ايمن امه وقعت بين ايديه وهو واقف مش عارف يعمل ايه او يتصرف ازاي؟ ايمن: انا هاخدها المستشفي انتو مين؟ الناس: احنا كنا موجودين ساعت الحادثه المدير: روح انت بوالدتك واحنا هنتصرف روح ما تقلقش ايمن اخد امه على المستشفي وقابلوه واخدوها منه وهو واقف مستني حد من الدكاتره يطلع يطمنه عقله عاجز عن التفكير او انه يصدق انه لو روح مش هيلاقي حبيبه مستنياه اخيرا دكتور خرج لايمن.
ايمن: خير والدتي مالها؟ في ايه واغمي عليها ليه؟ الدكتور: ايدها مكسوره ورجلها تقريبا مجزوعه وفي كدمات في جسمها فحضرتك المفروض تقولنا ايه السبب؟ ايمن: انا معرفش كل اللي اعرفه انها جاتلي الشغل وقالتلي انها اتعرضت لحادثه خطفوا منها مراتي وهيا وقعوها محتاج افهم منها ايه اللي حصل؟ الدكتور: هيا شويه بسيطه وهتفوق وتقدر تتكلم معاها واتمني ان مرات حضرتك ترجع بالسلامه هنا زمايله راحو له المستشفي.
ايمن: عرفتو ايه؟ وصلتو لحاجه؟ على زميله: مش كتير عربيه كبيره رمادي متفيمه وقفت واخدوا مراتك فيها ايمن: طيب ليه؟ العربيه نمرها ايه؟ موديلها ايه؟ على: محدش ادانا معلومات كتيره الاغلبيه كانوا بعيد اعتقد ان والدتك ممكن تفيدنا اكتر هيا حالتها ايه؟ ايمن: ايديها مكسوره ورجلها متصابه والله اعلم عملوا فيها ايه؟ ( ايمن حط ايديه على راسه الاتنين) على انا مراتي اتخطفت؟ مراتي معاهم؟ مراتي اتخطفت.
كأن ايمن بدا يستوعب ان مراته اتخطفت احمد زميله: ان شاءالله هنرجعها بس حاليا احنا محتاجين صوره لمراتك علشان نوزعها على الكل ونبلغ كل الاقسام والدوريات ولازم نتحرك بسرعه على: فعلا عايزين صوره ليها يا ايمن ايمن مش بيرد عليهم ازاي يدي صور لمراته ويوزعها لكل الناس، ازاي؟ مديره بنفسه جاله كمان.
المدير: انا بلغت كل الدوريات والاقسام الكل حاليا بيدور عليها بس لازم يبقوا عارفين بيدورا على مين عايزين صوره لمراتك يا ايمن! ايمن؟! ايمن ايمن: هاه هاه المدير: عايزين صوره لمراتك ركز وفوق صوره مراتك ايمن: انتو عايزني اجيب صوره لمراتي واوزعها على كل الرجاله والاقسام والدوريات؟ صوره مراتي المنقبه صح؟؟ المدير: عندك استعداد تخسرها؟ ايمن: اخسرها؟ لا طبعا انا مش عايز اخسرها انا معنديش صور ليها معنديش.
احمد: افندم مش مصور مراتك ولا صوره على تليفونك او في البيت ليه يعني؟ ايمن: صور خاصه بينا ما ينفعش حد يشوفها؟ معنديش صور ينفع حد يشوفها احمد: ايمن اتصرف وبسرعه قبل ما اللي خطفوها يوصلوا لمكانهم ويستخبوا بيها اتصرف ايمن بيحاول يفكر يعمل ايه؟ طيب يطلع صوره لمراته بشعرها في حضنه؟ لا مش ينفع اخيرا افتكر ايمن: سميه احمد: سميه مين؟ ايمن: سميه اختها كانت بتصورنا من كام يوم واحنا عندهم ايمن اتصل بسميه وكلمها.
ايمن: سميه ابعتيلي بسرعه كام صوره لحبيبه تكون واضحه فيها قوي ومحترمه ينفع حد يشوفها سميه: حد يشوفها؟ حد مين يا ايمن؟ ايمن: سميه بسرعه وحياتك ابعتي على الواتس او الماسنجر بسرعه سميه: في ايه يا ايمن فهمني الاول ايمن: حبيبه اتخطفت ومحتاج صور ليها نوزعها على الظباط علشان يتعرفوا عليها فهمتي بسرعه بقى بالله عليكي سميه: حاضر ثواني هبعتهم واكلمك تاني سميه بعتتله كام صوره لحبيبه وهيا مع ايمن.
صوره وشهم جنب بعض واحلي ابتسامه على وشها وصوره هو وراها وهيا سانده على صدره وبتضحك ياااه قد ايه هو مفتقدها دلوقتي ومفتقد ابتسامتها دي اللي بيعشقها احمد: ايمن وبعدين؟ انجز الوقت محسوب علينا ايمن بتردد بيمد ايده يديله تليفونه وبعدها افتكر ان في صوره خاصه كتير ايمن: هبعتلك صورها واتس فعلا ايمن بعت لاحمد الصور وبعتهم لعلي احمد وعلى فتحوا الصور واتفاجؤا بمدي جمال مرات صاحبهم وبصوله.
احمد: ايمن انت عارف اننا هنوزع صور مراتك دي للكل، ضباط وعساكر ومحققين وحتى الناس في الشوارع هنسأل الكل؟ ايمن الدموع لمعت في عنيه متخيلش ابدا ان مراته المنقبه هو بنفسه هيوزع صورها على كل الرجاله بص للارض على: اسف يا ايمن احنا عارفين ان الموضوع صعب عليك وخصوصا انها منقبه بس مضطرين وان شاءالله ترجعلك بسرعه ايمن: موبيلها وموبيل امي معاها انا ما جربتش اتصل.
ايمن اتصل بموبيل مراته بس لقاه مقفول واتصل بموبيل امه ورن جرس ايمن: بيرن بتاع ماما الخط اتفتح وسامع انفاس ايمن: الو حبيبه الو الو، رد عليا الووو، انت خطفت مرات الراجل الغلط، انا هقلب الدنيا عليك وهفتح ابواب جهنم كلها عليك، سيب مراتي تمشي وانفد بجلدك وانا مش هدور عليك لكن لو مسيبتهاش صدقني الدنيا دي على كبرها هتضيق عليك ومش هتلاقي مكان تستخبي فيه مني، رد عليا.
الصوت: مراتك جميله قوي، جميله لدرجه بس اكيد انت عارف، مراتك مش هترجعلك تاني انسي! ايمن: اقسم بالله لو لمست شعره منها قاطعه: هتعمل ايه؟ شعرها كله اهوه بين ايديا هتعمل ايه؟ ولا حاجه؟ انت مش بايدك حاجه فمتهددش انت تحت رحمتي انا اقرر هعمل فيك ايه؟ وانا لسه مقررتش باي باي يا نانوس قفل السكه في وشه وايمن هيتجنن... احمد: سمعت اي حاجه مميزه جنبه؟ حددت حاجه؟ عرفت صوته؟
ايمن: لا ولا اي حاجه وكان بيتكلم بالهمس صمت جنبه الدكتور خرج: والدتك فاقت ايمن وزمايله دخلولها ايمن: حمدلله على سلامتك فاطمه: حبيبه؟ حبيبه يا ايمن ايمن: ايه اللي حصل؟ فاطمه: احنا كنا ماشيين في شارع وكان الجو هادي ومره واحده عربيه كبيره كده رمادي وقفت ونزل منها اربع رجاله ضخام واخدوها وزقوني انا معرفتش اعمل حاجه يا ايمن عيطتت وهيا بتتكلم ايمن: اهدي يا امي اهدي بس قوليلي عرفتي رقم العربيه او اي حاجه؟
فاطمه: العربيه مكنش عليها نمر خالص ولا اي حاجه ايمن تليفونه رن وكانت سميه ايمن: ايوه يا سميه سميه: ايه اللي حصل وانت فين دلوقتي؟ ايمن: انا في المستشفي مع امي وهتحرك اهو ادور على حبيبه سميه: طيب لو عرفت حاجه امانه تبلغنا وما تقلقش على مامتك انا هاجي اقعد معاها خرج ايمن يلف على مراته ويشوفوا كل الاماكن المشبوهه صور حبيبه اتوزعت على الكل وتقريبا كل الدوريات بتدور عليها.
اهل حبيبه مع فاطمه في المستشفي بيقعدوا معاها ومش بيسيبوها غير بالليل وسميه بس اللي بتبات معاعا ايمن هيتجنن من غياب مراته بيلف ويلف ويرجع يشوف امه اللي مش مبطله عياط نهائي ورفضت تقول لاي حد على حمل حبيبه علشان ما تزودش قلقهم وخوفهم وحسرتهم وخصوصا ايمن اللي مش عارف يعمل ايه؟ زي المجنون او التايه بيلف حوالين نفسه ايمن مع اصحابه احمد وعلى وحمدي والمدير بتاعهم المدير: وصلتو لايه؟ ايه الجديد؟
احمد: ولا اي حاجه كل ما بنوصل مكان بيكونوا مشيوا منه ديما متأخرين بخطوه المدير: طيب يا ايمن محدش فيهم كلمك او طلب فديه او اي حاجه؟ ايمن: لا محدش كلمني على: اعتقد ممكن يكون الموضوع ليه علاقه بسعيد عبد الصمد ده ايمن: سعيد ده اخد حكم اعدام واعتقد ان الحكم اتنفز كمان المدير: طيب القواضي اللي انت بتشتغل فيها حاليا ايمن: درستهم كلهم ما اعتقدش ان لهم علاقه ##.
فات اسبوع بحاله وحبيبه غايبه ومفيش ولا حس ولا خبر عنها، ايمن كل ما بيوصل لمكان بيكتشف انها كانت فيه ومشيت منه، في مره جاله واحد وقال ان عنده اخبار ايمن قابله وكل زمايله معاه الراجل: انا يا بيه شفت اخر الليل عربيه متقفله وكام راجل ونقلوا فيها واحده مربطينها ايمن مش عارف يسأل ايه او يقول ايه وكأنه عمره ما اشتغل في اي قواضي زي كده احمد: مواصفاتها ايه البنت دي؟ ورولو صورتها.
الراجل: الدنيا كانت ظلمه وبعدين البنت دي كانت لابسه بنطلون وبلوزه كده بحمالات وبصراحه ملامحها مش باينه قوي ايمن: يعني ايه ملامحها مش باينه؟ الراجل: يا بيه وهيا بتركب في عربيه عدت فنورت في وشها وانا شفته بس معلش كانت عنيها ورامه ووشها في دم فمغطي ملامحه مش باينلها ملامح ايمن هيعيط ومش عارف يعمل ايه؟ متكتف عاجز احمد: طيب مفيش اي حاجه مميزه للبنت شعرها مثلا ايمن هو شعرها ايه؟
ايمن: حبيبه شعرها طويل وطويل قوي كمان الراجل: لا يا بيه تبقي مش هيا دي كان شعرها قصير خالص زي الولد تقريبا، نازل شويه من قدام على وشها لكن وري مفيش خالص ايمن: ااحمد ابعت حد المكان ده وشوف تعرف ايه؟ او شوف اي دليل احمد: هبعت اي حد يشوف وانا هروح مكان تاني خلينا حاليا مركزين على مراتك ودي مش مراتك ايمن: دي مرات حد تاني وبنت حد تاني واكيد اهلها هيتجننوا عليها احمد: حاضر يا ايمن حاضر.
تاني يوم ايمن بيلف اليوم كله ورجع اخر النهار المستشفي عند والدته وكانت سميه معاها ايمن: متشكر يا سميه على وقفتك معايا سميه: على ايه بس يا ايمن بس يارب حبيبه ترجع الباب خبط والباب اتفتح ودخل احمد من غير ما يستني حد يقوله ادخل واتقابل هو وسميه سميه ملحقتش تلبس نقابها كان على الكرسي وهتمد ايدها تجيبه بس ملحقتش احمد: انا اسف وقف قدام الكرسي بحيث يوسع لسميه طريقها سميه: اسفه بس عايزه اللي على الكرسي.
احمد بص على الكرسي وشاف النقاب عطاه لسميه احمد: انا اسف جدا جدا ايمن: انجز يا احمد في ايه؟ احمد راح لايمن احمد: الراجل بتاع امبارح جاي وعايزك ضروري وبيقول في اخبار جديده ايمن: طيب هو فين؟ احمد: جبته معايا اختصارا للوقت وواقف بره ايمن خرجله بره وخرجت معاه سميه اللي لبست نقابها واحمد كمان الراجل: يابيه في حاجه مهمه لقتها النهارده في الزباله ايمن: خير لقيت ايه؟
الراجل كان في ايده كيس فتحه لايمن اللي اول ما شافه رجع لوري لحد ما خبط في الحيطه ووقع على الارض وسميه عيطت واحمد واقف متنح معندوش اي كلام ممكن يقوله، حاله صدمه سيطرت عليهم كلهم بقى معقوله اللي هما شيفينه ده؟ هنا تليفون ايمن رن احمد: ايمن رد على تليفونك ايمن ايمن احمد شد تليفون ايمن ورد عليه هو وكان صوت غريب زي ما يكون صوت آله مش انسان احمد حط ايده على التليفون احمد: ايمن دول هما اللي خطفوا حبيبه.
احمد واقف جنب ايمن اللي قاعد في الارض بيحاول يوقفه او يخليه يقوم احمد: ايمن في ايه مالك؟ ايه ده؟ ده مجرد شعر انا مش فاهم في ايه؟ ايمن: ده مش مجرد شعر ده شعر مراتي...شعر حبيبه
سميه: ده شعر حبيبه ايمن انت لازم تتصرف يا ايمن فاطمه خرجت على صوتهم بتعرج فاطمه: في ايه؟ ايه الشعر ده اوعي يكون؟ لقيتوها يا ايمن؟ ايمن ما ردش بس منهار في الارض فاطمه: هيا جرالها حاجه؟ انتو مبتردوش ليه؟ ايمن؟ احمد: لا لا لسه معرفناش حاجه؟ هما بس علشان شعرها لكن لسه مفيش اخبار تعالي يا ست الكل ارتاحي تعالي اخدها احمد ودخلها اوضتها سميه: ايمن ممكن توديني البيت لوسمحت.
ايمن اخدها وروحها وبعد ما كان ماشي غير رأيه ودخل لابوها سميه كانت داخله منهاره من العياط واول ما ايمن دخل زينب جريت عليه هيا وعم سعيد زينب: في اخبار قولي يا ايمن سميه: قصولها شعرها يا ماما شعر حبيبه الطويل قصوه طلعت شعرها من الكيس وعطته لامها اللي شاركتها في العياط.
ايمن: انت جوزتهالي ليه؟ ايه الميزه اللي شفتها فيا؟ انا راجل فاشل، انا قبضت عليك غلط واتهمتك انك بتخطف بنات اتهمت شيخ وامام مسجد انه بيشغل بنات في الدعاره! ايه فكرت ازاي تجوز بنتك لواحد معرفش يفرق بين قواد وشيخ؟ مخك كان فين؟؟
عم سعيد: شفتك فيك راجل يعتمد عليه، شفت فيك واحد غيور على اي بنت وهيتجنن ويقبض على واحد قواد زي ما انت قولت ومهموش مظاهر او اي حاجه تانيه، شفت واحد بيخاف ربنا وبيتقيه في كل اعماله، شفت واحد عنده خلق وعلم ودين، شفت فيك حاجات كتيره ايمن: واديني اهوه قدامك متكتف ومش عارف ارجع مراتي، مش عارف اعمل اي حاجه واقف اهوه عم سعيد وقف فوق ايمن وبيشده يوقفه على رجليه.
عم سعيد: مش عارف تعمل ومش عارف تتصرف لانك حاليا زوج بيدور على زوجته! حبيب بيدور على حبيبته لكن مش ظابط ابدا، المفروض تقف على رجليك انت لما اصريت في خلال 24 ساعه اثبت برائتي وجبت المجرم الحقيقي فين الظابط ده؟ عارف ان الموضوع صعب عليك بس حاليا انسي شويه انها مراتك واركن الزوج على جنب وطلع الظابط وخليه يشوف شغله، طلع الظابط يا ايمن وخليه يرجعلي بنتي، اتحرك وهو ماشي خرجتله زينب.
زينب بصوت مبحوح من كتر العياط زينب: بنتي عمرها ابدا ما بعدت عن حضني، بناتي كلهم ديما في حضني، ابوها شافك وقال انك راجل ويعتمد عليه، فالراجل ولا يرتاح ولا يهداله بال غير ومراته قدام عينه في حضنه، انت مسؤل تجيبلي بنتي انت فاهم؟ بنتي لازم ترجع وانت هترجعها.
ايمن مشي من عنده وبيحاول يرتب افكاره راح لاحمد واخد منه كل المعلومات اللي جمعها وجاب خط سيرهم من اول مكان اتخطفت مراته فيه ومشي وراهم خطوه خطوه كان في مكتبه وجاله طرد مكتوب عليه اسمه كان معاه زمايله بيدرسوا القضيه احمد: مش عارف يا ايمن بس هتفتحه كده على طول مش نعرف في ايه الاول ايمن: وهنعرف في ايه ازاي من غير ما نفتحه؟ ايمن فتحه وبص جواه واتجمد مكانه.
احمد فتح الكرتونه وبص فيها احمد: دي هدوم يا ايمن في ايه؟ ايمن بصوت عالي: دي هدوم مراتي مش هدوم بس، دي هدوم مراتي عارف ده معناه ايه؟ انهم يقلعوها هدومها؟ مراتي مع مجرمين قصولها شعرها وقلعوها هدومها ومش بعيد كمان يكونوا، ، مقدرش يكمل الجمله ويقول انهم ممكن يكونوا اغتصبوها بس كلهم مشاركين صاحبهم نفس الخوف والوجع وحاسين بيه وحاسين بالاهانه انهم مش عارفين يعملوا حاجه.
ايمن لقي كمان علبه صغيره زي علبه خواتم فتحها واول ما فتحها قام لوري لدرجه انه وقع على الارض واصحابه كلهم بصوا ايه اللي في العلبه وما قدروش ينطقوا... العلبه كان فيها كام صباع مقصوصين معرفوش ازاي يهونوا على ايمن او يقولوه ايه؟ قام وقف وراح بص من الشباك بيحاول يسيطر على اعصابه.
جاله تليفون وجري يرد عليه ايمن: عايز ايه؟ انت اكيد عايز حاجه عايز ايه؟ الصوت: عايز اوجعك وبس مراتك ناعمه قوي وجميله قوي ايمن: اقسم بالله لاقتلك واشرب من دمك الصوت: هتقتلني زي ما قتلت ابويا ايمن: ابوك مين؟ هنا الخط اتقفل وكأن اللي بيتكلم غلط وندم احمد: قالك ايه؟ ايمن: قالي اني قتلت ابوه؟ احمد: انت قتلت حد قريب راجع نفسك كده؟ ايمن فضل يعصر دماغه ايمن: قتل بايدي مخصلش انا ما قتلتش حد لكن اتسببت في موت حد.
احمد: مين؟ ايمن: سعيد عبد الصمد مش اتعدم بسببي احمد: ومين عياله ولا اعمارهم ايه؟ ايمن: عنده كذا ولد، انا محتاج ملف قضيته فضل يعملوا كلهم تحريات بحيث يعرفوا مين من عياله ممكن يكون ليه نشاطات اجراميه زي ابوه.
عمل حمله مكثفه وبدأ يهجم على كل الاماكن المشبوهه وقبض على اي حد مشبوه، اي حد ليه سجل عنهم او مسجل خطر، اي حد ليه علاقه بالخطف وبدأ يوسع شبكه معلوماته وبيحقق مع الكل بشراسه، ايمن ركن الزوج والانسان كمان واتحول لوحش شرس ما بيرحمش والكل مستغرب ان ايمن الزوق اتحول للوحش اللي ما بيتفاهمش ابدا وبيحقق ويستجوب بمنتهي العنف.
اخر الليل ايمن بيقعد ويرفع ايده للي خلقه ويطلب منه يرحمه ويقف جنبه ويرجعله روحه تاني اخيرا جتله معلومات عن كام واحد بيتحركوا بواحده مخطوفه في حته تعتبر وكر للمجرمين فاخد قوه كبيره وراح هجم عليهم فتش المكان حته حته ومش لاقي مراته لقي اوضه فيها سرير صغير وحبل صغير وقلبه اتقبض اول ما شاف الحبل ده ايمن: مين كان مربوط بالحبل ده؟ راجل من المجرمين: محدش يا بيه ده مجرد حبل ايمن قرب ومسك الحبل ولقي عليه اثار دم.
ايمن: واثار الدم دي ايه؟؟ الراجل: معرفش يا بيه ايمن: متعرفش اممم يدوب ايمن هيخرج حاجه لمعت في الارض جنب السرير فقرب منها وشالها واتفاجئ انه حلق حبيبه مراته ايمن: ايه ده؟ ولا متعرفش ده ايه؟ الراجل: لا معرفش تلاقيه وقع من اي بنت من البنات اللي بيجوا هنا ايمن: انا اعرفك ده حلق مراتي اللي كانت مربوطه هنا وبما ان السرير لسه دافي فده معناه انها يدوب لسه منقوله من هنا من دقايق وانت هتقولي هيا فين.
الراجل: معرفش سيادتك بتتكلم عن ايه؟ ايمن: امممم متعرفش طيب انا اعرفك ايمن طلع موبيله ووري للراجل صوره حبيبه ايمن: بتكلم عن دي هاه؟ الراجل: مشفتهاش قبل كده ايمن كان بيقدر يميز اللي بيكدب من اللي بيقول الحقيقه والراجل ده كان بيكدب ايمن من غير اي مقدمات طلع مسدسه وضربه رصاصه في رجله والراجل وقع وفضل يصرخ احمد وعلى دخلوله بسرعه احمد: ما ينفعش كده يا ايمن.
ايمن: اللي مش عاجبه يمشي من هنا، وانت افتكرت ولا لسه؟ مراتي فين!؟ على فكره مسدسي مليان ومعنديش اي مانع افضيه كله عليك الراجل: معرفش قولتلك مشفتهاش قبل كده ايمن: اممم مصر برضه ضربه رصاصه تانيه في رجله التانيه بكل برود احمد: مش هينفع كده يا ايمن ايمن: قولتلك مش عاجبك اطلع بره احمد جه يقرب على ايمن رفع مسدسه في وشه.
ايمن: احمد انا ضاعت مني اغلي حاجه في حياتي وبعدها معنديش غالي ومستعد اضحي باي حاجه حتى لو كان حياه صاحبي فابعد عني دلوقتي احمد رجع لوري خطوتين احمد: اهدي يا ايمن اهدي ايمن: مراتي فين؟ مش هعيد سؤالي تاني الراجل: معرفش يا بيه اه اه معرفش ايمن: طالما مش هتفيدني يبقى حياتك كلها ملهاش لازمه ايمن رفع المسدس في وش الراجل ايمن: طالما ما تعرفش يبقى حياتك ما تلزمنيش.
ايمن يدوب رفع صمام الامان والمسدس في وش الراجل فصرخ ايمن: والله ما اعرف هيا كانت هنا بس لما الدنيا اتدربكت الباشا جري وقالي اخلص منها فناديت على اتنين صنايعيه اخدوها يدفنوها واخدوها ما اعرفش بقى هما راحو فين او عملوا ايه والله ما اعرف صدقني الراجل بيتكلم وبيعيط ويصرخ من الالم ايمن شده وقفه وما سكه من هدومه ايمن: دفنتو مراتي؟ الكلام ده من امتي؟ الراجل: اخدوها من نص ساعه بس.
ايمن: راحو فين؟ هيدفنوها فين؟ انطق الراجل: في حته الارض الفاضيه ورانا دي ايمن رماه من ايده وطلع يجري ووراه احمد وعلى وكام واحد من زمايله وراحوا للارض اللي الراجل قالهم عليها راحو الارض ووقفوا كلهم متنحين لان الارض كانت كبيره ومش عارفين يبدؤا منين؟ وياتري هيلحقوها ولا لأ؟ ايمن بيبص حواليه مش عارف يبدأ منين؟ ايمن: اكيد شكل الارض هيكون مختلف لانها لسه محفوره كل واحد يدور في مكان اتحركوا.
كل واحد فعلا راح في اتجاه والكل متوتر وخايف حياه مرات صاحبهم متوقفه حاليا عليهم كلهم ايمن بيدعي انه يلحقها ورجليه شيلاه بالعافيه فجأه وقف قدام مكان على جنب وبدأ يحفر فيه هو مش عارف ليه اختار المكان ده بس احساس جواه او شيئ الهي خلاه يحفر هنا كان بيحفر بإديه بدأ براحه وكل ما بيحفر بيحس اكتر ان مراته في المكان ده كل اصحابه اتلموا عليه يساعدوه، واحد فيهم جاب حاجه يحفر بيها بس ايمن رفض وخاف انها تعور مراته.
بيحفر باديه لحد ما قابله حاجه زي شوال بدؤا يحفروا براحه حواليه لحد ما كله ظهر وفعلا جواه حد ايمن عايز يفتحه مش عارف فاحمد طلع مطواه وقطع الشوال واخيرا لقي حبيبه! شالها وطلعها بره الشوال مسك وشها ومش عارف اذا كانت بتتنفس ولا لأ؟ او قلبها بينبض ولا لأ؟؟ بايد بتترعش حطها على رقبتها بس من رعشه ايده مش عارف اذا كان في نبض ولا لأ؟ احمد: اسمحلي يا ايمن انا ايمن بصله وكأنه مش سامع حد في الدنيا.
احمد حط ايده على رقبة حبيبه وبعد لحظات احمد: ايمن لسه عايشه! في نبض بس ضعيف جدا قوم لازم نوديها المستشفي حالا انا طلبت الاسعاف واكيد هيا على وصول بس مش هي هيعرفوا يدخلوا هنا قوم... ايمن: عايز اغطيها الاول ايمن مسك ايدين حبيبه وشافها بس ايديها كانت كامله وصوابعها موجوده يعنبحهما كانوا بيلعبوا باعصابه بس لكن شعرها للاسف اتقص كله.
على بص حواليه وكان في بيت قريب منهم وناشر غسيل جري وجابله ملايه لف بيها ايمن مراته الاسعاف جت وفي دقايق كانوا في المستشفي ايمن اتصل بفاطمه: ماما انا لقيت حبيبه وجبتها المستشفي فاطمه: حالتها ايه؟ طمني ايمن: كان مغمي عليها وكانت مدفونه ساعت ما لقيناها ونبضها ضعيف ويدوب واصلين ولسه جوه مع الدكاتره ادعيلها يا امي ادعيلها كلمي اهلها وبلغيهم لاني مش قادر اتكلم.
فاطمه لبست بسرعه ونزلت وهيا في الطريق كلمت اهل حبيبه وبلغتهم وخلال عشر دقايق وصلت وبعدها بشويه وصل اهل حبيبه عم سعيد وزينب وسميه كلهم بيتكلموا مع بعض وبيسألوا ايمن اللي واقف بالعافيه اصلا على رجليه عطاهم ضهره وبص للحيطه احمد: يا جماعه احنا لسه ما نعرفش حاجه سميه: طيب هيا كانت فايقه لما جبتوها؟ احمد: لأ سميه: طيب كانت حالتها ايه؟ لقتوها ازاي؟ وضعها كان ايه؟
احمد: للاسف هيا كانت مدفونه، احنا حفرنا وطلعناها يعني في كام جرح في وشها واثار لكدمات بس الحمد لله اننا لحقناها وحاليا مستنين حد من الدكاتره يطلع يطمنا الكل سكت بس صوت العياط زينب: يا عيني عليكي يا بنتي وعلى اللي جرالك، ادفنتي وانتي حيه يا قلبي عم سعيد: انتي يا وليه هتعددي ولا ايه؟ يا تدعي ربنا يقومها بالسلامه يا تسكتي عم سعيد راح لايمن اللي عاطي ضهره للكل وحط ايده على كتفه.
عم سعيد: ما تخافش عليها، زي ما ربنا خلاك تلاقيها هيقومهالك بالسلامه، ربك كبير ورحيم، ايه رأيك لو نروح انا وانت نصلي ركعتين قضاء حاجه ونطلب من ربنا يقومها بالسلامه؟ ايمن: نطمن عليها ونروح، نطمن بس الاول احمد وعلى والباقين وحتى مديرهم اول ما سمع جالهم المدير للضباط: ايه الاخبار حالتها ايه؟ احمد: مستنين حد يخرج يطمنهم المدير: ايمن عامل ايه؟
واحد من الظباط اسمه عادل: اللي يشوفه مع المجرمين وهو جبروت وبيستجوبهم ما يشوفوش دلوقتي وهو ماسك نفسه بالعافيه ولولا الملامه كان عيط احمد: مراته يا اخي عايزه يعمل ايه؟؟ انت مشفتش شكلها كان عامل ازاي؟ وبعدين ايمن متدين ومراته منتقبه لما تتخطف من رجاله معندش اخلاق ولا ضمير يقلعوها نقابها ويلبسوها لبس عريان بالشكل ده ويضربوها وحتى شعرها يقصوه وجوزها واقف متكتف عايزه يعمل ايه؟ حس بيه،.
الظابط عادل: يا تري اغتصبوها؟ ده ايمن ممكن يروح فيها على: وانت مال اهلك ده انت بارد المدير: بس انت وهو، انتو عاملين زي العيال بتوع ابتدائي وبيتناقروا المدير راح لايمن: ايمن ان شاءالله خير ان شاءالله ايمن: ان شاءالله الباب اخيرا اتفتح وخرج دكتور وممرضه الدكتور بيكلم الممرضه: روحي بسرعه وهاتي دكتوره امل شوفيها اتأخرت ليه؟ بسرعه الكل متوتر ومستني على اعصابه ايمن: حالتها ايه؟
الدكتور: الحمدلله حاليا حالتها مستقره احنا عملنا كل المطلوب هيا ضعيفه من عدم التغذيه فبنعملها ارواء طبعا حطينها على جهاز التنفس الصناعي شويه بس لحد ما الرئتين يرجعوا لطبيعتهم، الجروح اللي في جسمها كلها الحمد لله سطحيه ودكتور تجميل بيخيطهم حاليا علشان ما يسيبوش اي اثر في وشها والباقي كله كدمات فالحمد لله مجملا هيا كويسه المشكله هتبقي نفسيه مش عضويه فاطمه: والبيبي يا دكتور؟ نزل ولا؟ الكل بص لفاطمه.
ايمن: بيبي ايه يا امي؟ فاطمه: كانت حامل يا ايمن ولما خرجنا كانت عايزه تعمل حاجه مميزه علشان لما انت ترجع تقولك الدكتور: هو مفيش عندها نزيف او اي حاجه بس ما اقدرش احكم على وضعها، دكتوره النسا دكتوره امل حاليا هيا هتكمل شغلها معاها هيا هتحدد حاله البيبي او اي حاجه تانيه بعد اذنكم ايمن: مقولتيش ليه انها حامل؟
فاطمه: هو انت كنت ناقص هم وقلق وتوتر زياده؟ مكنتش هتقدر تفكر او تعمل اي حاجه مكنلوش لازمه انك تعرف ايمن: يا الله ارحمنا برحمتك يا رب.
عادل لزمايله: تصدق شكل المنقبين دول جامدين، يعني بعيد انها مزه مزه يعني مخليه الواد يلف حوالين نفسه وده مش هيحصل الا اذا كانت جامده احمد: تصدق انت راجل بارد يا اخي! اهو اللي بيلبسوا نقاب بيلبسوه من امثالك دول... احمد سابهم وراح وقف جنب ايمن وشويه والدكتوره خرجت بره تطمنهم الدكتوره: البيبي سليم ووضعه مستقر والرحم كويس جدا الحمل مستقر هيا حاليا في الاسبوع الثامن.
فاطمه: بجد يا دكتوره؟ وهيا كويسه؟؟ وصحتها هتستحمل الحمل؟ الدكتوره: هيا ضعيفه طبعا بس احنا هنغذيها وهنحاول نرجعها لطبيعتها وان شاءالله خلال اسبوع مع المحاليل والتغذيه تاخدوها البيت ايمن: لو سمحتي يا دكتوره هيا؟ يعني؟ الدكتوره: عايز تسأل على ايه قول على طول ايمن: مراتي منقبه وانتي شايفه المنظر اللي جيبناها بيه ومخطوفه من اكتر من اسبوعين واللي خطفوها ضربوها عذبوها قصولها شعرها فعايز اعرف عملوا ايه تاني؟
الدكتورة: اعتقد اني فهمتك انت عايز تسأل هل هما اغتصبوها ولا لأ؟ ايمن: ايوه الدكتورة: الموضوع ده صعب ارد عليه بس اللي اقدر اقولهولك ان مفيش اي اثر لعنف حصل معاها واعتقد انها مش هتسلم نفسها بسهوله كمان مفيش اي اثر لاي حيوانات منويه ايمن: يبقى محدش لمسها؟ امال ليه بتقولي انك مش متأكده؟
الدكتورة: الحيوانات المنويه بتفضل اثارها اربع او خمس ايام بالكتير كمان لو في عنف خلال اسبوع هيخف طالما ما اتكررش وانت بتقول انها اكتر من اسبوعين ايمن: ام فهمتك يعني لو حد اغتصبها من اسبوعين انتي متقدرش تحددي صح؟
الدكتورة: ما تقلقش كلها ساعه بالكتير وتفوق وهنعرف منها كل حاجه بس برضه علشان اطمنك انا ارجح ان محدش لمسها لان برضه لو كان في عنف في بدايه حمل الجنين هينزل فبنسبه 95%محدش لمسها بس ده برضه ما يمنعش ان محدش اتحرش بيها وده لو حصل هيأثر نفسيا كتير، مراتك يا سياده المقدم معندهاش حاليا اي مشاكل طبيه المشاكل هتبقي نفسيه وده للاسف اللي علاجه صعب وده هيتحدد بعد ما تفوق، انا في مكتبي لو عزتو اي شيئ.
ايمن واقف بره الباب بيبص عليها فالممرضه فتحت الباب الممرضه: ممكن تدخل لو تحب ايمن دخل فعلا وقرب منها بيحاول يفتكر شكلها في الاول كان ايه؟ كانت جميله ورقيقه وابتسامتها منوره على طول في وشها حاليا وشها ازرق وفي كدمات كتير وعنيها ورامه ومضروبه جامد وشعرها مفيش حط ايده على وشها وباسها في خدها ايمن: انا اسف ان كل ده حصلك واسف اني مكنتش موجود حقك عليا، ، حقك عليا.
ايمن خرج بره واول ما خرج هيا بدأت تفوق واول ما فاقت ما نطقتش غير كلمه واحده.
حبيبه اهلها جنبها واول ما فتحت عنيها استغربت هيا فين بصت حواليها وشوش كتير قوي حاسه انها عارفاها بس في وش وحيد اتمنت انها تشوفه ومش لقياه غمضت عنيها تاني حبيبه: ايمن، ايمن ايمن بره الباب سمعها غمض عنيه وسند على الحيطه ومقدرش يدخلها عم سعيد: حمدلله على السلامه يا بنتي، ايمن يدوب خارج راح يصلي وهيجي المهم يا بنتي طمنينا عليكي حبيبه: ايمن، ايمن زينب: حبيبت قلبي انا امك حبيبه: ايمن فين؟
زينب: جاي دلوقتي هيجي حبيبه نامت تاني وعم سعيد راح لايمن يشوفه فين ولقاه زي ما توقع بيصلي عم سعيد: حبيبه فاقت وسألت عليك ايمن: الحمدلله ربنا يقومها بالسلا مه عم سعيد: مش هتروحلها؟ ايمن: اكيد هروح طول الوقت ايمن ما بيفارقش باب اوضتها بس مش قادر يدخلها نهائي فاقت تاني بس المره دي كانت احسن ونامت تاني على طول وبعدها حبيبه: سميه سميه: حبيبه فوقتي يا قلبي؟ حبيبه: ايمن فين؟ سميه: طول الوقت قاعد بره.
حبيبه: وليه مدخلش؟ سميه: علشان اعرف اخد راحتي ولا انتي عايزاني انام ازاي وجوزك هنا؟ حبيبه: ينفع تناديله وحشني قوي سميه: ثواني يدوب هتخرج الدكتوره قابلتها في وشها فدخلت معاها تاني وايمن بره الباب مراقب الدكتورة: عامله ايه النهارده؟ ان شاءالله احسن؟ حبيبه: الحمدلله احسن الدكتورة: قلقتي الكل وخصوصا جوزك اللي ما بيفارقش بابك ده نهائي حبيبه: البيبي اخباره ايه؟
الدكتورة: البيبي كويس عايزك بس تشدي حيلك بسرعه وتخرجي من هنا حبيبه: ايمن عرف اني حامل؟ الدكتورة: اهه طبعا الكل عرف ما تقلقيش المهم انا عايزه اتكلم معاكي بس براحتك السؤال اللي ما تقدريش تجاوبي عليه عادي خدي راحتك وخدي وقتك حبيبه: اتفضلي الدكتورة: انا ملقتش فيكي اي اثر لعنف حبيبه: كل اللي في وشي ده ومفيش اثر عنف الدكتورة: مش قصدي على عنف ضرب او كده حبيبه: امال قصدك على ايه؟
الدكتوره: انا كشفت عليكي كشف نسا ومفيش اثر لعنف او مقاومه او حاجه زي كده حبيبه: انتي عايزه تسأليني اذا كانوا اغتصبوني او لأ؟ الدكتورة: بالظبط حد اغتصبك؟ اول ما خطفوكي مثلا؟؟؟ حبيبه سكتت وسرحت اول يوم خطفوها فيه اخدوها في العربيه وغموها قلبها كان هيوقف من الخوف والعجز وصلت لمكان دخلوها فيه ومش شايفه اي حاجه كل اللي سمعاه اصوات صوت1: ايه دي؟ صوت2: بنت خطفينها صوت1: دي بنت؟ لا شكلها ما يديش.
صوت2: ماشيه هيا ومامتها صوت1: ولابسه كده ليه؟ صوت2: منقبه يا باشا... صوت1: وانت خاطفين منقبه ليه؟ صوت2: المنقبه دي اهلها هيخافوا عليها قوي وبعدين هيدفعوا اللي نطلبه علشان نرجعها سليمه وبعدين الباشا هو طلب دي بالذات نخطفها صوت 1: طيب وريني شكلها يستاهل ولا؟ حبيبه: لألألأ محدش فيكم يقربلي انتو فاهمين؟ محدش يقربلي.
بترجع لورا لحد ما خبطت في الحيطه بس ايد شدتها جامد وشدوا الغطا اللي على وشها وقلعوها طرحتها وشعرها اتفرد طويل الاوضه كانت ظلمه ونور في وشها فمش شايفه حاجه صوت1: هما المنقبات بيبقوا حلوين قوي كده ياض صوت2: اول مره اشوف واحده كده؟ ايه الجمال ده؟ يا باشا احنا نتمتع بيها وبعدها يحلها المولي دي ما ينفعش نرجعها كده! ده انا اموت لو ملمستهاش.
حبيبه: لا محدش فيكم هيقربلي، انا جوزي ظابط وزمانه قالب الدنيا عليا وهيقتلكم انتو فاهمين؟ هيقتلكوا لو حد لمسني صوت 1: جوزها ظابط؟ وتقولي بنت هنا دخل واحد كمان بس شكله الريس بتاعهم لانه اول دخل كلهم سكتوا ووقفوا على جنب الريس: جبتوها كويس صوت1: بس مين دي يا باشا؟ دي حلوه قوي و قاطعه الريس: محدش يلمس شعره منها فاهمين؟ دي الباشا الكبير تلزمه صوت 2: بس حتى نتسلي.
الريس: قولت ولا شعره لحد ما تروحله وهو حر يعمل ما بداله احنا وظيفتنا نجيبها وبس.
سابوها وخرجوا وساعتها تليفون مامته رن وكان ايمن وردوا عليه واتأكدوا فعلا ان جوزها ظابط.
الدكتوره: يعني اغتصبوكي ولا لأ؟ حبيبه: لأ كانوا خايفين محدش اغتصبني ايمن هنا اخد نفس طويل وحمد ربنا ويدوب هيبتسم حبيبه: بس ده ما يمنعش ان فيه منهم حاول ايمن هنا فهم ان مراته محدش اغتصبها بس اتحرشوا بيها الدكتورة: يعني ايه؟ حبيبه: يعني بعد ما نقولوني وودونا للراجل الكبير بتاعهم ده بدؤا يضايقوني! قطعولي هدومي! لمسوني في اماكن محبش حد يلمسني فيها! تحرشوا بيا دموعها نزلت وسكتت.
الدكتورة: لو الكلام صعب بلاش.
حبيبه: انا كنت بنت محدش لمحها حتى قبل جوزها ودلوقتي؟ دلوقتي شاركوا جوزي في حاجات كتيره قوي، انا اعتقد ان اي حاجه تتاخد غصب تبقي اغتصاب، هما ايوه ما اغتصبونيش بالمعني المعروف بس اغتصبوا حاجات مني، شعري اللي قصوه! حرمه نقابي! حرمه جسمي اللي كشفوه! حاجات كتيره عملوها مش هقدر انساها ابدا، ازاي اقدر اواجه ايمن او هو ازاي يواجهني وهو عارف ان غيره شاف مراته ولمسها وانه معدش هو المتفرد بجسم مراته؟
انا مش عارفه اصلا ازاي انا وهو هنواجه بعض؟؟ صعب وصعب قوي كمان ايمن مشي من قدام اوضتها لانه هو كمان مش عارف ازاي هيواجهها؟
الدكتورة خرجت من عند حبيبه وقابلت ايمن وقالتله ان مراته محدش اغتصبها اهلها فرحوا بالاخبار دي لكن محدش حس بالنار اللي جوي ايمن او حبيبه ايمن كانت في نار جواه مش عارف يعمل فيها ايه؟ اخيرا مشي وراح شغله ودخل للرجاله اللي قبض عليهم ومسؤلين عن خطف مراته وبدأ يضرب فيهم كلهم زي المجنون، كان عايز يعرف مين في عيال سعيد صاحب فكره خطف مراته؟ احمد دخل لايمن ومسكه بالعافيه احمد: هتموتهم يا ايمن هتموتهم في ايدك.
ايمن: ما يموتوا دول بهدلوا مراتي احمد: وهيتحاكموا وياخدوا جزاتهم ايمن: لازم اعرف مين صاحب فكره خطف مراتي زق احمد ودخلعم تاني واول مره ايمن يستمتع بضرب حد فضل يطلع النار اللي جواه فيهم بس للاسف النار ما بردتش وقلبه ما ارتاحش عرف منهم اسم اللي خطف مراته وراح جابه من بيته وعرفه ازاي يخطف مرات ظابط ولولا احمد سحبه من فوقه كان قتله ش.
كل يوم بيعدي ايمن بيتهرب بطريقه شكل انه يدخل لمراته وهيا في الاول كانت متفهمه لكن بعد كده بقت بتعيط في صمت احمد كان بيزورهم بانتظام وكان ايمن بيكلفوا انه يجيبلهم اكل او طلباتهم او اي حاجه واحمد كان مبسوط بالدور ده لانه شويه شويه بيقرب من سميه اللي معجب بيها اخيرا جه معاد خروج حبيبه من المستشفي كان مر عليها اسبوع في المستشفي اليوم ده كانت فاطمه هيا اللي مع حبيبه وايمن كالعاده موجود بس بعيد.
الدكتورة شافته وطلبت منه يخلص اوراق الخروج لمراته رن على امه وخرجتله بره حبيبه عرفت ان ايمن بره قامت تخرجله هيا او على الاقل تلمحه كانوا بره الباب ايمن وفاطمه فاطمه: وبعدين معاك يا ايمن؟ هتدخل تشوف مراتك امتي؟ كل شويه تسأل عليك ايمن: مش وقته، انا هروح اخلص ورق خروجها من المستشفي وانتي جهزيها اوك؟ فاطمه: هناخدها على البيت صح؟
ايمن: لا طبعا ومين هيخلي باله منها في البيت؟ انا هسيب شغلي ولا انتي بايدك المكسوره دي؟ فاطمه: يا حبيبي ملكش دعوه بينا وبعدين انا بقيت كويسه وفكيت الجبس خلاص ايمن: امي حبيبه هتروح بيت ابوها اقفلي الكلام بقى فاطمه: طيب فهمني يا ايمن؟ انت كنت هتجنن عليها؟ ايمن: امي انا، انا، مش عارف اواجهها خلاص؟ هروح اخلص الورق فاطمه دخلت لحبيبه اللي كانت في الحمام خبطت عليها فاطمه: حبيبه احنا هنمشي عايزه مساعده عندك.
حبيبه: لا يا ماما تسلمي حبيبه كانت بتعيط غسلت وشها وتماسكت وخرجت كانت فاطمه بتلم حاجتها بايد واحده فساعدتها ولبست هدومها ونقابها واستنو ايمن في صمت فاطمه كانت حاسه بحبيبه وانها بتعيط في صمت بس معرفتش تقولها ايه؟ ايمن خلص الاوراق وجالهم خبط على الباب بره فامه خرجت ايمن: يالا فاطمه: طيب انا اللي هشيل الشنطه والحاجات اللي جوه ولا مراتك الحامل؟
ايمن بص لامه واستعد انه يدخل يقابل حبيبه بس هو مش مستعد، ايمن دخل بس مش عارف يقول ايه؟ ايمن: سلام عليكم، حمدلله على السلامه حبيبه: وعليكم السلام، الله يسلمك ايمن كان مستني منها انها ترمي نفسها عليه او تعاتبه او تكلمه او تقول اي حاجه بس حبيبه ما نطقتش ايمن: نمشي؟ ناقصك حاجه؟ حبيبه: لا يالا مشي قدامها وهيا وراه امه مسكتها واتسندوا على بعض وهما ماشين حبيبه كانت دايخه ومش قادره وكانت ماشيه بالعافيه.
فاطمه: حبيبه انتي كويسه؟ لو تعبانه نرجع؟ حبيبه: لا انا بس دايخه شويه من كتر الرقده ما تشغليش بالك بيا فاطمه: واشغل بالي بمين بس هو في اغلي منك حبيبه: ربنا يخليكي ليا يا ست الكل حبيبه الدنيا بتلف بيها وسندت على الحيطه فاطمه: ايمن الحقنا ايمن رجعلهم: في ايه؟ حبيبه: مفيش حاجة يالا فاطمه: انتي هتوقعي وانتي ماشيه وتقولي مفيش حاجه؟ ايمن: نرجع؟
حبيبه: لا انا دايخه بس شويه وعايزه اروح لو سمحتو ما تكبروش الموضوع لو تعبت اكتر هبقي اجي بس انا كويسه ايمن: ماشي براحتك، يالا انا هساعدك ايمن حس انها فعلا مش قادره تمشي وبعد تردد للحظات شالها حبيبه: ايمن انا كويسه ايمن: عارف هو ما زودش وهيا ما نطقتش بس ايديها حوالين رقبته ودماغها في صدره اكتر حاجه وحشتها ضمته ليه، احساسها بالامان في حضنه، ريحته اللي بتعشقها، كل حاجه فيه وحشتها...
ايمن اتمني لو العربيه تبعد ويوصلها للبيت كده او ما يوصلهاش ابدا وتفضل كده في حضنه! لو يقدر ما يخليهاش تغيب عن عينه ابدا! لو ينفع يسيب شغله ويسيب الدنيا كلها وياخدها لمكان مفيهوش حد غيرهم هما الاتنين بس، لو ينفع، وهو بيكره كلمه لو... وصل العربيه وفتح بابها ودخلها براحه وري بحيث ترقد براحتها حبيبه فهمت انه مش عايزها جنبه وهو سايق فتح الباب لامه وركبها جنبه وركب هو.
كل شويه يبص في المرايه يشوفها بس كانت باصه بره على طول وصلوا بيت عم سعيد ايمن: وصلنا حبيبه فاقت من سرحانها لقت نفسها قدام بيت ابوها كان عندها امل بسيط انه ياخدها بيته او اللي كان بيتها، ده حتى ما سألهاش حبيبه: متشكره يدوب هتنزل كانت هتوقع فايمن لحقها سندها ودخلها من غير ما يشيلها، دخلوا والكل رحب بيها عم سعيد: انا اتخيلت انك هترجعي بيتك؟ حبيبه: امشي يعني مش عايزيني؟
عم سعيد: حبيبه قلبي بيت ابوكي على طول مفتوح بس مستغرب حبيبه: ماما فاطمه تعبانه وانا تعبانه وايمن المفروض يرجع شغله بقى هنعمل ايه؟ فاطمه: يا حبيبتي انا احطك في عنيا حبيبه: تسلمي يا ست الكل بس لولا انك تعبانه كنت جيت لكن ده امر ربنا، خليكي انتي معايا النهارده ايمن: امي لو عايزه تفضلي النهارده براحتك بس انا لازم اروح شغلي فقرري فاطمه: طيب وانت؟
ايمن: مالكيش دعوه بيا انا لو روحت البيت فيدوب هغير وانزل انا بقالي كتير ما بنزلش الشغل عم سعيد: اتكل انت على الله وسيبهملنا توكل يالا؟
ايمن مشي وحبيبه طلعت اوضتها تعيط في صمت.
حبيبه فاهمه ان ايمن مش قابل ان مراته حد يشاركه فيها وشايفه ان ده من حقه، مراته مبقتش ملكه لوحده، هو بيحبها اه بس مش متقبل فكره ان حد لمسها غيره، مش قادر حتى يبص لوشها، مش قادر حتى يواجهها، كل ما بيشوفها بيتخيل الرجاله وهما بيلمسوها، حتى شعرها اللي كان بيعشقه قصوه، معدش عندها حاجه تشد جوزها ليها، معرفتش تحافظ على نفسها، وعلشان كده بطلت تطلب تشوفه في المستشفي وما اعترضتش لما جابها بيت ابوها لانها ما تيستاهلش تدخل بيته...
ايمن مشي وهو بيلوم نفسه، ازاي معرفش يحمي مراته؟!؟ ازاي مقدرش يرجعها بسرعه؟ ازاي هيا هتقدر تشوفه راجل تاني قدامها؟هيا في الاول كان واحشها بس بعدها استوعبت، استوعبت انه اضعف من انه يحمي اهل بيته، فقدت ثقتها فيه، الراجل اللي يقبل ان مراته غيره يشاركه فيها ميبقاش راجل بيبقي ديوث، لا لا بس ده حصل غصب عنك يا ايمن؟ لا كان لازم تبقي اذكي من كده؟
مراتك معدتش بتثق فيك وعلشان كده بطلت تطلب تشوفك في المستشفي ولما وديتها بيت ابوها مفتحتش بوقها حتى ما اعترضتش ولو بكلمه لا دي كمان بتبرر لابوها هيا ليه جت، هو خلاص خسر مراته، خسرها نهائي ومش هيعرف يرجعها لحضنه تاني! فتره عدت وايمن عرف يقبض على ابن سعيد ويقفل ملف القضيه دي للاخر كان هيقتله بس مسك نفسه وغفرله انه ما اغتصبش مراته.
شهر بحاله عدا وايمن بيكلم عم سعيد كل كام يوم يطمن ويهرب منهم ومستني حبيبه تقوله ولو كلمه حبيبه كل يوم تعيط وتستني كلمه من ايمن، اي كلمه.
اخيرا اخدت قرارها، نزلت لابوها وقعدت معاه شويه يرغوا وبعدها حبيبه: بابا انا طول عمري كنت مطيعه ليك وعمري ما كسرتلك كلمه او طلب صح؟ عم سعيد: ايوه يا حبيبه خير اطلبي على طول حبيبه: هطلب بس لازم توعدني من غير ما تتدخل عم سعيد: ماشي مش هدخل حبيبه: ولا تقولي لأ عم سعيد: قولي بقى خير حبيبه: انا عايزه اتطلق من ايمن، طلقني منه ارجوك انا عايزه اطلق...
تحميل محتوى الموضوع
عرض نسخة صالحة للطباعة
أرسل هذا الموضوع إلى صديق
[4]
الدعوات : 2قوة السمعة : 10
رواية حب مشروع