رواية مر العمر للكاتبة الشيماء محمد الفصل السابع عشر
ايناس: خاطب ليلي؟ عمر: اه مش انا قلتلك اني خطبت ليلي فتره كده؟ ايناس: اه، اهلا بيك اخبارك ايه؟ ادهم: اهلا بحضرتك على فكره دلوقتي مقدم مش رائد عمر: اه سوري ادهم: لا عادي عمر: على العموم ليلي في بلدها انا مشفتهاش من ساعه ما اتخرجنا ادهم: اه، طيب فرصه سعيده يا دكتور ودكتوره بعد اذنكم سابهم ومشي وجواه شعاع امل ان ليلي تكون لسه ,,,,,,لسه ايه بقى فوق انت هترجع تاني تفكر فيها؟انسي بقى ادهم: عبير ازيك.
قرب منها واخدها في حضنه لانه فعلا بيعتبرها اخته عبير: ادهم ازيك واحشني ادهم: انت كمان يا قمر عامله ايه؟بقولك تتغدي معايا؟ عبير: طبعا انت بتسأل؟ اخدها وخرجوا يتغدوا مع بعض ويهزروا ويضحكوا لحد ما ادهم فتح الكلام المهم ادهم: ها يا عبير مش هتقوليلي في ايه؟ عبير: في ايه؟مافيش حاجه، سلامتك ادهم: انتي مش مبسوطه ليه مع احمد؟ عبير: لو قلتلك مش عارفه هتصدقني ادهم: لازم يكون في شيئ، محدش بيزعل من حد كده.
عبير: انا مش زعلانه منه ودي المشكله... ادهم: طيب خلاص يبقى مش بتحبيه ابعدي عنه عبير: انا مش بحبه؟انا لما بيسافر في مهمه بموت لحد ما يرجع، روحي بتروح معاه ادهم: طيب فين المشكله يا عبير، انتي بتحبيه وهو بيحبك عبير: معرفش يا ادهم، كل لما بكون معاه بحس بحاجه خنقاني، حاجه واقفه بيني وبينه، في جدار واقف بنا وحاولت كتير اقرب منه او اتجاهل الجدار ده، بس في حاجه جوايا بتقولي انه خاين...
ادهم: احمد خاين؟طيب انا معاكي، خانك قبل كده؟ عبير: لأ طبعا ادهم: خان حد تعرفيه؟ عبير: لأ برضه ادهم: طيب يبقى خاين ازاي؟ عبير: انا معرفش يا ادهم، انا قربت اتجنن في حاجه بتمنعني اقربله ومش عارفاها ايه؟وفي نفس الوقت بحبه ومش قادره ابعد عنه,,,اعمل ايه يا ادهم؟ ادهم: انا هنا مش عارف اقولك ايه يا عبير، بس خليكي جنبه وحاولي تهدي الحاجز ده او تشوفوله سبب عبير: سيبك مني، المهم انت اخبارك ايه؟
ادهم: انا كويس ومسافر بكره عبير: مسافر تاني؟ ادهم: هدرب العيال الجداد عشان يبقوا زينا كده عبير: اه، طيب خلي بالك منهم بقى ادهم كلم احمد وحكاله اللي حصل ونصحه انه يحاول يتكلم معاها كتير ويشوف حل للموضوع ده بدل ما يكبر بينهم ويفرق بينهم نهائي،.
احمد كان جواه عارف ان احساس عبير مش كدب وانها صادقه في احساسها لانه خان اقرب الناس ليه، وكان عارف ان ربنا بيعاقبه لانه زي ما حرم اتنين من السعاده ربنا حرمه هو كمان من السعاده مع حبيبته، بس وصل لمرحله مش عارف يتصرف فيها ولا يصلح غلطه ده ازاي؟
ادهم جهز نفسه للسفر لانه بقى بيعشق السفر ونسي يسأل مكان التدريب هيكون فين او ما اهتمش انه يسأل كل المهم انه هيبعد كام شهر في وسط صحرا بعيد عن كل الناس، راح ادهم وركب الطياره الهليكوبتر واتحركت بيه الطياره وهو استغل الساعه دي في النوم لانه ديما مش بينام غير في اوقات غريبه، وصل ادهم ونزل من الطياره في مكان المعسكر اللي هيدرب فيه الخريجين الجداد واتصدم لما شاف المكان، المكان ما اتغيرش ابدا، كل حاجه زي ما هيا، استغرب انه سافرعلشان يبعد عن افكاره لقي نفسه في اكتر مكان كان بيهرب منه، مكان ما بدأت حكايته، مكان تدريبه القديم.
وقف ادهم مش عارف يعمل ايه؟طيب يعتذر عن المهمه ويرجع؟بس هيفسر رفضه الفجائي ده بأيه؟طيب يكمل وخلاص وما يخرجش ابدا من المعسكر، ده الحل فعلا، هيا عمرها ما هتيجي المعسكر وهو لو خرج مش هيشوفها وبكده تكون محلوله... قابلوه الطلبه فرحانين جدا بوصوله الطلبه: مقدم ادهم حضرتك ما تتخيلش قد ايه احنا فخورين بان حضرتك استانا، انت مثلنا الاعلي #انت متتخيلش احنا بنحلم باليوم ده من امتي؟ #احنا لينا الشرف انك هتدربنا.
قاطعهم ادهم: هااه خلصتوا؟ انتو فاكرين نفسكم جايين رحله؟ انتو حاليا ولا حاجه انتو في قاع السلسه الظباطيه، انتو نكره فاهمين؟ يالا كل واحد يروح يشوف وراه ايه؟
مشيوا الطلبه وهو استغبي نفسه قوي، مش ذنبهم انه هو مصدوم حاليا، رأفت كان صارم بس عمره ما اتريق على حد فيهم او قلل من كرامة حد، لازم يغير معاملته وما ينفعش يبدأها كده، راح الاوضه المخصصه ليه، وحط حاجته وراح لطلبته وهو في الطريق عدي على المعسكر بتاعهم اللي كانوا بيناموا فيه، كل الذكريات اللي كان فاكر نفسه نسيها رجعت كلها تاني... عسكري سيد: سياده المقدم، سياده المقدم.
ادهم: افندم في حاجه، سوري ما اخدتش بالي انت قلت حاجه؟ العسكري: بقول لحضرتك الفريق الطبي مستني حضرتك علشان برنامج التدريب وتشوف العنايه الطبيه هيكون ايه نظامها ادهم: طيب خلاص جاي، هما فين في المكتب؟ العسكري: لا مش في المكتب، في الساحه عند المكتب اللي في الساحه في الهوا ادهم: خلاص ماشي جاي اهوه معاك راح ادهم مع العسكري وشافهم واقفين ادهم: ايه ده؟دي بنت دي؟ العسكري: ايوه يا افندم دي الدكتوره.
ادهم: دكتوره بنت في معسكر جيش؟ده اللي كان ناقص العسكري: لا يا افندم دي دكتوره شاطره قوي ادهم: شاطره ولا المهم انها بنت، ما علينا راح ادهم عندهم ولما حسوا بيه بصوله واول ما شاف البنت كانت تاني صدمه ليه النهارده هيا كمان لما شافته اتصدمت ومعرفتش تنطق، الكل بيبصلهم باستغراب وهما واقفين كده قصاد بعض زي ما يكونوا بقوا تماثيل. مدير المعسكر: مقدم ادهم، مقدم ادهم، ادهههههههم ادهم: افندم سوري ايه؟
المدير: اعرفك بالدكتوره ليلي، هيا اللي هتكون مسؤله عن تدريبات الاولاد مع حضرتك ليلي اخر شخص ادهم اتمني يشوفه واقفه اهي قدامه لسه جميله زي ماهيا بس لا بقت اجمل واجمل بس راحت نظره البراءه اللي في عنيها واترسمت نظره جديه زياده عن اللزوم شعرها بيطير وبقى اطول من الاول. اتمني، معرفش يتمني ايه يضمها في حضنه ويقولها وحشتيني ولا يهرب من المكان ده ويلحق قلبه قبل ما كل جروحه تتفتح تاني؟
ادهم اخيرا عرف يسترجع نفسه ويتكلم ادهم: افندم؟ومن امتي البنات بيشتغلوا في معسكرات الجيش؟ ليلي حست انه بيهنها كبنت ليلي: وايه المانع؟طالما بقوم بشغلي كامل يبقى مفيش فرق بين بنت وراجل ادهم: انا حاليا مش هتكلم عن الرجاله والستات، بس وجودك هنا مش مقبول ليلي: وجودي هنا مش حضرتك اللي تحدده ولما ما اعرفش اقوم بشغلي ابقي اشتكي مني، غير كده اسفه.
ادهم: وانا مش عايز بنات هنا بغض النظر عن ان حضرتك شاطره في شغلك ولا المدير: ادهم اهدي لو سمحت ادهم: ده على اساس اني بقطع في هدومي؟ما انا هادي اهوه المدير: البنات بيتواجدوا في الجيش من بدري انت نفسك لما كنت بتتدرب هنا كان في بنات معاك وما اعترضتش على الرغم من انهم كانوا ظباط لكن جاي تعترض على دكتوره ادهم: انا مش بعترض على شغلها كدكتوره.
المدير: امال بتعترض على ايه بالظبط؟ده انت اكتر ظابط متفتح، لما ده يكون رأيك؟ ادهم: (انا معترض عليها كشخص لاني مش عايز اشوفها لاني بحاول انساها وانتو كده بتصعبوها قوي)طبعا ده كان رد ادهم لنفسه لكن مقدرش ينطقه ادهم: انتو حرين، انا مهمتي مع الطلبه ولما حد يجراله حاجه هبعتهلكم، بعد اذنكم ليلي: استني سياده المقدم وقف ادهم وهو نفسه يخنقها يا اما يبوسها واستغرب هو ازاي بيفكر كده اصلا؟
ادهم: افندم ليلي: عايزه اعرف من حضرتك طبيعه التدريبات بتاعتهم وايه المطلوب منهم بالظبط ومده تدريبهم اليوميه هتكون قد ايه؟ ادهم: طبيعه تدريباتهم؟شوفي انا الاول هدلعهم وبعد كده هنعملهم مساج وبعدها ايه؟مش عارف صراحه لسه هعملهم برنامج ايه مسائي المدير: ادهم؟ ادهم: سبق وقلت لما حد يجراله حاجه هبعتهلكم غير كده معنديش بعد اذنكم.
سابهم وراح للطلبه بتاعته وهو هيولع اصلا، من ضمن كل الدكاتره تطلع هيا، طيب يهرب بس يروح فين؟ بس ما لمحش دبله في ايديها ياتري اتجوزت الواد هوا ولا لأ؟ انت مالك اصلا اتجوزت ولا لأ؟
ليلي كمان راحت المستشفي وهيا مش قادره تصدق انها شافته تاني، كانت متخيله نفسها نسيته وخلاص هتكمل حياتها بس الواقع غير كده نهائي، طلعت سلسلتها اللي مخبياها على صدرها جوه ديما، وافتكرت لما لبسهالها وباسها في رقبتها، لسه حاسه بشفايفه على رقبتها، لسه بتتمناه، بتتمني ايه؟فوقي بقى؟ماهو رماكي من عشر سنين نسيتي ولا ايه؟
نسيتي ازاي هانك وسابك؟نسيتي الفيديو اللي بعته لاصحابه؟نسيتي لما طلب من صاحبه انه يقولك لما تفقدي عذريتك هو موجود؟لا ما نسيتش وهفضل اكرهه ومش هحن ابدا ليه...
ادهم كان عصبي جدا مع الظباط وبيتنرفز من اقل حاجه، بس على الرغم من كده الطلبه بيحبوه وبيقدروه، لانهم عارفين انه لازم يكون قاسي كده علشان يوصلهم انهم يكونوا زيه وفعلا هو كان مثلهم وبعدين كان طول التمارين بيعمل زيهم واكتر بالعكس هما اخر النهار بيريحوا وهو بيفضل يكمل تمارينه، هو برضه بدأ يتعرف عليهم ويحبهم بس عمره ما اظهر الحب ده ابدا.
في يوم قاعد في الساحه ومتابعهم وفجأه لقي ظل فوقه رفع عينه لقاها قدامه بعنيها الخضرا الغامقه ادهم: يا ساتر استر خير؟ ليلي: وهيجي منين الخير وحضرتك بتهرب مني ادهم: انا بهرب.؟انا موجود هنا على طول، عايزه ايه يا ليلي؟ ليلي: اولا اسمي الدكتوره ليلي ادهم ضحك بصوته كله: ماشي يا دكتوره، كبرتي، حقك ليلي: ايوه كبرت امال فاكر اني هفضل على طول القطه المغمضه؟ ادهم: ياريت كنتي فضلتي على طول قطه مغمضه! عايزه ايه؟
ليلي: انت بتدرب العيال فوق طاقتهم براحه شويه ادهم: حد اشتكالك؟ هنا المدير جالهم واتنين ممرضين علشان يفصلوا بينهم لو اتخانقوا لان الكل مستغرب من العداء الشديد بينهم، المدير: ازيك يا دكتوره، ادهم اخبارك الاتنين: الحمد لله المدير: كملوا كلامكم عادي ادهم طلع سيجاره وولعها ليلي: لو سمحت اطفي السيجاره ادهم: سوري مش عاجبكي اتفضلي بعيد طبعا الكل قاعد بيتفرج وناقص يجيبوا لب ويتسلوا بالحوار اللي شغال.
ليلي: اكيد انا ورايا حاجات اهم من القعده مع حضرتك فلو سمحت خلصني علشان امشي ولو سمحت اطف السيجاره لاني مش بحب ريحتها ادهم: اخلصك؟لما تبقي على ذمتي ابقي اخلصك ليلي اتضايقت قوي منه وراحت شاده السيجاره ورمياها على الارض ادهم: انتي اتجننتي ولا ايه؟ ليلي: قلتلك مش بحبها ادهم طلع سيجاره تانيه وولعها ونفخ الدخان في وشها تليفونه رن فطلعه وهو بيفتح شدت السيجاره التانيه ورميتها تاني.
ليلي: قلتلك اطفيها، مش هتولعها وانا هنا وقفوا الاتنين قصاد بعض المدير خاف لاحسن ادهم يضربها ولا حاجه المدير: خلاص ا جماعه اهدوا بقى ادهم: انتي مالكيش مكان هنا سابهم ومشي واتصل بالمدير بتاعه وقاله انه يختار بين وجودها ووجوده هو، وطبعا المدير ما ينفعش يرفدها لمجرد انها بنت علشان حقوق المرأه وفي نفس الوقت مش مستغني عن ادهم.
اتقاءا للمشاكل الكل اتفق ان ليلي تفضل في المستشفي واتنين مسعفين يفضلوا في المعسكر ولو في اي حاله حرجه تتحول للمستشفي على طول... وفي يوم في تدريب كان حي واحد من تلامذيته اتصاب برصاصه في بطنه وادهم شاله بسرعه واخده للمستشفي. ليلي كانت جراحه وهيا اللي عملت العمليه للظابط المتصاب كان اسمه مؤمن وادهم فضل طول الوقت بره اوضه العمليات مستني يطمن عليه لحد ما خرجت ادهم: حالته ايه؟
ليلي: وده شيئ يهمك؟انت مش بتعاملهم زي العبيد عندك؟ ادهم: ليلي مش وقته ارجوكي، طمنيني عليه الاول ليلي حست بضعف غريب جواه، حست انه خايف فعلا على الظابط، واستغربت ازاي حد بالاحاسيس دي ممكن يخون في يوم من الايام ادهم: ليلي ارجوكي حالته ايه؟ ليلي: كويس يا ادهم ماتخافش عليه، الرصاصه ما صابتش اي حاجه حيويه ادهم اخيرا قعد في الارض، زي ما يكون حمل وانزاح عنه.
ادهم: انا فعلا ممكن اكون قاسي عليهم بس ده لمصلحتهم ومهما اكون اقاسي ده ولا حاجه من اللي هيقابلوه بره، الواقع مختلف تماما عن التدريب، لو بايدي ما ارضاش لاي حد اصلا يشتغل شغلنا ده ابدا، احنا بنواجه الموت في كل لحظه واصحابنا بيموتوا قصاد عنينا والمفروض ان اننا نكمل عادي، انا فعلا قاسي عليهم بس لمصلحتهم ليلي: انا اسفه يا ادهم، بس اطمن هو هيكون كويس.
ادهم فضل جنبه واقف على الباب لان ممنوع دخول العنايه المركزه، هما حطوه فيها لحد ما يفوق ويطمنوا عليه، ليلي كانت نبطشيه الليله دي وكل شويه تروح تتطمن عليه تلاقي ادهم واقف مكانه قدام الباب، كل شويه حيرتها تزيد اكتر، ليه بيهتم بطالب كده، لحد الفجر وهو لسه واقف مكانه.
رواية مر العمر للكاتبة الشيماء محمد الفصل الثامن عشر
ليلي: ادهم؟ارتاح بقى شويه ادهم: طيب هرتاح. شويه بس وارتاح ليلي: انا هفضل جنبه نام انت شويه، انا ممكن افتحلك اي اوضه تريح فيها شويه ادهم: شويه كده على اخر الليل هروح ارتاح، متشكر ليلي: ادهم الفجر طلع من بدري ادهم: الفجر؟ ليلي: ايوه الفجر انت واقف الليل كله كده ادهم: طيب خلاص عادي، يبقى شويه واروح المعسكر ليلي: انت لازم تنام شويه ادهم: انام؟ ياما نفسي بجد انام ليلي: وايه المانع؟روح نام.
ادهم: في مثل بيقولك ما ينام الليل غير مرتاح البال ليلي: وانت ايه اللي شاغل بالك؟ ادهم ابتسم وبص للارض وبعدها بصلها ادهم: ماتشغليش بالك انتي بس بيا، روحي انتي ارتاحي شويه سابته ومشيت بس كان نفسها تقوله ازاي بس ما تشغلش بالها بيه؟لو عنده طريقه تقدر بيها تبطل تفكير فيه ياريت يدلها عليها. راح ادهم المعسكر لقي مفاجأه مستنياه ادهم: معقوله؟انا مش مصدق عنيا ابدا سيف: لا صدق.
اخدوا بعض بالحضن وفضلوا مع بعض يضحكوا ويهزروا والكل مستغرب ان ادهم بيعرف يضحك او يهزر، سيف كان مقرب جدا من ادهم وخصوصا في فتره سفره، كانوا بيتقابلو كتير جدا وكان اقرب رفيق ليه سيف: مولع الدنيا مع لوليتك ليه؟ ادهم: اولا مش مولع حاجه، ثانيا مابقتش لوليتي خلاص سيف: لما ما بقتش لوليتك بتتخانق معاها ليه؟ ادهم: هيا مستفزه سيف: ما علينا نسيبنا منها، اخبار مؤمن ايه؟ ادهم: كويس الحمد لله فاق اخيرا.
سيف: طيب كويس المهم شكلك عايز ترتاح شويه روح انت نام شويه وانا هنا ادهم: انام؟هو انت مش عارف اللي فيها ولا ايه؟صح انت ايه اللي جابك هنا؟ سيف: رجعت مصر زيك، معرفتش افضل بره بعد رجوعك وبما اني في اجازه فالمدير طلب مني اجيلك هنا اساعدك وخصوصا بعد خناقاتك كل شويه مع لوليتا ادهم: كويس كويس، طيب تعال اعرفك على الفريق سيف: مش هتنام ادهم: نوم ايه بقى، يالا.
اخر النهار ادهم راح المستشفي لمؤمن، كانت ليلي لسه مستلمه ورديتها، راحت تتطمن عليه لقت ادهم معاه ليلي: ازيك النهارده يا مؤمن اخبارك ايه؟ مؤمن: الحمد لله احسن ليلي: المقدم ادهم الظاهر انه بيحبك قوي، ما سابكش امبارح ابدا مؤمن: طبعا بيحبنا كلنا ده احنا رجالته، ولا ايه؟ ادهم: طبعا رجالتي، الفريق كله بيسلم عليك، وبكره هيجولك كلهم.
وبرضه فضل ادهم قاعد جنبه الليل كله، ليلي دخلت الفجر كان قاعد على الكرسي ومغمض عنيه ومد رجليه على حرف السرير، افتكرته نايم فوقفت قدامه وافتكرت لما نام على حجرها وفضلت تلعب في شعره وعدها ساعتها انه هيفضل يحبها، سألت نفسها، ليه ياتري رجع في وعده ده؟ ادهم: هتفضلي واقفه كده كتير؟ ليلي اتخضت جدا منه لانها كانت مفكراه نايم ليلي: انت مش نايم؟ ادهم: ما انا قلتلك مش بنام ليلي: يعني ايه مش بتنام؟كل الناس بتنام.
ادهم: بنام ساعتين كده كل يومين ولا حاجه ليلي: ده غلط وهيتعبك وهيعمل اجهاد على قلبك وه... ادهم: براحه شويه عليا، ايه هوه ده؟انا مش بعرف انام بحاول بس مش بعرف، يعني مش بمزاجي ليلي: تعال نعرضك على دكتور مخ واعصاب ادهم: ليلي اطلعي من دماغي، انا كويس كده ليلي: انت حر، لو في حاجه نادي عليا ادهم: اوك سلام.
ادهم كان بيجي المستشفي علشان مؤمن او هو بيقنع نفسه بكده، وليلي كانت بتروح كل شويه تتطمن عليه علشان هو مريضها او هيا كمان بتحاول تقنع نفسها بكده في يوم ادهم رايح عند مؤمن كانت ليلي واقفه مع دكتور زميلها وضحكت بصوت عالي وهو اتضايق قوي، راح اوضه مؤمن بس فضل مستنيها تيجي، وفعلا اول ما لمحها جايه خرجلها بره ادهم: مين ده اللي انتي واقفه بتضحكي بصوتك كله كده معاه؟ ليلي استغربت قوي هو ليه بيسأل اصلا.
ليلي: وده يخصك في ايه؟ ادهم: يخصني ولا ما يخصنيش ما ينفعش تقفي كده وصوت ضحكك واصل لاخر الدنيا ليلي: مش انت اللي هتعلمني ايه اللي ينفع وايه اللي ما ينفعش ادهم: لا طالما بتتصرفي زي العيال يبقى عايزه حد يعلمك ليلي: وانت بقى الحد ده؟لا فوق لنفسك يا سياده المقدم، الحبتين دول تعملهم هناك على تلامذتك لكن هنا انت مجرد زائر وبس، مفهوم؟ ادهم: زي ما انتي لسه عيله.
ليلي: العيله دي بقت دكتوره ومسيرك في يوم هتقع تحت ايديها وساعتها مش هرحمك ادهم: هههههه وهتعملي ايه يا شاطره؟ هتسيبيني اموت؟ ليلي: لا ده بعدك، ده انا هعالجك بس هخليك تبوس ايدي علشان ارحمك ادهم: يوووو تصدقي خفت، العبي بعيد يا شاطره لا انتي ولا مليون زيك تقدري تهزيني ليلي: بكره نشوف ادهم: بكره نشوف.
ادهم مشي وافتكر لما قالها قبل كده انها هيا تعالجه وهيا رفضت نهائي وقالت انها ما تستحملش تشوفه متصاب، قد ايه الزمن بيغير الناس؟ مؤمن بقى كويس وساب المستشفي وادهم بطل يشوف ليلي، سيف كان لسه معاه بيهون عليه كتير، في يوم طلبهم مدير المخابرات وقالهم ان صفقه تهريب سلاح هتم قريب منهم على الحدود وانهم ياخدوا فريق ويروحوا هما الاتنين يوقفوها باي ثمن.
فعلا راح ادهم وسيف ووقفوا الصفقه بس للاسف ادهم اتصاب رصاصه في صدره ونقلوه بسرعه على المستشفي ليلي كانت هناك وجالتها ممرضه تجري الممرضه: دكتوره ليلي في ظابط جاي متصاب برصاصه في صدره وبينزف جامد ودكتور عماد طالبك تساعديه بسرعه قامت ليلي تجري وراحت عندهم واتفاجئت بادهم هو اللي متصاب والدكتور عماد بيحاول يسيطر على النزيف عماد: ليلي تعالي هنا بسرعه اضغطي على الجرح.
ليلي واقفه مصدومه مش اول مره تشوف جرح بينزف بس اول مره يبقى حبيبها هواللي بينزف عماد: ليلي تعالي هنا قربت منه عماد: اضغطي هنا ايديها كانت بتترعش بس حطتها على صدره وضغطت ولمحتها في صدره متعلقه، سلسلتها لسه متعلقه في صدره وافتكرت ( اوعدك ان طول ما السلسله دي في صدري يبقى قلبي بينبض ليكي انتي وبس) ادهم كان بيفوق ويغيب ومش حاسس باللي حواليه عماد: قلعوه السلسله دي.
ادهم: لأ السلسله لأ مش هقلعها وعدتها مش هقلعها لأ عماد: ما تخافش هنحافظ عليها، خدروه، ليلي خدي سلسلته خليها معاكي وتعالي معاياي العمليه بسرعه حطوا السلسله في ايديها واخدوه العمليات وهيا فضلت مكانها مش قادره حتى تتنفس، سلسلته في ايديها,,ايديها مغرقين دمه هو، الممرضه: دكتوره ليلي دكتور عماد عايزك معاه ليلي: حاضر جايه.
راحت استعدت ودخلت العمليات وهيا بتدعي انه مايجرالوش حاجه، الرصاصه كانت جنب قلبه وهما بيحاولو يخرجوها ضغطه وطي جدا وقلبه وقف، عماد: ليلي دلكي قلبه ليلي بتبص لعماد وهيا مش مستوعبه كلامه عماد: انتي مالك النهارده ابدأي دلكي قلبه بايديك يا دكتوره.
فعلا ليلي مسكت قلبه بايديها وبدأت تدلكه لحد ما استجاب ليها وبداينبض تاني بين ايديها، هنا هيا انفجرت في العياط وجريت من العمليات وراحت تعيط براحتها كل اللي حصل كان اقوي منها بكتير، عماد خلص العمليه وراح لها كانت في مكتبها عماد: انت ايه اللي حصلك النهارده؟مالك؟ ليلي: ماليش عماد: انتي مكنتيش طبيعيه ابدا، انتي بتجنني لاي عمليه قلب مفتوح والنهارده، انا مش عارف انتي مالك النهارده؟
ليلي: انا بس صعب عليا الظابط، بيبقوا في شغلهم ومره واحده بيتصابوا او يموتوا عماد: ده شغلهم وهما عارفين كده كويس، والمفروض ان شغلنا اننا نحاول ننقظهم مش نوقف نتفرج عليهم سابها ومشي وهيا طلعت سلسلته ونضفتها من الدم اللي فيها ولاحظت انه كتب اسمه على اسمها من وراي حرفAفوق ال Lوحرف Dفوق ال Aوحرف الHفوق I وحرفA فوق الL.
وحرف ال M فوق ال A كل حرف من اسمه ضامم حرف من اسمها هيا بحيث لو حد بصلهم هيشوف حروف فوق بعض وخلاص لكن لو ركز هيلاقي اسمه بيضم اسمها وبيخبيه جواه,,,,استنت ليلي ادهم يفوق وهيا بره اوضته كل شويه تتدخل تتطمن عليه وتخرج لحد ما فاق والدكتور عماد كان داخله وهيا بره ولما شافته ليلي: دكتور عماد، لحظه عماد: ايوه يا ليلي ليلي: اتفضل رجعله دي مدت ايديها بالسلسله عماد: طيب ما تدخلي انتي تيديهاله.
ليلي: لا معلش عندي حاله لازم اتطمن عليها، اتفضلها انت عماد: براحتك هاتي دخل عماد وهيا وقفت بره تسمعهم هيقولو ايه عماد: اخيرا يا بطل فقت، ادهم: لو سمحت كانت في رقبتي سلسله هيا فين؟ عماد: للدرجه دي.
السلسله دي مهمه؟ ادهم: لو سمحت هيا فين؟ عماد: اهي موجوده ما تخافش اتفضلها مسك ادهم السلسه وغمض عنيه عماد: مقدم ادهم حضرتك كويس حاسس بأيه؟ ادهم: انا كويس، صدري بس بيوجعني شويه لما بتنفس عماد: ماهو الرئه بتاعتك اتصابت من الرصاصه، والالم هنسيطر عليه بالمسكنات لحد ما الجرح يخف شويه ما تقلقش ادهم ابتسمله وغمض عنيه عماد: هسيبك ترتاح وهما هيجيبلوك مسكنات علشان الم صدرك خرج عماد وشاف ليلي وهيا ماشيه.
عماد: دكتوره ليلي استني ليلي: افندم عماد: حاله مقدم ادهم مسؤليتك، زوديله جرعة المسكنات علشان صدره بدأ يتعبه وبعدين اصلا لما مفعول البنج يختفي نهائي هيحس بالألم بجد فحاولي تخففي عليه بالمسكنات لان الالم هيكون فوق الاحتمال ليلي: طيب ممكن تكلف غيري؟ عماد: انا بكلف حضرتك اهوه، اتفضلي راحت ليلي لادهم كان ماسك السلسه في ايده ومغمض عنيه ليلي: حمدلله على السلامه.
ادهم: الله يسلمك، اديني بقيت تحت ايديك اهوه اعملي اللي انتي عايزاه ليلي: دكتور عماد بيقول ان انت حاسس بألم في صدرك مع النفس ادهم: وبعدين؟ ليلي: على فكره الألم لسه هيزيد ادهم: وانتي مستنياه يزيد علشان ابوس ايديك ترحميني؟مش عايز رحمتك يا ليلي، انا والالم كنا اصحاب عشر سنين فمتعود عليه... ليلي: هنشوف بعد ساعتين صاحبك هيعمل فيك ايه؟وهاجي اتفرج عليك وانت بتأن...
ادهم: وانا مستنيكي، اتفضلي بقى سيبيني ارتاح الساعتين دول خرجت ليلي ونادت على الممرضه ليلي: ياخد المضادات الحيويه في معادها، بس بلاش مسكنات نهائي الممرضه: ايه؟مفيش مسكنات؟ده كده يموت ليلي: مش هيموت ولا حاجه، هو عنده حساسيه من معظم المسكنات، فيستحمل الالم؟ولا نقضي عليه خالص؟ الممرضه: حاضر بس حرام ليلي: لو في ايدينا حاجه مش هنتأخر عليه، اتفضلي شوفي شغلك.
ليلي حست انها بتنتقم منه، بتنتقم لكرامتها، بس مش حاسه بفرح ابدا، قلبها مش فرحان انها هتعذبه ابدا، ليه مش فرحانه؟ ادهم بدأيتعب جدا جدا وبدأ جسمه كله يتشنج من الالم. دخلت عليه الممرضه واول ما شافته جريت على ليلي الممرضه: دكتوره دكتوره ليلي: في ايه؟
رواية مر العمر للكاتبة الشيماء محمد الفصل التاسع عشر
الممرضه: المقدم ادهم تعبان جدا وبيتشنج ليلي جريت عليه واول ما شافته ما استحملتش منظره وهو بيتألم ليلي: هاتيلي ابره، بسرعه ادهم بصوت متقطع: مش عايز مسكنات، مش عايز منك حاجه يا ليلي، استمتعي بالعرض لانه مش هيتكرر تاني ليلي: ادهم انت تعبان جدا ولازم مسكن ادهم: واحرمك انك تشوفيني بتألم ما ينفعش يا دكتوره؟ الممرضه: الابره اهي يا دكتوره.
اخدتها ليلي ولسه هتقرب لادهم منعها فحطتها في المغذي اللي في ايديه. راح شده كله من ايده ولما قربت ليلي منه زقها بعيد ادهم: ابعدي عني العرض ما يشملش اللمس العرض للفرجه بس ادهم بدأ صوت نفسه يعلي ليلي: ادهم انت لازم تسيبني اساعدك ادهم: مش عايز مساعدتك هنا دخل سيف واول ما شافه بالحاله دي جري عليه سيف: ادهم مالك في ايه؟ ادهم: طلعها بره يا سيف، طلعها بره.
سيف فعلا طلع ليلي بره وطلب الدكتور بسرعه وقبل ما الدكتور يجي سيف: ادهم خليك معاياي ادهم، ادهم ادهم كان بدأ يغيب عن الوعي وفجأه الجهاز اللي محطوط على قلبه صفر وده معناه ان قلبه وقف، سيف فضل يصرخ بصوته كله وينادي على الدكتور، ليلي دخلت ولسه هتقرب سيف: انتي بالذات ما تلمسيهوش انت عايزه تقتليه دخل دكتور عماد بسرعه وبدأ ينعش قلبه لحد ما قلبه نبض تاني عماد: في ايه؟هو كان كويس.
الممرضه: انا دخلت لقيته تعبان وبيتشنج من الالم وطلبت الدكتوره ليلي بسرعه، علشان نشوف نعمله ايه بدل المسكن عماد: بدل المسكن؟ وما اديتلوش مسكنات ليه؟ الممرضه: الدكتوره ليلي قالت ما نديلوش مسكن عماد: ايه؟ازاي يا دكتوره مريض خارج من عمليه قلب مفتوح ما نديلوش مسكن؟ده انا قلتلك ان الالم بالمسكنات هيكون لا يحتمل فما بالك من غير مسكنات نهائي؟علشان كده قلبه وقف، قلبه ما استحملش الاجهاد ليلي: ، بتعيط وبس.
عماد: دكتوره ليلي اتكلمي سيف: عايزها تقولك ايه؟تقولك انها عايزه تقتله؟ عماد: تقتله؟ليلي؟ ادهم بدأيفوق وبيحاول يتكلم سيف: على العموم انا هرفع قضيه على المستشفي وكل المسؤل عن اللي حصل هيتجازي، اما سيادتك فتودعي شغلك ده نهائي ادهم: كفايه سيف عماد: مقدم ادهم حاول ما تجهدش نفسك لان قلبك وقف من كتر الاجهاد والكلام حاليا اجهاد ادهم: انا اللي رفضت المسكن ليلي مالهاش ذنب... سيف: ما انت لازم تقول كده.
ادهم: هيا حاولت تديني المسكن بالعافيه وانا رفضت ولما حطته في المغذي غصب عني شلت الكانولا خالص من ايدي غاب عن الوعي وهو بيقول ليلي مالهاش ذنب قال كده وغاب تاني عن الوعي الممرضه: ده فعلا حصل الدكتوره ليلي حاولت تديله المسكن وهو رفض ولما حطتهوله غصب شال الكانولا من ايده ورماها عماد: على العموم لما يفوق هنعرف ايه اللي حصل بالظبط، دكتوره ليلي حضرتك باقي اليوم اجازه.
الكل خرج وسابوه يرتاح شويه، وسيف قبل ما ليلي تمشي ناداها سيف: اوعي تتخيلي للحظه اني مصدق اللي حصل,,,انتي عنيكي فضحاكي يا دكتوره انتي كنتي عايزاه يموت ليلي: لأ لأ عمري ما اتمنيتله الموت ابدا ابدا حرام عليك.
سيف: حرام عليا ومش حرام عليكي اللي انتي عملتيه فيه؟على العموم انا عارف ان ادهم عمره ما هيتهمك بأي شيئ لاني دي عوايده بيهتم بناس ما تستاهلش، بس انتي كفايه عليكي عذاب ضميرك، ان ظابط بيعرض حياته للخطر في بلدك علشان يحمي شباب البلد وتكون جزاته اننا نحرمه حتى من مسكن لوجعه، متشكر جدا ليكي يا ملاك الرحمه.
ليلي فضلت تعيط وراحت مكتبها وعيطت عياط من كل قلبها كل ما تفتكر شكله وهو بيتألم تعيط اكتر واكتر، ازاي عملت فيه كده؟من امتي بتستمتع بالام الناس كده؟ده حتى لما بيكون مجرم وجايلهم بتعالجه وتقول حرام نكون قادرين نمنع الالم وما نحاولش، تقوم تعمل كده في اغلي الناس عندها، في ادهم، اول واخر حب في حياتها؟ ادهم فاق تاني ورفض تماما انه يحمل ليلي اي مسؤليه نهائي وخلص الموضوع على كده سيف: انت ازاي تعمل كده؟
ادهم: عايزني اعمل ايه يعني؟ سيف: تعاقبها ادهم: مش يمكن اكون هعاقبها على طريقتي؟مش يمكن رفضي اني اتهمها يكون اكبر عقاب ليها؟ سيف: لا انا ما بكلش من عقابات الضمير دي ادهم: وانتي عايزني اعمل ايه؟اخليها تتطرد من شغلها مثلا؟ سيف: ده اقل حاجه تستاهلها، انت قلبك وقف يا ادهم ادهم: وايه يعني؟ سيف: انت هتجننيني؟نفرض انه ما اشتغلش تاني؟
ادهم: يبقى ارتحت من الدنيا واللي فيها، سيف انا اكتر واحد في الدنيا دي فرحت لما عرفت ان ليلي دخلت كليه الطب، عايزني بعد كده احطم كل ده؟طيب تيجي ازاي؟ سيف: ادهم انت لسه بتحبها بعد كل ده؟ ادهم: ايه هو كل ده؟ سيف: ايه هو؟ هيا رفضتك من خمس سنين ودلوقتي معلنه الحرب عليك وكانت لسه هتقتلك وتقولي عملت ايه؟
ادهم: هيا ما رفضتنيش من خمس سنين، انا اللي سبتها من عشر سنين من غير حتى كلمه، من غير ما اودعها او اقولها اي حاجه وغبت عنها خمس سنين كنت متوقع ايه؟ارجع الالقيها مستنيه وهم، وبعدين متنساش انا لما سبتها كان عندها 15 سنه كانت عيله وانا اتخليت عنها مش يمكن ده جرحها وخلاها تحاول تنساني بأي طريقه؟ سيف: انت ازاي قادر تحطلها مبررات كده؟ ادهم: حط لحبيبك الف عذر ولو ما لقيتش قول يمكن عنده عذر سيف: وهيا حبيبتك؟
ادهم: انا تعبان ومحتاج ارتاح ممكن؟ سيف: ارتاح بس انا هفضل هنا جنبك مش هسيبك ادهم: هتحرسني يعني؟ سيف: ايوه هحرسك هنا الباب خبط ودخلت ليلي ليلي: كنت عايزه... سيف قاطعها: اطلعي بره ادهم: سيف بس... سيف: لا مش بس مش كفايه حميتها ادهم: سيف لو سمحت سيبنا لوحدنا سيف: اهو ده بقى اللي لا يمكن ابدا ابدا ادهم: سيف( قالها بصوت عالي وده تعبه وحط ايده على صدره) ليلي: انت تعبان؟ سيف: البركه في سيادتك ادهم: سيف لو سمحت.
سيف: هطلع بس هقف بره الباب سيف طلع ووقف في الباب ادهم: اقفل الباب قفله ومشي ادهم: عايزه ايه يا ليلي؟ لسه ما اكتفيتيش؟ ليلي: لأ يا ادهم انا اسف، اسفه مليون مره، عمري ما اتمنيت لحد الالم بالشكل ده ادهم: على العموم حصل خير ليلي: لا محصلش خير انت قلبك وقف ولو كان جرالك حاجه عمري ما كنت هقدر اسامح نفسي ابدا، انا سمحت لحاجات شخصيه تأثر عليا كدكتوره ادهم: وانا قلتلك خلاص انسي، قربي مني.
قربت ليلي منه وقعدت على حرف السرير قصاده وهو بايده مسح دموعها وبص لعنيها ادهم: الاخضر الفاتح اكتر لون بكرهه لون حزنك ليلي بصتله وهيا مستغربه انه لسه فاكر الوان عنيها ليلي: اللون ده ما بيفارقنيش ابدا ادهم: خساره الالوان التانيه كانت جميله، اتغيرتي كتير يا ليلي ليلي: اتغيرت فعلا، ممكن اسألك سؤال ادهم: اسألي ليلي: انت ليه مقلتلهمش على اللي حصل بينا؟ ادهم: لانه حصل بينا ليلي: يعني ايه؟
ادهم: يعني هستفاد ايه لو اضريتي في شغلك؟ انتي متتخيليش فرحتي بيكي لما عرفت انك دخلتي طب كانت قد ايه ليلي: انت ليه لسه لابس السلسله؟ ادهم: علشان وعدت صاحبتها اني هفضل لابسها ليلي: وانت بتحافظ على وعدك؟ ادهم: طول عمري ليلي: وعدتها انك تفضل جنبها ومشيت.
ادهم: مش يمكن تكون ظروف خارجه عن ارادتي، بس رجعتلها تاني ولقيتها مرتبطه وكملت حياتها وبقيت انا ذكري في حياتهااو الله اعلم اذا كانت افتكرتني اصلا ولا؟افتكرتني، انتي ايه رأيك؟ ليلي: انت بعتها ومشيت كان لازم تكمل حياتها بأي طريقه ادهم: بعتها؟ ربنا يعلم اذا كنت بعتها ولا لأ؟ ادهم: انتي يا ليلي سلسلتك فين؟
للحظه فكرت انها تتطلعها من صدرها وتوريهاله وتاخده في حضنها وتنسي كل اللي فات، بس افتكرت انه جاي في مهمه هيخلصها ويمشي ويسيبها تاني تلملم جروحها ليلي: رميتها، بعد ما سافرت استنيتك ترجع ولما ما رجعتش دخلت كليتي وابتديت حياه جديده من غير ذكريات فرميتها ادهم: رميتيها؟ ادهم حس بوجع في قلبه وحس انه مش قادر يستحمل منها اكتر من كده ادهم: ممكن لو سمحتي تسيبيني ارتاح شويه؟ ليلي: انت تعبان؟
ادهم: اه تعبان وبعترفلك تعبان جدا ممكن ارتاح؟ ليلي: ادهم؟ ادهم: ارجوكي سيبيني ارتاح، سيف سيف دخل بسرعه سيف: ايوه ادهم ليلي: هسيبك ترتاح بس ممكن ابقي اتطمن عليك؟ ادهم: انا موجود في المستشفي هروح فين ليلي مشيت وسابته بيتألم من كلامها، هيا نسيته على طول للدرجه دي كان مالوش لازمه ابدا في حياتها؟ سيف: ادهم مالك؟ ادهم: ماليش عايز ارتاح مش اكتر، سيبني لوحدي عايز انام شويه سيف: وانت من امتي بتنام؟ ادهم؟
ادهم: انا واخد مسكنات كتير وعايز انام فعلا ارجوك سيف سيبني لوحدي سابه سيف لوحده مع الامه واحزانه.
ليلي مشيت وهيا مستغربه هيا ليه كل ما بتحاول تقرب تبعد زياده؟ليه ديما بتوصله انه مالوش قيمه في حياتها؟ده عمرها في يوم ما نسيته او نامت ليله من غير ما تفكر فيه؟حتى في عز كرهها ليه كانت بتحبه ولسه بتحبه؟ليه ليه ليه؟علشان جرحك وسابك وخانك وصورك وفضحك مع اصحابه عرفتي ليه؟ هتحنيله تاني ويجرحك تاني ويسيبك تاني؟لا مش هرجعله ابدا ابدا... عماد راح لليلي عماد: ليلي ايه اللي بيحصلك؟مالك؟ ليلي: ولا حاجه.
عماد: في حاجه انتي مخبياها، طول عمرك مثال للدكتوره النشيطه الشاطره لكن امبارح والنهارده؟ ليلي: اسفه ده مش هيتكرر تاني عماد: اتمني، ليلي انتي عارفه انك ممكن تتكلمي معايا في اي وقت، انتي عارفه انتي مهمه قد ايه بالنسبالي؟ ليلي: دكتور عماد،.
عماد: لا يا ليلي اسمعيني، من ثلاث سنين وانتي هنا معايا براقبك وبشوفك انسانه محترمه موهوبه جميله، حاولت اقرب بس انتي قافله الباب. قلت يمكن في حد واستنيت الحد ده يظهر بس محدش ظهر ليلي: لان مفيش حد عماد: طيب ليه؟ليه رافضه اي حد يقرب مد ايده ومسك ايدها فسحبتها بسرعه ليلي: دكتور عماد لو سمحت عماد: ليلي احنا مش صغيرين ولا مراهقين انا عايزك اتجوزك ليلي: ايه؟
تحميل محتوى الموضوع
عرض نسخة صالحة للطباعة
أرسل هذا الموضوع إلى صديق
[16]
الدعوات : 2قوة السمعة : 10
رواية مر العمر