رواية حبيبي المجهول

رواية حبيبي المجهول للكاتبة الشيماء محمد الفصل الحادي عشر

الكل اتفاجئ ان ريهام نازله تقابلهم ورحبت بيهم جامد جدا
على مستغرب جدا لانه عارف ان مراته مش بتتنازل بسهوله او تستسلم
ليلى واهلها وجيرانها دخلو القصر الطويل العريض الفخم جدا وانبهروا بكل حاجه وكل شويه يغمزوا لليلي يا بختها
الكل فرحان ومبسوط الا ليلى خوف مبهم ماليها ومالوش سبب
اخيراً ادهم نزل يقابل ضيوفه وسلم على الكل
لقاهم بيكلموه بطريقه رسميه قوي وبينادولو بالباشمهندس مش ادهم زي الاول.

ادهم: ايه ده بقى؟ لا انا اسمي ادهم وزي ما انا مفيش حاجه اتغيرت فلو سمحتم ما تحسسونيش اني بقيت غريب كده
ام امل: ولا غريب ولا حاجه بس المقامات محفوظه
ادهم: مقامات ايه وكلام فاضي ايه؟ لا انا ادهم زي ما انا والا هعتبر انكم معتبرني غريب
عم فتحي: لا يا ابني ما غريب الا الشيطان
ادهم: يبقي خلاص
فضل يتكلم معاهم هو وابوه وكل الحواجز اترفعت والكل حاسس بانهم عيله مع بعضها
ريهام اختفت شويه ورجعت.

ريهام: العشا جاهز اتفضلوا
ادهم بيبص لامه وهو مستغرب وعايز يفهم ايه اللي في دماغهابالظبط وبتخطط لايه
ادهم: طيب يالا اتفضلوا نتعشي مع بعض
عم فتحي: لا معلش يا ابني اتفضلوا انتو واحنا نتكل على الله
علي: لا والله ما ينفع انت مش عايز يبقي عيش وملح بينا ولا ايه؟
عم فتحي: خلوها مره تانيه الباشمهندس تعبان وخارج من المستشفي والمفروض يكون في سريره مرتاح
ادهم: لا يا عم انا كده مرتاح.

نتعشي مع بعض الاول وبعدها ربنا يسهل
ريهام: لازم تتعشوا الاول ولا ايه؟ وبعدين يا عم فتحي انا سمعت انك طباخ صح؟ لازم تدوق اكلنا احنا ولا انت اكلك احسن ولو اكلك احسن يبقي انت تعملنا الاكل بعد كده ولا ايه؟
ادهم بص لامه وما اتكلمش
عم فتحي: حضرتك بس تشاوري يا هانم
ادهم: يالا نتعشي يا جماعه لان انا واقع من الجوع وصراحه اكل المستشفي لا يؤكل.

عم فتحي: حمدلله على سلامتك وربنا يكفيك شرها وشر اكلها قوم انت بس بالسلامه لينا وكل اللي انت عايزه نعملهولك
ادهم: تسلم يا عمي بس ابوس ايدك بلاش شطه
كلهم ضحكوا وخصوصا ليلى اللي افتكرت لما حطتله شطه ساعت الكشري واكل علشان خاطرها
ليلى: مش قد الشطه بتاكلها ليه؟
ادهم: مش بيقولو لاجل الورد
ليلى اتكسفت وسكتت
ادهم: مش قد الكلام ورده بتتكلمي ليه؟
المهم يالا نتعشي.

الكل اتعشي وسط جو مليان رغي وحب الا ريهام هتولع لانها معرفتش تبوظ الحكايه بس لسه سلتها مليانه خطط
اتعشوا وبيشربوا القهوة والشاي والعصير كل واحد وطلبه
ريهام استاذنت وسابتهم شويه
ريهام: اتاخرتي ليه مش قولتلك تيجي يالا بسرعه
هنا دخل على عليها
علي: بتكلمي مين؟ يالا علشان الناس خلاص هيشربوا القهوه ويمشوا
واياك تحاولي تعملي حاجه تاني؟ انتي مش شايفه ابنك مبسوط قد ايه وهو معاها؟

ريهام: ده بس علشان ما طالهاش لو طالها كان رماها
علي: لا طبعا اللي بينهم حب بجد
ريهام: بكره نشوف
علي: ريهام ما تعمليش اي حاجه
ريهام: مش انا اللي هعمل يالا بينا
نزلت وسابته يفكر امال مين اللي هيعمل
يدوب خلصوا شرب القهوه والشاي والباب خبط وداده كريمه فتحت الباب
# بيبي حبيبي الف سلامه عليك نورت بيتك يا جميل #.

الكل بص للي داخله دي ولابسه قصير وشكلها استايل جدا واول ما دخلت سلمت على ادهم بانها حضنته وباسته في خده
وبعدها باست ريهام اللي سلمت عليها بترحاب جامد وكانها عايزه توريهم الفرق
ادهم: اهلا يا دولي خير بقالنا كتير ما حدش شافك
دولي: عادي مشغوله بس اول ما عرفت انك تعبان مقدرتش اتاخر على الرغم من اني زعلت منك لما كنت بايت عندي وصحيت الصبح ما لقيتكش جنبي.

طبعا الكل بص لادهم اللي مكنش عارف يقول ايه بس هو كده فهم لعبة مامته ايه
ادهم: انتي قولتيلي عرفتي منين اني تعبان؟
دولي: سمعت
ادهم: اهم طيب مش اتطمنتي عليا
ريهام: ايه يا ادهم ده اتفضلي دولي حبيبتي البيت بيتك انتي عارفه انتي ياما بيتي هنا عندنا ولا ايه؟
دولي: اه طبعا يا طنط والنهارده ان شاءالله هقضي الليله هنا اخلي بالي من ادهم وحضرتك ارتاحي بقى
ريهام: وماله يا حبيبه قلبي.

ادهم: ههههه حلو الفيلم اللي بتمثلوه ده
بقى دي لعبتك؟
ريهام: لعبه ايه مش فاهمه؟
ادهم: انك تقولي قدامها ان انا على علاقه بواحده تانيه
احب اطمنك ان لعبتك مش هتفلح اما انتي يا دولي طالما ما بتحبيش الذوق اتكلم معاكي بقله ذوق
سبق وقلتلك مليون مره قبل كده انا عمري ما حبيتك ابدا ولا هحبك
دولي: امال اللي بينا ده تسميه ايه؟

ادهم: بينا؟ وهو في بينا وانا مش واخد بالي؟ انتي مجرد واحده بشوفها في نايت كلب اخر الليل ارقص معاها شويه او اقضي وقت مش اكتر
دولي: ترقص معايا شويه؟ ( بصت حواليها واستنتجت ليلى) انتي بقى ليلى؟ مش بطاله!
ادهم: اطلعي بره يا دولي
دولي: ليه خايف احسن اقول لحبيبه قلبك انك كنت بتيجي تنام في حضني اول ما تتخنق منها او تمل
ولا اقولها انك طول وقت دراستك بره كنت بسافرلك اقضي معاك شهر واتنين مع بعض.

ادهم: اطلعي بره او هنادي للخدم يطلعوكي بره
دولي: وعلي ايه؟ بس هستناك تجيلي لما تزهق من قطتك الجديده وهترجعلي
ادهم: روحي واحلمي واتغطي كويس علشان البرد
خرجت دولي بس طبعا كلامها عمل مفعوله لانها اول ما مشيت الكل وقف يمشي
ادهم معرفش يتكلم قدام الكل كده ولا عرف يعمل ايه
نظره واحده لليلي كانت كفيله بانها تتطير النوم من عينه لانه عرف انها مش هتسامحه بسهوله ده اذا سامحته اصلا.

اما ريهام فكانت مبسوطه باول انتصار ليها
مشيوا واول ما خرجوا
ادهم وعلي وريهام واقفين بيبصولهم وهما بيتحركوا لحد ما اختفوا خالص
ادهم: اتبسطي كده اعتقد صح؟ دي لعبتك انك تعرفيها الماضي بتاعي بالطريقه دي
ريهام: انت بتتكلم عن ايه؟ اه عن دولي؟
دولي اتصلت بيا وعرفت مني انك عملت حادثه ويدوب خرجت اعرف منين بقى انها هتيجي النهارده وبعدين لو اعرف كنت خليتها تيجي بدري اهي كانت ترحمني من التمثيل طول الوقت ده.

ادهم: على العموم براحتك بس ليلى مش هسمح لحد يبعدني عنها مهما يكون التمن
بس انا عايز الفت نظرك لنقطه مهمه
ريهام: اللي هيا ايه؟
ادهم: ان انا ابنك مش عدوك
ريهام: وعلشان انت ابني مش هسيبك تضيع حياتك كده مع واحده ما تستاهلكش
ادهم: واللي تستاهلني دولي؟
اللي كل يوم بتسهر مع راجل شكل وتنام مع واحد شكل؟ هيا دي اللي انتي عايزاها هنا في بيتك زوجه ليا؟
ريهام: مش شرط دولي في غيرها كتير محترم.

ادهم: ليلى وبس فاهمه؟ ليلى
سابهم وطلع حاول يكلم ليلى بس طبعا تليفونها مقفول
اتصل على تليفون البيت بس قالوله انها نايمه
اول ما ليلى روحت البيت جريت على اوضتها تعيط
خالد نادي عليها تطلع بره معاهم
اخواتها كلهم متجمعين
خالد: وبعدين انتي ما عندكيش غير العياط؟
ليلى: عايزني اعمل ايه؟
ماجده: تعمل ايه يعني؟ انت شوفت امه عامله ازاي؟ استعوضي ربنا فيه وبكره يرزقك باحسن منه؟ وبعدين ده من توب واحنا من توب.

شوفت البت البجحه اللي جايه تبات معاه عيني عيني كده ولا ادب ولا خشي
ناديه: بنات اخر زمن اهو لايقين على بعض ماهو كان بيبات معاها واكيد مع غيرها
خالد: خلصتو لك وعجن ولا لسه؟
ماجده: خلصنا قول يا سيدي انت
خالد: بصي يا بت يا ليلى اول حاجه انتي بتحبيه؟صح ولا؟
ليلى: صح وبعدين؟
خالد: وانتي قبلتي بيه على وضعه الجديد ورجعتيله صح؟
ليلى: صح بس ده علاقته ايه ب.

قاطعها: ليه كل علاقه واحد غني ومليونير وشايفه شكله عامل ازاي وغير كل ده متعلم بره وعاش في امريكا يعني ولا عيب ولا حرام
محمد: وانتي نفسك يا ليلى اشتكيتي منه قبل كده فاكره ولا نسيتي لما زعل منك انك بعيده عنه وساعتها كنتي مستغربه تصرفه
هو طبعه كده واتعود على كده
ده انا دلوقتي بس عذرته على تصرفاته دي
ليلى: يعني ايه؟
خالد: يعني هيكون في مليون واحده زي دولي دي هتظهرلك لو فضلتي معاه.

ده واحد عنده الموضوع ده عادي مش زينا
ليلى: والمفروض اني ايه اقبل بالوضع ده واحمد ربنا انه اخر الليل يجيلي وتشاركني فيه مليون واحده صح؟
خالد: حماره من يومك محدش قال كده ولا حد يقبل بكده
اللي بقوله انك تحاسبيه اه بس من يوم ما ارتبط بيكي مش قبل كده
اللي قبل كده مش بتاعك
ماضيه بقى ماضي وبعدين هو اكيد هيجيلك اول ما يشد حيله ويقدر يتحرك وهيشرحلك كل ظروفه وهيطلب منك كمان تسامحيه على اللي فات.

انتي بقى حددي هتقبليه بوضعه ده ولا انتي ناويه على ايه؟
ليلى: وامه؟
خالد: اهو امه دي الواحد نفسه يمسكها يروقها
بس ما علينا مالكيش دعوه بيها سيبي ابنها يتصرف معاها وخليكي بعيد عنها
ليلى: انت هتقول زيه مالكيش دعوه بيها
خالد: طيب اهو كمان قالك ايوه هو يتصرف معاها ابن وامه يتخانقوا يتصالحوا مالكيش فيه وهيا مسيرها هتقبلك اول ما تعرف انه مفيش فايده.

وعلي فكره اقطع دراعي من هنا ان مكنتش هيا اللي كلمت البت دي وقالتلها تيجي وتقول كده قدامك وكل مره هتعمل فيكي حاجه زي كده
وانتي وشطارتك هتسمحيلها تفرق بينكم ولا هتكوني ذكيه وتحافظي على جوزك
ليلى: جوزي؟
خالد: بكره يبقي ولا ايه؟ فكري كده وعلي مهلك مستعده للحياه الجديده دي ولا نفك منه ونشوف حد على قدنا؟ والاهم هو هينفع اصلا نشوف حد غيره ولا خلاص هو اتطبع في القلب ونستحمل علشانه؟ فكري وخدي قرارك.

بس المهم اوعي تستقلي بنفسك وعلشان هو غني تحسي انك قليله جنبه
هو غني اه بس في حاجات كتيره نقصاه وعايز يكملها بيكي
ليلى: هو ناقصه حاجه!؟ايه اللي ممكن يكون ناقصه او يعوزه ومش لاقيه؟
خالد: عايز حب ودفا وبيت واخلاق وواحده تصونه وتحبه هو مش فلوسه
عايز كتير وانتي بس اللي تقدري تكمليه فاهمه يالا تصبحي على خير وبطلي العياط اللي لا بيقدم ولا بياخر ده.

وانتي وهيا هش كل واحده على بيتها يالا نجوزكم علشان نرتاح منكم ترجعوا بعيالكم واجوازكم هيا ناقصه! كل واحده على بيتها
ماجده: انا بايته جوزي روح اصلا
ناديه: وانا كمان قولتله يروح هنبات عندك مانع
خالد: باتوا انتو حرين خشوا ناموا فوق بعض تصبحوا على خير انا هنام بكره اجازه واياك اصحي بدري على صوت العيال.

الصبح اول ما طلع اتفاجؤا بالباب بيخبط
خالد قام من نومه وفتح الباب لقي ادهم في وشه
ادهم: اسف لو جيت بدري ومن غير معاد
خالد: يا فتاح يا عليم ادخل يا عم يعني انت اخر حد توقعت انه ممكن يصحيني بدري ولو حد غيرك صحاني كنت روقته وعملت معاه الجلاشه
ادهم: عملت ايه؟ ما علينا مش وقته معلش بقى يعني لو ينفع هما كلمتين مع ليلى
خالد: على فكره انت مفيش حاجه بينك وبينها لحد دلوقتي.

ادهم: عارف بس معلش استحملني ما انت شايف اللي بيحصل اهوه
خالد: شايف بس احنا حته شعبيه وكلام الناس فيها كتير
ادهم: عارف بس هو انا ينفع اقعد الاول انا مش قادر اقف نهائي وانت بتستجوب فيا
خالد: يوووه انا نسيت اصلا انك تعبان معلش اتفضل اقعد
ادهم: متشكر
عم فتحي: صباح الخير يا ابني تعال وهعملك احلي فطار
ادهم: لا معلش مش وقته
عم فتحي: ده هو وقته وبعدين شكلك كنت تعبان جامد امبارح وما نمتش.

ادهم: انا فعلا ما نمتش بس مش من التعب
عم فتحي: امال من ايه؟
ادهم: مش بيقولو ما ينام الليل غير مرتاح البال
عم فتحي: وانت ايه اللي تاعب بالك كفاله الشر؟
خالد: عمايله السودا
ادهم: ماشي مقبوله منك
خالد: امال لما تدور تعط مع نسوان ده اسمه ايه مش عمايل سودا!
ادهم: اولا انا ما بعطش مع نسوان وثانيا دولي دي كانت ماضي واهي قالت بنفسها ايام دراستي يعني زمان
خالد: عارف بس انا رايي مش مهم المهم اقنع صاحبه الامر.

ادهم: طيب ممكن بقى تناديلها ولو ينفع يعني نخرج انا وهيا ساعه؟
خالد: نعم؟ تخرجوا!؟ اه؟ انت عارف المثل بتاع سكتناله
ادهم: لا مش عارفه وبعدين فيها ايه؟ انا لازم اتكلم معاها لازم تفهم مني الدنيا ماشيه ازاي
خالد: ماشيه كدهو، خروج لا كفايه بقى كلام الناس
ادهم: ناس ايه؟ انا في البيت اهو قدامكم مش بخرج معاها من وراكم وجاي استاذنكم
خالد: لا معلش اتكلم هنا براحتك.

ادهم: لا معلش اللي هتكلم فيه حياتي الخاصه وهيا بس اللي من حقها تسمع
خالد: يبقي تاجل الكلام في حياتك الخاصه لحد ما هيا تبقي جزء من حياتك الخاصة دي
ادهم: معنديش مانع بس هيا اوكي بالنسبه للي حصل امبارح ومفيش مشاكل بالنسبالها؟
يبقي خلاص ناجل الكلام لبعدين
هنا ليلى خرجت
ليلى: لا طبعا انا مش اوكي بالنسبة للي حصل امبارح
انت كنت معاها وانت معايا صح؟

هو ده اللي كنت تقصده ساعت ما قولتلي انك كل يوم نايم في حضن واحده؟
ادهم: اولا ممكن تهدي شويه؟ وثانيا ينفع ما نتكلمش كده قدام الكل ده مش اسلوب نقاش
ليلى: اه سوري نسيت انت ما بتتكلمش في حياتك الخاصه قدام الناس
بس بتنام مع بنات عيني عينك كده
ادهم: لو هتفضلي تتكلمي كده يبقي بلاش كلام احسن
ليلى: انت بتهددني؟
ادهم: هو فجأه بقى كلامي مع اي حد تهديد؟
امي تقولي انت بتهددني وانتي تقوليلي انت بتهددني وبعدين معاكم؟

عم فتحي: اهدي يا بت انتي دي مش طريقه كلام دي
اطلع انت يا ادهم واستني عند البنزينه وهيا هتجهز وخالد هيجبها وروحو اتكلموا بس ما تاخرهاش وتنزلها برضه بعيد
علشان بس الشارع ما يشوفهاش خارجه داخله معاك ولسه مفيش حاجه بينكم رسمي
خالد: ايه يابا ده؟
عم فتحي: اللي سمعته، ساعات بتبقي عاقل وعقلك يوزن بلد زي امبارح بالليل وساعات بتبقي حمار وعايز رسن زي دلوقتي كده
انتي عايزه تتكلمي معاه اتفضلي البسي.

مش عايزاه اصلا قوليله روح ارتاح في بيتك وينساكي اصلا
ليلى: هلبس
دخلت تجهز وادهم قام وقف بالعافيه
ادهم: متشكر يا عم فتحي
خالد: ما تاخرهاش
ادهم: مش هاخرها يا خالد
خرج ادهم وركب عربيته
حسين: طردتك ولا ايه؟ كان لازم تكون واضح معاها وتقولها على ماضيك المهبب
ادهم: هو انا لحقت اصلا وبعدين انت بتتدخل ليه في اللي مالكش فيه اطلع واستني عند البنزينه اتحرك
حسين: طلعت بس حصل ايه؟
ادهم: انت راجل فضولي بشكل مستفز.

حسين: اهو وصلنا البنزينه احنا مستنين ايه؟
ادهم: مالكش دعوه
حسين: مستنين ليلى اكيد وهو في غيرها
ادهم:
حسين: طيب كويس انهم وافقوا انها تخرج معاك طيب وهما قبلوا كلامك اصلا؟
ادهم:
حسين: ايوه طالما بنتهم هتخرج معاك يبقوا قبلوه
ادهم: ارحمني يا الله
حسين: هيرحمك ان شاءالله بس انت ادعي كتير كده وخليك قريب منه وليلي برضه هتسامحك بس انت قولها على كل حاجه واوعي تقولها انك كنت بايت عند دولي دي
قولها انه كله كان ماضي.

ادهم: ايه رايك تكلمها انت بدالي؟
حسين: معنديش مانع لو تحب فعلا انا
ادهم: اخرس يا عمي حسين اخرس شويه عصبتني ووترتني
اهي ليلى جت اهي انزل افتحلها
نزل حسين وفتح لليلي ودخلت جنب ادهم
ادهم: تحبي تروحي فين؟
ليلى: مش عايزه اروح اماكن هما كلمتين اسمعهم منك وخلاص
ادهم: حسين ودينا اي مكان هادي نعرف نتكلم فيه
حسين وداهم مكان هادي ونزل من العربيه وسابهم
ادهم: هاه عايزه تقولي ايه؟
ليلى: مش انا اللي هقول.

ادهم: عايزاني اقول ايه؟ ان انا ليا ماضي وانتهي
ليلى: هو سؤال واحد تجاوبني عليه بصراحه ومن غير كدب ولا لف ولا دوران
ادهم: اسالي وهجاوبك
ليلى: انت شوفت دولي بعد ما عرفتني وقضيت ليله عندها؟
اتنهد ادهم تنهيده طويله
ادهم: ايوه شوفتها فعلا
ليلى: بس خلص الكلام كده بعد اذنك
ويدوب هتفتح باب العربيه فمسكها وشدها
ادهم: لسه الكلام ما خلصش الكلام ما بداش اصلا.

اولا دولي دي اعرفها من سنين طويله لكن عمرها ما كانت حبيبتي اه بقضي معاها وقت بس تسليه وعارف ان ده غلط قبل ما تتكلمي بس انا كان وضع طبيعي وحاجة طبيعيه وهيا كمان معارضتش ابدا مع انها عارفه اني ما بحبهاش لاني قولتها صريحه
ليلى: انت شوفتهاونمت معاها بعد ما عرفتني يبقي ما تقولش ماضي
ادهم: مش بالظبط كده اولا انا شوفتها في الفتره اللي اتخانقنا فيها يعني مكناش مع بعض.

ليلى: يعني كل ما نتخانق تروح لواحده وتقولي احنا مش مع بعض؟
ادهم: الوضع مختلف ودلوقتي حاجه وقبل كده حاجه؟
ليلى: يعني ايه؟
ادهم: يعني اول ما عرفتك مكنتش اعرف حدود العلاقات ايه ولا كنت مهتم اعرفها وكنت بتعامل معاكي زي اي بنت اه بحبك بس عادي العلاقه ما يبقلهاش حدود اعمل اللي انا عايزه ولما رفضتي اتهمتك ساعتها انك ما بتثقيش فيا مش ده اللي حصل؟
ليلى: انت عايز توصل لايه؟

ادهم: اوصلك ان انااتغيرت ومفاهيمي اتغيرت وعرفت كتير عن عادات وتقاليد هنا وعرفت كتير عن الحرام والحلال
انا اتغيرت لانك انتي حطيتيني على اول الطريق الصح
اما دولي بقى فدي ساعتها كنت لسه ادهم القديم وبعدين قابلتها وانا سكران مش في وعي وايوه بيت عندها في بيتها بس ما لمستهاش ابدا كنت سكران لدرجه اني اول ما شوفت السرير تقريبا اغمي عليا واول ما فقت الصبح مشيت.

ليلى انا من يوم ما عرفتك ما لمستش واحده تانيه ابدا
وانتي لو هتحاسبيني يبقي من يوم ما عرفتك وبس قبل كده انتي مكنتيش موجوده
ليلى: انت ايه اكتر حاجه عملتها غلط؟
ادهم: يعني ايه؟ انا بشرب سجاير وساعات بسكر وبروح كازينوهات يعني حاجات زي كده
ليلى: وانا مش قصدي على كل ده انا قصدي مع البنات
ادهم: مالهم البنات؟ عمري ما عملت حاجه باسم الحب او خدعت واحده لو ده قصدك
ليلى: مش كده قصدي وصلت لحد ايه معاهم؟

ادهم: مكنش في حد جدي في حياتي ما وصلتش يعني لاي حاجه مع اي واحده
ليلى: يوووه مش قصدي كده
ادهم: وانا مش فاهم انتي بتسالي عن ايه علشان اجاوبك
ليلى: قصدي وصلت لايه؟ يعني بتمسك ايدهم بس؟ بتبوسهم؟ بتعمل لحد فين معاهم؟
ادهم: اه قصدك بمارس معاهم ال** ولا لأ ده سؤالك؟
ليلى: ايوه ده سؤالي بس مش كلنا عندنا نفس جراتك في الكلام كده
ادهم: وده يفيدك بايه السؤال ده؟

ليلى: عايزه اعرف انا هكون اول واحده في حياتك ولا ايه؟
ادهم: انتي اول واحده احبها في حياتي
ليلى: مش ده سؤالي جاوبني بصراحة
ادهم: هتفيدك بايه الاجابه؟
ليلى: مش عايزه مفاجآت في حياتي وكل شويه واحده تظهر وتقولي انا كنت مع جوزك قبل كده؟ فلو عملت حاجه زي كده يبقي تقولي عليها انت خليني ابقي مستعده نفسيا لاي حد
ادهم: ليلى ارجوكي بلاش كلام كتير في الماضي.

الماضي بتاعي كان مشين ومهين وعملت كل حاجه غلط وحرام فارجوكي خلينا نقفل الشابتر ده من حياتي ونبدا شابتر جديد نظيف
ليلى: طيب جاوبني علشان نقفله
ادهم: اه يا ليلى كنت مع بنات قبل كده وكتير واغلبيتهم ان مكنش كلهم اجانب
ليلى: مكنتش اعرف ان دولي اجنبيه!
ادهم: انا قلت اغلبهم دولي واحده من البنات المصريه عايزه تعرفي ايه تاني؟ واوعي تقوليلي كام واحده
ليلى دمعه نزلت منها على خدها وما ردتش.

وهو كمان سكت لان معندوش كلام يقوله
ليلى: كان نفسي اكون اول واحده في حياتك واول فرحه
ادهم مسح دموعها: انتي فعلا كده! ليلى انتي اول واحده قلبي يدق علشانها واول واحده اتمنيتها واول واحده هموت والمسها
كل حاجه معاكي تعتبر تجربه جديده ليا
انتي اول واحده هلمسها وهيا مراتي
انتي اول واحده هلمسها واكون انا اول راجل في حياتها
انتي اول واحده المسها وانا بدوب فيها وبعشقها
انتي اول حقيقه واضحه وثابته في حياتي.

كل ده مش كفايا؟
ليلى: توعدني اني هبقي الاخيره في حياتك ما تبصش ولا تلمس واحده غيري؟
ادهم: اوعدك طبعا
ليلى: لو مت بس من حقك
حط ايده على شفايفها
ادهم: ولا حتى الموت هيفرق بينا انا ليكي انتي وبس
انا حبيبك انتي وبس ولا في غيرك ولا هيبقي في غيرك
وارجوكي بقى انا اترهنت مع امي انها مش هتعرف تفرق بينا اوعي تخلينا اخسر الرهان
ليلى: مش هتخسره ومحدش هيفرق بينا ابدا ابدا
حطت راسها على صدره وهو ضمها براحه.

ادهم: ضلوعي هاه خلي بالك
ليلى: طيب انا غلطانالك
ويدوب هتبعد
ادهم: حقك على قلبي بس خليكي قريبه.

ريهام اتجننت لما عرفت ان خطتها فشلت برضه لكن مش هتستسلم
ادهم اتحسن واخد ابوه وراحو طلبو ايد ليلى رسمي ولبسوا دبل كمان
اخدها هيا واخواتها واهلها واشترالها احلي شبكه في الدنيا دهب زي ما اخواتها اختاروا
والماس علشان يليق بحبيبته
وطبعا كل واحده من اخواتها وصحباتها هداهم بهديه دهب معتبره جننت الكل.

عملها حفله خطوبه بالنسبالها كانت وهم
الحفله كانت في الشارع بتاعهم بناءا على طلبها بس ادهم علشان خاطرها حول الشارع لاحلي مليون مره من اجمل قاعه افراح
الانوار اتعلقت الشارع اتفرش كله الورد بقى في كل مكان احسن فرق للدجي كانت موجوده واتعمل احلي ليله ليهم.

ادهم عزم الناس اللي بيحبوه وبس في شغله او معارفهم وليلي كل اللي يعرفها واللي ما يعرفهاش من الشارع كان موجود اصلا اي حد بيعدي بيقف يتفرج وليلي كانت لابسه فستان مخليها اميره ( صوره الفستان على الغلاف)
اتعملت ليله الكل بيحكي بيها
كلها ضحك ورقص وفرح واتمني ادهم انه ياخد ليلى ويمشي
اخر الليل قبل ما يمشي كانوا لوحدهم
ادهم: هو يجري ايه لو طلعت قولت لابوكي اني عايز اخدك معايا وتبقي مراتي بجد؟

ليلى: ولا اي حاجه جرب كده
ادهم سابها وخارج فعلا شدته من ايده
ليلى: تعال هنا يا مجنون انت رايح فين؟
ادهم: مش قولتي روح قول لابويا!؟ فاكراني هخاف يعني ولا هتكسف؟
ليلى: لا ده ولا ده مجنون وتعملها
ادهم: مش كنا عملنا الفرح بالمره ده ايه الغتاته دي لازمته ايه الانتظار يعني؟
ليلى: معلش كل حاجه بأوان اصبر
ادهم: والل مش قادر يصبر يعمل ايه بقى؟
ليلى: يعني ده هو شهر مش كتير.

ادهم: مش كتير؟ انتي بتستعبطي صح؟ كل ساعه بتعدي وانتي بعيد بيوم يعني اليوم بالنسبالي 24 يوم الشهر هيبقي قد ايه بقى
ليلى: ايه ده كله براحه
ادهم مره واحده شدها عليه جامد وهيا كانت هتقع فسندت عليه
ادهم: انتي بعيد على طول ليه؟ يعني اغلطي وقربي مره
ليلى حطت ايديها حوالين رقبته وضمته ليها للحظات سندت راسها على صدره
ليلى: واغلط ليه؟ انت بقيت ملكي وانا ملكي
مشيت نص المسافه فاضل نص كمان.

ادهم: طيب النص ده مفيهوش اي تسهيلات؟
ليلى ضحكت بطريقه ناعمه وقربت اكتر ووقفت على طراطيف صوابعها وباسته في خده
ادهم اندهش من تصرفها بس ابتسم وكان عايز يضحك
ليلى: مالك في ايه؟
ادهم: لا مفيش
ليلى: لا بجد في ايه؟
ادهم: اصل انتي حسستيني ان انا اخوكي لما بوستيني كده يا حبيبه قلبي العشاق ما بيبوسوش كده
ليلى: ده اخرك عاجبك ولا مش عاجبك؟
ادهم: عاجبني هو انا اقدر اتكلم
طيب اردهالك انا بقى وبنفس طريقتك.

قرب منها قوي وهيا خافت للحظه انه يلمس شفايفها بس هو مسك دقنها ودور وشها بحيث خدها هو اللي في وشه وقرب قوي منها لمس خدها بخده نفسه في رقبتها جننها قربه منها بالشكل ده عايزه تصرخ وتقوله خلص بس انفاسها مقطوعة
لمس بنعومه خدها وطبع بوسه رقيقه على خدها وبعد
الاتنين بصوا لبعض بنظره مليانه شوق ولهفه
ونفاذ صبر.

ادهم كان عايز اكتر وفعلا قرب منها جامد يلمس شفايفها ويدوب لمسها فهيا بعدت لحظه وحطت ايدها على شفايفه بحيث تبقي فاصل بينهم وباست ايدها كانها بتبوسه هو
هو مسك ايدها وباسها
ادهم: حاضر هاصبر
رجع لورا خطوه وعمل صوت يدل على نفاذ صبره وبصوت عالي شويه
ادهم: يا صبر ايوب تعالي نطلع بره مش قادر اقعد معاكي لوحدنا وافضل بعيد يالا يا بنتي يالا
ضحكت هيا برقه ومسكت ايده وخرجوا بره
شرين: انتو جيتو ليه؟

هبه: تلاقيهم اتخانقوا
ادهم: بس بس انتي وهيا وبطلوا افتراضات كتير كده
ليلى: وحشتونا جينا نقعد معاكم
ادهم: فعلا وحشتونا! وحشتونا لدرجه مش عارف صراحه اقولكم ايه؟
اتقلبت القعده هزار وضحك واتفاجئ ادهم ان الوقت اتاخر جدا
فقام واستاذن واخد ابوه اللي كان مندمج مع الرجاله في الشارع وروحوا على البيت
اول ما الكل مشي اتلم البنات حوالين ليلى
هبه: عملتو ايه؟
شرين: بالتفصيل الممل لو سمحتو
وفاء: انتو خرجتو ليه؟

ليلى: وانتو مالكم ايش حشرركم
هبه: ايش حشررنا؟ هيا من اولها ايش حشررنا ماشي؟
ليلى: لا لا ابدا معملناش حاجه كان عايز يقول لبابا ياخدني على البيت معاه وفضلنا نهزر حبتين وبوسه على الطاير
هبه: باسك بجد؟
شرين: طعمها ايه هاه حلوه؟
وفاء: طويله ولا ايه
ليلى: يخربيت اسئلتكم انتو بنلت سفله اصلا
لاطبعا مش اللي في بالكم ده خالص بوسه في خدي عادي كده يعني وبعدين دي مجرد خطوبه مش جواز مش هيبوسني غير لما ابقي في بيته.

البنات قاموا وقفوا
هبه: نقوم ننام طالما طلعت في الخد
البنات سابوها ومشيوا وهيا فضلت هيمانه في حبيبها
ادهم رجع بيته مبسوط واول ما دخل
اخيرا سيادتك شرفت؟ مستنيك من بدري؟ والله ليك وحشه عامل ايه؟ سمعت اشاعه عنك كده وجننتني فجيت اتطمن منك انها غلط
ادهم بص للزائر بصه حذر وترقب وهو وابوه بصوا لبعض ولامه بصه لحد امتي هتفضلي كده؟

رواية حبيبي المجهول للكاتبة الشيماء محمد الفصل الثاني عشر

ادهم دخل من بره مبسوط واول ما دخل لقي حد في انتظاره
( اخيرا شرفت انا في انتظارك من بدري
سمعت اشاعه كده جننتني وقولت اجي اطمن منك انها غلط)
ادهم بص لامه واتنهد
( ايه مش هتسلم عليا ولا ايه)
ادهم: اهلا بالخطاب الكبير! عاش من شافك مش بتقولوها كده برضه؟!
سليم: لا اتقدمت كتير وبقيت بتتكلم عربي كويس اهو
ادهم: اكيد طبعا بقالي تقريبا سنتين اهو هنا
المهم خير؟
سليم: خير؟ انا جدك اجي في الوقت اللي يعجبني ولا ايه؟

ادهم: جدي! اه؟ طيب اهلا بيك بعد اذنكم انا طالع ارتاح شويه
سليم: استني هنا قولت عايز اتكلم معاك شويه
ادهم: اجلها للصبح دلوقتي تعبان
سليم: لا الموضوع ما يتجالش اقعد
ادهم قعد قصاده: خير اتفضل
سليم: خير بس انا كنت جايبلك عروسه حفيده واحد صاحبي جدا و
قاطعه ادهم: مع احترامي لحضرتك ولصاحبك بس انا مش محتاج عروسه
انا اعرف انقي لنفسي كويس.

سليم: بتعرف تنقي؟ قولتلي! وعلشان كده منقي واحده جايبها من الشارع وعايز تتجوزها؟ هيا دي تنقيتك؟
ادهم: انا مش جايب واحده من الشارع
انا حبيت بنت محترمه ومن بيت محترم
سليم: اه بيت محترم! ابوها طباخ في كل بيت شويه واخوها الكبير بلطجي وسواق
ده غير المنطقة البيئه اللي ساكنه فيها
دي تربيه شوراع ما تلقيش بينا
ادهم: عجباني ودي خلاصه الكلام
سليم: يعني ايه عجباك؟
ادهم: ملهاش كذا معني.

وبعدين ده شيئ ما يخصكش اصلا فلو سمحت ما تتدخلش في شيئ ما يخصكش
سليم: يعني ايه ما يخصنيش!؟ انا جدك وانا كبير العيله دي وانا المسؤل عنها ولا علشان سبتكم انت وابوك تديروا الشركات يبقي خلاص
لا فوق وشوف انت بتكلم مين؟
ادهم: بكلم مين؟
سليم: انا قبل كل شيئ جدك
ادهم: جدي؟ بعد ما بقى عمري 30 سنه جاي تقول جدي؟
انت يدوب واحد اعرفه شكلا مش اكتر
وما تطمعش في اكتر من كده
ورايك احتفظ بيه لنفسك.

ريهام اتدخلت: عيب كده يا ادهم ما تكلمش جدك كده
ادهم: هيا دي خطتك التانيه؟ بس احب اقولك انه ما يعنيليش اي شيئ قال جدي قال؟
شوفو انتو الاتنين خلال شهر هتجوز ليلى ومفيش قوه على الارض هتمنع الفرح ده فريحوا نفسكم
سابهم و ابوه دخل بعد ما ابنه طلع
علي: ايه ناويين على ايه؟
ايه يا سليم باشا؟ مش مكفيك حياتي اللي ضيعتها مني جاي تضيع حياه ابني؟

سليم: الظاهر اني غلطت لما احترمت رغبتك وسيبتك تربي ابنك بعيد عني! كان لازم اربيه انا
علي: تربيه انت؟ ابني متربي احسن تربيه
متعلم احسن تعليم
من اذكي الناس في شغله وفي حياته
سليم: ولما هو ذكي جايب واحده اي كلام ليه يتجوزها ولا من شابه اباه
علي: القلب وما يريد
ابعد عن ابني ومالكش دعوه بيه
انا غلطت لما سيبتك تمشي كلامك عليا بس مش هسمحلك تبعد ابني عن حبيبته فاهم؟

سليم: انا انقذتك من ورطه كنت هتعيش فيها ده جذاتي وحفيدي انا هتصرف معاه ومش هسمحله على اخر الزمن يدخل عيلتنا واحده زي دي
علي: مش هتقدر تعمل حاجه ادهم غيري
سليم: هتشوف
تاني يوم ادهم نزل شغله هو وابوه
اما الجد ففضل في البيت مع ريهام
سليم: اتصلي يا ريهام بالبنت دي وخليها تيجي او ابعتيلها السواق يجيبها
ريهام: حاضر بس هتعمل ايه؟
سليم: هحاول ابعدها هاتيلي البنت دي.

ريهام طلعت بس ملقتش غير حسين والسواق بتاعها مع جوزها وحسين ولاؤه لادهم بس مضطره
بعتته يروح لليلي ويجيبها
حسين: خلاص هتصل بالباشمهندس وابلغه واجيبها
ريهام: لا انا عايزه افاجؤه وبعدين عايزه اقرب منها واحنا لوحدنا عايزه اشوف ابني بيحبها ليه؟
محتاجه احبها علشان ادهم ولا ايه؟
حسين: اه طبعا يا افندم
ريهام: طيب روح وما تتاخرش
مشي حسين وراح لليلي وطول الطريق بيحاول يتصل بادهم بس موبيله مقفول وفي مكتبه محدش بيرد.

عدي عليه بس مالقهوش في الشركه خالص ولا هو ولا على
في الاخر اضطر يروح لليلي واول ما قالها خافت تروح من غير ادهم بس اخواتها قال لها انها فرصه تحاول تكسب حماتها وتوريها قد ايه هيا بتحب ادهم وتلطف الاجواء شويه
راحت ليلى وقبل ما تدخل
حسين: خلي بالك يا بنتي هما ممكن يحاولو يبعدوكي عن ادهم
ليلى: بس انت قلت.

قاطعها: انا بنصحك بس مش مصدق كلامها هيا اختارت وقت عارفه اني مش هعرف اوصل لادهم او ابوه الله اعلم هما راحو فين؟
ممكن يكون مدبرين اي حاجه ليكي
ليلى: انت بتخوفني كده يعني اعمل ايه؟
حسين: تكوني واثقه من حب ادهم ليكي وما تسمحيش لحد يبعدك عنه مهما يكون الحد ده
واوعي تسمعي منهم انك مش مناسبه ولا انك فقيره ولا ان ادهم هيزهق منك مثلا
مهما يقولو خليكي واثقه في ادهم وفي نفسك.

ادهم سعادته معاكي انتي وبس ده اهم حاجه مهما يحاولو يقنعوكي بالعكس. فهمتي؟
ليلى: ربنا يستر
دخلت ليلى واستقبلتها ريهام ودخلتها عند سليم اللي ليلى خافت منه اول ما شافته
فضلو يتكلمو كلام كتير وليلي واقفه وبيحاولو يرهبوها قبل ما يوجهولها اي كلام
سليم: اه انتي بقى اللي واكله دماغ حفيدي؟
ليلى: انا مش واكله دماغ حد
سليم: امال ايه بيحبك ليه ومتشعبط فيكي كده؟ عملاله عمل مثلا؟
ليلى: لا طبعا انا وادهم بنحب بعض.

سليم: انتي بتحبيه؟
ليلى: طبعا بحبه
سليم: بتحبي فلوسه؟ مستواه؟ المركز اللي هينقلك فيه؟ لكن بتحبيه هو؟ ما اعتقدش
ليلى: انا يوم ما حبيت ادهم مكنتش اعرف انه غني اصلا ولا مركز ولا مستوي كنت فكراه انسان عادي
سليم: اه سمعت بالفيلم ده بس مش مصدقه
ادهم صوره واسمه في مجلات كتير
ما تقنعينيش انك مكنتيش تعرفي
انت بس بتمثلي كويس
ليلى: حبي لادهم حقيقة مش تمثيل حضرتك غلطان
سليم: لا طبعا مش غلطان
ريهام: انتي بتحبيه بجد؟

ليلى: طبعا بحبه بجد
ريهام: طيب اثبتي حبك ده
ليلى: اثبته ازاي؟
قلقت ليلى وخافت منهم وندمت انها جت من غير ما ادهم يكون موجود
ريهام: اثبتي حبك واتاكدي من حب ادهم ليكي
ليلى: انا بحب ادهم وواثقه من حبه هو كمان
سليم: امال خايفه كده ليه ووشك اتخطف؟
ليلى: انتو بتشككوا في حبي ليه وحبه ليا
انا والله بحبه من كل قلبي
ريهام: طيب هصدقك بس انتي ليه رفضتي انه يلمس شعره منك؟ بتجننيه وبس وبتعليقه بيكي.

خايفه انه لو لمسك ما يتجوزكيش صح؟
ليلى: لا طبعا انا رفضت ادهم يلمسني لاني ده حرام ولاني اتربيت على ده مش علشان اجننه وبعدين ادهم هو بنفسه اللي قالي انه مش عايز يلمسني غير بعد ما يتجوزني
ريهام: ده كلام لكن انتي عارفه انه لو لمسك مش هيتجوزك لان خلاص مفيش حاجه فاضله يتجوزك علشانها
ليلى بدمعه بدات تنزل: لا ادهم بيحبني
سليم: ايه الميزات اللي انتي شايفاها في نفسك علشان يحبك؟
انتي بنت عاديه بنت طباخ.

جمالك عادي وفي مليون واحده جميله
معندكيش ولا مركز ولا نسب ولا اي شيئ
ذكائك عادي وتعليمك اقل من العادي
ايه فيكي مميز؟ بتحبيه؟ في مليون غيرك بيحبوه واحسن منك مليون مره؟
هاه ردي
ليلى: معرفش بس هو بيحبني
ريهام: شرط اساسي في الجواز التكافئ
قوليلي حاجه واحده انتي متكافئة فيها مع ادهم
مستواه؟ مركزه؟ تعليمه؟ شغله؟ اهتماماته؟ هواياته؟ اصحابه؟
ايه اللي بينكم مشترك؟
سليم: العلاقه دي لازم تنتهي.

ليلى: لأ لأ انا بحب ادهم وهو بيحبني
سليم: يكفيكي كام؟
سكتت فجاه من العياط وبصتله باستغراب
ليلى: افندم؟
سليم: اللي سمعتيه تاخدي كام وتسيبيه؟
ليلى: ولا ملايين الدنيا تساوي ضفره حتى
ريهام: سيبك من الكلام اللي لا يودي ولا يجيب
تاخدي كام وتسيبيه؟ كل انسان ليه ثمن المهم تعرفي ثمنه كام؟

ليلى: انا اسفه بس انا مضطره امشي بعد اذنكم
ويدوب لفت وشها وهتمشي
سليم: طبعا سيادتك ما تعرفيش حاجه عن الذوق او اداب المعامله بدليل اهو ان احنا لسه مخلصناش كلامنا وحضرتك ماشيه!
ليلى: انا ماشيه لان معنديش كلام اقوله
حبي لادهم مش للبيع اسفه
سليم: مليون جنيه؟ مبلغ ما تحلميش انتي وعيلتك كلها تملكيه هاه؟
تعلمي اخواتك وو تتجوزوا وتريحي ابوك من الطبخ في البيوت وتجيبي لاخوكي عربيته الخاصه بدل السواقه.

ايه رايك فكري بعقلك؟ حتى لو اتجوزتي ادهم مش هتملكي مبلغ زي ده لانه طبعا مش هيصرف على اخواتك لكن لما تاخدي المبلغ ده عيلتك كلها هتستفاد
ليلى: عيلتي مش محتاجه فلوس وكل واحد فينا قنوع وراضي بحياته اما انا لا عمري اتمنيت املك مبلغ زي ده ولا عيزاه اصلا
اتمني تكونو خلصتو كلامكم؟
سليم كتب الشيك برضه وعطاهولها
سليم: اتفضلي واياك تعملي زي الافلام وتقطعيه، خديه وفكري وتشاوري مع عيلتك ومعاكي لحد بكره فكري.

ليلى ؛ انا مش محتاجه افكر ولا محتجاه
ريهام اخدت الشيك وحطته لليلي في شنطتها
ريهام: حاجه كمان
ليلى: ايه تاني؟
ريهام: لو واثقه في حب ادهم وفي حبك سلميله نفسك ونشوف هيفضل معاكي ولا لأ؟
ليلى: انا اسفه ده مش هقدر اعمله
ريهام: لو بيحبك وبتحبيه مش هتخسري حاجه بالعكس هتتبسطي معاه! ولو ما بيحبكيش برضه مش هتخسري حاجه!
ليلى: سواء بيحبني او ما بيحبنيش هخسر احترامي لنفسي واخسر ديني واخون مبادئ اتربيت عليها.

ريهام: ما قلتلك سيبك من كلام الشعارات ده
لو ادهم بيحبك فعلا هيكمل معاكي لانه ما يفرقش معاه قوي موضوع العذريه اللي انتي مهتمه بيه قوي
اما لو ما بيحبكيش وقرر ينفصل عنك فساعتها الشيك اللي معاكي ده ملكك وغير اني هاخدك بنفسي لاكبر دكتور في مصر وهرجعك بنت تاني وبكده ما خسرتيش اي حاجه
ليلى: انتي بتتكلمي في ايه؟ انا اسفه انا ولا عايزه فلوس ولا عايزه اتجوزه اصلا باتهاماتكم دي كلها انا اسفه.

سابتهم المره دي وطلعت تجري وتعيط
اول ما خرجت شافها حسين وجري وراها
حسين: ليلى يا بنتي استني، استني طيب انا هوصلك تعالي
ليلى: اسفه بس مش عايزه بعد اذنك
سابته وجريت على بره وهيا دموعها سابقاها
ريهام: هاه يا حمايا العزيز تفتكر هتقبل؟
سليم: لا طبعا ما اعتقدش بس ممكن تسيبه لانها هتشوف نفسها قد ايه صغيره وما تلقيش بيه وبعدين انتي قلقانه ليه؟ ادهم على طول مع بنات.

ريهام: لا المره دي مختلفه والبنت مختلفه دي بيحبها بجد
سليم: حب ايه وكلام فاضي ايه
بكره هيسمع كلامنا ويرضخ زي ابوه ولا نسيتي واهو اتجوزك وكمل معاكي وخلفتو اهوه وكله بيتنسي
اخر النهار ادهم وابوه راجعين من بره ويدوب ادهم ركن العربيه ونزل هو وابوه
حسين شافهم جري عليهم
ادهم: خير جاي تجري ليه؟
حسين: انت فين من الصبح؟ وما بتردش على تليفونك ليه؟
ادهم بص لابوه وضحكوا الاتنين.

ادهم: انت عامل زي الزوجه النكديه وانت مالك انا كنت فين ولا قافل تليفوني ليه؟
حسين: طيب انا زوجه نكديه؟ الزوجه بتسال جوزها كان فين لانه اتاخر عليها وبتسال من باب الحب وبعدين لان انت مردتش عليا شكلك مش هيكون عندك زوجه اصلا ومش هيفضلك غيري اسالك كنت فين ورحت فين؟
ادهم انتبه وبص لابوه
ادهم: قصدك ايه مش هيبقي عندي زوجه؟
حسين: كان لازم ترد عليا
علي: ليلى مالها في ايه اللي حصل؟ وقعت قلبنا اتكلم.

ادهم قلب بيدق بسرعه من الخوف على حبيبته
حسين: لا مش كده ليلى سليمه محصلهاش حاجه
ادهم: امال انت بتلعب باعصابي ليه؟
مسك التليفون ويدوب هيتصل
حسين: ما تتصلش بيها روحلها
ادهم: في ايه اللي حصل؟
حسين: اللي حصل ان الهانم طلبت مني اجيبلها ليلى
ادهم: وطبعا سيادتك روحت وجبتها صح؟
حسين: قالتلي عايزه اقرب منها واحاول احبها زي ادهم واهي فرصه نقضي وقت مع بعض
ادهم: وانت صدقتها؟
حسين: لا مصدقتهاش طبعا بس هعمل ايه يعني؟

ادهم: وبعدين ايه اللي حصل؟
حسين: جبتها وفضلت احذر فيها انها ما تهتمش بكلامهم
ادهم: حسين انجز ايه اللي حصل؟
حسين: معرفش انا ايه اللي حصل
كل اللي اعرفه انها خرجت من عندهم منهاره ورفضت حتى تخليني اوصلها او اكلمها
ادهم: عندهم؟ مش قلت ماما بس مين بقى عندهم؟
حسين: جدك
ادهم: ربنا يسامحك
حسين: انا برضه؟ المفروض كنت اعمل ايه يعني اقولها لا مش هجيبها!
ادهم: ايوه تقولها اني قلتلك لا
تقول اي حاجه مش تسلمهالهم.

علي: مش وقته يا ادهم روحلها دلوقتي حسين مكنش في ايده حاجه يعملها روحلها وابقي طمني عليها
على اول ما دخل لقي مراته وابوه قاعدين بيتكلمو مع بعض
علي: بتخططوا لايه تاني؟ مش هتعرفوا تبعدوهم عن بعض
سليم: كله بيرضخ في الاخر
علي: ادهم غيري ربيته انه ما يرضخ ابدا ولا يتنازل عن حقه ابدا
سليم: حق ايه وزفت ايه؟ البنت دي مش مناسبه ودي نهايه الكلام
علي: البنت دي حبيبته ودي نهايه الكلام.

وانت كجد كان المفروض تاخده في حضنك هو وحبيبته مش تحاول تفرق بينهم
سليم: لما يختار واحده تليق ابقي اخدهم في حضني
علي: سبق وخسرتني قبل كده ودلوقتي بتخسر حفيدك كمان
بعد اذنكم.

راح ادهم لليلي واول ما خبط وفتحوله
ماجده فتحتله لقي ليلى وناديه وماجده كمان كلهم عنيهم منفخه من العياط
وعم فتحي قاعد في الارض قدام باب اوضته وباين عليه الحزن وكسره النفس
ادهم: في ايه؟ ايه اللي حصل؟
عم فتحي: ادخل يا ابني
ادهم دخل وعم فتحي وقف وسلمه كيس
ادهم: ايه ده؟
عم فتحي: دي شبكتك وهداياك وايه حاجه جبتها اتفضلهم
ادهم: انت بتهزر صح؟ ليلى في ايه؟
عم فتحي: مالكش دعوه بيها وكلمني انا.

احنا ناس بسيطه وغلابه واه فقره بس اغنيه باخلاقنا ومبادئنا
ادهم: انت بتقولي الكلام ده ليه؟ انا عارفه كويس
عم فتحي: لان علشان احنا غلابه يبقي نتهزا ونسكت مش هنعرف نرد وهنرد بايه وكل الكلام صح
انت في وادي واحنا في وادي
معلش يا ابني سيبنا في حالنا
ادهم: انت بتتكلم في ايه؟ ايه اللي حصل لكل ده؟ وبعدين لو حد غلط فيكو انا هرد وانا هجيبلكم حقكم وانا مش هسمح اصلا لحد يغلط فيكم
عم فتحي: هترد على والدتك وتوقفها؟

ادهم: هعرف اتعامل معاها
ممكن لو سمحت اتكلم مع ليلى! ممكن انا وهيا نحل مشاكلنا بنفسنا
عم فتحي: مشاكلكم؟ دي مش مشاكل دي
ادهم: لو سمحت ممكن نتكلم انا وهيا؟
عم فتحي: اتكلم بس قرار فسخ الخطوبه ده قرارها هيا مش انا علشان تبقي عارف
ادهم: ماشي
راح ادهم وشد ليلى من الارض
ادهم: قومي معايا
ليلى: انا مش عايزه اتكلم ارجوك سيبني
ادهم: لا مش هسيبك مش هسيبك يا ليلى ولا النهارده ولا بكره ولا في اي يوم قومي.

شدها من ايدها وسحبها معاه
ليلى: يا ادهم سيبني ارجوك سيبني
هيا بتتكلم وهو بيشدها وخرجها بره
ليلى: يوووه يا ادهم سيبني استني
ادهم: استني ايه؟
ليلى. : انا حافيه
ادهم: مش مهم اتفضلي
شدها وركبها العربيه وطلع بيها ساق لحد ما وصل مكان هادي على الكورنيش فطفي العربيه وبصلها
ادهم: ممكن بقى تبطلي عياط وتقوليلي ايه اللي حصل؟
ليلى زودت عياطها
ادهم: انا بقول بطلي عياط مش زودي العياط.

ليلى مش عارفه اصلا تسكت حاولت تتكلم بس ما عرفتش من كتر العياط
ادهم: طيب بس بس هششششش اسكتي ما تقوليش حاجه اهدي الاول
ضمها لصدره وهيا خبت وشها وفضلت تعيط كتير قوي وهو ضاممها وساكت وبيحاول يهديها
قلبه كان بيوجعه على عياطها ده وعجزه هو انه يعمل حاجه
اخيرا بدات تهدي شويه شويه
رفعت راسها وبصتله مسح وشها بايديه
وجاب مناديل وكمل مسح وشها المبلول
اخدت المناديل منه وكملت هيا
ادهم: على فكره انتي بليتي القميص.

ليلى ضحكت وهو كمان
ادهم: اخيرا ضحكتي
ليلى سكتت ودموعها لمعت في عنيها
ادهم: علشان خاطري ما تعيطيش تاني قلبي وجعني كفايه بقى علشان خاطري
بيكلمها وهو بيشيل شعرها من على وشها
بيتكلم بمنتهي الرقه معاها
ادهم: بقى عايزه تسيبيني يا ليلى؟ هنت عليكي انا؟ ايه مش بتحبيني كفايه؟
ليلى: انا بحبك والله بحبك
ادهم: من غير حلفان طيب
ليلى: ما هو انتو كلكم بتشككوا في حبي ده.

ادهم: بصي خليني انا لوحدي في كفه والعالم كله في الكفه التانيه
انا بعمل كده ما بحطكيش مع اي حد
ممكن بقى تحكيلي ايه اللي حصل الصبح مع امي وجدي؟
ومن غير عياط وواحده واحده
ليلى حكت لادهم كل حاجه وهو سامعها وساكت مش بيعلق ولا بيتكلم لحد ما هيا سكتت
ادهم: وعلشان كده عايزه تسيبيني؟
ليلى: مش عايزه اسيبك بس اعمل ايه؟
ادهم: يعني هما بيعملوا كده علشان يبعدونا عن بعض وانتي عارفه كده وبرضه عايزه تنفذي رغباتهم؟

ليلى: امال اعمل ايه؟ هما مش عايزيني
ادهم: انا عايزك! والمفروض ان ده اللي يهمك انا وبس ( مسك وشها) انا بحبك مالكيش دعوه بيهم! انا اللي هتجوزك مش هما وانتي هتعيشي معايا مش معاهم فاهمه؟
وسبق واتفقنا ما نسمحش لحد يدخل بينا بتدخليهم ليه بقى؟
ليلى: دي مامتك مش حد ومش عايزاك تخسرها بسببي
ادهم: اديكي قولتي مامتي! مش هخسرها.

هيا بتحاول وبتجرب بس في الاخر هترضي بالامر الواقع وهتستسلم المهم انتي بس ما تستسلميش الاول
انتو الاتنين مهمين عندي كفتين الميزان راجحين قصاد بعض وهيا عارفه كده كويس خليكي بقى ناصحه زيها
ليلى: يعني ايه؟
ادهم: يعني هيا عارفه اني بحبها ومهما تعمل اه ممكن ازعل منها بس عمري ما هخسرها وهيا بتلعب على النقطه دي وبتقول لنفسها مهما تعمل هسامحها
انتي كمان خليكي واثقه من حبي ليكي وواثقه اني عمري ما هخسرك ابدا.

نزعل اه لكن ما نسيبش بعض
ليلى: يعني اعمل ايه؟
ادهم: تفضلي جنبي ومالكيش دعوه بيها ومهما تعمل او تقول ما ترديش عليها بس تصدريني انا ليها وانا اللي هعمل اتفقنا؟
ليلى: وجدك؟
ادهم: اهو ده بقى تجاهليه تماما وما تسمعيلوش اصلا سيبك منه خالص
ليلى: انا اول مره اعرف ان عندك جد اصلا
ادهم: لاني ما بعتبروش جد اصلا هو عمره ما كان له اي دور في حياتي فهمتي بقى؟
ليلى: مامتك قالتلي ---------
ادهم: قالتلك ايه؟

ليلى: قالتلي اني يعني -----
ادهم: يعني ايه ما تتكلمي على طول
بصت للارض ووطت وشها
ليلى: اني لو واثقه في حبنا ااا
ادهم: ااا ايه؟ تعملي ايه؟
ليلى: اسلمك نفسي
ادهم: وبعدين؟
ليلى: لو انت بتحبني هتكمل ولو لأ هتسيبني
ادهم: وبعدين؟
ليلى: وبعدين ايه مفيش بعدين
ادهم: وبعد ما اسيبك ايه اللي يحصل؟ هتستفادي ايه يعني؟
ليلى: ما هيا بقى هتعوضني
ادهم: تعوضك ازاي ان شاءالله؟ بفلوس يعني وكده؟
ليلى: بفلوس وترجعني تاني زي ما كنت.

ادهم: ترجعك ازاي بقى؟
ليلى: توديني لدكتور يرجعني بنت تاني
ليلى بتتكلم وهيا باصه للارض واول ما قالت كده ادهم ضحك بصوته كله ليلى بتبصله باستغراب لان الموضوع يضايق مش يضحك
ادهم: سوري يا قلبي
بس امي دماغها ضربت خالص
طيب انتي قولتلها ايه؟
ليلى: مقلتلهاش طبعا سبتهم ومشيت
ادهم: طيب وانتي عايزه ايه؟
ليلى: عايزه ايه في ايه؟
ادهم: عايزه تشوفي اذا كنت بحبك ولا لأ؟ ولو لمستك هسيبك ولا لأ؟
ليلى: انت عايز تلمسني؟

ادهم: نعم يا روحي وده سؤال برضه؟ انا عايزك طول الوقت
ليلى: انت فاهم انا قصدي ايه؟ لو ده الدليل على حبي يا ادهم انا موافقه اعمله
ادهم: موافقه تسلميلي نفسك؟
ليلى: موافقه اثبت حبي ليك
ادهم قرب منها قوي ومسك وشها وباسها على راسها بوسه حب وتقدير واحترام
ادهم: عمر ما ده كان دليل حب يا ليلى وانتي فهمتيني ده وعرفتيني ازاي احب بجد
سيبك يا قلبي من كلام كل الناس.

وخليكي معايا انا وبس -- انا بحبك وبعشقك وبموت فيكي ومحدش في الدنيا دي يفرق معايا غيرك وبعدين اه عايزك وعايز كل حاجه منك وهاخدها بس لما تلبسي الفستان الابيض واخدك من ايدك واخدك بيتي مش قبل كده اتفقنا يا اغلي ما في قلبي؟
ضمها ليه وهيا لقت الامان بين ايديه
ادهم وصل ليلى بيتهم وقبل ما يروح عطته الشيك بتاع جده
ليلى: ده اعمل بيه ايه؟
ادهم اخده منها: ده انا اللي هعمل بيه مش انتي هاتي.

روح بيته لقي جده وامه في انتظاره دخل بيصفر ويدندن وطالع على اوضته
ريهام: ادهم
قاطعها: هششششش انا راجع مبسوط ومش عايز اتكلم تصبحي على خير
ريهام: استني
وقف على السلم واستني
ريهام: هيا سلمتك نفسها ولا ايه؟
ادهم ابتسم: زي ما انتي قولتليها؟ على العموم اللي بيني وبينها شيئ ما يخصكيش تصبحي على خير
سابها وطلع اوضته من غير ما يتكلم معاهم
الصبح طلع وهو نزل فطر معاهم فتليفونه رن.

ادهم: صباح الخير يا قمر عامله ايه دلوقتي؟
ادهم: هفطر واكلمك اوك يا قلبي
قفل وكمل فطاره وكلهم مستغربينه حتى ابوه كمان مستغرب من رد فعله لانه كان متخيل انه هيزعق ويتخانق مش اللامبالاه دي
تليفونه رن تاني
ادهم: هاه يا محمود عملت ايه؟
--
ادهم: طيب تمام كده متشكر يا غالي
ادهم حط الشوكه من ايده وبص لجده
الكل انتبه لانه اخيرا هيتكلم.

ادهم: اللي حصل امبارح وعملتوه مش هيتكرر تاني ابدا وليلي هتجوزها بموافقتكم غصب عنكم هتجوزها! فبلاش بقى حركاتكم النص كم دي لانها بتجيب نتيجه عكسيه
امبارح لما ليلى عيطت وهيا في حضني ورتني قد ايه انا بعشقها واني لا يمكن ابدا اسمح لحد ياذيها او يضايقها فشكرا ليكم لانكم قربتو بينا جامد قوي
الفرح بعد اسبوعين ما تنسوش وانا هبقي ابعتلكم دعوات ان شاءالله
قام ادهم ورجع تاني.

ادهم: اه صح متشكر يا سليم باشا على هديتك الجميله دي مقبوله منك
سليم: هديه ايه؟ انا ما اديتش حد هدايا
ادهم: امال المليون جنيه دول كانوا ايه؟ ( خبط ايده على راسه بتريقه) اوف سوري نسيت دول كانوا علشان ليلى تسيبني؟! اممم على العموم ليلى اديتني الشيك وانا اخدته وبعدين قولت مفيش اكرم من جدي طبعا روحت ايه بقى؟ فتحت لمرات حفيدك حساب باسمها في البنك وحطتلها المليون جنيه بتوعك
علشان كده بقولك هديه مقبوله.

سليم: انت اتجننت رسمي روح اقفل الحساب ده وهات الفلوس
ادهم: ههههههههه انت عطيته واحنا قبلنا وبعدين ليلى الوحيده اللي تقدر تسحب الفلوس دي
سليم: كمان؟ عملتها هيا لوحدها مسؤله عنه انت اكيد مجنون
ادهم: تاني مره ابقي فكر مليون مره قبل ما تلعب معايا لان انا غير
بعد اذنك.

ويدوب هيمشي اتفاجئ باللي قدامه
مش هو بس كلهم اتفاجؤا.

رواية حبيبي المجهول للكاتبة الشيماء محمد الفصل الثالث عشر

ادهم: تاني مره ابقي فكر مليون مره قبل ما تلعب معايا لان انا غير
بعد اذنك.

ويدوب هيمشي اتفاجئ باللي قدامه
مش هو بس كلهم اتفاجؤا
اتفاجئ بليلي واقفه قصاده في منتهي الشياكه والجمال واول ما شافته
ليلى: وحشتني قلت الحقك قبل ما تفطر نفطر مع بعض ولا ايه؟ اصلا وانت بتكلمني كنت في الطريق لهنا
ادهم مش مستوعب وقفتها قدامه وشكلها بشعرها المفكوك الطويل وجمالها
ليلى: ايه مالك؟ مش مبسوط اني جيت ولا ايه؟

ريهام ردت بسرعه: لو بتفهمي في الاتيكيت كنتي عرفتي انك المفروض تتصلي قبل ما تيجي وخصوصا لو في وقت مش مناسب اصلا للزيارات
ادهم: خلصتي كلامك؟ حد عنده حاجه ممكن يضيفها؟ مفيش كويس
ليلى بيتي هو بيتك تيجيه في الوقت اللي يعجبك ( مسك ايديها وباسها وكل كلمه ببوسه) صبح! ظهر! فجر! اي وقت انا متاح ليكي ال 24 ساعه انتي بس تشاوري اوك
ليلى: اوك هنفطر مع بعض ولا فطرت معاهم؟
ريهام: للاسف فطر معانا.

ادهم: تعالي نفطر مع بعض في مكان يفتح النفس شويه لان الجو هنا خنقة حبتين يالا بينا
اخدها ومشي وهما الاتنين هيولعوا وعلي فرحان جدا
علي: ياريت بقى تسيبوهم في حالهم وانتي بصي لابنك قد ايه مبسوط معاها مش كفايه ده؟
ريهام: لا مش كفايه مش على اخر الزمن هناسب طباخ وبياعه
سليم: ما تقلقيش انا وراه ويورينا هيعمل ايه في المره الجايه
علي: كفايه بقى انتو ما بتزهقوش
انا رايح الشغل وخليكو مع بعض خططوا للخراب.

ادهم وليلي قضوا اليوم كله مع بعض ضحك وفسح وتسوق طبعا
اخدها ادهم لافخم الاتيليهات تشتري لبس يليق بمكانتها الجديده. وهو كان بينقيلها بنفسه
فساتين بناطيل بلوزات لبس بيت واتوصي جدا بقمصان النوم اللي ليلى كانت مكسوفه اصلا تبصلهم
اليوم خلص وروحها بيتها وهو كمان روح
ادهم: مساء الخير وتصبحوا على خير
سليم: مرحتش الشغل النهارده يعني؟
ادهم: كنت مع ليلى عندك مانع؟
سليم: واخبارها ايه؟
ادهم: ويهمك في ايه؟

سليم: ما يهمنيش بس انا لو مكانك مخليهاش تغيب عن عيني
ادهم بعد ما كان طالع السلم نزل تاني لجده
ادهم: قصدك ايه؟ لو هتوصل ان ممكن حد يأذيها فده مش هسكت عليه ابدا
سليم: هتعمل ايه يعني؟ لو مثلا خبطتها عربيه او مثلا اتخطفت او حد اغتصبها مثلا
ادهم: قسما بالله لاقتلك فيها فاهم؟ اوعي تفتكر انه علشان اسمك مكتوب مع اسمي انك جدي بجد لا اوعي تنسي نفسك انت ما تعنيليش اي شيئ خليك فاهم ده كويس.

سليم: طيب اهدي اهدي انا كنت بقول مثلا وبعدين انا مش راجل عصابات ولا بلطجي
ادهم: والله حتى البلطجيه وبتوع العصابات بيحترموا بعض وليهم قواعد وقوانين
سليم: طيب اطلع وكلم حبيبتك واسهر معاها طول الليل اطلع
ادهم طلع وهو قلقان وقبل ما يدخل اوضته دخل لابوه
ادهم: ممكن اتكلم معاك شويه؟
علي: طبعا ادخل
ادهم: لا تعال انت علشان نكون لوحدنا
ريهام: ده على اساس اني خلاص بقيت عدوتك؟

ادهم: انت اختارتي انك تقفي قصادي وتحاربيني ده كان اختيارك مش اختياري
ريهام: طيب ما تسيبك منها وتعال لحضني وانا هجوزك احلي واجمل منها مليون مره
ادهم: هو انتي معداش عليكي الحب قبل كده؟ هقولك مثال صغير لو انا وانا صغير حد جالك بعد ما ولدتيني وقالك هاخد ابنك واديكي غيره احلي منه واجمل منه كنتي هتقوليله ايه؟ اه موافقه؟
ريهام: ده وضع مختلف انت ابني وحته مني.

ادهم: لا مش مختلف الحب واحد زي ما انا حته منك وما ينفعش تبدليني ليلى حته مني وما ينفعش ابدلها يارب اكون وصلتلك احساسي
اخد ابوه وخرج وقعدوا مع بعض
علي: خير في ايه؟
ادهم: لا خير بس عايز اسالك سؤال غريب ولو سمحت جاوبني بصراحه
علي: بلاش تفتح الماضي يا ادهم
ادهم: لا لا مش هفتح حاجه في الماضي ده سؤال يخصني
علي: طيب قول على طول
ادهم: هو سليم له في الاعمال الخارجه عن القانون؟

علي: جدك؟ قصدك ايه بخارجه عن القانون؟
ادهم: قصدي قتل او خطف او بلطجه!؟ امور زي دي يعني
علي: بتسال ليه؟
ادهم: ارجوك جاوبني الاول! له ولا مالوش؟
علي: لا معتقدش هو ممكن يبتز حد او يجبر حد لكن بلطجه وقتل وكلام من ده ما اعتقدش بس بتسال ليه؟
ادهم حكاله على الحوار اللي دار بينهم
علي: لا يا ادهم معتقدش انه ممكن يعمل حاجه زي دي بس ده ما يمنعش انه هيفضل يضغط عليكم باي طريقه ممكنه.

ما تتوقعش هو ممكن يعمل ايه؟ خلي بالك منه
ادهم: مع احترامي ليكم انتو الاتنين بس سؤال تاني
علي: اسال
ادهم: هو البيت ده بيتك ولا بيته هو
علي: لا ده بيتي انا! انا اشتريته بنفسي اول ما انت جيت الدنيا
مكنتش عايز اي شيئ يربطني بجدك فبعدت عنه خالص وجيت هنا واستقليت بشغلي وحياتي
الشركات دي تعبي انا وشقايا انا جدك مالوش حاجه هنا.

ادهم: طيب معلش يعني هو ابوك وكل حاجه بس طالما انتو مختلفين هو هنا ليه؟ ما تخليه يروح بيته؟
علي: على الرغم من ذكائك وتعليمك الي ان تربيتك بره اثرت عليك
ادهم: وده ايه علاقته ده؟
علي: هو انا وانت لو اختلفنا او اتخانقنا وانا في بيتك هتطردني وتقولي بره بيتي!
ادهم: لا طبعا الوضع مختلف انا وانت بنختلف عادي بس مش لدرجه ان اننا نقاطع بعض لكن انت وجدي مش بينكم العلاقه اللي بيني وبينك.

علي: بس برضه هو ابويا وما ينفعش اطرده
وبعدين انا وهو كنا زي انا وانت كده في يوم من الايام
ادهم: وبعدين ايه اللي حصل؟
علي: نفس اللي بيحصل معاك حب دخل في النص
ادهم: انت حبيت؟ ما تقولش انك حبيت ماما لانه مش باين عليكم الحب
لا اعتقد حبيت واحده تانيه وهو رفضها صح؟ ومن ساعتها انتو اختلفتو
علي: ادهم لو سمحت مش عايز اتكلم في الموضوع ده فاقفله لو سمحت وبلاش اسئله كتير تصبح على خير.

على ساب ابنه ومشي ورجع لذكرياته 30 سنه.

منذ 30 عاما
على راكب عربيته وماشي بيها وفجأه ظهرت واحده بتجري في الشارع ملحقش يتفاداها فخبطها بس خبطه خفيفه
نزل يجري من عربيته ويشوف حصل ايه
علي: انتي كويسه؟ فيكي حاجه؟ انتي ازاي تجري كده اصلا في نص الشارع
رفعت البنت وشها وبصتله وهو غرق في عنيها لدرجه انه نسي انه خبطها او انه في الشارع اصلا زي ما يكون حلم
اتكلمت البنت بصوت سحره اكتر واكتر.

البنت: انا اسفه بس كنت بجري لانه لازم ألحق حاجه مهمه قوي واتاخرت عليها
عيطت البنت وهو قرب منها مش عارف يسكتها ازاي
علي: لا ما تتاسفيش انا اسف اسف بجد ما تعيطيش خلاص
ارجوكي ما تعيطيش
البنت: اسفه بس رجلي بتوجعني ومش هقدر اروح مشواري
عيطت تاني وهو واقف مش عارف يعمل ايه
فجأه شالها من غير مقدمات
البنت: انت بتعمل ايه؟ ارجوك استني ارجوك نزلني
علي: مش هنزلك الاهم فالمهم اهدي واسكتي وماتخافيش مني.

دخلها عربيته وطلع بيها
البنت بخوف: اوقف ارجوك انت خاطفني ولا ايه؟
علي: خاطفك؟ لا طبعا انا هاخدك المستشفي علشان رجلك
البنت: لا لا ارجوك مالوش لازمه نزلني شويه وهبقي كويسه
علي: هششش اسكتي بقى
اخدها المستشفي وكشفوا عليها وكانت رجلها مجزوعه بس
بعد ما خلصت وعلي واقف قصادها
علي: يالا هتقدري تقومي؟
حاولت البنت تقوم بس مجرد ما وقفت كانت هتقع لانها مقدرتش تحمل على رجلها.

طبعا على جري ولحقها ومسكها واتقابلت عنيهم تاني في نظره طويله
على شالها تاني واخدها ونزل بيها
البنت: ارجوك ارجوك نزلني انا همشي عليها
علي: هو انتي معندكيش غير ارجوك دي وبعدين جربتيها ومجابتش نتيجه
البنت: انت مش مضطر تعمل كل ده
علي: عارف على فكره انا اسمي على وانتي
البنت: اسمي امل
علي: امل! اهلا يا امل واسف اني خبطتك مكنش قصدي ابدا
امل: حصل خير
وصل لعربيته وركبها معاه تاني
امل: ارجوك بقى انا هروح.

علي: تاني ارجوك دي؟ مش قلتلك ما بتجيبش نتيجه
امل: طيب اقول ايه؟
علي: تقولي كنتي رايحه فين وكنتي بتجري ليه؟
امل: خلاص بقى مالوش لازمه
علي: ايه اللي مالوش لازمه ده قولي كنتي رايحه فين؟
امل: كنت رايحه شغل جديد هقدم فيه وكانوا بيختاروا ناس بس الكلام ده خلاص
علي: خلاص ليه انتي ممكن تروحي وتقوليلهم اللي حصل واكيد هيقدروا
امل: لا خلاص هما طالبين عدد معين وهياخدوا اللي راح الاول الاسبقيه في الحجز يعني.

علي: طيب انا ممكن اساعدك
امل: انت ساعدتني كفايه شكرا
علي: طيب انتي ساكنه فين علشان اوصلك
وصلها على بيتها وروح بس معرفش يشيلها من تفكيره ابدا كانت عايشه مع امها وخالها
وابوها ميت وخالها هو المسؤل عنها
زارهم تاني يوم يطمن عليها لانه مقدرش يشلها ابدا من تفكيره
بدا الحب يكبر بينهم عجبه جدا رقتها وصفاءها ونقاءها وحس كانها ملاك ماشي على الارض.

ساعدها انها تشتغل لانها رفضت اي مساعده منه فخلاها تشتغل عند ابوه في شركته
ومع الوقت علاقته بيها بدات تاخد وضع جدي جدا
علي: امل انا بحبك ومش عايزك تبعدي عني ابدا
امل: بتحبني انا؟ طيب ليه؟
علي: وهو الحب بيتقال فيه ليه؟ بحبك وبس
تقبلي تتجوزيني؟
امل: انت بتسالني سؤال معنديش الجرأه اني اوافق عليه
علي: ليه؟ السؤال اجابته بسيطه يا اه او لأ؟
يا بتحبيني يا ما بتحبينيش؟
امل: لا طبعا مش بسيط ابدا.

انت فين وانا فين؟ انت مين وانا مين؟
مين هيسمحلك تتجوزني؟ عيلتك؟ ابوك؟ مجتمعك؟ مين قولي؟
علي: امل انا عايز اسمع رايك انتي لان ده اللي يهمني
امل: انا اقصي امل ليا اشوفك كل يوم دقايق واسرق لحظات اشوفك فيها ومش هطمع في اكتر من كده
علي: برضه دي مش اجابه
بتحبيني ولا لأ؟
امل: انت لسه بتسال؟
انا حبيتك من اول لحظه شوفتك فيها وعشقتك لما اتقابلو عنينا تاني مره
ودبت في غرامك لما شلتني بين ايديك
كده جاوبتك ولا لأ؟

عل: انتي هتبقي حبيبتي ومراتي وشريكه عمري فاهمه؟

ادهم صحي وكلم حبيبته صبح عليها وطلع على شغله
وهو في شغله على الظهر كده سمع صوت عالي وخناق بره مكتبه
كان عنده اجتماع مهم ويدوب هيقوم يشوف في ايه الباب اتفتح ودخل خالد ووراه محمود بيحاول يوقفه
ادهم: خلاص يا محمود سيبه
خالد: انت يا بني ادم انت، انت تطلع من حياتنا وتحل عنا بقى
احنا استحملنا منك كتير لكن توصل لكده يبقي تغور في داهيه انت وعيلتك كلها
ادهم: في ايه لكل ده؟ اهدي كده وقولي في ايه؟

خالد: في انك ما تستاهلش ظفر ليلى وطالما مش هتحافظ عليها يبقي تحل عنا بقى
ادهم: انا برضه مش فاهم في ايه؟
ليلى مالها وايه اللي حصل؟
هنا على جه على صوت الخناق والدوشه
علي: في ايه بيحصل هنا؟
خالد: في ان احنا قرفنا منكم بقى
علي: ايه اللي حصل يا ادهم في ايه؟
ادهم: معرفش في ايه وماله وليلي كلمتها من ساعتين كانت كويسه
خالد: كانت فاهم كانت
ادهم قلبه دق بسرعه وخاف يكون جرالها حاجه.

ادهم: خالد في ايه اللي حصل؟ اتكلم بقى وليلي فين؟
خالد: ليلى! ليلى يا حيلتها اتقبض عليها.