كانت اميرة تنظر الى غادة فى صدمة وهى تقول: اخته؟ اومأت غادة برأسها وهى تقول: انا عارفة انى متأخرة، بس الفترة اللى فاتت كنت مشغولة بحاول أوصل لأخواتى عقدت أميرة حاجبيها فى حيرة، لتبتسم غادة قائلة: لأ ده موضوع تانى خالص هحكيهولك بعدين، المهم انى اول ما رجعت وعرفت باللى حصل جيت ليكى علطول تمالكت اميرة نفسها قائلة: بس انتى ازاى أخته؟ قالت غادة:.
انا ابقى اخته فى الرضاعة، عارفة، هتقولى ازاى وفرق السن اللى بينا؟ نظرت اليها اميرة تؤكد تساؤلها فابتسمت غادة فى حزن قائلة: لما ماما اتوفت، مامة قصى رضعتنى مع بنتها رقية اتسعت عينا اميرة فى دهشة فاستطردت غادة قائلة:.
اكيد مسمعتيش عنها حاجة، اسمها على اسم اختى على فكرة بس سيرة رقية أخت قصى خط احمر بالنسبة لقصى وعمى امجد، الموضوع مؤلم اوى بالنسبة لهم، رقية كانت روحهم ولما ماتت مع مامة قصى فى الحادثة، كانت حالتنا النفسية وحشة اوى، انا بابا سفرنى معاه وقصى جاله اكتئاب واتقطعت بينا الصلات لغاية لما قصى سافر امريكا وشفته هناك أحست اميرة بالدوار، لقد شعرت بانها لاتعرف الكثير عن قصى، وظلمته كثيرا.
قالت غادة بقلق وهى تلاحظ شحوب اميرة: انتى كويسة؟ ابتسمت اميرة بحزن قائلة: انا كويسة متقلقيش، انا بس لو ممكن اعتذر عن اسلوبى وكلامى معاكى قبل كدة ابتسمت غادة قائلة: ولا يهمك حبيبتى كل واحدة بتحب جوزها وبتغير عليه هتعمل كدة قالت اميرة بسرعة: بس انا مبحبش ق... قاطعتها غادة قائلة: انا مش قصى يااميرة، انا واحدة ست وبفهم كويس مشاعر الست اللى أدامى نظرت اميرة اليها فى حيرة فاستطردت غادة قائلة:.
متخليش كبريائك يعميكى عن حقيقة واضحة لكل الناس، انتى بتحبى جوزك وجوزك بيحبك، بصى بقلبك مش بعنيكى هتشوفى حب قصى يااميرة نهضت غادة واقتربت من اميرة ومدت اليها يدها قائلة: انا مليش اخوات بعد موت رقية غير قصى، رغم ان لية اخوات من الأب بس عمرى ما شفتهم، بابا الله يسامحه خبى علية والمحامى بعد وفاته قاللى، وقصى عوضنى عنهم بحنيته، وبتمنى تقبلى انك تكونى اختى يااميرة؟
ابتسمت اميرة وهى تقف لتترك المكتب وتلتف حوله لتحتضنها قائلة: يشرفنى ياغادة يكون لية اخت قمر زيك ترقرقت الدموع فى عينى اميرة وغادة لتسبقها غادة وتمسح دموعها وهى تبتعد عنها قائلة فى مرح: احنا هنقلبها نكد ولا ايه؟لأ بقولك ايه، مليش فى النكد خالص، فرفشى كدة وانا همشى عشان اتأخرت، عندى مشوار مهم اوى، اشوفك بقى فى البيت ابتسمت اميرة وهى تقول: اشوفك فى البيت.
خرجت غادة مسرعة فارتطمت بجاسر وتناثرت الاوراق التى كانت بيده، فأسرعت بالاعتذار قائلة: آسفة، آسفة والله مخدتش بالى نظر جاسر الى عينى غادة العسليتين فسرح فيهما وظل صامتا مما أصاب غادة بالخجل فأخفضت عينيها ارضا ليفيق جاسر من سرحانه ويعدل من وضع نظارته قائلا: انتى بشر زينا؟ رفعت غادة عينيها اليه مجددا لتقول فى دهشة: أفندم؟ ابتسم قائلا: طب انتى عميلة هنا؟ قاات فى حيرة: لأ فقال فى لهفة: اومال ايه؟
قالت غادة فى دهشة: ايه هو اللى ايه؟ ابتسم وهو ينظر الى عينيها: انتى ايه؟أصلك مستحيل تكونى بشر ابتسمت وهى تتركه مبتعدة قائلة: مجنون وضع جاسر يده على قلبه وهو يقول: هو فيه كدة؟قلبى راح منى خلاص، روحى ياشيخة كدة وانتى تهبلى وصل الى مسامعه صوت ضحكة مكتومة فالتفت وهو يحاول ان يتظاهر بالجدية قائلا الى السكرتيرة التى تكتم ضحكتها بصعوبة: فيه حاجة ياليلى؟ قالت ليلى: ولا اى حاجة يافندم حاول ان يخفى ابتسامته وهو يقول:.
مدام اميرة فى مكتبها؟ اومأت برأسها فتقدم الى المكتب بثبات وما ان دلف الى الحجرة حتى قال فى لهفة: تقوليلى حالا وبسرعة، مين القمر اللى كانت عندك دلوقتى، قولى بقى ساكتة لييه؟ ابتسمت اميرة قائلة: اهدى بس ياجاسر، تعالى اقعد وانا هاحكيلك كل حاجة.
دلف قصى الى حجرته ليفاجئ بتلك الاضاءة الخافتة، جال بنظره فى الحجرة ليرى شموع تزينها واستقر بنظره على تلك الحورية رائعة الجمال، انها اميرته الحسناء، كاد قلبه ان يقفز من بين ضلوعه وهو يراها تلبس فستانا ابيضا رقيقا عارى الكتفين وتسدل شعرها الحريرى الطويل الذى يزينه فقط وردة حمراء فوق أذنها تماما، كانت فعلا تبدو كالأميرة، لا بل هى ملكة، ملكة تربعت على عرش قلبه دون منازع، اقتربت منه اميرة ووقفت امامه مباشرة، كاد ان ينسى كل شئ ويأخذها بين أحضانه ليسكنها بين ذراعيه للأبد، ولكن صدى كلماتها ظل يتردد فى رأسه، فانتصر عقله الذى امره بالتجاهل ليقول فى سخرية:.
لو الهانم نفسها فى حاجة انهاردة تنسى، عشان انا مش تحت امر سموك ومش طالب رضا معاليكى ظهر الألم فى عينيها فكاد ان يتراجع عن كلماته، الا انه تمالك نفسه وصمت ينتظر ردها وهو يرجو من كل قلبه أن لا يخيب فيها أمله، ولم ينتظر كثيرا، حيث اقتربت منه على الفور وامسكت يديه ونظرت مباشرة الى عينيه قائلة: انا آسفة.
تأملها وهو يرفع حاجبه الأيسر قائلا فى هدوء يخالف ثورة قلب تسارعت دقاته غير مصدق لاعتذارها وتنازلها عن كبرياؤها الأحمق: آسفة عن ايه بالظبط ياأميرة؟ نظرت اميرة مباشرة الى عينيه قائلة:.
آسفة عن كل لحظة حسستك فيها انك ولا حاجة بالنسبة لى مع انك كل حاجة لية، آسفة عن غيرة عامية سيطرت علية وخلتنى مشفش قدامى، آسفة عن كل كلمةقلتها هديت بيها مشاعر حلوة عشناها، آسفة لقلبى عشان عذبته بنكران حبك، وآسفة لقلبك اللى حبيته طول عمرى و...
هنا لم يستطع قصى الصمود اكثر ليصمتها بقبلة أودع بها كل حبه وعشقه وشوقه. بادلته هى اياها فى لهفة ومشاعر اختزنتها كثيرا، لم يترك قصى شفتيها سوى ليتنفسا سويا وهو يضع جبهته على جبهتها مغمضا عينيه فى راحة عاشق ظمآن حتى الموت ارتشف لتوه نقطة مياه كانت له اكسيرا للحياة، رفع يديه واحاط بوجهها فى حنان وهو ينظر الى عينيها مباشرة وهو يقول معترفا لأول مرة: بحبك، بحبك أوى.
نظرت اليه اميرة غير مصدقة ولكن نظرات عينيه الولهة، أكدت عشقه ليقترب هو مجددا من شفتيها ويريها قوة مشاعره التى أذابتهما سويا فى نهر العشق يرتشفان حلاوته.
I m so sorry for you lost. please,accept my condolences. آسف جدا لخسارتكم، تقبلوا تعازي نطق الطبيب الأمريكى المعالج لحالة والدة رقية بتلك العبارة بعد ان نقل لطارق ورقية خبر وفاة والدتها ثم تركهم مغادرا المكان لتنهار رقية تماما وكادت أن تسقط لولا ان أسرع طارق بإسنادها لتتكئ على صدره تبكى فى لوعة أدمت قلبه، ضمها اليه مهدئا وهو يقول:.
وحدى الله يارقية، الحمد لله انك لحقتى تشوفيها قبل ماتموت، ادعيلها بالرحمة قالت رقية من بين شهقاتها: ربنا يرحمها ويغفر لها، قلبى واجعنى عليها اوى ياطارق، اوى تعجب طارق من قلب حبيبته الذى غفر لأمها قسوتها، واهمالها وبرودها تجاهها، ويبكى الآن من أجل تلك الأم، حقا لقد أحسن اختيار محبوبته، زاد من ضمه له وهو يربت على شعرها قائلا: اهدى ياحبيبتى، اهدى عشان خاطرى.
فتحت رقية عينيها بصدمة عندما نطق طارق بلفظ التحبب لتدرك أنها داخل حضنه تفرغ مشاعرها الحزينة على صدره، فشعرت بالخجل، لتبتعد بتوتر وهى تمسح دموعها دون أن تنظر اليه، ليشعر هو بتسرعه عندما أظهر مشاعره الآن ليقول بارتباك: يلا يارقية عشان نشوف اجراءات الدفن عادت الدموع لعينيها فأمسك يدها قائلا فى حزن: عشان خاطرى ياروقية كفاية دموع، بالله عليكى انا مش قادر أستحمل دموعك.
نظرت اليه فى دهشة ليشعر أنه تسرع مرة أخرى فترك يدها ليمرر يده فى شعره بتوتر قائلا: يلا بينا أومأت برأسها وهى تتبعه، تشعر بأنها لم تعد وحيدة فى مشاعرها بل هناك أمل ظنته مستحيلا، ولم يعد مستحيلا بعد الآن.
وآدى الحلو ياحبيبى قالت حور تلك الجملة وهى تضع موس الشيكولاتة امام أسامة وآوس ليصرخ أسامة قائلا: شوكليت موس، بحبه جدا ياطنط حور ابتسمت حور فى سعادة وهى تقول بلهفة: يعنى عجبتك المفاجأة ياأسامة؟ قال أسامة فى سعادة: اوى ياطنط حور.
كان آوس ينظر اليهم فى حنان تغمره مشاعر شتى، لقد استطاعت حور ببساطة ان تكسب قلب صغيره كما اكتسبت قلبه من قبل، عادت اليه أمنيته بأن ينسى انتقامه ويأخذهم بعيدا جدا ليعيشوا سويا وبسعادة للأبد ليعود عقله ويفرض سيطرته مجددا ليمسح فمه بالمنديل ويهم بالنهوض قائلا: لما تاكل الحلو ياأسامة تعالالى ع الأوضة، عايزك ثم وجه حديثه الى حور قائلا: تسلم ايديكى.
نظرت اليه حور فى دهشة، هل يوجه اليها هذا الكلام أم أنها تحلم؟كاد آوس أن يغادر فوجدت حور نفسها تسأله فى لهفة: مش هتاكل م الموس نظر اليها قائلا: مش هقدر، انا عمرى ما أكلت نجرسكوا بالشكل ده قال أسامة: كل معانا يابابا، دى حلوة اوى قالت حور باندفاع: عشان خاطرى نظر اليها بدهشة فأحست بتسرعها فقالت بارتباك: أصل، أنا، هو، لو يعنى مكلتش منها هيضطر أسامة ياكلها كلها ويسمن، طب ترضى كدة لأسامة طيب؟
رفع آوس حاجبه الأيسر قائلا: أسامة، قلتيلى، لأ ميرضنيش طبعا، هاتيلى حتة منها ابتسمت فى سعادة وهى تقطع الموس وتعطيه قطعة كبيرة التهمها فى تلذذ أمام عينيها التى التقت بعينيه لتطول نظراتهم وتتشابك وتفصح عن مشاعرهم التى يخفيها كل منهم فهل آن الأوان لتفصح عنها الألسنة، وهل تستسلم القلوب أم تظل العقول صاحبة الكلمة الأخيرة؟
بتقول ايه ياحيوان انت؟ نطق سعيد بتلك العبارة فى حدة مخاطبا رفعت، مساعده الشخصى ومدير أعماله الذى قال فى ارتباك: يافندم أنا عايز حضرتك متنفعلش، احنا عرفنا مين أخد الورق وحاليا بنراقبه وهنعرف مين اللى وراه ضغط سعيد على أسنانه بغيظ قائلا: بتراقبوه؟معتش وقت يابهايم للمراقبة، أنا مسافر بعد بكرة ولغاية ما أسافر مش عايز أى غلطة، مفهوم؟ أومأ رفعت برأسه قائلا: مفهوم يافندم قال سعيد بغضب:.
انا مش عارف ألاقيها منين ولا منين، من سوسن اللى موترانى فى البيت بخوفها وقلقها على حور ولا من شوية الأغبيا اللى شغالين معايا ومقدروش يحافظوا على شوية ورق لو وصل للبوليس او لسوسن قبل ما اسافر ابقى رحت بلاش، مش قادرين تظبطوا يومين لغاية ما اهرب م البلد دى؟، اسمعنى كويس يارفعت، تروح وتجيب الزفت اللى أخد الورق ده على فيلا الصحراوى بعد ساعة وانا بنفسى اللى هعرف مين وراه.
أومأ رفت برأسه وكاد أن يذهب لولا أن ناداه سعيد قائلا: هو الزفت ده يبقى مين يارفعت نظر رفعت الى سعيد قائلا: عزت البيومى يافندم أشار له سعيد بالانصراف فغادر رفعت لينفذ أوامر رئيسه الذى اتجه الى النافذة ينظر الى الطريق فى غيظ قائلا فى غضب: والله عال ياعزت الكلب، ان ما وريتك انت والحيوان اللى وراك ودفعتكم التمن، مبقاش أنا سعيد المنياوى.
فتح آوس باب المنزل ليدلف بهدوء ليفاجأ بحوريته الجميلة تنام على الأريكة، تأمل ذلك الجمال النائم فى عشق وظل هكذا لدقائق، ثم أزاح الكتاب من يدها ووضع يده على ظهرها واليد الأخرى أسفل قدمها ليحملها بخفة الى حجرتها، وضعها فى سريرها ودثرها جيدا، تأملها لثوان ثم مرر يده على شعرها فى حنان، وقبلها فى جبينها برقة، كاد أن يغادر لولا أن اوقفته يد تمسكت بيده نظر الى تلك اليد فى دهشة ثم نظر الى صاحبتها ليرى عينان فى لون زرقة السماء تنظران اليه فى عشق اقترب منها مجددا ليجلس بجوارها على السرير ويمرر يده على وجنتها الناعمة فمالت بخدها تقبل يده فى عشق أذابه ليميل عليها ويقترب من وجنتها بشفتيه يقبلها بنعومة جعلها تغمض عينيها شوقا ليقبل تلك العينين المغمضتين ويوزع قبلات حنونة شغوفة على وجهها ليسمعها تقول بصوت عاشق:.
بحبك ياآوس ابتلع كلماتها داخل فمه الذى نهل من رحييق شفتيها حد الارتواء، ثم مال تجاه أذنها يهمس فى حنان: بحبك ياحور، بعشقك ليغوصا سويا فى بحر العشق يتيهون بين أمواجه المتلاطمة، تنفجر أحاسيسهم التى عجزوا عن كبح لجامها نهض آوس من نومه تتساقط حبات العرق على جبينه وتتسارع أنفاسه وكأنه فى سباق، نظر حوله ليستوعب محيطه فى ثوان ليجد صغيره نائما بجواره كالملاك، أخذ نفسا عميقا وهو يقول: اهدى ياآوس، ده كان حلم.
استغفر ربه واتجه الى الحمام ليأخذ حماما باردا يحاول به أن يطفئ نار الشوق الى حوريته والتى اندلعت فى قلبه بعد هذا الحلم، وقف ينظر الى نفسه فى مرآة الحمام، يتذكر حلمه بحوريته، هز رأسه قائلا: ربنا يسامحك ياحور، ده انا عمرى ما حلمت حلم بالشكل ده، ياترى هتعملى فية ايه تانى؟
خرج آوس من الحمام يبتسم على جنون أحلامه بها، وقعت عيناه على صورة حنان التى يضعها على الكومود بجوار سريره لتتجمد ابتسامته ثم تختفى. جر خطواته الى حيث تلك الصورة، أمسكها قائلا بحزن:.
سامحينى ياحنان، حبيتها أوى، يمكن أكتر ما حبيتك وفى فترة قليلة اوى، مش عارف ازاى وليه، زى مادمها بيجرى فى دمى، حبها بقى بيجرى فى شرايينى، لما بتغيب عنى بحس بروحى بتتسحب منى ولما بشوفها ساعتها بس بتتردلى روحى، أنا عارف انك مش زعلانة ويمكن مبسوطة عشان بنفذ وصيتك لية، بعيش وبكمل حياتى من بعدك، وبحب وهيكون لأسامة أم تانية حنينة اوى عليه، وده اللى أقدر اوعدك بيه، لكن مقدرش أوعدك أسيب تارك ياحنان، انا خلاص معايا الورق اللى هيودى سعيد فى داهية وبكرة، بكرة هاخد تارك منه، أخيرا اللعبة هتنتهى وهقدر ساعتها أحرر حور من سجنى بس مش هقدر احررها من قلبى، هتفضل سجينة فى قلبى طول ما قلبى بيدق وده وعدى ليكى ياحنان، وعد.
كانت غادة تجلس مع اميرة فى الحديقة عندما أصابتها الدهشة وهى ترى الرجل الذى شاهدته فى مكتب أميرة وجذبتها وسامته وجنونه يدلف من باب المنزل ويتجه اليهم وعلى شفتيه ابتسامة خطفت قلبها وسارعت دقاته وما ان اقترب منهم حتى قال بصوته الرائع: صباح الخير صمتت غادة فى حين قالت اميرة مبتسمة: صباح الخير ياجاسر.
جاسر، جاسر، جاسر، اذا هذا اسمه، كم هو جميل، يناسبه تماما، هكذا فكرت غادة وهى تنظر اليه متأملة، رفع جاسر عينيه اليها ليضبطها متلبسة بتأمله فابتسم فى خبث قائلا: اذيك ياانسة غادة نظرت اليه مندهشة من معرفته لاسمها، ولكنها تمالكت نفسها قائلة: الحمد لله ثم التفتت لأميرة قائلة وهى تنهض: هجيبلكم عصير امسك جاسر بيدها يمنعها من الرحيل وهو يقول: مش مهم العصير. خليكى قاعدة معانا شوية.
نظرت الى يده التى تمسك بيدها فى دهشة ثم نزعتها قائلة فى حدة: أفندم كاد جاسر ان يتحدث ولكن سبقته أميرة قائلة لغادة: روحى ياغادة هاتى العصير ياحبيبتى نظرت اليها غادة وهى تومئ برأسها وتسرع بالمغادرة، وعلى شفتيها ابتسامة قائلة بصوت غير مسموع: مجنون فى حين التفتت اميرة الى جاسر قائلة: انت ياأخى، مش هتعقل بقى؟ تنهد جاسر وهو يلتفت اليها بعدما كان يتابع غادة قائلا: وهى اخت جوزك دى خلت فية عقل، بحبها ياناس.
ابتسمت اميرة قائلة فى مرح: طب اعقل كدة عشان اخوها لو سمعك هيعلقك ابتسم جاسر قائلا: ربنا يجعل كلامنا خفيف عليه، بالمناسبة، أخباركم ايه؟ قالت اميرة: الحمد لله انا وقصى تمام اوى قال جاسر فى مرح: انا وقصى وبالنبرة دى، على بركة الله، عقبالى أنا وغادة واقولها بنفس النبرة، يارب، عقباااااااااالى ضحكت اميرة قائلة: اعقل يامجنون تناهى الى مسامعها صوت قصى يهدر بقوة قائلا: أميرة.
التفتت اليه اميرة ونظرت الى ملامحه الثائرة وهو يقترب منهم فى توتر، تدل ملامحه على عراك قادم لا محالة، فأسرعت اليه تقول فى قلق: اهلا ياقصى، خير، انت مش قلت هتتأخر نظر اليها فى غضب قائلا: نسيت ملفات وجيت آخدها، ايه، الهانم كانت عايزانى أتأخر عشان تنزل ضحك ومسخرة مع ابن عمها ولا ايه؟ قال جاسر فى غضب: انت ياعم انت، بتقول ايه، أنا مسمحلكش اقترب منه قصى قائلا فى غضب وبنبرة تهديد واضحة:.
اول وآخر مرة تيجى البيت وانا مش موجود، و الشغل اللى بينكم هتفضوه و مش عايز... قاطعه صراخ غادة وهى تقول: أميرة التفت كل من قصى وجاسر لمكان اميرة فوجداها ملقاة على الأرض، فأسرعوا اليها وضمها قصى رافعا رأسها اليه فى جزع وهو يربت على خدها قائلا فى لهفة: أميرة، أميرة، ردى علية ياحبيبتى قال جاسر فى قلق: الموضوع كدة ميطمنش. لازم نوديها لدكتور.
نظر اليه قصى فى صرامة ثم تجاهله تماما وهو يقول لغادة حاملا اميرة ومتجها بها الى المنزل: اتصلى بالدكتور ياغادة وخليه ييجى حالا اومأت غادة برأسها وهى تسرع الى هاتفها لتتصل بالطبيب وقلبها يبتهل الى الله ان يكون كل شئ على مايرام، وان تكون تلك مجرد اغماءة سببها الاجهاد.
أفاقت أميرة على لمسة حانية على وجنتيها ففتحت عينيها ببطء لتقابلها عينى قصى الرماديتين الجذابتين ينظران اليها فى عشق فابتسمت لا اراديا وهى تقول: صباح الخير ياقصى اتسعت ابتسامة قصى قائلا: قولى مساء الخير ياقلبى، احنا بقينا المغرب نظرت اليه فى دهشة وكادت ان تتساءل ولكن ما لبثت ان عادت اليها الاحداث مرة واحدة فقالت فى حيرة: آخر حاجة فاكراها انك كنت بتتخانق مع جاسر وبعدين الدنيا لفت بية.
قال جاسر فى حنان: قلقتينا عليكى ياقلبى بس الدكتور طمنا نظرت اليه فى دهشة قائلة: وكمان دكتور ابتسم ناظرا الى عينيها مباشرة قائلا فى عشق: كان لازم اطمن عليكى ياحتة من قلبى ابتسمت فى خجل ثم مالبثت ان نظرت اليه قائلة فى لوم حاد النبرات: بس انا زعلانة منك ياقصى، ايه ده اللى بتعمله مع جاسر كل اما تشوفه، طب اعمل حساب لية وانه ابن عمى؟ قهقه قصى قائلا: ايه يابنتى، انتى بتتحولى.
نظرت اليه فى غيظ فاقترب من وجهها يتأمله فى عشق وهو يقول: بغير عليكى ياميرا ثم رفع يده ليمسك تلك الخصلة المتمردة من شعرها ويعيدها خلف أذنها وهو يستطرد قائلا: بغير عليكى حتى من الهوا لو لمس شعرك ومرر يده على وجنتها قائلا: ومن الشمس لو لمست وشك ومرر يده على شفتيها قائلا: ومن المية لو لمست شفايفك ثم اقترب من أذنها وهو يقول فى همس أذابها: بعشقك يااميرة، وبعشق التراب اللى بتمشى عليه.
ثم قبلها قبلة رقيقة على وجنتها تبعتها قبلات حارة على وجهها حتى اقترب من شفتيها لتتقابل الشفتين فى قبلة أودعا فيها كليهما حرارة عشق تغلغل داخل كيانهما ولم يتركها قصى سوى ليتنفسا ووضع جبهته على جبهتها وهو يقول: لو تعرفى بس بتعملى فية ايه؟ ابتعدت عنه اميرة تنظر اليه فى عشق وهى تمسك يده لتضعها على قلبها ذو الدقات المتسارعة قائلة:.
زى ما انت بتعمل فية بالظبط، أنا كمان ياقصى بحبك، بعشقك، وبغير عليك حتى من نفسى اسودت عينيه من الرغبة وهو ينظر الى وجهها الملائكى الجميل قائلا: عارفة انا نفسى فى ايه دلوقتى؟ نظرت الى عينيه التى تعشقهما قائلة: نفسك فى ايه ياحبيبى؟ ابتسم قصى قائلا: اللى نفسى فيه مقدرش أعمله، أوامر الدكتور ياقلب حبيبك نظرت اليه فى حيرة فاستطرد قائلا: آه، ما انا نسيت اقولك، انتى حامل ياقلبى اتسعت عينيها دهشة وهى تقول: حامل؟
ابتسم وهو يضع يده على بطنها والتى لم تظهر عليه آثار الحمل بعد قائلا فى حنان: بعد 8شهور ياميرا هتجيبى بيبى ابتسمت اميرة فى سعادة واسرعت تضمه قائلة: انا فرحانة اوى ياقصى ضمها قصى اليه واغمض عينيه قائلا: وانا فرحان اوى ياروح قصى اغمضت اميرة عينيها مستسلمة للسعادة التى منحها اياها القدر غير عابئة لما يخبئه لها من مفاجآت.
السلام عليكم.. نطقت غادة بتلك العبارة وهى ترد على ذلك الرقم الغريب فى هاتفها فاستمعت الى صوت تعرفه جيدا زاد من دقات قلبها يقول فى مرح: وعليكم السلام ورحمة الله وبركاته قالت فى توتر: مين حضرتك؟ قال الصوت ضاحكا: لأ، كدة ازعل لو معرفتيش صوتى، ده انا حتى عرفت صوتك اللى هيجننى ده علطووووول ابتسمت بداخلها ولكن صوتها ظل ثابتا وهى تقول فى حزم: لو مقلتش حضرتك تبقى مين، انا هضطر اقفل حالا.
احست غادة بابتسامة محدثها وهو يقول: خلاص ياستى متزقيش، أنا جاسر ابتسمت قائلة: جبت رقمى منين؟وحضرتك طالبنى ليه؟ قال جاسر فى هدوء: جبته من اميرة، وطالبك عشان محتاج أقابلك ضرورى صمتت غادة فاستطرد جاسر قائلا: لو تسمحيلى بس نتقابل فى مكان هادى ياغادة ونتكلم مع... قاطعته غادة قائلة فى حزم: آسفة يااستاذ جاسر، مش هقدر، قصى مش بيطيقك ومش هيرضى يخلينى اقابلك وانا متعودتش اعمل حاجة من ورا اللى بيهمونى.
ابتسم جاسر قائلا: وده يخلينى متمسك بيكى اكتر، لو على قصى متقلقيش هكلمه، انا بس عايز اعرف رأيك لو اتقدمتلك، توافقى ياغادة؟ اصابت غادة صدمة اعجزتها عن الرد، فلم تتفوه بكلمة، أفاقت من صدمتها على صوت جاسر يقول فى قلق: غادة، انتى معايا؟ قالت غادة فى خجل: اللى هيشوفه عمى امجد وقصى انا موافقة عليه ابتسم جاسر قائلا وهو يشعر بموافقتها الخجولة عليه: انا كدة قلبى ارتاح، حاجة اخيرة ياغادة عايز أقولهالك.
قالت غادة فى حيرة: اتفضل قال جاسر فى حنان: بحبك اضطربت غادة وازدادت دقات قلبها واغلقت الهاتف بسرعة وهى لا تصدق تصريحه لها بحبه هكذا، ثم ما لبثت ان ابتسمت فى سعادة وهى تقول: مجنووون.
خلاص خلصت، ايه رأيك بقى؟ نطقت اميرة بتلك العبارة وهى ترفع يدها الممسكة بماكينة الحلاقة وتبتسم فى استحسان وهى تنظر الى وجه قصى الذى ازداد وسامه بعد ان قامت بحلاقة ذقنه، فنظر الى ابتسامتها الجميلة وهو يمسك يدها ويرفعها ويمررها على وجنته قائلا فى همس: ايه رأيك انتى؟ ازدادت دقات قلبها وهى تستشعر نعومة بشرته أسفل يدها ونظرت الى عينيه قائلة فى عشق: حبيبى قمر، مفيش كلام.
ابتسم وهو يميل ليقبل يدها التى على وجنته قائلا: لما انا قمر حبيبتى تبقى ايه؟ أخذت يده الممسكة بيدها وضمتها الى صدرها قائلة فى سعادة نطقت بها ملامحها: قصى انا بجد مش مصدقة السعادة اللى انا عايشاها معاك، مش مصدقة انك بقيت بتحبنى وبتخاف عليه وأنزلت يده ووضعتها على بطنها قائلة: ومش مصدقة انى هجيب منك بيبى، حاسة انى هصحى فى يوم ألاقى كل ده حلم وانك لسة مسافر وسايب قلبى مكسور.
نظر الى ملامحها التى تسلل اليها الحزن مع عبارتها الأخيرة، وذكرى ذلك اليوم تسيطر عليها فربت بيده على بطنها ثم امسك بيدها واجلسها على قدميه وهو يضمها اليه قائلا: اللى احنا عايشينه مش حلم يااميرة، دى احلى حقيقة كان لازم نعيشها من زمان، انتى لازم تعرفى... قاطعه صوت طرقات سريعة على الباب فابتعدت اميرة بسرعة وهى تتجه الى الباب لتفتحه فوجدت والدتها فى حالة انهيار وهى تقول:.
الحقونى ياولاد، أمجد وقع ومبيردش علية.
كانت اميرة تجلس بجوار والدتها تربت على يدها وتمسح دموعها فى صمت حزين، مالبثت ان قاطعته سعاد قائلة: انا هقوم ادخل الاوضة اتوضى واصلى وادعيله.
اومأت اميرة برأسها فقامت سعاد واتجهت الى الحجرة، نظرت اميرة الى قصى فى حزن، كان يقف مستندا بجبهته على تلك الواجهة الزجاجية لغرفة العناية المركزة ينظر الى ابيه وكأن روحه معلقة داخل تلك الحجرة فاتجهت اليه فى هدوء وامسكت بيده فى صمت واستندت الى كتفه، انتبه قصى اليها فرفع يده وضمها الى جانبه قائلا: روحى ارتاحى شوية يااميرة عشان خاطر ابننا نظرت الى وجهه الحزين قائلة:.
راحتى معاك ياقصى، مش هقدر ارتاح غير لما اشوفك مرتاح ابتسم لها بحنان وكاد ان يقول شيئا لولا سماعه صوت غادة يقول بلهفة: اخبار عمى ايه دلوقتى؟ التفتوا اليها وقال قصى فى هدوء: الحالة مستقرة الحمد لله، جبتى الحاجة من البيت؟ اومأت برأسها وهنا جاء جاسر قائلا: ايه الأخبار ياجماعة؟ نظر قصى اليه قائلا: الحمد لله ياجاسر قال جاسر: ربنا يشفيه ويعافيه يارب قال قصى:.
يارب، انا مش عارف اشكرك ازاى ياجاسر على وقفتك جنبنا رغم اللى حصل بينا ربت جاسر على كتف قصى قائلا: انتوا عيلتى ياقصى واحنا اخوات.
نظر اليه قصى بامتنان ثم التفت لينظر الى والده فى صمت ووقفت اميرة الى جواره فالتفت جاسر الى غادة فوجدها تتأمله باعجاب تحول لخجل وهو يضبطها متلبسة بتأمله، كاد ان يبتسم فى سعادة ولكنه تمالك نفسه وهو يشير لها بالجلوس فاطاعته على الفور ليجلس الى جوارها يود لو يضمها بين ذراعيه ليرتاح قلبه الذى يهفوا اليها، ولكن يكفيه وجودها بجواره، مؤقتا.
انطق ياعزت بدل ما أكسرلك ايدك التانية قال سعيد تلك العبارة فى حدة ليصرخ عزت قائلا فى هستيرية: لأ خلاص ياباشا، أبوس ايدك، أنا هقول على كل حاجة، اللى خلانى أسرق الورق يبقى آوس بيه عقد سعيد حاجبيه قائلا: لأ بالراحة كدة ياعزت واحكيلى بقى سى آوس ده يطلع مين؟ حكى له عزت كل ما يعرفه ليشعر سعيد بالغضب الشديد ويقبض يديه بقوة ليقول فى حدة:.
يعنى آوس جوز حنان ورا كل حاجة، هو اللى خطف حور وأخد الورق وعايز كمان يسجنى، ماشى ياآوس، هنشوف مين اللى هيضحك فى الآخر ومبقاش انا سعيد المنياوى ان مكنش موتك يبقى على ايدى قال عزت فى توسل: انا غلطت ياباشا، بس قلتلك على كل حاجة حتى المكان اللى مخبى فيه ست حور، ابوس ايدك سيبنى امشى واوعدك انك مش هتشوف وشى ابدا نظر اليه سعيد قائلا فى برود: من الناحية دى انا مش قلقان خالص لأنى أكيد مش هشوف وشك تانى.
وقرن قوله بتوجيه سلاحه الى عزت واطلاقه لرصاصة استقرت فى قلب عزت التى جحظت عيناه ليغمضها بعد ذلك وقد فارق الحياة، ليبصق عليه سعيد قائلا باحتقار: ده جزاء اللى يخون سعيد المنياوى ثم استطرد وعيناه تنطقان بالشر: حسابك معايا بقى تقيل ياآوس، أنا هخليك تندم انك وقفت يوم فى طريقى.
قال آوس لطارق عبر الهاتف: تمام ياطارق، أنا مستنيكم، بس خلى رقية تكلمنى لما تصحى، هى بقت أحسن مش كدة؟ زفر طارق بقوة قائلا: أيوة بقت أحسن الحمد لله، بس انا اللى حالتى بقت صعبة اوى ياآوس قال آوس فى حيرة: مالك ياطارق؟ قال طارق:.
معنتش قادر أخبى مشاعرى ياآوس، تعبت ياأخى، افهمنى بقى، طول الوقت ادامى ومش قادر اعبر لها عن حبى، شايفها بتتعذب ادامى ومش قادر اخدها فى حضنى واقولها اطمنى انا جنبك، مش عشان انا زى أخوكى، لأ، عشان بحبك، بحبك اوى يارقية، مش بس بحبك دلوقتى لأ، بحبك من زمان ولولا وعدى لأخوكى انى مقولكيش ع اللى فى قلبى لغاية ماتكبرى وتقدرى تحددى مشاعرك من ناحيتى، كنت قلتهالك من زمان، زمان اوى تنهد آوس قائلا:.
والله انا حاسس بيك دلوقتى اكتر من اى وقت فات واوعدك لما ترجع هنحط النقط ع الحروف، خلى بالك بس منها وارجعوا بسرعة قال طارق: قلتلك راجعين مصر فى الطيارة اللى هتقوم كمان 4ساعات، ومتقلقش رقية فى عينية ياآوس، مش هتوصينى على حبيبتى، سلام اغلق الهاتف والتفت ليرى رقية تقف امامه تتساقط دموعها بصمت، اقترب منها بلهفة قائلا: مالك يارقية، حصل حاجة تانية؟ نظرت الى ملامحه تتأمله لثوان ثم قالت بصوت هامس:.
انت بجد بتحبنى ياطارق؟ تجمد طارق مكانه، ظن انه ربما سمع سؤالها فى خياله فقط لتقترب هى منه وتمسك يده قائلة: بتحبنى ياطارق؟ قال طارق بارتباك: أنا، أنا.. نظرت الى عينيه برجاء أن لا ينكر ما سمعته وتكاد لا تصدقه قائلة: ماتحاولش تخبى، انا سمعت كل حاجة، بس محتاجة اسمعها منك انت عشان أتأكد انى مكنتش بحلم وانك فعلا بتحبنى زى ما بحبك تمسك بيدها التى تمسك بيده ليقول فى لهفة: انتى... قاطعته قائلة فى همس محب:.
بحبك ياطارق، بحبك من زمان اوى ضمها الى صدره قائلا فى سعادة: وانا كمان بحبك، لأ بحبك ايه، أنا بعشقك ومن زمان اوى، انا مش مصدق نفسى ياروكا، حاسس انى بحلم ابتسمت رقية داخل حضنه وقرصته فتأوه وهو يبعدها عن حضنه دون ان يتركها بل ظلت فى محيط زراعيه قائلا فى دهشة: طب ليه كدة بس؟ ابتسمت رقية قائلة فى خجل:.
اولا، عشان تتأكد انك مبتحلمش، ثانيا عشان الوقت اللى ضيعته من عمرنا وعذابى كل يوم وانا فاكرة انى بالنسبة لك مش اكتر من أخت ضمها مرة اخرى قائلا فى حنان: انا وآوس خفنا تكونى لسة صغيرة على مشاعرى ياقلبى وآوس عارف اد ايه كبيرة وهتغرقك ياحبيبتى ابتعدت تنظر اليه فى عشق قائلة: انى أغرق فى بحر حبك أحسن ما اغرق فى بحر الشك بانى مش هنا أصلا ياطارق.
وأشارت الى قلبه بيدها فأمسك يدها وقبلها فى حنان ثم وضعها على قلبه قائلا: انتى هنا من يوم ما عرفتك ياروكا، من اول لحظة شفتك فيها بضفايرك الشقرا وعيونك الخضرا، ساعتها قلبى رفع رايته واستسلم لحبك ياحبيبتى ابتسمت رقية قائلة: يااه ياطارق، ضيعنا وقت كتير بس ملحوقة وآوس حسابه معايا لما انزل مصر قال طارق ضاحكا: سيبى آوس فى حاله، ده حكايته حكاية هو كمان، وشكله طب وهيسمعنا خبر حلو قريب.
عقدت رقية حاجبيها فى حيرة ثم مالبثت ان التمعت عيناها بفرحة قائلة: تقصد انه حب من جديد، بجد ياطارق؟ ابتسم قائلا: بجد ياقلب طارق، وتعالى واحنا بنحضر الشنط احكيلك عن آوس وسجينة انتقامه اللى اتحولت بعدها لسجينة قلبه.
تحميل محتوى الموضوع
عرض نسخة صالحة للطباعة
أرسل هذا الموضوع إلى صديق
[7]
الدعوات : 2قوة السمعة : 10
رواية سجينة قلبه