رواية زواج مع سبق الإصرار

رواية زواج مع سبق الإصرار للكاتبة سلمى المصري

الفصل الثاني

ورده بابتسامه: صباح الخير يا لبني
لبنى وهى تقبل يد أمها: صباح الفل والياسمين على احلى ماما فى الدنيا
وردة بحب: ربنا مايحرمني منك انتي واخوكي
لبنى بابتسامه: ولايحرمنا منك ابدا ياست الحبايب
جلست لبنى إلى منضدة الطعام لتناول فطورها
وردة بحذر: عرفتي طريق المدرسه يالولو
أومات لبنى برأسها: اه بس أول مره أروح مدرسة بعد الظهر
وردة بتفهم: علشان دي مدرسه مشتركة بيبقى فيها فترتين أكيد التيرم الجاي هتبقى فترة صباحية
لبنى وهي تلوك الطعام بفمها: لا بعد الظهر احلى طبعا
وردة بااستنكار: والله مااعرف ليه نقلكم من المدرسة التانيه كنت قريبة مننا كان لازم توضيب المباني والتعب ده
وبعد أن انتهت من فطورها قبلت امها وذهبت إلى صديقتها وصديقة طفولتها لينا
فهما أصدقاء منذ أن كانتا بالثالثه الابتدائيه منذ أن حضرت لبنى مع أهلها إلى تلك المدينه منذ سبع سنوات
وقفت لبنى أمام منزل لينا واخرجت هاتفها المحمول من حقيبتها واتصلت عليها لتنزل لها


نزلت لينا مسرعة
لينا باشتياق:لولو حبيبي
لبنى: كلبه مش بتسألي عليا
احتضنتها لينا باشتياق
لينا: ميبقاش قلبك اسود بقى
لبنى بابتسامه: ماشي ياستي
لينا: يلا بقى علشان الطابور مش يفوتنا
دخلتا المدرسة وحضرتا الطابور وصعدتا مع زملاؤهم على فصولهم

 

فتح غمرالمحل
والمحل يتكون من طابقين كل طابق منقسم إلى قسمين قسم الملابس الحريمي وقسم خاص بالملابس الرجالى
كان مكتبه الخاص بالإدارة في قسم الرجال في الطابق العلوي
وقد ورث هذا المحل عن أبيه من ضمن ميراث كبير
ولكن هذا المحل كان له مكانة خاصة عنده
أحد عمال المحل لعامل آخر:أستاذ غمر شكله زعلان اوي
العامل الآخر: فعلآ باين عليه جدا
فقد دخل غمر مكتبه قبل قليل وهو في حالة وجوم وضيق
سند يديه على المكتب ووضع راسه بين كفيه
غمر: يعنى كنت لازم اتسحب من لساني وازعلها
في حد يزعل أمه كده اكيد زمانها زعلت مني اوي
دخل عمرو المكتب بعد أن ظل فترة يدق على الباب ولم يجبه غمر
عمرو بغضب: ايه ياض بقالى ساعة عالباب وإنت ولا إنت هنا
وبعدين سلامة عقلك بتكلم نفسك يااهبل
غمر بحزن: والله ماسمعت
عمرو باستفهمام:مالك ياغمر
غمر: إتخانقت مع ماما
عمرو: مع طنط نجلاء ولا ...
غمر: مع ماما نور
عمرو: ليه
غمر: استنى هتصل بيها الأول
ضغط على أزرار هاتفه وكانت وقتها تقرأ وردها فى المصحف
رن هاتفها سمعت الهاتف
نور: صدق الله العظيم
أمسكت بالهاتف وقعت عينيها على رقمه فتركت الهاتف ولم ترد
عمرو:مبتردش
غمر بأسى: ايوة
عمرو: هو ايه اللي حصل
روي غمر لعمرو ماحدث
عمرو: اسمعني ياكبير هو كلامك صح وأخوك عايز يتشد بس طريقتك زفت ياحيوان
غمر: اتلم ياض لسانك دا عايز قطعه
ضحك عمرو ضحكه رجوليه قوية وابتسم غمر
: عمرو: وانت مروح خد حاجه حلوه وكلمتين حلوين من كلامك هتصالحك
غمر: حاضر

 

فى الفسحه المدرسيه
لينا برجاء: منار انتي لازم تنقلي للفصل بتاعنا خلي مامتك نيجى المدرسة وتنقلك
لبنى بمرح: ايوة لازم ثلاثي المرح يبقى فى فصل واحد
منار: حاضر هقول لماما تيجي معانا بكره
وبعد انتهاء الدوام المدرسي عادت لبنى إلى بيتها
وبعد أن أبدلت الزى المدرسى
كانت نائمه على السرير فدخلت امها
وردة: لبنى معلش انزلي اشتري لناعيش
لبنى بتعب: ومحمد فين
وردة:اخوكي فى الدرس
لبنى باستسلام: حاضر
قامت وابدلت ملابسها بأخرى للخروج ونزلت وكانت تمشي منهكه ومتعبه
وفى نفس الوقت الذى يخرج فيه غمر من المحل لذهب يصالح جدته هتف عمرو
عمرو: غمر متنساش اللي قولتك عليه
غمر وقد أدار وجهه نحو عمرو ليرد عليه
غمر:حاضر
وفجأة وقبل أن يلتفت مرة أخرى أمامه إصطدم بشخص
و ما إن إلتفت إليه ليعنفه وجد نفسه وقد تسمر أمام عينين بندقيتين ساحرتين تنظر إليه شذرا طبعا لأن صاحبتهما ذات جسم رقيق لا يتحمل صدمة بهذا الشكل فقد تماسكت حتى لا تقع
ظلت لبني تنظر إلي زوج العينين العسليتين وصاحبهما طويل القامة رشيق البنيان منتظرة أن يقدم إعتذاره عما حدث
ولكن وكأن الزمن قد توقف عند غمر وكأنه ذاب فى هاتين البندقيتين الساحرتين
مرت بضعة لحظات من تبادل النظرات مع إختلاف مشاعر كل منهما
تململت لبنى ونظرت إليه عابسه حانقة من صدمته لها
لبنى بحنق: مش تفتح
غمر بعد أن إستوعب الموقف
غمر: انا اسف
تركته وذهبت حانقة مستغربة
ظل غمر يراقبها حتى غادرت وإختفت عن عينيه تماما
غمر متحدثا لنفسه: مين دي انا اول مره اشوفها هنا
نفض الأفكار من راسه وتذكر جدته الغاضبة منه وذهب إلى محل الحلويات وأخذ بعض الحلويات التي تحبها جدته وذهب إلى البنايه يدعو الله أن ترضي عنه فهي اغلى شئ عنده
دخل البيت وجد صباح الخادمه التي تقيم معهم وتخدم جدته
غمر: صباح ماما فين
صباح: في اوضتها من الصبح
غمر: طيب هى اتغدت
صباح بأسي: لأ مرضيتش تاكل النهارده خالص ومزاجها متعكر اوي
غمر بحزن: طيب خدي ياصباح حطي الحلويات دي في أطباق وطلعيهالنا على اوضة ماما
صباح: حاضر
صعد غمر إلى غرفة جدته استأذن فلم ترد ولم تأذن بدخوله بالرغم من ان نور الغرفة مضاءا فقرر الدخول
فتح الباب ودخل
أغلقت المصحف وخلعت نظراتها الطبيه
نور بحده: أنا اذنت ليك انك تدخل
أشار برأسه يمينا ويسارا نافيا
نور بحزم: امال دخلت ليه
غمر بابتسامه: في ايه يانونو حد يقلب على غمر حبيبه كده كل ده علشان قولت كلمتين
نور بحده: قولت الكلمتين بقلة أدب وقلة ذوق صح ولالأ
غمر: ماهو
نور: حصل ولالأ
غمر: حصل ياكبيره بس متزعليش انا اسف
نور: لا مخصماك
غمر بحنان: وأهون عليكي يانونو يا نور عنيا
نور بابتسامه: أعمل فيك ايه بس
بس ببقى عايزه اخنقك وأول مااشوفك انسى
غمر: انتي حبيبي يانونو
دخل غرفته بعد أن قضى وقت مرح مع جدته إستلقى على سريره ووضع كفيه وراء رأسه وتذكر تلك العيون البندقيتين والتي رآها وهو لا يعلم من صاحبتهما ثم نام في سبات عميق
مرت عدة أيام كان يجلس في غرفة مكتبه منكبا على حسابات المحل الخاص به
دخلت نور إلى مكتبه فوقف على الفور وكانت الساعة السادسه مساءا
نور: مساء الخير ياحبيبي
غمر وقد لاحت ابتسامة صغيرةعلى شفتيه: مساء النور ياماما
لحظة صمت
غمر: حضرتك كنتي عايزه حاجه
نور: نجلاء كانت عزمتنا على العشا دلوقتى نفسها تشوفك اديلك فترة مش بتشوفك وانت واحشتها
غمر بهدوء: طيب ماتيجي هي
نور بحزم: هستناك تلبس علشان نروح
غمر حتى لايغضبها: حاضر ياماما
نور: غمر متقوليش ماما قدام نجلاء علشان بتزعل
غمر بحنق: حاضر عن اذنك
 

كانت تجلس على سريرها وسط كتبها فكانت لاتحب المذاكره على المكتب الخاص بها
لبني بانزعاج: اوف اوف بكره الفيزيا ضغطت أزرار هاتفها واتصلت على لينا
لينا بمرح: الو يالولو عامله ايه يا بيبي
لبنى بانزعاج: الفيزيا هتموتني
لينا بضحك: يالولو انتي اللي مش بتحبي المواد العلميه
بتنهد: فعلا
لينا: عايزين نتفق مع السنتر اللي جنب المدرسه علشان نروح نظبط الدروس
لبنى: فعلا لينا كان في حاجه تاني عايزه اقولك عليها
لينا: قولي ياحبيبي
لبنى: عايزين نغير الشارع اللي بنمشي منه للمدرسه
لينا: منار لسه كانت بتقولي على نفس الموضوع ده يبقى متفقين
لبنى: إشطه يلا اشوفك الصبح
لينا:اوكشن تصبحي على خير يابيبي
لبنى: وانتي من اهله
دخلت ورده على ابنتها
وردة: كنتي بتكلمي مين
لبنى: دي لينا صاحبتي
وقد تغيرت ملامح ورده للضيق
لبنى: في ايه ياماما كل أما سيرة لينا تيجي بتتضايقي
وردة: مش برتاح ليها يابنتي معرفش ليه
لبنى: ليه ياماما دي حتى لينا بتحبني اوي
وردة بتنهد: انتي عارفه اني في بعض البشر مش بارتاح لهم
لبنى: طيب
وردة: يلا ابوكي برا واخوكي رجع علشان نتعشي
لبنى بابتسامه: هرتب الكتب وارجعلك
وردة: يابنتي هو احنا عاملين المكتب ده لمين
لبنى: مبعرفش اذاكر عليه
وردة: طيب ياحبيبتي متتاخريش
لبنى: وراكي عالطول ياماما
خرجت وردة وتركت لبنى وسط كتبها

 

نعود لعائلة غمر
كان منزلهم له من العمر اكتر من أربعين عاما
فقد كان بيت نصر الدين العمري
وكانت عائله العمري مشهوره جدا وتتميز بحسبها ونسبها فى تلك المدينه
و البيت مكونا من خمس طوابق
الطابق الأول لنجلاء وهي أم غمر التي انجبته من رحمها وعاش معاها عشر سنوات من عمره
والطابق الثاني لمحمد ابنها الذى يكبر غمر بأربع سنوات فى الثالثه والثلاثون من عمره والتى قامت أمه بتدليله
ولكنه إحتفظ بصفاته النبيلة والتى جعلته لا يقبل أن أن يمس أيا من اخواته بسوء
وهناك أخت اكبر من محمد سنأتى على ذكرها لاحقا ولكن محمد هو الأكبر في الأولاد الذكور
وقد تزوج محمد في الثانيه والعشرين من عمره ومعه ابنتان
الطابق الثالث كان يخص غمر ولكنه ظل مغلقا لأن غمر مقيم مع جدته
الطابق الرابع لعبد الله وهو الأخ الأصغر من غمر بثلاث سنوات فهو في السادسه عشرين من عمره وكان شابا يافعا ملتزما ومتحملا للمسئولية ولم يكن مستهترا فموت ابيه وهو صغير جعل عوده يشتد أكثر واكسبه كيف يكون رجلا صلبا
وهو أيضا متزوج من سنتين وعنده ولد
الأخت الصغرى رقيه في الثانيه والعشرين من عمرها كانت شقيقة غمر من الأم فقط
لأنه عند موت الأب قررت نور أن تتزوج نجلاء من أخو زوجها للحفاظ على إلتئام شمل العائله
وأنجبت منه رقيه وياسين تزوجت رقيه من سنتين وعندها من الأولاد غمر
وتعتبر رقية فتاة غمر المدلله والمقربه من قلبه
وكان اغلب شباب العائله يتزوجون صغار السن
ياسين في الثامنه عشر من عمره وهو في ثالثة الثانويه
شاب به ملامح كثيره من غمر ومحمد
اخيرا نأتي إلى اختهم الكبرى والتي كانت تعد لغمر أما ثالثه له
فهي في أواخر العقد الثالث من عمرها وعندها من الأولاد حازم في الثامنة عشر من عمره وبنتا في الخامسة عشر من عمرها تدعي ايسل واخر العنقود ولد يدعي أحمد في العاشرة من عمره
رن الجرس وفتحت نجلاء
نور: السلام عليكم

رواية زواج مع سبق الإصرار للكاتبة سلمى المصري

الفصل الثالث

نور: السلام عليكم
نجلاء بابتسامه: وعليكم السلام
بعد السلام والاحضان بينهم دخلت نور وجاءت نجلاء لتغلق الباب ظهر غمر
نجلاء: جبتيه ليه ياحاجه مش قولتك مش عايزه اشوفه
هم غمر بالكلام لكن نظرت له نور نظرة ناريه فحبس الكلام فى فمه
نور بابتسامه: قلبك ابيض يانجلاء وبعدين انا ظبطتهولك تمام ووعد إنه كل أسبوع هييجي يبص عليكي
كان غمر ينظر إليهم وهو يستشيط غضبا ويهمس فى نفسه ما هذا الذى تقوله نور
بنظرة غضب نجلاء: آخر مافكرت تسأل عليا وتشوفني ادخل ادخل يابيه
دخل دون أن ينطق ووضع الشنط التي بيده التي تحمل الفاكهة وغيرها وجلس بجانب جدته
غمر بغضب وصوت هامس: هو ايه اللي بيحصل ياماما
نجلاء: بتوشوش ستك بتقولها ايه ايه خلاص مبقاش عندك أم تسأل عليها خلاص مت ياسي غمر
نظر إلى جدته نور وحتى لا يشتعل غضبه أكثر وينفجر
نور: قوم بوس ايد امك واعتذر ليها

نظر لجدته بحدة
نور بحزم: اتفضل
قام لينفذ رغبة جدته وهو يريد أن يحطم كل ما يقابله فى البيت
قبل يد أمه
غمر وهو يتمتم: انا اسف
نجلاء معترضة وباستغراب: مصمصت بشفتيها
نجلاء: والله انا عارفه لولا الحاجه ماكنت هتيجي أنا مش عارفة إنت طالع براوي كده لمين ياواد
نور بحزم: خلاص يانجلاء بقى
نجلاء: ماشي ياحاجه هاقوم اجيب لكم حاجه تشربوها
نور: هتقومي تجيبي انتي هو مش النهارده يوم رقيه تبقى عندك مجتش ليه
غمر دون أن يقصد انه سيقع في مشكله: مسافرة مع جوزها
نجلاء بغضب: يعنى بتتصل تطمن على رؤى ورقية وانا اللي امك مبيهونش عليك تعبرني
نور: هو مبيتصلش بيكي خالص
نجلاء: آخر مره اتصل من اسبوعين
نظرت له جدته بغضب فنظر إلى الأرض وكان يعلم أنه سينول من صرامتها ما يستحق
قامت نجلاء إلى المطبخ
ضربته جدته بحده على راسه وهو ينظر إلى الأرض
نور بحده: في حد مايتصلش على أمه ولا يعرف حاجه عنها من اسبوعين
غمر: كفايه عليها محمد يسأل ويقعد في حضنها ليل ونهار
ضربته مره اخرى على راسه ضربة آلمته فأخذ يمسد بيده بحركة سريعة على مكان الضربة
نور: ابقى اسمع تاني انك متصلتش والله هاخد مفاتيح المحل منك وقعدك فى البيت زي النسوان سامع
غمر ويجز على أسنانه: سامع
نور بعصبيه: ولد قليل الادب دلعتك بزياده
دخلت نجلاء وبيدها العصير وبعض الحلوى على صنيه
نور بحده: قوم شيل عن امك الصنيه
قام على الفور وهو يقول لأمه: عنك
نجلاء: لا مطيع اوي ياواد
نور بحزم: اي وقت يقصر معاكي رني عليا بس وشوفى هاعمل فيه إيه
نجلاء بحزن: لو مش من نفسه ياحاجه يسأل ويطمن على أمه يبقى بلاش احسن يتصل ويبقى بناقص السؤال
نور وهي تحاول تغير مجرى الحديث: ماتتصلي على الولاد ينزلوا يتعشوا معانا
نجلاء: حاضر والله البنات مش سايبني ربنا يخليهم ليا عقبال مراتك ياغمر
غمر بحزم: لما ابقى افكر في أني اجوز هتجوز في البيت اللي تربيت فيه
نجلاء بحدة: وشقتك اللي هنا
غمر بحزم: شقتي مالها قولتك مش عايزها خليها لرؤى ورقية انا إتربيت وعشت هناك وهفضل هناك
نجلاء بابتسامه خبث: والبيه ناوي يتجوز امتى
غمر بغضب: لما احس اني محتاج اتجوز
نجلاء بعصبيه: ياواد انت هتجنني انت مبتغيرش شباب العيله كلهم اتجوزوا وأصغر منك واللي قدك معاهم عيل وإتنين
غمر بابتسامه سخرية: أغير أغير من ايه مش فاهم
نور بهدوء: يعنى مش نفسك يبقى معاك حتة عيل تفرح بيه
غمر بحزم: لأ نفسي بس لما احس اني لاقي الانسانه اللي أرتاح ليها وأقتنع بيها تكون زوجة لى مش جواز والسلام وبعد كده يحصل إنفصال
نجلاء بغضب: انفصال في عينك من امتى واحنا عندنا حد بيطلق مراته
غمربحدة: لو مفيش يبقى على إيدي هيبقى فيه إن شاء الله انا مش ناوي أعيش حياتي في قرف
نجلاء: إنتي ايه رايك ياحاجه هنفضل سايبينه كدا لحد امتى
غمر بغضب: ايه سايبينه دي هو انا عيل صغير ماليش رأي انا راجل وعندي 29 سنه يعني مش قاصر علشان حد يتحكم في حياتي بالشكل ده
نجلاء وكأنها لم تسمعه: إيه رأيك ياحاجه في نورهان بنت أختي أهي بنت زي القمر ماشاء الله
نور بهدوء: أنا شايفه انها زي القمر بس متنفعش لغمر
غمر بعصبيه وقد علا صوته: وحتى لو هتنفع أنا مش هتجوز بالطريقة دى ومش هارتبط غير باللي أختارها أنا ومتحاوليش تتكلمي على أى واحده ولا تورطينى فى خطوبة وبعدين جواز لأني ساعتها مش هوافق وماتبقوش تلومونى بعد كده على بحر الدم هيشتغل
نور بعصبيه: إتلم ياولد صوتنا جايب آخر الشارع أمك نفسها تفرح بيك
نزل عبد الله فى لمح البصر
عبدالله: في إيه ياغمر في إيه ياماما انتو بتتخانقوا ولا إيه
نور بحب: تعالى ياإبن الغالي
نور امرأه قويه مات ولديها الاثنين فى حياتها مما زادها قوة وصرامه
عبدالله بابتسامه: ستي هنا إيه النور ده
دخل إلى جدته وقبل يدها وقبلته من رأسه
عبدالله: عامله ايه ياحاجه وحشتني جدا والله
نور بحب: بخير ياحبيبي
سلم الشباب على بعضهم
عبدالله: وحشني ياض
غمر: وإنت يامعلم مبتجيش المحل ليه
عبدالله: كان عندي شوية شغل كده اليومين اللى فاتوا دول كام مقاولة كده في 6 أكتوبر وخلاص فضيت يامعلم
غمر: إنت وياسين فى الشغل ده ولا لوحدك
عبدالله: لأ ياسين كان معايا الحمدلله بدأ يتعلم ماشاء الله عليه بيلقط بسرعة
غمر بابتسامه: ربنا يبارك فيه
تاني يوم قام من نومه منزعجا فهو لم ينم في سريره لقد أقسمت أمه عليهم بالمبيت في شقتها
قام من النوم وخرج إلى الحمام
غمر وأثر الانزعاج عليه: صباح الخير
نور بابتسامه: صباح النور ياحبيبي
نجلاء: صباح النور مالك يا غمر
غمر: معرفتش انام كويس
نور: علشان غيرت مكان نومك
نجلاء بحنق: هاقوم احضر الفطار وتركتهم ودخلت المطبخ
غمر بضيق: هي مالها
نور بإبتسامه: بتغير عليك يلا ادخل ياكسلان صلى الضحى وتعالى افطر
غمر ولقدلاحت ابتسامه على ثغره: حاضر يانونو ياقمر انت

تسلل ضوء الشمس على وجهها مما جعله عابسا
لبنى عابسة: قولت ميت مرة محدش يفتح ستاير الاوضه
لبنى بتوعد: ماشي يامحمد والله لما ترجع من المدرسه عيل برأس حمار
دخلت وردة على ابنتها وجدتها عابسه تزبد وتتوعد محمد
وردة: مالك يالولو
لبنى بضيق: ابنك إللى مش هيبطل عمايله الزفت دي قولتله ميت مره متدخلش اوضتي وتفتح الستاير ومفيش فايده
وردة بتفهم: أنا هبقي اتكلم معاه لما ييجى يلا اقومي الفطار جاهز علشان تلحقي تنزلي مدرستك
لبنى: حاضر إغتسلت وفرشت أسنانها وتوضات وصلت الضحى وإرتدت زيها لمدرسى وجلست إلى منضدة الطعام لتفطر
وردة بحزم: لبنى إشربي اللبن
لبنى بانزعاج: يوووه لا بقى هو لازم كل يوم لبن
وردة: أنتم غيرتم الطريق بتاع المدرسه ليه
لبنى: لأ مافيش بس في واحد حيوان كان بيضايقنا في الراحة والجاية فقولنا نغير الطريق ده
وردة بتفهم: امممممممم والطريق التانى أمان
لبنى اومات برأسها لأعلى وأسفل موافقه بحماس: أه أصله طريق حى كده وفيه حركة والناس راحة جاية فيه وكله محلات ومحدش بيضايقنا وكدا
وردة: تمام كنت عايزه أقولك على حاجه
لبنى بإصغاء: إتفضلي ياماما
وردة: بصي يابنتي إنتي معدتيش صغيرة ودخلتى على مرحلة المراهقة والمرحلة دى بتكون البنت فيها معرضة إنها تحس ببعض المشاعر المختلفة حب أو إعجاب لشخص ما لكن اللى لازم تعرفيه إن المشاعر دى بتحسى بيها بقلبك فقط لكن عقلك فى سنك دا بيكون لسه ماوصلش لمرحلة النضج اللى ممكن تحددى فيه الصح من الغلط أو الخير من الشر لوحدك ولازمك فى الوقت ده النصيحة من إللى أكبر منك وأنا بقولك الكلام ده دلوقتى علشان زي ماكنا أصحاب دايما قبل كده لازم نكون اصحاب دلوقتى وخصوصا في المرحله دي لأن دي أهم وأخطر مرحله في حياتك وأنا كل اللى يهمنى إنى أوصلك لبر الأمان سمعاني ياقلبي
لبنى: سامعة وماتخافيش على بنتك يا قمر
قبلت يد امها واحتضنتها بشده لبنى: وبعدين أنا لايمكن أخبي عليكي حاجه أبدا
مسحت أمها على رأسها
وردة: ربنا يقرب ليكى كل خير ويبعد عنك كل شر ياعمري
ابتسمت لبنى ابتسامه حب

في مكتب غمر
عمرو: بقولك ايه تعالى نقف برا الواحد زهق من قاعدة المكتب دي
غمر وقد ترك ملف الحسابات الذي بيده: محمد هيجنني سايب الحسابات كلها عليا
عمرو: تعالى نتكلم برا
غمر وأثر الانزعاج عليه: حاضر
ووقفا أمام المحل
عمرو: في إيه بقى
غمر: ملفات الحسابات كلها أنا اللي بخلصها
عمرو: طبيعي ياغمر إنت خريج تجارة وفاهم في الحاجات دي وده شغلك
غمر بعصبيه: كل حاجه على غمر غمر
عمرو: انت كنت عند طنط نجلاء امبارح
غمر بحنق: اه
عمرو وهو ابن عم غمر وصديقه المقرب وهو شاب متوسط الطول صاحب عينين سوداوتين وشعر أسود غزير وبشره بيضاء فكان أقرب لغمر في الشبه هو ومحمد اخوه
توقف غمر عن الكلام فجأة ولاحت ابتسامه على وجهه

ملحوظة:
لكل اللي سأل على معنى اسم غمر معنى الاسم في المعجم لي معاني كتير حسب التشكيل وحسب تشكيل الفتح زي ماانا بقول هو صفه تدل على الثبوت
والعمق وليس ضحل
كثير المعروف والكريم السخي
نطق غمر زي نطق اسم عمرو بالظبط مع اختلاف العين عمرو مش عمرو
ثانيا بالنسبه في غلطه فالفصل الثاني
سن ياسين 18 عام وهو في ثالثة الثانويه
وسن عبدالله 26 عام مش 24 واسفه على الخطأ بس كان عدم تركيز

رواية زواج مع سبق الإصرار للكاتبة سلمى المصري

الفصل الرابع

توقف غمر عن الكلام فجأة ولاحت ابتسامه على وجهه
عمرو باستفهام: أنا معرفش إنت واخد موقف عدائي ليه من طنط نجلاء
كان غمر فى هذه اللحظة لا ينصت إليه إنما عينيه وأذنيه مع تلك الفتاة ذات البندقيتين الساحرتين والتي يراها للمرة الثانيه ولا يعلم مالذي جذبه إليها
كان يبتسم وطابعة الحسن على ذقنه تزيد من وسامته والتى طالما كانت إبتسامته الساحرة سر جاذبيته ومحط أنظارفتيات كثيرة
فقد كانت معجباته من الفتيات يتخذن حجة شراء الملابس من المحل ظنا منهن أنه موجود في قسم الحريمى ولأنه كان يعلم ذلك فقد جعل مكتبه في قسم الرجالى للإبتعاد عن هذه الفتنة
عمرو: إنت ياض مش بكلمك ... إنت يابني ...هييييه ... بتبص على ايه
غمر وكأنه فى ملكوت آخر غير منتبها لعمرو
نظر عمرو إلى ماينظر إليه غمر فوجده ينظر إلى ثلاث فتيات يرتدين زى المدرسة الثانويه ويمرون من أمام المحل وهم فى طريقهم للمدرسة ويتبادلون الحديث
فى هذه الأثناء نظرت منار إلى ساعتها
لبنى: بتبصي في ساعتك ليه

منار برجاء: شوفوا بقه لسه ناقص نص ساعة على الطابور
لينا: تمام إيه المشكله يعنى
منار: فيه بلوزة كانت عجباني أوى فى المحل ده ممكن تتدخلوا معايا أقيسها قدامكم وتقولولى رأيكم إيه ولو كويسة أشتريها وأنا معايا الفلوس
لينا: رأيك إيه يالولو
لبني وكأنها تفكر
منار برجاء: بليز يالولو
لبنى بإبتسامه سحرت زوج العيون العسليتين التي تراقبها بشغف ولايعلم صاحبهم ما الذى أصابه عندما وقعت عيناه عليها أول مره ولا الذي أصابه فى هذه المره
إلا انه يشعر الآن بشعور لم يحسه من قبل وماهذا الذى يخفق بين جنباته ويضخ الدماء إلى رأسه بهذه القوة والسرعة
لبنى: موافقه
سارت الفتيات فى إتجاه المحل وحينما وصلوا كان يقف غمر وعمرو
وكان عمرو يقف فى حالة ذهول ودهشة من الحالة الغريبة التى عليها غمر والذي يراه أول مره في تلك الحاله
لبنى برزانه وثقة: السلام عليكم
رد غمر بصوت حانى وكأنه لايرى غيرها: وعليكم السلام
دخلت منار ولينا بدون إلقاء السلام
لينا: إيه سلام عليكم دي إنتي عايزوهم يقولوا علينا إيه ... بلدي
لبنى باستغراب: بلدي إيه يا بنتى أمال كنت اقول إيه
لينا: بونجور .. صباح النور
لبنى: إنتى ناسية إن إحنا مسلمين وإن أفضل تحيه هى تحية الاسلام ياست لينا
منار: بقولكم ايه خليني أشوف البلوزة ونخلص
دخلت منار للبروفه
عمرو: إسمه إيه اللي حصل ده وبيطلعوا إمتى إن شاء الله
غمر: مش فاهم هما مين اللى بيطلعوا إنت أهبل يلا
عمرو: نعم ياإبن نجلاء
غمر: عمرو مبحبش الكلمه دي إنت عبيط كمان ولا إيه
عمرو: مين الهانم دي وعلاقتك بيها إيه إعترف بدل مافضحك في العيله كلها
غمر: إخرس ياض إنت حكاية إيه ورواية إيه هاحكيلك بعدين سيبني بقه أشوف شغلى أنا داخل أمر على قسم الحريمي
عمرو باعتراض: نعم ياروح طنط من إمتى ده إن شاء الله
غمر بحزم: إطلع من دماغي ياض إنته
خرجت منار من البروفه
منار: رأيكم إيه
لينا بإنبهار: تحفة
منار: رأيك إيه يالولو
لبنى: رأيي مش هيعجبك ياموني
منار بحزن: ليه وحشه
لبنى: لا تحفه بس متنفعش خروج خالص
لينا باعتراض: ليه دي تحفه
لبنى: ضيقه جدا ومجسمه مبينه كل تفاصيل جسمك
لينا بضيق: بطلي تقاليدك المتزمتة دي
لبنى: دى مش تقاليد ولا تزمت ده ديننا إللى بيقول كده إنت ماسمعتيش رسولنا الكريم عليه الصلاة والسلام قال إيه علي وصف اللي بيلبس بالشكل ده .. فيه حديث شريف بيقول فيما معناه إن هايكون من أهل النار صنف من النساء ووصفهم بإنهن كاسيات عاريات مائلات مميلات ومش هيشوفوا الجنه ولا ريحها حتى
عايزه كلام الرسول إللى فى الحديث ينطبق عليكي ياموني رسولنا الكريم عايز يحافظ علينا وبعت لنا رسالة
وبعت لنا رسالة بتقول لنا متبقيش سلعه رخيصه لكل عين تبصلك لأنك هاتشيلى ذنب كل عين تبص لك كمان إيه رأيك بقى لو شايفه إن رسولنا بيقول حاجه غلط يبقى إشتريها
منار بابتسامه: ياحبيبي يارسول الله عليه أفضل الصلاة والسلام خلاص يا لولو مش هشتريها كويس إني خدت رأيك
خرجت الفتيات وكان يظهر عليهم أثر المناقشة
ريم (عاملة المحل ) تحدث نفسها: ماشاء الله عليهم
غمر وقد أكله الفضول: في إيه ياريم
روت له ريم ما حدث
إبتسم إبتسامة رضا ودخل إلى مكتبه وجد عمرو بمكتبه وينظر إليه بنصف عين ويهز رأسه
غمر وقد تصنع عدم الفهم: في إيه بتبص لي كدا ليه يابنى
عمرو: على بابا يا روميو
غمر: إيه ياعمرو مالك النهارده بتقول كلام غريب روميو وقيس
عمرو: مين الهانم اللي حضرتك لما شفتها بقيت مش على بعضك كدا ورحت فى ملكوت تانى وساعة ماشفتها كنت هتقع من الفرحة
غمر: بس يابني مفيش كلام من ده إنت إتهبلت ولا بيجيلك تهيؤات
عمرو بتهديد مصطنع: خلاص أنا هاروح لستي نور وهي بقى هتعرف تقولنا مين دي
غمر بجديه: إياك ياعمرو تحكي فى الموضوع ده مع حد .. لحد مانعرف مين دي
أوما عمرو برأسه بالموافقة
ونظر إليه وأشار أصبعه السبابه إلى وجهه: بس على فكره دى عمرها ماهتبصلك وإنت كدا
غمر بضيق: مالي كدا
عمرو وهو يسحبه من يده: قوم كدا قوم
قام غمر من مكانه ومشى مع عمرو كالمنوم مغتاطيسيا ووقفا أمام المرآة
عمرو: ده منظر شاب عنده 27 سنة
غمر وقد صدم من كلام عمرو: ماله شكلي
عمرو: إنت أهبل يلا مش شايف مكبر نفسك إزاي أقولك على حاجه سيبلي نفسك
غمر بعدم فهم: مع إنى مش فاهم حاجه بص إشطه معاك يا معلم
عمرو: بس مافيش أي خطوة هتاخدها غير لما نعرف نظامها إيه الأول
غمر بجدية: بس أنا حاسس إنها صغيرة ياعمرو
عمرو: لا دي شكلها معديه 18
غمر: إزاي وهي لسه في المدرسة الثانوى
عمرو: ممكن تكون دخلت كبيرة سنه وهي دلوقت في ثالثه زيي كدا لما كنت دخلت المدرسة كبير سنة
غمر محاولا إقناع نفسه وقد لاحت على شفتيه إبتسامة خفيفة: تصدق فعلاً ممكن برضه
عمرو بخبث وهو يغمز له بعينه: بس إنت باين عليك واقع أوي لشوشتك
غمر بهيام: معرفش يا أخى ايه اللي
بيحصلي أول مابشوفها مع إن دى تاني مره أشوفها بس حاسس إني أعرفها من زمان معرفش إزاى
عمرو: يابيضه وقعتي
غمر وقد إحمر وجهه: يلا يابني نبدأ شغل ماما عايزه الحسابات كلها
عمرو بخبث: أحبك وإنت بتتكسف كده
غمر دون أن يرفع عينيه من على الورق: إتفضل ركز بقه معايا خلينا نخلص

 

كانت تجلس إلى مكتبها فى المنزل وترتدي نظارتها الطبيه تتفقد ملفات الحسابات
نور بضيق: الإيرادت أقل من الشهر اللي فات
غمر بأسف: فعلا
نور بحده: أفهم من ده إن إنت مش شايف شغلك عدل تقدر تقوللى ليه
غمر بهدوء: المحل مش إدارتي أنا لوحدى بس على فكره
نور بحزم: غمر متستفزنيش المحل إيراداته بتتراجع ليه
غمر بضيق: معرفش وزي مابتحاسبيني حاسبي محمد ممكن يكون العجز من عنده
نور بعصبيه: إنت حاطط أخوك في دماغك ليه مالك بيه عملك إيه أخوك دا مابيطقش حد يمس شعره منكم ولا بيحب حد يجيب سيرتكم بكلمة وحشة وكل ماكلمك كلمه تقولي محمد محمد هو في إيه ياولد
غمر بضيق: انا مقولتش حاجه غلط إحنا الإتنين شركا في إدارة المحل زي مابتحاسبيني حاسبي محمد مقولتش حاجه غلط ولا إتهمته إتهام زور يعني علشان الدفاع اللي حضرتك عملتيه ده وكأني قولتلك روحي إعدميه
أنهت نور المناقشة لحين الرجوع إلى محمد وخرج غمر وهو يتمتم بعصبيه وضيق
وفى اليوم التالى كان يجلس على مكتبه فى المحل يتناول فطوره فلم يتناوله مع جدته كعادته وخرج من المنزل مبكرا حتى لاتراه جدته دخل عليه عمرو
عمرو بابتسامه: صباح الخير
غمر بضيق: وعليكم السلام
عمرو وهو يحدق به: مالك ياغمر روي له ماحدث مع جدته بالأمس
عمرو: ممكن أعرف إيه سبب خلافاتك مع أخوك وأمك وليه بتعمل كدا مش عادتك إنك تكون مش طايق حد كدا وبعدين اللي مش طايقهم دول أخوك الكبير وأمك
غمر بمرارة وحزن: أمي .. أمي اللي فاكره بس حقها عليا لكن حقي عليها مش موجود أمي اللي خلفتني وبعد ماخلفتني كأنها مجبتنيش ولا كأنها تعبت فيا
أمي اللي طول عمرها كل إهتمامها بس لأخويا الكبير وإخواتي التانيين وأنا أمري منتهى عندها من زمان من قبل ماعيش مع ستي نور
دايما بيقولوا إن الوسطاني مظلوم لكن نسيوا يقولوا إنه كمان مقهور
وفى هذه اللحظة ملأت الدموع عينيه ولكنه تماسك وحبسها أن وفضلت حبيسة عينيه وتحاشى يبص لعمرو وكأن شريط حياته فى طفولته بيمر قدامه
غمر بحزن إحمرت عيناه من أثر مقاومتة الدموع الحبيسة وبأسى: كان حضنها وحنيتها لمحمد وعبدالله وبس محمد الولد البكرى وأول فرحتها وعبدالله كان آخر العنقود حتى بعد ماااتجوزت عمي رافت الله يرحمه وخلفت رقيه وياسين كانت بتعامل عبدالله علي انه اخر العنقود ومحسستهوش ابدا بااني وجودهم هيغير حاجه أما أنا فمكنش ليه مكان فى الحضن ده وكنت منسي و ضايع بينهم ماكنتش بتفكر حتى تفتكرنى بكلمة حنان أوطبطبة أم لإبنها وحتى لما كنت أتأخر على ميعاد الغداء أو العشاء كنت أتمنى إنها تفتكرني لكن للأسف كنت برضه مش على بالها خالص وكأنى ماليش وجود ولما بابا مات حسيت إني حياتي إنتهت في البيت ده
دى حتى مزعلتش عليا أو منى لما سيبتلها البيت ومشيت ولاحتى دمعت دمعه على فراقي على عكس لما محمد كان بيكون مسافر كانت بتعمل مناحه لغاية مايرجع
والله أنا مش بكرهها بس كان نفسي أحس إني موجود في حياتها أحس بإهتمامها زى بقيت إخواتى
أما عن محمد كل اللي بتمناه أنه يتحمل المسئوليه شويه
لكن غير كدا هو أخويا الكبير اللي بحترمه وبحبه ومبكسرش له كلمه
ده مكان بابا الله يرحمه كفايه انه بيعاملنا بحنية بابا بس نفسي يفوق من دلعها ليه ويفهم إننا محتاجينه
فى تلك الأثناء دخل محمد المحل
كان هو وغمر بينهما تشابه كبير كان لايفرق بينهم إلا إستدارة الوجه
محمد بجدية: السلام عليكم ورحمة الله وبركاته
وقف غمر وعمرو إحتراما له وردوا السلام: وعليكم السلام ورحمة الله وبركاته
كل من كان يرى محمد العمري وغمر يعطى محمد العمري
سن أصغر من سن غمر وأن غمر هو الأخ الأكبر
فقد كان محمد يولى إهتماما كبيرا بهيئته ومظهره ولذلك كان محط أنظار كثيراً من الفتيات وكان الجميع لايصدق أنه فى أول ثلاثينات من عمره ومتزوج ولديه فتاتان
دخل محمد عليهم المكتب وهو يرتدي تيشرت ابيض وهو لونه المفضل وبنطلون جينز اسود وكاب على رأسه
محمد ويعلو وجهه الهم والإنزعاج: هات الملف الزفت ده لما أشوفه
غمر: حاضر
عمرو بهمس: شكل ستي نور عملت معاه الصح وهيطلعه عليك
غمر بهمس: وأنا مالي أنا عملتله حاجه
محمد بعصبيه: إقعد إتوشوش إنت وهو وأنا يتحرق دمى
عمرو معتذرا: أنا اسف ياريس أنا هروح المحل بتاعي عن إذنكم
خرج عمرو مسرعا دون الإنتظار لرد
غمر: إتفضل الملف
أخذ الملف من يد أخيه وإرتدي نظارته الطبيه
محمد بضيق: فعلا الإيرادات قلت عن الشهر اللي فات ومش بنسبه قليله لأ دى كبيرة
غمر: أه
محمد بأسي: بسببي صح
أطرق غمر برأسه لأسفل ولم يجب
صمت محمد قليلا وظل يفكر أحس غمر بأنه يريد أن يكون وحيداً
غمر: طيب أنا هنزل أمر كدا على المحل
محمد شاردا: إتفضل