كانت سارة تسرع بالصعود لحجرتها وهى تكتم دموعها حتى استوقفتها يد تسحبها بقوة فالتفتت الى صاحب اليد لتجده آدم، نظرت الى عينيه في تساؤل فوجدته يتأمل تلك الدموع الحبيسة في مقلتيها بقلق وهو يقول: رايحة فين؟ اخفضت نظراتها وهى تشعر بالدهشة لاهتمامه قائلة: طالعة اوضتى تنحنح آدم قائلا: احمم، ممكن متزعليش؟ رفعت عينيها لتقابل عينيه في حيرة فاستطرد قائلا:.
انا مش هقدر ابرر تصرفات اهلى، بس كل اللى اقدر اقوله انهم معذورين، أصل... وبدا مترددا وهو يقول: اصل ياسارة انتى ناسية انتى كنتى ايه، وبتتعاملى معاهم ازاى سقطت دموعها رغما عنها وهى تقول: يااااه، قد كدة كنت وحشة؟
صمت آدم فأدركت سارة الاجابة فنفضت يده وصعدت الى حجرتها بسرعة ودموعها تنهمر تتبعها اعين آدم الذى أراد التخفيف عنها فزاد الطين بلة، زفر بقوة وهو يخلل شعره بأصابعه ثم اتجه الى خارج المنزل وهو في حيرة من أمره، لماذا يهتم بها بعد كل مافعلته معه؟لمااااذا؟
قلتلك ريحى دماغك ياماما قالت كريمة تلك العبارة في ضجر فقالت عايدة في حدة: يعنى ايه اريح دماغى؟يابت اتلحلحى شوية، سارة هتاخده منك تانى، انتى مش شايفة اتنرفز عشانها ازاى؟ قالت كريمة في نفاذ صبر:.
يعنى اعمل ايه ياماما؟طول عمرك بتقوليلى انتى لآدم وآدم ليكى وانا صدقتك ورغم انى محبتهوش بس قلت آدم ابن خالى طيب ومناسب، ولما اتجوز الزفتة دى، قلت خلاص ده نصيب وقبلت بكدة، منكرش انها متستاهلوش بس بقى بينهم طفلة، ولما اختفت السنة اللى فاتت قلت يمكن تبقى دى فرصتى لكن هو فضل مش شايفنى وانا فقت من اوهامى، دلوقتى سارة رجعت وحاساها متغيرة، طب ياستى حتى لو مش طايقاها فده برده مش معناه انى ابقى عايزاه يطلقها، عشان خاطر نورسين حتى، سيبيهم يحاولوا وسيبينى اعيش حياتى بقى.
قالت عايدة في غضب: الله في سماه، ماأسيبك ابدا، انتى لآدم وآدم ليكى مهما طال الزمن، وانتى لو مبطلتيش الغباء اللى ورثتيه من ابوكى ده، لا انتى بنتى ولا اعرفك نظرت اليها كريمة في غضب قائلة: يعنى عايزانى اعمل ايه دلوقتى؟ نظرت اليها عايدة قائلة في خبث: انا بردوو هقولك تعملى ايه؟اشغليه ياعبيطة وخليكى قدامه علطول، متسيبيش فرصة للعقربة دى تلف عليه من تانى نظرت اليها كريمة في استسلام قائلة:.
حاضر ياماما هعمل اللى يريحك ربتت عايدة على كتفها قائلة: هو ده الكلام ياحبيبتى، ربنا يسعد قلبك وينولك اللى في بالك قالت كريمة في همس: قصدك اللى في بالك انتى ياماما نظرت اليها عايدة قائلة: بتقولى حاجة ياكرملة؟ قالت كريمة وهى تغادر الحجرة بسرعة: وانا هقول ايه يعنى، سلام ياماما وغادرت الحجرة تتبعها عينا عايدة وهى تفكر كيف تجبر سارة على الرحيل من ذلك المنزل، كيف؟
كان آدم يجلس في شرفة حجرته يشرب قهوته ويتابع الأخبار على هاتفه المحمول حين تناهى الى سمعه صوت ضحكات سارة ونورسين فوقف ينظر الى الحديقة حيث وجدهما يلهوان معا بالماء فابتسم في حنان ثم عقد حاجبيه في شرود أفاق منه على يد توضع على كتفه فالتفت ليجد أخاه آنس ينظر اليه قائلا وهو يشير الى سارة: متغيرة، صح؟ التفت آدم لينظر الى سارة التى تلهو مع نورسين قائلا: جدا وقف آنس الى جواره يتابعهم هو أيضا وهو يقول:.
وكأنها واحدة تانية أومأ آدم برأسه قائلا: سارة اللى اتجوزتها كانت جميلة آه، لكن من برة بس، بانت حقيقتها لما اتجوزتها، ظهرت انانيتها وجشعها، كرهت كل حاجة فيها، وكرهتها اكتر لما... شعر آدم بالمرارة في حلقه وهو يستطرد قائلا: انا كنت فكرت انى خلاص قفلت الصفحة دى من حياتى لغاية لما قريت عن الحادثة قال آنس: وبقلبك الكبير مقدرتش تسيبها زفر آدم قائلا: وياريتنى سيبتها ياآنس، انا حياتى اتلخبطت من يوم ما شفتها تانى.
نظر اليه آنس قائلا في هدوء: رجعت تحبها؟ نظر اليه آدم قائلا: اكتر م الاول، اللى قدامى دى هى اللى كان نفسى فيها بجمالها ورقتها وخجلها، بطيبتها وامومتها قاطعه آنس قائلا: مش مهم كل ده المهم انك تكون من جواك مسامحها هز آدم رأسه نفيا قائلا في حزن: مش قادر ياآنس، مش قادر أسامحها، مش قادر عقد آنس حاجبيه قائلا: بس كدة انت بتعذب نفسك نظر اليه آدم قائلا وهو يتفحصه: الظاهر ان عيلة الصياد مكتوب عليها تتعذب في حبها ياآنس.
اخفض آنس عينيه فرفع آدم ذقنه بيده لتتلاقى عيناهما وهو يقول: انت فاكر انى مش حاسس بيك وقد ايه شايفك بتتعذب ابتسم آنس في الم قائلا: ويفيد بإيه، انا حبى من طرف واحد ابتسم آدم قائلا: اصبر عليها ياآنس، انت عارف عمتك وزنها، ثم استطرد في مزاح قائلا: انا مش فاهم عمتك ليه مش شايفاك وعينيها علية أنا وبس، ده كفاية عينيك دى ابتسم آنس قائلا في مرارة:.
طول عمرك الكبير بتاعنا ياآدم ده غير الشبه اللى بينك وبين بابا الله يرحمه، ده انت نسخة منه وانت عارف هى كانت بتحبه أد ايه هز آدم رأسه قائلا في حزن: ربنا يرحمه ويهديها قال آنس: يارب، مقلتليش يا آدم، هتعمل ايه؟ نظر آدم الى سارة وهو يقول: مش عارف ياآنس، بجد مش عااارف.
كان آدم يتجه لغرفته عندما استوقفته همهمات باكية تأتيه من داخل الغرفة الخاصة بسارة، طرق الباب طرقات خفيفة ولم يأته جواب مما اصابه بالقلق ففتح الباب بهدوء ودلف الى الداخل فرأى سارة نائمة على سريرها تنتفض وكأنها تعانى كابوسا، اقترب من سريرها مناديا اياها بهمس قائلا: سارة.
لم تستجب لندائه فكرر النداء بصوت اقوى وهو يلاحظ تلك الدموع المتساقطة من عينيها وحبيبات العرق التى تغرق جبينها، اقترب اكثر عندما ازداد انعقاد حاجبيها وظهر على وجهها الألم فهز كتفها بقوة قائلا: فوقى ياسارة فتحت سارة عينيها مرة واحدة وكادت ان تصرخ ولكنه كمم فمها بسرعة قائلا: اهدى ياسارة، انا آدم نظرت اليه في حيرة ثم نظرت الى ارجاء الغرفة ومن ثم عادت اليه بعينيها فأزال يده وهو يقول:.
انا كنت رايح اوضتى، بس سمعتك بتعيطى فقلت اطمن عليكى، شكله كابوس، صح؟ اومأت برأسها فجلس الى جانب السرير مما أدى الى اضطرابها والذى ازداد وهو يقول: ينفع تحكيهولى؟ نظرت الى عينيه في تردد قائلة: أصله غريب، انا نفسى مش فاهماه قال يستحثها: طيب قولى، جايز اقدر افسرهولك تلعثمت قائلة: كنت يعنى، بتخانق مع، مع، اومأ برأسه يستحثها على الكلام قائلا: مع مين؟ نظرت الى عينيه في حيرة قائلة: مع نفسى عقد حاجبيه قائلا: ازاى يعنى؟
هزت كتفيها قائلة: معرفش، في الحلم كنا اتنين انا ونفسى وكنت بتخانق معاها وبلومها على حاجات انا مش مصدقة انى ممكن اعملها شرد آدم قليلا يفكر ولكنه افاق على صوتها يقول في تردد: آدم هو انا، يعنى، كنت ازاى قبل الحادثة؟ نظر اليها للحظات خيل لها فيهم انه لن يجيب خاصة وقد قست ملامحه ولكنه ما لبث ان قال:.
كنتى واحدة تانية خالص غير اللى قدامى دلوقتى، انا مش عارف ازاى ممكن الواحد يتغير 360درجة بالشكل ده، الصراحة، حقيقتك مظهرتش غير بعد الجواز، انسانة انانية ومستهترة ومبيهمكيش حد استوقفه ظهور الالم في عينيها ولكنها استحثته قائلة: كمل ياآدم، لو سمحت متخبيش علية حاجة أخفض نظره عنها فالألم في عينيها يقتله وهو يقول:.
كنت خلاص بدأت افكر في الطلاق بس لما عرفت انك حامل، قلت دى ارادة ربنا ولازم اكمل عشان خاطر الطفل اللى بينا، وقلت يمكن لما تخلفى تتغيرى، لما جبتى نورسين، مع الأسف كنتى أم أسوأ كمان من زوجة، مرضتيش ترضعيها ولا حتى تيجى جنبها واهملتيها، كان اهم حاجة عندك حفلاتك وصاحباتك وانا كان اهم حاجة عندى نورسين، لغاية... صمت قليلا فاستحثته قائلة في الم: لغاية ايه ياآدم؟ نظر الى عينيها قائلا في حزن:.
لغاية لما بدأت أشك فيكى، مشيت وراكى وشفتك طالعة شقة، طلعت وراكى وشفته بيفتحلك الباب وبياخدك في حضنه شهقت سارة فاستطرد آدم قائلا: الدم غلى في عروقى، اتهجمت عليكم انتم الاتنين وكنت هرتكب جريمة لولا الناس اللى خلصوكم منى، سبتكم ومشيت مش شايف قدامى مفوقتش غير وانا واقف ع الكورنيش ولما رجعت البيت مشفتكيش من يومها ولا عرفت حاجة عنك لغاية ماشفت الخبر في الجرنال كانت الدموع تنهمر من عينيها وهى تقول في صدمة:.
مش معقول، انا ازاى كنت بالقذارة دى.
اغمض آدم عينيه في الم وتعجب من نفسه وتسائل لماذا وقع في حبها مجددا رغم انه الوحيد الذى يعلم حقيقتها، نعم فهو لم يخبر أحدا قط، لم يستطع ان يشوه صورتها امامهم. ربما من اجل طفلتهما او من اجل كرامته، انه حقا لا يدرى، استمع الى شهقاتها في حزن وتساءل أيضا لم لا يستطيع ان يعامل سارة التى امامه الان على انها سارة الخائنة التى ود في يوم من الايام قتلها، كيف تسللت الى قلبه، كيف سامحها بتلك السهولة، كيف يراها فتاة اخرى لا تشبه زوجته سوى بملامحها، انتبه من شروده على صوتها يقول في حزن:.
انا مش قادرة اصدق انى كنت بالبشاعة دى، انا كنت بحس انى شبه البنت اللى بشوفها في احلامى عقد حاجبيه قائلا: بنت ايه؟ قالت في حزن: هى أنا، نفس الملامح لكن مش نفس التصرفات، بشوف نفسى بساعد واحدة كبيرة، وبحن على واحد غلبان واسمه عم سعيد، بشوف نفسى مرشدة سياحية وبتكلم مع اجانب و... قاطعها آدم قائلا في حسم: مستحيل طبعا، سارة مكنتش بتعرف لغات نظرت الى عينيه قائلة في حيرة: بس أنا أعرف ومش لغة واحدة، 4لغات.
نظر اليها في دهشة قائلا: طب ازاى وامتى؟ هزت كتفيها قائلة في حيرة: مش عارفة، كمان فيه اسم بسمعه كتير وحاساه قريب منى زى اسم سارة بالظبط. قال آدم: اسم ايه؟ تنهدت سارة قائلة: سلمى ردده آدم قائلا: سلمى؟ اومأت برأسها قائلة وهى تمسك رأسها ألما: انا معنتش قادرة افكر، كل ما افكر، دماغى توجعنى قال آدم وهو ينهض:.
اهم حاجة دلوقتى متحاوليش تفكرى ياسارة، الاحتمالات كتيرة، جايز اتعلمتى لغات في السنة اللى فاتت او حتى كنتى بتضحكى علية وانتى اصلا تعرفى لغات، جايز سلمى دى صاحبتك، الموضوع معقد واحنا تعبانين ومش هنقدر نفكر دلوقتى او نفهم حاجة، خلى كل حاجة لوقتها نظرت اليه سارة قائلة بحزن: انا بقيت بخاف افكر، بخاف افتكر الاقينى وحشة فعلا وبخاف مفتكرش افضل تايهة زى ما انا قال آدم: قولى يارب، هو قادر يحلها من عنده.
تنهدت سارة قائلة: ونعم بالله القى عليها نظرة اخيرة وهو يقول: انا هروح انام وانتى كمان، حاولى تنامى نظرت اليه سارة قائلة في تردد: آدم، انت، انت ازاى قادر تتعامل معايا بعد اللى حصل؟ نظر الى عينيها مباشرة بنظرة جعلتها تتضطرب وهو يقول: قلتلك، حاسس انى بتعامل مع واحدة تانية خالص، كل المشترك بينها وبين مراتى اسمها وشكلها. اخفضت عينيها وهى تقول: طب ليه مطلقتنيش لما، قصدى يعنى لما، زفر آدم بقوة وهو يقول:.
مش عارف ياسارة، مش عارف، مش يمكن قدر؟ رفعت عينيها اليه في حيرة فقال في هدوء: كفاية بقى أسئلة تصبحى على خير أومأت سارة برأسها قائلة: تلاقى الخير غادر الحجرة مثلما دخلها في هدوء ولكنه ترك خلفه عاصفة من الأحاسيس اجتاحت قلب سارة التى شعرت بنفسها تغرق وبشدة في حب ذلك الرجل نادر الوجود، زوجها.
عشان خاطرى يادومى خدنى معاك نطقت كريمة بتلك العبارة في دلع وهى تنظر الى ملامح سارة التى بدت باردة وهى تأكل طعامها في هدوء ثم نظرت الى آدم الذى قال: مش هينفع ياكرملة، عندى meating مهم انهاردة ومش هبقى فاضى قالت كريمة وهى تتذمر كالأطفال: كدة يادومى هزعل والله قال آنس في حدة مخاطبا كريمة: ما قالك مينفعش، انتى ايه مبتفهميش؟ شهقت كريمة قائلة في غضب: ايه اللى انت بتقوله ده، انت اتجننت ياآنس؟
نهض آنس قائلا وقد عاد اليه بروده: انا خلاص شبعت، سلام تابعه آدم بعينيه في حين قالت كريمة: ماله ده؟اوووووف ثم نظرت الى جيدان قائلة: هى ماما فين ياطنط جيجى؟ نظرت اليها جيدان قائلة: مش عارفة ياحبيبتى، خرجت م الصبح بدرى ولما طلبتها مردتش اومأت كريمة برأسها ثم نظرت الى سارة الصامتة وهى تقول: وانتى لسة مفتكرتيش حاجة ياسارة؟ نظرت اليها سارة قائلة: لسة قالت كريمة في سخرية: والله شكلك فاكرة وبتشتغلينا.
هدر آدم في قوة قائلا: ايه اللى انتى بتقوليه ده؟ نظرت اليه كريمة في غيظ قائلة: مالك ياآدم؟ قال آدم في صرامة: لآخر مرة هقولهالك، خليكى في نفسك وملكيش دعوة بحد جزت كريمة على اسنانها قائلة وهى توجه الحديث لجيدان: عاجبك كدة ياطنط؟ قالت جيدان في هدوء: اسمعى كلام آدم ياكرملة، وخليكى في نفسك، وبلاش تسمعى كلام حد او تقلديه، انتى في الآخر اللى هتخسرى وهتخسرى كتير كمان.
احتبست الدموع في عينى كريمة وأسرعت بالنهوض ومغادرة الفيلا وعيون الجميع تتابعها قالت سارة: مكنش لازم ياآدم تطلع فيها بالشكل ده... قاطعتها جيدان قائلة: لأ كان لازم يابنتى، هو عمل الصح، كان لازم يوقف كرملة من دلوقتى قبل ماالموضوع يتطور، حتى لو كنتى غلطتى قبل كدة فمن يوم ما رجعتى واحنا مشفناش منك غير كل طيب نظرت اليها سارة في حيرة وهى تلاحظ الحنان في صوتها، استطردت جيدان قائلة:.
مش مهم كنتى ايه، المهم انتى دلوقتى ايه، متنسيش ده ابدا ياسارة امتلأت عينا سارة بالدموع ولم تنطق نظرت جيدان الى آدم قائلة: ياريت تبدأو صفحة جديدة وتعيشوا حياتكم زى اى اتنين متجوزين، انسوا اللى فات ياولاد، عشان خاطر نورسين نظر آدم الى سارة التى بادلته نظراته حتى انهم لم يشعروا بجيدان التى غادرت الحجرة بهدوء، لفهما الصمت للحظات حتى قطعته سارة قائلة في حزن: تفتكر ممكن؟ تأمل آدم ملامحها قائلا:.
مش عارف بس لازم نحاول قالت في الم: ولو رجعتلى الذاكرة ورجعت زى الاول؟ قال آدم في ثقة: مش هسمحلك ترجعى زى الاول، هنحارب سارة القديمة ونتمسك بسارة اللى قدامى دلوقتى نظرت الى عينيه التى تعشقهما فمشاعرها نحوه لا توصف سوى بالعشق، وما لبثت ان تسللت البسمة لشفتيها فابتسم آدم بدوره وهو ينهض قائلا وهو يقترب منها: آجى انهاردة ألاقى حاجتك في اوضتى، هنبدأ من اول وجديد، وكأننا لسة بنتعرف على بعض.
شعرت سارة بنبضاتها تزداد كلما اقترب منها حتى اصبح خلفها تماما فمال عليها وهو يقترب من أذنيها قائلا في همس: مش هتأخر اغمضت عينيها في سعادة ثم فتحتهما، التفتت فلم تجده، وضعت يدها على قلبها تهدئ ضرباته وهى تتمنى ان لا يكون كل ماحدث الآن هو احدى احلامها، هذا ماتتمناه حقا.
تحميل محتوى الموضوع
عرض نسخة صالحة للطباعة
أرسل هذا الموضوع إلى صديق
[4]
الدعوات : 2قوة السمعة : 10
رواية الماضي المجهول