قصة لفت انتباه

نزلت من بيتها وهى فرحانة انها رايحة تقابله اصله كان واحشها اوى .ركبت عربيتها ووصلت لعيادته واول ما طلعت العيادة لقت صباح الممرضة قاعدة على مكتبها
ريم: ازيك يا صباح
صباح فى تردد: انسة ريم ! اهلا وسهلا
ريم: دكتور ماجد فاضى ولا عنده حد
صباح بتلجلج: لا عنده... عنده واحدة... قصدى عنده مريضة جوا.

ريم قلقت من توتر صباح وحست بحاجة غريبة عملت نفسها هتقعد تستناه وفجاة اتوجهت لاوضة الكشف بتاعته وفتحت الباب مرة واحدة. وقفت اتسمرت مكانها رجليها مش شايلاها مش مصدقة الى عينيها شايفاه لقته واقف وواحدة واقفة ادامه قريبة منه اوى ولافة دراعها حوالين رقبته بدلع وهو ماسك ايديها الى على رقبته . ماجد اول ما شاف ريم اتصدم ومبقاش عارف يعمل ايه.

ماجد فى صدمة: ريم !
ريم دموعها وقفت فى عينيها وضربات قلبها بقت متسارعة
ريم بصوت مكتوم: انا اسفة يا دكتور دخلت فى وقت مش مناسب
خرجت تجرى وهى منهارة
ماجد: استنى بس يا ريم انتى فاهمة غلط صدقينى
ماجد جرى ورا ريم لكن للاسف ملحقهاش خدت عربيتها وساقت بسرعة كانت بتسوق وهى منهارة وفجاة بصت جنبها على البحر وركنت عربيتها ونزلت .
قعدت ادام البحر على مقعد من المقاعد وفضلت بصاله بوجع ورجع بيها الزمن لورااااااا.
فصول قصة لفت انتباه
قصة لفت انتباه للكاتبة أمنية الريحاني

الفصل الأول

فى احد النوادى فى اسكندرية:
ندى قاعدة فى النادى مستنية ريم صاحبتها وفجاة بتظهر ريم الى بتروح ناحيتها.
( ريم بنت جميلة عندها 21 سنة متخرجة من كلية الاداب جامعة الاسكندرية ومشتغلتش بعد التخرج ريم قصيرة القامة ذات بشرة قمحية وشعر اسود متوسط الطول . ريم يتيمة الام وبتعيش مع باباها على وملهاش غير اخ واحد اسمه وليد اكبر منها بخمس سنين مهندس وبيشتغل برة.ريم بتقضى وقتها ما بين النادى والرسم الى بتحبه وقراية الروايات الرومانسية والقعدة مع باباها).

ريم بتروح عند ندى
ريم: صباح الخير
ندى: صباح الخير يا ريمو . انتى يا بنتى مش ناوية تيجى فى ميعادك مرة واحدة بقالى ساعة مستنياكى
ريم: قلبك ابيض يا نودى معلش راحت عليا نومة
ندى: امممم. يبقى كنتى سهرانة بتقرى رواية جديدة

ريم: اااااااااه يا نودى بس المرة دى رواية فظيعة البطل انتحر لما البطلة سابته ومرديتش ترجعله مقدرش يتخيل الحياة من غيرها
ندى: اممم يا سلام وجنابك فاكرة بقى ان ده ممكن يحصل فى الواقع. ما تفوقى شوية يا بنتى هو فى حد بينتحر عشان حد
ريم: انا عارفاكى عديمة الرومانسية
ندى: قصدك انى واقعية . وبمناسبة الرومانسية سى روميو بتاعك وصل اهو
ريم: روميو ! روميو مين !
ندى: مش عارفة مين روميو . ماجد حبيب القلب
ريم بلهفة: ايه؟ هو فين ها ؟

ندى: اهو هناك اهو رايح ناحية ملعب التنس
ريم بصت على ماجد بهيام وسرحت معاه: اههههههه صحيح دا وصل
( ماجد شاب وسيم عنده 30 سنة دكتور نفسى واعزب ماجد طويل القامة جسمه متوسط غير عريض بشرته سمرا وشعره بنى.ماجد هوايته لعب التنس وبيجى النادى عشان يدرب تنس)
ندى: يا بنتى ارحمى نفسك بقالك اكتر من سنة بتحبى فيه وهو ولا هنا هتفضلى كده لحد امتى
ريم: عايزانى اعمل ايه يعنى؟

ندى: ما تلفتى نظره ليكى يا تسيبك منه وتنسيه
ريم: انساه ! انتى بتهزرى يا ندى دا انا من اول يوم شفته فيه وانا حاسة زى ما يكون جواه مغناطيس بيشدنى ناحيته كل ما افكر ابعد حاجة بتقربنى ليه اكتر حاجة جوايا رفضانى انساه او ابعد عنه.فاكرة اليوم ده يا ندى ولا نستيه

فلاش باك
ريم بتجرى فى النادى وحاطة فى ودنها سماعات بتسمع اغانى وفجاة ظهر عصام ابن عمها نده عليها ووقفها
( عصام ابن عم ريم عنده 28 سنة بيحبها وعايز يتجوزها لكن هى رفضاه)
عصام: ريم ! ياريم استنى يا ريم!
ريم وقفت وبصتله بزهق: عصام ايه الى جابك؟
عصام: جى عشانك يا ريم سألت عليكى وعرفت انك هنا
ريم: خير يا عصام فى حاجة؟

عصام: مالك يا ريم بتكلمينى كده ليه انتى ناسية انك خطيبتى
ريم: خطيبتك ! دا من امتى ان شاء الله؟
عصام: هو ايه الى من امتى ! هو انا مش جيتلكم البيت انا وبابا وطلبت ايدك من عمى
ريم: وانا رفضت يا عصام واظن بابا قالك ردى
عصام: ايوا يا ريم بس انا بحبك وبحبك من زمان اوى من ساعة ما كنا عيال صغيرة  مش عارف انتى ليه مش حاسة بحبى ليكى طول السنين دى
ريم: يا عصام افهم انت ابن عمى وبس وانا بحترم العلاقة دى وارجوك بطل تلاحقنى فى الرايحة والجاية

عصام: اه انتى اسمعى بقى لازم تعرفى اننا هنتجوز لانى مش هسمح لحد ياخدك منى انتى بنت عمى وانا اولى بيكى ومحدش هيحافظ عليكى زيى
ريم: لا انت شكلك اتجننت انا هخلى بابا يشوفله صرفة معاك
وبدات ريم تتحرك عشان تمشى راح عصام شدها من ايديها بقوة
عصام بزعيق: احترمى نفسك وانتى بتكلمينى ولما اكون بكلمك متمشيش وتسيبينى
ريم بزعيق: انت اتجننت بتعمل ايه سيب ايدى
عصام: انتى بتقوليها تانى اظاهر عمى معرفش يربيكى وانا بقى الى هربيكى
ريم: سيب ايدى يا عصام لانده امن النادى يتصرفوا معاك
عصام بيشدها اكتر: تعمليها يا بنت عمى يا متربية

وفجاة بيلاقى ايد بتمسك ايده بقوة وبتشلها مع على ايد ريم فى صدمة من عصام وريم
عصام: انت مين انت وازاى تعمل كده؟
ماجد بص لريم: فى حاجة يا انسة الشخص دا بيضايقك؟
ريم بصاله ومش عارفة ترد
عصام: وانت ايه الى دخلت انت دى خطيبتى
ماجد بص لريم واتحرج ولسه كان هيتحرك ويمشى راحت ريم وقفته
ماجد: انا اسف مكنت...

ريم: لا مش خطيبى
ماجد لف وبصلها
عصام: ريم انتى بتقولى ايه
ريم بقول انك مش خطيبى . ولو سمحت حضرتك الشخص دا بيضايقنى
عصام لسه هيقرب على ريم عشان يمسكها راح ماجد حركها وراه ووقف ادامها بينها وبين عصام
ماجد: هى قالت انك مش خطيبها وانك بضايقها . لو مديت ايديك عليها تانى ولا قربتلها انا هقطعلك ايدك. حتى لو خطيبتك او مراتك زى ما بتقول مينفعش واحد يعامل واحدة بالاسلوب ده ادام الناس.

عصام: وانتى مالك ايه الى دخلك؟
ماجد: هى طلبت مساعدتى
عصام: عندك حق الحق مش عليك





عصام بص لريم: ادامى يا هانم كفاية فضايح لحد كده
ورفع عصام ايده عشان ياخد ريم من ورا ماجد لكن لقى ماجد مسك دراعه
ماجد: قولتلك مش هتلمسها وانا موجود واحسنلك تبعد عنها
وهنا جيه رجلين من رجال امن النادى
رجل الامن: فى حاجة يا دكتور

ماجد بص لعصام: لا مفيش . ولا حضرتك ليك راى تانى
وهنا عصام بصلهم بغضب وسابهم ومشى
ماجد: اتفضلوا انتو كان مجرد سوء تفاهم واتحل
ريم بصت لماجد: انا متشكرة اوى مش عارفة كنت هعمل ايه من غيرك
ماجد: لا شكر على واجب . انا مستحملتش اشوف بنت بتتعامل بالطريقة دى ادام عينى واسكت عشان كده ادخلت. وانا مفترض طبعا ان حضرتك صادقة وانه فعلا مش خطيبك زى ما بيقول والا هيبقى موقفى سئ اوى

ريم: والله العظيم مش خطيبى . هو ابن عمى وطلبنى للجواز فعلا وانا رفضت ومن ساعتها وهو بيطاردنى
ماجد: لو كده يبقى لازم تبلغى اهلك عشان يتصرفوا معاه
ريم: اكيد هعمل كده
ماجد: عن اذنك
ريم: هتمشى؟
ماجد: انتى محتجانى فى حاجة.؟
ريم: لا متشكرة اوى
ماجد بيمشى ويسيب ريم وهى عينيها عليه وساعتها اتولد فى قلبها اول نبتة حب من ناحيته

باك
ريم: فاكرة يا ندى؟
ندى: خلاص يا ستى فاكرة ومبلحقش انسى بس انتى من ساعتها وانتى بتستنى كل يوم عشان تشوفيه فى النادى وبتقعدى تراقبيه من بعيد وهو ولا هنا ولا شايفك ولا حاسس بوجودك
ريم: يعنى انتى عايزة ايه؟
ندى: انا كل الى عايزاه منك انك تحاولى تلفتى انتباهه ليكى
ريم: طب اعمل ايه يا ندى؟ قوليلى الفت انتباهه ازاى ؟ ازاى اخليه يحس بيا ويشوف الحب الى جوايا من ناحيته؟
ندى: انتى تعرفى هو بيشتغل ايه؟
ريم: اه طبعا ماجد دكتور نفسى
ندى بعد تفكير: انا بقى هقولك تعملى اييييييييييه
تااابع اسفل