رواية العنيد

رواية العنيد الجزء الأول بقلم الشيماء محمد الفصل الثاني

ادهم: سيادتك رايحه فين؟ العربيه اهي
ليلي: اه واخده بالي بس روح انت وانا وراك علي طول
ادهم: معاكي عربيه؟
ليلي: للأ هحصلك بتاكسي
ادهم: نعم؟
ليلي: سوري مش بركب عرببات مع حد غريب
ادهم تنحلها وملقاش رد يقوله
ادهم: اقسم بالله لولا انك بنت كنت قولتلك كلمه ما يصحش تتقال... يعني انتي تدخلي شقه واحد غريب وتصحيه من نومه وبعدها تدخلي اوضه نومه الخاصه وتقريبا كده بتشديه من علي السرير وبعدها جايه تقوليلي مبركبش عربيه واحد غريب؟ انتي بتستظرفي علي الصبح ولا ايه؟
ليلي: انا مش عارفه انت ايه مشكلتك؟

 

ادهم: بقولك ايه هطلع اكمل نومي هيا مش ناقصه حرقه دم علي الصبح انجزي واركبي؟
ليلي خافت منه ومن نرفزته عليها ركبت بهدوء وفضلت ساكته
دور العربيه وطلع نظارته الشمس ولبسها وشرب القهوه اللي كانت عملاها
ادهم: تسلم ايدك
ليلي: بالهنا
قعدوا جوه العربيه وادهم بيقلب في تليفونه وليلي مستنياه يتحرك بس هو واقف مكانه
ليلي: وبعدين بقي؟ لامتي الوقفه دي؟

ادهم: اللهم طولك يا روح!
ليلي: يعني احنا واقفين كده ليه؟ ما تتحرك
ادهم: حاضر هتحرك اتفضلي بقي قوليلي اتحرك علي فين؟ عارفه مكان نروحه قوليه مش عارفه يبقي اسكتي خالص
سكتت ليلي شويه بس مقدرتش تفضل كتير
ليلي: طيب انت بتعمل ايه؟
ادهم: علي فكره انا معنديش ادني فكره اخوكي ممكن يكون فين؟ فبدور علي حد ممكن اسأله ممكن تسكتي بقي شويه
اتصل بأكرم صاحبه الانتيم
ادهم: بقولك هو انت ما تعرفش العيال الجديده دي بتسهر فين ولا بيقعدوا فين؟
اكرم:______
ادهم: وانت مالك؟ تعرف ولا ما تعرفش؟
اكرم: ؟
ادهم: ماشي تسلم يا غالي
ادهم: بصي في مكان بيتجمعوا كل العيال الجديده دي فيه هشوفه موجود ولا لأ؟ او هسال عليه
ليلي: خلاص ماشي
ادهم اخيرا اتحرك وطول الطريق هيا ساكته بس متبعاه بصمت بتراقب كل حاجه فيه
شكله.. شعره.. ريحته... ملامحه... هدومه
كل حاجه... ادهم كان راجل شيك جدا متناسق في كل حاجه.. وسيم لدرجه مستفزه جدا... كل حاجه فيه تسحر البنات وهنا ليلي عرفت ليه البنات بتترمي تحت رجليه
اخيرا وصلوا المكان اللي رايحينه
ادهم: هو ده المكان انا هنزل اشوفه موجود ولا لأ؟ استنيني
فك حزامه ويدوب نزل رجله طلعها تاني وبصلها
ليلي: رجعت ليه نسيت ايه تاني؟
ادهم: هو محدش قالك قبل كده انك مستفزه جدا؟
ليلي: اتقالتلي كتير... رجعت ليه؟
ادهم حط ايده علي وشه بشكل يقول ان صبره نفذ خلاص
ادهم: معرفش شكل اخوكي ده ايه معاكي صوره ليه؟
ليلي طلعت موبيلها وحاولت تلاقي صوره لاخوها لوحده بس مفيش
ادهم: معاكيش اي صوره اخوكي فيها؟
ليلي: في بس مش لوحده
ادهم: انجزي وريني شكله خليني انزل واخلص منك بقي
ليلي عطتله التليفون: في كذا صوره وري بعض شوفهم
ادهم مسك التليفون وكانت الصور لليلي ومصطفي وبيعملوا حركات مجنونه ليلي متضايقه جدا انه بيشوفها هبله كده وبتعمل الهبل ده
ادهم ابتسم ابتسامه خفيه بس ليلي لاحظتها واتضايقت اكتر

رجعلها التليفون علي صوره كانت حاطه راسها علي كتف اخوها وهيا وراه وعامله وشها بطريقه تضحك هيا واخوها
ادهم: اه عرفته... شكلكم قد بعض مين الكبير؟
ليلي: انا الكبيره
ادهم: اوكي هنزل انا اشوفه موجود ولا لأ... استنيني هنا
نزل ادهم ويدوب دخل مدخل العماره لقاها جايه وراه
ادهم: اممم انتي من النوع اللي ما بيسمعش اي كلمه صح؟
ليلي: بالظبط كده
ادهم استسلم وطلع وهيا وراه لحد ما وصل لباب الشقه
ادهم: لو قلتلك استني هنا هتستني؟
ليلي: اعتقد انك عارف اجابه سؤالك
ادهم: اوك براحتك بس علشان ابقي عملت اللي عليا.. الشقه دي بتاعت عزاب بمعني شباب وبيجيبوا فيها بنات فالله اعلم ايه الاشكال اللي هتبقي جوه او ايه المناظر اللي هنشوفها
ليلي: انا اخويا مالوش في الكلام ده اخويا متربي كويس
ادهم: ههههههه بجد؟ انتي حره انا بلغتك
ادهم خبط علي الباب وضرب الجرس وبرضه محدش فتح
ليلي: هو مفيش حد ولا ايه؟
ادهم: ما اعتقدش بس ممكن يكونوا سكرانين ومحدش قادر اصلا يقوم يفتح
ليلي: وبعدين؟ ما تقوليش هنمشي؟
ادهم: انتي عايزه ايه؟
ليلي: عايزه اتأكد في حد جوه ولا لأ؟ مش انت ظابط؟
ادهم باستغراب: وبعدين؟ عايزاني اعمل ايه؟
ليلي: اعمل زي الافلام اخبط الباب برجلك طيره ولا بدبوس ولا بنسه افتح الباب اتصرف
ادهم: اخبط الباب اطيره؟ هركليز انا صح؟ علي فكره ده معظمه شغل سينما
ليلي: مصطفي كمان قال انك بتعمل حاجات محدش غيرك بيقدر يعملها ولا انت سمعه علي الفاضي
ادهم: استغفر الله منك ومن لسانك...
عطاها ظهره وطلع حاجه من جيبه وفي ثواني كان فتح الباب
ادهم: اتفضلي يا بتاعت السيما انتي
ليلي: الرجال قوامون... وبعدين اهو يجي منك
ادهم بصلها بغيظ: يجي مني متشكر يا عم الحج
سابها ودخل وهيا لازقه وراه لدرجه انه اول ما وقف لبست فيه
ادهم بصلها باستغراب
ليلي: المفروض تدي اشاره انك هتقف
ادهم: علي اساس اني سايق عربيه؟
ليلي: هما دول ميتين ولا ايه؟
ادهم: دول سكرانين اخوكي مين فيهم؟
ليلي: ما اعتقدش انه في دول اصلا
ادهم فتح اول اوضه تقابله وهيا برضه لازقه وراه كان فيها اتنين نايمين في وضع غير لائق نهائي
ليلي حطت وشها في الارض واتكسفت
ادهم: علشان كده قولتلك استنيني تحت
ليلي: ما قولتليشان احنا هنشوف اشكال زي دي
ادهم: قولتلك شقه عزاب ومعاهم بنات عايزاني اقولك ايه تاني؟ ولا اشرحلك تفصيلي بنات معاهم رجاله سكرانين متخيله اشكالهم هتبقي ايه؟
ليلي: متخيلتش اصلا ان في كده؟
ادهم: متخيلتيش ايه؟ ما علينا

فتح اوضه تانيه وبرضه مفيهاش حد... خرجت بنت من حمام وكانت يدوب لفه حاجه خفيفه عليها زي طرحه او شال مش مداري تفاصيل جسمها لدرجه ان ليلي حطت وشها في الارض
البنت: انت كنت فين امبارح؟ لو كنت موجود كنت هبسطك قوي بس احنا لسه فيها تعال معايا وانا اوريك الجنه ونعيمها
وقفت باغراء تبين جسمها اكتر وليلي مستغربه اللي بيحصل قدامها ده ومش عارفه هو يعرفها ولا مجرد معجبه بشكله
ادهم رفع نظارته من علي عنيه وحطها علي راسه وبص للبنت من فوق لتحت
ادهم: للاسف مفيكيش حاجه تشد
مش بس البنت استغربت دي ليلي كمان استغربت لان البنت كانت جميله جدا وجسمها مغري جدا كانت متخيله انه ما هيصدق يترمي في حضنها
البنت: جرب مش هتخسر
البنت بتقرب ويدوب هتمد ايدها عليه
ادهم: مستغنيه عن ايدك دي خليها تلمسني
البنت خافت: انت حر انت الخسران
سابتهم ومشيت وليلي كانت مبسوطه ومتغاظه في نفس الوقت فسبقته وفتحت اوضه قدامها وقفلتها تاني بسرعه
ادهم: ايه؟
ليلي: مصطفي جوه
ادهم: طيب الحمدلله صحيه وخليني امشي انا بقي
ليلي: مش هينفع اصحيه
ادهم: ليه بقي؟
ليلي: معاه واحده والاتنين ا...
ادهم: اه وطبعا عايزاني اصحيهولك صح؟ والبسهولك وانزلهولك
ليلي: ده لو ممكن؟
ادهم: غريبه بتتحولي لما تبقي عايزه حاجه؟
ادهم فتح الباب وحاول يصحيه بانه ينادي عليه بس ما صحيش
ادهم بص حواليه لحد ما لقي ازازه ميه فتحها وكبها علي وشه فقام منفوض واول ما شاف ادهم غطي نفسه ومش عارف يعمل ايه؟
ادهم: البس وانزل خلال دقيقتين... اختك معايا بره وعايزاك
ادهم خرج وقفل الباب ومسك ليلي من دراعها وخارجين بره بس مره واحده وقف خرجها بره ودخل هو تاني
ادهم: ثواني
رجع تاني وهيا مستغربه هيعمل ايه؟
مسك ازاتين ميه وفتحهم وبدا يرش علي كل النايمين في الصاله والكل بيقوم مفزوع ويدوب هيشتموا بيشوفوا ادهم يتنحوا وقفوا تعظيم سلام

ليلي واقفه مرقباه وعجباها هيبته دي وخوف الكل منه
كلهم وقفوا انتباه
ادهم: خلال عشر دقايق كلكم تبقوا في صاله التدريب هناك مفهوم؟
ادهم بيتكلم بصوت قوي بس مش عالي.. صوت واحد واثق من نفسه... صوت اتعود يأمر فيطاع
ادهم وهو خارج: اتحركوا وصحوا النايمين جوه دول
كلهم طلعوا يجروا يمين وشمال
ادهم شد ليلي ونزل بيها لتحت من غير ما يديها فرصه تتكلم لحد ما نزلوا ووقفوا قدام عربيته
ليلي: علي فكره تاني مره ما تشدنيش كده وتسحبني وراك
ادهم: اتحولت

ليلي: يعني بتسحبني وراك كده ليه؟
ادهم: لان الشقه دي بشكلها ده مشبوهه ومحبتش حد فيهم يشوفك فيها وخصوصا لو عرفوا انك اخت واحد زميلهم
ومش هيفرقوا انتي جيتي امتي بايته ولا لسه جايه فهمتي؟
ليلي فرحت جواها انه مهتم بسمعتها
فضلوا ساكتين هو واقف بعيد شويه اديه في جيبه ونظارته في وشه وبيشوت حاجه في الارض وباصص للارض
كان نفسها تطلع موبيلها وتصوره
ادهم: هو انتي علي كده طالعه من البيت الساعه 6 مثلا ولا جايه منين ولا ايه؟
ليلي: لا مش جايه من البيت طبعا... كنت نبطشيه النهارده في المستشفي وبابا كلمني بعد الفجر بعد ما صلي لانه اتخض ان مصطفي مش موجود في البيت
ادهم: نبطشيه؟
ليلي: انا دكتوره يدوب خلصت الامتياز ولسه مستلمه شغل جديد
ادهم: دكتوره اممم؟ عرفتي عنواني منين؟
ليلي: مصطفي اخويا مالوش سيره تقريبا غيرك انت.. من وهو في الكليه وهو بيعرف كل حاجه عنك وبالتالي انا كمان عارفه كل حاجه عنك
ادهم: تعرفي ايه عني؟ ولا اخوكي نفسه يعرف ايه عني؟ مش لانه عارف مكان سكني او المكان اللي بسهر فيه يبقي يعرف كل حاجه عني... انا مفيش حد يعرف حاجه عني
ليلي بتحدي: انا اعرف عندك كام سنه واعرف بتاكل ايه وبتشرب ايه وبتشرب كام سيجاره في اليوم وبتسهر فين وبتعرف كام بنت وبتسافر امتي وترجع امتي؟
ادهم: اي حد في شغلي يعرف كل ده عني بس برضه ده مش معناه انك تعرفي حاجه عني.. طيب انتي مثلا في المستشفي ممكن بتاع الامن اللي علي الباب لو سألته هيقولي بتيجي امتي وتمشي امتي ومين بيجيبك واصحابك هيقولو بتاكلي ايه وتشربي ايه فهل ده معناه اني اعرف كل حاجه عنك؟
سكتوا الاتنين و عدت كام دقيقه ومصطفي اخوها نزل يجري ووقف قدام ادهم وحياه
ادهم: نزل ايدك وشوف اختك
راح لاخته

مصطفي: انتي ايه اللي جابك وجيتي ازاي؟ انتي اتجننتي تجيلي هنا؟
ليلي: انت بتعمل ايه هنا؟ وايه الوضع اللي شفتك فيه ده؟ من امتي احنا كده؟ هيا دي تربيتك واخلاقك؟
مصطفي: بقولك ايه انتي هتعملي زي ابوكي ولا ايه؟ وبعدين انتي بتكلميني كده ليه اصلا؟
ليلي: انا اختك الكبيره واتكلم زي ما انا عايزه
مصطفي: كبيره؟ انتي هتستعبطي ولا ايه؟ انتي كبيره بتلات دقايق بس هتعملي فيهم كبيره بقي
ادهم سامعهم وابتسم وفهم انهم تؤام
ليلي: اياك تكون ثانيه واحده برضه انا الكبيره يالا اتحرك بابا وماما قالبين الدنيا عليك يالا
مصطفي سكت وهيا راحت لادهم
ليلي: انا متشكره جدا لحضرتك واسفه لو كنت ازعجتك؟
ادهم مردش عليها بس بص لاخوها
ادهم: هات اختك واركبوا هوصلكم البيت انجز
كان بيأمر مصطفي ومصطفي بينفذ بس ليلي شدته ووقفت
ليلي: متشكرين احنا هناخد تاكسي ونروح
ادهم بص لمصطفي: اركب وركبها
وهو ركب عربيته... مصطفي شد اخته وركبها وركب هو جنب ادهم واهو اتحرك بيهم
مصطفي: انا متأسف جدا يا سياده المقدم علي اللي حصل النهارده ده؟
ادهم: تاني مره تبقي تعرف بيتك ازاي يلاقوك لو احتاجوك وطالما انت بره يبقي تليفونك مفتوح
مصطفي: حاضر يا افندم
ادهم: وما تقولهمش تاني انك سهران معايا طالما انتي مش سهران معايا؟
مصطفي: تمام يا افندم
ادهم: انزل طمن عيلتك وتجري علي شغلك اتفضل
ادهم راح علي شغله وجمع كل الخريجين الجداد اللي لسه مستلمين شغلهم
وجمع زمايله كمان وكلهم في صاله التدريب
كانو اربعه ادهم واكرم ومحمد وعلاء دول اصحاب جدا وكل واحد فيهم معاه خمس تلاميذ مسؤل عنهم يدربهم ويجهزهم للخروج للحياه العمليه... يجهزهم لشغل المخابرات وشغل الجاسوسيه ويعلمهم مهاراته الخاصه
طبعا ده وليهم كمان مدربين للفنون القتاليه وفنون التنكر وكل مجال ممكن يحتاجوه في شغلهم
ادهم كان واقف مع اصحابه واستأذنهم الاول انه يتكلم مع العيال كلهم
ادهم: بما انكم كلكم هنا فانا عندي كلمتين هقولهم
الباب خبط ودخل مصطفي يجري ووقف وسط اصحابه
ادهم: مش معني انكم بقيتوا ضباط مخابرات واتعينتوا هنا انكم بقيتوا حاجه! انتو حاليا ولا حاجه؟ انتو في قاع السلسله الغذائيه للضباط... وبدال ما تدربوا وتحسنوا قدارتكم بترحوا تسهروا وتسكروا وتقضوها مع بنات...
طبعا ممكن حد فيكم يقول ان دي حياتنا الخاصه واحنا حريين وهو فعلا عنده حق بس ده لو حياته الخاصه مش هتأثر علي شغله.. لكن في حالتكم انتو اللي بتعملوه ده والمنظر اللي انا شفتكم فيه الصبح احب اقولكم ان ده بدايه نهايتكم

مينفعش تفضلوا طول الليل سهرانين تشربوا وتسكروا وكمان تعملوا علاقات مشبوهه وعايزين تيجوا الصبح تبقوا ظباط طبعا ده كلام فارغ... صحتكم هتدهور من الشرب وال** والسهر ولا هتقدروا تدربوا ولا هتقدروا تقفوا اصلا علي رجليكم... ومحدش يبصلنا ويقول ان احنا مثلا بنسهر ونشرب او لينا علاقات لاني هقولكم ان احنا خلاص وصلنا وبقينا وزي ما بيقولوا كده بالعاميه نمونا وقف وعلي الرغم من كده لو عندنا مهمه او التزام معين بنقوم بيه وساعتها ولا بنشرب ولا بنسهر... كلامي ليكم خلص... كلامي حاليا موجه لرجالتي انا بس... تدريبكم كل يوم هيبدا الساعه 6 الصبح هتيجوا وهتتدربوا حتي لو انا مش موجود... هبدا معاكم نظام جديد وهكلف كل واحد بمهمه معينه يقضيها وهدخلكم معايا في شغلي اكتر يعني مش هنقتصر علي التدريب هنا بس هخرجكم شويه شويه للعالم الخارجي... ممنوع منعا باتا السهر او الشرب او ال** طول ما عندك تاني يوم تدريب... عندكم يوم الخميس وراه الجمعه اجازه اعملوا ما بدالكم... طبعا انا مش بجبر حد وكل واحد حر بس اللي مش عاجبه نظامي او انا مش عاجبه يتفضل يشوف غيري... قرروا
اكرم هنا اتدخل: نفس الكلام ده ينطبق علي رجالتي
محمد وعلاء كمان قالوا نفس الكلام
يوم وري يوم بيعدي والطلبه بينفذوا الكلام بالحرف
ادهم بالليل راح الكباريه اللي متعود يسهر فيه وشرب وجاتله بنت تقعد معاه واكتشف انها نفس البنت بتاعت الصبح
البنت: اسمي دنيا
ادهم: اهلا

دنيا: ما انت حلو اهوه وليك في السهر والشرب امال الصبح كنت شاويش عطيه ليه؟
ادهم: الصبح حاجه والليل حاجه تانيه خالص المهم هترغي ولا هتقومي؟
دنيا: اقوم طبعا هو انا اطول
ادهم: طيب يالا قبل ما افوق
ركبوا العربيه وادهم طلع بيها
ادهم: هنروح فين؟
دنيا: شقتك
ادهم: لا شقتي مفيش بنات بتدخلها نهائي
دنيا: طيب نروح شقه الصبح
ادهم: لا طبعا اللي فيها تلامذتي مينفعش
دنيا: يبقي تعال شقتي
وصفتلو الطريق ووصلوا وطلعوا علي شقتها... ادهم كان معاه ازازتين خمره شربوهم... دنيا جنبه لابسه ما يشبه قميص النوم وقلعت ادهم قميصه وقاعده جنبه بتحاول تغريه
كان قدامهم مزه بياكلوها ودي عباره عن مكسرات
ادهم مع انه سكران جدا الي ان في حرب جواه... كل يوم نفس الحرب دي... نفس الكره والغيظ والغضب ما بينتهوش! ما بيقلوش...
دنيا: ما تيجي ندخل اوضه النوم ايه رأيك؟
ادهم: عارفه؟ انتو كائنات متطفله مستنفزه... تعرفي العلقه اهي دي حشره صغيره بتلزق في الجسم تمص الدم لحد ما تشبع تمشي تشوف غيره اهو انتو كده... لا لا انتو مش كده لان الحشره دي بتمص الدم الملوث كده انا بظلمها بتشبيها بيكم... انا مش عارف انتو ايه؟
دنيا: ما كفايه بقي كلام
ادهم: عارفه انا هنا ليه؟ علشان بكره كل الستات بكرهم جدا
دنيا: بتكرهنا بس متقدرش تستغني ههههههه
ضحكت بمياعه ضحكه الرقصات
ادهم: مش حكايه اني مقدرش استغني حكايه اني بحب اعمل زيكم اخدكم اتمتع بيكم وبعدها ارميكم بره زي السجاير بالظبط اشربها واحطها تحت رجلي ادوس عليها... انتو كده بالظبط
دنيا: وانا راضيه اشربني

اخدته اوضه النوم وشويه كده ولقي نفسه قرفان جدا منها ومش قادر يفضل معاها
زقها بعيد عنه ومهما تشده بيزقها ولانه سكران بيوقع لحد ما وقف وسابها وخرج شد قميصه ومشي علي شقته
مستغرب من نفسه ليه معرفش ينام معاها؟ ليه صوره ليلي جايه قدامه وهيا بتقول ان اخوها متربي وما يعملش كده؟ ليه جواه احساس كبير بالذنب ان تلامذته بتقلده حتي في علاقاته وشربه وسهره... طيب هو وله ظروفه الخاصه لكن هما يقلدوه ليه؟ ؟ ؟
روح بيته وخلع قميصه المفتوح ورماه بعيد وفضل يشرب ويشرب وجواه نار مهما يشرب ما بتطفيش ابدا ونام علي الكنبه او بمعني تاني اغمي عليه من كتر الشرب والقزايز حواليه فاضيه
فتح عينه علي خبط مزعج جدا في دماغه وفي الباب
جه يقوم بس وقع لانه مش قادر يقف اصلا
صداع رهيب من كتر الشرب بس اللي علي الباب ملح انه يفتح... ادهم قام واخيرا وصل للباب وفتحه وما استغربش لما لقي ليلي بس المره دي معاها راجل كبير خمن انه ابوها...
ابوها محمد: ابني فين؟

زق ادهم ودخل جوه واول ما شاف قزايز الخمره بص لادهم اللي ندم للحظه ان ابو ليلي شاف المنظر ده عنده
عم محمد: خمره؟ وسيادتك مثل اعلي ههههههه... لعن الله شاربها وساقيها وحاملها بس انت امثالك ما يعرفوش ربنا اصلا... ابني فين؟
ادهم: الشقه قدامك دور عليه براحتك
ادهم فتحله الطريق وزي بنته دور بس ملقيش حد
عم محمد: ابني فين؟
ادهم: انا معرفش ابنك فين؟
عم محمد: انت ظابط انت؟ انت مسؤل عن تدريب شباب صغير هيطلع للدنيا؟ ابني مربيه احسن تربيه واول ما جه عندك بقي يسهر ويشرب والله اعلم بيعمل ايه تاني وده ليه؟ لان القائد بتاعه اسوأ من كده بمراحل فطبيعي انه يقلده
ادهم: والله انا مقلتلش لحد يقلدني وانا مش مسؤل عن تصرفات حد كل واحد حر ومقلتولوش ياخدني مثل اعلي
عم محمد: بس لما تكون مسؤل عن ناس لازم تراعي تصرفاتك
ادهم: انا حر
عم محمد: لا ما انتاش حر ابدا طالما بقيت مسؤل تبقي مش حر... طالما مسؤل تعلم ناس يبقي مش حر لان طبيعي ان الطلبه تقلد استاذها
ادهم: حضرتك جاي تديني درس في الاخلاق؟
عم محمد: لا العفو يا باشا بس انا عايز ابني لان لو هما دول الضباط امثالك كده فانا ما يشرفنيش اني اقول ان ابني ضابط
لا اخلاق ولا دين ولا تربيه... يعربد طول الليل ويشرب ويسكر ويزني يبقي ما يشرفنيش ابدا ان ابني يبقي منهم
ادهم: خلاص خد ابنك بعيد عنهم
عم محمد اتنرفز جامد علي ادهم: ابوك معلمكش انك عيب ترد علي الكبير كده... معلمكش الادب والاخلاق (مسك قزازه خمره وحدفها في الارض اتكسرت) معلمكش ان الشرب ده حرام؟ معلمكش ان السجاير دي (مسكها ورماها) مضره وتعتبر ذنب اصغر؟ معلمكش ان الزنا من اكبر الكبائر؟
معلمكش انك لما تكون مسؤل لازم تكون قدوه؟ انا مش عارف انت بتعلمهم ايه؟ ازاي يشربوا ويسكروا ولا ازاي ياخد بنت معاهم السرير؟ هو ده اللي بتعلمهلهم صح؟ انت ظابط انت؟
ادهم: خلصت كلامك؟

عم محمد: لا مخلصتش... انا عايز اعرف انت ابوك فين ولا امك ولا متبريين منك من عمايلك السودا دي؟
هنا ادهم وصل للقمه: عايز تعرف ابويا فين؟ ابويا ميت خلاص ارتحت ابويا وامي ماتو وانا عندي عشر سنين وعلشان كده محدش علمني كل اللي انت قولته ده... خلاص؟ محدش علمني اي حاجه؟وبعدين بتسالني انا ظابط ايوه ظابط واحمد ربنا ان انا ضابط لاني لو مكنتش ضابط كنت هبقي مجرم في الشوارع وساعتها كنت هحرق الدنيا دي كلها انا جوايا نار ملهاش اول من اخر فاهم؟ جوايا نار لو خرجت مش هتخلي اخضر ولا يابس؟ ودلوقتي بقي انا معرفش ابنك فين فاتفضل من هنا؟
عم محمد: تربيه شوارع يعني! يبقي الواحد ما يستغربش انك تطردني او تعمل اكتر من كده؟ يالا يا بنتي من هنا الجو والمكان هنا وسخ
خرجوا وسابوه قاعد مكانه مش قادر يتنفس او يتكلم او يقوم من مكانه؟ من امتي بيطرد حد من بيته كده ولا بيرد كده؟ ليه زعلان ان اب خايف علي ابنه؟ مش كل الناس زيه

ادهم قام بسرعه يلبس هدومه كان هيدوس علي القزاز فوقف لمه كله بايده... كان متغاظ جدا ومتنرفز جدا وكل كلمه الراجل قالها بيعيدها تاني
ادهم اخد باله انه بيضغط بكل قوته علي قزازه في ايده وان ايده اتعورت وبتجيب دم كتير
قام بسرعه ومسك شاشه من علبه اسعفاته ولفها علي ايده بسرعه ولبس ونزل يجري علشان يحصلهم
نزل لقاهم ماشين يدوب علي ناصيه الشارع ركب عربيته وحصلهم بسرعه ووقف جنبهم

ادهم: لو عايز ابنك اركب هوصلكم
عم محمد: متشكر لخدماتك
ادهم: عايز ابنك ولا مش عايزو؟ اركب
عم محمد بص لبنته وفتحلها الباب ركبت وري وهو ركب قدام جنبه
ادهم بيسوق والكل ساكت بس عم محمد لاحظ ان ايد ادهم بتنزف والدم بينقط منها
حاول يتجاهله ويعمل مش واخد باله بس مقدرش
عم محمد: علي فكره انت ايدك بتنزف
ادهم: متشغلش بالك
بعد شويه ليلي متابعه ايده: غلط تنزف كده لازم
قاطعها: ما تشغليش بالك يا دكتوره
ليلي: ولو اغمي عليك وانت سايق كده بينا؟
ادهم بيضحك بغلب: لا ما تخافيش علي نفسك وعلي ابوكي مش بيغمي عليا من مجرد جرح كده
اخيرا وصلوا وهو فتح عربيته ونزل وبص لليلي
ادهم: استنوني هنا... محدش يجي ورايا وثواني ونازل
ادهم بيبص لليلي علشان ما تخليش ابوها يطلع ويشوف منظر ابنه كده ليلي شاورت بدماغها انها فاهمه
ادهم طلع يجري لفوق وزق باب الشقه خلعه من مكانه ودخل للمكان اللي مصطفي فيه واتفاجئ مصطفي بنفسه بيوقع من علي السرير
ادهم مسك هدومه ورماها في وشه: البس هدومك في اقل من دقيقه اتحرك
مصطفي بيلبس بسرعه: علي فكره احنا لوحدنا مفيش اي بنات
ادهم: البس وانجز

ادهم مسك قميصه وحدفه في وشه ومعطاهوش فرصه يقفل زرايره مسكه من هدومه وجرجره قدامه علي السلم لحد ما نزلوا لتحت ومصطفي مستغرب ليه كده؟
كان ابوليلي وهيا واقفين تحت وليلي بتحاول تمنع ابوها يطلع لانه لو شاف ابنه كده ممكن يروح فيها
ليلي: انت مش حاسس انك زودتها قوي معاه؟ ده ضابط له وزنه ومركزه وانت هزقته
عم محمد: معرفتش امسك نفسي شاب في سن الورد يضيع شبابه كده؟ وبعدين ندمت لما عرفت انه يتيم يالا ما علينا اهو اللي حصل
ادهم وصل لقدامهم ورمي مصطفي ناحيه ابوه
ادهم: ابنك في حضنك اهوه... من هنا ورايح انت مسؤل عنه ومحدش ابدا يجي يدق بابي يسألني عنه مفهوم؟
( بص لمصطفي) انت يا ابني انت تشوفلك حد غيري لانك مالكش مكان عندي خلاص؟ من هنا و رايح انت مش من رجالتي؟ وبعدين انت بتعمل كده ليه هاه؟ عندك عيله بتحبك وتخاف عليك.. عندك اخت بتيجي تسأل عليك وبتحبك وعندك اب هيموت نفسه من خوفه عليك واكيد والدتك في البيت هتموت من قلقها.. عايز ايه تاني اكتر من كده؟ اللي عنده اب وام المفروض كل يوم يوطي علي رجلهم يبوسهم مش يجننهم ويخليهم كل يوم يطلعوا يدورا عليه؟ حافظ علي النعمه اللي في ايدك بدال ما تتحرم منها
مصطفي: يا سياده المقدم انا م
قاطعه: مالكش مكان عندي وما اشوفش وشك تاني... كده مرضي يا عم الحج ابنك اهوه قدامك انت حر فيه وانا من هنا ورايح ماليش علاقه بيه خلاص؟
سابهم وركب عربيته وطلع زي الصاروخ من قدامهم
مصطفي: انتو عملتو ايه؟ انتو دمرتوني فاهمين؟ انتو دمرتوني

رواية العنيد الجزء الأول بقلم الشيماء محمد الفصل الثالث

ادهم سابهم وركب عربيته وطلع زي الصاروخ من قدامهم
مصطفي: انتو عملتو ايه؟ انتو دمرتوني فاهمين؟ انتو دمرتوني
عم محمد: انت عايزني اشوفك بتغلط واقف اتفرج ؟
مصطفي: ومين قالك اني بغلط؟ هيا صح ؟
انت عارف كنا بنعمل ايه هنا ؟ كنا بندرب ؟ كنا بنساعد بعض واتصلت بامي وقولتلها اني هبات مع زمايلي يبقي ايه بقي ؟ تيجو وتدمروني كده ليه ؟
عم محمد: الراجل ده تأثيره وحش عليك ...
مصطفي: انت تعرف مين الراجل ده ؟ تعرف ايه عنه هاه ؟
عم محمد: اعرف انه سكري وبتاع نسوان وده كفايه
مصطفي: الراجل ده من اكفئ واحسن الظباط اللي التاريخ بيذكرهم مش في مصر بس لا ده في اي جهاز مخابرات اسمه له وزن ... ده القمه وانا عمري كله بتعب وبسهر علشان اقدر اوصله ... طول سنين كليتي بحلم اوصل لادهم ده يبقي لما اوصله تبعدني انت عنه ؟ ليه انا عملتلكم ايه ؟ وانتي يا ليلي اكتر واحده في الدنيا عارفه قد ايه الموضوع ده مهم بالنسبالي تقومي تعملي كده ؟

 

ليلي: انا معرفش ان بابا هيعمل كده
عم محمد: بقولك ايه انا ما قولتش كلمه واحده اتبليت فيها عليه قولت اللي شايفه بعيني وبعدين انت لسه في شغلك
مصطفي: بس مش معاه انت عارف بعد الليله اللي فاتت هو كلفنا بمهام نعملها وغير تدريبه معانا وبدا يخرجنا للواقع ومنع تماما اي حد فينا يشرب او يسهر او يسكر او يقابل بنات وهدد ان لو حد عمل كده هيطرده من فريقه ... وخلي كل الظباط زمايله يعملوا زيه كده تيجي انت تتسبب في طردي ... ده مش بس انت دمرت مستقبلي معاه انت حتي سمعتي دمرتها لان الكل هيقول اني اتطردت بسبب اني سكرت ولا نمت مع واحده
شفت بقي انتو وصلتوني لايه ؟ انا مش هسامحكم ابدا
سابهم وجري بعيد عنهم وركب اول تاكسي يقابله في وشه

ادهم فضل يلف بعربيته وقعد في حته هاديه علي النيل ديما بيقعد فيها من صغره
فضل يفتكر بيته الجميل الهادي ... ابوه وحب ابوه ليه .. عم محمد بخوفه علي ابنه فكره بابوه وحب وخوف الاب علي عياله ... ليلي كمان فكرته باخواته وتخيل للحظات لو ابوه لسه عايش كان فضل وسط عيلته الهاديه والجميله ومكنش خسر كل حاجه كده واحده واحده بعد موت ابوه ...
ذكريات وذكريات بتهاجمه سنين طويله وحيد
# يا ابني ؟ يا ابني ؟ يا ابني مالك ؟
فاق ادهم علي صوت حد بيكلمه
ادهم: خير في ايه ؟ حضرتك محتاج حاجه ؟
# لا يا ابني بس انت اللي محتاج
ادهم: وانا محتاج ايه ؟
# محتاج دكتور لايدك اللي بتنزف دي
ادهم كان نسي تماما ايده ... بصلها بلامبالاه
ادهم: ياريت كل الجروح بتتعالج زي ايدي كده
# كله بيروح حتي العمر بيروح ارمي تكالك علي اللي خلقك واشكيله وهو بيرزق
ادهم قام وراح المستشفي العسكري بتاعتهم وخصوصا لانها قريبه من مكان شغله
دخل وطلب دكتور جراحه
الاستقبال:حضرتك عايز حد معين ولا اي دكتور
ادهم: اي دكتور جراحه مش تفرق
الاستقبال: في استشاري بس حاليا هو في عمليات والله اعلم هيخلص امتي
ادهم: وعلشان كده قولت لحضرتك اي دكتور
البنت كان عاجبها ادهم وعلشان كده بتحاول توقفه قدامها كتير
الاستقبال: في حوالي تلات دكاتره تانين منهم
ادهم: هو انا بتكلم بلغه انتي مش فاهماها ولا ايه ؟ قولتلك اي دكتور متاح مش هيفرق معايا فيا تنجزي.. يا تقولي انك مش فاهمه شغلك... يا ما بتفهميش من اصله لكن كده انتي بتعطليني انجزي
الاستقبال: اسفه يا فندم لحظه
عملتله الكشف وعطتهوله وهو راح لعند الدكتور خبط وفتحتله الممرضه ودخلته
الممرضه: لحظه والدكتوره هتيجي وريني ايدك
ادهم: دكتوره هاه ؟
الممرضه: عندك مشكله انها بنت ؟ ولا ايه ؟
ادهم: لا مش هتفرق بس ياريت ما تكونش هتتأخر لاني متأخر اصلا علي شغلي
الممرضه: دقيقه وهتكون هنا
غسلت ايده ونظفتها وجهزت كل حاجه للدكتوره
الدكتوره دخلت: هاه يا بنتي في مين هنا ؟
الممرضه: في حاله جوه هتحتاج لخياطه (بصوت واطي جدا ) مز من الاخر
الدكتوره: اخرسي
كانوا بيتكلموا بهمس بس ادهم كان شايف الممرضه وقري حركه شفايفها وعرف بتقول ايه
ادهم حط ايده السليمه علي دماغه ومغمض عنيه وراقد علي سرير الكشف ومستني
الدكتوره: اسفه للتأخير ... حضرتك اتعو...
قطعت الكلمه اول ما رفع ايده من علي وشه وشافته
الدكتوره: انت ؟
ادهم: انتي هنا ؟

قام وقف: انا غيرت رأيي ومش ناوي اخيط ايدي بعد اذنكم
ليلي: خايف ولا ايه ؟ ما تخافش لو صوت مش هقول لمصطفي علشان صورتك ما تتهزش
ادهم ابتسم: هو حد قالك اني عيل صغير هتضحكي عليه بكلمه او انك تثيريه بالكلام واتحداكي مثلا واقولك لأهستحمل ؟
ليلي: ما اعتبرتكش عيل صغير غير لما قمت تمشي لمجرد ان الدكتوره مش علي هواك فلغيت عقلك وقررت تهرب وتجري
ادهم: انا لا بهرب ولا بجري بس بريح دماغي
ليلي: بتريح دماغك بانك تأذي نفسك ... انت already نزفت كتير وبعدين الجرح كل ما يقعد من غير علاج هيبقي علاجه صعب وخياطته صعبه وبعدين سيبني ارد جميلك
ادهم: جميلي ؟ جميلي ابوكي رده تالت ومتلت
ليلي: لو سمحت اقعد واسمحلي اعالج ايدك
في حاجه في صوت ليلي بتخليه يستسلملها وهو مش عارف ليه بس قعد
ليلي: الاول هشوف لو في قزاز ولا حاجه لسه في ايدك
نضفت ايده وهيا متوتره وبعدها مسكت حقنه
ادهم: الحقنه دي ليه ؟
ليلي: لا متقلقش دي مجرد مخدر موضعي علشان اعرف اخيط ايدك
ادهم: خيطي من غير مخدر عادي
ليلي: لا مش هتستحمل الالم
ادهم: سيبيني انا احدد استحمل ايه وما استحملش ايه ؟
ليلي: براحتك بس لو ما استحملتش ما تكابرش
ليلي بدأت تخيط ايده وهو رجع لوضعه الاولاني ايده علي دماغه ومداري وشه وساكت تماما لدرجه انها افتكرته نايم او مكابر
حاجه جواها خلتها شكته بالابره وهيا بتخيطه
يمكن لانها عايزاه يتألم ؟ او عايزاه ينطق ؟ او عايزاه يشتكي ؟
ادهم رفع ايده: شوفي مهما تعملي مش هتأثر فريحي نفسك
ليلي: وانا عملت ايه ؟ وبعدين في حد لاستحمال الالم
ادهم: لو متعوده عليه بتيجلك فتره وهتلاقي نفسك ما بيفرقش معاكي الالم وبقيتوا اصحاب واتعودتوا علي بعض وانا والالم اصحاب من سنين فمش هتفرقي معايا وبعدين سبق وقولتلك ان ده مجرد جرح بسيط في ايدي
ليلي: انت هتاخد اكتر من 15 غرزه وتقولي جرح بسيط ؟
ادهم: ايوه بسيط مقارنه بضربه سكينه او رصاصه ده مجرد جرح عادي مش حاسس بيه اصلا
ممكن بقي تخلصي لاني متأخر؟
ليلي خلصت وقامت غسلت ايدها وكتبتله علاج ياخده ووقفت واديتله الروشته
ادهم كان بيقفل ايده ويفتحها وكأنه بيمرنها
ليلي هنا مدت ايديها بتلقائيه ومسكت ايده بين ايديها واستغربت هيا عملت كده ليه
ليلي: ما تحركش ايدك كتير وحاول تريحها وما تستعملهاش علي قد ما تقدر وتيجي بعد يومين هفكلك الغرز دي انا موجوده في نفس الوقت
ادهم سحب ايده: ان شاءالله
راح للباب وفتحه بإيده المصابه
ليلي: مش بقولك ريحها
ادهم: سوري ما بهتمش بكلام الدكاتره
خرج وسابها ومشي وهو احاسيسه متلخبطه ومستغرب ليه بيتوتر وهيا موجوده ؟ ليه الاكسجين بيختفي لما بيشوفها ؟
ادهم فوق لنفسك الستات كلهم طينه واحده مستعد تجرب ؟ لا لا مش مستعد ! مش مستعد ابدا ابدا

ادهم راح شغله واول ما دخل مكتبه لقي مصطفي مستنيه وفضل يترجاه يرجعه فريقه تاني
ادهم سابه خلص كلامه
ادهم: عمرك سمعت عني اني برجع في كلامي او بغير رأيي ؟ لا محصلش ... يبقي تتفضل وتشوف غيري لاني مش فاضيلك اتفضل
حاول يتكلم تاني بس ادهم بنظره خلاه يمشي من قدامه
كل اصحابه حاولو يعرفوا منه هو اتطرد ليه بس معرفش يقولهم ايه ؟ يقولهم ان ابوه هزأ ادهم واتسبب بطرده ؟فالسكوت افضل
مصطفي اهمل شغله وبدأ ما يرحش ويسهر بره او يبات كمان
عم محمد: وبعدين واخرتها معاك النهارده وصلك انذار بالطرد من شغلك لو اتغيبت اكتر من كده
مصطفي: ما يطردوني فيها ايه ؟

عم محمد: يا ابني كام سنه وانت في الثانويه بتحلم تبقي ظابط وكام سنه في الكليه وانت بتتمني تدخل مجال المخابرات تيجي بعد ما توصل تتخلي عن كل ده ؟
مصطفي: كنت بحلم ابقي زي المقدم ادهم ... كانوا علي طول بيقولولنا علي مهماته وعلي ان الموت نفسه بيخاف منه وان محدش ابدا زيه .. هو اسطوره في عالم المخابرات .. كان حلمي اني اكون زيه او حتي ابقي قريب من العالم بتاعه وعملت المستحيل ووصلت وانت جيت هديتلي كل اللي عملته طول السنين اللي فاتت دي فحسيت خلاص اني مش قادر اكمل ولا قادر ارجع فملوش لازمه بقي لازمتها ايه ؟
عم محمد: ماهو انت برضه في نفس مجاله وهو برضه قريب هتفرق ايه بقي تحت قيادته من قياده غيره ؟
مصطفي: تفرق السما والارض ... احنا كنا ملوك والكل بيشاور علينا ... دول تلامذه ادهم واكيد هيبقوا زيه ... دلوقتي انا اتطردت والكل بيشاور عليا ... ده اللي اتطرد من عند ادهم ياتري اتطرد ليه ؟ ياتري عمل ايه ؟معدتش عارف اعمل ايه او اوجههم ازاي ؟ خليهم بقي يطردوني
بعد اذنك عايز اناااام
عم محمد خرج لبنته العاقله بيستشيرها يعمل ايه ؟
عم محمد: وبعدين مع اخوكي ده مش هامه انه يطرد نعمل ايه ؟
ليلي: هو بيحلم بحلم وبعد ما وصله احنا فوقناه منه فده رد فعله
عم محمد: يعني ايه ؟ نوقف نتفرج ؟
ليلي: هتعمل ايه يعني ؟
عم محمد: اي حاجه نعمل اي حاجه
ليلي: لو مستعد يعني المفروض ...
عم محمد: المفروض ايه قولي علي طول
ليلي: تخلي اللي طرده هو اللي يرجعه
عم محمد: قصدك ايه؟ اروحله ؟

ليلي: انت غلطت فيه وهو سكت وما ردش وعمل اللي انت عايزه قولتله يبعد فبعد ابنك انت طلبت وهو نفذ
عم محمد: يعني انت متخيله اني هروحله اقوله رجعه يقوم يقولي امين ؟
ليلي: لا طبعا بس اعتقد يابابا انك لو اعتذرتله وكلمته من ناحيه انك اب وخايف علي ابنك هيسمعك وبعدين يا بابا انت عايرته بيتمه .. هو مش ذنبه انه يتيم
عم محمد: لا حول ولا قوه الا بالله انا مكنتش اقصد بس اهوه الظروف بس انتي متأكده انه هيتقبل اعتذاري ؟
ليلي: لأطبعا مش متأكده بس اعتقد انه بيقدس العيله وحب العيله لبعضها اللي هو اتحرم منها فهيقدر.. علي العموم مش هنخسر حاجه لو جربنا
عم محمد: طيب اروحله امتي ؟
ليلي: مش عارفه ... كان المفروض يجيلي وما جاش
عم محمد: يجيلك ؟ يجيلك ليه ؟
ليلي: مش ايده كانت متعوره وجه المستشفي وكان من حظه انه يوقع تحت ايدي اول ما اكتشف ان انا الدكتوره بتاعته كان هيمشي بس اقنعته يقعد وخيطت ايده وكان المفروض يجي يفك السلك وما جاش
عم محمد: نروحله الشغل يعني ؟
ليلي: علشان زمايل مصطفي يشوفوك ويقولو ابوك جاي يستسمحه لا طبعا ... روحله بيته واديك عارفه
عم محمد: طيب تيجي انتي معايا ؟ لو حسيتي اني هشد معاه تهديني انا لاني ممكن لو شفته بيشرب ولا عنده حد ممكن ادخل اهزقه
ليلي: لا يا بابا مالكش دعوه بحياته الخاصه
عم محمد: خلاص نروحله انا وانتي ماشي ؟
ليلي: ماشي
دخلت ليلي اوضتها وجواها فرحه مبهمه مش عارفه ليه متحمسه انها هتشوفه
من امتي وهيا بتسمع اسمه؟ ومن امتي كانت بتتمني تعرف حتي شكله ايه ؟بتعرف كل اخباره ورسمتله صوره في خيالها والمشكله ان هو طلع احلي من الصوره دي ! اتمنت وهيا في بيته انه يكون ده بيتها ...
فوقي يا ليلي فوقي ده مجرد راجل سكري وخامرجي وبتاع ستات وهيخونك كل يوم مع واحده شكل فوقي لنفسك وشوفي انتي فين وهو فين ...انتي فوق في السما وهو تحت سابع ارض
قرروا فعلا انهم يرحوله البيت وراحو واستنوا بره
خبطوا كتير جدا بس محدش فتح
عم محمد: شكله متنيل سكران ولا مغمي عليه
ليلي: طيب نمشي ونجيله وقت تاني ولا ايه ؟
عم محمد: خبطي تاني
فضلو حوالي عشر دقايق كمان
ليلي: بابا مفيش حد يالا بينا

عم محمد: لا هيروح فين يعني دلوقتي ؟اكيد متنيل علي عين اهله سكران جووه ومش قادر يقوم ولا حاسس بالدنيا واللي فيها .. ماهو ده حال الخامرجي
## وهو الخامرجي ده عاطل وقاعد في البيت ليل نهار ؟ مش يمكن يكون عنده شغل ؟
ادهم كان وراهم ويدوب جاي من بره يدخل بيته
كمل طريقه ووسعوله من قدام الباب فتحه ودخل
عم محمد: نمشي ولا ندخل ؟
ادهم: لو عايزك تمشي كنت هقولك امشي او علي الاقل اقفل الباب ...
عم محمد: بس علي الاقل تقول اتفضلوا
ادهم: اه سوري بس زي ما حضرتك قولت محدش علمني الذوق ... اتفضلوا
دخلو الاتنين وكالعاده شقته نظيفه جدا والمره دي ما فيش قزايز خمره فاضيه
عم محمد: مفيش قزايز فاضيه !
ادهم: ده لاني بقالي يومين ما دخلتش البيت مش لاني بطلتها ... المهم خير !؟
عم محمد: المفروض الاول تضايفنا وتسألنا نشرب ايه ؟
ادهم اتنهد بصوت عالي لانه كان تعبان ونفسه يوصل سريره باي شكل
ادهم: اه طبعا .. تشربوا ايه ؟
قام وقف
عم محمد: اقعد انت وليلي هتعملنا كوبيتين قهوه مظبوطين
ليلي وقفت بس هو شاورلها تقعد
ادهم: لا معلش انا هعمل لحضرتك القهوه المظبوط وحضرتك يا دكتوره قهوتك مظبوط برضه ؟
ليلي: انا مبشربش قهوه ما تشغلش بالك بيا
ادهم: اه وابوكي يقول اني كالعاده قليل الذوق وما اتربتش وما بعرفش في الاصول صح ؟ اتفضلي قولي تشربي ايه ؟
ليلي: طيب نسكافيه لو ممكن ؟ بس ممكن اساعدك
ادهم: لا معلش ما بحبش حد يساعدني
دخل ادهم عمل كوبايتين قهوه وواحده نسكافيه
ليلي وابوها بره بيتوشوشوا
ليلي: كان لازم يعني تطلب تشرب حاجه ؟
عم محمد: بلطف الجو شويه
ليلي: وهو كده تلطيف ؟
عم محمد: انا قلت انتي تعمليلنا حاجه نشربها واهو يتكسف مننا فيوافق واحنا في بيته لكن ما تخيلتش ان هو اللي هيصر يقوم بنفسه
ادهم خرج بالصينيه وقدم القهوه لعم محمد والنسكافيه لليلي وهو مسك قهوته
ادهم: اتفضلوا

عم محمد: قهوتك حلوه ومظبوطه وبوش كمان متخيلتش انك هتعرف تعملها اصلا ؟
ادهم: انا عايش لوحدي اكتر من عشرين سنه فأكيد هعرف اعمل قهوه ... نسكافيهك مظبوط يا دكتوره ولا عايزه سكر او سكره زياده ؟
ليلي: لا مظبوط جدا متشكره قوي .. مجتش فكيت السلك !؟ ايدك اخبارها ايه دلوقتي ؟
ادهم: كويسه وفكيت السلك وكويسه
ليلي: فكيته فين ؟
كان عايز يقولها مالكيش دعوه بس معرفش يقولها
ادهم: فكيته بنفسي .. دي لا اول ولا اخر مره اتعور فيها ما تشغليش بالك ...المهم خير ؟
عم محمد: مصطفي ابني
ادهم بص للارض وبيدعك دماغه بايده بتعب
ادهم: معرفش هو فين ومش مستعد نهائي اني انزل ادور لحضرتك عليه ..
عم محمد: لا مش القصد انا عارف مكانه هو في البيت
ادهم: ولما هو في البيت حضرتك جايلي ليه ؟
عم محمد: اعتذرلك عن اللي حصل مني وتهوري وفقدان اعصابي عليك
ادهم: الموضوع انتهي وخلص عادي
عم محمد: لا ما انتهاش ابني في البيت
ادهم: وايه المشكله انه في البيت ؟
عم محمد: انه في البيت مش في شغله ... ابني بيحلم من صغره يبقي ظابط ودلوقتي بعد ما بقي ظابط قاعد في البيت وبعتوله انذار بالطرد
ادهم: طالما اتغيب من غير سبب هيطرد
عم محمد: هو مش عايز يروح
ادهم: هو حر
عم محمد: لا مش حر طبعا ... لا مش حر ابدا
ادهم: انت عايز ايه ؟
عم محمد: مش عارف اشوف ابني بيدمر مستقبله واحلامه وطموحه واقعد اتفرج واقول انه حر
ادهم: المفروض تعمل ايه بقي ؟ تجيلي انا ؟ عايز مني انا ايه ؟
عم محمد: عايزك ترجعه شغله
ادهم: ارجعه ؟ هو بيغيب بمزاجه ارجعه انا ازاي بقي ؟
عم محمد: هو مش عايز يروح بسببي فانت ساعدني
ادهم: اساعدك ازاي ؟

عم محمد: رجعه لفريقه ولاصحابه وزمايله
ادهم: نعم !؟ ارجعه ايه ؟ ارجعه تحت قيادتي تاني ؟ وكل يوم الصبح تيجوا تسألوني عنه ؟وكل ما يسهر او يعمل اي حاجه ما تعجبكش تيجي ترميها عليا ؟
عم محمد: لا يا ابني
ادهم: انا مش ابنك ومش ابن حد ... انا سكري وخمرجي ما تنساش ده ... انا زي ما انا ما اتغيرتش ... وهفضل قدام ابنك علي طول ... انا المثال السيئ للضباط الجداد ... اسف طلبك مرفوض
عم محمد: يا سياده المقدم مش هسامح نفسي ابدا لو انا كنت السبب في تدمير مستقبل ابني ... انا مجرد اب وكان خايف علي ابنه واتنرفزت عليك شويه معلش بقي عديها
ادهم: اسفك علي عيني وعلي راسي بس مش هقدر ارجعه ... انت لمجرد انه سهر بره جيت وعملت معايا خناقه لرب السما تخيل للحظه لو كان اتصاب مثلا او اتعرض لضرب نار او لاقدر الله مات
هتعمل ايه فيا ؟احنا في شغلنا ده بنخرج واحنا عارفين تماما انه ممكن ما نرجعش
عم محمد: وانا عارف الكلام ده كويس ودي اعمار بيد المولي واختلفت الاسباب والموت واحد
ادهم: وانا مش عايز اكون السبب في اي شيئ يخص ابنك ... انت طلبت مني ابعد وانا بعدت احترم بقي اتفاقنا ده ودلوقتي انا تعبان جدا وزي ما قولت لحضرتك بقالي يومين بره البيت وما نمتش فاعذرني
ادهم وقف وهما وقفوا واخد بنته وخرجوا
هما خرجوا وهو قعد مكانه حط راسه بين رجليه وساند علي ايديه
ليه برضه احساسه بالذنب بيزيد؟ ليه غيران من مصطفي وعيلته ؟ ليه بيتمني ولو مره يحس بالحب او ان حد خايف عليه ؟
احاسيس كتيره محروم منها وهو قاعد كده اتفاجئ بحد جنبه فرفع راسه وشافها واقفه وبتبصله وللحظه تخيل انه متهيأله وانها مش موجوده بس اتكلمت وعرف انها حقيقه واقفه قدامه ...

رواية العنيد الجزء الأول بقلم الشيماء محمد الفصل الرابع

ليلي: ممكن اعرف انت عملت كده ليه؟
ادهم رجع لورا وسند ضهره علي الكنبه وبيتفرج عليها
ادهم: افندم؟ ابوكي بعتك تقنعيني؟
ليلي: لا طبعا ركبني تاكسي علشان اروح شغلي وهو ركب ومشي بس انا رجعتلك علشان افهم انت عملت كده ليه؟
ادهم: مزاجي كده عندك مانع؟
ليلي: عندي مليون مانع لان ده مش بالمزاج
ادهم.: فعلا مش بالمزاج... مش بمزاجكم تقولولي ابعد عنه ولما الدلوع بتاعكم يزعل تيجوا تقولولي رجعه تاني... عندك حق مش بالمزاج فعلا
ليلي: انت بتضيع مستقبل اخويا ودلوقتي بتدمر ابويا انت ايه ما بتحسش؟
ادهم: للاسف ما بحسش ما عنديش قلب اصلا ولا بهتم بالمشاعر والكلام ده كله اللي بتتكلمي عنه
ليلي: طالما ما بتحسش يبقي تسمعني وبس... انت هترجع مصطفي شغله وفريقه فاهم ولا مش فاهم؟
ادهم ضحك: والا ايه؟
ليلي: انا مش بهزر

 

ادهم: انتي بتهددي فعايز اعرف بتهدديني بايه؟
ليلي: ترجع مصطفي شغله... بابا مش هيستحمل انه يكون السبب في ان ابنه يخسر مستقبله ويضيع... ومصطفي بيحمل بابا مسؤليه اللي حصل... هيروح فيها انت فاهم؟ انت لازم ترجع مصطفي شغله لازم
ادهم: بتهددي تاني والا ايه؟ لو مرجعتوش هتعملي ايه؟
ليلي مش عارفه تقوله ايه بس متغاظه من بروده
ليلي: هقتلك... ايوه هقتلك واهو يبقي سبب ان مصطفي مش معاك لانك ميت
ادهم: اممممم هتقتليني!؟ تصدقي شوقتيني للموت؟ بقي اخطر اجهزه مخابرات في العالم حاولو يقتلوني وما عرفوش ومجرمين وقتالين قتله وفي الاخر اموت علي ايدك انتي! يمكن مش بيقولو يجعل سره في اضعف خلقه! اوك انا موافق اقتليني يالا
بعد ما كان اتعدل رجع لورا تاني وقعد باسترخاء علي كنبته ورفع رجليه علي التربيزه وايديه تحت راسه وباصصلها
ادهم: مستنيه ايه يالا واوعدك مش هقاومك نهائي...
ليلي: ارجوك يا ادهم عيلتي هتتدمر اخويا وابويا الاتنين! لو جرالهم حاجه ماما كمان هتروح فيها ارجوك
ادهم: لا لا ما تقلبيش دراما كنتي ماشيه حلو في الاول وبعدين ما قولتلك ما ليش في كلام المشاعر... بصي الحياه خد وهات عندك ايه تديهولي في مقابل اني ارجع اخوكي مكانه

بصلها من فوق لتحت وفهمها بنظراته عايز ايه وهيا فهمته
ليلي: ده نجوم السما اقربلك مني... ده حتي في خيالك مش ممكن انت فاهم؟ تطلع ايه انت علشان تبصلي كده ولا تطلع مين انت؟ انت راجل في نظري ما تسواش تلاته تعريفه؟ انت مش راجل اصلا؟ انت لو الكون كله فضي ومفضلش غيرك انت برضه لأ فاهم ولا مش فاهم؟
ادهم: انتي مش ملاحظه انك المفروض بتترجيني ولا نسيتي ان حياه عيلتك في ايدي
ليلي: طالما انت ندل وواطي وما بتحسش يبقي ما ينفعش معاك الذوق
ادهم: وانتي برضه ما ينفعش معاكي الذوق... اطلعي.. بره... بيتي
ليلي: مش هطلع غير لما تتصل بمصطفي وتقوله انك رجعته
ادهم: انا مش عارف مصدر الثقه اللي بتتكلمي بيه ده معتمد علي ايه؟ مش هتصل ومش هرجعه
ليلي: ادهم
ادهم: افندم
ليلي: اتصل بمصطفي والا
ادهم: والا ايه اتفضلي! هتقتليني؟ يالا مستنيه ايه؟ اسهلهالك لحظه
خلع حزام مسدسه ورماه قدامها علي التربيزه ورجع لوضعه تاني
ادهم: متعمر وجاهز يدوب ترفعي صمام الامان
ليلي من غيظها منه فعلا طلعت مسدسه ووجهته ناحيته
ليلي: والله اقتلك بجد لمجرد اني امسح الابتسامه دي من علي وشك الثقيل ده
ادهم ابتسامته اتحولت لضحك وضحك عالي كمان قام وسابها ودخل اوضه نومه وهو بيضحك دخل وقفل بابه وراه وسابها هيا في الصاله وهيا هتجنن مش عارفه تعمل ايه؟
ادهم دخل وبدأ يقلع هدومه... قلع شوزه ورماه وقلع قميصه وفك حزام بنطلونه ويدوب هيقلع بنطلونه الباب اتفتح ودخلت
من غير ما يبصلها
ادهم: غيرتي رأيك وجايه؟
ادهم لقي مسدسه علي دماغه
ليلي: لا ده ابعد من احلامك... بس هقتلك
ادهم: علي فكره التهديد الكتير بيفقد قيمته ودي اول حاجه بنعلمها للعيال انه ما يهددش الا اذا كان مش ناوي يعمل حاجه لكن لو ناوي ينفذ علي طول من غير تهديد
ليلي: بصلي هنا

ادهم بصلها: انسي انتي في مقابل اخوكي يا تقبلي يا تطلعي بره
ليلي: ما قولتلك انا ابعد من نجوم السما
ادهم: ابعد ازاي وانتي بيني وبينك كام سنتيمتر ولا دي دعوه منك بس مش عايزه تقوليها صريحه وانا مش واخد بالي؟ بتثيرني؟ دي طريقتك؟ الاول تترجي وبعدها تتنرفزي وبعدها تهددي وبعدها تليني تاني وبعدها تهددي تاني وتقوليلي اني مش راجل! عايزاني اثبت رجولتي زي ما قولتيلي خايف من خياطه الجرح علشان اقولك مش خايف واثبتلك! دلوقتي انا مش راجل علشان اثبتلك... ده قصدك؟ سوري ما فهمتكيش
قرب منها وهيا بترجع لوري: انا في ايدي المسدس هقتلك ما تقربش
ادهم طبعا متجاهلها تماما وبيقرب مره واحده مسكها من ايدها وحدف مسدسه بعيد عنها
ليلي: اوعي تلمس شعره واحده مني؟
ادهم: ومين قالك اني هلمس شعره؟ انا هلمسك كلك
شدها من ايدها جامد عليه حاولت تقاومه بس مفيش وجه مقارنه بين قوتها وقوته
مسك بلوزتها وبسهوله جدا شقها نصين وهيا صوتت
شالها ورماها علي السرير وهو فوقها مكتفها تماما
ماسك ايديها وكأنهم كلبشات من حديد ومش مديها اي فرصه تتحرك
ادهم: هاه عجبك كده؟
ليلي: ابعد عني اياك تلمسني اياك؟ مش علي اخر الزمن انت تكون اول واحد يلمسني ابعد
ادهم: علي فكره كلامك بيجنني اكتر واسلوبك ده مش نافع... فكره اني اول واحد المسك لذيذه وما تخافيش اوعدك هبقي رقيق معاكي وبعدين دي هتكون تجربه جديده ليا.. وليكي الشرف انك اول واحده المسها هنا في بيتي... تصدقي انك اول بنت تدخل البيت ده..
بيكلمها وبيقرب منها وبيلمسها في خدها ورقبتها بوشه وشفايفه
ليلي: ابعد عني يا ادهم
ادهم: ادهم ادهم ادهم وكأنني صاحبك او حبيبك او ايه؟ بتهددي بايه تاني؟ انتي تحت رحمتي فاهمه؟ اديتك فرصه واتنين وتلاته وقولتلك اخرجي وانتي فضيلتي اعملك ايه؟

ليلي: تبعد عني
ادهم: انا جوايا وحش نايم وبحاول ديما اسيطر عليه بس للاسف مش ديما بقدر ولما بيطلع ما بيفرقش وما بيشفش وانتي صحيتي الوحش ده فصعب ينام تاني؟
ليلي: ارجوك سيبني خلاص فهمتك خلاص هنتيني وكسرتني وكسرت غروري وكبريائي كفايه استوعبت درسك كويس سيبني بقي
ادهم: مقولتلك ما بحبش الدراما الاول كنتي احسن بحب روح التحدي فيكي يالا طلعيها وبلاش عياط ودموع
ليلي: الدنيا مش سايبه
ادهم: انتي في اوضه نومي في شقتي... البواب تحت شافك طالعه بمزاجك يعني جيتي هنا بمزاجك مش غصب عنك... العبي غيرها
ليلي: عارف بابا سألته انت طلبت منه قهوه ليه عارف قالي ايه؟ علشان تبقي عشره ونبقي اكلنا وشربنا مع بعض وانت تتحرج منه... هتخون ثقته دي فيك؟ مصطفي شايفك مثله الاعلي وانك اسطوره هتخونه هو كمان؟ انت ظابط مش خاين... انت مش خاين
كلمه خاين بترن في ودن ادهم... خاين... خاين... اكتر حاجه بيكرهها في الدنيا هيا الخيانه وهو فيه كل الصفات السيئه الا الخيانه عمره ما خان ابدا ابدا وعمره ما كان خاين ابدا
قام مره واحده من فوقها وسابها وخرج بلكونته وطلع سيجاره يشربها
ولعها بايدين بتترعش وفضل يطلع غضبه وغيظه فيها ويهدي اعصابه وافكاره المجنونه وسامع صوت عياطها ومش عارف ليه هيتجنن عايز يكسر اي حاجه؟ عايز يطلع ياخدها في حضنه ويطبطب عليها؟ عايز يقتلها ويخلص من مشاعره المتناقضه دي؟
رمي سجارته ودخلها

ادهم: ممكن اعرف بتعملي ايه لسه هنا؟ امسكك تقوليلي سيبني واسيبك تفضلي وبعدين؟
ليلي وقفت وبصتله كانت ماسكه هدومها وسابتها
ليلي: همشي ازاي بهدومي كده
بلوزتها مشقوقه نصين وهدومها الداخليه باينه
ادهم: دولابي كله قدامك خدي اللي يعجبك
عطاها ضهره وطلع سيجاره تانيه وولعها
ليلي بصت حواليها كان فيه كنبه صغيره جنب السرير وعليها تيشرت اسود
قلعت بلوزتها ولبست تيشرته وطلعت ادهم لاحظها
ادهم: استني ( وقفت من غير ما تبصله؟) التيشرت ده ملبوس مش نظيف
ليلي: مش مهم
مديتوش فرصه يتكلم وجريت... فضل في البلكونه لحد ما لمحها نزلت وجريت في الشارع مش بتقف نهائي
فضل واقف مكانه يبص لمكان ما اختفت فيه وكل جراحه اتفتحت تاني وكل ذكرياته اللي بيحاول يدفنها طلعت تاني وبتمدله لسانها وبتتحداه انه عمره ما هينساها ابدا
دخل وفضل يشرب ويشرب ويشرب لحد ما وقع من كتر الشرب
ليلي راحت لشغلها مهزوزه ضعيفه مستغبيه نفسها
كانت فاكره ايه؟ انها اول ما تقوله يرجع اخوها هيسمع كلامها؟ كانت فاكره انها ليها خاطر عنده!؟ علي رايه هو ايه مصدر ثقتها؟ كانت بتعتمد علي ايه؟
كانت مجنونه كده ليه؟ وفي لحظه جنون كانت هتخسر كل حاجه... هو مش زيها... هو ما بقالوش سنين بيسمع اسمها وبيحلم بيها وبشكلها... هو مش معجب بيها وبشخصيتها وبيتمني يقابلها او يشوفها... هو مش زيها،... هو شخصيه مختلفه عن احلامها وتخيلاتها... لازم تفوق من جنونها ده وعالم احلامها اللي عايشه فيه؟
اخدت نفس طويل فشمت ريحته وافتكرت انها لابسه هدومه... فيها ريحته مش بس برفانه لا ريحته هو... ريحة رجولته مخلوطه ببرفانه... ريحه عشقتها وزودت جنونها اكتر واكتر...

ادهم فاق من نومه كانت الدنيا ليل... قام تليفونه بيرن بازعاج فمسكه ورد
ادهم: الو
اكرم بصوت عالي: انت فين هاه؟ اخيرا اتكرمت ورديت؟
ادهم: وطي صوتك
اكرم: كنت بتشرب بالليل بس دلوقتي ليل ونهار ولا ايه؟ قوم وتعال المدير عايزك اتحرك
ادهم قفل السكه وقام اخد شاور يفوق نفسه شويه وخرج يلبس هدومه
وهو بيلبس وطي يلبس شوزه لمح حاجه في الارض مد ايده وجابها ولقاها بلوزه ليلي اللي قطعهالها
مسك وبتلقائيه شم ريحتها وغمض عنيه افتكر لما شدها عليه ووقعت بين ايديه... افتكر وهو فوقها وبيلمس رقبتها وخدها
افتكر ريحتها ونعومتها وتخيل لو كان ده بمزاجها مش غصب عنها وابتسم
ومره واحده فاق ورماها من ايده: فوق لنفسك ايه؟ هتحن؟ هتتجنن وتحب؟ مستعد تجرب؟ مستعد للحب؟
وكانت الاجابه واضحه وصريحه:لأ مش مستعد
نزل شغله وشاف مديره اللي كلفه بمهمه جديده وطلب منه انه يكلف تلامذته بيها وهو يراقبهم ويشوف هيعملوا ايه؟
راح مكتبه وجمع تلامذته

ادهم: واحد فيكم يتصل بمصطفي ويطلب منه يجي بسرعه علشان وراكم مهمه جديده... ربع ساعه ويكون هنا وتيجوا كلكم مع بعض اتحركوا
فعلا اتصلوا بمصطفي اللي مكنش مصدق نفسه ونزل يجري علي شغله وماردش علي امه اللي بتكلمه ولا ابوه بس جري
وصل شغله واتجمعوا كلهم في مكتب ادهم
ادهم بصله واكتشف مدي الشبه بينه وبين ليلي بس ليلي علي اجمل بكتير
فاق من تخيلاته علي اصواتهم وحماسهم واستعدادهم
ادهم رمي قدامهم ملف
ادهم: ده ملف فيه كل المعلومات المتوفره عن عصابه الاسلحه... بيستوردا اسلحه وبيوزعوها في الشوارع والعصابات ووصلنا ان في صفقه كبيره هتم... امتي!؟ فين؟ مين مسؤل عنها؟ الله اعلم... وظيفتكم انتو بقي تجاوبوني علي الاسئله دي... قدامكم 72 ساعه حد اقصي

اتفضلوا وروني شطارتكم
خرجوا كلهم بس مصطفي فضل
ادهم: افندم
مصطفي: انا متشكر جدا انا مش عارف اشكرك ازاي اصلا انا
قاطعه ادهم: انا رجعتك لانك ظابط كويس ولانك مالكش ذنب في اللي حصل بس لو اللي حصل ده اتكرر تاني مش هكتفي بطردك من عندي بس لأ انت هتطرد من مجال المخابرات نهائي؟ الظابط اللي ابوه بيخاف عليه بالشكل ده يبقي مالوش مكان بينا... احنا هنا بنواجه الموت في كل لحظه ده تعرفه لاهلك والا اتفضل من هنا؟ ودلوقتي روح لزمايلك ووريني شطارتك
مصطفي خرج واول حد فكر يكلمه هو تؤامه وبلغها برجوعه لشغله وفرحته وفضل يتكلم ويتكلم وهيا في ملكوت تاني... ملكوت اسمه ادهم محمود احمد عبدالله...
اشتغلوا في مهمتهم وادهم معاهم طول الوقت بس متفرج لكن دماغه شغاله وبيطلع خيوط القضيه وبيجمع واحد وواحد وتقريبا ملامح القضيه كلها بقت في ايديه