رواية نصفي الآخر للكاتبة شاهندة الفصل الثالث والعشرون
دخلت رهف الى حجرة والدتها بلهفة، اقتربت منها وقبلتها في جبهتها برفق قائلة: حمد الله على سلامتك ياماما قالت سهام بضعف: الله يسلمك ياحبيبتى، مكنتش متخيلة انى هشوفك تانى يارهوفة قبلت رهف يدها قائلة: بعد الشر عنك ياماما ثم جلست الى جوارها وهي تمسك يدها قائلة: انا من غيرك أموت ياحبيبتى نظرت اليها سهام قائلة: بعد الشر عنك يارهف، متقوليش كدة ابتسمت رهف وهي تقبل يدها ثم قالت بتردد:.
ماما، فيه ضيف واقف برة، يعنى، عايز يطمن عليكى قالت سهام في حيرة: مين يارهف؟ فتح الباب في تلك اللحظة ليدلف رفعت، تلاقت نظراتهم فتوقف الزمن، غرق كل منهم في عينى الآخر، نقلت رهف النظر بينهم ثم نهضت قائلة: اتفضل ياعمى أفاقوا سويا على صوت رهف فاقترب رفعت من سهام دون ان تفارق عينيه عينيها ووقف الى جوارها قائلا: حمد الله ع السلامة يامدام سهام ظهر الالم في عينى سهام وهي تقول: الله يسلمك ياأستاذ رفعت.
قالت رهف في نفسها: مدام واستاذ، كدة مش تمام خالص، أحسن حاجة أسيبهم لوحدهم لتترجم أفكارها الى فعل قائلة: هسيبكم مع بعض ثوانى أجيب عصير وآجى ثم غادرت الحجرة دون ان تلتفت لنظرات والدتها المعترضة، وما ان خرجت حتى التفت رفعت الى سهام قائلا: انا عارف ان مش وقته، بس مش قادر استنى، ممكن نتكلم شوية بصراحة أومأت برأسها بتوتر ليجلس هو على الكرسى المجاور لسريرها قائلا: وانا في الغيبوبة كنتى بتزورينى صح؟
اومأت برأسها فاستطرد قائلا: وقلتيلى انك بتحبينى، صح؟ اومأت برأسها مجددا وهي تبتلع ريقها بصعوبة لينظر الى عينيها مباشرة قائلا: اومال ليه سبتينى زمان ياسهام واتخليتى عن حبنا؟ قالت سهام في استنكار: انا اللى اتخليت عنك، مستحيل أعمل كدة، انت اللى سبتنى يارفعت وروحت اتجوزت بنت عمك قال رفعت في حيرة: انتى بتقولى ايه؟ قالت سهام:.
بقول الحقيقة يارفعت، مش انت اللى بعتلى نورا برسالة بتقولى فيها ان احنا مبقيناش لبعض وانك قررت تتجوز بنت عمك وكان مع الرسالة الساعة اللى كنت جايبهالك واللى عليها حروف اسامينا عقد رفعت حاجبيه قائلا:.
انا مستحيل ابعت رسالة زى دى، بالعكس انتى اللى بعتى معاها رسالة بتقوليلى فيها انك متقدريش تعصى اهلك وانك هتتجوزى ابن شريك باباكى، مصدقتش، جريت على بيتكم زى المجنون، البواب قاللى انكم سافرتم تعملوا الفرح في القاهرة قالت سهام بصدمة:.
هما فعلا سفرونى غصب عني، بس انا هربت منهم ورجعت البلد، كان يوم فرحك على بنت عمك، شفتكم مع بعض في الكوشة أغمى علية وجالى انهيار عصبى وفضلت اتعالج نفسيا سنين يارفعت، و ابن شريك بابا هو اللى وقف جنبى وصبر علية وساعدنى اتخطى محنتى لحد ما اتعالجت وطبعا لما عرض علية الجواز وافقت، حبه لية ووقفته جنبى كانت اكبر من انى أرفض، ساعتها سمعت انك خلفت ولدين ومعتش فيه أمل انك تكون لية.
صمت الاثنان ليدركوا ان ماحدث لم يكن سوى مخطط دنئ من عائلتيهما للتفريق بينهما، أمسك رفعت يدها بلهفة قائلا: يعنى انتى مبعتنيش ياسهام؟ ادمعت عينا سهام قائلة: وانت متخليتش عني يارفعت؟ ثم قالت في حيرة: طب ازاى وصلت الساعة لايد نورا؟ قال رفعت بهدوء: واضحة طبعا ياسهام، نورا أخدتها من اوضتى قالت سهام في حزن: ربنا يرحمها ويسامحها قال رفعت بدهشة: بتدعيلها ياسهام؟ قالت سهام:.
متنساش انها كانت اختك وصاحبتى وأكيد فهموها ان ده في مصلحتنا او هددوها بقتلنا أومأ رفعت برأسه قائلا: معاكى حق، ربنا يسامحهم كلهم، فرقوا بين اتنين بيحبوا بعض ابتسمت سهام قائلة: بس ولادنا حبوا بعض، ومقدروش المرة دى يعملولهم حاجة، القدر كان اقوى منهم قال رفعت: فعلا، القدر كان معاهم، ربنا يسعدهم ويخليهم لبعض.
سقطت دمعة من عين رهف التي تركت الباب مواربا ووقفت تستمع الى حديثهم بالداخل، انتفضت على يد حانية تمسح لها دمعتها لتلتفت وتجد نضال يقف خلفها وعينيه تقولان انه استمع هو الآخر لذلك الحديث لتبتسم قائلة في همس: مطلعتش خاينة يانضال، مطلعتش خاينة ضمها اليه قائلا في حنان: الحمد لله ياحبيبتى، الحمد لله رجعت الى الوراء لتنظر اليه بقلق قائلة: انت عملت ايه مع نائل؟ ابتسم قائلا:.
اطمنى مقتلتوش، انا يادوبك اديته درس وخلصتها منه، نيرة أخيرا بقت حرة قالت رهف بسعادة: انهاردة اسعد يوم في حياتى، تحسه كله افراح كدة قال نضال في خبث: طب بما ان اليوم ده حلو كدة وعاجبك طب ما تيجى شوية في أوضة الحاج رفعت، أصل شكله مش هيبات فيها انهاردة، هقولك كلمتين كدة في بقك ضربته بخفة على يده قائلة في خجل: اتلم يانضال، متبقاش قليل الأدب، أنا رايحة أجيب عصير وابتعدت بسرعة ليتبعها مناديا اياها قائلا:.
استنى ياحاجة، آل قليل الأدب آل، يابت ده انا جوزك.
كانوا جميعا يجلسون بحجرة سهام بمنزل رفعت التي أصرت ان تكمل فترة نقاهتها بالمنزل رغم اعتراض الاطباء، استأذنوا جميعا بالذهاب، وخرجوا من الحجرة تاركين رفعت جالسا مع سهام، جلسوا سويا في ردهة المنزل يتبادلون الحديث ثم استأذن يزيد ليتحدث مع نيرة في حديقة منزلهم فاعترضت نيرة ولكن نظرة واحدة من نضال جعلتها تستسلم، في حين رن هاتف وعد فاستأذنت للرد عليه بتوتر تابعه عينا فهد، ابتعدت وعد قليلا وهي تقول لمحدثها:.
بس ياشيخ عابد، مش هينفع انهاردة، أنا... قاطعها عابد قائلا: والله يامدام وعد، أنا كدة عملت اللى علية، الجلسة ان متعملتش انهاردة اعتبرى أملك في الخلفة خلاص معتش ليه وجود، ده كلام أسيادنا اللى زعلانين منك خالص قالت وعد في لهفة: لأ خلاص هاجى، ساعة بالكتير وهكون عندك قال عابد بانتصار: وانا مستنيكى يامدام وعد أغلقت الهاتف في قلق وهي لا تعرف كيف ستخرج الآن وبأى حجة، أفاقت على صوت فهد يقول: كنتى بتكلمى مين؟
قالت وعد في ارتباك: ده، ده، دى نهلة صاحبتى تعبانة اوى يافهد ومحتاجانى أروح معاها للدكتور عشان جوزها مسافر، أنا هضطر امشى دلوقتى نظر اليها نظرة طويلة اعتادتها منه مؤخرا، توترت بشدة ليقول أخيرا: روحى ياوعد، بس متتأخريش ابتلعت ريقها قائلة: حاضر مش هتأخر استأذنت من الجميع وذهبت فأمسك فهد بالهاتف واتصل قائلا لمحدثه: المدام خرجت حالا، تمشى وراها واوعى تغيب عن عينك واول ماتوصل للمكان اللى رايحاه اتصل بية فورا.
ثم أغلق الهاتف قائلا: اللى مخبياه هعرفه انهاردة ياوعد، انهاردة.
قال مازن لمحدثه على الهاتف: لأ ياغبى، زى ماقلتلك تعمل بالظبط، أول ما يخرج م البيت تتصل بالرقم اللى اديتهولك وتقول اللى قلتهولك. واول ما هي تخرج م البيت تعمل اللى قلتلك عليه وتجيبها ع المكان اللى كتبتهولك في الورقة، لو غلط غلطة مش هرحمك، فاهم؟ ثم أغلق الهاتف بعصبية لتقول ميس في قلق: والله يامازن انا مش مطمنة للى انت بتعمله ده رمقها بسخرية قائلا:.
ياريت تخلى احاسيسك ومشاعرك لنفسك وتنقطينى بسكاتك، مش ناقص بوذك الفقر ده يعكنن علية ويضيعلى الكاسين اللى شاربهم قالت ميس باستنكار: انت ازاى تكلمنى كدة؟ زفر مازن بقوة قائلا: ميس، أنا دماغى فيها اللى مكفيها ومستحملها بالعافية، اطلعى انتى منها بس وهي تعمر قالت ميس وهي تحمل حقيبتها قائلة: انا غلطانة اصلا انى جيت، انا ماشية وهريحك منى خالص وابتعدت مغادرة تتبعها نظرات مازن الساخرة ليقول:.
والله ريحتينا، انا اصلا معنتش طايقك، لوكلوك لوكلوك علطول، وانا عايز اركز ثم ابتسم بشر قائلا: هانت يارهف وهترجعبلى تانى وهنتقم من نضال، هاخد منه حبيبته وفلوسه ثم اطلق ضحكة شيطانية وهو يمسك بكأسه يرتشف منه بتلذذ متخيلا رهف في أحضانه، رهف الفاتنة، رهف الرقيقة، ورهف البريئة.
رواية نصفي الآخر للكاتبة شاهندة الفصل الرابع والعشرون
جلس كل من نيرة ويزيد صامتين لا يدرى يزيد من أين يبدأ بالحديث ولكنه لملم أفكاره قائلا: أنا آسف يانيرة نظرت اليه بهدوء قائلة: آسف على ايه يايزيد؟ نظر اليها يزيد قائلا: آسف لأنى كنت جبان نظرت اليه في دهشة فاستطرد قائلا:.
ايوة كنت جبان، بحبك وعارف انك بتحبينى ومعملتش حاجة عشان الحب ده، وقفت ساكت وانا شايفك بتضيعى منى، خفت أخسر العيلة اللى احتوتنى بعد أهلى ما ماتوا، ومفكرتش في انى بكدة بخسرك انتى، بخسر السبب الوحيد اللى مخلينى عايش، ياريت كنت خسرت الدنيا كلها ومكنتش خسرتك انتى، ياريتنى كنت مت قبل ما اسيبك للزفت ده قالت بلهفة: بعد الشر عنك.
نظر اليها في حنان فأدركت خطأها بإظهار مشاعرها، لتعود ملامحها جامدة، يعلم أنها تحبه ولكنه يعلم أيضا انها مازالت مجروحة منه ليقول في رجاء: عشان خاطرى سامحينى، انا كل اما افتكر أد ايه الحيوان ده عذبك مبقدرش أسامح نفسى.
اغمضت نيرة عينيها في ألم وانتفض جسدها بضعف ليرى يزيد انتفاضتها ويشعر بألمها ليصيبه ذلك الألم في مقتل، ويندم أشد الندم لسماعه كلام نضال وعدم الفتك بذلك الوغد، مد يده ليربت على يدها فانتفضت بقوة أكبر وفتحت عينيها لتواجهها عيناه مباشرة، لتدرك انها الآن بأمان بعيدة كل البعد عن ذلك الوغد نائل، حرة وأخيرا، ابتلعت ريقها وهي تسحب يدها قائلة بتوتر:.
انا كمان آسفة، الغلط كان منى انا كمان، استسلمت ووافقت، وافقت اتجوز واحد وانا في قلبى واحد تانى، تعرف، كان كل ما يضربنى أحس انه عقاب من ربنا عشان كنت بفكر في واحد وانا شايلة اسم واحد تانى، بس والله ما كان بايدى، انا حاولت كتير انساك، بس مقدرتش، والله ما قدرت انهمرت دموعها مع كلماتها الأخيرة، ود لو احتواها بين ذراعيه ليمحى ألمها ويمسح دموعها، قال بحزن:.
عشان خاطرى يانيرة كفاية دموع، انا مش قادر أتحملها بدأت دموعها تخف تدريجيا، فأخرج منديله من جيبه وأعطاها اياه فأخذته منه وهي تمسح دموعها لتشتم رائحة عطرها، نظرت الى المنديل في حيرة لترى حرف اسمها منقوشا على أطرافه، اتسعت عيناها في دهشة قائلة: ده منديلى نظر اليها ليدرك انه منحها ذلك المنديل الذي يحتفظ به ليخفض نظره خجلا لتبتسم هي في حنان ولكنها سرعان ما اخفت تلك الابتسامة عندما رفع اليها عينيه قائلا:.
انتى عارفة انى بحبك من زمان يانيرة، دى كانت حاجة منك بتواسينى، كل اما توحشينى كنت بضم المنديل لحضنى وكأنى بضمك انتى، كل ذكرى في قلبى منك كان المنديل بيحييها، بس انا خلاص مش عايز ذكريات انا عايز حاضر ومستقبل يجمعنا، عايز اتجوزك يانيرة نظرت اليه نيرة بحزن قائلة: ياريت كان ينفع يايزيد، انت مش فاهم حاجة ربت يزيد على يدها قائلا: فهمينى سحبت يدها قائلة في مرارة:.
السبب أهو أدامك، انا مبقتش انفعك خلاص، مش قادرة أستحمل ايد تلمسنى، يمكن نائل كان عاجز **يا بس اللى عشته معاه كان أسوأ من الاغتصاب، انا محتاجة علاج نفسى مش جواز اغمض عينيه بألم، تذبحه كلماتها، تصيبه في مقتل، تعذبت حبيبته كثيرا، كثيرا جدا.
وقفت نيرة لتمشى وهي تدرك قسوة كلماتها وانه لن يتحمل ان يتزوج بها وهي مدنسة بلمسات رجل آخر، لتجد يده تمسك بيدها وتوقفها عن الرحيل، نظرت الى عينيه التي نظرت اليها نظرة لم تصدقها تجمع العشق مع التصميم وهو يقول:.
انا جنبك ومش هسيبك، هكون معاكى خطوة بخطوة، وهصبر عليكى، انا مش عايز حاجة من الدنيا غير انك تكونى جنبى، انام في حضنك وأحس ان لقيت نصى التانى، انى بقيت كامل يانيرة، من غيرك بحس انى تايه، ناقصنى حاجة، ناقصنى النفس اللى بعيش بيه يا حبيبتى، ناقصنى انتى ظهرت مشاعرها في عينيها واغروقت بالدموع لينهض يزيد ويجلس على احدى ركبتيه قائلا في حنان:.
نيرة رفعت الجبالى تقبلى تكونى مراتى، تقبلى تكملينى وتكونى النور اللى بينور حياتى؟ ظهر التردد في عينيها للحظات ثم ما لبثت أن حسمت أمرها وهي تدرك أنها لا تريد الحياة بدونه وانها لن تتحمل أن يكون لأخرى لتومئ برأسها في خجل، فينهض يزيد لا يصدق أنها وافقت ليضمها ويدور بها في سعادة وسط ضحكاتها التي ملأت أذنيه بفرحة طاغية وهما يشعران بالحب، والسعادة.
قالت وعد بترقب: هي الجلسة هتبتدى امتى؟ قال عابد وهو يتأمل ملامحها قائلا باابتسامة مقيتة: حالا يامدام وعد، اشربى انتى بس العصير وهنعملها علطول اومأت برأسها وامسكت كوب العصير ترتشف منه رشفة واحدة فأحست بطعم غريب في فمها فمالت على حسنية تقول بتوتر: العصير ده طعمه غريب ياحسنية ولا انا بتهيألى؟ نظرت حسنية الى كوب عصيرها الفارغ قائلة:.
لأ ياستى، ده طعمه حلو أوى، أنا أدامك أهو خلصته في ثوانى، انتى بس اللى متوترة نظرت اليها وعد قائلة: عندك حق، أنا فعلا متوترة ثم ارتشفت باقى العصير لتحس بالدوار، قالت لحسنية: حسنية أنا دايخة اوى، بقولك ايه قومى نمشى ونأجلها مرة تانية قالت حسنية: يووه ياستى ما ينفعش، احنا أجلنا قبل كدة والشيخ عابد قال ده آخر أمل بدأ السواد يحيط بوعد حتى فقدت وعيها لتنهض حسنية بجزع قائلة: ستى وعد، ياستى.
ابتسم عابد ابتسامة انتصار خفية ليقول لحسنية: سيبيها ياحسنية، دى الأسياد، حضرت وهم اللى خلوها كدة قالت حسنية بفزع: ياحوووستى، ربنا يجعل كلامنا خفيف عليهم اتصل عابد برقم ليقول بحدة: تعالى شيلها، بسرعة دخل رجل مفتول العضلات حمل وعد وخرج بها من الغرفة، نهض عابد ليغادر خلفها فنهضت حسنية لتذهب معهم فالتفت عابد اليها قائلا: استنينا هنا، احنا في الاوضة اللى جنبك، شوية وهنجيلك قالت حسنية بتردد: بس ياسيدنا...
قاطعها قائلا في صرامة: من غير بس، تحبى تيجى معانا عند الأسياد قاطعته حسنية قائلة في خوف: لا ياسيدنا خلاص، روح ربنا يجعل الخير على ايديك خرج عابد وقد ارتسمت على شفتيه ابتسامة ذئب بشرى على وشك ان ينال فريسته.
قال رفعت: يعنى عايزة تكتبى الكتاب بس يانيرة ومتعمليش فرح اومأت نيرة برأسها فقال يزيد: بس انا عايز اعملك فرح يانيرة ابتسمت نيرة قائلة: انا عارفة انك مبتحبش الافراح يايزيد، ولو عايز تعمله عشانى فأنا مش عايزة غير حفلة بسيطة تضم اللى يهمونا وبس زى اخويا نضال ما عمل، وبعدين انا فرحتى بجد هي ان احنا نكون مع بعض ابتسم يزيد بحنان في حين ظهرت الفرحة على وجه الجميع ليقول رفعت: كدة الفرحة هتبقى فرحتين.
نظر اليه الجميع في تساؤل فاستطرد قائلا: انا وسهام قررنا نتجوز اول ما تقوم بالسلامة، يعنى هنكتب كتابنا وياكم هلل الجميع في حين اقترب رفعت من نضال قائلا: هو اخوك ومراته راحوا فين يانضال؟ قال نضال: مش عارف يابابا، وعد خرجت عشان صاحبتها تعبانة و فهد خرج بعدها علطول أومأ رفعت برأسه قائلا في مزاح: وانت مش هتعمل العملية وتصلح وشك ده ولا ايه، ذنبها ايه البنت القمراية دى تصطبح وتتمسى بالوش ده؟
نظر نضال الى رهف التي تتحدث بهمس مع نيرة وتبتسم في رقة ليبتسم وهو يشعر بها تملأ قلبه سعادة قائلا في حنان: كل شئ بأوان يابابا، كل شئ بأوان.
سمعت حسنية ضجة شديدة بالخارج فخرجت لترى ما يحدث، لتجد سيدها فهد ومعه رجلين، يتحدث فهد مع السكرتيرة بعصبية وصوت عال، وضعت يدها على فمها تكتم شهقتها في فزع ولكنه سمعها لينظر اليها بغضب ويتجه اليها بخطوات سريعة وهو يمسك ذراعها بعنف قائلا بصوت كالرعد: فين وعد ياحسنية؟ قالت حسنية متلعثمة: ستى وعد، أصلها، أصلها... صرخ في حدة: ما تنطقى، قولى هي فين لاما اقسم بالله هدفنك حية دلوقتى قالت حسنية بخوف:.
ستى مع الشيخ عابد في الجلسة قال فهد بعصبية: والنيلة دى فين؟ أشارت باصبع مرتجف الى الحجرة المجاورة، أسرع فهد الى الحجرة المجاورة ليجدها موصدة فحطمها ليرى ما جعله يتمنى الموت في تلك اللحظة، رأى زوجته شبه عارية وفوقها رجل يقبلها بجنون، صعد الدم الى رأسه أسرع اليه ليجد رجلا في مواجهته فعاجله بلكمة قوية محترفة اطاحت به وأسقطته مغشيا عليه، ابتعد عابد عن وعد قائلا برعب: انت مين؟
نظر فهد الى زوجته التي بدأت تفيق لترى نفسها بهذا المنظر فشهقت بفزع، وجدت فهد يحدقها بنظرات حزينة، مصدومة، غاضبة، فأمسكت بالملاءة تغطى بها جسدها وهي تبكى بشدة اما فهد فقد اقترب من عابد ينظر اليه نظرة نارية قاتلة وهو يقول: عايز تعرف انا مين، صح؟، انا جوز الهانم واللى كنت عايز تلوث شرفه ياكلب، وانا اللى يمس مراتى بنظرة مش بلمسه أقتله بايدية دول، لكن انت هدفنك حى واخليك تتمنى الموت ألف مرة ومش هتطوله.
قال فهد في رعب: أنا... قاطعته لكمات نضال القوية التي أطاحت بأسنانه وشوهت وجهه وأفقدته الوعى على الفور نادى فهد رجال قائلا لهم: خدوه من هنا وخدوا البت حسنية معاه ودوهم المخزن واستنونى هناك أومأ رجاله برأسهم وهم ينفذون أوامره، في حين نظر فهد الى زوجته المنهارة قائلا في صرامة: البسى هدومك وحصلينى، انا مستنيكى تحت.
أومأت برأسها دون ان تنظر اليه، فخرج من الغرفة وهو ينظر اليها نظرة مريرة، نهضت وعد وهي ترتجف لتلبس ملابسها، همست في يأس باكى وهي تضرب رأسها: تستاهلى ياوعد عشان خبيتى على جوزك، تستاهلى عشان غبية، غبية، غبية.
رواية نصفي الآخر للكاتبة شاهندة الفصل الخامس والعشرون
نزلت وعد بخطوات ثقيلة، وجدت فهد ينتظرها بالسيارة دون أن ينظر اليها، ركبت السيارة فانطلق بها دون كلمة، كانت دموعها تتساقط بغزارة وهي تستند برأسها على زجاج الشباك بجوارها، انتفضت على صوت فهد وهو يضرب المقود بعنف قائلا: ليه، ليه؟ أمسكت يده بلهفة قلقة قائلة: أبوس ايدك يافهد، متعملش في نفسك كدة نظر اليها في غضب وهو ينزع يده من يدها قائلا بعنف: ابعدى عني متلمسنيش..
أخفضت نظرها وهي تبكى، أسرع بالسيارة حتى وصلوا الى المنزل، أسرعت بالنزول والهرب الى حمام حجرتها، دلفت اليه تخلع ملابسها وتدخل تحت الدش تدعك جسدها بهستيرية، تكاد تؤذى نفسها، حتى وجدته يخرجها منه عنوة وهو يلفها بالمنشفة ويخرجها من الحمام قائلا: انتى اتجننتى، حد يعمل في نفسه كدة؟ قالت في انهيار وهي تجلس على الارض:.
سيبنى يافهد، مش طايقة جسمى، انا اللى عملت كدة في نفسى، أنا اللى غبية ومكنتش شايفة أدامى، بس والله والله ما خنتك يافهد، انا الموت عندى اهون من انى اكون لغيرك نظر اليها بغضب قائلا: انتى اتجننتى، انا مستحيل أشك فيكى، انا قلتلك مليون مرة ثقتى فيكى زى ثقتى بنفسى نظرت اليه بصدمة، اذا هو يعرف أنها بريئة، طمأنها ذلك الشعور لتنهض وتقترب منه لتجمدها نظرته الغاضبة، توقفت وهي تقول: يعنى انت عارف انى مظلومة.
قال في غضب: بس خبيتى علية ياوعد، روحتى المكان ده من غير ما تقوليلى، كنت كل ما بسألك بتكدبى، وانا مبحبش الكدب ولا الكدابين، ده لولا ستر ربنا ولحقتك كان واحد تانى نام معاكى ياوعد، فاهمة يعنى ايه واحد تانى ينام معاكى؟ وضعت يدها على أذنها وهي تصرخ قائلة: اسكت، اسكت كاد ان يحتضنها مهدئا وهو يرى انهيارها ولكن قلبه الموجوع أبى ان يواسيها بل قال في حدة:.
لأ مش هسكت، انتى عارفة يعنى ايه أدخل الاقى مراتى عريانة و في حضن واحد تانى، بيبوسها أدامى، عارفة انا ازاى اندبحت؟ ظلت تبكى وتردد في انهيار: اسكت، ابوس ايدك، كفاية امسك كتفيها يهزها قائلا: روحتيله ليه ياوعد، خبيتى عني ليه؟ليه؟ قالت بانهيار: عشانك والله العظيم عشانك تركها وهو ينظر اليها في صدمة فاستطردت قائلة من وسط دموعها:.
حسنية قالتلى ان الراجل ده بيعالج الستات اللى فرصتهم في الخلفة ضعيفة، كان نفسى أجيبلك بيبى يسعدك، والله كنت عايزة الطفل ده عشانك انت مش عشانى قال لها بصوت ضعيف مكسور: أديكى كنتى هتجيبى البيبى بس مش منى، مش منى ياوعد، كنتى هتضيعى نفسك وتضيعينى انهارت وهي تقع أرضا مرة اخرى فلم تعد قدماها قادرة على احتمالها قائلة:.
أنا آسفة، والله العظيم آسفة، عارفة انى غلطت وغلطتى كبيرة أوى، انا لما الدكتورة قالتلى ان نسبة حملى ضعيفة يادوب 5%، الدنيا اسودت حوالية، اتعلقت بقشاية كانت هتغرقنى، بس اعمل ايه؟بحبك وكان كل همى أسعدك اقترب منها ونزل جالسا على ركبتيه ليكون في مواجهتها، أمسك بوجهها بين يديه قائلا في لوعة:.
أنا سعادتى في وجودك جنبى ياوعد، انتى مش بس حبيبتى، انتى بنتى اللى مربيها على ايدى، ان شاالله تكون نسبة حملك صفر%، ميهمنيش، انا كل اللى يهمنى انتى، انتى وبس، انسى بقى موضوع الخلفة ده وسيبيها على ربنا، لو أراد ربنا نخلف هنخلف، لو ما أرادش، يبقى كفاية ان احنا مع بعض نظرت اليه فتبينت صدق كلماته، أدركت انه حقا يكتفى بها، أدركت انها تعذبه مثلما تتعذب وأكثر، قال لها:.
الموضوع ده هنقفله خلاص واللى حصل من شوية معدناش هنجيب سيرته، محتاج أنسى ياوعد، لازم أنسى أومأت برأسها تود فعلا أن تنسى وتجعله ينسى، تحمد ربها في سرها أن رزقها بحبه، فمسح دموعها قائلا: قومى نامى حبة وارتاحى، وانا هروح مشوار صغير ومش هتأخر أمسكت يده قائلة: رايح فين؟ قست عيناه فاستطردت في قلق: رايحله صح؟ رأت الاجابة في عينيه فتعلقت بذراعه قائلة في رجاء:.
متروحش، استنى لما تهدى، لو روحت دلوقتى هتقتله وهخسرك، وبعدين انا بجد محتاجة انام في حضنك، محتاجالك انهاردة اوى يافهد ظهر على وجهه التفكير، خشى ان تؤذى نفسها اذا تركها، رأته يلين، فنهضت وأنهضته معها وأخذت بيده الى السرير ليناما في حضن بعضهما ويرتاحا أخيرا بعد يوما كان كالجحيم لكليهما.
أفاقت رهف من نومها وهي تتمطى في كسل، نظرت بجانبها فلم تجده، سمعت جريان الماء في الحمام فأدركت أن زوجها بالداخل يستحم، ابتسمت وهي تتذكر أحداث الليلة الماضية، لقد قضوا ليلة رائعة تبادلوا فيها أجمل المشاعر، ترك نضال الضوء لأول مرة مضاء، وكأنه لم يعد يخشى كشف جروحه، وكأنه أدرك أخيرا انها لا تهمها على الاطلاق، تذكرت عندما تركها تجلس خلفه تتلمس تلك الجروح ليتجمد جسده تماما، قلقا ربما، لتقبل هي تلك الجروح جرحا جرحا ومع كل قبلة كان جموده يلين حتى التفت اليها ليأخذها في قبلة أرسلتها الى السماء وأعادتها من جديد، ليتركها فقط كى يتنفسا، وليهمس في أذنها بعشق:.
بحبك يارهف، بعشقك فتهمس هي الأخرى في أذنه: وأنا بعشقك ياقلب رهف ليضمها ويأخذها معه في رحلة الى السعادة، كانت تبتسم في سعادة عندما أفاقت على صوته وقد خرج من الحمام ووقف مستندا الى الحائط متأملا اياها قائلا في عشق: أكيد بتفكرى فية ابتسمت في خجل فاتسعت ابتسامته واقترب منها مقبلا اياها على وجنتها قائلا: صباح الجمال يارهوفة ابتسمت في خجل قائلة: صباح الخير يانضال رفع ذقنها بيده لتتقابل عينيهما قائلا:.
الجميل بتاعى لسة بينكسف منى؟ ضربته على يده بخفة قائلة: بطل بقى، انا مش متعودة ع الدلع ده كله نظر الى ملامح وجهها في عشق قائلا: من هنا ورايح مفيش غير الدلع، الدلع وبس ابتسمت ثم قالت لتغير الحديث: انت لابس كدة ورايح فين؟ ابتعد عنها قليلا وهو يدرك أنها تغير الحديث قائلا بابتسامة جذابة: الشغل ياحبيبتى، عندى انهاردة اجتماع مهم، هخلصه ثم غمز لها بخبث مستطردا: وهجيلك جرى.
ابتسمت بخجل فقبلها مرة أخرى من وجنتها ثم نهض ليلقى نظرة أخيرة على نفسه بالمرآه ثم يأخذ مفاتيحه وهاتفه المحمول قائلا: سلام مؤقت ياقمر اتجه الى الخارج فاستوقفه صوتها وهي تنادى باسمه برقة أذابته فالتفت ليجدها تلقى اليه بقبلة طائرة، التقطها بيده وقربها الى فمه يقبلها ثم قربها من قلبه وهو يغمز لها ليخرج بعد ذلك لتتنهد رهف في سعادة قبل أن تنهض لتأخذ حماما.
لبست رهف حجابها وذهبت الى حجرة والدتها لتطمئن عليها، وجدتها نائمة فاستعدت للنزول الى الحديقة لتفطر بها فلا يوجد اليوم أحد بالمنزل، الجميع غادروا حتى نيرة خرجت مع يزيد، ليرن هاتفها نظرت اليه فوجدته رقما غريبا، فتحته قائلة: السلام عليكم قال محدثها: وعليكم السلام، مش حضرتك مرات نضال بيه الجبالى قالت رهف في قلق: أيوة مين معايا؟ قال محدثها:.
البيه عمل حادثة ورقم حضرتك كان اول رقم على موبايله انهارت رهف ونزلت دموعها وهي تقول: وهو عامل ايه وانتوا فين دلوقتى؟ قال الرجل: هو في اوضة العمليات دلوقتى في مستشفى السلام لا تدرى كيف اغلقت الهاتف واتصلت بوالد نضال قائلة من وسط دموعها: الحقنى ياعمى، نضال عمل حادثة وفي مستشفى السلام، انا رايحة على هناك...
وجدت هاتفها قد انتهى شحنه وأغلق، فألقته من يدها وهي تزفر بقوة، لتذهب الى حجرتها وتحمل حقيبتها وتسرع بالخروج من المنزل، قالت للبواب: شوفلى تاكسى بسرعة ياعم عبده.
أومأ برأسه وهو يذهب لينفذ طلبها وما ان ذهب حتى فوجئت بيد بها منديل تحيط بها وتضع المنديل على أنفها ليلفها السواد، ويمسك بها ذلك الرجل حتى لا تقع، اخرج ذلك الرجل ورقة من جيبه ليقرأ العنوان الموجود بها وهو يشير للسيارة التي جاء بها للتقدم، ثم يضع رهف داخلها، فوجئ بعم عبده يقول له بصوت حاد: انت واخد ست رهف على فين ياجدع انت؟ التفت اليه الرجل قائلا في غلظة: وانت مالك انت؟ أمسك به عم عبده وهو يقول في حدة:.
ايه اللى مالى ده، لأ مالى ونص يااخويا لكمه الرجل على وجهه فعاجله عم عبده بلكمة اشد قوة ليستشيط الرجل غضبا ويضربه على رأسه بشئ صلب ليقع عم عبده أرضا، فيدخل ذلك الرجل الى السيارة قائلا بتوتر: بسرعة ياسيد، امشى بسرعة أسرع سيد بالسيارة ليقول له في قلق: على فين يا على؟ وضع على يده في جيبه ليخرج الورقة فتذكر أنها كانت في يده قبل شجاره مع ذلك البواب ليدرك انها وقعت منه، ليزفر بقوة قائلا:.
الورقة وقعت بس انا فاكر العنوان وأملاه العنوان فانطلقوا الى وجهتهم وابتسامة انتصار تعلو وجه ذلك العلى.
اتصل يزيد بنضال الذي نظر الى هاتفه ليستأذن من الاجتماع ليرد على هاتفه قائلا وهو يخرج من الحجرة: خير يايزيد؟ قال يزيد بدهشة: انت فين يانضال؟ قال نضال بدهشة: في الاجتماع ياابنى، ما انت عارف قال يزيد في قلق: احنا في مستشفى السلام يانضال انتقل قلقه الى نضال ليقول بسرعة: حد حصله حاجة؟، طمنى قال يزيد:.
باباك كان في الجمارك، اتصلت بيه رهف وقالتله انك عملت حادثة وفي مستشفى السلام، وبعدين موبايلها اتقفل وباباك اتصل بينا واحنا في المستشفى اهو وانت في الاجتماع، ييقى اكيد فيه حاجة غلط قال نضال بقلق وهو يسرع بالخروج من الشركة ويركب سيارته: ع البيت علطول يايزيد، انا مش مطمن، انا هسبقكم على هناك قال يزيد: ربنا يستر يانضال، احنا رايحين علطول.
أغلق نضال هاتفه وهو يسرع بسيارته، ليقود بأقصى سرعة وقلبه يخفق بقوة، وبخوف.
تحميل محتوى الموضوع
عرض نسخة صالحة للطباعة
أرسل هذا الموضوع إلى صديق
[22]
الدعوات : 2قوة السمعة : 10
رواية نصفي الآخر