قصة انتقام الحب ج2 بقلم أمنية الريحاني ف16 بسنت الأسيوطي
فلاش باك: عاصم بيروح يقابل الواحدة الى سألت عليه عاصم: مساء الخير حضرتك طلبتى تقابلينى ؟...ممكن اعرف مين حضرتك؟ بسنت: مساء النور يا عاصم بيه حضرتك يمكن متعرفنيش بس اكيد سمعت عنى . انا بسنت الاسيوطى عاصم بضيق: ايه ! بسنت الاسيوطى ! مرات حسن فهمى بسنت: بالظبط كده عاصم بجمود: خير يا مدام بسنت؟
بسنت: انا طبعا مش هستغرب اى رد فعل منك عليا واكيد هتبقى معذور فيه بس ممكن حضرتك تتفضل وتسمعنى وانت حر فى اى حاجة تعملها بعد كده عاصم قعد وهى قعدت ادامه تكمل كلامها عاصم: حضرتك عايزة تقولى ايه؟ بسنت: عاصم بيه انا سافرت من مصر لحد لندن مخصوص بعد ما عرفت مكان حضرتك وجيتلك النهاردة عشان ارفع الظلم عن انسانة اتظلمت عاصم بصلها باستفهام بسنت: اايوا يا عاصم بيه مدام اميرة المدام بتاعتك وقع عليها ظلم كبير اوى وللاسف الى ظلمها حسن جوزى عاصم: مدام بسنت حضرتك تقصدى ايه انا مش فاهم؟
بسنت: قبل ما اتكلم عايزاك الاول تشوف الفيديو ده وبعدها تقدر تقول الى انت عايزه بسنت اديت عاصم تابلت شغال على فيديو وعاصم بيتفاجئ اول لما بيشوفه. الفيديو كان لحسن واميرة فى اليوم الى راحتله فيه عاصم عرف السبب الحقيقى لزيارة اميرة لحسن انها كانت جاية تطلب منه يوقف الحرب عليه شاف ازاى كانت واقفة بتدافع عنه بكل حب وازاى كانت واقفة ادام حسن بصرح بحبها ليه وانه حبها الحقيقى مش حسن شاف كمان كرهها لحسن . والاهم من كل ده شاف المؤامرة الى عملها حسن لما بص فى الاب توب بتاعه وشاف عاصم لما وصل واللعبة الى عملها ادامه عشان يحاول يوصله خيانة مراته ليه.
عاصم كان بيتفرج على الفيديو وهو مصدوم ودموعه خانته ومقدرش يمنه نزولها حس ساعتها بوجع اميرة اوى لما كانت بتترجاه يسمعها وحلفانها ليه انها مظلومة وانها بتحبه هو وبس هو وجع اميرة واهانها وهى كان كل غلطتها انها راحت تدافع عنه ادام حسن عشان يبطل يحاربه فعلا راحت لحسن من خوفها عليه وحبها ليه زى ما قالتله مش عشان تخونه زى ما اتهامها
بسنت: اظن حضرتك دلوقتى عرفت الحقيقة وان اميرة مظلومة وان حسن هو الى دبر اللعبة دى كلها عشان يوقع بينكم عاصم: ممكن اسالك ازاى عرفتى تجيبى الفيديو ده؟ بسنت: بص يا عاصم بيه انا ابويا الله يرحمه كان راجل اعمال كبير ليه اسمه وسمعته فى السوق الى الكل كان بيحلف بيها ولما مات حسن جوزى الى مسك كل حاجة منكرش انه دخل مكاسب مهولة للشركة بس كان بيستخدم اساليب فى الشغل انا غير راضية عنها لانها غير شريفة ودا سوأ اسم الشركة فى السوق وكره كل رجال الاعمال فينا.
عاصم: دا حقيقى يا مدام بسنت بسنت: عشان كده قررت اعرف ايه الى حسن بيعمله من ورايا وايه الصفقات والعمليات الغير مشروعة الى بتم فى شركة الاسيوطى . استعنت بموظف فى الشركة كان شغال مع بابا الله يرحمه وكان دايما محل ثقته وطلبت منه يحطلى كاميرا مراقبة فى مكتب حسن لانه المكان الوحيد الى مفهوش كاميرا مراقبة فى الشركة ووصلت الكاميرا دى بجهاز اللاب توب بتاعى فى الفيلا وبكده قدرت اعرف كل الى بيعمله حسن فى الشركة من ورايا . وفى اليوم الى المدام بتاعتك راحت لحسن الشركة انا كنت قاعدة قدام الاب توب بتابع حسن ودا كان من حظى عشان اشوف واسمع المواجهة الى حصلت بينهم واعرف ان كل السنين الى فاتت كنت مخدوعة فى جوزى وابو بنتى.
عرفت ساعتها ان اميرة الى واقفة ادامى دى هى نفسها الانسانة الى شاغلة قلب وعقل جوزى من يوم ما اتجوزته هو فعليا من قبل ما اتجوزه وبعداه عنى ومخلياه معايا بجسمه بس لكن روحه معاها هى وهى نفسها حبيبته الحقيقية مش انا والى وجعنى اوى لما عرفت انه لما صمم يسمى بنتنا اميرة كان على اسمها . منكرش انى فى الاول كرهت الانسانة الى واقفة ادامى دى خصوصا وهو عمال يأكدلها انه لسه بيحبها وانه محبش حد غيرها لكن لما سمعت المواجهة بينهم نظرتى ليها اتغيرت خالص وعرفت الحقيقة الى ياريتنى ما عرفتها.
عرفت ان اميرة كانت خطيبته وحبيبته من قبل حتى ما يعرفنى وانه راح خطبنى لمجرد انه يستغلنى عشان يوصل لفلوس ومركز ابويا وانها رفضت تشاركه اللعبة الى لعبها عليا وفوجئت بيها واقفة بدافع عنى من غير حتى ما تشوفنى بدافع عن مشاعرى الى استغلها لتحقيق مصالحه فعلا كبرت اوى فى عينيا وعرفت اد ايه هى انسانة محترمة واتصدمت لما شفت اللعبة الى لعبها عليكم عشان يوصلك انها خاينة هتصدقنى لو قلتلك انى حسيت بوجعها اوى لما اتظلمت وفى اللحظة دى كرهت حسن ازاى قدر يظلم انسانة بريئة ويفرق بينها وبين جوزها الى بتحبه.
عاصم بوجع: انا كمان شاركته فى ظلمها لما رفضت اسمع دفاعها عن نفسها انا وجعتها كتير اوى بسنت: ارجعلها واطلب منها تسامحك بسنت: تفتكرى هترضى تسامحنى بسنت: الانسانة النقية الى شفتها ادامى بدافع عن واحدة حتى متعرفهاش بالرغم ان الواحدة دى خطفت خطيبها منها اكيد قلبها كبير اوى وممكن تسامح. صدقنى يا عاصم بيه انا شفت فى عينين اميرة حب كبير اوى ليك وهى بتهاجم حسن عشانك عاصم: مدام بسنت مش عارف اقولك ايه انتى فعلا انسانة عظيمة بسنت: مراتك هى الى طيبة اوى والى زيها ربنا بيبعتلها الى يقف جنبها دلوقتى لازم ترجع لمراتك اكيد هى محتجالك دلوقتى متسبهاش لوحدها تواجه حسن
باك: اميرة بتسمع وهى مصدومة ومش مصدقة نفسها اميرة: ياااااااه يا عاصم بسنت مرات حسن تعمل عشانى كل ده بالرغم انها مشافتنيش ولا تعرفنى دا حتى كل معرفتها بيا ضدى مش معايا عاصم: هى صحيح مشافتكيش يا اميرة بس من الى عرفته فيكى احترمتك وقدرتك انتى بنت حلال يا اميرة وربنا دايما بيوقفلك ولاد الحلال اميرة بدموع: ربنا كان كريم معايا اوى ومرضيش يحرمنى من الانسان الوحيد الى بحبه مرضيش يبعدك عنى فى اكتر وقت محتجالك فيه ولا يحرم ابنك انه يجى للدنيا ويشوف ابوه فرحان بيه عاصم بيمسح دموعه: خلاااااص من هنا ورايح مش عايز اشوف دموعك دى انا رجعت وجنبك عشان انتى ترتاحى وبس
فى شركة الاسيوطى: حسن قاعد على المكتب حاطط ايده على راسه واحمد قاعد ادامه احمد: خلاص يا صاحبى اهدى ومتعملش فى نفسك كده حسن: اهدى ازاى بس يا احمد وانا كل حاجة بتروح منى احمد: كله يتعوض يا حسن المهم انت تهدى وتحاول تقف على رجلك من تانى حسن: الى واجعنى يا احمد ان الى عمل فيا كل ده وضيع منى كل حاجة الانسانة الوحيدة الى حبتها فى حياتى احمد: متنساش يا حسن انك انت الى بدأت معاها الحرب لما حاولت تخسر جوزها وعملت مؤامرة عشان تخرب بيتها وتفرق بينها وبين جوزها حسن: عشان كده كرهتنى وقررت تنتقم منى اميرة: حسن اميرة معملتش كده عشان بتكرهك ولا عشان تنتقم منك اميرة عملت كده عشان خايفة عليك صدقنى هى خايفة عليك من نفسك انت الانتقام بقى عامى عينيك ومبقتش شايف انت بتأذى مين.
حسن: خايفة عليا ! وانت عرفت كل ده ازاى؟ احمد: من اميرة نفسها يا حسن . اسمعنى يا حسن انت صاحبى وعشرة عمرى وانا كنت بفهمك من نظرة عينيك وبفهم كويس انت كنت بتخطط لايه دا غير ان فى حاجة كمان انت متعرفهاش انا خطيبتى تبقى رحمة صاحبة اميرة حسن: انت خطيبتك تبقى رحمة ! وطبعا تلاقيك شاركتها فى كل الى عملته ضدى وكنت بتوصلها اخبارى اوى باول عشان تقدر تحاربنى احمد: انا مش خاين يا حسن وعمرى ما اخون ثقة صاحبى فيا انا عمرى ما نقلت لاميرة اخبار عنك ولا عن شغلك حسن: انا حاسس انى فى كابوس ومش قادر اخرج منه
احمد: راجع نفسك يا حسن وعيد حسباتك شوف كام واحد ظلمته ودوست عليه فى سبيل ومصلحتك ونفسك وارجع لربنا واطلب منه التوبة. اه وعلفكرة استقالتى اهى انا مش هقدر اكمل شغل معاك بس علفكرة انا هفضل جنبك وعمرى ما هتخلى عنك واى وقت تحتاجنى هتلاقينى معاك خرج احمد من عند حسن الى مش مصدق كل الى بيحصل حواليه وفجأة افتكر شخص مهم فى حياته هو كان مهمشه راح مسك التليفون واتصل حسن: الو... بسنت... انتى فين؟ ...انا محتاجك اوى يا بسنت جنبى
فى شركة الشاذلى: اميرة داخلة الشركة وايديها فى ايد عاصم وكل الموظفين فرحوا لما شافوه ورحبوا بيه . عاصم واميرة راحوا على مكتبه واتفاجئ بوجود سكرتيرة جديدة غير شهد عاصم بص لاميرة: مين دى؟ اميرة: دى نيفين السكرتيرة الجديدة عاصم: امال فين شهد اميرة: هقولك بعدين
اميرة بصت لنيفين: ايه الاخبار يا نيفين؟ نيفين: كله تمام يا بشمهندسة وانا كتبت لحضرتك اسماء الناس الى كلموا حضرتك اميرة: لا خلاص بقى من هنا ورايح مش هيبقى شغلك معايا يا نيفين نيفين: ليه يا بشمهندسة اميرة: احب اقدملك عاصم بيه الشاذلى صاحب الشركة انا كنت مسكاها بشكل مؤقت لحد ما يرجع من السفر اميرة بصت لعاصم بحب: وهو خلاص رجع بالسلامة عاصم دخل هو واميرة المكتب
عاصم: يااااه المكتب وحشنى اوى والشركة كلها وحشتنى اميرة: نورت مكتبك وشركتك والدنيا كلها يا حبيبى عاصم: قوليلى بقى فين شهد طردتيها؟ اميرة: دا انا طردتها وحولتها للتحقيق اميرة حكت لعاصم الى عملته شهد عاصم: ياااااه معقولة تطلع بالحقارة دى اميرة: شفت بقى يا عاصم انك محاولتش تعرف اعداءك الحقيقين عاصم: عندك حق يا اميرة حقك عليا بس ايه دا يا مدام الشاذلى دا انتى طلعتى ولا اجدعها سيدة اعمال امال لما طلبت منك تشتغلى معايا قبل الجواز قولتيلى مبفهمش غير فى الهندسة
اميرة: الظروف حكمت يا حبيبى قولى صحيح انت كنت عاملى توكيل عام ليه عاصم: لانى بسافر كتير وكنت حابب تبقى مكانى فى الشركة يعنى لو احتاجوا امضتى على ورق او حاجة ومكنش عندى حد اثق فيه غيرك اميرة: متتصورش التوكيل دا فادنى اد ايه عشان اكمل الصفقات الى اتفقنا عليها عالعموم كل ملفات الصفقات هتلاقيها مع عادل متتصورش ساعدنى اد ايه يا عاصم بجد من اوفى واخلص الناس الى عرفتهم.
عاصم: عادل طول عمره صاحبى ودراعى اليمين ومحل ثقتى. المهم انتى من النهاردة هتشتغلى معايا ما انا مش هقدر اسيب كفاءة زيك دلوقتى اميرة: لا يا حبيبى اشتغل معاك ايه بس انت ناسى انى ماسكة دلوقتى شركة بابا الله يرحمه ما انا مش معقولة بعد كل الى عمله معايا اقول لطنط اسمت خدى الشركة اتصرفى فيها او اسيب الشركة تضيع لازم اسمه يفضل مرفوع عليها ويفضل اسمها فى السوق عاصم: عندك حق يا حبيبتى الله يرحمك يا عمى طارق. بس الكلام ده لحد ما الباشا الصغير يجى بالسلامة وبعدها... اميرة: متشتغلش بالك يا حبيبى انا عملت حسابى وشغلت رحمة صاحبتى فى الشركة مكانى وهى الى ممشية الشغل دلوقتى وانا بتابعها كل شوية يعنى الحمل كله مش هيبقى عليا زى الاول.
عاصم:... بيقطع كلامهم تليفون عاصم الى بيرن فبيرد عاصم: طنط اسمت ازيك يا حبيبتى عاملة ايه دلوقتى...خير يا طنط اسمت؟...انا واميرة؟ طب حاضر حاضر ساعة بالكتير وهنبقى عندك سلام اميرة: خير يا عاصم؟ عاصم: طنط اسمت بتقول لازم نروحلها دلوقتى ضرورى اميرة بقلق: خيييييييير؟
عاصم واميرة راكبين العربية فى طريقهم لاسمت اميرة: انا قلقانة يا عاصم تفتكر طنط اسمت عايزانا ليه عاصم: هى بتقول ان محامى عمى طارق جايلها النهاردة وكانت عايزانا نبقى موجودين ساعة فتح الوصية اميرة: طب واحنا مالنا ومال حاجة زى دى دى حاجة تخص طنط اسمت لوحدها عاصم: مش عارف والله يا اميرة عالعموم مش هنخسر حاجة لو رحنا يمكن محتاجانا جنبها انتى عارفة اللحظة دى صعبة اد ايه اميرة: ماشى يا حبيبى الى تشوفه.
فى فيلا العشرى: اميرة وعاصم وصلوا عند اسمت ولقوا عندها المحامى اميرة بتبوس اسمت: عاملة ايه طنط؟ اسمت بحزن: الحمد لله يا اميرة انتى عاملة ايه يا حبيبتى دلوقتى؟ اميرة بصت لعاصم: الحمد لله يا طنط بقيت كويسة اسمت: انا عارفة يا اميرة طالما عاصم بقى جنبك هتبقى كويسة ربنا ميحرمكوش من بعض يا بنتى عاصم: طنط اسمت هو ليه حضرتك طلبتينا نحضر فتح الوصية؟ اميرة: ايوا يا طنط دى حاجة خاصة بحضرتك لوحدك اسمت: لا وتخصك يا اميرة انتى وعاصم انتوا كمان ولا ناسيين ان طارق الله يرحمه كان بيعتبركم ولاده اميرة وعاصم: الله يرحمه
اسمت: عالعموم اصبروا وهتعرفوا كل حاجة فى وقتها . اتفضلوا المحامى مستنيكم فى المكتب اميرة وعاصم دخلوا المكتب وفعلا المحامى بدأ يفتح الوصية
المحامى: اول حاجة دكتور طارق كان موصى انكم تحضروا فتح الوصية انتوا التلاتة حضرتك طبعا يا مدام اسمت وعاصم بيه والمهندسة اميرة وقالى فى حالة ان عاصم بيه يكون لسه مسافر يتأجل فتح الوصية لحد ما يرجع (اميرة بصت لعاصم عشان فهمت ليه طارق كان شارط الشرط ده) المحامى بيكمل كلامه: اول حاجة فى الوصية موجهة لحضرتك يا عاصم بيه دكتور طارق كان بيبعت مبالغ شهرية لناس معينة محتاجينها . وبيوصى حضرتك انك تفضل تبعتلكم المبالغ دى حتى بعد اما يموت وبيقول انك الوحيد الى كنت عارف اسماء وعنواين الناس دى . اسمت بتعيط: الله يرحمك يا طارق ويجعله فى ميزان حسناتك عاصم: اطمن حضرتك المبالغ دى هتوصلهم زى ما كان عمى طارق عايش وازيد كمان المهم هو يبقى مرتاح فى قبره المحامى: تانى حاجة وصى بيها دكتور طارق تخص مدام اسمت . دكتور طارق كتب لحضرتك الفيلا دى وكل الفلوس الى فى البنوك كلها باسم حضرتك عاصم: دكتور طارق مكنش محتاج يعمل كده كل حاجة هتروح لطنط لانها فعليا الوريثة الوحيدة ليه المحامى: عاصم بيه من فضلك خلينى اكمل
عاصم: انا اسف اتفضل المحامى بص لاميرة: تالت حاجة فى الوصية تخص حضرتك يا بشمهندسة اميرة: تخصنى انا ؟ المحامى: دكتور طارق الله يرحمه كتب لحضرتك شركة المقاولات الهندسية بتاعه بكل المشاريع الخاصة بيها باسم حضرتك ما عدا مجمع الشاليهات الى فى الساحل فده كتبه باسم عاصم بيه اميرة وقفت مكانها من الصدمة وصرخت: لا دا من حقى انا مقبلش الفلوس دى اسمت: اهدى يا اميرة وسيبى المحامى يكمل اميرة: لا يا طنط الشركة دى من حق حضرتك هى والفلوس وكل حاجة من حق حضرتك لوحدك وانا مقبلش اخد حاجة مش من حقى المحامى: ممكن تسمحيلى اكمل يا بشمهندسة اميرة: فاضل ايه تانى حضرتك مقولتوش مقولتوش؟
المحامى: فاضل حاجة اخيرة الجواب ده كان من ضمن الوصية وكان دكتور طارق الله يرحمه موصينى بعد ما اقولكم على الوصية اديهولك اتفضلى اميرة خدت الجواب وقريته ولقت مكتوب فيه: "بنتى الغالية اميرة لما يوصلك الجواب ده يبقى معنى كده انى خلاص مبقتش موجود (اميرة دموعها نزلت) متزعليش يا اميرة عايز اقولك انك قدرتى تدينى السعادة الى انحرمت منها طول عمرى فى الفترة البسيطة الى عرفتك فيها وكلمة بابا الى كنتى بتقولهالى خلتنى مبقتش عايز اى حاجة من الدنيا تانى غير انى ابقى مطمن عليكى.
سامحينى يا بنتى نقدرتش اقف جنبك واكون فى ضهرك زى ما وعدتك لكن دا عمر ومحدش فينا بيختار عمره . اميرة انا ملقتش اغلى من شركتى تبقى اخر هدية منى ليكى عشان تفتكرينى بيها انا عارف انك مش هتقبلى تاخديها لكن بحلفك بغلاوتى عندك تقبليها عشان ابقى مطمن عليكى يا بنتى وصدقينى يا بنتى الهدية دى ارخص بكتير اوى من كل السعادة الى قدمتهالى والايام الحلوة الى عشتها وانتى موجودة فى حياتى ". (وهنا اميرة مقدرتش تكمل قراية الجواب وانهارت فى العياط فعاصم اخد منها الجواب وكمل قرايته بصوت)
عاصم:" اميرة قولى لعاصم انى كنت عارف انه راجع وانى مش زعلان منه انا كنت بعتبره جزء منى مش بس ابنى الى ربيته وقوليله انى كان نفسى اشوفه اوى قبل ما ... بس معلش هيبقى كفاية عليا اوى انه يرجع ليته وياخد باله منك ومن ابنه الى جاى. كان نفسى بجد اشوف ابنكم اوى حفيدى. فى النهاية اتمنى انى اكون كنت اب كويس ليكم وانى اكون عوضكم بالحنان والحب زى ما انتم مليتوا حياتى بالسعادة بابا طارق" عاصم كمان بعد ما قرا الجواب مقدرش يمنع دموعه انها تنزل وبص على اميرة لقاها حاطة وشها بين ايديها منهارة فى العياط
اسمت: اميرة ! اسمعينى كويس طارق لما كتبلك الشركة باسمك كان عارف كويس انك هتقدرى تحافظى عليها وتخلى اسمه موفوع عليها .طارق كان بيحبك اوى يا اميرة وكان نفسه يأمنلك مستقبلك. عشان خاطره اقبلى عشان يبقى مرتاح فى قبره ومطمن على بنته وهنا عاصم قعد ادام اميرة ومسك ايديها: اميرة انا عارف ان الجواب صعب عليكى زى ما هو صعب عليا ويمكن اكتر بس احنا ناس مؤمنة . انا عايزك تفكرى فى الموضوع وتشوفى هتقدرى تحافظى على الامانة الغالية الى امنهالك عمى طارق ولا لا والى انتى عايزاه يا حبيبتى انا معاكى فيه وفى كل الاحوال محدش هيقدر ينسى عمى طارق
اميرة انهارت فى حضن عاصم: ابويا وحشنى اووووووى يا عاصم
بتمر الايام وحالة حسن بتبقى اسوأ وبيخسر اكتر فى فيلا الاسيوطى: حسن قاعد فى اوضته مربى ذقنه وباين عليه الهم بتدخل عليه بسنت الى مضايقة عشانه وعشان الحالة الى وصلها بسنت: حسن! ايه يا حبيبى هتفضل قاعد لوحدك كده حسن: عايزانى اعمل ايه يا بسنت
بسنت: عايزاك تخرج من اوضتك دى الى حابس نفسك فيها علطول وترجع لشغلك ولحياتك حسن: عايزانى ارجع لشغلى مش خايفة اخسر الى فاضل من شركتك وفلوسك انا خلاص عرفت طريق الخسارة وشكلى مش هعرف هغيره بسنت: يا حبيبى فداك كل حاجة المهم انك موجود معايا حسن: ووجودى معاكى هيفرق فى ايه بعد ما خسرتك فلوسك بسنت: وجودك هيفرق فى ايه ! انت لسه بتسال يا حسن بعد كل السنين دى عمرك ما حسيت انت اد ايه مهم بالنسبة لى عمرك ما حسيت بحبى ليك . يا حسن انت الانسان الوحيد الى حبيته فى حياتى واتمنيت يشاركنى باقى حياتى ويبقى اب لولادى . فلوس ايه الى بتتكلم عليها انا ميهمنيش انى اخسر فلوسى كلها المهم عندى انى مخسركش انت . انا استحملت طول السنين الى فاتت بعدك عنى كنت عارفة انك بتبقى معايا بجسمك بس وعقلك وقلبك مع غيرى ورغم كده استحملت كان عندى امل تحس بحبى ليك وانك اهم انسان فى حياتى كنت بستحمل تجاهلك واهمالك ليا واهتمامك بغيرى وبرضه مفكرتش فى يوم اسيبك لانى عارفة انك هيجى اليوم وتعرف مين الى بيحبك بجد وتحس بالحب الحقيقى الى موجود فى حياتك ومش شايفه كان عندى امل انك تقدر حبى ده وساعتها افتكر حسن كلام اميرة لما كلمته عن الحب الحقيقى وان حبهم مكنش هو الحب الحقيقى فى حياتها وانها لقت حبها الحقيقى مع عاصم وساعتها اكتشف ان هو كمان مكنش واخد باله من حب بسنت ليه وانه ممكن يكون هو ده الحب الحقيقى بالنسبة له حسن بصلها بحب: انا اسف يا بسنت سامحينى انا عارف انى وجعتك كتير وظلمتك كتير انا مشوفتش منك غير كل حب واخلاص مع انى مستاهلش... بسنت حطت ايديها على بقه: انا مسمحاك يا حسن وبحبك والى بيحب بيسامح انا مستعدية اكمل معاك باقى حياتى حتى لو هنبتدى من الصفر انا برضه هفضل معاك وجنبك حسن: ياااااااه يا بسنت انتى بالطيبة دى للدرجة دى انا كنت اعمى ومش شايف كل حبك وطيبة قلبك طول السنين الى فاتت دى كان عامينى الفلوس والمركز ومكنتش شايف غير نفسى وبس بسنت: خلاص يا حسن انسى الى فات يا حبيبى وتعالى انا وانت واميرة بنتنا نحاول نعوض الى فاتنا ونبدأ من جديد حسن: ياريت كان ينفع يا بسنت بسنت: وايه الى يمنع يا حسن؟ وقطع كلامهم خبط الشغالة الشغالة: بسنت هانم فى بوليس تحت بيسأل على حسن بيه بسنت: بوليس ! ودول عايزين ايه دول؟ حسن: انا عارف هما عايزين ايه قوليلهم انا نازل انا اصلا مستنيهم بسنت: حسن !
حسن بحزن: مش قولتلك ياريته كان ينفع . عالعموم انا عايزك تسامحينى على كل لحظة وجعتك فيها وخدى بالك من بنتنا فهميها ان ابوها عمره ما كان كده ابوها كان انسان كويس اوى بس الطمع فى لحظة عمى عينيه وقوليلها ان لو باقى فى عمرى ساعة واحدة هعيشها برة السجن هتبقى عشان اعوضك انتى وهى عن كل حاجة وحشة شوفتوها منى بسنت بعياط: لا يا حسن انت هتفضل معايا مش هتروح معاهم حسن: مبقاش ينفع يا بسنت انا لازم اتعاقب عن كل حاجة وحشة عملتها وياريت تيجى على عقاب الدنيا وربنا يسامحنى . بسنت عايزك تقولى لاميرة تسامحينى انا اذيتيها كتير وخليها تقول لعاصم كمان يسامحنى خليهم يسامحونى يا بسنت انا فعلا ندمان على كل الى عملته معاهم قوليلهم ان ربنا خدلهم حقهم منى.
بسنت بانهيار: حسن ! متسبنيش حسن نزل للبوليس الضابط: حسن بيه حضرتك متهم بالتورط فى قضية غسيل اموال ومضظرين ناخدك معانا حسن: اتفضل حضرتك انا جاهز
اميرة قاعدة جنب عاصم على السرير وشكلها سرحان عاصم: اميرة .مالك يا حبيبتى سرحانة فى ايه؟ اميرة بصتله بتردد: لا مفيش يا حبيبى متشغلش بالك عاصم: يا سلام يعنى هتخبى عليا اميرة: فى حاجة جوايا بس خايفة اقولهالك لتزعل وانا مش حمل زعلك تانى يا عاصم عاصم مسك ايديها: انا وعدك انى حتى لو زعلت منك هعاتبك بس مش هبعد عنك قولى يا حبيبتى ايه الى جواكى
اميرة: عاصم هو انا ينفع ازور حسن ؟ عاصم بغضب: ايه؟ انتى بتقولى ايه؟ اميرة بخوف: خلاص اعتبرنى مقولتش حاجة عاصم فكر شوية مع نفسه تجربته الى فاتت علمته انه لازم يسمعها ويفهم مبرراتها وانه مش لازم يخلى غيرته تغطى على تفكيره عاصم بيحاول يهدى نفسه: طب ممكن اعرف عايزة تزوريه ليه؟
اميرة: يا عاصم حسن من غير الى حصل دا كله كان جارى واخويا الى مربينى على ايده وانا متاكدة انه اتعلم الدرس كويس وفاق لنفسه ولو الى حصل لحسن ده كان حصل لاى حد من اهلى الى اتربيت معاهم كنت هطلب منك الطلب ده هو اكيد محتاج حد جنبه بعد ما خسر الكل وانا عمرى ما اتخليت عن حد محتاج مساعدتى الا لو كنت مش واثق فيا.
عاصم: اوعى تقولى كده يا اميرة انتى عارفة انى واثق فيكى وفى حبك ليا الموضوع بس موضوع غيرة راجل على مراته اميرة: وانا مقدرة غيرتك يا عاصم بس متنساش انى السبب فى دخول حسن السجن وفى انه خسر كل حاجة . عاصم لو رفضت انا مش هعارضك وهنفذ رغبتك فورا عاصم بعد تفكير: انا موافق انك تروحى تزوريه بس بشرط اميرة: شرط ايه؟ عاصم: دى هتبقى اخر مرة اسمع فيها اسم حسن فهمى فى حياتى لا بخير ولا بشر ولا تقولى جارى ولا اخويا ولا الجن الازرق لان ساعتها فعلا مش هضمن رد فعلى مفهوم اميرة: مفهوم
حسن بيدخل مكتب الظابط بعد ما بيعرف ان عنده زيارة واول ما بيدخل المكتب بيتفاجئ انها اميرة حسن: انتى ؟ وجاية بعد كل الى حصل ؟ اميرة: كان لازم اجى يا حسن حسن: جاية تشمتى فيا يا اميرة اميرة: انا يا حسن اشمت فيك. للاسف يا حسن بعد كل العشرة الى بينا طلعت متعرفنيش
حسن: امال جاية ليه؟ جاية تقوليلى انك كسبتى الحرب الى دخلتيها ادامى عشان خاطر عاصم ولا جاية تقوليلى ان عاصم هو حبك الحقيقى وإنك مبتحبيش حد غيره اميرة: لا يا حسن انا جاية اقولك حاجة اهم من كل الكلام ده انا جاية اقولك عمرى ما كرهتك وان كل الى عملته معاك دا كان عشان بحبك حسن: ايه بتحبينى! انتى واعية انتى بتقولى ايه وعاصم ...
اميرة: ياريت المرة دى تسمعنى لانها هتبقى اخر مرة هكلمك فيها يا حسن انا فعلا بحبك بحب الانسان الى فتحت عينيا لقيته واقف فى ضهرى بيخاف عليا وبياخد باله منى بحب الولد الى لما كان حد فى العيال يضايقنى اروح اعيطله فيروح يجيبلى حقى انا فعلا بحبك بس بحبك كأخ انا اكتشفت ان كل حاجة كانت بينا كانت حقيقية بس احنا الى فسرناها غلط من الاول انت فعلا كنت بتحبنى بس بتحب فيا اختك الصغيرة الى حاسس بمسؤلية ناحيتها مش حب ولد لبنت لكن الحب الى قصدك عليه دا كان حاجة تانية خالص وهو دا نفس الحب الى خلانى ازعل عليك مش منك رغم كل الاذى الى اذتهولى
حسن: اميرة انا اسف بجد بس... اميرة: متتاسفش على حاجة يا حسن انت مكنتش حسن كانت عينيك متغمية وانا كأختك اضطريت اضربك ع دماغك عشا تفتح معلش انا عارفة الضربة كانت جامدة شوية بس انا بجد عملت كده من خوفى عليك خفت تخسر نفسك وحياتك وبيتك حسن: هو انا لسه هخسر يا اميرة ما انا خسرت كل حاجة اميرة: لا يا حسن فى حاجة مهمة اوى لسه مخسرتهاش وارجوك حاول بجد تحافظ عليها حسن: ايه هى الحاجة دى؟ اميرة: حبك الحقيقى يا حسن زى ما ربنا كان كريم معايا وبعتلى عاصم عشان يكون نصيبى وحبى الحقيقى ربنا كرمك انت كمان وبعتلك حبك الحقيقى حسن: انتى قصدك ؟
اميرة: بسنت مراتك انا عارفة انها بتحبك اوى وانت كمان بتحبها انت بس مكنتش مدى نفسك فرصة تشوف الحب ده حسن: تفتكرى ممكن تسامحينى اميرة: دا بقى اخر وعد منى ليك انى هرجعلك بسنت مراتك وحبيبتك بس توعدينى انك تحافظ على حبها ليك ومضيعوش منك حسن: اخرج بس من هنا اميرة: هتخرج وترجع لبيتك ولمراتك ولبنتك المهم تكون اتعلمت الدرس كويس اميرة كانت هتخرج حسن: اميرة! اميرة: نعم ! حسن: ممكن تقولى لعاصم يسامحنى انا بجد مكنتش عارف انا بعمل ايه اميرة حركت راسها بالموافقة وسابته وخرجت
بعد فترة فى شركة العشرى: اميرة بتدخل مكتب طارق وبطنها على اخرها وقربت تولد وبتبعت لرحمة الى بقت مهندسة شاطرة جدا عشان تطمن منها على احوال الشركة. اميرة اول ما بتقعد على مكتب طارق بتبص لصورته وعينيها بدمع اميرة فى نفسها: الله يرحمك يا بابا رحمة بتدخل على اميرة اميرة: تعالى يا رحمة طمنينى ايه اخبار الشغل؟
رحمة: تمام يا اميرة متقلقيش الشغل ماشى زى ما انتى عايزة وامبارح عديت على كل المواقع بتاعتنا واطمنت على الشغل ماشى ازاى اميرة: هايل شفتى بقى يا رحمة انك مهندسة شاطرة بس انتى الى مكنتيش بتحاولى رحمة: عندك حق يا اميرة انا فعلا بقيت مستمتعة بالشغل جدا . اميرة فى حاجة كنت عايزة استأذنك فيها اميرة: خير يا رحمة؟ رحمة: انتى عارفة ان احمد ساب الشغل عند حسن ويعنى لو ينفع نشوفله شغل هنا و... اميرة: هنا مش هيلاقى حاجة يعرف يثبت فيها نفسه رحمة وشها بان عليه الزعل اميرة مبتسمة: بس خليه يعدى على عاصم فى الشركة وهو هيشغله معاه كده هيبقى انسب ليه رحمة بفرحة: بجد يا اميرة متشكرة اوى
اميرة بتعب: على ايه يا رحمة بس انتوا اخواتى وانا عمرى ما هنسى وقفتكم معايا الفترة الى فاتت رحمة: مالك يا اميرة شكلك تعبان اوى اوعى تكونى هتولدى؟ اميرة: لا اولد ايه لسه ادامى شوية رحمة: طب يا بنتى ما تريحى فى البيت شوية لحد ما تولدى انتى تعبتى اوى الفترة الى فاتت اميرة: ما انا هعمل كده بس الاول فى مشوار واحد فاضلى لازم اعمله قبل ما اولد رحمة: مشوار ايه؟
فى فيلا الاسيوطى: اميرة قاعدة مستنية بسنت تنزل تقابلها وبسنت اول لما بتنزل بتحقق من اميرة اوى لحد ما بتتاكد انها هى بتروح تسلم عليها اميرة: مدام بسنت انا ... بسنت: مدام اميرة الشاذلى اهلا وسهلا بيكى اميرة بصتلها باستغراب انها عرفتها بسنت: متستغربيش احنا صحيح متقبلناش قبل كده بس انا شفتك اكتر من مرة اميرة: اه انا نسيت من الفيديو الى كان معاكى بسنت بحزن: لا يا مدام اميرة من صورتك الى كانت مبتفارقش جيب جوزى اميرة بحرج: مدام بسنت انا ... بسنت: متقوليش حاجة اتفضلى اقعدى
اميرة: فى الحقيقة انا كنت جاية اشكرك على الموقف الى عملتيه معايا انتى بجد مش عارفة انتى عملتى ايه انتى رجعتيلى روحى خليتى جوزى وحبيبى يرجعلى بعد ما كنت فقدت الامل انه يرجع وكمان ظهرتى براءتى . بجد كل كلام الشكر ما يوفيش حقك بسنت: هتصدقى لو قلتلك مش عارفة مين الى المفروض يشكر مين اميرة: مش فاهمة قصدك ايه
بسنت: يا اميرة انا لو كنت رحت لجوزك ودافعت عنك ادامه فده لانك انتى بدأتى بالخير لما رفضتى تشاركى حسن فى لعبته عليا ولما وقفتى ادامه ودافعتى عنى وانتى حتى مشوفتنيش وبرغم كل الى حصل ده هو مبطلش يحبك حتى بعد ما اتجوزنا (بتتكلم بوجع) انتى عارفة انه سمى بنتنا على اسمك كنت دايما عايشة فى خياله اميرة: بسنت انا اسفة بس بجد انا مكنتش اقصد ابدا اكون سبب فى وجعك بسنت: برضه يا اميرة انا معرفش مين الى المفروض يتأسف لمين انا الى خطفت منك خطيبك فى الاول وحرمتك من الانسان الى بتحبيه بس صدقينى انا مكنتش اعرف بوجودك فى حياة حسن هو فهمنى انه مش مرتبط لو اعرف مكنتش فكرت حتى اقربله اميرة: علفكرة انا مش زعلانة منك بالعكس انا عايزة اشكرك انك عملتى كده بسنت: تشكرينى انى اخدت منك حبيبك؟
تحميل محتوى الموضوع
عرض نسخة صالحة للطباعة
أرسل هذا الموضوع إلى صديق
[40]
الدعوات : 2قوة السمعة : 10
رواية انتقام الحب