رواية العنيد

رواية العنيد بقلم الشيماء محمد الجزء الثاني

الفصل الرابع

ادهم راح فتح الباب ودخل عمي حسن اللي كلهم اتفاجؤا بيه
عم حسن: خير في ايه؟ وايه الكلام الغريب اللي انا سمعته ده؟ ايه يا محمد؟ للدرجه دي بقيت عيل زيهم ومش عارف تحكم بينهم؟

كلهم اتفاجؤا بيه واول واحد نطق
عم محمد: اهلا يا حسن يا اخويا اتفضل اتفضل
عم حسن: لا اهلا ولا سهلا مزعل الراجل السكره ده ليه؟ وانتي يا بت يا ليلي مالك؟ مش ده حبيبك اللي وقفتي قصاد ابوكي علشانه ولا نسيتي حالتك كانت ايه لما ابوكي رفضه
ليلي: عمي حضرتك مش عارف حاجه ف
قاطعها حسن: لا عارف وفاهم كل حاجه... جوزك معرفني كل حاجه عنه... من يوم ما امه خرجته من البيت لحد ما اتجوزك
الكل بص لادهم

ادهم: مينفعش يبقي كبير وهو ما يعرفش كل حاجه عني... عمي محمد انت كنت عايز كبير علشان في المواقف دي يكلمك... اهو قدامك اهوه اتكلم وقوله...
قوله اللي انت عملته واللي بنتك عملته؟
عم حسن: ايوه انا جاي اسمع سمعوني بقي
ليلي زعلانه من جوزك ليه؟

ليلي: اولا يا عمي انا حامل بس سيادته زعلان ومش عايز عيال مني
ادهم بصلها باستنكار بس ساكت... عم حسن بصله
ادهم: لااااا سيبها تكمل للاخر خالص انا عايز اسمعها
واسمع تفكيرها المتخلف خليني انا للاخر
ليلي حكت الموضوع من وجهه نظرها وابوها كمان اتكلم وقال علي اللي فاهمه
عم حسن رفض تصرف اخوه تماما وعاب عليه
عم حسن: حتي يا محمد لو هو فعلا طردها ما تروحلوش شغله وتتكلم قدام رجالته... ده غلط جدا...
انت غلطان وان كان ليك حق ضيعته باللي عملته ده
اما انتي يا ليلي فاسمع جوزك الاول... بس برضه قبل ما اسمعه انتي عارفه انه بيحبك فليه ما تفضليش في بيتك وتحلي امورك معاه؟ ليه بتيجي وتكشفي سر بيتك؟ ليه بابك مش مقفول عليكي؟ بس هتجيبي العقل منين وانتي ابوكي متخلف كده؟
طيب يا ادهم انت ليه بقي مش عايز تخلف منها؟
ادهم: اولا يا عمي انت سمعت كل الماضي بتاعي وعرفت علاقتي بامي كان شكلها ايه؟
اول ما ليلي قالتلي علي الحمل كل اللي جه في بالي هو اللي امي عملته... فالحمل كان مفاجأة بالنسبالي
وبالتالي رد فعلي مكنش اللي هيا متوقعاه
بس عمري ما قولت اني زعلان ولا اني مش عايزو ولا كل التخاريف اللي هيا قالتها
سألتني مالك قولتلها اني خايف من الخطوه دي...،
اتكلمت معاها علي اساس انها صحبتي قبل مراتي وعرفتها مشاعري وبس
وقولتلها اني خايف من هوائيتها دي... اول ما ليلي بتزعل عقلها بيتلغي وبتدور علي ايه اللي تنتقم بيه...
او ازاي تجرح اللي قدامها زي ما هيا اتجرحت...
هيا عارفه انها لما تسيب البيت ده قد ايه هيضايقني وهيجرحني... ليلي ديما بتدور علي نقطه ضعفي وتضغط عليها...
ليلي مشكلتها انها ديما معتمده علي حبي ليها وانها مهما تعمل فانا عادي هزعل شويه واسامحها وبالتالي بتسوق فيها قوي...
امتي يا ليلي قولتلك تسيبي البيت زي ما فهمتي ابوكي!؟
ليلي: انت ما قولتهاش بالمعني؟
ادهم: امال قولت ايه؟ قولي ايه اللي قولتي فهمتي منه اني مش عايزك في البيت؟
ليلي:_______

ادهم: مفيش صح؟ طيب امتي قولتلك انك زي امي وانك خاينه وانك هترمي ابنك؟

ليلي: مش انت قولت انك اول حاجه جت في بالك هيا دي؟
ادهم: موقف وحصلي وماثر فيا جامد بس مش لاني افتكرته يبقي بربطك انتي بيه...
ليه ربطتي دي بدي؟
ليلي: امال قصدك ايه؟
ادهم: قصدي انك خاينه؟ لا طبعا انتي بتفكري ازاي؟ موقف واثر فيا... العللقات الاسريه دي كلها بتاثر فيا وانتي عارفه ده كويس... بس ليه فكرتي كده؟
ليلي: انت قولت انك خايف ومني... وزي ما امك عملت انا هعمل...
ادهم: لا انا ما قولتش كده نهائي... انا قولت اني خايف من تهوراتك دي...
طيب امتي قولت اني مش عايز البيبي ده او اني عايزك تسقطيه؟
ليلي: امال معناه ايه لما تقولي انك اتصدمت بالحمل؟
ادهم: اتفاجئت... هو الواحد لما يتفاجئ ده معناه انه كاره المفاجاه دي؟ كنت محتاج وقت استوعب فيه اللي حصل... انا مش انسان سوي... اعتبريني مريض نفسيا يا ستي... انا حكتلك الماضي بتاعي علشان في المواقف دي تقدري... تديني فرصه استوعب الامور براحه وبهداوه... محتاج وقت غير الانسان الطبيعي... ماقولتلكيش ده علشان تحاربيني بيه كل شويه...
ما تحسسنيش ديما اني غلطت لما فتحتلك قلبي...

بحتاج وقت يا ليلي... احتجت وقت لحد ما استسلمت لحبك واحتجت وقت علشان اتقبله واحتجت وقت علشان اخد قرار الجواز... والمفروض تكوني فهمتيني... المفروض تكوني متأكده انه مجرد وقت وهتلاقيني اسعد راجل في الدنيا ان عيلتنا هتزيد ويبقي في حد يربطنا ببعض العمر كله... مش المفروض تيجي تهاجميني كده وتبعتيلي ابوكي يهاجمني... اهدي عليا شويا...
ليلي: كانت اسعد لحظه في حياتي ساعت ما اكتشفت الحمل وكل اللي في بالي اقولك ازاي وتشاركني الفرحه دي ازاي؟ بس ما تخيلتش ده فاتصدمت انا كمان وكان لازم
قاطعها ادهم: وكان لازم زي ما انا صدمتك تصدميني وتجرحيني وتعملي كل حاجه عارفه انها هتوجعني...
وده بالظبط اللي انا اقصده...، شوفي يا ليلي انا متأكد تماما وبقولها قدام الكل... ان البيبي ده هتستغليه وهيكون نقطه قوه لصالحك واكبر نقطه ضعف ليا... ويوم ما تزعلي هتلعبي بيه؟
ليلي: قصدك ايه؟
ادهم: كلامي واضح... انتي عارفه كويس قوي اني هحب البيبي ده اكتر من اي حاجه في الدنيا وعارفه ان احساس العيله ده حلم بالنسبالي وبيتحقق اهوه
انتي والبيبي ده هتبقوا اهم حاجه ويوم ما هتزعلي بتهددي ديما باهم حاجه... اول حاجه بتعمليها هتحرميني من الحلم ده...
ليلي: شايف يا عمي... اهو بيتهمني اهو
عم حسن: انتي اللي بنيتي الاتهام ده... انتي ما حاولتيش تنفي الاتهام ده بالعكس انتي بتثبتيه وبتنفذيه
عم محمد: هو مش عملك الكبير ليه لازم تيجي في صفه
عم حسن: وانت بغباءك ده كنت هتضيع بنتك اول مره وهتفضل وراها لحد ما تخليها تعض ايديها من الندم بس ساعتها مش هينفعها الندم
بت انتي... انتي اول مره لما ابوكي رفضه ودخل بينكم روحتي فضحتيه... و دي عمله ما تعملهاش واحده عندها قيم واخلاق انك تفتشي سر اتأمنتي عليه،...
وتاني مره ساعه القضيه سيبتيله البيت بدل ما تقفي جنبه وتقوليله احمد ربنا ان انا جنبك مع ان ده الطبيعي وده المفروض والواجب عليكي اصلا... بس طبعا اكيد ابوكي فهمك ان ده فضلا منك!؟ ... و تالت مره اهوه برضه بتسيبيله البيت يبقي هو فعلا عنده حق والمفروض ما يديكيش الامان خالص... لان الثقه دي بتكتسب وتتبني واحده واحده... في حالتك انتي بقي ماشيه بالعكس... هو اداكي الثقه دي حق مكتسب وانتي بقي بتهديها طوبه طوبه وجايه دلوقتي تشتكي وتقولي خايف مني ليه ؟
شوفي يا ليلي يا تقفلي بابك عليكي واللي جوه بيتك يفضل جواه.. بينك وبين جوزك وبس.. يا اما اوعدك ان قريب قوي مش هيبقي عندك بيت تقفليه اصلا...
عقلك في راسك وانتي مش صغيره...
ده اللي عندي قولته... محمد يا تقف جنب بنتك وتساعدها صح يا تبعد عنها بدل ما تجيبها تقعد جنبك

ليلي: عمي انا عارفه ان كلامك صح بس ادهم ما بيتمسكش بيا... ما بيحاولش ابدا
عم حسن: بيحبك ولا لأ؟
ليلي: في فرق
عم حسن: بيحبك ولا لأ؟
ليلي: ايوه بس وجودي مش فارق معاه او هو محسسني بده
ادهم: انا محسسك ان وجودك زي عدمه؟ انا؟ انا مش عارف اقولك ايه؟ ؟ عمي مالوش لازمه الكلام اصلا... بعد اذنكم انا ورايا شغل
ادهم قام وقف
ليلي: اهو كل ما تكلمه يقولك ورايا شغل ويهرب
ادهم بيزعق: انا ما بهربش... لو انتي مش حاسه بحبي ليكي ومش حاسه ان وجودك يفرق يبقي مالوش لازمه الكلام... مفيش اي حاجه ليها لازمه،،،،
ابقي في شغلك اقعدي مع صحباتك واتكلمي معاهم واسمعي معامله ازواجهم ليهم ازاي وتعالي قارنيها بمعاملتي ليكي... وان ما شفتيش نفسك ملكه متوجه ابقي تعالي لوميني... (مشي خطوه ورجع)
وهقولهالك للمره الالف لو انتي مش عايزه تفضلي في بيتي مش هقولك افضلي ابدا ولو هموت من غيرك...
{بصلهم كلهم } باب بيتي مفتوح علي طول بعد اذنكم

سابهم وخرج وحاله صمت مسيطره عليهم
اخيرا عم محمد قطع الصمت ده
عم محمد: اهو اتفضل رزع الباب ازاي وبيزعق ازاي؟ لا ادب ولا احترام..، تربيه ملاجئ صح؟
عم حسن: تصدق ان انا اللي هغلط فيك وهوريك تربيه الشوارع... يعني الغلط راكبك من ساسك لراسك انت والمتخلفه بنتك وجاي تقول عليه تربيه ملاجئ؟
وانت لما بتروحله شغله تردحله ده ايه؟ هاه؟
انتي يا بت انتي خساره فيكي اصلا راجل زيه؟
انا هقوم اكلمه واقوله يطلقك وانا قسما بالله لاجوزه واحده تشيله من علي الارض شيل وتعرف قيمته بس هو يطاوعني... جتكم القرف عيله هم
قام وماشي وليلي جريت وراه
ليلي: عمي استني بس
عم حسن: لا ما استناش... ده انتو حرقتو دمي... انا رايح عنده بيته مفتوح الجو هناك انضف من هنا... هبات هناك وبكره اروح... وباذن الله الليله دي هقنعه يسيب النسب الهم ده...
ليلي: انت عايز تطلقني من جوزي؟
عم حسن: طالما ما انتيش مقدراه وشايفه نفسك عليه يبقي شوفي غيره وسيبيه في حاله... هو لا نرحم ولا نسيب رحمه ربنا انزل... ده حتي يبقي افترا
ليلي: عمي استني بقي
عم حسن: لا مش هستني عايزه ايه؟
ليلي: هروح معاك البيت ونستني ادهم مع بعض
عم حسن: وتروحي ليه خليكي جنب ابوكي وامشي وراه
ليلي: علي فكره ابويا مقاليش حاجه اصلا ومقاليش انه رايحله... وبعدين بابا بيحب ادهم
عم حسن: ايوه صح... ماهو الحب بيشرشر اهوه

ليلي روحت بيتها مع عمها وانتظروا مع بعض ادهم اللي رجع بالليل واول ما دخل اتفاجئ بيهم
دخل واتعشوا مع بعض وجه معاد النوم
ادهم دخل عم حسن لاوضه يرتاح فيها ودخل هو ومراته اوضتهم
واول ما دخلوا يدوب ليلي هتتكلم سابها ودخل الحمام
وخرج بعد فتره طووووووويله
رقد علي السرير من غير ولا كلمه
ليلي: ادهم
ادهم: تعبان وعايز انام تصبحي علي خير
عطاها ظهره وطفي النور ونام
عم حسن تاني يوم راح بلده وادهم وصله
ليلي مش عارفه ازاي تصالح ادهم وهو بيتجاهلها تماما ولو طلبت حاجه بينفذها بصمت
بس متجاهلها تماما وده بيقتلها وعرفت انها مش ملكاه
وعرفت ان تجاهله بيوجعها قوي قوي
واكتر حاجه وجعاها بالليل لما بينام جنبها من غير ما يعبرها بيبقي نفسها تصرخ
بتتعمد تلمسه او تثيره او تلفت نظره زي الاول بس كان حيطه سد قدامها
وعرفت انها لما بتثيره بيبقي بمزاجه هو مش شطاره منها ابدا
كانت هتموت عليه.. علي نظره رضا.. علي لهفه في عنيه.. علي لمسه منه... علي حضنه... ...
شهر بحاله فات علي بعد ادهم منها وهيا جابت اخرها
كانت عند امها
ليلي: ماما هتجنن ادهم عامل زي الفولاذ اعمله ايه؟
ناديه: ماهو كان بين ايديك وانتي معجبكيش تستاهلي
ليلي: دلوقتي استاهل مش انتي كنتي معايا؟
ناديه: انتي قولتيلي مش عايز الحمل وعايز يسقطني اعملك ايه بقي؟ مقولتيش انك انتي اللي غبيه ومتخلفه... شوفي بقي هترجعيه تاني ازاي؟
ليلي: طيب يا ماما اعمل ايه؟ مفيش اي حاجه نافعه معاه؟
## جعااااان انتي فين يا ماما
دخل مصطفي عندهم وسلم علي اخته
مصطفي: في ايه مالك؟ مكلضمه ليه؟ وجعتي قلبي معاكي؟
ليلي: وهو ا نت عندك قلب وبتحس!؟
مصطفي: والله بقالي شهر مخنوق لما هطق ولا عارف انام ولا مبسوط واتاريكي انت السبب روحي يا شيخه
ناديه: مش عارفه تصالح جوزها
مصطفي عملها حركه بايده: اغريه؟ البسيله حاجه شفتشي تبين كل اشي
ليلي ضربته: شفتشي!؟ انت عارف ان ادهم يفرق معاه الشفتشي
مصطفي: في الطبيعي لأ... ده احنا اول حاجه علموهالنا اننا نبقي محصنين ضد الاغراءات دي تماما
بس ده المقدم ادهم... لكن اللي عندك في البيت ده العاشق
ليلي: لا يا اخويا سيادته شال العاشق ومصدرلي المقدم ومش عارفه اخترق دفاعاته خالص
مصطفي: اممم تلك مشكله عويصه بس كل مشكله وليها حل
ليلي: قسم وسمعني بقي
مصطفي: جعااان وانا وانا جعان مبعرفش اقسم املي الكرش الاول وبعدها بعون الله علاجك عندي
ليلي: عارفه انك عمرك ما كان ليك لازمه... حطيله ياكل
اتغدوا مع بعض كلهم وهما بياكلوا
مصطفي: بت يا ليلي طريقتك غلط
ليلي: قصدك ايه؟
مصطفي: قصدي انك تغريه والكلام ده مش هيجيب نتيجه خالص
ليلي: امال اعمل ايه؟
عم محمد: اديله علي دماغه
ناديه: والنبي اسكت انت قول يا مصطفي بتفكر في ايه
مصطفي: بصي بقي العاشق او المقدم الاتنين مشتركين في نقطه مهمه
ليلي: اللي هيا ايه؟
مصطفي: ما بيتأخروش ابدا في مساعده حد محتاج
ليلي: محتاج ايه؟ قصدك ايه؟ اتكلم علي طول
مصطفي: افهمك انا... انتي لو فضلتي سنه لقدام تغري فيه مش هيستسلم طريقتك غلط... انتي لازم تكوني ضعيفه محتاجه لمساعده وهو مش هيتأخر ابدا
ليلي: برضه مش فاهمه
مصطفي: قصدي ان قوتك هتكون في ضعفك... انا هقولك تعملي ايه وبكره تكلميني وتشكريني

ليلي روحت بيتها وبدأت تنفذ فكره اخوها يمكن ترجع حبيبها ليها... فضلت تستني رجوع ادهم البيت
وادهم فتح الباب ودخل وهيا قاعده في الصاله في انتظاره وبتفكر هيكون رد فعله ايه؟ ؟ ؟
اول ما دخل عملت نفسها تعبانه ومش قادره
ليلي: اجهزلك عشا؟
ادهم: لا متشكر
ادهم دخل اوضته وسابها وهيا دخلت وراه ورقدت علي السرير
ادهم بصلها وسكت وهيا فجأه قامت تجري علي الحمام وفضلت ترجع
طبعا ادهم سامعها وماسك نفسه بالعافيه علشان ما يدخلهاش
خرجت وشكلها مرهق
ادهم: انتي كويسه؟
قالها ببرود
ليلي: الحمدلله ما تشغلش بالك
يدوب كام دقيقه وقامت ترجع تاني وتالت ورابع
هنا ادهم مقدرش يسكت
ادهم: انتي النهارده غير كل يوم في ايه؟
ليلي: معرفش يا ادهم... الحمل
ادهم: ما انتي حامل داخله علي الشهرين اهوه اشمعني النهارده...
ليلي: عادي... ده طبيعي في الحمل
ادهم سابها ودخل اخد شاور وغير كل هدومه
يمكن تكون متضايقه من ريحته لان ريحته فيها سجاير من اصحابه
وهو في الحمام ليلي خبطت عليه
ليلي: ينفع ادخل يا ادهم؟
ادهم: اه ادخلي انا خلصت اصلا
ليلي دخلت ورجعت تاني والمره دي قعدت في الارض مقدرتش تقوم
ادهم قرب منها وشالها وغسلها وشها وحطها في السرير
ادهم: ما اعتقدش ان ده طبيعي ابدا
ليلي: انا بس محتاجه ارتاح شويه وبعدها هبقي كويسه
ادهم: طيب انتي اخر مره اكلتي امتي؟
ليلي: مقدرتش اكل النهارده... كنت عند ماما الظهر ومقدرتش برضه اكل...
ادهم: ماهو ده ما ينفعش... وبعدين انتي بترجعي علي الفاضي لان معدتك فاضيه
ليلي كانت عايزه ترجع تاني ومش قادره تقوم
ادهم: خليكي مكانك الباسكت اهي
ادهم قعد وراها ومسك بطنها وهيا بترجع

حس ان روحها هتطلع منها ومش عارف يعمل ايه؟
فجأه الزعل انتهي والخلافات انتهت وكل اللي فاكره انها تعبانه
ليلي سندت عليه وهو ضاممها جامد وعيطت جامد في حضنه ومش عارفه بتعيط ليه؟
من شوقها؟ ولا من وجعها؟ ولا من المها؟
ادهم: طيب بتعيطي ليه دلوقتي؟
ليلي: بطني وجعاني ومش قادره انا تعبانه قوي... تعبانه يا ادهم
ادهم: اشششس طيب بطلي عياط... تعالي ننزل المستشفي ايه رايك؟
ليلي: مش قادره اتحرك مش قادره
ادهم: انا هشيلك اتفقنا؟ لحظه هلبس
لبسوا ونزلوا

حاولت تقف معاه بس مقدرتش واتعلقت في رقبته وشالها ونزل بيها
عم لطفي: خير يا باشا
ادهم: تعبانه شويه افتحلي الباب يا راجل يا طيب
عم لطفي فتحلوا الباب وباب العربيه ودعواته ملحقاهم
وصلوا المستشفي اللي ليلي شغاله فيها
قابلهم الدكتور امين وسلم عليهم ورشحلهم دكتوره فوزيه لانها كويسه وشاطره ومن حظها انها لسه كانت في العمليات ومخلصه
جاتلهم الدكتوره
دكتوره فوزيه: خير يا دكتوره ليلي؟
ادهم: هيا حامل تقريبا في شهرين والامور اعتقد انها كانت طبيعيه بس النهارده مش مبطله ترجيع وتعبانه زي ما حضرتك شايفه حتي مش قادره تقف
دكتوره فوزيه: الترجيع طبيعي في الحمل يعني مثلا الصبح او ما تصحي او لما تاكل حاجه مش عجباها او تشم ريحه مش عجباها بس لكن غير كده يبقي لا
طيب يا دكتوره عملتي سونار قبل كده اتطمنتي علي وضعه والكيس والنبض؟
ليلي: لا صراحه معملتش قبل كده
دكتوره فوزيه: معقوله طيب ازاي؟
ليلي بصت لجوزها وكأنها بتقوله ان هيا السبب
ليلي: اهو اللي حصل بقي
دكتوره فوزيه: طيب اتفضلي الاول نطمن علي الوضع
ليلي قامت والممرضه جت تساعدها وادهم وقف معاها
كان متوتر جدا وباين عليه
دكتوره فوزيه: اهدي يا سياده المقدم ده مجرد سونار عادي
ادهم: انا هادي بس قلقان عليها هيا
دكتوره فوزيه: لا ما تقلقش ان شاءالله كله هيبقي مظبوط
الدكتوره بدات تعمل السونار وادهم واقف متابع
وهيا بتشرح
دكتوره فوزيه: واضح يا سياده المقدم؟
ادهم: انا مش فاهم اي حاجه؟ حضرتك بتقولي راس ورجلين وحاجات غريبه انا مش شايف اي حاجه
الدكتوره: طيب شايف الكوره دي؟ دي الراس
وده العمود الفقري اهو
ادهم: اه ده شوفته
الدكتورة: تمام ودي الرجلين اهي وده قلبه بينبض واخد بالك من الحركه بتاعته؟
ادهم: اه فعلا
الدكتورة: وهسمعكم اهو النبض بتاعه
وفعلا سمعوا نبضه والاتنين بصوا لبعض
ليلي شافت في عنين ادهم لهفه وفرحه اتمنت تشوفهم من زمان
ليلي: طيب هو باين هو ايه؟ ولد او بنت؟
الدكتوره: يفرق؟
ادهم: ما اعتقدش تفرق ولد او بنت الاتنين نعمه من ربنا
الدكتوره: اهو يا دكتوره شوفي بنفسك
ليلي بصت وابتسمت
ادهم: انا مش فاهم
ليلي: ولد يا ادهم
ادهم: طيب الحمد لله كل اللي يجي كويس... بس برضه يا دكتوره هيا تعبانه
الدكتوره كملت كشفها وحجزتها بحيث تعلقلها كذا محلول يغذوها شويه
دخلوها اوضه وادهم معاها وعلقولها محاليل وسابوهم لوحدهم
ليلي كانت عايزه ترجع تاني وادهم سندها وعدلها ترجع في باسكت ونومها تاني
فضل طول الليل واخدها في حضنه واخيرا بعد الفجر
ناموا وهيا في حضنه
الصبح ادهم صحي علي صوت الممرضه عايزه تشيل المحلول من دراع ليلي وتغيره

ليلي كمان صحيت: لا استني ما تحطيش محاليل دلوقتي
ادهم: ليه؟
ليلي: عايزه ادخل الحمام واقوم كده شويه ونبقي نحطه.. معلش تعالي بعد شويه كده
الممرضه: خلاص يا دكتوره
ليلي جت تقوم مقدرتش فادهم سندها وقومها وفضل جنبها طول الوقت وجه الفطار وحاول ياكلها
كانت بتبصله باستغراب قوي وافتكرت كلام اخوها ان ادهم مش هيتأخر عنها لو هيا احتاجتله
حست قد ايه هيا بتغلط في حقه ديما
ادهم ملاحظ نظرتها
ادهم: ايه؟ وصلتي لفين؟
ليلي: هاه؟ لا ما وصلتش
ادهم: انتي بقالك عشر دقايق سرحانه
ليلي: مستغربه انت مكنتش بتكلمني حتي! ومن امبارح مسبتنيش؟
ادهم: انتي مراتي ومسؤله مني وانا بحبك ده شيئ ما انكرتوش ابدا وما تهنيش عليا وما يهنش عليا تعبك بس ده مش معناه اني سامحتك
ليلي: يعني لما نرجع البيت هتكمل زعلك؟
ادهم: ربك يسهل
ام ليلي اتصلت ببنتها و ادهم رد عليها وقالهم انهم في المستشفي وجولها طبعا
ادهم خرج يجيبلهم قهوه
مصطفي: ايوه قولتلك اعملي تعبانه بس مش لدرجه المستشفي؟
ليلي: لا تمارضوا فتمرضوا
مصطفي: قصدك ايه؟
ليلي: قصدي اني علشان كنت ناويه امثل اني تعبانه فربنا قال وتمثلي ليه خليها بجد... تمارضت ومرضت بجد شفت بقي
مصطفي: يعني انتي تعبانه بجد؟ لا لا الف سلامه عليكي؟ بس جايب نتيجه اهوه خطتي صح؟
عم محمد: غبي من يومك وافكارك غبيه ديما... ولما ترجع البيت وتبقي كويسه لو رجع تاني تبقي تعمل ايه؟
مصطفي: الحمل كله تعب
عم محمد: انت مش وراك شغل يالا علي شغلك يالا انت وافكارك دي يالا
ادهم رجع وعم محمد اعتذرله علي غباؤه والدكتوره جت وسمحت لليلي تروح
واخيرا وصلت بيتها وادهم انتهز فرصه وجود ناديه واعتذر وراح شغله
رجع اخر النهار لما ناديه كلمته وقالتله انهم هيروحوا
رجع لمراته وفضل معاها
ليلي: علي فكره يا ادهم انا بقيت كويسه
ادهم: بمعني؟ مش عايزاني افضل
قاطعته: اوعي تكمل انا عايزاك علي طول وانت عارف ده كويس بس مش عيزاك تقعد علشان انا تعبانه فلو ده اللي مقعدك انا كويسه
ادهم فضل يبصلها شويه كتير وبعدها قام وقف وهيا عنيها متعلقه بيه
ادهم: هدخل اخد شاور انا من امبارح بره البيت
سابها في حيرتها ودخل وهيا مش عارفه هيفضل ولا هيمشي ولا ايه بالظبط؟
ادهم خرج وقعد جنبها
ادهم: عايزاني اعملك حاجه قبل ما انام انا مطبق من امبارح يدوب نمت دقايق؟
ليلي: لا تسلم بس انا مش فاهمه؟
ادهم: مش فاهمه ايه؟
ليلي: انت مصالحني ولا انت زعلان ولا ايه؟
ادهم: ما انا قلتلك اني مش هسامحك
ليلي: امال انت جنبي ليه؟
ادهم: اقوم؟
ليلي: لأ... بس برضه مش فاهمه؟
ادهم قام واتعدل: ولا انا فاهم خلاص؟ انا مش مسامحك بس برضه مش عايز نفضل كده بصي انا مش فاهم علشان افهمك... اول ما افهم هفهمك تصبحي علي خير
ليلي سكتت وهيا مش عارفه ومش فاهمه
فضلت كتير راقده وساكته وهو ساكت بس صاحي
ليلي: طيب في حاله عدم الفهم دي ينفع انام في حضنك ولا؟

رواية العنيد بقلم الشيماء محمد الجزء الثاني

الفصل الخامس

ادهم وليلي شويه شويه بيتجاهلوا اللي حصل ورجعوا لحياتهم الطبيعيه
ادهم طول فتره الحمل وهو جنب مراته مبيبعدش الا لو عنده مهمه او شغل
ليلي استمتعت جدا بحملها جنب جوزها
كانت في الشهر السابع
ليلي: ادهم عايزه اقولك حاجه مهمه
ادهم: قولي يا قمر
ليلي: عايزاك تكون متفتح
ادهم ساب كل اللي في ايده وبصلها: متفتح؟ انا متفتح اهوه قولي
ليلي: يعني بص انا حاليا مش بشتغل كتير ومش بقدر ادخل عمليات كبيره لانها بتاخد وقت كبير
ادهم: اممم وبعدين؟ هاتي من الاخر
ليلي: يعني قصدي مش بستفاد حاجه الفتره دي قوي
ادهم: ليلي! مقدماتك كترت
ليلي: ماهو انت لازم تبقي فاهم الموضوع كله
ادهم: طيب ما تقولي الموضوع الاساسي وبعدها استفيضي بالشرح
ليلي: المهم في فرصه اني استفاد كويس قوي
ادهم: طيب كويس ايه بقي هيا الفرصه دي؟
ليلي: السؤال الصح فين مش ايه
ادهم: طيب يا ليلي فين؟

ليلي: هيا في... في...
ادهم: هتنجزي ولا اقولك لأ ونخلص من القصه دي؟
ليلي: مؤتمر في جامعه واشنطن
ادهم تنح: جامعه واشنطن؟
ليلي: اهممم
ادهم: جامعه واشنطن دي اللي في سياتل صح؟
ليلي: صح؟
ادهم: سياتل اللي في امريكا صح؟
ليلي: عارفه ان الموضوع استيعابه صعب فكره مجنونه صح؟ خلاص اعتبرني مقولتش حاجه
ادهم: استني اقعدي هنا... انا مش معترض علي الفكره... انا معنديش مانع نهائي...
ليلي: امال اعتراضك علي ايه؟
ادهم: علي حملك... انتي واخده بالك هتركبي طيران قد ايه؟ هتقدري تسافري في حالتك دي؟ انتي بتقولي ما بتقدريش تدخلي عمليات طويله... الطياره وحدها تقعدي فيها اكتر من 12 ساعه... وهناك هتعملي ايه لوحدك؟ ليلي التوقيت غلط... روحي في اي مؤتمر تاني بعد ما تقومي بالسلامه
ليلي: لا يا ادهم انا عايزه اروح ده... ده ملتقي لكل دكاتره الجراحه وبعدين هناك مستشفي سياتل اكبر مستشفي جراحه في العالم علشان خاطري
ادهم: وبطنك اللي قدامك دي؟
ليلي: ملكش دعوه ببطني انا عارفه انا بعمل ايه؟
ادهم: ماليش دعوه امال مين اللي له دعوه؟
ليلي: يعني انا عارفه هستحمل ايه ومش هستحمل ايه؟ ولا انت عامل علي المصاريف
ادهم: لا طبعا هو انتي كل يوم يعني بتروحي مؤتمر؟
ليلي: احنا الاقامه علي المستشفي احنا علينا بس التذاكر
ادهم: مقدور عليها ما تقلقيش بس برضه مش ده اعتراضي
ليلي: ما تخافش عليا
ادهم: واخاف علي مين لو مش هخاف عليكي؟
ليلي سكتت جوزها بطريقتها الخاصه هو وافق بس قلقان
ليلي سافرت وادهم وصلها للمطار وهو اللي حس بغربه فظيعه اول ما هيا سافرت
مكنش عارف يدخل البيت وهيا مش فيه... حس قد ايه حياته فارغه من غيرها وملهاش معني ولا لون ولا طعم...
طول الليل بيفضلوا يتكلموا مع بعض اهو يهونوا شويه
عدي شهر بحاله لان ليلي فضلت تقعد في المستشفي بتاعت سياتل تتعلم فيها هيا وصحباتها واداره المستشفي وافقت تستقبلهم
ليلي: هانت اهي حبيبي كلها يومين بس وراجعين
ادهم: حملك اخباره ايه؟
ليلي: تمام مش انا عملت اشعه 3D وشفته يا ادهم بيلعب جوه
ادهم ضحك: كوره ولا سله؟
ليلي: بيطنطط...وبيسوق مش عارفه بيسوق ايه بس اهو بيسوق وخلاص
ادهم: عندي ليكي مفاجأة
ليلي: ايه هيا؟
ادهم: بقولك مفاجأة
ليلي: طيب لمحه
ادهم: لأ هتعرفيها في وقتها
ليلي: طيب وقتها امتي؟
ادهم: برضه هتعرفيه لما تشوفي المفاجأه
ليلي: يووووه هتجننيني كده
ادهم: ماهو انتي علي طول مجنيناني جربي بقي
تاني يوم اخر النهار ليلي وصحباتها اللي اتعرفت عليهم هناك من كل ال**يات قاعدين بيتعشوا في الفندق
ساره و سالي و ريبيكا و جميله و كريستينا و ناديا
كانو بيتكلموا كلهم مع بعض وبيهزروا كلهم بتجمعهم لغه واحده وهيا الانجليزيه ( الحوار كله بالانجليزي)
ريبيكا: وااو شوفوا الوسيم اللي داخل ده
كلهم بصوا ما عدا ليلي ما اهتمتش لانها جعانه جدا وبتاكل بشرهه
كريستينا: بيدور علي حد... اعاكسه يمكن يجي يقعد معانا..؟
سالي: مجنونه انتي ولا ايه؟ انا اللي هاخده واطلع بيه فوق

ضحكوا كلهم وبيتغزلوا فيه
جميله: انتي ما راح تبطلي اكل شوي وتشتركي معانا في هاالحوار؟
ليلي: بتعاكسوا في راجل انا مال اهلي
جميله: ماهو اي رجال هو شي مختلف عن كلياتهم
ليلي: مختلف ولا مو مختلف شو دخلني انا
جميله: والله واتعلمت تحكي لبناني انتي
كريستنا: اتكلموا بحيث نفهمكم بلاش العربي
ليلي: بتعاكسوا في راجل انا مالي
كريستينا: ده وسيم لدرجه تجنن وشكله بيقول انه مش امريكي بصيله انتي
ليلي بصت بلامبالاه للراجل اللي بيحكوا عنه واتقابلت عنيها في عنيه وقلبها كان هيخرج من مكانه
بقي معقول ادهم قدامها
ساره: اتسحرت البنت وهتسيب جوزها وتروحله
كلهم: هههههه عهههههه
ليلي فعلا قامت من مكانها وراحت ناحيته وصحباتها بيحاولوا يوقفوها
ليلي وقفت قدام ادهم وهيا مش مصدقه اصلا
ادهم طلع من جاكته ورده حمرا جميله وعطاهالها
اخدتها وضحكت
ادهم: ايه رأيك في المفاجأه؟
ليلي: وحشتيني قوي قوي
ادهم بصلها بحب وقرب منها هيبوسها
ليلي: هتعمل ايه؟
ادهم: انتي هنا مش في مصر
وباسها بحب وصحباتها فاتحين بوقهم ومتنحين ومش مستوعبين اصلا
ادهم: وحشتيني قوي... هو البنات دول مركزين معانا قوي كده ليه؟
ليلي بصت وضحكت: دول صحباتي وبيعاكسوا فيك من ساعت ما دخلت وبيتخانقوا مين فيهم اللي هتاخدك لاوضتها
ادهم: بجد!؟ انا ممكن اخدهم كلهم عادي يعني
ليلي ضربته وسابته وماشيه راح ماسكها واخدها في حضنه
ادهم: انتي عارفه اني بهزر
ليلي: تعال اعرفك عليهم
ليلي شدته وراحو لاصحابها اللي الدهشه مسيطره عليهم
ليلي: ده ادهم جوزي يا مجنونه منك ليها
سالي ساره ناديا كريستينا جميله
ادهم سلم عليهم كلهم وعزموا عليه يقعد معاهم بس هو اعتذر انه تعبان وعايز يريح
اخد مراته وطلعوا الاوضه اللي هو حجزها
وبعد وقت طووووويل
ليلي: هو انت جيت ازاي؟
ادهم: ركبت الطياره وجيت
ليلي: ما اناعارفه انا قصدي يعني ازاي؟ اخدت اجازه؟ عملت ايه؟ اشرحلي بالتفصيل
ادهم: اخدت اجازه يا ستي عشر ايام وقولت نقضيهم انا وانتي فسحه قبل ما البيبي يجي لاني اعتقد انه بعد ما يجي هياخدك مني شويه فقلت الحقلي يومين بقي اتمتع فيهم
ليلي: مفيش حد في الدنيا يقدر ياخدني منك
ادهم: مفيش غير حد واحد بس
ليلي: تقصد مين؟
ادهم: اقصدك انتي... انتي الشخص الوحيد في الدنيا دي كلها اللي يقدر ياخدك مني
ليلي: وانا مش هاخدني منك اتفقنا؟
ادهم: اتفقنا
ليلي خلصت شغلها وخرجوا اول يوم مع صحباتها اللي كانوا بيعاكسوا ادهم قدامها كانت هتغير بس حست ان ادهم واخد الموضوع بهزار ومش مهتم باي واحده فيهم وحبه ليها ظاهر فكبرت دماغها
كانوا بيتفسحوا طول الوقت
ليلي: ادهم نفسي اروح مكان فيه ثلج
ادهم: نعم ثلج... ده انتي في الشتا العاديه بتبقي ناقص تولعي في الشقه تقوليلي اروح مكان فيه ثلج اتجننتي ولا ايه؟
ليلي: علشان خاطري

ادهم: ليلي انتي قربتي تولدي لمي الدور بقي
ليلي: انا لسه هبدا في التاسع يعني 3 اسابيع حد ادني علشان خاطري بقي... في مكان هنا قريب فوق الجبال فيه منتزه بيرحوا يتزلجوا فيه
ادهم: انتي عايزه تتزلجي؟،؟
ليلي: مش لازم بقي تزلج المره دي
ادهم: لا والنبي اتزلجي والنبي والنبي والنبي
ليلي:هههههههعه انت بتعمل كده ليه؟ انا لو هتزلج هيبقي معاك وانت هتبقي ماسك ايدي

ادهم: انا هحجز علي اول طياره لمصر... قال تتزلج قال
ليلي: لا لا خلاص بهزر مش هتزلج بهزر والله
ادهم: انتي عارفه قمه المحترفين في التزلج بيوقعوا وبيتشقلبوا وبيتكسروا
ليلي: خلاص بقي وديني علشان خاطري
ادهم: لما نشوف واخرتها معاكي ايه؟
ادهم فعلا وداها لاقرب بلد فيها ثلج
ليلي مكنتش متخيله البرد هيبقي ازاي واول ما نزلت انبهرت بكميه اللون الابيض اللي شيفاه ده بس هتموت من البرد واسنانها عامله احلي مزيكا وادهم بيضحك عليها
ادهم: تصدقي انا فرحان فيكي تستاهلي
ليلي: ا.. د..ه..م
ادهم ضحك بصوته كله: تعالي جوه
اخدها ودخلوا الفندق واول ما دخلت حست شويه بالدفا
طلعوا اوضتهم وليلي قعدت قصاد النار اللي جوه الدفايه
ادهم: ايه مش هتخرجي تتفسحي
ليلي: لا اتفسح مين؟ وبعدين انت غلطان
ادهم: نعم يا اختي انا؟
ليلي: ايوه انت انا متخيلتش كميه البرد دي لكن انت مجربها
ادهم: وانا مقولتلكيش؟ قولتلك برد مصر ما بتستحملهوش وده اضعاف مضاعفه
ليلي: لا ده مش اضعاف... اصلا مفيش وجه مقارنه
ادهم: يعني انتي عارفه ايه؟ التلج مالي الشوارع والشوارع بيضا من ايه؟ يعني ايه ما تخيلتيش؟
قومي بس نخرج نتمشي وانتي جسمك هياخد علي الجو ده
ليلي: لا شكرا انا قتيله النار دي... انا هاكل وهشرب هنا حتي الحمام هعمله هنا
ادهم: اهههههه هتعمليه ازاي بقي هنا؟
ليلي: هلبس بامبرز؟ هجيب قصريه بتاعت عيال؟ هتصرف المهم مش هتحرك من هنا
ادهم كان هيموت من الضحك عليها غير هدومه وطلع بره البلكونه من غير جاكت بتيشرت نص كم
ليلي: اقفل الباب ده
ادهم بصلها وابتسم: مش للدرجه دي
ليلي قامت وقفلت الباب ووقفت قصاد القزاز وجوزها بره وبيعاكسها من وري القزاز
فضل يحط ايده علي القزاز وهيا من جوه ماشيه بايدها وري ايده
رسمت قلب وهو مشي عليه من بره باسته من القزاز وفضلوا يضحكوا ويهزروا لحد ماهو دخلها واول ما لمسها صرخت
ليلي: لا جسمك كله متلج روح دفيه الاول
ادهم قعد جنب النار وهيا جت قعدت في حضنه
قضوا يوم كامل معسكرين قدام النار وتاني يوم
ادهم: يا تخرجي يا انا هخرج انا مش حابب الحبسه دي
ليلي: ما احنا في شهر العسل كنا بناخد يومين تلاته ما نخرجش بره الاوضه
ادهم: شهر العسل كان حاجه ودلوقتي حاجه
ليلي: ايه المختلف؟
ادهم: انتي مش عارفه ايه المختلف؟
ليلي: انت متضايق ان انا حامل؟
ادهم: تاني يا ليلي؟ انا مش متضايق بس انتي بتقولي ايه المختلف قولتلك
ادهم اخدها وخرجوا وهيا فعلا مع الحركه بدأت تستمتع بالمكان والاسواق
اخيرا روحوا وسهروا وشربوا حاجات كتير غريبه من البلد اللي هما فيها وناموا
صحي ادهم باحساس غريب جواه وليلي صحيت
ليلي: في ايه مالك؟ مش مظبوط ليه؟
ادهم: مش عارف في حاجه مش صح؟
ليلي: ايه اللي مش صح؟
ادهم بيرفع ايده لقي كلبش في ايده ومكلبش مراته معاه فاتنفض وهيا كمان
ليلي: مين كلبشنا كده؟
ادهم: قومي بسرعه البسي شوزك
ادهم لبس ولبسها بسرعه ويدوب هيفتح الباب قفله تاني
ليلي: في ايه؟
ادهم شدها علي البلكونه ووقف يفكر هينزلوا ازاي
ليلي: ادهم بتفكر في ايه؟
ادهم: شوفي احنا هنمشي علي السور ده لحد الاوضه اللي هناك فهمتي يالا
ليلي: انت متخيل ان انا ممكن امشي علي الحته الضيقه دي وعلي ارتفاع عشر ادوار يا ادهم انا حتي لو مش حامل مش هقدر
ادهم: ليلي مفيش وقت وانا معييش سلاح يالا وبعدين احنا متكلبشين يعني حد بالليل خدرنا وكلبشنا يعني مكاننا معروف اتحركي بسرعه
ليلي: ادهم؟
ادهم: انتي مربوطه فيا ما تقلقيش
ادهم طلع علي السور وطلع ليلي معاه وهيا هتموت من الخوف
فضل ماشي واحده واحده وهيا جنبه لازقه في الحيطه وطول ماهو ماشي
ادهم: لازم نشوف الشروق من الدور العاشر ماينفعش من الارضي ماهو كله شروق
ليلي ؛ انت بتتريق دلوقتي يا ادهم وقته ده
ادهم: ما تبصيش لتحت
اخيرا وصلوا لشباك ادهم زقه ونط وشالها دخلها
وخرجوا من الاوضه فاتنين ضربوا عليهم نار وجريوا عليهم
ادهم وقف وليلي وراه متدارين في الحيطه
واستناهم لحد ما وصلوا فضربهم واخد السلاح منهم
ليلي: ادهم في ايه؟
ادهم مش بيرد شدها وراحوا للسلم بس لقي كتير مسلحين طالعين
ادهم: الطريق ده مقفول
ليلي: ناخد الاسانسير
ادهم: لا ما ينفعش ممكن يفصلوه بسهوله
جريوا وادهم بيشدها
ليلي: انا مش قادره اجري... اجري انت
ادهم: مش هينفع اسيبك هنا اتحركي يالا
طلعوا كام واحد وادهم حركته متربطه بسبب مراته اللي في ايده
ادهم: ليلي مفيش غير طريق واحد يالا
ادهم بيجري في طرقه طويله وفي شباك قزاز قدامه وهو ضربه بالرشاش اللي اخده من واحد من اللي قتلهم ونزل القزاز كله
ليلي: ادهم هتعمل ايه؟ لااااااااااااااااااااا
ادهم نط بليلي من الدور العاشر والارض تحته تلج وهيا بتصرخ
وهما نازلين كان بيضرب الارض بالرشاش في كل حته تحتهم بحيث يكسر التلج لحد ما لمسوا الارض وطلع تحت التلج ده ميه عاموا فيها
طبعا الميه كلها تلج وليلي اغمي عليها فادهم شالها وطلعها بره
واقرب عربيه كسر قزازها وحطها وبالمسدس اللي معاه كسر الكلبش اللي بين ايديهم
ودور العربيه وطلع بعيد عن المكان ده واول ما بعد وقف جنب كوخ صغير شكله مهجور
نزل وشال مراته ودخلوا وحاول بسرعه يولع نار وبدا يفوق مراته ويدفيها
قلععا هدومها المبلوله وقلع هو كمان هدومه ولقي بطانيه غطاها بيه واخدها في حضنه علشان يدفيها
فاقت وبصتله: احنا فين؟
ادهم: معرفش بس لازم نتحرك بسرعه
ليلي: مين دول وعايزين ايه منك؟
ادهم: معرفش لازم اتصل بشغلي علشان اعرف ايه اللي بيحصل...
قاموا وكملوا طريقهم ووصلوا لاقرب تليفون فاتصل بمديره
المدير: انت عملت ايه؟ وايه كميه الجثث اللي سيبتها في الفندق دي وبعدين انت كنت نازل باسمك؟
ادهم: اولا دول هاجموني وانا دافعت عن نفسي وبعدين لا انا ما نزلتش باسمي طبعا ولا اسم مراتي بس افهم في ايه؟
المدير: في ان وجودك اتعرف ودول اعتقد انهم روس عايزين يصفوك
ادهم: طيب ليه؟
المدير: اشاعه طلعت ان انت موجود هناك والكل عمل طوارئ ومستغرب انت هناك ليه وبالتالي مش دول بس اللي هيواجهوك فخلي بالك
ادهم: اخلي بالي ايه؟ انا مراتي معايا انا لازم اخرج من البلد دي بسرعه
المدير: لازم ترجع سياتل تاني ومن هناك احنا نأمنلك وسيله خروج لكن من عندك صعب دي بلد صغيره
ادهم: هحاول اكلمك في اقرب وقت
المدير: ادهم هتلاقي في العنوان ده حد هيأمنلك سلاح او مواصلات او اي حاجه تحتاجها
ادهم: خلاص ماشي
ادهم رجع لمراته اللي شكلها تعبان
ليلي: عرفت ايه؟
ادهم: ولا حاجه مهمه لازم نلاقي طريقه نرجع بيها سياتل
ليلي: طيب ناخد عربيه ونتحرك اوطيران
ادهم: الاسم اللي احنا جينا بيه مش هينفع نمشي بيه لانه خلاص اتكشف ومفيش حد هنا نعرف نعمل عنده جوازات نمشي بيها فلازم ما نمشيش في اماكن عامه انا عارف ان غلط الحركه بيكي كده مش عارف انا ليه سمعت كلامك

ليلي: انت بتلومني انا دلوقتي؟
ادهم: امال الوم مين هاه؟ لو تعبتي دلوقتي اعمل ايه هاه؟ اروح بيكي فين؟ ولو جرالك حاجه اواجه نفسي ازاي؟ مش عارف انا عقلي كان فين؟
اخدها ومشيوا لحد ما وصلوا العنوان اللي المدير عطاهوله
ليلي: ايه المكان ده؟
ادهم: مكان امن او ده المفروض استنيني هنا
ليلي نزلت قبله
ادهم: مش وقته
ليلي: مش هفضل لوحدي في العربيه
ادهم: ولو في حاجه جوه؟
ليلي: انت هتتصرف لكن مش هفضل لوحدي
ادهم عارف انها ما بتقتنعش بالكلام فسكت وهيا وراه
دخلوا جنينه البيت اللي كان في مكان مقطوع
واول ما وصلوا للباب اتفتح وطلع واحد كبير شويه في السن ومعاه بندقيه
ادهم: استني
الراجل لمح ليلي وراه ببطنها دي والتعب اللي باين عليها فنزل سلاحه وبصلهم
ادهم: انا عرفت ان ده مكان امن
الراجل: ده يتوقف علي انت مين؟
ادهم: انا X3
ليلي بصتله باستغراب لانها اول مره تعرف اللقب ده
الراجل باستغراب: انت X3؟
ادهم: ايوه انا
الراجل: ومين دي اللي معاك؟ X3 عاده بيكون لوحده
ادهم: دي مراتي وانا هنا في فسحه مش شغل وفجأه ابواب جهنم اتفتحت علينا وهيا زي ما انت شايف تعبانه ومش عارف اخرج بيها
الراجل: ادخل ودفي مراتك
ادهم دخل هو وليلي بحذر وليلي قعدت قصاد النار
الراجل: اقعد ما تخافش هنا امان فعلا... عملت ايه قلبت المكان عليك؟
ادهم: انا في اجازه معملتش بس الدنيا اتقلبت لوحدها
الراجل: مراتك هتولد امتي؟شكلها تعبان وما اعتقدش انك هتقدر توديها مستشفي
ادهم بص لمراته بقلق
ليلي: انا كويسه ماتخافش
الراجل جابلوهم هدوم واكل ووري ادهم مكان السلاح اللي ممكن يحتاجه
ورجعوا تاني لليلي اللي نايمه قدام النار
الراجل: انت متأكد انها كويسه؟
ادهم: لا طبعا مش متأكد ومش عارف لو تعبت هعمل ايه؟
الراجل: في طريق ممكن توصل منه سياتل بس محتاج مشي كتير وسط غابه
ادهم: نمشي فيه قد ايه؟
الراجل: في الطبيعي يومين يعني ده لو انت لوحدك
ادهم: وبمراتي؟
الراجل: مش اقل من تلات ايام ده اذا استحملت الطريق والمشي والبرد ؟
ادهم: لا طبعا انا كده بقتلها
الراجل: ومش هينفع تفضل هنا كتير والطرق كلها اتقفلت فقرر هتعمل ايه؟
ادهم ماسك راسه بايديه مش عارف يتصرف
الراجل: تعرف انك شبه ابوك كتير
ادهم بصله باستغراب
ادهم: ابويا؟ وانت تعرف ابويا منين؟ ؟

الراجل: انا وابوك اصحاب جدا
ادهم: قصدك كنتوا؟
الراجل: اه اه كنا المهم قررت تعمل ايه؟
ادهم: علي فكره انت مقولتليش اسمك ايه؟
الراجل: ولا انت قولت اسمك؟
ادهم: انت عرفت لقبي وبعدين انت بتقول انك تعرف ابويا يبقي لازم تبقي عارف اسمي
الراجل: هههههه انا فعلا عارف اسمك يا ادهم مش ده اسمك برضه؟ علي العموم انا فوكس
ادهم: انت فوكس؟ الثعلب؟ اسمك له وزنه في عالم المخابرات... بس تعرف ابويا منين؟
فوكس: هو عالم المخابرات معلمكش انك ما تسألش كتير علي العموم انا اسمي يوسف او جوزيف زي ما بيقولولي هنا وكنت اعرف ابوك وانا لسه في مصر زمان قوي... كان ليك اخ واخت اخبارهم ايه؟ كبروا واتجوزوا زيك؟
ادهم بصله بوجع: هو عالم المخابرات معلمكش انك ما تسألش كتير ولا ايه؟
جوزيف: ماشي براحتك قوم اتطمن علي مراتك
ادهم راح لمراته اللي كانت صاحيه وسمعاهم
ادهم: انتي كويسه؟
ليلي: لا مش كويسه هتعمل ايه؟
ادهم: مش عارف يا ليلي مش عارف
ليلي: طيب ناخد الطريق اللي قال عليه؟
ادهم: انتي هتقدري تمشي تلات ايام بلياليهم يا ليلي؟ ليلي انتي بتتعبي من نص ساعه مشي
ليلي: ربنا هيقف معانا وهيسهلها يا ادهم بس انت انوي وتوكل

ادهم: انتي مش متخيله صعوبه الموضوع زي ما مكنتيش متخيله البرد ازاي مش هقدر اسافر بيكي كده نهائي هشوف طريق تاني
ادهم حاول يشوف طريق تاني بس كل الطرق متقفله في وشه ومكنش قدامه غير انه يعدي وسط الغابات
جوزيف: انا هوصلك متقلقش
ادهم: مش ده اللي قالقني
جوزيف: عارف وان شاءالله ربك هيسترها
بدؤا رحلتهم وليلي فعلا تعبت جامد منهم وكل ساعتين يضطروا يقفوا
جوزيف: مراتك مش هتقدر تكمل الطريق يا ادهم
ادهم: اعمل ايه؟ قولي اعمل ايه؟
جوزيف: مفيش حاجه تقدر تعملها حاليا غير انك تدعي ربك يسترها يالا
ادهم بيسند مراته وبيشيلها وكل شويه يحاول يريحها
بالليل وقفوا يريحوا في الطريق بس ليلي من التعب مقدرتش تنام او ترتاح
ادهم: ليلي احنا لازم نتحرك يالا
ليلي: اه يالا
قامت متسنده علي جوزها اللي كان عايز يعيط من تعب مراته
ماشين وشويه وراح لجوزيف
ادهم: هو انا ليه حاسس ان اننا متراقبين؟
جوزيف: لاننا فعلا متراقبين دول سكان القبيله هنا وربنا يسهل ويسيبونا نعدي في اراضيهم
ادهم ماشي جنب مراته وهو عينه علي اللي مراقبينهم
اللي فجأه هجموا عليهم ولفوا حواليهم بصرختهم المعهوده وليلي خافت قوي ولزقت في جوزها
ادهم كان هيضرب عليهم نار بس جوزيف مسكه ومنعه
جوزيف: لا هما اكتر مننا وهيغلبونا بسهوله
ادهم: والمفروض نعمل ايه؟
جوزيف: هما ما بيحبوش الحكومه والجيش وانت وجود مراتك هيفيدنا وهيسمعونا ومش بعيد يساعدونا كمان
جوزيف اتواصل معاهم بلغه غريبه
ادهم: ايه اللي بيحصل؟
جوزيف: هنروح معاهم يالا
راحو كلهم للقبيله بتاعتهم والكل بيتفرج عليهم والقائد بتاعهم كان واحده ست كبيره واستغربت من وجود ليلي الحامل دي
جوزيف شرحلهم وضعهم وانهم عايزين يرجعوا بلدهم بس الحكومه بتضايقهم لمجرد انهم غريبين عن البلد ومش من اهلها
رئيسه القبيله قررت تستضيفهم وتساعدهم والاول عرضت عليهم خيمه يرتاحوا فيها وادهم من نظره لمراته عرف انها محتاجه للراحه دي
ليلي نامت كتير وادهم مستنيها تفوق علشان يكملوا طريقهم
رئيسه القبيله كانت عايزه ليلي تفضل لولاده البيبي لانها بتقول انها خلاص هتولد وحاولت تأخرهم بس ادهم رفض يقعد
ادهم: ليلي انتي حاسه انك هتولدي؟
ليلي: لا انا كويسه جدا ما تخافش
مشيوا في طريقهم بس ليلي وصلت لمرحله تخطت التعب والوجع وحست بألم ولاده بيهاجمها وهيا كدكتوره عرفت ان ده طلق ولاده
بس قررت انها لازم تستحمل لاخر لحظه
فضلت ماشيه خطوه تقدمها وخطوه تأخرها والوجع بيزيد ويزيد لحد ما وصل لدرجه فوق التحمل
وقفت مكانها ولا قدرت تقعد ولا قدرت تتحرك
ادهم: في ايه مالك؟ ليلي ردي عليا
كانت بتتنفس بسرعه وعايزه تنظم نفسها بس مش عارفه فبتتنفس بصوت عالي
جوزيف: اعتقد انها بتولد
ادهم: ليلي؟ ردي عليا مالك؟
ليلي: حاولت... حاولت بس مش قادره... مش قادره اكتر من كده يا ادهم... مش قادره
كانت بتتكلم وتعيط ومش قادره تتحمل
ادهم هنا حس بقمه العجز ومش عارف يعمل ايه نهائي؟ واقف جنبها متجمد عقله عاجز عن التحليل او الاستيعاب تماما
جوزيف: ادهم! مراتك بتولد
ادهم: اعمل ايه؟ المفروض اعمل ايه؟
جوزيف: الاول هتنومها علي ظهرها وهنحاول نستعد نستقبل البيبي
ادهم: انت عايزني اولدها هنا!؟
جوزيف: عندك حل تاني؟
ادهم: نرجع لبتوع القبيله
جوزيف: ليلي تستحملي خمس ساعات نرجع فيهم؟ ليلي: لألألألألألألأ... هولد دلوقتي... ااااااه... ادهم اعمل اي حاجه نزله مني مش قاااااادره
ادهم واقف ومش عارف اصلا يعمل ايه؟
جوزيف: ادهم اتصرف
ادهم: انا ما ولدتش قبل كده
جوزيف: انت ادربت قبل كده علي كل حاجه حتي الولاده يالا ساعد مراتك
جوزيف جهز قميص يلفوا فيه البيبي وطلع عده الاسعافات الاوليه اللي معاهم
ادهم واقف مع مراته وبيحاول يساعدها وهيا بتصرخ وهو ماسك نفسه ما يعيطش معاها مع كل صرخه
ليلي بعد فتره طووووووويله وهيا حاسه انها هتموت
ليلي: ادهم في حاجه غلط انا هقولك تعمل ايه؟
ليلي شرحت لادهم وهو بينفذ كلامها
ليلي: الرحم فاتح كويس معني كده ان في حاجه غلط جوه
ليلي عيطت جامد
ادهم: ليلي ليلي متعيطيش قولي نعمل ايه؟
ليلي ضحكت بعياط: انا محتاجه اولد قيصري هتعرف؟
الاتنين سكتوا وبصوا لبعض
جوزيف شد ادهم
جوزيف: معانا مشرط ومورفين و ممكن
قاطعه: انت اتجننت؟ انت عايز تفتح بطنها هنا؟ انت مش متخيل انت بتقول ايه صح؟
يدوب ادهم هيمشي فشده
جوزيف: فكر بعقلك مش عواطفك
ادهم: حاضر هفكر بعقلي... هنفتح بطنها وبعدين؟ مفيش بنج... فتحناها وطلعنا البيبي... هنخيطها بايه؟ هنمنع النزيف بايه؟ هنوصلها المستشفي ازاي؟ جاوبني ياللي بتفكر بالعقل
جوزيف: واعتقد برضه ان لو البيبي فضل جواها يبقي بتخاطر بيهم هما الاتنين؟
ادهم: لا بخاطر بالبيبي بس... ولو هختار بينهم هختار مراتي اوك؟
ليلي بتعيط وصرخت وادهم جري عليها
ليلي: هو عنده حق انت لازم تنزل البيبي يا ادهم... الطلق هيفضل مستمر ومش هينزل وقلبي مش هيستحمل الاجهاد ده... هتخسرنا احنا الاتنين
ادهم: المفروض اعمل ايه؟
ليلي: هتفتح بطني وتنزل البيبي
ادهم: وعلي افتراض اني عرفت افتح بطنك هنمنع انك ما تنزفيش ازاي؟
جوزيف: نكوي الجرح!
ليلي: اهو قالك ادهم انا عارفه ان الموضوع صعب عليك بس ارجوك حاول تنقذ ابني
ادهم مسك مراته: حبيبتي اسمعيني... استحملي شويه كلها كام ساعه وهنوصل خلاص انا هشيلك ومش هقف ولا هريح لحد ما اوصلك المستشفي اتفقنا؟
ليلي: ابنك هيتخنق ومش هيوصل ابدا

ادهم: نعوضه مش مهم... انا مستعد لاي خساره غيرك انتي فاهمه؟
ليلي: انا كمان مش هوصل ارجوك لازم تعمل كده
يالا وهقولك تعمل ايه يالا
ادهم متردد وخايف ومش عارف وجوزيف بيشجعه
ليلي: عقم المنطقه وافتح... الرحم حاول ما تفتحش كتير يدوب راسه تعدي باقي جسمه سهل هتكوي الجرح بعدها وده هيوقف النزيف وهتلزق الجرح باي حاجه مؤقتا... خلي بالك انا هيغمي عليا فمش هكون موجوده تسال... اه هتقطع الحبل السري لابنك وتربطه كويس ماشي وتلفه كويس وتخلي بالك منه مفهوم؟
ادهم: انا مش هقدر اعمل اللي انتو بتقولوه ده... ليلي انتي متخيله هتحسي بايه لما افتح بطنك كده؟
ليلي:معلش نستحمل يالا
ادهم: ليلي ده فتح بطن ومن غير بنج انتي فاهمه؟ ولا زي البرد هتقولي مكنتش متخيله؟
ليلي: انا دكتوره جراحه وعارفه ومفيش حل تاني ما تخافش عليا ولو حصل اي حاجه اوعي تلوم نفسك لومني انا... انا اللي اصريت اجي هنا وانا اللي ماسمعتش كلامك وانا اهو اللي بقولك افتح بطني فاهم؟ انت مالكش ذنب ابدا
ليلي عيطت وباست جوزها وكأنها بتودعه وداع صامت
ادهم حط المطهر الموجود علي الجرح وايده بتترعش ومسك سكينه في ايده لان المشرط هيكون صغير مش هيفتح لتحت
ادهم مش قادر يفتح بالسكينه بطن مراته ومش هاين عليه
جوزيف زقه وطلب منه يخلص عطي لمراته حقنه المورفين
مسك السكينه وهيبدأ يقطع في بطنها واول ما حطها صرخت بصوتها كله وادهم عيط كمان وهو بيقطع لحم مراته كده
وكل ما هيا تسكت هو يكمل لحد ما فتح بطنها وهو في سره بيدعي انها يغمي عليها بسرعه
جوزيف: اعتقد ان ده الرحم افتحه.
ليلي بصوت تايه: هو الرحم افتح... يالا
ادهم فتح تاني وهيا صرخت تاني بس المره دي اغمي عليها
ادهم شد البيبي من بطنها وجوزيف اخده وقطعوله الحبل وفضل يخبط علي ظهره لحد ما عيط ولفه بقميص كان معاهم
ادهم بص لايديه الغرقانه بدم مراته ووللحظه مش عارف يعمل ايه ببطنها المفتوحه قدامه
ادهم: اللي عملناه ده غلط... غلط جدا... حتي لو ما نذفتش لحد ما تموت هيتلوث الجرح... غلط غلط

جوزيف: مش وقته ده فوق لنفسك وتمالك كده... امسك ابنك
جوزيف عطاله البيبي وهو راح للنار اللي كانوا مولعينها وجاب السكينه الحمرا وبص لادهم اللي دور وشه بعيد
كوالها بطنها المفتوحه علشان يوقف النزيف وحاول يلم الجروح المفتوحه
وربط الجروح بشاش من علبه الاسعافات
وعطاها حقنه مضاد حيوي الموجوده في العلبه
جوزيف: ادهم قوم نتحرك لان حاليا بدأ العد التنازلي لحياتها قوم وأقف علي رجليك
ادهم حاول يقوم بس رجليه مش شيلاه
جوزيف اخد منه البيبي وادهم قام وقف وشال مراته المغمي عليه وبدؤا يتحركوا وطول الطريق دعاء صامت انه ما يوصلش بعد فات الاوان

رواية العنيد بقلم الشيماء محمد الجزء الثاني

الفصل السادس

ادهم شال مراته واتحرك بيها وما بيوقفش ولا بيريح وكانه اله اتصممت للحركه وبس
جوزيف: اوقف ريح شويه...
ادهم: لما نوصل اتحرك بسرعه يالا
جوزيف: لو انت وقعت ولا اغمي عليك يبقي كده حياه مراتك انتهت فماتكابرش... اوقف ريح ايديك وجدد طاقتك اوقف
ادهم: مش هينفع اوقف اتحرك
جوزيف: طيب اوقف انا اريح انا راجل كبير مش شباب زيك اوقف ناخد نفسنا وبعدين نطمن عليها ونشوف الجرح لتكون بتنزف اوقف
هنا فعلا ادهم وقف واول ما نزلها من ايديه حس ان ايديه وقفت ومش قادر حتي يتنفس
جوزيف: ريح ايديك شويه قوم انت انا هتطمن عليها
جوزيف فك الشاش واتطمن انها مش بتنزف
جوزيف: نفوقها شويه ولا ايه؟

ادهم: نفوقها تتوجع يعني ولا ايه؟ لا سيبها مغمي عليها كده... يالا
جوزيف: امسك كل ده الاول وما تعارضش انت عارف انك محتاج للطاقه علشان تقدر تكمل
ادهم شد من ايده الساندوتش واكله وشرب ميه
ادهم: هاه نكمل،،؟
جوزيف: اه هنكمل بس انا هشيل مراتك وانت شيل ابنك انت ايديك تعبت
ادهم: لا ملكش دعوه بايديا انا هشيل مراتي
جوزيف: هو انت علي طول معارض كده يا ابني اسمع الكلام خلينا نوصل وماتخافش انا مش عجوز قوي هقدر اشيلها اتحرك يالا
ادهم شال ابنه ومشي بيه ودي كانت اول مره ياخد باله ان ده ابنه كشف وشه الصغير وبصله
وحط ايده جنب ايده فمسك البيبي صباعه وقفل عليه وكأنه بيقوله انه عارف ومقدر وبيشجعه يكمل
ادهم دموعه نزلت بصمت وخاف ان ابنه يتيتم زيه ويتحرم من حنان الام
جوزيف لمحه وحاسس بيه ومش عارف يقوله ايه؟
جوزيف: فاضلنا ساعه بالكتير وهنوصل للنقطه اللي متفق عليها وهناك هنلاقي طياره خاصه مستنيانا
خلاص هانت متقلقش
ادهم اخد مراته بحيث يتحركوا اسرع
لحد ما اخيرا لمحوا الطياره اللي مستنياهم
جوزيف: استني انت هنا وانا هتاكد الاول اذا كانت هيا ولا كمين؟
جوزيف راح وشاور لادهم
انه امان واتنين جريوا علي ادهم يساعدوه وركبوا الطياره وودوها هلي مستشفي سياتل هناك
وادهم هناك واقف شافوه صحبات ليلي جريوا عليه فقالهم باختصار اللي حصل
وكل الدكاتره اهتمت بليلي اهتمام مضاعف
وادهم بره العمليات هيتجنن وحاولوا يخلوه يغير او حتي يغسل ايديه من دمها رفض لحد ما يتطمن عليها
خرج دكتور الاطفال وقاله انهم حطوه في الحضانه مؤقتا بس يطمنوا عليه لكن مبدئيا هو كويس
ادهم استني كتير بره العمليات وكل ما الوقت بيزيد القلق بيزيد لحد ما اخيرا الدكتوره خرجت وبصت لادهم نظره طويله
ادهم: قوليلي اني مقتلتش مراتي باللي عملته؟

الدكتوره: انت انقذت حياتها... انقذت الاتنين مش هيا بس لو البيبي فضل كان هيتخنق جواها وهيا كمان مع استمرار الطلق والاجهاد كان ممكن قلبها ما يستحملش ما تقلقش احنا عملنا المطلوب.. الجرح اتخيط كويس واتقفل وبطنها اتعملتله جراحه تجميليه يعني كل حاجه رجعت زي الاول ما تخافش عليها وحاليا احنا بنعوض جسمها عن اللي فقدته وعطيناها جرعه مضاد حيوي علشان اي تلوث ممكن يكون حصل
من الاخر مراتك كويسه وممكن تشوفها بس
ادهم: بس ايه؟
الدكتوره: انت حاليا ملوث كلك علي بعضك نظف نفسك قبل ما تدخلها
ادهم ابتسم: حاضر حاضر
ادهم فعلا غير هدومه واستحمي وكانت اصعب مره يشيل فيها اثار دم من جسمه لان ده كان دم اغلي انسانه عنده
عيط في الحمام جامد قوي لانه حس ان في لحظه كان ممكن كل حاجه تروح منه
ادهم خرج وراح لمراته اللي كانت بتفوق واول ما شافته ابتسمت
ليلي: انا اسفه علي اللي حطيتك فيه
ادهم: انا تخليني افتحلك بطنك؟ انتي مجنونه؟
ادهم قرب عليها وحضنها جامد وهيا عيطت في حضنه وهو كمان وهنا صحباتها سابوهم براحتهم
ادهم نزل لجوزيف اللي كان في انتظاره
اخده وطلع لليلي فوق شافها واتطمن عليها
وكان البيبي في حضنها واول ما شافته
ليلي: انا متشكره قوي اعتقد من غيرك مكناش هنوصل لهنا

جوزيف: انا؟ انا كنت عامل مساعد مش اكتر وعلي فكره انا كنت بشجع ادهم اه لكن كلام في سرك انا الشيئ الوحيد اللي فاشل فيه هو الاسعافات الاوليه دي... واللي هو عمله ده مش اي حد ممكن يعمله... صعب جدا ان حد يقدر يفتح بطن مراته ومن غير بنج وبعدها يشيلها الطريق كله وهيا تقريبا بتموت بين ايديه... اللي حصل ده كان معجزه من كل النواحي... جوزك بيحبك جدا حافظي عليه...
ليلي: انا عارفه ده ومقدراه كويس المهم برضه انا بشكرك
ادهم: حتي لو انت كنت مجرد عامل مساعد برضه مكنتش هوصل من غيرك لحد هنا انا مديونلك بحياتي كلها وحياتهم كمان...
جوزيف: حمدلله علي سلامتهم المهم قررتوا تسموا البطل الصغير ده ايه؟ بطل من صغره اهوه وتحمل ظروف صعبه من اولها
ادهم وليلي بصوا لبعض وابتسموا
ادهم: هنسميه يوسف جو الصغير
جوزيف عينه دمعت: علي فكره انا معملتش حاجه نهائي انا بس
ادهم: انت بس خرجتني من ازمه ووقفت جنبي لحد ما وصلت لمراتي لبر الامان وشيلتها وشيلت ابني بس ما عملتش حاجه خالص
جوزيف: بس ده برضه مش سبب انك تسمي ابنك باسمي
ليلي: احنا حابين نسميه كده... ذكري بسيطه واتمني انك اول ما تنزل مصر تجي عندنا تشوفه
ادهم: فعلا

جوزيف: انا امنيه حياتي انزل مصر بس الظاهر انه لسه ما انش الاوان
فات اسبوع وليلي في المستشفي واخيرا خرجت وعايزه تنزل مصر بقي
ادهم اخد مراته وابنه ونزلوا مصر وموضوع الازمه ده اتعرف والكل كان في استقبالهم
طبعا مصطفي عرف ومنها عرف ابوه وامه والكل في انتظار نزولهم...
ادهم ظهر بمراته وابنه في ايده والكل اتفاجئ كالعاده
بس المره دي ام ليلي وابوها اللي جريوا عليها
وطبعا اختلطت الابتسامات بالدموع والمباركات
عم محمد: هات حفيدي اشوفه هات
وبعد سلامات كتيره ادهم اخد عيلته وروحوا كلهم علي بيت محمد اللي اصر ان بنته ترجع بيته
ناديه: اخص عليكي يا ليلي تولدي وما تقوليلناش
وانت يا ادهم مقولتش ليه؟
ادهم: هعيشكم في قلق ليه؟ الحمد لله علقه وعدت
عم محمد: علقه ليه بقي ان شاءالله؟ انت تطول مراتك تولد في اكبر مستشفي في العالم كله وفيها اكفأ دكاتره؟ ليلي قيلالي ان المستشفي اللي كانت فيها اكبر مستشفي جراحه في العالم
ادهم: في مثل بيقولك ايه: اللي ميعرفش يقول عدس
عم محمد: قصدك ايه؟
ادهم: بنتك تقولك لان انا خلاص حطيت صوابعي العشره منها في الشق زي ما بيقولو...
ناديه: عملتي ايه تاني يا منيله؟

ليلي: انا ما عملتش ادهم بيبالغ حبتين
ادهم شهق: انا ببالغ! تصدقي انتي... انا... انا مش عارف اقول ايه؟
ليلي ضحكت: فيها ايه يا ماما اني اطلب منه يوديني حته فيها تلج؟ ولا اني اشوف الغروب في مكان زي ده من الدور العاشر؟ وبعدين هو انا كنت اعرف ان الدنيا هتتقلب علينا كده؟ وتولدني انتي في الطريق؟
ناديه: هو انتي مش والده قيصري؟ ولدك هو ازاي؟
ادهم: اه والنبي قوليلها ولدتها انا ازاي؟
ليلي حكت الحكايه كلها لامها وابوها واخوها اللي الذهول كان مسيطر عليهم
عم محمد: وانت قدرت؟ قدرت تفتح بطن مراتك بالسكينه؟ يا قلبك يا اخي!
ادهم: يا قلبي؟ وانا كان قدامي اختيارات؟ انا عايزك تحط نفسك مكاني كنت هتعمل ايه؟
عم محمد: لا انا كنت اموت نفسي احسن الحمد لله يا ابني انكم رجعتوا بالسلامه واللي انت عملتو فعلا مش اي حد يقدر يعمله
ادهم: الحمد لله يا عمي
ليلي رجعت بيتها بابنها والحياه جميله مع ابنها وجوزها وكل يوم احلي من التاني
يوسف وابوه متعلقين ببعض جدا لدرجه ان يوسف لما بيفتح في العياط مش بيسكت غير مع ابوه
ادهم عايش مبسوط في بيته الصغنن وعيلته الصغننه وما يتمناش اي حاجه تانيه
ابنه بدأ يزحف ومالي البيت حب وضحك وفرح
وادهم وليلي بيزحفوا وراه
واخيرا كبر سنه وبدأيمشي اول خطواته وسط فرحه العيله كلها لانه اول حفيد
في يوم مشؤم الصبح بدري ليلي صحيت لان عندها شغل بدري صحت جوزها
ليلي: ادهم انا نازله عايز حاجه؟ هتنزل ولا؟
ادهم: لا لا انا راجع متأخر يوسف فين؟
ليلي: هوديه في طريقي عند ماما علشان تبقي براحتك ماشي يالا حبيبي اسيبك انا
جت تمشي فشدها باسها الاول باسها بحب وشوق ومن جواه قلبه دق وحس انه بيبوسها لاخر مره وبعدها سابها
ليلي: مالك في ايه انا في حضنك الليل كله؟
ادهم: معرفش بس حبيت ابوسك عندك مشكله؟
ليلي ضحكت: لا طبعا سلام
عدت ساعه ونزلت الكافتيريا تاخد النسكافيه بتاعها شربته وشويه تعبت جامد بترجع وتعبانه
فاستأذنت تروح بيتها
واتصلت بمامتها فقالتلها تسيب يوسف طالما تعبانه ولما جوزها يخلص شغل يبقي يعدي ياخده
ليلي طالعه شقتها وجواها احساس مبهم بالخوف
مش عارفه ايه مصدره
فتحت شقتها ودخلت واول ما دخلت قلبها بيدق بسرعه وانفاسها مخطوفه ولمحت هدوم في الصاله
هدوم مش بتاعتها
هدوم ست تانيه
هدوم داخليه كمان
قزازه خمره فاضيه
سجاير ماليه الطفايه
ماشيه بخطوات تقيله لاوضه النوم وبتحاول تهيئ نفسها لاي منظر
فتحت الباب واتفاجئت بيها عريانه تماما في سريرها
واقفه ومش مستوعبه وشكت انها تكون دخلت شقه غلط
لحظه وباب الحمام اتفتح وادهم خرج عريان بس فوطه حواليه واتفاجئ بمراته واقفه
ادهم: انتي رجعتي بدري ليه؟
ليلي مش بترد بس بتبصله بذهول
ادهم: في ايه مال
مكملش الكلمه لانه شاف البنت العريانه في سريره
ادهم: انتي مين وبتعملي ايه هنا؟ ودخلتي هنا ازاي اصلا؟
ليلي: انت بتهرج ولا ايه؟ ؟
ادهم: ليلي اصبري انتي لما اشوف دي دخلت هنا ازاي؟
البنت: دخلت من خرم الباب ههههههههه
بس تصدق تستاهل الصحيان بدري!
كنت زعلانه انك بطلت تسهر بس فكرتك حلوه الصبح بدري احلي بكتير
اسيبك بقي مع المزه الجديده دي...
قامت البنت بكل بجاحه وشربت اخر حته في الكاس اللي في ايدها وحطته علي الكوميدينو وطلعت بره وهيا طالعه
البنت: يستاهل علي فكره هاه فاهماني انتي صح؟
البنت خرجت وادهم عايز يخرج وراها يعرف البنت دي ايه وحكايتها ايه؟
يدوب هيخرج وراها مراته شدته
ادهم: استني هنا
ليلي:ايه عايز تكمل معاها ولا ايه؟ ولا انا قاطعتكم؟
تحب اسيبلك البيت تكمل؟
ادهم: اكمل ايه افهمي انا ما اعرفش دي دخلت هنا ازاي؟ استني لازم الحقها
ادهم هيخرج وهيا شدته ورجعته
ليلي: مختومه انا علي قفايا علشان تمثل عليا الفيلم ده؟ ما تعرفهاش صح؟ ؟ وما تعرفش دخلت ازاي لحد السرير يا سياده المقدم؟ ؟ ده علي اساس الحماره تصدق
ليه كده؟ انا عملت ايه علشان تعمل كده؟ ليه يا ادهم؟
ادهم: يا ليلي افهمي انا ما اعرفش دي دخلت هنا ازاي؟ اديني فرصه افهمك!
ليلي: تفهمني ايه؟ هتألف قصه جديده
ادهم: انا ما اعرفهاش
ليلي: وانت من امتي بتعرفهم! انت بتنام معاهم بس... حنيت للوساخه والقذاره... مش قادر تفضل نظيف صح؟ رجعت للخمره والسجاير والقرف تاني؟
ادهم: ليلي اهدي وشوفي انتي بتقولي ايه؟ انا بيتي بعشقه ههده ليه هاه؟شميني انا لاريحتي سجاير ولا خمره
ليلي: انت لسه مستحمي ولا انا هبله قدامك للدرجه دي؟ انا مش قادره افضل هنا... من امتي بتنومهم في نفس سريري هاه؟ من امتي؟ انا مش قادره افضل هنا
ليلي جريت من قدامه وهو ملحقش يمسكها وعريان مقدرش ينزل وراها
دخل بسرعه لبس هدومه ونزل بس كانت مشيت فركب عربيته وراح وراها علي بيت ابوها
ليلي دخلت بيت ابوها تعيط جامد
عم محمد: في ايه مالك؟ في ايه يا ليلي؟ جوزك جراله حاجه
ليلي: يا ريت يا بابا ياريت
عم محمد: طيب في ايه؟
ناديه خرجت بيوسف اللي عيط اول ما شاف امه
ناديه: ايه اللي حصل في ايه؟

ليلي: ادهم بيخوني... ادهم بيخوني يا ماما
ناديه: لا ما اصدقش ادهم ما يخونكيش ابدا
عم محمد: فعلا الراجل بيحبك وعمره ما يخونك ابدا
ليلي: شوفته... شوفتها عريانه في سريري في اوضه نومي شوفتها بعيني
ناديه: يمكن تكوني غلطانه؟
ليلي: واحده هدومها كلها في صالتي... هدومها الداخليه مرميه في كل حته ودخلت اوضه نومي لقيتها في سريري عريانه تماما وادهم خارج من الحمام واخد دش وعريان تماما... الاتنين عريانيين وتقوليلي فاهمه غلط ايه اللي فهماه غلط؟
عم محمد: لا حول ولا قوة الا بالله متأكده يا بنتي؟
ليلي: يا بابا الاتنين عريانين اتاكد ايه تاني؟
هنا الباب خبط وادهم دخل واول ما شاف ليلي جري عليها
ادهم: اسمعيني انا عمري ما خنتك ابدا ولا عمري هخونك انتي فاهمه؟ انا ما اعرفش البنت دي دخلت ازاي؟ انا كنت في الحمام وخرجت اتفاجئت بيها زيك بالظبط افهمي؟ انا محتاج لوقت افهم البنت دي مين ودخلت ازاي؟ وبعدين يا ليلي انا هخونك ليه؟ انا عايش مبسوط معاكي هخونك ليه هاه؟
ليلي: علشان الوساخه والخيانه طبع فيك حاجه واخدها بالوراثه
ادهم: ليلي! ما تدخليش لسكك ملهاش رجوع انا ما خنتكيش
ليلي: انت خاين واطي زيك زي امك... زي ما امك عاهره انت عاهر زيها... زي ما هيا كانت بتستغل غياب ابوك انت كمان زيها بتستغل غيابي وتوسخ بيتي انت الخيانه في دمك
ادهم: ليلي انا مش هحاسبك علي الكلام ده لانك دلوقتي متضايقه بس اهدي وفكري بالعقل
ليلي متغاظه جدا وبدأت تضرب فيه
ليلي: انت وسخ... واطي... حقير... في بيتي؟ في بيتي يا احقر راجل في الدنيا،؟ في سريري كمان؟ ليه كده؟
ادهم مسكلها اديها وبيحاول يسيطر عليها بس بتشد ايديها وتضربه وتخربشه بضوافرها
ادهم: اهدي واعقلي انا ما بخونكيش ولا خنتك ولا هخونك افهمي دي حد داسسها عليا
ليلي: صح زي اللي قبلها... انت خاين اصلا طلقني فاهم انا مش عايزه افضل علي ذمتك
ادهم لقي ان العقل والمنطق مش موجودين حاليا
بص لابوها يستنجد بيه
ادهم: عم محمد عقلها
عم محمد: ديل الكلب عمره ما يتعدل
ادهم اتصدم منه وبص لاخر قشه يتعلق فيها بص لناديه اللي بيعتبرها امه
ادهم: انتي ديما بتعتبريني زي ابنك... انتي عارفاني صح؟ عمري ما اخونها ابدا فهميها ده؟ قوليلها اني مش ممكن اخونها قوليلها انها اغلي حاجه في حياتي
قوليلها اني مكتفي بيها ومستغني عن الدنيا وما فيها طول ما هيا معايا هخونها ليه؟
ناديه: لان ساعات البني ادم بتبقي عينه فارغه مايملهاش الا التراب
ادهم بصدمه: وانا عيني فارغه؟ ليلي عمي فكروا انا ليه هعمل كده؟ انا ما صدقت يبقي عندي بيت وعيله وزوجه ليه اضيع كل ده من ايدي؟
ليلي: علشان انت كده؟ ده حاجه غصب عنك... الوساخه بتجري في دمك... امك عملت كده وانت من جواك حاسس انه عادي تعمل كده... طلقني... طلقني... انت سامعني طلقني... مش عايزه افضل علي ذمتك لحظه بعد النهارده
ليلي بتتكلم وبتخبط فيه وبتزقه
ادهم: طيب فكري في ابنك ده؟ اعمليله حساب
ليلي: كنت عملتله انت الاول حساب... يوسف يوسف... ابوك ده اوطي راجل في الدنيا واوسخ بني ادم.. طلعته من الوحل اللي كان فيه ونظفته وعملته بني ادم وفي الاخر لانه واطي بيخوني انا... جايب كلبه في البيت في بيتي وفي سريري يخوني معاها... ابوك ده راجل عاهر انت فاهم
ادهم: بس يا ليلي بس... بس انتي كده قطعتي كل الخيوط اللي بينا
ليلي: طلقني طلقني طلقني واخرج من حياتي بره حياتي كلها طلقني
ادهم زقها بعيد عنه: هطلقك... اقسم بالله هطلقك بس الاول اعرف البنت دي مين ودخلت بيتي ازاي... مبقاش انا المقدم ادهم ا للي واحده تدخل بيتي وتخرج من غير ما اعرفها وساعتها هطلقك وهتندمي وهتعضي علي ايديكي هتندمي علي كل حرف نطقتيه
ليلي: طلقني واطلع بره طلقني
عم محمد: اطلع بره بيتي بقي... بره... انا غلطان من الاول اني وافقت ان الاشكال دي تدخل بيتي بره
ادهم: حاضر خارج بس خليكو فاكرين ان انتو اللي بدأتوا ده ويوم ما هتيجوا تترجوني مش هقبل رجائكم ده ابدا خليكي فاكره يا ليلي وافتكري قبل كده كام مره عملتي ده وندمتي والنهارده بقولهالك للمره الاخيره هتندمي
ليلي: انا عايزه اندم بره حياتي كلها بره
ادهم خرج بره مش مصدق كل اللي حصل ده؟
من شويه بس كان اسعد راجل في الدنيا وفجأه الترابيزه اتقلبت عليه وبقي اتعس انسان في الدنيا...
بس مين البنت دي؟ وازاي تدخل بيته كده؟ وفوق كل ده ازاي ليلي ترفض تسمعه وازاي تصدق انه ممكن يخونها؟ بس هو مستغرب ليه؟ ماهيا سبق وصدقت انه ممكن يخون ؟
لأ بس ده كان قبل ما تعاشره وتعرفه ويعيشوا مع بعض... ده كان زمان...
بس انت سامحتها علي اتهامها ليك بالخيانه؟
لأ بس المره دي مختلفه،؟
مختلفه ليه ما هيا كل شويه بتجرحك وانت بتتسامح وترجع تبوس ايديها ورجليها لازم تركبك؟ كنت مستني ايه منها؟ تعزرك مثلا؟
ايوه كان لازم تحاول تشغل عقلها شويه؟ انت ظابط وليك اعداء وهيا شافت بتفسها قبل كده حاولو يبعدوك عنها بقضيه النسب كان لازم تاخد درس منها؟
ده لو كانت بتحبك اصلا! انت كنت مجرد راجل عادي! راجل وسيم حبتين عجبها وعجبها استايلك والبرستيج اللي عملتهولها وعجبها حبك وتفانيك ليها لكن انت نفسك لا متخطتش قشره قلبها؟ قلبها عمره ابدا ما دق ليك؟ هاتلي موقف واحد من يوم ما عرفتها للنهارده حسيت فيه حبها الصادق؟
ساعت ما اتهمتك بالخيانه؟
ساغت ما تفضلت عليك بوقوفها معاك في القضيه؟
ساعات الحمل وقلبت الدنيا عليك لمجرد انك فضفضت بكلمتين معاها؟
ولا ساعت ما طلبت منك تفتح بطنها بايدك علشان لو ماتت يبقي دمها علي ايديك انت؟
امتي حبتك هيا؟
انت عملت زي النعامه اللي بتدفن راسها في التراب
انت دفنت نفسك في حضن كله شوك ما يستاهلكش
انت ما بتتعلمش ابدا مهما الدنيا تديك دروس
انت ما اتعلمتش من اللي امك عملته
انت ما اتعلمتش من اللي ليلي عملته اول مره سبتها
وما اتعلمتش تاني مره وتالت مره
كان لازم الدنيا تديك قلم كبير علشان تفوق؟ فوقت لنفسك ولا لسه؟ ولا لسه محتاج اقلام تانيه يا متخلف؟
عقلك كان فين ولا سلمته مع قلبك يا غبي؟
ادهم: كفاااايه... كفايه بقي
راح شغله وكأن شيئا لم يكن بينزف في صمت بيدور في الملفات وقاعده البيانات عن البنت دي يمكن يلاقيها
اكرم: ادهم مالك بتدور علي ايه؟
ادهم: هو انت لو بتدور علي حد ما تعرفش اي شيئ عنه تعمل ايه او تبدأ منين؟
اكرم: اسمه مثلا؟
ادهم: بقولك ما تعرفش اي حاجه عنه؟
اكرم: يعني بتدور علي وهم ولا ايه؟ ماهو لازم اي حاجه تبدأ منها... اسم؟ بصمه؟ لقب؟ وظيفه؟
ادهم فكر شويه وافتكر البنت وهيا بتشرب من الكاس
ادهم: بصمه؟ انت عندك حق بعد اذنك
ادهم قام ويدوب هيخرج دخل مصطفي
مصطفي: انت ازاي تخونها هاه؟
اكرم: في ايه اهدي؟
ادهم: مش وقتك مش فاضيلك
مصطفي وقفه ووقف في وشه
مصطفي: قصرت معاك في ايه علشان تخونها؟ دي بتحبك؟
ادهم: وانا مش بحبها!؟ هاه؟ رد عليا؟ انا مش بحبها وبحب بيتي ومراتي وابني؟ انا هضحي بكل ده ليه؟
مصطفي: هيا شافتكو مع بعض
ادهم: هيا شافتنا اه بس مش مع بعض... هيا جمعتنا مع بعض في دماغها لكن احنا مكناش مع بعض
انت ظابط وعارف ان ده ممكن يكون كمين معمولي وده اللي هثبته وبعد ما اثبته هرمي علي اختك يمين الطلاق بعد اذنك
ادهم مشي ومصطفي صدق كل كلمه ادهم قالها بس خلي احساسه جواه
ادهم رجع جري علي بيته ودخل بس لقي البيت في حال غير الحال
كل اثر للبنت اختفي... وخصوصا قزازه الخمره والكاس... كده ادهم اتأكد ان في حد فعلا عامله كمين؟ بس فين الدليل وازاي يلاقي دليل اصلا؟
ادهم استدعي لجنه كامله لكشف البصمات
وفضلوا يقلبوا في البيت في كل حته
الخبير: يا افندم كل البصمات اللي لقيناها لاهل البيت ليك او للمدام او لابن حضرتك او اهلها مفيش بصمات غريبه
ادهم: في حد دخل بيتي انت فاهم؟ في واحده دخلت وقعدت وشربت كمان اتصرف اكيد سابت بصمه واحده علي الاقل؟
الخبير: في اماكن نظيفه تماما
ادهم: يعني ايه؟
الخبير: يعني حد منظف كل البصمات فيها... زي الترابيزه دي مثلا والطفايه اللي عليها
ادهم: اهي الطفايه دي كانت مليانه سجاير من شويه
الخبير: ما انا بقول لحضرتك انها متنظفه وكمان اوضه النوم التسريحه والكومودينو متنظفين جدا
ادهم: اتصرف انا حياتي كلها واقفه علي البصمه دي... او اي حاجه تلاقيها غريبه وتحللها اتصرف
الخبير فضل يدور ويدور واخد عينات من حاجات كتير
وتاني يوم كلم ادهم
الخبير: سياده المقدم لقيت شعره انا فضلت ادور وادور وفي الاخر لقيت شعره غريبه عنكم انت والمدام وحللتها ووصلت انها للبنت هبعتلك صورتها واسمها علي اللايميل بتاع حضرتك
ادهم فتح ميله واستلم صوره البنت وجاب عنوانها
ادهم: اخيرا وصلتلها هقتلها واشرب من دمها كمان
مصطفي: مين دي اللي هتقتلها؟

ادهم: وانت مال اهلك
ادهم سابه ومشي وطلع علي عنوان البنت خبط علي بابها وفتحتله ودخل ومسكها من رقبتها وخنقها
ادهم: قسما بالله لاقتلك ان مقولتيش انتي مين وعايزه ايه مني؟
جارتها طلعت علي صرختها وشافت ادهم خانقها
ادهم اول ما شاف الجاره سابها ودخل البيت وقفل الباب والبنت خايفه جدا منه
البنت: انا ماليش دعوه ابدا ماليش دعوه
ادهم: امال مين اللي له دعوه انطقي؟
البنت: ما اعرفش ما اعرفش انا الهانم اللي بشتغل معايا هيا اللي قالتلي... عطتني فلوس كتير وعنوانك وبالتليفون كانوا بيحركوني... امتي ادخل؟ وامتي اقلع؟ وامتي ادخل اوضه نومك... وامتي اخرج؟
حطولي سماعه في ودني يحركوني بيها... انا ماليش دعوه ماليش دعوه ابدا... هددوني انهم هيقتلوني لو ما سمعتش كلامهم
البنت بتعيط جامد والمشكله انها مش بتكدب وادهم عارف ده كويس
ادهم: مين الهانم بتاعتك دي؟
البنت: صاحبه كباريه الليل والسهر
ادهم: انا اعرف الكباريه ده مش صاحبته حياه
البنت: ايوه هيا يا باشا
ادهم: الصبح هاجي اخدك تيجي عند مراتي وتقوليلها الكلام ده فاهمه؟ لو كان بدري شويه كنت خدتك دلوقتي بس مش هينفع هو انتي اسمك ايه؟
البنت: اسمي فريده ويبقولولي ديدا
اللي انت عايزو انا هعمله كله يا باشا بس تحميني منهم
ادهم سابها ومشي وراح للكباريه بس ملقيش حياه جوه وعرف انها مسافره من فتره
استني الدقايق والساعات تعدي علشان يطلع الصبح وياخد دليل براءته لمراته
وفعلا جري علي بيت البنت فريده واول ما طلع فوق يدوب هيخبط الباب اتفتح دخل بحذر
ولقي فريده في الارض جري عليها وحاول يفوقها بس ما فاقتش
حط ايده علي رقبتها يشوف النبض بس كانت ميته
هنا دخلت الجاره واول ما شافت المنظر ده صوتت ولمت الحته كلها علي ادهم اللي بيحاول يفهمهم انه ظابط وانه مقتلهاش
في خلال دقايق البوليس وصل وادهم استغرب من سرعه وصوله وكأنه مستني ادهم يجي
قبضوا عليه وحققوا معاه واستدعوا الكل والمره دي الكل بيشهد ضد ادهم
اتعملت قضيه بسرعه البرق وكأن في ايد خفيه بتسرع كل الامور
المدعي العام استدعي شهود كتيره بس اهمهم كان مصطفي وليلي والجاره
مصطفي: الليله دي ادهم وهو خارج سمعته بيحلف انه هيقتلها ولما سألته مين قالي وانت مال اهلك؟
المحامي: هو قبل كده ادهم اتهم في قضيه قتل واحد اسمه خميس صح؟
مصطفي: ايوه صح
المحامي: ممكن تقولنا ادهم قتله ازاي؟ وليه؟
مصطفي: كسر رقبته لانه كان بيهدد الكل
المحامي: انت سبق وقولت انه كان دفاع عن النفس... هل ده فعلا كان دفاع عن النفس ولا كان ضيق علشان لمس حبيبته اللي هيا اختك؟
مصطفي: انا اسف معنديش اجابه
استمر التحقيق
الجاره: سمعتها بتصرخ وفتحت الباب كان ماسكها من رقبتها وبيخنقها واول ما شافني سابها ودخل شقتها وقفل الباب وراه
واستمر التحقيق واستدعوا ليلي
المدعي: في اشاعه بتقول انك حاليا مش في بيتك هل انتي في زياره لبيت ابوكي؟
ليلي: لأ انا سايبه بيتي
المدعي: ممكن اسأل ليه؟ معروف قصه الحب العظيمه اللي بينك وبين جوزك وقبل كده كان في قضيه لجوزك مرفوعه ضده حطيتي ايدك في ايده ليه المره دي ايدك مش في ايده؟ وقبل كده ادهم اتهم بالقتل وانتي جيتي ودافعتي عنه؟ ليه المره دي مش ايدك في ايده؟
ليلي: لانه خاني...
(الكل بيهمس)
القاضي: سكوت والا هخلي القاعه
المدعي: قبل كده لما قتل خميس قدامك شهدتي انه كان دفاع عن النفس
ليلي: مكنتش لسه اعرفه... معرفش دلوقتي اذا كان فعلا دفاع عن النفس ولا قتله لمجرد انه متضايق منه؟
المدعي: اممم طيب وبالنسبه لخيانته ليكي... انتي اي حد يقولك انه خانك تصدقي علي طول؟
ليلي: انا ما بصدقش اي كلمه ضده بس المشكله اني شفته بعيني... في اوضه نومي... في سريري
المدعي: شفتي واحده في سريرك مع جوزك؟
ليلي: ايوه

ادهم: لأ انتي ما شفتيهاش معايا افهمي يا ليلي... كل اللي بيحصل ده مقصود... شغلي دماغك
القاضي: ادهم هيجي دورك واتكلم فيه براحتك
المدعي: جوزك بيقول لأ ممكن تشرحيلنا
محامي ادهم: انا بعترض دي مش قضيتنا
المدعي: دي هيا قضيتنا اللي حضرتك ما تعرفوش ان اللي اتقتلت دي هيا نفسها اللي الدكتوره شافتها في سريرها مع جوزها
محامي ادهم سكت وبص لادهم اللي رافض يكلمه اصلا
المدعي: قوليلنا شفتي ايه؟
ليلي: دخلت الصاله كان فيها هدومها وملابسها الداخليه وقزازه خمره ودخلت اوضه النوم كانت في سريري وبتشرب
المدعي: وجوزك كان فين؟
ليلي: كان خارج من الحمام
المدعي: كان لابس ايه؟
ليلي ضحكت بهم: مكنش لابس... كان عريان
المدعي: سؤال اخير ادهم جوزك مش المقدم ادهم ممكن يقتل؟
ليلي وهيا باصه لادهم اللي مستني اجابتها
ليلي: انا اكتشفت ان الاتنين شيئ واحد اصلا مفيش وجود لادهم الانسان... واجابه لسؤالك اه ادهم يقتل وببرود كمان
اتقابلت عنيها بعنين ادهم اللي مش مصدق كل حاجه حواليه
طلبوا ادهم يتكلم الي انه رفض
ادهم: مالوش لازمه اي كلام... ليلي انتي مصدقه اني قتلتها؟
ليلي: كنت عايز تداري جريمتك او تجبرها انها تيجي تكدب عليا؟ الله اعلم انت قتلتها ليه بس بعد خيانتك ليا اه اصدق انك تقتلها وببرود كمان
ادهم ابتسم: خلاص يبقي انا قتلتها فعلا
القاضي: عندك اي اقوال تانيه؟
ادهم ماردش
القاضي فضل يرغي كتير بس المهم في الاخر
القاضي: حكمت المحكمه حضوريا علي
المتهم ادهم محمود احمد السيد
بتجريده من رتبته وتسريحه تسريح غير مشرف
والغاء جميع امتيازاته وحذف اسمه من سجل الشرف
لسوء استغلال منصبه
كما حكمت عليه بالاعدام شنقا للقتل العمد
رفعت الجلسه