رواية للعشق وجه آخر

رواية للعشق وجه آخر للكاتبة سحر فرج الفصل الثاني

طلب حسين من فارس وكرم أنهم يجيبوا بسرعه الدكتور لكن مع الأسف لما الدكتور جه قال أن احمد مات نتيجه سكته قلبية فجاه
حسين مكنش مصدق أن احمد مات كده فجاه وهو معاه ومكنش قادر يفكر خالص ان ازاى هايبلغ والدته بكده وهيام مراته وسلمى أخته.
وبالاخص، مراته الهام وعياله في اسكندريه اللى عمره ما شافهم خالص.
خدوه في عربيتهم وركب حسين جنبه
ووصلوا للقصر.

وشالوه ودخلوا بيه وحمد ربنا حسين أن مكنش في حد في مدخل القصر من الحريم.
ودخل بيه على اوضه موجوده جمب اوضه المكتب وقفل الباب عليه وخرج.
وطلع الاول على اوضه والدته وخبط على الباب.
الام، ادخل ياللى بتخبط؟
حسين فتح الباب ودخل وقرب من امه وباس ايدها.
الام، خير يا ابنى انت رجعت من المصنع بدرى ليه كده وفين احمد اخوك؟
حسين، وطى رأسه في الارض ومسك أيد امه وبدأت عيونه تتملى دموع.

الام، في ايه يا حسين اخوك جراله حاجه!
حسين، اخويا، اخويا
الام، انطق يا حسين قلبى هايقف.
حسين، اخوى تعيشى انتى يا امى البقاء لله وبدأ يعيط جامد وبصوت عالى.
الام، مش متخيله الكلام لحد اللحظه دى..
انت بتقول ايه يا حسين؟
اخوك ايه؟
وبكل ما فيها وبكل وجعها على ابنها صرخت صرخه هزت القصر كله وجه كل اللى فيه على صوتها ده.

فتحوا الباب بسرعه وجريت ملك وهيام وسلمى عليها وبصوا لقوا حسين على الأرض وعمال يعيط على اخوه والام في حاله فظيعه وعياط فظيع..
والكل في نفس واحد في ايه؟
حسين، احمد اخويا مااااات
احمد اخويا مااااات.
وبدا الكل بالصراخ والعويل وبدأ فارس يهدى في هيام وكرم يهدى في ملك وفي عمته سلمى.
وحسين قرب من امه وخدها في حضنه وبدأ يطبطب عليها ويهديها. ويقولها ادعيله بالرحمه يا امى هو راح للى ارحم من الكل.

وعدت فترة وبدأ حسين في إبلاغ الجميع بوفاه اخوه وان الدفنه هاتكون تانى يوم الصبح لحد ما أولاده يجوا من السفر.
وطلب حسين من فارس ابنه انه يسافر الاسكندريه ويجيب مرات عمه وولاد عمه بس ما يبلغهمش باللى حصل لعمه احمد لحد ما يجوا هنا الاول.
ويبلغهم أن احمد طلب منه أن يجبهم علشان يشوفوا ستهم علشان هي تعبانه شويه وعاوزة تشوفهم.
وفعلا طلع فارس وغير هدومه وخد العنوان من ابوه وركب عربيته وراح على الاسكندريه.

وفعلا بعد. كام ساعه كان وصل فارس على بيت عمه.
دق جرس الفيلا وجه البواب فتحله وطلب فارس أنه يبلغ الهام هانم ان في واحد عاوزها ضرورى.
وفعلا راح البواب وبلغها وامرته الهام أنه يدخل ويجيبه.
ودخل فارس الفيلا وكانت الهام في استقباله وعرفها بنفسه أنه بيكون فارس ابن حسين اخو احمد.
الهام، اهلا وسهلا بيك يا فارس عمك حكالى كتير عنك وعن كرم اخوك اتفضل.
ودخل فارس وبدأ يحكى لمرات عمه على اللى ابوه قاله عليه يعمله.

بس الهام استغربت أن احمد مكلمهاش وبلغها بنفسه فاستغربت لمده.
وسالت فارس طيب ليه عمك ما بلغنيش بنفسه كنت جهزت نفسى انا والولاد؟
فارس اصل الصراحه عمى احمد وابويا ملخومين جدا بتعب الحاجه اللى جه فجاه ده.
الهام، طيب هاكلمه في التليفون واقولها؟
فارس، الشبكه عندنا وحشه جدا حتى هو كان هايكلمك بس معرفش.
الهام، خلاص يا ابنى انا هاروح ابلغ يسر وهمس وكريم
ويجوا يسلموا عليك وبعدها نجهز نفسنا للسفر معاك.

وفعلا طلعت الهام وبلغت البنات وكريم ونزلوا سلموا على فارس وكانوا فرحانين جدا أنهم اخيرا هايسفروا ويشوفوا ستهم وعمهم وولاد عمهم وعمتهم سلمى اللى باباهم كان بيحكى على طول عنهم..
فارس كان قلبه بيدق جدا اول لما شاف يسر وعرف هي اد ايه جميله جدا جدا حتى عن الصورة اللى كان رسمها ليها في عقله وسرح للحظات وفاق تانى من شروده.
وفعلا بدؤا يجهزوا نفسهم وشنطهم وخدوا بعضهم وركبوا العربيه مع فارس.

وبعد فترة كان الليل دخل عليهم و وصلوا على القصر في القريه وبدؤا ينزلوا من العربيه وامر الحارس أنه يخرج الشنط.
مسكت يسر ايد مامتها وكريم مسك ايد همس وكان معاهم فارس.
واول ما وصلوا عند باب القصر لاحظوا أن في ناس كتير جدا رجاله وحريم فاستغربوا ليه كل الناس دى وازاى يبقوا موجودين في الميعاد اللى متأخر ده!

وكان في استقبالهم عمهم حسين اللى قرب منهم وبدأ يرحب بيهم وسلم على الهام مرات اخوه وعيال اخوه بعد ما عرفهم فارس بيه.
حسين، اهلا بيكم يا جماعه حمد الله على السلامه.
الهام، اهلا بحضرتك يا حاج حسين اومال فين احمد مش واقف معاك ليه..
حسين، اتفضلوا الاول على جوه الحاجه مستنياكم من بدرى.
وفعلا دخلت الهام مع ولادها واتجهوا لاوضتها علشان يسلموا عليها ويطمنوا على صحتها.

وهما داخلين لاحظوا كميه الحريم اللى لابسه اسود وقاعدين يعيطوا.
وقربت منهم واحده كانت لابسه اسود وكانت بتعيط وسلمت على الهام وقالت انها بتكون سلمى اخت احمد.
رحبت بيها الهام ورحبوا بيها البنات وجرى كريم عليها وقالها انتى بقى عمتوا سلمى اللى بابا بيحكلنا عنها كتير اوى..
سلمى بدأت تعيط جامد لما كريم قالها كده
فاستغربوا ليه هي بتعيط وليه الناس دى كلها موجوده.

وخدتهم سلمى وطلعوا على اوضه الام وخبطت على الباب ودخلت.
والام اول ما شفتهم فتحت ايدها الاتنين وخدتهم في حضنها وفضلت تبوس فيهم وتقولهم يا حابيبى يا ولاد الغالى وبدأت تعيط جامد وهي حضناهم.
الهام استغربت اوى من كل اللى بيحصل حواليها وبدأ قلبها يحس أن في حاجه حصلت وسالت عن احمد.
الهام، احمد فين؟
احمد فين يا جماعه حد يرد عليا؟
احمد جراله حاجه؟

بدأت الام وسلمى في العياط جامد وفي ثوانى كانت الهام واقعه على الأرض مغمى عليها وصرخت البنات على امهم وعلى اللى بيحصل كله من حوليهم.
وبدأت البنات في العياط على منظر امهم وعلى كل اللى بيحصل حوليهم.
بدؤا يهدوهم ويفوقوا الهام وبدأت الهام تفتح عينيها ولقت البنات وحماتها وسلمى جمبها وفعلا اتاكدت أن احمد مات وأنه سابهم لوحدهم
الهام، ازاى حصل ازاى قولولى.

وطلبت الهام منهم أنها تشوفه وتودعه قبل ما يدفنوه وعلشان بناته يشوفوه هما كمان
وسلمى اخدت كريم معاها في اوضتها علشان كان عمال يعيط وكان عاوز يشوف باباه.
وفعلا سمح حسين لالهام وبنات اخوه أنهم يودعوا لآخر مرة
ودخل معاهم وبدؤا يعيطوا اول ما شافوه وهداهم حسين وخد بنات اخوه في حضنه وطبطب عليهم وقالهم ادعوله يا بنات ربنا يرحمه ويغفر له ويسكنه فسيح جناته.

وفي اخر الليل كان راح كل واحد على اوضه والهام هي وعياله في اوضه وكانوا قاعدين بس محدش كان عارف ينام من الحزن والالم على احمد.
وطلع النهار و كانوا راحوا المقابر ودفنوه وجه ناس كتير رجاله وحريم من اهل القريه والاهل والاقارب ليؤدوا واجب العزاء.
وانتهى اليوم وجه عليهم الليل وكانت لسه الهام مصدومه من كل اللى حصل ليهم في اليوم ده من ساعه ما راح لهم فارس الاسكندريه لحد ما وصلوا القصر وكأنها بتحلم بكل ده.

وماكنتش مستوعبه أن احمد مات وسأبهم لوحدهم.
وان اول لقاء لأهله دول يكون هو مش موجود معاهم.
ومسكت تليفونها واتصلت باخوها عبد الرحمن علشان تبلغه بكل اللى حصل.
وكان عبد الرحمن اخو الهام الصغير وكان دكتور امراض نساء مشهور جدا في الاسكندرية.
وبلغته الهام بخبر وفاه احمد واتصدم عبد الرحمن من الخبر ده وبلغ أخته أنه مسافه السكه هايكون عندها علشان يقوم بواجب العزاء لاخوات احمد ووالدته.

والبنات كانت حزينه ومش مبطله عياط وكانوا مع جدتهم في اوضتها اللى كانت حابه أنهم يفضلوا معاها.
ودخلوا كل واحد على اوضته ودخلت الهام مع كريم اوضه والبنتين دخلوا اوضه لوحدهم.
وطلع نهار يوم جديد على جميع من في القصر وبدؤا يصحوا.
واول لما صحيت الهام خدت بعضها ونزلت على تحت ولقت حماتها قاعده فسلمت عليها...
كانت سلمى وملك وهيام في المطبخ بيجهزوا الفطار لاهل البيت.

وشويه ونزلت البنات وكريم وسلموا على امهم وعلى جدتهم وشويه نزل حسين وفارس وكرم.
واتجمعوا كلهم على السفرة وبدؤا يفطروا مع بعض لكن كان كل واحد مكسور وحزين وبياكل بالعافيه.
وبعد الفطار طلبت الام انها تدخل مع الهام وحسين اوضه المكتب علشان يتكلموا شويه.
وفعلا دخلوا وحكوا لالهام على كل اللى حصل لاحمد من ساعه ما جه لحد ما مات.

الام، يا بنتى كان نفسى اشوفكم من زمان انتى وولاد الغالى والنصيب أنى ما اشوفكوش غير في ظرف زى ده.
وعاوزة اقولك يا الهام يا بنتى أن ده بيتك وبيت اولادك وكان بيت احمد الله يرحمه.
انتى هنا يا بنتى في وسط اهلك وعيلتك.
حسين، طبعا يا حاجه ده بيت احمد اخويا الله يرحمه وولاده زى ولادى وربنا يعلم معزتهم عندى اد ايه...

فامش عاوزك تحسى انك غريبه ولا في بيت حد غريب لأنه بيتك فعلا وكلنا تحت امرك ولو عزتى اى حاجه انا موجود ورقبتى سدادة لأى شىء.
شكرتهم الهام على كلامهم ده وأنها فعلا كانت بتتمنى انها تشوفهم من قبل كده.
وشويه وباب الاوضه خبط ودخلت الشغاله بتبلغهم أن في واحد اسمه عبد الرحمن عاوز الست الهام.
الهام، ده عبد الرحمن اخويا جه لما عرف باللى حصل لاحمد الله يرحمه.

وخرج حسين والهام واستقبلوا عبد الرحمن وسلم على كل اللى موجود وجريت عليه يسر وهمس وحضنوه وفضلوا يعيطوا وهو يطبطب عليهم ويهديهم.
فارس كان عمال يبص على بنات عمه اللى كانوا صعبانين عليه اوى وعلى منظرهم وعلى اللى حصل لهم وبالأخص كانت نظراته كلها ليسر...
اللى اول ما شافها لفتت نظره من جمالها وحلاوتها مع انها هي وهمس تؤام لكن يسر شدته ليه هو مش عارف ليه؟

يسر كانت حلوة اوى وكانت عيونها عسلى فاتح هي وهمس وشعرهم كستنائى.
شويه وخرجت يسر وهمس وراحوا في جنينه القصر اللى كانت لافته نظرهم من جمالها واشجارها وظهورها الجميله.
شويه وجه فارس وقرب منهم وقالهم انا اسف على اللى حصل لعمى احمد الله يرحمه واسف اننا اول مرة نشوف بعض نشوف بعض في ظروف زى دى.
يسر، شكرا يا فارس
احنا كمان كان نفسنا نشوفكم ونقعد معاكم ومع جدتى وعمى حسين.

همس، فعلا يا فارس كان نفسنا نشوفكم اوى.
وفضلوا يتكلموا ويتعرفوا على بعض اكتر ويعرفهم هو خريج ايه وبيشتغل مع والده في المصنع هو وكرم اخوه.
وفي داخل القصر كان الكل موجود وبيتكلموا بس لاحظت الهام نظرات هيام ليها واد ايه هي كانت نظرات كره.
وشويه استأذن حسين ليقابل الناس اللى جايه تقدم واجب العزاء وفضل عبد الرحمن مع الهام والحاجه وسلمى.

ولاحظت سلمى نظرات عبد الرحمن ليها فقامت واستاذنت ودخلت مع ملك وهيام المطبخ علشان يجهزوا للغدا.
يا ترى ايه اللى هيحصل وتواقعتكم ايه؟
وايه نظرات عبد الرحمن لسلمى دى؟

رواية للعشق وجه آخر للكاتبة سحر فرج الفصل الثالث

وبعد مرور أسبوع من وفاه احمد اتعودت البنات والهام على كل اللى في القصر وحبوهم كلهم الا هيام هي اللى كانت واخده موقف منهم وبالذات من الهام.
وكانت معاملتها غريبه معاهم.
الموضوع ده كان شاغل الهام جدا وكانت عاوزة تعرف سبب معامله هيام ليها ولعيالها كده ليه وبسبب ايه.
فراحت لحماتها علشان تسألها عن السبب ده وقالت اكيد هي اللى هاتوضحلى كره هيام ده سببه ايه.

وفعلا راحت الهام على اوضه حماتها وبعد ما خبطت على الباب والام سمحت لها بالدخول.
الهام: ازي حضرتك يا دلوقتى يا ماما يارب تكونى بخير؟
الام: الحمد لله يا بنتى بخير طول ما انتم معايا ومنورين عليا القصر كله.
الهام: الصراحه يا ماما كنت عاوزة اتكلم معاكى في موضوع مهم ملحظاه من ساعه لما جينا؟
الام: اتفضلى يا بنتى اسألى على كل اللى انتى عاوزة تعرفيه وانا تحت امرك.

الهام: الصراحه يا ماما من ساعه لما جينا وانا ملاحظه معامله هيام ليا ولاولادى غريبه شويه وعلى طول قالبه وشها لينا وقليل اوى لما تقعد معانا في مكان واحد.
الام: مش عارفه اقولك ايه يا الهام الموضوع ده مقفول عليه من زمان.
وماكنتش عاوزة افتحه تانى خالص بس: وسكتت!
الهام: خير يا ماما في ايه وانا لازم اعرف بالضبط ايه اللى بيدور حواليا يمكن انا زعلتها في حاجه وانا مش قصدى.

الام: لا يا بنتى انتى مالكيش ذنب في حاجه. انا هاحكيلك كل حاجه حصلت.
!
الام: الموضوع ده حصل من عشرين سنه من ساعه ما احمد خلص دراسته وكان عاوز يسافر بلاد بره.
ولما فتح الموضوع مع ابوه. ابوه ماكنش راضى انه يسافر وكان عاوزه يفضل هنا و يكمل دراسته.
بس احمد صمم على السفر.
فالأب شرط عليه شرط أنه علشان يسمحله بالسفر لازم يتجوز بنت عمه الاول وبعدها يسافر.

احمد الصراحه ماكنش موافق على الجواز دى وأنه كان بيعتبر هيام بنت عمه دى زى سلمى بالضبط.
واخته اللى اتربت معاهم من ساعه ما عمه ومرات عمه ماتوا في حادثه وهما في الحج.
واتربت مع احمد وحسين وسلمى.
بس الاب كان مصمم على جواز احمد من هيام وبالذات لان حسين كان اتجوز ومعاه عيال.
ولما احمد لقى تصميم ابوه على الجواز ده وافق علشان كان نفسه يسافر بلاد بره ويحقق حلمه.

وبعد جوازهم بفترة ربنا ما اردش ليها انها تخلف من احمد وودناها لداكترة كتير بس ما حصلش نصيب.
وبعد مرور سنه من جوازهم كان سافر احمد ومرجعش غير بعد كام سنه لحد ما خلص دراسته.
وكان في الوقت ده شافك وحبك وطلبك للجواز وأبوه وافق على الجواز بس بشرط أن هيام تفضل على زمته.
وكان بيجى كل كام شهر علشان يطمن عليها وعلى اخواته وعليا.
حتى بعد ما ابوه مات.

وده كان السبب اللى مخلقوش تيجوا وتشوفونا ونشوفكم العمر ده كله يا بنتى.
وطول الوقت اللى الام كانت بتحكى فيه كانت الهام دموعها نازله وماسكه نفسها بالعافيه.
ومش قادرة تصدق أن احمد يعمل معاها كده.
الام: انا عارفه انها صدمه كبيرة ليكى يا بنتى بعد العمر ده كله بس احمد مالوش ذنب في حاجه وأبوه هو السبب.
الهام: انا مش قادرة اتخيل أن احمد يكدب عليا ويخبى عنى حاجه زى كده العمر والسنين دى كلها.

مش قادرة. مش قادرة يا ماما
الام: خدتها في حضنها وطبطبت عليها وقالت لها ليكى حق تزعلى يا بنتى بس السبب في ده كله الاب لأنه كان شديد جدا. جدا ومحدش يقدر يرفضله طلب.
سامحيه يا بنتى واطلبوله الرحمه.
الهام: مش هاقدر يا ماما سامحيني هو كدب عليا وخبى عنى حاجه مهمه زى كده السنين دى كلها اقول للبنات ايه دلوقتى!
أقولهم ابوكوا كان متجوز من بنت عمه ومخبى علينا السنين دى كلها؟
انا لازم امشى؟

الام: تمشى فين يا بنتى استهدى بالله.
الهام: اخد عيالى وارجع اسكندريه انا مش هقدر اقعد هنا دقيقه واحده
الام فضلت تهدى فيها وتترجاها انها تفضل عايشه معاهم علشان هي اتعلقت بالعيال ومش هاتقدر أنهم يبعدوا عنها تانى بعد ما حبتهم وعرفتهم وشافتهم وبالذات أنهم من ريحه المرحوم.

الهام خدت بعضها وراحت على عيالها علشان تبلغهم باللى هي عرفته بس وهي راحه شافت هيام وهي مع كريم وعماله تلعب معاه وبيضحكوا ويهزروا فاستغربت اوى من المنظر ده
وقالت لنفسها أن هيام ملهاش ذنب في اللى حصل.
واحمد هو اللى خبى عليها الموضوع من الاول وكان لازم يعرفها وياخد رأيها قبل الجواز منها.
قربت منهم وابتسمت وقالت لكريم تعال يا كريم علشان تغير هدومك ونجهز شنطنا علشان السفر.

فاستغربت هيام من كلام الهام وأنهم ممكن يسافروا تانى ويفضى البيت عليهم تانى.
بس كان فارس واقف هو كمان على بعد وسمع كلام مرات عمه وأنهم ماشين وراجعين على الاسكندريه بعد ما بدا يتعود عليهم وبذات على يسر اللى خلال الاسبوع ده كان بدأ يعجب بيها وبدأ قلبه يحبها.
راحت الهام على اوضتها وبعد شويه لقت الباب بيخبط ففتحت الباب واتفجأت من اللى شافته واستغربت.

فتحت الهام الباب واستغربت لما شافت هيام هي اللى على الباب
هيام: ممكن نقعد مع بعض شويه ونتكلم.
الهام: اه طبعا اتفضلى ادخلى.
هيام: انا كنت عند مرات عمى وقالتلى انها قالتلك على كل حاجه وانك عرفتى موضوع جوازى انا واحمد الله يرحمه.
انا ماليش ذنب في كل اللى حصل يا الهام.
انا بالعكس أتحرمت من حاجات كتير اوى.
أتحرمت من جوزى اللى اتجوزته يا دوبك لمجرد سنه واحده وبعدها سبنى وسافر بلاد برا.

أتحرمت من الحب والحنان اللى اى واحده بتشوفه من جوزها بعد الجواز لان احمد كان معتبرنى أخته على طول.
أتحرمت من نعمه الخلفه اللى اى واحده ست بتتمنى يكون عندها عيل وتفرح بيه وتلعبه وتربيه ويكبر اودام عنيها.
أتحرمت من حاجات كتير اوى يا الهام وكنت بتجنن طول ما هو بعيد عنى ومعاكى انتى وكنت بسكت ومش بتكلم.
وعارفه أن انتى كمان ملكيش ذنب في حاجه لأنك ماكنتيش عارفه.

انا ماليش اخوات يا الهام وبتمنى اننا نكون اخوات لانى اتعودت عليكم وبذات على كريم حبيته اوى وحسسنى بحاجات كنت محرومه منها فعلشان خاطرى اوعى تمشى
وتخديه وتسبينى تانى في الوحده اللى كنت عايشه فيها ارجوكى يا الهام ارجوكى.
وفضلت تعيط جامد على حالها وعلى كل اللى هي مرت بيه.
الهام دموعها نزلت هي كمان على حاله هيام وصعبت عليها فقربت منها وخدتها في حضنها وقالت لها ماتخفيش يا هيام مش هامشى وهافضل معاكم.

بصت لها هيام وفرحت اوى من كلامها وباستها وحضنتها وشكرتها على القرار ده واتفقوا أنهم ينسوا الماضى واللى حصل فيه لأنهم ملهومش ذنب فيه هما الاتنين.
فارس كان قاعد زعلان من كلام مرات عمه احمد وحاول أنه يكلمها ويخليها تغير رأيها.
شويه ولقى الهام وهيام نازلين من فوق والإبتسامة على وشهم فاستغرب لمنظرهم ده لأنه عارف كل حاجه.
قربت الهام وسلمت عليه وطلبت منه أنه يشوف يسر في الجنينه برة.

وفعلا راح فارس على الجنينه وشاف يسر وهي قاعده تحت الشجرة وسرحانه.
فارس: احم. احم خير يا يسر سرحانه في ايه؟
يسر: ابتسمت وقالت ابدا مفيش حاجه بس خايفه من نتيجه الامتحانات لأنها هاتظهر بكرة.
فارس: يا ستى اطمنى وانشاء الله خير. انتى ناويه على كليه ايه او حابه تدخلى ايه؟
يسر: انشاء الله نفسى ادخل صيدله حابه اوى المجال ده.
فارس: ايوا بقى يا دكتورة يسر.
يسر: احم. احم، احنا هانتريق ولا ايه يا استاذ.؟

فارس ضحك وقالها ابدا والله انا بهزر معاكى.
يسر، اه بحسب.
فارس بص ليسر وشاف ابتسامتها واد ايه هي جميله ورقيقه.
فلاحظت يسر نظرات فارس ليها فاتكسفت ووشها احمر وحاولت انها تغير الموضوع.
فارس لاحظ توتر يسر وقرر أنه يعترف لها باعجابه ده.
فارس: كنت عاوز اقولك على حاجه.
يسر، اتفضل يا فارس انا سمعاك.
فارس الصراحه انا معجب بيكى وبشخصيتك اوى وبطريقه كلامك وطموحك ومستقبلك.

يسر: اتكسفت اوى من كلامه وبصت في الارض وماكنتش عارفه تعمل ايه.
فارس، ايه هاتفضلى ساكته كده.
يسر: الصراحه يا فارس انا مش بفكر في الموضوع ده خالص.
انا الدراسه أهم عندى دلوقتى.
فارس حس بالحرج وحب يغير الموضوع
فارس: خلاص يا يسر انا مش قصدى حاجه
غير أنى اعبرلك عن مشاعرى.
وعدت فترة على وفاه احمد ونتيجه البنات ظهرت.
ودخلوا كليه صيدله هما الاتنين.
وكل مادا بيقربوا من بعض ومن كل اللى في القصر.

وام احمد كانت فرحانه جدا بيهم وبرقبهم من بعض.
وهيام والهام بقوا يعاملوا بعض كويس.
وجه الوقت اللى لازم يرجعوا فيه للاسكندريه.
وجهزوا شنطهم ونزلوا وسلموا على كل الموجودين ووعدتهم الهام انها تحاول تيجى كل فترة وتطمن عليهم كلهم.
وخدوا بعضهم ومشيوا ورجعوا الفيلا بالاسكندريه.
وفي أول يوم دراسى في كليه الصيدله بدؤا يتعرفوا على بنات كتير وأصدقاء.
وكانوا فرحانين جدا أنهم دخلوا الكليه اللى حابينها.

وفي يوم وهما واقفين في الكليه بعد ما حضروا سكشن ليهم.
كانت واقفه يسر وهمس وبنتين صحابهم رضوى وهدير.
بصوا فجاه شافوا عربيه اخر موديل ونازل منها شاب زى القمر وهو شريف
بنات كتير وولاد جريوا عليه وكانوا فرحانين بيه ووقفوا وقعدوا يهزروا وينكتوا وهو يحكلهم عمل ايه امبارح في النادى.
وهو بيحكى كانت يسر وقفه تتفرج عليه وعلى طريقه كلامه.
ومن جواها اعجبت بشخصيته وبطريقته واستايله.

هدير خدت بالها من نظرات إعجاب يسر بيه.
هدير، ايه نحن هنا يا ست يسر.
يسر: هه
رضوى: هي فيها هه.

همس ايه يا بنات سيبوا يسر في حالها.
يسر، ايه في ايه بتقولوا ايه يا بنات.
هدير: لا ابدا ولا حاجه يا اختى يالا بينا.
وهي ماشيه مع البنات واختها لفتت نظر شريف.
من جمالها وحلاوتها وشياكتها.
ولما وصلوا الفيلا..
دخلوا البنات وسلموا على امهم وعلى كريم والهام طلبت من سماح الشغاله انها تجهز الغدا.
وطلعت يسر وهمس على اوضتهم علشان يغيروا هدومم قبل الغدا.

وفجاه تليفون همس رن وبصت في التليفون ولقت اسم كرم ابن عمها حسين.
همس: الوا ازيك يا كرم عامل ايه.
كرم، الحمد لله يا همس انا قولت اطمن عليكم.
همس، احنا تمام الحمد لله.
كرم: وحشتينى.
همس: نعم بتقول ايه؟
كرم: قصدى وحشتونا
همس: اه بحسب
كرم: انا ممكن انزل اسكندريه بعد يومين اخلص مصلحه للمصنع واكيد هاعدى عليكم علشان اسلم على طنط الهام وعلى كريم ويسر.
همس: بس كده مفيش حد تانى ولا ايه نحن هنا.
كرم: لا طبعا ازاى.

وفضلوا يهزروا ويضحكوا.
وبعد لما خلصت مكالمتها مع كرم كانت يسر غيرت هدومها ونزلت على تحت.
وسماح جهزت لهم السفرة ونزلت همس والهام وكريم وبدؤا يتغدوا مع بعض.
همس: كرم اتصل بيا يا ماما وبيسلم عليكم كلكم.
وقالى أنه كمان يومين نازل اسكندريه في شغل وهايعدى علينا.
الهام: انشاء الله يجى بالسلامه الصراحه هو وفارس شابين محترمين جدا.
يسر كانت سرحانه في الشاب الوسيم اللى نزل من عربيته ولم عليه نصف بنات الكليه.

وكان عاجبها ولفت نظرها اوى.
الهام خدت بالها من سرحان يسر.
الهام: يسر مالك؟

يسر: ابدا يا ماما مفيش حاجه صرحت شويه.
همس: ضحكت وغمزت لها.

وفي النادى كان قاعد شريف مع كام واحد من صحابه.
وعمال يفكر في البنت اللى لفتت نظره وشدته دونن عن البنات كلها اللى كانت حوليه.
وقال لنفسه زيها زى غيرها هاتفرق ايه عنهم هاشغلها شويه واخد اللى انا عاوزه ولما ازهق منها اشوف غيرها.
ومسك شريف الموبيل بتاعه وراح طالب رقم يسر.

رواية للعشق وجه آخر للكاتبة سحر فرج الفصل الرابع

الهام: مالك يا يسر
سرحانه في ايه؟
يسر: ابدا يا ماما مفيش حاجه.
الهام، اخبارك في الكليه ايه؟
يسر: تمام يا ماما الحمد لله.
خلصوا غداهم وطلعوا على اوضهم.
ومع بدايه يوم جديد.
صحى الكل وبدؤا يجهزوا علشان يروحوا كليتهم.
وكريم يفطر ويستنى الباص و يروح على مدرسته.
وهما في الكليه كان شريف واقف وحوليه بنات واولاد كتير واول ما يسر وهمس وصلوا قرب منهم وراح علشان يتعرف عليهم.

شريف: صباح الخير يا بنات انا شريف ممكن نتعرف؟
همس: انا همس ودى اختى يسر.
شريف: ابتسم وقالهم انتم توأم صح؟
همس: ابتسمت وقالتله اه عندك مانع!
شريف: لا ابدا
كل ده وكانت يسر ساكته خالص ما بتتكلمش.
شريف: ايه نحن هنا انتى مش معانا ولا ايه؟
يسر: ابتسمت وقالت لا ابدا انا معاكم.
هدير ورضوى كانوا جم وسلموا عليهم واتعرفوا بشريف.
وفضلوا شويه يتكلموا ويتعرفوا على بعض.
وعرف أنهم بيروحوا نفس النادى اللى هو بيروحه.

وشويه شريف استأذن علشان كان وراه محاضرة ولازم يحضرها.
واول ما مشى اتنهدت يسر وده اللى خلى البنات ضحكوا عليها وعلى سهم الله اللى كان نازل عليها طول ما شريف كان واقف معاهم.
وفي القصر كانت الحاجه ام احمد طلبت من سلمى أن تتصل بالهام وتطمن عليها وعلى العيال.
وفعلا اتصلت سلمى وطمنتها وقالت لها أنهم ممكن يجوا يقضوا معاهم يومين اخر الاسبوع.

وفي الكليه كانت يسر قاعده لوحدها في الكافيتريا علشان البنات سبوها وراحوا يتمشوا شويه بين المحاضرات.
وفجاه شافت شريف جاى ناحيتها وقرب منها وقالها؟..
شريف: ممكن اقعد معاكى شويه؟
يسر: اه طبعا اتفضل.
شريف: ايه هما سابوكى وراحوا فين؟
يسر: راحوا يتمشوا.
شريف: وليه ما روحتيش معاهم؟
يسر: عادى مش قادرة الف معاهم في الكليه وقولت اقعد هنا واشرب اى حاجه.
شريف: حد قالك قبل كده انك حلوة اوى.

يسر: اتكسفت وبصت للأرض وقالتله انت جرىء اوى على فكرة.
شريف: حرام اشوف حاجه حلوة وماقولش لصاحبها انها حلوة.
يسر: متشكره يا سيدى.
شريف: انتى بتروحى النادى امتى.
يسر: بنروح يوم الخميس والجمعه علشان الدراسه وكده..
شريف، طب خلاص نبقى نتقابل هناك بقى!
يسر، انشاء الله.
شريف: ممكن تدينى رقمك.
يسر، فكرت شويه كده وادتهوله.
وشويه وجت البنات واستاذن شريف لما نده عليه واحد زميله زميله.

هدير: ايه ده ايه اللى حصل من ورانا اعترفى؟
رضوى: ان غاب القط العب يا فار ولا ايه يا ست يسر؟
همس: بشويش عليها يا بنات هي هاتعترف بكل حاجه دلوقتى اعترفى؟
يسر: في ايه واحده واحده عليا.
مفيش اى حاجه اتكلمنا شويه وخد رقم موبيلى بس.
همس: ايوا بقى يا يسر هانم هي حصلت ولا ايه.
هدير: استنى بس يا همس خليها تحكلنا بالتفصيل عن اللى حصل بالضبط؟
رضوى: بس بقى يا بنات بطلوا رخامه على يسر هي هاتحكيلى انا الاول.

وفضلوا يضحكوا ويهزروا لحد ما خدوا بعضهم ومشيوا بعد. ما خلصوا محاضرتهم.
وفي اوضه يسر كانت قاعده سرحانه في الكلام اللى قاله لها شريف ومن جرأته وطريقه كلامه ومن الاحساس اللى هي حست بيه ناحيته من اول مرة شافته فيها وفجاه!
رن التليفون بتاعها واستغربت لما بصت فيه ولقت اسم شريف.
يسر: الو
شريف: احلى الو سمعتها في حياتى.
يسر: وبعدين معاك
شريف: حرام اقول الحقيقه يعنى
يسر: لا ازاى ودى تيجى.

شريف: يسر انا معجب بيكى من اول ما عينى جت عليكى.
مش عارف انتى عملتيلى ايه بالضبط
انا شوفت بنات كتير قبل كده لكن مفيش حد عمل معايا اللى انتى عملتيه فيا ده.
يسر: شريف انا عملت في ايه
شريف: عيون شريف وقلب شريف يا يسر.
يسر: وبعدين معاك بقى
شريف: كل خير انشاء الله.
انا لازم اشوفك واقعد معاكى بعيد عن الكليه ونتكلم براحتنا يا يسر.
يسر: انا مش بخرج لوحدى خالص ولو خرجت مش بروح غير النادى.

شريف: خلاص هستناكى بكرة في النادى بعد ما تخلصى الكليه علشان انا مش هاروح بكرة معنديش حاجه مهمه.
يسر: سيبنى افكر الاول.
شريف: نعم انتى بتهزرى صح
يسر: لا مش بهزر
شريف: خلاص مش عاوز حاجه منك يا يسر شكلك خايفه منى؟
يسر: لا ابدا وهاخاف منك ليه؟
شريف: خلاص نتقابل بكرة زى ما اتفقنا.
يسر: سكتت شويه
شريف: ايه روحتى فين انتى لسه بتفكرى ولا ايه؟
يسر: لا ابدا خلاص ماشى هاقبلك بكرة في النادى.

همس كانت قاعده في الجنينه بتاعه الفيلا وفجاه لقت كرم ومعاه فارس راحت عليهم ورحبت بيهم.
همس: اهلا وسهلا ايه المفاجاه الحلوة دى؟
كرم: اهلا بيكى يا همس والله مفاجاه فعلا انا كنت لسه هاجى بكرة لولا فارس كان وراه مشوار مهم في اسكندريه هنا فقولت اجى معاه بالمرة.
فارس: ازيك يا همس وازى طنط الهام ويسر وكريم
رحبت بيه همس وخدتهم ودخلت على جوا وسلموا على مرات عمهم.
ونزلت يسر من فوق ورحبت بيهم.

وطول ما هي كانت قاعده كان فارس عمال يبص لها بشوق ولهفه جامد من كتر ما كان مشتاق ليها وكانت وحياه اوى اوى.
وكان طول القاعده كرم وهمس مش مبطلين شد مع بعضهم زى العيال الصغيرة وكل شويه كرم ينرفزها.
وقضوا اليوم مع بعض وكانوا خلاص عاوزين يقوموا علشان يروحوا اى فندق يباتوا فيه.
الهام ما رديتش ابدا أنهم يمشوا وخلتهم يباتوا عندهم في الفيلا.
بعد ما كريم فضل يتحايل عليهم كتير أنهم يباتوا معاهم.

وطلعت شمس يوم جديد وجهزت البنات علشان يروحوا على كلياتهم ولبسوا وراحوا.
وخرج كرم وراح المشوار اللى حتى علشانه.
وفارس راح يخلص كام مشوار بخصوص المصنع.
خلص اليوم وروحت البنات واستاذنت يسر انها تروح النادى علشان هاتقابل زميلتها هناك.
امها وافقت وقالت لها خدى همس معاكى.
همس: لا يا ماما مش قادرة خالص وتعبانه وشويه.
الهام: خلاص يا يسر روحى وماتتاخريش وتعالى بدرى علشان ولاد عمك هنا.

يسر حاضر يا ماما ساعتين تلاته كده وهاجى على طول.

في النادى كان قاعد شريف مستنى يسر وكل شويه يبص في ساعته.
يسر: بصت على بعد لقت شريف قاعد على تربيزة قربت منه وسلمت عليه.
شريف: ياااااه كل ده يا يسر وحشتينى اوى
يسر: بلمت من كلمته واتكسفت وبصت في الارض
شريف: يسر انا بحبك.
يسر: انت بتقول ايه احنا لسه عارفين بعض من يومين اتنين.
شريف: هو ده الحب اللى من اول نظرة.
يسر: ههههههههه
شريف: انتى بتضحكى ليه؟
يسر: لا ابدا اصل كلامك ده بيفكرنى بفيلم ابيض واسود.

فجاه جت عليهم سالى وقربت من شريف وحتط ادها على عنين شريف.
سالى: حزر فزر انا مين يا شوشو؟
يا ترى مين سالى دى؟ وعاوزة ايه من شريف؟
ورد فعل يسر هايكون ايه من تصرف سالى مع شريف ده؟