رواية انتقام عاشق

نوفيلا انتقام عاشق للكاتبة شاهندة الفصل الخامس

مرت الأيام على شهد بطيئة منذ تلك الليلة وفارس يخرج أول النهار ليتركها تقوم بكل أعمال المنزل في قائمة يتركها لها في ورقة على طاولة المطبخ قبل أن يخرج، وتقوم هي بكل الأعمال في صمت، تظل تعمل جاهدة وتأكل القليل حتى أصابها الهزال والتعب، فالمجهود الذي تبذله في رعاية هذا المنزل الكبير وذنب والدها الذي تحمله في أعماقها لا يجعلانها تشعر بأى رغبة في الطعام، ثم تنام مبكرا قبل ان يعود فارس ليتكرر روتينها يوميا،.

كانت تقوم بعملها كالمعتاد وهي تفكر بمشاعرها تجاه فارس، لم تعد تشعر تجاهه بالكره بل تشعر نحوه بالشفقة وتساءلت في نفسها هل الشفقة هي الشعور الوحيد الذي تشعره نحوه، فداخلها ينمو شعور غريب تجاهه، ذلك المزيج من الاعجاب والانجذاب والذي كانا قد نبتت بذرتهما قبل أن يعرض عليها الزواج لتمر بها مرحلة ضبابية امتزجت فيه تلك المشاعر بالخوف منه لتعود مجددا تشعر بتلك الأحاسيس بعد أن عرفت قصته وسبب ما يفعله بها، تتسارع دقات قلبها كل يوم وهي ترتب غرفته وتتنقل بين أشيائه، ترى عناوين الكتب بجوار سريره وتلك الصور له ولأخته، لتشعر بأنه شخص آخر غير ذلك الشخص المنتقم الذي يحاول اذلالها.

تشعر بأن داخله شخص آخر يقاوم في الظهور، شخص حان محب، ان فارس يجذبها نحوه، يجذب شعورها الانسانى في محاولة محو احزانه التي رأتها في عينيه ليلة زفافهما، ورغم محاولته سجنها وتعذيبها واذلالها وقسوته عليها وتجريحها بكلماته، الا انها تشعر أنه مرغم عليها والدليل على ذلك انه لا يجلس بالمنزل ليحاول ان يزيد من اذلالها، بل يتجنب تماما المكوث به، عليها فقط ان تحاول اقتحام حصونه التي بناها حوله لتعيد اليه ابتسامته وحبه للحياة والذين رأتهم على ملامحه في ألبوم الصور الخاص به، ستحاول ان تكفر عن ذنب والدها مهما قاومها، نعم تلك هي خطتها الجديدة ولا مزيد من الهروب.

قالت ياسمين بفرح:
بجد ياشهد؟، يعنى نجاح هتتخطب، انا مش مصدقة ودانى، أخيرا فيه حد قدر يقنع عدوة الرجال الأولى بإن الرجالة مش كلهم وحشين، فيه حد قدر يخلى المتمردة الأولى تخضع لسلطانه، ده اجمل خبر سمعته من زمان.
ابتسمت شهد قائلة:
انا اول ما سمعت الخبر قلت اقولك علطول، انا كمان مكنتش مصدقة، لأ ولما تعرفى التفاصيل هتندهشى اكتر.
قالت ياسمين في لهفة:
قولى ياشهد بسرعة، قولى وفرحينى.

قالت شهد وهي تستند بظهرها الى الوسادة تريحه بعد عناء اليوم:.

الموضوع ياستى، ان الأستاذ وليد خبط فيها في النادى زيك تمام، بس نجاح طبعا مش زيك، مسكتتلوش، خطبة طويلة من انه اعمى ومبيشوفش او انه اكيد قاصد وساعتها يبقى مامته داعية عليه، هو كمان مسكتلهاش خبط فيها جامد وسابها ومشى، بعد كدة طلعت مامته صاحبة مامتها ونفسها تناسبها، نجاح كالعادة رفضت بس قعدت مع العريس عشان متحرجش مامتها ولما عرف العريس ان عروسته نجاح، قرر يكمل الخطوبة عشان ينتقم منها وهي كمان فكرت زيه وفي مدة قليلة مقالبهم في بعض اتقلبت لحب وقرروا يكملوا مع بعض، هي دى كل الحكاية، وحفلة خطوبتهم ياستى الشهر اللى جاي ولانها كلمتك كتير ومردتيش عليها، أكدت علية اعزمك، لازم تيجى ياياسمين.

قالت ياسمين بهيام:
هيييح، طبعا هاجى، وانابرده افوت فرصة اشوف فيها نجاح عروسة وفي الكوشة، جاية أكيد ياشهد، هقول بس لعادل وهاجى علطول.
قالت شهد:
صحيح اخبارك ايه معاه؟
تنهدت ياسمين قائلة:
زى ما احنا مفيش جديد، انتى كمان عاملة ايه مع فارس؟
قالت شهد ساهمة:
فارس، فارس ده حكاية معقدة لوحدها مش عارفة ابتديهالك منين؟
قالت ياسمين وقد شعرت بنبرات شهد التي تحمل الكثير:.

ابتديها من الناحية اللى تحبيها بس بالراحة كدة وواحدة واحدة عشان افهم.
تنهدت شهد قبل ان تقول:
هحكيهالك م البداية خالص ياياسمين، من أول ليلة فرحنا.

حاولت شهد تلك الليلة ان تنام ولكنها لم تستطع، كادت ان تخرج من الغرفة لتتجه الى المطبخ لتشرب كوب لبن يساعدها على النوم، ولكنها ما ان تحركت باتجاه الباب حتى سمعت صوت أنين يأتى من حجرة فارس فأسرعت الخطى تجاه الباب المتصل بحجرته، وحاولت الانصات فتكرر الأنين الخافت، تمالكت شهد نفسها وتشجعت وهي تفتح الباب لتراه جالسا على السرير يضع يده على عينيه ووجهه، شاحبا للغاية وبنظرة واحدة متفحصة ادركت ما به، أسرعت الى خزانة الأدوية الخاصة بها وأحضرت الدواء ثم دلفت الى حجرته وأطفأت النور فسمعته يقول مزمجرا:.

بتعملى ايه؟
قالت شهد بصوت خفيض:
انا طفيت النور يافارس، انت عندك صداع نصفي والاضاءة هتضايقك اكتر، خد الدوا ده هيريحك.
ومدت يدها بالدواء وكوب الماء لفارس الذي قال في حدة:
ابعدى عني، مش عايز حاجة منك
قالت شهد في حزن:
خلى انتقامك على جنب دلوقتى وسيبنى أساعدك، وحياة اغلى حاجة عندك.
أحست بتردده فأعطته الدواء الذي أخذه منها وشربه فاستطردت قائلة:
دلوقتى بقى هدلك راسك وهيبقى كل شئ تمام.

أحسته يتصلب لتشعر برفضه الذي كاد ان يعلنه فأسرعت قائلة:
من فضلك خلينى أساعدك.
ارتخت عضلاته قليلا وهو يتركها تدلك رأسه بأيد خبيرة وبالفعل شعرت به شهد يرتاح ويغمض عينيه يستسلم للنوم فأبعدت شهد يديها عنه ثم دثرته بالغطاء واتجهت لغرفتها ولكنها مالبثت ان توقف عندما سمعته يقول بهمس:
شهد.
التفتت اليه فوجدت عيناه تنظران مباشرة اليها رغم الظلام وهو يقول:
انتى عرفتى منين انى عندى صداع نصفي؟
قالت شهد بهدوء:.

ماما الله يرحمها كانت بتعانى هي كمان منه.
أومأ برأسه في هدوء وهو يقول:
الله يرحمها.
ارتسمت ابتسامة مترددة على فمها وهي تقول:
تصبح على خير.

لم يرد عليها لتدرك استغراقه في النوم لتتجه الى غرفتها تشعر بدقات قلبها المتسارعة والتي تخبرها انه رغم كراهيته لها الا انها احبته، لم تكن تلك المشاعر التي تنتابها تجاهه سوى الحب فنظرة واحدة منه تكفى لأن تطيرها فوق السحاب، ربما لا أمل لعلاقتهما ولا أمل لأن يحبها ولكنها ستساعده على ان يجد نفسه مرة اخرى، ستساعده ليكون سعيدا ثم ستخرج من حياته للأبد.

نوفيلا انتقام عاشق للكاتبة شاهندة الفصل السادس

دلفت ياسمين الى المكتب بوجه شاحب لينهض عادل على الفور قائلا في قلق:
فيه ايه ياياسمين؟
قالت ياسمين بجزع:
عمر ياعادل، عمر تعبان وحرارته عالية اوى.
احس بنبضات قلبه تتسارع بخوف ولكنه تمالك نفسه وهو يسرع اليها قائلا:
اهدى بس ياياسمين انا هتصل بالدكتور حالا،.

وقرن قوله باخراج هاتفه والاتصال بالطبيب لتسبقه ياسمين الى حجرة عمر يتبعها عادل، وما ان دلفا الى الحجرة حتى اسرعت ياسمين الى المهد تحمل عمر وتضمه الى صدرها بخوف.
نظر عادل الى الطفل ثم الى ياسمين التي تحمله وتتمسك به بشدة ليدرك انها ليست بحالتها الطبيعية فقال بهدوء:
هاتى عمر ياياسمين اشوفه.
تمسكت بالطفل اكثر وهي تقول:.

لأ مش هديهولك، انت مش فاهم حاجة، عمر ده الحاجة الوحيدة اللى باقيالى، انا مقدرش اخسره زى ما خسرتك، انت عندك غيره لكن انا معنديش الا عمر.
عبس عادل وكاد ان يسالها توضيحا لكلماتها ولكن ربما هذا التوقيت ليس مناسبا للتوضيح، فآثر الصمت، كما ان وصول الطبيب بعدها وانشغالهم بمرض عمر حال دون ذلك، علم انه لابد وأن يطالبها بذلك التوضيح ولكن ما يهمه الآن هو صحة طفلهما ثم سيكون لديه معها حديثا طويلا،.

، مر يومان طوال لم يتحدثا فيهما سويا سوى ببعض الكلمات فقد كان كل تفكيرهما منصبا على عمر، حتى إطمأنوا سويا عليه، فقد انخفضت حرارته واصبحت في معدلها الطبيعى وأشرق وجهه بعد ان كان شاحبا، ليبتسم لهما قبل أن يغط في نوم عميق.

اشار عادل الى ياسمين ان تتبعه، تنهدت ياسمين، كانت تدرك ان تلك اللحظة آتية لا محالة لذا لاداعى لتأجيلها اكثر من ذلك، اتبعته في صمت، حتى دخلا الى حجرته ليغلق الباب بهدوء قبل ان يلتفت اليها وهو يعقد ذراعيه قائلا:
الوقتى هيكون وقت الصراحة ياياسمين، محدش فينا هيكذب او يخبى حاجة عن التانى، مفهوم؟
تنهدت ياسمين وهي تومئ برأسها ايجابا ليستطرد هو قائلا:
انتى فعلا بطلتى تحبينى زى ما كتبتيلى في رسالتك.

هزت ياسمين راسها نفيا قائلة بحزن:
انا عمرى ما حبيت ولا هحب حد غيرك ياعادل وكلام الرسالة اللى كتبتهالك كنت قاصدة بيه تبعد عني ومتدورش علية.
التمعت عيناه وهو يقول وقد رقت ملامحه:
طب ليه سيبتينى، ايه كان ذنبى اللى خلاكى بعدتى عني؟
صمتت وأطرقت برأسها في حزن ليقول هو وقد تعجب من صمتها:
طب كنتى تقصدى ايه بكلامك اللى قلتيه من يومين؟

لم تجيبه مجددا ليقترب منها في خطوتين ويمد يده يرفع بها وجهها اليه لتواجهه عيناها الدامعتان، ليقول هو في همس وهو يتأمل ملامحها قائلا:
احنا اتفقنا ع الصراحة، اتفقنا تجاوبينى مش تسكتى وتخبى علية تانى.
نزلت دموعها وهي تبتعد عن مرمى يده التي تضعفها قائلة في مرارة:.

وانت كمان هتجاوبنى بصراحة؟، هتقولى مين هي الست اللى سمعتك بتكلمها في التليفون وبتقولها انك هتكون مسئول عن طفلها، هتقولى مين الست اللى خنتنى معاها وليه خنتنى معاها اصلا؟هتقولى اسم طفلك التانى، هتقول ياعادل؟
تراجع عادل خطوة الى الوراء وملامحه تعبر عن الصدمة، ليتمالك نفسه بسرعة وهو يقول في غضب:.

يعنى انتى عايزة تفهمينى انك سيبتينى وعذبتينى المدة دى كلها عشان كدة، عايزة تقوليلى انك مخلتنيش اشوف ابنى من يوم ما اتولد لدلوقتى، وانك حرمتينى منه ومنك عشان مكالمة تليفون سمعتيها؟
اطرقت برأسها في حزن ليتقدم منها ثانية يمسكها من كتفيها ويهزها قائلا في غضب:
انطقى، قوليلى ان الكلام ده مش صح.
نظرت الى عينيه وهي تقول في مرارة:.

لأ صح، أنا سمعتك بودنى، كنت لسة عارفة بحملى وجاية افرحك، سمعت غدرك وكدبك علية، سمعت الدليل على خيانتك، تفتكر بعد كدة كنت اقدر اربى ابنى معاك وانا عارفة انك خاين وغشاش.
ترك كتفيها وهو يمرر يده في شعره قائلا في مرارة:
طب ازاى، ازاى صدقتى انى ممكن اخونك، أخون روحى اللى كنت عايش عشانها؟أخون حبيبتى اللى مكنتش عايز من الدنيا غيرها، ازاى؟

نظرت اليه في امل تتمنى ان يكون صادقا في مشاعره ليقابل نظراتها بسخرية مريرة وهو يقول:
للأسف ضيعتى حب كبير اوى من ايدك بسبب أوهام، طب كنتى تعالى اسألينى قبل ما تهربى، تعالى حاسبينى ولا انا مكنتش استاهل منك تبقى باقية ولو شوية علية.
قالت بسرعة:
أنا...
قاطعها قائلا في قسوة:.

انتى ايه ياياسمين؟ انتى أثبتيلى انى ولا حاجة بالنسبة لك، أثبتيلى ان ان حبك لية أضعف من انك تواجهى خوفك وضعفك عشانى، عموما وعشان بس العشرة القديمة اللى بينا انا هقولك الحقيقة، المكالمة اللى سمعتيها كانت من سكرتيرة بابا، كانت محاولة ابتزاز حقيرة ليه منها وانا اللى وقفتلها، كنت بحاول أنقذ أمى من خبر ممكن يقضى عليها وانتى عارفة انها مريضة، خصوصا انى كنت متأكد من برائته، لو كنتى استنيتى يومين كنت هتعرفى انى كشفت كدبتها وانها اختفت بعد كدة من حياتنا للأبد، يمكن غلطتى انى خبيت عليكى بس كان عذرى ان ملامحك شفافة اوى وكنت خايف تظهر مشاعرك دى ادام ماما، او انك تضعفى وتقوليلها، لكن انتى عذرك ايه ياياسمين؟، شفتى منى ايه يخليكى تصدقى انى خاين؟

نظرت اليه بصدمة ثم أطرقت برأسها بخجل من أفعالها، ليصمت للحظة قائلا في مرارة:
ياخسارة ياياسمين، ياألف خسارة ع الحب اللى حبيتهولك واللى ملقتش صداه في قلبك.
اقتربت ياسمين منه تمسك بذراعه، تنهمر دموعها على خدها قائلة في حزن:
لأ يا عادل متقولش كدة، والله انا بحبك اد ما بتحبنى واكتر.
نفض ذراعه قائلا في غضب:.

لو كنتى حبيتينى نص ما بحبك كنتى دافعتى عن حبك، عن حقك فية، كنتى عاتبتينى، او شفت منك اى حاجة تدل انى غالى عندك لكن انتى كنتى اجبن من انك تدافعى عن حبك واخترتى الهروب.

نظرت اليه في مرارة تدرك انه على حق، كانت أجبن من ان تدافع عن حبها واختارت ان تهرب ولكنه مخطئ في انها لا تحبه فهى تعشقه، هي فقط تركت نفسها للشيطان وظنونه التي زرعها بعقلها وقلبها، لتضيع سعادتها بيديها وهاهي قد اضاعتها مجددا بخروج عادل من الباب يصفقه خلفه بعنف بعد ان رمقها بنظرة عتاب مريرة طويلة تاركا اياها غارقة في الأحزان.

نوفيلا انتقام عاشق للكاتبة شاهندة الفصل السابع

لأول مرة منذ زواجهما تجد فارس يجلس على طاولة الافطار، نظرت اليه تتفحص وجهه فوجدته يقول:
انا كويس متقلقيش.
تلاقت عيناها الدهشة بعينيه الهادئتان فاستطرد قائلا:
ملامحك شفافة اوى، ممكن اقراها بسهولة
أطرقت رأسها بسرعة قائلة في خجل:
أجيبلك الشاى؟
نهض قائلا:
لأ، انا فطرت خلاص ومستعجل، بس حبيت اشكرك على اللى عملتيه معايا انبارح.
نظرت اليه قائلة:
ده واجب علية.
نظر اليها مطولا ثم قال:.

الحقيقة انتى حيرتينى، كان ممكن تسيبينى اتألم وخصوصا بعد اللى بعمله فيكى.
اطرقت برأسها مجددا تخشى ان يرى مشاعرها واضحة في تلك النظرات وهي تقول:
مقدرش اشوف حد بيتألم، وبعدين انا بدأت أعذرك في انتقامك، لو انا مكانك كنت عملت كدة واكتر.
احست بفارس يشرد وهو يقول:
مستحيل، قلبك الطيب كان هيمنعك.
نظرت اليه في دهشة فاطرق برأسه وبدا وكأنه أحس بأن كلماته خرجت منه دون وعى ليتنحنح قائلا وهو ينظر اليها:.

انا، انا همشى عشان اتأخرت.
ثم اتجه مغادرا المنزل في هدوء تتابعه نظرات شهد المتحيرة من تغير اسلوبه معها، هل بدأ يلين؟ام انها تتوهم ذلك؟هي حقا لا تعرف.

تأملت ياسمين طفلها النائم كالملاك بعيون ممتلئة بالدموع، مدت يدها تلمس خده بحنان وهي تقول بحزن:.

خلاص ياعمر لازم أمشى، بس المرة دى مش هاخدك معايا، هسيبك لعادل، هو هيربيك احسن منى، انا مكنتش زوجة كويسة قادرة تحافظ على بيتها وجوزها، هربت مع اول مشكلة قابلتنى وأدينى بهرب تانى، ازاى بس هكون أم كويسة، ضميرى مش قادر يسمحلى آخدك معايا وأربيك على انك متواجهش مشاكلك وتهرب منها، زى ما بعمل انا بالظبط، ما انا اتربيت على كدة، كانت ماما دايما تهرب من مشاكلها مع بابا، يابتسافر، يا بتشغل نفسها في جمعيتها الخيرية.

أنا مش عايزاك تبقى زيى، انا عايزاك تبقى زى باباك، كان نعمة كبيرة أوى في حياتى محافظتش عليها، وللأسف ضاع منى خلاص، اشوفك بخير ياحبيبى.

تأملته بحنان حزين بينما اغمض عادل عينيه من الألم وهو يقف خارجا بجوار باب الحجرة يستمع الى كلماتها، يعلم انها تحبه ولكن يبدو ان حبها أضعف من أن تدافع عنه، هي أضعف من ان تظل وتجبره على مسامحتها، انه لا يريد عشقها ان كان ضعيفا هكذا، فالحياة مليئة بالصعاب، ان كانت ستظل معه ثم تتخلى عنه في كل مشكلة تقابلهم، اذا كانت ستجعله يواجه العذاب مجددا وحده، اذا فمن الأفضل أن يدعها الآن ترحل، نعم من الأفضل ان يفعل ذلك.

كاد ان يغادر مكانه متجها الى حجرته عندما استمع الى صوتها يقول بنبرة ملتاعة:
لأ، مش هقدر ابعد عنكم، مش هقدر اسيبكم، لو سيبتكم ابقى بحكم على نفسى بالموت، انتوا اغلى عندى من الدنيا دى كلها، انتوا اجمل ما في حياتى، وعشان تفضلوا فيها لازم أكون أقوى من كدة، لازم مبقاش ضعيفة.
ابتسم عادل وقد اغروقت عيناه بالدموع بينما تستطرد ياسمين قائلة في قوة:.

مش هتنازل عن حقى فيكم، ومش هسيبكم وأمشى، حتى لو عادل كرهنى وكره ضعفى، هفضل هنا وهوريه انى اتغيرت، هو حبنى قبل كدة وأكيد هقدر اخليه يرجع يحبنى تانى.
فتح عمر عينيه في تلك اللحظة وابتسم لها لتبتسم ياسمين من وسط دموعها وهي تقول في حنان:.

انت معايا ياعمر، مش كدة؟، هنرجع مع بعض اللى خسرناه، هنقاوم كره بابا عادل لية بكل قوتنا، مهما عمل فية هستحمل، حبى ليه وحبى ليك هيخلونى اقدر أستحمل، هيخلونى اقوى، أنا وانت هنرجع بابا لحياتنا بعد ما ضيعته بغبائى.
انتفضت ياسمين على صوت عادل وهو يقول بحنان:
انتى مخسرتنيش اصلا عشان ترجعينى،
التفتت اليه تنظر الى عيونه الدامعة لاتصدق كلماته، اقترب منها وهو يقول:.

وانا مكرهتكيش او بطلت أحبك عشان تخلينى احبك من جديد.
ليقف أمامها تماما يمسك بيدها يضعها على قلبه وهو ينظر الى عينيها قائلا:.

من اول لحظة شفتك فيها وانتى مكانك هنا في قلبى، مفارقتهوش ولا لحظة، حتى لما هربتى وحسيت انى بكرهك لإنى فكرت انى بالنسبة لك ولا حاجة، كنت من جوايا عارف انى بضحك على نفسى وانى مبطلتش احبك، ولما شفتك تانى، من نظراتك ورعشة ايديكى حسيت انك لسة بتحبينى ومن كلامك حسيت بسر مخبياه عني صممت اكشفه، كنت كل يوم بستناكى تيجى تصارحينى بس انتى فضلتى ساكتة، كنت بتعذب وانا جنبك، ذكرياتى معاكى كانت حية أدامى في كل مرة اشوفك فيها، ضعفت بس قويت قلبى.

ولما اعترفتيلى زعلت عشان ثقتك كانت فية معدومة وحبك كان أضعف من انك تواجهينى بس من جوايا سامحتك، سامحتك لانى عارف انه غصب عنك، دى طبيعتك، وقلت انك أدامى مسبتنيش من تانى، ومع الأيام هقويكى، بس مع الأسف، شفتك وانتى ماشية بشنطتك، مشيت وراكى ولما سمعتك بتكلمى عمر وبتقوليله انك هتهربى تانى، قلت مفيش فايدة، حبك لية لسة ضعيف، كنت خلاص فقدت الأمل فيكى وهسيبك تمشى وتخرجى من حياتى، لكن كلامك من شوية ادانى أمل، أمل في ان حبك لية قوى مش ضعيف زى ما كنت فاكر، ومع الأيام وانتى جنبى هخليكى تواجهى كل حاجة بتخافى منها ياياسمين.

ابتسمت ياسمين في عشق قائلة:
يعنى سامحتنى بجد ياعادل ولسة بتحبنى بعد كل اللى حصل بينا.
اومأ برأسه ايجابا في حنان لتقول هي في فرحة:
وهنبدأ مع بعض من جديد.
رفع يده يمسح دموعها قائلا في عشق:
هنبدأ مع بعض صفحة مفيهاش دموع، صفحة أساسها الحب والصراحة، اتفقنا؟

ابتسمت وهي تومئ برأسها في سعادة ليتناهى الى مسامعهم صوت طفلهم الضاحك نظرا اليه في حنان، ثم التقطته ياسمين تضمه بحنان وهي تقبل وجنته ليحيطهما عادل بين ذراعيه وهو يغمض عينيه لأول مرة منذ أن فارقته حبيبته بارتياح.