رواية عشقت المتمردة

رواية عشقت المتمردة للكاتبة الشيماء محمد الفصل السابع عشر

ندي: انت لقيت حاجه، قولي مخبي ايه؟
جاسر: قولتلك الصبح ما تحطيش امال كتيره
ندي: جاسر قول على طول لقيت ايه؟
جاسر: الرقم اللي بعتلك الصوره
ندي: رقمها هيا صح؟
جاسر: للاسف ده رقم متسجل باسم ادم نفسه، ادم اللي بعتلك الصور
ندي اتصدمت استحاله يكون ادم؟ ايوه هو قاسي بس مش بالشكل ده ابدا
ندي: استحاله ادم يعملها فاهم؟ انت غلطان.

جاسر: ممكن اكون فعلا غلطان بس برضه ده ما يمنعش انه ممكن يكون ادم بيحاول يفهمك انك صفحه قديمه هو قلبها خلاص؟
ندي: لا يا جاسر لأ، ادم مش كده انت بس ما تعرفوش
جاسر: اعرف انه رجل اعمال ناجح جدا وله اسمه ووزنه في عالم رجال العمال واكيد هو ما وصلش لده من فراغ، شخصيه زي دي بتتعود تبقي قياديه بتاخد قرارت صعبه والعواطف عامة مش بتبقي اساسيه عنده، فشخصيته ما تستبعديش منها حاجه زي دي.

ندي: انت ما تعرفوش فاهم؟ ما تعرفوش؟ لو وصلت لحاجه مفيده ابقي كلمني بعد اذنك
قامت وقبل ما تخرج
جاسر: ندي، اسف لو كنت ضايقتك بس مش ديما الحقيقه بتبقي على هوانا وياريت ما تبنيش امال كتير.

سابته وخرجت وجريت على بيتها تعيط، كل يوم حلم بينهار وامل بيختفي، لحد امتي هتتحمل؟ ولامتي هتقاوم اليأس؟ والاهم لامتي هتفضل بعيده عنه وسيباه لواحده غيرها؟
تاني يوم ما راحتش الشركه نهائي عند ادم وده خلاه هيتجنن وكل دقيقه يفكر يكلمها بس مش لاقي سبب مقنع يكلمها بيه..
ابوها بالليل رجع وقاعدين مع بعض
سالم: انا وادم خلاص هندمج الشركتين
ندي بفتور: مبروك.

سالم: بتقوليها كده ليه؟ ندي سبق وقولتلك لو متضايقه نلغي الموضوع ده؟
ندي: لا لا ابدا، انا بس تعبانه ومحتاجه ارتاح اليوم كان طويل تصبح على خير
سالم: وانتي من اهله، ( مشيت كام خطوه) اه صح يا ندي هنعمل حفله كبيره بمناسبه الدمج ده بعد يومين علشان بس تجهزي
ندي: ان شاءالله.

ندي تاني يوم برضه ماراحتش بس بتعرف من امل كل حركات ادم وعرفت منها ان خطيبته موجوده في القاهره وكل شويه بتفكر تروح تخنقها او تعمل فيها اي حاجه، الاخر قررت تروح وتبطل هرب وتبطل تقدمهولها على طبق من فضه، . لازم تحارب علشانه!

راحت على الشركه وما راحتش فاضيه لا كان معاها حاجه ملفوفه وراحت تحديدا على مكتب ادم، مريم حاولت توقفها بس ندي باشاره ثبتتها مكانها وفتحت الباب مره واحده كانت فاتن قاعده على كرسي وادم على كرسي والقعده زي ما تكون قعدت بيزنس
ندي وهيا داخله: hi babe, miss you
ادم بصلها باستغراب لان دي اول مره تقوله كده؟
ندي: اوووه عندك ضيوف، سوري
فاتن: لا انا مش ضيوف.

ندي: سوري انتي مين؟ حاسه اني شفتك قبل كده؟ فكريني كده بنفسك.
فاتن: انا مراته
فاتن قالتها وكأنها بتغيظها
ندي: اه مراته! الزوجه المطيعه، اوووهه جميل، lovely oh Adam, she is antique
ادم: leave it alone
ندي: why? I have just started
ادم: ندي. What do you want?
ندي: nothing babe
ادم: ندي؟ خير؟
ندي طلعت اللفه الكبيره في ايدها وكانت زي فستان او بدله وطلعتها.

ندي: جبتلك البدله بتاعت الحفله babe زي ما طلبت مني، على ذوقي
ادم اتفاجئ بكلامها وبالبدله وعرف ان ندي بتحاول تعمل مشاكل ومعرفش يكدبها ولا يسكت ولا يعمل ايه؟
ادم: البدله؟ بدله ايه؟
ندي: الحفله بيبي، انت مشغول كتر خيرك ومحتاج كل مساعده المهم يالا شوف مقاسها هتعجبك ولا؟
ادم: اقيسها؟
ندي: طبعا يالا
راحت ندي عليه ووقفته غصب ومسكت الجاكت ويدوب هتلبسهولو اتدخلت فاتن
فاتن: انا هساعده بعد اذنك.

ندي: اه وماله اتفضلي! لبسيه
ادم كان هيولع لانه ما بيحبش يتلعب بيه ابدا وندي عملاه لعبه بين ايديها
ندي: تحفه عليك وبالكرافات هتبقي احلي واحلي، ما تتخيلش شكل الكرافات اللي جبتها تعبت كتير لحد ما لقيت حاجه تليق على الفستان اللي انت اخترتهولي بس ما تقلقش لقيت
ادم فتح بوقه: فستان!
ندي: ايه؟ مش مصدقني؟ لقيت ما تقلقش، هنبقي ثنائي رائع
فاتن: ادم جابلك فستان للحفله؟

ندي: اه بس عادي يعني ما تقلقيش ده مجرد واجهه علشان الصحافه والكلام ده، وواجهه للشركه لان الحفله دي مهمه، ما تقلقيش انتي جوزك في امان مني..
فاتن: لا ما تخافيش مش قلقانه
ندي: اه طيب كويس، حبيبتي انتي تعبانه؟ وشك اصفر خالص! ارتاحي ارتاحي، ادم هاتلها عصير فريش علشان تفوق كده الظاهر انك مجوعها؟ طيب وديها تتغدي في المطعم اللي انا وانت بنروحه، رائع هيعجبك صدقيني اكله تحفه
ادم: ندي!

ندي: ايه في حاجه! اه سوري انا طولت هنا صح؟ واحد وخطيبته وانا في النص، سوري ما اخدتش بالي اسيبكم بقي انتو يا عيني ما بتشفوش بعض غير كل فين وانا فين! وبعدين انا معاك على طول هسيبك باي، فاتن باي لو احتجتي حاجه كلميني على طول انا موجوده اوكي باي
سابتهم وخرجت والاتنين في حاله غير الحاله
الاتنين فضلوا ساكتين مش بيتكلموا لحد ما فاتن نطقت
فاتن: جبتلها فستان!؟ وبعدين انت مقولتليش اصلا انها شغاله معاك هنا؟

ادم: ابوها شريكي واتفاجئت بيها مسكت شغل ابوها كله
فاتن: فض الشراكه
ادم: نعم؟ انتي بتقولي ايه؟
فاتن: انت مش محتاجو فض الشراكه
ادم: انتي مش عارفه انتي بتقولي ايه فاسكتي احسن
فاتن: متمسك بيه ليه؟ ولا متمسك ببنته؟
ادم: سالم ده في مقام والدي فاهمه؟ اعرفه من وانا عيل صغير صاحب وصديق مقرب لوالدي الله يرحمه فعمري ابدا ما اعمل حاجه زي دي مهما يحصل وبعدين ما تدخليش في اللي ما يخصكيش.

ادم: طيب مش هتدخل، بس ليه بتجيبلها فستان للحفله وليه انا اصلا معرفش ان في حفله من اصله والف ليه وليه يا ادم؟
ادم: الحفله شغل وانا ما بقولش لحد عن شغلي او بتكلم عنه
فاتن: بس انا المفروض اكون معاك؟
ادم: تعملي ايه؟ ندي دخلت مجالنا وعارفه معظم المعزومين لان اغلبهم عايزينهم في شغل فبالتالي الحفله اقرب منها للبيزنس عن انها مجرد حفله وندي وجودها ومظهرها مهم فهمتي؟!

فاتن: لا مفهمتش، ايه علاقه كل ده باني ابقي موجوده معاك؟
ادم: يووه يا ندي بقي، عايزه تيجي تعالي اسكتي بقي وما تصدعينيش
فاتن: اسمي فاتن على فكره مش ندي، بس معلش واخده عقلك
ادم: لا مش كده، بس علشان طول الوقت هنا واسمها على لساني
نظره فاتن عرفت ادم انه عكها زياده مش حط مبرر
ادم: يالا انا هروح تعالي اوصلك شقتكم عند اخواتك يالا
فاتن: لا الاول عايزه فستان للحفله
ادم: انتي برضه عايزه تحضريها؟

فاتن: ده طبعا لو سيادتك ما مانعتش؟
ادم: براحتك يالا
اخدها يجيب معاها فستان وكان في قمه خنقته، كل ما بتوريه فستان بيقولها حلو وخلاص وهيا مش عارفه تختار اي شيئ مناسب لمستوي الحفله في الاخر ادم اضطر ينقي هو فستان لان مظهرها مهم
فاتن: الحفله امتي بالظبط؟
ادم: بالليل بكره على الساعه 7 كده هتبدأ
فاتن: طيب تمام هبقي جاهزه قبلها
ادم: اوك هبقي ابعتلك السواق
فاتن: وانت مش هتجيلي ليه؟

ادم: لاني لازم ابقي موجود في تجهيزاتها اصلا، انا تقريبا النهار كله هبقي موجود في مكان الحفله
فاتن: وطبعا الهانم هتبقي معاك؟
ادم بنفاذ صبر: الله اعلم بس هيا اكيد زيك هتبقي محتاجه تجهز نفسها للحفله..
ادم سابها ومشي وهو مستغرب من اللي ندي عملته ومعرفش يفسره...
تاني يوم اول ما وصل شغله راحلها والشرر بيتطاير من عنيه
ادم: سيادتك كنتي عايزه تعملي ايه؟
ندي: صباح النور بيبي.

ادم: وايه حكايه بيبي اللي طالعالي فيها دي!؟ ده احنا لما كنا متجوزين مكونتيش بتقوليها؟ عايزه توصلي لايه يا ندي؟
ندي: مش عايزه حاجه وبعدين مكنتش بقولها لانك بشخصيتك القديمه مكنتش هتفهمها
ادم: مكنتش هفهمها اه؟ والبدله والفستان والكرافات دول معناهم ايه؟ عايزه تخليها تتخانق معايا ولا تغير منك؟
ندي: بيبي هيا من غير حاجه لازم تغير مني؟ هيا فين وانا فين؟

ادم: كنت فاكر انك اتغيرتي بجد بس مازلت زي ما انتي الناس عندك طبقات
ندي: فهمتيني غلط انا ما قصدتش ابدا غني وفقر او فوارق اجتماعيه نهائي
ادم: امال تقصدي ايه؟
ندي قربت قوي منه وهمست في ودنه: اقصد ان انا مكاني جوه قلبك لكن هيا ملهاش مكان اصلا...
بعدت ومشيت بس ادم حصلها وشدها من دراعها جامد
ادم: بطلي تلعبي وتتسلي بحياه الناس يا ندي وخلي بالك من نقطه مهمه قوي انتي ناسياها
ندي: اللي هيا؟

ادم: ان هيا مراتي وعلي ذمتي وانتي، ، انتي مجرد بنت شريكي، ما تديش لنفسك حجم اكبر من حجمك انتي مجرد ماضي وانتهي وما تعنيليش شيئ نهائي
ندي بصتله بصدمه ووجع حقيقي خلاه كان عايز يسحب كلامه بس سابته ومشيت ومعطتلوش فرصه يتكلم وندم على كل حرف نطقه...
راحت ندي على جاسر
ندي: ارجوك قولي انك وصلت لاي حاجه؟

جاسر: ندي، فوقي بقي، دي مجرد مدرسه نكره لا راحت ولا جت ابدا، ملهاش حياه خاصه او مغامرات او اي شيئ بره البلد، دي مجرد بنت بسيطه الحظ خدمها مش اكتر ولا اقل
ندي: لا استحاله انا قلبي مش مطمنلها وقلبي عمره ما بيكدب عليا.

جاسر: قلبك ما بيكدبش بس بيقولك اللي انتي عايزه تسمعيه، ندي طبيعي انك ما تحبيهاش وطبيعي انك تكرهيها، دي اخدت منك حبيبك فاحساسك طبيعي جدا بس مش شرط يكون له اسباب او اسرار، كل ما تقبلتي الواقع كل ما كان افضلك
ندي: وايه هو الواقع؟ هاه؟
جاسر: ان ادم تخطاكي وكمل حياته وانتي ذكري حلوه عدت
ندي: لا طبعا ادم بيحبني.

جاسر: كان، دلوقتي هو راجل متجوز، وبعدين لو بيحبك ايه اللي مانعه يعترفلك بالحب ده؟ قوه؟ قوي؟ شخصيه؟ وعنده شخصيه جباره؟ فلوس؟ وغني؟ خوف؟ ما بيخفش ابدا من حد؟ عادات وتقاليد؟ ما بتهموش؟ تقدري بقي تقوليلي ايه اللي مانعه انه يكون معاكي الا اذا كان فعلا تخطاكي؟
ندي رافضه تصدق كلامه ده
ندي: طيب انا هثبتلك..
جاسر: انتي مش محتاجه تثبتيلي حاجه
ندي: خلاص هثبت لنفسي ما تزعلش
جاسر: ازاي؟

ندي: انت هتيجي معايا حفله النهارده وهعرف ادم عليك كصديق مقرب قديم وبس يعني هعرفه بصداقتنا
جاسر: ده راجل متفتح وعادي ان يكون ليك اصدقاء
ندي: مش بقولك انت ما تعرفوش؟
جاسر: وبعدين ناويه على ايه؟
ندي: مش ناويه انا بس عايزه اعرف اذا كان بيحبني فعلا ولا زي ما انت قولت تخطاني؟

ندي لبست فستانها الطويل وكانت ايه في الجمال بطرحتها وميكبها الهادي الرائع ولمساتها الجميله
سالم: يالا يا ندي؟ بسم الله ما شاء الله ايه الجمال ده؟
ندي: مرسي بابي بس اسبقني انت
سالم: لا طبعا وانتي؟
ندي: جاسر هيجيبني
سالم: جاسر؟ جاسر مين؟
ندي: مقدم جاسر مش فاكرو؟
سالم: ساعت ما قبض عليكي تحري علشان معكيش بطاقه ولا باسبور؟
ندي: ايوه هو ده، بعدين ما انت عارف اننا بقينا اصحاب جدا.

سالم: اه عارف بس ايه اللي فكرك بيه؟
ندي: قابلته من فتره كده صدفه وبنشوف بعض من وقت للتاني المهم روح انت علشان ما تتأخرش على ادم وانا وراك ما تقلقش
سالم: ولو ادم سألني عنك؟
ندي: قوله عادي جايه مع صديق قديم
سالم: ندي انتي بتخططي لايه؟
ندي: ولا اي حاجه يا بابا انا بس استسلمت وبطلت احارب على ادم وبحاول اشوف بقي حياتي ويكون ليا اصحاب هنا واستقر مش اكتر، يالا انت اتفضل.

راح سالم وطبعا ادم اول ما شافه راحله
ادم: امال فين ندي؟
سالم: جايه ورايا
ادم باستغراب: وراك؟ ومجاتش معاك ليه؟
سالم: معاها صديق قديم مقرب هيوصلها
ادم بضيق: صديق قديم؟ صديق مين؟ وشافته فين وليه جايه معاه اصلا؟ ويعني ايه اصلا صديق؟
سالم: ايييه حملك شويه؟ واحد كانت تعرفه زمان وكانوا اصحاب قوي وقابلته من فتره وجددوا صحوبيتهم عادي يعني يا ادم؟

سالم اشترك في خطه ندي من غير ما يعرف اصلا بكلامه بس يمكن لان هو كمان عايز يعرف ادم بيحب بنته فعلا ولا لأ؟
ادم: يعني ايه صاحبها؟ انا مش فاهم انت ليه بتقبل بحاجات زي كده؟
سالم: وانا مش عارف انت ليه مهتم اصلا يا ادم؟ هيا حره وكبيره وعاقله، مراتك بتدور عليك روحلها
ادم بص وراه لقاها فعلا جايه عليه، قال جمله كده في سره وكأنه بيشتم او بيعترض بس راحلها.

ادم: انا مش فاهم ايه كميه الميكب اللي انتي حطاها دي؟ حد قالك انك رقاصه ولا بنت من بنات الليل؟
فاتن: انت بتقول ايه؟
ادم: بقول ان الميكب بتاعك اوفر بطريقه مستفزه
فاتن: ولما ندي كانت بتحطه مكنتش بتتكلم يعني؟
ادم: يادي ندي اللي انتي حطاها في بالك دي؟ ندي مكنتش بتحط كده ابدا وبعدين دي مكنتش لا متدينه ولا عندها عيب ولا حرام وطلقتها علشان الاسباب دي انتي بقي بتقلديها ليه؟

فاتن: علشان يمكن تشوفني لاني مهما اعمل انت مش شايفني اصلا مهما اقول، انت مش حاسس بيا.

فاتن لاحظت ان ادم مش معاها نهائي ولا سامعها ولا شايفها وعنيه مركزه بعيد تماما بصت لقت ندي داخله وللاسف كانت زي الاميره بفستانها البسيط اللي فوق الرائع ومكياجها الهادي ولعنت حظها بس فرحت ان معاها واحد جنبها ومكنش اي واحد لا كان راجل منتهي الشياكه والوسامه وما يقلش ابدا عن ادم، هيا ابتسمت وادم كان هيطلع نار من عنيه
ندي جت عليهم تسلم.

ندي: هاي سوري لو اتأخرت، فاتن ازيك شكلك، مختلف، ادم ازيك، البدله تحفه عليك
ادم: والفستان برضه عليكي! معرفتيناش؟
جاسر اتدخل: سوري انا جاسر محمد السلماني
ادم: ليك علاقه بشركه السلماني للامن؟
ندي: شركته، جاسر ده ادم الحسيني ودي خطيبته فاتن
تم التعارف وادم كان باين عليه قوي انه هينفجر من الغيظ مهما يحاول يداري او يخبي
ندي مع جاسر
ندي: ايه؟ شايف ايه؟ وبصراحه؟ فعلا بيحب خطيبته؟

جاسر: هو مش شايفها اصلا، عينه مش نازله من عليكي وهيتجنن وحاسس ان في اي وقت هيتهور ويجي يتخانق معايا
ندي: يعني مش بيتهيألي؟
جاسر: لا يا ندي، الراجل ده فعلا بيحبك، طيب ايه السر؟ وليه بعتلك الصور دي؟ ممكن يكون بعتها لان معندوش القدره انه يبعد هو فعايزك انتي اللي تبعدي
ندي: جاسر! ادم ما بعتش الصور دي، انا عارفه انا بقولك ايه، وفاتن دي وراها سر لازم اعرفو.

جاسر: لا بقي دي بنت عاديه في مكان غير مكانها وملهاش في اللف والدوران والا كانت عرفت تتعامل معاه او معاكي او حتي عرفت تكون متناسبه في حفله زي دي، مشكلتك مش فيها
ندي: مشكلتي فيها بالظبط، بقولك؟ تعال نشرب اي حاجه.

ندي وجاسر مع بعض بيتكلموا وفاتن اصرت انها ترقص سلو مع ادم على الرغم انها ما بتعرفش
ادم عينه مش نازله عن ندي وبيبصلها بغيظ! بتمني! بحب؟! بولهه! نظراته ندي معرفتش تفسرها..
بس شايفه مع الغيظ حاجه تانيه، شوق غريب وتمني ودعوه صامته من عنيه، نظراتهم اتقابلت لمده طويله
ندي: جاسر معلش اعذرني بعد اذنك
جريت ندي من الحفله تهرب من عنين ادم اللي مكتفاها وخنقاها ومخليها مش قادره حتي تتنفس.

ندي خرجت بره القاعه وطلعت تجري وسمعت حد بيجري وراها وللاسف الحد ده كان ادم..

رواية عشقت المتمردة للكاتبة الشيماء محمد الفصل الثامن عشر

ندي: جاسر معلش اعذرني بعد اذنك
جريت ندي من الحفله تهرب من عنين ادم اللي مكتفاها وخنقاها ومخليها مش قادره حتي تتنفس
ندي خرجت بره القاعه وطلعت تجري وسمعت حد بيجري وراها وللاسف الحد ده كان ادم...
فضلت تجري مش عارفه تروح فين وشايله فستانها بايديها زي سندريلا وهيا بتهرب من حفله الامير لحد ما لقت بابا مكتوب عليه مخرج طوارئ فتحته ودخلته كان سلم بس ادم لحقها ومسكها
ادم: استني هنا.

لفتله ندي: انت عايز مني ايه؟ بتبصلي كده ليه؟ انت بين ايديك مراتك بصلها هيا؟ ادم كفايه بقي؟ بطل تبصلي كده لانك لما بتبصلي كده
I can t even breath
ادم: وانا ببصلك ازاي بقي؟
ندي: بالطريقه اللي انت بتبصلي بيها دلوقتي.

ادم: انتي متخيله ان انا عايز ابصلك كده؟ انتي فاكره ان انا مبسوط بالوجع والمغص اللي بيسيطر عليا كل ما بشوفك مع حد وانا ماليش حق اعترض او اتكلم؟ انتي متخيله ان انا مش عارف اني متجوز ومراتي بين ايديا المفروض ابصلها هيا؟ انتي فكراني حجر ما بحسش يا ندي؟
ندي: انت عايز مني ايه يا ادم؟
ادم: وهو باللي انا عايزو! لو باللي انا عايزو فعايزك ما تفارقيش حضني ابدا وما تغيبيش عن عيني ابدا.

ندي: هو فعلا مش باللي احنا عايزينو، اسفه على حركات امبارح كنت، مش عارفه كنت ايه؟ بس ما تخيلتش انك فعلا هتلبس بدلتي؟
ادم: امال تخيلتي ايه؟ حاجه انتي جيباها بنفسك عيزاني اعمل فيها ايه؟
ندي رفعت عنيها وبصتله بكل الحب اللي جواها
ادم: المره دي الدور عليا اقولك ما تبصليش كده يا ندي.

ندي: امال ابصلك ازاي وانت حبيبي وقلبي وعمري وحياتي كلها؟ ابصلك ازاي يا ادم؟ انت جوزي ولحد النهارده شايفاك جوزي، اعمل ايه؟ قولي انت اعمل ايه؟
ادم ما ردش عليها لان مفيش غير رد واحد على كلامها وهو عمله
شالها وحضنها بكل الشوق اللي مخبيه طول السنه اللي عدت عليهم بعيد عن بعض..
فضلوا قد ايه مع بعض؟ محدش فيهم عارف المهم انها بين ايديه وفي حضنه.

فجأه الباب اتفتح عليهم والاتنين اتفاجؤا وبعدوا عن بعض بسرعه وندي استخبت وري ادم
واللي كان على الباب سعد اللي اتحرج اكتر منهم واعتذر وقفل الباب بسرعه
ادم بص لندي وبيساعدها تعدل نفسها وهيا بتعدله الكرافات بتاعته وبتمسح اثار الروج بتاعها اللي في وشه
ادم: ندي ده معناه ايه؟
ندي: مالوش معني ارجع للحفله ولمراتك
ادم: ندي بصيلي وكلميني
ندي بصتله بس هو معرفش يتكلم بسبب شكلها ووشها
ادم: ما ترجعيش الحفله وانتي كده.

ندي: حاضر هعدل نفسي قبل ما ادخل روح انت وشوف سعد كان عايز ايه؟
ادم سابها وخرج وكان سعد واقف بعيد
ادم: في ايه؟
سعد: انا متأسف جدا يا ادم بيه
ادم: انجز بقي في ايه؟
سعد: سالم بيه بيدور عليك وست فاتن والكل صراحه بيدورا عليكم علشان الصحافه المفروض هتتكلموا معاها وانا كنت بدور بس لجيت ده مخرج جلت اخطف سيجاره على السريع
ادم: طيب يالا
سعد: لحظه.

سعد طلع منديل ومسح اثار لروج على وش ادم اللي اتحرج اكتر واكتر من سعد، الوضع كله كان محرج جدا
ادم دخل القاعه وراح لسالم ووقف وسط رجال الاعمال والصحافه هتبدأ تصور وفعلا بدؤا
ندي راحت على الحمام تعدل نفسها ومكياجها، امل لمحتها وراحت وراها
امل: مالك في حاجه؟
ندي: لا مفيش
امل: امال وشك ماله كده واحمر ليه؟
ندي: قولتلك مفيش يا امل هو تحقيق ولا ايه؟
امل: اسفه مش قصدي اضايقك بس بتطمن عليكي.

ندي بصتلها: انا اللي اسفه يا امل ما تزعليش
امل: لا ابدا، بس مالك؟
ندي بدئت تعدل مكياجها لحد ما عدلت كل حاجه وراحت هيا وامل على القاعه
وقفت بعيد تماما عن ادم اللي اول ما دخلت عينه مرفعهاش من عليها
فاتن بنظره لادم ومتابعتها لعينه عرفت انه متابع ندي وده ضايقها اكتر واكتر، راحت وقفت جنبه وهو ابتسم لها ابتسامه مصطنعه وبعدها كمل كلامه مع اللي واقف معاه لحد ما خلص وبقوا لوحدهم
ادم: مالك مش عوايدك ساكته؟

فاتن طلعت منديل ومسحت حاجه من رقبه ادم وورتهالو وكان اثر لروج
فاتن: بما ان ده مش روجي ومش انا اللي عملت ده فاكيد ده تبع مراتك الاولي اللي انت مصر ان مافيش حاجه بينكم غير تقريبا قبلات حاره مسروقه ولا ايه؟عرفت مالي؟ بعد اذنك واه روح اغسل وشك بدال ما اثار الروج بتاعها مالياه وشكلك مش حلو.

سابته ومشيت وهو راح فعلا للحمام يغسل وشه بس مستغرب ليه مش حاسس بالذنب زي ما حصل ساعت ما باس فاتن او بالاحري هيا اللي باسته؟
تليفونه رن وكانت ايتن فرد عليها
ايتن: حبيبي ازيك مبروك على الدمج ان شاءالله تبقي حفله جميله وتتبسط فيها
ادم: الله يبارك فيكي يا قمر يا ريتك كنتي هنا معايا
ايتن: انت مش مبسوط ولا ايه؟

ادم: مبسوط ازاي وانا محاصر بين مراتي القديمه ومراتي الحاليه ومش عارف اعمل ايه؟ واحده بحبها وواحده مش عارف ابعد عنها علشان احساسي بالمسؤليه، صدقيني مش عارف اعمل ايه نهائي؟
ايتن: انا عندي حل يا ادم
ادم: الحقيني بيه؟
ايتن: انت بتحب ندي وعايزها معاك وفي نفس الوقت مش قادر تتخلص باحساسك بالمسؤليه ناحيه فاتن وحاسس انها مش رجوله انك تسيبها حاليا لمجرد ان مراتك ظهرت في الصوره. صح كده؟

ادم: صح والحل بقي ايه؟ نوريني
ايتن: تتجوز الاتنين
ادم بتريقه: ياااه ده ايه الفصاحه والجمال والحلاوه دي؟ يا تري انا ليه مفكرتش كده؟ امم علشان فكره متخلفه وغبيه وانا اللي كنت فاكرك هتقولي حاجه عدله الظاهر ان الحمل اثر على دماغك...

ايتن: على فكره انا بتكلم بجد، ندي هتتجوزها عندك وهتعيش معاها وفاتن عارفه انها مفروضه عليك فهتتجوزها هنا واهو كل كام يوم تجيلها ليله كده ولا حاجه، ولو رفضت الوضع ده يبقي هيا اللي هتسيبك وبالتالي تبقي انت في حل منها..

ادم: ايتن حبيبتي، عدم تفكيري في الحل ده مش لاني خايف ان واحده ترفض لا رفضي ليه لاني مش متقبل فكره الجواز من فاتن، انا مش عارف انا ازاي اتحطيت في الموقف ده؟ ومش قادر اتقبل فكره انها تبقي مراتي ويكون ليها حقوق! والموضوع ده اتضاعف مليون مره بعد ظهور ندي في الصوره تاني..
ايتن: خلاص يبقي تسيب فاتن؟
ادم: ازاي بس؟ وبعدين انتي متخيله ان ندي ممكن تقبل بفكرتك دي؟
ايتن: ندي بتحبك وهتقبل باي وضع يقربها منك.

ادم: ما اعتقدش، اللي بيحب ما بيقبلش شريك، انتي لو جوزك اتجوز عليكي او عرض عليكي مجرد الفكره دي هتعملي ايه؟
ايتن: هقتله بس
ادم: الله ينور عليكي، اسكتي بقي وما تتكلميش تاني
ايتن: طيب جرب مش هتخسر حاجه
ادم: سلام يا ايتن انا اتأخرت على الناس اللي بره
ايتن: سلام بس جرب وقولي عملت ايه؟

دخل ادم القاعه وما شافش فاتن بس شاف ندي قريبه من البوفيه وراح عندها وقف وراها وقريب منها وهيا ابتسمت عمل نفسه بيجيب طبق من قدامها بحيث انها تبقي في حضنه..
ندي: الناس هتاخد بالها
ادم: ياخدو مش مهم عندي حد
ندي: مراتك هتاخد بالها
ادم: برضه مش مهم..
ندي بتتحرك وهو بيتحرك معاها وبيتكلموا بحب ظاهر للي حواليهم زي سالم وجاسر وسعد واهمهم فاتن...
ادم: تتجوزيني يا ندي؟
ندي اتصدمت وبصتله.

ندي: انت بتقول ايه؟ ما تهرجش في المواضيع دي
ادم: انا مش بهرج، تتجوزيني؟
ندي: قولي انك بتحبني؟
ادم: انا تخطيت الحب من زمان يا ندي، انا مجنونك، بعشقك وهموت عليكي، كل لحظه بتقضيها بعيد عن حضني عمر بحاله، عايزك على طول جنبي لا لا مش جنبي عايزك في حضني يا ندي ما تفاريقهوش ابدا، قولتي ايه؟
ندي: قولت ان انا كمان بحبك وبعشقك وبتمني اللحظه اللي تشيلني فيها تاني اسمك بس المره دي هحافظ عليه وهصونه..

ادم: موافقه يعني؟
ندي: طبعا، بس فاتن هتقولها ايه وهتعمل معاها ايه؟
ادم سكت شويه: مش هقولها حاجه هيا هتفضل زي ما هيا في البلد ويا تقبل ده يا هيا حره؟
ندي: استني استني يعني ايه مش هتقولها؟ ويعني ايه تقبل او لأ؟ انا مش فاهمه حاجه
ادم: يعني انا هتجوزك هنا وهنعيش هنا
ندي: ماشي وهيا؟ هتسيبها صح؟
ادم: مش هينفع اسيبها وانتي عارفه ده كويس واعتقد انك عارفه سبب جوازي منها من الاول..

ندي: برضه مش فاهمه يعني ايه مش هتسيبها؟ امال هتتجوزني ازاي؟
ادم بتردد: عادي يعني، هتجوزكم انتو الاتنين
ندي مذبهله ومش قادره تصدق اللي ادم قاله؟ ومش قادره ترد عليه حتي
ندي: انت عايزها تبقي مراتك زيي؟ انت واخد بالك انت بتقول ايه؟
ادم: معنديش حلول تانيه، اعتبريه حل مؤقت.

ندي: هشش هشش اسكت خالص يا ادم، انت متخيل ان انا ممكن اقبل ان حد يشاركني فيك؟ انت مش قادر تقبل واحد يتكلم معايا مجرد كلام فعايزني انا اقبل ان واحده تانيه يكون لها نفس حقوقي عليك؟ انت ازاي اصلا قدرت تفكر في الحل ده؟ وازاي تخيلت اني ممكن اقبله؟ و، لا الكلام مالوش لازمه، ادم انت كده جبت اخر طريقك معايا
ادم: انتي بتقولي ايه؟

ندي: بقولك اني انتهيت منك، انا معدتش عيزاك في حياتي، لا عايزه اشوفك تاني ولا اسمع صوتك تاني، بعد اذنك روح لمراتك
جت تمشي مسكها من دراعها فبصتله
ندي: سيب ايدي بدال ما اخلي كل الموجودين يتفرجوا علينا والصحافه تكتب احلي كلام عنك، سيبني حالا يا ادم
ندي كانت بتتكلم باسلوب ادم اول مره يشوفه ولاحظ ان كذا صحفي متابعه وعارف ان ندي مجنونه فسابها تمشي..

راحت ناحيه ابوها تعتذرله علشان تمشي بس اتفاجئت بيه بيطلب منها في انها تفضل موجوده علشان هيمضوا عقود وهو عايزها تفضل
راحت لبتاع الدي جي وطلبت منه اغنيه وطبعا ادم مراقباها ومنتظر هتقوله اغنيه ايه
Rolling in the deep
ودي اغنيه ل Adele.

There s a fire starting in my heart,
Reaching a fever pitch and it s bring me out the dark,.

Finally, I can see you crystal clear,
Go ahead and sell me out and I ll lay your sheet bare,
See how I ll leave with every piece of you,
Don t underestimate the things that I will do,.

The scars of your love remind me of us,
They keep me thinking that we almost had it all,
The scars of your love, they leave me breathless,
I can t help feeling,
We could have it all
Rolling in the deep.

Baby, I have no story to be told,
But I ve heard one on you and I m gonna make your head burn,
Think of me in the depths of your despair,
Make a home down there as mine sure won t be shared,.

Could have had it all,
Rolling in the deep,
You had my heart inside of your hands,
But you played it with a beating,.

ادم واقف باصص للارض ومركز قوي مع كلماتها حتي فاتن حاولت تكلمه بس ما ردش عليها وده ضايقها قوي فسابته وخرجت
ندي خلصت اغنيتها اللي طلبتها واتقابلت عنيها مع ادم في نظره طويله وانسحبت بعدها علشان تمشي.

وهيا ماشيه سمعت صوت فاتن بتتخانق مع حد فوقفت بعيد تسمعها وطلعت موبيلها وبتصورها فيديو
فاتن: انت ايه اللي جابك هنا؟ انت مجنون؟
## عايز فلوس
فاتن: نعم؟ ما انا عطيتك؟
## مش كفايه عايز خمسين الف
فاتن شهقت: وانت متخيل ان معايا مبلغ زي ده؟
## حبيب القلب معاه
فاتن: مقدرش اخد منه مبلغ زي ده
## بقولك ايه اللي انتي طلبتيه نفذناه بالحرف جايه دلوقتي بقي تقولي معرفش ايه؟

فاتن: اتفاقنا كان جزء بعد التنفيذ وجزء لما اتجوزه
## واديكي اتجوزتيه يا حلوه
فاتن: لا لسه ده كتب كتاب بس لسه ما دخلتش بيته ولا احتكم على اي حاجه وبعدين شايف ده؟
طلعت منديل وورتهوله
فاتن: عارف ايه ده؟
## منديل عليه روج ايه يعني؟
فاتن: اه فعلا بس عارف انا مسحاه من على وشه، شايفني حاطه اللون ده؟
## ماليش فيه ده، الكلام ده ما يعنيليش شيئ، جمعيلي المبلغ ده والا...

فاتن: ما تهددنيش، هحاول كل فتره اجيبلك جزء لكن اياك تيجيلي تاني في اي مكان فاهم ولا لأ؟
## حاضر يا قطه سلام
فاتن راجعه فندي جريت واستخبت ودماغها هتنفجر من التفكير جريت وراحت لجاسر
جاسر: انتي فين بدور عليكي
ندي: يالا نمشي من هنا تعال
اخدته وخرجوا الاتنين بسرعه ولمحت ادم عينه عليها ونفسه لو يروح يجيبها ويحبسها
في العربيه
جاسر: طيب في ايه فهميني؟
ندي: خد اتفرج على الفيديو ده وقولي رأيك ايه؟

اتفرج جاسر عليه لحد ما خلص
ندي: هاه لسه برضه عند رأيك ان موراهاش اي قصه؟
جاسر: لا كده الموضوع فعلا مريب، سيبيلي انا الموضوع ده وانا هحاول اجيب قراره، المهم انتي اختفيتي فين؟ وايه اللي حصلك؟
ندي: مفيش اتخانقت انا وادم
جاسر: اوعي يكون بسببي؟
ندي: لا لا، بس طلب يتجوزني
جاسر: طيب كويس ايه اللي مزعلك؟
ندي: علشان الاستاذ عايز يتجوزنا احنا الاتنين
جاسر ضحك: والله فكره مش بطاله وانتي قولتيلو ايه؟

ندي: متخيل اني هقوله ايه مثلا؟ رفضت طبعا
جاسر: طيب ليه؟
ندي: ايه هو اللي ليه ده؟ انت مجنون؟
جاسر: لا ابدا بس ده فعلا الحل الوحيد وبعدين انتي حبيبته يعني مش هيفارقك انتي التانيه هتكون تأديه واجب مش اكتر وبعدين هو غني يعني يقدر يفتح بدال البيت عشره
ندي: اسكت يا جاسر وما تتكلمش تاني.

جاسر: حاضر هسكت بس لو ما وصلناش لحاجه عن فاتن تبعدها خالص من طريقك يبقي تفكري في عرض ادم وتقبليه لان ساعتها مش هيبقي قدامك غيره...
ادم خلص حفلته وروح فاتن على بيتها وبدال ما يروح لقي نفسه قدام بيت ندي، دخلها يتكلم معاها
سالم خبط على بنته: ندي ادم تحت عايزك
ندي: مش عايزه اكلمه يا بابا اعتذرله
سالم: لا انزلي كلميه بلا اعتذرله بلا زفت انزلي يالا
ندي نزلت متغاظه: افندم.

ادم: تعالي نتمشي شويه في الجنينه ونتكلم
خرجوا الاتنين يتمشوا
ندي: هتفضل ساكت كده كتير؟
ادم: مش عارف اقول ايه؟
ندي: طيب يبقي تصبح على خير
جت تمشي بس شدها عليه ومره واحده باسها من غير مقدمات او تفكير او حسابات، بس عمل شيئ بيتمناه
ندي: وبعدين؟
ادم: بحبك يا ندي
ندي: وبعد الحب ايه؟

ادم: ماعرفش ومش عايز اعرف، المهم اني بحبك وعايزك معايا في اي وضع، ندي انا لو عندي حل غير اللي قولته مكنتش استنيت؟ وبعدين انتي رفضاه ليه؟ ده انا بحبك انتي المفروض ان هيا اللي ترفض لانها هتغير منك لكن العكس لأ
ندي: مش هقدر اتخيلك معاها، ده انا كده ولما بشوفك بتتكلم بس معاها بموت.

ادم: يبقي الحل بقي ان انا نسيب بعض؟ ندي فكري، تقبلي حلي ده ونعيش اسعد زوجين ويعدي علينا لحظات نتوجع فيها ولا نرفضه ونفضل انا وانتي عايشين في وجع مستمر؟ ارجوكي يا ندي انا عايزك معايا ما ترفضيش
ندي: مش قادره يا ادم ( مسكت وشه بايديها) ازاي اقبل واحده تقرب منك غيري!؟ دي ازاي اقبلها؟
ادم: مش عارف مش عارف طيب قوليلي حل غيره
ندي: انا اسفه هقولك زي ما ديما بتقولي دي مشكلتك انت اتحمل نتيجتها مش انا.

ادم: ندي حبيبتي ده هيكون وضع مؤقت بس
ندي: لامتي؟ هاه؟ وبعدين اذا كان انتي مش قادر تفسخ خطوبه هتقدر تطلق؟ وبعدين بلاش كل ده نفترض انك اتجوزتها وبقت حامل هتطلقها برضه؟ ولا ساعتها هتقولي ابني؟ لا يا ادم الفكره نفسها مرفوضه انا اسفه مش هقدر، انا مش هقبل حد يشاركني فيك، اتصرف وبعد ما تتصرف تعال غير كده انا اسفه، تصبح على خير.

سابته ومشيت وهو مشي مش عارف يعمل ايه؟ اول مره يحس انه متكتف بالشكل ده؟ وهو مروح شغل راديو العربيه وللاسف شغله على اغنيتها
Rolling in the deep حس ان كل حاجه مستقصداه
تاني يوم في الشركه كان في دربكه كتير بسبب نقل الشركتين وضمهم في شركه واحده وحاله هرج في الشركه وزحمه
ادم: مريم هيا ندي جت؟
مريم: ما اعتقدش سالم بيه بس موجود لكن ندي ما شفتهاش..
ادم راح لسالم: صباح الخير
سالم: يا اهلا مش عوايدك تتأخر يعني؟

ادم: معلش بس نمت متأخر وبالتالي صحيت متأخر هيا ندي فين؟ مش شايفها في مكتبها
سالم: لا هيا مجاتش ومش ناويه تيجي
ادم: تعبانه ولا حاجه؟
سالم: لا ابدا بس كانت بتقول هتشوف شغل في مجالها هيا
ادم: يعني ايه؟ عايزه تسيب الشغل هنا؟ هو لعب عيال ولا ايه؟
سالم: اهدي بس انت، هيا متضايقه حاليا ورافضه تقولي متضايقه من ايه؟ شوف انت بقي مضايقها في ايه؟
ادم: انا؟ هيا اللي مجنونه ومتسرعه.

سالم: وده طبعها هو انت اول مره هتعرفها؟
ادم: طيب بعد اذنك
سالم: رايح فين؟ انت يدوب جاي
ادم: رايحلها هجيبها.

ادم مشي وراح لندي البيت، الشغالين فتحولو وعرف انها نايمه فطلعلها، هو طالع وعارف ان طلوعه غلط هيا مش مراته بس النفس اماره بالسوء، دخل اوضتها كانت نايمه، ياما راقبها وهيا نايمه، ياما اتمناها وهيا نايمه، ياما اتمني يضمها لحضنه، احساسيس كتير سيطرت عليه، قعد جنبها ومشي ايده على خدها برقه وهمس باسمها يصحيها، ابتسمت
ندي: حبيبي، وحشتني
ادم: انتي اللي وحشتيني
ندي اول ماسمعت صوته اتعدلت وشدت الغطا عليها.

ندي: انت هنا بجد! انا فاكره نفسي بحلم! انت ايه اللي جابك هنا ودخلت هنا ازاي؟
ادم: جاي اشوفك واعرف سيبتي الشغل ليه وبعدين خبطت والشغالين فتحولي..
ندي: وازاي يفتحولك؟
ادم: انتي ناسيه ان انا جوزك؟
ندي: لا انت اللي ناسي انك طلقتني؟
ادم: وانا اهو بقولك نرجع انتي اللي رافضه
ندي: انا رافضه؟ ولا انت اللي عايز تتجوز واحده تانيه معايا؟
ادم: انا مش عايز انتي ليه مصره تشوفيها كده؟
ندي: لان ملهاش معني غير كده.

ادم: ندي انا بحبك وانتي عارفه ده كويس، تفرق معاكي في ايه فاتن؟ او وجودها؟ هيا ولا حاجه؟
ندي: تفرق انها هتشاركني فيك، هتشيل اسمك، هيكون ليها حقوق عليك ومش هتقدر تنكرها، وده اللي انا مش هستحمله
ادم: ندي
قاطعته ندي: ادم اقفل الكلام، انا مش هتجوزك وهيا على ذمتك، مهما يحصل خلاص؟
ادم: طيب سيبك من الجواز خالص دلوقتي، سيبتي الشغل ليه؟
ندي: ولا قادره ولا عايزه اشوفك كل دقيقه كده.

ادم: وده سبب انك تتخلي عني في حلم زي ده؟ انتي عارفه مكانه المشروع ايه بالنسبالي يبقي ما تتخليش عني
ندي: انا مش بتخلي عنك وبعدين انت عندك مهندسين اشكال والوان وخبرات ضخمه شغالين معاك عايزني انا ليه!
ادم: لان انتي مميزه قوي بالنسبالي غير كل المهندسين دول، وجودك بيفرق معايا كتير، ندي ارجوكي خليكي جنبي لاخر المشوار! ارجوكي
ندي: خلاص يا ادم هفضل معاك فتره المشروع بس بعد كده ما اوعدكش.

ادم: وانا موافق خليكي معايا لاخر المشروع وبعدها ربك يسهلها، يالا قومي اجهزي وانا هستناكي تحت وننزل مع بعض
ندي لبست ونزلت بسرعه وهو اخدها وراحوا فطروا الاول وبعدها راحوا على الشغل، كانت داخله معاه مكتبه بيهزروا ويضحكوا واول ما فتح المكتب اتفاجئ بفاتن قاعده مستنياه وطبعا غيظها وقهرتها كانت باينه جدا على ملامحها
ندي: ok, I ll leave you with your، wife
ادم: ok
قفل ادم الباب ودخل: ازيك، مقولتيش انك جايه؟

فاتن: انا هنا من ساعه ونص
ادم: اشمعني؟ ملقيتينيش امشي. مستنيه ليه؟
فاتن: علشان اعرف هترجع امتي لان باباها قالي انك رايح تجيبها وتيجي على طول بس الظاهر ان القعده معاها عجبتك ولا ايه؟
لهجه فاتن معجبتش ادم واتخنق منها لاقسي حد
ادم: ايوه القعده معاها بتعجبني ومش القعده بس لأ كل حاجه فيها بتعجبني، ولعلمك علشان بس تبقي الامور واضحه انا طلبت منها تتجوزني وارجعها ليا.

فاتن: انت بتقول ايه؟ انت عايز تتجوزها عليا؟
ادم: اتجوزها عليكي؟ انتي نسيتي نفسك ولا نسيتي اللي حصل ونسيتي انا اتجوزتك ليه اصلا؟ هيا اللي مراتي قبلك ولو اعرف انها جايه مكنتش اخدت الخطوه دي ابدا وكنت سيبتك تتجوزي ابن عمك رمضان، وبعدين انا لولا باقي عندي حته احترام لابوكي وعامل حساب ليه كنت سيبتك من زمان، انتي اللي حطيتينا في الوضع ده، كان ممكن باتصال صغير لابوكي ورجالتنا مكنش كل ده حصل..

فاتن: انت لسه بتلومني؟ انت عايز تسيبني؟
ادم: ولا الومك ولا تلوميني، ندي انا بحبها وده شيئ مش هيتغير وفي اللحظه اللي هيا توافق فيها هتجوزها علشان بس ما نرغيش كتير..
فاتن: بس انا بحبك يا ادم، مفكرتش في ده؟
ادم: الحب اللي من طرف واحد بيبقي ديما محكوم عليه بالفشل وبيبقي غباء من صاحبه لو استمر فيه
فاتن: ايوه عارفه بس برضه بحبك؟
ادم: فاتن انا معنديش حل او رأي، وبعدين انتي لسه على ذمتي
فاتن: لامتي؟

ادم: لحد ما انتي تطلبي غير كده
فاتن: يعني لو ندي وافقت انت مش هترميني؟
ادم: لا يا فاتن، انا لاعمري كنت ندل ولا هكون، دلوقتي بقي انتي جايه ليه في حاجه ولا جايه عادي؟
فاتن: لا بس جايه اشوفك لاننا مسافرين
ادم: اهمم طيب يالا اوصلك
اخدها ادم وروحها بس هيا فكره واحده في دماغها
ندي هيا عقبتها ولا زم تخلص منها باي طريقه وده هيفتحلها الطريق لقلب ادم...

رواية عشقت المتمردة للكاتبة الشيماء محمد الفصل التاسع عشر

فاتن سيطرت عليها فكره واحده، انها تخلص من ندي وبتدور على طريقه تعمل بيها ده...
ندي نفذت وعدها ومع ادم في كل خطوه وهو اتعمد يخليها معاه في كل حاجه بحيث ما تغيبش لحظه عن عنيه، طول النهار مع بعض واخر النهار بيبعدوا بالعافيه بيوصلها ويفضلوا في العربيه قدام الباب ساعه او اكتر...
في اجتماع.

ادم: دلوقتي فاضلنا خطوه ان احنا نبدأ نشوف مين في الماركات العالميه اللي هيدخل معانا او هيأجر محلات، بس حاليا اهم واحد عندي صاحب محلات بنده وده صاحب اكبر سلسله سوبر ماركت في المملكه وطبعا لو فتح فرع هنا هيكون شيئ كويس...
سالم: بنده؟ ده زي هايبر ون وكارفور صح؟
ادم: بالظبط بس على مستوي اعلي، المهم ان احنا نقابله، مريم عرفتي حاجه؟

مريم: عرفت كل حاجه عنه وجبتلك عنوانه وكل حاجه عنه هو اسمه فهد محمد القرشي بس ايه اللي هيخليه يوافق يستثمر هنا؟
ندي: سيبولي انا موضوع اقناعه
ادم والكل بصولها باستغراب
ادم: اشمعني يعني؟
ندي: لان انا اعرفه معرفه شخصيه
ادم بغيره: تعرفيه منين ان شاءالله؟
ندي: اعرفه من زمان، اتقابلنا في امريكا وكان مقرب جدا من العيله هناك وبالتالي معرفتي بيه قويه مش مجرد معرفه عابره، انا هقابله وهتكلم معاه.

ادم: انتي لا هتقابليه ولا هتتكلمي معاه؟
ندي: ليه بقي ان شاءالله؟
ادم: علشان انا قلت كده
ندي بذهول: افندم؟
ادم: اللي سمعتيه
الكل عارف ان خناقه جديده هتبدأ وهتستمر لحد ما حد فيهم يسيب المكان
ندي: لا طبعا، ادم!
ادم: افندم! مقابله مش هتقابليه
ندي وقفت وادم وقف قصادها
ندي: انا بقولك اعرفه وهتكلم معاه انت ايه مشكلتك؟
ادم: مشكلتي اني مش عايزك تقابليه ولا عايزك تتكلمي معاه اقفلي بقي الموضوع ده
ندي: لا مش هقفله.

ادم: وانا بقولك اقفليه
ندي: مش هقفله يا ادم، انا سبق وسيبت الشغل هنا وانت جيتلي وقولتلي انك محتاجني يبقي سيبني اساعدك
ادم: مش دي الطريقه اللي عايزك تساعديني بيها
ندي بصدمه وكأنها استوعبت حاجه مهمه
ندي: انت مش محتاجني اصلا هنا، انت بس كنت عايز تخليني قدام عنيك صح؟ هههه وانا صدقتك بعد اذنكم.

اخدت شنطتها ومشيت وادم بيناديها بس ما ردتش عليه، كان هيولع، الكل بيبصله ومستنيه يتكلم بس قام وقف مره واحده ومشي وري ندي من غير ولا كلمه
لحقها بره واقفه مع كام موظف وسط المكاتب راحلها ومسكها من دراعها علشان ياخدها مكتبه يتكلموا بس شدت دراعها منه ووقفت قصاده بتحدي قدام الكل
ندي: انا مش هتكلم معاك، انا شغلي هنا انتهي
ادم: ما تلويش دراعي انا مبحبش الاسلوب ده.

ندي: انا ما بلويش دراعك انا بس بقولك ايه اللي هيحصل
طبعا صوتهم كان عالي فاللي جوه الاجتماع خرجوا
سالم: اهدوا انتو الاتنين لا ده مكانه ولا وقته
الاتنين بصوا لسالم ومع بعض
الاتنين: حضرتك ما تتدخلش
سالم رفع ايديه: قطعوا بعض
ادم: باباكي عنده حق لمي الدور وتعالي نتكلم جوه
ندي: انا مش عايزه اتكلم معاك اصلا...
ادم: كل ده علشان قولتلك مش هتقابليه؟

ندي: كل ده علشان سيادتك ما بتثقش فيا، انت زي ما انت، انت عمرك ما وثقت فيا ولا هتثق؟
ادم: ايه دخل الثقه دلوقتي هاه؟ ليه ما تسميهاش حب او غيره مثلا؟؟

ندي: لان الغيره بتبقي غير كده يا ادم، ساعت ما اتكلمت انا ومهندس وائل دي كانت غيره، في الحفله كانت غيره لكن دلوقتي ده تملك، لما تبقي خطوه كبيره في المشروع زي دي وانا اقدر اساعدك فيها وانت ترفض لمجرد الرفض يبقي ده مش منطقي ولا دي غيره ابدا ويبقي انت اصلا مش محتاجني هنا وانا هنا كصوره او براوز انت حاطو مش اكتر
ادم: كلامك مش صح انتي مش هنا صوره
ندي: يبقي اثبت كلامك ده، ثق فيا مره يا ادم.

ادم: الموضوع مالوش علاقه بالثقه يا ندي
ندي: الموضوع كله ثقه يا ادم، يا اما انت مش واثق فيا وفي اخلاقي وعلشان كده رافض ان انا اقابله؟ يا اما مش واثق فيا ان انا ابقي مسؤله عن خطوه مهمه في مشروعك؟ في كلتا الحالتين الموضوع ثقه.

ادم: انا مفكرتش كده ابدا، انا اولا لو عندي شك في اخلاقك او مش بثق فيكي مكنتش هطلب منك تتجوزيني ابدا ( الكل بيهمهم) وثانيا المشروع ده كله ما يهمنيش ده مجرد بيزنس وبعدين انا مستعد اسلمك عمري وحياتي فمشروع ايه ده اللي هخاف عليه، مازلتي سطحيه يا ندي في امور كتير، مقابله مش هتقابلي الراجل ده واللي عندي قلته
سابها ومشي بس هيا وقفته
ندي: انا سطحيه اوك، انت رافض ليه؟ بتفكر ازاي؟

ادم: بفكر زي ما بفكر بعد اذنك
راح لمكتبه ورزع الباب وراه وطبعا ندي وراه ورزعت الباب اكتر وصوتهم مازال عالي
سالم: كل واحد على مكتبه العرض المجاني خلص يالا
ندي وادم كملوا خناقهم
ادم: يا الله منك يا ندي، انتي عايزه ايه مني؟
ندي: افهم انت ليه رافض اقابله يا اما قسما بالله يا ادم لهخرج من المكتب ده ومن البلد كلها
ادم: انتي بتهدديني ولا ايه؟ الاسلوب ده ما بينفعش معايا على فكره.

ندي: انا ما بهددكش انا بس بقولك اللي هيحصل، انا مش هقدر افضل في مكان انت فيه وما اشوفكش ومش هقدر ابعد عنك ولا انت هتسيبني ابعد يبقي الحل اني اسيب البلد كلها تاني
ادم: انتي عايزه ايه دلوقتي؟ انا تعبت
ندي: عايزه افهم، ايه اللي صعب في ده؟ ليه حاطط حواجز بينا؟
ادم: الحواجز سيادتك اللي حطاها، انتي اللي رافضه اننا نكون مع بعض وبسبب حجج ملهاش لازمه
ندي: ممكن تكون بالنسبالك ملهاش لازمه لكن بالنسبالي مهمه.

ادم: وده نفس كلامي اسباب رفضي ممكن تكون ملهاش لازمه في نظرك لكن بالنسبالي انا مهمه
ندي: هقابله ومش هتمنعني وهجيبلك موافقته على المشروع
ادم بنرفزه: مش عايزها، عارفه انا غيرت رأيي اصلا انا مش هكلمه نهائي ريحي نفسك بقي
ندي يدوب هترد الباب اتفتح ودخلت مريم
مريم: لحظه وكملوا خناقكم( الاتنين بصولها) معلومه صغيره ما اديتونيش فرصه اقولها...
ادم: انجزي يا مريم.

مريم: فهد القرشي اللي بتتخانقوا عليه مش هنا هو في السعوديه وتحديدا في الرياض بس حبيت اوضح النقطه دي
خرجت مريم وسابتهم
ادم: اعتقد كده الموضوع اتقفل
ندي: هسافرله
ادم: نعم؟ لااااا انتي كده بقي اتجننتي رسمي، انا معنديش استعداد اكمل معاكي الجنون ده بعد اذنك
سابلها المكتب ومشي خالص
ندي خرجت هيا كمان والكل بيبصلها والكل عايز يعرف خناقتهم خلصت على ايه؟

تاني يوم ندي راحت لمريم: مريم هاتيلي كل حاجه عرفتيها عن فهد القرشي.

مريم: بس ادم
ندي: سيبي ادم ليا، هاتيلي بس اللي طلبته وجهزيلي نسخه من المشروع واحجزيلي على اقرب طياره للرياض
مريم فاتحه بوقها ومش عارفه ترد
ندي: اقفلي بقوك ونفذي اللي قلتلك عليه، واه صح احجزي تذكرتين مش تذكره واحده واحجزيلي فندق كويس علشان ننزل فيه
مريم: تذكرتين لمين؟ سالم بيه هيسافر معاكي؟
ندي بابتسامه: ادم اللي هيسافر، جهزيهم وقوليلي
مريم: حاضر بس لعلمك ادم مش هنا النهارده ومش هيجي الشغل.

ندي: عارفه
مريم جهزت المطلوب وعطته لندي وهيا بالليل راحت لادم ودي كانت اول مره تروحله شقته...
خبطت وادم فتح كان بلبس البيت ودي اول مره تشوفه بلبس في البيت غير الجلابيه بصتله من فوق لتحت باعجاب ظاهر
ادم: هتدخلي ولا هتفضلي تتفرجي من بره كتير
دخل ادم وساب الباب مفتوح وراه وهيا دخلت وقفلته
عجبتها الشقه اللي جوها كان هادي ورمانسي.

ادم قعد على الانتريه قدام اللاب بتاعه وكان فيه موسيقي واطيه شغاله فندي راحت وعلت الصوت ولقت اغنيتها شغاله اللي غنتها في الحفله فبصت لادم اللي لقته باصصلها واتقابلت عنيهم وبعدها بص للاب بتاعه، ندي وطت الصوت تاني وخليته هادي وراحت وقفت قصاد ادم وقفلت اللاب بتاعه
ادم رجع لوري في قعدته وبصلها وطبق ايديه على صدره
ادم: افندم؟
ندي طلعت ظرف من شنطتها وحدفته قدامه على اللاب بتاعه بصله
ادم: ايه ده؟

ندي: افتحه وشوف
ادم مد ايده وفتحه وقلب فيه ورماه تاني بغيظ
ادم: عايزاني اقول ايه؟
ندي: عرفت ايه دول؟
ادم: تذكره سيادتك للرياض
ندي: وتحتها تذكرتك انت
ادم: وبعدين معاكي؟ هو انتي بتعارضيني ليه؟ من يوم ما عرفتك للنهارده بتعارضيني لمجرد المعارضه
ندي: لا طبعا انت بس اللي ما بتحاولش تفهمني وما بتحاولش تعرفني اسبابك، يجري ايه لو قولتلي ما تعمليش كذا علشان كذا؟ بلاش صيغه الامر معايا يا ادم ارجوك.

ادم: ويجري ايه لو انتي نفذتي اللي انا بطلبه وبعدها تسأليني ليه وانا ساعتها هقنعك؟
ندي: لاني ما اتعودتش اعمل حاجه انا مش مقتنعه بيها وبعدين الصح انك تفهمني الاول انت عايز ايه وبعدها تستني مني اعمله ولا ايه؟ انت نفسك ما بتعملش اي حاجه غير المقتنع بيه صح ولا بيتهيألي؟
ادم: ندي انا تعبت من الخناق ارجوكي كفايا، انتي حجزتي التذاكر سافري انتي حره بس انا مش هسافر، خدي باباكي معاكي انا لأ.

ندي: ليه يا ادم ارجوك بقي؟
ادم: لا يا ندي سافري انتي بس لعلمك ده هيكون النهايه لينا علشان بس تبقي الامور واضحه، انا قلتلك ابعدي عن الموضوع ده وانتي رفضتي فاسف مش هكمل مع واحده بترمي كلامي عرض الحائط
ندي: هو انت مش واخد بالك ان احنا متطلقين اصلا ولا ايه؟
ادم: لا واخد بالي كويس بس عارف اننا بنحب بعض وعارف اننا هنرجع لبعض الموضوع وقت مش اكتر لكن كده احنا وصلنا لحيطه سد.

ندي: كل اللي طلباه منك ليه؟ ليه؟ ليه؟
ادم بنفاذ صبر: لاني خايف اوكي، خايف يا ندي..
ندي باستغراب: خايف؟ خايف من ايه؟

ادم: خايف انه يكون لك ماضي معاه هو كمان وخايف انك لما تروحي تقنعيه يفتكر ان ماضيه لسه عايش وخايف انك تضطري تعملي حاجه غصب عنك وخايف انه يوافق لمجرد انه يوصلك انتي، والاهم من كل ده مش عايز ابني مشروع على اساسك انت وبعدين انتي ازاي عايزاني اقبل ان ادخل شريك معايا وافق انه يشاركني علشان كان على علاقه سابقه بمراتي؟ ازاي؟ نقف قصاد بعض ازاي؟ بلاش، انا اقف قصاد نفسي ازاي؟ انتي بتفكري ازاي؟

ندي واقفه مذهوله ومبسوطه من جواها وسابته يخلص كلامه وبعدها قربت منه وقفت قصاده وهو جه يبعد بس مسكته من وشه وقربت قوي ومره واحده ادم مسك ايديها وبعدها عن وشه بس لسه ما سابهمش من ايده
ندي: انا بحبك قوي
ادم: وانا عارف ده بس برضه مش موافق
جه يبعد بس هيا ما سابتش ايديه فوقف مكانه وبصلها
ادم: ومش هتغيري رأيي بده
ندي ابتسمت: عارفه بس في نقطه مهمه انت ما عطتنيش فرصه اوضحهالك
ادم: اتفضلي.

ندي: ان انا وهو مش بينا العلاقه دي، ده كان واحد من اللي امي اتجوزتهم، الوحيد اللي انا احترمته وحبيته واعتبرته زي ابويا بس امي ملهاش في الجد والمحترم وبالتالي اتطلقت منه بس انا وهو فضلنا على اتصال وفي اي وقت بحتاج لحاجه مش بيتأخر وبيعتبرني بنته، عرفت ان رفضك مالوش اساس؟
ادم باستغراب: وما قولتيش ده ليه من الاول؟

ندي: انت اديتني فرصه؟ وبعدين انا كنت ناويه اقولك اول ما نبقي لوحدنا لاني محبتش اتكلم كده قدام بابا وقدام الموظفين بس انت اللي معطتنيش فرصه
ادم: كان ممكن تقوليلي بعدين وخلاص بس انتي وقفتي قصادي
ندي: لاني ما بحبكش تأمر وبس ومش عايزه ده
ادم: ويجري ايه لو تنفذي اللي انا بقوله من غير خناق؟
ندي: ويجري ايه لو انت تطلب باسلوب كويس؟
ادم: انا كده وده اسلوبي
ندي: وانا كمان كده
ادم: وبعدين؟

ندي: قابلني في نص الطريق، حاول تفهمني انت عايز ايه وانا هحاول انفذه
ادم: اتفقنا بس برضه انا معترض على سفرك
ندي: ليه بقي؟ وبعدين انا نفسي اعمل عمره يا ادم ممكن؟
ادم: عمره؟ دي ممكن طبعا، طيب خلينا نتجوز قبل ما نسافر يا ندي وتسافري مراتي؟
ندي بعد تفكير: لا اسفه، مش هقدر، سيب فاتن وانا شبيك لبيك لكن وهيا موجوده لأ
ادم: خلاص انتي حره انتي كده كده اصلا مراتي
ندي بابتسامه: مراتك؟ لامتي؟

ادم: لاخر يوم في عمري انا اصلا كنت متخلف ساعت ما طلقتك
ندي: كنت ومازلت
ادم: ماشي مازلت مش عاجبك؟
ندي: ماهو المصيبه انه عاجبني والمصيبه اني بعشقك يا ادم قوي
قربت منه وسندت راسها على صدره
ادم: والمصيبه الحاليه انك لو ما بعدتيش حالا مش هضمنلك ايه اللي ممكن يحصل
ندي ضحكت وبعدت: هتنزل توصلني؟
ادم: هغير ثواني
ادم دخل يغير هدومه واتصل بسالم
ادم: ايوه يا عمي انا هوصل ندي عندك دلوقتي البيت ومحتاج منك خدمه.

سالم: طبعا قول على طول
ادم: محتاج منك ترفض سفرنا انا وهيا مع بعض وانه ما ينفعش نسافر كده من غير علاقه شرعيه تربطنا ولو هيا مصره على السفر يبقي تسافر وهيا مراتي وبالتالي نكتب الكتاب
سالم: ادم انت عايزني تاني اجبرها على الجواز منك؟
ادم: عمي انت عارف اننا بنحب بعض انت بس اعمل الخطوه دي والباقي سيبه عليا انا ارجوك يا عمي دي اول مره اطلب منك طلب وزي ما انا ساعدتك قبل كده بطلب منك تساعدني.

سالم: يا ابني انت عارف غلاوتك عندي بس خايف اخسرها
ادم: ما تخافش وسيبها عليا اتفقنا
سالم: اتفقنا وربنا يستر
وصلوا البيت وادم وصلها وسالم خرجلهم
سالم: استني يا ادم وادخلوا عايزكم انتو الاتنين
دخلوا وقعدوا
ندي: خير يا بابا؟
سالم: دلوقتي سيادتك هتسافري مع ادم بصفته ايه؟ يعني مسافرين مع بعض ازاي؟
ندي: ده بزنس يا بابا.

سالم: ولا بزنس ولا غيره، انتي الحمد لله اتغيرتي وبقيتي متدينه وبقيتي عارفه الحلال والحرام، سفرك معاه حرام شرعا
ندي: بابا اعتبرنا كل واحد مسافر لوحده
سالم: سفرك لوحدك بدون محرم برضه حرام
ندي: يووه يا بابا انت عايز توصل لايه؟ وانت ساكت ليه ما تتكلم
ادم: انا عندي حل بس اتمني تسمعيه وما تعارضيش وخلاص
ندي: اتفضل قول
ادم: نكتب كتابنا قبل ما نسافر وبكده هتسافري وانتي مراتي واعتبر محرم ليكي.

ندي: وده اللي انت عايزه، بتلوي دراعي
ادم: انا بحبك وانتي عارفه ده كويس، بس حاليا لا مش بلوي دراعك احنا هنكتب الكتاب ولو عايزه تلغيه او تطلقي بعد ما نرجع حاجه ترجعلك انا عمري ما جبرتك على اي شيء ولو عايزه تكملي معايا هكون اسعد راجل في الكون كله، بس في نقطه مهمه لو انفصلنا تاني يبقي كده اتطلقنا مرتين هاه؟ فاضلنا واحده كمان والموضوع يخلص، القرار في ايديكي
ندي: بابا اتكلم.

سالم: كلام ادم صح، يا تسافري وانتي مراته يا تلغي فكره السفر تماما، القرار في ايدك
ندي حاولت تتكلم بس سكتت ومره واحده سابتهم وطلعت اوضتها
ادم وسالم فضلوا شويه بيتكلموا ويدوب ادم هيمشي ندي نزلت
ندي: انت لسه مكانك؟
ادم: انتي عايزه ايه؟
ندي: فين المأذون اللي جبته؟ مش ورانا طياره الصبح؟
ادم ابتسم: جاي في الطريق
خرج اتصل بسعد وقاله يجيبله مأذون من تحت الارض ويجي واتصل بكريمه وبلغها باللي حصل بسرعه.

كريمه: تاني يا ادم جواز بالشكل ده؟
ادم: اوعدك يا كراملتي هعمل فرح ما اتعملش قبل كده
كريمه: واوعدني ان دخلتك تكون هنا؟ في البيت ده؟
ادم: بس كده انتي تشاوري
جه المأذون مع سعد وكتبوا الكتاب وكان سالم وسعد شهود وندي من جواها فرحانه بس زعلانه في نفس الوقت كانت بتتمني تتجوز ادم بفرح كبير ومن غير ما يكون لها شريك
الكل مشي وسابهم لوحدهم
ادم: بقيتي مراتي تاني.

مسك ايديها وبيشدها يقربها منه وقرب منها جامد علشان يبوسها ومره واحده رفعت راسها و وشها في وشه وبتحدي
ندي: اوعي تتخيل للحظه اني هبقي مراتك بجد وانك ليك حقوق والكلام الفاضي ده؟ طول ما فاتن هانم على ذمتك انا ابعد من نجوم السما، علشان بس نبقي واضحين يا حبيبي
ادم بعد: ولازمتها ايه حبيبي اللي في الاخر دي! تصبحي على خير هجيلك بدري ونطلع على المطار.

وفعلا جالها واخدها على المطار و وصلوا الرياض ونزلوا في الفندق اللي مريم حجزتلهم فيه وندي كلمت فهد ورحب بيها جدا هيا وادم واتقابلوا ورفض يتكلم في الشغل نهائي الا لما يضايفهم بطريقه تليق بيهم وتليق بيه اولا..

اتجمعوا كلهم مع بعض علشان يتكلموا في الشغل وبدأ ادم وندي يشرحوا فكرتهم ومشروعهم ولاقي ترحاب كبير من فهد واستعد ورحب انه يمول المشروع كله من الالف للياء بس ادم رفض تماما الفكره واتفق انه بس يفتح فرع عنده في مشروعه...
ادم مع ندي في الفندق بيتعشوا
ندي: حاسه اني في سجن كده جوه الكابينه دي
ادم: هما نظامهم كده، كل المطعم كباين متقفله بحيث كل واحد مع عيلته براحتهم ومحدش يضايق حد.

ندي: ماشي يعملوا اماكن كده واماكن كده وكل واحد حر يقعد في المكان اللي يريحه
ادم: ده نظام بلد هتغيره على مزاجك؟ هما بيطبقوا الشريعه، ممنوع الاختلاط فبالتالي مانعينو
ندي: اهو دي خنقه المهم هنسافر من هنا امتي؟
ادم: بكره الصبح بدري هناخد الطياره لجده ومنها نشوف اي حاجه لمكه
ندي: ما تتخيلش انا متحمسه قد ايه وفرحانه قد ايه؟ ما تخيلتش ابدا ان ممكن اعمل عمره او اجي مكان زي ده ابدا ابدا.

ادم: ربك لما يريد بقي، ربنا يتقبلها منك ان شاءالله، المهم قومي نامي علشان الفجر هنصلي ونطلع على المطار يالا، ايه بتبصيلي كده ليه؟ شكلك عايزه تقولي حاجه؟
ندي: انا؟ لا انا مش عايزه
ادم: معني انك انتي مش عايزه وبتبصيلي كده يبقي مستنيه مني انا اقول حاجه! في ايه المفروض اقوله؟
ندي: ايوه ايه بقي؟
ادم: ايه بقي؟
ندي: ادم بقي
ادم: ماهو انا لو اعرف اقول على طول، مش عارف
ندي: انت مديونلي باعتذار.

ادم: انا؟ اشمعني بقي؟
ندي: علشان فهد
ادم: ماله فهد مش فاهم؟
ندي: علشان اللي انت عملته قبل ما نيجي واتهامك ليا اني على علاقه بيه وعدم ثقتك فيا
ادم: انا امتي اتهمتك؟ ولا امتي قولت اني مش واثق فيكي؟ على فكره انتي بتغيري الحقايق كده
ندي: امال اتخانقت معايا خناقه كبيره ليه؟
ادم: انا قولتلك اسبابي واعتقد انك تقبلتيها وما اعتقدش برضه انه كان من ضمنها عدم ثقه او اتهامات
ندي: ده فعلا صح
ادم: طيب امال ايه بقي؟

ندي: برضه ده ما يمنعش اني مستنيه منك اعتذار
ادم ضحك: قومي يالا علشان هنصحي بدري يالا ربنا يهديكي كمان وكمان يالا
اخدها وطلعوا ووصلها لحد باب اوضتها وقبل ما تدخل مسكها من دراعها وهمس في ودنها من غير ما يلفها ليه
ادم: حقك عليا يا ستي اني اتخانقت معاكي وفعلا كنت غلطان اني اتسرعت في الحكم سواء عليكي او على فهد ومتشكر جدا انك اصريتي على موقفك وجبتينا في الرحله الرائعه دي، كده مرضيه؟

ندي لفتله وبصتله بصه طويله وما ردتش بس قربت وباسته في خده ودخلت اوضتها وهو راح اوضته...

الفجر طلعوا ندي استغربت ادم في لبس الاحرام بتاعو بس حست بهيبه، وصلوا جده ومنها لمكه راحوا الفندق حطوا حاجتهم واتغدوا وطلعوا على الحرم على طول.

اول ما ندي شافت الكعبه دموعها نزلت وحست باحساس غريب جواها، ، وكأن مفيش شيئ في الدنيا دي كلها له معني الا ده، وكأن حياتها كلها ملهاش لازمه وانها اتولدت في اللحظه دي وبدئت من اللحظه دي، ادم سابها واقفه تستمتع بلحظتها دي وتفكر في كل حياتها وتعيد حساباتها لحد ما بصتله
ادم: يالا نبدأ
ندي ابتسمت: يالا.

ادم طول الوقت بيدعي ان ربنا يقرب ندي منه وتكون ديما جنبه ومن نصيبه ويخلصه من فاتن على خير او لو فضلت ما يظلمهاش معاه، ويلهمه ديما للصح...
عملوا طوافهم وخلصوه وادم معاها لو معرفتش حاجه بيقولها خلصوا الطواف وصلوا الركعتين وراحوا للسعي ما بين الصفا والمروه
ندي: ياه ده طويل قوي اروح شوط وارجع شوط صح لحد ما اكمل سبعه؟
ادم: اه يا قلبي انا، تروحي شوط وترجعي دي شوط وهكذا لحد ما تكملي السبعه.

ندي: يا لهووي يا ادم ده كتير جدا ليه كل ده؟
ادم: لان ده اللي عملته ستنا هاجر لما كانت بتدور على ميه لابنها، كانت بتجري المسافه دي رايح جاي سبع مرات وعلشان كده اتعمل السعي بين الصفا والمروه وده على حد علمي
ندي: طيب اقول ايه؟
ادم: كل اللي نفسك فيه، اتكلمي مع ربنا، اشكيله! اطلبي منه؟ ادعي!؟ اللي يريحك قوليه، مش شرط صيغه او دعاء محفوظ بس افتحيلو قلبك
ندي شايفه ادم جديد عليها بتعشقه من الاول وجديد.

ندي: طيب يالا نبدأ
ادم: يالا
خلصوا السعي
ندي: كده خلصنا صح؟
ادم: اه بس فاضل حاجه بسيطه
ندي: ايه هيا؟
ادم: نتحلل
ندي: ازاي؟ نعمل ايه يعني؟
ادم: تقصي شعرك
ندي بخضه: ايه؟ اقص شعري؟ لا طبعا
ادم: اسمعي للاخر، تقصي جزء بسيط من طوله سنتيمتر كده مش اكتر
ندي: اه انا اتخضيت، كده ماشي وانت؟
ادم: وانا كذلك، السنه التقصير بس الحلاقه افضل
ندي بخبث: وانت هتحلقه؟ خالص خالص؟
ادم: ايه رأيك انتي؟
ندي: لا وانا مالي انت حر.

روحوا على الفندق وادم نزل يحلق واتفق يشوفها بالليل لما يتعشوا، اول ما شافته بالليل شهقت من شكله وضحكت
ادم: للدرجه دي وحش؟
ندي: شكلك غريب وانت بطاطسايه كده
ادم: انا بطاطسايه ماشي يا ست ندي المهم يالا نتعشي.

ندي شافت شخصيه تانيه في ادم او بمعني تاني شافته على حقيقته، خوفه عليها وتقديره ليها وحبه اللي بيبان في كل حاجه بيعملها كل ده قربها اكتر منه وفهمها اكتر لشخصيته، دلوقتي بس عرفت وفهمت هو ليه ارتبط بفاتن، مكنتش مقتنعه ان احساسه بالمسؤليه يخليه يعمل كده بس دلوقتي فهمت وتصرفه زود تقديرها ليه
قبل ما يمشوا
ندي: تعرف؟
ادم: ايه؟
ندي: انا بحبك قوي
ادم ساب اللي في ايده وبصلها باستغراب
ندي: مستغرب ليه؟

ادم: يعني بقالنا فتره ما اتكلمناش في اي حاجه زي كده فاستغربتها دلوقتي مش اكتر
ندي: لان انا حاسه نفسي قدام ادم جديد، ادم مختلف عن اللي عرفته قبل كده
ادم: حبيبت قلبي انا زي ما انا ما اتغيرتش من اول يوم شفتيني فيه، بس انتي كل يوم بتفهميني اكتر، وبتقربي اكتر بس كده
ندي: فعلا انا حاسه اني قربت منك قوي بالسفريه دي واحساس انك انت مسؤل عني ده عاجبني، ادم!
ادم: عيون ادم
ندي: تتجوزني؟؟

ادم تنح: افندم؟ انتي بتهزري صح؟ انتي اصلا مراتي
ندي: لا ابدا بتكلم جدوجد جدا كمان، تتجوزني بجد؟
ادم: وفاتن؟
ندي: لو قبلت الوضع ده خليها ما قبلتش براحتها
ادم: ممكن اعرف ايه اللي خلاكي تغيري رأيك؟

ندي: لان في حاجات كتيره اتغيرت، نظرتي للامور اتغيرت، نظرتي ليك اتغيرت، وبعدين انا عارفه انك بتحبني وهتراعي ربنا فيا وغير كده انت عندك المقدره سواء الماديه او غيرها انك تفتح بيتين فليه لأ؟ وبعدين مش هرضي اني افرح على حساب حد، وكفايه قوي انك بتحبني...
ادم مسك ايدها وباسها: انتي ما تتخيليش انا شايفك ايه دلوقتي، انتي ملاكي الجميل، اول ما ننزل نتجوز بإذن الله.

ندي: هو انا مش خلاص مراتك؟ عايزه انزل وانا مراتك...
ادم: ياريت بس انا بعتبر اننا كتبنا كتابنا بس لسه بقي الفرح وبعدين انا وعدت امي اني هعمل فرح كبير جدا وان ليله دخلتنا هتكون في البيت
ندي: ما ليش دعوه اللي عرفاه اني عايزه افضل معاك على طول
ادم معرفش يرد لان قلبه بيدق بطريقه غريبه زي مراهق بيحب لاول مره
ندي: ايه ساكت ليه؟

ادم: لا ابدا، مش هعيد ارتباطي بيكي تاني بالطريقه دي، ندي انا عايز اعمل فرح ما اتعملش قبل كده وعايز اشوفك عروسه بالفستان الابيض واعتقد ان انتي كمان زيي ولا ايه؟
ندي: زيك، زيك طبعا بس ده ما يمنعش اني عايزه افضل على طول معاك
ادم: كلها بكره هنسافر واول ما نوصل مصر هنعمل فرح كبير جدا ايه رأيك
ندي: تمام طيب تيجي نكلم بابا ومامتك نبلغهم يجهزولنا لاكبر فرح في الدنيا
ادم: اوك يالا.

فعلا اتصلوا باهلهم وبلغوهم، سالم فرح جدا وقالهم انه هينزل يتفق مع اكبر قاعه يعملوا فيها الفرح
كريمه: طيب يا ادم وفاتن؟ هتسيبها خلاص؟
ادم: انتي ايه رأيك؟
كريمه: حبيبي دي حياتك وبعدين انا كنت معترضه من الاول على ارتباطك بيها
ادم: يالا اهو اللي حصل، المهم لا مش هسيبها ندي مش معترضه على وجودها اما هيا بقي حره عايزه تفضل خليها عايزه تطلق هيا حره فمعلش هسيبلك مهمه انك تبلغي عيلتها اني رجعت مراتي لذمتي.

كريمه: بتدبسني يعني؟
ادم: لا ابدا والله لو مش عايزه خلاص لما ارجع انا البلد اقولهم بس ما حبتش اني اعمل الموضوع ده في السر علشان محدش يفهمه غلط
كريمه: عارفه حبيبي انا بس بهزر، هروح النهارده وهبلغهم انت ما تقلقش وبكره هتلاقينا كلنا عندك وهبلغ اخواتك وهنعمل احتفال بيكم على الضيق
ادم: تسلميلي يا ست الكل
كريمه: صح ادم طيب انت على كده هتعملوا الفرح فين وامتي ولا هتعمل حاجه على الضيق؟

ادم: لا يا امي لأ طبعا، انا المره دي عايز فرح ومش اي فرح كمان انا عايز فرح يليق بيا انتي فاهمه؟ عايزك تعملي كل اللي كنتي بتحلمي بيه
كريمه بفرحه: بس كده من عيوني، هعملك فرح الكل يحكي ويتحاكي بيه
ادم: ربنا يخليكي ليا بس في نقطه مهمه
كريمه: قول يا قلب امك
ادم: الوقت مهم، عايز الفرح بسرعه
كريمه بحذر: ليه؟ وليه الوقت مهم؟ ما تسيبونا نعمل فرح كبير ونجهزله كويس؟

ادم: امي الوقت مهم لان خلاص انا وهيا جبنا اخرنا، وعلي يدك احنا حياتنا كانت ازاي؟ الموضوع وما فيه اني مشتاقلها مش اكتر
كريمه: ربنا يسعدكم
ادم قفل وبص وراه كانت ندي واقفه ومستمتعه بالحوار اللي سمعاه
ندي: هيا مامتك قالت ايه انت اعترضت عليه؟ وايه اللي انت ما تعملوش؟
ادم: كانت عايزانا نستني شويه تجهز لفرح كبير عايزه وقت يعني
ندي: وانت قلتلها ايه؟
ادم: اللي انتي سمعتيه
ندي: وايه هو اللي انا سمعته.

ادم: ساعات بحس انك طفله كبيره
ندي حطت ايديها حوالين رقبته واتعلقت فيها
ندي: انا فعلا طفله عندك اعتراض؟
ادم: وانا اقدر اعترض اصلا؟ انا بحبك زي ما انتي
ندي: هتعملي فرح كبير؟
ادم: هعملك
ندي: وهلبس فستان ابيض
ادم: هتلبسي احلي فستان
ندي: وايه كمان؟
ادم: هعملك كل اللي تشاوري عليه
ندي: كله كله؟ مش هتقولي لأ؟
ادم: مش هقولك
ندي: هتخليني اشتغل براحتي؟
ادم: انا من امتي اتدخلت في شغلك
ندي: ايه كمان؟ هتعملي ايه كمان.

ادم: ندي بس، انا غلطان لاهلك، بصي حبيبتي انا صرفت نظر عن الجوازه دي
ندي ضحكت: اوك انا بس بضايقك
ادم: واديكي ضايقتيني
ندي: طب اصالحك ايه رأيك؟
ادم: صالحيني.

كريمه راحت لعيله فاتن وقالتلهم ان ادم رد مراته وطبعا ابوها لانه راجل صعيدي وفاهم الاصول تفهم الموضوع وما اعترضش ابدا لكن فاتن هيا اللي اعترضت
فاتن: ادم اتجوز عليا؟
كريمه: والله يا حبيبتي الوضع معكوس انتي اللي اتجوزك عليها
فاتن: دي كانت طليجته
كريمه: واهو ربنا صلح ما بينهم
فاتن: طيب وانا؟
كريمه: انتي معززه مكرمه
فاتن: اه يتجوزها هناك ويفضل معاها وانا يجيلي مره في الشهر صح؟ انا لا يمكن اوافج ابدا.

كريمه: والله يا بنتي دي حياتك ودي حاجه ترجعلك انتي حره شوفي ايه اللي عناسبك؟
فاتن: انا مش موافجه انه يتجوز
كريمه: لا يا حبيبتي انتي مش من حجك تجولي حاجه زي دي، ادم مرته ردها ده موضوع منتهي، انتي بجي شوفي ايه اللي يناسبك؟
فاتن: اه يعني اخبط دماغي في الحيط؟ انا ماليش كلمه صح؟
كريمه: بصي يا فاتن انتي ما تعمليش دراما، انتي عارفه كويس ادم اتجوزك ليه اصلا فمش من حجك ابدا تعترضي.

فاتن: يعني احط جزمه في بوجي واسكت صح؟ لا مش انا دي ابدا، ومش حته واحده اللي هتاخد ادم مني
كريمه بصتلها باستغراب، ايه اللي عجبها في دي؟ وليه عرفت ابنها عليها؟ كان عقلها فين؟
كريمه: على العموم فكري واللي يناسبك اعمليه بعد اذنكم علشان الحج اجهز للسفر
سابتهم ومشيت ندمانه انها ورطت ابنها الورطه دي...
فاتن لنفسها: مش هتاخديه مني، انا اللي هبجي مرت الكبير مش انتي يا امريكاويه.

ادم وندي نزلوا على مصر وابوها وسعد كانوا في استقبالهم وروحوا كلهم على اتفاق انهم خلال اسبوع هيكون الفرح لان حجز القاعه مفيش بدري عن كده..
كل واحد روح بيته وادم لقي اخواته وامه مستنينه وكانوا واحشينو وهو واحشهم، ادم المرح بتاع زمان
بالليل اجتمعوا كلهم وسهروا سهره للصبح ندي ما فارقتش حضن ادم ابدا، طول الليل بيرقصوا سلو مع بعض وبيعيدوا ذكرياتهم...

رجعوا لاشغالهم والكل بيباركلهم في الشركه والكل بيساعد في تجهيز الفرح...
ادم سافر البلد يعزم اهلو على الفرح ويعزم معارفو كلهم وفعلا عمل كل المطلوب وقبل ما يسافر القاهره بالليل كان نايم
كريمه: ادم اصحي ادم
ادم صحي: في ايه خير؟ ندي جرالها حاجه؟
كريمه: بعد الشر عليها ياقلبي لأ
ادم: طيب ايه؟ بتصحيني ليه؟
كريمه: اختك بتولد وجوزها اخدها على المستشفي قوم وديني عندها
ادم قام بسرعه: لحظه وهجهز.

اخد ادم امه على المستشفي وقضوا الليله مع اخته لحد ما ولدت وجابت بنوته زي القمر
الصبح بدري ندي بتكلمه
ندي: طلعت على الطريق ولا لسه؟
ادم: لا يا قلبي ما طلعتش
ندي: ليه؟ وحشتني بقي؟ يالا اطلع
ادم: شكلك انتي اللي هتطلعي مش انا
ندي: مش فاهمه
ادم: ايتن ولدت
ندي بفرحه: بجد؟ امتي اخص عليك ما قولتليش
ادم: اهدي اهدي، لسه والده مكملتش ساعتين وما حبتش اصحيكي
ندي: حمدالله على سلامتها والبيبي اخباره ايه؟

ادم: الحمد لله الاتنين بخير
ندي: طيب انا هجيب بابي ونجيي اوك بيبي
ادم: في انتظارك
ندي: ادم صح كده هنأجل الفرح؟ صح؟
ادم: والله ما عارف يا ندي شكلها كده، ممكن نأجله اسبوع ولا اسبوعين لحد ما ايتن تتحسن، على العموم ده سابق لاوانه
ندي: طيب نيجي الاول وبعدها نتكلم
ندي بلغت ابوها واتحركوا الاتنين على الطريق ووصلوا الاستراحه.

ندي: بابي نوقف شويه، انا ميته من الجوع وبعدين بحب الاستراحه دي بالذات ياما انا وادم وقفنا فيها
دخلوا الاتنين يريحوا شويه في الاستراحه
ادم طول الوقت مستني ندي تيجي والوقت طول وتليفونها اتقفل وابوها ما بيردش وبدأ يقلق
كريمه: ايه يا حبيبي مالك؟ لو عايز تريح روح انت
ادم: لا ابدا بس قلقان، ندي اتحركت هيا وابوها من بدري والمفروض يكونوا وصلوا من ساعه بس اتاخروا وتليفون ندي مغلق وابوها مش بيرد.

كريمه: ما تقلقش ان شاءالله خير، الغايب حجته معاه وبعدين الاخبار الوحشه بتوصل، فاطمن ان شاءالله خير وهيجوا
دخل ادم وقعد جنب اخته بس القلق والخوف بيكبر في قلبه وعينه على التليفون وكلهم ملاحظين ده
ايتن: ما تقلقش ادم دلوقتي هتلاقيهم داخلين
ادم: ان شاءالله المهم انتي تقومي بالسلامه ونخرج من هنا، وبعدين يا كنتي بدرتي يا اخرتي
ايتن: ليه ان شاءالله؟

ادم: يعني جايه في توقيت!؟ اعمل فرح انا ولا اجلو ولا اعمل ايه؟ هاه؟
ايتن: امم كده، اعملو في معادوا انا ان شاءالله خلال اسبوع هبقي كويسه ايوه كنت عايزه ارقص واتنطط بس ملحوقه في فرح امجد بقي
حاولت ايتن تلطف الجو علشان تخرج اخوها من حاله القلق اللي مسيطره عليه
اخيرا تليفونه رن
ادم: ده ابو ندي، الو ايوه انتو فين؟
سالم: الحقني يا ادم الحقني
ادم وقف: في ايه؟ ايه اللي حصل؟
سالم: ندي، ندي يا ادم.

ادم: عمي اهدي وقولي ندي مالها في ايه؟
الكل وقف واتوتر
سالم: الحقني يا ادم ندي مفيش وملهاش اثر، مش لاقيها، ندي اتخطفت
سالم قال الكلمه وادم وقف جامد ولا قادر ينطق ولا قادر يتحرك.