رواية لعنة الماضي

رواية لعنة الماضي للكاتبة الشيماء محمد الفصل الثامن

ايمان: اديني اهوه اتفضل يا سيدي قول عايز تقول ايه اللي كان لا وقته ولا مكانه في الورشه؟
فارس: تشربي حاجه الاول؟
ايمان: فارس اتكلم علي طول لاني مش هينفع اتأخر
فارس: اوكي، هتكلم وهقولك علي كل اللي في دماغي
طبعا انتي عارفه ان انا كنت متجوز
ايمان: اكيد طبعا ومش محتاجه اعرف تفاصيل عن جوازك يا فارس او عن طلاقك
فارس: ممكن تسمعيني لو سمحتي؟
ايمان: اتفضل.

فارس: انا معرفش اذا كنتي تعرفي ولا لأ ان انا كنت بحب مراتي جدا او يمكن بعشقها
ايمان: انت بتقولي الكلام ده ليه؟
فارس: لان انا لسه لحد اللحظه دي بحب مراتي وخلي بالك ان انا بقول مراتي مش طليقتي
ايمان ابتسامتها اختفت ومعرفتش في اللحظه دي تفكر في ايه وهو عايز يقول ايه؟
ايمان: يعني ايه؟ تقصد ايه؟ انت مطلقتهاش يعني؟ هيا علي ذمتك؟ ولا انت ردتها ولا ايه؟ انا مش فاهمه اي حاجه؟

فارس: لا انا مردتهاش وايوه هيا طليقتي ومش علي ذمتي اللي انا بقوله ان انا لسه بحبها
ايمان: امال مرجعتلهاش ليه؟ او عايز تتجوز ليه؟
فارس: رجوع مش هرجعلها احنا كل الطرق بينا اتقفلت وما ينفعش نرجع لبعض اما عايز اتجوز ليه فهو ده السؤال المهم، هو ده اللي انا جاي النهارده اقولهولك لان انتو عيله قريبين مننا قوي وانا الصراحه بحب والدك وبحترمه وبعتبره في مقام والدي بالظبط.

شوفي يا ايمان فرح فهمت غلط لما قولتلها ان انا موافق اتجوز وطلبت منها تشوفلي عروسه
ايمان: يعني انت مش عايز تتجوز ولا انت مش عايز تتجوزني انا بالذات؟

فارس: مش حكايه انتي بالذات لأ الحكايه اني عايز واحده تخدم امي وتاخد بالها منها، امي كبرت وتعبانه وفرح عماله تلومني انا اني السبب في تعبها وان انا المفروض اريحها وانا بصراحه حاولت كذا مره اجيبلها شغاله في البيت الا انها رافضه وبتمشيها وعايزاني اتجوز ومعرفش انتي عرفتي ولا لأ انها من اسبوع كده تقريبا تعبت جامد وفضلت في المستشفي كام يوم.

ايمان: فارس، فارس لو سمحت، انا مش فاهمه انت عايز تقولي ايه؟ انت بتتكلم كلام كتير جدا بس مش فاهماك..

فارس: عايز اقول اني مش عايز زوجه بالمعني المتعارف عليه، انا عايز خدامه بس باسلوب شيك عايز واحده تعيش معانا في البيت من غير ما امي تطردها ومن غير ما حد يقول دي عايشه معاهم بصفه ايه؟ وتخيلت ان فرح فاهمه ده وكان في دماغي انها هتشوفلي واحده مطلقه او ارمله او يتيمه او اي واحده تحمد ربنا ان في اربع حيطان بيداروها لكن ما تخيلتش ابدا انها هتختارلي واحده الشباب كلها يتمنوها، ايمان انتي تستاهلي راجل يحبك ويقدرك ويدلعك ويديكي حقك كزوجه، يحبك وتحبيه لكن مش واحد زيي ابدا، انا خلاص حبيت وانتهيت وقفلت قلبي ومش ناوي افتحه ولا عايز اصلا افتحه، فانا ما انفعكيش كزوج، انتي تستاهلي راجل يقدرك، تستاهلي حد احسن مني مش انا ابدا، حطام راجل...

ايمان: امال فرح
فارس: فرح افتكرت ان انا هتجوز واعيش حياتي لكن انا زي ما قلتلك عايز خدامه مش زوجه، ومش هكون لها زوج، هحترمها هعاملها كويس، هجيبلها طلباتها لكن مش هكون زوج، مش عارف انتي فهماني ولا لأ؟ انا متفرقش معايا هتجوز مين؟ اي واحده تقضي الغرض طالما هيا موافقه علي الجواز بالطريقه دي فهمتيني؟
ايمان كانت عايزه تعيط بس مش عايزه تعيط قدامه كفايه لحد كده بهدله، فقامت وقفت.

ايمان: انا فهمت كويس قوي واسفه علي الازعاج اللي احنا عملناهولك
فارس: ايمان لو سمحتي
ايمان: خلاص يا فارس ما تتكلمش زياده بعد اذنك انا اتأخرت ولازم اروح.

سابته وجريت لانها لازم تعيط، حبته من قلبها، اول حب ليها وتقريبا اخر حب لانها مش قادره تشوف غيره حتي، اليومين اللي فاتوا عاشت في وهم حب كبير، بنت احلام كتير في الهوا اتدمرت علي ارض الواقع، عاشت في قصه حب من نسج خيالها وتخيلت ان هو كمان كان واخد بالو منها وهيقولها ان هو حبها ولاي سبب بعد لكن ما تخيلتش ابدا انه هيرفضها ويرفض حبها بالطريقه دي..

روحت وحبست نفسها وفضلت تعيط كتير جدا ومحدش عارف مالها بتعيط ليه؟
فارس روح هو كمان مخنوق ومش طايق حد ومجدي مارحموش ابدا
مجدي: غبي انت راجل غبي، في واحد عاقل يجيلو القمر ويدق علي بابه يقوله لأ مايلزمناش، انتي غبي يالا، يعني حتي لو مش هتحب يا اخي اتجوزها وخلفلك عيلين منها وعيش معاها واحترمها وقدرها مش لازم حب اصلا، علي الاقل الاحترام بيدوم العمر كله...

فارس: مجدي وحياة ابوك ما هي نقصاك، ابوس ايدك نقطني بسكاتك
مجدي: ماهو انت غايظني بطريقه ما تتخيلهاش، طول عمري بحسدك علي ذكائك مره واحده كده قلبت معاك بتخلف ماتفهم؟ غبي ما تفهم؟ مش قادر افهم انت جرالك ايه؟ الغباء بقي متوفر عندك بكتره
فارس: مجدي وحياه ابوك لتسكت
فارس سابه وروح علي بيته وهناك امه اول ما شافته راحتله فرحانه وطايره
منيره: بجد يا فارس؟ بجد اللي انا سمعته؟
فارس: ايه هو اللي بجد وسمعتي ايه؟

منيره: ان انت عايز تتجوز ايمان اخت هدي؟ انت مش متخيل قلبي كان هيقف من فرحتي بالخبر ده، اول ما امها كلمتني وقالتلي انكم مع بعض كنت، كنت عايزه ازغرد وانزل ارقص في الشارع والناس كلها تقول الوليه اتجننت علي كبر، فارس انت مش عارف انا فرحانه قد ايه؟ كنت خايفه قوي لتقول هعيش حياتي كده ولا تروح تجيبلي واحده ما تسواش ضفرك وتقول اهي جوازه والسلام، لا بس انت حبيبي نقيت ست البنات، هتتجوزا امتي هاه؟ بسرعه والنبي نفسي اشيل عيالك بقي، بص انت تعملها فرح ما اتعملش وتشتريها شبكه تليق بيها ايوه، وتشتريها الفستان اللي هيا تشاور عليه، ايوه حبيبي انت مش قليل اه، انت الباشمهندس فارس.

فارس غمض عنيه ومش عايز يسمع زياده ولا عارف يسكتها ولا عارف يتكلم ويدمرلها احلامها اللي بتبنيها في الهوا، وفي نفس الوقت مش قادر يسمع زياده..
فارس: امي امي امي، اهدي، واحده واحده، اولا لسه مفيش اي حاجه من اللي انتي بتقوليها دي كلها، احنا مجرد قعدنا مع بعض، ما اتكلمناش في اي حاجه مهمه وبعدين انا لسه ما اتقدمتلهاش وبعدين هتقدم ازاي من غير حتي ما اقولك؟ هاه؟

منيره بحزن: اوعي تكون مش ناوي وهما فهموا غلط..
ويدوب دموعها هتنزل
فارس: لا لا مش كده بس لسه يعني، الموضوع محتاج صبر يا امي مش سربعه واحده واحده اوكي وماتحطيش امال كبيره ممكن هيا ترفض؟
منيره: لا هما بيحبونا من زمان وما هيصدقوا هو انت شويه ولا ايه؟ انت بس قول يارب
فارس: يا رب المهم انا عايز ارتاح ممكن؟
منيره: اه يا حبيبي ادخل ريح ادخل وربنا يجعلها من نصيبك يارب ويجعلك منها ذريه صالحه يارب.

فارس ابتسملها ودخل اوضته، اهو ده بقي اللي معملش حسابه ابدا، هيقول لامه ايه؟

ايمان في بيتها في اوضتها بتعيط فابوها دخلها يطمن عليها ويشوف عملت ايه مع فارس؟
عم سيد: ايمان مجيتيش قولتي لابوكي وحكيتيلو عملتي ايه؟ هاه هيجي يقابلني امتي؟
ايمان عيطت جامد وابوها بدأ يقلق
عم سيد: في ايه اللي حصل يا بنتي! انطقي قولي؟
ايمان: هو ما بيحبنيش يا بابا.

عم سيد: وهو هيحبك بتاع ايه؟ ولا يحبك امتي؟ وبعدين حب ايه اللي انتي بتعيطي علشانه؟ محسساني انكم تعرفوا بعض من سنين وكان بيسرح بيكي وجيتي اكتشفتي انه بيتسلي مش بيحبك؟ ايه يا ايمان ده انتي العاقله اللي في عيالي؟
ايمان: انت مش فاهم حاجه يا بابا
عم سيد: طيب ابوكي دقه قديمه وما بيفهمش انتي قولي ياللي بتفهمي!

ايمان: هو بيحب طليقته وعايز يتجوز بس علشان امه اهي واحده تراعيها وتراعي بيته وتبقي علاقته بيها مبنيه علي الاحترام وبس لكن مفيش حب
عم سيد: هاه وايه كمان؟
ايمان: يعني ايه ايه كمان؟ بقولك عايز خدامه في بيته مش زوجه؟ وبيقولي ان هو متخيلش ابدا ان انا ممكن اوافق عليه وان انا استاهل حققد احسن منه مليون مره واشوف حد شاب زيي يستاهلني مش راجل محطم وبواقي راجل.

عم سيد: طول عمري بحترم الواد ده واحترامي كل يوم بيزيد ليه، انتي معترضه علي ايه؟
ايمان: بقولك عايز خدامه؟

عم سيد: ربنا بيقول انه لو حلل ان حد يسجد لحد كان امر المرأه تسجد لجوزها، عارفه يعني ايه تسجد، يعني الزوج بعد ربنا، مقالش الاب ولا الام لأ قال الزوج، الواحده في بيت جوزها خدامه، مطيعه مربيه ام زوجه حبيبه عشيقه والست الشاطره تكون كل دول مجتمعين فيها، ايه يعني مزعلك؟ انه شرط عليكي تخدمي امه؟ راجل جدع وبار بأمه، هو ده مضايقك! كان المفروض تردي عليه في وقتها وتقوليلو امك في عنيا وفوق راسي وانت مش محتاج تشرط عليا حاجه زي دي، مش تيجي تعيطي وتقولي ما بيحبنيش.

ايمان: بابا لأ هو مش قصده كده هو قال انه حب مراته ومعندوش استعداد يحب تاني ومش هيحب تاني.

عم سيد: يا بنتي وهما اللي حبوا اخدوا ايه؟ مرايه الحب ديما عاميه ولما بتروح زهوه الحب وبيشتغل العقل الحياه بتتدمر لان العقل ما بيشوفوش حاجه من اللي القلب شافها وبيبدأ الانسان يندم ويستغرب انا ازاي كنت اعمي؟ انا ازاي عملت كده؟ وده نفس اللي حصل لفارس وعلشان كده مش عايز حب تاني، الجواز الصح بيقوم علي الاختيار بالعقل ولما العقل بيكون مقتنع مهما الايام تعدي هو مقتنع وباقتناعه ده بيتولد حب متين قوي حب مهما الايام تعدي عليه ما بيتهزش لانه اتبني علي اساس متين ولان العقل هيطوع القلب..

ايمان: يعني ايه؟ انت عايزني اروح اقوله انا موافقه اتجوزك من غير حب؟
عم سيد: انا بقول ان الانسان اللي شايف نفسه مش جدير بيكي هو اكتر انسان هيحاول ديما يبقي جدير وهيعمل كل اللي يقدر عليه علشان يسعدك وبعدين انتي محتاجه ايه من الراجل غير انه يحترمك ويقدرك ويعرف قيمتك ويكفي بيته؟
ايمان: محتاجه الحب.

عم سيد: وايه هو الحب في نظرك؟ يعني ازاي تحكمي ان البني ادم ده بيحب؟ هل مثلا علشان بيقول كلمه بحبك يبقي بيحب او لو مقلهاش يبقي ما بيحبش؟ ايه هو الحب؟
ايمان: معرفش بس ان الانسان يهتم بمشاعر الانسان التاني ويحاول ديما يسعده
عم سيد: ولو هو عمل كده اللي قدامه هيعمل ايه؟
ايمان: هيبادله نفس المشاعر دي.

عم سيد: طيب اعملي كده مع فارس وهو هيبادلك نفس المشاعر دي، هو هيبدأ حياته معاكي بأدب واحترام وموده واحتياج لان هو محتاج زوجه وانتي كملي ده بالحب وخليه يبادلك الحب، انتي دخلي الحب بيتك انتي اخلقي الحب ده
ايمان: ولو فشلت؟ لو معرفتش اخليه يحبني؟
عم سيد: لو انتي مش هتعرفي تخلي جوزك يحبك يبقي هتفشلي برضه مع اي حد تاني حتي لو بيحبك...
ايمان: انت منطقك غريب.

عم سيد: انا منطقي مبني علي الحب بعد الجواز، زمان كنا بنتجوز جواز اللي انتو بتسموا جواز صالونات وكنا بنحب بعض بعد الجواز وكان نادرا ما تسمعي عن حد طلق مراته، دلوقتي الكل يقول لا لازم اتجوز عن حب و90 % من حالات الجواز عن حب بتفشل، وبيطلقوا قبل اول سنه، واهو اكبر دليل لده فارس نفسه، حب واحده لا هيا مناسبه ولا هيا من مستواه وفضل يعافر ويعافر وبرضه في الاخر طلقها فهو استوعب الدرس كويس وعايز يتجوز بعقله، علي العموم دي حياتك انتي وانا برضه راجل عجوز ودقه قديمه شوفي انتي عايزه تعملي ايه وانا وراكي في اي قرار تاخديه، هتقوليلو اه يا اهلا وسهلا، هتقوليله لأ يبقي مع السلامه وخلينا حبايب، خدي قرارك علي مهلك وشوفي هل هتقدري تزرعي الحب في بيتك ولا انتي عايزه زرعه جاهزه والسلام؟ تصبحي علي خير يا بنتي فكري واستخيري ربنا وان شاءالله يلهمك للصح، وانا هدعيلك من كل قلبي ان لو هو خير ليكي ربنا يسهلك ولو شر يبعدك عنه..

سابها في حيره غريبه، منطق غريب عمرها ما فكرت بيه ابدا، بس فارس مقلهاش انه عايز يتجوزها هيا لأ هو رفضها تماما وقالها انه بيحب مراته، طيب تعمل ايه تقوله تعال اتجوزني وانا موافقه ابقي خدامه؟ ولا تصرف نظر خالص عنه وعلي رأي ابوها تشوف حد بيحبها؟ ولا تعمل ايه؟ هيا مش عارفه غير حاجه واحده وبس انها بتحب فارس، دي كانت بتنزل الشارع وتجري وري عربيه ايس كريم لمجرد انها تشوفه، وطول حياتها بتقبل باي شيئ لمجرد انها تلمحه جايه دلوقتي ترفض انها تبقي في بيته ومراته كمان لمجرد انه قال انه عايز واحده تخدم مامته؟ دي هيا كانت مستعده تشتغل خدامه بس وبجد لمجرد انها تبقي قريبه لكن ده هو عايزها زوجه كمان، ازاي ترفض؟ طيب بلاش مش يمكن يحبها زي ما بتحبه؟ مش يمكن يكون عايش في ماضي مراته وينساها لما يعيش الحاضر، مش يمكن يخلف منها وتبقي هيا كل دنيته؟ في افتراضات كتيره قوي لازم تفكر فيها وتاخدها في الاعتبار.....

فارس محتار مش عارف يقول لمامته ايه هو كمان؟ ولا ازاي يروح يقول لايمان اتجوزيني او ارفضيني انتي؟ مش عارف يعمل ايه؟
تاني يوم نزل الشغل وطول الوقت سرحان ومجدي حاول يعرف ماله بس مقالوش حاجه..
وقت رجوع ايمان طلع بره الورشه وهو معندوش ادني فكره هيعمل ايه؟ ولا عارف هو واقف ليه؟ ولا عارف لو شافها هيعمل ايه او يقول ايه؟
اخيرا شافها جايه وبيجهز اي كلام يقوله بس مش عارف، ايمان كمان متلخبطه مش عارفه تقوله ايه؟

وصلت عنده ووقفت قصاده والاتنين ساكتين..
الاتنين: اااا
فارس: قولي عايزه تقولي ايه؟
ايمان: قول انت الاول..
فارس: انا مش عايز اقول حاجه كنت هسلم بس
ايمان: وانا كمان..
فارس: طيب
ايمان: طيب انا ماشيه بعد اذنك
فارس: اه اتفضلي...
مشيت خطوتين
فارس: ايمان
وقفت وبصتله
فارس: والدتك كلمت والدتي وقالتلها ان انا طلبت ايدك وانك انتي وافقتي
ايمان: امم وبعدين؟
فارس: وبعدين ايه؟ انتي لسه موافقه؟
ايمان: انت لسه متقدملي؟

فارس: لو قلتلك اه؟
ايمان: هقولك اه
فارس: بس انا كلامي بتاع امبارح ما اتغيرش
ايمان: عارفه وموافقه
فارس: طيب اقدر اقابل والدك امتي؟
ايمان: كلمه وحدد معاه، بعد اذنك
فارس: اتفضلي
سابته ومشيت وهو فضل كتير مكانه يبصلها لحد ما طلعت بيتهم واختفت وهو برضه واقف فاق علي صوت مجدي وراه
مجدي: تيرارارااااا
فارس: اخرس يا واطي
مجدي: ما كان من الاول
فارس: ايه هو اللي من الاول؟ انت متخيل اني هتجوزها حبا فيها؟

مجدي: متجوزها تلاعبها شاطرنج
فارس: هههههه خفه تصدق ضحكتني
مجدي: من يومي يا ابني، بص يا فارس، خطوه الجواز في حد ذاتها صح واختيار اختك صح جدا، الحياه جايالك فاتحه ايديها باقي عليك انت يا حلو تنتهز الفرصه وتعيش بقي..

فارس: ما اسهل الكلام، تخيل يا مجدي للحظه ان انت ونجاه لاقدر الله انفصلتو لاي سبب كان، وجابولك ملكه جمال الكون هتعمل ايه؟ بامانه سيبك بقي من الهزار والضحك فكر للحظه اخدت منك نجاه وجبتلك واحده تانيه مكانها، جمالها هيفرق؟ هتعمل ايه؟ هتقول في داهيه؟ الحياه فاتحه ايديها؟ هتسمع للي حواليك وبيقولولك ارمي وري ضهرك عيش يالا؟
مجدي: ...

فارس: ايوه هو ده، الحياه ملهاش معني من غير الانسان اللي بتحبه، حتي لو نزلك ملك من السما وحتي لو كان اللي بتحبه شيطان، الحب هو الحب، مش بايدك تلغيه او تنساه او تديله ضهرك وتعيش حياه جديده، اتمني يا مجدي ما تتكلمش تاني في الموضوع ده معايا
سابه ودخل لشغله واخر النهار رجع وكانت والدته مستنياه علي نار هيا واخته
منيره: اخص عليك اتأخرت يا فارس.

فارس: ما اتاخرتش ولا حاجه معادنا معاهم بعد العشا واحنا يدوب المغرب اهو
فرح: علي اساس ان انت هتروح بمنظرك ده؟
فارس: نقطيني بسكاتك انتي
منيره: اسكتي يا بت انتي، ادخل يا حبيبي خد دش كده وغير هدومك ويالا علشان نلحق نشتري حاجه في ايدينا واحنا رايحين
فارس: انتي يا بت مش قولتلك شوفي الموضوع ده؟
فرح: علي فكره انا اكبر منك، ما تقولش بت دي تاني، ، وبعدين انا جبت اللي هناخده معانا بس ماما ما تقصدش ده.

فارس: امال تقصد ايه؟ تقصدي ايه يا أما
منيره: اقصد هديه لعروستك حبيبي، دي اول مره هتروح عندهم لازم تجيبلها حاجه
فارس: احنا لسه هنروح نتقدم يا أما
منيره: دي حاجات شكليه هما موافقين واحنا عارفين يبقي تنجز وتخلص علشان ما نتأخرش
فارس: بدأنا، انا عارف انها شوره
منيره: بتقول ايه يا حبيبي؟
فارس وهو داخل: ما بقولش.

دخل وقف تحت الدش كتير يفكر في مدي غباء الخطوه دي ومش قادر يتخيل نفسه مع واحده غير حبيبته ابدا غير ولبس وخرجلهم
منيره: ما لبستش بدله ليه؟
فارس: امي ما تضغطيش عليا، انا مش رايح فرح
منيره: انت مش متخيل فرحتي، سيبني افرح يا فارس
فارس: انا مش اول مره اتجوز وكل ده اتعمل قبل كده.

منيره: بالنسبالي انا دي اول مره، جوازتك الاولانيه كل حاجه فيها كانت غريبه ومش طبيعيه وكانوا ناس غير الناس لكن دول جيرانا وحبايبنا ولو سمحت سيبني اعمل اللي انا عيزاه...
فارس: حاضر يالا بقي علشان ما نتأخرش
منيره: يالا، استني، انت معاك فلوس؟
فارس: معايا يا أما
منيره: فلوس كتيره مش قليله
فارس: كتير قد ايه؟ انتي في دماغك ايه؟
منيره: ٥٠٠٠ كده ولا حاجه
فارس: معايا.

اخدته علي محل دهب يشتري حاجه لايمان وهناك فضلوا كتير
منيره: ما تنجز يا ابني
فارس: انا اللي انجز برضه؟ ما تنقوا انتو اي حاجه وتخلصو
فرح: المفروض انت اللي تنقي احنا بنوريك
فارس: انا فاضلي ثانيه ومش بس هسيب المحل لا ده انا هسيبلكم الدنيا كلها واطفش انجزوا
منيره: فارس اختار لعروستك حاجه
فارس اتنرفز وبيفكر جديا يسيبهم ويمشي ومش عارف يسيطر علي غضبه، اخيرا مد ايده ومسك سلسله في قلب وجواه قلب اصغر.

فارس: هاخد دي لو سمحت شوفهالي بكام؟
الاتنين سكتوا ومحدش فيهم نطق لانهم عارفين انه علي اخره
منيره: لو سمحت يا ابني حطهالنا في علبه صغيره شيك كده
اخدوها ومشيوا وراحوا عند بيت ايمان، فضلوا كتير يسلموا علي بعض ويرحبوا بيهم
ايمان من جوه عنيها علي فارس اللي ساكت وسرحان اصلا، ولو حد كلمه بيرد علي قد السؤال
منيره: اتأخرنا عليكم معلش، بس اللي اخرنا فارس
فارس بص لامه باستغراب
فارس: انا اخرتكم؟

منيره: اصر انه لازم يشتري هديه لعروسته وجننا في المحل مش عاجبو حاجه خالص، قلتله يا فارس يا حبيبي دي مش شبكه دي بس هديه، فين لحد ما اختار..
فارس مذبهل من كلام مامته وفرح كانت هتضحك من شكله وكانت عايزه تقوله اقفل بوقك...
فضلوا يرغوا كتير وبعدها ايمان خرجت ومنيره قامت وحضنتها جامد، كان نفسها تخطفها منهم وتاخدها وتمشي وتقولهم دي مرات ابني، سلمت علي فرح وفارس وقعدت علي جنب.

منيره: طبعا يا عم سيد احنا جايين نطلب ايد ايمان لفارس ويارب يجعلهم من نصيب بعض ويسعدهم ويعوضهم خير ببعض
عم سيد: اللهم امين، انا يشرفني ان فارس يبقي واحد من عيالي ويتجوز بنتي، فارس عارف معزته ايه عندي!
فارس: والله يا عمي المعزه متبادله، انا بحترمك وبقدرك وبعتبرك في مقام والدي...
قروا الفاتحه مع بعض وفارس عطي هديته لايمان اللي كانت طايره بيها من الفرح..
اخيرا سابوهم لوحدهم شويه...

ايمان: متشكره علي الهديه
فارس: المهم انها تعجبك؟
ايمان: زوق مامتك ولا فرح؟
فارس: زوقي انا
بصتله باستغراب
فارس: ايه مستغربه ليه؟
ايمان: تخيلت ان مامتك بتألف لما كانت بتقول علي الهديه وده من نظرتك انت ليها فقلت اكيد هيا اللي جابتها او فرح وهيا بتقول كده بس.

فارس: والله هو كده وكده، هما اللي اتاخروا لانهم مكنوش مستقرين علي حاجه مش انا، وبعدين اخترت انا دي وما اخدتش رأيهم علشان نخلص فبالتالي انا استغربت لانها قالت ان انا اللي محتار مش هما...
ايمان: يعني دي ذوقك؟
فارس لاحظ انها مسكتها وابتسمت وفرحت وبانت فرحتها قوي.

فارس: ايوه ذوقي بس ما تبنيش عليها حاجه، امي قالت اني لازم اجيب حاجه وزي ما قلتلك انهم فضلوا كتير فشديت اول حاجه عيني وقعت عليها مش اكتر ولا اقل، متبنيش امال، وارجوكي قبل ما ناخد الخطوه دي بجد ونتجوز فعلا انتي لازم تشيلي فكره الحب دي من دماغك نهائي، انا مش هحبك يا ايمان مهما تعملي، فلو انتي حاطه في دماغك اني مع الوقت ومع عشرتنا هحبك فتراجعي من دلوقتي احنا لسه علي البر...

ايمان: طيب علشان افهم بس يا فارس هو انت هتقدملي ايه؟
فارس: يعني ايه هقدملك ايه؟
ايمان: يعني انت عايز واحده تخلي بالها من والدتك وتراعيها وتراعي بيتك، انت في المقابل هتعملها ايه؟ مش معقوله هتعيش بلقمتها وبس..
فارس: مش فاهم برضه انتي عايزه توصلي لايه؟ اللي هيا عيزاه هعملهولها بس نخرج الحب بره علاقتنا
ايمان: ايوه علاقتكم بقي شكلها ايه؟
فارس: مبنيه علي الاحترام والتفاهم او ده اللي بتمناه.

ايمان: طيب وده اللي انا عيزاه، علاقه مبنيه علي الاحترام والتفاهم، اللي جوايا بقي يا فارس خليه جوايا مالكش دعوه بيه، احلم اتمني ابني في الهوا، ده شيئ يخصني اتفقنا؟
فارس: اتفقنا؟
منيره اصرت انهم يعملوا الفرح بسرعه وراحوا اشتروا الشبكه
منيره: نقي يا حبيبتي اللي يعجبك يالا
ايمان بصت لفارس اللي واقف علي جنب
فارس: شوفي اللي يعجبك ايه؟ واهو معاكي فرح وهدي يساعدوكي.

وقف هو بعيد وسابهم لوحدهم ينقوا ويختاروا وهو وقف بره المحل مستنيهم يخلصوا
ام هدي: بقولك يا ام فارس؟ هو فارس مالو مش مبسوط كده؟ وبعدين واقف بره ليه مش مع خطيبته يختار معاها شبكتها مش ده برضه هديته ليها ولا ايه؟
منيره: هو بس يا حبيبتي مالوش طولت بال ابدا للشري والتنقيه فديما يقولنا نقوا وفي الاخر يجي يدفع، هو اتعود علي كده..
ام هدي: بس دي شبكته؟

منيره: هو بس مستنيهم يستقروا وبعدها هو يجي، خليني اشوف البنات وصلوا لايه؟
قامت وراحت للبنات لقتهم محتارين بين كذا حاجه، فطلعت لفارس بره
فارس: خلصتو؟
منيره: انت واقف بره ليه؟ مش بتختار شبكتك ليه مع خطيبتك؟ ادخلها يالا وشوفها هتختار ايه؟ اتحرك
زعقتله وهو علشان ما يزعلهاش دخل وراح للبنات وقف وري ايمان وكان طويل عنها كتير، كانت دماغها عند صدره
فارس: وصلتو لايه؟
ايمان: محتارين.

فارس مد ايده ومسك طقم لفت نظره وايمان حست انها محاصره في حضنه وهو وراها..
فارس: ده احلاهم، ولا انتي ايه رأيك؟
ايمان بصتله وعنيها اتعلقت بعنيه: طالما عجبك هاخده
فارس: انتي اللي هتلبسيه المهم يعجبك انتي؟
ايمان: عاجبني
فارس: خلاص هناخد ده...
فرح: اختاروا الدبل يالا
ايمان نقت كذا واحده لفارس وهو اختار منهم وبعدها نقتله واحده رجالي
ايمان: قيسها...

فارس بصلها كتير وبعدها اخدها من ايدها ولبسها في ايده اليمين وهو بيلبسها لمحت دبله في ايده الشمال فبصتله باستغراب وهو بصلها كتير وبعدها بص للبياع
فارس: هاخد دي خلاص...
اشتري هديه لامه ولحماته وكان عايز يجيب لفرح ولهدي بس الاتنين رفضوا تماما وقالوا كفايه كده المره دي..
ايمان بعد ما شافت الدبله في ايده قعدت علي جنب هاديه وساكته
فارس خلص حسابه مع البايع واخدهم وطلع وعزمهم علي العشا بره..
فارس: ساكته ليه؟

ايمان: عادي ما تاخدش في بالك
فارس: براحتك
فضل يتكلم مع هدي وفرح ويهزر معاهم وهيا بتتفرج عليهم وساكته، خلصوا ومشيوا وفارس وصل كل واحده بيتها، فرح وهدي وامه نزلها وفاضل حماته وايمان وصلهم ونزلت حماته سبقت وسابت ايمان معاه
ام هدي: ما تتأخريش حبيبتي، انتو في الشارع
فارس: هتتطلع علي طول يا حماتي
طلعت وسابتهم وهو قاعد مستنيها تتكلم وهيا ساكته ولما طال سكاتها، طفي العربيه ورجع لوري في كرسيه والدنيا بقت ظلمه.

فارس: قولي اللي جواكي وطلعيه
ايمان: مفيش حاجه جوايا وبعدين احنا اتفقنا ان اللي جوايا يفضل جوايا..
فارس: ايوه اتفقنا بس ده مش معناه انك هتفضلي بالمنظر ده في ايه مالك؟
ايمان: لو مصر تعرف، الدبله اللي انت لابسها في ايدك ايه دي ولابسها ليه؟
فارس سكت شويه: بلاش، اطلعي يا ايمان وفرجي ابوكي واخواتك علي شبكتك اطلعي
ايمان: لابسها ليه؟
فارس: اجابتي مش هتعجبك فاطلعي
ايمان: عايزه اسمعها.

فارس: بما انك مصره، دي دبله مراتي ولبستهالي يوم فرحنا، نسينا ننقل الدبل في الفرح ونقلناهم في بيتنا وبعد ما بقت مراتي كانت في حضني واخدنا بالنا ان الدبل لسه في اليمين فنقلناهم واتواعدنا ساعتها انه مهما يحصل ما نقلعهمش ابدا..
دموعها نزلت بصمت وهو شاف دموعها
فارس: قولتلك بلاش
ايمان: طيب انت مش هتقلعها؟
فارس: لا مش هقلعها
ايمان: ودبلتي هتلبسها ازاي؟
فارس اتردد كتير بس في الاخر نطق: مش هلبسها.

ايمان هنا نزلت تجري من عربيته ودخلت بيتهم تعيط وفضلت كتير تعيط وتحاول تسيطر علي نفسها قبل ما تدخل بيتهم..
فارس فضل واقف هو كمان مكانه، متضايق مخنوق بس هيا اختارت ده وهو قلبه مش ملكه، وفي الاخر دور عربيته ومشي وهيا سمعت عربيته فلازم تطلع هيا كمان، دخلت واستأذنت ودخلت اوضتها علي طول
ابوها دخل وراها لانه عارف انها هتعيط
عم سيد: مالك بس يا بنتي، ايه اللي زعلك؟
فضلت تعيط شويه في حضن ابوها وهو ضاممها وساكت.

عم سيد: مش هتقولي مالك؟ ولا عايزه تعيطي بس؟
ايمان: فارس لابس دبله مراته ومش عايز يقلعها ولا عايز يلبس دبلتي
عم سيد: وده اللي عامل فيكي كده؟ يا بنتي الدبله دي شيئ صوري، اهو لابس دبله والسلام حد هيجي يقوله الدبله دي بتاعت مين وعليها اسم مين؟
ايمان: انا عارفه يا بابا، هيكون معايا وقلبه وعقله معاها.

عم سيد: ممكن في الاول بس بشطارتك انتي تخليه بكيانه كله معاكي انتي، خديها تحدي انك هتخليه يقلعها بنفسه ويطلب منك تحطي دبلتك في ايده، ايمان اللي جاي هيكون اصعب من مجرد دبله فلو كل شويه هتعيطي كده وهتبقي بالمنظر ده يبقي بلاها يا بنتي من دلوقتي، لو انتي مش قد الخطوه دي بلاش. ، انتي لسه علي البر سيبيه، بلاها الجوازه دي يا ايمان، انتي مش هتستحملي فارس ولا طباعه ولا تقلباته ولا معارضته عليكي ولا محاربته لحبك لانه هيحارب وخصوصا اول ما يبدأ يحبك هيحارب الحب ده بكل قوته فلو انتي مش هتقدري تقفي قصاده يبقي استسلمي من دلوقتي ووفري علينا كلنا الدراما اللي جايه، وفري الدموع والوجع..

ايمان: انت عندك حق انا مش هقدر احارب ولا هقدر اقف قصاده يا بابا ولا هستحمل حبه لغيري. ، . خلينا نقطع العلاقه دي في الاول، انا هفسخ خطوبتي يا بابا مش هقدر اكمل معاه، بكره هرجعله شبكته تصبح علي خير.

رواية لعنة الماضي للكاتبة الشيماء محمد الفصل التاسع

ايمان الصبح اخدت شبكتها ونزلت ترجعها لفارس وتقوله انها مش هتقدر تكمل معاه..
فارس طول الليل بيبص لدبلته وعاش في ذكريات شهر العسل بتاعه مع حبيبته واتمني بس لو يلمحها حتي من بعيد وفكر كتير يقوم يروح بيتها او يروح في المكان اللي كانت بتسهر فيه، ايمان كمان صعبانه عليه وحاسس انه هيظلمها قوي معاه وبيفكر يتراجع عن خطوبته دي، وشويه ويتراجع..
مجدي كان بره الورشه ولمح ايمان جايه ومعاها كيس وراح قابلها.

مجدي: صباح الخير يا قمر، مبروك علي الشبكه، مش هيا دي برضه الشبكه؟ نازله بيها ليه؟
دموعها اللي في عنيها عرفتو الاجابه
مجدي: اوعي يا ايمان..
ايمان: ليه؟ هو عايش في الماضي
مجدي: خرجي منه، خليه يشوفك انتي، فارس انسان رائع وجدع وطيب وفيه ميزات كتيره قوي حلوه وصدقيني هتعيشي معاه سعيده بس محتاج منك شويه تعب في الاول، محتاجين نستأصل العضو المصاب فيه
ايمان: مش هقدر.

مجدي: هتقدري والله هتقدري، عارفه احنا الخمس سنين اللي فاتو دول فارس معندوش غير هيام وبس علي طول هيا محور كلامه او هزاره او حتي خناقتنا بسببها ديما، الاسبوع اللي فات ده عارفه مين محور كلامنا، انتي، انتي وبس وده في حد ذاته تغير، فارس هو كمان خايف يظلمك وخايف ميعرفش يسعدك وده معناه انه بيحاول فاوعي تتخلي عنه، هو محتاجك جدا حتي لو مقالش ده
ايمان: ايوه محتاجني خدامه في بيته.

مجدي: كل ست خدامه في بيت جوزها بس بتاخد المقابل حب وبيت وامان وراحه
ايمان: اديك قلت اهوه حب، وهو ده المهم.

مجدي: اصبري بس عليه شويه، هيحبك ده اذا مكنش بيحبك اصلا، عارفه زمان كان لازم يقف هنا يشوفك وانتي داخله الدرس او لما يسمع عربيه الايس كريم لازم يبتسم ويقول ايمان زمانها نازله تجري وراها وساعات كان بيطلع يستناكي، ولو كان الزمن غير كده اعتقد انه كان هيكمل معاكي انتي بس النصيب بقي وبعدين كام مره اتخانق علشانك ولا نسيتي؟ لو حد عاكسك كان بياكله
ايمان: علشان بنت حتته.

مجدي: بنات حتتنا كتير عمرك شوفتيه اتخانق علشان حد تاني؟
ايمان: مجدي انت بتقنعني بايه؟ فارس ما بيحبنيش
مجدي: الحب موجود جواه وحب كبير جدا هو بس متوجه غلط، ساعديه يوجه صح، اصبري عليه اصبري..
ايمان: فارس جي ناحيتنا
مجدي: قوليله ان نجاه عايزه تشوف الشبكه بس حامل وتعبانه وعايزاكي تروحيلها
ايمان: لأ هرجعهالو
مجدي: اوعي
فارس: صباح الخير، في حاجه؟
مجدي: لا كنت بصبح بس
فارس بيبص لمجدي
مجدي: ايه انت عايز حاجه مني؟

فارس: اطرق، شوفلك سكه، حلوه عايز حاجه دي؟
مجدي ضحك: يعني علشان لو احتجت حاجه؟
فارس: لا يا سيدي متشكر اتفضل بقي، انجز بقي احنا في الشارع اصلا يعني هيا دقيقتين وطالعه
مجدي: ممكن ما يبقوش دقيقتين، خدها وافطروا بره
فارس: امشي يا بارد من هنا
مجدي مشي بس بيبص لايمان بترجي وبعد ما بعد خالص عنهم
فارس: عامله ايه دلوقتي؟ كويسه؟
ايمان بتردد: اه كويسه الحمد لله
فارس: منزلتيش الشغل النهارده يعني؟

ايمان: النهارده السبت اجازه
فارس: اه سوري ما اخدتش بالي، نازله ليه بدري كده؟
الاتنين بصوا لبعض كتير وهيا متردده تقوله ايه؟ نظره عنيه فيها حاجه هيا مش فاهماها
ايمان: نجاه مرات مجدي اتصلت بيا وطلبت مني انها تشوف الشبكه واصرت ولانها تعبانه من الحمل فقلت انزلها انا
فارس ابتسم: اه كويس، فعلا نجاه لما بتصر محدش بيعرف يقولها لأ...
ضحك ضحكه خفيفه
ايمان: مالك؟

فارس: اول ما شفتك وشفت في ايدك الشبكه تخيلت انك جايه ترجعهالي
ايمان: ولو كنت رجعتها كنت هتعمل ايه؟
فارس: ولا حاجه، انا اصلا مش طايق نفسي فمش هفرض نفسي علي حد، انا عارف اني غبي في حاجات كتير بس مش عارف اعمل ايه في نفسي، زمان كنت عارف ان في حاجات غلط كتير بتحصل وكنت بتجاهلها، كنت عامل زي النعامه اللي بتدفت دماغها في الرمله وبعدين وصلت لمرحله معدش ينفع، المهم لو رجعتيلي شبكتي كان هيبقي شيئ مش كويس.

ايمان: مش هرجعها او علي الاقل مش دلوقتي
فارس ابتسم وبص للسما واخد نفس طويل
فارس: هتخليني فتره تحت التمرين؟
ايمان: حاجه زي كده، او بمعني تاني انا اللي هكون تحت التمرين واشوف هتحمل معاك قد ايه؟
فارس: اتمني انه يكون نفسك طويل
ايمان: يا مسهل يالا همشي انا
مشيت كام خطوه
فارس: ايمان، ( بصتله) مجدي بيته من الناحيه التانيه
ايمان ضحكت ورجعت وراحت لنجاه تخبط عليها ومش عارفه هتقولها ايه؟

فارس دخل الورشه وهناك مجدي راحله
مجدي: راحت عند نجاه؟
فارس: اهه راحت، مجدي
مجدي: ايه؟
فارس: متشكر
مجدي: علي ايه؟
فارس: ما تاخدش في بالك سلام
ايمان نجاه فتحتلها وهيا مكسوفه جدا منها
نجاه: ادخلي ما تتكسفيش مجدي كلمني وحكالي عن اللي حصل تعالي
دخلت وقعدوا يدردشوا كتير مع بعض.

منيره عزمت ايمان وعيلتها كلهم عندها وهناك فرجتهم علي البيت وقالت لايمان تشوف عايزه تغير ايه براحتها هيا بس ابوها استحرم انها تغير اي حاجه لان العفش كله جديد وشكله حلو جدا
منيره حاولت مع ايمان بس رأيها زي ابوها، منيره وقت الغدا اتصلت بفارس يجي بقي وزعقتله علي تأخيره وهو عارف ان خطيبته واهلها موجودين...
فارس دخل بيته وسلم علي الكل من بعيد لانه بلبس الشغل واستأذن يغير هدومه الاول..

وهو داخل اتخبط في ايمان خارجه من جوه ووقفوا مع بعض في الطرقه
ايمان: جيت امتي؟
فارس: لسه جاي
ايمان: طيب وهربان علي جوه ليه؟
فارس: مش هربان هغير بس هدوم الشغل دي والبس حاجه تليق بخطيبتي
ضحكت: بتعرف تجامل اهو
فارس: والله ما مجامله، انا فعلا هغير علشان اعرف اقعد معاكم
ايمان: اممم، علي فكره شقتك حلوه
فارس: عجبتك يعني؟
ايمان: اه عجبتني، مامتك بتقولي اغير فيها
فارس: وناويه تغيري ايه؟

ايمان: ولا حاجه، مفيش حاجه عايزه اغيرها، الشقه كلها حلوه، فرجتني عليها كلها ماعدا الاوضه دي
شاورت علي اوضه وهو ابتسم
فارس: دي اوضه نومي انا، تعالي هفرجك عليها
مسكها من ايدها واخدها اوضته فتحها ودخلها تتفرج عليها براحتها، كانت مرتبه جدا ونظيفه
ايمان عجبتها بس اتضايقت مره واحده لان دي اوضه نومه اللي كانت مراته الاولي بتشاركه فيها...
فارس: ايه؟ ساكته؟
ايمان: هو انت منظم بطبعك ولا والدتك اللي مرتباها؟

فارس: لا انا بحب النظام، والدتي ما بتدخلش اوضتي
ايمان: اممم، ايه الباب ده؟
فارس: بابا الحمام
ايمان: اه، ممكن؟
فارس: اه اتفضلي شوفيه براحتك
ايمان دخلت واتفرجت علي حاجته الخاصه وهو واقف مراقبها علي الباب
ايمان: اول مره اشوف هنا في منطقتنا اوضه بحمام خاص
فارس: فعلا، انا عدلتها هيا مكنش فيها حمام، ضميته تبع الاوضه من فتره
ايمان: اشمعني يعني؟
فارس: عادي.

ايمان: هو انت ليه غامض كل اجاباتك مبهمه ما بتديش اجابه صريحه ابدا
فارس: يمكن لان الصراحه بتضايق؟
ايمان بنرفزه: ايه اللي هيضايق في انك ضميت حمام لاوضه النوم؟ ايه اللي ممكن يضايق؟ بس انت بتحب الغموض
فارس: اوك مش هبقي غامض، هيام طلبت مني اضم الحمام علشان يبقي خاص بينا، علشان لما نستعمله انا وهيا مع بعض منحرجش والدتي، ارتحتي كده؟
ايمان بصتله بغيظ وسابته وطالعه بره
فارس: لا تسألوا عن اشياء ان تبد لكم تسؤكم.

خرجت بره وقعدت مع عيلتها وهو شويه وخرج قعد معاهم، كانت بتتفادي ان عنيها تيجي في عنيه
منيره: ايمان عجبتها الشقه ومش عايزه تغير فيها
فارس: اه ماهي قالتلي والله هيا براحتها
منيره: ربنا يسعدكم
ايمان: معلش يا امي، في حاجه واحده بس حابه اغيرها ده لو معندكمش مانع؟
فارس بصلها بتركيز من غير ما ينطق
منيره: شاوري يا قلبي
ايمان: تسلمي يا ست الكل، اوضه النوم هيا اللي عايزه اغيرها.

فارس بصلها من غير اي رد فعل ومعلقش ولا اعترض
منيره: من غير ما تقولي يا حبيبتي دي كده كده هتتغير، شوفي اتفقي انتي وفارس وانزلي نقي حاجه علي ذوقك انتي ولا ايه يا فارس؟
فارس: طبعا، شوفي انتي فاضيه امتي وننزل
ايمان: بكره الظهر بعد الشغل؟
فارس: اوكي بكره...
اخدها فارس تاني يوم وخرجوا الاتنين مع بعض وساكتين طول الطريق لحد ما وصلوا ونزلوا وبيتمشوا يتفرجوا، من محل لمحل وهيا مش عاجبها حاجه.

فارس: وبعدين معاكي؟ ايه؟
ايمان: ايه المكان ده؟ مش عاجبني حاجه وبعدين الاسعار غريبه قوي...
فارس: غريبه ازاي؟
ايمان: غاليه بطريقه مبالغ فيها، وديني مكان معقول، وبعدين هو انت مستعد تدفع 30 او 40 الف في اوضه نوم؟
فارس: اللي مش عجباكي في البيت سعرها كده
ايمان: بقولك ايه ودينا اماكن عاديه، زي عبد الرحيم عمرو ولا المناصره ولا الاماكن دي ولا اي مكان من المتعارف عليه، مش عايزه انا الاماكن الهاي دي.

فارس: غريبه انتي
ايمان: الحاجات مفيهاش حياه، تحس ان فيهم كآبه او ناس ميتلهم حد، انا بحب البهجه والفرحه في المكان
فارس: ما داهيه لتنقي اوضه بيضا؟
ايمان: وليه لأ؟
اخدته وراحو المناصره وهناك كان في حاجات كتيره عجباها وفي الاخر اشترت اوضه فاتحه عجبتها جدا وفارس جابهالها
بدؤا تجهيزات الفرح وفارس فضي كل حاجته من الاوضه علشان يحطوا الاوضه الجديده ورفض اي مساعده من امه او اخته في نقل حاجته..

حط حاجته في اوضه فرح لحد ما يحطوا الجديده.

اخر الليل لوحده طلع صندوق صغير وده كان السبب اللي خلاه يرفض مساعده حد، فتحو وعاش مع ذكرياته فيه، كان فيه قميص نوم ناعم عسلي مسكه وشمه واكتشف قد ايه ريحتها واحشاه، ملمسها، حضنها، كان بينسي الدنيا واللي فيها بمجرد ما يكون في حضنها، كان بينسي تعب اليوم كله بابتسامه منها، كان فيه قزازه برفانها الخاص، كان فيه صورهم الخاصه، صور مليانه حب، صور مجنونه محدش شافها قبل كده لدرجه انه اشتري طابعه علشان يطبعهم هو بنفسه لان ما ينفعش حد يشوفهم..

ذكريات كتيره في الصندوق ده والمشكله انه مش عايز يتخلص منه او ينساها، ذكريات نفسه يعيشها من تاني ويمكن يكون محتفظ بالصندوق ده يمكن يفتحوه وهما مع بعض تاني...

خلاص خلص كل حاجه وكل التجهيزات تمت وايمان نقلت حاجتها في بيت فارس وجهزوا الشقه كلها وفارس نقل حاجته اوضته ونظمها بطريقته، ايمان عدلت كتير في الشقه بحيث يبقي طبعها هيا الغالب، وفي حاجات كتيره شالتها واستغنت عنها، خزنتها في اوضه صغيره معموله زي مخزن كده
هدي عدت علي فارس في الورشه
هدي: ازيك يا فارس اخبارك ايه؟
فارس: ازيك يا دودو انا الحمد لله مطحون المهم انتي ايه اخبارك؟ الزياره دي بريئه ولا؟

هدي: لا بريئه اينعم مش قوي بس بريئه
فارس: تعالي اتفضلي، ولا يا حسن حاجه ساقعه بسرعه
هدي: لا ملوش لازمه انا ماشيه علي طول
فارس: خير قولي
هدي: خير، انا مش عارفه اقولها ازاي اصلا
فارس: قولي علي طول، قلقتيني في حاجه حصلت؟
هدي: لا لا ما تقلقش دي حاجه ملهاش علاقه بحاجه
فارس: فزوره دي ولا ايه؟ حاجه ملهاش علاقه بحاجه
هدي ضحكت: لا، طيب شوف يا سيدي، اوضه نومك
فارس: مالها؟
هدي: هتعمل فيها ايه؟

فارس باستغراب: هعمل فيها ايه؟ هنام فيها هعمل فيها ايه يعني؟
هدي ضحكت: يا واد مش الجديده، اقصد القديمه..
فارس: اه اه سوري، مش عارف لسه هخلص منها عامله دربكه اصلا في المدخل هشوفلها اي حد ياخدها
هدي: طيب واللي يخلصك منها؟
فارس: ياريت تبقي عملتي فيا معروف عندك حد عايزها؟
هدي: اه عندي، هتبيعها بكام؟
فارس: ابيعها؟ مش هبيعها اصلا، انا هشوف خد ياخدها وخلاص مين اللي في دماغك؟

هدي: لا ماهو انت لازم تقولي هتبيعها بكام الاول
فارس: يا بنتي مش هبيعها، هو بالعافيه؟
هدي: لا يبقي خلاص مش عايزاها
فارس: انتي اللي كنتي عايزاها يعني؟ بس دي قديمه يا هدي بقالها يجي تلات سنين اهو
هدي: انت عارف دي سعرها كام؟
فارس: مش انا اللي مشتريها؟ عارف طبعا، اصلا العفش ده خلاني علي الحديده فتره طويله المهم عايزاها مبروك عليكي
هدي: لا ماهو الاول لازم تاخد تمنها
فارس: بقولك ايه هيا مش ناقصه، هديه مني ليكي.

هدي: لا مش هاخدها غير لما تقولي تمنها، غير كده لأ سلام انا ماشيه
مشيت وهو طلع وراها ينادي عليها بس ما وقفتش
مجدي طلع علي صوته: خير في حاجه؟
فارس: لا خير ما تقلقش، بقولك عايز عربيه تنقل اوضه نوم
مجدي: عربيه الواد صبحي تلاقيه قاعد علي القهوه هناك لو موجود
فارس: طيب انا رايح ساعه كده وجاي سلام
مجدي: في حاجه يعني؟ اجي معاك؟
فارس: لا لا واد يا حسن تعال انت وعلي عايزكم في حاجه كده.

اخدهم وراح واخد عربيه وحمل اوضه النوم وطلع بيها علي بيت هدي ملقهاش فنزلهالها في مدخل البيت بتاعها ومشي راح علي بيت خطيبته
خبط وفتحتله حماته رحبت بيه جامد ودخل
فارس: هيا هدي هنا؟
ام هدي باستغراب: اه هنا
فارس: طيب ينفع تناديها
ام هدي: طيب ادخل اقعد انت مش غريب ما ينفعش تقف علي الباب كده
فارس: لا معلش اولا انا بهدوم الشغل وثانيا مستعجل
ام هدي: شغل شغل ادخل يالا ( نادت) ايمان، يا ايمان خطيبك هنا.

طلعت ايمان تجري وشافته وفرحت بيه جدا كان شعرها مفكوك ولاحظ انه طويل وناعم
ايمان: ازيك ادخل
فارس: مستعجل وعايز اختك
ايمان: اه يعني مش جاي تشوفني؟ انا قلت معقوله اكون وحشتك وجيت تشوفني بسرعه؟
فارس: انا مطحون في الشغل وفي الشقه وفي الورشه ومعنديش وقت مش اكتر
ايمان: ماشي المهم ادخل بقي عقبال ما هدي تطلع
فارس: تطلع؟ تطلع منين؟
ايمان اتحرجت: من الحمام.

فارس ابتسم: المهم انتي اخبارك ايه؟ في حاجه نقصاكي او حاجه نفسك فيها
كان نفسها تقوله ان هو اللي ناقصها ونفسها فيه هو وبس ومش عايزه حاجه تانيه
فارس: ههههييي روحت فين؟ مش بكلمك؟
ايمان: سوري، لا مفيش حاجه ناقصه تقريبا كده كل حاجه جاهزه، فاضل الفستان وهننزل بكره نجيبه مع فرح وهدي
فارس: طيب كويس
ايمان: ليك تحفظات علي الفستان او حاجه معينه؟
فارس: لا اللي يريحك هاتيه دي ليلتك انتي
ايمان: ليلتنا مش ليلتي.

فارس: لا ليلتك انتي، هاتي اللي يعجبك
ايمان: جبت بدلتك؟
فارس: لا لسه! ما تشغليش بالك
ايمان: تحب اجيبهالك انا علي ذوقي؟
فارس: لأ، انا هجيبها
ايمان بصتلو وكأنها بتقوله افتحلي باب قلبك شويه بس نجدته هدي بخروجها
هدي: ايه يا فارس؟
فارس: الاوضه في مدخل بيتكم وقت ما تفضي اوضتك كلميني هبعتلك العيال ينزلوها ويطلعولك دي وهبعتلك النجار ينصبها اوك؟
هدي: هتاخد كام تمنها؟

فارس: ييييه ده انتي بارده، قولي حاجه لاختك يا ايمان؟
ايمان: بتتكلموا عن ايه الاول واوضه ايه؟
فارس: اوضه النوم القديمه عايزها وانا بقولها خديها وهيا مصره تديني تمنها مع اني قسما بالله كنت هشوف اي حد ياخدها كده فانتي اولي، قولي لاختك حاجه، سلام انا نازل ورايا شغل..
سابهم ونازل بس امهم طلعت مسكت فيه جامد
ام هدي: اتغدي الاول انا بغرف اهو، قسما بالله ما تنزل كده
فارس: يا ست الكل اسمعيني بس.

ام هدي: مش هسمع، تيجي وتقف علي الباب وانا احط الاكل وانت تنزل؟ اصلا احنا كنا هنتغدي وابو ايمان طالع اهو من الجامع والغدا جاهز، كل لقمه وانزل
جه عم سيد وهما بيشدوا فيه علي الباب
عم سيد: ما تدخل يا واد انت، حتي مش معروف عنك بالبخل لا انت ولا ابوك الله يرحمه
فارس: مش حكايه بخل
عم سيد: لا ماهو لما الاكل يتحط قدامك وتنزل كده يبقي بخل او مش عايز الامور تبقي عاديه بينا.

فارس: لا بس ورايا شغل وسايب الورشه من بدري
عم سيد: طيب براحتك بس قسما بالله ما حد فينا يدخل بيتك يدوق حتي كوبايه ميه، ايه رأيك؟
فارس: يا عمي مش كده
عم سيد: لا هو كده
فارس دخل: طيب هروح اغير هدومي وارجع
عم سيد: قسما بالله ما يحصل ادخل يا راجل بقي انت عامل فيها غريب ليه؟ ادخل
فارس دخل بس من جواه متضايق لانه ما بيحبش حد يحلف عليه او يفرض عليه وضع مش عايزو
حطوا الاكل بسرعه وقعدوا يتغدوا.

ام هدي: ايه رأيك في المحشي يا فارس؟
فارس: تسلم ايدك يا ست الكل
ام هدي: لا مش ايدي انا ايمان اللي عملاه، شكل قلبها كان حاسس انك هتيجي فعملته
فارس ابتسم لايمان: تسلم ايدك
ايمان: بالهنا
اكل وقعد شويه مع عم سيد ونزل يجري من عندهم وحس بالحريه اول ما خرج بره البيت واكتشف انه مش عايز مكان يجمعه مع ايمان؟ واكتشف ان مشكلته فوق كان تواجده معاها في مكان واحد، مش لبسه ولا شغله لأ هو مكنش عايز يبقي معاها!

جه معاد الفرح ويوم الفرح بدري فارس نزل الورشه
مجدي: ده ايه ده ان شاءالله؟ انت جاي ليه؟
فارس متنرفز: انا حر
مجدي: يعني ايه انت حر، النهارده فرحك يا ابني..
فارس ماردش عليه ودخل فتح عربيه وبدأ يشتغل فيها
مجدي: انت مش طبيعي بقي، ده انا ساعتين وكنت هقفل واروح
فارس: روح من دلوقتي لو عايز
مجدي: فارس، فارس سيب اللي في ايدك ورد عليا
فارس: عايز ايه يا مجدي
مجدي: بتعمل ايه هنا؟

فارس: بشغل نفسي وبشغل عقلي لاني لو فضلت في البيت هلغي ام الفرح ده فهمت؟ مش عايز افكر، وده الشيئ الوحيد اللي بيشغلني، الخطوه دي انتو شايفين انها صح جدا لكن انا شايفها غلط، شايف جريمه برتكبها في حق انسانه ما تستاهلش ده، انا ما بحبش ايمان ومش هحبها انا بس هتجوزها وهعيشها في جحيم معايا وهخليها تندم علي قرارها ده في اليوم الف مره، وعايز اتراجع بس كل ما اشوف امي وفرحتها وصحتها اللي اتحسنت احس اني متكتف ومتربط، فانا هربت علي هنا، ، لان قدامي حاجه من الاتنين يا اما الغي عقلي النهارده تماما يا اما هفكر وهلغي الفرح وساعتها هبات الليله دي في المستشفي بامي لانها هتقع من طولها لو عملت ده، فارجوك سيبني بقي في حالي ممكن؟

مجدي ملقيش كلام يقولو
مجدي: مش يمكن تحبها يا فارس
فارس حدف اللي في ايده علي اخر دراعه
فارس: احب ازاي وانا اصلا بحب يا مجدي؟ انت ممكن تحب علي مراتك!؟ لأ مش ممكن يبقي اسكت بقي الله لا يسيئك، اسكت
مجدي سابه بس فضل معاه في الورشه بيشتغلو بصمت وقافلين الباب عليهم علشان محدش كل شويه يسأل فارس هو هنا ليه؟
اخر النهار
مجدي: علي فكره انت كده يدوب تلحق تجهز علشان كتب الكتاب بعد صلاه المغرب
فارس وقف: يالا بينا.

مجدي: هروح اخد دش والبس بسرعه واجيلك
فارس: تمام
روحوا كل واحد لبيته وفارس اول ما دخل البيت امه جريت عليه
منيره: اخص عليك بجد اخص عليك، النهار كله تسيبني كده؟ سايبلي موبيلك هنا وانا لاعارفه روحت فين ولا عارفه عنك حاجه
فارس: معلش اعذريني بعد اذنك
منيره: علي فكره انا عارفه انك بتتجوزها علشاني انا وعارفه انك ما بتحبهاش
فارس: وبعدين؟
منيره: اديها فرصه يا فارس، ما تحطش اسوار عاليه بينكم، اديها فرصه.

فارس: حاضر يا امي حاضر
دخل فارس اوضه نومه اللي اول مره يدخلها بعد ما اتقفلت وايمان فرشتها واتفاجئ باوضه مليانه فرحه، اوضه كلها زاهيه، ستايرها، مفرشها، كل حاجه فيها، اوضه عكس كل حاجه جواه، جواه سواد رهيب
تجاهل كل ده ودخل الحمام اللي زي كل حاجه في الاوضه
خرج بره الاوضه خالص
منيره: في ايه مغيرتش ليه؟
فارس: الاوضه صعبه قوي..
منيره بزعل: مش عجباك ولا ايه؟

فارس: لا. لا مش القصد بس دي لو كحيت فيها هتتبهدل، بالشحم ده هبهدلها الاوضه والحمام
منيره: طيب استعمل الحمام التاني بس انجز
فارس: حاضر يا امي حاضر
دخل فارس واتمني لو يختفي او اي حاجه تحصل وما يروحش الفرح ده
خرج ولبس هدومه ومجدي جاله واخده وراحو الجامع علشان كتب الكتاب، كان قاعد تايه عايش في ذكريات كتب كتابه الاولاني بحذافيره لدرجه ان لما المأذون طلب منه يتكلم ما سمعوش كان سرحان تماما.

مجدي خبطه جامد علشان يفوقه
فارس: وانا قبلت الزواج بابنتك...
كملوا كتب الكتاب وراح يجيب عروسته من الكوافير
كان مجدي سايق العربيه وفارس قاعد جنبه
مجدي: ما تفوق كده؟ ده شكل عريس بالذمه؟
فارس: هاين عليا اسيب الدنيا دي كلها واروح اي مكان محدش يعرفني فيه!
مجدي: طيب خليك عاقل وبلاش فضايح البنت ما تستاهلش منك ده لا هيا ولا عيلتها.

فارس: عارف وعلشان كده مكمل، انا مش عارف اصلا انا هتعامل معاها ازاي؟ ولا هتقبلها في بيتي ازاي؟
مجدي: مجرد ما تاخدها في حضنك هتنسي اسمك
فارس بنرفزه: والنبي تنقطني بسكاتك
وصلوا الكوافير وفارس دخل وهناك كانت هدي وفرح اللي جريت علي اخوها وحضنته جامد وباركتله
فرح: عروستك زي القمر روح هاتها يالا.

راح فارس ناحيتها ووقفت قصاده ووشها متغطي وباصه للارض. رفع الغطا اللي علي وشها وهيا بصتله بس ماشفتش فرحه في عنيه، ما شفتش غير وجع وبس وده وجعها هيا كمان
فرح: بوسها يالا
باسها في دماغها واخدها وخرج وركبوا العربيه في صمت بيحاول مجدي يقطعه كل شويه لحد ما وصلوا القاعه ودخلوا واتزفوا وقعدوا في كوشتهم
ايمان كانت ساكته زي فارس.

فارس: ايمان الليله دي بتاعتك مخصوصه كلها ليكي فعيشها بقي، هيصي واضحكي وارقصي مع صحباتك عيشيها لانها بتبقي مره واحده في العمر
ايمان: وانت خلاص سبق وعيشتها صح؟
فارس: للاسف صح، مالكيش دعوه بيا انا وعيشيها انتي بالطول بالعرض المهم تفرحي
ايمان: وازاي افرح وانت قاعد غصب عنك جنبي، فرحه العروسه بتبقي بعريسها مش بالفرح نفسه
فارس: وانا هبقي فرحان لما اشوفك انتي فرحانه.

ايمان اصحابها شدوها وقامت معاهم، فضلت الليله كلها مع صحباتها واخواتها وفارس شويه مع اخته وشويه مع امه وشويه مع اصحابه واخيرا خلص الفرح وفارس اخد عروسته علي البيت وطلعوا كلهم مع بعض يوصلوهم
منيره: ربنا يسعدك يا حبيبي، ويهدي سركم يا رب، خلي بالك منها يا حبيبي
فارس: انتي رايحه فين؟
منيره: رايحه عند فرح
فارس: انتي مش هتطلعي من بيتك فاهمه ولا لأ؟

منيره: بقولك ايه انتو عرسان، وما ينفعش اصلا حد يبقي معاكم خليكو براحتكم حتي يومين
فارس: امي
منيره قاطعته: بقولك ايه ما تتعبش نفسك انا رايحه مع فرح انا مش هقعد مع اتنين عرسان ليله فرحهم يالا ادخل لعروستك
هدي مع ايمان في اوضتها
هدي: ربنا يسعدك يا رب
ايمان: اعمل معاه ايه يا هدي حساه مش مبسوط.

هدي: اول ما يجي وياخدك في حضنه هينسي الدنيا واللي فيها وانتي خليكي حنينه متفهمه وهو مع الوقت هينسي الماضي ويعيش في الحاضر، خليه يحس بحبك ليه وبعدين مفيش رجاله بتقاوم الستات فمابالك واحده بجمالك انتي ده ما هيصدق احنا نمشي وهتشوفي وتقولي هدي قالت
ايمان: ربنا يسترها
الكل مشي واتقفل الباب عليهم هما الاتنين وصمت سيطر علي البيت كله، وحاله ترقب من الاتنين.

فارس فضل مكانه في الصاله قاعد علي الكنبه مش عارف يعمل ايه؟ وايمان في اوضه النوم علي السرير مستنيه فارس يدخل عندها...
وطال الانتظار كتير قوي لافارس بيدخل ولا ايمان بتخرج لحد ما زهقت وقررت تخرجله بره
ايمان: فارس
فارس رفع دماغه وبصلها كتير بس ما نطقش ابدا، كان جمالها برئ وهادي كانت حلم لاي راجل ولكل راجل
ايمان: انت مش هتدخل؟
فارس:.

رواية لعنة الماضي للكاتبة الشيماء محمد الفصل العاشر

ايمان: فارس مش هتدخل؟
فارس: ادخلي انتي غيري هدومك وارتاحي
ايمان: وانت؟
فارس: ما تشغليش بالك بيا ادخلي انتي
كانت هتدخل بس افتكرت هدي وهيا بتقولها خليكي حنينه ومتفهمه وافتكرت ابوها وهو بيقولها ازرعي الحب في بيتك واكيد هتحصديه
قربت منه وقعدت جنبه، كان حاطط راسه بين ايديه
مدت ايدها حطتها علي كتفه فسحب نفسه بسرعه وهيا اتفاجئت انه مش عايزها حتي تلمسه
ايمان: مالك؟

فارس: ماليش ممكن اذا سمحتي تدخلي اوضتك وتسيبيني لوحدي، اذا سمحتي
ايمان: حاضر هسيبك بس انت مش هتيجي يعني؟
فارس: هاجي غيري وهدومك وخدي راحتك وانا هبقي اجي روحي
سابته ودخلت غيرت وقاومت ان دموعها ما تنزلش هيا كانت عارفه انه مش بيحبها وهو قالهالها كذا مره بس ما تخيلتش انه حتي مش هيلمسها، كده مهمتها بقت صعبه قوي ده اذا ما كانتش مستحيله!
غيرت وفضلت كتير قوي قاعده مستنياه بس ماجاش فرقدت يمكن تنام...

فارس بره دماغه هتنفجر بس مش قادر، مش قادر يدخلها، مش قادر يستوعب انه اتجوز اصلا، افتكر ليله فرحه بهيام كان هيتجنن عليها، كان هيموت علي اللحظه اللي تجمعهم، افتكر ليلتهم بكل تفاصيلها بكل الحب اللي كان فيها، افتكرها في حضنه ومش عايزه تنام ومش عيزاه ينام وكل ما يغمض عنيه تبوس فيه لحد ما يفتحهم تاني، كانت ليله حب بجد، ازاي مطلوب منه دلوقتي يدخل لواحده تانيه ويديها حقوقها وهو مش متقبل اصلا مجرد الكلام معاها فازاي هينام معاها! هو مش من نوعيه الرجاله اللي ممكن ينام مع اي واحده هو الموضوع عنده مرتبط بالحب والحب كان لهيام وبس، كانت هيا هيامه وعشقه...

النهار نور وهو مكانه فدخل اوضته براحه بحيث لو نامت ما يصحيهاش
ايمان حست بيه بس ما اتحركتش وخلته يفتكر انها نايمه...
دخل الحمام وغير هدومه وطلع ونام علي طرف السرير وعطاها ظهره ونام وهيا كمان نامت...
صحي الظهر علي خبط علي الباب بص حواليه كانت ايمان نايمه جنبه وشعرها مغطي وشها بتلقائيه مد ايده شاله بعيد عن وشها، وهيا ابتسمت ويدوب هتفتح عنيها كان قام بعيد خالص.

ايمان: صباح الخير هو الباب بيخبط ولا انا بيتهيألي؟
فارس: صباح النور، بيخبط فعلا انا هشوف مين؟
سابها وخرج فتح كانت مامت ايمان جايبه غدي ليهم
سلمت ودخلته المطبخ واستأذنت تدخل لبنتها فخبطت عليها ودخلتلها
ام هدي: اخباركم ايه؟ طمنيني
ايمان: تمام كويسين
ام هدي: عملتو ايه؟
ايمان: معملناش يا ماما انا كنت تعبانه ونمت ويدوب اهو صحيت
ام هدي: نعم يا اختي نمتي؟ وهو سابك تنامي؟
ايمان: اه امال كنتي عيزاه يعمل ايه؟

ام هدي: انا اللي هقولك يعمل ايه؟ بقولك ايه احنا ناس صعايده ما احناش مصراويه ومعنداش الكلام ده، خالاتك وعماتك في البيت عندي اقولهم ايه؟ كانت نايمه الهانم!
ايمان: ربنا يسهل يا ماما
سابتها وخرجت وكان فارس في الصاله واول ما شاف حماته وقف
ام هدي: بقولك يا حبيبي انت ما تخليش البت دي تتدلع عليك فاهم؟ يالا اسيبكم بقي.

فارس ابتسم وما ردش وقفل وراها الباب، هو كان فاهم هيا قصدها علي ايه؟ بس مش مستعد لده دلوقتي محتاج لوقت الاول يستوعب فيه خطوته دي
الجو كان متوتر بينه وبين ايمان اللي حاولت تلطف الجو بس معرفتش، جهزت الغدا واتغدوا وكل واحد قعد في مكان، اخر النهار امه واخته جم يزوره وقعدوا معاهم شويه ومشيوا وسابوهم تاني لوحدهم..
الملل كان هيقتلهم والصمت هيجننهم والاتنين مش لاقيين ولا كلام ولا فعل...

تاني يوم اختها هدي زارتها وفضلت تهزر وتضحك كتير وقبل ما تمشي قالت لاختها انها تحاول تقرب منه..
ايمان: انا مش عارفه اعمله ايه؟ اروح اقوله تعال نام معايا والنبي؟
هدي: فهميه انك موافقه، يمكن يكون مستنيكي انتي تاخدي خطوه..
ايمان: ايوه يعني اعمل ايه؟
هدي: البسي مثلا قميص نوم واطلعي اقعدي معاه ما تفضليش كده لوحدك وسيباه لوحده هو كمان
ايمان: ربك يسهل.

مشيت هدي وسابتهم وايمان دخلت اوضتها تاني ولما زهقت قررت انها تعمل زي ما اختها قالت فلبست قميص نوم وطلعت وقعدت جنب فارس
فارس: ده معناه ايه؟ عايزه ايه يا ايمان؟
ايمان: ااا مش عايزه انا بس زهقت من القعده لوحدي مش اكتر
فارس: وقميص النوم برضه زهق؟
ايمان اتحرجت وقامت تجري بس مسكها وقفها ووقف قصادها.

فارس: انا فاهم يا ايمان بس انا محتاج لوقت مش اكتر ممكن؟ ممكن تديلي الوقت ده؟ وانا لما اكون مستعد انا هجيلك بنفسي
ايمان سحبت ايدها: براحتك بعد اذنك
دخلت اوضتها وعيطت، عمرها ابدا ما تخيلت ان ده هيكون نصيبها وان اجمل ايام عمرها هتعيشهم كده، مع راجل محتاج وقت علشان يتقبلها..
تلات ايام عدوا وكل واحد في حاله وايمان بطلت حتي الكلام مع فارس
في بيت ايمان هدي كانت موجوده.

ام هدي: مكلمتيش اختك واطمنتي عليها يا هدي
هدي: بكلمها يا ماما هيا كويسه
ام هدي: يعني هيا وجوزها خلاص؟ بقت مراته يعني اخد خالاتك وعماتك واروح ولا ايه؟
هدي: ما تسيبيها في حالها وبلاش بقي حوارات الخالات والعمات ده، هو الجهل ده هتبطلوه امتي؟
ام هدي: جهل ولا مش جهل مش احنا اللي هنبطل الجهل الاول اما الناس كلها تبطله نبقي احنا كمان نبطله المهم اختك ايه نظامها خلاص ولا ايه؟

هدي: لا يا ماما مش خلاص، سيبيها بقي في حالها
ام هدي: طيب لو في حاجه نروح لدكتوره يا بت
هدي: مفيش حاجه يا ماما وسيبيها في حالها والامور لما تتظبط انا هبقي اقولك
الام شكت لجوزها اللي حصل وان اخواته بيقولولها عايزين يزورا ايمان وهيا معارضه لانه ما ينفعش يزوروها وهيا لسه بنت ومش عارفه تعمل ايه؟
الاب راح يزور بنته وقعد معاها شويه وقبل ما يمشي اتكلم هو وفارس.

عم سيد: بص يا فارس يا ابني طبعا حياتك الخاصه انت حر فيها بس انت ما ترضلناش الرغي الكتير والقيل والقال
فارس: مش فاهم حضرتك تقصد ايه؟
عم سيد: اقصد ان عمات البنات وخالاتها عايزين يجوا يزورها
فارس: طيب ما يجوا اهلا وسهلا بيهم
عم سيد: ايوه ماهو انت بعيد عن العادات والتقاليد وجوازتك الاولانيه مكنش فيها الكلام ده فعلشان كده مش فاهم سيادتك
فارس: افهم ايه؟

عم سيد: تفهم انهم علشان يزوروها لازم الاول تبقي مراتك مش بنت بنوت ولا انت نسيت عاداتنا وتقاليدنا
فارس: مش هقولك غير اهلا وسهلا بيهم يا عمي في اي وقت وبعدين انا مرضالكش ابدا القيل والقال ما تقلقش يا عمي
عم سيد: انا اسف اني بتدخل بس امها بتشتكيلي انهم بيزنوا عليها يجوا وهيا مش عارفه تقولهم ايه فاعذرني معلش
فارس: لا يا عمي وحماتي قولها اللي عايز يجي يا اهلا وسهلا بيه في اي وقت.

فارس بعد ما عم سيد مشي كان متغاظ جدا واكتر حد متغاظ منه هو ايمان لان هيا اللي اشتكتلهم وهيا اللي دخلتهم حياته الخاصه، اتجوز سنتين هيام وبالرغم من كل عيوبها الا ان عمر ابدا ما حد اتدخل في علاقتهم الخاصه ابدا وعمر ما حد قاله اعمل او ما تعملش، فضل رايح جاي كتير مش عارف يعمل ايه؟ وفي نفس الوقت الراجل طلبها منه صريحه...
اخيرا دخل اوضه نومه كانت ايمان قاعده علي السرير وماسكه موبيلها بتقلب فيه..

دخل وقف قصادها
ايمان: في حاجه؟ انت محتاج حاجه؟

فارس ماردش عليها بس قرب منها ومسك تليفونها ورماه بعيد عنها ومن غير مقدمات باسها، ايمان اتفاجئت بيه مكنتش عارفه حتي تتنفس بين ايديه، مكنتس مستعده او ما تخيلتش انه هيدخل كده من غير اي مقدمات، بس في نفس الوقت فرحانه وهيا في حضنه، فارس حاول يعاقبها علي كلامها مع اهلها بس معرفش يكون عنيف معاها، واتفاجئ ان الموضوع مش سيئ للدرجه اللي كان متخيلها، واتفاجئ انه اندمج معاها وهيا اتعلقت في رقبته مش بتسمحله يبعد عنها.

مره واحده قام وقف وزقها بعيد عنه
ايمان: قمت ليه؟
فارس: علشان خلاص عملت المطلوب مني، بلغي مامتك انك ماعدتيش بنت وان خالاتك وعماتك اهلا بيهم، اعتقد كده اديت وظيفتي؟ بعد اذنك.

ايمان فضلت كتير مكانها مش مصدقه اللي هو قاله، معقوله نومه معاها كان مجرد وظيفه! للدرجه دي هيا رخيصه قوي كده ومعندهاش كرامه ابدا، عمرها ما حست باحساس الاهانه ده قبل كده؟ عمرها ما حست بالذل ده قبل كده! بقي معقوله هيا بتحب البني ادم ده؟ ده ما يتحبش ابدا، وعلي رأيه هو يلعن ابو الحب اللي يذل صاحبه كده...

عيطت عياط من قلبها وهو كان سامعها وهو بره بس كان متغاظ من كل حاجه حواليه، متغاظ حتي من نفسه، مش بايده حاجه وصوت عياطها هيجننه.

وبعدين في نقطه مهمه قوي لاحظها، ايمان كانت لوح ابيض معندهاش اي خبره نهائي في الموضوع ده وده ضايقه بس يا تري ليه ضايقه؟ هل لانه ما استمتعش معاها قوي زي هيام؟ ولا لان هيام من اول يوم حس انها كانت عارفه هيا بتعمل ايه وازاي تمتعه؟ هل ده معناه انه مكنش اول راجل في حياه هيام؟ لا لا ازاي بتفكر كده يا فارس؟ انت كنت اول راجل في حياه هيام وهيا كانت مخلصه ليك؟ بقي جاي دلوقتي تشك فيها؟ معقوله حته عيله زي ايمان هتخليك تشك في حبيبتك؟ لا ايمان بس عيله وعلشان كده مش عارفه اي حاجه؟ لكن هيام كانت كبيره لما اتجوزها كانت في سنه وبعدين هيا متفتحه وبس؟ انت اول راجل؟ التفكير والشك هيقتله وهيجننه مع صوت عياطها وجرحه ليها بالشكل ده.

اخيرا قرر ينزل فدخل عندها غير هدومه ولبس هدوم الشغل وهو نازل راح جنبها ومن غير كلام طلع فلوس وحطها علي الكوميدينو جنبها
فارس: مصروف البيت معاكي اهو لو احتجتي حاجه هاتيها ولو خلصوا قوليلي
ايمان: مش عايزه حاجه منك
فارس: ده مصروف بيتي، مش ليكي انتي..
ايمان: ده كتير
فارس: متهيألك اصرفي منه ولو فضل فيه باقي حلال عليكي
ايمان: انا مش عايزه منك حاجه
فارس: خلاص سوري لو فضل حاجه ولعي فيها بعد اذنك...

خرج وسابلها البيت ورزع الباب وراه، نزل علي شغله وهناك مجدي اول ما شافه مرضيش يسأله وسابه براحته يتكلم او لأ، بالليل رجع بيته كانت ايمان نايمه او عامله نفسها نايمه، غير هدومه وراح علي السرير واول ما لمسها بعدت عنه
فارس: اوكي انا اسف خلاص...
ايمان:
فارس: اتكلمي، قولي اي حاجه؟
ايمان:
فارس: طيب انتي تعبانه ولا حاجه؟
ايمان:
فارس: طيب انا كنت عنيف؟ وجعتك؟ اذيتك؟ لو عايزه تروحي لدكتوره ولا حاجه قولي
ايمان:.

فارس بنرفزه: ردي علي امي
ايمان اتعدلت وبصتله: لا مش عايزه اروح لدكاتره واه انت اذيتني ووجعتني وعملت كل حاجه ممكن تتخيلها، كده رديت علي امك؟
فارس: انتي السبب اعملك ايه؟ قولتلك محتاج شويه وقت، لكن انتي روحتي تشكي لكل واحد شويه، وبعدين انتي زعلانه ليه؟ هاه؟ مش انتي كنتي عايزه الموضوع ده؟ اديني عملتهولك؟ مش ده اللي رحتي اشتكيتي لامك ولاختك علشانه؟
ايمان: انا ما اشتكيتش لحد.

فارس: اه صح اصل ابوكي جه بنفسي يقولي نام مع بنتي من فراغ؟ عارفه هيام كان فيها عيوب كتيره جدا لكن عمرها ابدا ما حد عرف منها حاجه عن علاقتنا الخاصه، ابدا..
ايمان: وهو احنا كان بينا اصلا علاقه خاصه؟ وبعدين كان المفروض اقولهم ايه لما يسألوني؟ هاه؟ امي بتقولي عملتي ايه اقولها ايه؟ هاه؟ قولي انت كان المفروض اقولها ايه؟
فارس: معرفش اللي اعرفه ان ابوكي مش من حقه يجي يكلمني في حاجه زي دي.

ايمان: مش ذنبي انا، مش ذنبي انك تيجي تنام معايا وبعدها تحسسني بكميه ذل واهانه محسيتهمش قبل كده عمري وبعدين حتي لو كنت عايزه الموضوع ده فهو لا حرام ولا عيب ده فرض عليك انت فالمفروض انت اللي تحس بالذل والاهانه مش انا، بعد اذنك
فارس: انتي رايحه فين؟
ايمان: في داهيه مالكش دعوه
طلعت وسابتله الاوضه خالص وهو فضل فيها كتير مستنيها ترجع بس ما رجعتش فقام يشوفها فين.

دور عليها في كل اوضه ملقهاش وخاف تكون خرجت بره، بس هيا بهدوم البيت، لاحظ ان البلكونه مفتوحه فطلع لقاها في الارض بتعيط
فارس: قومي الجو برد ادخلي جوه
ايمان: مالكش دعوه بيا وبعدين يمكن اخد التهاب رئوي وتخلص مني
فارس: مش عايز اخلص منك قومي
ايمان: قولتلك مالكش دعوه بيا روح نام انت، اهو السرير ليك بدل نومك علي الكنبه وفي كل حته شويه
فارس: يا الله منك ومن غلاستك.

وطي وشالها غصب عنها ودخلها وقفل البلكونه وهيا بتحاول تنزل بس ماسكها وما نزلهاش غير في السرير
فارس: بطلي لعب عيال..
ايمان: انا عيله عندك مانع؟
فارس: وانا مش فاضي للعب العيال، اكلتي ايه من الظهر كده لحد دلوقتي؟
ايمان:
فارس: ردي عليا اكلتي ايه؟
ايمان: ما اكلتش، البركه فيك سديت نفسي عن الدنيا كلها مش الاكل بس...
فارس: طيب قومي حضري عشا لينا
ايمان: جعان شوفلك حاجه كلها وسيبني في حالي.

فارس: هو انا متجوز علشان احط لنفسي اكل؟ قومي يا بت حطي عشا اتحركي قومي
ايمان: مش قايمه
فارس: قومي بدال ما ازعلك
ايمان: اكتر من كده ما اعتقدش، مش هحط اكل
فارس: امال انا متجوزك ليه؟
ايمان: علشان اخدم مامتك مش انت، انت بقي روح حط عشا لنفسك
فارس: بقي كده؟ ماشي؟ هروح احط عشا لنفسي بس خليكي فاكراها.

سابلها الاوضه وخرج ودخل المطبخ كان الغدا اللي مامتها جابته محطوط ومتغطي فكشفه وسخنه في الميكرويف وحطه في صنيه صغيره وشالها ودخل اوضه النوم وبدأ ياكل
فارس: الله الغني، ربنا يخليكي يا حماتي..
قامت وقفت وبصتله: علي فكره امي عامله الاكل ده ليا مش ليك انت، المفروض ما تاكلش منه، ده بتاعي انا
راحت واخدت من ايده الشوكه واكلت اللي فيها وبدأت تاكل هيا وهو بيتفرج عليها
فارس شد من ايدها الشوكه ورجع ياكل هو بيها.

فارس: يعني انا اللي مسخن الاكل وانا اللي جايبه لهنا وجايه تقولي ده بتاعي والنبي؟
ايمان شدت الشوكه تاني: وان كان عاجبك؟
شد الشوكه هو: مش عاجبني قومي هاتي لنفسك شوكه ولا اعملي لنفسك اكل قومي
ايمان: مش قايمه..
فارس: وانا مش هديكي شوكتي
ايمان: يبقي انت تأكلني
فارس فضل باصصلها كتير
ايمان: وده اقل حاجه تعملها علشان تعوضني علي اللي انت قولته.

فارس فضل ساكت بس فعلا حط الشوكه في بوقها وبدأ يأكلها بصمت لحد ما الاتنين اكلوا وهيا شالت الاكل وعملت حاجه يشربوها، وسهروا الاتنين مع بعض يرغوا وبس ويتعرفوا علي بعض اكتر واكتر
الايام بتعدي وكل واحد رجع شغله وفارس رفض يلمس ايمان مره تانيه وهيا كرامتها مانعها تلمحله حتي انه واحشها...

بالليل بينام معاها في نفس الاوضه بس ظهره ليها وهيا بتفضل وراه تتمني لو من حقها انها حتي تحط ايديها حواليه، دموعها كل ليله بتنزل في صمت واكتشفت انه بيوجع قوي ان واحده تتمني مجرد حضن من جوزها او ضمه حتي...
فارس كمان حاسس بيها بس مش قادر يعيد الموضوع ده تاني معاها...

في يوم رجع من الشغل الظهر كان عايز يريح، دخل وايمان كانت في اوضه النوم واول ما شافته قامت وقفت قصاده بطريقه مسرحيه وشغلت السي دي وكانت اغنيه اجنبيه ومدت ايديها مسكت ايديه وبدأت تخليه يرقص معاها بطريقه تضحك
فارس: علي فكره هدومك وكلك هتتبهدلي شحم
ايمان: وايه يعني؟
رقص معاها وهما بيضحكوا الاتنين واندمج مع جنانها ده ورقص معاها وبعدها وقعته علي السرير وطلعت فوقه وقعدت
فارس: المفرش هيتبهدل شحم.

ايمان: حبه اريل يخلوه زي الفل
فارس: انتي عايزه ايه؟
ايمان: انت متخيل ان انا عايزه ايه؟ عايزه جوزي بس ارجوك مش وظيفه بتأديها ممكن؟
فارس جوابها بانه شدها ليه واكتشف ان في جزء منه كانت وحشاه، عدم خبرتها عاجبه وبدأ يعلمها ازاي تتعامل معاه فضلوا كتير مع بعض..
وبعدها قامت تاخد شاور وهو كمان اخد شاور وفضل قاعد في الصاله وبعد شويه طلعتله واول ما شافها فضل يضحك كتير
ايمان: بتضحك؟
فارس: شكل الشحم في وشك تحفه.

ايمان: في وشي بس، ده في اماكن غريبه
فارس ضحك جامد وايمان اكتشفت ان دي اول مره تشوفه بيضحك وانه امور جدا وهو بيضحك
فارس: قولتلك الشحم هيبهدلك وانتي قولتي ايه؟ اه حبه اريل
ايمان: انت بتنظفه ازاي؟ انت بتدخل وتطلع زي الفل بتنظفه بايه؟
فارس قام وجاب قزازه من الحمام وقطنه
فارس: بنظفه بده، بنزين
ايمان: والمفروض اغسل وشي بالبنزين؟

فارس: لا مش للدرجه دي اقعدي هنظفهولك، ايه اللي بهدل وشك كده، انا مش فاكر اني حطيت ايديا علي وشك
ايمان: بجد؟ محطتش ايدك علي وشي؟
فارس: مش فاكر
نظفلها وشها: غيرو، بقي زي الفل اهو
بدئت توريه اماكن الشحم وهو بينظفها ومش مبطل ضحك ابدا وهيا كمان بتضحك معاه، اكتشف بعدها انها بين ايديه وانه عايزها في حضنه شدها وقعها بين ايديه
ايمان: انت عايز ايه؟
فارس: انتي شايفه انا عايز ايه؟

ايمان: يعني المفروض ان انا احس؟ امال من شويه كنت بتسألني عايزه ايه ليه؟
فارس: انتي بتتكلمي كتير ليه؟
ايمان: علشان انت سايبني اتكلم كتير
فارس سكتها ومخلهاش تتكلم تاني، ناموا مكانهم في الصاله ودي كانت اول مره تنام في حضنه...
منيره وفرح جم يزوروهم ودخلوا بالمفتاح اللي مع منيره وشافوهم في الصاله نايمين...
منيره شدت عيال فرح وطلعت بره وقالت لفرح تصحيهم، فرح صورتهم بموبيلها قبل ما تصحي فارس.

فرح: فارس، واد يا فارس اصحي
فارس فتح عنيه واتفاجئ باخته فوق راسه
فارس: انتي بتعملي ايه هنا؟ ودخلتي هنا ازاي؟
فرح: بمفتاح ماما وهيا معايا بره بالعيال واتكسفت من منظركم قوم يالا وصحي مراتك، حبكت هنا في الصاله؟
فارس: وانت مالك، اطلعي بره خليني اقوم
فرح بغلاسه: شيلها وقوم
فارس: يا بارده اطلعي بره
فرح: ما تقوم يا فارس الله
فارس: يا بارده اطلعي بره.

فرح ضحكت وطلعت وسابتهم وايمان صحيت بس مقدرتش تقوم لحد ما فرح طلعت
فارس: ايمان قومي
ايمان: قوم انت الاول
فارس: ايه قوم انت الاول دي، يا بت قومي الناس بره
ايمان: مش هقوم انا كده
فارس: نعم؟ ليه؟
ايمان: مش هقوم قدامك
فارس: ايه الهبله دي ما انتي في حضني اهو
ايمان: في حضنك حاجه واني اقوم قدامك حاجه تانيه
فارس بص حواليه ومد ايده جاب التيشرت بتاعه لبسهولها
فارس: قومي بقي التيشرت بتاعي مغطيكي كلك اهوه.

قامت واول ما قامت بصلها
فارس: شايفك
طلعت تجري وهو ضحك عليها، لبس باقي هدومه وطلع لامه واخته بره دخلهم
فرح: حبكت النوم في الصاله؟
فارس: يا بارده، غيرانه صح؟
فرح: اه فعلا العيال كبروا ومعدش ينفع الكلام ده
فارس: احسن.

عمرو جاب حاجه من تحت الكنبه
عمرو: خالو هدوم طنط ايمان
فارس اخده بسرعه وملك كمان طلعت الباقي وفارس شدهم
فارس: سبحان الله نفس برود امكم
الكل ضحك وهو سابهم ودخل لمراته جوه
فارس: خدي هدومك اللي سيباها بره والبسي واطلعي
ايمان: انا مش هطلع ابدا، ابدا
فارس: انتي وشك احمر كده ليه؟
ايمان: معرفش.

فارس حط ايده علي خدها: مكسوفه؟ هو لسه في حد في الزمن ده بيتكسف؟ انتي عمله نادره، البسي واطلعي عادي واناهعمل حاجه نشربها عقبال ما تطلعي
وهو خارج بص علي السرير فضحك
ايمان: بتضحك ليه؟
فارس: لا اصل انتي معرفتيش تنظفي حتي وشك من الشحم فمش عارف هتنظفي ده ازاي؟
ايمان: هتصرف وهتشوف
فارس: ماشي هشوف
سابها وخرج وحس بحاجه جديده جواه، مش عايز يفسرها بس هو حاليا مبسوط...

خرج يعمل عصير وشويه وهيا خرجت سلمت علي حماتها وفرح وقعدت معاهم
فرح طلعت موبيلها وعطته لايمان ورتها الصوره بتاعتهم وهيا في حضنه، كان شكلها حلو قوي
ايمان اتحرجت: ينفع تبعتهالي؟
فرح: تدفعي كام؟
لاحظت انها اتحرجت اكتر: انا بهزر علي فكره هبعتهالك ثواني
ايمان: امال فارس فين؟
منيره: بيعمل عصير في المطبخ
ايمان: طيب انا هشوفه
فرح: لا والنبي يا ايمان سيبيه هو اللي يعمله ده الكوكتيل بتاعه معتبر ونادرا ما بيعمله.

ايمان: حاضر هسيبه بس هساعده
منيره: روحي يا بنتي
دخلت لفارس جوه وقفت وراه تشوف بيعمل ايه واتجرأت وحطت ايدها حواليه وبتبوسه في رقبته مع كل كلمه
ايمان: بتعمل ايه؟
فارس: كوكتيل
ايمان: تحب اساعدك؟
فارس: لأ بس بطلي اللي بتعمليه ده
ايمان بدلع: ليه؟ متضايق؟
فارس: مش حكايه متضايق، حكايه ان في عيال قرود بره ممكن اي حد ينط هنا وغير كده الروج بتاعك بيطلع وبيبهدلني، هيام مكنش الروج بتاعها بيطلع ابدا.

فارس قال الجمله دي عادي بس ايمان اتجمدت وبعدت عنه وبعدها فارس استوعب قال ايه؟
ايمان: بجد؟ هيام مكنش روجها بيطلع وهيا بتبوسك؟ بجد؟
فارس: سوري ما اقصدش اقارنكم ببعض طلعت بتلقائيه مني
ايمان: وهي دي المشكله ان تلقائيتك بتفكر فيها هيا
فارس ساب اللي في ايده وبصلها
فارس: قولتلك سوري ما تعمليش فيلم بقي
ايمان: انا طالعه بره اقعد مع مامتك واختك
سابته وخرجت وهو استغبي نفسه جدا لان مفيش حد عاقل يقول كده ابدا..

عمل العصير وخرج وقعد معاهم واتبسطوا والعيال لعبوا مع ايمان اللي قومتهم ولعبتهم
فرح: شكلك مبسوط؟
فارس: الحمد لله
فرح: ابقي افتح الفيس بتاعك النهارده هشيرلك صوره هتعجبك قوي
فارس: صوره ايه؟
طلعت الموبيل بتاعها ومن بعيد ورتهالو
فارس: هاتي يا بارده
فرح: فيس بقي
حاول يشدوا منها بس قامت تجري وهو قام وراها وفضلوا يجروا ورا بعض كتير والعيال بيهيصوا
منيره: بس بقي يا فارس سيب اختك.

فارس: انا اللي اسيبها يا أما، انتي ما شفتيش الصوره اللي عايزه تنشرها
منيره: شفتها بس يا فصيح هيا اختك ممكن يعني تنشرلك صوره زي دي؟
فارس وقف: هو في حد اصلا محترم يصور حد كده، هاتي يابت التليفون
فرح: هزلك بيها
فارس: يا بارده
فرح: مش ابرد منك
قعدوا والعيال كملوا لعب مع ايمان
عمرو: طنط هيام مكنتش بتخلينا نلعب ابدا
ملك: ايوه كانت علي طول تزعقلنا وتزعق لماما وتقولها ما تجيش هنا تاني ابدا.

ايمان: خلاص يا حبايبي هيام مشيت ومش هتيجي تاني ومن هنا ورايح ده بيت خالكم تيجوا وقت ما تحبوا وتلعبوا وقت ما تحبوا اتفقنا؟
الاتنين: اتفقنا
فضلوا يلعبوا لحد ما امهم كانت ماشيه وبتناديهم وهما ماشيين
عمرو: خالو مراتك دي احلي من طنط هيام بكتير
ملك: ايوه يا خالو انا كمان بحبها اكتر
فارس: طيب كويس ابقي تعالو بقي براحتكم
فرح: ان شاءالله هنيجي
فارس: امي لامتي؟
منيره: يومين كده يا حبيبي حتي تكمل شهر ولا حاجه.

فارس: امي ارجعي بيتك بقي، البيت بيبقي ضلمه من غيرك
منيره: منور بعروستك يا حبيبي، يالا ربنا يخليكم لبعض تصبحوا علي خير
فارس: فرح امسحي الصوره دي.، وبعدين ممكن حد يشوفها او محمود مثلا
فرح: مسحتها يا بارد بس بعتها لمراتك علي فكره
فارس دخل لايمان وحاول يتكلم معاها بس هيا قافله تماما ودخلت نامت بدري وسابته وهو اتنرفز منها بس في نفس الوقت هو مستغبي نفسه...
تاني يوم خلص شغله وروح غير وخارج تاني.

ايمان: رايح فين كده؟
فارس: ورايا مشوار مهم
ايمان: هتتأخر؟
فارس: مش عارف عايزه حاجه؟
ايمان: شكرا
سابها ونزل وراح علي محل مكياج من اكبر المحلات اللي هيام كانت بتروحهم، دخل وكان تايه في المحل لحد ما جتله واحده
الموظفه: حضرتك عايز حاجه معينه؟
فارس: اه عايز روج
الموظفه: لون معين او نوع معين؟
فارس: مش عايزو يطلع بسرعه، يعني مش عايز كل ما مراتي تلمسني يبقي وشي خريطه فهماني؟

الموظفه: اه يا افندم، دي مجموعه كايلي وكل الوانها ثابته وضد الميه ومش بتطلع تحب تجرب الوانها؟
فارس: انا اللي هجربهم برضه؟ حضرتك جربيه
الموظفه بدئت توريه الالوان علي اديها وبعدها ورته قد ايه اللون ثابت، وخلته يحاول يمسحهم ومعرفش
فارس: وبيطلع ازاي؟
الموظفه: مزيل ميكب اب او مناديل مخصوصه لازاله الميكب، مش عايز ايلينر او ماسكرا ضد الميه بحيث برضه تبقي ثابته؟
فارس: اوكي هاتي اه.

الموظفه: الوان الروج هتختار ايه؟
فارس: المجموعه كلها ولفيهم زي هديه
اخدها فارس ورجع البيت واول ما دخل
فارس: ايمو، ايمان
سمعته بس طنشته وما ردتش عليه
دخلها اوضه النوم كانت علي السرير بتقلب في مجله
فارس: انت مش سمعاني؟
ايمان: سمعاك بس قلت اكيد هتدخل
فارس: هو حد قالك قبل كده انك بارده؟
ايمان: كتير
فارس: ماشي يا بارده..
سابها ودخل الحمام
ايمان: انت كنت بتنادي ليه؟
فارس: كنت هديكي حاجه وغيرت رأيي.

قامت براحه تشوف الكيس اللي كان في ايده فيه ايه؟
وهو حس بيها فبص من الباب من غير ما تاخد بالها وشافها بتقلب في الكيس فابتسم من فضولها
فارس: متقلبيش في حاجتي
ايمان: انا مش هقوم من مكاني اصلا
خرج بعدها وبصلها كتير
فارس: عجبك اللي في الكيس؟
ايمان: معرفش ايه اللي فيه؟
فارس: نصابه، علي العموم ده ليكي اتفضلي
طلع العلبه وعطاهلها وهيا بصتله
ايمان: فيها ايه؟
فارس: افتحيها وشوفي بنفسك.

فتحتها وشافت الارواج وبرفان وحاجات ميكب كتير
ايمان: ده ليه؟
فارس: ماركات واهم حاجه انها ما بتطلعش حتي بالميه كلها water proof
ايمان: ليه؟ اه علشان ابقي زي هيام حبيبتك؟
فارس اول ما سمع اسمها اتجمد مكانه وهيا لحظتها ندمت علي كلمتها دي، فارس مره واحده شد العلبه من ايدها ورماها في الباسكت
فارس: سوري انا غلطان، ارميهم في الزباله وما تبقيش شبه حد، بعد اذنك.

سابها وخرج وهياندمت جدا لان كان بيحاول من امبارح يصالحها والنهارده راح اشترالها دول ومهتم بيها وهيا بغبائها بوظت كل حاجه، المفروض ما تحاولش تذكر اسمها نهائي، غبيه!
قامت لبست وحطت ميك اب من بتاعه وبرفان وطلعت بره وقعدت جنبه
ايمان: سوري زدوتها شويتين، ممكن خلاص؟
فارس: عادي...
ايمان: طيب بوصلي...
مرضيش يبصلها فمسكت وشه ولفته ليها.

ايمان: بقولك بص، الروج بتاعك والميكب كمان وحتي البرفان، خلاص بقي، جمله غبيه قصاد جمله غبيه كده خالصين! صح؟
فارس: بترديهالي يعني؟
ايمان: لا مش بردها، هيا طلعت بتلقائيه مش قصدي خلاص خلي قلبك ابيض بقي
فارس: انا قلبي مش ابيض، مش ابيض نهائي
شالها ودخلها اوضه النوم وهناك فضل معاها كتير
عطته ظهرها وهتنام وهو راقد جنبها وشه ليها ساند علي ايده وبيلعب في شعرها الطويل
فارس: هتنامي؟
ايمان بصوت نايم: لأ هغمض عيني بس.

ابتسم لانها زي الطفله بين ايديه، طفله بتتمرد وتتعلم
وهو سرحان مره واحده لمعت في ايده دبلته، دبله هيام فاتخنق وقام اخد حاجه من درج وخرج بره
طلع البلكونه ولع سجاره وفضل في الظلمه دماغه هتنفجر من المقارنه بين ايمان وهيام
ايمان كل لحظه بتثبتله انها ابيض وهو بيشكلها زي ماهو عايز، هو بيقولها تعمل ايه؟، هو بيعلمها...

هيام علامه استفهام كبيره؟ هيام كان الوضع معكوس تقريبا، هيام كانت بتوجهه هو للي هيا عيزاه، كانت مسيطره عليه، ، كان اعمي في حاجات كتير فهل ياتري كان اعمي برضه في النقطه دي؟
بس ازاي هيا كانت بنت لما لمسها!؟ بس هل ده شرط؟ هل ده دليل كفايه انه اول راجل في حياتها؟

كفايه يا فارس هيا خلاص انتهت ومشيت المفروض تقلع دبلتها وترميها وخليك مع اللي بين ايديك بدل ما تضيع منك هيا كمان، حاول يقلع الدبله بس اتراجع قلبه رفض يقلعها، اتفاجئ بصوت وراه
ايمان: انت من امتي بتشرب سجاير؟
فارس بصلها كانت لابسه روب طويل ابيض ومسكاه بايديها وواقفه علي الباب
فارس: مش بشربها، بس ساعات كده
ايمان: اما تكون مخنوق مثلا؟
فارس: مثلا.

عطاها ظهره وبص للشارع الهادي وهيا جت وقفت وراه وسندت علي ظهره وايديها حواليه
ايمان: ايه اللي خانقك؟
فك ايديها من حواليه وقعد علي الكرسي ورفع رجليه علي سور البلكونه
فارس: بلاش، سبق وقلتلك ما تسأليش كتير
ايمان قعدت جنبه: قول ايه اللي تاعبك؟ حتي لو هيضايقني..
فارس: متأكده؟
ايمان: جربني
فارس: هجربك، مخنوق من المقارنه بينك وبين هيام
ايمان مش عارفه تقول ايه لانها متوقعتش انه هيقولها صريحه كده؟

ايمان: مقارنه في ايه بالظبط؟
فارس: انتو الاتنين علي النقيض تماما، ممكن تكون هيا غلط بس للاسف انا حتي الغلط بتاعها حبيته
ايمان: معني كده انك حتي الصح بتاعي كارهو؟
فارس: شاطره بدأتي تفهمي، انتي عيله ( يدوب هتعترض بس وقفها) وقبل ما تعترضي مش قصدي عيله بالمعني اللي فهمتيه، قصدي انك فعلا صغيره معندكيش خبره في الحياه، بريئه زي الاطفال، انا ساعات بحس انك ما بتفرقيش عن ملك بنت فرح...

وده مش وحش بالعكس ده شيئ كويس جدا بس للاسف مش مع واحد زيي، واحد الحياه عركته وورته كل وشوشها وسبق واتجوز واحده كانت استاذه في كل حاجه بتعملها، فلما اقارن بينكم، استاذه مع طفله، اكيد انتي فهمتي الباقي؟
ايمان: وبعدين ناوي علي ايه؟
فارس سحب نفس طويل من سيجارته.

فارس: انا اتجوزتك وبقيتي ملزمه مني خلاص، ( مره واحده غير كلامه) انتي اتجوزتيني ليه؟ انا قلتلك اني ما بحبكيش ايه اللي يخلي واحده باخلاقك وجمالك ووضعك تقبل تتجوز واحد بيقولها ما بحبكيش ومش هحبك؟ ايه؟ العقل والمنطق بيقول انك ترفضي مش تقبلي وتيجي علي نفسك؟
ايمان وقفت وسيباه وداخله بس وقفت علي الباب ومن غير ما تبصله.

ايمان: نفس اللي مخليك لابس دبله واحده خلت ايامك جحيم وعملت كل حاجه غلط ممكن الواحد يتخيلها وغلطت في حقك وحق بيتك كتير جدا، العقل والمنطق بيقول انك ترمي اي ذكري ليها مش تفضل تقارني بيها وانت عارف انها غلط، اعتقد كده جاوبتك؟
فارس: مش بقولك طفله، وطفله غبيه كمان
فارس وقف وسابها هو ودخل: لما تحبي واحد زيي تبقي غبيه، غبيه جدا كمان
سابها ودخل وهيا دخلت وراه وشدته خلته يبصلها.

ايمان: وانت لما تحب واحده زيها تبقي مش بس غبي لا ومتخلف كمان، قولي ميزه واحده فيها؟ علي الاقل انا حبيتك من زمان، حبيت مهندس بيشتغل في الاجازه في ورشه علشان ما يكلفش باباه، حبيت شاب محترم عمره ما عاكس واحده بكلمه، حبيت شاب لو حد بس بصلي كان بياكله اكل، حبيت اخ بيخاف علي اخته من الهوا، حبيت ابن مستعد يرمي نفسه في النار علشان امه لدرجه انه مستعد يتجوز واحده ما بيحبهاش علشانها، حبيت راجل الكل بيشهدله بالاحترام، انت بقي حبيت فيها ايه؟ هاه؟ انا موافقه قارني بيها وقولي هيا بتتميز عني في ايه؟ انطق ورد، قولي بتتميز عني في ايه؟

فارس كان متغاظ وكان عايز يسكتها باي طريقه
فارس: بتعرف ازاي تمتعني في السرير مش عيله زيك محتاجه حد يقولها تعمل ايه وكل اللي بتعمله انها متشعبطه في رقبتي؟
ايمان كلامه جرحها جدا فسابته وجريت علي اوضتها ودخلت وقفلت الباب وراها بالمفتاح وهو سمع ده وعرف ازاي يجرحها جرح في الصميم، لان مفيش حاجه تجرح واحده الا ان جوزها يقولها انها فاشله معاه وان غيرها احسن منها!

وانهارت الكام طوبه اللي كانوا حطوهم في علاقتهم ورجعوا لتحت نقطه الصفر، كل واحد بعيد تماما عن التاني، كل واحد في حاله، كل واحد في اوضه...
هو مش عارف يعمل ايه؟ وهيا مجروحه معندهاش استعداد تسامح تاني...
فضلوا اسبوع علي الوضع ده، الصبح لابس وهينزل شغله
فارس: اوصلك الاول؟
ايمان: شكرا
فارس: انتي متأخره النهارده
ايمان: هاخد تاكسي ما تشغلش بالك.

يدوب بتفتح باب الشقه اتفاجئت بحد قدامها، بصت لفارس وهو كمان بصلها...
: #ايه مفاجأة مش كده؟