رواية هو والجميلات

رواية هو والجميلات الجزء الأول للكاتبة سحر فرج الفصل الثاني

وبعد شويه كانوا التلاته نازلين من البيت ولسه يا دوبك هايخرجوا من الباب اتفاجات نور من اللى شافته
كان يوسف واقف بعربيته اودام الباب ومستنيهم ينزلوا من بدرى.
نور: يوسف انت بتعمل ايه عندك؟
يوسف: مش تقولى صباح الخير الاول يا نور وتعرفينى بالحاجه؟
نور: اه معلش انا اسفه.
نور: صباح الخير يا يوسف.
يوسف: صباح النور يا نور
نور: ده يوسف زميلى في الكليه يا امى وهو اللى وصلنى امبارح لما عرف أن حضرتك تعبانه.

الام: اهلا وسهلا يا ابنى وشكرا على تعبك.
يوسف: اهلا بيكى يا حاجه والف سلامه عليكى.
وبعدين تعب ايه اللى تعبته حضرتك زى والدتى طبعا واكيد لما اعرف أن حضرتك تعبانه اكيد هاجى واطمن عليكى.
نور: انت واقف هنا ليه يا يوسف في الوقت ده؟
يوسف: ابدا انا توقعت انكم هاتروحوا المستشفى اللى انتى قولتى عليها.
وقولت اكيد هاتنزلوا بدرى كده فجيت اول ما النهار طلع.
وفضلت مستنيكم تنزلوا.

نور: يا خبر يا يوسف كل ده وانت واقف في الشارع مستنينا.
طيب ما طلعتش ليه بدل وقفتك دى.
يوسف: مش هانبطل رغى بقى علشان ماما اللى تعبانه دى وبعدين ابقى أسألى براحتك يا ستى..
الام: كتر خيرك يا ابنى ملوش لزوم تتعب نفسك احنا كنا هاناخد تاكسى.
يوسف: ولا تعب ولا حاجه يا امى ربنا يشفيكى.
ركبوا العربيه وراحوا على المستشفى اللى كانت زحمه جدا جدا وكان لازم يقفوا طوابير اد كده عقبال لما دورهم يجى في الكشف.

يوسف: هاروح اشترى حاجه واجى على طول.
نور: اه طبعا اتفضل يا يوسف.
الام: اتفضل يا ابنى معلش تعبناك معانا.
يوسف: تعبك راحه يا امى ما تقوليش كده.
راح يوسف يشترى حاجه ويرجع.
تليفون نور رن وكان سيف هو اللى بيتصل.
نور: السلام عليكم
سيف: وعليكم السلام يا حبيبتى.
عامله ايه وازى ماما دلوقتى.
نور: الحمد الله احسن دلوقتى.
واحنا دلوقتى في المستشفى مستنين الدكتور يطمنا عليها.

سيف: طيب انتم فين وانت اجيبلكم يا نور وابقى معاكم؟
نور: لا لا احمد اخويا معانا ما تتعبش نفسك انت.
سيف: ماشى يا نور اول لما تطمنوا من الدكتور ابقى رنى عليا وطمنينى يا حبيبتى.
نور: حاضر يا سيف يالا سلام
يوسف جه وكان معاه شنط كتير فيها اكل وعصاير كتير علشان يكلوا حاجه لان باقلهم كذا ساعه مستنين دورهم في الكشف.
نور: ايه ده كله يا يوسف كل دى حاجات جبتها.

يوسف: ايه يا نور دى حاجه بسيطه شوفى انتم بقالكم اد ايه هنا.
الام: تعبت نفسك يا ابنى معانا معلش حقك عليا.
يوسف: تعبك راحه يا امى والله.
نور: ربنا يخليك يا يوسف.
يوسف: مش كنتى سمعتى كلامى يا نور وودينا الحاجه لاكبر دكتور في البلد.
نور: معلش يا يوسف بس غصب عنى انا ما كنتش هاقدر على كشفهم الغالى اوى ده.
يوسف: كشف ايه وبتاع ايه اللى بتتكلمى عنه ده.
دى زى والدتى يا نور وكنت عاوز اطمن عليها بدل البهدله دى.

فجاه اسمهم الممرضه ندهته وقامت نور ومسكت ايد مامتها ودخلوا على اوضه الكشف.
وفضل يوسف واحمد برة مستنينهم لما يخرجوا من جوا.
دخلوا جوه ونور قعدت مامتها على الكرسى وبدأ الدكتور يسألها عن شكوتها.
نور ومامتها حكوا للدكتور عن تعبها وشكوتها والكلام اللى قالوا الدكتور اللى جابوه في البيت.
الدكتور كشف عليها واستغرب من حالتها وطلب انها تعمل ايكو على القلب.
وفعلا عمل اشعه الايكو ورسم القلب.

الدكتور: الصراحه يا جماعه الحاله متدهورة اوى وفي ضيق في الشريان التاجى وهو ده اللى تاعب الحاجه.
نور: اتملت عينيها بالدموع بس في نفس الوقت كانت ماسكه نفسها بالعافيه علشان مامتها.
نور: طب والحل ايه يا دكتور؟
الدكتور: انصحك يا بنتى تروحوا مكان كويس وكبير علشان تكونوا مطمنين لان الحاله مش عاوزة تأخير.
وهنا لازم تستنوا دوركم في العمليات واودامكم كذا شهر لكده.
الام: لا حول ولا قوه الا بالله.

نور: مسكت ايد مامتها علشان تطمنها وقالت للدكتور يعنى هو ده الحل الوحيد يا دكتور.
الدكتور: ايوا يا بنتى علشان ما ينفعش تستنوا كل الوقت ده.
نور خدت ايد مامتها وخرجت على بره ولقت يوسف واحمد مستنين.
احمد جرى على مامته وسندها مع نور.
يوسف: خير يا نور الدكتور قال ايه؟
نور: الحمد لله يا يوسف.
وبدأت تعيط جامد.
يوسف: في ايه يا نور احكيلى.

نور حكت لاحمد ويوسف كل اللى الدكتور قال عليه وإن لازم يعملوا العمليه في اسرع وقت علشان الحاله متدهورة ومش عاوزة تأخير.
يوسف: اهدى طيب يا نور.
انا من الاول مش موافق على المستشفى دى وقولتلك تعالى نروح للدكتور بتاع العيله وده دكتور مشهور وكبير وعنده اكبر مستشفى في البلد.
الام: يالا يا نور مش قادرة أقف يا بنتى اكتر من كده.
نور مسكت ايد مامتها ومشيوا لحد ما خرجوا للعربيات برة.

نور: كفايه كده يا يوسف تعبناك معانا احنا هانشوف تاكسى.
يوسف: ايه اللى انتى بتقوليه ده ازاى اسيب الحاجه وهي تعبانه كده وامشى.
نور: ما احنا هناخد تاكسى من هنا لحد البيت.
يوسف: لا يا سيتى انا اللى هاروحكم ولا عندك مانع يا امى؟
الام: معلش يا ابنى هانتعبك معانا.
يوسف: تعبك راحه يا امى والله.
اركبوا يلا لما اوصلكم.

وفعلا ركبوا مع يوسف العربيه ووصلهم لحد البيت واتفق أنه هايعدى عليهم اخر النهار ويوديهم للدكتور اللى هو عارفه.
نزلوا من العربيه ومشى يوسف وطلعوا على شقتهم.
جرى احمد وفتح باب الشقه علشان مامته تعبت من طلوع السلم وبدأت تنهج جامد.
نور: واحده واحده يا امى معلش انا عارفه انك تعبتى من السلم حقك عليا انا.
الام: لا انا كويسه يا حبيبتى ما تزعليش.

دخلت الام على اوضتها وراحت نور معاها غيرت لها هدومها ونومتها على السرير تستريح من المشوار ده عقبال لما تجهز الاكل.
الام: الحمد لله أن لسه في ناس كويسه كده زى يوسف.
نور: اه يا ماما فعلا احنا مع بعض بقالنا اربع سنين واول مرة اعرف انه راجل كده.
الام: الراجل بيبان في المواقف اللى زى كده يا بنتى.
يارب يكون من نصيبك يا نور انا لاحظت أنه بيحبك من نظراته ليكى ووقفته دى معانا.

نور: اه يا ماما انا حاسه بكده برضوا من اول سنه لينا في الكليه.
الام: ربنا يرزقك باللى يحبك يا بنتى ويكون حنين عليكى ويقدر يسعدك.
قبل ما اموت وانا قلقانه عليكى انتى واخوكى.
نور: ما تقوليش كده يا امى ربنا هايشفيكى ويخليكى لينا انشاء الله.

خرجت نور بعد ما اطمنت على مامتها.
دخلت غيرت هدومها في اوضتها ولقت الموبيل بيرن.
نور: سلام عليكم ايوا يا سيف.
سيف: ايه يا نور انتى فين دلوقتى؟
نور: انا في البيت لسه واصلين من شويه.
سيف: خير يا نور الدكتور قالكم ايه على الحاجه.
نور حكتله على كلام الدكتور وان الحاله وحشه ومش عاوزة انتظار.
سيف: طب هاتعملى ايه يا نور دلوقتى؟.
نور اترددت شويه قبل ما تقوله انهم هايروحوا مع يوسف عند الدكتور الكبير ده.

نور: لسه هانشوف يا سيف وأقفل دلوقتى علشان ماما بتنادى عليا.
سيف: ماشى يا نور ربنا يشفيها ويعفيها انشاء الله وخلى بالكم من نفسكم.
سيف كان قاعد في كافيتريا الكليه هو وصحابه وكانوا عاملين يهزروا مع بعض جامد وهو كان زعلان على اللى بيحصل مع نور حبيبته.
قام وسابهم ومشى رجع على البيت.
سيف خبط على باب الشقه فتحتله أخته مى.
سيف: سلام الله عليكم.
مى: وعليكم السلام يا حبيبى عامل ايه.

مى كانت طالبه في اخر سنه في هندسه وكانت اكبر من سيف بسنه واحده وكانت بتعتبره اخوها وصديقها وبيحكوا لبعض على كل حاجه.
مى: خير مالك يا سيف شكلك حزين اوى كده ليه؟
سيف: ابدا يا مى اصل مامت نور تعبانه اوى ولازم تعمل عمليه كبيرة.
وانتى عارفه أن ظروفهم وحشا جدا.
ونور صعبانه عليا اوى ومش قادر اعملها حاجه.
مى: يا حول الله يارب ربنا معاها انشاء الله.

في بيت نور كان احمد قاعد بيزاكر دروسه ولقى باب الشقه بيخبط قام وراح فتح ولقى اللى بيخبط جارتهم.
احمد: اهلا يا طنط اتفضلى.
ايه الاخبار يا احمد ماما عامله ايه دلوقتى وعملتوا ايه في المستشفى.
جت نور من المطبخ لما سمعت صوت جارتهم ورحبت بيها وحكت لها على اللى حصل معاهم وعلى كلام الدكتور.
جارتهم: طب هاتعملوا ايه يا بنتى في موضوع الدكتور الكبير ده وعلى كل المصاريف الجايه دى.

مامتكم تعبت كتير معاكم من ساعه ما ابوكم مات.
نور: انا عارفه والله وانشاء الله هاعمل كل اللى ربنا يقدرنى عليه حتى ولو سبت الكليه واشتغلت اى حاجه.
جارتهم: انتى بتقولى ايه يا نور انتى في اخر سنه يا حبيبتى.
نور: اومال اعمل ايه بس يا طنط؟

رواية هو والجميلات الجزء الأول للكاتبة سحر فرج الفصل الثالث

في فيلا مالك كان يوسف بيستعد علشان يروح لنور ومامتها ويوديهم للدكتور بتاع العيله بتاعتهم.
نهله: يوسف انت خارج ولا ايه يا حبيبى.
يوسف: اه يا ماما ورايا مشوار مهم جدا ومش عاوز اتاخر عليه.
نهله: مشوار ايه ده يا يويو هاتخبى على ماما حبيبتك ولا ايه؟
يوسف: بعدين يا ماما هابقى احكيلك على الحكايه كلها بس سيبنى امشى دلوقتى علشان ما اتاخرش اكتر من كده.
نهله: اوك يا يويو لما ترجع لازم تحكيلى على كل حاجه.

يوسف: انشاء الله يا ماما بس بلاش يويو دى انا كبرت خلاص على الدلع ده.
نهله: هو انا عندى كام يويو يعنى يا استاذ.
يوسف: اوووووف. سلام يا ماما احسن يالا باى.
نهله: هو ماله الواد ده بقاله يومين متغير كده ليه.
انا هافضل وراه لحد ما اعرف ماله.
ملك: هاى ماما بتكلمى نفسك ولا ايه.
نهله: هاى لوكه انتى هنا من امتى؟
ملك: من ساعه لما يوسف مشى.
نهله: طيب تعالى نقعد نتكلم شويه انا وانتى عوزاكى.

اول ما خرج يوسف اتصل على نور علشان يعرفها أنه جاى في السكه وعلشان يجهزوا نفسهم.
نور كانت بدأت تلبس هدومها وراحت علشان تساعد مامتها في لبسها هي كمان.
نور وهي داخله لمامتها قابلت احمد اخوها.
احمد: اروح البس انا كمان يا نور؟
نور: لا خليك انت زاكر دروسك يا احمد واحنا انشاء الله مش هانتاخر.
احمد: ليه بس يا اختى علشان ما ترحوش لوحدكم.

نور: لا احنا معانا يوسف ما تقلقش علينا هايودينا ويرجعنا زى ما قال الصبح.
احمد: ماشى يا اختى اذا كان كده انا موافق.
نور دخلت على مامتها ولقيتها فعلا لبست هدومها ويا دوبك كانت بتلف الطرحه على راسها.
نور: ايه ده انتى خلصتى وانا اللى كنت جايه اساعدك في اللبس يا حبيبتى.
الام: اه خلصت يا بنتى الحمد لله يا دوبك بس هالف الطرحه اللى مش عاوزة تتعدل دى.
نور: عنك انتى يا امى انا هالفهالك ما تتعبيش نفسك خالص.

لفت نور لامها الطرحه وخرجوا على الصاله وقعدتها نور على الكنبه لحد ما يوسف يجى ليهم.
باب الشقه خبط وراح احمد علشان يفتح الباب.
احمد: اهلا وسهلا يا يوسف اتفضل.
ماما ونور جوا.
يوسف: ازيك يا احمد عامل ايه؟
احمد: الحمد لله ادينى بزاكر علشان الامتحانات قربت.
يوسف: انت في سنه كام يا احمد؟
احمد: انا في تالته إعدادى.
يوسف: طيب اجدعن بقى ربنا معاك.
نور جت على صوت يوسف.

نور: ايه يا احمد كل ده رغى مع يوسف مش تدخله الاول بعد كده ترغى براحتك يا رخم انت.
يوسف: لا ما تقوليش كده لو سمحتى على صاحبى انا ما اسمحلكيش.
نور: صاحبك كمان هههههههه اطلع انا منها بقى اتفضل يا يوسف.
يوسف: اتفضل ايه يالا علشان ننزل على طول الدكتور مستنينا في العياده.
راح يوسف وسلم على ام نور ومسك اديها وساندها هو ونور علشان ينزلوا.
الام: معلش يا ابنى تعبينك معانا.

يوسف: تعبك راحه يا امى والله وربنا يشفيكى ويعفيكى.
نزلوا على تحت ودخلت نور ومامتها العربيه ودخل يوسف وساق العربيه وراح على عياده الدكتور.
وصلوا عند العياده ونزلت نور ويوسف و مسكوا ايد الام لحد ما وصلوا جوا العياده ودخلوا للدكتور اول ما يوسف عرف الممرضه بنفسه.
والممرضه رحبت بيهم وبلغته أن الدكتور مستنيهم.
دخلوا على اوضه الكشف وسلم يوسف على الدكتور.

الدكتور رحب بيهم وسلم عليهم وبدأ يعرف شكوة الام وايه اللى بتحس بيه. وايه اللى بيتعبها.
نور عرفت الدكتور بكل اللى حصل مع الام وعلى كلام الدكاترة اللى قبله.
الدكتور سمع ليهم كل اللى قالوه وبدأ يكشف عليها وعملها كل اللى لازم علشان يعرف الحاله بالضبط.

خلص كل حاجه الدكتور من إشعاعات ورسم قلب وايكوا واستغرب من الحاله وتدهورها وان هما ازاى ساكتين على كده وايه اللى سكتهم الفترة دى كلها لحد ما الحاله اتأخرت كده.
الدكتور: الصراحه يا يوسف الحاله حرجه جدا ولازم نعمل عمليه في اسرع وقت وبلاش التأخير.
انا هاديكم يومين تفكروا كويس ولازم تردوا عليا لان الحاله متدهورة جدا ومش عاوزة تأجيل.

نور والام اتصدمت من كلام الدكتور بس ده شىء مش جديد عليهم واللى قبل الدكتور ده بلغوهم بكده.
يوسف بص لنور وشاف الحزن اللى في عنيها وقال للدكتور إنه هايرد عليه في اسرع وقت ممكن.
رجعوا على البيت بعد ما وصلهم يوسف وطلع مع نور لحد فوق علشان يساعدها في سند الام.
نور دخلت ولقت احمد مستنيهم وكان عاوز يطمن هو كمان عليهم.
نور: اتفضل يا يوسف ادخل.
يوسف: لا معلش مش هقدر الوقت اتاخر وما يصحش.

الام: معلش يا ابنى اتفضل اشرب حاجه احنا تعبناك معانا.
يوسف: معلش يا امى هانزل انا واسيبكم ترتاحوا وابقى اطمن عليكم بكرة انشاء الله.
وفعلا استأذن يوسف ونزل وأحمد نزل معاه علشان يوصله لحد العربيه.
الام: شاب ونعم الشباب يا نور ربنا يحفظه ويحميه لشبابه.
نور: ايوا فعلا يا ماما عندك حق انا ما كنتش اعرف انه راجل كده غير دلوقتى.
الام: الواحد يا بنتى ما بيتعرفش غير في وقت الزنقه اللى زى كده.

نور: عندك حق يا ماما هو فعلا راجل.
الام: يارب يكون من نصيبك يا نور يا بنتى علشان اموت وانا مستريحه ومطمنه عليكم انتى واخوكى.
نور: ما تقوليش كده يا ماما لو سمحتى وانشاء الله هاتعملى العمليه وهاتقومى بالسلامه.
الام: انا حاسه يا نور أن عمرى قرب ينتهى وعاوزة يا بنتى اطمن عليك انك في ايد امينه ومع واحد زى يوسف ده اللى هايقدر يحافظ عليكى وشكله بيحبك اوى.

نور: يا ماما ما تقوليش كده ربنا يطول في عمرك وتشوفي احفادك انشاء الله.
الام: مش باين يا بنتى انى هاشوف احفادى اجلى قرب وانا حاسه بكده.
جه احمد على كلام امه وسمع كلامها ده وبدأ يقرب منها وجه في حضنها وفضل يعيط جامد وخلى نور هي كمان تعيط.
الام خادتهم في حضنها وفضلت تطبطب عليهم هما الاتنين وتوصيهم أنهم يخلوا بالهم على بعض.

في فيلا مالك كان يوسف رجع ودخل على جوا بعد. ما ركن عربيته في جراج الفيلا.
دخل لقى مامته وباباه قاعدين بيتفرجوا على التليفزيون وملك ماسكه موبيلها وعماله تتكلم على الواتس مع اصحابها.
ملك كانت طالبه في أولى جامعه وكانت جميله جدا وحلوة اوى وعنيها خضرا.
وكان كل شباب العيله بيحبها وبيتمنى قربها بس هي ما فكرتش ابدا في حد فيهم خالص.
وكانت بتتمنى تعيش قصه حب كبيرة زى اللى بتقرأ عنها في الروايات.

يوسف دخل وسلم على الكل وطلب من الشغاله انها تجهز له العشاء.
نهله: احنا برضه ما اتعشناش وكنا مستنينك علشان نتعشى مع بعض كلنا.
يوسف: اوك يا ماما انا هارح اخد دوش واغير هدومى وانزل على طول علشان ميت من الجوع.

نور كانت دخلت الاكل لمامتها في الاوضه ومشيت من عندها بعد. ما اطمنت انها نامت.
خرجت نور وراحت لاحمد اخوها الاوضه ولقته بيزاكر شويه قبل ما ينام.
نور: مش عاوز حاجه يا حبيبى اعملهالك وانت بتزاكر.
احمد: شكرا يا حبيبتى ولو عزت حاجه هاقولك على طول.
نور: ماشى يا حبيبى هروح اعمل احلى كوبيتين شاى ليك وليا ايه رايك علشان تركز وانت بتزاكر كويس.
احمد: بس كده هاتعبك معايا.

نور: تعبك راحه يا حبيبى ربنا يخليكم ليا دايما انت وماما.
راحت نور علشان تعمل الشاى ودق تليفونها وكان اللى بيتصل سيف علشان يطمن عليها هي ومامتها.
نور: السلام عليكم ازيك يا سيف.
سيف: وعليكم السلام يا حبيبه قلب سيف عامله ايه وازى ماما دلوقتى.
نور: الحمد لله يا سيف احنا لسه جايين من شويه من عند دكتور كبير.
سيف: طيب والدكتور قالكم ايه؟

نور: نفس كلام الدكتور بتاع المستشفى الصبح لازم ماما تعمل عمليه في اسرع وقت.
المشكله ان العمليه كبيرة جدا وانا خايفه عليها وغير كده اكيد مصاريف العمليه دى كبيرة ومش عارفه اعمل ايه؟
سيف: مش عارف اقولك ايه يا نور وكان نفسى اكون معاكى وابقى سندك وضهرك في حاجه زى كده.
وما اخلكيش تحتاجى حاجه ابدا.
وبالنسبه للمصاريف ما تشليش هم حاجه وانا هاتصرف المهم أن ماما تقوم بالسلامه.

نور: هاتتصرف ازاى بس يا سيف ما انا عارفه ظروفك انت كمان وعارفه أن لو معاك فعلا مش هاتتاخر.
سيف: انشاء الله يا نور ماما هاتعمل العمليه وهاتقوم بالسلامه وتفرح بينا كمان.
نور: يارب يا سيف معلش شغلتك معايا.
سيف: ما تقوليش كده يا نور انا جمبك في اى حاجه تحتاجيها.
نور: ربنا يخليك يا حبيبى يارب.
سيف: هو فين الدكتور ده يا نور وروحتيله ازاى.

نور: ما كنتش عارفه ترد وتقوله ايه وعارفه ومتاكده انها لو قالتله أن يوسف هو اللى وداهم هايزعل منها ومش هايكلمها وممكن يعمل مشكله كبيرة.
سيف: نور انتى روحتى فين؟
نور: معلش يا سيف اقفل دلوقتى ماما بتنده عليا الظاهر عليها صحيت وعاوزة حاجه.
سيف، ماشى يا حبيبتى روحلها بسرعه وانا سهران بزاكر لو عزتى حاجه كلمينى على طول.

نور قفلت الموبيل بتاعها ونسيت موضوع الشاى بتاع احمد ودخلت عملته وادتهوله ودخلت أوضتها علشان تزاكر لها شويه علشان بقالها يومين ما فتحتش كتاب والإمتحانات قربت.
فضلت نور تزاكر لحد ما ضوء النهار طلع وغلبها النوم ونامت من التعب.
سيف هو كمان فضل يزاكر لحد ما تعب هو كمان ونام.
دخلت عليه الصبح والدته علشان تصحيه للكليه بعد ما صحت مي أخته.
الام: اصحى بقى يا سيف هاتتاخر على كليتك يا ابنى قوم الساعه بقت سبعه.

سيف: حاضر يا امى هاقوم اهو سيبينى بس ربع ساعه وهاقوم على طول.
الام: ماشى يا حبيبى ربع ساعه واكون جهزتلك الفطار قبل ما تنزل.
يوسف كان نايم هو كمان وصحى على خبط الباب واللى كانت بتخبط هي ملك أخته.
ملك: اصحى بقى يا يوسف الساعه قربت على سبعه ونصف هاتتاخر على كليتك.
يوسف: لا انا هافوق اهو على طول هاخد شاور وانزل روحى انتى بس من هنا بدل ما اضربك على الصبح.
ملك: مين ده اللى يضربنى مين وانا اوريله شغله كويس.

يوسف مسك المخده اللى كان نايم عليها وقام من على السرير وفضل يضرب أخته وهي تجرى منه لحد ما نزلوا على تحت وهو بيجرى وراها بالمخده.
جريت ملك واستخبت في حضن باباها اللى كان نازل على شركته.
الاب: ايه يا ولاد في ايه على الصبح انتم مش هاتبطلوا حركات القط والفار دى انتم كبرتوا على الكلام ده.
يوسف: هي اللى بتجيبه لنفسها يا بابا ومش بتبطل رخامتها دى.

ملك: انا رخمه انا عجبك كده يا بابتى يا حبيبى سامع بيقول ايه عليا.
نهله: ايه يا ولاد مالكم صوتكم عالى ليه على الصبح.
يوسف: لا مفيش يا ماما غير الظريفه بنتك دى بس انا وريتها.
انا طالع علشان البس وما اتاخرش.
ملك: خد المخده بتاعتك معاك طيب.
يوسف: انتى مالك انتى خليكى في حالك.
سيف كان قام وغير هدوم النوم ولبس لبسه وراح على السفرة علشان يفطر مع ابوه وامه واخته مي.
سيف: صباح الخير.

الاب: صباح الخير يا ابنى اتأخرت النهارده في النوم كده ليه.
سيف: ابدا يا حاج اصلى سهرت كتير امبارح كنت بزاكر شويه.
الاب: ربنا يقويك وينجحك يا حبيبى انشاء الله.
وفضلوا يتكلموا شويه وراح سيف على كليته ولسه يا دوبك كان داخل من باب الكليه لقى يوسف داخل بعربيته هو كمان.
يوسف ضرب كلاكس بعربيته علشان يلفت نظر سيف ليه.
سيف خد باله ووقف علشان يشوف في ايه.
يوسف: صباح الخير يا سيف اخبارك ايه.

سيف الحمد لله يا يوسف في حاجه.
يوسف ابدا بطمن عليك مش اكتر.
نور كانت جت هي كمان واستغربت أنهم واقفين مع بعض اول لما دخلت من باب الكليه.
قربت منهم وصبحت عليهم.
نور: صباح الخير.
سيف: صباح النور.
يوسف: صباح النور انتى جيتى ليه وسبتى مامتك لوحدها.
سيف بص لنور واستغرب أن يوسف عارف حاجه زى كده.
سيف: انت تعرف منين أن مامتها تعبانه.

نور بدأت تتوتر جامد وما عرفتش تعمل ايه وعارفه أن سيف مش بيحب يوسف خالص علشان هو عارف ومتأكد أنه معجب بنور وبيحبها من اول سنه ليهم في الكليه.
يوسف ما كانش عارف يقول ايه وبص لنور وشاف الخوف والتوتر اللى هي فيه.
يوسف: ابدا يا سيف اصل قابلتهم امبارح عند الدكتور بظروفها وعرفت أن مامتها تعبانه.
نور اتنهدت جامد واطمنت شويه عن الاول.
سيف: ماشى يا يوسف كنت عاوز حاجه منى.

يوسف ابدا مفيش انا بس كنت بصبح عليك وخد بعضه ومشى.
سيف: مسك ايد نور وشدها وقالها انتى ازاى ما قولتيش انك قابلتى يوسف امبارح عند الدكتور.
نور: سيب ايدى يا سيف احنا في الكليه وفيها ايه يعنى أنى قابلته بظروفها عند الدكتور ونسيت اقولك.

رواية هو والجميلات الجزء الأول للكاتبة سحر فرج الفصل الرابع

نور: سيب ايدى يا سيف احنا في الكليه وفيها ايه يعنى لما قابلته بظروفها هناك.
سيف: فيها انك ما جبتيش ليا سيرة يا هانم ولا قولتيلى انك شوفته عند الدكتور.
نور: انا في أيه ولا ايه يعنى يا سيف انا دماغى كلها وتركيزى على ماما مش في الكلام الفارغ بتاعك ده.
سيف: انا كلامى فارغ.
ماشى يا ست نور اشبعى بيوسف باشا سلام.

سيف سابها وخرج برة الكليه خالص ونور فضلت واقفه مكانها وعماله تبص حواليها على الطلبه في الكليه اللى كانوا واقفين بيتفرجوا عليها هي وسيف.
لحد ما وشها جاب ميت لون من الإحراج اللى سيف حطها فيه.
يوسف كان واقف على بعد وبيراقب الموقف من ساعتها ما سبهم وقرب من نور بعد ما اتاكد أن سيف مشى.
يوسف: انا اسف يا نور ما كنش قصدى احطك في الموقف اللى حصل ده.
نور: ما تتأسفش يا يوسف انت ما عملتش حاجه غلط.

والظاهر عليا انا اللى اديته اكبر من حجمه علشان يعمل فيا كده اودام الطلبه كلها.
يوسف: معلش يا نور حقك عليا انا. المهم ما تزعليش نفسك خالص.
واهدى كده ويالا ادخلى على المحاضرة بتاعتك.
نور: محاضرة ايه بقى انا مش هقدر اورى وشى للطلبه تانى انا هاروح على البيت.
يوسف: طيب براحتك اجى اوصلك طيب للبيت؟
نور: لا شكرا يا يوسف مش عاوزة اتعبك معايا اكتر من كده انا هاروح لوحدى.

يوسف: طب خلاص روحى وإذا سمحتى ليا هاجبلك كشكول المحاضرة بعد الكليه على البيت وعلشان بالمرة اشوف الحاجه واشوف رأيها النهائى ايه علشان ارد على الدكتور.
نور: اه طبعا تنور وبالمرة علشان تقنع ماما على موضوع العمليه ده.

رجعت نور على البيت ودخلت على اوضه مامتها علشان تطمن عليها.
نور: انتى صاحيه يا حبيبتى انا قولت زمانك لسه نايمه.
الام: اهلا يا بنتى انتى جيتى على طول كده ليه ده انتى مالحقتيش تحضرى المحاضرات كده.
نور: معلش يا امى ما اقدرتش اسيبك لوحدك وأنا عارفه انك تعبانه ويوسف كتر خيره هايحضر المحاضرات ويجيبلى الكشكول على اخر النهار ويطمن عليكى انتى كمان.

الام: ربنا يخليكى يا بنتى انا كويسه الحمد لله مش عوزاكى تهملى محضراتك علشانى واحمد معايا اهو ما سبنيش من ساعه ما انتى نزلتى.
نور: لا يا ماما انا مش هاروح الكليه الا لما حضرتك تعملى العمليه واطمن عليكى الاول.
الام: عمليه ايه بس يا نور اللى بتقولى عليها وافرض انا وافقت أنى اعملها هانجيب فلوس العمليه منين يا بنتى انتى عارفه أن احنا ما حلتناش حاجه.

نور: انا هاتصل بعمى وأطالب بورثنا من ابونا اللى كل السنين دى ومش عاوز يدينا حقنا.
وحاطت أيده على كل حاجه حتى الارض ومصنع الالبان اللى في القريه.
الام: ما فيش فايده فيه ده انسان طماع وعاوز يكوش على كل حاجه بحجه انكم لسه صغيرين.
نور: المهم انك توافقى يا امى ومالكيش دعوى انا هاتصرف معاه.
الام: انا هاوافق بس بشرط يا نور.
نور: استغربت وقالت شرط ايه يا امى ده؟

الام: روحى بس استريحى من مشوارك وبالليل هاقولك على اللى انا بفكر فيه.
راحت نور على اوضتها بعد ما اطمنت أن أمها هاتنام شويه ودخلت لاحمد اخوها اللى لقيته بيزاكر علشان امتحاناته اللى قربت.
غيرت هدومها ونامت على سريرها وفكرت في كل اللى حصل معاها ومع سيف.
من اول يوم ليها في الكليه لحد وقتنا هذا.
واكتشفت أن سيف انسان بيغير عليها اوى وده اللى بيسبب لهم مشاكل كتير دايما.

وبينها وبين نفسها فكرت انها تفوق بس من تعب مامتها ده ولازم توقفه عند حده ويبطل غيرته المريضه دى.
علشان بعد كده وبعد جوازهم هايحصل مشاكل كتير بسبب الغيرة دى.

بعد ما خلص كل المحاضرات ركب عربيته وروح على فيلته ودخل وسلم على والدته وعلى أخته ملك.
يوسف: سلامو عليكم.
الام: وعليكم السلام يا حبيبى جيت بدرى يعنى النهاردة.
ملك: ولا بدرى ولا حاجه يا ماما احنا بقينا العصر اهو.
تلاقى بس بطنه جاعت وانتى عارفه ابنك مش بيحب يأكل حاجه من اى حته ولا اى مطعم.
يوسف: لا ظريفه وجبتى التايهه انتى تصورى.

الام: طيب يا حبيبى اطلع انت غير هدومك وانا هاخلى الشغاله والسفرجى يجهزوا الغدا.
يوسف: اوك يا ماما هاطلع اخد دوش وانزل على طول لانى ما كلتش حاجه من الصبح.
قامت نهله ودخلت على المطبخ وأمرت أنهم يجهزوا السفرة.
ملك طلعت تقعد في الجنينه شويه علشان تكمل الروايه اللى كانت بتقرأ فيها بقالها كام يوم وكانت روايه
للعشق وجه اخر
واد ايه كان عجبها شخصيه فارس واد ايه كان بيحب يسر وهي مش حاسه بيه.

وكان نفسها أن تحب واحد زى ما بتقرأ في الروايات.
سيف كان قاعد في اوضته من ساعه لما رجع من الكليه.
مي دخلت عليه الاوضه وقالتله ان الغدا جاهز.
سيف: مش عاوز حاجه اقفلى الباب وسبينى لوحدى يا مي.
مي: في ايه يا سيف من ساعه لما رجعت وانت قالب وشك كده في حاجه حصلت لنور أو مامتها ولا ايه.
سيف: لا مفيش وقولتلك سيبينى لوحدى لو سمحتى.
مي: قربت منه وقعدت جنبه على السرير.

وقالت له احكيلى يا سيف مش انا اختك حاببتك وانت مش بتخبى عنى حاجه.
سيف حكى لها كل اللى حصل معاه هو ونور من ساعه ما راح الصبح الكليه.
مي: انت غلطان يا سيف ونور ما غلتطش في حاجه.
انا مليون مرة اقولك خف عليها في موضوع الغيرة دى علشان ما تتخنقش.
وبعدين فيها ايه لما كانت مع مامتها عند الدكتور وقابلت زميلكم ده بظروفها.
سيف: فيها انها ما قالتش ليا لما كنت بكلمها.
كده قاصده انها تخبى عليا وما تقوليش.

مي: عادى يا سيف جايز تكون نسيت او ممكن انها حاجه مش مستهله انها تقولك عليها يعنى.
سيف: ازاى مش مهمه هي عارفه انى مش بحب يوسف ده من زمان.
مي: اديك قولت لنفسك اهو انت مش بتحبه فاأكيد علشان كده هي ما حبتش تقولك علشان ما تفهمش غلط.
سيف: صح ولا غلط بقى انا تعبان أخرجى وسيبينى لوحدى لو سمحتى عاوزة انام.
مي: انت دايما كده اللى يقولك انك غلطان تتهرب منه.
انت لازم تتصل بنور وتتاسف لها وتطمن على مامتها.

سيف: انشاء الله ربنا يسهل.
مي: لازم تقف معاها يا سيف في المحنه اللى هي فيها دى علشان هي تحس بكده.
سيف فضل يفكر في كلام مي اللى هي قالتهوله وحس أن فعلا زودها شويه مع نور.
مسك موبيله واتصل على نور بس فضل الجرس يرن وهي مش عاوزة ترد عليه وده اللى خلاه يعرف انها زعلانه منه على اللى حصل في الكليه.
جه الليل وخرجت الام تقعد شويه في الصاله ولقت احمد بيتفرج على الماتش.

نور خرجت من المطبخ وكانت بتعمل كيكه علشان لما يوسف يجى يكون في حاجه حلوة تقدمها ليه مع الشاى.
نور: اهلا اهلا بست الكل نورتى الصاله يا امى ووحشتنا قعدتك والله.
احمد: اه والله يا امى ربنا يشفيكى لينا وترجعى احسن من الاول انشاء الله.
الام: ربنا يخليكم ليا يارب ويخليكم لبعض انتم كمان.
باب الشقه خبط وقام احمد علشان يشوف مين ونور كانت قاعده بشعرها وكانت مفكرة اللى بيخبط جارتهم.

احمد فتح الباب ولقى يوسف هو اللى جه.
احمد: اهلا وسهلا يا يوسف اتفضل نور وماما جوا.
يوسف كان عدى على السوبر ماركت واشترى حاجات كتير وهو رايح عصاير وحلويات وفاكهه وعدى على محل الورد واشترى بوكيه ورد حلو اوى.
واول ما دخل ادا الحاجات والشنط لاحمد علشان يدخلها جوا.
يوسف سلم عليه ودخل معاه على جوا.
احمد: اتفضل يا يوسف نور اهى هي وماما.

نور قامت بسرعه وكانت عاوزة تغطى شعرها بالأشارب بس كان يوسف دخل وشافها وهي بشعرها.
يوسف، انا اسف والله احمد اللى دخلنى على طول.
الام: ولا اسف ولا حاجه يا ابنى البيت بيتك. اتفضل.
نور جريت ودخلت على اوضتها وغيرت هدومها ولبست طرحه وخرجت تسلم عليه.
نور: اهلا وسهلا يا يوسف.
يوسف: اهلا بيكى يا نور معلش انا اسف أنى جيت من غير ما اقولك بس والله فضلت أرن عليكى كتير وكان بيدينى غير متاح.

فاطلعت على طول من غير ما استاذن سامحينى بقى.
نور: ولا يهمك يا يوسف ما تشغلش بالك وفعلا للاسف الشبكه هنا وحشه جدا.
يوسف: عامله ايه يا امى دلوقتى يارب تكونى احسن؟
الام: الحمد لله يا ابنى فضل ونعمه هاناخد زمنا وزمن غيرنا يعنى.
الحمد الله راضيه بقضاء الله.
نور: استاذنت لما سمعت مامتها بتقول كده لانها اتخنقت بالعياط وما رديتش تعيط اودامهم علشان ما تزعلش حد فيهم.

دخلت على المطبخ علشان تعمل شاى وتشوف اخبار الكيكه ايه.
بعد شويه خرجت بعد ما ندهت على احمد علشان يساعدها ويجيب معاها الحاجه.
جابوا الحاجه وحطوها على التربيزة اودام يوسف وبدات تقدمله الكيكه اللى عملتها.
يوسف: ايه ده كله تعبتى نفسك ليه يا نور انا كنت هاقوم امشى بعد ما اديكى كشكول المحاضرات.

الام: تمشى ايه يا ابنى انت لحقت تقعد ولا تأكل ولا تشرب حاجه انت لازم تدوق الكيكه اللى عملتها نور هاتعجبك اوى يا حبيبى.
احمد: الصراحه اختى نور بتعمل كيكه روعه.
نور: ولا روعه ولا حاجه دى عاديه خالص.
يوسف: طب خلاص انا هادقها واشوف هي عاديه ولا لا وانا اللى هاقولك.
يوسف مسك الشوكه واكل اول قطمه وساب الشوكه تانى وبص لنور.
نور: ايه مش حلوة صح؟
يوسف: دى روعه روعه.
واول مرة ادوق كيكه حلوة كده تسلم اديكى بجد.

نور وشها احمر جامد من الكسوف ويوسف لاحظ كده وحب يغير الموضوع.
( تابعونى على صفحتى روايات وقصص نوتيلا )
يوسف: قررتى ايه يا امى على موضوع العمليه.
الام: الصراحه يا ابنى لسه مش عارفه ومش ناويه اعملها انا بقيت احسن الحمد لله.
نور: هو ايه بقيتى كويسه يا ماما لازم تعملى العمليه وتقوملنا بالسلامه.
يوسف: طبعا يا امى لازم تعمليها وانتى بنفسك سمعتى الدكتور قال ايه عن الحاله كويس.

وقال اننا لازم نقرر في اسرع وقت ممكن وادانا يومين نشوف هانعمل ايه ونقرر فيهم وأبلغه بالقرار بتاعنا دنه.
الام: الصراحه انا حتى لو وافقت على العمليه مصاريفها كتيرة يا ابنى اوى علينا.
نور: يا ماما انا قولت لحضرتك انا هاعمل ايه والصبح إنشاءالله هاسافر البلد واروح لعمى وأطالب بحقنا في ورث بابا الله يرحمه
احمد: ايوا يا ماما لازم تعملى العمليه وتخفى وترجعى احسن من الاول انشاء الله.

يوسف: انا هاتكفل بكل مصاريف العمليه ماتشلوش هم حاجه ابدا لو سمحتوا.
نور: انت بتقول ايه يا يوسف لا طبعا وانا مش هوافق بكده.
الام: انا هتعمل العمليه بس بشرط.
نور: بصت باستغراب لاحمد ويوسف.
ويوسف كمان بصلها باستغراب.