رواية حبيبي المجهول

رواية حبيبي المجهول للكاتبة الشيماء محمد الفصل الثاني

مشيوا ناحيه المترو وادهم حاسس ان كدبه بيكتر شويه شويه
والمترو عمره ما ركبه قبل كده
وصلو لحد المترو وادهم واقف مش عارف يتحرك ازاي او يروح فين
ليلى: روح اقطع تذكره ولا معاك اشتراك؟
ادهم: معايا ايه؟
ليلى: اشتراك، اشتراك مترو؟ ماسمعتش عنه؟
سمر: يا ابني انت جاي من انهي كوكب؟
ادهم: ما ركبتش مترو قبل كده
ليلى: احنا كلنا معانا اشتراك انت اقطع تذكره او تعال عدي معايا باشتراكي.

ادهم مفهمش يعني ايه يعدي معاها ويعدي ايه اصلا فاسلم حل انه يقطع تذكره
ادهم قطع تذكره واتحركو هيا ماشيه وهو معاها بيدردشوا عادي لحد ما جه المترو
ادهم: ده زحمة نستني غيره
ماجدة: لا ده كده رايق يالا بينا
ادهم: هتقعدوا ازاي؟
ليلى: محدش بيقعد يالا تعال
دخلو المترو الزحمه ادهم مش بيحب نهائي الزحمه ولا ان حد يزقه او يلمسه اصلا.

كل ما حد يلمس ليلى يضايق وعمال يجيبها يمين وشمال لحد ما وقفت عند الباب وهو قدامها وحط ايديه حواليها علشان محدش يلمسها او يخبطها
وفي محطه الشهداء المترو اتزحم على اخره وهو اتزق جامد عليها
ولقي نفسه مش مضايق نهائي اتزق لدرجه انه بقى لازق فيها، حط شفايفه عند ودنها وهمس
ادهم: تصدقي اول مره احب الزحمه ونوعا ما بدا يعجبني المترو
ليلى: على فكره ما ينفعش تستغل الظروف كده.

ادهم: انا معملتش اي حاجه، انا بتحرك بالقصور الذاتي، هتنزلو ايه؟ الجيزه؟
ليلى: لا بعدها
ادهم: فيصل!؟
ليلى: لا برضه
ادهم: ام المصريين؟
ليلى: ما انت عارف الخط كله اهو
ادهم: هههههه لا هما مكتوبين على الباب
ليلى: امممم على العموم احنا هننزل الساقيه
ادهم: ايه الساقيه دي؟ ده تبع ايه؟
ليلى: مش عارفه انت ازاي سواق ومش عارف اي حاجه في الاماكن؟
ادهم: هو السواق المفروض يبقي حافظ الجمهوريه كلها!

ليلى: لا بس الساقيه دي تبع الجيزه حته شعبيه شويه ممكن اسالك سؤال؟
ادهم: اتفضلي
مي: انت خريج ايه؟؟
ادهم فكر يقولها الحقيقه ولا يكدب كدبه جديده وفي الاخر قرر كفايه كدب
ادهم: خريج هندسه قسم كمبيوتر
ليلى: هندسه! وشغال سواق انت مجنون!؟
ادهم: لا مش مجنون بس شغلي كمهندس مجبش همه فغيرت المجال
ليلى: بس سواق انا فكرتك دبلوم ولا حاجه مش مهندس.

ادهم: ليه عمرك مشفتي حد شغال في مجال غير مجاله وبعدين غيري الموضوع لو سمحتي
فضلوا يرغو لحد ما وصلو ونزلو وجه وقت الفراق، سلموا عليه وماشين
ماجدة: يالا لاحسن حد يشوفنا معاه ويقول لخالد مش ناقصيين
ادهم: خالد مين؟
ليلى: اخونا الكبير المهم سلام
ويدوب مشيت خطوين راح ماسكها وهمس
ادهم: اروح ازاي؟
ليلى: ههههههههه هههههههه. بجد؟
ادهم: اضحكي براحتك مقولتلك مركبتش مترو قبل كده انا سواق يعني بسوق فوق الارض مش تحت.

ليلى: اطلع فوق وغير الاتجاه وانزل الناحيه التانيه واركب المترو الراجع
ادهم: وانزل فين؟
ليلى: هههههههه انت رايح فين بالظبط؟
ادهم: ارجع مكان ما ركبنا
ليلى: تنزل محمد نجيب ولو حبيت تكمل للحدايق هتغير في مبارك
ادهم: اغير ايه؟ واروح الحدايق ليه؟
ليلى: مش بيتكم في الحدايق يادي النيله
ادهم: اه سوري بس انا بقولك راجع مكان ما ركبنا انزل محمد نجيب، اغير ايه برضه لو هكمل؟

ليلى: تغير المترو وتركب اتجاه المرج مش حلوان فاهم وتنزل الحدايق
ادهم: تسلمي يا قمر
ماجده رجعتلها تاني
ماجدة: انتي مش ناويه تجيبيها لبر انجزي
مشيوا وهو لف ورجع تاني ونوعا ما بدا يحس بالاثاره في حياته
طبعا ادهم ركب المترو ورجع ونزل محمد نجيب اتصل بسواقه عم حسين
ادهم: عم حسين تعال خدني لاني معنديش ادني فكره انا فين
المفروض ان انا نزلت محطه محمد نجيب وطلعت بس مش عارف طلعت فين؟

عم حسين: محطه ايه وبتتكلم عن ايه؟ وانت فين؟
ادهم: مترو وبقولك محمد نجيب ايه بتكلم انجليزي انا
عم حسين: محمد نجيب تبقي جنبنا تعال انت
ادهم: هو انت شارب ايه على المسا؟ بقولك مش عارف انا طلعت فين اصلا تقولي تعال
عم حسين: طيب انا هجيلك بس من غير عربيه وانت انزل تحت تاني
ادهم: انزل ليه؟
عم حسين: اسهل اني الاقيك تحت اقف عند شباك التذاكر ودقايق وهكون عندك
وفعلا اقل من خمس دقايق كان عنده واول ما شافه ضحك عليه.

ادهم: ولا كلمه فاهم
عم حسين: انا ما اتكلمتش
بس سؤال واحد؟ ليه؟
ادهم: وانت مالك انت؟
بقو بيسرقو اللحظات اللي يقعدوا فيها مع بعض
وقت غدا، وقت بريك، واخر النهار يوصلها ودي كانت متعته ركوب المترو وخصوصا وهو زحمه علشان تكون قريبه منه
بس كل ده ومحدش فيهم اتكلم عن مشاعره
ادهم مع السواق بتاعه في الشغل
حسين: واخرتها ايه؟
ادهم: في ايه؟
حسين: في علاقتك بالبنت دي؟
ادهم: مش عارف لسه.

حسين: انت بتحبها ولا تجربه جديده والسلام؟ خلي بالك النوعيه دي من البنات لما بتحب بتحب بجد وبتخلص في حبها
ادهم: مش انت من كام يوم بس كنت بتقولي خلي بالك من البنت دي؟
عم حسين: غيرت رأيي لما شوفتها من قريب وسألت عليها البنت دي نظيفه ورقيقه وجميله.

ادهم: عارف وعلشان كده مش عايز اتسرع في اي شيئ احنا مجرد اصحاب وبعدين انت سألت عليها ليه وقالولك ايه؟
حسين: اصحاب؟ انتو ابعد ما يكون عن الصحوبيه، لهفتك عليها، خوفك عليها، توصيلك ليها كل يوم، ده مش شغل اصحاب وبعدين انا سألت عليها لما لقيتك مصر تخرج معاها كل يوم واهتمامك بيها زاد والكل صراحه شهد باخلاقها المهم انت بقى ناوي على ايه؟
ادهم: انت عايز ايه يا عمي حسين؟
حسين: انا مش عايز حاجه يا ابني.

ادهم: طيب ممكن تسكت بقى؟!
بتعدي الايام وادهم مش عارف يحدد مشاعره ايه؟ حب؟ صداقه؟ تجربة جديدة؟
مش عارف بالظبط كل اللي عارفه انه لازم يشوفها كل يوم ويوم اجازتها بيعدي بالعافيه هيتجنن فيه
ليلى زوغت يوم بدري ساعه وقالته انهم يتمشوا شويه وطبعا هو ما صدق نزلها يجري
ليلى: انت بتنهج ليه!؟ انت بتجري؟
ادهم حط ايده على راسه من ورى بحركه عفوائيه وابتسم
ادهم: بجري؟ لا طبعا وهجري ليه؟ مستعجل مثلا او عايز اشوفك مثلا؟

ليلى: مثلا يعني؟ المهم تعال نتمشي شويه في وسط البلد
ادهم: يالا بينا
ادهم ماشي معاها وكل حاجه اول مره يشوفها كانه محبوس واول مره يخرج الشارع
زي عيل صغير عايز يجري يمين وشمال ويمسك دي ودي
راحو ناحيه العتبه كده وليلي شاورت على حاجه
ليلى: تعال هناك
ادهم: وايه هناك؟
ليلى: هعزمك تعال انا ميته من الجوع
ادهم: بيبص مكان ما شاورت بس مش شايف اي مطاعم او كافيهات ابدا
قالها بحذر وترقب: تعزميني على ايه بالظبط وفين؟

ليلى مازلت بتشاور في نفس المكان وهو برضه مش شايف حاجه
ليلى: انت مش بتشوف بعيد ولا ايه مالك؟
ادهم: انا نظري 6/6 وبشوف كويس جدا بس برضه مش شايف انت بتشاوري على ايه وبعدين اهو وصلنا ورينا بقى تقصدي ايه؟
ليلى: عمي فرج اهو ايه ما تعرفوش،؟
ادهم: فرج؟ لا معرفوش ايه هو بقى؟
ليلى: اسمها مين هو مش ايه هو؟ انت مختلف ليه؟ عامل زي ما تكون؟
ادهم بقلق ؛: مختلف ازاي واكون ايه؟ هو علشان مش عارف عم فرج ابقي مختلف؟

ليلى: مش كده بس بحس ساعات ان في حاجات اول مره تعدي عليك
ادهم: انتي لسه شوفتي حاجه ( قالها بصوت واطي)
ليلى: ايه قولت ايه؟
ادهم: بقولك هتعزميني على ايه ولا غيرتي رأيك؟
ليلى: لا تعال
راحو ووقفوا قدام عربيه كبده ودي كانت تاني صدمه لادهم بعد المترو بس المره دي اجمد مليون مره لانه مش اي حاجه بياكلها وبيقرف جدا وبسهوله جدا
ليلى: مالك؟ هتاكل قد ايه؟ 3 ولا 4؟
ادهم: 3 ايه و 4 ايه واكل ايه بالظبط؟

ليلى: كبده ولا سجق ولا 2 كده واتنين كده؟
انا هاخد اتنين واتنين وانت؟
ادهم شكل السجق مضايقه جدا ومعدته بتقلب ومش عارف يعمل ايه وفي نفس الوقت مش عايز يتكشف او يزعلها ومش هيقدر يدوق اي حاجه من الاكل ده نهائي
بيتابع عم فرج وهو بيعمل السندوتشات مع شكل الزيت والتحمير وريحه السجق
خلاص هيرجع بيرجع لوري ومش لاقي اي كلام نهائي يقوله ومش عارف يخرج ازاي من الورطه دي؟
ادهم: ليلى انا.

ليلى: انت ايه مالك قول بقى انا جعانه هتاكل ايه كبده ولا سجق ولا الاتنين؟
يدوب هيتكلم تليفونه رن وده كانت نجده ليه
كان السكرتير بتاعه محمود
محمود: ايوه يا باشمهندس كنت عايز ااكد على حضرتك عشا النهارده هيكون الساعه 9 حضرتك فاكر؟
ادهم: ايوه يا افندم انا فهمت؟
محمود: يا افندم انا محمود
ادهم: ايوه حاضر انا قريب جدا وهاجي على طول دقايق واكون موجود
محمود: يا باشا فاضل لسه 3 ساعات.

ادهم: انا في الطريق واسف يا فندم على التاخير
محمود: يا با
ادهم قفل السكه وبص لليلي
ليلى: هتمشي؟ يالا تتعوض بس استني انا طلبت وهخليه يلفهم ناخدهم اوك
ادهم: ليلى خلاص مش لازم
ليلى: لا انا نفسي فيهم قوي لو اتاخرت جامد امشي انت وانا هجيبهم واجي روح
ادهم: لا عادي هاتي اللي انتي عايزاه
ليلى: علشان محدش يضايقك
ادهم: ما تشغليش بالك
ليلى طلبت زياده لاخواتها في البيت وابوها
ادهم: انتي هتاكلي كل ده؟

ليلى: لا طبعا ليا ولماجده واخواتي في البيت
ادهم: امم طيب تسمحيلي بقى انا احاسب؟
ليلى: انا قلت انا هعزمك
ادهم: والعزومه باظت خليها المره الجايه لما ناكل بجد
ليلى: لا بس انا جايبه كتير اعزمني لما تبقي حاجه ليا انا بس
ادهم: ليلى! انا مبحبش الكلام الكتير قلت خلاص يبقي تسمعي الكلام خلاص
ليلى حست برهبه منه واتبسطت في نفس الوقت لانها بتحب الراجل اللي بيقول كلامه مره واحده وما يرجعش فيه.

اخدوا السندوتشات ومشيوا وصلها لحد المحل ويدوب هيمشي نادتله
ادهم: ايه خير؟
ليلى: ساندوتشاتك نسيتها
ادهم: ساندوتشاتي انا؟ هو انا جبت اصلا؟
ليلى: انا جبتلك بالهنا يالا باي اشوفك بكره
ادهم اخدهم وهو لو مش حرام كان رماهم واول ما شاف عم حسين
ادهم: ابوس ايدك خد دول بعيد نهائي
عم حسين اخد الكيس منه وهو مستغرب
عم حسين: دول ايه؟ ريحتهم جميله ده كبده صح؟

ادهم: جميلة؟ ايه الجمال فيهم ولا في التاني اللي عامل زي المواسير الطويله ده؟
عم حسين: مواسير؟ ممبار ده ولا ايه؟
ادهم: ويطلع ايه التاني ده لا اسمه كان حاجه فيها س
عم حسين: سجق
ادهم: هو ده خدهم بقى وكلهم اديهم لحد اي حاجه المهم خلصني منهم
عم حسين: طب انت اشتريتهم ليه اصلا؟
ادهم: وانت متخيل ان انا ممكن اقف على عربيه واشتري ده؟
عم حسين ؛ اه ليلى؟ ههههههههه ههههه ولسه انت لسه هتشوف
ادهم: بتضحك سيادتك اطلع بره.

عم حسين وهو بيضحك: مش قد النيله بتتنيلوا ليه
ادهم: انت بتبرطم بتقول ايه؟
عم حسين: بقول تسلمي يا ليلى على السندوتشات الجميله دي بس خلي بالك دي مش هتبقي اخر مره والمره دي نفدت
ادهم: اطلع بره واقفل الباب
ادهم كل يوم بيتعلق بيها اكتر واكتر اتمشوا مره تانيه واصرت تعزمه بس حظه انها كانت عزومه ايس كريم من العبد وهما في طلعت حرب
كل يوم بيتعلق بيها اكتر واكتر.

وفي يوم وهو واقف مستنيها شاورلها وهيا نازله ورايحاله اول ما شافته يدوب هتجري عليه جت عربيه بسرعه وخبطتها وهو يدوب هيقولها حاسبي بس ملحقش العربيه كانت اسرع منه
الكل سمع صوت العربيه واتلم عليها وهو جاي يجري عليها زي المجنون ويدوب هيقرب راحت ماجده مشاوراله يبعد
واحد تاني كان يدوب واصل جه عليها وشالها وادهم واقف مش عارف يعمل ايه؟ ومين ده اللي شالها؟ واختها شاورتله يبعد ليه؟

اخدوها ومشيوا وهو واقف مكانه مجنون عقله هيتشل من التفكير يعمل ايه؟ طيب يطمن عليها ازاي؟ طيب هو ليه كان غبي وما مشيش وراهم يعرف راحو اي مستشفي ليه؟
اتصل بيها بس موبيلها مغلق
الدقايق بتعدي ساعات وهو هيتجنن
روح بيته مش طايق حد يكلمه لا ابوه او امه اي حد مش متقبل يشوف حد اصلا
الليل كله عدي وهو كل دقيقه يرن على موبيلها بس مقفول.

اخيرا طلع الصبح جري بسرعه على مكان الشغل بس لقي المحل مقفول فضل واقف قدامه بس مش بيفتح
حسين: ادهم يا ابني انت واقف هنا ليه؟
ادهم: مستني يفتحوا
حسين: يا ابني النهارده الاحد اجازتهم ما بيفتحوش
ادهم نسي تماما ان ده يوم اجازه المحل وحس في اللحظه دي انه عايز يعيط
حسين: ما تقلقش ان شاءالله خير لو في حاجه لاقدر الله كنا عرفنا
ادهم: موبيلها مقفول ومش عارف اعمل اي حاجه زي ما اكون مشلول، مشلول يا عمي حسين هتجنن.

حسين: طيب اهدي بس شويه وبعدين ممكن يكون موبيلها اتكسر من الحادثه وهيا كويسه وبكره تيجي
ادهم: انت مش عارف امبارح عدي ازاي؟ لسه هستني لبكره؟ انا هموت لو ما اطمنتش عليها
حسين: استني عندي فكره ثواني
امل جديد انتعش جوي ادهم
عمي حسين سابه ودخل مطعم صغير جنبهم وادهم وراه
حسين: سلام عليكم ازيك يا كبير اخباركم ايه
صاحب المطعم: الحمدلله وانت يا عم حسين.

حسين: نحمده على كل حال بقولك متعرفش البنت اللي عملت حادثه امبارح حصلها ايه؟ كانت بنت غلبانه
صاحب المطعم: لا والله كل اللي سمعته انها في المستشفي لكن حالتها ايه الله اعلم
ادهم: متعرفش انهي مستشفي؟!؟
صاحب المطعم: لا معنديش فكره
خرجو من المحل وادهم هيتجنن
حسين: معلش بس بكره مش بعيد
ادهم: بكره مش بعيد! انا الدقيقه بتعدي عليا بساعه وتقولي مش بعيد
حسين: انت بتحبها؟! انت بتعشقها مش بتحبها.

فجأه ادهم مشاعره بقت واضحة زي الشمس هو فعلا بيحبها هو كمان تخطي الحب
معقول مش هيقدر يقولها بحبك؟ كان لازم يقولها من زمان والوقت قدامه
ادهم راح بيته وحبس نفسه في اوضته لانه مش عايز يشوف حد ولا يتكلم مع حد
مستني النهار يطلع
اخيرا طلع النهار وهو خرج زي المجنون مع استغراب الكل من تصرفه وصمته وخروجه كده
لقي المحل مفتوح دخل جري شاف ماجده ويدوب هيتكلم لقي وراه صاحب المحل
وماجده ملامحها متوتره انه يتكلم قدامه.

ادهم: لو سمحتي كنت عايز جهاز لشد البطن واسمه ( ) موجود
ماجده: اه موجود يا افندم وسعره 1200 جنيه
ادهم: تمام هاخده
صاحب المحل: تحب تتفرج عليه اتفضل
ادهم: متشكر عارفه لو ممكن تجيبلي كرتونته
هنا صاحب المحل نادي على واحد من العمال يجيب الجهاز وسابه واقف مع ماجده
ادهم: ليلى فين؟ وعامله ايه؟؟ اتكلمي بسرعه
ماجده: الحمد لله كويسه ويد
: اتفضل الجهاز حضرتك ادفع الفلوس عند الكاشير اتفضل
ادهم: متشكر.

بص لماجده نظره واحد صبره نفذ وهيرتكب جريمه، دفع الفلوس واخد الجهاز ومشي وواقف في نفس المكان اللي بيشوف ليلى فيه على امل ان ماجده تفهم وتجيله
واخيرا شافها جايه ناحيته جري عليها
ادهم: انتو ايه مبتحسوش؟ مفيش اي ادني احساس بيا؟ هتجنن من اول امبارح وانتو ولا هاممكم،؟ طيب افتحو الزفت التليفون وانا اكلمكم؟ للدرجه دي انا ماليش اي قيمه عندكم؟ مشاعري مالهاش وزن؟ مش عارف اذا كانت عايشه او ميته او اي حاجه عنها.

ماجده: مكن تهدي علشان اعرف اتكلم
ادهم: اهدي بجد بتقولي اهدي؟ انتي معندكيش ادني فكره انا اليومين دول عدوا ازاي لانك لو بني ادمه وبتحسي مكنتيش تقولي اهدي دي؟
ماجده: طيب براحتك انا راجعه شغلي ولما تهدي ابقي ارجع اكلمك
ادهم: انتي بتستفزيني ولا ايه؟ هيا عامله ايه؟
ماجده: قولتلك انها كويسه
ادهم: ولما هيا كويسه مجتش ليه ومفتحتش تليفونها ليه هاه؟؟

ماجده: تليفونها اتكسر ومفيش غيره ورقمك متسجل عليه علشان كده معرفتش تكلمك اما مجتش ليه فده لان رجلها اتعورت جامد ومبتقدرش تمشي عليها
ادهم واقف هيتجنن قدام اختها
ادهم: اتعورت ازاي والدكتور قال ايه كلميني بالتفصيل لو سمحتي حالتها ايه بالظبط؟
ماجده: اتحجزت في المستشفي. لانهم اشتبهوا بارتجاج بس الحمد لله طلعت كويسه وكدمات بسيطه والجرح اللي في رجلها ان شاءالله هيخف وبس.

ادهم: عايز اكلمها اتصرفي يا اما تديني عنوانكم وانا اروح اشوفها؟ انا روحت اصلا وخرجت من المترو وعمال الف في المنطقه ومعرفتش اوصل لحاجه عنوانكم ايه بالظبط؟
ماجده: هتروح بصفتك ايه؟
ادهم: باي صفه متفرقش معايا زميلها اي نيله المهم اشوفها
ماجده: مش هينفع خالد عارف زمايلنا واصحابنا متعملش مشاكل
ادهم: طيب اكلمها
ماجده: ممكن تكلمها على الارضي بس ازاي
ادهم خرج موبيله
ادهم: اتفضلي اتصلي بيها
ماجده: انت وحظك هات.

اتصلت بالبيت
ماجده: ايوه يا ناديه ليلى عامله ايه؟ ام طيب هيا فين؟ نايمه؟
ادهم: صحيها
ماجده: طيب صحيها والنبي يا ناديه عايزاها ضروري اصحي يابت ليلى
هنا ادهم شد منها التليفون
ادهم: ايوه يا ليلى انا ادهم
بعد خطوتين وماجده انسحبت بهدوء
ليلى: اهلا ازيك يا ادهم
ادهم: بجد فاكره اسمي لسه؟
ليلى: ليه بتقول كده طبعا فاكراه ومبنسهوش ولو للحظه.

ادهم: وعلشان كده هنت عليكي يومين بحالهم هتجنن ودماغي هتنفجر ومش عارف اتطمن عليكي صح؟
ليلى: انا اسفه بس اول يوم تقريبا ما فقتش وامبارح معرفتش اتصل بيك وندمت اني مش حافظه رقمك اسفه يا ادهم بس متخيلتش انك هتقلق كده عليا؟

ادهم: مش هقلق؟ ليلى انا لا عرفت اكل او اشرب او حتى اغمض عيني اليومين دول والكل هيتجنن مالي وانا مش عارف حتى اقولهم مالي؟ اقولهم ايه؟ هاه؟ قلبي هيقف من خوفه وقلقه؟ ولا عقلي هينفجر من التفكير؟ اقول ايه بالظبط يا ليلى؟ انتي مش عارفه انتي ايه بالنسبالي؟
ليلى: لا مش عارفه انا ايه يا ادهم بالنسبالك؟

ادهم: انتي بقيتي ادماني يا ليلى لازم اشوفك اول حاجه في نهاري ولازم اتغدي بضحتك ولازم اتكلم معاكي واحكيلك عن يومي والا ميكونلوش معني
انتي صحبتي وصديقتي واختي وحبيبتي
ليلى: حبيبتك؟
ادهم: ايوه حبيبتي وروحي وعقلي وكل حاجه! كنت خايف اعترفلك بمشاعري بس اليومين اللي فاتو دول بجحيمهم خلوني اخاف من اي لحظه تعدي وانا مقولتلكيش اني بحبك، بحبك يا ليلى
ليلى:
ادهم: اسف لو صدمتك او فاجئتك بمشاعري بس كان لازم اقولها.

ليلى: ياه يا ادهم اتاخرت كتير قوي لحد ما نطقتها! انت عارف انا نفسي اسمع الكلمه دي من امتي؟
ادهم: من امتي؟
ليلى: من قبل ما اتكلم حتى معاك! كنت بلمحك بعيد واقف مخنوق متضايق وبيبقي نفسي اجري عليك واحضنك واقولك مفيش حاجه في الدنيا دي تستاهل تكشيره حتى منك من زمان يا ادهم وانا نفسي اسمعها
ادهم: واديني اهوه قولتها بحبك وهفضل احبك على طول وديما.

فضل ادهم يحب فيها واهم حاجه حفظها رقمه علشان تكلمه كل شويه او ترن عليه وهو يكلمها!
ادهم روح بيته وداخل بيغني
امه ريهام: ماله الواد ده نازل بحال وراجع بحال؟
علي: هو بقاله فتره مش مظبوط نهائي
ريهام: يكون بيحب؟
علي: معقوله؟
ريهام: وهو ايه اللي يلخبط كيان الواحد كده غير الحب
ماجده روحت ودخلت لاختها بتبصلها ومبتسمه قوي
ليلى: في ايه بتبصيلي كده ليه؟
ماجده: ادهم بيحبك صح؟
ليلى: عرفتي منين؟

ماجده: كان زي المجنون النهارده ويا عيني لبس جهاز 1200 جنيه علشان بس بيسال عليكي
ليلى: طيب خليه يرجعه
ماجده: ماشي نبقي نقوله بس المهم احكيلي بالتفصيل
وفضلو يرغو مع بعض عن الحبيب المجهول
ادهم بيكلم ليلى كل شويه بس هيموت ويشوفها وفي نفس الوقت خايف عليها تنزل لاحسن تتعب
واخيرا قالتله انها هتنزل الشغل بكره وهو مش عايزها تنزل بس هيتجنن ويشوفها
عايز يقولها خلاص ما تشتغليش بس مش عايز برضه يستعجل الامور.

اخيرا واقف اهو مستنيها تيجي وقفت عربيه قدام المحل ونزل واحد نزل ليلى، كان نفس الشخص اللي شالها قبل كده يوم الحادثه
سند ليلى لحد ما دخلت وادهم واقف ومراقب من بعيد
وبعدها بشويه مشي وادهم لسه مستني مش عارف يدخل ولا يستني ولا يعمل ايه؟
وبعدين مين ده اللي بيشلها ووصلها ويسندها كده ويقرب منها كده؟
لازم يعرف ده؟

رواية حبيبي المجهول للكاتبة الشيماء محمد الفصل الثالث

ليلى في شغلها دلوقتي بس كان واضح انها تعبانه ومش قادره تمشي على رجلها
ادهم مش عارف يدخلها ولا هيعمل مشاكل ومش عارف مين الشخص اللي وصلها بس مفترض انه خالد اخوها
واقف عينه على الشباك اللي هيا ديما بتشاور منه بس مفيش حد
اخيرا طلع شغله علشان اجتماع مهم وقاعد معاهم بس عقله مع ليلى
تليفونه رن فلقي رقم غريب مرضيش يرد وبعدها فكر ممكن تكون هيا راح ماسك التليفون ورد واخيرا سمع صوتها.

ليلى: انا مستنياك ينفع تنزل ولا مشغول؟
ادهم: ولو مشغول هنزل برضه ثواني
قام وقف: انا اسف يا جماعه بس في حاجه طارئه ولازم امشي حالا
سابهم ومشي قبل ما حد يتكلم
ابوه هيتجنن من تصرفاته اللي مش مفهومه دي نهائي
نزل جري لحبيبته ولقاها مستنياه وقاعده على الرصيف اللي هو كان قاعد عليه اول مره شافها فيها
ادهم: واخيرا شوفتك!
ليلى بتحاول تقف علشان تسلم عليه فجري هو عليها وقعد جنبها
ادهم: ما تقفيش انا جنبك اهوه.

ليلى: واخيرا شوفتك
ادهم: عامله ايه؟ ولما انتي تعبانه كده نزلتي ليه اصلا من البيت؟
ليلى: علشان اشوفك مقدرتش اكتر من كده
ادهم: ايوه انا كنت هموت اصلا والمحك حتى مش اشوفك بس مش على حساب صحتك
ليلى: سيبك من صحتي المهم قولي اخبارك ايه واخبار شغلك ايه؟
ادهم: شغلي؟ انا كويس وشغلي كويس الحمدلله رجلك عامله ايه؟ وجعاكي
ليلى: شويتين ما تقلقش
ادهم: ما اقلقش؟ انا عيشت يومين يا ليلى ما اتمناهمش لعدوي.

ليلى قربت منه وابتسمت بطريقه طيرت عقله
ليلى: احكيلي حسيت بايه؟
ادهم: مش عارف ليه حاسس انك مستمتعه بقلقي ده وبعذابي في بعدك
ليلى: ههههههه فوق ما تتخيل
ادهم: تعرفي انا ممكن حالا اقوم ارمي نفسي تحت اقرب عربيه واخليكي تحسي بنفس احساسي
ليلى: بعد الشر عليك مش لسه بتقول ما تتمناهوش لعدوك؟
ادهم: ماشي عدوي لكن انتي حبيبتي وفرحانه فيا اعمل ايه بقى؟
ليلى: تقولي قد ايه بتحبي.

ادهم: امممم عايزه تعرفي قد ايه بحبك؟ عقابا ليكي مش هقول وبعدين مش واخده بالك ان انا اتكلمت وصرحت بمشاعري وانتي لسه؟
ليلى: انا لسه؟ امال لما قلتلك اني مستنيه اسمعها منك ده كان ايه؟
ادهم: ماشي تسمعيها بس لازم تقوليها انتي علشان يبقي ليها معني وطرفين المعادله يتوازنو ولا ايه؟
ليلى: ما اهو مش هقدر اقولها دلوقتي
ادهم: ليه بقى ان شاءالله؟

ليلى: ما ينفعش اقولها علشان انت طلبتها لازم تطلع لوحدها ساعتها هيكون ليها معني تاني وطعم تاني زيك كده كنت حاسسها بس جه وقتها وطلعت واعتقد انها طلعت لوحدها من غير ما تخطط تقولها
ادهم: انا خططت اقولها بمليون طريقه لكن ما تخيلتش ابدا اني هقولها وانا بزعق فيكي وفعلا هيا طلعت لوحدها
مسك ايدها وهيا بلطف سحبت ايدها منه وغيرت الموضوع
هو تقبل تغيرها ودردشوا مع بعض شويه.

ليلى: انا لازم اقوم اخويا زمانه جاي قالي ساعتين وجاي يروحني
ادهم: صح هو اللي شالك ساعت الحادثه وهو اللي جابك النهارده؟
ليلى: ايوه هو اتطمن
ادهم: ايه اتطمن دي انا بس بسال عادي
ليلى: الغيره باينه في عنيك
ادهم: لا متهيالك
وقفها وسندها واول ما وقفت لمحو ماجده جايه
ادهم: ايه ده؟ ودي عرفت ازاي؟
ليلى: مراقبه الجو وقولتلها اول ما اقف تيجي
ادهم: اممم طيب مش تقوليلي ان المكان متراقب
ليلى: مش كده بس علشان تساعدني.

ادهم: طيب ما انا موجود
ليلى: وبعدين وزمايلي لما يشوفوك ويسالوني مين ده؟
ادهم: قوليلهم حبيبي
ليلى: اممم بجد والله؟
ادهم: فين المشكله انا فعلا بحبك
ليلى: انت فاكرنا في امريكا هنا اوعي تتجنن وتيجي في مره تقولها قدام حد فاهم؟
ادهم: براحتك
مشيت وسابته وهو كمل شغله واخر النهار مروح بيكلمها في الفون ومبسوط وبعد ما خلص
حسين: صحتها ايه دلوقتي وعامله ايه؟
ادهم: الحمدلله بقت احسن.

حسين: طيب الحمدلله بس مكنتش اعرف انك حبتها قوي كده! اعترفتلها بحبك ده؟
ادهم: وانت مالك؟ على العموم اه اعترفتلها بس صح هيا ليه رافضه ان حد يعرف علاقتنا وانها حبيبتي ايه المشكله يعني؟ ايه يعني لما الكل يعرف انها girl friend بتاعتي
حسين: احنا مجتمع شرقي مفيش حاجه اسمها علاقه او جيرلفريند دي
ادهم: امال هنا بيعترفوا بايه؟

حسين: بالخطوبه وبس دي اللي معترف بيها احنا هنا مش في امريكا اللي انت اتربيت واتعلمت فيها هنا البنات مختلفه وخصوصا بنت زي ليلى دي
احمد: مالها ليلى؟
حسين: بنت بسيطه ومن الناس اللي عندهم قيم واخلاق غير وسطكم
ادهم: ايه وسطنا دي انت هتعمل زيها؟!
حسين: يا حبيبي ماتزعلش مش قصدي بس انت أهو بتقول جيرل فريند ده مش صح هنا ولا ينفع واللي بتصرح بحاجه زي دي بتبقي مش محترمه فهمت بقى؟
ادهم: فهمت بس مش مقتنع.

حسين: هتقولها امتي على حقيقتك؟
ادهم: لما اقرب منها اكتر وافهمها اكتر
حسين: بس خلي بالك الكدب الكتير مش حلو واخرته مش حلوه
ادهم: ربنا يسترها بقى
ليلى اختفت فتره لحد ما تتحسن وكل اللي بينهم تليفونات بس
ادهم اشتري موبيل هديه ليها علشان يعرف يكلمها براحته
اخيرا هترجع تاني ويشوفها تاني كان متحمس جدا انه يشوفها ويكلمها وهيا قصاد عينه
وهو رايح الصبح شغله
حسين: متحمس النهارده خير؟

ادهم: انت مش ملاحظ انك بتتدخل كتير في اللي مالكش فيه!؟!
حسين: بطمن بس عليك وبعدين شايف معاك هديه اكيد لليلي؟
ادهم: ماشي يا عم واه لليلي بس مش هديه بالمعني ده، ده مجرد موبيل بدل موبيلها اللي اتكسر
حسين: طيب ممكن اسالك بكام الموبيل ده؟
ادهم: انت بجد حشري قوي
حسين: لا مش حكايه حشريه
ادهم: امال ايه بقى؟ my god
حسين: حكايه ان التليفون ده احدث حاجه في السوق صح؟
ادهم: طيب وفيها ايه؟
حسين: لا فيها كتير.

اولا المفروض ان حضرتك سواق فمينفعش تروح تجيب موبيل هديه لحبيبتك بفوق 5000 جنيه
ثانيا حتى لو هتقولها حوشت وفداها الفلوس هيا مش هتقبله
ادهم بتفكير: وليه بقى ما تقبلوش؟
حسين: لانها مش هتعرف تبرر وجوده معاها في بيتها تقولهم جابته منين؟ سرقته ولا لقته ولا ايه لان دي راتبها ما يوصلش ل 500 جنيه هاه؟
ادهم: هو انت بتعقد كل حاجه ليه؟
حسين: مش انا انت قلتلها انك على قد حالك يبقي تمشي معاها على قد حالك.

ادهم حدف علبه التليفون قدام جنب حسين
ادهم: حلال عليك الهديه لبنتك
حسين: لا العفو يا باشمهندس خليه ولما تخطبها اديهولها هديه
ادهم: لا خلاص قفلت منه خده يا هرميه من الشباك اختار
ادهم راح واتقابل هو وليلي والمفروض انهم هيخرجوا مع بعض لاول مره
خرجت بدري من شغلها واتقابلت معاه كان واقف على عربيته واول ما شافها ابتسم وقرب منها وسلم عليها
ادهم: اخيرا هنغير منظر باسكت الزباله ده ونخرج
ليلى: ادهم مش عايزه اتاخر.

ادهم: يالا بس
ويدوب هتمشي لقت نفسها هيا في اتجاه وهو في اتجاه
ادهم: انتي رايحه فين؟
ليلى: انت اللي رايح فين يالا
ادهم: طيب اركبي يالا
ليلى: اركب ايه؟ العربيه دي؟ لأ طبعا
ادهم: ليه بقى ان شاءالله؟
ليلى: اولا مش بركب عربيات حد
ثانيا مش هركب عربيه مع حد
ادهم باستغراب: افهم بس ايه الفرق بين اولا وثانيا دي الاتنين واحد.

ليلى: لا طبعا العربيه دي مش بتاعتك بتاعت الشغل ولو جرالها حاجه وانت بتتدلع بيها هتلبس ثانيا بقى انا مش بركب عربيات مع حد
ادهم: اولا ملكيش دعوه بالعربيه واللي هيجري ثانيا يعني ايه ما بتركبيش مع حد انا مش حد المفروض اني حبيبك ولا ايه؟
ليلى: حبيبي اه بس برضه مش هنركب عربيه مع بعض
ادهم: انتي محسساني اني بقولك تعالى شقه مفروشه ولا تعالي نامي معايا دي مجرد وسيلة مواصلات.

ليلى: ارجوك يا ادهم انت بتضيع الوقت يالا بقى ولا هنقضيها خناق
ادهم مخنوق ومتضايق من تفكيرها بس مضطر يجاريها
احمد: ok let s go
ليلى: افندم؟
ادهم: sorry يالا بينا بس هناخد تاكسي مش مترو deal؟
ليلى: ديل وايد ورجل واي حاجه يالا بينا
مشيوا ويدوب هيمسك ايدها سحبتها براحه
وقف وبصلها باستغراب
ليلى: الناس هنا عرفيني ما ينفعش ارجوك
سكت ادهم ووقف تاكسي ومشيوا
اتفاجئت ليلى بانهم واقفين قدام مطعم شكله فخم جدا.

ليلى وقفت وما اتحركتش وادهم بيتكلم بس ملقهاش جنبه بص لقاها وراه رجعلها تاني
ادهم: في ايه مالك وقفتي ليه؟
ليلى: ايه المكان ده؟
ادهم: مطعم ماله؟ هيعجبك يالا
ليلى: انت عارف مكان زي ده منين؟
ادهم فكر للحظه: صاحب الشغل بيجي هنا كتير وانا ببقي معاه علشان كده عارفه
ليلى: طيب اديك قولت صاحب الشغل مش احنا يالا يا ادهم من هنا
ويدوب مشيت خطوتين
ادهم: انتي مالك النهارده؟ حد مصلطك عليا؟

الاول مش هركب عربيه وبعدها لا متمسكش ايدي ودلوقتي لا ما ادخلش المطعم في ايه بالظبط؟

ليلى: في انك غريب بتحاول تعيش عيشه مش عيشتك انا عندي استعداد اخدها مشي معاك لاي مطعم في وسط البلد على قدنا او غالي سنه بس اهو نغير جو وناكل حتى ولو فول وطعميه المهم ابقي معاك لكن انت عايز تركب عربيه مش بتاعتك وتمشي زي صاحب الشغل ولابس بدله معرفش ليه مع انك المفروض انك خارج معايا مش يونيفورم بتاع الشغل وجايبني مطعم هندفع فيه 3000 او 2000 جنيه علشان ناكل اكله منعرفش اسمها انت اللي ايه ده؟ بتعمل كده ليه؟ انا مش عايزه كل ده.

انا ممكن اقعد معاك ساعه على الكورنيش ناكل دره وابقي اسعد انسانه في الدنيا
ادهم واقف مش عارف يرد ويقولها ايه؟
يقولها ان ده لبسه الطبيعي؟ ولا دي عربيته؟ ولا ده طبعه ولا مطعمه ولا ايه ولا ايه ولا ايه؟ كدب كدبه ولا زم يكملها للاخر
ادهم: طيب يا ليلى اوك شوفي عايزه تروحي فين و انا معاكي
مشيت وهو وراها وقفت على المحطه
ادهم: ممكن اسال انتي واقفه هنا ليه؟
ليلى: هنركب
ادهم: نركب ايه بالظبط؟

ادهم بيسالها وهو عارف الاجابه
ادهم: اوعي تتخيلي للحظه اني ممكن اركب اتوبيس انا وانتي اوعي
راح شدها ووقف تاكسي وركبوا
ساكتين هما الاتنين والسواق بيسالهم رايحين فين وهما الاتنين ساكتين
ادهم: ما تردي على الراجل وقولي رايحين فين
ليلى: حاضر
ردت على السواق ووصلهم ونزلو
ليلى: يالا تعال
ادهم: ايه ده؟

ليلى: ايه هو اللي ايه ده؟ انت محسسني انك خواجه كشري ايه متعرفش الكشري مجيتش هنا انت واصحابك قبل كده؟ ده اشهر محل كشري في وسط البلد
ادهم: يعني اول خروجه لينا تبقي محل كشري؟
ليلى: انا بحب الكشري يالا
شدته من ايده ودخل وراها ودي كانت اول تجربه لادهم بالكشري المره دي هيخرج ازاي بقى منها وهيتحجج بايه!
ادهم: ايه الريحه دي؟
ليلى: ريحه الكشري في ايه يا ادهم مالك؟
ريحه الدقه والصلصه ركز بقى.

قعدوا يدردشوا وجه الجرسون وطبعا ادهم ما فهمش اي مصطلح من مصطلحات الجرسون وفتح بقه وبص لليلي
معرفش يعني ايه نص ولا كماله ولا عادي ولا اي حاجه تانيه
ادهم: هو مش انتي توليتي الخروجه من اولها كملي يالا ساكته ليه؟
ادهم عالج الموقف
ليلى: ماشي بس انت عايز حراق ولا ملكش في الحراق؟
ادهم: هاكل اللي انتي هتاكليه
ليلى: اوك اتفقنا
ومكنش عارف انه هيندم على اختياره ده
جه الكشري قدامهم وادهم بيبصله ايه ده؟

مكرونه ولا رز وايه البني ده؟
ليلى: بتبص كده ليه؟ كل وهو سخن
بصلها لقاها بتقلبه قلب زيها بتحط دقه حط زيها حطت شطه مسك القزازه راحت ماسكاها منه
ليلى: هو فيه شطه جرب الاول قبل ما تزود انا بحب الشطه زياده
جرب فعلا ويدوب حط معلقه في بوقه حس بنار طالعه من ودانه ووشه احمر
ليلى: هههه شكلك مالكش في الشطه
ادهم مش عارف يتكلم اصلا لانه لو فتح بقه هيصوت زي العيال.

اكل كام معلقه والنار بتزيد وهيا بتاكل عادي جدا ومستمتعه جدا
ادهم: في حمام هنا صح؟
ليلى: اه هناك اهوه
ادهم: طيب بعد اذنك
قام بسرعه وهيا ضحكت لانه اكل شطه علشان خاطرها واستحملها
ادهم جري وغسل بوقه بميه بس مفيش حاجه بتبرد النار دي وفضل واقف مش عارف يعمل ايه؟ يمشي ويسيبها ولا ايه؟ ايه اللي هو بيورط نفسه فيه ده وليه كل ده؟
الاجابة كانت واضحه وبسيطة
بيحبها وبس.

هنا سكت وخرجلها وقعدوا يتكلموا مشيوا هما الاتنين جنب بعض وكل ما بيحاول يمسك ايدها بترفض بالذوق
واخيرا وصلها لحد المترو واختها كانت مستنياها
ليلى: هتركب معايا وتوصلني
ادهم عايز يقول اه بس كان تعبان جدا ولازم يروح لانه حاسس ان الكشري هيطلع على عنيه
ادهم: لا معلش ورايا شغلانه لازم اخلصها تتعوض اشوفك بكره اوك
ليلى: اوك اول ما اعرف اكلمك هكلمك سلام
مشيت مع اصحابها واختها وهو جري على عربيته وروح بسرعه.

اول ما وصل ابوه بينادي عليه وامه بس ما ردش على حد وجري على اوضته
علي: لا ابنك زودها قوي
طلع وراه وامه كمان بتهدي في جوزها
دخلو الاوضه عنده مفيش حد بس سمعوه صوته في الحمام بيرجع
امه ريهام: ظلمت الولد تعبان اهو
دخلت عنده لقته قاعد في الارض
ريهام: ايه يا حبيبي مالك قوم
ادهم: لا متقلقيش لخبطت بس في الاكل شويه...
ريهام: اكلت ايه وفين،؟
ادهم: متشغليش بالك انتي
قام ادهم وخرج ولقي ابوه هو كمان واقف.

ادهم: مالكم في ايه؟ اول مره تشوفو حد بيرجع غريبه آه
ريهام: اجيبلك دكتور
ادهم: لا يا ماما بس شويه وهفوق عندي حرقان في صدري ومعدتي مش متظبطه
ريهام: طيب انا هجبلك حاجه للحرقان بس قولي اكلت ايه الاول؟
ادهم: كشري
على وريهام: ايه كشري؟ كشري ايه ده؟
علي: وليه تاكل كشري عرفتو منين ده اصلا؟
ريهام: ولما انت عايز تاكل حاجه زي كده قولي وانا اخلي الشغالين يعملولك هنا حاجه نظيفه.

ادهم: ايه انتو الاتنين؟ عيل صغير انا؟ كلته وخلاص خلص الموضوع مش تحقيق هو
علي: لا مخلصش اهو ما انت عمال ترجع ووشك اصفر وحالتك متنيله
ادهم: طيب خلاص ممكن تسيبوني ارتاح بقى
عند ليلى هيا واصحابها اللي هما جيرانها
هبه ولقبها عجيبه لانها سمرا شويه
شرين ولقبها عبدو وساكنه وفوقهم
وفاء وسمر واختها ماجده طبعا
وفاء: احكيلنا عملتو ايه ورحتو فين!؟
سمر: بالتفصيل الممل.

ليلى: اولا كان عايزنا نخرج بعربيه الشغل وانا رفضت وبعدها خدنا تاكسي روحنا مطعم كده من النوع الهاي قوي بس رفضت وروحنا ابو عماد بتاع الكشري
سمر: جتك نيله بقى يقولك العربيه تقولي لأ ويوديكي مطعم فخم تروحي للكشري اضربها دي ولا اعمل ايه؟
هبه: سيبهالي هو انت هبله ولا هبله بقى حد يرفض مطعم فايف ستار ويروح للكشري واحشك يا اختي الكشري!

وفاء: ايه يا بنات الماده مش كل حاجه هيا مش عايزه تكلفه ايه اللي فيها يعني؟
شرين: الطم ولا اجيب لطامه يارب مش طالبه غير واحد كده طويل عريض حليوه وياخدني مطعم نجمه واحده حتى يارب
ليلى: هههه يارب يا اختي يرزقك من اوسع ابوابه
شرين: طيب والنبي بيلي ريقنا باي حته رومانسيه كده اي كلمه اي لمسه اي حاجه ده احنا غلابه.

ليلى: رومانسيه ايه يا عبدو بقولك اتخانقنا على العربيه والمطعم وبعدها روحنا للكشري وهو شكله مالوش فيه ولا في الشطه وحطيتله شطه كلها وايه قام يجري يا عيني على الحمام يطفي النار وبعدها قعدنا شويه ووصلني للشغل واعتذر وجري
هبه: ياعيني عليك يا ولدي من ليلى العسكري واللي هتعمله فيك
ليلى: والله بحبه بس مش عارفه بحب اغلس عليه
ماجده: مالك سرحتي في ايه كده؟

ليلى: مش عارفه بحس احساس غريب وانا معاه؟ مش عارفه ميعرفش المترو! مبيحبش الزحمه! ساعات بيتكلم انجليزي كتير ولكنته حلوه مش مصطنعه كانه مولود بره! بيصرف مش بيهمه! النهارده حسيت انه ميعرفش يعني ايه كشري اصلا واول مره يدوقه! انسان غريب
وفاء: ولا غريب ولا حاجه هو بس من جاور القوم، كل اللي حواليه ناس نظيفه وهو من كتر ما عاشرهم بقى زيهم وانتي مع الوقت هتبقي زيه.

شرين: ههههههههه وتقول ياي ايه ده؟ ايه اللي بتكوله ده ياي؟ سوفاج
قلبوها هزار وضحك واهي لمه بنات
اخر الليل ليلى كلمت ادهم والبنات جنبها بعد اصرارهم انها تتطمن عليه
ليلى: ازيك عامل ايه بعد علقه الكشري؟
ادهم: الحمدلله كويس
صوته كان واطي وتعبان
ليلى: صوتك ما بيقولش كده انت تعبان ولا ايه؟
ادهم: يعني شويه معدتي مكركبه حبتين مش اكتر just don t worry
ليلى: ايه اخر جمله دي؟

ادهم: سوري ما تقلقيش انتي وما تشغليش بالك وانا الصبح هبقي كويس واشوفك ان شاءالله
ليلى: ولو مش هشغل بالي بيك هشغله بمين
البنات: تيراراتيرراا
ادهم: مين جنبك؟
ليلى: ما تاخدش في بالك دي شله المجانين
ادهم: الساعه كام دلوقتي علشان سهرانين كده مع بعض
ليلى: الوقت متاخر بس احنا ساكنين جنب بعض كلنا اللي فوق واللي في الوش واللي تحت كده يعني ومن صغرنا بنسهر مع بعض.

عدت الليله على ادهم وهو تعبان الليله كلها وقرر انه ما ياكلش حاجه ما يعرفهاش تاني
يومين وادهم اقنع ليلى انهم يفطروا مع بعض وانها تيجي الشغل بدري شويه وفعلا اتقابلو وخناقه كل مره المكان والعربيه والمره دي ليلى اخدته فلفه ودي كانت تجربته مع الفول والطعمية الاكل عجبه جدا واستمتع بالوجبه جدا بس بعد ما رجع شغله معدته اشتغلت وفضل تعبان النهار كله.

اخر النهار مروح لانه مش قادر يفضل اكتر من كده اتصل بليلي واعتذرلها وروح
حسين: وبعدين معاك هتفضل كده لامتي؟ انت مش متعود على الاكلات دي وهيا بتحاول توفرلك علشان ماتصرفش كتير قولها الحقيقة
ادهم: مش وقته وبعدين الحياه تجارب
حسين: بس انت بتتعب جامد ومعدتك مش مستحمله يا خوفي المره الجايه لتاخدك مصمت
ادهم: تاخدني ايه مصم ايه؟ دي بتاع ايه ده كمان؟
حسين: كرشه وفشه ولحمه راس وكوراع.

ادهم: ايه الكرشه والفشه دي ده عباره عن ايه؟ حسين: مصارين البقر ورجليه
قاطعه ادهم: بس خلاص يا عم حسين اسكت واوقف على جنب بسرعه
وقف وهو فتح الباب وفضل يرجع وعم حسين بيضحك عليه
ادهم: اااااه انت بتضحك عندك حق ماهو انت مش حاسس بيا
حسين: اسف يا ابني بس تخيلتك كده اول ما تدخل هتقولها ايه؟ ولا هتسيبها وتجري هههه
ادهم: اضحك اضحك براحتك انت، اول مره اعرف ان الحب بهدله كده.

ليلى خرجت مع اصحابها ونزلو الجيزه فانتهزت الفرصه واتصلت بادهم
ليلى: احمد مشغول؟
ادهم: ليه؟
ليلى: جاوب الاول مشغول ولا فاضي
ادهم: اتردد هو مشغول بس لو في فرصه يشوفها بعيد عن الشغل مش هيضيعها
ادهم: مش فاضي ولا مشغول وده يعتمد على الوضع
ليلى: يعني لو الوضع اني اشوفك هتقول ايه؟
ادهم: هقول حددي المكان وخمس دقايق وابقي عندك
ليلى: ينفع تيجي الجيزه؟
ادهم: اه ينفع بس فين في الجيزه؟

ليلى: تعال بس واوصفلك في الطريق بس مبدئيا كده عند الميدان
ادهم: مش عارف حاجه في الجيزه فسال حسين ووصفله المكان
ادهم اتصل بليلي
ادهم: انا في الميدان انتي فين؟
ليلى فضلت تقوله اماكن كتيره وهو مش عارفها
ليلى: طيب عند عمر افندي
ادهم: ويطلع ايه عمر افندي ده وهو فين؟
ليلى: ااااه هتجنني طيب السنترال واوعي تقولي سنترال ايه ده الميدان عباره عن السنترال
ادهم: لحظه كده اه اه شوفته انا قدامه اصلا.

ليلى: ثواني وهبقي عندك خليك معايا وقولي انت واقف فين بالظبط؟
اخيرا وصلوا لبعض وطبعا معاها اصحابها وعرفتو عليهم
شرين: هو انت معندكش اخوات صبيان يا اخويا
ادهم: لأ ليه؟
شرين: خساره يالا المهم فرصه سعيده اكابتين
ادهم: انا اسعد اتشرفت بيكم يا بنات جميعا
يالا يا ليلى يدوب انتي بتقولي ساعتين
ليلى: انت جاي بالعربيه تاني؟
ادهم: يعني نفترض ان حد اتصل بيا اقوله استني والنبي ارجع اجيب العربيه خليكي منطقيه بقى شويه.

ليلى: ماهو
ادهم: ماهو ايه؟ قولي حاجه يا ماجده
ماجده: العربيه هتسهل الطريق وبعدين لو حصل حاجه يعرف يجيبك بسرعه روحي
ادهم: تصدقي انا هبدا احبك
ماجده: ماشي بس عد الجمايل
احمد: يا باشا انت فوق راسي
اخدها واتحركو كانت مبهوره بالعربيه وفخامتها فضل سايق شويه وبيفكر يروح فين ليلى: ده شارع البحر العظم هتلاقي فيه اماكن كتيره يتقعد فيها او اركن جنب الكورنيش كده وخلاص.

ادهم: نفسي اعرف مش عايزانا نقعد في مكان محترم ليه؟
ليلى: نظرتنا للاحترام مختلفه انا اي مكان بسيط هيعجبني انت بتحكم بفخامته
اهوه استني
ادهم: استني ايه؟
ليلى: نادي النقابة بتاع المهندسين تعال ندخل بالكارنيه بتاعك
ادهم: كرنيه ايه؟
ليلى: كرنيه النقابه مش انت مهندس ولا ايه؟
ادهم: اه ماشي نركن بس يالا تعالي
نزلو وماشين وكالعاده كل ما بيحاول يمسك ايدها بتسحبها وتبتسم
ادهم: ماشي براحتك.

دخلو وقعدوا وجالهم الجرسون بيسالهم تشربوا ايه؟
ادهم: فيه موكا
الجرسون: افندم؟
وبيبص ليلى
ليلى: ما تبصليش انا معرفش ايه الموكا دي
ادهم: اوك خلاص كابتشينو ولا ده كمان مش موجود؟
الجرسون: موجود يا افندم والانسه؟
ليلى: زيه ولا اقولك في عصاير فرش
الجرسون: ايوه يا فندم
ليلى: لو سمحت عصير مانجه
مشي وهما بيبصوا لبعض والاتنين مستغربين بعض
ليلى: تطلع ايه الموكا دي؟
ادهم: نوع من انواع النسكافيه بس احلي شويه منه واقوي.

ليلى: امممم ماشي
هما الاتنين ساكتين لحد ما جه الجرسون بطلباتهم
ليلى: انا بعشق المانجه بكل اشكالها
ادهم بابتسامه: وايه كمان؟
ليلى: وايه كمان ايه؟
ادهم: بتحبي ايه كمان؟ عايز اعرف كل حاجه عنك كل حاجه بتحبيها
ليلى: بحب الشوكولاته وخصوصا بنت الابالسه مارس غاليه بس حلوه
ادهم: مفيش اي شيئ في الدنيا دي يغلي عليكي فاهمه؟
ليلى ابتسمت واتكسفت وشغلت نفسها بالعصير.

ادهم بيبصلها وسؤال جواه بيلح يخرج بس مش عارف يقوله ازاي؟ هيقوله من غير تزويق احمد: ليلى!
ليلى: هاه
ادهم: تتجوزيني؟

رواية حبيبي المجهول للكاتبة الشيماء محمد الفصل الرابع

ادهم بيبصلها وسؤال جواه بيلح يخرج بس مش عارف يقوله ازاي؟ هيقوله من غير تزويق ادهم: ليلى!
ليلى: هاه
ادهم: تتجوزيني؟
ليلى مش مستوعبه سؤاله او مش متاكده من اللي سمعته
ادهم: على فكره انا مستني اجابه لسؤالي
ليلى: وعلي فكره المواضيع دي مفيهاش هزار فلو سمحت يا ادهم متهزرش
ادهم: هزار؟ هزار ايه؟ على فكره انا جد جداانا عايز اتجوزك
ليلى: انت بتقول ايه؟ طيب ليه؟
ادهم: وهيا دي فيها ليه؟ على العموم اقولك ليه.

علشان عايز اخر الليل ارجع الاقيكي في بيتي
وعايز انام في حضنك انتي
وعايز افتح عيني الاقيكي انتي
وعايز لما ازعل اعيط في حضنك انتي
ولما افرح افرح معاكي انتي
من الاخر عايز اشاركك في كل حاجه
تقبلي تشاركيني يا ليلى في كل حاجه؟
ليلى مش مصدقه اللي بتسمعه ومش لاقيه صوت ترد بيه
ادهم: اوكي خلاص لو كلامي ضايقك اعتبري نفسك ما سمعتيش حاجه يالا بينا
ويدوب هيقوم يقف مسكت ايده.

ليلى: استني بس انت ايه على طول متسربع كده؟ انا المفاجأة لجمتني معرفتش ارد
ادهم: والمفاجأة دي حلوه ولا صدمه؟
ليلى: صدمه طبعا( ادهم كشر فلحقته) بس مفاجأة حلوه ومش عارفه انت ازاي لسه بتسال ومستني اجابه!
ادهم: لان المواضيع دي لازم تكون الاجابه صريحه وواضحه مفيهاش افتراضات
ليلى: موافقه يا ادهم اشاركك حياتك كلها
اجابه صريحه ولا؟
ادهم: ليه؟
ليلى: ليه ايه؟
ادهم: ليه موافقه؟

ليلى: امم انت عايز تسمع ايه؟ تسمعني اقولك علشان بحبك وبموت فيك!؟
ادهم: مثلا
ليلى: ادهم انا بحبك من زمان قوي من قبل حتى ما نتكلم مع بعض، كنت بشوفك من بعيد وبتمني اكلمك ولو كلمه
ادهم: وايه اللي منعك؟ وليه ضيعتي الوقت ده كله؟
ليلى: كنت هقولك ايه هاه؟ هاي انا ليلى بشوفك من الشباك كل يوم وبحبك؟ كنت هتقولي ايه ساعتها؟
ادهم: اممم احتمال كبير اجري منك
ليلى: هاه شوفت.

التليفون رن وكانت ماجده بتستعجل ليلى علشان اخوهم بيتصل ومستعجلهم يروحو
ليلى طبعا قامت تجري وادهم وصلها بسرعه
روحو بيتهم واول ما دخلوا لقوا خالد في انتظارهم
خالد: اتاخرتو كده ليه؟ هو في بنات تتاخر بره لحد الساعه 11 كده؟
ماجده: كنا بنشتري حاجات وبعدين الدنيا صيف والناس ماليه الشوارع
خالد: برضه متتاخروش كده المهم اشتريتو ايه؟
بيسال وبيبص لليلي ومستني الاجابة منها وطبعا هيا معندهاش اي فكره هما اشتروا ايه.

الوضع اتأزم للحظه بس الباب خبط
ليلى فتحت لقت البنات اصحابها
شرين وهبه وسمر ووفاء
شرين: ايه يا جنجا عامل ايه؟
خالد دلعه جنجا والكل بيندهله بالاسم ده
خالد: احسن منك بقولك يا بت يا عبدو انتي ما تيجي اتجوزك واهوه كله بثوابه!
شرين: اخرس انا اتجوزك انت فشر
خالد: بكره تعنسي، تيجي انتي يا بت يا سمر
سمر: لا يا اخويا شكرا
هبه: متشوفلك سكه كده يا جنجا ويالا يا بنات نقيس الحاجات اللي جبناها.

فعلا خالد سابهم وخرج وفضلو البنات لوحدهم
معلومه صغيره
ليلى اخواتها بالترتيب
ناديه متجوزه ومعاها ولدين وبنتين
خالد واعزب
نجوي متجوزه ومعاها ولدين وبنت
ماجده ومخطوبه يدوب
محمد ولقبه شكوكو
واخيرا ليلى اخر العنقود
ابوهم بيشتغل طباخ وامهم ميته وحاليا خالد بيعتبر نفسه المسؤل.

نكمل بقى
البنات مع بعض
ماجده: ايه روحتو فين ولا عملتو ايه؟
ليلى: ادهم اتقدملي
البنات: ايه؟ بجد.؟ وساكته ده كله يا واطيه
ليلى: ما انا بقولكم اهوه
وفاء: وقولتيلو ايه وقالك ازاي؟
هبه: احكي بالتفصيل الممل
حكتلهم كل كلمه
ماجده: طيب هيجي يتقدملك هنا امتي؟
ليلى: مقالش او احنا ما اتكلمناش في النقطه دي
ماجده: وليه ان شاءالله؟
ليلى: يعني اول ما يقولي اقوم اقوله تعال البيت؟
ماجده: ايوه طبعا ده الصح.

وفاء: كلها بكره ولا بعده وهيقولها اكيد ما تستعجليش
سهروا البنات
وفاء: هو محمد بيجي امتي من شغله؟
ليلى: بيجي على 12 كده لو جه على البيت على طول اشمعني؟!
وفاء: لا عادي اصله يعني بيتعب جامد
شرين: اه ياعيني
وفاء: بت بطلي
سمر: هيا السناره غمزت ولا ايه؟
وفاء: لا انتو بتخرفو انا هسيبكم واطلع انام سلام
ويدوب فتحت الباب لقت محمد في وشها
محمد: مساء الخير فوفا ايه ماشيه بدري ليه؟

وفاء: لا ده انا كنت هشوف ام امل قفلت ولا لسه فاتحه؟
البنات بيضحكوا عليها
محمد: قوليلي عايزه ايه وانا اجيبلك وخليكي انتي
شرين: هيا بس ولا ايه؟ لا ده انا اصورلكم قتيل
محمد: اخرسي يا بت يا عبدو
هبه: طيب انا يا كوكو ده انا حبيبتك
محمد: تصدقوا انا غلطان روحي يا وفاء هاتي اللي انتي عايزاه هيا مش ناقصه
وهيا خارجه مسكها
محمد: قولي بس عايزه ايه؟ انا بهزر اقعدي.

سهروا مع بعض وماجده وليلي بصوا لبعض نظره فاهمينها الظاهر ان اخوهم وقع
ادهم مستني النهار يطلع علشان يشوف حبيبته بس للاسف النهار كله كان عنده اجتماعات مع عملاء بره الشركه ومعرفش خالص يشوفها
كام يوم عدي وهو برضه مش عارف يروح يقابلها واضطر انه يسافر بره مصر فكلمها بسرعه بس طبعا معرفش يقولها انه مسافر
ليلى الكل بيلعب في دماغها لاحسن يكون حس انه اتسرع وندم وعلشان كده بيهرب منها
وبعد اسبوع بيكلمها.

ليلى: هو انت لسه فاكر؟ ده انا نسيتك اصلا
ادهم: متقدريش تنسيني المهم وحشتيني قوي
ليلى: لا ما وحشتكش ولا انت فاكرني اصلا؟ يالا روح للي كنت مشغول فيه ومتخافش مش هدبسك في عرضك ولا هفكرك بيه
ولو كنت رجعت في كلامك او اتسرعت عادي يعني مش محتاج تتهرب وتقفل تليفونك الفتره دي كلها ما تخافش مش هفرض نفسي عليك
قالت كلامها وقفلت السكه وقفلت تليفونها خالص ومعرفش يرد عليها حتى.

فضلت طول الليل تعيط حتى صاحبتها معرفوش يسكتوها او يشغلوها
ادهم الليل كله هيتجنن متخيلش ابدا انها هتفكر بالشكل ده
الكدب له ثمن برضه لو كان قالها الحقيقه كان قالها انه مسافر شغل
الصبح طلع قام بسرعه ونزل وهو ماشي
علي: صباح النور
ادهم: اسف مخدتش بالي صباح الخير عليكم صباح الخير يا ست الكل
امه: صباح النور يا قلبي اقعد افطر
ادهم: لا معلش عندي مشوار مهم: :
علي: اه بس لسه فاضل ساعه على الاقل على وصول الوفد.

ادهم: وفد ايه؟ انت بتتكلم على ايه؟
علي: بتكلم على الوفد اللي انت رحت مضيت عقد معاهم المفروض انك هتستقبلهم في المطار امال مشوار ايه اللي وراك؟
ادهم كان ناسي تماما الموضوع ده
ادهم: سوري يا بابا بس انا فعلا ورايا مشوار مهم لازم اروحه الاول ولو خلصت هروح للوفد مخلصتش يبقي معلش روح انت
علي: مشوار ايه الاهم ده؟
ادهم: معلش بعدين سلام
علي: لا استني هنا ادهم
بس كان خرج ومشي ومردش عليه.

حسين: انت بتلعب بالنار على فكره
ادهم: والنبي يا عم حسين مش ناقصاك هيا كفايه ليلى اللي افتكرت اني بهرب منها دي
حسين: امال انت فاكر ايه؟ لما تطلب ايديها وبعدها تختفي يبقي انت ندمت
ادهم: والنبي اسكت
حسين: كفايه يا ادهم وقولها الحقيقه متكدبش اكتر من كده
ادهم راح وحاول يكلمها بس قافله تليفونها فضل يشاورلها بس طنشته.

راح داخلها المحل ماجده اول ما شافته ارتبكت هو بصلها ولسه واحد من العمال هيقرب عليه راح طلع على فوق على طول
ليلى اول ما شافته اتفاجئت بيه
ليلى: انت اتجننت؟
ادهم: اه اتجننت اعملك ايه يعني؟ مش انتي كنتي عايزه كده؟
ليلى: امشي ارجوك قبل ما حد يطلع ابن صاحب المحل تحت ورخم
ادهم: رخم على نفسه
وفعلا طلعلهم فوق وكان اسمه ماجد
ماجد: هاه لقيت طلبك
ادهم: لسه بشوف.

ادهم بص حواليه وليلي خرجت كام ترنج رياضي وعملت نفسها بتوريهملو
ادهم: مقاسهم ايه؟
ليلى: مقاس حضرتك اعتقد لارج صح؟
ادهم: مظبوط اوك هاخد دول
مسك تلاته وهيا بتبصله باستغراب لان اسعارهم غاليه
ادهم: اعملي الفاتوره
ليلى عملتله الفاتوره وهو اخدها ونزل بس قبل ما ينزل قالها انه مستنيها والا هيرجع تاني
بعدها بشويه استاذنت وطلعتله
ليلى: انت مجنون ولا فاكر نفسك ايه؟ انت بتعمل ايه بالظبط؟

ادهم واقف لابس نظارته الشمس وساند على عربيته وحاطط رجل على رجل ومن غير ما يتعدل كلمها
ادهم: انتي اللي حطيتينا في الموقف ده
ليلى: انا قلت لسيادتك تيجي تشتري ترنجات تمنها الف جنيه بتهرج؟
ادهم: اهدي واتكلمي بطريقه كويسه لاني بكره الصوت العالي فوق ما تتخيلي
ليلى: انت عارف ملوش لازمه الكلام اصلا بعد اذنك
مشيت خطوتين وكانت متوقعة انه هيوقفها بس هو ما اتحركش من مكانه نهائي.

ليلى: هو انا مش فارقه معاك خالص كده؟؟
هنا دمعه نزلت من عنيها غصب عنها
هنا هو اتحرك وقرب منها ومسح دمعتها
ادهم: اولا انتي مهمه فوق ما تتخيلي بس كان عندي ظروفي وانتي مسمعتيهاش
ثانيا في داهيه الفلوس ما بتفرقش معايا
ثالثا مبعرفش اتكلم مع حد صوته عالي بسيبه يهدي وبعدها اتكلم
لكن ده مش معناه ابدا انه مش فارق معايا فهمتي بقى؟
ليلى: انت كنت فين الفتره اللي فاتت دي؟
ادهم: اهو ده السؤال اللي كان المفروض تبدئي بيه.

على العموم يا ستي انا كنت مسافر في شغل مع المدير ويدوب راجع امبارح واول حاجه عملتها اني كلمتك وكنت مضغوط جامد علشان كده معرفتش اكلمك
ليلى: بقى تسافر من غير ما تقولي؟
ادهم: اهو انا ما رضيتش اقولك لا تقولي اني بتهرب منك وقولت هتقدري انشغالي عنك لكن برضه مقدرتيش وبرضه افترضتي اللي كنت خايف منه اني اتسرعت وندمت وبهرب منك
شوفي انا مفيش شيئ في الدنيا دي كلها يقدر يجبرني اعمل حاجه مش عايزها فاهمه؟

ليلى: فاهمه بس برضه ده ما يديكش عذر تبعد كل ده عني وتسيبني كده
ادهم: حقك عليا اسف يا ستي واوعدك اني قبل ما اتحرك هبلغك الاول اتفقنا بس انت بلاش افتراضات ارجوكي
ليلى: حاضر مش هفترض تاني وهسمعك الاول
ادهم: تمام بقولك حاولي تستاذني بدري وتعالي نخرج نتغدي مع بعض
ليلى: اشمعني؟
ادهم: اشمعني ايه بالظبط؟
ليلى: اشمعني نتغدي مع بعض؟
ادهم: اسباب كتيره اولهم ان الناس بتتغدي وبتجوع
وبعدين انا جعان اصلا من دلوقتي.

واهمهم انك واحشاني جدا
ليلى: كان المفروض تبدأ بده الاول
ادهم: امم ماشي كده اتعادلنا يا ستي المهم هاه قولتي ايه؟
ليلى: هشوف لو عرفت هكلمك
ادهم: خلاص مستني منك تليفون
مشي وسابها هيا راحت شغلها وهو كمان طلع مكتبه بس مش علشان يشتغل لكن عشان ينام
حسين دخل لقاه هينام
حسين: طيب روح ارتاح انت جاي من سفر
ادهم: لا مش هينفع عايز اكون قريب
حسين: طيب اجلها بكره والنهارده ارتاح.

ادهم: هو انا اللي تعبان ولا انت؟ انت راجل غريب يالا اتكل على الله وسيبني انام ولو جد جديد صحيني
حسين: حاضر لما نشوف اخرتها معاك ايه
ادهم: ان شاءالله خير بس انت ادعيلي يا راجل يا طيب
حسين: ربنا يسترها معاك ويعديهالك على خير
ادهم: امين ان شاءالله
فعلا استاذنت ليلى بدري واتصلت بادهم يقابلها
ليلى: ايه فاضي تنزل ولا ايه؟
ادهم: ايوه طبعا ( صوته نايم تماما).

ليلى: ايه ده انت نايم؟ طيب خلاص ارتاح واشوفك بكره ان شاء الله
ادهم: بكره ايه ثواني وهكون تحت
قفل السكه قبل ما تتكلم وقام غسل وشه ونزل جري ليها
ابتسمت اول ما شافته
ليلى: انت نايم فين بقى؟
ادهم: فوق في مكتب فاضي وعلي الكنبه اعمل ايه بقى واحشاني
ليلى: للدرجه دي واحشاك؟
ادهم: واكتر كمان يالا بينا من هنا
ركبت معاه واتحركو
ادهم: تحبي تروحي فين بس ابوس ايدك ولا كشري ولا فول وطعميه ولا كبده.

ليلى: هههههههه خلاص النهارده اختار انت بس ما تخادش على كده ده علشان جاي من السفر بس
ادهم: اممم ماشي
ركبوا العربيه واول ما ركبوا قالها
ادهم: افتحي التابلوه قدامك
ليلى فتحته واتفاجئت باللي موجود
ليلى: دي ليا انا؟ بجد؟
ادهم: اه طبعا ليكي انتي مش بتحبيها؟
ليلى: بعشقها مارس دي بعشقها ويمكن اكتر منك كمان
ادهم: بقى على اخر الزمن تقارني حبي بالشوكولاته ماشي يا لوليتي.

ليلى: لا ده انت المفروض تفرح انت مش متخيل اصلا انا بحبها قد ايه بس مكنتش تجيب علبه كفايه واحده او اتنين
ادهم: علشان اوفر صح؟
ضحكوا هما الاتنين
اخدها على مكان هادي جدا وشكله تحفه من بره معرفتش هو ده كافيه ولا نايتكلب ولا مطعم ولا ايه بالظبط
ادهم: ايه مالك واقفه كده ليه؟
ليلى: لا بس شكل المكان غالي
ادهم: ابوس ايدك سيبيني بقى مره براحتي
ليلى: ماشي ادخل يالا.

جه يمسك ايدها ويدخل بس هيا شدتها براحه هو اخد باله بس معلقش عليها
اول ما دخلت حست ان الدنيا ظلمه وكانت هتقع فمسكها هو
ليلى: شكلهم قافلين الدنيا ظلمه قوي
ادهم: لا يا حبيبتي مش قافلين ولا حاجه هو الجو هنا هادي بس انتي علشان جايه من الشمس حاسه انك مش شايفه هاتي ايدك لحد ما ندخل
مسك ايدها لحد ما قعدوا واول ما قعدوا سحبت ايدها
ليلى: المكان ده مش مريحني
ادهم: ليه بقى ان شاءالله؟

ليلى: حاساه مشبوه كده تحس ان احنا معزولين كده ناقص سرير
ادهم: مكان بيحترم الخصوصيه ايه الغلط في كده؟
ليلى: الخصوصية دي غلط، الخصوصيه تبقي في البيت مش مكان عام واهو لا محصل عام ولا خاص مش فاهمه انا ايه ده؟
ادهم: مش فاهم انا ايه اللي مضايقك هنا؟
ليلى: مش عارفه بس احنا لوحدنا قوي
ادهم: طيب وايه المشكله؟
ليلى: معرفش يا ادهم بس مش مرتاحه وبعدين انت بتدافع عن المكان كانه بتاعك؟

ادهم مرضيش يقولها ان فعلا المكان ده بتاعه وبيحبه جدا واتضايق من رايها ده
استاذنها يدخل الحمام وخرج وراح للعمال جوه اتفق معاهم انهم يعاملوه كزبون عادي ورجعلها
ادهم: ما علينا هتاكلي ايه؟
مسكت المانيو وفضلت تقلب فيه ومش عاجبها حاجه وهو ملاحظها ومراقبها
ادهم: ايه مفيش حاجة عجباكي؟
ليلى: لا وانت الصادق مفيش حاجة عارفاها
مش لاقيه حاجه عارفاها
ادهم ابتسم: اختارلك انا؟
ليلى: ياريت
ادهم: بتحبي المكرونه والفراخ؟

ليلى: طبعا بس فين دول؟
ادهم: مكتوبين بس مش بنفس الاسم
ليلى: لازم الفزلكه يعني ما علينا
ادهم: فز ايه؟
ليلى: ما علينا منك انت كمان المهم اطلب الاكل لو ناوي تاكلنا
طلبو الاكل وطبعا الاكل كان بالشوكه والسكينه وليلي ملهاش فيهم
ادهم: في ايه تاني؟ مش عاجبك الاكل؟
ليلى: لا بس مليش في الشوكه والسكينه اما انت ما شاء الله تحس انك مولود بتستخدمهم
ادهم: بقالي فتره كبيره في شغلي ده وزي ما قلتي اتاثرت بيهم مش اكتر.

ليلى: ساعات بحس انك انت منهم اصلا
ادهم: ممكن تاكلي قبل ما الاكل يبرد وانا هساعدك
قطعلها ادهم الفراخ بحيث تاكل بالشوكه عادي وفعلا اكلوا وهيا بتبصله باستغراب كانها بتدرس فيه
خلصوا اكل وشرب وقعدوا ادهم قرب منها وحاول يمسك ايدها بس هيا بعدت براحه عنه
ادهم: وبعدين لحد امتي؟
ليلى: لحد امتي ايه؟
ادهم: لحد امتي كل ما قرب تبعدي؟
ليلى: متهيألك بس انا قريبه منك اهوه
ادهم: امال بتسحبي ايدك ليه من ايدي؟

ليلى: المكان مش مريحني حاسه ان كل اللي بيدخلوه بيبقي علشان ياخدوا راحتهم فحاسه ان سمعه اي بنت تدخلوا مش حلوه ومش حابه حد يبصلي بطريقه مش حلوه من اللي شغالين هنا
ادهم: اولا مفيش حد هنا يقدر يبصلك باي طريقه
ثانيا كلامك مش منطقي اللي عايز يعمل حاجه هيروح شقه مش هيجي كافيه
ثالثا سمعه الكافيه ده محترمه
ليلى: براحه واحده واحده كده مش قصدي اعيب في المكان بس ده معمول لناس غيرنا مش زينا مش اكتر.

ادهم: انا مش فاهمك هو الناس انواع يعني؟
ليلى: طبعا في ناس عندهم عادي نظام الارتباط وتقول للكل ده صاحبي وتخرج معاه قدام الكل وكله عارف انهم مرتبطين حتى اهلها احنا بقى نوعيه معندناش الكلام ده ولا معترف باي حاجه غير خطوبه او جواز وبس
ادهم: طيب علاقتنا دي انتي بتسميها ايه؟
ليلى فكرت شويه: انا بسميها حب لكن مش معترف بيها
ادهم: يعني ايه مش معترف بيها؟

ليلى: يعني لو مثلا حبيت تعرفني على باباك او مامتك هتقولهم ايه؟ صحبتي؟ ولا بلاش لو قابلنا خالد صدفه وانا وانت مع بعض اقوله ايه؟ ده صحبي يا خالد؟
ادهم: ولو قولتيله ان انا وانتي بنحب بعض؟
ليلى: اممم كل اللي هيعمله انه هيحبسني في البيت وهيقعدني من شغلي ومعدش هيثق فيا تاني ابدا
ادهم: كل ده ليه يعني؟

ليلى: لانه مش بيعترف بالعلاقات ده ماجده مخطوبه ورسمي ولما خطيبها يحب يشوفها يبقي في البيت وما يخرجوش لوحدهم ابدا
ادهم: ما علينا كفايه رغي بقى غيري الموضوع
ليلى: ما قولتليش انت سافرت فين؟
مش عايز يكدب كدبه جديده هيقولها ايه؟ انه سافر بره مصر يعمل صفقه جديده ولا ايه؟
ادهم: اتكلمي في اي حاجه بعيده عن الشغل
ليلى: امم نتكلم في ايه؟ طيب قولي وحشتك قد ايه بقى؟

ادهم بابتسامه: اخيرا حاجه تفتح النفس شويه وحشتيني قد ايه؟ عارفه لما تغطسي بيوحشك الهوا قد ايه؟ انتي الهوا بتاعي
بتوحشيني زي الهوا بالظبط
مش عارف ليه يا ليلى بس عايزك على طول قدامي ( ادهم مسك ايدها وهيا حاولت تسحبها) ما تسحبيش ايدك
انتي حاجه غريبه قوي سيبي ايدك في ايدي
ليلى مردتش وسكتت بس قلبها بيدق بسرعه
هيا مش متعوده حد يمسك ايدها ابدا
ادهم: ساكته ليه؟
ليلى: ابدا مفيش.

ادهم: مالك كده؟ مش على بعضك وقلقانه ومتوتره ليه؟
ليلى: ابدا بس خايفه حد يعدي من الناس او اللي شغالين هنا ويشوفنا
ادهم: يشوفنا،؟ يشوفوا ايه بالظبط؟
ليلى: يعني واحنا ماسكين ايدين بعض
ادهم: انتي بتهرجي صح؟ انتي بتتكلمي بجد؟
ليلى: لا على فكره انا بتكلم بجد
ادهم: معنديش اي رد بس علشان تتطمني
قام ادهم وراح قفل الستاره.

( هما قاعدين في ركنه وليها ستاره تتقفل لان الكافيه عباره عن ترابيزات عاديه وركنات خاصه تتقفل بستاير)
ليلى: يا سلام وده ايه ده؟ يعني انا قلقانه من ماسكه ايد تقوم قافل الستاره خالص علشان
قاطعها: علشان ايه هاه؟
ليلى: علشان كل واحد يفكر بمزاجه احنا بنعمل ايه؟ لا طبعا لو سمحت افتحها
ادهم: لا مش هفتحها اقعدي
ليلى: لا اسفه مش هينفع كده
وقامت بنفسها وفتحتها وربطتها زي ما كانت
هو واقف وايديه في وسطه ومستغربها.

وفتحها للستاره كان النهايه
ادهم نادي للجرسون
ليلى: في ايه عايزه ليه؟
مردش عليها لحد ما الجرسون جه عندهم
ادهم: الحساب لو سمحت
ليلى: وبعدين؟ في ايه؟
ادهم: مفيش تعبان ومحتاج ارتاح عندك مانع؟
ليلى: لا براحتك
ليلى زعلت جواها وسكتت لانها مش عارفه هو زعلان ليه
حاسب وخرجوا من غير ولا كلمه طول الطريق صمت وبس لحد ما وصلها لمكان شغلها علشان تروح مع اختها
وقف ومستنيها تنزل وهيا مكانها مش عايزه تنزل وهو زعلان.

ليلى: طيب على الاقل قولي زعلان من ايه؟
ادهم: وانتي مين قالك اني زعلان قولتلك تعبان
ليلى: لا انت زعلان هو انا مش عارفاك؟
ادهم: انتي عارفاني؟ ما علينا انزلي علشان اروح انزلي
ليلى: قولي زعلان من ايه؟ كلمني ارجوك
ادهم: اقولك ايه هاه؟ اولا من ساعه ما دخلنا الكافيه وانتي شغاله ما شاء الله نقد وبس
نقد في المكان في الخصوصية في المعامله في الاكل في كل حاجه
حتى علاقتنا مسلمتش منك.

سبق ورحت معاكي على مطعم كشري انا ما بحبش الاماكن دي ولا بحب الكشري عملت ايه هاه؟ عادي شوفت انتي عايزه ايه وعملته
ولا نقدت المكان ولا الاكل ومشيت معاكي لاخر المشوار على الرغم ان مفيش شيئ عجبني نهائي بس عملت خاطر ليكي
مبحبش الزحمه وعادي ولا الدوشه ولا ريحه الاكل ولا الاكل نفسه وتعبت جدا بعد ما روحت بس ولا للحظه حسستك بده
وانتي من ساعت ما خرجنا نقد نقد نقد.

انا مش فاهم انتي عايزه ايه بالظبط؟ وبعدين لما انتي ما بتثقيش فييا بتخرجي معايا ليه؟

ليلى: انا بثق فيك والا مكنتش خرجت معاك
ادهم: ههههه ضحكتيني قاعده بيني وبينك متر ولو مسكت ايدك بتشديها واول ما قفلت الستاره اتجننتي هيا فين الثقة دي؟
ليلى: انا مش عارفه اقولك ايه؟ بس مش قصدي
مش قصدي انقد اختيارك؛ المكان بس غريب عليا اسفه مش قصدي.

اما فتحي للستاره وبعدي عنك فده لاني ما بثقش في نفسي مش فيك انا بحبك وبحبك قوي كمان انت بالنسبالي حلم واهو معايا وقدامي فمش عارفه ايه اللي ممكن يحصل لو كنا لوحدنا مش اكتر
ادهم: خلاص يا ليلى ارجوكي انا فعلا تعبان ومرهق من السفر ويمكن علشان كده مش مستحمل ارجوكي روحي دلوقتي وبكره نبقي نتكلم براحتنا ارتاح بس
ليلى: طيب ماشي بس ارجوك ما تشكش ابدا في حبي ليك.

ادهم ابتسملها ومشي بس من جواه هو مخنوق جدا لانه حس قد ايه هما مختلفين عن بعض
روحت وهيا مع اصحابها سهرانين كانت معاهم ومش معاهم ابدا
كلهم بيهزروا وبيضحكوا وهيا في عالم تاني
فضلوا يكلموها واخيرا حكتلهم كل اللي حصل واصحابها انقسموا بين مؤيد ومعارض
ماجده: انتي صح اثبتي على رايك
سمر: لا طبعا كده هيطفش منها محدش بيحب البنت الخنقه
ماجده: ومحدش بيتجوز البنت السهله اه يحبها ويمشي معاها لكن ما يتجوزهاش.

شرين: طالما بيحبها ايه المشكله لازم يكون في ثقه وبعدين ايه يعني لما يمسك ايدها ما الشباب بيعملوا اكتر من كده؟
هبه: لا طبعا النهارده مسكه ايد بكره بوسه وبعده الله اعلم انتي صح يا بت يا ليلى
وفاء: اعتقد ان مسكه الايد عادي
ماجده: لأ مش عادي طالما مجاش هنا البيت يبقي مالوش اي حق يلمس ولو شعره منك
ليلى: طيب ولو سابني؟ اعمل ايه ساعتها؟
ماجده: تحمدي ربنا انه بان على حقيقته واتكشف قدامك بدري.

الراجل اللي يطلب حاجه مش من حقه مالوش امان
لو بيحبك هيفضل معاكي وهتكبري في عينه وهيحترمك اكتر واكتر وثقته فيكي هتكون من غير حدود
ليلى مقتنعه بكلام اختها بس في نفس الوقت خايفه انها تزعل حبيبها او تخسره
عدي يوم واتنين وادهم مش بيكلمها وهيا مستنيه ان هو اللي يكلمها واخيرا اتنازلت وكلمته
ليلى: ادهم ازيك اخبارك ايه؟
ادهم: الحمدلله كويس
ليلى: امال ايه انت فين؟ ما كلمتنيش خالص؟

ادهم: قولت اسيبك براحتك شويه تعرفي فيها انتي عايزه ايه؟
ليلى: انا عارفه اناعايزه ايه
ادهم: وايه هو اللي انتي عايزاه؟
ليلى: عايزاك انت انت وبس يا ادهم وده شيئ واضح بالنسبالي وضوح الشمس
ادهم: امال ليه انا مش حاسس بده؟
ليلى: انت ما بتحسش اعمل ايه انا؟
ضحكت وقلبتها هزار معاه وهو استجاب لهزارها وضحكها
ليلى: المهم ينفع اشوفك اخر النهار ساعه كده؟
ادهم: ينفع كلميني قبلها بنصايه كده وهجيلك اوك مستنيكي.

اخر النهار كلمته وجالها وركبت معاه
ادهم: تحبي تروحي فين؟
ليلى: مش اي حته خلينا كده بالعربيه تعال على الكورنيش او اي حته هاديه
ادهم: اي حته هاديه؟ اممم اوك ماشي
فضل ماشي بالعربيه واهم بيرغوا ويتكلموا
واخيرا ركن في حته على النيل والدنيا كانت ليلت وبقي الجو ظلمه وقف وطفي العربيه
ادهم: بقى معجبكيش الكافيه وعجباكي العربيه غريبه انتي!
ليلى: انا كده بتعجبني حاجات بسيطه
ادهم: ماشي يا عم البسيط انت.

فضلوا يتكلموا شويه
ليلى: هاه مقولتليش بقى انت بتحب ايه فيا؟
ادهم بصلها شويه: يعني مش عارف عمال افكر مش لاقي اي اجابه نهائي
ليلى خبطته على صدره
ليلى: لا بجد بقى قولي بتحب ايه فيا؟
ادهم: طب ما نعكس السؤال وتقوليلي
انتي بتحبي ايه فيا؟
ليلى: بحبك انت كلك على بعضك
بحب خوفك ولهفتك عليا
بحب نظراتك دي ليا
بحب لما تعمل حاجه مش عجباك لمجرد انك تبسطني
بحب اهتمامك باصغر التفاصيل علشاني.

بحب جنونك وعدم اهتمامك باي حد لمجرد انك تكلمني زي ما جتلي المحل او لما جيت لماجده وكل مره تتدبس في حاجات قد كده
بحب نرفزتك وهدوئك وجنونك وعقلك
بحبك لما تتنرفز عليا واحس انك هتضربني بس احس في نفس الوقت انك هتاخدني في حضنك
من الاخر كده بحب كل حاجه فيك
ادهم بهمس: ولما انتي بتحبيني كده بتبعدي عني ليه وكل ما اقرب تبعدي؟!؟!؟
ليلى: انا مش ببعد انا قريبه منك جدا.

هيا المره دي حطت ايدها في ايده وهو ضغط عليها حست ان الضغطه دي على قلبها مش ايدها
ادهم مسك ايديها الاتنين وشدها قربها منه قوي حطت وشها في الارض فرفعهولها
ادهم: بوصيلي ما تهربيش مني
قرب ادهم منها قوي لدرجه انه كان هيلمس شفايفها
الجو كله بقى مشحون حواليهم هو بيقرب وهيا عقلها بيضرب صفارات انذار
هربت من شفايفه بانها حطت راسها على صدره ودفنت وشها فيه
حست بقلبه هو كمان بيدق بسرعه زيها.

ادهم فضل ضاممها للحظات بس هوعايز اكتر من كده فبعدها براحه عنه وحاول تاني انه يبوسها بس هيا رافضه ده فحطت ايدها على شفايفه
ليلى: ارجوك لأ
ادهم: لأ ليه؟
ليلى: ادهم
ادهم بصوت عالي: نعم! انتي عايزه ايه؟ انتي لسه اهوه بتقولي بتحبيني!
ليلى: ايوه بحبك
ادهم: هو فين الحب ده؟ باماره ايه بتحبيني؟ وكل ما اقرب تصديني؟!
ليلى: مش ده الحب ابدا؟

ادهم: ايوه مش ده الحب عارف بس اللي بيحب حد بيحاول يريحه يفرحه يعمل اي حاجه تبسطه صح ولا ايه؟ لكن انتي بتشوفي ايه اللي بيضايقني وتعمليه
ليلى: اسفه بس قرب بالشكل ده لأ ما ينفعش
ادهم: يعني ايه ما ينفعش حبني بس من بعيد لبعيد
ليلى: مش من حقك
ادهم: لا من حقي انا بحبك يبقي من حقي
ليلى: لا طبعا من غير ما ابقي مراتك وشايله اسمك يبقي مش من حقك
ادهم: هو ابتزاز ولا ايه؟ هو الحب ملوش اي حقوق عندك؟

ليلى: حقوقه اني ابادله الحب باكتر واني اصونه واحفظه واراعيه لكن اكتر من كده لأ
ادهم: يا سلام ده اي منطق ده؟ طيب انا عايز اتمتع بيكي عايز اخرج معاكي وامسك ايدك واخدك في حضني وابوسك كمان عايزك كلك على بعضك كده
ليلى: وانا كمان عايزه كل ده؟ بس كل اللي بتتكلم عنه دي حقوق الزوج مش الحبيب
الحبيب ملوش غير حق الحب وبس وانا بحبك
ادهم: وانا مش عاجبني كلامك ده
ليلى: وانا اسفه معنديش غيره.

ادهم: طيب خلاص ايه رايك احب فيكي واشوف واحده تانيه اعمل معاها اللي انا عايزه وخليكي انتي للحب الافلاطوني ده؟
ليلى بزعل: والله يا ادهم انت حر. حياتك وانت حر فيها لكن انا مش هقبل واحده تشاركني فيك انت سبق وطلبت تتجوزني واناوافقت اكتر من كده معنديش
ادهم: وانا مازلت عند كلامي بس ظروفي حاليا ما تسمحش
ليلى: خلاص وانا ما ضغطتش عليك وقولتلك براحتك.

ادهم: امال اللي انتي بتعمليه ده ايه مش ضغط ده؟ مش هتلمسني غير لما تتجوزني ده ايه ده؟
ليلى: ده اللي اتربيت عليه
محدش يلمسني قبل جوزي
جوزي اول راجل يبوسني ويمسك ايدي وياخدني في حضنه محدش قبله ابدا
ادهم: وانا هبقي جوزك
ليلى: خلاص يبقي لما تبقي
ادهم: متلويش دراعي
ليلى: انا ما بلويش دراعك افهمني
ادهم: لا اسف مش فاهمك ولا فاهم وجهه نظرك ولا مقتنع بيها
ليلى: وانا اسفه مش هتنازل عن مبادئ.

ادهم: انتي كده بتجيبي اخرها يا ليلى
ليلى: لو ده اللي هيجيب اخرها معاك يبقي هاته انا اسفه انا بحبك اه لكن بالطريقه دي لأ
ادهم دور العربيه ووصلها لحد شغلها وهيا طول الطريق دموعها بتنزل بصمت وقف العربية ومستنيها تنزل
ليلى: وبعدين؟
ادهم: مفيهاش بعدين انتي بتحبي بطريقه وانا بحب بطريقه
انتي اثبتي ليا في كذا حاجه اننا غير بعض
طرقنا مختلفه اسف فرصه سعيده يا ليلى
ليلى: ههه يعني يا تبوسني يا تسيبني؟

ادهم: لا مش كده
ليلى: لا هيا كده بالظبط
ادهم: خلاص هيا كده عايزه ايه؟
ليلى: مش عايزه حاجه بس كنت بااكد لنفسي اني اتمسكت بيك لاخر لحظه وانت اللي بعتيني علشان بس ما الومش نفسي
ادهم: طيب ومستنيه ايه اتفضلي.