رواية حب مشروع

رواية حب مشروع للكاتبة الشيماء محمد الفصل الحادي عشر

احمد: سوري سوري يا عم سعيد، ماهيا دي فكرتي المجنونه
عم سعيد: مش فاهم قصدك ايه؟
احمد: قصدي ان انا اللي دبرت خطفهم وانا اللي اقنعته ان سعيد المجرم هرب وانا اللي كنت حابسهم الخطف والحبس كله جزء من خطتي ومرضتش اقولكم لانكم مكنتوش هتوافقوا بس اهو الخطه تمت بنجاح باهر واهم رجعوا لبعض وايمن معرفش حاجه ودي اهم نقطه.

احمد لاحظ ان كلهم بيبصوا وراه فقلبه دق وبص لوراه ولقي ايمن واقف وراه في حاله ذهول وصدمه...
احمد: ايمن، اسمعني انا بس
ايمن: انت خطفت مراتي؟
احمد: كان قصدي بس
ايمن: انت خليت رجاله تخطف مراتي
احمد: ايمن بس اسمعني
ايمن: انت خدرتها ولا ضربتها؟
احمد: اديني فرصه اتكلم
ايمن: انت خليت الرجاله اللي جبتهم يضربوني ويكتفوني ويحسسوني بالعجز لتاني مره قدام مراتي
احمد: يا ايمن اسمع
حبيبه وسميه خرجوا على صوتهم العالي.

ايمن: اسمع ايه؟ ازاي خططت لخطفي انا ومراتي ولا ازاي حبستنا واحنا متربطين كده؟ انا مراتي حامل ولا ده ميهمكش؟
احمد: محدش لمس شعره واحده منها
ايمن: ولو سقطت كنت هتعمل ايه؟ لو تعبت؟ رجالتك كان عندهم اوامر بايه؟
احمد: ايمن انا كنت مراقبكم ومتابع كل حاجه
ايمن: واستمتعت بالعرض بتاعنا
احمد: انا كان قصدي انكم تتصالحو، تتقابلو، تتكلموا تسمعوا بعض، وده اللي عملته؟

ايمن: خدرتها وضربتيني وكتفتنا وهنتنا علشان نسمع بعض، حد قالك اننا محتاجين مساعده
احمد: انتو كنتو هتطلقوا؟
ايمن: وانت مال اهلك انت؟ نطلق؟ نتجوز؟ انت مالك؟ ولا ده ذنبي اني وثقت فيك واعتبرتك زي اخويا.؟ انا دخلتك بيتي؟
احمد: وعلشان دخلت بيتك كان لازم لما اشوفك في ازمه اساعدك تخرج منها.

ايمن: بانك تعيد الازمه دي تاني؟ اقولك حاسس اني رجولتي اتهانت بخطف مراتي وانا متكتف مش عارف اعمل حاجه تقوم تخطفها تاني والمره دي تحطني انا معاها متكتف بجد، ايه قاصد ايه؟ بتحطني في اوضه واحده انا ومراتي متكتفين جنب بعض؟ مراتي قدامي متكتفه مربوطه متوجعه وانا واقف قدامها ولا عارف ولا قادر اعمل حاجه؟ بتعيد اللي حصل بطريقه أسوأ مليون مره؟ على الاقل في المره الاولي مكنتش شايفها بتخيل بس حالتها ايه تقوم انت تعيشني كل حاجه تاني؟ تحسسني بعجزي تاني؟ وتعيشها هيا كابوس خطفها تاني؟ انت ايه يا اخي ما بترحمش؟

احمد: انا ما فكرتش في كل ده؟ انا كل اللي فكرت فيه اجمعكم مع بعض وبس؟
ايمن: ملقتش اي طريقه تجمعنا بيها غير دي؟ يعني ايه ده؟ عذر اقبح من ذنب! معرفتش تقولي مثلا اقابلك وهيا تكلمها ونتقابل! معرفتش مثلا تخترع اي سبب نشوف بعض بيه؟ معرفتش غير انك تخطفنا؟
اطلع بره بيتي لو سمحت؟ وما تورنينيش وشك تاني؟
احمد: ايمن اسمع
ايمن: اطلع بره بيتي
معتز: يا ابني يالا دلوقتي.

ايمن: لا يا عمي حضرتك وجودك هنا على عيني وراسي، كلامي موجه ليه بس؟
احمد سابهم وخرج والكل ساكت محدش قدر ينطق
ايمن: انتو كنتو عارفين انه هيعمل كده؟
عم سعيد: لا مش كده، هو مقالش كده خالص
ايمن: امال قال ايه؟
عم سعيد: قال انه هيضحك عليك ويقولك انه عايز يتجوز حبيبه اول ما عدتها تخلص ويخليك تغير وتتجنن فتتمسك بمراتك
ايمن: وحضرتك وافقته على الفكره دي؟

عم سعيد: انتو كنتو هتطلقوا كنت عايزنا نعمل ايه نتفرج ونسكت حاولت اخليكم تكلموا بعض ومعرفتش هيا قالت لأ وانت قولت مش فاضي هبعتلك امي ولا نسيت؟ فكلنا وافقنا؟
ايمن: كلكم اللي هو مين؟ (بص لمراته) انتي كنتي عارفه؟
عم سعيد: لا مكنتش تعرف حاجه هيا رفضت اي حد فينا يتدخل، الباقي كله عارف قوليله يا سميه
ايمن: وسميه ايه علاقتها؟

سميه: هو كلمني انا في الاول وقابلته وعرض عليا فكرته وبعدها قولت لماما ووافقت والباقي كله عرف
ايمن: كلمك وقابلتيه؟ وانتي من امتي بتقابلي شباب هاه؟؟
سميه: مكنتش قادره اشوف حبيبه ليل نهار بتعيط كده وكنت عايزه اساعدكم باي طريقه
ايمن: جاب تليفونك منين ولا كلمك ازاي؟
سميه: مش عارفه. قالي انه ظابط
ايمن: سميه؟ جاب تليفونك منين؟؟ وما تكدبيش لو سمحتي، ما تقضيش على شويه الاحترام اللي فاضلينلك.

سميه: جابها من تليفونك
ايمن: تليفوني؟ انتي بقى كنتي عارفه انه هيعمل انهي فكره؟ هيتجوز مراتي ولا هيخطفنا؟
سميه: يا ايمن حاول تفهم هو عمل كده حبا فيك
ايمن: انهي فكره كنتي عارفاها؟
سميه: انت رجعت لحبيبتك بسببه
ايمن: انهي فكره؟
سميه: كنت عارفه الاتنين! انا اللي خدرت حبيبه ونقلتها معاه الشقه
ايمن: وهو شالها وطلعها صح؟
سميه: لأ محدش لمسها...
ايمن: وما خفتيش على اختك لما خدرتيها؟ مخفتيش على اللي في بطنها؟

سميه: اتفقنا مع الدكتوره بتاعتها وهيا اللي خدرتها وبعتت معانا اتنين ممرضات يساعدوني في نقلها...
ايمن احنا عملنا كده علشان تتصالحوا
ايمن: مجبتيهاش على هنا ليه؟ خدرتيها هاتيها هنا! ولا متخيله اني لو لقيتها هنا هطردها؟ هرميها في الشارع مثلا؟ انا كنت بعتبرك زي اختي الصغيره وربنا عالم بس من هنا ورايح انتي مجرد اخت مراتي مش اكتر...
سميه: وانا بعتبرك زي اخويا واكتر صدقني.

قاطعها: خلص الكلام، اه على فكره احمد عايز يتجوزك روحي وافقي عليه واتجوزيه علشان لايقين على بعض قوي، بعد اذنكم
ايمن اخد مراته ودخل اوضته وقفل عليهم
فضل رايح جاي، رايح جاي زي المجنون بيكلم في نفسه
حبيبه: ممكن تهدي وتقعد
ايمن: احمد ده صاحبي من سنين انتي فاهمه؟ صاحب عمري؟ ده عايز يجوز ابوه لامي متخيله؟
حبيبه: طيب اهدي
ايمن: انا مش عارف انتي اصلا هاديه كده ازاي؟

حبيبه: انت هتتجنن لانك حاسس زي اول مره ان رجولتك اتهانت واتهزيت والتفكير ده مجاش في بالي لا المره الاولي ولا المره دي! وبعدين انا اول مره كنت خايفه لاني عايزه احافظ على نفسي علشانك لكن المره دي انت كنت معايا فمفيش اي شيئ ممكن يهزني علشان كده انا هاديه، انت كمان اهدي وحاول تشوف هما عملوا كده ليه؟
ايمن: احنا كنا هنلاقي طريقه نرجع بيها لبعض، فاهمه؟ مكنتش هسيبك تروحي مني؟ مكنتش محتاج لحد يرجعلي مراتي؟

حبيبه: انت كنت هتطلقني يا ايمن
ايمن: ومطلقتكيش ليه؟ عرفتي الغيب سيادتك، دي حاجه كانت لسه في علم الغيب
حبيبه: اللي اعرفه وافهمه ان احنا رجعنا لبعض بسبب اللي عملوه وبعدين فعلا محدش لمسني ولا حد لمسك وجابولنا اكل وشرب ومحدش ضايقنا ولو بكلمه زعلان من ايه بقى؟
ايمن: مش هرد عليكي يا حبيبه اقفلي الكلام بقى
ايمن تاني يوم راح شغله ودخل للمدير بتاعه
المدير: اهلا يا ايمن اتفضل.

ايمن: حضرتك ازاي تدخل في لعبه رخيصه زي كده؟
المدير: كل الوسائل مباحه في الحرب والحب، اقتنعت بوجه نظره وهو صاحبك من صغرك وخايف عليك فكان لازم اساعده
ايمن: انتو هتجننوني؟ اي منطق بتتكلموا بيه؟ تخطفوني انا ومراتي وتكرروا مأساه حصلت وتقولوا بتساعدونا؟ دي مساعده ايه دي؟ انا مش قادر افهم
المدير: اول ما تهدي وتفكر بعقلك مش عواطفك هتفهم لوحدك احنا عملنا كده ليه واي منطق اتعاملنا بيه...

احمد حاول مع ايمن يصالحه او يكلمه بس ايمن رفض يسمعه نهائي
الحياه جميله بين حبيبه وايمن وحملها بيكبر ويكبر
جه رمضان وده كان اول رمضان يجي عليهم واتعزموا كلهم في بيت عم سعيد
ايمن: انا مش عايز اروح روحي انتي وماما
حبيبه: ده اول رمضان لينا مع بعض وانت عايز تفطر بعيد عني؟ انتي مش وعدتني؟
ايمن: وعدتك بإيه ان شاءالله؟
حبيبه: وعدتني نفطر مع بعض؟
وهتفطرني بايدك اول تمره
ايمن: اللهم اني صائم، اللهم اخزيك يا شوشو.

حبيبه: مفيش شوشو دلوقتي كلهم اتسلسلوا هنفطر مع بعض و هتنفذ وعدك
ايمن: امري لله
حبيبه: ونعم بالله، هروح انا وماما دلوقتي معاك توصلنا وانت نازل شغلك وانت ترجع علينا اوك
ايمن: اوك بس بسرعه بقى يالا
ايمن جه قبل المغرب بدقايق والعيله كلها معزومه ومن ضمن احمد وابوه معزومين
ايمن دخل وسلم على الكل حتى احمد سلم عليه بس سلم عليه كأنه واحد يدوب يعرفه مش صاحبه ورفيق عمره
حبيبه بتهمس: فاكر وعدك؟

ايمن بابتسامه: فاكره بس ازاي؟ ايدي على كتفك
حبيبه: ماليش دعوه انت وعدت انت تنفذ
ايمن بصلها: نعم يا اختي
صوته طلع عالي فالكل بصلهم
ايمن: موضوع بينا ما تشغلوش بالكم، هو فاضل قد ايه على المغرب؟
عم سعيد: يدوب نوصل المسجد يالا بينا كلنا نصلي ونيجي نفطر، ايمن متوضي ولا تتوضي
ايمن: لا متوضي الحمد لله يالا
راحو الرجاله يصلوا المغرب والبنات مع بعض
فاطمه: حبيبه في حاجه؟ ايمن على صوته كده ليه؟ هو متضايق من احمد؟

حبيبه: لا لا ابدا، بس هو وعدني وعد ومش عارف ينفذه
زينب: وعد بايه؟
حبيبه: اول يوم لينا في رمضان يفطروي بايده ووا يفطرش غير بايدي
زينب: يلهفك قلمين يعني؟؟ تعالي وانا افطر عليكي انا
حبيبه والكل ضحك
حبيبه: لا طبعا، قلمين ايه؟؟ يفطرني، يأكلني بايده
زينب: ودلوقتي اهو في الجامع والرجاله هتفطر هناك عايزاه يعمل ايه؟
حبيبه: يتصرف انا مالي
زينب: طيب هيفطر يا اختي مع ابوكي في الجامع اتهدي بقى ويالا جهزوا الصفره يالا.

حبيبه: مش هيفطر
زينب: هيفطر تراهني؟
حبيبه: اه اراهن على ايه؟

زينب: لو خسرتي تباتي هنا ليلتين جوزك ما يشفكيش فيهم
حبيبه: ولو كسبت تيجي انتي معايا ليلتين في بيتي
زينب: اتفقنا والكل شاهد
فاطمه: بت يا سميه جهزي لامك غيارين علشان هتخسر رهانها، زينب يا حبيبتي ايمن عمره ما رجع في كلمته ده اولا وثانيا بقى بيموت في بنتك
زينب: ربنا يهنيهم ببعض بس ده رمضان وهيفطر مع الحج في الجامع هيقولهم ايه اصلا؟ معلش اصلي هروح افطر مراتي الاول؟ ده انا وعدتها ااكلها بايدي.

المغرب اذن وحبيبه مرضيتش تفطر واخدت كوبيتين عصير اوضتها وجهزتهم
زينب: شكلك هيبقي وحش قوي لو رجع فاطر
حبيبه: مش هيرجع فاطر وبعدين حتى لو فطر هيبقي غصب عنه علشان بابا
اخيرا الرجاله جت واول ما دخلوا
عم سعيد: يا حبيبه
حبيبه: ايوه يا بابا
عم سعيد: صليتوا وجهزتو الاكل يا بنتي
حبيبه: كله جاهز اتفضلوا
عم سعيد: طيب فطري جوزك ده الله اعلم ما رضيش يفطر معانا معرفش مستني ايه؟ خديه وبلي ريقه بتمره يا بنتي ولا اي حاجه.

حبيبه بصت لامها وابتسمت والفرحه مكنتش سايعاها
فاطمه: مش قلتلك يا زينبو
زينب: خدي يا حبيبتي جوزك فطريه وتعالو بسرعه نلحق ناكل.

ايمن وحبيبه طلعوا ودخلوا اوضتها وكانت مجهزه البلح والعصير
ايمن مسك كوبايه العصير وحبيبه حطت ايديها في وسطها
حبيبه: يعني انت ما فطرتش علشان تيجي تفطر على العصير؟ فطرتي انا الاول
مكملتش الكلمه لان ايمن سكتها نهائي و، ،
نزلو تحت يلحقوا يفطروا مع العيله
خلص الفطار وجه العشا وصلوا التراويح ورجعوا والكل ملموم
عم سعيد: بما ان العيله كلها ملمومه فدي فرصه نتكلم فيها
معتز: ربنا يديم المحبه، ايمن يا ابني.

ايمن: ايوه يا عمي
معتز: احمد طالب ايد سميه وبصراحه مستنين موافقتك علشان نحدد معاد للفرح
ايمن: وانا علاقتي ايه بمعاد فرحهم، العروسه واهلها موافقين خلاص انتو حريين، شوفو اللي يناسبكم
عم سعيد: ايمن الاتنين سواء احمد او سميه بيعتبروك اخوهم وما ينفعش فرح يتم او يتحدد الا بموافقه الاخ
ايمن: وما ينفعش برضه اخ يخطف اخوه او مراته
عمي بنتك واتقدملها عريس انتو حريين بقى توافقو او لأ؟ براحتكم.

عم سعيد: يا ايمن قوله صلى الله عليه وسلم: ( تعرض الأعمال في كل إثنين وخميس فيغفر الله لكل امرئ لا يشرك به شيئا، إلا امرأ كانت بينه وبين أخيه شحناء فيقول اتركوا هذين حتى يصطلحا ) رواه مسلم.
ايمن: عمي انا عارف كل الحاجات دي بس هقولك انا بقى انا مش مخاصم حد اللي جوه في قلبي انا حر فيه هو انا مش دخلت سلمت انا مش مخاصم حد
عم سعيد: امال ده اسمه ايه؟

ايمن: والله انا بشوفه بسلم عليه بكلمه عادي، اما نرجع زي الاول فده ما ينفعش في حاجات لو اتكسرت ما بتتصلحش تاني
عم سعيد: هقولك تاني
( أربع من كن فيه كان منافقا خالصا ومن كانت فيه خصلة منهن كانت فيه خصلة من نفاق حتى يدعها، إذا اؤتمن خان وإذا حدث كذب، وإذا عاهد غدر وإذا خاصم فجر ) انت فجرت في الخصام كام شهر عدي وانت كده؟ مراتك اهي قربت تولد واحنا في ايام مفترجه فايه بقى؟

ايمن اتنرفز: انا؟ انا فجرت في الخصام يا عمي؟ وهو عمل ايه؟ ماهو اؤتمن وخان؟ وحدث وكذب؟وعاهد وغدر؟اجر رجاله يضربوني؟ خدر مراتي وخطفها؟ فتح تليفوني وسرق حاجات مالوش حق يسرقها؟ كلم اخت مراتي اللي بعتبرها زي اختي من ورايا؟ عايزني ازاي بعد كل ده ارجع اثق فيه تاني؟ خان ثقتي بكذا طريقه جاي بقى تقولي انا اني فجرت لا يا عمي والله انا حر اصاحب مين واعرف مين، ده كان في يوم اكتر من اخويا وهو محافظش على الاخوه دي، وانا مش مقاطع حد ولا مخاصم حد.

بس انا حر فاني اختار مين يقرب مني ومين اكتفي معاه بالسلام وبس انا حر...
قام وقف وبص لامه ومراته
ايمن: هتروحو ولا قاعدين؟
عم سعيد: يا ابني اقعد هنسهر مع بعض بطل رخامتك دي سيب البنت مع اخواتها
ايمن: انا بسألها هتروح ولا هتقعد يعني هيا حره؟ اما انا اكيد هيا قالتلك اني من الصبح بره البيت فتعبان وعايز اريح ده لو معندكمش مانع؟
عم سعيد: اطلع ريح فوق.

ايمن: لا معلش انا ممكن انام للصبح مش شويه واصحي، هتروحو ولا قاعدين؟
حبيبه وقفت: انا هروح معاك، ماما؟
عم سعيد: مالها امك؟
حبيبه: هتيجي معايا ولا نسيتي؟
زينب: يعني انتي شايفه ينفع اسيب الناس هنا واجي معاكي؟
ايمن: الفطار اصلا عندنا بكره
حبيبه: اهو يالا بقى
زينب: لا يا حبيبتي هجيلك اول ما اصحي خلاص؟
ايمن: عم معتز الفطار عندي بكره ان شاءالله
معتز: لا معلش اعذرنا احنا.

ايمن: ليه؟ انت زي والدي وده شيئ مش هيتغير؟ واحمد خطيب اخت مراتي؟ فين المشكله؟
معتز: لو انا زي ابوك يبقى احمد زي اخوك مش خطيب اخت مراتك؟
ايمن: يعني حضرتك مش عايز تيجي عندي؟
معتز: لا مش حكايه مش عايز اجي بس اعذرنا
ايمن: امال حكايه ايه؟

معتز: حكايه اتنين اخوات من سنين وفجأه يبقوا اغراب انما الاعمال بالنيات ولكل امرئ ما نوي يعني هو ممكن يكون طريقته غلط لكن نيته كانت خير ودي حاجه لصالحه مش ضده فايوه انت من حقك تزعل منه شويه بس مش تقاطعه وتنهي علاقتك بيه انتو مش معرفه يومين
ايمن: يعني انا ينفع مثلا اروح اسرق من الاغنيه واوزع على الفقرا واقول اصل انا قصدي خير؟ مش في كل حاجه فيها الاعمال بالنيات.

معتز: خلاص يا ابني وزي ما انت لسه قايل انت حر تعرف مين وتصاحب مين؟ انت حر بس متجيش تقطع من ناحيه وتوصل من ناحيه تانيه ما ينفعش لان الاتنين ناحيه واحده، انت بترمي عشره سنين في الارض بسبب انه غلط علشان مهنش عليه انك تتحرم من الانسانه اللي بتحبها، مهنش عليك يشوفك بتتعذب ويقف ساكت ده غلطه فمعلش حقك عليا انا انه غلط واتسبب انك رجعت لمراتك وان ابنكم هيتولد بينكم معلش، كان المفروض قال وانا مال اهلي زي ما انت قولت وهو مال اهله كنتو اتطلقتوا ولا رجعتو وهو مال اهله اصلا؟ حقك علينا يا ابني، بس معلش بقى ما تجيش دلوقتي وتقولي انت زي ابويا يا عم معتز لان انا مش ابوك طالما هو مش اخوك اتكل على الله وشوف انت رايح فين؟

ايمن اخد مراته وامه وروح وطول الطريق ساكت واول ما وصلوا بيتهم سابهم ودخل اوضته...

رواية حب مشروع للكاتبة الشيماء محمد الفصل الثاني عشر

فاطمه: ادخلي يا بنتي لجوزك ما تسيبيهوش لوحده
حبيبه: حاضر يا ماما تصبحي على خير
فاطمه: وانتي من اهل الخير ربنا يهدي النفوس يا رب
حبيبه دخلت لجوزها اللي كان راقد في السرير غيرت هيا كمان هدومها وقعدت جنبه
حبيبه: اااه
ايمن: تعبانه؟
حبيبه: هلكانه مش تعبانه، خلاص بقى تعبت وجبت أخرى
ايمن: هانت انتي في السابع اهو
ايمن نام على حجرها وايديه على بطنها بيستمتع بحركات ابنه
ايمن: هيا خبطاته دي بتوجعك؟

حبيبه: لا مش توجعني بس ساعات تضايقني لما يخبط كتير في حته واحده او يصحيني من النوم
ايمن: ربنا يكون في عونك ويقومك ليا بالسلامه
حبيبه بتلعب في شعر جوزها والاتنين ساكتين
ايمن: انتي عمرك ما اتكلمتي عن علاقتي باحمد
حبيبه: دي حاجه ترجعلك انت
ايمن مسك ايدها وباسها في ايديها
ايمن: برضوا مقولتيش رايك ايه؟

حبيبه: طبعا في الاول والاخر دي حاجه ترجعلك بس يا ايمن هو قصده انه يرجعنا لبعض فاعتقد ان ده يغفرله وبعدين احنا فعلا رجعنا لبعض بسببه بغض النظر بقى كنا هنرجع بعدين او هنلاقي طريقه احنا رجعنا بسببه
ايمن: انتي عايزاني اصالحه واعتبر كأن مفيش حاجه حصلت!
حبيبه: انت سألتني عن رأيي وانا قولتهولك لكن تعمل ايه بقى دي حاجه ترجعلك انت
ايمن: ما علينا غيري الموضوع
حبيبه: مش النهارده اتراهنت انا وماما.

ايمن: الرهان حرام المهم اتراهنتو على ايه؟
حبيبه: عليك
ايمن: عليا انا؟ ازاي؟ ومين كسب؟
ايمن اتعدل
حبيبه: انا كسبت طبعا والبركه في حبيب قلبي
ايمن: مين حبيب قلبك ده؟ انتي تعرفي حد من ورايا
حبيبه: بطل غلاسه انت طبعا حبيب قلبي المهم اتراهنا ان انت مش هتفطر وهتيجي تفطرني وماما قالت لأ هيتحرج من ابوكي وهيفطر بس واتراهنا والكل كان شاهد
ايمن: هو انتي قولتيليهم على الاتفاق اللي بينا؟؟ تصدقي بقى كده غلط.

حبيبه: ماما واخواتي مفيش حد غريب فين المشكله؟
ايمن: يا حبيبه الحاجات الخاصه اللي بيني وبينك يا ريت ما تتقالش لحد وبعدين يعني اختك ساره في مشاكل على طول مع جوزها ومش متفقين تيحي انتي تحكي قدامها قد ايه انتي مبسوطه وجوزك واثقه من حبه! راعي مشاعرها ما تتكلميش عن السعاده قدام حد محروم منها ولا عن الصحه قدام حد مريض ولا عن الفلوس قدام حد فقير هو انا اللي هقولك يا حبيبه
حبيبه: انا مفكرتش فيها كده خالص.

ايمن: عارف بس ابقي خلي بالك
تاني يوم بعد الفطار سميه قعدت مع ايمن
سميه: على فكره انا مش هتجوز غير لما انت واحمد تتصالحوا
ايمن: حياتك وانتي حره فيها تتجوزي ما تتجوزيش انتي حره؟ وبعدين انا سبق وجيت على نفسي مره علشانك ساعه ما اتسببت في فشل جوازتك الاولانيه وسوري مش هاجي على نفسي تاني علشانك
سميه: وانت زعلان علشان جيت على نفسك واتجوزت حبيبه؟
ايمن: انتي عارفه ان ده مش قصدي فماتحوريش في الكلام.

سميه: طيب فكها بقى يا ايمن كفايه
ايمن: على فكره انا فاككها انتو اللي مش واخدين بالكم
سابها ومشي ورافض يسمع لحد
رمضان عدي وخلص بتعدي الايام وفاطمه جاتلها قرعه الحج السنه دي الفرحه مكنتش سايعاها
ايمن: مبروك يا قمر
الكل متجمع بيهنيها
فاطمه: بس يا حبيبي مكنتش عايزه اسيب حبيبه دلوقتي خالص دي هتولد على العيد او قبل العيد
ايمن: ولو ولدت فين المشكله؟ هتضيعي الحج علشان حبيبه هتولد؟ وبعدين ما احنا كلنا موجدين n.

زينب: ما تخافيش عليها ابدا روحي وتوكلي وادعيلها ربنا يقومها بالسلامه
فاطمه فعلا سافرت وايمن وحبيبه اول مره البيت يفضي عليهم كده
حبيبه: كنت متخيله اني هبقي براحتي اكتر لو كنا لوحدنا بس البيت مالوش طعم من غيرها
ايمن: انتي عايزه تقعدي لواحدك؟
حبيبه: فكرت بس دلوقتي لأ مامتك بتملي عليا البيت وانت مفيش واهو بنسلي بعض وبعدين مع البيبي هتساعدني لاني مش حاسه اني هعرف اعمل اي حاجه.

ايمن: كله بيتعلم المهم هتسميه ايه؟
حبيبه: في كام اسم في بالي
ايمن: زي ايه؟
حبيبه: انس، حمزه، يزيد، يوسف، يس، عمر
ايمن: انتي بتنقي اسم لابنك ولا الشخصيات اللي بتحبيها؟
حبيبه: المهم ايه رأيك؟ انا كلهم سيان بالنسبالي
ايمن: بحب حمزه وعمر انا كانوا شخصيات ليها وضعها ووزنها سواء حمزه عم الرسول او عمر بن الخطاب.

كان رسول الله صل الله عليه وسلم يقول اللهم اعز الاسلام باحد العمرين: عمر بن الخطاب وعمرو بن هشام وربنا اختار عمر بن الخطاب
حبيبه: يبقى عمر
ايمن: يبقى عمر، يالا يا سي عمر شد حيلك وتعال بقى اشتقنالك ربنا يقومكم بالسلامه
اخيرا يوم وقفه عرفه ايمن كان مقضيه اجازه في بيته مع مراته وبيشاركو بقلوبهم اللي واقفين فعلا على عرفه كلموا فاطمه واتطمنوا عليها
زينب اتصل ببنتها بالليل.

زينب: ايوه يا حبيبه هتيجي انتي وجوزك امتي
حبيبه: الصبح بدري ان شاءالله
زينب: ما تيجي تباتي مع اخواتك هنا ساره اختك هنا واهو الصبح بدري ندبح بدري
حبيبه: اديني دقيقتين واكلمك يا ماما
راحت لجوزها
حبيبه: حبيبي ماما بتقول نروح نبات ايه رأيك؟ اخواتي كلهم مع بعض وساره بايته هناك
ايمن: عايزه تروحي اوديكي تباتي مع اخواتك
حبيبه: وانت؟
ايمن: ما تشغليش بالك بيا انا هجيلكم الصبح بدري.

حبيبه: ايوه بس دي ليله عيد وانا عايزه افضل في حضنك
ايمن: والله دي بقى عندك انتي اختاري يا تباتي في حضني يا وسط اخواتك؟
حبيبه: حضنك طبعا هكلم ماما اقولها هنروحلها بدري
اخر الليل كانوا نايمين حبيبه صحيت على مغص ووجع في ظهرها
قامت دخلت الحمام وخرجت الوجع بيزيد وفي خبط في ظهرها جامد
حبيبه: ايمن يا ايمن
ايمن صحي: ايه؟ عايزه حاجه؟
حبيبه: انا تعبانه قوي اااه
ايمن اتعدل بسرعه: تعبانه ازاي في ايه؟

حبيبه: اعتقد اني بولد وديني المستشفي.

ايمن: نكلم مامتك؟
حبيبه: لأ يمكن ما تتطلعش ولاده والساعه 3 وكلها ساعه ولا اتنين ويصحوا يمكن ابقي كويسه وما تبقاش ولاده دي ليله عيد ما تعملش قلق
ايمن ساعدها تلبس ونزلوا الاتنين مع بعض
حبيبه: سوق بسرعه يا ايمن ارجوك
ايمن: طيب اربطي حزامك
وفعلا ايمن ساق بسرعه جدا وفي العجله الندامه
ظهرت عربيه فجأه قدام ايمن معرفش يتفادها لان اللي سايقها شكله كان سكران لانه بيطوح يمين وشمال وبسرعه و خبطهم وجري.

ايمن اتخبط جامد وفقد الوعي لدقايق وفاق على مراته بتصرخ
ايمن: انتي كويسه حصلك حاجه؟
حبيبه: محصليش حاجه بس هولد يا ايمن ااااه اتصرف
ايمن جه يتحرك بس العربيه اتخبطت جامد من ناحيته والدركسيون نازل على رجليه ومش قادر يتحرك او يخرج بره العربيه
حبيبه: في ايه مالك؟ ايمن في دم في وشك
ايمن: دي خبطه بسيطه ما تشغليش بالك المشكله اني مش قادر اتحرك الدركسيون نزل على رجليا ومتكتف.

حبيبه: هنعمل ايه كلم حد اي حد ااااه اتصرف
ايمن: اكلم ابوكي؟
حبيبه: بابا لأ مش هيعرف يعمل حاجه وهيخاف ويقف مكانه
ايمن: مين طيب؟ الاسعاف محدش بيرد ودي ليله عيد يعني محدش هيعبرنا
حبيبه: كلم احمد
ايمن: احمد؟
حبيبه: مش هيعبرنا هو كمان ااااااه ااااه ايمن الحقني
ايمن كلم احمد اللي اتفاجئ باتصاله بس ما اتأخرش وخلال خمس دقايق كان واصلهم
احمد: قولي اعمل ايه؟
حبيبه بتصرخ وبتتوجع جامد
ايمن: خدها على اقرب مستشفي.

احمد: ايمن انت
قاطعه. : هششش اسكت خدها على المستشفي ومالكش دعوه بيا هيا مش هتستحمل، كلم اي حد يجيلي وروح انت بحبيبه المستشفي
احمد: مش هينفع اسيبك كده؟
حبيبه: احمد هو في ايه؟
ايمن: مفيش بس مش عايز يسيبني متكتف كده خدها واتحرك روح، حبيبه امانه في رقبتك روح وصلها
احمد سند حبيبه وخرجها بره العربيه بس مقدرتش تمشي فبص لايمن
ايمن: مستني ايه؟ شيلها واتحرك
يدوب هيشيلها حبيبه صوتت وزقته.

حبيبه: مش هوصل المستشفي هولد دلوقتي هينزل خلاص، اهه مش هوصل، اااه
احمد: ايمن اعمل ايه؟
حبيبه: ااااه مش قادره
ايمن: خدها في عربيتك وولدها، كلنا واخدين دورات مكثفه في الاسعافات الاوليه...
احمد: بس مش ولاده
حبيبه: حرام عليكم ااااه اعملوا اي حاجه
احمد فتح عربيته ونومها على الكنبه وري وكان معاه بطانيه غطاها بيها وهيا بتصرخ وتصوت وتنادي على ايمن اللي مش عارف ليه ديما في الاوقات دي بيبقي متكتف كده.

حط ايده على جنبه اللي بينزف وغمض عنيه في استسلام
ايمن مكنش الدركسيون اللي واقع عليه بس كان باب العربيه لما اتخبط اتكسر وحديده منه داخله في جنبه
بينزف جامد وبدأ يفقد احساسه بكل جسمه
مفيش الم، مفيش وجع، مش سامع غير صوت حبيبه ومش شايف غيرها بس حتى صوتها بيغيب ويبعد شويه شويه، اخيرا صوت عياط بيبي
صوت اتمني كتير يسمعه.

احمد جاله بسرعه: ايمن ابنك اهو كويس شايفه؟ الاسعاف في الطريق وكل زمايلنا في الطريق وكلها دقايق وهنخرجك من هنا
ايمن: حبيبه؟
احمد: هيا كويسه ما تخافش
ايمن شاف ابنه: عمر ماشي؟
احمد: عمر
ايمن: عمر وحبيبه امانه بين ايديك هتربي عمر زي ابنك واهو مش هيكون غريب هيبقي ابن اخت مراتك اوعي تبخل عليه باي حاجه؟ فاهم؟
احمد: انت بتقول ايه؟ ايمن انت هتربي ابنك، ايمن، ايمن، فتح عنيك شوف ابنك، ايمن.

رواية حب مشروع للكاتبة الشيماء محمد الفصل الثالث عشر

ايمن اخد ابنه باسه واذنله في ودنه ونطقله الشهاده وعطاه لاحمد
ايمن: عمر وحبيبه امانه بين ايديك هتربي عمر زي ابنك واهو مش هيكون غريب هيبقي ابن اخت مراتك اوعي تبخل عليه باي حاجه؟ فاهم؟
احمد: انت بتقول ايه؟ ايمن انت هتربي ابنك، ايمن، ايمن، فتح عنيك شوف ابنك، ايمن
اخيرا سرينات الاسعاف وصلت واصحاب ايمن وصلوا وصوت تكبيرات العيد بدأت
اصوات كتيره متداخله مع بعض ايمن بيسمعها.

احمد عطي البيبي للاسعاف واخدوا حبيبه ومشيوا وهو فضل مع ايمن بيحاولو يخرجوا والمشكله انهم كل ما بيحاولو يفتحوا الباب بينزف زياده ولو خرجوه بالنزيف ده مش هيوصل المستشفي
احمد: مش هينفع كده؟ هنعمل ايه؟
دكتور الاسعاف: لو خرجتوه هينزف وهيموت قبل ما نوصل المستشفي المسافه بعيده
احمد: انا عندي فكره
دكتور: قول
احمد: نقرب المسافه للمستشفي
دكتور: قصدك ايه؟

احمد: قصدي ان احنا ما نخرجوش هنا احنا ناخد العربيه بحالها المستشفي وهناك نخرجه ويبقي كله مستعد والعمليات مستعده بحيث تخرجوه وخلال دقيقه يبقى في العمليات
دكتور: لو تقدر تنقله للمستشفي انا اجهز الباقي
احمد: اقدر اتحرك
احمد استخدم العربيه اللي بتقطر العربيات علشان تسحب العربيه للمستشفي وفعلا بدأوا يتحركوا.

الدكتور اتصل بالمستشفي وقالهم على اللي هيحصل وهما كمان بدؤا يجهزوا العمليات وفريق من الدكاتره بدأ يجهز ويستعد لاستقبال ايمن
احمد ركب جنب ايمن: ما تخافش كله هيبقي مظبوط
ايمن: سامحني يا احمد اني كنت غبي معاك
احمد: هششش مش وقته خالص لما تقوم بالسلامه نكمل خناقنا
ايمن: انت عارف انك زي اخويا واكتر وعلشان كده زعلت منك قوي.

احمد: ايمن عارف وعلشان كده محبتش اضغط عليك انت كنت محتاج وقت تسامحني وانا بصراحه كانت فكرتي متخلفه انت اللي سامحني ودلوقتي اسكت وارتاح وحاول تفكر في حاجات كويسه تخليك تتمسك بالحياه، ابنك وحبيبه محتاجينلك.

فاطمه نايمه وقامت مره واحده مفزوعه على كابوس
واول ما قامت سمعت تكبيرات العيد
قلبها مقبوض مش عارفه ليه؟ بتحاول تتصل بايمن او حبيبه ومحدش بيرد فيهم
بتدعي من كل قلبها ينجي ابنها ومراته وحفيدها
بس جواها قلق غريب مش عارفه مصدره
اتصلت باهل حبيبه تعيد عليهم
فاطمه: كل سنه وانتو طيبين والسنه الجايه تبقوا هنا مكاني ان شاءالله
زينب: ان شاءالله يا حبيبتي
فاطمه: ايمن وحبيبه عندك ولا لسه مجوش؟

زينب: لا قلتلهم يجوا يباتوا بس ما رضيوش وقالوا هيجوا الصبح زمانهم على وصول اهوه اول ما يوصلوا هخليهم يعيدوا عليكي ما تقلقيش انتي
قامت فاطمه وراحت ترمي اول جمره وتدعي ربها يحفظ ابنها اللي ملهاش غيره وطلعت على الحرم تصلي وتدعي وهيا مش عارفه ليه خايفه قوي كده على ابنها!

ايمن اول ما وصل دخلوه اوضه العمليات على طول
حبيبه في اوضتها بعد ما اسعفوها والبيبي كمان بقى في سريره وحبيبه مستغربه ايمن اتأخر ليه؟
حبيبه طلبت الدكتورة بتاعتها وجاتلها
الدكتورة: حاسه بإيه مالك؟
كشفت عليها واتطمنت انها كويسه
حبيبه: انا كويسه انا بس عايزه اتطمن على جوزي هو فين واتأخر ليه؟
الدكتورة: هتطمن عليه وابلغك ما تقلقيش
حبيبه: اه ارجوكي تطمننيني
خرجت الدكتوره من عندها وقابلها احمد.

احمد: حالتها ايه وعامله ايه والبيبي حالته ايه؟
الدكتورة: اهدي كلهم كويسين البيبي كويس وحبيبه كويسه، مش اي حد يقدر يعمل اللي انت عملته
احمد: انا مش عارف اصلا انا كنت بعمل ايه ده ربنا اللي سهلها المهم دلوقتي جوزها يقوم بالسلامه
الدكتورة: طيب هيا بتسأل عليه هتقولها ايه؟

احمد: مش عارف اعمل ايه واهلها اقولهم ايه؟ انا هدخلها اتطمن عليها وهقولها ان ايمن بس اتعور في رجله لانه قالها الدركسيون زنق رجله واطمنها عليه لحد بس ما نعرف حالته ايه؟ ويخرج بإذن الله من العمليات
الدكتورة: خلاص ماشي...
احمد خبط واستني لحد ما قالتله يدخل
احمد: حمدلله على سلامتك وقعتي قلبي، انا مالي انا ومال الولاده هاه؟ بقى كده تعملوها فيا؟

حبيبه: معلش بقى المهم ايمن فين طمني عليه ارجوك محدش عايز يقولي حاجه؟
احمد: هو كويس ما تقلقيش بس انتي عارفه ان رجله اتزنقت في دركسيون العربيه فحاليا هيخدوه يعملوله اشعه وفيها جرح بسيط هيتخيط ويجيلك على طول
وبعدين هو كمان كان هيتجنن ويجيلك ومش هماه رجله لولا الدكاتره منعوه وقالو انها لو مكسوره او مشروخه فحالتها هتبقي اسوأ
حبيبه: رجله بس؟ يعني هو كويس يا احمد؟
احمد: اه يا بنتي الحمد لله كويس.

حبيبه: طيب الحمد لله، ينفع انا اروح اشوفه يا احمد؟
احمد: بقولك هيطلع الاشعه اول ما يخلص لفته دي هجيبهولك هنا او هاخدك ليه خلاص؟
حبيبه: وعد؟
احمد: وعد، المهم دلوقتي هنعمل ايه في عيلتك وسميه بتتصل بيا من بدري ومش عارف ارد عليها؟
حبيبه: لا اوعي تقولهم حاجه هيلغوا العيد والدبح وهيجوا سيبهم يدبحوا الاول وبعدها نقولهم.

احمد: وانتي متخيله انهم مش هيقلقوا واحنا كلنا مش موجودين وهيدبحوا عادي كده؟ دول هيطلعوا يدوروا عليكم في الشوارع
حبيبه: طيب اطلبلي ماما انا هكلمها
احمد: هتقوليلها ايه؟ وبعدين انتي صوتك تعبان وطالع بالعافيه اصلا اول ما تسمع صوتك هتقلق
حبيبه: هات بس هات
احمد طلب امها وعيد عليها وعطاها حبيبه اللي حاولت على قد ما تقدر انها تتكلم عادي
حبيبه: كل سنه وانتو طيبين
زينب: انتي مع احمد ليه وايمن فين؟ في ايه؟

حبيبه: احنا كلنا تمام ومفيش حاجه انا حابسه ايمن وهحبس احمد اهوه معاه ومش هخليهم يخرجوا غير لما يتصالحوا يعني ممكن نتأخر شويه ادبحوا انتو واحنا اول ما يتصالحوا هنجي خلينا نعيد بنفس بقى
زينب للي جنبها: البت حبيبه حبست احمد وايمن ومش هتفتحلهم غير لما يتصالحوا
عم سعيد بصوت عالي: ربنا يعينك عليهم لو عايزاني ابعتلك قوات امن قولي
حبيبه ابتسمت: تسلملي يا حبيبي كل سنه كلكم وانتو طيبين ماما.

زينب: ايوه حبيبتي اديني سميه
سميه جت تكلمها فعطتها احمد وقالتله يقوله ويخليها ما تعرفش حد غير بعد ما يخلصوا
احمد فعلا طلب من سميه تطلع اوضتها علشان يعرف يكلمها وحكالها اللي حصل وحكالها ان حاله ايمن صعبه وحرجه وان حبيبه ما تعرفش وطلب منها اول ما يخلصوا يجولهم بسرعه
سميه عيطت لوحدها واتماسكت ونزلت وفضلت ساكته طول ساعتين لحد ما كانوا بيخلصوا وبيهزروا.

عم سعيد: بت يا سميه مالك هو يعني علشان خطيبك مش موجود ما تعبيريناش كده ولا ايه؟ وبعدين هما اتأخروا ليه؟ اتصلوا بيهم لاحسن واحد فيهم يموت التاني كلميهم يجوا بقى
سميه:
عم سعيد: سميه كلمي اختك يالا
سميه: مش هيجوا محدش فيهم جاي
الكل سكت وكل واحد ساب اللي في ايده وبصولها
زينب: اختك ولدت صح؟ وعلشان كده كان صوتها تعبان؟ انطقي
سميه عيطت: حبيبه كانت هتولد وايمن نزل بيها قبل الفجر على المستشفي وعملوا حادثه.

زينب صوتت والكل وقف وعم سعيد فضل يقول لاحول ولا قوة الا بالله ومعتز كان قلقان عليهم
زينب: اختك جرالها حاجه؟ وجوزها عامل ايه؟ والعيل؟
سميه: اختي كويسه والعيل كويس ولدت بالسلامه
عم سعيد: وايمن؟ ايمن ماله؟
سميه: حالته متأخره قوي وصعبه وفي اوضه العمليات وحبيبه ما تعرفش ان جوزها تعبان احمد قالها انه متعور في رجله بس وهيا بتسأل عليه.

عم سعيد: مقولتيش ليه بس؟ اختك لوحدها وجوزها ربنا يلطف بيه؟ يا بنتي حرام كده يالا بينا كلنا يالا
وصلوا المستشفي واحمد لسه مخرجش برضه من العمليات واحمد وصاهم وفهمهم يقولو ايه لحبيبه ودخلو يطمنوا عليها
زينب بتعيط جامد بس قالت ان صعبان عليها بنتها تولد وهيا مش جنبها
جت الدكتوره واتدخلت وخرجت الكل بره بحجه انها المفروض ترتاح وطلبت من حبيبه تحاول ترتاح.

عم سعيد. زينب، سميه، معتز، احمد كلهم واقفين مستين اي خبر عن ايمن
اخيرا حد خرج وكلهم جريو عليه
الدكتور: مين هنا من عيله ايمن؟
احمد: دول حماه وحماته وانا صاحبه
الدكتور: لا حد من العيله ابوه امه اخوه؟ حد من العيله
احمد: يا دكتور طيب طمنا مراته هنا بس يدوب ولدت هيا بس الموجوده تعتبر من عيلته ولسه ما تعرفش حاجه عنه
الدكتور: لازم تعرف لاننا محتاجين موافقتها،.

احمد: موافقتها على ايه بالظبط؟ يا دكتور لو سمحت وضحلنا
الدكتور: الحديده اللي دخلت في جنبه اذت الكليه الشمال جدا وحاولنا ننقذها بس للاسف صعب فهنضطر نستأصلها خالص كمان جزء من الكبد اضر واستأصلناه بس علشان نستأصل الكليه لازم موافقه الاهل علشان موضوع سرقه الاعضاء
احمد: بس مراته ما تعرفش انه متصاب اصلا؟
الدكتور: مسيرها هتعرف وحاليا الوقت ده محسوب من عمر جوزها، كل دقيقه بتعدي ليها تأثيرها السلبي على جوزها.

الدكتور دخل لحبيبه وهيا اول ما شافته عرفت ان في حاجه غلط لان قلبها مش مطمن
حبيبه: ايمن ماله؟ قول على طول من غير مقدمات لو سمحت ما تخبيش عليا حاجه؟
الدكتور: هدخل في الموضوع على طول، جوز حضرتك اصابته جامده وللاسف الكليه اضررت جدا ومحتاجين موافقتك على استأصالها
حبيبه: وهيعيش ازاي من غير كليه؟
الدكتور: التانيه سليمه وان شاءالله تقوم بالوظيفه كامله.

حبيبه: انا موافقه على اي حاجه المهم انه يقوملي بالسلامه، هو فيه ايه تاني؟ ايه اللي حصله غير الكليه؟ ورجله عامله ايه؟ قولي حالته كلها
الدكتور: الاصابه جامده في الجنب الشمال بس لولا ستر ربنا كانت جت في قلبه لانها من جوه كان بينها وبين قلبه اقل من نص سنتيمتر فكأن حد فاداله قلبه.

استأصلنا جزء من الكبد وجزء بسيط من الامعاء وزي ما قولتلك هنستأصل الكليه الشمال وربنا يسهل وما يحصلش اي مضاعفات، اما رجله فدي مجرد جرح بسيط فيها وكدمات مش اكتر
شدي حيلك بقى وان شاءالله يقوم لك انتي وابنك بالسلامه، بعد اذنكم
حبيبه: دكتور؟ انا عايزه اشوفه
الدكتور: اول ما يخرج من العمليات بإذن الله تشوفيه
الدكتور سابهم وخرج
حبيبه: احمد
احمد: ايوه يا حبيبه
حبيبه: ايمن شاف عمر صح؟

زينب: هيشوفه ازاي بس يا بنتي ماهما جابوه على العمليات على طول وانتي دخلتي ولدتي
احمد: لا يا ست الكل اطمني يا حبيبه ايمن شاف عمر واذنله كمان وقالي انه عمر
زينب: شافه امتي؟
احمد: حبيبه ولدت في عربيتي قبل الاسعاف ما يجوا
زينب: ومين كان معاها؟
حبيبه: احمد كان معايا، ابني اتولد على اديه وايمن كان محبوس جوه العربيه متصاب وبينزف ومقاليش بس قالي ان رجله مزنوقه ضحك عليا.

احمد: انتي كانت حالتك ايه ساعتها يا حبيبه؟ الحمدلله انها جت على قد كده وان شاءالله هتخرجوا كلكم بالسلامه
حبيبه: متشكره يا احمد على وقفتك جنبنا لولا ان انت جيتلنا بسرعه الله اعلم كان حصلنا ايه؟
احمد: انا عمري ما اتأخر على ايمن ابدا احنا اكتر من الاخوات
عم سعيد: ونعم الصاحب والاخ
حبيبه نامت على جنبها وعطتهم ضهرها وبتعيط في صمت وتدعي ان جوزها يقوم بالسلامه.

عم سعيد: وبعدين يا حبيبه؟ ادعيله يا بنتي يقوم بالسلامه مش تعيطي، هتفضلي لامتي تعيطي بصمت كده وفاكرانا مش واخدين بالنا؟ ابنك محتاجلك وجوزك هيحتاجلك فلازم تبقي قويه علشانهم
حبيبه: مقاليش انه تعبان وانا محستش بيه كنت مشغوله بوجعي ونفسي وبس، ما اخدتش بالي انه بينزف، ازاي ما شفتوش؟ كنت بقوله الحقني واقوله اعمل اي حاجه؟ انا جيت عليه قوي.

عم سعيد: يابنتي ما تلوميش نفسك وبعدين ربنا قال ان اصعب وجع في الدنيا هو طلق الولاده فماتستهونيش بوجعك وايمن عارف ده كويس، ايمن عارف كويس فما تلوميش نفسك
ايمن خرج اخيرا من العمليات ودخلوه العنايه المركزه ومنعوا عنه الزياره لحد ما حالته تستقر
حبيبه مصره تروحله وبيحاولوا يمنعوها بس محدش قدر عليها قامت وماشيه بتتسند على الحيطه وسألت عليه فين؟ ومحدش عايز يقولها مكانه
احمد صعبت عليه فوصلها ليه.

احمد: اهو شفتي وصدقتي انهم مانعين عنه الزياره، يالا بقى ارجعك اوضتك
احمد جه يشد حبيبه فزقته بعيد وراحت تخبط على الباب علشان يفتحولها
الممرضه: ممنوع الزياره عنه وبعدين انتي تعبانه روحي اوضتك ارتاحي
حبيبه: انا لازم ادخله، انا لازم اشوفه، حرام عليكم اوعوا سيبوني لازم ادخله لازم
حبيبه بتتكلم وهيا بتعيط امها واختها بيعيطو كمان
الدكتور خرجلها ودخلها لانها صعبت عليه.

الدكتور: ادخلي بس لو سمحتي ما تعمليش اي دوشه وخمس دقايق وهخرجك اتفقنا؟
حبيبه: اه اتفقنا
دخلت حبيبه ودموعها مش عارفه توقفها نهائي
اول مره تشوف حبيبها كده
جهاز تنفس، جهاز رسم قلب، محاليل حاجات كتيره هيا مش عارفاها
باسته: ارجوك اوعي تفكر تسيبني او تتخلي عني؟ انا محتجالك قوي...
الممرضه للدكتور بصوت واطي: مش ده اجهاد ليه؟

الدكتور: بالعكس ده مشجع ليه انه يقوم لحبيبته ده اذا كانت حبيبته وهو بيحبها زي ما هيا بتحبه كده؟
حبيبه: ايمن فتح عنيك وكلمني، قوم يالا شيل ابنك.
عيطت حبيبه على كتفه فالدكتور قرب منها
الدكتور: يالا بقى كفايه كده؟ انتي محتاجه ترتاحي علشان لما يفوق تجيله
حبيبه: طيب خلوني جنبه؟
الدكتور: لا مش هينفع اتفضلي
حبيبه مشيت خطوتين ووقعت من طولها واغمي عليها
شالوها وودوها اوضتها
عدي اول يوم وجه تاني يوم العيد.

فاطمه هتجنن من القلق والخوف المبهم ده وبتتصل بابنها ومراته ومحدش بيرد فاتصلت بزينب
فاطمه: امنتك باغلي ما عندك لتقوليلي ايه اللي حصل؟ ابني عمره ابدا ما اتأخر في الاتصال بيا او انه يرد عليا؟ حبيبه عامله ايه؟ ولدت؟
زينب: ايوه يا حبيبتي ولدت
فاطمه: البيبي جراله حاجه وعلشان كده ما بيكلمونيش؟
زينب: لا ابدا عمر كويس والحمد لله.

فاطمه عيطت: ايمن ماله؟ حصله ايه؟ بقالي ليلتين بحلم بيه وبقوم مفزوعه وادعي ربنا يسترها معاه
زينب: ما تشغليش انتي بس بالك خلصي حجتك وارجعيلنا بالسلامه
فاطمه: زينب انتي ام وعارفه احساسي ايه دلوقتي طمنيني بالله عليكي ابني ماله؟ انا محيلتيش غيره في الدنيا دي؟ طيب خليني اكلمه قوليلي حصله ايه؟
زينب: عملوا حادثه وهما جايين المستشفي وهو اتعور بس في جنبه واهو الحمدلله بقى كويس.

فاطمه عياطها بيزيد: طيب خليني اكلمه
زينب مش عارفه تقولها ايه؟
فاطمه: زينب اديله التليفون خليني اكلمه
زينب: اصله نايم اول ما يصحي ان شاءالله
فاطمه: ما فاقش صح؟ مش نايم؟ لطفك بيا يا رحيم
انا هاخد اول طياره واجيله
زينب: وهتعملي ايه لما تيجي؟
عم سعيد اخد التليفون من مراته.

عم سعيد: شوفي يا ام ايمن انتي في مكان طاهر ومقدس وخارجه من حج وبكره ان شاءالله اخر جمره ترميها بقى في حد يبقى جنب الكعبه ويسيبها ويجي هنا؟ ابنك محتاجك هناك توقفي بين ايدين ربنا وتدعي يقومهولنا بالسلامه؟ توقفي في جوار سيدنا النبي في الروضه الشريفه وتدعي ربنا يلطف بينا في حكمه ويرد قضاؤه ويقومه لمراته وابنه، لكن هتيجي هنا تعملي ايه؟ توقفي تعيطي بره اوضته؟ هيفيده بإيه عياطك.؟ انتي في مكان الدعوه فيه مستجابه تسيبيه وتيجي؟ ده انهي عقل يقول كده؟

فاطمه: بس لازم اكون جنبه
عم سعيد: كلنا جنبه انتي بس ادعيله عندك خلصي الجمرات بكره واطلعي على المدينه زوري الروضه وابقي تعالي على هنا بعدها خلاص
عم سعيد اقنع فاطمه بس برضه قلبها مش مطاوعها تسيب ابنها كده
ايمن اخر النهار بدأ يفوق واول كلمه نطقها
الدكتور: ايه اخيرا قررت ترجعلنا؟ فوق كده بقى؟ هتجنن الناس بره
ايمن: حبيبه؟ حبيبه فين؟
الدكتور: حبيبه دي مراتك؟ صح؟

ايمن: حبيبه كانت بتولد في العربيه وجابت عمر هيا فين وصحتها ايه؟
الدكتور: الظاهر انك بتحبها قوي، {بيبص للممرضه}
طلع الحب متبادل اهو
ايمن: عايز اروحلها
حاول يقوم بس صرخ ومقدرش.

الدكتور: تروح فين اقعد واهدي كده؟ جنبك مفتوح وجسمك متأذي جامد وتقولي اقوم، انسي انك تقوم خالص دلوقتي انسي تماما! انتو شكلكم انتو الاتنين جوز مجانين، مراتك في اوضتها وتقريبا كده هنكتفكوا انتو الاتنين لانها برضه اصرت تيجي وتدخلك واغمي عليها من التعب والاجهاد ايه بقى الدور عليك انت النهارده توقع من طولك اهدي
ايمن: ماهو لازم اشوفها
الدكتور: روحي يا بنتي شوفيها لو فايقه هاتيها هنا
الممرضه: حاضر يا دكتور.

الدكتور: هجبهالك لحد هنا
ايمن: هو احمد هنا؟
الدكتور: احمد ده اللي هو صاحبك ولازق بره وما اتحركش نهائي من قدام الباب! اه بره
ايمن: ينفع يدخل؟
الدكتور: هدخله بس دقيقتين وهخرجه
احمد دخله
ايمن: سامحني يا صاحبي
احمد: اسامحك على ايه بس المهم تقول بالسلامه
ايمن: كنت متخلف قوي وزعلت الكل مني، انت وسميه وابوك وحمايا وحماتي كلكم زعلتكم.

احمد: لا ياسيدي بس لو مصر تصالحني يبقى تقوم بسرعه وتخرج من هنا علشان انا اتجوز بقى
ايمن ابتسم: ان شاءالله
حبيبه دخلوها بالكرسي لحد عنده واول ما شافته قامت وقفت ومسكت ايد جوزها وباستها
هو مسكها وشدها ليه
ايمن: حمدلله على سلامتك يا قمر
حبيبه: حمدلله على سلامتك انتي يا حبيبي ربنا ما يحرمني منك ابدا ابدا يا ايمن
كلهم سابوهم وخرجوا
الممرضه: يا دكتور احنا هنسيبها هنا
الدكتور: هيا احسن علاج ليه حاليا سيبيهم.

ايمن: عامله ايه وحاسه بايه دلوقتي وابننا عامل ايه؟
حبيبه: انا وعمر كويسين المهم انت تقوملنا بالسلامه، ايمن انا مقدرش اعيش من غيرك ابدا ابدا،
ايمن: ان شاءالله نفضل على طول مع بعض، عايز اشوف عمر وانتي جايه تاني هاتيه معاكي...
حبيبه: انا عايزه افضل معاك هنا؟
ايمن: انتي محتاجه ترتاحي ما تتعبيش نفسك معايا.

حبيبه: مامتك هتتجنن عليك صح كلمها طمنها كانت هتيجي بس بابا اقنعها تفضل واحتمال تيجي بكره او بعده بالكتير
ايمن: طيب معاكي تليفون؟
حبيبه: لا مش معايا تليفوني سيبته في البيت اصلا
اول ما اخرج هبعتلك احمد بالتليفون
ايمن كلم مامته وطمنها عليه واقنعها انها تفضل تكمل حجها للاخر وما تجيش علشانه
حبيبه طلبت من احمد ياخد عمر ويوديه لايمن
احمد: ممكن ادخل؟بس معايا ضيف
ايمن: ادخل انت وضيفك.

احمد دخل وكان شايل عمر اللي اول ما ايمن شافه كان عايز يقوم بس احمد منعه
احمد: لا لا خليك مرتاح هو هيجي لحد عندك
احمد رفع السرير لايمن اللي كل ما السرير يترفع يتعب بس بيجي على نفسه لانه عايز يشيل ابنه
شاله وباسه: بسم الله ما شاءالله تبارك الخلاق...
احمد: هو هيبجيبه من بره؟ ابوه وامه زي القمر وجدوده كمان؟ وخصوصا بقى خالته
ايمن جه يضحك بس ما قدرش: يا واطي مش قادر اضحك...

احمد: سوري المهم زمايلك كلهم عايزين يجوا يشوفوك انت وابنك ومراتك
ايمن: انا وابني اه مراتي لأ
احمد: ههه ماشي مراتك دي اضافه من عندي كنت عايز اشوف هتقول ايه؟
ايمن كان بيتحرك بالعافيه وحبيبه كانت بتتحسن بسرعه
احمد وسميه والكل معاهم وامه كمان كانت رجعت
ايمن حبيبه مسنداه لحد ما قعد
احمد: سبحان الله له في ذلك حكم
ايمن: من امتي الايمان ده؟ مالك؟

احمد: اصل ديما يا اخي بعد ما الست تولد جوزها يسندها ويقومها اول مره بقى اشوف الوضع معكوس هيا ولدت وانت اللي بتتسند
الكل ضحك وايمن مش قادر يضحك فكان جنبه ازازه ميه خبطها في وش احمد وطرده بره
قضوا اسبوع في المستشفي وجه وقت الخروج من المستشفي
زينب: تيجوا عندنا البيت مع حبيبه
ايمن: حبيبه؟
زينب: مش والده؟ يبقى تيجي تربعن في بيت ابوها
ولا انت معترض يا ايمن؟

ايمن: وانا من امتي بعترض على حبيبه انها تيجي عندكم؟ هقول زي كل مره براحتها
حبيبه: ماما معلش انا هروح بيتي انتي شايفه الظروف انا مقدرش اسيب جوزي في حالته دي؟
زينب: بس انتي لسه والده
حبيبه: معلش بقى
عم سعيد: سيبي البنت مع جوزها يا زينب..