شعرت جورى بتوقف دقات قلبها لتعيد تلك الدقات الى الحياة ابتسامة حبيبها الحانية وهو يتقدم منها دون أن تحيد نظراته عنها وهو يقول: عايز أتكلم معاكى شوية لوحدنا ياجورى نظرت جورى اليه بتردد ثم ما لبثت ان حسمت أمرها لتأخذ نفسا عميقا ثم تمشى بجوار أيهم تتابعهم أربعة أعين حتى غابا عن النظر لتقول ألسنتهم فى وقت واحد: ربنا يسعدهم.
التفتت سوسن الى عادل تلاحظه لأول مرة بينما كان بدوره يتأمل ملامحها فى فضول أصابها بالخجل، ابتسم وهو يمد يده اليها قائلا: عادل صافحته برقة قائلة: سوسن نظر اليها متسائلا: ممكن نقعد؟ أومات برأسها ليجلسا وهو يقول بفضول: انتى صاحبة جورى من زمان؟
هزت رأسها نفيا قائلة: مش من زمان، اتعرفت عليها فى اول يوم جامعة، بس ارتحنا لبعض علطول وبقينا اكتر من الاخوات، جورى طيبة اوى وتستاهل كل خير قال عادل فى نفسه: انتى كمان باين عليكى طيبة وتستاهلى كل خير، لأ وحلوة اوى كمان، يابخته اللى هتكونى من نصيبه ليعقد حاجبيه وهو يفكر:.
ويابخته ليه، طب انا موجود أهو ولا يمكن مرتبطة، بتهيألى لأ، مفيش فى ايديها دبلة، بس مش شرط، ماهى واحدة بالحلاوة والرقة دى وباين عليها بنت ناس، معقولة مش هترتبط لغاية دلوقتى؟
طال الصمت وعادل غارق فى افكاره لتتنحنح سوسن قاطعة الصمت وهى تقول: وانت ياعادل صاحب أيهم من زمان؟ قال عادل فى مرح: من واحنا لسة فى اللفة ابتسمت فقال عادل فى نفسه: يالهوى على ابتسامتك، شكلى هحبك ياسوسن أحس بنفسه يقول دون وعى: هو انتى مرتبطة ياسوسن؟ ليتمنى فى نفسه: أبوس ايدك، قولى لأ.
لتبتسم هى بخجل قائلة: لأ اعتدل قائلا: طب احب اعرفك بنفسى، عادل فايز عندى 22سنة، وحدانى وبشتغل محاسب فى شركة الفيومى، نفسى اكمل نص دينى، ها، ايه رأيك؟ لم تستطع سوسن ان تمنع ضحكة خرجت منها ليقول عادل بمرح: كدة نقول الف مبروك عليكى.
قالت سوسن ضاحكة: حيلك حيلك، الف مبروك على ايه؟، هو سلق بيض، احنا لسة متعرفين من دقايق، انت أكيد مجنون نظر عادل الى عينيها مباشرة وهو يقول: لو قلتلك انى لغاية ساعة فاتت كنت أعقل حد ممكن تقابليه فى حياتك، بس من ساعة ما شفتك وانا حاسس بحاجات كتيرة مش قادر اوصفها، مش هقول حب بس هقول انى متخيل حياتى معاكى ومش شايفها مع حد غيرك ولا متخيل حياتك مع حد غيرى، وده حصلى اول عينى ماجت فى عنيكى، هتصدقينى؟
نظرت سوسن لعينيه بحيرة وهى تقول: هصدقك لأنى حاساك بتوصفنى بالظبط، ومش عارفة أسمى اللى احنا فيه ده ايه؟ ابتسم قائلا: سميه قدر، قدر جمعنا مع بعض وباذن الله ميفرقناش ابتسمت سوسن قائلة: ومتنساش جورى وأيهم اومأ برأسه قائلا: فعلا ربنا يحل مشاكلهم ويجمعهم تانى ببعض نظرت الى السماء قائلة: يااارب.
طرقت مايا الباب لتسمع صوت مهيب يسمح للطارق بالدخول، لتبتسم قائلة وهى تقف على الباب: خلصت الاجتماع؟ قال لها بهدوء: آه خلصت، تعالى ادخلى دخلت مايا الحجرة وهى تغلق الباب خلفها واقتربت منه قائلة: وحشتنى.
شعر بكلمتها تخترق كيانه وتستقر بقلبه ليقول دون ارادة منه: انتى وحشتينى أكتر اقتربت منه ومدت يدها تعقد له ربطة عنقه فى نعومة، أغمض عينيه ينعم بقربها ورقتها، يستنشق عبيرها الهادئ فى عشق، لقد أيقن أن لعنة العشق قد أصابته وأنه لن يستطيع التخلص منها، أفاق على صوتها الرقيق وهى تقول: طول عمرك مبتعرفش تربطها يامهيب قال بصوت متهدج النبرات من تأثره بها: وطول عمرك بتربطيهالى يامايا.
نظرت اليه بعشق قائلة: كنت كل مرة ببقى عايزة أصرخ وأقولك حس بية وخدنى فى حضنك، انا بحبك ومحتاجالك، بس كان لسانى بيقف عاجز أدامك وأنا حاسة انك مبتحبنيش ومش حاسس بية ضمها اليه يتنفس عطرها وهو يقول بالم: ياريتك قلتيلى على اللى فى قلبك يامايا، ياريتك فوقتينى من بدرى قبل، . وصمت لا يدرى كيف يخبرها لتشعر مايا بألمه الصامت فتخرج من محيط ذراعيه قائلة فى قلق: قبل ايه يامهيب؟
كاد ان ينطق ويريح قلبه من عذاب الكتمان ليقاطعه دخول ديالا المفاجئ ورؤيتهما بهذا القرب يبدوان وكأنهما خارجين للتو من عناق عاشق لتجز على أسنانها غيظا وهى تقول ببرود: انا جيت فى وقت مش مناسب ولا ايه؟ قالت مايا وقد شعرت بغصة فى قلبها وهى تتذكر ان مهيب مازال ملكا لأخرى: لا ابدا، اتفضلى يامدام ديالا، انا كنت ماشية، احنا تقريبا خلصنا شغلنا.
نظر اليها مهيب يشعر بها وبألمها، ولكن ليس بيده شيئا يخفف به ذلك الألم، انه القدر الذى يستمر باللعب به يبعده عن كل أحلامه التى رسمها معها، كادت مايا ان تغادر لولا ان استوقفها صوت ديالا يقول بسخرية: مش هتباركيلنا يامايا.
التفتت مايا الى ديالا فى حيرة لتنقل نظراتها الى مهيب الذى اخفض عينيه بألم لتعود بنظراتها الى ديالا وهى تشعر بالرعب من كلمات ديالا التالية، تشعر انها لن تعجبها على الاطلاق لتقول بهدوء: أباركلكم على ايه؟ أشارت ديالا الى بطنها قائلة: على البيبى، أصل انا، . حامل.
أحست مايا بالصدمة تضربها بعنف، ليشحب وجهها وهى تحس بالدوار ليقول مهيب بقلق وهو يتجه اليها بسرعة: مايا انتى كويسة؟ اشارت له بيدها وهى تنظر اليه بجمود ليتوقف فى مكانه، وهى تقول ببرود: انا كويسة، متقلقش يامستر مهيب شعر مهيب فى تلك اللحظة انه لأول مرة يخسر مايا للأبد، لتلتفت هى الى ديالا قائلة بصوت خال من المشاعر: مبروك، عن اذنكم.
وخرجت من الغرفة بثبات، لتمشى بسرعة حتى خرجت من الشركة وهى تشعر بالاختناق، احست أنها لن تستطيع القيادة لتسرع بمشيتها، تتخبط فى الكثيرين دون وعى منها، تنزل دموعها بغزارة، حتى وصلت الى باب شقتها لتطرق الباب بقوة، فتحت لها علية الباب لتفاجئ بمظهرها المنهار لتقول فى قلق: مالك يامايا؟حصل ايه؟ لم تقوى مايا على التحمل اكثر لتسقط بين يدى والدتها فاقدة الوعى.
ما ان غادرت مايا حجرة المكتب حتى التفت مهيب الى ديالا قائلا فى صرامة: كان قصدك ايه م اللى قولتيه دلوقتى؟ قالت ديالا ببرود: هيكون قصدى ايه يامهيب؟مش مايا بنت عمتك، قلت افرحها معانا بالخبر الحلو ده قبض مهيب على ذراعها بقوة قائلا: ومن امتى بتحبى مايا وعايزة تفرحيها، ها، انتى كنتى قاصدة تجرحيها بكل كلمة قولتيها؟
نزعت ذراعها من يده بغل قائلة: آه مبحبهاش، وآه كنت قاصدة اقولها عشان أحرق دمها ولا انت فاكر انى مش عارفة انها بتحبك نظر اليها بصدمة لتستطرد قائلة: تعرف لولا انى عارفة انك مش بتفكر فيها بالطريقة دى انا كنت وريتها الجربوعة دى، خطافة الرجالة أفاق مهيب من صدمته وهو يدرك ان كل من حوله شعروا بحب مايا له الا هو، ليقول بصرامة:.
لآخر مرة هسمحلك تتكلمى عن مايا بالشكل ده وخليكى فى حالك أحسنلك ياديالا، والا هتشوفى منى وش عمرك فى حياتك ما شفتيه، فاهمة ولا لأ؟
زاد الحقد فى قلب ديالا تجاه مايا التى تسلب عقل الرجال من حولها لتنتفض على صوت مهيب يقول بحدة: فاهمة ولا لأ؟ اومات براسها ايجابا ليزفر مهيب قائلا: كنتى جاية عايزة ايه؟ تلونت ديالا مثل الحرباء لتبتسم قائلة: كنت عايزة فلوس قال بجمود: ليه؟
قالت بدلال: عايزة اشترى هدوم وشوية لوازم يامهيب، عشان هدومى ضاقت بسبب البيبى قال بسخرية: انتى لسة فى الشهر الأول ياديالا، هدوم ايه اللى لحقت تضيق عليكى قالت ديالا بضيق: المهم انها ضاقت وخلاص وعايزة غيرها، وبعدين انت بقالك فترة بتدقق معايا فى الفلوس، انت مكنتش كدة ايه اللى غيرك؟ نظر اليها مهيب ولسان حاله يقول: عينية فتحت ياديالا، وشفتك على حقيقتك.
ليغمض عينيه يخفى مشاعره النافرة و الواضحة على وجهه ثم يفتحهما وهو يخرج بطاقة الائتمان الخاصة به من جيبه ويمنحها اياها قائلا: اتفضلى ياستى، آدى الفلوس اللى انتى عايزاها أخذتها منه بسعادة وهى تقبله على وجنته وتسرع بالمغادرة ليهز راسه فى مرارة قائلا: انا ازاى كنت اعمى بالشكل ده، ازاى؟
نظر أيهم الى جورى بثبات لا يشعر به بداخله وهو يرى عيونها الحزينة، يود لو يأخذ حزنها ويلقيه بعيدا، يعلم انه السبب به، ولكن ما بيده حيلة، فوالده سد الطريق بوجهه وداس عل قلبه بقوة، تنهد وهو يقول: قبل ما أقول أى كلمة، احب أفكرك بوعدك لية نظرت اليه بحيرة ليمسك يدها قائلا:.
يوم ما مسكتى ايدى، قلتلك قبلها انك لو مسكتيها يبقى بتوعدينى انك هتفضلى معايا لآخر يوم فى عمرى، وده كان اول وعد نوعده لبعض ومش مستعد حد فينا يخلف بالوعد ده ياجورى.
نزعت جورى يدها من يده وقد امتلأت عينيها بالدموع قائلة: بس ما اتفقناش ان ماما تتهان كرامتها بسبب الوعد ده ياأيهم، اذا كانت سعادتى هتيجى على حساب أمى، فآسفة مضطرة أخلف وعدى قال فى صدمة: يعنى هتتخلى عن حبنا بالسهولة دى، هتقدرى ببساطة كدة تبعدى عنى؟ قالت فى مرارة:.
مين قالك انها بالبساطة دى، ربنا اللى عالم أنا بموت ازاى من جوايا، كل ما أفكر انى هبعد عنك، بحس ان روحى بتتسحب منى، بس غصب عنى مش هقدر اكون معاك وامى بتتهان وتنكسر لتانى مرة بسببى أمسك وجهها بين يديه قائلا فى لوعة: يبقى مفيش أدامنا غير انى آخدك انتى ووالدتك ونسافر، انا مستعد أبعد عن الناس كلها بس أكون معاكى.
قالت فى حزن: مش هينفع، مش هتقدر تبعد عن أهلك وانت روحك فيهم، مش هقدر اكون السبب فى ده، انا عشان بحبك مستحيل أرضى بالحل ده ترك أيهم وجهها ليمرر يده بشعره بمرارة قائلا: بس أنا كدة هموت، انا مش هقدر أتخلى عنك، حبك بقى بيجرى فى دمى وعذابى بقى بعدك ياجورى نزلت دموعها وهى تقول: حتى لو اتعذبنا، هييجى يوم وننسى، محدش فينا هيقدر يتخلى عن أهله ياأيهم حتى لو قلنا العكس قال فى حزن: ده آخر كلام عندك؟
أومأت برأسها قائلة فى مرارة: انسانى ياايهم واتجوز بنت عمتك، يمكن تقدر تحبها وتعوضك عنى ابتسم بمرارة قائلا: لو مكنتش ليكى مش هبقى لغيرك ياملاكى وفجأة ابتعد عنها مسرعا وكأنه يخشى أن يضعف لتصاب جورى بالقلق عليه لتذهب مسرعة الى سوسن وترى عادل جالسا بجوارها لتقول بسرعة: انت صاحب أيهم؟
اومأ برأسه وقد قلق من ملامحها الشاحبة لتقول هى بسرعة: من فضلك روح وراه بسرعة، أصله مشى وهو متعصب وخايفة عليه من السواقة وهو فى الحالة دى.
اومأ برأسه ايجابا وهو يسرع خلف أيهم الذى انطلق بسيارته بسرعة جنونية ليركب عادل تاكسيا ويأمره بأن يمشى وراء تلك السيارة المسرعة وقلبه يدق قلقا، فى حين كان أيهم يقود شاردا بكلمات جورى التى أصابته باليأس ليزيد السرعة دون وعى منه، ليشعر فجأة بضربة قوية، ويحس بالم شديد فى جسده وصراخ المارة من حوله، ليكون آخر ما سمعه هو صراخ عادل باسمه قبل أن يسقط فاقدا الوعى.
أسرع كل من راجى ووجد وأدهم داخل طرقات المستشفى حتى وصلوا الى غرفة العمليات حيث وجدوا عادل هناك يقف فى توتر ليسرعوا اليه ووجد تقول فى لهفة: طمنى ياعادل، ابنى عامل ايه؟ قال عادل بسرعة: اطمنى ياطنط، الممرضة لسة خارجة من شوية وطمنتنى، وقالتلى مفيش نزيف داخلى، رجله اليمين بس انكسرت، ودلوقتى بيجبسوهاله جوة، كويس اوى انها جت على أد كدة، انتى لو كنتى شفتى الحادثة او منظر العربية، .
ليصمت وهو يرى شحوب وجه وجد واشارة أدهم له بالصمت، ليستطرد قائلا: عموما الحمد لله انه بخير رددت وجد قائلة: الحمد لله، الحمد لله.
احست وجد بالدوار وكادت أن تقع لولا ان أسرع راجى باسنادها لتستند اليه بضعف ليحمد الله فى سره على نجاة ولده من موت محقق، ليقول أدهم بحيرة: وايه اللى يخلى أيهم يسوق بالسرعة دى، ده عمره ما عملها؟ قال عادل بتردد: احنا، كنا، عند الآنسة جورى فى الجامعة، والظاهر زعلوا مع بعض، وهو سابها وجرى زى المجنون، انا، انا خايف يكون كان قاصد يعمل كدة فى نفسه.
شهقت وجد وهى تضع يدها عل فمها ليرفع أدهم عينيه الى السماء فى يأس من غباء عادل ليتجنب عادل النظر اليه فى خجل من تسرعه فى الكلام، ونظرت وجد الى راجى بعينين لائمتين مغروقتين بالدموع ليخفض هو عينيه لا يتحمل تلك النظرات وهو يلعن نفسه لما سببه لهم من حزن وألم من أجل لا شئ، انها فقط بعض الاعتبارات البالية، أفاق من أفكاره على صوت خروج الطبيب من حجرة العمليات ليسرعوا جميعا اليه، ليبتسم قائلا:.
حمد الله على سلامة المريض، ربنا نجاه من موت أكيد.
قالت وجد فى الم: أخباره ايه يادكتور؟ قال الطبيب: الحمد لله، كل شئ تمام، بس مين هى جورى؟ نظروا الى بعضهم البعض ليقول أدهم: بتسأل ليه يادكتور؟
قال الطبيب: المريض قبل ما يفوق من الحادثة مبطلش ينادى باسمها قال أدهم فى تردد: دى، دى تبقى خطيبته، هى أكيد فى الطريق ابتسم الطبيب قائلا: كويس أوى لأنه أكيد هيحب يشوفها فى حالته دى، وده برضه مفيد لحالته النفسية اللى ملاحظ انها سيئة شوية قال أدهم بامتنان: شكرا يادكتور، تعبناك معانا.
قال الطبيب: العفو، ده واجبى ليغادر الطبيب وتقول وجد فى حزن: ياحبيبى ياابنى أد كدة بتحبها.
ثم نظرت الى راجى بعتاب قائلة: وانت، انت كسرت قلبه ياراجى، أيهم كان هيضيع مننا ياراجى، اتبسط كدة؟ارتحت وحافظت على مركز العيلة ربت راجى على يدها قائلا: اهدى ياوجد، مش وقته الكﻻم ده.
لتنظر اليه وجد بغضب وكادت ان تتكلم ليضع اصبعه على شفتيها قائلا: أنا اللى هروح أجيبها بنفسى، وانا اللى هعتذر لنوال لأنى انا اللى غلط فى حقها مش انتى.
نظرت اليه وجد لاتصدق أذنيها، لتبتسم فى سعادة قائلة: بجد ياراجى؟ ربت راجى على وجنتها قائلا بحنان: انا مليش فى الدنيا غيركم، ولو اتصرفت أى تصرف غلط فأكيد مبيبقاش قصدى أجرحكم، بيبقى كل همى مصلحتكم، والغلط لازم يتصلح ياوجد.
ربتت وجد على يده الموضوعة على خدها بحنان قائلة: انا كنت متأكدة انك هتعمل الصح ياراجى، ربنا يخليك لينا يارب.
قال أدهم بمرح غريب عليه ولكنه هكذا منذ أن عرف الحب: راعوا مشاعرنا ياجدعان، احنا سناجل على فكرة وكدة مش حلو علشانا ابتسم كل من عادل و راجى و وجد ليقول راجى: طب ادامى ياسنجل، وصلنى لبيت نوال، أجيب عروسة أخوك، عقبال ما اشوف لك انت كمان عروسة واخلص منكم بقى.
قال ادهم: لا انا خلاص لقيت عروستى، محدش ليه دعوة بية قال راجى فى دهشة: طب أدامى ياأخويا اما نشوف موضوعك انت كمان ثم نظر الى وجد قائلا وهو يهز رأسه بيأس: ولو انى تقريبا عارفه، مفيش فايدة، ولادى وحبوا هعمل ايه أنا؟
لتبتسم وجد ويغادر كل من راجى وأدهم ليقول عادل بسعادة: أيهم هيطير من الفرحة لما يشوفها ويعرف ان باباه وافق على جوازهم ابتسمت وجد قائلة: الحمد لله، عقبالك ياابنى ابتسم عادل قائلا: قريب ياطنط، قريب اوى.
استيقظت مايا على صوت والدتها تنادى عليها من مكان بعيد، فتحت عينيها ببطئ لتواجهها عينا والدتها القلقتين لتعقد حاجبيها وهى تقول بتعب: أنا فين؟
قالت علية بلهفة: انتى فى بيتك وفى اوضتك ياحبيبتى، كدة يابنتى تخضينى عليكى، الدكتور قال ضغطك واطى اوى أغمضت مايا عينيها وهى تتذكر الأحداث الماضية، لتنزل دموعها فى صمت، قالت امها فى خوف: مالك بس ياحبيبتى، طمنينى عليكى.
قالت مايا فى الم: ديالا حامل ياماما قالت علية فى صدمة: هو انتى لسة بتحبى مهيب يامايا وباقية عليه؟ قالت مايا فى مرارة: وانا امتى بطلت أحبه ياماما؟مهيب هيفضل حبى الاول والاخير.
قالت علية فى غضب: آه مبحبوش، ولا هو كمان بيطيقنى، من يوم ما فضل عليكى حتة بت متسواش وكسرك وخلاكى تنهارى، وهو خلاص مبقاش ابن اخويا ولا عايزة أعرفه وهو كمان طول عمره وانا كلمتى واقفاله فى الزور، لكن أيهم ده بقى آخر العنقود أبو لسان بينقط عسل، واللى الكل بيتمنوله الرضا، ولا وراه عيال زى أدهم ولا هيجيب عيال زى مهيب، يعنى هيكون ليكى انتى وبس.
قالت مايا فى عصبية: قلتلك مستحيل أتجوزه، مستحيل، آاااه شحب وجه مايا بشدة وهى تشعر بالدوار لتقول علية بقلق: خلاص اهدى بس ونبقى نتكلم بعدين.
أخذت مايا نفسا عميقا، ثم قالت بهدوء: أنا هسافر قالت علية بدهشة: هتسافرى فين؟ قالت مايا بتصميم: المنصورة، عند اعمامى، هقعد يومين أريح فيهم أعصابى.
ارتاحت علية لذلك القرار التى اتخذته ابنتها، فمن جهة تبتعد مايا قليلا عن مهيب وربما تنساه، ومن جهة أخرى تستطيع هى ان تقضى وقتا أطول مع صديق بل وتبيت معه أيضا لتقول بهدوء: ماشى يامايا، سافرى ياحبيبتى، بس هما يومين تلاتة مش اكتر وترجعى علطول نظرت اليها مايا قائلة بحزن: ربنا يسهل ياماما، ربنا يسهل.
لم تستطع جورى أن تسمع كلمة أخرى لتسقط مغشيا عليها على الفور، لتصرخ نوال باسمها ويسرع راجى بحملها وتمديدها على الأريكة قائلا لنوال: ازازة برفان بسرعة.
لتسرع نوال باحضار العطر وتمنحه لراجى الذى وضع بعضا منه على يده ومرره على أنف جورى لتفيق جورى على الفور وترى راجى، تتذكر كلماته الأخيرة لتترقرق عيناها بالدموع وهى تقول ممسكة يده بتوسل: أبوس ايدك طمنى، قولى انه بخير، قولى ان محصلوش حاجة ابتسم راجى بحنان قائلا: بخير يابنتى والله، رجله بس اليمين انكسرت.
شهقت ليقول بسرعة: الحمد لله يابنتى، دى كانت حادثة موت اغمضت جورى عينيها بارتياح قائلة: الحمد لله.
ثم فتحت عينيها ناظرة الى أمها بتردد لتقول: هو أنا ممكن، . أومأت أمها برأسها بحنان وهى تفهم نظرتها المتسائلة لتلتفت الى راجى مستطردة وهى تتلعثم: يعنى لو ينفع، .
صمتت وهى تخفض عينيها لا تستطيع اكمال جملتها ليبتسم راجى قائلا: هو ممكن، بس ده بعد اذن والدتك طبعا شعت الفرحة فى عينيها لتتسع ابتسامة راجى ويتآكل قلبه من الندم وهو يدرك كيف كان سيهدم حب كبير مثل هذا ليقول موجها الحديث لنوال: الحقيقة انا كنت لسة هطلب منك ياست نوال ان جورى تيجى معايا تشوف أيهم، أيهم مبطلش يقول اسمها لغاية ما فوقوه أومات نوال برأسها بطيبة ليقول راجى:.
انتى لازم تعرفى انى باخد خطيبة ابنى تشوف خطيبها، يعنى بطلبها دلوقتى منك رسمى، أنا بعترف انى غلطت غلطة كبيرة لما عارضت ارتباطهم، كان لازم انا بالذات أشوف الحب فى عيونهم وأعرف انهم بجد بيحبوا بعض ومتمسكين ببعض، زى ما حبيت وجد واتمسكت بيها بس الغلط يصلح وعشان كدة بتمنى من كل قلبى توافقى على أيهم عريس لبنتك وتأكدى ان احنا كلنا هنشيلها فوق راسنا.
ترقرقت الدموع بعينى نوال لتومئ برأسها فى سعادة وقد أعجزتها الفرحة عن أن تنطق بكلمة، لتقترب من ابنتها وتقول بصوت مخنوق من عبرات الفرحة: ألف مبروك يابنتى ضمتها جورى بسعادة وهى تشاركها دموعها قائلة: الله يبارك فيكى ياماما ابتعدت عنها نوال قائلة: يلا ادخلى اغسلى وشك وامسحى دموعك وروحى مع حماكى شوفى خطيبك ياضنايا.
ابتسمت جورى وأسرعت لتنفيذ ما طلبته منها والدتها وهى لا تصدق انها سترى حبيبها سليما معافى، و ان ارتباطها بأيهم قد تم، . و قصة حبهما ستكتمل بالزواج وبتلك البساطة.
فتح أيهم عينيه ليجد حوله أدهم وعادل ووالدته وجد، ليقول أدهم مبتسما: حمد الله ع السلامة ياأيهم، الحمد لله انها جت على أد كسر بسيط فى رجلك ازدرد أيهم ريقه قائلا بتعب: الله يسلمك ياأدهم، الحمد لله على كل حال جلست وجد بجواره وربتت على يده بحنان قائلة: خضتنا عليك ياحبيبى.
ربت على يدها قائلا: انا بخير ياماما متقلقيش قال عادل فى مرح: حمد الله على سلامتك ياأيهوم نظر اليه أيهم شذرا قائلا: أيهوم فى عينك، اتلم يااض.
ضحك الجميع، نظر أيهم باتجاه الباب، لتقول وجد بحنان: مستنى حد ياأيهم؟ قال أيهم بحزن: مجاش معاكم، لسة زعلان منى صح؟
ابتسموا فى حين قالت وجد: لا ياحبيبى جه بس راح يجيبلك مفاجأة عقد أيهم حاجبيه بحيرة قائلا: مفاجأة؟
سمعوا طرقات على الباب ودخول راجى مبتسما وهو يقف على الباب قائلا: ممكن أدخل؟ نظر أيهم اليه باشتياق ليبادله والده النظرات ويقطع تشابك نظراتهم صوت وجد تقول بحنان: أكيد ممكن، اتفضل ياراجى.
دخل راجى ووقف أمام سرير أيهم تماما ليقول بحنان: حمد الله على سلامتك ياابنى ترقرقت الدموع بعينى أيهم وهو يقول: الله يسلمك يابابا.
قال راجى: معايا برة خطيبتك، عايزة تشوفك وتطمن عليك.
عقد أيهم حاجبيه ظنا منه أن أباه يقصد مايا وقبل أن يتفوه بكلمة معارضة، رأى جورى تدلف الى الحجرة لتظهر على ملامحه الدهشة، تأمل ملامحها بشوق وجرت عيناها عليه تتفحصه سريعا بلهفة، تريد الاطمئنان عليه، همس باسمها لا يزال غير مصدقا أنها هنا، يراها وتراه، اقتربت منه، عينيهما متشابكتان فى عشق، ليشير راجى للجميع بالخروج ليخرجوا مبتسمين، جلست جورى بجوار أيهم وأمسكت يده قائلة بحب: حمد الله على سلامتك.
نظر الى يده التى تسكن فى حضن يدها ثم نظر الى عينيها مجددا وهو يقول: قوليلى انى مبحلمش وان انتى هنا وايدى لامسة ايدك رفعت يده الى شفتيها تقبلها برقة وتضعها على وجنتها قائلة بعشق أذابه: أنا هنا جنبك وهفضل جنبك لآخر يوم فى عمرى.
ظهر فى عينيه العشق وهو يقول: بحبك أوى ياجورى، والله بعشقك ابتسمت جورى قائلة: نفس احساسى ياقلب جورى، بعشقك.
ابتسم بحنان ثم ما لبث أن تذكر شيئا ليقول فى حيرة: استنى كدة، بابا قالى خطيبتك عايزة تشوفك لتتسع عينيه قائلا فى فرحة: بابا خطبك لية، صح؟عشان خاطرى قولى ان ده اللى حصل.
قفز من السعادة متناسيا قدمه المكسورة ليأن فى ألم فتسرع اليه جورى فى قلق تمدده مرة أخرى وهى تقول فى لهفة: انت كويس؟
اغمض عينيه للحظة ليفتحهما مجددا وهو يقول: انا بخير ياحبيبتى، الفرحة بس نستنى نفسى ابتسمت فى حنان ليقول أيهم ببراءة مصطنعة: يعنى بما انك خطيبتى دلوقتى ما تقربى شوية.
نظرت اليه شذرا قائلة: أيهم، اتلم رفع حاجبه الأيسر قائلا: وانا قلت ايه يعنى، انتى اللى دماغك شمال على فكرة، آل وانا فاكرك مؤدبة قالت جورى بحزم: أيهم!
قال ايهم بغيظ: خلاص خلاص، على فكرة انتى الخسرانة، ده انا كنت هقولك كلمتين سر بس ايه مقولكيش قال جورى فى يأس: لا، أنا هناديلك أهلك، انت حالتك ميئوس منها قال لها بسرعة: استنى بس، خلاص هقعد مؤدب، ياجووورى.
اعطته ظهرها تفتح الباب لتبتسم قائلة فى همس: مجنون بس بعشقك.
قال راجى بحيرة: والله ما انا عارف هواجه اختى ازاى ولا أقولها ايه ياوجد؟ اقتربت منه وجد تضع يدها على يده بحنان قائلة: قولها كل شئ قسمة ونصيب ياراجى، وابنك خلاص اختار نصيبه.
تنهد راجى قائلا: فعلا كل شئ قسمة ونصيب ومفيش حاجة بايدينا، ده قدر، بس انتى عارفة اختى علية، هتقوم الدنيا.
ثم تنهد مستطردا: انا كان نفسى فى مايا لحد من ولادى ياوجد، لكن أهو النصيب بقى، هنعمل ايه؟، أدهم واختار يتجوز كارمن، وايهم اختار يتجوز جورى، وخلاص مايا مبقالهاش نصيب مع ولادى.
تنهدت وجد قائلة: انا كمان كان نفسى فيها، بس مش لأدهم ولا لأيهم.
عقد راجى حاجبيه قائلا: أومال لمين؟ ترددت قائلة: ل، لمهيب.
قال راجى باستنكار: مهيب متجوز ياوجد.
قالت وجد بحزن: بس مايا محبتش غيره، و الكلام ده من زمان اوى ياراجى، للأسف مختارتش من ولادك غيره، وهو كمان محبش غيرها بس مكنش حاسس بحبه، ولو انى ملاحظة فى الفترة الأخيرة انه بدأ يفهم مشاعره، بس بعد ايه بقى.
فكر راجى بكلماتها، ربما وجد على حق، فقد تغيب عنه اشياء كثيرة، أما حبيبته وجد فلا يغيب عنها شيئا، خاصة مشاعر الحب، تلتقطها فى العيون، وتدركها على الفور، ليقول بأسى: لو مكنش فيها خراب بيوت، كنت طلقت ديالا منه وجوزتله مايا، بس أنا مقدرش اخرب بيت حد بايدى، ما بالك ببيت حد من ولادى، ولو كانت اختى او مايا يقبلوا، والله كنت جوزتهالوا وتعيش معاه كزوجة تانية، بس مستحيل حد فيهم هيقبل بالوضع ده.
تنهدت وجد قائلة: سيب كل حاجة للأيام، كل واحد هياخد قسمته ونصيبه، ادعيلهم انت بس وربنا هيقدرلهم اللى فيه الخير قال راجى فى امل: يارب يا وجد، يااارب يسعدهم مع حبايبهم زى ما ربنا فرحنى معاكى.
كان راجى يجلس مع وجد ومعه أولاده أدهم ومهيب و اخته علية ليلقى اليها خبر خطبة أيهم وزواج أدهم، قالت علية بصدمة: خطبت لأيهم جورى ياراجى، سبت بنتى مايا بنت الحسب والنسب وخطبت لابنك بنت نوال ياأخويا؟
انتبه مهيب على ذكر مايا لتعتصر قلبه قبضة قوية، يتساءل فى مرارة، هل كان من المفترض أن يرتبط أيهم بمايا؟ياالله، أخاه الذى يحبه يتزوج حبيبته، انه العذاب فى حد ذاته، حمد الله فى سره لارتباط أخيه بأخرى والا كان الموت أهون له، ليفيق من شروده على صوت والده يقول: اهدى ياعلية وافهمينى، كل شئ قسمة ونصيب، وابنى نصيبه جه كدة، وربنا يكتب الخير لمايا ونصيبها يبقى احسن باذن الله.
احس مهيب بالاختناق، كاد ان يتحدث، ان يرفض كلام أبيه، ان يرفض كل ما يشير الى ان مايا ستصبح فى يوم من الأيام ملكا لرجل آخر، ولكن بأى حق سيرفض، بأى حق؟ربت ادهم على يد مهيب وهو يشعر بصراعه والمه البادى على وجهه، لينظر اليه مهيب ليرى تعاطفه ويدرك ان مشاعره باتت واضحة ليخفض بصره فى مرارة، قالت علية بجمود:.
انت شايف كدة ياراجى؟عموما انا بنتى جوهرة واكيد هتلاقى اللى هيقدرها، بنتى الف من يتمناها وطالبها بس انا قلت ابن خالها اولى بيها.
نظر مهيب الى عمته يود ان يصرخ بها قائلا: كفى، كفى ترديدا لكلمات تذبحنى، ولكن نظرة ادهم الحازمة أخبرته ان يصمت ليشيح بوجهه فى ضيق، قال راجى بارتباك ليغير الموضوع: صحيح ياعلية، مايا فين، مجتش معاكى ليه؟
نظر مهيب بلهفة مرة أخرى الى عمته ينتظر اجابتها، فقد كان يود لو سالها هذا السؤال بنفسه فمايا لم تأتى للشركة منذ ذلك اليوم المشئوم ولا ترد على اتصالاته أيضا، لتنظر اليه علية شذرا، ثم تنظر لأخيها قائلة: البنت تعبت اوى من يومين، ولما جبتلها الدكتور قالى لازم تغير جو.
وصمتت للحظة تتأمل شحوب وجه مهيب عندما علم بمرض مايا، لتستطرد قائلة بتشفى: سفرتها عند اعمامها فى المنصورة تقضى هناك يومين تريح فيهم أعصابها وتبعد شوية عن الشغل.
هنا لم يستطيع مهيب أن يلتزم الصمت ليقول بغيرة واندفاع: ازاى تسيبيها تروح عند اعمامها لوحدها، هو سعيد ابن عمها مش كان طالبها للجواز نظر اليه الجميع ليدرك تسرعه باظهار مشاعره ليقول بارتباك: بتهيألى الوضع كدة غلط، ولا ايه يابابا؟
نظر اليه راجى يشعر بوجعه ليقول بهدوء حزين: كدة ياابنى، مايا لازم ترجع ياعلية رفعت علية حاجبها بتحدى قائلة: سعيد اتجوز ياراجى، وبنتى فى أمان عند اعمامها، ومقدرش أرجعها قبل ما تريح أعصابها ولا عايزنى اخسرها ياأخويا.
لتلتفت الى أخيها الذى قال: اكيد بحبها زى ولادى بالظبط، ربنا يطمنا عليها وألف سلامة على مايا ياعلية نهضت وهى تأخذ حقيبتها قائلة ببرود: الله يسلمك، أنا ماشية بقى عشان عندى مشوار ثم استطردت بسخرية قائلة: مبروك عليك جواز ولادك ياأخويا.
تجاهل راجى نبراتها الساخرة قائلا: الله يبارك فيكى ياعلية غادرت بخطوات سريعة ليقول راجى بحزن: ربنا يستر، مش مطمن لكلامها ولا نظراتها، حاسس انها ناوية على حاجة قال ادهم بثبات: هتعمل ايه يعنى يابابا؟
هز راجى كتفيه قائلا: مش عارف، ربنا يلطف قال مهيب بالم: تفتكر هتجوز مايا حد من اللى متقدمينلها يابابا؟
اقترب راجى من مهيب ليربت على كتفه قائلا بحزن: انساها ياابنى، ومتخربش على نفسك، انت جايلك طفل فى السكة ولازم يتربى بين أمه وابوه نظر مهيب الى والده بصدمة، هل ادرك والده مشاعره هو الآخر، بالطبع نعم، فالعشق يظهر مهما حاولنا اخفاؤه، ليخفض عينيه بانكسار قائلا: معاك حق يابابا، عن اذنكم.
غادر مهيب تتبعه الأعين، حزينة عليه، ليقول ادهم: مهيب صعبان علية، كانت مايا علطول ادامه بتعشقه وهو مش حاسس بيها ولا حاسس بحبه ليها هو كمان ويوم ما حس وقف القدر ما بينهم.
تنهد راجى قائلا: العشق نعمة بتسعد صاحبها بس فى حالة اخوك لعنة لانه مش هيقدر يتخطاها ولا يواجهها، ولا هيقدر يفرح بعشقه.
ثم نظر الى أدهم قائلا: ياترى العشق فى حياتك انت كمان ياادهم هيبقى نعمة ولا لعنة؟ قال أدهم بارتباك: عشق ايه يابابا، انا، انا بتجوز كارمن بس عشان خاطر الاولاد، وانت عارف الكلام ده كويس رفع راجى حاجبيه فنظر أدهم الى ساعته ليقول متهربا من نظرات والده: بالمناسبة انا اتأخرت علي أولادى اوى ولازم أروحلهم عشان احكيلهم حدوتة قبل النوم، عن اذنكم.
غادرهم ادهم لينظر راجى الى وجد مبتسما وهو يقول: من اول مرة شوفته فيها مع كارمن وانا متأكد انه بيحبها، بس اللى شفته فى عينيه من يومين وهو واقف من بعيد يراقبها وهى بتلعب مع ولاده، كان عشق ياوجد، عشق.
اقتربت منه وجد لتمسك وجهه بين يديها قائلة: مهما حاولوا يخبوا عشقهم هيبان عليهم زى مابان علينا ياراجى.
اقترب من وجهها ليضمه بين يديه وهو يقول امام شفتيها بهمس: بحبك ياوجد، بحبك ياعشقى.
ليقبلها قبلة رقيقة، عبرت عن مشاعر عشق ولد منذ سنوات وزادت نبضاته مع كل لحظة مرت عليهم وسيظل قويا رائعا مهما تمر عليهم من سنوات.
مايا، قاعدة لوحدك ليه ياقمراية؟ نظرت مايا إلى هدى ابنة عمها والتى رغم سنها الصغير إلا أن مايا تعتبرها رفيقتها الروحية، نفس العقل، نفس القلب، ونفس النظارة الطبية ذات الاطار الأسود والتى تمنحهم تميزا ملحوظا، تنهدت مايا قائلة: بفكر شوية ياهدهد، تعالى ياحبيبتى اقعدى جنبى.
قالت مايا بحزن: مش عارفة أنساه، غصب عنى مش قادرة، ده حب الطفولة، حب العمر كله، مستحيل هقدر أنساه، مهما حاولت أومات هدى برأسها قائلة: للأسف حاسة بيكى، لأنى بردو بحب هانى ابن خالتى من صغرى ومستحيل أتخيل فى يوم انى أقدر أنساه أو أبعد عنه.
ابتسمت مايا فى حزن قائلة: فيه فرق كبير بينى وبينك ياحبيبتى، فى حالتى، انا حبيت وهو محسش بية وضاع منى خلاص، لكن انتى حبيتى وهانى كمان حبك وخلاص هانت ويخلص جامعته ويخطبك من عمى، وبإذن الله متفرقش بينكم اى حاجة و أحضر فرحكم قريب ياارب.
ابتسمت مايا وهى تمد يدها إليها تحاول ان تتفاعل معها ومع مرحها وحماسها لتنسى ألمها ولو لساعات قليلة.
قالت علية فى حقد: هموت ياصديق، كل ثروة أخويا دى هتروح لشوية خدامين، وبنتى، بنتى هتطلع من المولد بلا حمص.
قال صديق وهو يقترب منها ليأخذها فى أحضانه: طب اهدى بس ياعلية، اهدى وخلينا نفكر.
ابتعدت عنه وهى تقول فى مرارة: أهدى ايه بس، بقولك اخويا هيجوز ولاده لشوية خدامين، أخويا ساب بنتى، بنت الأصول وراح يجوز ولاده لشوية بنات لا ليهم أصل ولا فصل، لتانى مرة أخويا بيكسرنى، ده انا لسة مسامحتوش عشان فرق ما بينا زمان، ييجى دلوقتى ويذلنى ويفضل على بنتى، بنت نوال الدادة، وبنت الملاجئ، كسر ضهرى بقولك.
قال صديق: قلتلك اهدى واحنا هنتصرف، الأمور متتاخدش بالعصبية دى، كدة مش هنعرف نفكر صح زفرت علية قائلة: مش قادرة ياصديق، هتجنن.
قال صديق: اسمعينى كويس، سيبيهم يفرحوا، سيبيهم يفتكروا انهم فازو وعاشوا بسعادة، وخلينا احنا نخططلهم ونضربهم ضربة تقضى عليهم، وبكدة نتتقم من راجى على كل حاجة عملها فينا زمان ودلوقتى اقتربت منه قائلة بلهفة: بجد ياصديق، هتبرد نارى منه ومن اولاده.
ابتسم وهو يشدها من خصرها قائلا: وحياة علية هتشوفيهم بيقعوا واحد ورا التانى، وهبرد نارك وآخد بتارى من راجى، بس بقولك ايه ما تيجى تبردى نارى أنا الأول وأهو بالمرة أظبطلك ضغطك اللى على ده لم تستطع علية كتمان ضحكتها لتطلقها مجلجلة ليقول صديق بخبث: إلعب ازدادت ضحكاتها ليضمها اليه وفى عينيه ظهرت نظرة ساخرة لو رأتها علية لأدركت أنها أخطأت فى حق نفسها خطأ فادحا، وأنها ستدفع ثمن ذلك الخطأ غاليا، غاليا جدا.
تحميل محتوى الموضوع
عرض نسخة صالحة للطباعة
أرسل هذا الموضوع إلى صديق
[13]
الدعوات : 2قوة السمعة : 10
رواية لعنة العشق