رواية المشوه الجزء الأول للكاتبة الشيماء محمد الفصل الرابع عشر
الاسعاف وصل واخدوه للمستشفي وكانت حالته حرجه جدا
ليلي في المستشفي بتعيط في صمت والكل مستغرب من موقفها بس من ساعه الحادثه بتاعتها وهما شاكين ان في حاجه بس كانو فاكرين انه من ناحيته هو بس لكن دلوقتي الكل اتاكد ان العلاقه بينهم متبادله ابو ليلي الكل بيبصله والف سؤال وسؤال في عنيهم ادهم فضل تلات ايام غايب عن الدنيا وليلي المره دي رفضت نهائي انها تسيبه ولو لحظه وحتي مع ضغط ابوها بس ما قدرش يحركها من جنبه عرف ابوها انه خسر معركته مع بنته وان حبها انتصر عليه واضطر يستسلم قدام اصرارها
ادهم في المستشفي بيفتح عنيه ليلي جريت عليه ليلي: اخيرا فتحت عنيك رنت الجرس للمرضه علشان تيجي وتطلب الدكتور ادهم حاول يتكلم بس مقدرش ليلي: هششش متحاولش تقول اي شيئ كل حاجه كويسه المهم انت بس تقوملي بالسلامه وانا مش هبعد عنك تاني ابدا ادهم بيبصلها باستغراب ليلي: ما تستغربش بابا استسلم قدام حبي لبك ومش هيقدر يبعدني تاني عنك.
ادهم غمض عنيه بتعب وهنا دخل الدكتور الدكتور: الف سلامه عليك يا بطل الحمد لله انت احسن حاليا وكام يوم وهتسترد صحتك بإذن الله المهم بس ترتاح حاليا ومتحاولش تقوم باي مجهود يوم وري يوم بيعدي وادهم فعلا صحته بتتحسن وليلي مش بتفارقه ابدا ابدا والكل بيجي يزوره وهيا بتقابلهم وكأنها مسؤله عنه حتي ابوها لما بيجي بيبص لادهم بنظرات غضب وتحميل المسؤليه. ادهم مش بيتكلم مع ليلي في اي شيئ مهم لحد ما استرد صحته وبقي يقدر يقف لوحده.
ادهم: كفايه لحد كده انا عايز اخرج من هنا الدكتور: تخرج ازاي انت لسه تعبان؟ ادهم: لا مش لدرجه اني افضل في المستشفي ليلي: مستعجل ليه يا ادهم علي الخروج خليك ك... قاطعها ادهم: لا مش هقدر اقعد اكتر من كده النهارده هخرج وده اخر كلام الدكتور: براحتك طالما علي مسؤليتك سابهم الدكتور وخرج ليلي: انت مستعجل ليه علي الخروج؟
ادهم: انتي عارفه اني بكره المستشفيات مش هقدر اقعد اكتر من كده ليلي: طيب وهتروح فين لما تخرج؟ ادهم: هسافر مصر ليلي: ايه؟ هتسافر وتسيبني ادهم: اسيبك؟ ده علي اساس ايه؟ هو انتي معايا علشان اسيبك؟ ليلي: انا مفارقتكش دقيقه من ساعت ما دخلت المستشفي ادهم: ده علشان بس احساس ابوكي يالجميل مش علشان تقبل علاقتنا ليلي: انا ما يفرقش معايا السبب انا يهمني اني معاك وبس الا اذا انت غيرت رايك وخلاص معدتش عايزني؟
ادهم:معدتش عايزك؟ في فرق يا ليلي بين الواقع وبين اللي انا عايزه ليلي: بابا مش هيرفض جوازنا دلوقتي ادهم: مش هيرفض لانه مجبر مش لانه موافق البلد كلها عرفت بعلاقتنا وده في حد ذاته هيجبر ابوكي يوافق ليلي: وده المفروض يبسطك مش يضايقك ادهم: يبسطني؟ ان ابوكي يوافق غصب عنه يبسطني؟ ليلي: اني هكون مراتك ده اللي يبسطك ادهم: مش بالطريقه دي.
ليلي: هيا دي الطريقه لو عايزني يبقي تقبلها مش عايزني يبقي لو سمحت بلاش تتلكك وقولها صريحه ادهم: اتلكك؟ انا بعشقك يا ليلي ليلي: يبقي توافق وتفضل معايا وتيجي تتطلبني من ابويا ادهم: وبعد ما اطلبك؟ ليلي قربت منه وحطت ايديها حوالين رقبته ليلي: تتجوزني ونعيش انا وانت مع بعض ومحدش يقدر يفرقنا تاني ادهم: وبعد ما نتجوز وتفوقي من الوهم ده وتلاقي نفسك متجوزه واحد.. قاطعته ليلي بانها حطت ايدها علي شفايفه.
ليلي: متكملش انا عارفه انا عايزه ايه وبحبك وعمري ما هبطل احبك ادهم: اتمني ده يا ليلي ليلي: بكره الايام تثبتلك خرج ادهم من المستشفي واتقابل مع ابو ليلي عم محمود: حمدالله على السلامه ادهم: الله يسلمك عم محمود: نويت علي ايه؟ ؟ ادهم: في ايه بالظبط؟ عم محمود: انت اكيد فاهم انا بتكلم عن ايه؟ ولا انت عايزني اترجاك ولا ايه بالظبط؟
ادهم: لا العفو يا عمي شوف حضرتك عايز تعمل ايه وانا تحت امرك عم محمود: اعتقد سبق وقلتلك ما تقوليش يا عمي صح ولا ايه؟ ادهم بصله باستغراب ووجع وسكت شويه ادهم: اسف نسيت طب اقول لحضرتك ايه؟ علشان ابقي فاهم بس؟
عم محمود: قولي... قولي حج محمود ادهم: حاضر يا حج محمود المهم انا هسافر اكمل علاجي واول ما استرد صحتي هرجع ونتكلم في التفاصيل ساعتها عم محمود: ولو مرجعتش؟ ادهم: وايه اللي هيخليني مش ارجع؟ عم محمود: وانا اعرف منين ولا اعرفك انت منين؟ ايه اللي يضمنك؟ ادهم: حضرتك عايز ضمان ايه؟ عم محمود: تعمل خطوبه قبل ما تسافر وتلبس دبل وتعلن علاقتكم دي ادهم: وهو ده اللي هيضمنلك اني ارجع؟
عم محمود: ده اللي هيحفظ لبنتي كرامتها لو ما رجعتش تبقي انت ندل واتخليت عنها والكل ساعتها هيلومك انت ومش هيجيبو سيره ليلي ادهم: حاضر اللي يريحك هنفذه عم محمود: هاتلي بقي حد يضمنك ادهم: يعني ايه حد يضمني؟ عم محمود: حد كبير اقدر اتكلم معاه لو انت اختفيت او قليت مع بنتي حد كبير ادهم: ولو معنديش؟ عم محمود: هو انت بتستفزني ولا عايز توصل لايه؟
ادهم: لا ولا بستفزك ولا حاجه حاضر هجبلك حد كبير بكره ان شاءالله اخر النهار هنكون عندك بعد اذنك بقي دلوقتي مشي ادهم وهو. محتار وخايف واحساسيس كتير متلخبطه جواه كلم مديره وكلم ابوه اللي اتبناه صبري وطلب منهم يجو عنده وشرحلهم الموقف والاتنين رحبوا جدا بالفكره.
وراحوله واتفاجأ ادهم ان ساره مرات صبري جايه مع جوزها دي عمرها ما تقبلته ازاي جايه وليه كمان؟ ابنهم جه معاهم لانه عمره ما اتاخر عن ادهم وراحو كلهم لبيت ليلي ادهم كان تعبان وبايت عليه التعب بس علشان خاطر ليلي مستعد لاي شيئ.
ادهم راح ومعاه مديره مدير المخابرات ومعاه صبري ابوه بالتبني ومعاه اخوه وساره اللي استغرب جدا من مجيها معاهم هيا جت معاهم لانها بدأت تحب ادهم وتستجدعه وفي نفس الوقت فضول انها تشوف شكل البنت ايه اللي وافقت عليه ولما شافت الاستغراب باين قوي عليه ساره: ايه مستغرب ليه هو انت مش زي مصطفي ابني ولا ايه؟ متستغربش انت تستاهل اكتر من كده.
ادهم رد بابتسامه عرفان بالجميل راحو كلهم عند ليلي واستقبلهم اهل ليلي اللي كانوا كلهم متجمعين طبعا الكل اتصاب بحاله من الذهول لما شافوا جمال ليلي وده ضايق ابوها لانه مستخسرها في ادهم وضايق ادهم لانه كان مستكترها علي نفسه ساره: ماشاءالله ده ايه الجمال ده؟ كل ده يطلع منك يا ادهم؟
وبعد الترحاب والسلامات والتعارف بدأ الكلام الجد اول ما صبري اتكلم صبري: طبعا احنا جايين هنا علشان نطلب ايد بنتنا ليلي لابننا المقدم ادهم عم محمود: اهلا بيكم بس انا عندي كام شرط الاول صبري: كام شرط؟ هو الجواز فيه شروط؟
ادهم: بعد اذن حضرتك ( وبص لابو ليلي) اتفضل قول شروطك انا سامعك عم محمود: اولا تجيبلها بيت هنا صبري ومديره: ازاي يعني؟ هو شغله في القاهره وحياته كلها هناك ادهم قاطعهم: لو سمحتو سيبوه يكمل كلامه للاخر صبري: بس يا ادهم الكلام باين من اوله.
ادهم: معلش لو سمحت اسمع كلامه وشروطه للاخر،، اتفضل يا حج محمود كمل عم محمود: ثانيا هيدفعلها مقدم 100 الف وزيهم شبكه ( الكل بيسمع بذهول) ليلي قاطعت ابوها: بابا لو سمحت ايه اللي بتقوله ده؟ ماما قولي حاجه عم محمود: ده اللي عندي ام ليلي: ايه يا ابو ليلي اللي انت بتقوله ده من امتي احنا بنتكلم كده ولا بنهتم بالماديات كده؟ محمود: من ساعت ما هو دخل حياتها وقلبها فوقاني تحتاني وخلي بنتي معندهاش عقل نهائي ليلي: بابا لو سمحت...
قاطعها ادهم ادهم: حضرتك خلصت كده ولا في حاجه تانيه؟ عم محمود: لا لسه فاضل اهم شرط ادهم: اللي هو؟ عم محمود: ليلي هتتجوز هنا وتقعد هنا في البيت اللي انت هتجيبه مش هتسافر معاك القاهره المدير: لا ده كده كتير قوي عايز ترفض ارفض لكن تحط شروط تعجيزيه بالشكل ده؟ انت واخد بالك ان المسافه بين القاهره وهنا اكتر من 6 ساعات المفروض يعمل ايه يعني؟
ادهم: في شروط تانيه؟ عم محمود: لا مفيش... اه نسيت اقول مفيش مؤخر ساره: وليه بقي؟ مش حاطط عليه مؤخر مليون جنيه مثلا؟ ادهم: علشان يسيبلي الباب مفتوح سارة: باب ايه؟ ادهم: متشغليش بالك انتي عم محمود: دي شروطي مصطفي: دي مش شروط دي تطفيش ليلي: ادهم انت مش مجبر توافق علي الشروط دي ومتخافش من اي شيئ انا معاك.
ادهم ابتسم بمرار: طيب انا موافق علي شروطك دي بس موضوع انها ما تسافرش معايا ده صعب يعني ملوش حل بالنسبالي انا ما ينفعش اسيب شغلي او اغير مجالي والمسافه اكبر من اني اقدر اروح واجي؟ عم محمود: ده اللي عندي قولته لكن تعمل ايه بقي؟ دي عندك انت تسافر وتيجي كل يوم؟ تيجي يوم او يومين في الاسبوع؟ تسيب شغلك؟ دي بقي عندك انت المدير: يعني يسافر ويجي ازاي كل يوم؟ اليوم 24 ساعه منهم 12 يروحو طريق يشتغل امتي وينام امتي ويشوف مراته امته؟
عم محمود: مش مشكلتي؟ صبري: امال مشكله مين؟ قول كلام معقول علشان نقدر ننفذه عم محمود: اللي عندي قولته ساره: علي فكره دي حياه بنتك اللي انت بتلعب بيها دي هو انت لما تبعدها عن جوزها ده شيئ كويس ليلي: بابا ارجوك بلاش اخر شرط ده علشان خاطري ارجوك عم محمود: علشان خاطرك انا قاعد القعده دي لكن اكتر من كده اسف.
دي شروطي عاجبك علي كده عاجبك مش عاجبك حياتك وانت حر فيها لكن اللي عندي قولته ادهم كل ده ساكت وبيتفرج عليهم كلهم كان تعبان لدرجه انه حتي مش قادر يتكلم صبري: لا طبعا كلامك ما يعجبش حد وفرصه سعيده ان احنا اتعرفنا عليكم يالا يا ادهم ادهم هنا فاق من شروده واخيرا اتكلم...
رواية المشوه الجزء الأول للكاتبة الشيماء محمد الفصل الخامس عشر
ادهم فاق من شروده واخيرا اتكلم ادهم: مع احترامي لحضراتكم كلكم انا موافق علي كل شروطه الكل اتصدم بكلامه حتي ليلي اللي حست بوجعه وانه مجبر علشان خاطرها ساره: ولما انت مش هتسمع لكلام حد فينا جايبنا ليه؟ ادهم: مش حكايه مش هسمع.. الحكايه وما فيها ان حضرته مجبر يوافق علي الجوازه دي لاسباب كتير مش وقتها حاليا وهو اب بيحب بنته وخايف عليها وشايف ان انا مش جدير بيها ويمكن يكون عنده حق صبري: انت اي واحده بتفهم تتمناك.
ادهم: متشكر لحضرتك بس الكل بيحكم بالظاهر وانا وانت عارفين الظواهر بتودي لفين (بص لساره) حضرتك احتجتي لكام سنه علشان بس تتقبلي انك تتكلمي معايا علي الرغم اني كنت مجرد عيل مش ممكن يكون غلط في حياته فاكيد حضرتك لازم تتفهمي موفقه هو محتاج وقت يتعرف عليا اكتر ويتغلب علي الظاهر ويشوفني انا كإنسان وانا بديلوه الوقت ده ولو كل اللي مطلوب اني اسفر 12 ساعه في اليوم هسافرهم وهعمل اكتر من كده كمان هو محتاج يحس بامان ويطمن علي بنته وانا هعمل كل اللي اقدر عليه علشان احسسه ان بنته في امان معايا ليلي: ادهم...
قاطعها ادهم: انا مكمل معاكي لحد ما انتي تكتفي مني ليلي: انا عمري ما حكتفي منك ادهم: يبقي انا هعمل اي شيئ علشان افضل معاكي قروا الفاتحه كلهم هنا خلص الاتفاق واتفقوا علي ان الفرح هيتحدد اول ما ادهم يلاقي بيت ويجهزه خلصت القعده والكل روح ليلي: انا مش هسامحك علي اللي انت بتعمله فيا ده عم محمود: مش عايز مسامحتك بكره هتشكريني وتضربي نفسك لما تفوقي من وهمك ده وتشوفي الامور علي حقيقتها ليلي: انت بكره اللي هتندم لما تشوف ادهم زي ما انا شايفاه سابته ومشيت وادهم سافر يكمل علاجه وساب لابو ليلي مهمه انه يلاقي بيت مناسب لبنته.
اشتري ابو ليلي ارض في اخر البلد حواليها جنينه كبيره وبدأ يبني فيها ادهم كل اللي بيعمله انه بيبعتله الفلوس اللي بيطلبها.. عدي حوالي شهرين كان البيت اتبني بس لسه تشطيبه ادهم نزل البلد يشوف ليلي لانها وحشته جدا خبط علي باب بيتهم وفتحله باباها ادهم: السلام عليكم ازي حضرتك عم محمود: وعليكم السلام... جاي تشوف البيت يالا اوريهولك ادهم: لو مش يضايقك ياريت اشوف صاحبه البيت الاول؟
عم محمود: يضايقني وانت عارف كده كويس بس اعمل ايه ما باليد حيله! ادهم: لو سمحت يا عم محمود اديني فرصه... قاطعه عم محمود: سبق وقولتلك ما تقوليش عمي ولا ايه؟ ادهم: بجد؟ ؟ حاضر مش هقولك عم محمود اتفضل نشوف البيت عم محمود: استني ثواني اغير هدومي قفل الباب وساب ادهم بره مستنيه.
ادهم وقف وسند علي الحيطه وحاسس انه بياخد خطوه غلط في حياته بس بيحبها يعمل ايه بقي؟ يستحمل ابوها شويه لحد ما يبقوا مع بعض وساعتها محدش هيقدر يفرق بينهم عم محمود لبس وخارج شافته ليلي ليلي: انت خارج يا بابا رايح فين؟ عم محمود: رايح بيتك ابتسمت ليلي: بيتي! بس النهارده مفيش عمال هتروح ليه؟ احنا مستنين ادهم يجي نحدد الالوان والحاجات دي ابوها مطنش ليلي: بابا هتروح ليه؟
عم محمود: هوري ادهم البيت ليلي: ادهم جه وطلعت تجري رجعت تاني: محدش في اوضه الانتريه هو اتصل بيك وقال جاي ولا ايه؟ هنا جت امها:مين ده اللي جاي؟ ليلي: بابا بيقول هيروح يوري البيت لادهم وانا بساله هو فين مش بيرد ام ليلي: ما ترد يا راجل علي البنت خطيبها فين؟ عم محمود: خطيبها؟ ام ليلي: ايوه خطيبها، مش خلاص قرينا فتحتهم ولا ايه تبقي خطيبته ليلي: بابا فين ادهم؟ عم محمود: بره في الشارع ليلي: انت سايبه بره بصتله بغيظ وجريت علي بره تشوف حبيبها اللي غايب بقاله اكتر من شهرين ام ليلي: بقي تسيب الراجل في الشارع يا اخي ده حتي كده عيب فين كرمك يا ابو ليلي انت من امتي كده؟
عم محمود: مش عايزه في بيتي انا حر ام ليلي: ايه؟ ده خطيب بنتك وبكره يبقي جوزها امال لما يتجوزوا هتعمل ايه هتقفل بابك في وش بنتك كمان؟ عم محمود: ومين قال انهم هيتجوزوا؟ ام ليلي: انت بتقول ايه؟ امال بتشتري ارض وبتبني بيت لمين هو لعب عيال ولا ايه؟ ولا هننصب علي الواد وبتاخد فلوسه ولا ايه؟ عم محمود: انتي اتجننتي يا وليه انتي ولا ايه؟ وانا من امتي بنصب علي حد هاه؟ ام ليلي: امال انت بتقول ايه؟
عم محمود: بقول يمكن بنتك تفوق من وهمها ده وترجع لعقلها ام ليلي: تفوق ايه؟ والله لو في حد محتاج يفوق يبقي انت يا ابو ليلي مش بنتك تفوق وتشوف الراجل في ادبه واخلاقه وحبه لبنتك وانه بيتمنالها بس الرضي عم محمود: يا شيخه اسكتي بس هو كان عمره يحلم بواحده زي بنتك تبصله ولا تعبره المهم هطلع اشوفهم بنتك بره لوحدها معاه ام ليلي: خطيبها هيا حره سابها وخرج.
ليلي خرجت تجري بره واول ما شافته واقف ساند ظهره علي الحيطه وباصص للارض وحاطط رجل علي رجل وهو واقف فكرت ليلي جواها قد ايه هيا بتعشقه وبتحبه وقد ايه واحشها لمحها ادهم ورفع راسه وبصلها وابتسم ابتسامه خفيفه جريت عليه ورمت نفسها في حضنه واتعلقت في رقبته ليلي: وحشتني وحشتني وحشتني ادهم شايلها لانها متعلقه في رقبته ادهم: وانتي كمان بس لاحظي ان احنا في الشارع واي حد ممكن يعدي وابوكي كمان ممكن يخرج.
ليلي وقفت علي رجليها وبعدت عنه خطوه وكشرت ليلي: ابوكي ابوكي الناس وبعدين لامتي؟ مش وحشاك ادهم: واحشاني طبعا وفوق ما تتخيلي اما لامتي فده لحد ما تبقى مراتي ولازم اعمل اعتبار للناس ولابوكي طالما حاجه غلط بتحصل ليلي: غلط؟ اني ارمي نفسي في حضنك ده غلط؟
ادهم: في الشارع اه،، لو ابوكي خرج مش هخلص منه وانتي عارفه انه بيتلكك اما الناس فطبعا هيتكلمو وانا مش هقبل حد يتكلم عليكي وعلشان كده مش عايز ادي فرصه للكلام فهمتي؟ ليلي: بحبك وبحب خوفك عليا ايوه بتخنق منه بس بحبه ابتسمت وقربت تاني ووقفت قصاده بصلها نظره طويله ادهم: انتي بتقيسي قوه تحملي يعني ولا ايه؟ ليلي: ازاي؟
ادهم: ماهو ما ينفعش تقفي قصادي وتبصيلي كده انا مش تمثال حضرتك ليلي: بجد هو انت ممكن تتحرك اصلا؟ انا حاسه اني مهما اعمل عمري ما هخترق جدارك ده اللي انت محاوط نفسك بيه ادهم: ليه بتقولي كده؟ ليلي انتي اخترقتي جداري ده من اول مره عيني جت في عينك الباقي كله بقي كان حلاوه روح قبل ما اسلم وارفع الرايه البيضا ليلي بابتسامه: هو انت استسلمت خلاص؟
ادهم: انتي مش واخده بالك يعني؟ ليلي انا تخطيت الحب من زمان وحاليا انا بعشقك مسك ادهم ايديها الاتنين واتقابلت العيون في حوار صامت للعشاق صمت ابلغ من اي كلام ممكن يتقال ليلي: اوعي تسيبني ابدا او تزهق من ابويا فاتسيبني ادهم: ما تخافيش لو سيبتك يا ليلي في يوم من الأيام فده هيكون بناء علي طلبك وبس وابوكي عمره ما هيقدر مهما يعمل يبعدني عنك متخافيش ليلي: وعد؟
ادهم: وعد هنا خرج ابوها عم محمود: لاحظو ان حضراتكم في الشارع ليلي: وده غلط مين؟ عم محمود بصلها بغيظ عم محمود: ادخلي جوه وانت يالا علشان تلحق تشوف البيت قبل ما الدنيا تليل ليلي: انا جايه معاكم عم محمود: تيجي تعملي ايه؟ ليلي: مش بيتي ده ولا ايه؟ وبعدين في حاجات عايزه اتفق معاه عليها.. يالا بينا راحو البيت اتفرجو عليه واتفقوا علي كل حاجه وخططوا لكل حاجه.
ادهم محسش ابدا ان البيت ده بيته بس ليلي فرحانه بيه وده اللي يهمه بس محبش البيت ابدا واتخنق منه بدأت ليلي تفرجه علي البيت حته حته هو استمتع بكلامها وحماسها واحلامها الجميله وتخطيطها لكل حاجه وعجبه ذوقها في الالوان اللي بتقترحها اما ابوها فكان علي اخره منهم وحس انه لو فضل اكتر من كده معاهم يتفرج علي بنته وهيا طايره بيه كده ممكن يتشل او يجراله حاجه فقعد بره وسابهم مع بعض يخططوا لبيتهم ليلي: ايه ساكت ليه؟ في حاجه مش عجباك؟
ادهم: لا يا جميل بس بستمتع بحماسك وطريقه كلامك ليلي قربت منه بدلع ليلي: طريقه كلامي بس اللي عجباك؟ ادهم: حاليا اه ليلي ضربته علي صدره: رخم كشرت ولسه هتبعد راح شاددها عليه وحط ايديه حواليها ادهم: انتي عارفه ان كل همسه فيكي عجباني فبتسألي ليه؟ ليلي: بحب اسمعك... بحبك لما تتغزل فيا ادهم: اتغزل فيكي؟ امم وبتحبي ايه كمان؟
ليلي: بحبك انت اغنيهالك ادهم: غنيهالي ليلي: لعلمك انت بحبك انت.. واداري عنك لحد امتي... انت انت بحبك انت ( اغنيه قديمه لسميره سعيد) ادهم: سكتي ليه؟ ليلي: متبقاش طماع هو كده كفايه عايزه اسمعك انت بقي... بتوحشني كلك علي بعضك مش صوتك بس وبتتقل عليا وتطنشني ادهم: لا يا قلبي ولا تقل ولا تطنيش الحكايه وما فيها اني بحاول اقلل الاحتكاك بيني وبين ابوكي علي قد ما اقدر لكن بعد ما نتجوز.
ليلي: ايوه بعد ما نتجوز ايه بقي؟ ادهم: برضه هفضل اتجنب ابوكي زقته وراحت بعيد عنه ليلي: انت بجد بجد رخم... فصلتني يالا نروح ادهم ابتسم وقربلها ووقف وراها وضمها حط ايديه حواليها ودفن راسه في شعرها واخد نفس طويل ادهم: اه لو تعرفي انا بحبك قد ايه؟ ليلي: سندت عليه بجسمها وضمت ايديه بايديها ليلي: بتحبني قد ايه؟ ادهم لفها ليه ومسك وشها بايديه الاتنين واختلطت انفاسهم ببعض.
ادهم: بحبك لدرجه اني فقدت اي قدره او سيطره علي عقلي وبقيت ماشي وري قلبي وبس... بحبك لدرجه بتوجع قوي... بحبك بطريقه محدش وصلها قبل كده... انتي عامله زي الهوا اللي بتنفسه ولو اتمنع عني دقايق روحي تنتهي... بحبك لدرجه ان بعدك عني معناه نهايتي فهمتي... ياتري قدرت ولو شويه اوصلك جزء من احساسي ناحيتك ليلي مقدرتش تنطق او تتحرك او ترد باي كلمه ادهم: ليلي قولي اي حاجه... فاجئتك بحبي ليكي ولا ايه؟ قولي اي حاجه ليلي اخيرا صوتها طلع.
ليلي: معنديش غير رد واحد اتمني يكون رد يرضيك قربت منه قوي وحطت شفايفها علي شفايفه وغابوا الاتنين في دنيا تانيه محدش فيهم عرف هما فضلوا قد ايه كده ولا عدي وقت قد ايه فاقوا علي صوت ابوها بينادي عم محمود: ليلي... انتو فين وبتعملوا ايه؟ الدنيا ليلت بعدوا عن بعض انفاسهم مقطوعه ومحدش فيهم قادر يرد او حتي عارف يسيطر علي اعصابه اخيرا ادهم طلع بره ادهم: نازلين حالا.
خرجت ليلي ومسكت ايده ونزلو الاتنين ايديهم مشبكه في بعض عم محمود: الدنيا ليلت ولا ايه؟ يالا نمشي ليلي: حاضر يالا... ادهم هتيجي معانا البيت نتعشي ونسهر مع بعض اوك؟ ادهم: لا معلش اعذريني ورايا كام حاجه كده لازم اعملهم الليله وقت تاني ليلي: كل حاجه تتأجل وتعالا النهارده معايا ادهم: لو ينفع مكنتش اتأخرت ليلي: ادهم بقي عم محمود: ما قالك مش فاضي بطلي لك بقي ادهم بص ليلي وكأنه بيقولها عرفتي ليه مش هينفع اجي
قضي ادهم يومين في البلد رفض فيها اي عزومه اتوجهتله سواء من بيت ليلي او اي حد خرج هو و ليلي اتغدوا مع بعض بره بعد الحاح شديد من ليلي وامها علشان ابوها يوافق
عدت الايام والبيت اخيرا بقي جاهز بس ناقص العفش ليلي اصرت انها تسافر بنفسها تجيب عفشها وطبعا ابوها وامها سافروا معاها وصلوا اخيرا القاهره والمفروض ادهم هيستناهم وصلو وادهم قابلهم ليلي كانت طايره بحبيبها اللي كان واحشها جدا وهو كالعاده كابت مشاعره اتقاءا لغضب ابوها اخد شنطهم وحطهم في العربيه ليلي: عربيه مين دي؟ كل مره بشوفك بعربيه شكل انت عندك كام عربيه بالظبط؟
ادهم: عربيه واحده بس هيا دي... التانين كانوا تبع الشغل لكن دي عربيتي ليلي: امممم ادهم: امممم ايه؟ وحشه ولا ايه؟ ليلي: لا طبعا حد يقول علي دي وحشه! بس لايقه عليك... جيب فور باي فور لايقين علي بعض ظابط طويل عر يض ليه هيبه كده وعربيه عاليه ضخمه الكل يوسعلها في الطريق لايقين علي بعض ادهم ابتسم ومامتها كمان لكن ابوها كان هيولع
عم محمود: هنركب في اليوم اللي مش باينله اخر ولا هنفضل كده كتير؟ ادهم: لا طبعا اتفضل حضرتك ادهم فتحله الباب اللي قدام بحيث يقعد جنبه عم محمود: لا خليها هيا تقعد جنبك لاحسن الضغط عالي عليا ادهم بابتسامه: براحتك ركب وري جنب مراته وليلي طبعا كانت طايره وفضلت طول الطريق رغي رغي رغي.
ادهم بيسمعها مبتسم زي سيمفونية جميله وصلهم ادهم لبيت عم ليلي اللي ساكن في القاهره واصر عمها انه لازم يدخل الاول فعلا دخل معاهم بس اتفاجئ ان شقه عم ليلي صغيره جدا واستغرب هما ازاي هيفضلوا عنده طلب من ابوها انه يتكلم معاه بره للحظه قبل ما يمشي فطلعوا بره وليلي خافت ان ابوها يزعل ادهم فخلت مامتها تتطلع معاهم ادهم: الشقه صغيره جدا فازاي هتقعدوا فيها كلكم؟
عم محمود: اعتقد ده شيئ ميخصكش ام ليلي: ميخصهوش ازاي يعني؟ مش خطيبته دي اللي خايف علي راحتها؟ عم محمود: خلاص يا ستي علشان راحه خطيبته وراحته اروح احجزلكم في فندق خمس نجوم ايه راي سيادتك؟ ادهم: لو سمحت شقتي موجوده وواسعه عم محمود: اممم قولتلي شقتك؟ وحضرتك عايزني اجيب خطيبتك تعيش معاك في شقتك صح؟ عايز الناس تاكل وشي صح؟
ادهم: لا طبعا مش قصدي كده اولا محدش يقدر يتكلم ثانيا حضرتك ووالدتها هتكونو موجودين وبعدين انا هسيب الشقه لحضراتكم الفتره دي مش قضيه يعني عم محمود: متشكر علي عرضك الكريم ده ادهم: انا مش بعزم انا بتكلم بمنطقيه وبعدين المفروض انكم هتشتروا جهاز ليلي تقدر تقولي الحاجات اللي هتشتروها هتحطوها فين؟ ام ليلي: والله يا ابني عندك حق عم محمود: قصدك ايه بقي؟
ام ليلي: قصدي ان شقه اخوك شايلاه بالعافيه هو ومراته وعياله واحنا تلاته وكمان هنشتري عفش البنت.. ادهم بيتكلم صح عم محمود: يعني انتي عايزه تروحي شقته؟ ام ليلي: ايوه طبعا نروح وبعدين كلها اسبوعين ويتجوزا بإذن الله عم محمود: خلاص انتو حرين ليلي طبعا كانت واقفه بتسمع واول ما سمعت موافقه ابوها فضلت تتنطط اخدهم ادهم وراح بيهم شقته المنطقه كانت في حي راقي جدا عجبهم كلهم العماره فخمه من بره دخلو وطلعوا الاسانسير ووقفوا قدام الشقه واول ما ادهم فتح الباب اتفاجؤا كلهم
رواية المشوه الجزء الأول للكاتبة الشيماء محمد الفصل السادس عشر
اخدهم ادهم وراح بيهم شقته المنطقه كانت في حي راقي جدا عجبهم كلهم العماره فخمه من بره دخلو وطلعوا الاسانسير ووقفوا قدام الشقه واول ما ادهم فتح الباب اتفاجؤا كلهم اتفاجؤا لما لقوا الشقه فخمه جدا ليلي: واو دي شقتك يا ادهم؟ ادهم: عجبتك؟
ليلي: عجبتني! انت بتهزر دي تحفه زي الشقق اللي بشوفها في التليفزيون وبس طبعا اتفرجت علي الشقه كلها واكتر حاجه عجبتها اوضه النوم الرئيسيه بحمامها الخاص والجاكوزي فيه والمطبخ لانه كان امريكان مفتوح علي الصاله وعجبها البار اللي فيه ادهم: كان نفسي تعيشي معايا هنا... عم محمود: متنساش اتفاقنا ادهم: مش ناسيه عم محمود: ما انت مليونير اهوه علشان كده مفرقش معاك المهر والشبكه ادهم: ولا مليونير ولا حاجه.
عم محمود: عربيه موديل السنه وشقه في منطقه راقيه جدا وعفش بالمنظر ده والبيت اللي بتبنيه وتقولي مش مليونير ادهم: ايوه مش مليونير بس مش معدم اولا الشقه اخدتها من اكتر من 8 سنين كانت الاسعار غير دلوقتي وبعدين انا راتبي عالي وكل مهمه بطلعها ليها حساب خاص وكل اصابه عليها تعويض والاهم ان انا مش من النوع اللي بصرف او ليا اهتمامات ماديه والسنه اللي فات جددت الشقه والعفش وساعدتني ساره في الموضوع ده واشتريت العربيه لان الفلوس موجوده وملهاش لازمه... اما البيت والمهر والشبكه والفرش فاعتقد ان بعد الفرح هبقي جبت اخري خلاص.
عم محمود: هتفلس يعني ولا ايه؟ ادهم: مش هفلس بس لان شغلي موجود بس قصدي علي الحساب في البنك ليلي: طب احنا ممكن نشتري المهم بس ونوفر ادهم: لا يا حبيبتي مش قصدي كده اشتري كل اللي نفسك فيه الفلوس رايحه وجايه ما تقلقيش انتي المهم اتفضلو في كذا اوضه نوم اللي تعجبكو اتفضلو فيها ليلي: انا هاخد الاوضه دي تعال معايا.
شدته من دراعه توريه الاوضه اللي عجبتها ادهم: دي اكتر اوضه عجبتك؟ ليلي: اههه... اينعم عايزه اغير الوانها الغامقة دي بس هيا اكتر حاجه عجباني ادهم: دي اوضتي ليلي: اوضتك! طب خلاص اسيبهالك ادهم: لا يا قمر هو انا اطول انك تنامي في اوضتي وبعدين اصلا انا هسيب الشقه كلها فنامي انتي هنا ليلي: ليه؟ خليك معانا ادهم: بجد اخليني؟ انتي عايزاني انا وابوكي في بيت واحد؟
عم محمود: ابوها هياكلك يعني ولا ايه؟ اتفاجؤا الاتنين بيه ادهم: لا طبعا مش القضيه بس حضرتك اللي اعترضت علي وجودي انا وليلي في بيت واحد ام ليلي: لا يا حبيبي سيبك من الكلام ده انت متخرجش من بيتك خليك معانا ادهم: لا معلش عم محمود: اترجوه شويه وهو يوافق ادهم: انا مش عايز حد يترجاني.. بس مش عايز مشاكل مش اكتر عم محمود: وانا بقي بسبب لسيادتك مشاكل صح؟
ادهم: انا مش عارف اقول لحضرتك ايه؟ ام ليلي: متقولش حاجه ومتخرجش من بيتك واللي ليه عندنا حاجه يجي ياخدها ليلي: ايوه يا ادهم خليك وبعدين محسسني انك قاعد طول النهار في البيت؟ ادهم: خلاص براحتكم المهم هسيبكم ترتاحو وانا هرجع شغلي عم محمود: استني قبل ما تنزل اللي عايز يشرب شاي هنا يلاقي ولا ينزل يشتري؟
ادهم: المطبخ فيه كل حاجه.. تعالي يا ليلي اوريكي مكان كل حاجه ليلي بابتسامه: يالا بينا اخدها المطبخ وعرفها علي اماكن الحاجات الأساسية
ادهم: مالك بتبصيلي كده ليه؟ ليلي: عاجبني المطبخ واستيله ذوقك ولا ذوقك مامتك ادهم: مامتي؟! ليلي: قصدي ساره مش تعتبر مامتك ولا ايه؟ ادهم: لا ما تعتبرش المهم اغلب عفش الشقه ذوقي هيا ساعدتني في شرا الحاجه مش اكتر وشويه ديكورات كده ادي الشاي والسكر والغلايه والميه ايه تاني؟ ليلي: نسكافيه اهم حاجه النسكافيه ادهم: اشمعني؟
ليلي: انا مدمنه نسكافيه ادهم: امم قولتيلي وايه كمان؟ ليلي: اممم الشيكولاته بعشقها يعني بص في اي وقت عايز تصالحني تطلب حاجه ارشيني علي طول بشكولاته كادبوري هتلاقيني بقولك شبيك لبيك ادهم: طيب كويس انك قولتيلي... ادي يا ستي النسكافيه اهوه ليلي: عندك لبن بقي؟ ادهم: ايه محل البقاله اللي انا واقف فيه ده؟ لا يا ستي معنديش لبن اتفطمت من بدري.
ليلي: خفه انا بشرب النسكاف باللبن ادهم: النسكاف؟ حاضر اجيبلك لبن حاجه تانيه عايزاها ليلي: لا يا حبيبي سلامتك قربت ليلي عليه وهو مسك ايديها ادهم: وحشتيني ليلي: يااااااااه اخيرا افتكرت ادهم: مش انتي اللي دخلتينا محل البقاله اعملك ايه يعني؟
ليلي: طب خلاص خرجنا من محل البقاله خلينا في المهم... انت كمان وحشتني قوي شدها عليه ويدوب هيضمها عم محمود: فين الشاي؟ ادهم: جاهز ثواني ليلي حطت الشاي لابوها وادهم بصلها وهز اكتافه وكأنه بيقولها مش بايدي وراح على شغله ابوي ليلي رفض ان ليلي تنام في اوضه ادهم نهائي ادهم كان بيقضي النهار كله في شغله ويرجع اخر الليل وينزل بدري جدا.
ليلي وابوها وامها بيشتروا جهازها وادهم بينزل معاهم في الحاجات المطلوب منه وجوده فيها عم محمود لاحظ ان ادهم ليه هيبه بين الناس وانه محترم جدا من اللي حواليه ادهم اي شيئ بيعجب ليلي بيشتريه حتي لو غالي وفي الاجهزه اللي كان بيجيبها عم محمود: انت مش ملاحظ انك بتشتري بزياده ادهم: ايه اللي بشتريه بزياده؟ عم محمود: الشاشات دي ما كفايه واحده كفايه الكبيره دي.
ادهم: واحده في الصاله والتانيه لاوضه النوم عم محمود: والتكيفات؟ ادهم: الجو في الصيف حر جدا في بلدكم وبعدين كل الاجهزه دي لراحه ليلي ولا ايه؟ عم محمود: براحتك انت حر
خلصوا شري العفش وكل حاجه تقريبا وفي يوم بالليل الكل نايم ليلي صحيت وطلعت تشرب قابلت ادهم يدوب راجع ليلي بصوت نعسان: اخيرا جيت؟ راحت ناحيته واستكانت في حضنه نايمه علي نفسها خالص ادهم: انتي هتنامي ولا ايه؟ ليلي: انا نايمه اصلا ادهم: طيب ادخلي كملي نومك.
ليلي: لا عايزه افضل معاك شويه... تعال نقعد شويه في البلكونه ادهم: ولو ابوكي صحي؟ ليلي: سيبك من ابويا بقي كلها بكره وهسافر ادهم: تعالي طلعوا البلكونه وفضلو يتكلمو ويتكلمو في اي حاجه وفي كل حاجه وسكتو الاتنين مره واحده وبصوا لبعض واتقابلت العيون المشتاقه في نظره طويله وغابوا الاتنين مع بعض في لحظات لاتنسي ليلي همست لادهم: بحبك قوي ومحتاجالك قوي جنبي وانت علي طول بعيد ادهم: انا مش بعيد ابدا بس مش عارف قرب حاسس اني متكتف ومتراقب في كل حركة ابوكي واقفلي ومستنيلي اي غلطه ليلي: هانت خلاص ادهم: بجد هانت؟
ليلي: اكيد بعد ما نتجوز محدش هيدخل بينا تاني ادهم: والشرط اللي ابوكي حاطه انك ما تسافريش معايا هنتصرف فيه ازاي؟ ليلي: هنطنشه ومش هيمنعني ساعتها اجي معاك وبعدين مالوش حكم عليا بعد ما اتجوزك ادهم: اتمني ده يحصل لاني مش عارف اصلا ساعتها هعمل ايه وهبعد عنك ازاي؟ ليلي: متبعدش خليك جنبي ديما ادهم: ولما تزهقي؟ ليلي: عمرك سمعت عن حد زهق من روحه؟
ادهم: وانا روحك؟- ليلي: عندك شك في ده؟ انت روحي وقلبي وحياتي كلها.. انت اهم حاجه في حياتي فاهم؟ انا من غيرك ولا حاجه وبيك انت كل حاجه ضمها ادهم لصدره قعدوا جنب بعض وادهم قلع جاكته ولبسهولها وفضلو لحد الصبح مع بعض ونامو كده اتفاجئ ادهم بايد علي كتفه بتصحيه.
اصحوا اصحوا انتو الاتنين يالا صحي ادهم وبص لقاها ام ليلي ام ليلي: اصحوا بقي قبل ما ابوها يطلع ويعمل مشكله ادهم: صحيت خلاص اهوه ام ليلي: صحي البت دي ادهم: ليلي ليلي اصحي بقي ام ليلي: يا بنتي اصحي بقي ابوكي جاي ليلي: يوه بقي سيبوني انام... اه رقبتي ام ليلي: بقولك ايه؟ شيلها دخلها اوضتها بسرعه وانا هدخل لابوها لحد ما تدخلها ماشي.
بصلها ادهم باستغراب ام ليلي: انت لسه هتبصلي اتحرك ولا مش تقدر تشيلها؟ ابتسمتله وهيا داخله ام ليلي: متطولش عندها واخرج علي طول جاوبها بابتسامه وفعلا شالها ودخلها علي سريرها غطاها ويدوب هيمشي اتشعبطت في رقبته ليلي: خليك جنبي ادهم: انتي مصره تودينا في داهيه صح؟
ليلي: انت رخم ادهم: رخم اه بس عايز اتجوز مش عايز مشاكل قبل الفرح سيبي رقبتي بقي ليلي: طب بوسني وانا اسيبك ادهم: أ... ابوسك باسها ادهم علي خدها بوسه خطف كده ليلي: بجد! ده بجد ولا بتهزر؟ ادهم: بهزر اوعي بقي ليلي: طب اطلع بره انا غلطانالك اصلا... انا غلطانه اني احب واحد زيك ادهم وقف بسرعه: قصدك ايه بواحد زي؟
ليلي استوعبت كلامها وان ادهم حساس جدا ليلي: مش قصدي اللي في بالك ده انا بهزر علي فكره مش قصدي حاجه يا ادهم ادهم: ما علينا انا نازل شغلي ليلي جريت ومسكته من ايده: مش قصدي حاجه انا بحبك وانت عارف ده كويس انا بس اتضايقت انك عامل حساب قوي لبابا وخايف منه كده.
ادهم: خايف منه؟ مين قالك اني خايف منه؟ انا مبخفش من اي حد علي وجه الارض نهائي فاهمه؟ مبخافش... لكن في فرق اني اخاف منه او اخاف علي حاجه بين ايديا حلم جميل او وهم خايف اصحي منه علي كابوس حياتي انتي يا ليلي في ايد ابوكي لسه مش في ايدي وده اللي مخلينا عامله حساب مش اكتر خايف علي زعله علشانك مش عايزك تزعلي منه او يزعل منك بسببي... مش عايز ابدا في يوم من الايام تختلفوا بسببي فاهمه؟
انا اتحرمت من العيله وده احساس ما اتمنهوش لعدوي فما بالك بحبيبتي فهمتي بقي انا خايف من ايه؟ خايف انك تضيعي مني مش اكتر ليلي: انا مش هضيع منك ابدا محدش يقدر يبعدني عنك ولو هختار قاطعها ادهم: ولو في يوم اتحطيت في موقف انك تختاري بيني وبين عيلتك هنسحب من حياتك وهختار انا نيابه عنك العيله ليلي: ادهم ارجوك.
ادهم: ارجوكي انتي افهميني وقدري موقفي انا اتاخرت علي شغلي بعد اذنك مسكته: طيب علشان خاطري متمشيش زعلان ادهم: انا مش زعلان يا ليلي ومش هزعل منك بس بجد انا اتاخرت خرج ادهم وما اخدش باله ان ابوها سمع الحوار ده كله بينهم عدت الايام واخيرا جه اليوم الموعود
تحميل محتوى الموضوع
عرض نسخة صالحة للطباعة
أرسل هذا الموضوع إلى صديق
[13]
الدعوات : 2قوة السمعة : 10
رواية المشوه