رواية فارس عشقي

رواية فارس عشقي للكاتبة سحر فرج الفصل الخامس

لبست البورنس وخرجت من الحمام بسرعه ومسكت الموبيل بس للاسف طلعت سلمى هى اللى بترن .
همس بزعل ... افندم .. ده وقته يا ست سلمى .
سلمى ... ايه السلام الحلو ده اللى على الصبح .. بقى كده اجى المطار الاقيكى مشيتى ومستنتناش انا ورغد يا هانم .

همس .. معلش يا سلمى اصلك خرجتينى من الحمام وطلعت بسرعه علشان اشوف مين بيرن .
سلمى ... ومن امتى وانتى بتخرجى من الحمام طول ما انتى جوه .. ياااااما كنا بنرن عليكى وانتى بتخدى شور وتسبينا نرن و رن ونرن .. ايه اللى شقلب حالك يا صاحبتى للدرجه اللى تخليكى تتنازلى عن الشور بتاعك
همس .. يا لهوووى عليكى وعلى دماغك اللى بتفهمها وهى طايرة .

سلمى .. اوووبااا يعنى فى حاجه وشكى فى محله يا همس .. اعترفى بسرعه .
همس بضحكه عاليه ... الله يخربيتك يا سلمى ضحكتينى .. المهم اقفلى دلوقتى خلينى اكمل الشور بتاعى وانام شويه قبل ما تشرفوا انتى ورغد وجنه .. ماتتأخروش عليا .
سلمى .. ماشى يا عروسه .. حمام الهنا على قلبك .
همس .. عروسه اقفلى يا بت اقفلى كتك ضربه .

وفعلا قفلت همس الموبيل ودخلت علشان تكمل الشور بتاعها بس للاسف اول لما دخلت وقفلت الباب وقلعت البورنس .. سمعت الموبيل تانى بيرن .. بس المرة دى كان فارس عاوز يطمن عليها ويشوفها وصلت ولا لسه ويعتذر لها انه مجاش لها على المطار واستقبلها بنفسه .
لكن همس توقعت انها تكون سلمى تانى ونسيت تقولها حاجه او ترخم عليها تانى وحلفت ما هى خارجه تانى من الحمام .
فارس كان صحى من نومه واول حاجه عملها انه مسك الموبيل قبل حتى ما يغسل وشه علشان يكلم همس .. بس طبعا همس كانت فى الحمام ومردتش عليه .. وده اللى خلى فارس يزعل اكتر وتوقع انها ممكن تكون زعلت منه علشان مكلمهاش لحد دلوقتى .

فارس بيكلم نفسه وقال ... ردى يا همسى عاوز اسمع صوتك واطمن عليكى يا ... حبيبتى !
اه حبيبتى .. فعلا انا بدات احبك واحبك اوى اوى كمان .. لااااااا انا بعشقك يا همس .
امتى وازاى مش عارف .
كل اللى انا عارفه دلوقتى .. انى عاوز اخدك فى حضنى واعترفلك بحبى ده .
قام فارس وساب الموبيل على السرير ودخل الحمام وخد شور سريع وطلع لبس قميص وبنطلون وجذمه وحط البرفان بتاعه المميز وخد مفاتيح عربيته ونزل على تحت علشان يروح على الشركه .
همس كانت خرجت من الحمام ومن كتر تعبها اترمت على السرير بعد ما سرحت شعرها ورفعته ديل حصان لفوق ونامت فى سابع نومه حتى ما فكرتش انها تشوف مين اللى كان بيرن عليها وهى فى الحمام .

وبعد كذا ساعه .. ام همس كانت تقريبا خلصت كل حاجه تخص العيد ميلاد وكل التجهيزات .. واتصلت على رضوان فى مكتبه علشان كانت عاوزة شويه حاجات يطلبها من ادارة الفندق بخصوص الحفله .. ويأكد عليهم بخصوص عدد ادوار التورته .. والتورته الكبيرة اللى بصورة همس .. وحاجات تانى كتير تخص الحفله .
وفى مكان تانى خالص .. مكان يشبه الجنه .. بشجرها وزرعها وزهورها .. كانت همس واقفه وسرحانه فى البحر وجماله والمنظر الجميل وصوت العصافير .. وفجاه جه شخص من ضهرها وحضنها وبدأ يشم ريحه شعرها ويضمها ليه .وقال وحشتينى اوى اوى اوى يا همس .

همس غمضت عيونها وخدت نفس طويل وعرفت انه فارس من ريحه برفانه .
فالفت نفسها ليه واتاكدت انه هو حبيبها اللى بتعشقه وبتحبه .. فدفنت راسها فى صدره وضمته بأيديها .. لكن فارس رفع وشها بايده وبص فى عيونها وقرب منها اكتر ويلمس خدودها ولسه يا دوبك هايبوسها !
سلمى بصوت مرعب ... اصحى بقى يا بنتى .. كفايه نووووم .. مفيش وقت على الحفله وانتى كل ده نايمه .

همس فتحت عيونها .. وفضلت تبص حواليها .. وشافت اودمها سلمى ورغد وكمان جنه .. وعرفت انها كانت بتحلم بفارس .. وان ده كان مجرد حلم .. بس حلم ايه .. لذيذ وجت ست سلمى وصحتها من اجمل حلم هى حلمته .. وده اللى خلاها تقوم وتضرب سلمى بالخوداديه بتاعه السرير .
سلمى .. لا اله الا الله فى ايه يا بنتى .. هو انا عملت ايه لده كله يعنى .. الحق عليا انى صحيتك يعنى .
همس .. حرااااام عليكى .. كنتى سبينى اكمل الحلم .. ليه صحتينى ليه .

رغد .. اووووبا .. ليه يا همس .. كنتى بتحلمى ولا ايه .. اعترفى ؟
جنه .. ايه يا بنات فى ايه .. كلكم عليها ولا ايه .. قومى يا همس يا بنتى .. يالا مفيش وقت .. يا دوبك تغيرى وتلبسى فستانك . الحفله قربت خالص .
همس .. هى الساعه كام دلوقتى ؟
جنه .. الساعه اربعه .
همس .. يااااخبر .. كل ده نمته .. وجت علشان تمسك الموبيل علشان تشوف فارس رن عليها ولا لا .. بس للاسف الموبيل كان فاصل شحن .
من جواها زعلت بس طلبت من سلمى انها تحطه فى الشاحن عقبال ما هى تدخل الحمام وتتشطف .

وفعلا دخلت همس وخدت الشور بتاعها وخرجت وبدات البنات تساعدها فى لبسها العادى ومكياجها . لانها كان ليها سويت مخصوص فى الفندق علشان تلبس فيه لبس الحفله .. وفجاه الباب كان بيخبط .
همس سمحت للى بيخبط انه يدخل .
عمر دخل وسلم عليهم ورحب بيهم لانه كان فى شغله لما هما جم وطلعوا لهمس وقال .. ايه يا بنات كل ده .. الوقت اتاخر وكان لازم نروح من بدرى على الفندق .. ده حتى بابا وماما سبقوا على هناك .. وماما طلبت منى انى اقولك ..اودامكم اد ايه وتخلصوا علشان انا اللى هاوصلكم .

همس .. انا خلصت اهو يا عمر .. بس لو سمحت خد الفستان اللى فى العلبه ده وحطه فى العربيه عقبال لما نيجى وراك .
عمر عيونه على جنه اللى اتكسفت من نظراته ليها .. قال .. العلبه بس .. مفيش حد تانى عاوز ينزل معايا ولا ايه ؟
همس .. انزل يا عمر واخلص بدل ما اخلى سلمى اللى تنزل معاك .
عمر سلمى لاااااا انا نازل لوحدى .
سلمى ... يا نهارك منيل يا عمر .. مالها سلمى يا كابتن الكباتن انت .
عمر .. معلش يا اخ .. مش قصدى .

سلمى .. اخ ! .. انت بتشوف عادل كتير الايام دى الظاهر .
الكل كان بيضحك على كلام سلمى وعمر .. وبدؤا ينزلوا كلهم على تحت .. وراحوا لحد العربيه .. بس للاسف همس نسيت الموبيل فى اوضتها .. وعمر مرديش يرجع تانى علشان يجيبه .. ولا خلى همس تروح تجيبه .. وركبوا كلهم وراحوا على الفندق .
وصلوا الفندق وعمر راح على قاعه الحفله هو ورغد وجنه ووصلهم لحد تربيزه كبيرة . لكن سلمى وهمس طلعوا على السويت علشان همس تلبس فستانها وتضبط مكياجها .

فارس كان زهق من كتر الرنات اللى كان بيرنها على همس وبيلاقى الموبيل مغلق .. وبدا يقلق عليها اوى .. وقرر انه يتصل على سلمى وهى اللى هاطمنه عليها .
مسك الموبيل ورن على سلمى .. والموبيل كان عمال بيرن لان سلمى كانت ملخومه مع همس .. لحد ما قررت سلمى انها ترد .. واستغربت جدا لما شافت اسم المتصل.

سلمى باستغراب .. فارس !
همس اول لما سمعت اسمه دقات قلبها زات اوى وقربت من سلمى وقالت لها بتقولى مين .
سلمى بضحكه خبيثه .. فارس يا همس فارس
سلمى .. الووووو اهلا فارس .
فارس بصوت كله قلق .. ازيك يا سلمى .. اخبارك ايه طمنينى .. انتى فين دلوقتى ؟

سلمى .. ايه كل ده .. واحده واحده عليا يا استاذ انت .
اولا انا كويسه .. ثانيا الحمد لله بخير .. ثالثا انا مع همس فى الفندق علشان حفله عيد ميلادها .. انت مش جاى ولا ايه .
فارس اول لما سمع اسمها وانها فى الفندق اطمن .. وقال لها .. لا طبعا جاى .. انا اتصلت بيكى اصل عمال ارن على عادل مش بيرد عليا علشان نيجى مع بعض .
سلمى .. تلاقيه مش سامع الموبيل او فى الحمام . رن تانى واكيد هايرد عليك . وبشويه هزار و رخامه قالت .. مش عاوز حاجه ؟او عاوز تكلم حد ؟ وبتبص على همس اللى كانت واقفه وعامله زى الغرقانه.

فارس بجرأه .. ادينى همس اطمن عليها .
سلمى .. انت تؤمر يا فارس بيه خد معاك اهى .. وادت الموبيل لهمس اللى خبتطها على كتفها من كتر كسوفها والوضع اللى هى حتطها فيه .
همس برقتها المعتاده .. الوووو
فارس خد نفس طويييييل من اعماق صدره وقال ... يااااااااه اخيرا قدرت اسمع صوتك يا همسى .
همس .. ازيك يا فارس .
فارس .. عيون فارس وقلب فارس يا همس.. وحشتينى ووحشنى صوتك .
همس بقت عامله زى الفارولايه من كتر كسوفها وبالذات من سلمى اللى كانت واقفه جنبها زى عفريت العلبه .. ومش عارفه ترد تقول ايه .. لحد ما سلمى خدت بالها وقالت انها هاتدخل البلكونه شويه تغير جو وتشوف المنظر من فوووق .

فارس ... همس روحتى فين ؟
همس .. ابدا معاك .. اصل سلمى كانت جنبى ومش عارفه اقول حاجه .
فارس .. طب كنتى هاتقولى ايه ؟
همس .. لا مش هاقولك .
فارس .. علشان خاطرى كنتى هاتقولى ايه ؟
همس بكسوف .. وانت كمان وحشتنى .. وقفلت الموبيل من كتر الكسوف .
فارس فرح اوى اوى باللى همس قالته ..وحس انها بتبادله نفس مشاعره .. وقرر انه يقولها حقيقه مشاعره اول لما يشوفها .
سلمى كانت خرجت من البلكونه وشافت همس واقفه سرحانه وماسكه الموبيل .

سلمى ... ههههههههه ... هو اكيد حصل
همس .. بتقولى حاجه يا سلمى ؟
سلمى .. لا يا حبيبتى بقولك يالا بينا ننزل زمان الضيوف بدؤا يجوا والكل بيستعجلونا .. وكمان علشان تكونى فى استقبال فارس باشا بنفسك ولا ايه ؟
همس خبطتها على كتفها وضحكت .. وقالت .. اه منك انتى اه دايما فهمانى .. يالا يا ناصحه ننزل .. وهابقى احكيلك على كل حاجه بعد الحفله .. وايه رايك تيجى تباتى معايا النهارده علشان نتكلم براحتنا طول الليل .

سلمى .. شكل الموضوووووع كبييير اوى .. وانا موافقه .. يالا بينا .
وفعلا نزلت البنات على تحت . وكانت همس طالعه زى القمر ولابسه فستان احمر فى منتهى الروعه وشعرها مفرود على ضهرها ولابسه جذمه كعب عالى اوى .
اول لما دخلت همس كل العيون كانت عليها من كتر جمالها وحلاوتها .. فاقربت من باباها ومامتها .. وباستهم .. والكل بدا يهنيها بمناسبه عيد ميلادها .
عمر اللى كان قاعد ومش عاوز يشيل عيونه من على جنه .. وقرر انه ياخدها فى مكان هادى ويصارحها باعجابه بيها .

عدى حوالى ساعه واكتر الضيوف كانوا وصلوا . وفجاه دخل فهد ومعاه البودى جارد بتوعه وبلال كمان .. فقام رضوان من مكانه وقرب منه ورحب بيه .. وخده على تربيزة مخصوصه ليه وقعدوا .. وبعت عمر يجيب همس علشان فهد عاوز يسلم عليها ويديها هديته .
وفعلا عمر راح جاب همس اللى كانت عيونها على باب القاعه علشان تكون فى استقبال فارس .
راحت مع عمر وقربت من باباها وكان فهد مديها ضهره .

قام رضوان وقف وحضن همس وعرفها على فهد .
فهد كان بيتكلم مع بلال واتفاجاه بالقمر اللى ظهرت ليه فجاه ووقفت اودامه .
رضوان .. همس بنتى يا فهد بيه ..ايه رايك شوفت كبرت ازاى وبقت عروسه حلوة .
فهد بعيون كلها شهوة من جمال وحلاوة همس مد ايده ومسك اديها وباسها .. كبرت وبس .. ده بقت زى القمر .. هى دى همس البنت الصغيرة ام ضفاير معقوووول .. لاااااا دى احلوت اوى يا رضوان .. كنت مخبيها عنى فين دى .

همس استغربت اوى من كلام فهد ونظراته ليها فشدت اديها منه وطلبت انها تمشى علشان تتابع ضيوفها .
فهد بنظرات كلها اعجاب .. وهما ضيوفك احسن منى يا همس .. وبعدين مش لما تشوفى هديتى ليكى هاتعجبك ولا لا .
همس .. لا طبعا يا فهد بيه .
فهد يا دوبك بنظره لبلال .. خلت بلال يطلع علبه شيك اوى من جيبه واداها لفهد بيه .
فهد خدها من بلال وقرب من همس ومد ايده تانى ومسك اديها وباسها. ولسه كان عاوز يحضنها .. بعدت همس بسرعه عنه وبصت لباباها ولعمر اخوها .. فاستغرب فهد واداها العلبه .. وقال كل سنه وانتى طيبه يا برنسيسه .

همس خدت العلبه واستاذنت ومشيت وكانت عصبيه من الموقف اللى حصل ده .. وراحت ناحيه التربيزه اللى عليها سلمى وجنه ورغد وقعدت معاهم .
سلمى حست ان فى حاجه زعلت همس .. فاسألتها .. فى ايه همس مالك ؟.
همس بغضب ... انسان حيوان .
سلمى بصت لرغد وقالت .. هو مين ده اللى حيوان يا بنتى وزعل القمر كده ؟
همس .. خلاص يا سلمى بعدين هاقولك .. خلينا فى الحفله دلوقتى .
سلمى عيونها جت على الباب فجاه و بضحكه وغمزه لهمس قالت .. وانهى حفله اهم وصلووا اخيرا البهوات .

همس دقات قلبها بقت سريعه جدا جدا .. وكانت خايفه انها تلف تشوف مين اللى جه .. لانها كانت متاكده ان سلمى قصدها على عادل وفارس .
فارس وعادل شافوا البنات وقربوا من التربيزه بتاعتهم .
همس قامت وقفت ولفت نفسها ليهم .. وعيونها جت فى عيون فارس .. وكان نفسها فى اللحظه دى انها تترمى فى حضنه .. بسبب اللى حصل لها مع فهد .. بس طبعا مسكت نفسها ويادوبك مدت اديها ليه وسلمت عليه هو وعادل .
فارس عيونه ماتشلتش من على همس وحس ان فى عيونها حزن غريب .. فقرب منها وقال.. فى حاجه يا همس .
همس .. لا طبعا مفيش حاجه خالص .. اصل انا بتوتر من الدوشه والموسيقى العاليه .

فارس .. ماشى يا ستى ..على العموم كل سنه وانتى طيبه وعقبال مليون سنه .. وطلع علبه قطيفه صغيره من جيبه واداها لهمس .
همس شكرته وفتحت العلبه اللى كان فيها سلسله صغيرة ورقيقه جدا جدا بحروف اسمها بس مش همس .. كانت ( همسى )
عجبت همس جدا جدا .. وسلمى طلبت انها تشوفها .. بس همس ما رديتش توريها لحد خالص وحطتها على طول فى شنتطها .
وقعد عادل وفارس معاهم .

عادل عينه كانت على طول على رغد . اللى هربت من عيونه اول لما الموسيقى والاغانى بدات و قامت همس والبنات والشباب كلها بما فيهم عادل وبدؤا يرقصوا .
لكن فارس فضل مكانه على التربيزه يراقب همس بعيونه وهى بترقص وتغنى مع اصحابها .
عادل بعد شويه راح جاب فارس علشان يكون معاهم وبدا فارس يندمج معاهم .. والموسيقى قلبت على سلوووووو وفارس مسك ايد همس ورقصوا مع بعض .
عادل طلب من رغد انه يرقص معاها بس هى رفضت فى الاول وبعد محاولات كتير وافقت .

عمر هو كمان طلب من جنه اللى كانت مكسوفه جدا بس بعد ما رغد وافقت انها ترقص مع عادل وافقت هى كمان انها ترقص مع عمر .
سلمى كانت واقفه تندب حظها .. وكانت تتمنى ان شريف يكون موجود فى اللحظه دى وترقص معاه .. ويادوبك بتلف نفسها شافت شريف واقف وبيبص على همس وعلى فارس وهما مع بعض .
سلمى طبعا فهمت النظرة دى معناها ايه .. فقربت منه وبهزار . انت جيت .. ده انا مستنياك من بدرى علشان ارقص معاك يا كابتن شريف ..
شريف .. ماشى يا سلمى .. تعالى نرقص .. وبعدين ابقى اسلم على همس واهنيها واديها هديتها .. بس قوليلى مين اللى هى بترقص معاه ده ؟
سلمى .. ده فارس الحسن لو سمعت عنه صاحب عادل اخويا .. وهو وهمس صحاب .

شريف .. فارس الحسن .. اه طبعا اسمع عنه .
يالا بينا نرقص .
فارس كان مندمج هو وهمس جدا على الموسيقى الرومانسيه الهاديه اللى كانت شغاله وكانوا فى دنيا تانيه خالص .
لحد ما راح عمر لما شاف منظرهم ده وقرب من همس وقال .. مش تعرفينا يا هموسه
همس فاقت من اللى هى فيه على صوت عمر ..وقالت .. ده فارس صاحب عادل اخوا سلمى يا عمر .
وده عمر اخويا يا فارس .
الشباب سلموا على بعض .. وعمر رحب بيه .. وطلب من همس انها تستعد علشان هايطفوا الشمع .. وفعلا الكل راح على التربيزه الكبيرة اللى عليها التورته .
لكن فارس حب انه يروح يقعد مكانه وفجاه عينه جت على تربيزة تانيه خالص واتفاجاه باللى قاعد عليها .

رواية فارس عشقي للكاتبة سحر فرج الفصل السادس

الكل راح على التربيزه علشان يطفوا الشمع .. لكن فارس رجع قعد مكانه ومرديش يقف معاهم .
بس عيونه كانت على همس ونظراته كلها ليها ولعيونها ورقتها وجمالها اللى بيعشقه.
بس فجاه عينه جت على شخص معين كان قاعد على تربيزه بعيده شويه عنه وواقف جنبه البودى جارد بتوعه .. واتصدم لوجوده هنا وفى المكان ده وبالذات كمان فى عيد ميلاد همس .

فهد الجبالى ... ! ؟
فارس لنفسه و بنظرات كلها كره وحقد ... ايه اللى جاب الحيوان ده هنا .
يا ترى ايه علاقته بهمس او بعيلتها علشان يجى ويحضر عيد ميلادها .
وبعد شويه قربت منه همس وقعدت على نفس التربيزه اللى قاعد عليها فارس اللى كان فى عالم تانى خالص .. وبهدوء قالت .
همس برقه .. نحن هنا .. يا ترى سرحان في يا استاذ فارس .

فارس انتبه لصوت همس .. لكن للاسف كانت نظراته كلها عباره عن علامه استفهام كبيرة .
فارس ... عيونه جت فى عيون همس وقال .. انتى تعرفى فهد الجبالى منين ؟
همس .. فهد الجبالى مين ؟ انا معرفش حد بالاسم ده .

فارس .. اللى هو ازاى يعنى .. اومال موجود فى عيد ميلادك ازاى يا همس .
همس .. انت قصدك على مين بالضبط يا فارس بجد انا مش عارفه تقصد مين .
فارس وجه عيونه ونظراته كلها على تربيزة فهد وقالها ... الحيوان اللى قاعد هناك وكلابه بيحرسوه هناك ده .
همس وشها احمر جدا وافتكرت لحظه تعارفها بفهد وقله ذوقه ونظراته الشهوانيه ليها ومعرفتش تنطق ولا كلمه .
فارس .. سكتى ليه .. تعرفيه ولا لا يا همس .

همس بكل هدوء .. ايوا اعرفه من شويه بابا عرفنى عليه وقالى انه فهد وبيكون زبون عنده فى المكتب .. لان بابا محامى كبير واكيد انت عارف كده .. واكيد هايكون ليه علاقات بناس كتير جدا زى الانسان الحقير ده .
فارس استغرب اوى من اخر كلمتين همس قالتهم وقال .. حقير
طب كويس انك عارفه انه حقير من خلال الدقايق اللى باباكى عرفك عليه .
الانسان ده اكبر اعداء شركه الحسن فى السوق .. انسان فعلا حقير وكل شغله قذر وعلاقاته كلها مشبوهه .
همس .. انا فعلا مستريحتش ليه خالص ولا لنظراته .

فارس بغيره واضحه ووشه بقى شخص تانى خالص .. ولسه هايقف ... اوعى يكون عملك حاجه تدايقك او تزعلك .. انا اروح اموته واقطعه حتت .. قوليلى يا همس .. حاول يعملك او يقولك حاجه زعلتك .
همس... اهدى يا فارس مفيش اى حاجه حصلت .. مفيش حاجه بجد .
وبعدين انت زعلت كده ليه من كلامى .
فارس احم ... لا ابدا .
همس .. متأكد .
فارس من ورا قلبه .. اه متأكد.

وفى وسط ثوران فارس وغضبه وغيرته جه عادل وسلمى وباقى البنات .. بس عادل لاحظ على فارس الحاله اللى هو فيها .. فقرب منه وسأله بشويش علشان ماحدش ياخد باله ... مالك يا صاحبى ايه اللى وصلك لكده ... وشكلك عامل كده ليه ؟ فى ايه يا فارس ؟
فارس كانت كل عيونه على فهد .. وعادل لف نفسه فى نفس اتجاه نظرات فارس واتصدم اول لما شاف فهد هو كمان .
عادل .. ياااااا حلاوة .. فهد الجبالى بجلاله قدره .

وللاسف الشديد فهد هو كمان شاف فارس ومن واقحته قام وراح ناحيته .. واول لما اتحرك من مكانه راح معاه طبعا .. البودى جارد وبلال .
فهد بضحكه صفرا وغل ... فارس الحسن
فارس بقوه ... اهلا فهد الجبالى .
همس كانت واقفه واعصابها بدات تتوتر من نظرات فهد وفارس لبعضهم .. وحاولت انها تهدى الموقف بس للاسف عكته اكتر واكتر .
همس قربت من فهد ومن فارس وحاولت تكون بينهم .
همس لفهد ... اهلا فهد بيه .. احب اعرفك بفارس وعادل اصدقائى .

فهد .. اه طبها عارفه وهل يخفى القمر .. ده فارس الحسن .. وريث عائله الحسن .
ومن قله ادبه وسفالته قرب اكتر من همس وحط ايده فى وسطها .
همس اتصدمت من القذاره اللى هو عملها دى .. وعيونها بسرعه جت فى عيون فارس اللى كانت بطلع ناااااااار .
همس بعدت عنه وقالتله لو سمحت يا فهد بيه .. انا مسمحلكش .
فارس قرب من فهد ومسكه من جاكيت بدلته وقاله .. ايدك لو اتمدت عليها تانى انا هاقطعهالك انت فاهم .
البودى جارد كانوا عاوزين يمسكه فارس .. بس بنظره من فهد ليهم بعده عنه .

همس حاولت تبعد فارس وتهديه .. وجه عمر وباباها وسألوا .. فى ايه يا جماعه ايه اللى بيحصل هنا .
فهد ... ابدا يا رضوان .. بس انا زعلان منك .. مش تقولى انك عازم فارس الحسن فى عيد ميلاد البرنسيسه همس .
فارس كان ماسك نفسه بالعافيه لانه اول مرة يتقابل برضوان .. بس للاسف رضوان رد على فهد وقال .
فين فارس الحسن ده .. انا معزمتش حد بالاسم ده .
همس .. فارس ضيفى يا بابا وانا اللى عزمته .. ووقفت جنب فارس ومسكت ايده وقالت .. احب اعرفك على فارس الحسن يا بابا .
رضوان برخامه .. اهلا فارس بيه .

فارس حس انه لو فضل اكتر من كده ممكن يعمل كارثه .. فطلب من عادل انهم يمشوا .
وطبعا عادل فهم الوضع اللى هو فيه .
فاسلمى ورغد بصوا لعادل وفهموا هو عاوز يقول ايه من غير ما يطلب .
فارس مد ايده و سلم على همس .
همس اعتذرتله على الموقف ده وعلى اى حاجه زعلته .

بس فارس عمل نفسه انه مش سامع اى حاجه ومد ايده وسلم على عمر واستاذن وخرج على طول من غير حتى ما يدى همس انها تقول اى كلمه تانى .
همس من جواها حست بشرخ كبير فى قلبها وحزن من نظرات فارس ليها اللى كلها اتهام بس بسبب ايه هى مش عارفه .
فاخرج فارس وعادل والبنات وكان الكل متوتر واعصابهم كلهم بايظه من الموقف اللى حصل .
عادل خد سلمى والبنات فى عربيته وراح علشان يوصل رغد واختها .. وكانوا طول الطريق نفسهم يعرفوا ايه بالضبط اللى حصل ومين فهد ده .
بس عادل كانت دماغه كلها فى صاحبه وصديق طفولته وعمره فارس .. ولانه اول مرة يشوفه بالمنظر ده .. ولانه كمان عارف كره فارس لفهد الجبالى اد ايه .
وطول الطريق حاول يتصل عليه بس للاسف فارس مش بيرد على الموبيل خالص .

سلمى .. مين ده يا عادل .. وايه اللى بينه وبين فارس بالضبط .
عادل .. مش وقته خالص يا سلمى .. ده موضوع كبير ومن زمان اوى بينهم .. بعدين اقولك .. المهم دلوقتى فارس .. انا هاوصلكم واحاول اوصله واشوف هو فين واروحله علشان اكون معاه فى الموقف ده .
سلمى بصت لرغد اللى كانت ساكته خالص بس كانت بتابع كل اللى بيحصل حاوليها ومن حاله عادل وتوتره ما نطقتش ولا كلمه .
وفى عربيه فارس اللى كان سايق زى الصاروخ ومش هامه السرعه الجنونيه اللى كان ماشى عليها .. موبيله كان عمال بيرن من همس ومن عادل .. وهو كان فى عالم تانى خالص ورجع بالذاكرة لورا من اول مره سمع فيها عن فهد الجبالى وعن شغله المشبوه ومحاولاته اكتر من مره انه يوقع ابوا فارس وفارس ويخلص عليهم علشان يستولى هو على السووووق كله .

وعن صندوق المخدرات اللى حطه فى الشحنه اللى كانت جايه من بره باسم ابوا فارس للشركه وفهد بلغ عليها واتقبض على ابوا فارس واتحقق معاه وفضل حوالى اسبوع محبوس لحد ما المحامى قدر يخرجه بعد اجراء تحاليل وثبت ان المخدرات دى بودرة اطفال .
وافظع حاجه افتكرها.. لما اكتشف فارس ان فهد الجبالى كان السبب الرئيسى فى موت اخوه الوحيد اسلام .. اللى كان اكبر منه بخمس سنين وهو كان دراع ابوه اليمين فى الشغل .. لان فارس كان ساعتها بيدرس فى الجامعه .. وللاسف مفيش اى دليل يثبت ان فهد له علاقه بموت اسلام .. بس كل اصابع الاتهام كانت عليه هو لانه عدوهم الوحيد فى السوق .

وعدت السنين و بسبب ذكاءه ودهاءه وشاطرته قدر انه يوصل فارس ويكون فارس الحسن وريث شركات الحسن .
وقلب الصوره واصبح هو الشبح بالنسبه لفهد اللى بيهدد دايما شغله ومجموعه شركاته .
وكان دايما فارس يشوف صوره ولقاءاته التلفزيونيه لكن دى كانت اول مرة يتواجهوا مع بعض .
فارس فضل راكب عربيته ومش عارف هو رايح فين ولا راح لفين .. ووصل اودام كافيه صغير على النيل وركن عربيته ونزل ودخل الكافيه .
عدى اكتر من حوالى ساعتين وكل ده وهمس بتحاول انها تتصل على فارس .. اللى كان قاعد كل الوقت ده فى الكافيه وشرب اكتر من اربع فناجين قهوة .
لحد ما قرر انه يرد عليها ويشوف هى عاوزة ايه .

فارس من غير اى مقدمات ... نعم عاوزة ايه ؟
همس .. اخيرا يا فارس رديت .. وانا كل ده بحاول انى اطمن عليك .
فارس .. وتطمنى عليا ليه يا همس .
همس .. فى ايه يا فارس .. مالك بتكلمنى كده ليه .
فارس .. عاوزة منى ايه يا همس .
همس ... عاوزة اطمن عليك .. واعتذرلك مرة تانيه على اللى حصل فى الحفله.
فارس برخامه .. خلصتى كلامك .
همس بتعجب ! اه يا فارس .

فارس .. طب سلام .. وقفل الموبيل على طول من غير حتى ما يديها فرصه انها ترد عليه .
همس قفلت الموبيل واتخنقت بالعياط واستغربت جدا من تغير طريقه فارس ليها وحست ان فيه حاجه كبيره بينه وبين فهد ده .. وفضلت تعيط اوى لحد ما تعبت من كتر العياط وراحت فى النوم .
فارس فضل قاعد لوحده تانى لحد ما عادل رن عليه وسأله على مكانه وراح قعد معاه شويه وشرب معاه قهوة .
عادل .. فى ايه يا صاحبى .. ايه اللى وصلك لكده .. كل ده علشان شوفت الزفت فهد ده .
فارس .. يعنى مش عارف مين هو فهد الجبالى يا عادل وعمل لعيلتى ايه .

عادل .. عارف يا ابنى .. بس مكنش ليه لازمه تنسحب من اودامه كده .. وتخلى الساحه ليه .. انت كنت ضيف زيك زيه بالضبط .
فارس .. مقدرتش اتحكم فى نفسى يا عادل لما شوفته اودامى .. والذكريات كلها بقت اودام عيونى .. وبالذات لما شوفته بيعامل همس ازاى .
عادل باستغراب .. اوووووباااا همس .
فارس .. والله هى مش نقصاك .. ولا ناقصه رخامتك يا عادل دلوقتى .

عادل .. لا انا مش متحرك من هنا لما تقولى فيه ايه بالضبط وحكايتك ايه مع همس .. انت مش على بعضك من ساعه ما شوفتها. فى ايه يا صاحبى بالضبط احكيلى.
فارس ... مش وقته يا زفت انت انا فى ايه ولا ايه .. ويالا بينا علشان نمشى .ورانا شغل كتير الصبح .
عادل .. ماشى يا معلم .. لينا قاعده تانى وتحكيلى على كل حاجه انا مش هاضغط عليك .
وقاموا و حاسب فارس على القهوة وخرج هو وعادل و راح على عربيته ورجع على فيلته وطلع على اوضته .

قلع بدلته ودخل خد شور وهو تحت الدوش الساقع واقف و فضل يفتكر كل اللى حصل فى الحفله لحد ما همس كلمته وعرف اد ايه هو كان رخم معاها وهى اكيد ملهاش ذنب لكل اللى بينه وبين فهد .. وقرر ان اول لما النهار هايطلع هايتصل بيها ويعتذر لها .. وبعد شويه خرج وكان لابس تيشيرت كت وشورت ودخل البلكونه وفضل قاعد فيها لحد ما راح فى النوم وهو قاعد لحد الشمس ما طلعت عليه .

همس كانت قامت من بدرى علشان تروح على شغلها .. وفعلا كانت خلصت لبسها وخدت شنتطها ومفاتيح العربيه ونزلت على تحت .
اول لما نزلت كانت مامتها على السفرة هى وباباها بيفطروا فراحت وسلمت عليهم .
الام .. اهلا يا حبيبه قلبى .. اقعدى افطرى معانا .
همس .. ماليش نفس يا ماما .. هابقى اخد اى حاجه فى الشغل .
الاب ... تعرفى فارس ده من امتى يا همس وايه علاقتك بيه بالضبط .

همس لباباها .. فارس صديقى يا بابا واتعرفت عليه من فتره صغيره .
الاب .. ياريت تقطعى علاقتك بيه يا همس ومتعرفهوش تانى .
همس باستغراب من كلام ابوها .. ليه يا بابا بتقول كده ومن امتى انت بتدخل فى صحابى واصدقائى .
رضوان .. هى كلمه يا همس ومش هاعيدها تانى .. فارس اكبر عدو لفهد بيه فى السوق .. وانا مش عاوز اخسر فهد الجبالى علشان استاذ فارس ده .. فهد الجبالى اكبر زبوووون فى المكتب عندى واعرفه من سنين طويله .

همس .. وانا مالى ومال فهد ده .. ده انسان قليل الذوق وانا لولا حضرتك امبارح كان هايبقى ليا معاه تصرف تانى خالص .. عن اذنكم .. انا لازم اروح على الشغل دلوقتى .. واعتبرنى ما سمعتش حاجه يا بابا علشان فارس الحسن ده صديقى ومش هابعد عنه علشان فهد الجبالى ده .. سلاااااام .
الاب ... طول عمرك دماغك ناشفه يا همس .. وتعبتينى معاكى .. انا مش اد فهد الجبالى .
كل ده وهمس كانت خرجت على بره وركبت عربيتها وراحت على المطار ...

رواية فارس عشقي للكاتبة سحر فرج الفصل السابع

وصلت همس اودام باب المطار وركنت عربيتها ويادوبك لسه هاتنزل شافت اللى واقف اودامها .
فلاش باااااك
فهد ... عاوزك تجبلى كل حاجه عنها

بتروح فين ؟ وبتاكل ايه ؟وتشرب ايه ؟ وبتحب ايه؟ وتكره ايه ؟ كل ثانيه بتقضيها فى حياتها بتعمل فيها ايه .
وبالخصوص تعرف ايه علاقتها بالضبط بفارس الحسن .. وهو ايه علاقته بيها ويعرفوا بعض من امتى .
كل ده عاوز اعرفه قبل ما يطلع النهار ..

انت فااااهم يا بلال .. ولا اشوف حد غيرك من الرجاله .
بلال .. بس يا فهد بيه مش شايف حضرتك ان مفيش وقت لده كله .. ده كلها كام ساعه والنهار هايطلع .
فهد بغضب ... نفذ اللى قولت عليه بالحرف الواحد يا بلال .. انت فاااااهم .
بلال بخوف .. انا تحت امرك يا فهد باشا .. وكل اللى سياتك امرت بيه هايتنفذ ويكون عند حضرتك قبل ما النهار يطلع .

باااااااك .
فهد كان وصل للمطار قبل ما همس توصل .. بعد ما بلغه بلال بكل تحركاتها وكل الاسئله اللى فهد كان عاوز يعرف اجابتها .. ومواعيد شغلها وكل حاجه عنها .. علشان كده قرر انه يروح لها المطار ويفاجأها .
همس اتصدمت اول لما شافته .. واستغربت جدا انه واقف اودامها .
بس بينها وبين نفسها قررت انها تمشى من غير حتى ما تسلم عليه .. لانها مش مستريحاله خالص وبالذات لنظراته الشهوانيه ليها طول الحفله . وفعلا مشيت ودخلت على طول على جوا .

فهد الحركه دى عجبته اكتر .. وشدته ليها اكتر .. وقال .. هاتروحى منى فين يا حلوة وللاسف دخل وراها وسال على مكتبها .
فارس كل ده وكان نايم فى البلكونه ... واتفاجاه بوالدته وهى بتصحيه .. اللى استغربت جدا انه نايم بالمنظر ده .
الام ... صباح الخير يا ابنى .
ايه يا فارس اللى منومك كده يا حبيبى.. معقول طول الليل وانت نايم هنا كده .
فارس بصوت كله نعاس .. صباح الخير يا ست الكل ... لا ابدا اصل انا رجعت متاخر بالليل وفضلت سهران هنا والظاهر راحت عليا نومه وانا قاعد .
الام ... ماشى يا حبيبى .. فوق كده وخدلك دوش عقبال ما اخلى الشغالين يجهزوا الفطار واشوف باباك لبس ولا لسه .

فارس .. حاضر يا امى .. هاخلص وانزل على طول .. بس معلش ما تعمليش حسابى فى الفطار ماليش نفس .
الام ... ليه بس يا فارس .. انت مش عجبنى خالص الايام دى .. على طول سرحان كده ومش على بعضك بقالك فترة .
فارس .. ابدا مفيش حاجه .. الشغل كتير الايام دى فى الشركه بسبب المناقصه الجديده .. وزى ما انتى عارفه انا اللى شايل الحمل كله لوحدى .
الام .. ربنا يعينك يا حبيبى .. يالا قوم اتشطف وانا هانزل على تحت واشوف باباك .

فارس ... ماشى .
وفعلا قام فارس ومسك موبيله على امل ان همس تكون كلمته .. بس ملقاش حاجه . و افتكر انه كان رخم اوى معاها اخر مرة .. واستحاله انها هاتسامحه .. فمسك الموبيل ورماه على السرير .
دخل على الحمام وخد شور سريع ولبس قميص لبنى وبنطلون جينز وخد مفاتيح عربيته وموبيله ونزل على تحت .
وفى المطار
فهد كان وصل لمكتب همس وطلب من بلال والبودى جارد انهم يستنوه بره .

ومن غير استئذان فتح الباب ودخل على طول .. وده اللى خلى البنات .. همس وسلمى يتفاجؤا بيه اودامهم .
همس بغضب ... ايه ده .. انت ازاى تدخل كده من غير استئذان ؟
فهد بكل برود قااال .. استئذان .. و بضحكه كلها سخريه ونظرات شهوة لهمس قاااال ... انا فهد الجبالى .. ومفيش حاجه تقف اودامى .. ومفيش حاجه اسمها استئذان عندى ياااااا قطه .
همس بغضب ... لو سمحت اطلع بره .. بدل ما انده الامن يطلعوك بره .
وكل ده وسلمى واقفه مرعوبه من منظره وطريقه كلامه .

فهد بضحكه عاليه جدا شد كرسى وقعد وحط رجل على رجل وولع السيجار بتاعه وقال .. وانا اهو اودامك .. واعملى اللى انتى عوزاه يا حلوة .
همس .. لو سمحت ارجوك اطلع بره .. هاتصل بى بابا واقوله على كل اللى حضرتك بتعمله ده .
فهد ... اتصلى يا قطه وانا قاعد مستنى رضوان لما اشوف هايعمل معايا ايه .
همس .. لاااااا انت الظاهر عليك مجنون .. انت عاوز منى ايه .. انا هاطلب الامن هنا فورا.
فهد قام وقف وقرب منها جدا .. جدا .. وانفاسه كانت فى وش همس على طول وقال .. عاوزك انتى يا حلوة .
ولف نفسه ليها وسابها مصدومه من كلامه هى وسلمى .. وفتح الباب ومشى .

سلمى بكل خوف وتوتر ... ايه الراجل ده يا همس.. وعاوز منك ايه بالضبط .. انا شويه كمان وكنت هاعملها على نفسى من كتر خوفى منه ومن منظره ونظراته الزباله ليكى .. انتى لازم توقفيه عند حده واحكى لباباكى كل اللى هو عمله وقاله ده .
همس كانت لسه مش مستوعبه اللى حصل واللى فهد قاله .. لحد ما فاقت على صوت سلمى وهى بتفوقها من اللى هى كانت فيه وسرحانها فى الكلام اللى حصل .
همس .. انتى بتقولى حاجه يا سلمى .

سلمى .. نعم .. انتى روحتى فين.. وانا عماله اكلمك .. الراجل ده اكيد مجنون وعاوز حد يوقفه عند حده .. ولازم تقولى لابوكى كل اللى حصل .. وبالذات كلمه .. انا عاوزك دى .
همس ... انا هاقدر اوقفه عند حده .. هو فاكر نفسه مين بالضبط.. اذا كان هو فهد الجبالى .. انا بكون همس رضوان .
سلمى .. انتى مش اد الاشكال دى يا همس .. الراجل ده اكيد مجنون .. وشكل كلامه وطريقته ونظراته ليكى تخوف .. انا خايفه عليكى يا حبيبتى .
همس .. متخافيش عليا يا سلمى انا ادها وادود . واهم حاجه متجبيش سيره اودام عادل ولا فارس بالذات .. مش عاوزة اسبب ليهم اى مشكله واديكى شوفتى فارس كان عامل اذاى امبارح اول لما شاف فهد فى الحفله .

سلمى . عندك حق يا همس .. بس اكيد فيه حاجه غريبه بين فهد وبين فارس .. وهى اللى وصلت فارس لكده امبارح اول لما شاف فهد ده فى الحفله .
همس .. اقولك على حاجه بس متجبيش سيره لحد .
سلمى .. قولى .
همس .. احلفى انا عرفاكى وعارفه لسانك مش بيتبل فيه فوله .
سلمى .. لا المرة دى مش هاقول لحد صدقينى .
همس .. انا كلمت فارس امبارح علشان اعتذرله على اللى حصل فى الحفله واطمن عليه . بعد ما رنيت كذا مرة وهو مش بيرد عليا .. وفى الاخر رد .. وكان بيكلمنى بطريقه وحشه جدا وكانت دى اول مرة بيكلمنى بالمنظر ده .
سلمى اول مرة ! هو انتم بتتكلموا على طول ولا ايه يا حلوة من ورايا .
همس بخجل يعنى مش دايما وبعدين هابقى احكيلك على كل حاجه .. خلينا بس فى الزفت اللى اسمه فهد ده .. وقوليلى اهبب معاه ايه .
سلمى ... وحياتك يا اختى مش عارفه .. بس بينى وبينك كده انا قلقانه من حاجه وخايفه لا يحطك فى دماغه ويكون عاوز منك حاجه كده ولا كده .. لان نظراته ليكى مش مريحه وزباله جدا .
همس بخوف اكتر .. انتى تقصدى ايه يعنى .
سلمى .. مش عارفه والله يا همس .. هو ده اللى حسيته من شكله ومنظره ليكى .. الراجل ده شكله كده عاوزك .
همس بخوف وتوتر اكتر .. يعنى ايه عاوزك دى .. ما تنطقى يا سلمى متوقعيش قلبى .
سلمى ... شكله معجب بيكى اوى وعاوزك ليه . وبصراحه كده عاوز قله ادب
همس ... عاااااااااااااااااااااا

سلمى .. اهدى يا بت انتى هاتفضحينا فى الشغل والمطار كله هنلاقيه هنا دلوقتى فى المكتب .
وفجاه دخلت رغد اللى كانت لسه يا دوبك جايه من البيت وبتستعد للرحله اللى هاتروحها لباريس .
بس استغربت من منظر سلمى وهمس اللى بيقول ان فى حاجه حصلت تانى غير موضوع حفله امبارح .
رغد ... صباح الخير يا بنات .. خير مالكم عاملين كده ليه .

سلمى بابتسامه مزيفه حاولت تخبى توترها .. صباح النور يا ستى .. مفيش حاجه يا رغد هايكون فى ايه يعنى غير الموضوع بتاع الحفله امبارح .. ده انا لسه كنت بتكلم فيه انا وهمس .. مش كده يا همس .
همس بحزن .. كده يا سلمى .. عن اذنكم هاروح اشوف ميعاد الرحله بتاعه بكره امتى ونتكلم بعدين .
ولسه يا دوبك خارجه من باب المكتب كان شريف وصل هو كمان علشان كان طالع على رحله لندن اللى هاتقوم كمان نصف ساعه وفرح اوى انه شاف همس .

شريف ... اهلا
ازيك يا همس اخبارك ايه ؟
همس .. الحمد لله يا شريف بعد اذنك .. ومشيت وسابته .
شريف استغرب جدا من همس ومن شكلها .. ودخل على جوا .
سلمى اول لما شافت شريف خدت نفس كبير وفرحت جدا انه وصل .
شريف .. ازيكم يا بنات .. مالها همس .. هو فى حاجه ولا ايه .. خارجه بسرعه وشكلها مدايق من حاجه .

سلمى غمذت لرغد بعنيها وقالت .. ابدا يا شريف هايكون فى ايه يعنى .. هى تلاقيها تعبانه من حفله امبارح .. واكيد ملحقتش تستريح ونام .. وانت عارف ان الاجازات ممنوعه عندنا الايام دى علشان ده موسم للرحلات .
شريف ... ايوا فعلا . بس لو كانت طلبت اجازة كنت انا كلمتلها المدير انتم عارفين انه صديق والدى .

سلمى .. لاااا على ايه بس .. هى شويه كده وهاتكون كويسه من اللى هى فيه .. انت اخبارك ايه .. وعرفت انى هاكون معاك على رحله ايطاليا انا ورغد الاسبوع الجاى .
شريف .. اه عرفت دلوقتى وانا فى مكتب المدير .. بس كان نفسى اطلع على رحله نيويورك مع همس .. بس قالى ان احمد هو اللى هايطلع هو ومريم وهمس .
سلمى بحزن ووجع فى قلبها ومالها ايطاليا يعنى يا استاذ شريف ؟
شريف ... ابدا مفيش بس بقالى كتير جدا مطلعتش مع همس على نفس الرحله .

فارس كان ركب عربيته ووصل للشركه والكل كان بيرحب بيه .. وهو يا دوبك بيبتسم ابتسامه بسيطه وبنظره بعيونه كانت بتكفى للرد عليهم .
وصل مكتبه ودخل واول لما قعد طلب من السكرتيرة انها تعمله فنجان قهوة كبير .
مسك فارس موبيله وطلب رقم همس .. وفصل يرن كتير بس هى مش بترد .
همس كانت فى مكتب المدير وكانت سايبه الموبيل فى شنتطها فى المكتب التانى .. وما عرفتش ان فارس فضل يرن عليها اكتر من عشر مرات علشان يعتذر لها عن طريقه كلامه ليها باليل .

فضل ينفخ اد كده من كتر غيظه علشان مش بترد عليه . ومسك الموبيل ورزعه على المكتب .
ورجع مسكه تانى بعد ما قرر انه يبعت لها رساله وقال فيها ؟
( صباح الخير
انا عارف انك زعلانه منى .. وحبيت اعتذرلك عن طريقه كلامى معاكى امبارح . وياريت تسامحينى .. وتسمحيلى انى اقعد فى اى مكان انا وانتى وافهمك على كل حاجه .. لو سمحتى يا همسى ).

الباب اتفتح فجاه ودخل عادل عليه وشافه بالمنظر ده وتوقع ان منظره كده من اللى حصل امبارح .
عادل .. يا فتاح يا عليم .. مالك يا صاحبى شايل طاجن ستك كده ليه على الصبح؟
فارس ... بقولك ايه انا مش فايقلك على الصبح وعفاريت الدنيا كلها بتتنطت اودامى . سيبنى لوحدى وروح على مكتبك دلوقتى يا عادل .
عادل .. فى ايه طيب احكيلى .

فارس .. قولتلك مش وقته .. واتفضل دلوقتى .
عادل ما حبش يتقل عليه لانه اكتر واحد عارف فارس لما يكون زعلان ومدايق من حاجه مش بيحب يحكى . فخد بعضه وخرج من مكتب فارس وراح على مكتبه .
همس كانت وصلت لمكتبها ورغد بلغتها ان الموبيل كان بيرن كتير جدا .
فامسكت شنتطها وطلعت الموبيل .. وعرفت ان فارس رن اكتر من عشر مرات وشافت فى رساله كمان منه .
فافتحتها وقرتها وفرحت اوى اوى انه حاول يصالحها .

رغد .. خير يا همس فى حاجه ولا ايه .
همس .. لا ابدا مفيش .. هى سلمى راحت فين ؟
رغد .. دخلت الحمام من شويه .. وانا هاوصل لحد المدير لما اشوف نظام الرحلات ايه الاسبوع الجاى .
همس تمام .. واستنت لما رغد خرجت من المكتب وقفلت وراها الباب ومسكت الموبيل واتصلت على فاااااارس .
فارس كان عصبى اوى .. وكان رايح جاى فى المكتب مستنى رد همس على رسالته وفجاه سمع الموبيل بيرن فجرى بسرعه ناحيه المكتب ومسك الموبيل وفرح جدا اول لما شاف اسم همس على شاشه الموبيل .

فارس بلهفه ... الوووووو
همس برقه ... صباح الخير يا فارس .
فارس ... صباح الفل يا عيون فارس .
همس بخجل ... احم . احم انا زعلانه منك ومكنتش هارد عليك ولا كنت هاكلمك تانى .. بس حبيت اعرفك ان الموبيل كان فى الشنطه وانا كنت عند المدير وسايبه الشنطه على مكتبى .. علشان تعرف بس انى مش قليله الذوق .

فارس .. ومين قال كده بس .. انا الصراحه زعلت جدا لما مردتيش عليا واتاكدت انك زعلانه من طريقتى معاكى امبارح .. وحبيت اقولك انى اسف .. وياريت تقبلى اننا نتقابل النهارده على العشاء .. اكون سعيد جدا . وبالمرة عاوز احكيلك واقولك حاجات كتيييير اوى يا همس .
همس معرفتش تقول ايه وكانت متردده توافق ولا لا على موضوع العشاء ده وسكتت .
فارس لاحظ سكوتها فقال .. همس لو سمحتى وافقى انا محتاجك اوى اوى يا همس . محتاج احكيلك واقولك على حاجات كتير جوايا .
همس قلبها رق ليه وقالت .. انا موافقه يا فارس .

فارس مكنش مصدق اللى همس قالته ... بجد يا همس موافقه .
همس .. بجد يا فارس .
فارس ... يااااااااه قلب فارس وعيون فارس يا همس .
همس بكسوف .. سلام بقى علشان ورايا شغل كتير قبل رحله بكرة.
فارس ... لاااا استنى .. اعدى عليكى فى الفيلا الساعه سبعه .

همس ... لاااا لااا ابعتلى الابلكيشن وانا اجيلك على هناك .
فارس .. تمام اتفقنا .. سلام يا عمرى .
همس .. سلام يا ... ؟
فارس .. قولى يا همس .
همس .. سلام يا فاااارس.