رواية حبيبي المجهول

رواية حبيبي المجهول للكاتبة الشيماء محمد الفصل العشرون

طول الطريق ليلى بتحاول تتكلم وادهم بيسكتها واخيرا وصلوا البيت وطلعوا اوضتهم
واول ما دخلوا وقفلوا الباب ادهم بص لليلي وقالها جمله واحده
ادهم: اول ما النهار يطلع مش عايزك في البيت فاهمه؟ عايزك بره البيت وبره حياتي؟
قال جملته وخرج وما رجعش غير الصبح
ليلى الليل كله تعيط لمت هدومها وحاجتها وسابت اي حاجه هو جبهالها غاليه
دهب مجوهرات شبكتها ما اخدتش غير خاتم جوازها وبس.

والصبح بعد ما على نزل شغله هيا نزلت ومعاها شنطه صغيره
ريهام: سيادتك فاكره نفسك رايحه فين؟
ليلى: اللي حضرتك عايزاه اتحقق وادهم طردني وماشيه بيت ابويا بعد اذنك
ريهام الفرحه مش سايعاها وجهزت لحفله كبيره اليوم ده
ادهم رجع البيت وطلع اوضته واستغرب ان ليلى مش موجوده
كل حاجتها موجوده امال هيا فين؟
نزل لامه اللي كانت مشغوله بتجهيز الحفله
ادهم: بتعملي ايه؟
ريهام ؛ عامله حفله صغننه كده وانت لازم تكون موجود.

ادهم: ان شاءالله بس ليلى فين؟
ريهام سابت اللي في ايدها وبصتله
ريهام: ليلى؟ هو مش انت طردتها؟ هيا قالت كده ومشيت
ادهم افتكر كلامه بس ماتخيلش ابدا انها هتمشي بجد
كان متخيل انها هتحارب علشان تفضل جنبه!
كان متخيل انها هتحارب علشان حبيبها؟!
بس هيا استسلمت ومشيت زي ما تكون ماصدقت تمشي
هيا حره هيا اختارت تمشي
ريهام: ادهم ايه؟
ادهم: لا مفيش حفلتك هتبدا امتي؟
ريهام: الساعه 9 هتبدا الناس تيجي
ادهم: هكون موجود.

وفعلا خرج ادهم لشغله وكأن شيئا لم يكن
بس تفكيره كله في ليلى اللي استغنت عنه ومشيت
علي: هاه قولت ايه؟
ادهم:
علي: ادهم انت سامعني؟ ادهم؟
ادهم: هاه سوري قولت ايه؟
علي: في ايه مالك مش مظبوط النهارده؟
ادهم: ليلى مشيت
علي: مشيت ايه؟ فين؟
ادهم: سابت البيت ومشيت
علي: كده من غير سبب؟ ببساطه؟
ادهم: اه ببساطه
علي: قولتلها ايه انت؟
ادهم: انا؟ قولتلها تمشي بس ما تخيلتش ابدا انها هتمشي بجد!

علي: امال تخيلت ايه؟ واحده عايشه في بيت غريبه فيه مكروهه فيه وجوزها مطنشها وطول الوقت حاسه انها عبء عايز لما تقولها تمشي تقولك ايه؟ لا والنبي خليني؟
ادهم: كلامك مش مظبوط انا بحبها وانت بتحبها وامي بتحاول على طول تقرب منها يبقي عذرها ايه هاه؟ لو كانت بتحبني كانت فضلت بس هيا ندمت وما صدقت قولتلها امشي مشيت
علي: انت سامع نفسك؟ انت قولتلها تمشي ليه اصلا؟

ادهم: كنت متغاظ منها ومعرفتش اطلع غيظي ده في ايه وبدال ما امد ايدي عليها قولتلها تمشي
علي: وليه متغاظ؟
ادهم: امبارح مش كلمتها من بدري وقولتلها على السهره جات الهانم ومفيش نص ساعه وفضلت تتاوب وتنام وهيا قاعده لدرجه ان الناس قالولي روح مراتك
ايه مش قادره تسهر ليله واحده ولا اصلا مش مهتمه بيا او بشكلي او اي حاجه تهمني؟
علي: علشان نامت قولتلها تمشي؟
ادهم: مش النوم في حد ذاته.

ليلى بعيده تماما عني! مفيهاش اي شيئ يشد! انسانه معدومه المشاعر او الاحاسيس! اقصي اهتمامها هتطبخ ايه؟ وده اخر اهتماماتي ورافضه انها تتغير
انا بحبها بس مش لاقي اي طريق ااقابلها فيه
علي: وهتعمل ايه؟
ادهم: هنهي العلاقه دي كفايه كده؟
ادهم في الحفله كان بيهيص ويرقص مع كل بنت تقرب منه
حسين شايفه وهيتجن منه وحاسس انه متكتف بوعده لليلي.

ليلى روحت بيتها ورفضت تحكي لاي حد حاجه ولما سألوها جايه ليه قالتلهم عادي وحشينها مش اكتر
بس طبعا باين على شكلها الدبلان والزعلان ان في مشكله او زعل بينهم.

اخر الليل حكت لمحمد كل اللي حصلها لانها بتثق في اراؤه وهدؤه
محمد: اللي انتي عملتيه ده غلط
ايوه مش حلو انك تفرقي ابن عن امه بس انتي ليه سكتي من الاول؟ كان لازم جوزك يعرف؟ وخروجك بره البيت ده كان اكبر غلط؟ كان المفروض تقوليلي او تقولي لخالد واحنا ساعدناكي
انتي ضيعتي جوزك من ايديك وياريت علشان حاجه ليها لازمه
امه هتفضل تتدخل في حياته وبعدين ادهم عاقل كان هيسمعك وهيتصرف صح.

عارفه لو هو زي خالد مثلا عصبي كنت عذرتك لكن ادهم عاقل وبيوزن الامور
على العموم سيبيه فتره كده يهدي وقابليه واحكيله كل حاجه حصلت وخليه هو يتصرف
بهدوء
يوم ورى يوم بيعدي وادهم بيحاول يبين للكل ان حياته احسن وليلي مش موجوده
بس الحقيقه ان الاول حتى وهيا مهملاه بس كان كفايه عليه اخر الليل تكون جنبه قدام عينه
الليل بالنسباله عذاب ما بينتهيش مكانها الفاضي بيعذبه
للدرجه دي بيحبها! بس هيا مشيت! هيا بعدت!

وفي يوم ادهم مع دولي بيوصلها بيتها وبتحاول تقنعه يدخل معاها البيت
حسين نزل من العربيه وراح ناحيتهم
حسين: ادهم باشا سعاده البيه الكبير اتصل وعايزك حالا في المكتب
ادهم بصله نظره طويله لانه عارف ان لو ابوه عايزه هيكلمه هو مش حسين
ادهم: اوك رايحله سلام يا دولي وقت تاني
سابها ومشي واول ما ركب العربيه
ادهم: مش هتبطل تتدخل في اللي مالكش فيه!؟
حسين: لا ليا فيه! يوم ما خلتني شريك في لعبتك خليت يبقي ليا فيه.

ادهم: لعبتي! برضه مسميها لعبتي؟
حسين: طول ما كل ما بتزهق ترميها تبقي لعبه
ادهم: تاني يا حسين؟ لتاني مره هقولك انها هيا اللي بتختار
حسين: ومسألتش نفسك هيا اختارت تبعد ليه!؟
ادهم: علشان ما بتحبنيش
حسين: انت مصدق كلامك ده؟!
ادهم: انت مش عارف احنا كنا عايشين ازاي؟
حسين: وانت عارف هيا كانت عايشه ازاي؟
ادهم: اه كانت في المطبخ عايشه دور الخدامه.

حسين: وما سالتش نفسك مره واحده ايه اللي يخلي واحده بتعشق جوزها تبعد عنه كده! وما تسمعش كلامه؟ وتوصل لمرحله انها تشوفه مع بنات تانيه وتسكت وتستحمل
ادهم: لما الواحده ما تحبش جوزها تعمل اللي انت بتقوله ده ومايبقاش فارق معاها
حسين اخد فرامل وبص لادهم
ادهم: انت اتجننت؟
حسين: انا اتجننت ولا انت؟ احلف كده انك مصدق ان ليلى ما بتحبكش
ادهم: طيب مشيت ليه لو هيا بتحبيني؟
حسين: ،
ادهم: ايه اللي خلاها بعيد عني؟

ايه اللي خلاها تركني على الرف؟
ايه اللي خلاها ما تسمعش اي كلمه اقولهالها؟
وايه وايه وايه؟ ليلى اختارت انها تبعدني بره حياتها
ايه ساكت دلوقتي؟
حسين: اكيد في سبب؟حاولت تسمعها؟
ادهم: هاه وايه هو السبب؟
حسين: السبب ده هيا تقولهولك
ادهم: انت عارف حاجه ومخبيها عني؟
حسين: انا كنت شايف ليلى عايشه ازاي؟ اسالها وانت تعرف
ادهم: تعرف حاجه انا مش عارفها؟
حسين: اسالها
ادهم: حسين اتكلم بقى
حسين: اسف بس وعدتها ما اتكلمش.

ادهم: وعدت مين؟ ليلى؟ حسين ايه اللي بيحصل من ورايا؟
حسين: اسف عايز تعرف اعرف بنفسك! اسال مريم ونجاه وصبحي ولا كريمه!؟ او اسال والدتك؟ وشوف هيجاوبوك ولا هيخبوا عنك عمايلهم؟ اكتر من كده مش هتكلم؟ قبل ما تقول مراتك مش بتحبك اعرف الحقيقه كامله؟ وقبل ما ترمي نفسك في حضن واحده رخيصه شوف حضن مراتك الاول.

ادهم راح على البيت وامه مكنتش موجودة
وهو داخل لقي عم منعم في الجنينه بيظبط فيها وافتكر ليلى لما كانت كلها طينه راحلوا
ادهم: ازيك يا راجل يا عجوز
منعم: اهلا بسيد الناس
ادهم: اخبارك ايه؟
منعم: انا الحمدلله: الا الهانم الصغيره هتيجي امتي يا باشا!
ادهم: هيا مش هتيجي تاني
منعم: ليه بس دي حته سكره والله ما هتلاقي ضفرها ولا حنيتها ولا طيبتها
ولا حد هيستحمل اللي هيا استحملته علشان تفضل جنبك.

ادهم استغرب ايه اللي هيا استحملته؟
ادهم: الا قولي هيا ليلى كانت بتحب تزرع؟
كذا مره تبقي هدومها مطينه؟ للدرجه دي بتحب الزرع
منعم: الهانم كانت بتخليها تزرع الورد بتاعها المفضل وحتي كنت بقولها انا ازرعه بس الهانم بترفض وتشغلني اي حاجه بعيد
ادهم: وليلي مكنتش بتقولها لأ مثلا مش هزرع؟
منعم: هو حد يعرف يقول للهانم لأ يا بيه؟
ادهم مشي وقابل صبحي المسؤل انه يشتري طلبات البيت كلها
ادهم: صبحي عايزك تعال.

صبحي: افندم يا بيه؟
ادهم: كنت عايزك تجيبلي شويه حاجات كده بس انت كنت مختفي فين الفتره اللي فاتت دي؟
صبحي: بجيب حاجات من هنا وهنا وبعدين طلبات البيت كانت كتيره قوي لدرجه ان الهانم كانت بتبعت معايا نجاه.

ادهم: امال مين بيطبخ بقى ويشوف شغل البيت؟
صبحي: مش عارف يا بيه
ادهم: صبحي! جاوبني
صبحي: الهانم مرات حضرتك
ادهم: وكريمه ومريم؟
صبحي: يا بيه انا بكون بره ما اعرفش
ادهم: لو مش هتجاوبني بصراحه يبقي ما تلزمنيش هنا خد حسابك واتفضل
ويدوب هيمشي ويسيبه.

صبحى: يا باشا كل اللي اعرفه ان البت نجاه قالتلي ان كريمه بتوزعهم هيا ومريم علشان الهانم الصغيره تعمل كل حاجه لوحدها ومش مسموح لاي حد يساعدها سواء في طبخ ولا تنظيف ولا اي شغل
الهانم الصغيرة كانت بتعمل كل حاجه
اما خروجها كل يوم والله ما اعرف حاجه عنه
ادهم: خروجها؟
ادهم لازم يعرف كل حاجه بتحصل
ادهم بدا يشك ان امه فعلا بتجبر ليلى
دخل على المطبخ
لقي كريمه ومريم ونجاه.

كريمة: خير يا بيه عايز حاجه؟ الهانم في النادي
ادهم: هو انتو كنتو بتبقوا فين وليلي في المطبخ كل يوم؟
كريمه: بنبقي هنا وبنساعدها
ادهم: امم مريم كنتي بتساعديها؟
مريم اتلجلجت ومش عارفه تقول ايه؟
كريمه: ايوه يا باشا
ادهم عارف ان كريمه من يوم ما اشتغلت وهيا جاسوسه امه وايدها اليمين
ادهم قرب من كريمه واخد السكينه اللي بتقطع بيها الخضار ومسكها من وشها.

ادهم: اخرسي يا كريمه انتي لاحسن بالسكينه اللي بتقطعي بيها دي هقطعلك لسانك
بص لمريم
ادهم: كنتي بتساعديها ( بصوت عالي)
مريم: لا يا بيه
ادهم: ليه؟
مريم بصت لكريمه فادهم زعقلها
ادهم: ليه؟
مريم: كانت ستي كريمه بتخليني اعمل حاجه تانيه او اروح البيت
ادهم بص لنجاه: وانتي؟ كنتي بتهربي من الشغل مع صبحي صح؟
نجاه: ابدا والله ستي كريمه اللي بتقولي اروح.

ادهم مسك كريمه وبيهددها بالسكينه شدها لبره واخدها وجرجرها على البدروم تحت.

ادهم: انتي بقى كنتي عامله هانم على مراتي! قسما بالله لاخليكي تندمي على اليوم اللي دخلتي فيه هنا
كريمه بتصوت وادهم جرجرها لحد تحت
على دخل البيت سمع صويت كريمه جري عليهم
علي: انت اتجننت بتعمل ايه؟
ادهم: الهانم كانت بتعذب ليلى
كريمه: ابدا والله ما انا! انا ماليش دعوه
علي: مين قالك بس يا ادهم الكلام ده؟ نزل السكينه دي
ادهم: انزلها ده انا هشرحها حتت حتت واخليها تلعن اليوم اللي ضايقت ليلى فيه ابعد انت.

اطلع فوق انت وسيبهالي
علي: يا ادهم اهدي
ادهم زعق جامد: يا تطلع يا تسكت
علي: يا زفته انتي عملتي ايه في مراته؟
كريمه: انا بنفذ اوامر الهانم وبس
هيا كانت بتشغلها مش انا! انا كل وظيفتي اني مخليش حد من البنات يساعدها
الهانم مكنتش عايزاها هنا وكانت بتحاول تبعدها عنك وطول اليوم تشغلها وماتخليهاش تريح ابدا ابدا علشان تتهد باليل وتنام زي القتيله وانت تزهق منها وتسيبها
والله انا ما قلتلها حتى كلمه تزعلها.

ادهم: طيب وليلي كانت بتخرج كل يوم تروح فين الفتره الاخيره دي؟
كريمه: ما اعرفش
ادهم: ما تعرفيش يبقي لسانك ده مالوش لازمه
ويدوب هيقرب منها
كريمه: الهانم بتبعتها بيوت صحباتها تشتغل هناك
ادهم وعلي اتفاجؤا وادهم اتصدم
ادهم: وازاي ليلى توافق؟

كريمه: هددتها الهانم لما رفضت انها هتخلي صحباتها يشغلوا ابوها فوق طاقته واللي اعرفه ان ابوها تعبان ومش هيرفض الشغل وصحته مش قد كده وليلي خافت على ابوها ونزلت مكانه لان الهانم قالتلها يا انتي يا ابوكي
انا مليش ذنب يا بيه
ادهم: ليلى مقالتليش ليه؟
كريمه: ماهي سبق وقالتلك وانت جيت وسالت مامتك واول ما عيطت قدامك زعقت لمراتك وخليتها تتاسف وطلعتها اوضتها.

والمره التانيه لما مراتك قالتلها لأ انت جيت سمعت صوتها عالي برضه زعقتلها وطلعتها اوضتها مامتك بقى عرفت انك مش هتصدقها لو قالتلك وان مراتك اصلا مش هتجرب تقولك تاني وعلشان كده كانت متطمنه
وكمان الهانم قالتلها ان هيا السبب ان سيدي على طرد ابوه من بيته وانها هيا كمان هتكون السبب ان سيادتك تطرد امك من حياتك
وقالتها انها هتكون خراب البيت
والله ده كل اللي حصل ما اعرفش حاجه تانيه
فضلت تعيط كريمه.

على شد ادهم وخرجوا
على مش مستغرب عمايل مراته بس ادهم عنده حاله ذهول
للدرجه دي امه عندها استعداد تعمل لمجرد ان ليلى مش عجباها؟
علي: ادهم اتكلم
ادهم: طيب هيا ما بتحبش ليلى وانا؟ سعادتي انا؟ مش فارق معاها،؟
علي: طالما مش على هواها يبقي لأ مش هتفرق معاها؟ امك كل اللي يهمها الشكل والمنظر ما تعرفش يعني ايه حب فبالتالي عادي بالنسبالها انها تبعدك عن ليلى طالما مش شايفاها مناسبه.

ادهم هيتجنن: امي كانت بتشغل ليلى في البيوت انت فاهم؟ مكفهاش هنا فشغلتها في بيوت اصحابها؟ ( على صوته قوي) انت فاهم يعني ايه مراتي تشتغل في بيوت الناس؟
علي: فاهم والله بس اهدي.

ادهم: اهدي؟ اهدي؟ انت فاهم يعني ايه مراتي تبقي خدامه؟ انت عارف انا كام مره هنتها وجرحتها وزعلتها؟ انت عارف انا كام مره هنتها على هدومها ولا شكلها ولا ريحتها ولا نومها حتى؟ انا طردتها علشان نامت؟ ههههههه فاهم انا طردتها علشان من التعب نامت؟ انا ازاي ماشفتش تعبها ده؟ انا اتهمتها انها ما بتحبنيش؟
علي: اهدي اللي انت بتعمله ده مالوش لازمه اهدي.

ادهم: بس كان لازم اعرف ان امي مش هتتقبلها انا غبي؟ كان لازم افهم انها اصرت ان احنا نقعد هنا علشان تتطفشها مني
علي: اهدي يا ادهم صلح اللي حصل ده المهم.

ادهم: طيب وليلي خبت كل العذاب ده عني ليه؟ ليه ما قالتليش؟ ليه سابتني اهينها واغلط فيها مره ورى التانيه؟ ليه سابتني اجرحها كده؟؟
علي: لانها مش عايزه تكون سبب في خراب البيت ومقاطعتك لامك
روحلها يا ادهم، روح وصلح الامور روح
ادهم: وهيا هتقبلني؟ وانا هسامحها انها خبت كل الامور دي عني؟
علي: روحها ورجعها وبعدين عاتبوا بعض زي ما تحبوا المهم مراتك تبقي في حضنك روح لمراتك روح.

ادهم مشي وطول الطريق بيفتكر كل مره كانت بتنام قدامه وهو بيتريق عليها
كل مره زعقلها ان هدومها مش نظيفه!
كل مره بصلها بقرف؟
كل مره وجعها بكلمه او نظره؟
كل مره قرب فيها من دولي علشان يضايقها؟
كل مره عايرها بريحتها؟
يااااه قد ايه كان بيجرحها ويوجعها
واكبر حاجه انه اتهمها انها ما بتحبوش
دي بتحبه لدرجه انها ضحت بيه علشان ما تأذيهوش
كان في طريقه لليلي بس لقي نفسه قدام النادي، جواه غضب لازم يفضيه الاول.

دخل النادي يدور عليها
ريهام قاعده مع اصحابها مبسوطه وفرحانه بانتصارها الصغير
وقفت ورافعه كاس في ايديها
ريهام: واخيرا قدرت اني اطرد الحشره دي بره بيتي وخليتها ترجع تزحف للجحر اللي خرجت منه، يااااه كابوس وانزاح، ، المهم حاليا ابني بقى متاح لاي واحده
لاحظت انهم متنحين وبيبصوا وراها اتلفت واتفاجئت بادهم وراها
ادهم: خلصتي خطبتك ولا لسه؟
ريهام: حبيبي انا كنت بتكلم عن واحده كانت هنا في الجمعيه بتاعتنا و.

ادهم قاطعها: مش كفايه كده بقى ولا ايه؟
ليلى اللي انتي بتقولي عليها حشره دي انظف من مليون واحده زي اللي حواليكي دول
ليلى دي ضفرها برقابكم كلكم
ليلى دي اللي شغلتيها عند اصحابك مراتي اللي انتي، ، . ،
انتي ازاي قدرتي تعملي فيا كده؟
ازاي جالك قلب تجرحيني بالشكل ده؟
بس زي ما بابا قال انتي معندكيش قلب اصلا تحبي بيه ولا تعرفي يعني ايه حب فعمرك ما هتحسي بيا.

على العموم احتفالك بانتصارك انتي لانك خسرتي وفشلتي وخسرتي كتير قوي
ليلى مراتي وهتفضل مراتي هاخدها بره بيتك اشبعي بيه لوحدك
خليكي ملكه على امبراطوريه فاضيه وخلي حواليكي شويه المنافقين دول اللي بيسقفولك علشان خسرتي ابنك وخربتي بيته
بس احب اقولكم ان ليلى مراتي وهتفضل مراتي وهيا اللي هتتربع على العرش وهيا اللي هتبقي الهانم هنا وهيا مرات صاحب شركات الخطاب وهيا شريكته وحبيبته ومراته
انتي خسرتي.

سابها ومشي وراح لمراته
وصلها وخبط باب بيتهم وهيا فتحت واتفاجئت بيه قدامها.

رواية حبيبي المجهول للكاتبة الشيماء محمد الفصل الحادي والعشرون

ادهم وصل عند ليلى وخبط وهيا فتحتله واتفاجئت بيه اول ما شافته
طبعا محدش عارف هما زعلانين او لا بس الكل شاكك انهم زعلانين
كلهم اتفاجؤا بيه وخصوصا ليلى
دخل سلم عليهم عادي زي اي مره بيجي فيها البيت
عم فتحي: لا يا ادهم انا زعلان منك
ادهم افتكر انه هيلومه على انه محافظش على بنته
ادهم: خير ليه يا عمي
عم فتحي: انت محرج على ليلى تبات هنا عندنا ولا ايه؟
ادهم: لا طبعا امال هيا بتبات فين؟

عم فتحي: بتبات في شقتك لوحدها عاجبك كده؟
ادهم افتكر زمان لما قالتله انها نفسها تعيش معاه فيها
ادهم: هيا من زمان نفسها تبات فيها عادي بقى
بس لا مش محرج عليها ولا حاجه هيا براحتها.

طبعا طول الوقت ده وليلي ساكته تماما
ادهم: طيب استاذن انا ليلى تعالي معايا شويه
ليلى: اجي معاك فين؟
ادهم: في شقتنا اكتشفت دلوقتي انك ما دخلتيهاش ولا مره معايا
عم فتحي: طيب يا ليلى روحي مع جوزك بس اعملوا حسابكم هنتغدي مع بعض
ادهم: سيب الغدي للتساهيل انا مش غريب
عم فتحي: طيب روحو وابقي هاتي جوزك يا ليلى
اخدها وطلع وهيا ماشيه وراه
ام امل في الشارع بره.

ام امل: ازيك يا ادهم عامل ايه؟ عاش من شافك نسيت ان مراتك هنا ولا ايه؟
ادهم: ودي حاجه تتنسي برضه ولا ايه يا ام امل بس هيا كان نفسها تيجي هنا يومين
ام امل: طيب انا جبت الشوكولاته اللي هيا بتحبها مش هتاخد منها ولا ايه؟
ادهم: لا هاخد هاتي وريني
ام امل بتحب تدبس اي حد في حاجه يشتريها بس عموما هيا ست طيبه وغلبانه وعندها ديما اخبار الشارع كله
اخد ادهم منها علبتين شوكولاته كادبوري ومارس.

ودخل هو ومراته حط العلب على الصفره ودخلوا اوضه النوم
كانت دي اول مره يدخلها من ساعه ما سابها لما ليلى عرفت الحقيقه
استغرب هو ليه مجابش مراته ولا مره وباتو هنا مع ان هيا كان نفسها من ساعه ماهو وضبها انها تبات فيها معاه
اكتشف ان كان بيلوم ليلى كتير بس هو نفسه كان مقصر كتير جدا واهملها كتير جدا واهمل مشاعرها كتير جدا
قعد على السرير وهيا وقفت قصاده زي التلميذ اللي مستني العقاب بتاعه.

ادهم: اقعدي واقفه كده ليه؟
قعدت وساكته
ادهم: مش عايزه تقولي اي حاجه؟
ليلى: هقول ايه؟ لا معنديش حاجه اقولها
فكرت انها تقوله كل حاجه جواها وتعيط في حضنه وتشتكيله بس تراجعت مالوش لازمه هيروح يتخانق مع امه والمشاكل هتستمر
ادهم: متاكده انك مش عايزه تقولي اي حاجه؟
ليلى: انت عايز تقولي حاجه؟

ادهم: ايوه عايز اسالك انتي ليه مصره تبعدي عني؟ وليه كل اختياراتك ديما بتحطينا احنا في المرتبه الاخيره؟ ليه ديما بتختاري على حسابنا وحساب حبنا؟
ليلى: ...
ادهم: ايه ساكته ليه؟
ليلى: مقولتلك معنديش كلام اقوله
ادهم: برضه مصره ان معندكيش كلام عايزه تقوليه؟
ليلى: اه معنديش
ادهم بنرفزه: انتي عايزه توصلي لايه وبتعملي فينا كده ليه؟
ليلى: لو سمحت وطي صوتك انت شايف ام امل قاعده تحت الشباك.

ادهم قعد تاني قصادها واتكلم بهدوء
ادهم: خبيتي عني ليه؟
ليلى: خبيت ايه؟
ادهم: احنا مش هنلف وندور واللي انتي كنتي خايفه منه خلاص حصل
ليلى: قصدك ايه؟
ادهم: قصدي واضح وكلامي اوضح امي واتخانقت معاها وسيبتلهم البيت انتي بقى خبيتي ليه عني كل اللي بيحصل؟ ليه مقولتيليش؟ ليه سيبتيني اخبط كده في الظلمه وافترض بمزاجي،؟

ليلى: اقولك ايه يا ادهم هاه؟ انت ما شفتش ليه بعنيك؟ ماشفتش تعبي وارهاقي وخوفي وكتماني عنك؟ للدرجه دي انا غريبه عنك مش عارفني؟ ليه محستش انت بيا وبالوجع اللي انا عيشاه؟ ولا ديما اسهل حاجه عندك تتهمني اني ما بحبكش؟
ادهم: انا اسف اتشغلت عنك بس كان لازم تقوليلي اللي بيحصل!

وبعدين انتي ازاي توافقي تتطلعي تشتغلي بره في بيوت الناس؟ ازاي قدرتي تكدبي عليا كل يوم وتخرجي؟ ازاي جالك عين وانتي مراتي تتطلعي تشتغلي شغل زي كده بره؟
ليلى: انا اسفه بس كان يا اما انا اطلع او بابا فكان لازم اعمل كده
ادهم بنرفزه: هنا بقى كان لازم تقوليلي
كان لازم تعرفيني علشان اتصرف اعمل اي حاجه؟
ليلى: كنت هتعمل ايه يعني؟
ادهم: كنت هعمل كتير ااقلها كنت هوقف امي عند حدها.

ليلى: ازاي تقاطعها ولا تتخانق معاها؟
ادهم: واديني اهو حاليا قاطعتها!
ليلى: وعلشان كده ما قولتلكش
ادهم: لو كنتي قولتيلي في وقتها كنا هنتخانق ويومين ونتصالح بس حاليا وصلنا لمرحله صعب نتصالح فيها الموضوع كبر قوي
سكوتك خلي الموضوع يوصل لنقطه مفيش منها رجوع لانه مهما يحصل مش هسامحها انها تخرج مراتي تشتغل بره البيت.

ليلى: واللي حصل جوه البيت؟ مش فارق معاك؟ وهيفرق معاك ليه انت بس كل اللي همك شكلك ومنظرك قدام الناس صح؟
ادهم: لا طبعا مش صح قولتلك مليون مره بطلي تفكري عني وتاخدي قرارات عني
اللي اقصده ان شغلك جوه البيت ده ممكن اتغاضي عنه واسامحها عليه لاني ممكن اعتبرها مجرد حمى بترخم على مرات ابنها وبتضايقها وتشغلها في البيت وفي حموات كتيره بتعمل ده.

لكن خروجك بره البيت ده مش مجرد مضايقه ده كده اتخطت كل الحدود وقطعت كل الخيوط اللي بينا وده مش ممكن ابدا اسامحها عليه
موضوع شكلي ومنظري انتي عارفه كويس ان انا ما بهتمش بكلام حد او راي حد
ليلى: عارفه وهتعمل ايه دلوقتي؟
ادهم: انتي عايزاني اعمل ايه؟ البيت وسيبته! امي واتخانقت معاها ومش هتتدخل في اي شيئ يخصنا تاني؟
ليلى: وانا ولا عايزاك تسيب البيت ولا تتخانق معاها
ادهم: امال ايه؟

ليلى: مش عايزه انفذ كلامها هيا قالت ان انا خليت باباك طرد ابوه بسببي ودلوقتي انت اهوه بتطرد مامتك من حياتك بسببي
ادهم: فعلا بسببك
ليلى: ايه؟
ادهم: اه يا ليلى بسبب انك خبيتي عليا لو من الاول قولتيلي مكنش الموضوع كبر قوي للدرجه انه ما يتلمش تاني كده
بس المهم ما علينا دلوقتي اللي حصل حصل
ليلى: هتعمل ايه؟
ادهم: انتي عايزاني اعمل ايه يعني؟
ليلى: انا قصدي بالنسبالنا؟
ادهم: مش عارف.

انتي عارفه كنت مستغرب قوي زمان لما زعلتي مني اول ما عرفتي حقيقتي اللي كنت مخبيها عنك واقول فيها ايه؟ وبعدين اقول لو بتحبني مش هيفرق معاها اني كدبت عليها او خبيت عنها بس حاليا انا عرفت انتي ليه زعلتي وليه اتوجعتي
الكدب من الحبيب بيوجع قوي
ان حبيبك ما يخلكش تشترك معاه في اسراره او وجعه او يخبي عنك دي حاجه توجع قوي
بس انا كان عندي سبب اساسي علشان خبيت عليكي لكن انتي خبيتي ليه؟ ليه وصلتينا لده؟

ليلى ساكته وادهم ساكت
ادهم: انا حاليا معنديش استعداد اسامحك او اثق فيكي، انتي عارفه اكتر سبب خلاني اتجوزك هو ايه؟ ثقتي العميه فيكي؟ ثقتي ان انا هكون اول حد ترجعيله في اي شيئ تعمليه؟ ثقتي انك بتحبيني بجد مش تمثيل فاي حاجه هتوجعني هتبعديها عني؟ ثقتي انك عمرك ما هتكدبي عليا او تخرجي بره بيتي بدون اذني؟
للاسف انتي عملتي كل حاجه كنت فاكر ان عمرها ما تطلع منك
وللاسف يا ليلى حاليا معنديش استعداد اسامحك.

ليلى: ولا انا يا ادهم عندي استعداد اسامحك انت اذيتك ليا كانت اكبر بكتير من مامتك هيا كانت بتكرهني لكن انت المفروض اني حبيبتك وفي كل مره كنت بتيجي عليا انا
محاولتش ولا يوم تسمعني او تحس بيا وديما تتهمني بعدم الحب
ادهم: طيب انتي مش هتسامحيني وانا مش هسامحك وبعدين ده يوصلنا لفين
ليلى: انت عايز تطلقني؟
ادهم: انتي عايزه تتطلقي؟
ليلى: مش هقعد معاك غصب عنك!
ادهم: دي مش اجابه
ليلى: لا يا ادهم مش عايزه اطلق.

ادهم قام وسايبها وماشي
ليلى: انت رايح فين؟
ادهم: عندي شغل عايزه حاجه
ليلى: لا شكرا
بس كان نفسها تقول عايزاك انت، عايزاك تفضل جنبي وفي حضني لانك واحشني جدا
وهو كمان كان نفسه ياخدها في حضنه بس حاجه جواه مانعاه.

ريهام رجعت البيت بسرعه علشان تلحق ادهم بس مالقتوش لقت على بس
ريهام: ادهم فين؟
علي: راحلها انتي كنتي فاكره ايه؟ هيسيبها؟
ريهام: انا نفسي اعرف شايف فيها ايه؟
علي: بيحبها ما تعرفيش يعني ايه حب!؟ بيحبها ومهما تعملي مش هيسيبها
عارفه حتى لو سابها هرجعه ليها علشان ما يضيعش عمره زيي انا
ريهام: وانت عمرك ضاع ليه ان شاءالله؟
علي: انتي عارفه ليه؟
ريهام: انت عمرك ما حبتني؟

علي: ولا انتي انتي كنتي عارفه اني ما بحبكيش وقولتلك وانتي عملتي نفسك مش واخده بالك ولا طنشتي ولا ايه مش فاهم
بس انتي كنتي عارفه اني انا ما بحبكيش وعمري كله ضاع معاكي وعلشان كده مش هسمحلك تضيعي حياه ابنك سيبيه يعيش مع اللي قلبه اختارها
ريهام: لا مش هخليها تفوز عليا لازم اخليه يسيبها
علي: لو ادخلتي بينهم تاني انا اللي هطلقك
ريهام: انت بتقول ايه؟ انت ما تقدرش تتطلقني.

علي: لا هطلقك وهتشوفي، اعملي حاجه تانيه وقسما بالله هطلقك
سابها وراح شغله واتفاجئ بادهم في مكتبه
علي: انت هنا ليه؟ انت ليه مش في حضن مراتك
ادهم: مش عارف! تخيلت اني اول ما اشوفها هاخدها في حضني بس اول ما بقت قدامي حسيت ان في حواجز كتير بينا مش عارف اعديها
علي: ادهم اوعي تفرط فيها
ادهم: مش هفرط ماتخافش بس محتاج وقت
علي: هيا فين حاليا؟
ادهم: عند بيت ابوها في الشقه اللي كنت واخدها
علي: وانت؟
ادهم: انا ايه؟

علي: انت فين؟
ادهم: انا قدامك اهوه ايه انا فين دي؟
علي: قصدي هتقعد فين؟ هترجع البيت؟
ادهم: لا طبعا مش هرجع البيت
علي: امال؟
ادهم: مش عارف اوكي مش عارف
You ask too much questions
علي: سوري حبيبي بس عايز اطمن عليك
ادهم: i know that but i need some time
علي: خد وقتك وخد اجازه لو تحب
ادهم: لا مش عايز اجازه دلوقتي
اخر النهار وهما مروحين
علي: هتروح على فين؟

ادهم: احتمال اروح فندق انا هاجي معاك اخد هدومي وحاجتي الاول اوك
راح معاه على البيت واول ما ريهام شافتهم
ريهام: حبيبي العشا جاهز عملتلك كل حاجه بتحبها.

ادهم تجاهلها وطلع اوضته طلع شنطه وبيلم فيها هدوم على قد كام يوم
ريهام: ادهم حبيبي يالا نتعشي مع بعض
ادهم ساكت مش بيرد وبيلم حاجته المهمه بس ومتجاهل امه اللي بتتكلم تماما
ريهام: هو انا مش بتكلم رد عليا!
ادهم بصلها بكل هدوء: افندم عايزه ايه؟
ريهام: سيادتك بتلم هدومك ورايح فين؟
ادهم: ده بقى شيئ ما يخصكيش
ريهام: يعني ايه ما يخصنيش انت ابني؟

ادهم: ياااه بجد فاكره اني ابنك؟ انا بدات اشك اصلا اني ابنك؟ ولما انا ابنك بتعملي في مراتي كده ليه؟ مش المفروض انها مرات ابنك ولا ايه؟ بقى تتطلعي مراتي في بيوت الناس؟ انتي ازاي قدرتي تعملي كده؟ ازاي مش فاهم؟ طيب تشغليها في البيت عادي اهو حمي وبتغلس على مرات ابنها لكن تطلعيها تخدم في البيوت اهو ده لايمكن ابدا اسامحك عليه فاهمه؟
ريهام: كل ده علشان
قاطعها: علشان مراتي اللي شايله اسمي.

علشان حبيبتي وروحي وقلبي ولو انتي ما بتحبيهاش كان المفروض تحبي حبي انا ليها
ودلوقتي بعد اذنك
ريهام: استني هنا استني ادهم
ادهم نازل وسايبها وهيا نازله تنادي عليه
مسكته من دراعه
ادهم: شوفي انا سامحتك قبل كده وفضلت معاكي وقولت هتحبيها لكن كنت غلطان مكنش المفروض اجيبها اصلا هنا
سابها ومشي وهيا قعدت مكانها
علي: مش قلتلك هتخسريه مصدقتينيش.

اهو راح لمراته وسابك ياريت بقى تتقبليها علشان تلاقي حد في يوم من الايام جنبك
قامت وقفت وبصتله بتحدي
ريهام: مش انا اللي بنت الطباخ تاخد ابني مني
اوعدك اني مش هرتاح غير لما اطلقهم من بعض وارجع ابني ليا
علي: لا حول ولا قوة الا بالله ده ابنك ودي مراته انتي حره انتي اللي هتخسري في الاخر
ادهم خرج وراح فندق ونزل فيه دخل اوضته وفضل رايح جاي مش عارف يعمل ايه؟
مش حابب يخرج يسهر ولا عايز يكلم حد.

ساعه ورى ساعه بتعدي ببطء شديد
الساعه جت 2 وهو لسه صاحي هيتجنن فقام لبس هدومه ونزل ركب عربيته وساق
ولقي نفسه قدام شقته نزل بهدوء ودخل وهو مش عارف هيلاقيها في شقته ولا في بيت ابوها
فتح براحه ودخل لاوضه النوم ولقاها نايمه في السرير زي الملاك
قلع هدومه ونام جنبها على السرير باصص للسقف فبصت هيا ناحيته
ليلى: انت جيت؟
ادهم: لو مضايقك امشي.
ليلى: لا طبعا ده انا ما صدقت.

ويدوب هتقرب منه عطاها ظهره ففهمت انه رجع بس مش كله
ادهم: مش معني رجوعي اني سامحتك تصبحي على خير
سابها ونام والغريبه ان الاتنين نامو فعلا
صحي الصبح على ريحه اكل حسسته بالجوع
فقام لقي ليلى مجهزه فطار
ادهم: صباح الخير
ليلى: صباحو فل تعال افطر
بصلها بنظره طويله قوي وكانه مش عارف ياخد قرار
ادهم: هدخل الحمام واجي
دخل الحمام واقف تحت الدش مش عارف ياخد قرار.

حس انه لو فضل معاها هيسامحها وحاسس برضه انه مش مستعد يصالحها
قعد فطر معاها بس من غير كلام نازل شغله وهو ماشي
ادهم: عايزه حاجه؟
ليلى: سلامتك هتيجي على الغدا؟
ادهم: الله اعلم
ليلى: طيب لو جيت تحب تتغدي ايه؟
ادهم: تاني؟ هقولهالك لاخر مره الاكل اخر اهتماماتي
سابها ومشي عدي اسبوع عليهم بيجي اخر الليل ويمشي الصبح بدري شغله ويدوب بيفطر معاها بس وهيا ساكته وهو ساكت.

في مره جه الظهر واتغدوا مع بعض وقاعدين قدام التليفزيون فحد خبط على الشباك
ادهم فتح وكانت هبه وشرين
هبه: ايه ده انت هنا؟ اول مره تكون هنا دلوقتي
ادهم: عادي مفيش شغل فجيت
شرين: ما تيجي في مره كده يا ادهم اغلط واعزمني في المطعم بتاعك
ادهم: اولا مش مطعم نايتكلب
ثانيا اي وقت روحو وكلموني من هناك وانا اظبط الدنيا
هبه: بجد؟ ماشي اتفقنا
ادهم كان فاتح الشباك وواقف فيه وقاعد بركبه على الكنبه اللي تحت الشباك.

هبه: مراتك فين كده؟ بت يا ليلى
ليلى جت من وراه ووقفت وراه على الكنبه وحاطه ايديها حواليه وسانده كلها عليه وبتتكلم مع صحباتها وبيهزروا كلهم
ادهم مش معاهم لان مراته اللي وراه وضماه مجنناه فسابهم ولف وشه ليها وقعد على الكنبه وهيا بقت فوقه
خلصت كلامها وقفلت الشباك بس مش عايزه تنزل من فوقه
بصتله تحتها وايديها على كتفه سانده عليه واتقابلت عنيهم ودق ناقوس الخطر.

ادهم مره واحده وقف فليلي هتقع فمسكها وبقت في حضنه شايلها ولفت رجليها حواليه
واكتشف ادهم انه هيموت عليها وانها واحشاه جدا اكتر حتى من شوقه ليها قبل الجواز واتقابل الحبيبين في لقاء اشتاقوله كتير
واحلو العتاب بين الاحباب. واتكلموا بلغه القلوب واتصافوا واتعاهدوا مره تانيه على الحب وان ميسمحوش لحد يدخل بينهم تاني
ادهم: توعديني ما تخبيش عليا حاجه تاني ابدا وما تسمحيش لحد يدخل بينا تاني ابدا.

ليلى: اوعدك بس انت خليك ديما جنبي وما تبعدنيش عنك وعاقبني لو غلطت باي طريقه غير انك تبعدني عنك
ادهم: انا اسف اني خرجتك من البيت بالشكل ده اوعدك اني عمري ما هعمل كده تاني ابدا
ليلى: ممكن اسالك سؤال؟
ادهم: طبعا
ليلى: هو انت لسه على علاقه بدولي؟
ادهم: لا طبعا انتي قصدك على الشاليه صح؟
ليلى: ايوه انت كنت قريب منها قوي.

ادهم: سوري يا قلبي بس انا كنت بحاول الفت نظرك لحاجات مضايقاني وقولت انك لما تغيري هتصلحيها، اسف يا ليلى اني كنت اعمي للدرجه دي بس انتي غلطانه انك خبيتي عني
ليلى: لكن انت محبتهاش؟
ادهم: لا طبعا انا بحبك انتي وبس.

اتحولت قعدتهم في الشقه الصغننه لشهر عسل جديد ادهم بينزل الشغل بالعافيه وليلي طول الوقت في حضنه والوقت كله فسخ ولعب وخروج وحب وبس
ادهم اخد ليلى شقتهم الجديده اللي كان اخدها قبل الجواز وكانت احلي مفاجئه ليها واحلي هديه
الحياه كانت من اجمل ما يكون بينهم
ليلى راحت معهد لتعلم اللغه وادهم كان بيساعدها على قد ما يقدر وعاشوا حياه جميله جدا وكملت اول ما عرفوا ان ليلى حامل في ولي العهد الجديد.

ادهم وعلي بيعاملوا ليلى انها ملكه
الشركه كانت عامله حفله وطبعا الكل موجود في الحفله
ريهام وسليم وعلي وكل العيله والكل مستني ادهم يدخل وفعلا ادهم دخل وماسك في ايده ملكه جمال الكون كله
ليلى احلوت جدا في حملها اللي يدوب في اوله
طول الوقت بتتضحك وبتتكلم وتتناقش مع الكل وايدها في ايد جوزها
ريهام بتراقب والنار هتاكلها
سليم: هدي نفسك الكره لسه في ملعبك
ريهام: ما خلاص اخدته مني وفازت.

سليم: تبقي هبله هما ما استسلموش يبقي ليه انتي تستسلمي سهل قوي ترجعي ابنك لحضنك وقدامك على اهو زعل شويه مني وبعدها رجعلي تاني و اتجوزك وكمل معاكي حياته ولا ايه؟ الحكايه بس محتاجه عقل بصي الواضح انه محدش هيقدر يبعدهم عن بعض وكل ما حد بيدخل بينهم بيرجعوا اقوي من الاول
ريهام: فعلا انت مش شايف بقت عامله ازاي؟
سليم: يبقي الحل انهم هما يسيبوا بعض من غير حد ما يدخل بينهم
ريهام: ازاي بقى ان شاءالله؟

سليم: ازاي بقى سيبها مش دلوقتي قومي اندمجي مع الناس علشان بدؤا يلاحظوا اننا واخدين جنب
سليم قام وراح ناحيتهم ومد ايده لحفيده اللي اتردد كتير انه يمد ايده لجده بس لازم يحفظوا شكلهم قدام الناس والمجتمع
سليم: ازيكم وانتي يا ليلى اخبارك ايه؟ اتغيرتي كتير وشكلك اختلف لدرجه ان اللي يشوفك يفتكرك بجد من نساء المجتمع الراقي.

ادهم: لا طبعا هيا مش زيهم دول مجرد لبس وميك اب مش اكتر لكن جواهم تافه وفاضي ليلى ما تتقارنش بالاشكال دي
سليم: اممم براحتك اتمني انكم تكونوا بخير
ادهم: طول ما انتو بعيد احنا بخير فلو سمحتوا خليكم بعيد
ليلى: ادهم براحه ده برضه جدك
سليم: قوليله والنبي ايه رايكم نفتح صفحة جديده ونبقي عيله انا كبرت في السن ومحتاج حفيدي جنبي
ادهم: لا متشكر خليكوا بعيد
ليلى: ادهم!

ادهم: بس انتي! دي خطه جديده يقرب بيها وبكره تلاقي المصايب جايه وراه
سليم: لا لا انت بتظلمني انا واضح وصريح لما كنت مش عايزها في العيله قولتلك مش عايزها وقولتلك اني هحاربك صح ولا ايه؟
انا اللي عايزه بقوله صريح
بس حاليا انت مبسوط معاها وهيا اتغيرت واتعلمت وبقت تستحق انها تكون موجودة في العيله
ادهم: برضه احب يكون في مسافه بيني وبينك بعد اذنك تعالي نرقص
شد مراته وراحوا يرقصوا مع بعض
ليلى: انت ليه عملت كده؟

ادهم: لانه سبق واذاني كتير ومازال عايز يفرق بينا ولو جاتله فرصه هيستغلها محدش بيتغير كده وبعدين انتي مستعده تخاطري تاني؟
ليلى: مش حكايه اخاطر حكايه ان وضعنا اختلف وبعدين لو عرفوا اني حامل ه
قاطعها ادهم: اياك!؟ اياك تقوليلهم فاهمه؟؟
مش بعيد لو عرفوا حد يعملك حاجه
ليلى: ده حفيدهم؟

ادهم: حفيد جاي من واحده مش متقبلينها ولو اتولد هيبقي خلاص مفيش اي فرصه ليهم فساعتها هيعملوا اي حاجه بحيث ان البيبي ده مايشوفوش النور
اياك يا ليلى امي او سليم يعرفوا
ليلى: ماهو باباك ممكن يقول لمامتك؟
ادهم: لا طبعا على عمره ما هيقولها، انتي مش فاكره في علاقتنا انه مقلهاش
على علاقته بريهام مش قد كده فمش هيقولها الا اذا انا طلبت منه يقولها فهمتي؟
الحمل ده هيفضل بينا لحد ما على الاقل يثبت
اتفقنا يا حبيبيتي.

ليلى: اتفقنا حبيبي
عدت الليله وسليم بيحاول يقرب بس ادهم مش مديهم اي فرصه نهائي
عدي كذا شهر وليلي حملها بيكبر والحياه جميله
ادهم متعته انه يحط ايده على بطن مراته ويحس بحركه ابنه جواها
على فرحان جدا بالحفيد المترقب ده ومستنين الشهرين الفاضلين يعدوا بسرعه
ادهم خلي مراته تروح جنب بيت ابوها في شقتهم الصغيره بحيث ان اخواتها يكونوا جنبها وهو في الشغل.

الكل حواليها وبرضه في نفس الوقت سليم او ريهام عمرهم ما هيروحوا هناك فميعرفوش بالحمل ده لانه حاسس انهم بيخططوا لحاجه
ادهم في شغله بالليل وراه شغل مهم عايز يخلصه تليفونه رن
ادهم: حبيبه قلبي اسف اني اتاخرت
ليلى: هتيجي امتي بقى؟
ادهم: مشروع مهم لازم اخلص دراسته علشان المفروض نبدأ فيه وبصراحه انا معطله المهم انتي عامله ايه؟
ليلى: انا كويسه ابنك عمال يخبط ويرزع جوه بيسال عليك هتيجي امتي؟

ادهم: حبايب قلبي بصي ساعتين بالكتير وهاجي اتفقنا
ادهم خلص شغله ومروح تليفونه رن رقم غريب
ادهم: الو ايوه مين؟
# انا؟ انت لسه فاكرني ولا؟
ادهم: يا الله عايزه ايه مني؟ هو انا مش سبق وقولتلك ابعدي عني وسيبيني في حالي بقى؟
# انا لسه بحبك ومش قادره انسي اللي بينا انا بتعذب يا ادهم
ادهم: وانا قولتلك انسي
# طيب تعال عندي مره اخيره اودعك فيها
ادهم: لا طبعا انسي.

# ارجوك انا هسافر بره مصر ومش هرجع تاني بس لازم اشوفك مره اخيره ارجوك سلام اخير وبعدين ما تنكرش اني ياما وقفت جنبك وياما هونت عليك كنت ديما تجيلي وانت متضايق ومخنوق يبقي مره واحده تجيلي كصاحب مش اكتر ودعني وامشي وعمري ما هضايقك تاني ابدا انا طيارتي بكره خلاص
ادهم: خلاص هاجي اسلم عليكي وامشي علشان خاطر العشره اللي بينا.

قفل معاها وفكر يكلم مراته يقولها هيتاخر شويه بس رجع في كلامه وقرر انه يروح يسلم عليها ويمشي يرجع لحضن مراته
راح خبط بابها وفتحتله ودخل وقفلت الباب
بس اترسمت ابتسامه شريره ونيه بالشر جواها وحب للانتقام انه رماها في يوم من الايام.

رواية حبيبي المجهول للكاتبة الشيماء محمد الفصل الثاني والعشرون

قفل معاها وفكر يكلم مراته يقولها هيتاخر شويه بس رجع في كلامه وقرر انه يروح يسلم عليها ويمشي يرجع لحضن مراته
راح خبط بابها وفتحتله ودخل وقفلت الباب
بس اترسمت ابتسامه شريره ونيه بالشر جواها وحب للانتقام انه رماها في يوم من الايام.

الصبح طلع وليلي نايمه في سريرها تليفونها بيرن صحيت لقت نفسها لوحدها مسكت التليفون بس لقت رقم غريب ردت عليه
ليلى: الوو ايوه مين؟
## انتي ليلى مرات ادهم؟
ليلى: ايوه انا ادهم جراله حاجه!؟ هو فين؟
## لا هو بخير ما تقلقيش هو حاليا نايم في العنوان ده ( )
ليلى: عنوان ايه ده وانتي مين؟
##انا هههههههه انا الحضن الحنين اللي كل جوزك ما بيزهق منك بيروح يرمي نفسه فيه
ليلى: انتي كدابه.

## استني قبل ما تقفلي اتصلي بيه هتلاقي تليفونه مقفول وبعدين مش امبارح قالك انه عنده شغل متأخر؟ وبعدين تعالي واتاكدي بس بسرعه قبل ما يصحي ويمشي ولا استني هبعتلك دليل بسيط صورته نايم وعريان ولو عايزه بقى تتاكدي تعالي بنفسك
قفلت التليفون وليلي مكانها مش قادره تفكر حتى! بس هيا متاكده من حاجه واحده ان جوزها بيحبها
رنت عليه فعلا تليفونه مقفول وفعلا اتاخر علشان شغل.

دقيقه وتليفونها رن برساله واتس فتحتها وشافت صوره لجوزها عريان ونايم على سرير
لا اكيد دي صوره قديمه! لا ممكن يكون في فندق ودي واحده من خدمه الغرف وعايزه توقع بينهم ايوه هو كده
تليفونه المقفول جننها طيب الشك دخل جواها
لا مش هتقدر تعيش في الشك ده لازم تثبت لنفسها ان جوزها بيعشقها هيا وبس
خرجت راحت بيت ابوها لقت خالد نايم صحته
ليلى: خالد معلش اصحي
خالد: في ايه انتي تعبانه؟

ليلى: لأ بس عايزاك توديني مشوار بسرعه قوم
شدت الغطا من عليه: قوم بقى البس بسرعه ويالا ولو حد سالك قولهم هنروح نجيب فطار
خرج خالد بسرعه وراها وركبوا عربية الشغل
خالد: هنروح فين؟
ليلى قالتله العنوان وسكتت تاني
خالد: ده عنوان ايه؟
ليلى: من غير اسئله لو سمحت يا خالد
وارجوك واحنا راجعين مهما تكون حالتي متسالنيش
خالد: افهم بقى
ليلى: لو سمحت يا خالد انا كان ممكن اخد تاكسي بس قلت انت تبقي معايا علشان مبقاش لوحدي.

وصلوا المكان
ليلى: خالد اوعدني انك مش هتسالني اي اسئله
خالد: اوعدك ماشي
ليلى: تليفونك خليه في ايدك لو رنيتلك اطلعلي بسرعه فاهم؟ انا في الدور التالت شقه 6
خالد: انتي يا بت هتقلقيني ليه؟ طيب اطلع معاكي؟
ليلى: لو في حاجه هرنلك والتليفون في ايدي اهو اهوه
طلعت وقلبها بيدق بسرعه والخوف ماليها ومش عارفه تتوقع ايه؟

وصلت قدام الشقه وواقفه خايفه انه يكون حد مستنيها او يكون سليم مدبرلها مقلب او حد عايز ينتقم منها زي ما ادهم قالها
حطت ايدها على بطنها بخوف بس لازم تتاكد
خبطت واتاكدت ان تليفونها مفتوح على رقم خالد بحيث انه بضغطه يطلعلها.

سمعت صوت وراها لقته خالد
ليلى: انت وعدتني؟
خالد: وعدتك مش هسال وفعلا مش هسال هستناكي هنا مش هدخل معاكي بس علشان اكون قريب انتي مش شايفه وشك لونه ايه؟
ليلى: خلاص بس ما تدخلش الا لو ناديت عليك
ضربت الجرس وفتحت الخدامه الباب
ليلى: اهلا لو سمحتي هو ده بيت مين؟
الخدامه: ده بيت عمر عبد الكريم
ليلى: مين عمر عبد الكريم؟
الخدامه: انتي عايزه مين يا هانم؟
ليلى بتردد: عايزه ادهم على خطاب موجود؟

قلبها بيدق ومستنيه الاجابه بفارغ الصبر
الخدامه فتحت الباب: اتفضلي يا هانم
ليلى: موجود هو هنا؟
الخدامه: ايوه اتفضلي وانا هناديله
ليلى دخلت ويدوب الخدامه هتقفل الباب
ليلى: سيبيه مفتوح لو سمحتي
فعلا الخدامه سابته ودخلت وليلي وراها قلبها هيخرج من مكانه
الخدامه: لحظه هنا وانا هقوله او هشوفه صحي هو والهانم ولا لسه؟

ليلى مش مصدقه اللي بتسمعه اكيد بيضحكوا عليها مشيت ورى الخدامه ويدوب الخدامه خبطت على الباب راحت ليلى زقتها بعيد وفتحت هيا الباب ودي كانت صدمه عمرها
الخدامه: لو سمحتي يا هانم خليكي بره
ليلى واقفه مش مستوعبه اللي شايفاه ولا مصدقه عنيها وحاسه ان الزمن وقف بيها
الخدامه: لو سمحتي اتفضلي بره لو سمحتي
ليلى ولا قادره تتحرك او ترد او تنطق
معقوله جوزها قدامها نايم عريان وفي حضنه واحده نايمه معاه.

بقى معقوله ادهم يخونها؟ بقى معقوله كل المكالمات اللي كانت بتجيلها وتجاهلتها كانت حقيقة؟
الخدامه: لو سمحتي يا مدام اتفضلي بره
ادهم واللي جنبه بدؤا يصحوا من صوت الخدامه ومحاولتها لطرد ليلى
ادهم بيفوق وفتح عنيه وبص للي جنبه واتفاجئ ان ليلى واقفه قدامه قام واتنفض
ادهم: ليلى؟
ليلى: ايوه انا انت
ليلى مش لاقيه كلام تقوله واقفه قدامه مصدومه
ادهم: ليلى اسمعيني
كان هيتحرك بس لقي نفسه عريان تماما فمسك الغطا عليه.

قامت اللي جنبه واتفاجئت ليلى انها دولي
دولي: حبيبي ارجع مكانك بقى
ادهم: اخرسي يا دولي
قامت اتعدلت وهيا كمان عريانه وماسكه الغطا باهمال عليها بس واضح طبعا انها عريانه
ليلى مره واحده سابتهم وجريت على بره
ادهم: ليلى استني
قام بسرعه: هدومي فين؟
دولي: مطرح ما قلعتهم
ادهم: هدومي فين؟
دولي: امينه امينه
الخدامه: افندم يا هانم
دولي: هاتي هدوم البيه
جابتله هدومه ولبس ونزل يجري لمراته.

ليلى خرجت كان خالد واقف واول ما شافها
ليلى: ولا كلمه يالا بينا بسرعه
جريت على السلم
خالد: براحه انتي حامل
ركبوا العربيه ومشيوا وهو بيبصلها وهيا متجمده باصه قدامها ولا بتنطق ولا بتتكلم ولا بترد عليه
خالد سكت واحترم سكوتها وصلوا البيت وهيا
دخلت وقفلت على نفسها وفضلت واقفه شويه مش عارفه تستوعب ايه اللي حصل؟
وعماله تحاول تفكر هتعمل ايه؟ هو اكيد هيجي وراها هتقوله ايه؟ وهتعمل ايه؟ مش عارفه تفكر نهائي.

امبارح بالليل كان بيكلمها ويحب فيها ويقولها مشتاقلها وهو في حضن واحده تانيه؟
ياترى كام مره خانها؟ وكام مره ضحك عليها مع صحباته؟
لازم تكون قويه مش هتعيط! مش. كل شويه تعيط وتقعد حزينه ومكسوره! لازم تكون قويه علشان ابنها اللي جاي
الباب بيخبط اهو جه عندها هتعمل ايه؟
ادهم: ليلى فين يا خالد؟
خالد: جوه ادخل
خالد مرضيش يقول لادهم حاجه لانه مش فاهم ايه اللي حصل وساب اخته هيا تحدد هتقول لجوزها ايه وهتعمل ايه؟

ادهم دخل عند ليلى وقفل الباب كانت قاعده على السرير واول ما شافته دموعها هددت بالنزول زي المطر اللي بيبدأ خفيف وهيتحول لعاصفه
ادهم: ليلى اسمعيني! انا مش عارف اقول ايه؟ ليلى انا اصلا مش عارف ايه اللي حصل؟ وحصل ازاي اصلا؟
ليلى باصه قدامها ومش بتنطق واول ما دمعه بتنزل بتمسحها بسرعه
ادهم قعد قدامها تحت رجليها ومسك ايديها وهيا جامده
ادهم: ليلى قولي اي حاجه متسكتيش كده؟

اقسم بالله يا ليلى ما اعرف انا ازاي ده حصل؟ او ايه اللي حصل حتى؟
دولي اتصلت بيا امبارح وانا جاي وقالتلي انها مسافره واترجتني اروح اشوفها قبل ما تمشي وانا رحت علشان بس العشره اللي بينا وبعدها وبعدها لقيتك انتي واقفه قدامي انا اصلا مش فاهم ده حصل ازاي؟
حط ايده على بطنها
ادهم: وحياتك انتي وحياة ابننا ده ما اعرف ايه اللي حصل او حصل ازاي؟؟
ليلى زقت ايده من على بطنها وقامت وقفت.

ليلى: اوعي تحلف بحياة ابني انت فاهم؟
ادهم: ابننا
ليلى: ابني لوحدي انت فقدت اي حق فيه
ادهم: ليلى اسمعيني
قاطعته: اسمع ايه؟ اسمع ايه؟ انك نمت مع واحده ومش عارف ازاي؟ انت للدرجه دي شايفني هبله ومتخلفه؟
ادهم: ليلى
ليلى: ما تنطقش اسمي قصرت معاك في ايه؟ ايه اللي كان ناقصك؟ انا اتغيرت علشانك واتعلمت علشانك واتحولت لانسانه تانيه علشان أليق بيك؟ ايه اللي ناقصني؟
انا استحملت اهانات كتير علشانك.

استحملت ابقي زي الخدامه علشانك
استحملت اهانات مامتك وجدك كل شويه علشانك
انا استحملت اللي محدش يستحمله ابدا
قصرت في ايه معاك هاه؟
كل جنله بتقولها بتضربه على صدره وبتزقه
ادهم: ولا اي حاجه ليلى انتي حبيبتي وروحي وقلبي واقسم بالله ما اعرف ده حصل ازاي؟
ليلى صدقيني انا مش فاهم ايه اللي حصل؟ ارجوكي صدقيني
ليلى: انت عارف كل يوم من يوم ما اتجوزتك معاكسات بتجيلي.

اللي تقولي انها حبيبتك! واللي تقول انك معاها! واللي تقول انك بتحبها! وكل يوم حاجه مختلفه وانا بكدبهم بكدبهم كلهم وبثق فيك انت والنهارده! النهارده عرفت قد ايه كنت غبيه! قد ايه كنت ساذجه
قد ايه كنت متخلفه اني وثقت في حبك ليا
ادهم: انا بحبك فعلا وعمري ما حبيت غيرك وعمري ما خنتك ابدا ولا حتى بصيت لواحده تانيه
ليلى: والنهارده كنت ايه؟ بتجرب ولا بتريح بس شويه ولا ايه؟

ادهم: اقسم بالله ما اعرف ايه اللي حصل؟ صدقيني( مسكها من اكتافها وخلاها تبصله)
اقسم بالله ما حبيت غيرك وعمري ما خنتك ابدا
ليلى انتي تصدقي اني اخونك او ابطل احبك
انا عندي استعداد ابيع الدنيا كلها علشانك
ليلى: شوفتك بعيني
ادهم: طيب اديني فرصه افهم ايه اللي حصل؟
ليلى: ادهم لو سمحت سيبني لوحدي
ادهم: طيب هسيبك وهرجعلك تاني وانا عندي اجابه مقنعه اقولهالك.

ادهم مشي وبعد ماهو خرج ليلى قعدت على السرير ومن غير مقدمات هبت العاصفه ولقت نفسها بتعيط بهستيريه مش قادره تقف او تبطل او حتى تاخد نفسها بتشهق
اخواتها اتلموا عليها بيحاولو يكلموها او يهدوها او يفهموا ايه اللي حصل بس من غير فايده
فضلت تعيط كتير وكان العياط هو الشيئ الوحيد اللي تقدر تعمله
ادهم خرج من عندها وراح لدولي
اول ما دخل مسكها من دراعها بعنف
ادهم: ايه اللي حصل بينا؟

دولي: نعم؟ كنت بتطفي نار والعه جواك
للدرجه دي كنت واحشاك؟
ادهم: انتي هتهرجي ولا ايه؟ نار ايه وزفت ايه؟
دولي: عايز ايه يا ادهم؟
ادهم: عايز اعرف انا ازاي نمت هنا وليه وايه اللي حصل بالظبط؟
دولي: انت بتهرج صح؟ مراتك مش هنا علشان تمثل عليها
ادهم مسكها بعنف ومسكها من رقبتها
ادهم: قسما بالله لو ما اتكلمتي عدل وقولتيلي انا ازاي نمت هنا لاقتلك انتي فاهمه؟
دولي زقت ايديه بعيد.

دولي: اقولك ايه انت جيت وقعدت معايا شويه وبعدها طلبت مني نطلع فوق وطلعنا وقربت مني والباقي معروف
ادهم: وانا مش فاكر حاجه من الكلام ده ليه؟ شربنا ايه؟
دولي: مشربناش او انت شربت قبل ما تيجي
ادهم: انا كنت في الشغل شربنا ايه هنا؟
دولي: شربنا عصير فريش وبس بقولك ايه ماتحاولش تبرر اللي حصل على حسابي
ادهم: وانتي اول ما قولتلك تعالي على طول وافقتي؟

دولي: انا بحبك وانت عارف ده كويس وكنت مشتاقالك وبعدين دي مش اول مره يعني
ادهم خليك معايا
يدوب هتقرب منه زقها بعيد وقعها
ادهم: ابعدي عني انا مسيري هعرف ايه اللي حصل وساعتها مش هرحمك
ادهم سابها ومشي ومش عارف يروح فين او يعمل ايه؟
تاني يوم راح لمراته يحاول يتكلم معاها
ادهم خبط عليهم وفتحله خالد
ادهم: ازيك امال ليلى فين؟
خالد: الله اعلم
ادهم: افندم؟ انت بتقول ايه؟
خالد: اللي سمعته.

ادهم زقه ودخل يدور عليها بنفسه بس فعلا مالقهاش
ادهم: ليلى فين؟ فين مراتي؟
عم فتحي: احنا صحينا الصبح ملقيينهاش في البيت وكنا فاكرينها معاك تلاقيها في بيتك
ادهم: عم فتحي ارجوك ما تخبيش عليا
عم فتحي: يا ابني اقسم بالله ما اعرف حاجه عنها انا يدوب اهو كنت هكلمك
خالد: انت عملتلها ايه؟ امبارح بعد ما مشيت فضلت تعيط بهستريه ومحدش عرف يسكتها
ايه اللي حصل بينكم؟
ادهم: انا هروح ادور عليها.

ادهم راح بيته وراح كمان بيت امه وراح لاي مكان مراته تعرفه بس ملهاش اي اثر
راح بيت ابوها تاني لقي الكل بيدور عليها
والشارع كله ميعرفش حاجه عنها
واخيرا بلغوا البوليس يدوروا عليها.