رواية حبيبي المجهول

رواية حبيبي المجهول للكاتبة الشيماء محمد الفصل السابع عشر

ليلى بتفوق اهوه ولسه بتنادي على ادهم
ادهم صحي على صوتها
ادهم: ليلى حبيبتي انا جنبك اهوه انا اسف اني مشيت كنت غلطان بس اوعدك مش هسيبك تاني بس انتي قومي وارجعيلي
ليلى بصتله وهيا ساكته وهو بيسال نفسه اذا كانت عرفاه ولا زي امبارح هتقوم تصرخ
ليلى: انت هتجيبلي ادهم؟
ادهم: ليلى انا ادهم
ليلى: لو تعرف مكانه خدني عنده ارجوك
ادهم: ليلى بقولك انا ادهم اسمعيني بقى
انتي بتعذبيني كده ليه؟ انا ادهم ادهم سامعه.

ليلى بتعيط بصوت اعلي وحطت ايديها على ودانها وبتنادي على ادهم بصوتها كله
الدكتوره جت وشافت ادهم ما سكها بيشيل ايديها من على ودانها وبيقولها انا اهوه وهيا بتصرخ وتنادي عليه
الدكتوره: اطلع بره انت اطلع بره
ادهم: انا عايزاها تشوفني انا قدامها اهوه
الدكتورة: وكده هتشوفك؟ اطلع بره سيبها ترتاح وهيا هتفوق لوحدها
عطوها حقن مهدئه تاني ونامت تاني
ادهم هيتجنن عليها ومش عارف يعمل ايه؟

الكل بيجي ويمشي الا هو مش عايز يتحرك ابدا من جنبها
علي: ادهم روح ارتاح شويه
ادهم: انا مش تعبان ما تشغلش بالك انت بيا
علي: طيب يا ابني روح بس غير هدومك ات بقالك 4 ايام لابسها وبصراحه ريحتك لا تطاق
ادهم: انا بغير هدومي ومعايا شنطتي ولا ناسي اني جاي من المطار على هنا
علي: شكلك على بعضك مش حلو روح احلق وغير ونام وتعالي فايق حتى البت لو فاقت ما تتطفش منك
مع اصرار الكل ادهم روح فعلا
ريهام: حبيب قلبي وحشتني.

جريت عليه بس هو تجاهلها وطالع على السلم
ريهام: ادهم استني
ادهم: عايزه ايه؟
ريهام: ليلى عامله ايه؟
ادهم: وتهمك في ايه؟ ولا بتتطمني هتخلصي منها ولا لأ؟
ريهام: لا ابدا بطمن عليها انت بتحبها خلاص براحتك وانا هحب حبك ليها
ينفع ازورها؟
ادهم: لأ ما ينفعش وبعدين لسه ما فاقتش اصلا
سابها وطلع وهيا ابتسمت انها ما فاقتش واتمنت انها ما تفوقش اصلا.

ادهم فعلا مجرد ما دخل اوضته ولمس السرير نام ونام كتير جدا نام لتاني يوم وصحي استغرب هو ازاي نام كل ده؟
ادهم حلق واخد شاور وراح لليلي واول ما وصل اتفاجئ بيها فايقه وبتتكلم مع ماجده
ادهم: ادخل؟
ماجده: طبعا ادخل اهو جه اهو يا ستي سالت عنك مليون مره
ادهم: وما اتصلتيش بيا ليه؟
ماجده: علشان ترتاح هقوم افطر انا وانت اهو معاها
خرجت ماجده وهو بصلها
ادهم: عامله ايه؟
ليلى: كويسه
ادهم قرب وقعد جنبها على السرير قصادها.

ادهم: انا اسف اني مشيت
ليلى: لا عادي قالولي انك فضلت جنبي الاربع ايام اللي فاتو
ادهم: في ايه مالك؟ مش طبيعيه ليه؟
ليلى: لا عادي متهيألك
ادهم قرب ايده من ايدها واول ما لمسها شدت ايدها بسرعه
ادهم: في ايه؟
ليلى: ما فيش تعبانه وعايزه ارتاح ممكن؟
ادهم: انتي بتتطرديني؟
ليلى: لا بس بقولك تعبانه
ادهم: مالك يا ليلى؟ قولي على طول في ايه؟
ليلى: ما فيش انا بقيت كويسه اهوه ممكن تمشي
ادهم: امشي فين؟

ليلى: ماطرح ما كنت ماشي روح مش هوقفك
ادهم: ليلى
ليلى: ليلى ايه؟ مش كنت ماشي قوم اتفضل امشي يالا روح
ادهم: ممكن تهدي؟
ليلى: لا مش ههدي انا مجنونه اتفضل بقى امشي وسيبني اتفضل
قامت ليلى وحاولت توقف وبتقع وهو بيحاول يهديها او يسندها وبتزقه وتزعق فيه وتقوله يمشي وبتضرب فيه
الكانوله شدتها من ايديها والدم بينزل من مكانها وهو بيحاول يمسك ايدها وهيا بتضرب فيه وتقوله يمشي.

اخواتها جم على صوتها وخالد هيدخل مسكته الدكتورة: سيبها تفضي كل اللي جواها سيبها تقول اللي هيا عايزاه
خالد: بس هو ممكن
الدكتورة: ممكن ايه؟ هيا بامان معاه
لازم يتصافو وما تخافش هو هيستحملها
جوه عندهم هيا بتضربه على صدره وهو بيمسكها ويهديها ويمسك ايدها اللي بتنزف مكان الكانوله
ليلى: امشي وسيبني لوحدي واهرب يالا
امشي وما تبصش وراك ابدا
امشي يالا وما تفكرش فيا امشي
عيطت جامد وهو كتفها ومسك ايديها الاتنين.

كتفها تماما ومقدرتش تتحرك فعيطت جامد
هو شدها لصدره وضمها وايده على شعرها بتهدهدها زي العيله الصغيرة
ادهم: انا استاهل اكتر من كده بس ارجوكي اهدي ، حقك عليا اسف يا قلبي وروحي وكياني كله اسف بجد اني فكرت للحظه ابعد عنك، كنت غبي ومتخلف
ليلى: ايوه انت متخلف
ادهم: عارف وده مش هيحصل تاني ابدا مش هبعد تاني ابدا.

ادهم شالها وحطها على السرير وغطاها
ادهم: ارتاحي وحاولي تسامحيني غبي بقى تعملي ايه؟ ارتاحي
ليلى: ولو انت مشيت؟
ادهم: مش همشي ابدا ابدا هتفتحي عينيكي هتلاقيني جنبك اوعدك
ليلى اتحسنت تماما وخرجت من المستشفي
وريهام بتجهز لفرح ما حصلش لابنها
ادهم عملها حفله خطوبه في النايتكلب اللي مكنش عاجبها وعرفها انه بتاعه
لبست فستان تحفه وادهم عزم بس الحبايب وكانت حفله خطوبه صغيره جميله
اتحدد معاد الفرح وكل حاجه جهزت.

ريهام جددت الفيلا كلها علشان تستقبل العروسه
اتعمل فرح الكل بيحكي ويتحاكي عليه
ليلى كانت اميره من الاميرات وادهم هيطير من السعاده
حسين واخد ادهم ورايحين لليلي وهما في الطريق حسين وقف على جنب وبص لادهم
ادهم: انت وقفت ليه هنتاخر
حسين: عايز اقولك كلمتين الاول
ادهم: اهم الوصايا العشر على قالهملي انجز
حسين: لا ما اعتقدش ان ابوك قالك اللي انا عايز اقولهولك ابوك تقريبا زيك.

ادهم: انجز يا عم حسين مش عايز اتاخر قول اللي عايز تقوله
حسين: طبعا انت عارف اني بعتبرك زي ابني وعلشان كده هتكلم معاك بحريه شويه
ادهم: من غير مقدمات لو سمحت وبعدين انت من يومك بتكلمتي بحريه ما تعش بقى انجز
حسين: ليلى انت عارف ان انت اول حد في حياتها وهيا من وسط مختلف
قاطعه: عارف وهخلي بالي منها واكسترا اكسترا وبعدين
حسين: اسمع واسكت الموضوع اصلا محرج بما فيه الكفايه.

ادهم: اتكلم على طول لاني صبري بدا ينفذ
حسين: ليلى غير البنات اللي انت عرفتها
ادهم: يا صبر ايوب عارف
حسين: ممكن تسكت لتلات دقايق؟
ادهم: ماهو انت بقالك ربع ساعه بتلف وتدور حسين: اوك ليلى هتبقي ابيض النهارده ما تتوقعش منها اي حاجه
هيا مختلفه عن البنات اللي انت كنت معاهم قبل كده
ادهم: انت بتقول الكلام ده ليه انا عارف ان ليلى مختلفه.

حسين: علشان ما تتصدمش لما تبني امال لليله طويله هتقضيها كلها حب وشوق وتتفاجئ بواحده واقفه قدامك مش عارفه تعمل ايه؟
ادهم: انا مش متوقع من ليلى حاجه ده اولا وبعدين انا مش جاهل قوي كده واعرف اميز بين البنات وعارف ان ليلى انا اول واحد في حياتها
حسين: عارف انها بنت وانها هتكون خايفه ومرعوبه منك
ادهم: خايفه ومرعوبه؟ ليه ان شاءالله؟

حسين: لان مجتمعنا هنا في حاجات كتيره بيعتبرها غلط فبالتالي البنت بتتجوز وهيا معندهاش اي فكره عن الحياه الزوجيه وعن متطلبات الراجل واعتقد ان ليلى من النوعيه دي اول ما هتكونوا لوحدكم هتلاقي قدامك انسانه مرعوبه منك وهتتصورك قدامها وحش هتغتصبها فاهم؟ في رجاله فعلا بتكمل الصوره وبيعتبر ان له وظيفه لازم يقضيها ولازم يثبت رجولته وفي رجاله بتفهم وتتفهم خوف البنت وبتتعامل معاه بحكمه وبيكسبوا مراتاتهم العمر كله.

ادهم: وانت بتصنفني من اي نوع؟
حسين: انت في المجمل من النوع العاقل واللي مش محتاج يثبت رجولته لحد ومابتهتمش بعادات وتقاليد وبتحب ليلى
ادهم: طيب ده شيئ كويس
حسين: بس من ناحيه تانيه انت متربي بره وليك علاقات كتيره قبل كده وبالتالي متوقع من مراتك انها المفروض تبقي اراجوز علشان تتغلب على كل اللي انت عرفتهم قبل كده وده مش موجود في مراتك فخايف انك تتصدم.

ادهم: شوف يا عم حسين انا مقدر خوفك وقلقك عليا وانت عارف كويس اني بعتبرك زي ابويا ومتشكر جدا لنصايحك دي بس ماتخافش عليا انا عارف ليلى كويس
وعارف هيا متوقعه مني ايه وماتخافش انا مش متوقع منها اي حاجه
ليلى يوم خطوبتنا باستني في خدي فانا عارف هيا مدي خبرتها ايه؟ وما تقلقش عليا انا عارف انها كتاب ابيض ولسه هيتكتب عليه ونوعا ما الموضوع ده عاجبني ان انا اكتب اللي انا عايزه منها بالطريقه اللي انا عايزها.

وبعدين مع اختلاف الثقافات ديما الراجل بيحب اللي يتجوزها تكون ابيض وهو يعلمها فماتخافش عليا ممكن بقى ابوس ايدك توديني عندها
حسين: دقيقتين وهنبقي هناك ومبروك لاحلي عريس في الدنيا.

ادهم اول ما شاف ليلى اتلجم ومعرفش ينطق او يتحرك او يتكلم لحد ما ابوه زقه وقاله يروحلها.

ادهم: انتي عامله كده ليه؟؟
ليلى بخوف: مش عجباك وحشه؟ انا قلتلهم شكلي غريب محدش
قاطعها ادهم: انت اجمل واحده شفتها في حياتي
ليلى ابتسمت واتكسفت
ادهم: لفيت تقريبا العالم شرق وغرب بس عمري ما شفت اجمل منك
ليلى: بجد شايفني جميله؟
ادهم: انتي بجد بتسالي؟ مش شايفاني متنح ازاي؟ مش باين عليا؟
ليلى ضحكت وبصت للارض وهو باسها في راسها ومد ايده ليها والمره دي شبكت ايديها في ايده
ادهم: هتسيبيها تاني؟
ليلى: عمري.

ابتسموا الاتنين لبعض ويدوب بصوا لقدام وهيتحركوا على خطف صوره ليهم بسرعه
ادهم: طيب قول انك هتصور
علي: لا كنت عايز الابتسامه الصافيه مش مصطنعه
قرب لابنه وبصله ودمعه في عينه
ادهم: اوعي تقلبها دراما
على حضن ابنه جامد
علي: مبروك يا اجمل حاجه حصلت في حياتي انت اللي صبرتني في الدنيا دي وعطيتني امل وسبب اعيش علشانه
والنهارده اسعد يوم في عمري كله انك انت وحبيبتك اتجمعتوا اخيرا.

اوعي يا ادهم تفرط فيها او تسيبها تضيع منك فاهم يا حبيبي؟
ادهم: فاهم يا اجمل اب في الدنيا دي كلها
وبعدين ( قرب لودنه وهمسله) كان لازم حد فين يطول حبيبته ولا ايه؟
ضحكوا الاتنين
علي: طيب الحمدلله انه انت ( بص لليلي) مبروك يا اجمل عروسه في الدنيا
خلي بالك من ادهم وافضلي حبيه ديما
ليلى: الله يبارك فيكي يا عمي وادهم جوه قلبي
ريهام سلمت عليهم وباركتلهم.

طول الفرح بيرقصوا مع بعض
ادهم طلع على الاستيج وبدا يحكي
ادهم: كله يسيب اللي في ايده ويركز معايا
( قالها زي احمد حلمي في اغنيته فكتير ضحكوا)
لا مش هقلد احمد حلمي
المهم انا عايز اقول حاجه بسيطه لليلي
ليلى انتي اجمل حاجه حصلت في حياتي
اول يوم شفتك فيه عرفت انك هتغيري حياتي كلها وفعلا شقلبتي كياني كله
واللي كان قريب مننا هيعرف انها بهدلتني كتير جدا وان حبها كان صعب قوي
طبعا اكتر واحد شاهد هو عمي حسين.

انا مديونلك يا عمي حسين بالنهارده
متشكر قوي على وقفتك معايا وعلي وقفتك ضدي لما كنت بطلع عن الطريق الصح
في ناس كتيره وقفوا جنبنا لحد ما وصلنا للنهارده وفي برضه وقفوا ضدنا وبرضه بشكرهم لان كل مشكله سببوهالنا كانوا بدون قصد بيقوا علاقتنا ببعض
كل مشكله قابلتنا خرجنا منها انا وليلي اقوي من الاول وحبنا اقوي
ليلى انا بحبك وبعشقك وعايزه على طول جنبي وفي حضني وما تبعديش عني ابدا.

ويالا كله يقوم ويهيص النهارده عايز الكل فرحان
كله يهيص
الكل فعلا هاج وهيص والموسيقى اشتغلت وادهم غني اغنيه جرالي ايه لعمرو دياب
وكان بيتنطط طول الاغنيه.

ليلى غنت لادهم اغنيه بطمنك لشرين
وهو غني اغنيه برتاح لرامي صبري
ورقصوا هما الاتنين على الاغنيه دي.

وهما بيرقصوا مع بعض ادهم حاول يبوسها بس هيا بعدت
ادهم: ايه ده بقى؟
ليلى: ممكن لما نبقي لوحدنا؟
ادهم: وليه بقى ان شاءالله؟
ليلى: اول بوسه ليا في حياتي من حبيبي هفتكرها عمري كله وعايزاها مميزه
ادهم: وايه بقى اللي مش هيخليها هنا مميزه؟
ليلى: مش قدام الناس كده؟ مش قدام بابا وخالد وجيراني! عايزه اكون انا وانت لوحدنا مش عايزه اكون بفكر في اي شيئ تاني عايزه انا وانت وبس.

مش عايزه اكون مكسوفه من حد او خايفه من حد
لكن دلوقتي هبقي مكسوفه وخايفه ومتوتره ومش هيكون ليها معني كبير بالنسبالي
ادهم: خلصتي الخطبه الطويله قوي دي؟ حفظتيها ازاي دي؟
ليلى ضربته على صدره
ليلى: اخص عليك مش خطبه ده احساس جوايا
ادهم: خلاص يا عم ما تزوقش اللي صبرني الشهور اللي فاتت دي كلها يصبرني الكام ساعه دول بس الباقي كله متاح اتفقنا؟
ليلى: اتفقنا
ادهم بيرقص معاها وباسها جنب شفايفها برقه
ليلى: انت وعدتني.

ادهم: اولا انا ما وعدتش ثانيا انا ما لمستش شفايفك مش اتفقنا ان الباقي متاح ولا بتنسي
شالها وفضل يرقص معاها وهو رافعها عن الارض
ادهم لبسها خاتم الجواز.

الليله كانت الف ليله وليله
محمد شايف وفاء قرب منها
محمد: عقبالنا
وفاء: ايه؟ بتقول ايه؟
محمد: بقولك عقبالنا ولا ايه؟
وفاء: لا مفيش ولا ايه عقبالنا
ابتسمت ومسك ايديها قدام الكل ونظره طويله لامها بيوعدها فيها انها جوه عنيه
ليلى بترقص مع ادهم
ادهم: انتي بتبصي على ايه؟ مش مسموحلك تبصي على حاجه غيري فاهمه؟
ليلى: حاضر بس بص انت كمان هناك
ادهم بص: ابص على ايه بالظبط؟
ليلى: محمد ووفاء.

ادهم: اخيرا اخوكي اتحرك ده زهق البت
ليلى: اخويا ما اتكلمش الا لما بقى مستعد يمسك ايدها في النور وقدام الكل ولا كدب ولا لف ودوران
ادهم: انتي بتلمحي لايه سيادتك؟
ليلى: لا ولا بلمح ولا بتنيل
ادهم: ايوه اتعدلي بقى بدال ما اعدلك انا ظروفي كانت مختلفه تماما عن اخوكي ووضعي مختلف
فلو سمحتي ما تقارنينيش بحد
ليحست انه هيضايق راحت لفت ايديها حوالين رقبته.

ليلى: عمري ابدا ما اقارنك بحد ابدا انا بحبك انت زي ما انت كده فاهم بعشقك وبموت فيك
ادهم: طيب مش كفايه بقى نروح
ليلى: عايز تروح يالا
فعلا ادهم وليلي روحو وطبها اللي زفهم كان عم حسين اللي كان فرحان جدا
ادهم: ايه يا عم حسين ساكت مش عوايدك؟
حسين: الفرحه ملجماني مبروك ليكم انتو الاتنين
ياه اخيرا اتجوزتو اخيرا
ادهم: يعني لما انت تقول اخيرا كده انا اعمل ايه؟ اخرج من هدومي؟
حسين: لا خليك جوه هدومك لحد ما تروح.

ادهم ضحك هو وحسين وليلي اتكسفت جدا
وصلوا البيت وادهم طرد الكل ورفض اي حد يدخل جوه عتبه الباب حتى
قفل الباب ودخل لحبيبته
ادهم: ايه باصه للارض كده ليه تعالي
ليلى: ادهم انا
ادهم: ايوه انتي
هو بيقرب وهيا بترجع لورا
ادهم: السلم وراكي هتوقعي
ليلى: مش هقع وانت موجود
يدوب نطقتها وكانت هتقع فمسكها هو وشدها عليه
ليلى: مش قلتلك مش هقع وانت موجود
ادهم ابتسم: هو انا قلتلك قبل كده قد ايه بحبك
ليلى: قول تاني.

ادهم قال بطريقه مختلفه عن الكلام
ادهم: تعرفي عمري ما تخيلت ابدا ان ممكن تكون مجرد بوسه ممتعه كده
كويس انك منعتيني ابوسك قبل كده لاني لو كنت بوستك مكنتش هكتفي بيها
قالها وشالها وطلع بيها لفوق واول ما فتح اوضه النوم ليلى صوتت
ليلى: ايه ده؟ مجنون؟ كل ده ليا؟
ادهم: فكرت افرشلك الارض ورد بس فكره تقليديه فقلت ايه اكتر حاجه بتحبيها اكتر مني
ليلى: مجنون تقوم تفرش الارض شوكولاته.

ادهم فرش الارض بقلوب من الشوكلاته كل الانواع اللي ليلى بتحبها
ادهم: مش بتحبيها
ليلى: انا بعشقك انت يا مجنون
يعني ماتزعلش مني بقى لو سيبتك وفضلت افتح في الشوكلاته دي كلها
ادهم: نعم يا اختي
ليلى: هههههه حد قالك تفرش الارض والسرير شوكولاته
ادهم: تصدقي انا غلطان
دخل ادهم ويدوب هينفض كل الشوكلاته عن السرير
ليلى صرخت: استني ( بصلها) عايزه اتصور الاول معاهم
ادهم: انا كنت عارف انها ليله مش معديه.

ليلى قعدت على السرير: صورني بقى مع الشوكولاته دي كلها
ادهم: يا صبر ايوب
طلع موبيله وهيا بتتضحك وصورها وسط الشوكولاته
اصرت تبعت الصور لاخوها خالد
خالد مع اخواته ووراهم الصور واتفاجؤا بيها بتكلمهم
ماجده: يا بت يا بارده روحي لجوزك
ليلى: شوفتي يا ماجده فرشلي الارض شوكولاته
ماجده: طيب روحيله بقى
ليلى: انا بحبه قوي
ماجده: ولما انتي بتحبيه روحيله بقى
قفلت ليلى وبصت لجوزها اللي مستنيها
ادهم: نفسك في ايه تاني؟ شاوري.

ليلى: فيك انت بقى
سكتت شهرزاد عن الكلام المباح.

الصبح ريهام وعلي جم الفيلا هما والشغالين وحاولو بقدر الامكان ما يزعجوش العروسين
علي: ريهام جهزيلهم فطار بقى وطلعيه عندهم وسيبيهم براحتهم اوك انا رايح مشوار كده
ريهام: روح انت وما تقلقش
على مشي وريهام دخلت المطبخ مع خدامتها المقربه كريمه
كريمة: هنعملهم فطار يا هانم ولا ايه؟ اهي جت اهي وهتبقي الكل في الكل
ريهام: اخرسي معدش غير بتاعت الشوارع دي اللي تبقي الكل في الكل
كريمة: هتعملي ايه يا هانم؟

ريهام: خليها بس الاول تدلع ابني شهر العسل وبعدها لو ادهم ما رماهاش هخليها تقول حقي برقبتي هعلمها ازاي تبص لاسيادها
خليه بس يعيشله يومين واهي بنت يتمتع بيها شويه جهزيلهم الفطار وطلعيه.

ادهم صحي على الباب بيخبط فتح عنيه كانت ليلى نايمه في حضنه جميله رقيقة ناعمه
صحيت هيا كمان على الخبط فتحت عنيه لقته بيبصلها
ليلى: صباح الخير
ادهم: صباح الحب والجمال والرقه
ليلى بكسوف: الباب بيخبط
ادهم: ما يخبط
ليلى: قوم افتح
ادهم: مش عايز اقوم
ليلى: قوم بقى ممكن يكون حد جايبلنا اكل
ادهم: انتي جعانه؟
ليلى: لا مش جعانه انا ميته بس
ادهم ضحك: لا يبقي كده اقوم
قام ولقاه الفطار
ادهم: تسلمي يا كريمه حطيه وروحي.

كريمة: حاض يالهووي الاوضه اتبهدلت بالشوكولاته
ادهم: وانتي مالك يا وليه انتي حطي الاكل وروحي
كريمة: بس دي كل حاجه اتوسخت شوكولاته
ليلى غطت وشها من كسوفها
كريمة: السجادة الارض المرايه مفرش السرير الجديد يا لهووي
ادهم: خلصتي لطم ولا لسه عندك باقي؟
لو خلصتي اطلعي بره علشان لسه في شوكولاته ما اتفتحتش واماكن عايز ابهدلها ده لو مش عندك مانع يعني؟
كريمه: بس يا بيه
ادهم بصوت عالي: بره يا كريمه بره يالا.

ادهم خرجها وقفل الباب
ادهم: ايه الوليه دي؟
ليلى كشفت وشها وهيا ميته من الضحك
ليلى: هيا عندها حق الاوضه باظت
ادهم: بس غريبه ما اديتينش درس في التوفير والفلوس والمحافظه
ليلى: عايز الحق؟ الاوضه مش عجباني كئيبه
ادهم: اممم بقى كده هقول لحماتك
ليلى: لا يا ادهم اخص عليك
ادهم: هههههههه مش هقولها بس تدفعي كام؟
ادهم بيتكلم وبيقرب وهيا بتتغطي
ليلى: انت عايز ايه؟
ادهم: عايز كل خير
ونسيبهم يبدؤا حياتهم مع بعض.

الصراحه ديما جميله مهما كانت صعبه
والكدب عواقبه مش حلوه ابدا
ادهم وليلي تخطوا الصعوبات لحد ما اتجوزا بس هل الحياه هتفضل وردي ليهم؟

رواية حبيبي المجهول للكاتبة الشيماء محمد الفصل الثامن عشر

ادهم اخد ليلى وسافر بيها وقضوا احلي شهر عسل في الدنيا
سافر بيها بره مصر فسحها في كل مكان سبق وراحه وعجبه وحب يشوفه بعيون حبيبته
ليلى كانت مبهوره بكل حاجه بتشوفها وحست ان الحياه اجمل من انها تكون حقيقه
عايشه زي اجمل حلم ممكن تتخيله
فسح لعب حب رومانسية ضحك كل شيئ ممكن اي واحده تتمناه
ادهم كمان عرف معني الحب الحقيقي ايه
وداق طعم الحلال ولقاه احلي بكتير من الف متعه رخيصه او سهره مع كاس.

اتعلم مع ليلى حاجات جميله وزي ما هيا بتتعلم اداب واتيكيت التعامل مع الطبقه دي بتعلمه هو كمان اخلاق وقيم هو مفتقدها
الاتنين بيكملوا بعض
وطبعا الحياه ما بتفضلش وردي على طول
وكل حلم لازم نصحي منه مهما يطول
رجع ادهم وليلي لمصر وطبعا مع اصرار ابوه وامه اضطرا ادهم يوافق انه يستقر معاهم وليلي وافقت انها تفضل معاهم ومكنتش عارفه ايه مستنيها.

ادهم بينزل شغله خفيف وباقي الوقت مع مراته سواء في البيت او بياخدها ويخرج
اول مره خرجوا فيها راحو النايتكلب بتاعه
واول ما وصلوا ونزلت ليلى من العربيه وقفت
ادهم: وقفتي ليه المره دي؟ خايفه من ايه؟
ليلى: مش خايفه بس ليا ذكريات مش حلوه هنا
ادهم شدها من ايدها: تعالي نعمل ذكريات جديده حلوه
ضمها ودخل بيها واول ما دخل كل الشغالين جم وباركوله
اخدها وقعد وسط دهشتها في نفس المكان اللي قعدوا فيه.

ادهم: مالك بتبصيلي كده ليه؟
ليلى: الكل عارفك هنا ليه؟ والمره اللي فاتت محدش اتكلم
دخل جرسون
الجرسون: تامرني بايه يا افندم؟
ادهم: سيبنا دلوقتي ولا اقولك هات عصير مانجه فريش
سابهم الجرسون
ادهم: مش دي اكتر حاجه بتحبيها
ليلى: ،
ادهم: مالك في ايه؟ عايزه تتخانقي؟
ليلى: مش حكايه عايزه اتخانق انا سالتك سؤال ومستنيه اجابتك
ادهم: سوري ايه هو السؤال بقى؟
ليلى: ليه المره اللي فاتت اتصرفوا كده؟ لما الكل هنا عارفك.

انت مخبي ايه عليا؟ كنت بتجيب صحباتك هنا؟ وكل مره ببنت شكل صح؟
ادهم: خلصتي افتراضات ولا لسه؟ اولا لأ مجبتش بنات هنا
ثانيا انا جايبك هنا لاني عايز اوريكي المكان ده لانه مهم بالنسبالي واتضايقت جدا انه معجبكيش فقلت نيجي تاني تشوفيه بطريقه مختلفه
ثالثا هما اتصرفوا كده لاني طلبت منهم ده
ليلى: ليه مهم؟
ادهم: لانه بتاعي وبحبه جدا وبهتم بيه جدا
ليلى: علشان كده قلبتها نكد معايا.

ادهم: انا مقلبتهاش نكد انتي اللي كنتي محبكاها قوي
ليلى: انا محبكاها؟ تاني يا ادهم؟
ادهم: ولا تاني ولا تالت المهم ايه رايك في المكان؟
ليلى: انا مفهمش في الحاجات دي
ادهم: ليلى قولي رايك وبلاش لف ودوران
ليلى: مناسب للوسط بتاعكم
ادهم: تاني الوسط بتاعنا وبتاعكم؟
ليلى: سوري مناسب للطبقه الغنيه كده احسن
ادهم: اسعاره مش غاليه قوي
ليلى: بالنسبالك اه
ادهم: قصدك ايه؟
ليلى: بالنسبالك انت مش غاليه.

انت عندك استعداد تدفع الف او اتنين في غدوه عادي غيرك الالف دي ممكن يحوش فيها كذا شهر علشان عمليه مثلا او يشتري حاجه مهمه في بيته مثلا
هنا مثلا ( مسكت المانيو) اقل حاجه فيها ب 50 جنيه وده تمن كوبايه شاي
ال 50 جنيه دي بالنسبة للناس العاديه تغدي عيله كامله يومين
ادهم: خلصت درس الفروق الاجتماعيه؟ و فرق الطبقات؟
ليلى: لا مخلصتش ده بالنسبه للاسعار.

المكان ظلمه قوي والخصوصية اللي انت بتتكلم عنها دي شيئ مش حلو لان انت عارف كويس انك كل واحد معاه واحده داخلين هنا بيبقوا داخلين لسبب واحد الخصوصيه دي
وانت فاهم كده كويس زي ما انت ما جبتني هنا وكنت عايز تاخد راحتك معايا صح؟
ادهم: انا مكنتش جايبك هنا علشان كده
ليلى: امال جبتني ليه؟ وقفلت الستاره ليه؟
ادهم: وبعدين عايزه توصلي لايه؟ اخره الكلام ده ايه؟
ليلى: انت سالت عن رأيي وانا جاوبتك يبقي ما تزعلش منه.

ادهم: تصدقي اني غلطان اني سألتك
ليلى: وعلي فكره كل اتنين بيدخلو هنا وبيعملوا حاجه غلط سواء مسكه ايد او بوسه او حضن انت بتاخد ذنب عليه
تخيل بقى خصوصيتك دي بتركبك ذنوب قد ايه كل ساعه وكل لحظه!
ادهم: ليه بقى انا مالي؟
ليلى: انت هيأت المكان لكده، سوري يا حبيبي بس انت عامل زي اللي فاتح بيت دعاره ويقول انا مالي
ادهم: انا زي قواد يا ليلى
ليلى: انا اسفه ان
ادهم: لا خلاص اقفلي الكلام لحد هنا
يالا بينا.

ليلى: تاني هنمشي بنفس الطريقة تاني؟؟
ادهم: يالا قومي
قام وقف
ليلى: مش هقوم اسفه لو كلامي ضايقك بس كان لازم اقوله
ادهم: قومي
ليلى: اقعد لو سمحت
ادهم: هتقومي ولا لأ؟
ليلى: لأ اقعد انت
ادهم: خلاص براحتك وقت ما تحبي روحي انتي عارفه عنوان البيت؟
سابها ومشي ومردش عليها وهيا بتحاول تكلمه
ادهم طول اليوم مخنوق ومتضايق منها ومن رأيها في مكانه المفضل
ليلى روحت وحبست نفسها في اوضتها.

ادهم رجع البيت اخر النهار وبغير عوايده ما طلعش لاوضته جري زي كل يوم
كريمه جريت للهانم ريهام اوضتها
كريمة: يا هانم مش قولتلك انهم متخانقين
ريهام: مين قالك؟
كريمه: هيا حابسه نفسها في اوضتها وشكلها معيط والبيه رجع وقاعد تحت ماطلعش عندها زي كل يوم
ريهام: كويس يبقي احنا نبدأ بقى
ههههههههه ايامك بقت معدوده يا بنت الساقيه.

ريهام نزلت وجهزت السفره واتلموا كلهم ياكلوا
ريهام: ادهم حبيبي مش هتنادي على مراتك؟
ادهم: ابعتيلها حد ينادي عليها
علي: مالك؟ انتو متخانقين ولا ايه؟
ادهم: ولا متخانقين ولا متنيلين
ريهام: كريمه كريمه نادي على ليلى
طلعت كريمه لليلي
كريمة: يالا يا هانم السفره جاهزه وكلهم مستنينك
ليلى: لا هستني ادهم
كريمة: سي ادهم بيه تحت معاهم
ليلى: ادهم تحت؟ طيب مطلعش ليه؟
كريمه: معرفش تحبي اسألهولك؟

ليلى: لا انا نازله روحي انتي
ليلى زعلت لان دي اول مره ادهم ما يجليهاش
هو معقول زعلان كده؟ لازم تصالحه بسرعه
نزلت وقعدت مكانها
ليلى: حمدلله على السلامه جيتو امتي؟
ادهم مردش فاضطر على يرد
علي: يدوب واصلين بس واقعين من الجوع وعلشان كده دخلنا على السفره على طول ولا ايه يا ادهم؟
ادهم: اه
ليلى: مالك حبيبي؟
ادهم بصلها: ماليش
اكل معلقتين وساب الاكل وقام
ادهم: كملوا انتو انا مش جعان بعد اذنكم
طلع لفوق.

ريهام: ليلى حبيبتي انتي مزعله ادهم؟
علي: ريهام سيبيهم في حالهم
ليلى: انا مكنش قصدي ازعله هو اخدني المطعم بتاعه وسألني عن رايي وقلتهوله وهو زعل
علي: sun rise ده ادهم بيعتز بيه جدا ايه اعتراضك عليه؟
ليلى: ما اعترضتش على المكان اعترضت على الخصوصية قوي دي
علي: ماهو ده اكتر حاجه بتميزه
ليلى: ودي اكتر حاجه غلط هو بيشوف بطاقات الناس اللي داخله وعايزين الخصوصية دي ولا هيا ذنوب وخلاص بيكسبها.

علي: والله يا بنتي عندك حق انا مبصتلهاش كده خالص بس فعلا وجهه نظر تحترم جدا
على العموم سيبيه يهدي وهو هيسمع كلامك وهيعرف انك بس خايفه عليه اطلعيله بس ما تتكلميش في الموضوع ده
ليلى طلعت لادهم اللي كان بياخد شاور
ريهام: ماعدش غير دي اللي هتعدل عليكم
ما تخلوها تقف على الاستيج وتخطب احسن
علي: هيا بتتكلم صح ايه مشكلتك؟
ريهام: انا؟ انا معنديش مشاكل بعد اذنك
ليلى خبطت على ادهم ومردش عليها.

فتحت الباب وبصتله كان راقد في البانيو ومغمط عنيه
دخلت وقعدت جنبه على الدرجه اللي جنبه
ليلى: حبيبي ما تزعلش مني اسفه لو ضايقتك
ادهم:
ليلى: ميبقاش قلبك اسود بقى
ادهم: خليه اسود علشان يبقي لايق مع القواد
ليلى: انا مقلتش كده انت اللي قلت كده
ادهم: ومعناه ايه لما ابقي فاتح مكان للدعاره؟
ليلى: برضه مقلتش كده
ادهم: امال قلتي ايه؟
ليلى قربت منه ومسكت وشه بايديها وبصتله.

ليلى: قلت اني مش عايزه اغلي انسان عندي يشيل ذنب حد من غير قصد
المكان جميل بس نوره وشيل الستاير دي
خلي اللي يقعد يقعد في النور وبس
اسفه لو خاني التعبير مش قصدي
ادهم: انا لما اخدتك مكنش قصدي اللي قولتيه
اه فكرت اعمل ده بس ما اخدتكيش هناك علشان كده
ليلى: عارفه
ليلى قربت اكتر منه
ليلى: صافيه لبن؟
ادهم: المفروض اقول ايه؟
ليلى بضحك: حليب يا قشطه
ادهم: ماشي حليب يا قشطه
ليلى: في مكان ليا؟
ادهم جاوبها بابتسامه.

وتاني يوم نزلوا الاتنين ايديهم في ايدين بعض
على شافهم وابتسم لانه عارف صلح العشاق بيبقي اجمل ما يكون
ريهام النار ولعت جواها
نزلوا الرجاله على الشغل وليلي وريهام فضلوا مع بعض
ريهام: حبيبتي يا ليلى انت بتعرفي تتطبخي صح ولا ايه؟
ليلى: ايوه طبعا بعرف
ريهام: ينفع اطلب منك طلب وبراحتك لو مش عايزه براحتك طبعا
ليلى: لا يا ست الكل انتي بس تشاوري.

ريهام: تسلمي يا قلبي بس كنت عازمه صحباتي على العشا النهارده وانا كنت وعدتهم باكله محشي معتبره وصراحه كريمه ملهاش فيه بتعمله بس اجارك الله ما يتاكلش اوعي تقوليلها هههههه
ليلى: بس كده من عنيا هعملك اكله محشي يحلفوا بيها
ريهام: تسلميلي يا قمر يعني اتكل عليكي؟
ليلى: طبعا واهو الوقت بدري هلحق ما تقلقيش بعد اذنك ابدا انا بس هيكونوا كام واحده كده؟
ريهام: مش كتير 10 او 15
ليلى: حاضر.

ليلى يالهووي كل دول مش كتير امال لو كتير كانت عزمت كام؟
يالا ابدا بقى خليني اخلص
دخلت ليلى المطبخ ولقت كريمه ومعاها بنتين كمان مريم ونجاه
كريمة: يالا يا مريم اطلعي نضفي الدنيا وجهزيها علشان الناس اللي جايه ونضفي بزمه وانا هساعدك
مريم: حاضر
كريمة: وانتي يا نجاه خدي الواد صبحي واطلعي هاتي الطلبات كلها واوعي تنسي حاجه يالا وما تتاخريش
مشيوا البنتين وفضلت ليلى وكريمه
كريمة: هاه قوليلي هتحتاجي ايه؟

ليلى: حاجه المحشي وخضره وطماطم وبصل وتوابل يعني الحاجات دي
كريمه: حاجه المحشي اهي
( اتفاجئت ليلى بالكميه وان تقريبا كل انواع المحشي هتتعمل)
ليلى: كل ده؟
كريمه: امال انتي فاكره ايه المهم
هنا التوابل وهنا وهنا
عرفتها كريمه مكان كل حاجه وجهزتهالها
كريمة: اسيبك بقى واطلع اشوف اللي ورايا ولو احتجتي حاجه اطلبيها
سابتها كريمه ومشيت لريهام
ريهام: عملتي ايه؟
كريمه: اهي في المطبخ.

ريهام: لوحدها؟ مش عايزه حد يساعدها عايزاها اخر الليل تبقي مهدوده وعلي اخرها
كريمة: دي اخر النهار هتلاقيها خلصت خالص ماتخافيش والبنات وزعتهم
ليلى في المطبخ اتصلت بماجده وحكتلها اللي حصل
ماجده: اجيلك اساعدك؟
ليلى: لا طبعا دي اول مره تتطلب مني حاجه ااقوم اجيب اخواتي يعملوها لا لازم اثبتلها اني اقدر اعمل اي حاجه ادعيلي
بدأت ليلى رحله عذابها واخدت النهار كله في المطبخ تجهز لعزومه ريهام.

ادهم رجع اخر النهار واول ما دخل بعادته بينادي على ليلى
ريهام سمعته ونزلت بسرعه وليلي كمان سمعته وخرجتله
الكل هنا اتفاجئ
ليلى اتفاجئت باصحابه الموجودين
و ادهم اتفاجئ بمنظر ليلى بشعرها المنكوش والمريله وريحه البصل والخضار اللي جايبه اخر الدنيا
كان معاه اتنين من اصحابه او بمعني اصح منافسيه في الشغل وعايز يعرفهم على مراته
و ريهام مبسوطه لان خطتها ماشيه بالظبط زي ماهيا عايزه.

رجل الاعمال كريم: الظاهر ان مرات حضرتك ست بيت شاطره؟
ادهم: الظاهر كده، هناكل النهارده من ايدك؟
ليلى: هتتعشي احلي عشوه في حياتك اصبر
اتفضلوا كلكم
دخل ادهم واصحابه وهما بيبصوا لبعض
وادهم اعتذر منهم وسحب مراته وطلع وهو طالع لمح امه
ادهم: لو سمحتي يا ماما شوفي ضيوفي وقابليهم
ريهام: من عنيا حبيبي، مراتك اصرت تاكلك النهارده من ايديها
ريهام بصت لليلي بصه رجاء وتمثيل طبعا انها ما تقولش لادهم الحقيقه.

ادهم اخد مراته وطلعوا اوضتهم واول ما دخلوا قفل الباب وزقها لجوه بعنف
ليلى: في ايه مالك؟
ادهم: انتي اللي في ايه؟
ليلى: مالي في ايه؟ مش فاهمه
ادهم: مش فاهمه؟ انتي مرات اكبر رجل اعمل في الشرق الاوسط كله وده منظرك
ليلى: ماله منظري؟
ادهم: مش عارفه ماله
ادهم شدها ووقفها قدام المرايه
ادهم: اتفرجي شوفي ماله شعرك لبسك المريله دي ولا ريحتك ايه ده؟
ليلى زقته بعيد.

ليلى: انا مش فاهمه انت متضايق ليه؟ حبيت اعمل لجوزي اكل ارتكبت جريمه؟
ادهم: محدش طلب منك تعملي اكل وانا بطبيعتي ماليش في الاكل على قد كده
وبعدين في شغالين في البيت ممكن تقوليلهم يعملوا اللي انتي عايزاه
ليلى: انا عايزه اعمل بايدي
ادهم: ولا تعملي بايدك ولا برجلك اتفضلي غيري القرف اللي انتي لبساه ده اتحركي واستحمي علشان ريحتك دي اتفضلي
ليلى: كل ده ليه علشان اصحابك انت جايبهم يتفرجوا عليا؟

ادهم: يتفرجوا؟ مش هرد عليكي لاني لو رديت هتزعلي اتفضلي عشر دقايق وتنزلي
سابها ونزل وهيا عيطت لوحدها
وفكرت انها ما تنزلش وتفضل كده
الباب خبط ودخلت ريهام
ريهام: اسفه اسفه حقك عليا انا
ليلى: لا وحضرتك ذنبك ايه؟
ريهام: انا قلتلك تعملي اكل واسفه اني خليتك تخبي عنه بس هو لو عرف اني طلبت منك هيعملهازعله كبيره وهيقول ان انا قصدي ايه وايه لكن كده انتي مجرد زوجه وعايزه تاكل جوزها من ايديها
ليلى: بس هو زعل قوي.

ريهام: علشان بس اصحابه قومي شاور كده والبسي وانزلي واول ما يدوق الاكل هيجي يبوس ايديكي قومي يا حبيبتي
ليلى سمعت كلامها لبست واتشيكت ونزلت وقامت بدور المضيفه وعدت اول حفله بامان
الكل اتعشي وشكر جدا في الاكل
اما ادهم فكان عادي مش فارق معاه ابدا
على شكر ليلى جدا على الاكل
كريم ونادر اصحاب ادهم شكروا ليلى بصفة شخصيه بس ادهم طول الوقت متضايق ومخنوق
ريهام بتتبع اسلوب تضرب وتلاقي.

الساعه وصلت يدوب 10 وليلي قاعده متوهه وبتتاوب كل شويه
علي: ادهم اسحب مراتك كده بلطافه وطلعها لاحسن دي هتنام على نفسها وشكلها هيبقي وحش قوي
ادهم وصل لقمه غضبه بس قام بكل هدوء واعتذر واخد مراته وطلعها اوضتها
ليلى: عملت ايه المره دي؟
ادهم: بجد بتسالي؟ مش هرد عليكي
اتفضلي نامي واشبعي نوم
سابها ونزل وهيا فضلت تعيط لحد ما الحفله خلصت وهو طلع لقاها قاعده وبتعيط بس هو كان جايب اخره.

بصلها ودخل الحمام غير هدومه وطلع سريره
ليلى: ادهم انا
ادهم: انا تعبان وعايز انام
عطاها ظهره وطفي النور وسابها مع دموعها
تاني يوم ادهم قضاه في شغله وريهام اخدت ليلى طول النهار تلف بيها على الاسواق بحجه انها تشتريلها لبس وطبعا خلت ليلى طول الوقت تمشي وراها تشيل شنطها وخلتها مهدوده تماما
اخر النهار روحو.

ريهام: اطلعي يا حبيبتي قيسي الحاجة اللي اشتريناها ونقي فستان حلو كده البسيه لجوزك زمانه جاي يالا قومي وصالحيه بقى.

ليلى طلعت فعلا لبست وبقت قمر بس قمر بينام
ليله امبارح قضتها عياط واليوم اللي قبله كان كله شغل واليوم ده كانت على رجليها النهار كله
ادهم وصل واتعشوا كلهم وقعدوا مع بعض
ريهام: ينفع يا ليلى تعمليلنا قهوه ده طبعا بعد اذن ادهم
ادهم: اذني انا! ليه اذني هيا دي محتاجه اذن طبعا يا ست الكل تعملك، ممكن يا ليلى؟
ليلى: طبعا
دخلت ليلى تعملهم قهوه وكوبايتها حطت فيها قهوه كتير علشان تعرف تصحي.

ريهام بره: مراتك تنفع ست بيت ايه ميه ميه
ادهم: وانا مش عايزها ست بيت ما تدخليهاش المطبخ
ريهام: واحده عايزه تعمل لجوزها اكل اضربها؟
ادهم: لا متضربيهاش
ريهام: ايه رايك في فستانها اخدتها النهارده وجيبتهولها هو وشويه حاجات
ادهم: اه حلو تسلمي يا ست الكل
بقولك يا ماما
ريهام: قول يا قلبي
ادهم: حاولي تعلمي ليلى اذاي تتصرف وازاي تتكلم يعني خليها تتعلم منك.

ريهام ؛ من عنيا حبيبي بس انت متخيل ان بنت زيها ممكن تبقي زيي
ادهم: لا طبعا عمرها ما هتبقي زيك بس معلش حاولي
ريهام: هحاول بس هيا توافق النهارده بالعافيه اخدتها معايا
ليلى طلعت بالقهوه وشربوها وهيا حاولت تفوق بس للاسف النوم غلبها
علي: ادهم مراتك شيلها والنبي وطلعها
ادهم متغاظ جدا منها بس اضطر علشان ابوه يشيلها وطلعها فوق وحطها على السرير وكل ده وهيا مصحيتش
حاول يصحيها بس للاسف هيا مقدرتش تصحي.

الصبح ادهم نزل قبل ما هيا تصحي
ليلى صحيت ونزلت لقت ريهام في الجنينه طلعتلها كانت عامله نفسها بتزرع ورد
ليلى: اساعدك؟
ريهام: تعالي
شرحتلها ريهام بتعمل ايه وخلتها تقعد تزرع وطبعا هيا بتقعد مرتاحه وتشغل ليلى
ادهم رجع كانت ليلى طلعت بس ملحقتش تغير
اول ما شافها هدومها طينه وحتي وشها فيه طينه يدوب هتتكلم.

رواية حبيبي المجهول للكاتبة الشيماء محمد الفصل التاسع عشر

ادهم رجع كانت ليلى طلعت بس ملحقتش تغير
اول ما شافها هدومها طينه وحتي وشها فيه طينه يدوب هتتكلم
ادهم: مش عايز اسمع
سابها ودخل غير هدومه وخرج يسهر بره
هيا عرفت من على ان عنده عشا بره شغل
كل يوم ريهام بتخترع شغله شكل لليلي بحيث تشغلها بيها طول النهار وادهم يرجع اخر النهار يلاقي مراته مش مستعده نهائي لاستقبال جوزها.

لابقي عارف يتكلم معاها ولا يقعد معاها ولا حتى ياخد حقوقه الشرعيه منها لانها بتنام بدري جدا
وبدا يسال نفسه هو اتجوزها ليه؟
يوم ورى يوم المسافه بتبعد بين ادهم وليلي
ليلى ساكته ومش عارفه تقول لادهم ان امه بتشغلها طول النهار
وادهم بدا يندم على قراره وتحديه لامه وجده.

على مع ادهم في الشغل
علي: مالك يا ادهم في ايه؟
ادهم: في ايه مالي!؟
علي: انت وليلي مالكم؟
ادهم: انا وليلي ملناش مالك انت؟
علي: حاسس ان في حاجه مش مظبوطه
مفيش الحب والشعله اللي بينكم وانت بتهمل مراتك جامد
ادهم: انا بهملها؟ هههههههه بجد؟
علي: ايه اللي يضحك؟
ادهم: كلامك قال انا بهملها قال! هو انا لاقيها اصلا
انا مش عارف اصلا انا اتجوزتها ليه
علي: علشان بتحبها وبتعشقها كمان، اوعي تنسي ده.

ادهم: وهو فين الحب ده؟ ليلى زرعت نفسها في شغل البيت ومهما اقولها مفيش فايده
علي: اصبر عليها النقله كبيره برضه يا ادهم
وبعدين انت بتحاول تخليها تنسي عمرها كله وده مش سهل هتاخد وقت لحد ما تتطبع زينا وتتعلم، انت حاول معاها تخرجها تاكلوا بره تعلمها يا اخي انجليزي خليها تاخد كورسات بحيث تسافر معاك وتشاركك اهتماماتك.

ادهم: وانت متخيل ان انا ما بحاولش اعمل كده؟
قلتلها على الكورسات وطنشت وحجزتلها كمان واعتذرت مره ورى مره
مش عارف اصلا اعمل معاها ايه؟
علي: اصبر عليها
ادهم: اديني صابر انت شوفتني عملت ايه يعني؟
ادهم روح بدري واخد ليلى يتغدوا بره
اتصل بيها وقالها تجهز بسرعه قدامه دقايق ويوصلها تنزله
ليلى كالعاده في المطبخ طلعت تجري وريهام عطلتها شويه
ليلى غيرت هدومها بس ملحقتش تاخد شاور.

حطت برفان ونزلت لادهم بسرعه اللي كان بدا يضايق من تاخيرها
اول ما ركبت معاه
ادهم: متصل بيكي من بدري علشان تجهزي بتعملي ايه كل ده؟
ليلى: اسفه معلش
ادهم: ما علينا المهم عاملك مفاجاه وحبيت انك اول واحده تشوفيها
ليلى: بجد مفاجأة ايه؟
ادهم: هتبقي مفاجأة ازاي لو قلتهالك
اخدها على مطعمه sun rise وقبل ما يدخلوا غمي عنيها
ليلى: تاني المكان ده؟
ادهم: اصبري عليا.

مسك ايديها ودخلها وبعد ما دخلو شال الغمامه من على عنيها واتفاجئت ليلى باللي شافته
المكان اختلف تماما
النور في كل مكان والديكور اتغير وموضوع الخصوصيه اتشال تماما
ليلى فرحت جدا وادهم فرح بفرحها ده
اتغدوا مع بعض وفضلوا يدردشوا واكتشف ادهم انها وحشاه جدا دي ليلى حبيبته اللي حبها واتجوزها مسك ايديها بحب
ادهم: تعالي معايا
ليلى: فين؟
ادهم: هتشوفي.

اخدها ادهم لمكان معزول جوه المطعم زي اوضه ديكورها رائع معزوله ومفتوحه على النيل والمنظر منها تحفه
ليلى عجبتها الاوضه جدا
ادهم: الحمدلله انها عجبتك بس قبل تسمعيني درس الخصوصية انا قلت للعمال هنا ان اي حد يحجز حاجه من دول لازم يكونوا متجوزين غير مسموح لاي حد تاني
ضحكت ليلى: انا بحبك قوي
ادهم قرب منها ومد ايده: تسمحيلي بالرقصه دي؟
ليلى: طبعا
ادهم شدها لحضنه جامد وبدؤا يرقصوا مع بعض.

ادهم اول ما ضمها جامد اتضايق جدا وبدا يتخنق وبعد شويه ما قدرش يسكت فبعد عن ليلى وبصلها باستغراب
ليلى: ايه مالك؟
ادهم: انتي ريحتك ايه؟
ليلى: ريحتي ايه؟
ادهم: انتي بتساليني انا معرفش ريحتك غريبه انا جايبلك برفانات من باريس ريحتها فوق الرائعه
ليلى: وانا حاطه منها
ادهم: ريحتك غريبه
ليلى: اوكي يا ادهم كنت في المطبخ لما كلمتني واتعطلت واتاخرت عليك وملحقتش اخد شاور فغيرت هدومي بسرعه ونزلت
ادهم: وبعدين؟

ليلى: وبعدين ايه؟
ادهم: لحد امتي؟
ليلى: لحد امتي ايه؟
ادهم: هتفضلي في المطبخ؟ ريحتك على طول بصل انا مش عايز طباخه انا عايز زوجه يا ليلى عايز حبيبه عايز واحده افضفض معاها لما ابقي مخنوق عايز واحده ارمي نفسي في حضنها وانا تعبان مش عايز طباخه عندي بدل الواحده 4 ولو عايز تاني هجيب لامتي بقى انا زهقت وتعبت.

ليلى: مش بايدي
ادهم: نعم ياختي امال بايد مين؟ هاه؟ حد بيطلب منك تدخلي المطبخ؟
ليلى:
ادهم: ردي عليا (بصوت عالي)
ليلى: مامتك بتتطلب مني اساعدها
ادهم شدها من ايديها وواخدها لبره
ادهم: طيب انا هتصرف معاها
ليلى طول الطريق بتحاول تهدي ادهم او تقنعه ما يتخانقش مع مامته وهو مش بيرد لحد ما وصلو البيت دخل زي المجنون وفضل ينادي على امه وليلي بتعيط جنبه
ريهام: في ايه بتزعق كده ليه؟

ادهم: هو سؤال واحد؟ انتي بتجبري ليلى تدخل المطبخ؟
ريهام: ايه بجبرها؟ بجبرها؟ تصدق بعلقلها المشنقه كل يوم بعد ما تنزل وبمسكلها الكرباج
ادهم: من غير تريقه لو سمحتي
ريهام: علشان طلبت منك مره تساعديني في تجهيز الحفله بقيت بجبرك!
ليلى بصتلها بذهول بقى كل ده مره
ريهام: انتي عايزه توقعي بيني وبين ابني؟
ليلى: لا ابدا والله
ريهام: لا يا ادهم مراتك مش عارفه تقوم بواجبها معاك ما تحطش السبب عليا.

ويا سيدي مش هكلمها خالص ولا لساني يخاطب لسانها ده يعجبك
ليلى: ماما انا مش قصدي
ريهام: ماما ايه وزفت ايه انتي خليتي فيها ماما؟ خلاص يا ستي لو ناديتلك حتى ما ترديش عليا اتفقنا واهو قدام جوزك اهو مبسوط خد مراتك وطلعها اوضتها اشبع بيها
ريهام عيطت وقعدت على الكرسي بتمثل انها مجروحه
ادهم: خلاص يا ست الكل اسف اني عليت صوتي اسف.

ريهام: انت بتتهمني ان انا السبب في بعد مراتك عنك وانها مش عارفه تقوم بدورها كزوجه، اهئ اهئ انا مش عارفه اعمل ايه قولي انت اعمل ايه وانا اعمله
ليلى: انا اسفه مش اقصد ادهم مفهمنيش وما سمعنيش للاخر
ادهم: اطلعي اوضتك لو سمحتي
ليلى: بس يا ادهم
ادهم: اطلعي اوضتك
ليلى طلعت وسابتهم وريهام فضلت تزن في ودان ادهم
ريهام: حاولت اقرب منها واخليها زي بنتي بس معرفتش هيا بتحب شغل البيت اعملها ايه
نادت على كريمه.

ريهام: كريمه انا كام مره اطلع ليلى من المطبخ واقولها تجهز قبل ما جوزها يجي
كريمه: على طول يا بيه وانا كمان اقولها قوليلي عايزه تعملي ايه وانا اعمله بس هيا مترضاش وتقولي عايزه اعمل بنفسي
ادهم: روحي انتي خلاص.

ادهم طلع لمراته
ادهم: لو سمحتي ما تحاوليش توقعي بيني وبين امي
ليلى: انا محاولتش انا
ادهم: امال لما تقوليلي بتجبرك يبقي ايه؟ هيا بتجبرك ولا لأ؟
ليلى: اسمعني
ادهم: بتجبرك ولا لأ؟
ليلى: لأ بس ب
قاطعها: مش عايز اسمع اكتر من كده
سابها ومشي والعلاقه بينهم بقت متوتره
طبعا ريهام مش عارفه تتطلب حاجه من ليلى فلازم تشوف طريقه تانيه.

جهزت لحفله كبيره ويوم الحفله الصبح بعد ما الرجاله مشيوا ليلى اتفاجئت بابوها جاي جريت وسلمت عليه وقعدت معاه يدردشوا
ريهام نزلت: اهلا بعم فتحي
عم فتحي: اهلا يا هانم
ريهام: هاه جاهز نبدأ
ليلى: جاهز لايه بالظبط؟
عم فتحي: الست هانم عايزاني اجهز لعشا النهارده
ليلى اتصدمت: ايه؟ لأ طبعا
ريهام: لأ ليه مش ده شغله ولا ايه؟ لو مش عايز يا عم فتحي براحتك
عم فتحي: لا يا هانم انا اتفقت مع حضرتك
ليلى: بس يا بابا.

عم فتحي: ما بسش
ريهام نادت على كريمه تدخل عم فتحي المطبخ
وليلي دخلت وراه وبدات تفهم ريهام عايزه توصل لايه؟ اخيرا عقلها بدا يستوعب خطتها
بس مفيش في ايدها حاجه تعملها
ليلى: بابا ليه بتقبل؟
عم فتحي: وانا من امتي برفض شغل؟
ليلى: ماشي بس هنا لأ
عم فتحي: وهنا لأ ليه!؟
ليلى: ده بيت جوزي ما ينفعش تيجي تشتغل هنا وانت مش محتاج شغل اصلا انا ممكن
قاطعها ابوها: انتي ممكن ايه؟ تصرفي عليا؟
ليلى: مش قصدي بس.

عم فتحي: ولا بتستعري من ابوكي دلوقتي
ليلى: لا طبعا عمري ابدا
عم فتحي: يبقي تسكتي واطلعي يا ستي انتي بره واعملي هانم
طبعا ليلى رفضت تسيب ابوها لوحده وفضلت النهار كله تساعده ايدها بايده في كل حاجه
اخر النهار طلعت جهزت للحفله وكانت ملكه جمال بس مطفيه
ادهم جه وعجبه شكلها ومبسوط بس هيا من جواها مخنوقه وهو حس بده
وفي وسط الحفله ريهام اعلنت ان العشا جاهز
الكل بيتعشي وصحبات ريهام
الاكل تحفه يا ريري.

كريمه اخدت كورس ولا ايه؟
للازم تقوليلنا السر
كل واحده بكلمه وليلي هتولع وادهم مراقبها وساكت
ريهام: السر في الطباخ الجديد
لازم تعرفينا عليه
ريهام: بس كده من عنيا
ليلى اتوترت فادهم مسك ايدها وهمس: اهدي مالك؟
ليلى: مفيش
ريهام نادت كريمه وقالتلها تنادي الطباخ
وطبعا الطباخ خرج ادهم اول ما اتلفت وشافه اتنفض ووقف وبص لليلي اللي حطت وشها في الارض
ريهام: اعرفكم باللي عمل الاكل ده كله ده عم فتحي ابو ليلى حمي ابني.

الكل استغرب وبيوشوشوا بعض وادهم بص لامه وبص لليلي ولعم فتحي
ادهم: اهلا بعمي اخبارك ايه؟ طيب يا ليلى مش تعرفيني ان ابوكي هنا؟ تسلم ايدك يا عمي الاكل فعلا خرافه بس تعال اتفضل معانا ما ينفعش تعمل كل ده وما تشاركناش اتفضل
علي: اتفضل يا راجل انت غريب ولا ايه؟
قام على بنفسه وقعد عم فتحي جنبه وعالج هو وادهم الموقف وريهام ولعت زياده.

الحفله خلصت والكل مشي وعم فتحي كمان مشي بس قبل ما يمشي ريهام اتعمدت تحاسبه قدامهم وهو مكنش راضي ياخد فلوس بس هيا اصرت وفضل الاربعه
ليلى وادهم وعلي وريهام
ادهم: قصدك ايه باللي عملتيه النهارده؟
ريهام: عملت ايه؟
ادهم: مش هنلف وندور
ريهام: مش فاهمه عملت ايه؟ عم فتحي طباخ واكله رائع وانا طلبت خدماته وحاسبته عليها وقدامكم مش ده شغله؟
ادهم: ومفيش طباخين غيره صح؟

ريهام: عجبني مالك انت بقى؟ متضايق ليه؟ لو متضايق ان حماك طباخ فدي مش مشكلتي
اديله قرشين وقعده بس طول ماهو طباخ انا حره
ليلى جريت على فوق وسابتهم
ريهام: محدش قالك تتجوز واحده ابوها طباخ
انا النهارده جبته بكره كل زمايلك واصحابك ومعارفك يجيبوه وريني هتعمل ايه؟
سابته ريهام وطلعت وادهم هيولع
علي: ما يهمكش منها ومن كلامها اطلع لمراتك حايلها
ادهم: احايلها اقولها ايه؟

علي: ما تقولش خدها في حضنك وبس تعرف ولا ما تعرفش
ادهم طلع لمراته وعمل زي ما ابوه قاله بس من جواه حاسس ان الموضوع هيكبر
تاني يوم راح لابو ليلى البيت وقعد معاه
ادهم: عمي بص انا مش عايزك تفهمني غلط
عم فتحي: عايز ايه يا ادهم؟ وقول على طول
ادهم: انت حاليا مش محتاج تشتغل
عم فتحي: اهم وبعدين لما ما اشتغلش افتح بيتي ازاي؟
ادهم: انا موجود
عم فتحي: تصرف عليا انت؟
ادهم: مش كده مش قصدي انا بس.

عم فتحي: انت ايه؟ لما تيجي بيتي وتقولي ما تشتغلش وانت موجود يبقي ايه؟ لو انا عايز خالد ومحمد موجودين هما اولي يصرفوا عليا بس لأ الحمدلله انا بصحتي وطول ما صحتي موجودة هشتغل انا ربيت عيالي من شغلي ده
انت بقى بتستعر من حماك دي مشكلتك مش مشكلتي وشوف عايز تعمل ايه اعمله؟
ادهم: مش حكايه بستعر حكايه انك حاليا مش محتاج الشغل ده وانا مركزي و
قاطعه: مركزك!؟ خلاص يبقي طلق مراتك وهاتها او خليها تتبري مننا.

ادهم: يا عمي
عم فتحي: انا كلامي خلصته شغلي مش هسيبه اللي يريحك انت اعمله
ادهم مشي وهو هيولع من حماه ومراته
ريهام طلبت من كل اصحابها انهم يطلبوا فتحي وعطيتهم تليفونه
ليلى ماشيه جنب ريهام فتعمدت تسمعها وهيا بتديهم الرقم
ليلى: ده رقم بابا بتديه لمين؟
ريهام: لهيام صحبتي عندها حفله وعجبها طبخه
ليلى: انتي بتعملي كده ليه؟
ريهام: بعمل ايه؟ بخلي ابوكي يسترزق.

ليلى اتنرفزت وعلت صوتها: ابويا مش محتاج يسترزق منك فاهمه؟
من حظها جملتها جت في وقت دخول ادهم
ادهم: صوتك ما يعلاش كده تاني فاهمه؟
ليلى: ادهم مش قصدي ان
ادهم: اتاسفي لامي واطلعي اوضتك
ليلى واقفه مكانها وساكته
ادهم: حالا
ليلى اتاسفت وطلعت جري لاوضتها
ادهم: اسف يا ست الكل لو ضايقتك
امه عيطت: ماهي دي اخرت انك تجيب واحده زيها هنا
ادهم: اسف حقك عليا
ادهم نزل شغله وليلي مش عارفه تعمل ايه؟

حاولت تكلم ابوها بس رفض يسمعها
ريهام بدات تجبر ليلى فعلا انها تشتغل في البيت واتطمنت انها مش هتقول لادهم تاني وادهم كمان مش هيسمعها
بتخليها تنظف وتروق وتتطبخ وتشتغل كل حاجه وادهم يرجع بالليل يلاقيها نايمه زي القتيل
ادهم بدا يتعود على عدم وجود ليلى في حياته واستغرب هو فعلا حبها؟
على قرر انه ياخد اجازه هو وابنه ويسافروا كلهم يغيروا جو في شرم.

وفعلا سافروا كلهم وليلي فرحت جدا لانها اخيرا هتعرف تقرب من جوزها تاني
ادهم كان الموضوع بالنسباله سيان مش فارق كتير
وصلوا الفندق وحطوا شنطهم وطلعوا يتغدوا وهناك في المطعم كلهم اتفاجؤا بدولي موجوده واول ما شافتهم جريت تسلم عليهم
وطبعا قعدت تتغدي معاهم
ليلى قاعده وساكته وعلي شاكك ان مراته اتعمدت تقول لدولي تيجي.

عدي اول يوم الكل كان تعبان ومرهق وتاني يوم ادهم صحي بدري ونزل يتمشي على الشط ليلى حست بيه وقامت لحقته
ليلى: ينفع اتمشي معاك؟
ادهم: تعالي
مشيت جنبه بصمت وكل واحد في ملكوت خاص بيه
فكرت ليلى انها تقول لادهم ان امه بتتعبها النهار كله بس خافت من رد فعله او يحصل زي اخر مره
ادهم ساكت لانه مش لاقي حاجه يتكلم فيها
هو مش فاكر اصلا امتي اخر مره قعد معاها او اتكلم معاها او حتى نام معاها.

ادهم وليلي مع بعض: بقولك
ادهم: قولي عايزه تقولي ايه
ليلى: قول انت الاول
ادهم: كنت هقولك يالا نفطر وانتي؟
ليلى: وانا كمان يالا
لا ادهم كان عايز يقول كده ولا هيا كمان
بس حتى الكلام بينهم بقى صعب جدا
ادهم كان عايز يقولها انه مفتقدها جدا ونفسه يلاقيها تاني
ليلى كانت عايزه تقوله انهم يبعدوا ويعيشوا لوحدهم
وللاسف محدش فيهم اتكلم فطروا في صمت وقعدوا على الشط وشويه ودولي جت
دولي: صباح الخير عاملين ايه؟

ادهم: تمام
دولي فضلت تتكلم وتهزر مع ادهم طول الوقت وادهم كان بيضحك معاها
كانت بتتدلع وهيا بتتكلم وبستعرض اللغات بتاعتها شويه انجليزي وشويه فرنساوي
طلبوا عصير فريش وهما بيشربوا العصير وقع حبه على دولي او هيا اتعمدت وقامت تجيب مناديل اللي كانت جنب ادهم
كل واحد فيهم نايم على شيزلونج على البحر
هيا قامت ووطت فوق ادهم علشان تطول المناديل واتعمدت انها توطي عليه جامد قوي.

وبصتله باغراء رقبتها تقريبا في وشه واتعدلت ورجعت مكانها
في الطبيعي الحركات اللي ذي كده ما بتفرقش نهائي مع ادهم بس حاليا في وضعه في حرمانه من حبيبته استغرب ان مشاعره اتهزت من قرب دولي ريحتها شكلها دلعها كل الحاجات دي مفتقدها من مراته
ادهم: حلو قوي برفانك ده يا دولي
دولي: مرسي قوي لذوقك انت عارفني بحب اكون ديما مميزه
ليلى سمعاهم وحست انها هتعيط لانها فعلا ديما ريحتها طبيخ وبصل او ديتول ومنظفات.

حست انها مهدده من دولي دي
دولي بتتكلم مع ادهم عن حد يعرفوه في باريس
ادهم: معقوله انتي لسه على علاقه بيها؟
دولي: طبعا على طول انا مش بنسي حبايبي ابدا استني اكلمهالك
اتكلمت مع واحده بالفرنسي وعطت ادهم الموبيل وهو كمان فضل يتكلم ويضحك ويهزر خلص وقفل التليفون وهو بيديه لدولي اتعمدت انها تمسك ايده وعنيها في عنيه
ادهم مسك ايدها بدون قصد بس قد ايه كانت ايدها ناعمه وطريه غير ايد مراته الناشفه.

وبعد ما خلص بص لليلي اللي دموعها بتهدد وقالها: دي ماري صحبتنا من ايام الكليه
ليلى: امم كويس
ادهم ملقيش كلام يقوله فكمل مع دولي وشويه وقام وقف
دولي: وقفت ليه؟
ادهم: هنزل الميه عايز اعوم شويه مسافه طويله
دولي: تتضايق لو شاركتك؟
ادهم بص لليلي اللي كانت باصه للارض
ادهم: البحر واسع انتي حره
دولي: ليلى هتيجي؟
ادهم: لا ليلى مش بتعرف تعوم
دولي: ايه ده بجد؟ انتي لازم تتعلمي ادهم بيعشق السباحه، مش تعلمها يا ادهم؟

ادهم افتكر في شهر العسل لما حاول يعلمها بس هيا رفضت وطول الوقت لو عايز ينزلها الميه كان بيشلها
دولي: ااايييه روحت فين؟
ادهم: لا ما رحتش انا نازل سلام حصليني لو قدرتي
جري ادهم ودولي وراه وصوت لعبهم وضحكهم واصل للكل
ليلى بتراقبهم من بعيد ودموعها نزلت في صمت
ريهام جت واول ما شافتها: ادهم فين؟
ليلى: نزل الميه
ريهام: اه ودولي معاه صح؟
ليلى: انتي اللي قولتي لدولي تيجي صح؟

ريهام: اه صح ادهم لازم يفوق ويشوف هو مفتقد ايه سبق وقولتلك انك مجرد لعبه جديده هيفتحها ويشوفها ويتسلي بيها وبعد كده تتركن على الرف
سابتها ومشيت وسط دموعها. وفجأه سمعت صوت وراها
ما تخافيش زي ما كان بيرجع كل مره هيرجع لحضنك تاني
بصت لقته حماها
ليلى: ادهم بيضيع مني
علي: ادهم هيلف ويدور ويرجع وهتقولي على قال بس انتي ما تسمحيش لواحده رخيصه زي دولي تاخده منك اتمسكي بجوزك.

البسي احلي منها انتي اجمل منها مليون مره عامله في نفسك كده ليه؟
نصحها على ومشي بس هيا مكسوره من جواها.

دولي ما بتسيبش ادهم نهائي وهو نوعا ما مستمتع بصحبتها
ليلى واخده جنب تماما وسيباه طول الوقت معاها بيسهروا مع بعض ويناموا لمتاخر ويصحوا يفضلوا برضه مع بعض
علي: وبعدين يا ادهم
ادهم: وبعدين ايه؟
علي: فين مراتك؟
ادهم: معرفش
علي: انت بتعمل كده ليه واوعي تقولي ان دولي عجباك او حبتها
ادهم: لا طبعا دولي لا عمري حبتها ولا عجبتني
علي: امال طول الوقت معاها ليه؟ وبتتغزل في جمالها
ادهم: علشان ليلى
علي: ازاي بقى؟

ادهم: بتغزل في فستان دولي ميكب بتاعها ريحتها يمكن ليلى تغير منها وتحاول تعمل زيها بس للاسف لا حياه لمن تنادي ليلى استسلمت واخدت جنب
علي: طيب ما تاخد مراتك في حضنك وتقولها انت عايز ايه؟
ادهم: عملت الكلام ده وقولت مليون مره وما جبش نتيجه ولو ده برضه مجبش نتيجه يبقي مالوش لازمه نكمل
علي: انت بتقول ايه؟
ادهم: اللي سمعته بابا انت مش عارف حاجه
انا تقريبا ما عشتش مع ليلى غير شهر العسل.

على طول بعيده، ارجع اخر النهار الاقيها متبهدله، يوم اكل! يوم منظفات! يوم طينه!
هو انا متجوز خدامه! وكلمتها وقولتلها حد جابرك؟ واتخانقت مع ماما بس اكدتلي هيا والخدم ان ليلى بتعمل من نفسها اعمل ايه بقى؟ ومن الساعه 9 وتنام زي القتيل.

انا مش فاكر اصلا اخر مره نمت معاها كان امتي؟ شكلها على طول متبهدل!شعرها على طول لماه! عرقان متبهدل! هدومها مبهدله! وكله كوم وريحتها كوم يا اما بصل يا منظفات وانا تعبت اتكلمت مليون مره ومفيش فايده
ومكنتش احب حد يتدخل بينا او اني اتكلم معاك بس انا جبت اخري
اديك اهو عرفت كل حاجه علشان ما تستغربش لو خدت اي خطوه!
علي: برضه يا ادهم اصبر عليها قرب منها حاول تاخدها في حضنك فين حبك ليها؟

خلصت الاجازه ورجعوا مصر ورجعت ريهام تبهدل ليلى اكتر واكتر وليلي بتتدبل اكتر واكتر والحمل بقى تقيل عليها وادهم رماها تماما
ريهام في يوم بدري بعد نزول على وادهم نادت ليلى ولما نزلتلها
ريهام: صاحبتي الانتيم صفيه او صافي عامله عزومه النهارده وعيزاكي تروحي تساعديها
ليلى: ايه؟ انا؟
ريهام: اه انتي ايه؟
ليلى: لأ انا هنا بعمل اه بيت جوزي لكن بيوت الناس لأ
ريهام: انتي بتقوليلي لأ كده؟

ليلى: اسفه بس مش هشتغل في بيوت الناس اسفه
ريهام: بقى كده؟ طيب انا هخليها تتصل بابوكي وهخليه تهده وتتطلب منه فوق طاقته وكل يوم هخلي واحده من صحباتي تكلمه وحياتك انتي خلال شهر هيكون ابوكي خلص خلاص
ليلى: لا حرام هليكي بابا تعب ومش حمل شغل تقيل
ريهام: ماهو اختاري يا انتي يا ابوكي؟
ليلى: هقول لادهم.

ريهام: روحي قوليله! قوليله ماما جابت شغل لبابا وانا مش راضيه وقوليله ان انا عايزه ابعتك مكانه وخليه يجي يتخانق معايا وخليه يضربني كمان يالا خلينا نقاطع بعض
هو مش انتي كنتي السبب ان على طرد ابوه من بيته كملي على باقي العيله وخلي ادهم كمان يطردني من حياته يالا روحي كلميه.

ليلى عيطت وسكتت: ارجوكي
ريهام: خلاص كريمه كريمه ( جت كريمه) اطلبي فتحي وقوليله عنوان صافي خليه يروح
ليلى: لا لا انا هروح بس ادهم هقوله ايه؟
ريهام: انا هكلمه
وفعلا اتصلت بادهم وقالتله ان ليلى هتخرج معاها يعملوا شوبنج
وخرجت ليلى تشتغل في بيوت اصحاب ريهام وترجع بالليل مكسوره مهدوده مش قادره تقول كلمه لجوزها اللي بيبصلها ويسكت
وفي يوم وحسين بيوصلها لبيت واحده من صحبات ريهام.

حسين: انا عايز اعرف انتي بتعملي ايه في بيوت الناس دي؟
ليلى: ما تشغلش بالك يا عم حسين
حسين: انتي بتدبلي وعلاقتك بادهم مش اللي هيا ودولي طول الوقت مع ادهم ايوه هو مغلطش معاها بس على الوضع ده هيغلط ومحدش هيلومه
ليلى: وانا اعمل ايه؟
حسين: خدي جوزك في حضنك وقوليله اللي بيحصل معاكي مخبيه عنه ليه؟ ادهم بيفتكر انك مع مامته مش في بيوت اصحابها الله اعلم بتعملي ايه؟ اوعي تكوني بتعملي حاجه غلط؟

ليلى: لا لا لا ابدا والله لا
حسين: امال بتروحي ليه؟
ليلى: ماهو يا انا يا ابويا
حسين: انتي بتشتغلي في بيوتهم!؟ انتي اتجننتي؟ انت مرات اكبر رجال الأعمال وتشتغلي خدامه في البيوت؟ قولي لادهم وانهي المهزله دي؟
ليلى: وبعد ما ينهيها هيعمل ايه؟
حسين: يعني ايه؟ هتنتهي
ليلى: وعلي حساب مين؟ ادهم هيقاطع امه ومش هيسامحها
حسين: هيا غلط تستاهل امال تستني لحد ما يطلقك؟

ليلى: لو طلقني ارحم عندي مليون مره انه يقاطع امه بسببي على العموم ربنا يعمل الخير ليا وليه اوعدني ما تقولش لادهم اي حاجه اوعدني
وبكده استمرت ليلى في شغلها
ادهم في يوم رجع بدري تعبان جدا من شغله واستغرب ان امه موجودة وليلي لأ
طلع يرتاح وامه بعتت جابت ليلى اللي اول ما عرفت ان ادهم تعبان جريت عليه كان راقد في سريره واول ما شافته جريت عليه وحطت ايدها على وشه
ليلى: انت سخن جدا حاسس بايه حبيبي.

ادهم: انتي على طول ريحتك كده ابعدي عني ابعدي عني خالص ابعدي
ادهم مش طايق ليلى نهائي
ليلى نزلت لريهام
ريهام: عايزه ايه؟
ليلى: ادهم تعبان جدا وسخن جدا هاتيله دكتور بسرعه
فعلا جه الدكتور وكشف عليه وكتبله ادويه
بس يرتاح تماما
ليلى فضلت جنب ادهم وهو نايم عدت ليله طويله وصعبة وهيا طول الليل تعمله كمادات وتديله دواه وادهم بيفوق يشوفها وينام
فاق لحظات: ليلى حبيبتي خليكي معايا ارجعيلي يا ليلى وحشتيني.

قالهم ونام وهيا دموعها نزلت بصمت لانها نفسها ترجعله وتفضل في حضنه
عدت مرحله السخونه وبدا يفوق وطبعا دولي جت وقعدت جنبه
الكل كان جنبه على وريهام وليلي ودولي
ريهام طلبت من ليلى تعمل لادهم اكل وادهم رفض وقال مش عاوز بس ريهام اصرت ان ليلى تعمله شربه خضار وفعلا ليلى نزلت غصب عن ادهم اللي حس انها اول ما ترجع يرمي الاكل في وشها ويقولها انه عايزها هيا تفضل جنبه مش دولي.

ليلى جابت الاكل وجت وادهم رفض ياكل منها وعلشان يضايقها اكل من ايدين دولي
اتحسن ادهم ورجع شغله
علي: ادهم النهارده ما تنساش العشا مع العميل الجديد
ادهم: مش ناسي
علي: عرفت ليلى
ادهم: ليلى ليه؟
علي: الراجل معاه مراته وانت كمان اتصل بيها وقولها
ادهم: ولما تنام واحنا قاعدين؟
علي: اتصل بيها دلوقتي وعرفها تنام لحد بالليل.

ادهم اتصل بليلي وقالها وريهام سمعت وعملت حسابها ان ليلى ما تنامش نهائي لدرجه انها قامت تشتغل بنفسها علشان تشغل ليلى معاها
والليل جه وليلي لبست وجهزت ادهم اول ما جه وشافها ابتسم لانها كانت فعلا جميله
ادهم: يالا بينا طالما جاهزه
ليلى مشيت معاه وقعدت جنبه بصمت
وصلوا واتعشوا مع الناس وقام يرقص معاها واكتشف انها وحشاه جدا وان لسه قلبه بيدق لما يقرب منها او يلمسها
ادهم: وحشتيني
ليلى: وانت كمان واحشاني.

ادهم: ليلى انتي بعيده عني ليه؟ انا عايزك جنبي تشاركيني كل حاجه
ليلى: انا جنبك
ادهم: لا يا ليلى انتي بعيده تماما
ليلى حطت راسها على صدره وسكتت وهو كمان سكت
قعدوا وفضلوا يرغو في الشغل وللاسف ليلى النوم بيهاجمها وهيا مش عارفه تبعده
قامت وغسلت وشها ومكياجها اتبهدل وحاولت تظبطه على قد ما تقدر
اول ما خرجت باين عليها انها تعبانه ومرهقه وادهم خلاص على اخره.

خلاص ليلى مش قادره تفتح عنيها نهائي وباين عليها جدا انها بتتخانق مع النوم
العميل اعتذر من ادهم انهم يكملوا كلامهم وقت تاني علشان مراته تعبانه
ادهم اخد ليلى علشان يروحها حاولت ليلى تعتذر بس ادهم باشاره وقفها
طول الطريق ليلى بتحاول تتكلم وادهم بيسكتها واخيرا وصلوا البيت وطلعوا اوضتهم
واول ما دخلوا وقفلوا الباب ادهم بص لليلي وقالها جمله واحده.

ادهم: اول ما النهار يطلع مش عايزك في البيت فاهمه؟ عايزك بره البيت وبره حياتي؟