رواية عشقت المتمردة

رواية عشقت المتمردة للكاتبة الشيماء محمد الفصل الخامس

في يوم ندي صحيت على دوشه فقامت ولبست ونزلت واتفاجئت بحد موجود جنتل قوي وعجبها جدا
كريمه: تعالي يا ندي مفيش حد غريب ده امجد اخو ادم وايتن
امجد بصلها وما تخيلش ابدا ان في حد بالجمال ده!
امجد: يا اهلا اهلا بالجمال الامريكي
ابتسمت ندي لأمجد...
ندي: انت بقي امجد؟
امجد: ايه ده انا مشهور هنا ولا ايه؟
ندي: لا مش قوي بس اسمك بيتذكر بس ديما مربوط بألقاب مش حلوه.

امجد ضحك بخفه: اممم اكيد طبعا المعقد ادم، سيبك منه ده جد بطريقه اوفر قوي والحياه ابسط من كده، الحياه جميله c est la vie
ندي: اهمم وانت بقي مش زيه؟
امجد: انا على النقيض تماما في كل حاجه
هنا ادم دخل واتكلم بالصعيدي: فعلا يعني عتلاجيه تافه فاشل ماعيتكلمش ولا كلمه جد، مالوش اي اهتمامات او انتماءات، عايش اكده وخلاص
امجد بالصعيدي بيقلد اخوه: استني اكمل انا، عايش زي البهيم ياكل ويشرب وينام صوح؟

ادم دخل وامجد راح عليه وحضنوا بعض يسلموا على بعض وشافت حب بجد بينهم على الرغم من الاختلافات الواضحه
ادم: حمد الله على السلامه، اتمني تكون خلصت فسح علشان تشوف كليتك وتخلص وتخلصني انا منك؟
امجد: ليه هو انت على ذمتي علشان اخلصك؟ وبعدين على افتراض اني خلصت هتخلص مني ازاي؟ هتتبري مني ولا ايه؟
ادم: مش هتبري بس اخلص بجي ما زهقتش؟
امجد: حاضر حاضر يا سي ادم، بس ما قولتليش انها قمر كده!

ندي استغربت انهم سبق اتكلموا عنها
ادم بصلها وبص لاخوه
ادم: اطلع ريح وانا هروح عندي شغل مهم عخلصه
سابهم ادم وخرج وهيا فضلت كتير تبص للباب اللي خرج منه وكأن خروجه عمل فراغ في المكان
امجد: ايه وصلتي لفين؟
ندي: هاه لا ابدا
امجد: بقولك تفطري معايا؟
ندي: ok no problem
امجد: ok that s good
ندي: you speak English?
امجد: yes.
ندي: اخيرا حد هيفهمني في البيت ده.

فطروا مع بعض واكتشفت شخصيه لذيذه جدا في امجد واتمنت لو اخوه يبقي زيه...
اخر النهار ادم طلع اتغدي مع الكل وطلع اوضته يغير هدومه
ندي: انت نازل تاني؟
ادم: ايوه في مشكله في بلد جنبنا ورايح هناك
ندي: مشكله ايه؟
ادم: خناقه وان ما اتلمتش في اولها هيكون فيها دم
ندي: نظام تار وكلام فاضي من ده؟
ادم: التار مش كلام فاضي دي مشكله بتقابل معظم الصعيد
ندي: ده تخلف وهمجيه ورجعيه
ادم: ماشي ياست المتعلمه.

ادم بيلبس وهيا بتراقبه فبيلبس الشوز بتاعه
ندي: معقوله Timberland
ادم جمد للحظه وما تخيلش انها هتراقب كل حاجه
ادم: افندم؟ بتقولي ايه؟يطلع ايه ده؟
ندي: your shoes
ادم: رطنت اهي
ندي: جزمتك
ادم: مالها؟
ندي: ماركه عالميه فمستغربه انك بتلبس الماركه دي؟
ادم: وهو حتي الجزم فيها ماركات؟ وبعدين اللي بيلبسوا ماركات احسن مننا في ايه؟
ندي: مش قصدي بس اقصد انت عرفتها منين؟
ادم مش عارف يقول ايه: امجد جابهالي.

ندي: اه كده معقوله
ادم فضل كتير يبص لخيبه املها وفي الاخر مشي
امجد اخد اسبوع في البلد وطول الاسبوع ندي ما بتفارقوش ابدا وادم ملاحظ ده
امجد: مراتك دمها خفيف قوي
ادم: كويس انك فاكر انها مراتي
امجد: تقصد ايه يا ادم؟
ادم: ما اقصدش يا امجد
امجد: لا سيب اللي في ايدك ده وقولي تقصد ايه؟ انت متخيل ان انا ممكن ابصلها بطريقه مش كويسه يا ادم؟ انا بعتبرها زي ايتن
ادم ساب اللي في ايده ورد بتعب واجهاد ظاهرين.

ادم: عارف يا امجد انك بتعتبرها كده بس المشكله مش فيك المشكله فيها
امجد: لا يا ادم المشكله فيك انت، انت لو ظهرت بطبيعتك قدامها هتعشقك
ادم: وهو انا مش بطبيعتي؟
امجد: لا طبعا انت واخد دكتوراه في امريكا وبتتكلم كذا لغه وقدامها الصعيدي القفل اللي ما يفهمش اي شيء.

ادم: لا طبعا ده مش صح، هو علشان انا مش لابس ماركه ومش بعوج لساني وانا بتكلم ابقي مش قد المستوي؟ امجد انا بطبيعتي قدامها بس مش بذوق نفسي فهيا لو هتتقبلني لشكلي يبقي ما تلزمنيش انا مش عايزها تعشقني لشكلي واستايلي لو هتحبني يبقي لطبيعتي، للانسان اللي جوايا فهمت؟
امجد: برضه التوافق مهم
ادم: مهم بس مش هو الاساس
امجد: المهم لو متضايق من كلامي معاها هبطله.

ادم: لا طبعا انت ارحم من غيرك على الاقل مطمن وهيا معاك، انا هسافر مصر يومين وارجع عندي مشاكل في الشغل وانت خلي بالك منها هنا في غيابي
امجد: اوك تمام
ادم مراته عرفت من امجد انه مسافر فطلعتله تجري
ندي: انت مسافر القاهره؟
ادم: ايوه
ندي: هاجي معاك
ادم: انا مسافر صد رد هتتعبي
ندي: لا مش هتعب ارجوك عايزه اغير جو البلد ارجوك وكمان اشوف بابا ارجوك يا ادم دي اول مره اطلب منك حاجه.

ادم: هروح بعربيتي هتستحملي الطريق؟
ندي: اه
ادم: قدامك نص ساعه وهنتحرك اجهزي بسرعه
ندي جريت عليه وباسته في خدته وجريت تجهز وهو فضل واقف مكانه ايده على خده مكان ما باسته
مستغرب هو ليه مشاعره كلها بتتفاعل معاها؟
نزلوا الاتنين مع بعض
امجد: ايه ده بقي؟ هتسيبوني هنا لوحدي ولا ايه؟ طيب ادم هاجي معاك
ادم: يا الله حاسس انكم اطفال
امجد: اديني تلات دقايق.

طلع يجري وفعلا دقايق ونزل واتحركوا كلهم وطول الطريق ندي وامجد مش مبطلين رغي وضحك وندي بتتعمد تكلمه بالانجليزي علشان ادم ما يفهمش او تضايقه اكتر او تحسسه انها متفاهمه مع اخوه اكتر منه؟ المهم ان كل كلامها مع امجد بالانجليزي.

وهو بدأ يتضايق ايوه بيثق في اخوه بس الموضوع بقي اوفر قوي، وصلوا استراحه نزلوا فيها وهو سابهم ودخل الحمام وخرج لقاهم طالبين ساندوتشات وبياكلو وامجد بيمسح حاجه على شفايف ندي وهيا بتضحك وده وصله لقمه الغضب
ادم: مش يالا
امجد: طلبتلك ساندوتشات اقعد الاول
ادم: يالا عايز اوصل بدري اتفضلوا
ندي: هادم اللذات يالا
ادم: اتفضلوا
امجد: هات اسوق انا شويه وانت ريح.

ادم فعلا ركب ورى ينام شويه بس ماقدرش ينام وهو شايف مراته منسجمه مع اخوه بالشكل ده لدرجه انه فكر يكلمهم بلغتهم لمجرد انه يضايقها بس اتراجع وفضل ساكت واخيرا وصلوا بعد رحله العذاب دي
امجد: هتروح فين؟
ادم: هنوصل ندي الاول بيت ابوها
قاله عنوانها ووصلوها وبعدها مشيوا الاتنين
امجد: ايه مالك؟
ادم: ماليش
امجد: لا بجد مالك؟

ادم: مالي يا امجد؟ دي مراتي اللي انت مش مبطل هزار معاها، ايوه قلتلك عادي بس مش للدرجه دي، اتفضل نزلني الشركه وشوف رايح فين
امجد: انا اسف يا ادم
نزل ادم الشركه وغير هدومه ورجع لطبيعته اللي اتفاجئ انها وحشاه
فضل وقت كتير في مكتبه وسط اجتماعات ولقاءات متأخره شويه وفريده دخلتله كان هو وسالم
فريده: ندي بره
ادم: ايه؟ ليه؟
فريده: عايزه سالم بيه؟
ادم: اطلعلهابسرعه اتفضل
سالم: اكلمها في الطرقه يعني ولا ايه؟

ادم: طيب انا هدخل الحمام وانتي دخليها بس ما تخليهاش تطول
فعلا ادم استخبي في الحمام وندي دخلت لابوها
ندي: امال فين شريكك الغامض؟
سالم: غامض ليه؟
ندي: ابدا بس ما اتقابلتش معاه ابدا المهم ما تعرفش ادم فين؟
سالم: ليه؟
ندي: عايزه اخرج مع امجد وامجد مش بيرد عليا فقلت اشوفه مع ادم ولا لأ؟نفسي اعرف انت ليه جوزتني ادم؟ ليه مثلا ما جوزتنيش اخوه؟
سالم: وانتي عايزه اخوه؟
ندي سكتت كتير: راجل جنتل قوي، دمه خفيف، يتحب.

سالم: وادم؟
ادم مستني اجابتها بترقب ونفاذ صبر
ندي: ادم؟ همجي متخلف هيكون ايه يعني؟ ما بيفهمش في اقل الحاجات، ايوه راجل يعتمد عليه بس
سالم: بس ايه؟
ندي مش عارفه تقول ايه: بس خالي من الاحاسيس والمشاعر مش زي باقي البشر معدوم الاحساس محب للسيطره، المهم يا بابي انا ماشيه ولو ادم كلمك خليه يكلمني
سالم: غريبه انك مهتمه برأيه؟
ندي: علشان هو غبي مش اكتر وردود افعاله غبيه وبخاف منه.

ندي مشيت وادم خرج بيحاول يداري ضيقه وسالم ما اتكلمش بس قاله يكلمها ومشي هو كمان
فريده دخلت تمضي ورق ولقته سرحان
فريده: مش كفايه بقي اللعبه دي؟ طولت قوي
ادم: مش عارف يا ديدا اخرتها ايه اصلا!المهم عايزه حاجه!
خلصت شغلها معاه وخرجت وهو كلم ندي ووافق انها تخرج مع اخوه والوقت اتأخر بالليل وهما سهرانين بره وهو على نار اخر ما تعب اتصل بأخوه وطلب منه يرجع وهو مستنيهم مع سالم
سالم: ادم ركز شويه معايا.

ادم: انا معاك اهو
سالم: حفله بكره لازم تكون موجود فيها
ندي: حفله؟ بكره؟
الاتنين بصولها وادم بصلها من فوق لتحت وسكت
ندي: طبعا مش عجباك؟ عادي المهم بابي حفله ايه؟
سالم: شغل مش حفله حفله يعني
ندي: اهو اي جو وخلاص
ادم: انتي عايزه تروحي الحفله دي؟
ندي: لا احنا هنخرج
ادم: انتو ؟ اللي هما مين؟
مسكت ايد امجد: احنا الاتنين
ادم معلقش بس انسحب بهدوء بعد ما مسي عليهم
الصبح بدري طلع الجنينه وشويه واخوه طلعله.

امجد: انا راجع البلد دلوقتي
ادم: وخروجك مع ندي ؟ خرجها الاول
امجد: ادم انت اخويا الكبير وانا لايمكن ابدا اضايقك وانت حاليا متضايق مني وده مش هسمح بيه ابدا
ادم مسك اخوه من اكتافه الاتنين واتقابلت عنيهم
ادم: لو ندي عجباك يا امجد خدها انت عارف العلاقه بينا ايه وبعدين ما تخافش احنا مش متجوزين بالمعني ده
امجد: لا يا ادم ابدا مجرد انها شالت اسمك اتلغت من تفكيري انا والله بتعامل معاها كأيتن وبس.

ادم: وانا والله عارف ده كويس بس عندي طلب منك
امجد: شاور
ادم: عايز اعرف هيا دماغها فيها ايه ناحيتك ممكن؟
امجد: حاضر هعرفلك
ادم: خلاص هنسافر اخر النهار كلنا مع بعض
ادم راح الحفله هو وسالم واندمجوا مع الناس والعملاء بتوعهم وشويه وادم بيتكلم لمح ندي قدامه واتقابلت عنيهم للحظه بعدها عدي حد بينهم وهو جري بسرعه واختفي
ندي عماله تدور عليه مش مصدقه عنيها اصلا
ادم اتصل بسالم: بنتك هنا بتعمل ايه؟

سالم: مش عارف ماشفتهاش اوعي تكون شافتك؟
ادم: لمحتني وانا اختفيت بس انت حاول تمشيها
سالم: حاضر حاضر
يالم راح يدور على بنته لحد ماشافها
سالم: بتعملي ايه؟
ندي: بدور على ادم، انت ما شفتوش؟
سالم: كان هنا بس انتي بتعملي ايه هنا؟
ندي: لابس ايه؟
سالم: مين ده؟
ندي: ادم كان لابس ايه؟
سالم: زي ما بيلبس عادي هيكون لابس ايه يعني؟
ندي: بابا انا شفته لابس بدله وبيتكلم زي اي جنتلمان هنا كان امور قوي، بابا ادم.

قاطعها ابوها: بطلي هبل بقي بدله ايه وزفت ايه؟بطلي بقي سطحيتك دي واهو جاي هناك اهو
ندي لفت بسرعه واتصابت بإحباط اول ما شافته بالجلابيه زي ماهو
ادم: ايه اللي جالك وفين امجد؟
ندي: انت غيرت هدومك صح؟
ادم: غيرت فين يعني؟ غيرت في البيت قبل ما انزل
ندي: مش معقوله بيتهيألي يعني؟
ادم: سلامتك يا قطه من الجنان بدري عليكي المهم فين امجد؟
ندي: مع صحباته انا عايزه اروح ممكن؟
ادم: يالا بينا...

اخدها ادم ومشي واتصل بأخوه اللي اعتذر لانه قابل اصحابه وطلب من ادم يروح هو وهو هيطلع على كليته بقي، الطريق كان طويل وممل وكل شويه ندي تتكلم عن امجد وهو ساكت
واخبرا وصلوا البلد وطلعوا اوضتهم
ندي: تعرف ان امجد
هنا ادم انفجر فيها: امجد امجد امجد ايه؟ معندكيش غيره تتكلمي عليه زهقتيني بعد اذنك
سابها ودخل ياخد دش يمكن يبرد نار الغيره دي
ندي مش عارفه هو اتجنن من ايه كده وانفجر ليه؟
بس اتعودت على تقلباته دي...

عدت الايام ببطء وبرود من الطرفين وفي مره ادم كان وسط رجاله كتير متجمعين عنده بيشتكوا ان الزرع بيموت والمحصول ضعيف وكل واحد جايب دره فاضيه وبيوريها لادم ومش عارفين يعملوا ايه؟
ادم: هنحاول نشوف حل اكيد في علاج
هنا ندي دخلت: طبعا كل حاجه ليها علاج
ادم: ان شاء الله نشوف علاج خير عايزه حاجه؟
ندي دخلت وسط الكل وقربت من فلاح ماسك كذا كوز دره في ايده ومدت ايدها تاخد واحد منه
ندي: تسمحلي؟

ادم مستغرب هيا عايزه ايه وداخله وسط الرجاله ليه؟ بس مش عايز يتهور
ندي: ده مرض بيصيب انواع كتيره من النباتات وبيأثر على المحصول واسمه (، )
ادم استغرب من كلامها وبيبصلها
ندي: مالك؟ انت ما تعرفش ان دراستي كلها في امراض النباتات ولا ايه؟ ده تخصصي
ادم: لا معرفش الصراحه
ندي: طيب انا ممكن اساعد لو تحب؟
ادم: طبعا لو تقدري
ندي: طيب عايزه معمل او اي مكان اشتغل فيه.

ادم: ينفع تشتغلي في المركز بتاع المبيدات وهناك هتلاقي دكاتره يساعدوكي مختصين بعلم النبات ورينا شطارتك، فتحي
جه فتحي يضرب تعظيم سلام
فتحي: اوامرك
ادم: خد الهانم المركز وخلي الكل تحت امرها واي حاجه تحتاجها تتنفذ، اتفضلي
ندي مشت مبسوطه من ثقه ادم ومبسوطه انها هتمارس شغلها اللي بتحبه.

قضت اليوم كله في المعمل بتاخد عينات من النباتات وبتجرب عليها حاجات ومعاها تلاته دكاتره بيساعدوها، اخر النهار ادم راحلها ودخل لقاها فوق ميكرسكوب ومندمجه جدا والصوره اتحفرت في دماغه اخيرا لقالها اهتمامات غير الميكب واللبس والمجلات، دخل وحمحم
ندي: ادم اهلا اتفضل
ادم: هتباتي هنا ولا ايه؟مش يالا
ندي: اوكي يالا اديني دقيقتين
ادم: خدي راحتك انا هستناكي
خلصت ومشيوا الاتنين مع بعض وركبت عربيته.

ادم: هاه قضيتي يومك كيف؟

هنا ندي اتفتحت وفضلت تتكلم كتير ونص كلامها مصطلحات وكلمات بالانجليزي ومش مستوعبه ان ادم موقفهاش او قالها مثلا مش فاهم بس فضل يسمعها ويتناقش معاها لحد ما وصلوا بيتهم نزلوا اتعشوا وفضلت ترغي وهيا قاعده جنبه لحد ما نامت زي العيل الصغير على كتفه وهيا بتتكلم فضل كتير يلعب في شعرها ومستمتع بوجودها في حضنه ومستغرب من مشاعره واحاسيسه وقدرتها على نقلته من سابع سما لسابع ارض والعكس واخيرا شالها وحطها في السرير وجه يقوم اتعلقت في رقبته وابتسمت.

ندي: خليك جنبي.

ادم رقد جنبها وهيا استخبت في حضنه بس فضل يقنع نفسه انها نايمه وما تقصدش لحد ما نام هو كمان وصحي الصبح كانت كلها بين ايديه هيا كمان صحيت واتوترت اول ما اخدت بالها انها في حضنه بس كانت مستمتعه بحضنه ده اخيرا الباب خبط عليهم
فتحي بره: سي ادم في ناس تحت عايزينك
هنا ادم عايز يقوم بس مش عارف ازاي
ندي بهمس: هتنزل؟
ادم بهمس: غصب عني
ندي بتدفن وشها في رقبته: خليك
ادم اتنفس نفس طويل: مش هينفع لازم اقوم.

ندي مش واخده بالها انه بيكلمها عادي مش صعيدي
ندي: طيب قوم
بتقوله يقوم وهيا ماسكه فيه ومتعلقه برقبته وهو لاعارف يقوم ولا عارف يرد بس كل اجراس الخطر بتضرب ولو ما قامش مش هيقوم ابدا من جنبها
ادم: ندي انا لازم اقوم
ندي: انا مش مسكاك
ادم: بجد؟ ماشي مش هرد عليكي
ندي: قوم انا بعيده اهوه
بصلها واخيرا قدر يقوم ودخل ياخد شاور يفوقه من حاله الحب اللي غمراه...

اخدت يومين بتروح المعمل واخيرا طلعت بعلاج للزرع وجهزوا كميات كبيره منه ووزعوه على الفلاحين وادم متحمس جدا معاها وكريمه فرحانه جدا بيها
بعدها بيومين صحيت ندي على دوشه عاليه وزعيق وخناق ودربكه كتيره فقامت بسرعه بصت من البلكونه لقت ناس كتيره فلبست بسرعه ونزلت تشوف في ايه اللي بيحصل؟
@ احنا اتخرب بيوتنا
& كل اللي حيلتي راح حرام
£ وانا كل الطيور اللي عندي ماتت.

@ الجاموسه بتاعتي كانت بتصرف علينا كلنا نعمل ايه من غيرها؟
؟ طيب انا العجلين دول كنت هبيعهم واجوز البت ياخراب بيتك يا سعداوي
£ نعمل ايه دلوقتي رد علينا يا ادم بيه؟
ادم: مش لما تدوني فرصه اتكلم ارد، اللي فهمته دلوقتي انكم اكلتم الحيوانات بتاعتكم من الزرع المرشوش صح؟ وحيواناتكم ماتت صح
@&£ ايوه كله بسبب الهانم مراتك هيا قتلتهم انت لازم تجيبلنا حقنا يا بيه.

ندي واقفه ومش مصدقه واخدوا بالهم منها واول ما شافوها الكل هاجمها ووجهوا ليها اتهامتهم وهيا باصه لادم ومستنياه ينجدها.

رواية عشقت المتمردة للكاتبة الشيماء محمد الفصل السادس

اغلب اهل البلد في بيت ادم بيشتكوله ان بهايمهم وطيورهم ماتت بسبب مراته و ندي واقفه ومش مصدقه واخدوا بالهم منها واول ما شافوها الكل هاجمها ووجهوا ليها اتهامتهم وهيا باصه لادم ومستنياه ينجدها راحت ووقفت جنبه ومسكت ايده اللي مداريه بينهم بحيث تستمد القوه منه او تحس انه مش هيتخلي عنها..
ادم فضل متردد يمسك ايدها ولا يشد ايده بعيد واخيرا ضغط على ايدها ضغطه انه جنبها وانه عمره ابدا ما هيتخلي عنها.

@ الست الامريكاويه جايه تعمل تجارب عليناحضرتك لازم تجيبلنا حجنا
&دي ميهمهاش واصل الناس كويس انها تجارب على الزرع مش علينا احنا
ادم فاق من افكاره على اتهامات الناس
ادم: كل واحد فيكم يحط لسانه جوه خشمه واوعو للحظه تنسوا ان اللي بتتحددوا عنها دي مرتي فاهمين ولا لأ؟ ولو مرتي غلطانه انا هعوضكم غير كده ما اسمحش لاي مخلوج يتكلم حرف واحد في حجها، اعتجد كلامي واضح؟ فتحي...
فتحي: اوامرك.

ادم: ما عايزش حد اهنيه واصل
ندي: ادم لحظه!انا قلت للدكتور محسن اللي شغال في المركز ونبهته ان العلاج سام وان محدش ياكل ابدا من الزرع على الاقل لمده اسبوع انا نبهته
ادم: فتحي، عايز د / محسن تيجيبهولي حالا
فتحي: اوامرك
ادم اخد ندي ودخل البيت وفتحي بدأ يمشي الناس، كريمه كانت قاعده مستنياهم يدخلوا واول ما دخلوا بصت لابنها نظره عتاب انه سلم مسؤليه زي دي لندي، ..
ندي: ادم انت لازم تصدقني! انا نبهت الدكتور.

قاطعها ادم: نبهتيه؟ ما جولتيليش انا ليه؟ هاه؟ انا اصلا مش عارف ايه اللي خلاني اثق فيكي في حاجه زي كده؟ انتي مستهتره، ما بتهتميش بأي حد غير نفسك وبس، انتي متخيله انتي عملتي ايه؟ انتي مستوعبه يعني ايه فلاح يبقي عنده مثلا جاموسه بيربي بيها عياله وتكون فاتحه بيته وهيا مصدر رزجه وانتي تيجي بكل بساطه تحرميه من رزجه ده؟ ولا واحده مربيه شويه طيور تبيع بيضهم او تبيعهم وتربي عيالها! انتي متخيله انتي عملتي ايه في الناس دي؟ انتي متخيله كام بيت هدتيه؟ طبعا كل الكلام ده ولا هامك صح يا امريكيه؟ بس العيب مش عليكي العيب عاللي حاطك في بيته.

ندي بتسمعه وهيا مصدومه ما تخيلتش انه هيقف ضدها كده، مكنش قصدها ابدا ده يحصل
ندي: انا اسفه مكنش قصدي.

ادم: اسفك مش مقبول لانه لا هيقدم ولا هيأخر انتي كده ده طبعك ما بتعمريش في اي مكان، تزهجي من امريكا تنزلي مصر تجعدي شويه تهربي على امريكا لا ليكي بلد ولا ليكي انتماء ولا ليكي اي اهتمامات انسانه تافهه ملكيش اي لازمه والمره الوحيده اللي عملتي لنفسك جيمه هديتيها فوج ادمغة الكل ودمرتي الدنيا بغباوتك واستهتارك.

كريمه: كفايه اكده يا ادم كلامك لا هيجدم ولا هيأخر، حاول تعوض الناس اللي خسروه وارجوك مره كمان ما تخليش مراتك تتدخل في امور تخص البلد واهلها
ندي: ماما ارجوكي اسمعيني انتي انا نبهت الدكتور
كريمه: اللي حصل حصل وامر الله تم، ادم صلح اللي حصل ده...
ادم: حاضر يا ست الكل، اتفضلي انتي اطلعي اوضتك ومش عايز اشوف وشك بره الاوضه اتفضلي
ندي طلعت تجري على اوضتها تعيط.

كريمه: افهم بس انت كان عقلك فين تسلمها مسؤليه زي دي؟ انت اتجننت يا ادم؟
ادم: اسف يا امي
كريمه: اعمل بيه ايه اسفك ده؟مراتك اخرها تنظم حفله تختار فستان لكن تهتم بأمور بلد وتسلمها رجاب ناس، انت مجنون يا ادم؟
ادم: امي انا اسف انا هصلح غلطها ده خلاص ارجوكي كفايه بقي، انتي مش متخيله خيبه الامل اللي انا فيها.

كريمه: خيبه امل؟ اوعي تكون بنيت اي امال عليها؟ اوعي تتخيل انها ممكن في يوم تبقي بنت بلد وتكمل معاك هنا، دي مش من توبنا ابدا وده اللي اتأكدت منه
ادم: حاضر يا امي
كريمه: حاضر ايه؟
ادم: حاضر مش هبني عليها امال وحاضر هصلح غلطها وحاضر اي حاجه تجوليها عندك حاجه تانيه؟
كل ده وندي بتسمعهم ومنهاره من كلام ادم وعدم ثقته فيها نهائي فدخلت اوضتها تعيط لوحدها
قاطعهم فتحي ودخوله بدكتور محسن اللي جاي متوتر
ادم: اتفضل.

د/ محسن: افندم يا ادم بيه
ادم: ندي حذرتك من تأثير العلاج بتاع الزرع فليه محذرتش العمال والفلاحين قبل ما توزعلهم العلاج؟
د/ محسن: لا يا باشا انا معرفش انه سام ولا مرات حضرتك ما نبهتنيش للنقطه دي...
ادم: بجد مراتي ما نبهتكش؟ طيب وانت كنت فين وهيا بتصنع العلاج ده وليه ما تابعتهاش وليه ما قمتش بشغلك وليه ما فهمتش العلاج ده ايه قبل ما توزعه هاه؟ مش ده شغلك؟
د/ محسن: يا بيه دي مراتك.

ادم: يعني ايه مراتي؟ يعني تسيبها وما تفهمش هيا بتعمل ايه؟ طيب بلاش ما تتعلمش هيا بتشتغل ازاي؟ يعني ايه مراتي مش فاهم؟
د/ محسن: يعني كلامها اوامر
ادم: طيب وقالتلك حذر العمال
د/ محسن بتوتر: لا مقالتش
ادم: لا قالت، هيا قالت انها نبهتك انت بتتهم مراتي انا، مرات ادم محمد السويفي بالكدب؟قولهالي مراتك كدابه اتفضل، فتحي
د/ محسن: لا يا باشا بلاش فتحي
فتحي وقف: اؤمرني يا باشا
ادم: دكتور محسن بيقول ان مراتي كدابه.

د/ محسن: يا باشا انا مقولتش كده
ادم: نعمل ايه يا فتحي في واحد بيتهم مراتي انا بالكدب؟
فتحي: نجطعله لسانه يا باشا علشان ما يتطاولش على اسياده تاني
د/ محسن: يا باشا انا عايش في خيرك يا باشاً
ادم: وعلشان كده اول ما بتعض بتعض ايدي انا صح؟ مراتي نبهتك ولا لأ ودي اخر مره هسألك بنفسي السؤال ده؟
د/ محسن: نبهتني. وانا ما اهتمتش ووزعت العلاج للفلاحين بس والله ما كنت اقصد أذي لحد انا ما تخيلتش انه ممكن يعمل كده؟

ادم: امال تخيلت ايه؟ انت متخيل انت عملت ايه في الفلاحين دول؟ سيادتك هتطلع للناس اللي متجمهرين بره بيتي وتعترفلهم ان ده غلطك وهما يتصرفوا معاك
د/ محسن: لا يا باش ارجوك دول هيقتلوني مكاني انا اسف انا في حمايتك انت
ادم: تتهم مراتي وتقول في حمايتي؟
د/ محسن: مرات حضرتك لو غلطت محدش هيقدر يلمس شعره منها ولا يوجهلها كلمه لكن انا يا باشا...

ادم: لا مش على حساب مراتي ولا سمعتي فاهم ولا لأ؟ فتحي، خده يعرف الناس بره الحقيقه
فتحي شد الدكتور اللي بيستنجد بأدم
الناس اول ما سمعوا الحقيقه من الدكتور وفتحي كانوا عايزين يقتلو الدكتور وكانوا بيحاولو فعلا يوصلوله وصوتهم عالي جدا لحد ما ادم خرج.

ادم: بس كفايه كده، الدكتور غلط وهو عارف غلطه كويس وانتو اتأذيتو وانا عارف خسارتكم قد ايه وما تخافوش انا مش هتخلي عنكم وهعوض كل واحد فيكم ومش هتخلي عن حد، دكتور محسن محدش هيضايقه بكلمه مفهوم ولا لأ؟
@ لا يا باشا اللي غلط لازما ولابد ياخد جزاته
& ايوه يا باشا لازم ياخد جزاته
كل اهل البلد اصروا انه يتعاقب
ادم: خلاص عقابه انه مالوش عيش وسطنا هنا تاني يرضيكم ده؟

اعترضوا شويه بس في الاخر كلام ادم بيتنفذ، محسن مشاه من البلد لمكان تاني وفعلا بدأ يعوض الفلاحين اللي خسروه
اخر الليل مهدود تعبان دخل اوضته كانت ندي قاعده على السرير ودموعها مغرقه وشها بصلها وتجاهلها ودخل غير هدومه وطلع رقد من غير ولا كلمه ونام او تظاهر انه نايم
النهار طلع وهو صحي بعد نوم متقطع لقاها مجهزه شنطه وقلبه دق اول ما شافها
ادم: ايه دي؟
ندي: شنطتي
ادم: انا عارف انها زفتتك...

ندي: كفايه بقي انا عايزه ارجع امريكا
ادم: بتهربي كالعاده
ندي: انا عايزه افهم انت مقعدني هنا ليه؟ انا محدش طايقني هنا، كلكم بتكرهوني، والدتك بتكرهني، شغالينك، عمالك، اهل البلد، وانت
كان نفسه ينطق وينكر ده بس هيا كملت
ندي: عايز مني ايه؟ انت قولتها انا ماليش انتماء لهنا فسيبني اروح للمكان اللي بنتميله...
ادم: وامريكا هو مكان انتماءك؟ هيا دي بلدك؟
ندي: ايوه.

ادم: اممم طيب، خروج من هنا مش هيحصل وريني بجي سيادتك هتعملي ايه؟
جه يمشي بس هيا وقفت قصاده وقفته
ندي: انت ما بتصدقنيش عايزني افضل هنا ليه؟
كانت عايزه تسمع اي كلمه منه بس زقها بعيد عن وشه وسابها وخرج لانه معندوش اجابه ليها...
اخد فتره مشغول مع الفلاحين وهيا محبوسه في بيته وهيا حابسه نفسها في اوضتها
ادم: على فكره انتي مش محبوسه هنا انتي ممكن تخرجي بريحانه
ندي: اهل البلد كارهيني اخرج اروح فين؟

ادم: معرفش بس محدش هنا كارهك انتي بيتهيألك
سابها وخرج وهيا نزلت لريحانه واخدتها تتمشي بيها شويه وخرجت وقابلت بنات شغالين اول ماشافوها عزومها تقعد تفطر معاهم اترددت بس وافقت وفعلا قعدت فطرت معاهم واكتشفت انها مش مكروهه ولا حاجه...
ايتن نزلت اجازه هيا وامجد ودول عملوا جو مختلف في البيت وندي اندمجت معاهم جامد وعوضوها شويه عن وحدتها...

ندي كانت كل شويه بتشغل اغنيه معينه اجنبيه اسمها don t let me down وبترقص عليها كتير وادم بيراقبها من بعيد لبعيد، وحاسس انها بتوجهالو هو الاغنيه دي او بيحاول يقنع نفسه ان الاغنيه دي بتشغلهالو هوه...

ادم رجع في يوم بدري وداخل مستعجل
كريمه: براحه يا ابني مالك؟
ادم: معزوم على فرح ومتأخر وعايز الحق كتب الكتاب
ايتن: طيب ما تاخدنا معاك، ندي عمرها ماشافت افراح في بلدنا
ندي: بيقولك مستعجل، خليها مره تانيه
ادم بصلها: لو عايزه تيجي يالا بس قدامكم نص ساعه بس مش اكتر تكفيكم؟
ايتن: طبعا يالا يا ندي
شدتها وطلعوا يجروا الاتنين وهو فضل باصصلهم لحد ما اختفوا وفاق على صوت امه
ادم: ايه قولتي حاجه؟

كريمه: بقولك ما تتعلقش بأحبال دايبه، مسيرها هترجع بلدها
ادم: ما تقلقيش عليا بعد اذنك
سابها وطلع اوضته بس مالقيش ندي وخمن انها مع ايتن بيجهزوا فدخل حمامه يغير وياخد شاور سريع
خرج كانت ندي قدام المرايا بتحط ميك اب كان لابس وجاهز فحمحم علشان تاخد بالها منه واول ما شافته قامت راحتله ووقفت قصاده وعطتله ظهرها ورفعت شعرها وهو مش فاهم عايزه ايه بس ظهرها العريان سحب اي تفكير او فهم منه
ادم: افندم.

ندي: السوسته ممكن تقفلها؟
ادم: اه
ادم مسك السوسته بايدين مهزوزه وبدأ يقفلها وفعلا كانت مش عايزه تتقفل وبدأ يتعصب عليها فايده بتلمس ظهرها كل شويه
ندي بهمس: ادم
ادم: هاه
ندي: مش عايزه السوسته تتقطع
ادم: حاضر.

بدأ يحاول معاها بالعقل فقعد على ركبه في الارض بحيث يشوفها شابكه في ايه فلقاها جزء من الفستان محشور فيها وحاول يخرجه لحد ما اخيرا عرف وبدأ يقفل السوسته وبيقف معاها واحده واحده وهو قريب منها وهيا قدامه وشعرها على جنب ورقبتها عريانه فلقي نفسه بيحط شفايفه على رقبتها وبيدفن وشه في شعرها وهيا سندت على صدره ويدوب حط ايديه حواليها فالباب اتفتح
ايتن: انا جاهزه.

ايتن لاحظت الوضع ده بس كانت دخلت زي المجنونه وهما اتنفضوا بعيد عن بعض الاتنين
ايتن: اسفه اني دخلت كده انا معرفش ان انت هنا ابيه اسفه كتير
ادم بص بعيد: لا عادي، انا هستناكم تحت بسرعه
وسابهم وخرج من غير ما يبص لواحده فيهم
ايتن: انا اسفه يا ندي
ندي: لا بتتأسفي ليه؟ عادي يا بنتي
ايتن: حاسه اني قطعت حاجه
ندي: مفيش حاجه علشان تقاطعيها يا ايتن انا وادم علاقتنا عاديه وبعدين دي فتره وهتعدي
ايتن: هتسيبيه يا ندي؟

ندي: هو اللي هيسيبني مش انا؟
ايتن: يعني انتي بتحبيه؟
هنا دخل امجد: ايه هتنزلوا ولا ايه؟ ادم هيطق تحت يالا
نزلوا التلاته مع بعض وادم اخدهم وراح على الفرح وندي بتراقب ادم في كل حركاته وبتراقب احترام الناس ليه...
العريس كان صاحب ادم قوي وشغل لادم اغنيه بحبك يا صاحبي وادم رقص معاه عليها وقعد.

اختفي ادم مع شويه رجاله وساب اخواته مع مراته ورجع بعد شويه اتفاجيء بالتلاته بيرقصوا على اغنيه شعبيه رقص معجبوش نهائي وخصوصا ان الكل بيبصولو هوه وبيلوموه بعنيهم ان ماينفعش مراته تبقي كده او ان الكل يشوف رقصها بالشكل ده، امجد في النص والبنتين حواليه وهو جه ووقف قدامهم
ادم: مش كفايه كده يا امجد ولا ايه؟
امجد: اه طبعا
ادم: طيب خد البنات روحهم ممكن ولا مش هتعرف؟
امجد: اه طبعا بعد اذنك.

اخد البنات ومشي وعرف ان في خناقه محترمه مستنياه في البيت قبل ما يمشوا ندي تجرأت وبصتله وندمت لان قابلتها نظره فولاذيه حست انها هتحرقها...
فضلوا التلاته مستنين رجوع ادم بتوتر وقلق وخصوصا ندي لحد ما سمعوا عربيه وصوت ادم
امجد: انا هنزل انا اخد اول صدمه واشوف الجو ايه؟
امجد نزل وقابل ادم تحت
امجد: حمدالله على السلامه، ما اتأخرتش يعني؟
ادم: انت عايز ايه؟
امجد: بس بطمن عليك
ادم: متشكر عايز حاجه تانيه؟

امجد: مالك في ايه؟
ادم: ماليش بعد اذنك
امجد: ادم في ايه مضايقك؟
ادم: بلاش يا امجد
امجد: لا في ايه؟ قول، معترض ان احنا رقصنا في فرح؟ ما انت رقصت؟

ادم انفجر: اني وقفت مع صاحبي كنوع من المجامله وبعدين انا ما هزتش وسطي ولا حزمت اختي ومرات اخويا ورقصتهم في وسط صعايده ورجاله هياكلوهم بعنيهم ورقصتهم، انا مش فاهم انت طينتك ايه يا اخي؟ في راجل محترم عنده دين او اخلاق يرقص اهل بيته وسط رجاله؟ انت فين نخوتك يا اخي؟ ما بتحسش؟ ما بتغيرش؟ ما بتفهمش؟
امجد: فيها ايه خليهم يفرحوا ويتبسطوا ومحدش يقدر يلمسهم او يبصلهم وانا موجود انت خنقه كده ليه؟

ادم: هو من امتي الانبساط بقله الادب؟ ما يتبسطوا بأي طريقه تانيه! ولو غيرتي على اهل بيتي خنقه يبقي ايوه انا خنيق...
كريمه طلعت على صوتهم: هتتخانقوا كده كتير؟ كل واحد على اوضته وانت يا امجد اللي عملته غلط فبلاش تقاوح
امجد: ماهو لازم تقولي كده لان كلام ادم منزل...
ادم: اطلع اوضتك بدال ما قسما بالله
كريمه: ادم، اطلع اوضتك انت كمان، اتفضلوا
ادم طلع اوضته ولقي ايتن مع ندي
ادم: اتفضلي على اوضتك.

ايتن: ادم انا اسفه
ادم: اتفضلي على اوضتك
ايتن: طيب انت زعلان مني؟
ادم: زعلان عليكي مش منك، انتي كنتي جوهره مصانه الكل بيبصلها من بعيد ويتمني بس يلمحها متخيلتش ابدا انك ممكن تنزلي للمستوي دي وترخصي نفسك كده، عتجلدي مين هاه؟
ندي بصتله واتجرحت قوي من كلامه وفهمت ان غضبه كل ده غيره على اخته مش اكتر
ايتن مشيت على اوضتها وهو بص لمراته
ادم: ما شاء الله عليكي اي شيء عتلمسيه عتدمريه.

سابها ودخل الحمام يهرب من نظراتها وهيا كرهته وكرهت ضعفها قدامه وكرهت دنيتها كلها، قررت انها لازم تبطل تضعف ولازم تعانده في كل حرف ولازم تطلع من البيت ده بسرعه...
ايتن وامجد مشيوا على كلياتهم وادم مازال واخد موقف منهم وندي بدأت تتعامل بمنتهي البرود مع ادم، راحت معاه توصل امجد وايتن للقطر لان ادم سحب عربيه امجد كنوع من العقاب وصلوهم المحطه وراجعين
ندي: ممكن اشغل الكاسيت؟
ادم: انتي حره.

ندي شغلت سي دي معاها وفيها الاغنيه اللي ديما بتسمعها ودي كانت اول مره يسمعوها مع بعض
كانت بتغني مع كل حرف وبتبص لادم وهو عامل نفسه مش واخد باله ولا مهتم ابدا بس قلبه هيخرج من مكانه وخصوصا وهيا بتقوله
I need you
بتقولها كتير وكأنها بتترجاه
Don t let me down
كان نفسها يقولها انه مش هيتخلي عنها ابدا بس طبعا مش هينفع ففضل ساكت لحد ما وصلوا البيت كان وصل لقمه احتماله
ادم: انزلي.

نزلت وهيا ساكته ويدوب مشيت خطوه
ادم: ندي
رجعت بلهفه.

ادم: خدي الصداع بتاعك ده
غمضت عنيها بوجع واخدت السي دي بتاعتها ومشيت مستغبيه نفسها.

تستاهلي يا غبيه انك تتمني واحد غبي جاهل يفهم! كنتي عايزه منه ايه؟ يفهم اغنيتك ويفهم رسالتك؟ نسيتو انه جاهل يا متخلفه؟ مستنيه منه يشاركك اهتماماتك او يسمع معاكي؟ انتي في وادي وهو في وادي مختلف تماما؟ اقفلي بقي صفحته واهو عدي شهرين استحملي واحد كمان وامشي ولازم تخرجيه بره اهتماماتك ولازم ترجعي لشخصيتك وما تسمحيلوش يمشي اي كلام عليكي، هو مالوش حكم عليكي.

طلعت غيرت هدومها ونزلت تعمل اي حاجه بس المهم تعارضه، خرجت الجنينه لقت السايس بيحمي حصان ادم واسمه ياقوت فلمعت في دماغها الفكره وراحت للسايس
ندي: بقولك روح هات ريحانه علشان احميها انا كمان
السايس: انا هحميها يا هانم اخلص بس ياقوت الاول
ندي: انا بقولك روح هاتهالي اتفضل
السايس: طيب وياقوت؟
ندي: هقف جنبه لحد ما تيجي اتفضل واتحرك يالا بسرعه.

السايس اتردد بس سمع الكلام ومشي وهيا استنته لحد ما مشي وراحت حاطه السرج على الحصان بسرعه وركبت واخدته وجريت بيه عندا في ادم واوامره وطلعت تجري وتجري وتجري وكل شويه تخلي الحصان يجري اسرع واسرع واسرع وهيا زي المجنونه، والحصان مجنون وبيطاوع جنانها مكنتش عارفه هيا رايحه فين ولا شايفه ايه الطريق؟ ومره واحده الحصان نط على الطريق العام واتفاجئت بعربيه في وشها معرفتش تعمل ايه ولا عرفت تتصرف ازاي بس الحصان وقف على رجليه في وش العربيه وهيا طارت بعيد وصوت فرامل جامد وده كان اخر حاجه حست بيها وسمعتها قبل السواد ما يهجم عليها...

رواية عشقت المتمردة للكاتبة الشيماء محمد الفصل السابع

ندي ركبت ياقوت وطلعت تجري بسرعه والحصان مجنون وبيطاوع جنانها مكنتش عارفه هيا رايحه فين ولا شايفه ايه الطريق؟ ومره واحده الحصان نط على الطريق العام واتفاجئت بعربيه في وشها معرفتش تعمل ايه ولا عرفت تتصرف ازاي بس الحصان وقف على رجليه في وش العربيه وهيا طارت بعيد وصوت فرامل جامد وده كان اخر حاجه حست بيها وسمعتها قبل السواد ما يهجم عليها...

الناس اتلموا عليها وعرفوها وعرفوا ياقوت @وبيطلبوا الاسعاف ولان البلد صغيره فالخبر وصل بسرعه للبيت
فتحي داخل يجري وري ادم اللي يدوب داخل البيت
فتحي: ادم بيه يا ادم بيه، الحج امصيبه
الكل طلع على صوت فتحي بسرعه
كريمه: في ايه يا راجل انت؟
ادم: في ايه يا فتحي انطق بسرعه
فتحي: ست ندي
ادم قلبه وقع بين رجليه
ادم: مالها؟ انطق
فتحي: اخدت ياقوت وخرجت
ادم خايف يسمع الباقي لانه عارف جنون الاتنين
كريمه: حصلهم ايه انطق.

فتحي: عملوا حادثه على الطريج
ادم مستناش حرف تاني وطلع يجري ووراه فتحي
ندي الناس فوقوها وهتموت من الخوف على حصان جوزها والاسعاف وصلت ورفضتها وقالت انها كويسه ووصل الدكتور البطري بتاع البلد ووصل ادم اللي طلع يجري على مراته
ادم: انتي كويسه!؟ فيكي حاجه؟ كويسه؟
ماسكها وبيفتش فيها كلها زي المجنون خايف عليها
ندي: انا كويسه شوف ياقوت
ادم هنا استوعب رفيق عمره وبصله وراح جري عليه وقعد جنبه في الارض.

الدكتور كان بيكشف عليه وناس كتيره ملمومه
الدكتور: ادم بيه
ادم رفع وشه: حالته ايه؟
الدكتور: انا اسف بس في الحاله دي احسن حل اننا نريحه من عذابه...
ندي اتفاجئت بكلام الدكتور وما تخيلتش ابدا ان دي ممكن تكون نتيجه تهورها!؟ او ان حصان ادم يتإذي بسببها وبسبب طيشها!
ادم: انت بتقول ايه؟ حصاني قوي وبيستحمل.

الدكتور: وكبير في السن ورجليه متكسره ومش هتخف وهيفضل يتألم كده يبقي الحل ايه؟ ماتفكرش بعواطفك ايوه هو قرار صعب بس ده الصح، انا هديله حقنه ونريحه...
ادم: لأ، لو حد هينهي حياته هيكون انا
ندي حطت ايدها على قلبها وحست بوجع ادم...
ادم مسك بندقيه فتحي ووجها ناحيه حصانه وبيحاول يقتله والكل مستصعب الموقف
فتحي: عنك انت ادم بيه اني هجوم بيها
ادم: لا يا فتحي.

ادم يدوب هيضغط على الزناد فحصانه رفع راسه وبص لصاحبه نظره طووويله وبعدها ريح دماغه تاني، ادم فضل شويه وبعدها رمي البندقيه
ادم: هعالجه، عايز انجله على البيت
الدكتور: قرارك عاطفي يا ادم بيه
ادم: قراري وانا حر فيه، اني مش هجتله طول ماهو مفتح عينه وبيتنفس، هساعده وهعالجه لاخر نفس، انا مش هدخل بيه سباق وعايز اقصي سرعاته، انا عايزو بس يجف على رجليه
الدكتور: في سنه ده مش هيقف.

ادم زعق: مش راح تعرف تعالجه جول وانا اجيب غيرك، جتل مش عجتله ودلوجتي اتفضل شوف طريجه ننجله بيها البيت اذا سمحت...
ندي قربت: اسفه يا ادم مكنتش اقصد
ادم: فتحي
فتحي: اوامرك
ادم: وصل الهانم البيت
ندي ما نطقتش ومعارضتش واتحركت مع فتحي من سكات
اول ما دخلت البيت كريمه جريت عليهم
كريمه: انتي كويسه يا بنتي
ندي: اه كويسه
كريمه: ادم فين؟
ندي: مع ياقوت هو اللي اتصاب جامد.

كريمه بزعل: قدر الله وماشاء فعل الحمد لله انها جت على جد اكده، بس انتي ليه خرجتي بياجوت؟ ريحانه فين؟
ندي سكتت وبصت للارض وما ردتش
كريمه: خرجتي بيه عندا في ادم صوح!؟ يعني مش فاهمه بتستفادي ايه لما عتعانديه او تأذيه؟ هو غلط معاكي في ايه؟
ندي: انا مش قصدي أأذيه ابدا
كريمه: في كل مره بتعانديه فيها او بتعارضي كلامه و بتحطي راسه في الارض بتأذيه، اطلعي ارتاحي.

طلعت وفضلت رايحه جايه عايزه تطمن، جسمها كله بدأ يوجعها جامد بس رافضه تقول لحد او تتكلم، الكل بيبصلها باتهام، حتي الخدم جابولها الاكل وسابوها، حست انها مكروهه جدا...
اخيرا ادم رجع بعد ساعات طويله من الانتظار، كان متبهدل وهدومه متبهدله، دخل وهيا جريت عليه
ندي: اخباره ايه؟ طمني عليه!
ادم زقها من قدامه ودخل الحمام ياخد شاور وخرج بعد فتره وكان نازل تاني ووقفت قدامه تاني وكانت قصاد الباب.

ندي: مش هتخرج غير لما ترد عليا، اخباره ايه؟
ادم: انا مش فاهم هو انتي بتسألي ليه؟ يفرج معاكي اصلا؟
ندي: انا مكنتش اقصد.

ادم: فعلا مكنتيش تجصدي، وانتي من امتي بتجصدي؟ موتي بهايم الفلاحين وطيورهم ومكنتيش تجصدي، سبتي ابوكي لوحدته ومحسيتيش بيه ومكنتيش تجصدي، عماله تغري في كل راجل بلبسك ده ومكنتيش تجصدي، علمتي ايتن تجف جام الكل وترجص وتتمايع ومكنتيش تجصدي، اتسببتي في جرح اغلي حاجه عندي وهتتسببي بموته وبرضه ما تجصديش، امال انتي جصدك ايه؟ مخلوجه ليه؟ غرضك ايه؟ تأذي في خلج الله وخلاص؟ كنتي عايزه تعانديني لمجرد العناد، عاندتيني اهو كده استريحتي؟ اديكي اهو رديتي كل حاجه عملتها فيكي مع اني مش عارف انا اذيتك في ايه علشان انتي مصره تأذيني بكل طريجه ممكنه؟ اديكي اهو هتتسببي بموت ياجوت اتمني تكوني مرتاحه؟ اتفضلي ابعدي عن وشي، انا بعد الساعات و الدجايج والشهر ده يخلص علشان اكون في حل من وعدي لابوكي وتخرجي بره بيتي، انتي اذيه في اي بيت انا مش عارف اصلا ابوكي عايزك يعمل بيكي ايه؟ انتي البعد عنك غنيمه...

زقها من وشه وخرج لحصانه اللي بيواجه الموت.

ندي فضلت كتير واقفه مكانها دموعها جامده لا راضيه تختفي ولا راضيه تنزل، بتعيد كل كلمه سمعتها من ادم، طول عمرها حاسه بالاحساس ده ان محدش عايزها ومحدش بيحبها ابدا وادم اهو اكد الاحساس ده، ابوها وامها انفصلوا وهيا اكتر واحده عانت من الانفصال ده، عامله تعاني من كل راجل بيدخل مع امها لحد ما كرهت كل الرجاله حتي ابوها كرهته لانه اتخلي عنها وسابها لامها اللي مش فاضيالها من مغامرتها العاطفيه، هيا فعلا زي ما قال ادم مش حاسه بالانتماء لاي مكان ومش عارفه تحس بالامان في اي مكان، ومش عارفه تعمل ايه؟ هيا تايهه مجروحه من الدنيا كلها بس للاسف محدش حاسس بيها ابدا، حتي ادم اهو هو كمان مش عايزهاومش طايقها، فضلت قاعده مكانها مش عارفه قد ايه بس حست بادم بيدخل الاوضه وكالعاده تجاهلها بس استغرب قعدتها هاديه كده على السرير، غير هدومه ودخل السرير ينام من غير ولا حرف، وفعلا من تعب النهار نام، صحي الصبح ملقاش ندي جنبه ويدوب هيدور عليها سمع صوت الميه في الحمام فعرف انها في الحمام، كان عايز يدخل الحمام ويغير علشان ينزل يطمن على ياقوت بس ندي طولت فنزل يطمن على حصانه الاول يكون هيا خرجت...

نزل ولقي فتحي معاه
ادم: اخباره ايه يا فتحي؟
فتحي: زي ماهو بس انا خايف لنكون فعلا بنعذبه؟
ادم: هو روح زينا يا فتحي اشمعنا احنا لما بنعجز او بنعمل حادثه الكل بيعمل كل اللي يقدر عليه علشان يعالجنا؟ ليه ما بيموتوناش علشان نرتاح من الألم؟
فتحي: احنا نختلف يا بيه؟ ده حيوان؟
ادم: ايه الفرق؟ احنا بنحس وهما ما بيحسوش؟ ليه نعالج نفسنا والحيوان نقتله بحجه اننا نريحه؟ انا هعالجه يا فتحي وبإذن الله هيقف تاني...

فتحي: بإذن الله، البت عزيزه بتشاور
ادم بص وراه وشافها وبص لفتحي باستفسار
فتحي: جصدها الفطار جاهز
ابتسم ادم: طيب روح افطر مع مراتك روح...
فتحي: لا انا هفضل جنب ياجوت وهيا تجيبلي الفطار اهنيه
ادم: لا روح افطر معاها واهو حمد السايس هيفضل معاه روح لمراتك
ادم مشي هو وفتحي ورايحين ناحيه البيت.

ندي قامت بدري قبل ما ادم يصحي ودخلت تاخد شاور يمكن جسمها يهدي من الالم اللي فيه، دخلت وفتحت الميه بحيث تملي البانيو ميه دافيه وتنام فيه شويه، فعلا نامت شويه بس الميه بدأت تعلي واتفاجئت انها مش قادره تتحرك نهائي ولا قادره تقوم ولا قادره تحرك ايديها او رجليها جسمها كله اتخشب زي ما تكون مشلوله، حست بادم لما صحي بس رفضت تنادي عليه لانها اولا مش عيزاه يشمت فيها او يعرف انها تعبانه وثانيا لانها مش عيزاه يشوفها كده ولا يحس انها محتاجاله...

ادم دخل هو وفتحي يفطروا ولقي كريمه مستنياه
ادم: ابعتى حد ينادي لندي تفطر معانا
كريمه: عزيزه، عزيزه
عزيزه: ايوه يا ست الحجه اتفضلي
كريمه: ندي جالتلك ايه؟
عزيزه: خبطت عليها في الحمام بس ما ردتش عليا يا ست الحجه وجولتها الفطار جاهز وبرضك مردتش
كريمه: طيب روحي انتي خلاص افطري وفطري جوزك
مشيت عزيزه وسابتهم يفطروا وادم سرحان تماما.

كريمه: انت بتتعصب عليها كتير، انا مش قادره افهمك يا ادم ما تعتبرها ضيفه هتاخد يومين وتمشي
ادم رافض المنطق ده ومش عارف ليه؟
ادم: الضيفه دي الكل عارف انها مراتي وشايله اسمي وبعدين هيا ليها حركات بتحرق الدم
كريمه: والله انا شايفه كل اللي بتعمله عادي ورد فعل مش اكتر.

ادم بنرفزه: يعني لما كانت هتموت ياقوت وهيا كمان ده كان عادي؟ ولا سمت بهايم الناس ده كان عادي ولا لما خلت بنتك ترقص وسط الرجاله ده عادي؟ ايه هو اللي عادي بس؟

كريمه: اختك مش صغيره علشان ندي تخليها ترقص وبعدين امجد كان بيرقص معاها وده فرح مش ذنبهايعني، وموضوع الزرع ده انت غلطان لانك ما تابعتهاش فيه وبعدين حذرت الدكتور وهو اهمل تحذيرها اما ياقوت بقي فده تمرد عليك وعلي تحكماتك انت وعند فيك، العناد يولد الكفر
ادم: انتي معايا ولا معاها؟ انتي بتبرريرها ليه؟

كريمه: انا مش معاها ولا عليها ولا ببرر تصرفاتها انا بحلل تصرفاتها، انا مستغربه انت ليه بتاخد كل تصرفاتها على اعصابك زي ما تكون حبيبتك او مراتك بجد؟
كريمه رمت السؤال علشان تشوف رد فعل ابنها اللي بص لامه وكأنه مستنكر سؤالها وحاول يرد عليها او ينكر انها حبيبته بس لسانه ما طاوعوش يقولها، وقام وقف
كريمه: رايح فين؟
ادم: هشوف ندي مش عوايدها تتأخر في الحمام كده ولا انها ما تردش على حد هطمن عليها وانزل.

ندي فوق بتعاني علشان وشها يفضل مرفوع فوق الميه وحاسه انها هتغرق، الميه كل شويه تغطي وشها وهيا بترفعه بالعافيه وبتفكر كل شويه تستسلم وخلاص يعني هتستني ايه ولامتي؟ وبعدين ادم طول ما نزل مش هيرجع غير اخر النهار واهل البيت مش بيدخلو اوضتها كتير لانها متعوده تنام للظهر
ادم طلع برضه ملقهاش في الاوضه وبرضه صوت الميه شغال، اتردد يخبط عليها ولا لأ؟
وقف قدام باب الحمام متردد.

ادم: ندي، انا نازل ما عيزاش حاجه مني؟
ندي سمعت صوته وعايزه ترد بس الميه بتغطي وشها وبتغرق ومش قادره تتطلع اي صوت
ادم: طب على الاجل ردي عبريني؟ المهم براحتك انا نازل سلام...
ندي هتعيط لازم تطلع اي صوت اي حركه اي حاجه تخليه يدخل لانه عمره ما هيدخل عليها الحمام ابدا الا لو هيا اتحركت
يالا يا ندي بس اي صوت قاومي اتحركي ما تستسلميش للموت انتي ياما واجهتي، انطقي، قولي اسمه.

ادم خرج للاوضه ومش عارف ليه القلق ماليه وزعلان انه كان قاسي قوي عليها
ندي بصوت مكتوم: ا، د، م
ادم حس انه سمعها وقف مكانه ومش عارف هو سمعها بجد ولا اتهيأله؟
رجع وقف قدام الحمام: انتي قولتي حاجه؟
ندي: ا، ا، د
معرفتش تكمل الكلمه ولا تنطق
ادم: ندي في ايه؟ انطجي.

فتح الباب بس مقفول من جوه، بدأ يخبط جامد وبرضه مفيش اي رد كده عرف واتأكد ان في حاجه غلط حاول يكسر الباب بس مقدرش ابدا فخرج بره صرخ ونادي على فتحي يطلعله وفعلا طلعوله كلهم كريمه وفتحي وعزيزه
ادم: اكسر معايا الباب ده يا فتحي
كريمه: في ايه يا ادم؟ ندي مالها؟
ادم: معرفش يا امي معرفش
فضلوا هما الاتنين يخبطوا في الباب لحد ما اخيرا اتفتح وفتحي خرج لبره الاوضه بسرعه.

ندي اول ما عنيها اتقابلت مع ادم ابتسمت بارتياح واستسلمت بعد ما سلمت حياتها لجوزها
اول ما استسلمت غطست في الميه فادم جري عليها يرفعها بسرعه من الميه وهنا اتفاجئ بمنظر جسمها الازرق كله، اماكن كتيره قوي وعرف انها تعبانه وكانت بتتألم بصمت او هو معطهاش فرصه تشتكي وجعها او مكنش عندها حد تشتكيله واتشغل بحصانه واهمل مراته
ادم: امي اتصلي بالاسعاف بسرعه،
كريمه: حاضر، عزيزه هاتي حاجه نغطيها بسرعه.

عزيزه جريت وجابت فوطه كبيره يلفوها بيها
عزيزه خرجت لفتحي بره وقالتله يتصل بالاسعاف فاتصل وجري يستناهم
ادم شال ندي من الميه وامه غطتها وحطها في السرير ومكنش عارف يعمل ايه؟
كريمه: اطلع بره انت دلوقتي وشوف الاسعاف اتأخرت ليه؟
ادم: انا مش هطلع واسيبها
امه هنا لمحت حبه ظاهر في عنيه واتأكدت من مخاوفها وعرفت ان ابنها وقع في غرام الامريكية.

كريمه: اطلع بره يا ادم البنت مش لابسه خلينها نلبسها قبل الاسعاف ما تيجي ولا عايزهم ياخدوها كده؟
ادم بص لامه وبص لندي وخرج بره زي المجنون ينادي على فتحي علشان يشوف الاسعاف والدكتور اتأخروا ليه؟
وصل الدكتور بالاسعاف وطلع وادم خبط على امه وسمحتله يدخل بس خرجته تاني
كريمه: خليك انت هنا لحد ما الدكتور يكشف عليها وانا هكون معاها
ادم كان هينفجر في امه بس نظره واحده منها جمدته مكانه
كريمه: مش من حقك.

ادم: دي مراتي
كريمه: بجد؟ فوق لنفسك واستني هنا
قفلت الباب في وشه وهو كان عايز يكسر اي حاجه بس فضل رايح جاي قدام الباب زي الاسد المحبوس في قفص هيتجنن، ازاي ما حسش بيها؟ ازاي سابها تتألم طول الليل؟ ازاي نزل الصبح من غير ما يطمن عليها!؟ ازاي اهملها بالشكل ده؟ طيب ازاي هيواجه ابوها ويقوله انه معرفش يحافظ على بنته؟ ألف ازاي وازاي وألف سؤال وسؤال وهيتجنن اكتر واكتر واللحظه بتعدي بساعه.

فتحي جنبه حاسس برئيسه لان اول مره يشوفه كده وعرف قد ايه هو بيحب مراته، وقد ايه اتعلق بيها! عرف بس ما نطقش بس بيراقبه من بعيد ومستني اي اوامر منه...
الباب اتفتح اخيرا وادم طار عليه
ادم: حالتها ايه؟
الدكتور: انا لازم انقلها مستشفي
ادم بخوف: مالها؟
الدكتور: مبدئيا كده عندها تلات اضلع مكسورين وكتفها مخلوع ولازم يترد والخوف انه يكون عندها نزيف داخلي فلازم نطمن باشعه..
ادم: طيب مستني ايه؟

الدكتور: حضرتك واقف في طريقي
ادم وسعله والدكتور نادي على المسعفين معاه ينزلوها وادم واقف جنبها يبصلها بخوف وقلق ظاهرين للاعمي، المسعفين اخدوها وهو وراها وركب معاها وفتحي وراه بعربيه ادم ومعاه كريمه وعزيزه
وصلوا المستشفي واخدوها على الاشعه واخيرا خرجت كان ادم هينهار من اللوم والخوف والقلق.

الدكتور: الحمد لله يا ادم بيه المدام بخير ومعندهاش نزيف داخلي وان شاءالله الكسور هتتعالج حاليا دكتور العظام معاها وممكن تتفضل تدخلها
ادم دخل هو وامه
دكتور العظام: حاليا انا هثبت الاضلع بتاعتها وهنلفها
يدوب هيكشفها الام وقفت قدام ابنها
كريمه بهمس: اطلع بره دلوقتي
ادم بيتنفس بصوت مسموع وللحظه امه حست انه مش هيسمع كلامها وانه هيعارضها بس لف وشه وخرج بره فعلا بس مقدرش يسيطر على اعصابه.

اول مره يخاف كده او يحس بتأنيب الضمير او التوتر ده هيموت من القلق
الممرضه خرجت: لو سمحت المدام فاقت واعتقد ان وجودك جنبها حاليا مهم
ادم دخل بسرعه كانت فعلا فتحت عنيها وبتبص للكل نظرات زايغه مليانه خوف والم
ادم جري عليها: ما تخافيش انا جنبك اهوه
الدكتور: للاسف مكنتش عايزها تفوق دلوقتي
ادم: ليه؟
الدكتور: لاني حاليا هرد كتفها مكانه وده بعد الفتره دي كلها هيكون قمه في الالم وممكن يغمي عليها تاني.

ادم: معلش بقي اهو نصيبها كده، ندي الدكتور هيرجعلك كتفك مكانه اوك؟ فهماني؟
شاورت بدماغها بألم
الدكتور: معلش سندها معايا عايزها قاعده نص قعده حتي علشان بس يكون اسهل انك تسيطر عليها
ادم: اسيطر عليها؟ هيا كلها ما بتتحركش اصلا
الدكتور: هتتحرك ما تقلقش
سندوها وهيا بتتأوه وتأن وهما بيعدلوها
ادم: براحه براحه عليها
بصتله وكأن هو بر الامان ليها وهو حاول يطمنها بس مش قادر.

الدكتور مسك دراعها ويدوب بيحركه أنت ونفسها عالي وبتبص لادم اللي مش عارف يعمل ايه؟
الدكتور: اوك يا ادم مستعد؟ هعد لتلاته وارده
الدكتور عد 1، 2 وراح رده مره واحده وهيا المره دي صرخت بصوتها كله وادم ضمها في حضنه وحس بيها بتترخي مره واحده وعرف انها اغمي عليها تاني
ادم: هيا كويسه!؟
الدكتور: ما تخافش ده كويس ليها
الدكتور عمل كل اللي يقدر عليه وسابهم وخرج
كريمه: روح انت وانا هفضل معاها.

ادم: لا طبعا مش هسيبها روحي حضرتك
كريمه: ادم، ردود افعالك دي مش طبيعيه ولا مقبوله
ادم: امي ارجوكي مش وقته
كريمه: ارجوك انت اوعي تنسي كميه الاختلافات بينكم؟ اوعي تنسي تربيتها؟ دينها اخلاقها؟ اوعي تنسي انك بتتخانق معاها مليون مره في اليوم الواحد
ادم: عارف كل ده انتي عايزه ايه مني دلوقتي؟
كريمه: بفكرك انها ما تنفعكش
ادم: فاكر يا امي ممكن بقي تسيبيني دلوقتي؟
امه سابته وخرجت وهو حط راسه بين ايديه.

معقوله فعلا يكون حبها؟ وللاسف الاجابه كانت واضحه وضوح الشمس، وللاسف امه حاسه بيه لان دي اول مره تشوف ابنها كده
فاقت وادم معاها لسه وهو اخد باله منها
ادم: حمدالله على السلامه حاسه بايه؟
ندي: تعباااااانه
ادم: احمدي ربنا لانه مش بيدي فرص لكل الاغبيه، في ناس غباؤهم زياده
ندي: ااااهههه تعبااانه.

ادم انفجر فيها: ولما انتي تعبانه مقولتيش ليه؟ مقولتيش من امبارح ليه؟ تقصدي ايه بده؟ كنتي عايزه تموتي نفسك صح؟ وتشيليني انا ذنبك؟ على طول انانيه ما بتفكريش غير في نفسك وبس صح؟ كنت هقول ايه لابوكي لما يسألني بنتي فين؟ ولا عملت فيها ايه؟ هاه كنت هقوله ايه؟
ندي ملاحظتش ان لهجه ادم كلها كانت عاديه ومش صعيديه ابدا
ندي بتعب: هو ده اللي انت عامل حسابه؟ ابويا؟
ادم استوعب انه بيتكلم عادي فبدأ يركز في كلامه.

ادم: كنتي هتموتي يا متخلفه مجولتيش ليه انك تعبانه؟
ندي: وانت محستش بيا ليه اني تعبانه؟ حصانك كان قالك انه تعبان؟ انت ليه قاسي كده؟ انت ليه كده؟ حرام عليك انا تعبانه وانت بتعذبني، حصانك لما عرفت انه تعبان اخدته في حضنك وكنت حنين معاه قوي ليه بتعاملني انا كده؟ ليه قاسي كده؟
ادم: حصاني ما بيعارضنيش في كل حرف وكلمه بنطجهم؟ حصاني ما بيجننيش!؟ حصاني ده رفيج عمري وانتي بغبائك كنتي هتموتيه.

ندي: ااااااااااه اطلع بره انا مش قادره ااااااه
ادم حس ان الاه دي بتوجعه قوي فسكت وقرب منها
ادم: ايه اللي تاعبك؟
ندي: انت اكتر حاجه تعباني ارجوك
ادم قعد جنبها: اسف مش هتنرفز عليكي تاني وهأجل خناجي معاكي دلوجت المهم انتي بس تجومي بالسلامه
ندي يدوب هترد بس لمحت نظره في عنيه وقفتها، مفهمتش دي نظره ايه؟ حب؟ حنيه؟ خوف؟ ايه بالظبط؟ ولا كلهم متجمعين مع بعض، قررت انها تشوف اخره ايه معاها؟

ندي: انا مش مرتاحه في السرير ده ولا مرتاحه في الرقده دي!
ادم باهتمام: طيب ايه اللي هيريحك عايزه ايه؟
ندي: عايزه ابقي قاعده ربع قاعده كده مش عايزه انام على ظهري صدري واجعني
دي كانت حقيقه بجد مكنتش قادره تنام كده
ادم بدأ يعدلها براحه
ندي: ااه براحه، براحه يا ادم
ادم: حاضر انتي بس امسكي فيا
حطت ايدها حاولين رقبته وهو بيحاول يقعدها ويحط مخدات وراها علشان يريحها
ادم: هاه كده احسن ارتحتي؟

ندي: احسن بس برضه مش قوي
فضل ادم يعدل فيها وبرضه بتقوله انها مش مرتاحه مع انها كانت مرتاحه
ادم: وبعدين؟
ندي: مش عارفه انا تعبانه وجسمي كله واجعني
ادم: معلش ده هياخد وقت
ندي: طيب ينفع تيجي انت ورايا تسندني المخدات دي مش مريحاني؟
ادم اتردد شويه بس وافق وقعد فعلا وراها وخلاها تسند عليه هو على صدره
ادم: هااااه ارتحتي؟
ندي: مش قوي
ادم: يووووه عايزه ايه تاني؟
ندي: ما تتنرفزش عليا ممكن؟

ادم: حاضر هاه عايزه ايه تاني سيادتك؟
ندي: بتتريق ماشي؟ المهم عايزه حاجه احط عليها ايدي اللي وجعاني دي
ادم فكر ومعرفش يعمل ايه؟ حطلها مخده تحت ايدها بس مريحتهاش
ندي: مش كده
شدت ايده وحطتها حوالين وسطها
ندي: حط ايدك التانيه
ادم لف ايديه حوالين وسطها وهيا سندت دراعها على دراعه ونامت كلها في حضنه
ادم: كده مرتاحه؟
ندي: جدا ما تتخيليش قد ايه؟
ادم: لا متخيل يا حلوه متخيل، نامي بجي.

ندي ضحكت لانها حاسه انه متوتر جدا وفعلا استرخت ونامت في حضن حبيبها، ايه ده من امتي هو حبيبها؟ من امتي بترتاح في حضنه؟
مفيش اجابه لانها مش عارفه امتي حبته وامتي اتعلقت بيه؟
ادم مع الوقت استرخي ونام هو كمان، امه جابتلهم اكل وجت تطمن عليهم، فتحت الباب ولقتهم في الوضع ده ومعرفتش تعمل ايه؟ خايفه على ابنها يتجرح او يتوجع، خرجت بره ولقت الممرضه جايه
كريمه: انتي جايه هنا؟
الممرضه: ايوه يا هانم.

كريمه: طيب خبطي وصحيهم لانهم نايمين
الممرضه: طيب اتفضلي
كريمه: لا علشان ما احرجهمش
الممرضه فعلا خبطت ودخلت صحتهم
ادم صحي وصحي ندي اللي اتأوهت وهيا بتحاول تعدل نفسها
ادم: براحه براحه...
الممرضه: الدكتور جاي يطمن عليها
حاول ادم يقوم بس ندي مسكته
ندي: خليك
ادم برقه: مش هينفع الدكتور هيجي يكشف عليكي، ارتاحي بس
ندي: مش برتاح وانت بعيد
ادم بابتسامه: مش هبعد
قام ادم وامه دخلت والدكتور كمان دخل.

ندي: هو انا هينفع اخرج امتي؟
الدكتور: لوتحبي تخرجي النهارده براحتك بس اهم حاجه ترتاحي
ندي: خلاص ادم وديني بيتي لو سمحت؟
ادم زعل انها عايزه تمشي وتروح بيتها
ادم: بيتك؟ هتستحملي الطريج اصلا؟
ندي باستغراب: طريق ايه؟ هو احنا فين هنا؟
ادم: في المستشفي طبعا
ندي: طيب ده يدوب عشر دقايق، طريق ايه اللي بتتكلم عنه؟
ادم: بيت ايه اللي عتتكلمي عنه الاول؟
ندي: بيتنا يا ادم بيتك، انت فاكرني بتكلم عن ايه؟

ادم ابتسم جواه لانه كان فاكرها تقصد بيت ابوها
ادم: ايوه هو البيت ده بس برضه هتستحملي الطريج؟
ندي: ان شاءالله
اخد ادم ندي وروحو كلهم البيت واول ما وصلوا لقت اهل البلد مستنيها يطمنوا عليها
ادم وقف وراح لمراته نزلها بس مقدرتش تتحرك فشالها واستأذن من الناس لانها تعبانه وطلعها على اوضتها حطها وريحها على قد ما يقدر، ويدوب هيبعد مسكته من هدومه بايدها السليمه واتقابلت عنيهم.

ادم: لازم انزل للناس اللي تحت دي
ندي: ممكن ما تتأخرش؟
ادم جاوبها بابتسامه وهو خارج معجبتوش نظره امه فتجاهلها وخرج وسابهم مع بعض...
ادم فعلا ماقعدش كتير تحت مع الناس وراح اطمن على ياقوت ورجع لمراته وفضل جنبها طول الوقت
الليل جه والمفروض انهم هيناموا
ادم رقد ويدوب هيغمض عنيه بس لقي مراته بصاله جامد...
ادم: ايه؟
ندي: عايزه انام انا كمان
ادم: طيب ما تنامي
ندي: مش مرتاحه، النهارده ما نمتش غير وانا معاك.

ادم ابتسم واتعدل وقرب منها بحيث ينيمها على صدره وفعلا ناموا الاتنين مع بعض
الصبح صحيت مالقتوش معاها ودخلتلها كريمه وعزيزه يساعدوها في كل اللي تحتاجه، ندي حست ان كريمه ام ليها مش مجرد حماه ليها
ادم جه بعدها بفتره ودخل سلم عليها وكانت مكشره لانه سابها الصبح ونزل ويدوب هتتكلم فاجئها باحلي ورده حمرا في ايده وعطاهلها
ادم: احلي ورده لاجمل وارق ورده في الدنيا كلاتها.

ندي الدنيا لفت بيها متخيلتش ابدا موقف زي ده، متخيلتش انه ممكن في وقت يكون رومانسي او رقيق كده او يهتم بتفاصيل بسيطه زي دي
ادم: صباح الخير يا جمر عامله ايه دلوجت؟ اتمني تكوني بخير؟
ندي بابتسامه واسعه: انا بقيت كويسه اول ما شفتك
ادم ردها عجبه جدا وقعد جنبها يدردش معاها
ادم: فطرتي؟
ندي: مستنياك..
لمعت فكره دلع في دماغ ندي وقررت تشوف ادم هيوصل معاها لايه
ندي: ممكن اطلب طلب صغنن قبل ما نفطر؟

ادم: اطلبي طلب كبير يا ستي مش صغنن
ندي كان جنبها المشط وكانت كريمه مسرحالها شعرها مسكت وعطته لادم اللي بصله باستغراب
ادم: نعم؟
ندي: مش عارفه اسرح بإيد واحده ممكن تساعدني؟
ادم: هناديلك عزيزه او امي لحظه
جه يقوم مسكته
ندي: انا بطلب من جوزي يساعدني، مش عايزه عزيزه ولا عايزه ماما عايزه جوزي
ادم: مش هعرف
ندي: انا مش رايحه حفله انا بس عيزاه متسرح مش اكتر ارجوك.

عطته المشط وهو قعد وراها وبدأ يسرح شعرها واول ما مسكه في ايده اتفاجئ قد ايه ناعم وطويل ودي كانت اول مره في حياته يكون بين ايديه شعر واحده والواحده دي حبيبته، فضل وقت كتير وهيا مستنياه يخلص لحد ما تعبت من القعده فسندت على صدره
ندي: مش قادره اكتر من كده وانت مش بتخلص
ادم: اسف يا جمر..
ندي: ينفع افضل كده على طول؟
سندت جامد عليه وغرقت في حضنه
ادم لف ايديه حواليها
ادم: لاخر العمر لو تحبي...

فضلو كتير الاتنين من غير كلام لحد ما الباب خبط فاتعدل ادم وقام
ادم: ادخل
دخلت عزيزه: الفطار يا سي ادم اجيبه هنا؟
ادم: اكيد طبعا ولا انتي مش واخده بالك ان ندي تعبانه؟
عزيزه: حاضر يا سي ادم
جابتلهم الفطار وهو قعد واكلها لحد ما اكتفوا
ادم خرج وراح لشيخ البلد
شيخ البلد: يا اهلا يا سي ادم اتفضل.

ادم: اهلا بحضرتك يا مولانا، انا كان عندي استفسار صغير
شيخ البلد: طبعا يا ابني اتفضل
ادم: هو لو واحد، مش واحد لا اقصد ابو واحده جوز بنته بدون علمها فهل الزواج ده بيكون صحيح ولا لأ؟
شيخ البلد: وهيا لما عرفت رافضه ولا جابله!
ادم: لو رافضه.

شيخ البلد: شوف يا ابني يحرم على ابو المرأة أنه يجبرها على الزواج بمن لا ترغب به ولا ترضاه، لقوله صَلَّى اللَّهُ عَلَيْهِ وَسَلَّمَ: ( لَا تُنْكَحُ الْبِكْرُ حَتَّى تُسْتَأْذَنَ ). رواه البخاري ومسلم
ادم: ماشي بس الجواز تم وهيا حاليا في بيته! هل قعدتها في بيته حرام؟ يعني جوازهم صحيح ولا باطل؟
شيخ البلد: ما هيا على جولك اهو انها رفضاه يا ابني فكيف هتعيش معاه تحت سجف واحد، لازم الاستئذان الاول.

ادم: يا شيخنا الاستئذان ده كان في الاول دلوقتي انا بنتكلم انه خلاص العقد تم حكم عيشتهم مع بعض ايه! هيا حلاله ولا لأ!
شيخ البلد: إذا تم عجد الزواج مع الإكراه، فالعجد يكون موجوف على إجازة المرأة، فلو هيا أجازته صار عجداً صحيحاً، وإن لم تجزه فهو عجد فاسد.

عن بُرَيْدَةَ بن الحصيب قال: جَاءَتْ فَتَاةٌ إِلَى النَّبِيِّ صَلَّى اللَّهُ عَلَيْهِ وَسَلَّمَ، فَقَالَتْ: إِنَّ أَبِي زَوَّجَنِي ابْنَ أَخِيهِ لِيَرْفَعَ بِي خَسِيسَتَهُ.
فَجَعَلَ الْأَمْرَ إِلَيْهَا.
فَقَالَتْ: قَدْ أَجَزْتُ مَا صَنَعَ أَبِي، وَلَكِنْ أَرَدْتُ أَنْ تَعْلَمَ النِّسَاءُ أَنْ لَيْسَ إِلَى الْآبَاءِ مِنْ الْأَمْرِ شَيْءٌ.
رواه ابن ماجه
ادم: برضه انا مش فاهم، هيا مراتي ولا مش مراتي.

الشيخ اتفاجئ بكلام ادم وبصله وادم اتراجع بسرعه
ادم: يعني اقصد ان دلوقتي في الحاله دي هل الزواج صحيح ولا لأ! يعني اتكلمت وحطيت نفسي مكان اللي بيسأل ! في الحاله دي يعني هيا مراته شرعا ولا قانونا بس
الشيخ: بالمفتشر كده يا ابني لو هيا وافقت وعجبها الزوج يكون زواج صحيح اما لو رافضه فالعجد باطل ومن حقها تطلج منه او ترفه جضيه عليه تطلب الطلاج وهتاخده بسهوله.

ادم فكر وسكت: يعني لو هيا موافقه يبقي ده جواز شرعي وصحيح، صح كده؟!
شيخ البلد: باذن الله
ادم روح وجواه متلخبط جدا ومش عارف هيعمل ايه!
ايام تعبها ورتها شخصيه جديده في ادم، شخصيه محبه حنينه، شخصيه اول مره تتعامل معاها لانها عمرها ما داقت طعم الحب والخوف والحنيه غير في البيت ده وبس، سواء من كريمه او ادم او ايتن وحتي امجد كمان حست باهتمامه بيها، كل يوم بتصحي على ورده جميله بلون مختلف.

البيت ده متحاوطه فيه بالحب في كل النواحي وتبقي غبيه لو فرطت في الحب ده، لازم تأقلم نفسها على الجو ده وعلي ادم وطباعه وقسوته وحنيته، صحتها بدأت تتحسن وبدأت تخرج شويه شويه وطبعا ادم معاها وبقت تروح تقعد مع ياقوت وكل شويه بتقرب اكتر من ادم وهو بيقرب، طول الوقت تقريبا في حضنه، اتحسنت وجسمها كله اتحسن
في ليله ادم رجع واخد شاور وطلع لبس بنطلون وتيشرت عادي مش جلبيه وقعد جنبها، فضلت تبصله كتير باعجاب ظاهر.

ادم: بطلي تبصيلي كده
ندي: امال ابصلك ازاي؟
ادم: معرفش بس ما تبصيش كده
ندي بتقرب عليه: امال ابص ازاي؟
هيا بتقرب وهو بيرجع بجسمه لوري
ادم: ندي!
ندي: عيوني
ادم: كده مش كويس، انتي تعبانه حاولي ترتاحي
ندي: انا مش تعبانه ومش عايزه ارتاح على فكره في حاجه مهمه انت مش واخد بالك منها
ادم: اللي هيا
ندي: ان انا مراتك.

لحظات صمت عدت وكأنه بيوزن الكلام او بيحاول يقنع نفسه انها فعلا مراته، حاول يفتكر اي موقف يضايقه منها بس مفيش، عنيه مركزه على شفايفها وبس وهيا بدأت تتوتر...
ندي: بتفكر في ايه يا ادم؟
ادم مردش عليها بس قرب منها اكتر وجت تتكلم قاطعها بشفايفه ودي كانت اول مره يبوسها وبمعني تاني اول مره يبوس واحده في حياته، مكنش عارف يهدي او يكون رقيق او جنتل كان عنيف، بعد عنها وحاول يقوم وهو بيعتذر انه اتهور كده.

ندي مش مستوعبه ايه اللي حصل بس حاسه انها كانت طايره ومره واحده بتفوق على واقع ادم مش فيه بصت حواليها لقته هيخرج بره فقامت جري وقفت قدامه
ادم: اسف اعذريني.

ندي بتحرك راسها لأ ما يعتذرش وهيا كمان من غير مقدمات حطت ايديها حوالين رقبته وباسته ودي كانت دعوه صريحه هو لباها، شالها وحطها على السرير واخيرا قدر ينطق
ادم: ندي انتي عارفه احنا بنعمل ايه؟
ندي: انا مراتك
ادم: هتندمي!
ندي: انا مراتك
ادم: انا جاهل ومتخلف ومابفهمش وصعيدي
ندي: وانا مراتك
ادم: انا
حطت ايدها على بوقه علشان ما يتكلمش تاني وافتكر كلام الشيخ انها طالما موافقه يبقي هيا مراته شرعا.

ندي: ما تفكرش كتير انا مراتك. وده المهم
وهنا هو كمان سكت واتكلم بلغه تانيه...
كريمه في اوضتها قلبها اتقبض مره واحده زي ما تكون حاسه بالنار اللي في ادم ابنها، فضلت مكانها بس مقدرتش تفضل كتير فقامت مره واحده وراحت اوضه ابنها خبطت عليها
ادم مش عايز يبعد عن حضن ندي وهيا ماسكه فيه
ندي بهمس: ما تقومش احنا نايمين واللي بيخبط هيمشي المهم ما تبعدش
بس الخبط استمر
كريمه: ادم، ادم.

ادم اول ما سمع صوت امه قام وبيدور على هدومه يلبسها بسرعه
كريمه بزعيق: ادم
ادم بصوت مبحوح: ايوه لحظه
اخيرا فتح الباب وشكله غني عن اي كلام، امه بصتله وبصت لندي اللي باين قوي توترها تحت الغطا، ما اتكلمتش بس شدت ابنها بره من دراعه وقفلت الباب وراه وشدته لاوضتها ودخلوا وقفلت الباب
ادم: في ايه يا امي؟
كريمه: انت مش عارف في ايه؟
ادم: لا مش عارف...
ادم بيهرب من عنين امه وهيا وقفت قصاده.

كريمه: في كتير يا ادم، في انها مش مراتك واللي بيحصل ده غلط وانا مش هسمح بيه
ادم: لا يا امي ندي مراتي على سنه الله ورسوله وهيا عايشه في بيتي على الاساس ده
كريمه: لا طبعا، انت جبتها غصبا عنها واهم شرط للجواز هو قبول الطرفين وهيا ما قبلتش وجبتها غصب عنها واتفقت مع ابوها انك ما هتلمسهاش وكان غلط اصلا من الاول اني اوافق على الجنون ده وغلط اكبر اني اسمحلكم تفضلوا في اوضه واحده..

ادم: انا ما بعملش حاجه غصب عنها واكيد انتي اخدتي بالك انا مش فارض نفسي عليها واحنا مش صغيرين
كريمه: انت بتهرج صح؟ انت راجل وهيا ست ونايمين في سرير واحد لازم طبعا مشاعركم تتحرك، اللي بيحصل بينكم ده رغبه.

ادم: انا عمري ما اتحركت بناءا على رغبه وانا مش مراهق ومريت بكتير قبل كده ودي مش اول مره يتعرض عليا الموضوع ده علشان اول ما واحده تشاورلي هجري على حضنها، انا عشت في امريكيا سنين ومليون واحده رمت نفسها تحت رجليا بس عمري ابدا ما ضعفت او استسلمت لواحده، فعمري ابدا ما حركتني رغبه، ولعلمك بقي انا سألت شيخ عن علاقتنا دي وقال طالما نها موافقه يبقي الجواز شرعي، انا عارف انا بعمل ايه وعايز ايه؟

كريمه: ودي المصيبه انك عارف انت عايز ايه؟ طيب معاك جوازكم شرعي بس انت فكرت هيا عايزه ايه؟ فكرت لما تصحي الصبح وتفوق من الحاله دي رغبتها هتكون ايه؟ فكرت يا ادم ولا لغيت عقلك تماما؟

لا مفكرتش، طيب بلاش لو عرضت حاليا عليها انك تسيبها وترجع بلدها هتختارك انت؟ سكوتك معناه انك عارف اختيارها ايه؟ بعدين حبيبي انت من امتي كده؟ بقي دي اللي تختارها في الاخر زوجه؟ دي اللي هتشاركك طموحك وحياتك؟ دي اللي هتصونك وتشيل اسمك! ادم انت لغيت عقلك تماما وماشي وري رغبه بدليل انك بتعمل غلط وغلط كبير وبتجادل فيه
ادم: انا ما بجادلش انا...

كريمه. : انت ايه!؟ اوعي تقول انك بتحبها، اوعي تغلط في حق نفسك كده، اوعي يا عمري كله لانها مش هتديك غير الوجع والالم، فوق يا حبيبي فوق، فكر وحكم عقلك واديها حريه الاختيار على الاقل وشوفها هتختار ايه؟ ولو اختارتك يبقي الاول تبدأ صح، اعملها فرح وخليني افرح بيك، وساعتها هتبقي مراتك فعلا لكن مش كده...
ادم: بعد اذنك يا امي
ادم خرج من اوضه امه وفضل كتير واقف قدام اوضته متردد يدخل وفي الاخر اخد قراره...