رواية حبيبي المجهول للكاتبة الشيماء محمد الفصل الثالث والعشرون
ادهم هيتجنن هو وعيله ليلى كلها لان محدش عارفلها اي اثر او طريق دوروا في كل المستشفيات الاقسام كل قرايبها اي مكان وملهاش اثر نهائي البوليس وزع نشرات باوصافها وبرضه مفيش فايده وفي اليوم التالت ادهم مع ابوه بيحاول يهديه علي: هنلاقيها يا ادهم ما تخافش هتروح فين يعني؟ ادهم: - علي: طيب هيا زعلانه منك؟ ادهم حط وشه في الارض وما ردش حسين: عملت ايه زعلها كده؟ ادهم:.
علي: ادهم رد علينا فهمنا اللي حصل علشان نقدر نساعدك ادهم: عايزني اقولك ايه؟ اقولك ان مراتي شافتني نايم في حضن واحده تانيه؟؟ الاتنين الكلام نزل عليهم زي الصاعقه ادهم: ايه سكتوا ليه؟ علي: انت بتحب ليلى ادهم: اه بحبها علي: طيب ليه؟ حسين: سبق وقولتلك في خطوط حمرا ما ينفعش تعديها ولو عدتها مفيش رجوع قولتلك كله الا الخيانه قولتلك انها مش هتسامحك ابدا انت مراتك حامل وابنك كلها شهرين او اقل ويجي الدنيا ليه؟
ليه عملت كده؟ ليه هديت بيتك؟ ليه قاطعه ادهم بصوت عالي ادهم: انت فاكرني مش عارف الكلام ده كله؟ انت فاكرني مبسوط باللي حصل؟ ولا حتى فاهم ايه اللي حصل؟ علي: يعني ايه؟ حد وداك عندها غصب عنك؟ ادهم: انا رحت حسين: طيب امال بتقول مش فاهم ليه؟ ولا هيا اغرتك ولا قضيتوا ليله بتلعبوا كوتشينه؟ ادهم: من غير ما تتريق! علي: خنتها مع مين؟ ادهم: دولي علي: دولي! اكدت لليلي مليون مره ان مفيش حاجه بينكم ليه كده؟
ادهم: وفعلا مفيش حاجة بينا هيا كلمتني وقالتلي انها هتسافر بره ومش راجعه تاني واستحلفتني اروحلها وفعلا روحت بعد كده ايه اللي حصل ما اعرفش ابيض كله ابيض علي: وليلي عرفت منين؟ ادهم: فتحت عنيا لقيتها واقفه قدامي حسين: كنت فين ودولي دي كانت فين وكنت لابس ايه؟ ادهم: كنت في السرير ودولي جنبي ومكنتش لابس حسين: يعني ايه مكنتش لابس؟ ادهم: يعني كنت عريان مش لابس هيا دي ليها مليون معني يعني؟
حسين: لا حول ولا قوة الا بالله ربنا يستر ومتكنش عملت في نفسها حاجه ادهم مجاش ابدا في باله النقطه دي ادهم: هيا ممكن تعمل في نفسها حاجه؟ علي: ان شاءالله لأ بس لو هيا حست ان حياتها انتهت وان ملهاش معني الله اعلم رد فعلها ايه ادهم سابهم ومشي يلف في الشوارع زي المجنون يدور عليها اسبوع عدي وهو ما يعرفش اي حاجه عنها لا بينام ولا بياكل ولا بيشرب ولا بيحلق ولا بيغير هدومه.
بيلف في الشوارع وبس يدور على حته من قلبه ضاعت منه راح لبيت ابوها يمكن يكونوا عرفوا حاجه عنها ادهم اول ما دخل وشافوه استغربوا شكله ادهم: مافيش اي اخبار منها؟ خالد: لا منعرفش عنها حاجه؟ انت عملتلها ايه؟ قولنا انت الاول عملت فيها ايه؟ ادهم: ارجوك يا خالد لو بس تعرف اي حاجه طمني عليها ارجوك ادهم كان هيعيط قدام خالد وبيترجاه خالد: ما اعرفش عنها حاجه ادهم هيمشي فخرج عمي فتحي.
عم فتحي: استني يا ادهم كنت بصلي وقطعت الصلاه علشان الحقك قبل ما تمشي ادهم: خير؟ عم فتحي: ليلى اتصلت بينا وهيا كويسه ما تقلقش عليها ادهم: بجد بجد بجد!؟ هيا كويسه؟ طيب هيا عامله ايه؟ وهيا فين؟ طمني ارجوك عليها عم فتحي: ما انا اهو بطمنك هيا كويسه وصحتها كويسه ادهم: طيب هيا فين؟ خالد: قولنا الاول هيا زعلت وطفشت ليه؟ ادهم معرفش يقولهم ايه ويقول ازاي اصلا؟
عم فتحي: يا ابني انا طمنتك عليها على الرغم من انها قالت محدش يقولك حاجه بس انا حسيت بخوفك عليها وحيرتك فطمنتك ما تتطلبش مني اكتر من كده خالد: هو غلط فيها والا مكنتش تمشي وهيا كده وتسيبه اكيد هو عمل مصيبه ادهم: انا اسف بس حتى اكلمها في التليفون عم فتحي: يا ابني هيا لو حبت تكلمك هتكلمك سيبها براحتك.
ادهم: عمي انت مش حاسس بيا انتو كلكم مش حاسين بيا انا بقالي اسبوع بلف في الشوارع زي المجنون ومن قسم لقسم لمستشفي ومستكترين عليا اني حتى اكلمها خالد: والله مش احنا هيا اللي مش عايزه تكلمك شوف انت بقى عملت ايه؟ ادهم: عم فتحي اسمع صوتها بس ارجوك عم فتحي: اتصل بيها يا خالد وشوفها تكلمه ولا لأ؟ خالد: يابا هيا عم فتحي: اتصل بيها خالد كلمها: ايوه يا ليلى جوزك هنا عايز يكلمك ليلى:.
خالد: والله ما انا ده ابوكي اللي قاله وهو اللي قال برضه نتصل بيكي عم فتحي شد من ايده التليفون عم فتحي: ايوه جوزك من حقه يعرف انتي فين و يعرف مكان ابنه اللي انتي شايلاه في بطنك ده بخير ولا؟ اتفضلي كلميه وطالما مش عايزانا نعرف بالمشكله اللي بينكم يبقي انتي تعاملي معاه عم فتحي سمعها وقفل التليفون وبص لادهم ادهم مستني بفارغ الصبر عم فتحي: هيا هتكلمك استني تليفون منها.
ادهم: حضرتك متأكد؟ عم فتحي: هيا وعدتني ادهم مشي وباصص للتليفون طول الوقت مستنيه يرن اخيرا تليفونه رن ادهم: ليلى ايوه ليلى: ايوه يا ادهم ادهم: ليلى ارجعي علشان خاطري كفايه كده وارجعي ليلى: مش من حقك تحلفني بخاطرك عندي ولا يا ادهم مش هرجع ادهم: ليلى ارجوكي سامحيني انا مش عارف انا عملت كده ازاي انا هتجنن من ساعتها ارجوكي سامحيني ليلى: ادهم انا بكلمك لمجرد اني وعدت ابويا اني هكلمك مش اكتر.
ادهم: ليلى استني اسمعيني بس استني ارجوكي ما تقفليش وتسيبيني بموت كده ليلى: انت قتلتني الاول يا ادهم انت ادهم: انا اسف وهفضل لاخر يوم في عمري اقولك اني اسف بس ارجوكي سامحيني وما تبعديش عني سبق ووعدتيني عمرك ما هتبعدي عني ليلى: اه وعدتك اني عمري ما هبعد الا لو انت بعدتيني وانت اهو رمتيني مش بعدتني.
ادهم: ليلى اقسم بالله انا مش عارف ده حصل ازاي؟ انا كل يوم بقعد اعيد الليله دي في دماغي مليون مره بس فعلا ابيض مش فاكر اي حاجه منها ولا فاهم ايه اللي حصل؟ بس صدقيني انا من يوم ما عرفتك عمري ما بصيت لواحده غيرك ابدا عمري ما خنتك ابدا صدقيني ليلى: عارف لو الدنيا كلها حلفتلي انك بتخني مكنتش هصدق بس مش قادره اشيل صورتك وانت عريان وواحده في حضنك من دماغي.
مش عارفه يا ادهم صورتك قدامي وكل ما اغمض عيني الاقيها قدامي واتخيل مليون فيلم وفيلم وانت في احضان بنات وبتتضحكوا عليا وتتريقوا عليا اسفه بس خلاص اللي بيني وبينك انتهي ادهم: عمره ما هينتهي ابدا انتي فاهمه؟ ليلى: لا خلاص انتهي انا كلمتك اهوه علشان بابا بس دي كانت اخر مره سلام ادهم: ليلى است قفلت الخط التليفون وهو حاول يكلمها تاني بس لقي التليفون مقفول.
معقوله دي نهايه حياته؟ هو ده اخره؟ معقول ليلى تخرج بره حياته؟ طيب ازاي وهيا اصلا حياته؟ ازاي الواحد يعيش حياه من غير حياه؟ ليلى قفلت التليفون وفضلت تعيط تعيط على حبها اللي راح على حبيبها اللي خانها على ابنها اللي هيتولد بعيد عن ابوه عن عمرها اللي هيضيع بتحاول كل يوم انها تتماسك وتقف بس الصدمه كبيره قوي عليها مش قادره تتكلم او تفضض كان ادهم هو اللي بتجري على حضنه وتفضفضله.
كان ادهم هو اللي بضمه واحده بينسيها وجعها والمها طيب دلوقتي تروح لمين وتشكي لمين؟ كل ما تنام كوابيس بتنقض عليها كل يوم بتشوف بنات بيمدوا لسانهم ليها وهما في احضان جوزها وهو بيبصلها وبيضحك ويشاوروا عليها كل يوم بتتخيله وسط مليون واحده وواحده وكل يوم بتصحي على صورته عريان في حضن دولي طيب ممكن تسامحه؟ طيب ازاي؟ ضربها بسكينه بارده في قلبها.
ازاي قدر يخونها؟ طيب ليه هيا ما بتشوفش غيره اصلا؟ الرجاله كلهم ملهمش ملامح قصاده! ادهم قدر يخونها ودي نهايه الكلام.
بتعدي الايام ورى الايام وادهم تايه بيروح شغله بس من غير عقله بيقعد على مكتبه ويمشي بيبص في ورق مش فاهمه ومش شايفه بيشوف ناس مش عارفها ابوه قلبه بيتقطع على ابنه يمكن هو قدر يكمل من غير حبيبته لانه ماعرفش طعم حضنها ايه؟ ولا عرف معني قربها منه ايه؟ ولا شاركته احلامه وحياته واهم من كل ده مش شايله جواها حته منه لكن ابنه جرب كل ده جرب انها تكون بين ايديه جرب انها تنام على كتفه وتصحي على كتفه.
جرب انها تشاركه في كل حاجه جرب انها شايله ابنه جواها واقف شايف ابنه بيدبل وبيتعذب ومش عارف يعمل حاجه بيتفرج عليه وبس علي: ادهم ادهم ادهم: هاه قلت حاجه؟ علي: لحد امتي هتفضل تايه كده؟ ادهم: حضرتك عايز حاجه؟ لو محتاج حاجه قولي وانا هعملها على: يا ابني انا مش عايز اشوفك كده؟ ادهم: طيب اعمل ايه؟ لو عندك طريقه تساعدني بيها قولي وانا هنفذها عل: طيب ليه عملت كده ليه؟ انا مش قادر استوعب ايه اللي خلاك تخونها.
ادهم قام وزعق بصوته كله ادهم: انا مخنتهاش انا ما اقدرش اخونها ولا اعرف اخونها ولا عايز غيرها اصلا انا مش عارف ايه اللي حصل وازاي انا نمت عندها؟ انا مشربتش وما سكرتش وحتي لو شربت مش بسكر لدرجه اني اخون ليلى ( قعد في الارض) انا تعبان انا تعبان ومش عارف اعمل ايه؟ ابوه قعد جنبه واخده في حضنه علي: تعال معايا البيت بلاش تفضل لوحدك تعال يالا اخده البيت وريهام اول ما شافته جريت عليه ريهام: ادهم ابني مالك حبيبي؟
علي: تعبان شويه هيطلع يرتاح في اوضته شويه ولما يفوق ابقي كلميه طلع ادهم اوضته ونام في سريره وامه قعدت جنبه غطته ودمعه نزلت منها على دخل وخرجها علي: سيبيه يرتاح شويه ريهام: ايه اللي حصله؟ كل ده ليه؟ علي: خسر حبيبته ليلى سابته وبعدت عنه وهو مش عارف يرجعها ريهام: كل ده علشانها؟ علي: مشكلتلك يا ريهام ان عمرك ما حبيتي وجربتي لوعه الحب وكسره القلب انتي بتحبي ادهم صح؟ ريهام: طبعا ده حته مني.
علي: طيب حب ادهم لليلي قد حبك انتي لادهم بس اضعاف مضاعفه ادهم جزء من حياتك في بيتك وجوزك وهو وشغلك وصحابك واهتماماتك ومليون حاجه تانيه كل ده بقى والمليون حاجه التانيه دول يتلخصوا عند ادهم في ليلى فهمتي؟ هيا حبيبته وصحبته واخته ومراته وبنته وامه كمان؟ هيا كل حاجه؟ وهو حاليا خسر كل حاجه الحمدلله ان انتي بعيده عن الموضوع ده لان لو كان ليكي يد فيه كانت هتبقي اخر حاجه ليكي في حياتنا.
ريهام سكتت وما اتكلمتش بس دموعها نزلت بصمت حست بوجع ابنها وحست بخوف جامد بيكبر جواها كل يوم بيعدي ريهام بتموت من جواها على ابنها وبتحاول تخفف عنه بس هو مش بيديها اي فرصه شهر والتاني عدوا وادهم بيروح كل شويه يقعد في شقته الصغيره جنب بيت ابو ليلى علشان يشم ريحتها في كل حاجه ويعيش قريب من كل حاجه بتحبها الكل ادهم صعبان عليهم اخواتها كل ما بيكلموها بيترجوها تسامحه وهيا بترفض.
خالد كان عند ليلى بيزورها عند خالتها خالد: يا ليلى الواد ده بيحبك والله بيحبك ايه اللي عمله مش عارفه تسامحيه عليه ليلى: ارجوك يا خالد اقفل الموضوع ده خالد: شتمك!؟ ضربك؟ بس لأ هو واد زوق ايه مشي مع واحده؟ مهما يكون عمل سامحيه انتي مش شايفه هو عامل ازاي ولا عايش ازاي؟ انتي بتدمريه وبتقضي عليه كده ليلى بتعيط: ارجوك يا خالد بقى خالد: ماهو افهم انتي بتموتي مليون مره بعيد وهو كمان يبقي ارجعوا لبعض وسامحوا بعض.
مفيش حاجه تستاهل كل ده الا اذا، ... الا اذا خانك؟ خانك يا ليلى وعلشان كده مش عارفه تسامحيه؟ ده الشيئ الوحيد اللي محدش بيقدر يسامح عليه؟ بس يا ليلى حتى لو خانك كفايه عذابه كل الفتره اللي فاتت وسامحيه هو بيحبك بجد ماتخسريهوش وتحرمي ابنك من ابوه ليلى سابت خالد ومشيت فضلت تعيط وتندب حظها وتسال نفسها هيا ممكن فعلا تقدر تكمل معاه ممكن تنام في حضنه تاني، الحضن اللي ضم غيرها؟ بس الاجابه واضحه لأ مش هتقدر.
كل ما ابنها بيتحرك جواها بتعيط لانه كان كل ما بيتحرك ادهم بيحط ايديه على بطنها ويفضل يكلم فيه لحد ما يهدي كانت قعدته المفضله يقعد على الارض وينام على رجلين مراته وايديه على بطنها يرغي مع ابنه او معاها والغريب ان ديما كان ابنه بيهدي لما يسمع صوت ابوه حتى لو بيتكلم عادي ودلوقتي مفيش الصوت اللي بيهديه حتى ابنها اللي لسه ما اتولدش مشتاقله.
ليلى خلص حملها وتعبت ونقلوها المستشفي والدكتوره قالت انها هتولد فعلا لان ده طلق ولاده ليلى بتتوجع وتتالم واكبر الم ليها ان ادهم بعيد عم فتحي: انا هتصل بادهم ليلى: لأ مش عايزاه عم فتحي: انتي مش عايزاه ابنك عايزه؟ ده حقه الشرعي ادهم لازم يكون موجود ليلى: ده ابني انا مش هو عم فتحي: بطلي هبل ده ابنه وله فيه زي ماليكي بالظبط دي امانته عندك فاهمه؟ خالد اتصل بيه وبلغه.
خالد بص لليلي مستنيها تعترض او ترفض بس هيا سكتت فاتصل بيه خالد: ايوه يا ادهم ادهم: ايوه يا خالد خير في حاجه؟ مش عوايدك تتصل في نص الليل كده؟ خالد: مراتك بتولد لو عايز تيجي ادهم قام اتنفض: ايه بتولد؟ دلوقتي؟ انتو فين؟ دقايق وهكون عندكم اخد منه العنوان وقام بسرعه وهو نازل ابوه كان راجع من بره علي: خير في ايه؟ ادهم: ليلى بتولد علي: طيب يالا انا جاي معاك.
راحو الاتنين وقابلهم خالد واخدهم على الاوضه اللي ليلى فيها خبط ودخل على ودخل وراه ادهم وبص لمراته اللي بقاله شهرين ماشفهاش وهيا بصتله و...
رواية حبيبي المجهول للكاتبة الشيماء محمد الفصل الرابع والعشرون
علي: طيب يالا انا جاي معاك راحو الاتنين وقابلهم خالد واخدهم على الاوضه اللي ليلى فيها خبط ودخل على ودخل وراه ادهم وبص لمراته اللي بقاله شهرين ماشفهاش وهيا بصتله نظره طويله مش عارفه تحدد فيها اي حاجه واحشها بتحبه بتكرهه عايزاه ايه بالظبط هيا مش عارفه ادهم واقف هيتجنن عليها عايز يجري يضمها عايز يحط راسه على صدرها عايز يشم ريحتها عايز يقرب منها عايز حبيبته في حضنه عايز وعايز وعايز بس مش بايده حاجه.
دخل ووقف ومعرفش يقول حاجه وهيا دمعه نزلت منها مسحتها ادهم: انتي كويسه؟ ملقيش حاجه يقولها غير دي ليلى: الحمد لله علي: ربنا يقومك بالسلامه يا بنتي ويحفظك انتي واللي جاي ده يالا شدي حيلك بقى وهاتيه بسرعه ليلى: ربنا يسهل يا عمي علي: ان شاءالله هيسهلك وهتقومي بالسلامه وكل حاجه هتبقي كويسه ليلى كل شويه بتجيلها الطلقه بتتعب وتتالم جامد لحد ما تعدي.
واول طلقه جاتلها ادهم جري عليها ومسك ايدها وهيا اتعلقت في ايده وضغطت عليها بكل قوتها لحد ما عدت فسابت ايده وجعها كان بيوجعه هو اكتر منها كان جنبها وشاركها كل لحظه الم كان بيراقب الجهاز والشاشه اللي بتقيس نبض البيبي والشاشه اللي بتقيس الطلقات وبتبين الطلقه وهيا هتيجي قاعد جنبها وبيمسك ايديها وهيا بتتعلق فيه الطلقه المره دي طولت جامد وهيا ماسكه فيه ليلى: ااااه هموت هموت يا ادهم هموت.
ادهم: لا يا قلبي بعد الشر عليكي هانت اهي خلاص هانت ادهم بيحاول يخفف عنها ويهديها لحد ما تعدي واول ما عدت ليلى سابت نفسها في حضنه يااااااه قد ايه اشتاقت للحضن ده! قد ايه اشتاقت لضمته دي! للمسه ايديه على جسمها؟ لانها تسمع نبضات قلبه وهيا نايمه على صدره وادهم ضمها زي ما يكون غريق واخيرا اتعلق بحاجه هو ده ملجأ الامان بتاعه هو ده بيته ومكانه ومن غيره تايه ومرمي في شارع هو ده حبه.
وحشته جدا وحشته لدرجه ان قلبه بيوجع بصت لفوق وهو بصلها وقرب منها لحد ما لمس شفايفها اللي اشتاقلهم وللحظه ليلى اندمجت معاه بس فجأه صوره دولي قدامها فبعدت عنه ادهم: ليلى! معرفش يقول ايه؟ فسكت وخاف انها تبعده كفايه انه جنبها وده المهم دلوقتي التعب بدا يزيد فراح للدكتوره ادهم: وبعدين سيادتك هتسيبيها تعبانه كده؟ اعملي حاجه ولو مش عارفه هنقلها مستشفي تانيه الدكتورة كشفت على ليلى بهدوء جنن ادهم.
الدكتورة: دي ولاده يعني الم وتعب ووجع ومفيش حاجه اقدر اعملها غير الانتظار الا لو حبيت اني اولدها قيصري!؟ اختاروا ادهم: لو ده هينهي المها ولديها الدكتورة: هينهي المها حاليا بس ادهم: يعني ايه؟
الدكتورة: يعني القيصريه ما بتتعبش في الولاده بس بنفتح بطنها وبنفتح الرحم علشان نخرج البيبي وبيبدا تعبها بعد الولاده ولا بتقدر تتحرك او تقوم او تقعد وكل حركه بمليون الم والم وبتاخد على الاقل اسبوع كده والرحم علشان يلتئم ويرجع لوضعه عايز على الاقل 6 شهور اما الطبيعي فبتتعب كام ساعه لحد لحظه خروج البيبي وبيبقي الم لا يحتمل بس بينتهي مع خروج البيبي وبعد ساعه بتقوم وتتحرك وتشيل ابنها والولاده انتهت.
فاختار تعب ساعتين ولا فتح بطن مع مخاطر الجراحه ادهم سكت ومردش الدكتورة: عارفه ان الموضوع مؤلم بس معلش نستحمل وبعدين امور مراتك طبيعيه كلها وضع البيبي كويس استجابه الرحم كويس وبمعدل الطلقات دي خلاص قربنا ادهم: طيب مافيش حاجه تسرع الموضوع بحيث ما تفضلش تتالم كتير؟ الدكتورة: في لو عايزين طلبت الدكتورة من الممرضه تديها حقنه طلق صناعي وقالتلها تجهزها خلاص واول ما خرجوا وسابوهم.
ليلى: خايف عليا اتوجع؟ الوجع اللي انت وجعتهولي يا ادهم اكبر عندي مليون مره من الوجع ده انت وجعتني بايدك ادهم: حقك عليا ليلى انا مستعد عمري كله افضل اتاسفلك بس سامحيني ملحقتش ترد لانها صرخت وبدات تولد اخدوها لاوضه العمليات وهيا متعلقه في ادهم ومسكاه ومش عايزه تسيبه ليلى: خليك معايا ما تسيبنيش اوعي تسيبني لو هموت عايز اموت وانت جنبي ماتسيبنيش ادهم: ليلى مش هسيبك بس انتي داخله العمليات.
ليلى بتعيط ومتعلقه فيه: انا خايفه ماتسيبنيش الكل بيبصلهم باستغراب الحب اللي بينهم كبير فعلا طب ليه هما بعيد عن بعض سؤال محير الكل الدكتورة: خليك معاها الظاهر ان انت بتديها القوه والشجاعه انها تواجه الالم تعال معاها.
وفعلا ادهم اتعقم ولبس ودخل معاها وطول الوقت ماسكه فيه بتصرخ وبتولد وشويه تشتمه وشويه تحبه وهو اول مره يحس بكميه المشاعر اللي هو حاسسها دي واول مره يحس بالعجز ده ليلى بدات تتعب جامد وتهدي ادهم: هو في ايه مالها؟ الدكتورة: في حاجه مش طبيعيه البيبي اتحرك من مكانه وغير وضعه مش هينزل كده دكتور خدرها بسرعه بنات جهزوها للقيصريه ادهم: ايه اللي بيحصل في ايه؟ الدكتورة: هنولدها قيصري.
ادهم: انتي قولتي هتولديها طبيعي وسايباها تتعذب من الصبح ودلوقتي جايه تقولي قيصري ماكان من الاول الدكتورة: الوضع اختلف وحاليا ابنك بيتخنق في كل لحظه بنضيعها يا تسكت يا تطلع بره ادهم سكت وفضل واقف مراقبها اول ما مسكتت المشرط وفتحت بطنها دور وشه بعيد وفكر يخرج بس وعدها هيفضل معاها قعد عند راسها ومسك ايدها وفضل يدعي انها تقوم تاني ليه.
اخيرا طلعوا البيبي واخدوا ولبسوه وهو بيراقبه من بعيد لحد ما خلصوا لقي الممرضه جيباه وبتديهوله ادهم: اي ده؟ اعمل ايه؟ انا ما بعرفش اشيل عيال اصلا الممرضه حطته في ايده: ماتخافش هتتعود ضم ابنك في حضنك ادهم شاله وبصله ومعرفش يحدد هو عايز يضحك ولا يفرح ولا يعيط بص لمراته الدكتورة: ماتخافش عليها دقايق وهنوديها اوضتها اطلع انت خلاص خرج ادهم وابوه قابله فعطاله البيبي ادهم: حفيدك على شاله وعنيه دمعت وضمه بشوق.
علي: اللحظه دي يا ادهم بالدنيا وكل مافيها ليلى خرجت وفاقت وادهم جنبها فضل جنبها الوقت كله يسندها يحركها يناولها ابنها وتعيط على كتفه كل ما تتوجع لحد اخيرا ما نامت على صدره اتشاركوا مع بعض لحظات جميله اول ضمه ليها لابنها اول مره ترضعه فيها ادهم كان واقف معاها ونسيوا الاتنين انهم كانوا زعلانين او متخاصمين بيراقبوا ابنهم طول الوقت ادهم: هتسميه ايه؟ ليلى: انت عايز تسميه ايه؟ ادهم: مش عارف مفكرتش في الاسم خالص.
ليلى: طيب ايه رايك نسميه كريم؟ ادهم: كريم؟ ماشي كريم اتفقنا اخدت ليلى 3 ايام في المستشفي وادهم معاها مش بيفارقها ابدا الكل بيروح ويجي الا هو معاها على كان بيجي يقعد بالساعات ومحدش يقدر ياخد منه كريم ابدا اخيرا هتمشي وخرجت من المستشفي وركبت العربيه ومعاها اخواتها ادهم: حمد الله على سلامتك نروح؟ ليلى: اه روحني بيت بابا ادهم بصلها باستغراب كان فاكر؟ كان فاكر انها هتسامحه ولو حتى علشان ابنها؟
هو قابل ده انها ترجعله باي سبب ليلى: ايه مالك؟ ادهم: نرجع بيتنا يا ليلى وما تخافيش مش هخرج واسيبك و ليلى قاطعته: ادهم مفيش بيتنا اللي بيني وبينك انتهي انت مجرد ابو ابني مش اكتر انا وافقت انك تيجي لان بابا ضغط عليا وقالي ان ده حقك بس اكتر من كده اسفه ادهم: ليلى انت مراتي وحبيبتي وشريكتي ليلى: كنت وانتهي ادهم: يعني ايه؟ ليلى: يعني يا ادهم انت هتطلقني.
ماجده: لا حول الله يارب مش وقته ده يالا يا ادهم على البيت وربنا يسهل بعدين روحهم ادهم ودخلها لاوضتها ووقف يبص لابنه ليلى: وقت ما تحب تشوفه البيت مفتوح ادهم: ليلى انا عايز اشوفه في كل لحظه انا عايز اكون جزء اساسي في حياته مش مجرد واحد بيشوفه ساعه او اتنين ارجوكي ياليلي ليلى: كان لازم تفكر في ده قبل ماتروح ترمي نفسك في حضن واحده تانيه وتنام معاها وتسيبني ادهم: ليلى انا.
ليلى: انت ايه؟ مش عارف عملت كده ازاي؟ ماتشوفلك حكايه تانيه تقولها ادهم: ده اللي حصل خلينا نبدأ صفحه جديده علشان خاطره ليلى: لما نبقي بعيد ونحترم بعض احسن ما نبقي قريبين ومفيش احترام او ثقه لو سمحت اتفضل بقى علشان عايزه ارتاح ادهم خرج ومشي وحس ان قلبه اتخلع من مكانه كان فاكر انها خلاص سامحته وانه هيعوضها كان فاكر، ، . ، وجع جديد اضاف لوجعه.
مش كفايه وجع بعد حبيبته لأ كمان بعد ابنه اللي ملحقش حتى يشبع منه او يطبع صورته روح البيت وطلع لامه كانت في اوضتها دخل وقعد في الارض تحت رجليهاومسك ايديها وباسها ريهام: مالك يا حبيبي ادهم: سامحيني ريهام: اسامحك في ايه مالك يا ادهم؟ ادهم: سامحيني على اي مره زعلتك فيها او سيبتك وخرجت وسيبتك زعلانه او سيبتك وسافرت سامحيني في كل مره وجعتك فيها.
لو اللي انا حاسه دلوقتي هو احساسك في كل مره ببعد عنك فيها يبقي تسامحيني يا امي ريهام: يا حبيبي انا عمري ما بزعل منك مالك يا ادهم فيك ايه؟ واحساس ايه اللي بتتكلم عنه؟ ادهم: احساس انك تتحرم من ابنك وماتقدرش تكون معاه ريهام: ابن ايه اللي بتتكلم عنه انا مش فاهمه يا ادهم ادهم: ابني يا امي ابني انا؟ ريهام: ابنك؟ ابنك منين وازاي انت بتتكلم عن ايه؟ ادهم: انا اسف اني مقولتلكيش كنت غبي ومتخلف.
ماكنتش فاهم ابدا مكنتش فاهم ان مفيش حد يقدر ياذي حته منه وعلشان كده خبيت عليكي ريهام: خبيت عليا ايه؟ ادهم: حمل ليلى ريهام: ليلى كانت حامل؟ ادهم: ايوه وولدت من تلات ايام وكنت معاها كنت معاهم وافتكرت انها سامحتني بس ما سامحتنيش وروحت بيتها بابني وطردتني بره حياتها ده عقاب ربنا ليا زي ما كنت ديما ببعد عنك وبهددك كل شويه بالسفر ربنا خلاني اجرب الاحساس ده ده عقابه ليا وعلشان كده بقولك سامحيني.
ريهام عيطت من كل قلبها وضمت ابنها ازاي قدرت تعمل كده؟ ازاي قدرت تهد حياته كده؟ ازاي والف ازاي؟ ريهام: انا ابدا ابدا ما زعلت منك ابدا يا حبيبي وكل حاجه هتتصلح ما تخافش كل حاجه هتبقي كويسه.
ريهام راحت لسليم واول ما شافته ريهام: انت السبب انت السبب في كل اللي حصل وكل اللي بيحصل سليم: اهدي كده اهدي؟ في ايه مالك؟ مش كنتي عايزها تبعد اهي بعدت اهي؟ ريهام: ايوه بعدت بس اخدت حفيدي معاها سليم: حفيد ايه اللي بتتكلمي عنه؟ ريهام: حفيدي ابن ادهم!!ليلى كانت حامل واهي ولدت سليم: انتي بتقولي ايه؟ وازاي محدش عرف انها حامل انتي بتكدبي صح؟
ريهام: ادهم خاف عليها مننا وعلشان كده خبي علينا وادينا اهوه دمرنا حياته انا هقوله سليم: هتخسريه للابد مش هيسامحك ابدا ابنك رجع لحضنك اخيرا ريهام: مش مهم المهم يرجع لمراته سليم: هيرجع لمراته بس مش هيرجعلك انتي احنا ممكن ناخد منها البيبي وناخد حضانته ريهام: هو انت ايه ابليس؟ انت ايه؟ ادهم عمره ما هيوافق على ده ابدا سليم: هيوافق لو ده هيرجعله مراته وابنه لو اخد منها الولد هترجعله ورجلها فوق رقبتها.
ريهام: لأ؟انت فاهم لأ؟ محدش هيدخل تاني في حياته سابته ومشيت وراحت لابنها تواسيه في وجعه وكل ما يبقي في حضنها عايزه تقوله الحقيقه وما بتقدرش ريهام: ادهم لو في طريقه ترجع بيها لمراتك وابنك تعملها؟ ادهم: طبعا مهما تكون بس يرجعوا لحضني ريهام: انت ممكن ترفع دعوه حضانه وتاخد حضانة الولد وساعتها.
قاطعها: وساعتها ايه؟ اساومها عليه؟ ياترجع غصب عنها يا مش هخليها تشوف ابنها؟ انتي ليه مش عايزه تفهمي اني بحبها؟ بحبها ولو عملت ده هخسرها نهائي ريهام: ادهم انت خسرتها ادهم: بس عندي امل انها في يوم تسامحني على خيانتي ليها ونرجع تاني.
عارفه ايه اكتر حاجه وجعاني؟ اني اصلا مش فاكر اني خنتها ولا عارف انا ازاي خنتها اصلا؟ ازاي انا روحت لدولي ازاي؟ هتجنن من كتر التفكير عمال اعيد وازيد في الليله دي بس مش عارف ولا فاهم ولا لاقي اجابه؟ وبطلب من ليلى تسامحني وانا اصلا مش عارف اسامح نفسي انا يا امي مش مسامح نفسي على خيانتي ليها يبقي ازاي بطلب منها تسامحني؟ امه عيطت جامد وفكرت انها تقول لابنها الحقيقة بس لازم الحقيقه تبان بقى لازم.
ريهام: ادهم حبيبي ادهم بصلها ريهام: في حاجه لازم تعرفها؟
رواية حبيبي المجهول للكاتبة الشيماء محمد الفصل الخامس والعشرون
ريهام: ادهم حبيبي ادهم بصلها ريهام: في حاجه لازم تعرفها؟ ادهم بصلها باهتمام واتردد جواها كلمه سليم عمره ما هيسامحك ابدا ابدا ادهم: ايه سكتي ليه قولي ريهام: انا بحبك قوي واي حاجه عملتها في يوم عملتها من حبي وخوفي عليك مش قصدي ابدا اني أذيك خليك ديما فاكر ده بيعدي يوم ورى يوم وريهام تأنيب الضمير بيموتها كل يوم اكتر من اليوم اللي وراه ادهم كل يوم يروح يقعد ساعه مع ابنه هو و على.
كل يوم بيروح ونفسه يتكلم مع مراته بس لسانه مربوط ليلى قررت تعمل لابنها سبوع وقالت لادهم.
ادهم روح البيت وقال قدام امه وابوه وطلع اوضته وريهام طلعت وراه ادهم: خير يا ست الكل في حاجه؟ ريهام: هو انا ممكن اطلب منك طلب؟ ادهم: طبعا انتي بس تشاوري ريهام: تسلم يا قلب امك كنت عايزه يعني لو ينفع ويناسبكم... ادهم: اتكلمي على طول ريهام: ينفع انا اعمل السبوع لحفيدي عايزه اشوفه يا ادهم ارجوك ادهم اتنهد تنهيده طويله.
ادهم: انا مش عارف ليلى هتوافق تيجي هنا ولا لأ بس هجرب ده بالنسبه للحفله اما انك انك تشوفيه فممكن تيجي معايا في اي وقت او انا اجيبهولك على العموم هشوف الوقت المناسب واقولك اوك يا قمر ريهام: تسلم يا قلبي وربنا يريح قلبك ادهم: امين يا ست الكل امين ادهم تاني يوم راح لليلي وقعد معاها ليلى: ايه عايز تقول ايه؟ ادهم: ايه رايك لو نعمل السبوع عندنا في الفيلا عند امي؟ ليلى: افندم؟ انت بتهرج ولا بتهرج؟
ادهم: انتي شايفاني بهرج،؟ ليلى: ايوه طبعا بتهرج لما تتطلب مني اروح اعمل لابني حفله في البيت اللي عاملوني فيه اني خدامه يبقي بتهرج؟ لما تتطلب مني اروح وامن اللي الناس اللي عمرهم ما تقبلوني ووصلت معاهم انهم يتهموني بالسرقه ويحبسوني يبقي بتهرج؟ لما تطلب مني اودي ابني عند الناس اللي انت نفسك خبيت عليهم اني حامل يبقي بتهرج؟
ادهم: خلصتي كلام ولا لسه؟ الوضع اختلف دلوقتي وبعدين امي اتغيرت وندمت على حاجات كتير ونفسها تشوف ابني ليلى: مش هتشوفه امك بالذات مش هتشوفه يا ادهم ولا هتلمح ضفره حتى ادهم: ليلى ليلى: ما تخلينيش اقولك ان انت كمان مش هتشوفه ادهم: انتي بتهرجي ولا ايه؟ ولا علشان انا سايبك براحتك فوقي يا ليلى عم فتحي: اهدوا انتو الاتنين، ليلى امه من حقها تشوف حفيدها خليه ياخده تشوفه ويجيبه تاني.
ليلى: لا اسفه يابابا محدش هياخد ابني مني اسفه طلبك مرفوض ادهم: هو بمزاجك ولا ايه؟ ليلى: اه بمزاجي عندك مانع سيادتك؟ ادهم: اه عندي والظاهر انك هتخليني استخدم اسلوب تاني معاكي ليلى: وريني شطارتك ادهم: ليلى انا لو سايب ابني معاكي فده بمزاجي انا ممكن اخد حضانته منك وساعتها مش هخليكي تشوفيه فاهمه؟ قاطعته: تعملها يا ادهم؟ ادهم: ليلى: ايه ساكت ليه رد عليا تعملها؟ ادهم: انتي بتضطريني لكده.
ليلى: الظاهر ان انا معرفتكش نهائي او كنت مخدوعه فيك انت لحد النهارده مجهول بالنسبالي ادهم: ليلى انا زي ما انا انتي بتضايقيني ليه؟ امي عايزه تشوف ابني مش طلب صعب هوه ليلى: بالنسبالك انت لكن بالنسبالي انا صعب جدا انا مش مستعده حاليا بعدين ارجوك ادهم: حاضر يا ليلى براحتك سابها ومشي وامه كانت مستنياه على نار واول ما شافته جريت عليه ريهام: هشوفه امته هاه؟ وافقت؟ انت مبتردش ليه ادهم؟
ادهم: اصبري يا ست الكل الموضوع صعب عليها انا هجيبهولك ما تقلقيش انا مش عايز اضغط عليها ريهام ابتسمت ومشيت لاوضتها وفضلت تعيط من كل قلبها هيا اللي وصلت ابنها ونفسها للمرحله دي هيا اللي عادت مرات ابنها وخلتها تحرمها من حفيدها اخر الليل على رجع بيته ودخل اوضته واول ما دخل صرخ بصوته كله علي: ادهم يا ادهم الحقني يا ادهم ادهم ادهم جه يجري على صوت ابوه ادهم: ايه اللي حصل في ايه؟
علي: معرفش انا جيت لقيتها واقعه كده في الارض ساعدني يا ادهم نقلوها على المستشفي وكان عندها ازمه قلبيه ادهم عارف ان هو السبب دخل عندها بعد ما فاقت ادهم: انا السبب انا اسف سامحيني يا ست الكل سامحيني ريهام: لا يا حبيبي لو في حد السبب هيبقي انا انا متقلبتش مراتك وحاربتك طول الوقت انا اسفه يا ادهم انا اللي اسفه ادهم: لا خلاص يا حبيبتي الموضوع ده خلص خلاص ادهم فضل جنب امه قاعد جنبها ومارحش حفله السبوع لابنه.
علي: ادهم مش هتروح سبوع ابنك روح انت وانا هفضل جنبها ادهم: لا معلش روح انت علي: ده سبوع ابنك ادهم: معلش مش عايز اروح روح انت مكاني علي: انا عمري ما هبقي مكانك ابدا لا لليلي ولا لكريم ادهم: معلش ممكن تسيبني براحتي وبعدين ولا ليلى عايزاني ولا كريم محتاجلي يبقي مالوش لازمه علي: ادهم ما تستسلمش ليلى محتاجه وقت وهتسامحك بس انتي اوعي تستسلم.
ادهم: انا تعبت ومحتاج ارتاح او ابعد شويه انا بعد ما امي تقوم بالسلامه هسافر شويه اغير جو علي: طيب ايه رايك تسافر شرم تتابع القريه الجديده انا كنت هسافر انا بس طالما عايز تغير جو روح انت ادهم: خلاص ماشي اول ما امي تخرج من هنا هسافر.
ليلى طول الوقت عينها على الباب مستنيه ادهم يجي ماجده: ولما انتي هتموتي عليه كده ما تسامحيه وتروحي بيته؟ ليلى: انا مش مستنياه ماجده: انتي بتضحكي عليا ولا على نفسك ليلى: ماشي يا ماجده مستنياه بس علشان يبقي مع ابنه ومستغربه هو ازاي قدر يتاخر؟
وشويه وعلي جه وقدم هديته لحفيده وشاله وفضل يلعب معاه او يلعب بيه ليلى هتموت وتساله عن ادهم وهو ملاحظ ده ومستنيها تيجي تساله قعد ساعه وماشي وهو خارج ليلى اخيرا سالته ليلى: هو ادهم مجاش ليه؟ علي: ظروف غصب عنه ليلى: اممم طيب علي: ريهام تعبت جامد ونقلناها مستشفي ليلى: الف سلامه عليها خير علي: عندها ازمه قلبيه اصلا اول مره نعرف ان قلبها تعبان وحاليا ادهم معاها في المستشفي.
ليلى: الف سلامه يا عمي عليها انا معرفتش علي: يالا خير اول ما تخرج اكيد ادهم هيجي يعدي عليكم قبل ما يسافر ليلى: هو هيسافر؟ علي: اه هيسافر ليلى بلهفه: هيسافر بره؟ علي: لا هيسافر يتابع شغل ومنها يغير جو شويه لانه زي ما انتي عارفه نفسيته تعبانه ليلى: هيطول؟ علي: الله اعلم؟ ليلى؟ ليلى: افندم يا عمي علي: ادهم بيحبك مش كفايه عليه لحد كده مجاش الاوان تسامحيه وتكملوا مع بعض؟ ليلى: مش قادرة ومش عارفه.
علي: بس انتي بتحبيه يا ليلى ليلى: وبعشقه كمان بس مش دي المشكله علي: فكري في ابنك وفكري في الحاجات الحلوه اللي كانت بينكم ومع الوقت هتسامحيه افتكري كل حاجه حلوه عملها في يوم معاكي ليلى: ربنا يسهل يا عمي على مشي والحفله خلصت والكل روح عم فتحي: مبسوطه كده؟ ليلى: وانا مالي؟ عم فتحي: وانتي مالك؟ الحفيد اغلي من الابن مليون مره وانتي منعتيها تشوف حفيدها انتي السبب ليلى اخدت ابنها ودخلت تنام بس النوم جافاها.
الصبح طلع وادهم جنب امه صحي ونزل الكافتيريا فطر ويدوب طالع لامه تليفونه رن ادهم: ايوه ليلى: انا ليلى يا ادهم انت فين؟ ادهم: انا فين؟ ليلى: مش قصدي بس اصل انا في المستشفي انت فين اقابلك ازاي؟ ادهم: في المستشفي؟ ليلى: باباك قالي ان مامتك تعبانه وجايه ازورها ينفع ولا اروح ادهم: ثواني نازلك نزل ادهم واول ما شافها اخد ابنه وشاله ادهم: ازيك يا جميل عامل ايه وحشتني في اليومين دول.
اخدهم وطلع بيهم فوق وخبط باب مامته ودخل ادهم: معايا ضيف عايز يشوفك دخل ادهم ومعاه ابنه وعطاه لامه اللي ضمته وفضلت تعيط ليلى دخلت واول ما دخلت ريهام مدت ايدها ليها ريهام: لو فضلت عمري كله اتاسفلك مش هوفيكي حقك بس طمعانه في كرمك تسامحيني ليلى: لا ماتقوليش كده انا مش زعلانه من حضرتك اصلا ريهام: بس انا غلطت في حقك كتير يا بنتي وفرقت بينكم كتير سامحوني انتو الاتنين.
ادهم: قولتلك ملوش لازمه الكلام ده المهم دلوقتي تقوميلنا بالسلامه.
ليلى ادهم اخدها وروحها بعد ما خلصت زيارتها وهما في العربيه مع بعض ليلى: مجيتش السبوع يعني؟ ادهم: كنت هنا في المستشفي ليلى: ماهو على قالي بس برضه ده سبوع ابنك ادهم: وجودي كان هيفرق في ايه؟ هيفرق معاكي انتي؟ ليلى: لأ بس ده ابنك ادهم: يا ستي عادي بقى سكتوا شويه ليلى: انت صحيح هتسافر؟ ادهم: اه هسافر ليلى: ممكن اعرف فين وليه؟ ادهم: شرم في شغل ليلى: وبعدين ادهم: وبعدين ايه؟ ليلى: انت بتنقطني بالكلام ليه؟
ادهم: وانتي عايزه تعرفي ليه؟ فارق معاكي سفري من عدمه؟ ناويه ترجعيلي؟ ليلى: لأ طبعا ادهم: طالما لأ طبعا يبقي ما تسأليش كتير سكتت ليلى بس كان جواها كلام كتير كان نفسها تقوله ان طبعا وجوده بيفرق وانها بتستني دخلته عليها طول الوقت وانها بتتطمن كتير وهو موجود بس مقالتش اي كلمه.
ادهم فعلا سافر وليلي افتقدته جدا سليم راح يزور ريهام لانها تقريبا على طول تعبانه سليم: وبعدين معاكي مش هتجيبيها لبر انتي ريهام: انت عايز ايه مني؟ مقولتلوش حاجه ما تخافش سليم: انا مش خايف عليا بتبصي لايه كده ومش مركزه معايا بتبص في الموبيل بتاعها ريهام: لحفيدي اللي انت حرمتني منه.
فعلا ريهام فرحت جدا وقامت تشتري كل اللي يخطر في بالها ينفع لبيبي علي: ايه ده كله بتعملي ايه؟ ريهام: بجهز اوضه لكريم علي: كريم! ريهام: اه ان شاءالله ادهم وليلي يتصالحو ويجوا هنا فيكون في اوضه لكريم تفتكر يا على هيتصالحوا صح؟ علي: اتمني ده، بس على الله انتي ما تطرديش ليلى تاني من البيت ولا تعملي الاعيبك دي معاها؟
ريهام: لا لا دي بقت ام حفيدي انا عرفت قيمتها في حياه ادهم ولو بايدي اعمل حاجه ارجعهم لبعض هعملها هو انت صح جاي بدري ليه كده؟ علي: اه مسافر اسبوع سريع كده في مشاكل عند ادهم وهروحله نظبط الدنيا وارجع ريهام: ترجعوا بالسلامه سافر على لادهم وغرقوا الاتنين في الشغل اللي وراهم.
ليلى قاعده في بيت ابوها مشتاقه لادهم حتى ابنها مشتاقله وبتفكر كل شويه تكلمه باب البيت خبط بازعاج ابوها فتح لقي ناس مايعرفهمش شكلهم ظباط الضابط: ده بيت فتحي محمد عم فتحي: ايوه يا باشا خير؟ الضابط: بنتك ليلى زوجه ادهم خطاب موجودة هنا؟ ليلى خرجت لما سمعت اسمها ليلى: ايوه انا هنا خير؟ اوعي يكون ادهم جراله حاجه،؟
الضابط: لا هو مجرالوش حاجه! هو رفع عليكي قضيه بحضانه ابنه وردك انتي لبيت الطاعه وبما انك غبتي عن كل الجلسات فالمحكمه حكمت لصالحه واحنا جهه تنفيذيه للحكم فاتفضلي معانا انتي وابنك ليلى مذهوله للي بتسمعه حتى عم فتحي كمان وهنا خالد جه خالد: في ايه اللي بيحصل هنا؟ في ايه يابا؟ ليلى بذهول: ادهم رفع قضيه عليا؟ خالد: انتي بتقولي ايه ادهم ما يعملهاش الضابط: لو سمحتي اتفضلي يالا معايا.
خالد: تتفضل فين يا عم انت؟ اختي مش هتروح لمكان وادهم عايزها يجي هنا بنفسه يكلمنا مش يبعتلنا البوليس الضابط: لو سمحت متعملش مشاكل لان انا بنفذ الاوامر اللي عندي وبس خالد: الاوامر دي على نفسك اختي مش هتطلع بره البيت وورينا هتاخدها غصب ازاي؟ الضابط: انا لحد دلوقتي بتكلم بالذوق فلو سمحت متخلنيش استعمل القوه معاك خالد: وريني كده هتعمل ايه؟
خالد دخل مع الضابط في خناقه وفي الاخر اتقبض عليه واخدوا ليلى بالقوه هيا وابنها.
تاني يوم الصبح عند ريهام الباب بيخبط وده كان البوليس ومعاه كريم حفيدها ريهام: ايه ده انت جبته ازاي وفين امه؟ الضابط: انا عندي اوامر اجيبه هنا لحضرتك احنا جبناه من بيت والدته بعد اذنك؟ سابها ومشي في حيره مش فاهمه اي حاجه ولا عارفه تتصرف.
عند سليم سليم فتح باب بالمفتاح ودخل سليم: هتعقلي ولا ايه؟ ليلى: ابني فين؟ سليم: ابنك بخير في حضن جدته وابوه ليلى: طيب انا عايزه ادهم هو فين؟ سليم: ما انا سبق وقولتلك ادهم سلمني الموضوع ده وطلب مني اتصرف وارجع ابنه مهما يكون التمن فحاليا اختاري ياترجعي لادهم وتعيشي مع ابنك يا تمشي من هنا ومالكيش حاجه عندنا ليلى: انا عايزه ابني؟ هاتولي ابني حرام عليك سليم: اختاري؟ ليلى: ادهم ما يعملش كده.
سليم: طيب بالعقل كده انا هروح اجيب ابنه واديهوله في بيته من غير ما يعرف ازاي يعني؟ مش هيسال ليلى فين؟ فكري بالعقل شويه مشكلتك انك مديه لنفسك اهميه هو مش سبق وخانك وانتي شوفتيه بنفسك؟ يعني انتي مش مهمه قوي بس كريم مهم فعلشان كده مضطرين نستحملك معاه هسيبك شويه تفكري سايبها وخارج وهيا بتصرخ ليلى: هاتلي ابني حرام عليك هاتلي ابني قامت ليلى وحاولت تتحرك بس ما قدرتش لانها مربوطه وايديها متكلبشه.
فقعدت مكانها تعيط.
ريهام بتحاول تسكت كريم مش عارفه راحت نادت لحسين وخلته يوصلها بيت ليلى نزل حسين خبط عليهم كتير بس محدش فتح حسين: مفيش حد في البيت يا هانم ريهام: متأكد يا حسين؟ حسين: ايوه يا هانم وخبطت كمان على شقه ادهم باشا وبرضه مفيش حد ريهام: طيب اعمل ايه انا؟ حسين: لو عايزه رأيي يا هانم احسن حل تكلمي ادهم بيه وهو يقولك تعملي ايه؟ روحت البيت وفعلا اتصلت بادهم ادهم كان هو وعلي مع بعض.
ادهم: ايه يا ست الكل خير؟ وايه صوت العياط اللي عندك ده؟ مين عندك عنده عيال صغيره؟ ريهام: اهلا يا حبيبي الصوت ده صوت كيمو ابنك ادهم: كريم عندك؟ ليلى عندك معقوله؟ ريهام: لا يا ادهم ليلى مش عندي ادهم: امي بلاش الغاز لو سمحتي جبتي كريم ازاي طالما ليلى مش عندك؟
ريهام: حبيبي انا مجبتوش البوليس هو اللي جابه ومفهمتش منه حاجه وروحت البيت عند ليلى ملقتش حد خالص في البيت ومش عارفه اعمل ايه يا ادهم وابنك رافض يرضع صناعي قولي اتصرف ازاي؟ ادهم كان هيتجن ومليون فكره وفكره نطت في دماغه قام وقف وبيتحرك ادهم: انا جاي هروح على المطار وان شاءالله ساعه وهكون عندك ماشي ابوه وقفه: في ايه؟ طمني ادهم: مش عارف البوليس جاب كريم لماما وهيا مش لاقيه ليلى.
علي: طيب استني انا جاي معاك متقلقش ان شاءالله خير ادهم: البوليس جايب ابني؟ ازاي مقلقش وليلي فين وهعمل ايه لو؟ علي: مفيش لو اكيد سوء تفاهم وصلو القاهرة وعلي راح لريهام وادهم راح لبيت ليلى خبط وفتحوله واول ما فتحوله وشافوه.
عم فتحي: طول عمري فاتحلك بيتي وثقت فيك وعاملتك زي واحد من عيالي وحتي لو بنتي بتزعل باجي عليها علشانك واتحملنا منكم كتير واقول ان انت انسان كويس بس تطلع بالنداله دي؟ ليه كده احنا عملنالك ايه؟ ادهم: عمي لو قاطعه: ما تقولش عمي انا مش عم حد عايز ايه تاني وجاي ليه معندناش حاجه تانيه تاخدها ادهم: عم فتحي اهدي ولو سمحت فهمني في ايه؟ ليلى فين؟ عم فتحي: انت جاي تهرج ولا جاي تستعبط؟
ادهم: انا لا بهرج ولا بستعبط ليلى فين؟ عم فتحي: شوف اللي يقتل القتيل ويمشي في جنازته ادهم: عمي ليلى فين؟ عم فتحي: معرفش ليلى عندك؟ ادهم: ليلى مش عندي انت بتقول ايه؟ عم فتحي: ليلى في بيتك مش سيادتك طلبتها في بيت الطاعه وخدت حضانه ابنك؟ جاي تستعبط بقى ولا ايه؟ ادهم: طاعه ايه وحضانه ايه انت بتتكلم عن ايه؟ عم فتحي: البوليس جه اخدها وقال انك اخدت حكم واخدها بيتك هيا وكريم.
ادهم: انا ما رفعتش قضايا انا كنت مسافر وامي اتصلت بيا من ساعتين قالتلي ان البوليس جابلها كريم وان هيا جتلكم هنا ملقتش حد وعلشان كده انا جيت فهمت بقى انا معنديش فكره عن اللي بتتكلم عنه ده فلو سمحت فهمني براحه ايه اللي حصل؟ عم فتحي سكت شويه: البوليس جالنا وقال انك رفعت قضيه حضانه وطاعه وكسبتهم ادهم: انا مارفعتش قضايا.
عم فتحي: والضابط جه ينفذ الحكم واخد ليلى وكريم وحتي خالد كمان قبضوا عليه لانه رفض انهم ياخدوا ليلى وضرب واحد من العساكر فقبضوا عليه واحنا كنا عنده ولسه راجعين كنا بنحاول نخرجه بس معرفناش ادهم: خالد انا هخرجه ما تقلقش وكريم في البيت مع امي المهم دلوقتي ليلى هيا فين؟ عم فتحي: الضابط قال انه هيوديها بيتك مش يمكن تكون في شقتكم؟ ادهم: طيب انا هروح شقتنا.
راح ادهم بس لقي الشقه فاضيه فاتصل بعم فتحي وعرف قسم ايه اللي خالد فيه وراحله هناك وقابل الضابط الضابط: يا باشا احنا جاتلنا اوامر ونفذناها ادهم: انا مارفعتش قضايا الضابط: دي حاجه مش عندي حضرتك ممكن تسال في المحكمه وتعرف مين اللي رفع القضيه بس يا انت يا حد معاه توكيل منك علشان يقدر يرفع قضيه زي دي ادهم جه في باله سليم ادهم: طيب انت وديت مراتي فين؟ الضابط: شقتك اللي في مصر الجديده ( قاله العنوان بالظبط).
ادهم: انا لسه جاي من هناك ومفيش حد الضابط: الله اعلم بقى هيا راحت فين؟ ادهم: طيب بالنسبه لخالد اخوها الضابط: ده ضرب عسكري وهيتعمله قضيه تعدي على موظف ادهم: طيب لو ينفع نحل الموضوع ودي الضابط: لو العسكري وافق يتنازل عن المحضر مفيش مشكله ادهم: طيب ممكن اشوف العسكري ده؟ ادهم راضي العسكري وخلال نص ساعه كان مخرج خالد ويدوب هيمسك في خناقه وضحله كل حاجه وصله وطلع هو على بيت سليم خبط وفتحله الخدم.
ادهم بصوت عالي: سليم انت يا سليم سليم طلع بهدوء: خير في ايه؟ ادهم: مراتي فين؟ سليم: مراتك؟ مراتك اللي انت مش عارف تلمها في بيتك؟ ادهم: ده شيئ ما يخصكش انت فاهم؟ ليلى سمعت صوت ادهم وهو بيزعق راحت مصرخه ونادت عليه سمعها وجري على الاوضه اللي هيا فيها فتح الباب اللي كان مقفول بالمفتاح من بره ودخلها واول ما شافته.
تحميل محتوى الموضوع
عرض نسخة صالحة للطباعة
أرسل هذا الموضوع إلى صديق
[22]
الدعوات : 2قوة السمعة : 10
رواية حبيبي المجهول