فى فيلا العشرى: اميرة راحت حكت لطارق كل الى حصل وكل الى ناوية تعمله وطارق مذهول بالقوة والاصرار الى رجعت بيهم طارق: ياه يا اميرة انتى هتعملى كل ده اميرة: هى خطة لو مشيت زى ما انا عايزة كل حاجة هتبقى تمام وهقدر اخد حقى من حسن طارق: بس انتى عرفتى منين موضوع التوكيل الى عملهولك عاصم
اميرة: بالصدفة وانا بدور فى ورق الصفقات والمناقصات الى المفروض كان يدخلها قبل ما يسافر لقيته بس بصراحة مش عارفة هو كان عامله ليه وليه مقليش عليه طارق: اكيد كان عاملهولك عشان لو سافر واحتاجوا امضته شفتى يا اميرة عاصم بيحبك وبيثق فيكى ازاى اميرة: ودا الى وجعنى يا بابا التاريخ الى عمل بيه التوكيل هو نفسه تاريخ اليوم الى اتخانقنا فيه وافتكرنى خنته وفقد الثقة فيا طارق: انسى يا اميرة وصدقنى كل حاجة هتبقى كويسة المهم يا حبيبتى انتى شايفة الخطة الى انتى حطاها دى هى الحل اميرة: معنديش حل تانى يا بابا ما انا مش هقف اتفرج على شركة عاصم الى بناها على كتافه وشقى وتعب فيها وهى بتنهار ادامى طارق: ايوا يا اميرة بس انتى كده يا بنتى داخلة على حرب كبيرة اوى وخايف ما تكونيش قدها وبعدين انتى تفهمى ايه فى شغل عاصم اميرة: ما تخافش عليا يا بابا انا برضه تربيتك واهو عادل معايا بيفهمنى الشغل واحدة واحدة والموضوع مش صعب طارق: والحرب الى ناوية تدخليها مع حسن دى انتى واثقة من نتيجتها
اميرة: صدقنى يا بابا انا مبقتش واثقة من اى حاجة حسن نفسه مبقتش اتوقع هو ممكن يعمل ايه حسن بقى شخص مختلف تماما عن الشخص الى عرفته زمان وحبيته بقى اقرب للشيطان من كونه انسان حبه لنفسه وللفلوس عمى عينيه وخلاه مش شايف غير نفسه وبس عمرى ما توقعت ان ممكن انتقامه منى يوصل انه يخرب بيتى ويخلى جوزى يفتكرنى خاينة عشان كده انا مبقتش قادرة اعرف هو بيفكر ازاى ولا ممكن يعمل ايه بس عالعموم هى مخاطرة ولازم ادخلها وربنا معايا كل الى متأكدة منه دلوقتى انى مش هسيب حقى الى عند حسن ولا هسمحله يضيع شقى عمر عاصم طارق: كل الى اقدر اقولهولك يا بنتى ربنا معاكى وطول ما انا عايش هفضل فى ضهرك ومعاكى اميرة: ربنا يديك الصحة يا بابا
فى شركة الاسيوطى: حسن بيتكلم مع شهد فى التليفون فى دخول احمد عليه حسن: انتى متأكدة من الكلام ده يا شهد ...طب انا عايزك تفتحى عنيكى الفترة الى جاية كويس ...عايز كل خطوة تعملها توصلنى ...سلام دلوقتى احمد: ايه يا عم حسن بتلعب بديلك من ورا المدام ولا ايه مين شهد دى حسن: لا دا موضوع كده متشغلش بالك انت احمد: مالك يا حسن شكلك مضايق حسن: مفيش بفكر فى كذا حاجة ودماغى مشغولة احمد: مفيش اخبار عن اميرة؟ حسن بارتباك: لا اخبار ايه وانا هسال عن اميرة ليه انت كان عندك حق اميرة دلوقتى متجوزة وانا كمان راجل متجوز وعندى بنت ربنا يخليهالى احمد بصله بعدم اقتناع وقال فى نفسه: يا ترى مخبى ايه تانى يا صاحبى ومين شهد دى وعايزها توصلك اخبار مين ؟
فى فيلا العشرى: قدرت اميرة تجتمع مع كل رجال الاعمال الى مصالحهم اضرت بسبب انانية حسن واسلوبه الغير شريف وهما رحبوا جدا بالمقابلة دى لما عرفوا انها مرات عاصم لانهم كلهم بيحترموه وبيقدروه اميرة: انا سعيدة اوى انى قاعدة مع حضراتكم النهاردة
رجل اعمال 1: احنا الاسعد يا مدام اميرة احنا سمعنا عن حضرتك كتير واسم اميرة العشرى كان ليه وزنه فى عالم المقاولات اميرة: دى حاجة تبسطنى وتشرفنى طبعا ان اسمى يتنسب لدكتور طارق العشرى بس انا حاليا اسمى اميرة الشاذلى لان زى ما حضراتكم عارفين انا مدام عاصم الشاذلى الى عاملين اجتماع النهاردة على شرفه رجل اعمال 2: عاصم بيه الشاذلى مش بس من احسن رجال الاعمال الى مروا على مصر دا كمان من اشرفهم واكثرهم احتراما وكلنا بنحترمه ونقدره هو ومن قبله ابراهيم الشاذلى والده لانه طول عمره انسان نضيف وشريف فى تعاملاته وكفاية ان اى حد فينا كان بيعدى بازمة كان بيلاقى عاصم بيه واقف جنبه اميرة: الكلام دا هيشجعنى ويسهل عليا مهمتى الى جامعة حضراتكم عشانها
رجل اعمال 1: خير يا مدام اميرة اميرة: حسن فهمى رجل اعمال 3: رئيس مجلس ادارة مجموعة شركات الاسيوطى؟ اميرة: بالظبط كده. اعتقد لما اقول حسن فهمى يبقى الحوار بينا هياخد شكل تانى رجل اعمال 2: حسن فهمى من اسوأ رجال الاعمال الى دخلوا مصر كفاية انى اقولك انه قدر يدخل للاسيوطى بيه الكبير ويدحلبله لحد ما جوزه بنته وخلاه دراعه اليمين وبعدها مسك الشركة بعد ما مات
اميرة بوجع: لا دى انا عارفاها كويس رجل اعمال 1: وياريته قدر يحافظ على اسم وسمعة الشركة فى السوق زى ما حماه سابها استخدم اساليب غير شريفة عشان يسحب البساط من كل الى حواليه ويبقى لوحده فى السوق رجل اعمال 3: دا غير شغل غسيل الاموال من تحت لتحت . ييييييييه دا حسن فهمى وراه مصايب اميرة: ودا الى خلانى اقابل حضراتكم النهاردة خلينا الاول نتفق ان محدش فينا متأذاش من حسن فهمى ومفيش حد فينا الا وخد ضربة ويمكن اكتر منه رجل اعمال 1: دا صحيح انا شخصيا خسرنى ملايين
اميرة: عظيم. عشان كده انا عايزاكم تحطوا ايديكم فى ايدى ونهد حسن فهمى وننسف جبروته نخسره كل حاجة زى ما هو خسر كل واحد فينا رجل اعمال 3: ايوا يا مدام اميرة بس الموضوع مش سهل اميرة: بس مش مستحيل واعتقد انا بكلم كبار رجال الاعمال على مستوى مصر يعنى قوة لا يستهان بها رجل اعمال 2: بس خدوا بالكم حسن فهمى مش لوحده وفى ناس تانية ساندينه ومش هيسمحوا لحد يجى جنبه اميرة: واعتقد برضه ان كل حد كبير فى الاكبر منه وافتكرش يعنى لما يلاقونا ايد واحدة انهم هيرضوا يعادوا كل رجال الاعمال دول عشان خاطر حسن فهمى ولو حصل فكل حاجة وليها تمنها . المهم انكم تتفقوا معايا ونبقى ايد واحدة ضد حسن فهمى والفترة الجاية تبقى اسوأ فترة فى حياته ميكسبش ولا صفقة ولا مناقصة وندور كمان ورا كل البلاوى الى مخبيها وراه ونعرف الناس بيها
رجل اعمال 1: كلنا معاكى رجل اعمال 2: كلنا فى ضهرك وهنساعدك اميرة بابتسامة نصر: ربنا معانا كلنا بعد ما خلص الاجتماع اميرة بتقعد مع طارق الى كان سامع كل حاجة اميرة: ها ايه رايك؟ طارق: فرحان بيكى وفخور بيكى بس كمان خايف عليكى يا اميرة اميرة: من ايه يا بابا؟
طارق: حسن مش سهل يا اميرة واكيد مش هيسكت لو عرف الى ناوية تعمليه فيه اميرة بحزن: دا لو عرف انى انا الى ورا الى هيحصله وبعدين هيعمل اكتر من الى عمله اكتر من انه خرب بيتى وحرم ابنى يجى يلاقى ابوه يفرح بيه طارق: مالك يا اميرة؟ اميرة: مخنوقة اوى يا بابا اوعى تفتكر الموقف الى انا فيه سهل عليا عمرى ما تخيلت فى لحظة انا ادخل حرب زى دى وادام مين ادام حسن يا بابا سيبك ان حسن فى يوم من الايام كان خطيبى هو كمان كان جارى وهو الى مربينى على ايده هبقى كدابة لو قلتلك انى مش زعلانة عليه طارق: طب وايه لزمة دا كله لما انتى زعلانة عليه؟
اميرة: عشان هو يا بابا الى مسبليش اى حل تانى لو معملتش كده وحميت نفسى منه مضمنش ادام ممكن يعمل ايه فيا ولا فى عاصم وفى كمان سبب تانى للى بعمله دا طارق: ايه هو يا اميرة؟ اميرة: حسن مغيب دلوقتى مش عارف هو بيعمل ايه انا عمرى ما فكرت اضر حسن ولا اذيه انا بس عايزة افوقه عايزاه هو الى يبطل يأذى نفسه خايفة على ما يفوق يلاقى نفسه خسر كل حاجة شركته ونفسه وبيته ومراته وبنته وانا مش عايزاه يخسر يا بابا طارق: ياه يا اميرة انا كنت فاهم انك بتعملى كل ده عشان تنتقمى منه
اميرة: يا بابا القلب الى يعرف الحب عمره ما يعرف يكره وانا حبيبت عاصم وحبه غطى على اى كره جوا قلبى خلانى اشوف الدنيا بمنظور نقى بعيد عن الكره والحقد الى عايشينه انا صحيح حسن وجعنى زمان واحتقرته ويمكن ساعتها كمان كرهته لكن لما حبيت عاصم وعرفت ان حسن بالنسبة لى مكنش اكتر من جار اخ صديق يمكن بدأت ابص لحسن بنظرة مختلفة نظرة اشفاق صعبان عليا الى وصله شايفاه بيضيع نفسه وحياته وكل الناس الى بيحبهم وهو مش حاسس عشان كده انا نفسى بجد يفوق طارق: ورغم كل الى عمله فيكى يا اميرة انتى وعاصم اميرة: وعشان كل الى عمله فيا انا وعاصم مخلاش ادامى اى حل غير الى هيحصل ادام بس صدقنى كل مرة حسن هيخسر فيها هبقى زعلانة اوى انى كنت السبب فى اذية اى انسان مهما كان طارق: انتى طيبة اوى يا اميرة يا بنتى اميرة: انا مش طيبة يا بابا انا بحب وبحب اوى كمان والقلب الى يحب واحد طاهر نقى زى عاصم عمره ما يعرف يكره
فى فيلا الاسيوطى: حسن قاعد جنب بسنت على السرير وزى عادته سرحان وفى دنيا تانية خالص وهى قاعدة بتتفرج على التابلت الى ادامها بس فعليا هى بتتفرج عليه وبتابعه وهو سرحان بسنت: مالك يا حسن حسن: مفيش يا بسنت بفكر فى حاجة بسنت: ماشى... حسن انا مسافرة بعد اسبوعين حسن: مسافرة فين؟ بسنت: هسافر باريس واحدة صاحبتى رايحة تحضر اوبن داى هناك وانا هسافر معاها يمكن يعجبنى حاجة حسن: هتاخدى اميرة معاكى؟ بسنت: لا هسيبها مع ماما هنا حسن بعدم اهتمام: طب كويس سافرى يا بسنت بس ابقى بلغينى قبل ميعاد السفر بسنت بضيق: حاضر يا حسن... تصبح على خير
فى شركة عاصم: اميرة قاعدة فى مكتب عاصم وبتدخل عليها شهد اميرة: خير يا شهد شهد: فى واحد برة بيسأل على حضرتك اميرة: اسمه ايه؟ شهد: اسمه احمد اميرة: احمد! احمد مين طب دخليه شهد: حاضر شهد بدخل احمد لاميرة الى بتستغرب اول لما بتشوفه شهد: اى اؤامر تانية يا بشمهندسة اميرة: لا يا شهد اتفضلى انتى وهنا يستوقف احمد اسم شهد ليتذكر كلام حسن فلاش باك: حسن: انتى متأكدة من الكلام ده يا شهد ...طب انا عايزك تفتحى عنيكى الفترة الى جاية كويس ...عايز كل خطوة تعملها توصلنى ...سلام دلوقتى
باك احمد: ازيك يا اميرة ولا تحبى اقولك يا مدام اميرة ولا يا بشمهندسة اميرة بابتسامة باهتة: ازيك يا احمد اتفضل احمد: انا طبعا عارف انك اكيد واخدة موقف منى وبصراحة انا عاذرك اميرة: لا يا احمد انا هاخد موقف منك ليه احمد: يعنى عشان انا صاحب حسن والى حصل زمان وكده اميرة: انت ملكش ذتب يا احمد احمد: اميرة انا طول عمرى بحترمك وبقدرك وبعتبرك زى اختى من ايام ما كان حسن خاطبك وبصراحة كده انا عرفت الى حسن عملوا معاكى ومع جوزك وانا ميرضتيش الظلم الى حصل ده اميرة: وعرفت منين طبعا هو الى قالك احمد: لا مش منه يا اميرة انا عرفت من رحمة اميرة: ايه من رحمة ! انت قصدك عرفت من رحمة صاحبتى وانت شفت رحمة فين اصلا؟ احمد: رحمة تبقى خطيبتى يا اميرة اميرة: رحمة تبقى خطيبتك انت طب ازاى هى متقوليش انا عارفة انها مخطوبة لكن عمرها ما جابتلى سيرتك ولا مرة احمد: هى كانت خايفة تقولك عشان متزعليش يعنى انتى عارفة الموقف حساس ازاى عشان انا صاحب حسن ولا حصل زمان يعنى اميرة: خلاص فهمت
احمد: المهم انا جى النهاردة يا اميرة عشان اقولك خدى بالك فى حد هنا فى الشركة بيوصل كل اخباركم لحسن اميرة: انا عارفة الكلام دا يا احمد بس للاسف لسه موصلتش للشخص ده مين بالظبط احمد: بصى هو انا شاكك فى حد معين بس هو مجرد شك وربنا يسامحنى لو ظنى غلط اميرة: شاكك فى مين يا احمد؟ احمد: الانسة الى دخلتينى دلوقتى اسمها شهد صح ؟ اميرة: اه صح بس اشمعنى؟ احمد: انا شغال مع حسن فى شركته يا اميرة ومن فترة كده دخلت عليه لقيته بيكلم واحدة اسمها شهد فى التليفون وبيطلب منها تجيبله اخبار حد اول باول واول ما شافنى قفل المكالمة علطول
اميرة: شهد ! معقولة هى ! وليه لا عندها الف سبب عشان تنتقم منى انا وعاصم ومنى انا بالذات عشان عاصم سابها واتجوزنى واكيد عايزة تفرق بينى وبينه ازاى انا مجاش فى دماغى انها ممكن تكون هى الى بتوصل اخبار عاصم دا هى سكرتيرته واكتر حد بيعرف عن الصفقات الى بيعملها احمد: بصى يا اميرة حاولى تتاكدى من الموضوع ده وخدى بالك من نفسك يا اميرة حسن مبقاش طبيعى الفلوس عمت قلبه وبقى عنده رغبة فى الامتلاك بشكل مرعب وخصوصا انتى يا اميرة حسن فعلا معتبرك ملكه ومش من حق اى حق غيره دا غير انه مبقاش شايف ادامه غير الانتقام من اى حد حتى لو الانسانة الى بيحبها صدقينى انا خايف عليكى منه اميرة: انا بجد مش عارفة اقولك عليه يا احمد انا متشكرة اوى احمد: على ايه يا اميرة انتى زى اختى واى حاجة اعرفها تخصك اكيد هحذرك بس ممكن اطلب منك طلب اميرة: طبعا يا احمد اتفضل
احمد: متزعليش من رحمة هى بجد بتحبك ومكنش قصدها تخبى عليكى علاقتنا اميرة: رحمة دى اختى وصديقة عمرى وعمرى ما ازعل منها ابدا احمد: كده انا اطمنت استاذن انا اميرة: احمد! احمد: نعم يا اميرة اميرة: خليك جنب حسن الفترة الى جاية اكيد هيبقى محتاج حد زيك جنبه يحميه من نفسه احمد بأسى: اكيد يا اميرة من غير ما تقولى. عن اذنك بيخرج احمد من عند اميرة وبعدها بتمسك الموبايل تكلم عادل اميرة: ايوا يا عادل... عملت ايه فى التحقيق الى كلفتك بيه... تمام طب اسمعنى كويس عايزاك تدورلى ورا شهد سكرتيرة عاصم كويس...من غير ليه هتعرف فى وقتها...فى اسرع وقت يا عادل وزى ما اتفقنا فى سرية تامة... تمام.. سلام
بتمر الايام واميرة هالكة نفسها فى شركة عاصم وبالفعل بدأت توقفها على رجلها من تانى وتممت اكتر من صفقة دا بجانب خطتها الى بتنفذها مع رجال الاعمال الى بيساعدوها لكن كل دا كان مجهود كبير على اميرة خصوصا وانها حامل
فى شركة العشرى: اميرة راحت لطارق الشركة تحكيله كل الى بيحصلها وكل الى عدت بيه لكن كان باين عليها التعب طارق: برافو عليكى يا اميرة بجد برافو عليكى انا مش مصدق انك تقدرتى تمشى شركة عاصم وتوقفيها على رجلها من تانى اميرة: ولسه يا بابا لما اهد جبروت حسن وانتقم ليا ولعاصم طارق: بس انتى بتضغطى على نفسك فى الشغل اوى يا اميرة اميرة: معلش يا بابا الفترة دى بس لحد الدنيا ما تستقر وفجأة اميرة حست ان الدنيا بتلف بيها ومش قادرة تاخد نفسها طارق فى قلق: مالك يا اميرة ؟ اميرة: مش عارفة يا بابا دخت فجأة و... وفجأة اميرة وقعت من طولها واغمى عليها وطارق حاول يفوقها معرفش فطلب الاسعاف ونقلها المستشفى
فى فيلا الاسيوطى: بسنت حضرتك شنطها ومستعدة للسفر فوزية: خلاص يا بنتى هتسافرى بسنت: اه يا ماما يا دوبك الطيارة كمان ساعتين فوزية: وكان لزمتها ايه السفر لوحدك يا بسنت بسنت: كده احسن يا ماما عايزة ارتاح ومش هرتاح غير لما اسافر السفرية دى فوزية: خدى بالك من نفسك يا بسنت بسنت بتبوس اميرة بنتها: خدى بالك من اميرة يا ماما فوزية: فى عينيا يا بسنت. هو حسن مش هيوصلك المطار بسنت بسخرية: حسن مش فاضيلى وراه حاجات اهم مش المهم السواق هيوصلنى اشوف وشك بخير يا ماما فوزية: ربنا يرجعك بالسلامة يا بسنت
فى المستشفى: اميرة نايمة على السرير متعلق فى ايديها محاليل وجنبها طارق وعزة واسمت والدكتور اميرة بتفوق بتعب: ايه دا انا فين وايه الى حصل ؟ طارق: كنتى بتكلمينى واغمى عليكى يا اميرة وطلبت الاسعاف جابوكى هنا .خير يا دكتور طمنا الدكتور: لا خير متقلقش هى بس ضغطها وطى اوى نتيجة المجهود الى بتعمله مع قلة التغذية ودا مينفعش لواحدة حامل زيها عزة: والله يا دكتور بتحايل عليها على الاكل بس هى مبتسمعش الكلام الدكتور: لا يا مدام اميرة مينفعش الكلام ده لازم تأكلى كويس جدا وتاخدى بالك من صحتك ولا مش عايزة عاصم باشا الصغير يجى بالسلامة اميرة بابتسامة باهتة: لا يا دكتور دا هو كل املى فى الحياة
الدكتور: خلاص يبقى تجيلى تتابعى كل اسبوعين ومتهمليش عشان نطمن على البيبى وانا هتكبلك فيتامينات تاخديها ومعلش نقلل المجهود على قد ما نقدر اميرة: حاضر يا دكتور اسمت: الف سلامة عليكى يا اميرة اميرة: الله يسلمك يا طنط اميرة افتكرت كلام عاصم ليها "عاصم: ازيك دلوقتى اوعى تكونى لسه بتنسى نفسك فى الشغل اميرة: انا فعلا الشغل بينسينى نفسى خالص بس اكيد بعد الى حصل مش هنسى اكل تانى عاصم: ياريت عشان مش كل مرة هبقى معاكى ومش عايز ابقى قلقان عليكى " وهنا بشكل لاارادى دموع اميرة نزلت
طارق حس بيها وحط ايده على راسها وملس على شعرها: هيرجع يا اميرة صدقينى هيرجع اميرة: ياريت يا بابا لو كان موجود جنبى دلوقتى كانت حاجات كتير اتغيرت ومكنش هيحصلى اى حاجة وحشة كان هياخد باله منى ومن ابنه الى فى بطنى طارق: وبعدين يا اميرة مش لسه سامعة كلام الدكتور ولا مش خايفة على عاصم الصغير اميرة: يارب يرجعلى بالسلامة ويارب يبقى زى عاصم فى كل حاجة
فى فيلا الاسيوطى: حسن بيتكلم فى التليفون وباين عليه القلق حسن: ايه حصل امتى الكلام ده؟ مستشفى ايييييه؟
قصة انتقام الحب ج2 بقلم أمنية الريحاني ف12 مدام عاصم الشاذلي
فى فيلا الاسيوطى: حسن بيتكلم فى التليفون وباين عليه القلق حسن: ايه حصل امتى الكلام ده؟ ...مستشفى ايييييه؟... يعنى هى خرجت؟...بقت كويسة طب تمام ماشى ماشى حسن قفل التليفون وبدأ يكلم نفسه: وبعدهالك يا اميرة هتفضلى قلقانى عليكى اه لو تعرفى ان محدش فى الدنيا دى كلها حبك ولا هيحبك قدى لو تعرفى خوفى عليكى عامل ازاى .بس اعمل ايه اذا كان الى اسمه عاصم ده مسيطر على عليكى وعلى تفكيرك ومخليكى مش شايفانى ..انا لازم اطمن عليها لازم اشوفها
فى شركة الشاذلى: بعد يومين اميرة بتروح الشركة بعد ما تكون اتحسنت وبيدخلها عادل اول ما بيعرف انها جت عادل: حمدا لله على السلامة يا بشمهندسة اميرة: الله يسلمك يا عادل ايه اخبار الشغل عادل: سيبك من الشغل دلوقتى انا عندى ليكى حاجة اهم اميرة: خير يا عادل عادل: ظنك فى محله يا بشمهندسة اميرة: يعنى ايه مش فاهمة عادل:شهد هى الى ورا كل الى حصلنا الفترة الى فاتت هى الى كانت بتوصل اخبارنا لحسن فهمى وكمان هى السبب فى المشكلة الى حصلت بين حضرتك وبين عاصم بيه.
اميرة: لا واحدة واحدة كده وفهمنى ايه الى عرفه بالظبط عادل: اول حاجة جت فى دماغى لما حضرتك طلبتى ادور وراها كانت الكمبيوتر بتاعها وفعلا لما دورت فيه لقيت الهانم عاملة سكان لكل العقود الى احنا كنا متفقين عليها وكمان سكان لكل عروض المناقصات الى كنا بنقدمها وطبعا الصور دى كانت بتبعتها لحسن فهمى عشان كده كان بيقدم اسعار اقل مننا حتى لو هيخسر اميرة: يا بنت ال... عادل: لا انا كمان لقيت حاجة اخطر مكتوبة على الكمبيوتر ومطبوعة مرة واحدة تخص حضرتك اميرة: تخصنى انا ! حاجة ايه دى؟ عادل: اتفضلى حضرتك اقرى كده اميرة بتاخد الورقة وبتشوف الجواب الى بعتته شهد لعاصم والى خلا عاصم يروح لحسن الشركة ويشوف اميرة عنده وعرفت ليه عاصم كان ثاير عليها بالشكل ده وعذرته لان الجواب كان بيمس كرامته ورجولته وكان كفيل المنظر الى شافه بعد ما قرأ الجواب ده انه يلغى عقله ويعمل الى عمله عرفت كمان انها كانت تحت مؤامرة بين حسن وشهد عشان يفرقوا بينها وبين عاصم
اميرة بغضب: ازاى يوصل بيها الحقارة انها تبعت لجوزى جواب زى ده عادل: انا اسف يا بشمهندسة بس كان لازم اوريهولك اميرة: فى ايه تانى عرفته عن الكلبة دى؟ عادل: كشفت عن حسابها فى البنك لقيت اضاف لحسابها فى الفترة الاخيرة ربع مليون جنيه اميرة: ياه ربع مليون جنيه دا تمن رخيص اوى قصاد حياتى وبيتى الى دمرتها مع جوزى عادل: ودلوقتى حضرتك شايفة نعمل معاها ايه؟ اميرة: تحولوها للتحقيق فورا وتتوقف عن العمل بشكل نهائى عادل: حاضر يا فندم اميرة: وبكده اكون خلصت من اول حية كانت السبب فى اكبر مشاكلى
اميرة بتخلص من شهد وبتجيب مكانها سكرتيرة جديدة اسمها نيفين وبخروج شهد من الشركة اميرة بتتوفق فى اكتر من صفقة ومناقصة وبالفعل بتبدأ فى تنفيذهم بمساعدة عادل وفى يوم واميرة قاعدة فى مكتبها نيفين بتبلغها ان فى شخص عايز يقابلها فتتفاجئ انه حسن الى داخل عليها اول ما بتشوفه بتفتكر منظرها وهو مكتفها فى حضنه وعاصم لما دخل عليهم اميرة بغضب: انت ايه الى جابك هنا ؟ ليك عين تدخل شركته بعد الى عملته ؟ اتفضل اطلع برة حسن: اهدى يا اميرة انا عرفت انك كنتى تعبانة فجيت اطمن عليكى اميرة بسخرية: لا والله فيك الخير اظاهر الناس الى مكلفهم يراقبونى شايفين شغلهم على اكمل وجه حسن بعصبية: بطلى تكلمينى كده انا مش عدوك يا اميرة وانتى عارفة كده كويس. انا فعلا كنت قلقان عليكى لما عرفت انك تعبانة وكان هاين عليا اجيلك المستشفى لما عرفت بس مكنتش ضامن رد فعلك. والناس الى بتتكلمى عنهم دول انا مكلفهم يخدوا بالهم منك ويحموكى ويبقوا فى ضهرك لو احتجتى حاجة مش يراقبوكى زى ما بتقولى
اميرة: ولا وفرهم لنفسك يا حسن بيه انا مش محتاجة حماية منك اظاهر انك نسيت انا مين ومرات مين. انا اميرة الشاذلى مرات عاصم الشاذلى ومحدش يقدر يجى جنبى لان البلد كلها عارفة مين هو عاصم الشاذلى انت بس الى مش واخد بالك حسن: ما تفوقى بقى من الوهم الى انتى عايشة فيه ده هو فين عاصم الشاذلى ده الى بتتكلمى عنه عاصم الى ما صدق وسابك وهرب اميرة: عاصم مهربش وانت عارف كده كويس خطتك القذرة الى عملتها مع الزبالة الى اسمها شهد عشان تفرق بينى وبينه حسن: ولنفرض انه مشى بسبب خطتى زى ما بتقولى هو لو كان من الاول عنده ذرة ثقة فيكى خطتى دى ولا كان هيبقى ليها قيمة من الاساس لكن هو زى ما يكون ما صدق وسابك اميرة: اطلع برة يا حسن
حسن: انا مقدر الى انتى فيه يا اميرة وعاذرك بس انا عايز اقولك انى لسه بحبك وهفضل متمسك بيكى لاخر لحظة فى حياتى ومش هعمل زيك واهرب واسيبك انا هفضل جنبك يا اميرة مش هتخلى عنك اميرة: قولتلك اطلع برة يا حسن واوعدك ان عاصم هيرجعلى قريب وقريب اوى والحرب الى بدأتها هتكون فى صالحى مش فى صالحك ودا كمان وعد منى ليك حسن: بس انا مفيش بينى وبينك حرب يا اميرة اميرة: الحرب كانت بينك وبين جوزى الى هو اغلى من حياتى كلها واذا كان هو مش موجود دلوقتى فأنا مكانه هكمل الحرب لحد ما يرجع حسن: مش فاهم يعنى ايه؟ اميرة: بكرة الايام هتفهمك قصدى ايه حسن: اميرة حبيبتى افهمينى انا... اميرة بعصبية: قولتلك انا مش حبيبتك انا حبيبة جوزى وبس ودلوقتى اطلع برة شركة الشاذلى الى متتشرفش بوجود واحد زيك فيها
حسن بيخرج من عند اميرة وجواه بركان غضب ثائر كفيل يحرق كل الى حواليه. مين الشخص ده الى رغم بعده عنها ورغم كل الى عمله معاها قادرة تقف ادام حسن وتدافع عنه مين الشخص الى يستاهل ان اميرة تدخل معاه حرب عشانه ايه الى فى عاصم يخلى اميرة تحبه الحب دا كله .حسن فى اللحظة دى لعن قلبه ولعن الحب الى موجود فى الدنيا كلها الى يخلى حبيبته تعمل معاه كده عشان حد تانى.
فى لندن: عاصم فى اوضته قاعد لوحده لكن خيال اميرة مش مفارقه كل حتة بتفكره بيها وبذكرياته معاها فلاش باك: " عاصم: يالا بقى يا حبيبتى حضرى الشنط عشان مسافرين بكرة ان شاء الله اميرة: ايه ده علطول كده عاصم: علطول ايه يا حبيبتى احنا بقالنا اسبوعين اهو اميرة: تصدق الايام عدت بسرعة اوى عاصم: امممم. انتى مش عايزة تسافرى اميرة: تؤتؤتؤتؤ... اصل بصراحة مكنتش متخيلة انى هبقى مبسوطة كده ولا انى هنسى الدنيا كلها وانا معاك "
"عاصم: يا سلام يعنى لو قلتلك متشتغليش... اميرة: مش هشتغل وهعملك كل الى انت عايزه...مكنتش متخيلة انى لما اتجوزك هكتفى بيك عن العالم كله مكنتش متخيلة ان هيبقى اهم حاجة فى حياتى انى اخليك مبسوط وانك تبقى كل حياتى انت مليت حياتى يا عاصم وخلتنى مش محتاجة اى حاجة فى الدنيا غير وجودك جنبى " باك وهنا عاصم رأسه عقله فقد السيطرة انه ميفكرش فيها كل ذكرياتها معاه بتمر ادامه بعدهل عنه فارق معاه اوى حاسس ان فى حاجة مهمة نقصاه فى حياته وهنا قرر يسيب الاوضة وينزل يتمشى يمكن يقدر يوقف عقله عن سرد ذكرياتها معاه
فى فيلا العشرى: اسمت بتدخل على طارق بتلاقيه قاعد على السرير مضايق وباين عليه التعب اسمت: مالك يا طارق؟ طارق: مضايق اوى على اميرة يا اسمت داخلة حرب مش قدها وانا خايف عليها . وكمان زعلان من عاصم اوى ازاى يهون عليه الفترة دى كلها ميسألش عليا طب هو زعلان من مراته لكن انا ابوه الى ربيته هونت عليه الفترة دى كلها ميطمنش عليا دا عمره ما عملها اسمت: مضايقش نفسك يا طارق بكرة ربنا يهدى الاحوال ويرجع لمراته ولبيته طارق بيمسك صدره بألم: يارب يا اسمت يا... اسمت بقلق: مالك يا طارق شكلك تعبان طارق ماسك صدره وبيتألم جامد ومش قادر يرد على اسمت اسمت: طارق... طااااااااااارق
فى شركة الشاذلى: اميرة بتتكلم مع عادل وباين عليها الفرحة اميرة: انت بتتكلم جد يا عادل يعنى المناقصة راحت عليه عادل: مش بس كده دا بقاله فترة مفيش ولا صفقة عارف يتممها البركة فى البشوات بصراحة كانت ضربة معلم من حضرتك اميرة: بصراحة هما ساعدونى كتير ولولاهم مكنتش عرفت اعمل اى حاجة عادل: بس لولا تشجيع حضرتك ليهم مكنوش فكروا يعملوا حاجة ولا يقفوا ادام حسن فهمى اميرة: كده اول مسمار ادق فى نعش جبروتك يا حسن عادل: لا مسمار ايه قولى لوح بحالخ انتى معرفتيش لسه الخبر الاهم اميرة: خبر ايه؟ عادل:... بيقطع كلام عادل تليفون اميرة الى بيرن فبترد اميرة: طنط اسمت! مالك يا طنط بتعيطى ليه؟ اييييييييه بتقولى ايه يا طنط!...امتى حصل الكلام ده... مستشفى ايه؟
تحميل محتوى الموضوع
عرض نسخة صالحة للطباعة
أرسل هذا الموضوع إلى صديق
[34]
الدعوات : 2قوة السمعة : 10
رواية انتقام الحب