فاجأه جت عليهم سالى وقربت من شريف وحتط اديها على عيون شريف. وقالتله حزر فزر انا مين يا شوشو؟ شريف مسك ايدها ولف نفسه وقالها اهلا يا سالى اخبارك ايه.؟ يسر: عن اذنك بقى يا شريف انا ماشيه. شريف: استنى يا يسر ماشيه ايه احنا لسه ماتكلمناش. سالى: احسن برضوا علشان انا عوزاك يا شريف في موضوع مهم اوى اوى اوى.
قامت يسر وخدت بعضها ومشيت بس كانت من جواها شايطه على الاخر ومتغاظه من اللى اسمها سالى دى ومن طريقه كلامها مع شريف. شريف: شاف يسر قامت ومشيت قام رايح وراها بسرعه وقالها... يسر استنى انتى ماشيه ليه هو احنا لسه قعدنا مع بعض يا بنتى ولا اتكلمنا في حاجه؟ يسر: لا خليك قاعد مع ست سالى بتاعتك يا شوشو.
شريف: سالى ايه وبتاع ايه دى بنت خالى وهي بت رخمه وبتحب تستزرف شويه لما تشوفنى وبذات لما تشوفنى مع واحده زيك زى القمر يسر: لا والله ماليش فيه خليها تنفعك يالا سلام. شريف: يا بنتى استهدى بالله انتى عليكى عفريت اسمه سلام اصبرى شويه علشان خاطرى انا ما لحقتش اشبع منك. يسر: مش هينفع يا سى شوشو علشان انا اتأخرت يالا باى. مشيت يسر وكان شريف على آخره من ست سالى دى وطريقتها معاه وبذات اودام يسر.
وهو واقف سرحان في اللى حصل جاله عادل صاحبه وقاله ايه يا عم سرحان في ايه مالك؟ هي المزة اللى كانت معاك راحت فين؟ شريف: بقولك ايه انت كمان هي مش نقصاك سيبنى في حالى دلوقتى يا عادل وحيات ابوك اصل عفاريت الدنيا كلها بتتنطط في وشى.
يسر رجعت على البيت وراحت على اوضتها وشويه خبتط عليها همس وسألتها مالها. همس: مالك يا يسر مش على بعضك ليه وبعدين مش انتى قولتى انك هاتتاخرى ساعتين تلاته.؟ ايه جيتى بدرى يعنى؟ يسر قعدت على سريرها وقالت أنا هاحكيلك على كل حاجه يا همس وقوليلى رايك ايه واعمل ايه علشان انا محتارة اوى ومش عارفه اعمل ايه... حكت يسر لاختها على كل اللى حصل معاها واللى هي حاسه بيه ناحيه شريف.
وهل فعلا شريف معجب بيها ولا زيها زى اى بنت بيكلمها؟ همس: الصراحه يا يسر انتى غلطانه لان احنا عارفين من الكليه ان شريف بتاع بنات وانتى شوفتى بعينك البنات بتبقى حواليه اد ايه في الكليه. وازاى تروحى النادى وتقابليه الناس تقول عليكى ايه؟ يسر: مش عارفه بقى يا همس انا اتشديت ليه وعجبنى شخصيته وطريقته واستايله. همس: مش كفايه انك تعجبى بيه وانتى عارفه كويس اوى أنه بتاع بنات.
الهام: بعتت الشغاله علشان تنادى على البنات علشان ينزلوا يجهزوا معاها السفرة علشان فارس وكرم هايجوا يتغدوا معاهم. فعلا طلعت الشغاله وخبتط على باب الاوضه وقالت للبنات أن الهام هانم عوزاهم تحت علشان الغدا وعلشان ولاد عمهم جاين على الغدا. نزلت البنات وفعلا بدؤا يجهزوا السفرة وشويه وجم الشباب واتجمعوا على السفرة واتغدوا. بعد الغدا طلعت الهام على اوضتها.
قعدت يسر وهمس وكرم وفارس مع بعض وفضلوا يضحكوا ويحكوا على حاجات مرت بيهم وهما في الكليه وهما على البحر في اسكندريه. همس: انا مهما روحت اى بحر أو شط في مصر كلها أو برة مصر. مش بحب غير اسكندريه وشواطئ اسكندريه وبحرها وناسها وجوها ورملها. كرم: هي فعلا جميله اوى وبحرها جميل جدا وناسها اجمل واجمل وقام غامز بعينه لهمس. همس خدت بالها من عنين كرم فاتكسفت وبصت على يسر اللى كانت في عالم تانى خالص.
وكان فارس واخد باله من يسر وأن شكلها زعلان من حاجه. كرم طلب من البنات ومن فارس أنهم يخرجوا باليل يغيروا جو شويه ويتمشوا شويه على الكورنيش. بس بعد ما يستاذنوا من مرات عمه الاول علشان هي دى الاصول همس: واااااو. انت بتتكلم بجد احنا بقالنا كتير اوى ما خرجناش. فارس: اول مرة تقترح حاجه عدله يا كرم ياريت والله نخرج نغير جو شويه. يسر: روحوا انتم انا ماليش مزاج أنى اروح اى حته.
همس: بطلى بواخه بقى يا يسر لازم تيجى معانا. كرم: فعلا لازم تيجى معانا يا يسر ومش هانروح في حته الا وانتى معانا. فارس قام واستاذن انه هايقعد شويه في الجنينه. همس خدت بالها أن فارس زعل لما يسر قالت كده وأنها مش عاوزة تروح معاهم. همس: بقولك ايه يا بت انتى لازم تيجى معانا انا بقولك اهو انتى فاهمه. الهام: تيجى معاكم فين انتم خارجين ولا ايه من غير ما تقولولى؟
كرم: انا كنت لسه هاستاذن من حضرتك يا طنط أنى اخد البنات انا وفارس ونخرج شويه ونتمشى على الكورنيش. ايه رأى حضرتك؟ الهام: ده انا لسه قافله دلوقتى مع عبد الرحمن اخويا وفرح اوى انكم موجودين هناك وهايخلص عيادته بدرى شويه ويجى يسلم عليكم. همس: خلاص يا ماما بقى نخرج دلوقتى ونيجى بدرى ومش هانتاخر ايه رايك. الهام: خلاص يا كرم اللى تشوفه يا حبيبى بس اهم حاجه تخلى بالك من بنات عمك وتيجوا بدرى.
همس جريت على أمها وخدتها في حضنها وباستها وقالت لها شكرا يا ست الكل. كرم: حاضر يا طنط اكيد طبعا. الهام، اومال فارس فين؟ همس: برة في الجنينه يا ماما طلع يغير جو شويه اصل هنا القاعده رخمه ومش عجباه وغمزت ليسر اختها. الهام خدت بعضها وراحت تشوف فارس. الهام: شافت فارس قاعد تحت شجرة وسرحان على الاخر وما حسش بيها لما جت نحن هنا ايه يا فارس مالك في حاجه مزعلاك ولا ايه؟
فارس جاى يقف مرات عمه قالتله خليك زى ما انت قاعد وقامت خدت بعضها وقعدت جمبه. الهام: مالك يا فارس في ايه شكلك مدايق من حاجه احكيلى في ايه يمكن اقدر اساعدك. فارس: فكر شويه في الكلام اللى هايقوله لمرات عمه وأنه فعلا زعلان من حاجه. فارس: الصراحه يا طنط انا بعزك جدا زى والدتى ومش هاخبى عليكى حاجه لانى فعلا نفسى اتكلم مع حد ويفهم اللى جوايا واللى انا حاسس بيه.
فارس: الصراحه يا طنط انا بحب يسر من اول يوم شوفتها فيه ومن قبل كده كمان من ساعه لما عمى احمد الله يرحمه كان بيتكلم عليها كتير. فارس: واد ايه يسر عجباه وعجبه شخصيتها وأسلوبها والإعجاب ده قلب بحب. وحب اوى كمان وبيتمنى انها تحس بيه وبشعوره ده تجاهها. الهام: اقولك على حاجه يا فارس وتصدقنى.
انا اتمنى انك تقرب من يسر انا بعزك جدا وبحترمك انت وكرم وعارفه ومتأكد انك هاتحبها وهاتحافظ عليها وهاتكون سند وضهر ليها في الدنيا دى كلها. فارس: فرح اوى من كلام مرات عمه بس في نفس الوقت الفرحه دى كانت خوف من جواه أن يسر مش حاسه بيه وبالحب الكبير ده. فارس: بس انا كنت لمحت ليسر بالاعجاب ده وهي اتهربت من كلامى وغيرت الموضوع خالص. الهام: معلش يا فارس يسر لسه صغيرة ومش عارفه مصلحتها فين كويس.
على العموم سبلى الموضوع ده وانا هاحاول اتكلم معاها. فارس: معلش يا مرات عمى سيبى الموضوع ده ليا واوعدك مع الوقت والأيام انا هافتح تانى الموضوع معاها واشوف رأيها ايه.
عادل يالا يا شريف الشله كلها جاهزة وهانروح نسهر في الكافيه اللى على الكورنيش. شريف، ماشى يا عدوله هاجهز واجيلكم على هناك وهات كام حته طريه معانا كده لزوم القاعده اصلى مخنوق وعلى أخرى. لبست البنات وركبوا العربيه مع فارس وكرم وراحوا على الكورنيش وركنوا على جنب ونزلوا يقعدا على البحر شويه. كرم: الله ما شوفتش احلى ولا اجمل من المنظر ده سبحان الله. همس، انت لسه شوفت حاجه يا ابنى دى اقل حاجه عندنا.
كرم: هههههههه يا ابنى بقى كده ماشى ماشى يا همس هانم. ضحكت يسر على طريقه كلام كرم وهمس مع بعض فضحك فارس هو كمان على ضحك يسر وفرح من جواه أن يسر بدأت تضحك من جواها تانى. كرم: استنوا يا شباب هنا هاروح اجيب ترمس وذرة مشوي من الراجل اللى هناك ده. همس: هاتلى حمص شام يا كرم معاك وانت جاى وخليه يزود الشطه. كرم: نعم يا اختى تعالى معايا هاتى اللى انتى عوزاه انا هاشيل كل ده ازاى لوحدى.
همس: اووووف عليك يالا امشى اودامى يا بيه. كرم: بت انتى لمى نفسك بدل ما احدفك في البحر ده انتى فاهمه. همس: يا مامى خوفت انا. ضحكوا كلهم وراح كرم وهمس علشان يجيبوا الحاجه مع بعض. وفضل فارس ويسر لوحدهم قاعدين يبصوا للبحر وجماله.
راح كرم وهمس علشان يجيبوا الحاجه اللى هما عاوزنها. فارس: مالك يا يسر في حاجه مزعلاكى؟ يسر: ابدا مفيش حاجه. فارس: اصل شايفك حزينه وعلى طول سرحانه. يسر: ابدا مفيش اصل افتكرت بابا الله يرحمه. فارس: الله يرحمه انا جمبك يا يسر ولو عزتى اى حاجه هاتلاقينى جمبك في اى وقت. شريف كان سايق عربيه وجمله عادل وكانوا رايحين على الكافيه اللى على الكورنيش. شريف: مش عارف الدنيا زحمه كده ليه النهارده.
عادل: يا عم دى على طول زحمه كده. شريف: فاجأه وهو سايق لمح يسر وهي قاعده مع فارس على الكورنيش. ركن عربيته ونزل منها بسرعه وراح ناحيه يسر. شريف: الله. الله يا ست هانم ايه ده انشاء الله. ايه هو انتى الصبح مع واحد وباليل مع واحد تانى ولا ايه؟ يسر اتخضت لما شافت شريف وبرقت بعينيها وبصت لفارس. يسر: شريف! فارس بص لشريف وبعزم ما فيه ضربه حته بوكس وقعه على الأرض. نزل عادل من العربيه بسرعه وراح ناحيه شريف وقومه.
شريف: انت حيوان انت مش عارف انا مين؟ فارس: مسكه من لياقة القميص بتاعته وقام رازعه بوكس تانى على وشه وجه عادل يقرب قام واخده بوكس هو كمان. كرم وهمس كانوا عاملين يضحكوا ويهزروا وهما جايببن الحاجه وشيلينها. فاجأه كرم شاف فارس وهو عمال يضرب في اتنين شباب وهما بيضربوا فيه. رمى اللى في أيده بسرعه وراح ناحيه فارس وحاول أنه يهدى الموقف ويعرف ايه اللى بيحصل ده.!
يسر كانت عماله تعيط جامد من المنظر اللى كانت شيفاه. همس جريت على اختها وحاولت تفهم منها ايه اللى بيحصل هي كمان همس: بصت للشباب وبرقت لما لقيت شريف وعادل هما اللى بيتخانقوا مع فارس. همس: شريف خلاص بقى في ايه لده كله. . فارس: انتى تعرفيه يا همس؟ همس: ايوا يا فارس دول زمايلنا في الكليه. فارس: وايه كمان يا همس؟ ايه علاقته بيسر.؟ شريف خد بعضه ومشى هو عادل بعد ما هدومه اتقطعت وركب عربيه ومشى.
كرم: في ايه يا فارس مالهم العيال دى؟ يسر: انا عاوزه اروح حالا. فارس: مفيش مرواح من قبل ما تقوليلى مين ده وبيكلمك كده ازاى.! يسر: انا مسمحلكش انك تكلمنى بالمنظر ده انت مين انت علشان تكلمنى كده.؟ فارس خد بعضه ومشى وسابهم بعد كلام يسر ليه. كرم: فارس: فارس. استنى رايح فين؟ مشى فارس وماردش على اخوه. كرم خد البنات وركبهم العربيه ورجعوا على الفيلا. اول لما دخلوا الفيلا شافتهم إلهام وشافت منظر يسر..
يسر خدت بعضها وطلعت على اوضتها وطلعت همس وراها. الهام في ايه مالكم ايه اللى حصل وفين فارس يا كرم؟ كرم: قالها اهدى بس يا مرات عمى مفيش حاجه اقعدى وانا هاحكيلك على كل اللى حصل. قعدت الهام وحكى لها على كل اللى حصل من ساعه ما راحوا على البحر لحد ما مشى فارس وسابهم. الهام: ومين شريف ده اصلا يا كرم وازى يتكلم مع يسر بالمنظر ده؟ كرم: همس قالت إنه زميلهم في الكليه.
الهام: حتى لو زميلهم في الكليه ازاى يتكلم معاها كده بصفته ايه وازاى يسر تسمحله بكده! دخلت يسر على اوضتها وجريت على سريرها وفضلت تعيط جامد جريت عليها همس وحاولت تهديها وتطبطب على كتفها. همس: اهدى يا يسر مفيش حاجه حصلت للعياط ده كله. يسر: انتى بتقولى ايه انتى مش عارفه شريف قال ايه عليا.
همس: قالك ايه؟ يسر: قالت لاختها على كلام شريف ليها وأنه افتكر أن فارس واحد هي ماشيه معاه. همس: انتى بتقولى ايه؟ انتى خايفه على زعل شريف وأنه يفتكر انك مع واحد تانى. ومش زعلانه على اللى قاله ليكى وطريقه كلامه معاكى اودام فارس. انا لو منك ما اتكلمش معاه تانى ابدا. يسر: انتى بتقولى ايه يا همس أنه بحبه ومش عوزاه يبعد عنى.
انا لازم اتصل بيه وافهمه على كل اللى فهمه غلط وان فارس ده ابن عمى وان انتى وكرم كنتم معانا ومش لوحدنا انا وفارس. همس: انتى مجنونه الظاهر عليكى. همس: انتى لازم ما تتكلميش معاه تانى وتوقفيه عند حده وتفهمى فارس الموضوع من أوله لاخره. علشان ما يخدش عنك فكره وحشه. يسر: فارس ايه وبتاع ايه ما يزعل ولا يتفلق حتى مايهمنيش زعله انا المهم عندى شريف وبس.
طلع النهار وجه يوم جديد وبدأت البنات تجهز نفسها علشان تروح كليتها. الهام: يسر. يسر: نعم يا ماما الهام: انا عاوزة اعرف شريف ده عاوز منك ايه وازاى تسمحيله أنه يتكلم معاكى كده. يسر: ابدا يا ماما ده زميلى في الكليه. الهام: وايه كمان يا يسر؟ يسر: ابدا يا ماما هو كلمنى واحنا في الكليه وقالى أنه معجب بيا. الهام: انا عوزاكى توقفيه عند حده ومالكيش دعوة بيه تانى خالص انتى فاهمه.؟ يسر: حاضر يا ماما.
راحوا على الكليه واول لما دخلوا لقوا شريف واقف هو وأصحابه ومعاهم كام بنت واول لما شاف يسر وهمس قرب منهم ومسك يسر من ايديها وقالها. شريف: تعالى عايزك. همس: في ايه يا شريف سيبها وسبب ايديها انت اتجننت. شريف: بقولك تعالى عاوزك. يسر: قالت لهمس استنى يا همس هاشوفه عاوز ايه واجى على طول. همس: انتى بتستهبلى تشوفى مين ده واحد مجنون. يسر: معلش يا همس هاشوفه على طول واجى.
راحت يسر مع شريف ووصلوا على الكافيتريا بتاعه الكليه وقعدوا على تربيزة. شريف: ممكن تفهمينى يا هانم مين اللى انتى كنتى معاه ده. يسر: وده يهمك؟ شريف: يسر ما تجنينيش انطقى مين ده وكنت معاه ليه؟ يسر: خافت من طريقه شريف معاها. وقالتله ده فارس ابن عمى وكان معانا كرم وهمس وخرجنا نتمشى شويه على البحر. شريف: ابن عمك وبس ولا بينكم حاجه تانيه؟ يسر: لا طبعا مفيش اى حاجه بينا.
شريف: يسر انا بحبك ومش عاوز اشوفك مع اى حد غيرى تانى انتى فاهمه. يسر: بس ده ابن عمى مش اى حد يا شريف. شريف: حتى ولو ابن عمك انتى سمعانى.
كرم: اهدى بقى يا فارس انت هتفضل كده لامتى. احنا من ساعه ما جينا من اسكندريه وانت قالب خلقتك دى. والكل بدأ يلاحظ أن فيه حاجه. فارس: انا هاتجنن يا كرم ازاى الحيوان ده انا سبته من ايدى كان لازم اخلص عليه. كرم: يا سلام وتودى نفسك في داهيه علشان واحد حمار زى ده. حسين: ماله فارس يا ملك من ساعه ما جه من اسكندريه وهو مش على بعضه. ملك: الصراحه يا حسين انا حاسه بحاجه كده ويارب يكون احساسى مظبوط.
حسين: خير يا ملك حاسه بايه؟ ملك: انا حاسه ان فارس بيحب حد من بنات عمه بس مين فيهم انا مش عارفه. وفي اوضه هيام كانت بتتكلم في التليفون مع واحد. هيام: وحشتنى اوى يا كريم. هاتيجوا امتى انا هاتجنن واشوفك يا قلبى. كريم: وانتى وحشتينى اوى يا طنط هيام. هيام: انا جبتلك لعب كتير اوى علشان لما تيجى نلعب بيهم انا وانت.
كريم: شكرا اوى يا طنط هيام. سلمى: ختى العلاج يا ماما بتاع الضغط. الام: ايوا يا سلمى يا بنتى خته من ساعه كده. سلمى: مالك بس يا ماما شكلك مش عاجبني بقالك فترة. الام: هيكون ايه بس يا سلمى. موت اخوكى هدنى يا بنتى ومش عاوزة حاجه تانى من الدنيا غير أنى اطمن عليكى. سلمى: الله يرحمه يا ماما هو احنا هانعوضه تانى كانت حنيه الدنيا فيه.
شريف: يسر اوعدينى يا يسر انك ما تسبنيش مهما يحصل. يسر: اوعدك يا شريف. وعدى كام شهر من الدراسه وشريف ويسر بيتكلموا على طول مع بعض وعلى الموبيل و في الكليه والنادى كمان. وبقى الكل عارف أن يسر حبيبه شريف الجديده مع تحظيرات همس على طول ليها.
طول الفترة اللى فاتت فارس ما كنش يعرف حاجه عن يسر ولا حاول يروح اسكندريه تانى أو حتى يتصل بيها. ولما كانوا بيجوا زيارة لجدتهم ما كنش بيقعد في البيت علشان ما يشوفهاش. وفي الفترة دى كان كرم وهمس بيتكلموا مع بعض على طول في التليفون. أو كرم يعدى عليهم في اسكندريه كل فترة. وفي مرة طلب من همس أنهم يتقابلوا في مكان هادى بعد لما تخلص الكليه علشان عاوزها ضرورى. كرم: الوووو.
ايوا يا همس انا في اسكندريه انتى فين؟ همس: الوووو ايوا يا كرم انا في الكليه ولسه مخلصه كرم: ويسر فين؟ همس: يسر ما راحتش النهاردة عندها شويه برد ونايمه في السرير. كرم: طيب انا هاعدى عليكى دلوقتى ايه رايك ونقعد في اى حته نتكلم شويه. همس: ماشى يا كرم بس الاول هاتصل بماما واقولها أنى معاك. كرم: ماشى يا همس عقبال لما اجيلك تكونى كلمتيها وانا مسافه السكه اكون عندك.
راح كرم لهمس ونزل من عربيته وسلم عليها وفتح لها باب العربيه وركبت. راحوا على مكان هادى على البحر وقعدوا على تربيزة قريبه من المنظر الجميل بتاع البحر. كرم: همس عامله ايه؟ همس: الحمد لله يا كرم. كرم... الصراحه يا همس انا طلبت أنى اشوفك النهاردة علشان اقولك على حاجه مهمه اوى. همس: خير يا كرم في ايه؟ كرم: الصراحه كده يا همس انا معجب بيكى اوى وعلى بلاطه كده ومن غير لف ولا دوران انا بحبك اوى اوى.
همس: سكتت خالص واتكسفت من اعتراف كرم ليها بحبه. كرم: همس. همس: نعم كرم: ايه رايك في اللى انا بقوله ده ويا ترى ايه شعورك من ناحيتى؟ همس: انا... كرم: انتى ايه قولى يا همس؟ همس: انا كمان كرم: انتى كمان ايه انطقى؟ همس: بحبك كرم: يااااااه اخيرا سمعتها منك يا حبيبتى. همس: احم. احم كرم: بحبك اوى اوى يا همس. ومسك ايديها وباسها ووعدها انها هايسعدها ويحافظ عليها.
واتفق معاها أنه يكلم ابوه ويجوا يخطبوها من مامتها وحالها عبد الرحمن. خدها كرم وروحها على الفيلا وسلم على مرات عمه وعلى كريم وسأل على يسر وعرف انها في اوضتها نايمه علشان تعبانه. وحكى لمرات عمه على اللى اتفق عليه هو وهمس وقالها في أقرب وقت هايجى هو وأبوه علشان يخطبوا همس. الهام فرحت اوى من كلام كرم علشان هي عارفه انهم رجاله ويقدروا يحافظوا على بناتها كويس اوى.
في اوضه يسر كانت ماسكه موبيلها وعماله تتكلم مع شريف في التليفون واتفقوا أنهم يخرجوا مع بعض شويه باليل. بس هي قالتله انها تعبانه ومش قادرة. شريف: نعم يا اختى تعبانه يعنى ايه انا لازم اشوفك. يسر: بجد والله يا شريف تعبانه مش قادرة. شريف: براحتك يا ست يسر. وقفل السكه. كرم ركب عربيته ورجع على القصر وكان من جواه فرحان اوى من كلامه مع همس وان همس بتبادله نفس الحب ده. كرم: سلامو عليكو.
حسين: وعليكم السلام اهلا يا كرم حمد الله على السلامه. ملك: حمد لله على السلامه يا ابنى. الجده: حمد لله على السلامه يا حبيبى ازى بنات عمك وكريم. هيام: اه والنبى يا كرم كريم عامل ايه وحشنى اوى اوى ونفسى اشوفه. كرم: هاتشوفبه قريب اوى يا طنط هيام. سلمى: اللى هو ازاى ده يا كرم بيه. وغمزتله بعنيها. سلمى كانت عارفه كل حاجه وعارفه أن كرم بيحب همس و هي اللى شجعته أنه يتكلم معاها.
حسين: خير يا كرم يا ابنى في ايه شكلك كده مبسوط وعاوز تقولنا على حاجه؟ كرم: الصراحه يا حاج ومن غير مقدمات كده انا عاوز اتجوز همس بنت عمى حسين: وخير ما اخترت يا ابنى وانا عمرى ما هلاقى حد احسن من بنات اخويا احمد الله يرحمه. ملك: الف مبروك يا حبيبى عقبال ما نفرح بفارس هو كمان. فارس دخل وكان جاى من برة. فارس: عقبالى في ايه بقى انشاء الله. سلمى بفرحه وهي بتتكلم. كرم هايخطب همس بنت عمك يا فارس.
فارس: خد اخوه في حضنه وقاله الف مبروك يا معلم وربنا يتمملك بخير. كرم: عقبالك يا كبير أنشاء الله انت كمان. وفرح الكل وقاموا باركوا لكرم وهنوه. كرم راح لجدته وباس ايديها وباس رأسها وقالها ادعيلى يا جدتى بكل خير. واتفق حسين وكرم على انهم يروحوا كلهم على اسكندريه علشان يتقدموا لهمس و يعملوا الخطوبه على اخر الاسبوع.
كرم كان حكى لهمس على كل اللى حصل لما حكى ليهم على الموضوع ده واتفق معاها أنه يرجع خلال يومين ويشتروا احلى فستان للخطوبه واحلى شبكه في الدنيا كلها. عدى كذا يوم وبدأت الهام تجهز الفيلا لاستقبال حسين وحماتها وملك وكل اللى في القصر علشان الخطوبه. صحيت البنات بدرى وراحوا على الكوافير علشان يجهزوا نفسهم للخطوبه. وشويه ووصلوا كلهم على الفيلا ورحبت بيهم الهام وكان في استقبالهم عبد الرحمن اخوها.
عبد الرحمن: يا اهلا وسهلا بيكم نورتم والله يا جماعه. الهام: وحشتينى اوى يا ماما وانتى يا سلمى وحشتينى اوى. وقربت من هيام وخدتها بالحضن وانتى والله يا هيام كنتى وحشانى اوى. وكريم مش مبطل زن علشان يروح عندكم البلد علشان يشوفك لولا الدراسه.. الهام: اومال فين فارس يا جماعه مجاش معاكم ليه؟ الصراحه فارس مقدرش يجى وقال في الليله الكبيرة انشاء الله. كرم كان واخد بعضه وهايروح علشان يجيب همس ويسر من الكوافير.
ويادوبك خارج من باب الفيلا لقى فارس اخوه واقف جنب عربيته ومرزوق العربيه احلى زواق بالورد والتل كرم اتفاجأ لما شاف فارس وشاف العربيه. فارس: ما ينفعش اسيبك لوحدك في يوم زى ده يا اخويا. كرم: قرب من أخوه وحضنه وباسه وقاله ما اتحرمش منك يا كبير ابدا وعقبال ليلتك انشاء الله. وصلوا على الكوافير ورن على همس. كرم: الوووو وهو. همس، لقيت تليفونها بيرن فاتكسفت وأدت الموبيل ليسر وقالتلها رودى انتى عليه.
يسر: الوووو ايوا يا عريس في حاجه. كرم: يسر: ازيك ايه الاخبار خلصتم. يسر: اه خلصنا كرم: طيب انا مستنيكم برة انا وفارس. يسر: ماشى يا كرم دقيقتين ونكون عندك. وقف كرم هو وفارس يستنوا البنات اودام الكوافير. وفجاه بيبص لفارس لقاه متنح. بيلف علشان يشوف فارس بيبص على ايه. كرم: بقى همس ويسر خارجين من جوه وشملهم عامل زى الملايكه.
همس كانت لابسه فستان دهبى وحاطه مكياچ حلو اوى و تاج على شعرها مخليها عامله زى الاميرات اللى في الحواديت. يسر: كانت لابسه فستان اسود طويل ومسيبا شعرها على ضهرها وحاطه مكياچ خفيف مخليها حلوة اوى اوى هي كمان قرب كرم من همس وباس ايديها. فارس قرب منهم وسلم على همس وباركلها وسلم على يسر. ركب كرم وهمي في العربيه من ورا وركبت يسر في الكرسى اللى جمب فارس. وركبوا العربيه ووصلوا عند الفيلا.
ونزلوا كلهم وكرم مسك ايد همس ودخلوا على جوه. الكل بارك لهمس وكرم على الخطوبه. وشغلوا الاغانى والعروسه والعريس رقصوا مع بعض شويه. عبد الرحمن: طول السهرة ما شلش عينه من على سلمى وكل لما سلمى تبص عليه تلاقيه باصص لها فاتتكسف وتبص على الأرض.. فارس هو كمان كان طول الوقت بيبص على يسر واد ايه كانت وحشانى وكان نفسه يشوفها اوى. الكل كان فرحان وسعيد. وبالأخص الجده كانت فرحانه اوى اوى الخطوبه كرم وهمس.
يسر كانت ماسكه موبيلها في اديها وفجاه التليفون رن. يسر: ايوا يا شريف في ايه. شريف: انا برة اودام الفيلا اطلعى لما اشوفك. يسر: انت اتجننت برة فين انت بتستهبل لا طبعا مش هاطلع. شريف: اطلعى يا يسر بدل ما ادخل انا عندك جوه. يسر: انت الظاهر عليك عبيط أصبر طيب انا خارجه. فعلا خرجت يسر وطلعت برة لقت شريف واقف اودام الفيلا بعربيته. يسر: ايه يا شريف انت ايه اللى جابك. شريف، وحشتينى قولت اجى اشوفك.
يسر: خلاص شوفتنى يالا بقى امشى قبل ما حد ياخد باله أنى مش موجوده. شريف: بس ايه يا بت الحلاوة دى. يسر: يالا بقى يا شريف بلاش غلاسه. فارس عمال يدور على يسر ماكنش لاقيها وقال لما اطلع اشوفها برة في الجنينه. يادوبك لسه خارج للجنينه شاف يسر.
تحميل محتوى الموضوع
عرض نسخة صالحة للطباعة
أرسل هذا الموضوع إلى صديق
[4]
الدعوات : 2قوة السمعة : 10
رواية للعشق وجه آخر