رواية سوء اختيار

رواية سوء اختيار للكاتبة اسماء عبد العظيم الفصل الخامس

فى منزل ناهد:
نزل هشام وخبط على ناهد ...
( ناهد ) فى ايه ياهشام ايه اللى نزلك دلوقتى يابنى .. ومال شكلك متغير كده ليه
( هشام ) انا طلقت اميرة ... وخدت كريم وسابت البيت ...
ناهد بتضرب على صدرها .. إيه .. انت بتقول ايه ... ليه
بتسمعها منار وبتخرج من اوضتها ( منار ) فى ايه ياماما ...

( ناهد ) اخوكى طلق مراته ...
فى منزل سعاد:
جرس الباب بيرن ...
( سعاد ) مين
( اميرة ) انا ياماما

( سعاد ) بتعجب ... اميرة .. فتحت الباب .. ايه اللى جابك فى الوقت ده يااميرة ..
دخلت اميرة وهى بتعيط .. هشام طلقنى .. ومليش مكان اروحه غير عندك ...
( سعاد ) طلقك ليه ؟
( اميرة ) اتخانقنا كالعاده وهو طلقنى وانا مش هرجعله تانى ..
بيخرج الحاج / سمير من اوضته فى ايه ياسعاد مين اللى جه ...
( سعاد ) دى اميرة بنتى .. وابنها ... هشام جوزها طلقها ...
( سمير ) ليه ايه اللى حصل ..! انا لازم اروحله بكره واكلمه ..
( اميرة ) لأ لو سمحتى ياعمى .. انا مش عاوزة حد يتدخل .. انا مش هرجع له تانى مهما حصل .. ولوسمحتى ياماما انا عاوزة مفتاح شقتنا علشان اروح اقعد هناك انا وابنى ...

( سعاد بإضطراب ) .. استهدى بالله يااميرة .. الامور مبتدختش كده .. انتى هتقعدى عندى يومين وبعدين هشام اكيد هيردك ليه ...
( اميرة ) لأ مش هرجعله يعنى مش هرجعله ... بعد مطلقنى ..لايمكن ارجعله ..
كريم بيعيط عاوز يرضع ..
( سعاد ) طب قومى دلوقتى ادخلى الاوضه دى ورضعى ابنك واستريحى انتى وهو والصباح رباح ...
قامت اميرة ودخلت الاوضه .. بصت سعاد لسمير ..
( سعاد ) هعمل ايه انا دلوقتى .. اهى عاوزة المفتاح بتاع شقة ابوها ..
( سمير ) قوليلها انك بعتيها ...
( سعاد ) لا اخاف اقولها .. معرفش هتعمل ايه وخصوصا ان فلوس الشقة اتصرفت كلها ..
( سمير ) يبقى لازم تحاولى ترجعيها لجوزها ...
( سعاد ) ايوه اميرة لازم ترجع لجوزها ..
بعد يومين فى منزل الحاج سمير ...

ناهد وهشام بيخبطوا على الباب بتفتح سعاد وبتشاورلهم بالدخول اهلا وسهلا وبضحكة مصطنعه اخص عليك ياهشام كده فى ساعة غضب تطلق اميرة انت اكيد متقصدش
( هشام ) لأ بصراحة ياحماتى اقصد .. انا خلاص معنتش قادر اعيش مع اميرة واللى جابنى النهارده هو ابنى كريم انا عاوز كريم يعيش معايا .. وكل مستحقات اميرة هتوصلها ..
( سعاد ) ايه ده ياناهد انتى موافقه ابنك على كده ..
( ناهد ) اسمعى ياسعاد انا كل اللى اعرفه ان هشام ابنى مش مرتاح مع اميره وكمان اميرة بتقول انها مش مبسوطه يبقى زى مادخلنا بالمعروف نخرج بالمعروف ..
سمير بيحاول يتكلم مع هشام وبيحاول يصلح بينه وبين اميره ...
( سمير ) فكر تانى ياهشااام .. علشان مصلحة ابنك انه يتربى بينك وبين مامته ...

( هشام ) معلش ياعمى .. خلاص كل شىء انتهى .. المهم انك تقنعها انها تتنازل لى عن حضانة كريم .. لإنه لازم انا اللى اربيه .. اميرة مينفعش انها تربيه ...
سعاد بتقوم وبتدخل لأميرة اللى سمعت الكلام وقالت لأمها لأ انا هزله ومش هتنازل له عن كريم ورجوع ليه انا مش عاوزة ارجعله ... وهاخد ابنى وارجع لشقة بابا ..
( سعاد ) طب وطى صوتك واهدى دلوقتى وبعدين نتكلم ...

وبيستأذن سمير من هشام ان يديله يومين يحاول يقنع فيهم اميرة انها تتنازل لهشام عن حضانة كريم وينفصلوا بالمعروف .. وبيوافق هشام وانه هينتظر تليفون من الحاج سمير علشان يروح ياخد كريم ...
بعد يومين:-
بتدخل سعاد على اميرة اوضتها ..

( سعاد ) بصراحة كده يااميرة انا بعت الشقة اللى كنا ساكنين فيها ..
( اميرة ) ايه بعتيها! ...ليه ياماما ... وليه مقولتليش ..
( سعاد ) بصراحة يابنتى كنت محتاجة فلوس علشان مصاريف علاجى ..فبعتها ومعرفش انك ممكن تيجى غضبانه ...
( اميرة ) لأ انا مش غضبانه .. انا اتطلقت

بيدخل سمير عليهم الاوضه:
( سمير ) دلوقتى يااميرة هشام جاى النهارده علشان ياخد كريم ...
( اميرة ) لأطبعا ... مش هتنازل عن كريم ليه ..
( سعاد ) يابنتى انتى مش هتقدرى على تربية كريم لوحدك وبعدين انت كده هتخليه خالى من اى مسئوليه ويروح يتجوز هو ويعيش حياته وتدبسى انتى فى تربية ابنك لوحدك ده غير مصاريفه ...
( اميرة ) بتبص لعمها سمير ...

( سمير ) بصى يااميرة انتى زى بنتى وامك مراتى وانتى مسئوله منى لحد ما أجوزك حد احسن من هشام او لحد ماأموت .. انما يعنى متزعليش منى ابنك مش مسئول منى وخصوصا ان ابوه عايش هو المسئول عنه وعن مصاريفه .. وكمان الليلتين اللى فاتوا يعنى ... ابنك صغير وبيعيط كثير ... وانا راجل كبير احب اعيش فى بيتى فى هدوء وراحة .. وبصراحة كده ابنك مكانه عند ابوه ... وبعدين سيبيه لابوه يربيه وانتى فوقى لنفسك وعيشى حياتك ...

اميرة بتفكر فى كلام امها وجوز امها .. ولقت ان كلامهم منطقى انها مش هتقدر على تربية كريم ولا هتعرف تصرف عليه .. وكمان جوز امها قالها لها صراحتا انه مش هيستقبل فى بيته غير اميرة .. والشقة اللى كان ممكن تقعد فيها مع ابنها امها باعتها ... كده مفيش حل اودامها غير انها تسيبه لهشام يربيه .. وتعيش هى حياتها ..
( سعاد) ياله ياميرة اومى لبسى كريم علشان اسلمه لأبوه
( اميرة ) بتعيط ... وبتقوم تلبس كريم ... وبتحضنه جامد ..
( سمير ) ياهشام اميرة هتسيبلك كريم بس تبقى تخليها تشوفه ... بردوا ده ابنها
( هشام ) طبعا .. انا مش هحرمها انها تشوفه ...
سعاد خرجت بكريم اخده منها هشام وحضنه ومشيوا على بيتهم ...
---
فى منزل ناهد:
( منار ) كيمو حبيبى .. بتحضنه جامد
( ناهد ) خديه دخليه جوه يامنار ...
( منار ) حاضر ياماما ..
( ناهد ) هشام هتعمل ايه دلوقتى .. كريم محتاج اهتمام ورعاية ..
( هشام ) طبعا ياماما ...هحاول انظم وقتى ووقت الشغل علشان اقدر اراعيه واخد بالى منه وأعوضه عن امه اللى اتخلت عنه بكل سهوله ...
( ناهد ) انت اكيد عارف ياهشام انى انا ومنار اكثر حد هياخد باله من كريم متقلقش عليه طول ما انت فى الشغل ...
( هشام ) عارف ياماما ... ربنا مايحرمنى منكم ...

بعد مرور شهرين:
( منار ) ماما ... هدوم كريم صغرت عليه .. عاوزة اشترى له هدوم ...
( ناهد ) وماله ياحبيبتى .. لما اخوكى يجيى من الشغل ابقوا انزلوا واشتروا لكريم احلى حاجة ...
هشام رجع من الشغل واتغدى وقاعد بيلعب مع كريم منار بتدخل عليه وبتقوله ياله علشان ننزل نشترى هدوم لكريم علشان هدومه صغرت عليه ...
( هشام ) انا تعبان يامنار مش هقدر انزل ..وبعدين انتى عاوزانى معاكى ليه روحى انتى اشترى زى ما اشتريتى له هدوم قبل كده ...
( منار ) خلاص براحتك ...

تانى يوم بتروح منار على المحل اللى بتشتغل فيه هناء ومعاها كريم ..
( منار ) السلام عليكم
( عمرو ) وعليكم السلام
( منار ) لوسمحت اومال فين هناء
( عمرو ) وهو حضرتك تعرفى هناء ...
( منار )ايوه انا صحبتها ...

( عمرو ) هناء تعبانه ومقدرتش تيجى النهارده الشغل
( منار ) طب ممكن رقم تليفونها علشان اسأل عليها
( عمرو ) انتى مش بتقولى انك صاحبتها ..
( منار ) ايوه بس رقمها ضاع منى ... لو سمحت ممكن الرقم
عمرو اداها الرقم واتصلت منار على هناء ...
( منار )الو .. ازيك .. ياهناء ..
(هناء ) الحمد لله مين معايا
انا .. منار .. مش فكرانى ..

( هناء ) اهلا يامنار .. انتى عرفتى رقمى منين
( منار ) اخدته من الراجل اللى فى المحل اللى انتى بتشتغلى فيه
( هناء ) آه من عمرو ..ورضى يديهولك بسهوله كده ..
( منار ) ايوه ما انا قولتله انك صحبتى ..المهم انتى عامله ايه وليه مروحتيش المحل النهارده
( هناء ) عندى دور برد جامد شويه فإستئذنت من عمرو انى ماروحش النهارده ..
( منار ) طب هتكونى هناك بكرة ..
( هناء ) ليه فى حاجة ؟

( منار ) ايوه .. عاوزة اشترى هدوم لابن اخويا وعاوزاكى معايا تختارى الهدوم لإن مفيش حد ممكن يساعدنى غيرك ..
( هناء ) اومال مرات اخوكى فين ليه مبتختارش هى الهدوم لإبنها ...
( منار ) ده موضوع كبير كده هبقى احكيلك عليه لما اقابلك
( هناء ) خلاص ان شاء الله هكون هناك بكره وهستناكى ...
( منار ) اوك ...

منار رجعت هى وكريم البيت ودخلت قعدت ناهد وهشام بيسألوها ليه ماشترتيش الهدوم لكريم قالتلهم صاحبتى اللى فى المحل اللى اشتريت منه قبل كده مكنتش موجوده وهتكون موجوده بكره فهروح بكره انا وكريم علشان هى اللى هتقدر تساعدنى ...
منار بتروح تانى يوم ومعاها كريم وبتدخل بتلاقى هناء فى استقبالها
( هناء ) اهلا يامنار ...
( منار ) انا آسفه انى ازعجتك ياهناء بس بجد مفيش حد معايا يقدر يساعدنى انا محتاجة حاجات كثير لكريم ومش هقدر اختار بنفسى وانتى اللى ممكن تساعدينى وتختارى الحاجات الكويسه

( هناء ) وهى بتبتسم وبتلاعب كريم .. مفيش مشكلة .. انا تحت امر الاستاذ كريم بس انا عندى سؤال اومال فين مامته ؟
( منار ) هشام اخويا طلق مراته.. وسابت كريم لهشام هو اللى يربيه ...
( هناء ) معقول فى ام تسيب ابنها وهو لسه صغير كده ...
( منار ) ايوه .. اللى حصل بقا
( هناء) بتبص على كريم .. وبيصعب عليها جدا ...

وبالفعل اختاروا كل حاجة مناسبه لكريم وبعد ماخلصوا قعدوا سوا يتكلموا ويتعرفوا على بعض اكثر ومنار حكت لهناء حكاية هشام مع مراته والظروف اللى اجبرته انه يطلق اميرة وكمان حكتلها على خطيبها محمد وانها هتتجوز بعد شهرين ومحتاجه حد ينزل يشترى معاها جهازها لإن مامتها ست كبيره ومش بتقدر تنزل معاها فى كل المشاوير ولإن منار ملهاش اخوات بنات هناء بترحب جدا بعلاقتها بمنار ... وهناء حكت لمنار على خطوبتها اللى اتفسخت وصدمتها فى احمد ومنار خففت عليها كثير ...
( هناء ) منار اى وقت محتجانى معاكى فيه .. قوليلى هتلاقنى جاهزة .. انا بقيت حاسة انك زى اختى ..
( منار ) ربنا يخليكى ياهناء يارب وعقبال ما افرح بيكى ..

رواية سوء اختيار للكاتبة اسماء عبد العظيم الفصل السادس

فى منزل سعاد:
( سعاد ) مرمر قومى ياله علشان نخرج ...
( اميرة ) احنا هنخرج النهارده ..
( سعاد ) ايوه .. ولا انتى عاوزة تقعدى فى البيت ...
( اميرة ) لأ قاعدة البيت ايه هو فى احلى من الخروج والفسح ... اهو الحاجة الوحيدة اللى استفدتها من طلاقى من هشام انى بقيت على راحتى ... وعايشه حياتى
خرجت سعاد واميرة والحاج سمير وراحوا النادى وهناك قابل الحاج سمير احد اصدقائه الحاج عبد الله
( سمير ) ازيك ياحاج عبد الله والله ليك وحشه .. انت رجعت من السفر امتى
( عبد الله ) لسه راجع من شهر تقريبا

( سمير ) وهتسافر تانى ..
( عبد الله ) آه ان شاء الله .. انا نازل اجازة كده .. وراجع تانى بإذن الله .. مش تعرفنى على الجماعه ...
( سمير ) مدام سعاد مراتى واميرة بنتها ...
( عبد الله ) بيبص لاميرة اهلا يااميرة اهلا يامدام سعاد ..
اميرة بتبص عليه وبترد عليه اهلا ياعمو ...
( عبد الله ) اهلا بيكى ياحلوة ...

فى منزل ناهد:
( هشام ) ماما انا مضطر اسافر القاهرة لمدة اسبوعين
( ناهد ) ليه يابنى ...
( هشام ) ابراهيم صاحبى طلب منى انى اتابع المعمل بتاعه اللى فى القاهرة بداله لمدة اسبوعين علشان هو هيتجوز ومش هينفع انه يقفله وكمان فيها دخل اضافى ليا ..
( ناهد ) وكريم ..
( هشام ) معلش ياماما والله انا عارف انى تقلت عليكى انتى ومنار بس فعلا انا مضطر ..
( ناهد ) ياهشااام الحكاية مش حكاية الاسبوعين وبس انت ناسى يابنى ان اختك فاضل شهرين وهتتجوز وتسافر لجوزها .. وانا كبرت ياهشام ومش هقدر على خدمة كريم لوحدى

( هشام ) طب اعمل ايه قوليلى
( ناهد ) اودامك حاجة من اثنين ياترجع اميرة لذمتك ... يإما تتجوز ...
( هشام ) ايه ارجع اميرة ده مستحيل .. انى افكر ارجعها لعصمتى تانى .
( ناهد ) خلاص تتجوز واحد تانية تقدر تربى ابنك وتاخد بالها منك ومنه
( هشام ) لا ده ولا ده انا خلاااااااا ص اتعقدت من الجواز .. والبركة فى اميرة ...
( ناهد ) انت رايح فين إقعد نكمل كلامنا ..

( هشام ) ياماما خلاص الكلام انتهى عن إذنك ...
بتدخل منار وشايله شنط كثير
( منار ) ياه ياماما لفينا كثير اوى على ماعرفنا نشترى الحاجات دى ..
( ناهد ) لفيتوا انتى ومين ؟
( منار ) هناء ياماما اللى كلمتك عليها قبل كده .. ياه انا مش عارفه من غيرها ولا كنت عرفت اشترى اى حاجة ربنا يكرمها يارب ويعوضها خير ..
( ناهد ) يعوضها خير .! ليه مالها

منار حكت لناهد كل اللى تعرفه عن هناء وقد ايه هى بنت محترمه وحساسه جدا
( ناهد ) واضح من كلامك يامنار انها بنت كويسه،، انتى شوقتينى انى اشوفها
( منار ) ياريت ياماما تتعرفى عليها فعلا انا حاسة انها زى ماتكون اختى ...
( ناهد ) ان شاء الله .. على فكرة اخوكى مسافر بكره القاهرة وهيقعد هناك اسبوعين عنده شغل هناك ...
( منار ) يااااااه اسبوعين، بس انا كده مش هعرف انزل اشترى حاجة علشان كريم مش هينفع اسيبوا معاكى لوحدك
( ناهد ) معلش يامنار استحملى علشان خاطرى ..
( منار ) ياماما انا كل اللى صعبان عليا كريم والله انا اتعلقت بيه اوى ومش عارفه ازاى هاسيبه وهسافر وهتعملى معاه ايه انتى لوحدك ...

تانى يوم:
( هشام ) انا مسافر هتعوزى حاجة منى ياماما
( ناهد ) عاوزة منك حاجة واحدة
( هشام ) اؤمرى ياست الكل
( ناهد ) عاوزاك تفكر كويس فى موضوع الجواز وتفكر فى ابنك ...
( هشام ) سكت شويه .. وبعدين قالها حاااااااااضر ياماما ..
( ناهد ) حضرلك الخير ياحبيبى تروح وتيجى بالسلامة ..
( هشام ) ابقى سلمى لى على منار وكريم بقا لما يصحوا
( ناهد ) ماشى ياحبيبى ... مع السلامة

فى منزل سعاد:
( سمير ) سعاد تعالى عاوزك فى موضوع
( سعاد ) خير ياسمير فى ايه ؟
( سمير ) عبد الله اللى كان قابلنا فى النادى سألنى على اميرة وعرف حكايتها وطالب ايدها .
( سعاد ) طالب ايدها ! ده اد ابوها !

( سمير ) وفيها ايه ياسعاد عبد الله هيعيش اميرة عيشه كويسه جدا وهيعوضها على اللى فات ... وبعدين انتى تفكرى فى مصلحة بنتك ولا عجبك قاعدتها كده ..
( سعاد ) انت زهقت من قاعدة بنتى فى بيتك ولا ايه ياسمير وماصدقت وعاوز تجوزها راجل اد ابوها .
( سمير ) بحزن إخص عليكى ياسعاد وانا اللى معتبر اميرة زى بنتى ..انا كل اللى عاوزة انك تدى لنفسك فرصه تفكرى فى الموضوع وكمان تعرضيه على اميرة ...وعلى فكرة الحاج عبد الله معجب بأميرة اوى ولو اتجوزها هيعيشها فعلا" أميرة " ده الفلوس عنده زى الرز
( سعاد ) طب خلاص متزعلش .. انا هفكر فى الموضوع وبعدين هعرضه على اميرة وهى حرة بقا ...
( سمير ) بس مش تعرضيه عليها بس ... تقنعيها كمان .. دى فرصه ومش هتتكرر كل يوم ..

 

فى منزل هناء:
( عليه ) انتى هترجعى امتى من الشغل ياهناء
(هناء ) فى ميعادى ياماما ليه فى حاجة ..
( عليه ) سماح اختك وولادها هيجوا يقعدوا عندنا يومين ..
( هناء ) والله كويس .. العيال دول واحشنى مووووووت
( عليه ) ماشى ياحبيبتى حاولى متتأخريش ...
فى منزل ناهد:
ناهد شايله كريم وهو عمال يعيط جامد ومنار فى المطبخ بتحضر له الرضعه
( ناهد ) ياله يامنااااااار... استعجلى شويه ...
(منار ) حاضر ببرد الرضعه ياماما .. حااااااضر
( ناهد ) هاتى ...
ناهد بتحاول تسكت كريم علشان تعرف تديله الرضعه ومنار سمعت تليفونها بيررررن
( منار ) الو ازيك ياهناء ..
( هناء ) كده يامنار مبتسأليش عليا بقالك اسبوع ..
( منار ) انا آسفه والله ياهناء .. بس جدت ظروف هشام اخويا مسافر وطبعا انتى عارفه انى كريم معانا فاانا مشغوله بيه ومش هقدر اسيبه مع ماما لوحدها ...
( هناء ) عذرك مقبول .. انتى بس وحشتينى قلت اتصل اسأل عليكى وعلى سر غيابك عنى
( منار ) وانتى كمان وحشتينى والله .. بقولك ايه ياهناء .. ماتيجى تقعدى معايا بعد الشغل شوية .. وكمان عاوزة اعرفك على ماما ..
( هناء ) معلش مش هينفع والله يامنار ..
( منار ) ليه ..؟ اصلا مفيش حد هنا غير انا وماما وكريم ..
( هناء ) لا مقصدش بس سماح اختى وولادها جايين عندنا النهارده ومش هينفع اتأخر عليهم وكمان مقلتش لماما انى هخرج بعد الشغل .. مرة ثانية بقا ..
( منار ) ماشى ياحبيبتى .. مع السلامة
( هناء ) الله يسلمك .. سلام

فى منزل سعاد:
( سمير ) ايه ياسعاد الحاج عبد الله كل يوم يتصل عليا .. قولتى ايه فى الموضوع اللى كلمتك فيه ...
( سعاد ) والله ياسمير انا قلقانه من الموضوع ده ..
( سمير ) ليه .. يااااسعاد

( سعاد ) ماهو كبير عليها بردوا ياسمير وكمان كده اميرة هتسافر معاه بره يعنى علاقتها بإبنها هتتقطع .. وكمان انا مش عارفه اميرة هيكون رأيها ايه ..
( سمير ) اسمعى ياسعاااد .. اميرة كده كده هتتجوز وخاصة ان هشام من يوم ما طلقها ولا سأل ولا هيسأل فيها وكأنه ما صدق وطلقها وابنها كده كده هيكبر وهيتربى مع ابوه ..واميرة مصلحتها مع عبد الله راجل مستريح ماديا وهيأمن لها مستقبلها ومعجب بيها وبنتك شغلت له دماغه يعنى لو طلبت منه نجوم السماء هيجبهالها ...انا رأى تعرضى عليها وتوضحى لها النقط دى ومش بس كده لأ وتحولى تقنعيها .. سمعانى ياسعاااد ..
( سعاد ) ماشى انا هروح هفاتحها فى الموضوع ده ..
( سمير ) لأ تفاتحى ايه ... انا عاوز راى نهائى النهارده .. الراجل قالب لى دماغى كل يوم اتصال علشان يعرف رأيها .. وانا كده تقلت عليه بما فيه الكفاية .. يعنى هتيلى ردها النهارده

( سعاد ) خلاص خلاص ماشى يااااسمير ..
( اميرة ) ماماااا .. ياماماااا .. انا خارجة عاوزة حاجة
( سعاد ) رايحه فين يااميرة ؟
( اميرة ) هروح الكوافير .. وبعدين هروح النادى اقابل صحباتى هناك ..
( سعاد ) قبل ماتنزلى .. انا عاوزة آخد رأيك فى موضوع ..
( اميرة ) خير موضوع ايه ...
( سعاد ) تعالى اقعدى علشان نعرف نتكلم
( اميرة ) حاضر بس بسرعة انا مستعجلة ..

فى منزل ناهد:
( ناهد ) يااامنااار ..تعالى خدى كريم نيميه فى سريره
(منار ) حاضر ياماما .. هاتيه ...
( ناهد ) كنتى بتكلمى مين يامنار
( منار ) دى هناء بتسأل عليا ... علشان بقالى اسبوع مكلمتهاش ومخرجناش سوا .
( ناهد ) آآآه ..مش هتعرفينى عليها يامنار
( منار ) ان شاء الله فى اقرب فرصه هعرفك عليها .. هتحبيها اوى ..

سعاد قالت لأميرة على موضوع الحاج عبد الله وطلبه ليها بالجواز ..
( سعاد ) هاااا يااميرة رأيك إيه ...
( اميرة ) بس ده كبير اوى ياماما ...
( سعاد) يعنى انتى ياميرة خدتى ايه من الصغير غير البهدله معاه وعيشه اى كلام .. انما بقا الحاج عبد الله راجل مبسوط وهيعيشك احلى عيشه وهيسفرك مطرح ما انتى عاوزة وهتعيشى حياتك زى ما انتى عاوزة ... وكل اللى هتطلبيه هتلاقيه .. هاااا قولتى ايه ؟
( اميرة ) طب وكريم ابنى ...

( سعاد ) كريم ابنك وهيفضل ابنك بس كده كده هيتربى عند ابوه .. لإن كده كده يابنتى انتى مش هتقدرى تصرفى عليه .. فالافضل ليكى انك توافقى يااميرة ومتضيعيش الفرصة دى من إيدك ... ومتنسيش انك مطلقه ... يعنى فرصك قليله ومش كل مرة هيجيلك واحد غنى زى الحاج عبد الله ...
( اميرة ) بعد لحظات صمت بتفكر فى كلم امها ...
( سعاد ) هااااا قولتى ايه

( اميرة ) ماشى انا موافقه .. هتجوز عبد الله
سعاد اتبسطت من موافقة اميرة وبلغت سمير برأى اميرة وطلبت منه انه يبلغ الحاج عبد الله ويحدد معاه ميعاد علشان يزورهم فى البيت ويتفقوا على الشبكة والمؤخر والمهر ويحددوا ميعاد الجواز بعد انتهاء فترة العدة لأميرة ...

فى منزل هناء:
هناء داخله من باب الشقة وبتسلم على اختها وولادها يوسف وعبد الرحمن وسلمى
( هناء ) ايه ياسماح كل دى غيبه ... وحشتونى انتى والولاد
( سماح ) معلش ياااهناء والله انتى عارفه بيبقى عند ورديات فى المستشفى وكمان مشغوله مع الولاد وعادل .. حقك عليا .. انا مقصرة فى حقك
( هناء ) ولا يهمك .. ربنا يعينك على مشاغلك ..
( سماح ) هاااا وانتى عاملة ايه فى الشغل ..

( هناء ) الحمد لله كويسه ... اتعودت عليه .. واهى حاجة تشغلنى احسن من قاعدة البيت
( سماح ) ربنا يوفقك ياحبيبتى ويكرمك يارب ويرزقك بإبن الحلال ياهناء اللى يسعدك ياحبيبتى ..
(هناء ) بإبتسامه لأختها مااشى ياستى ...ولو انى تجربتى مع احمد تخلينى اشك فى صوابع إيدى ..
( سماح ) مش كل الرجاله زى احمد .. ومش معنى انك اختارتى غلط فى الاول .. انه المرة الجاية هيبقى نفس الإختيار .. المرة الجاية هتختارى صح ..
( هناء ) سماح ! انا مختارتش غلط فى الاول .. انا اختارته راجل محترم ومتدين وده اظهره ليا فى الاول ... انا مختارتش الفلوس ولا منصب ولا اى حاجة ...علشان تقوليلى انى اخترت غلط .. انا إختارت صح .. بس هو اللى كان غلط .

رواية سوء اختيار للكاتبة اسماء عبد العظيم الفصل السابع

فى منزل ناهد:
( منار ) الو .. ازيك ياهناء ..
( هناء ) الله يسلمك ازيك يامنار . عامله ايه .. وازاى كريم
( منار ) الحمد لله .. انا كويسه
منار بتسمع مامتها بتنادى عليها ..
( منار ) لحظة ياهناء ماما بتنادى عليا .. هشوفها عاوزة ايه ..
( هناء ) ماشى انا معاكى ...
( منار ) نعم ياماما فى حاجة ...
( ناهد ) كريم ياهناء سخن وبيرجع يابنتى ...

( منار ) طب لبسيه ياماما على ما البس واخده واروح للدكتور .. هناء انتى معايا
( هناء ) ايوه يامنار مال صوتك فى حاجة ولا ايه ..
(منار ) ايوه ياهناء كريم تعبان وهاخده وهروح للدكتور .. سلام دلوقتى
( هناء ) انتى هتروحى لوحدك بيه ..
( منار ) ايوه .. اومال هعمل ايه .. ماما رجليها تعبانه مش هتقدر تمشى ..
( هناء ) خلاص انا هلبس وهعدى عليكى .. ونروح بيه للدكتور
( منار ) شكرا ياهناء .. انا هلبس واستناكى .. بس متتأخريش الله يخليكى
( هناء ) ماشى سلام ..

منار خرجت لمامتها وقالت لهاان هناء هتروح معاها، هتعدى عليها وهيروحوا للدكتور سوا ... هناء لبست وراحت على بيت منار ضربت الجرررس .. منار فتحت الباب
( منار ) تعالى ياهناء .. ادخلى .. على ما اكمل لبس لكريم ..
( هناء ) لأ هستناكى هنا ياله بسرعه..
ناهد سمعت الحوار بين منار وهناء
(ناهد ) تعالى ياااهناء ادخلى .. اتفضلى ياحبيبتى ... دخلت هناء
( هناء ) السلام عليكم .. ازى حضرتك ياطنط
( ناهد ) ازيك ياحبيبتى .. كان نفسى اتعرف عليكى من زمان ..
( هناء ) بإبتسامه وانا كمان ياطنط ... سلامة كريم
( ناهد ) الله يسلمك ياحبيبتى .. وشكرا على كل اللى بتعمليه مع منار .. منار بتحبك اوى
( هناء ) متشكرنيش ياطنط انا بحس ان منار دى اختى .. وانا والله بحبها ..
هناء ومنار خدوا كريم ونزلوا راحوا للدكتور وكتب ليهم العلاج
( منار ) معلش ياهناء اشتالى كريم على ما اجيب الدوا من الصيدلية
( هناء ) ماشى تعالى ياكيمو ..

منار دخلت جابت العلاج وخرجت
( منار ) دلوقتى بقا فى مشكلة ؟
( هناء ) مشكلة ايه ؟
( منار ) الدكتور كاتب حقن وانا معرفش حد يديله الحقنه دى كلها
( هناء ) هههههههههه ياسلام على دى مشكله .. دى اسهل مشكله ..
( منار ) ازاى بقا .. طب حليها ياحلالة المشاكل .
( هناء ) يابنتى انتى ناسيه ان اختى ممرضه ..
( منار ) يعنى احنا هنروح لأختك علشان تديله الحقن.. طب وحقن بكره وبعد بكره
مش معقول هنروح لها كل يوم .. لأمينفعش ..
( هناء ) لأطبعا .. سماح اختى علمتنى انا ازاى ادى الحقن .. وده طبعا علشان ماما عندها السكر وانى اديها الحقن فى اى وقت ...يعنى انا اللى هادى الحقن لكيمو
( منار ) هههههه تصدقى انك فعلا حلالة المشاكل .. بس انا كده هتعبك معانا ياهناء
( هناء ) لاتعب ولا حاجة كل يوم بعد الشغل هعدى عليكى علشان ادى لكريم الحقنه وربنا يشفيه يارب ...
( منار ) بس تصدقى انى مبسوطه انى هشوفك كل يوم ...
( هناء ) وانا كمان ...

فى القاهرة هشام قاعد وبيفكر فى الكلام اللى امه قالتهوله وموضوع الجواز ومسئولية كريم – ومنار اخته اللى كلها اقل من شهر ونصف وهتتجوز وتسافر مع جوزها – وفكرة انه يرجع اميرة لعصمته علشان خاطر كريم وبسرعه بيطرد الفكرة من دماغه ... لأ اميرة ... مستحيل ..بس كريم ملهوش اى ذنب ... اعمل ايه ياربى ...
( هشام ) اما اقوم اتصل اطمن عليهم وحشونى اوى وخصوصا كريم .. الو
( ناهد ) الو .. ازيك ياهشام .. عامل ايه يابنى
( هشام ) الحمد لله كويس ياماما ازيك انتى وازى صحتك ومنار عامله ايه وكريم عامل معاكم ايه ..؟
( ناهد ) الحمد لله يابنى ... كويسين
(هشام ) مال صوتك ياماما ..!

( ناهد ) ابدا مفيش ..كريم تعبان شويه ومنار خدته وراحت بيه للدكتور
( هشام بقلق ) تعبان ماله !
( ناهد ) متقلقش ياهشام هو عنده برد فى معدته انا لسه مكلمه منار وطنتنى عليه وزمانها جايه .
( هشام ) طب اول ماتيجى ياماما كلمينى علشان اطمن ..
( ناهد ) ماشى ياحبيبى ... هشااااام فكرت فى الموضوع اللى كلمتك فيه ..
( هشام ) مش وقته ياماما .. لما ابقى آجى نبقى نتكلم ...
( ناهد ) ماشى ياحبيبى مع السلامة
رجعت منار البيت وكان معاها هناء علشان تدى الحقنه لكريم
( منار ) اتفضلى ياهناء ادخلى ..

( ناهد ) اخيرا جيتوا ..خدت كريم من منار هااااا طمنونى كريم عامل ايه ..
( منار ) كويس الحمد لله .. الدكتور كتب له على حقن وانا جبتها من الصيدلية وهناء ربنا يكرمها هى اللى هتديله الحقن ...
( ناهد ) انتى بتعرفى ياهناء
( هناء ) ايوه ياطنط .. اختى ممرضه وهى اللى علمتنى .. علشان ماما
( ناهد ) شكرا ليكى ياهناء .. تعبينك معانا يابنتى
( هناء ) لا تعب ولا حاجة ياطنط انا تحت امر الاستاذ كريم ..
هناء جهزت الحقنه وإيدتها لكريم وقعدت شويه وبعدين استئذنت ونزلت ناهد اتصلت على هشام تطمنه على كريم ..

فى القاهرة هشام اتصل على صاحبه ابراهيم:
( هشام ) الو ازيك ياابراهيم .. عامل ايه . اخبار الجواز معاك ايه ؟
( ابراهيم ) تمام ياإتش .. ازيك انت .. والشغل عندك عامل ايه
( هشام ) الحمد لله كله تمام .. بس كنت عاوز اسألك .. انت هترجع من الاجازة امتى ؟
( ابراهيم ) إيه ياعم انا لحقت ده حتى الاسبوعين لسه مخلصوش
( هشام ) معلش ياابراهيم .. انا هضطر ارجع بعد بكره المنصورة لإن كريم ابنى تعبان وانا قلقان عليه اوى .. فلو ينفع تشوف حد يتابع الشغل مكانى ..
( ابراهيم ) الف سلامة على كريم ... حاضر انا هشوف الموضوع ده ... بس هو مش كريم مع والدتك واختك ..

( هشام ) ايوه .. بس بردوا .. لازم اكون جنبه
( ابراهيم ) طب وبعدين ياهشام .. انت لو استمر الحال معاك كده يبقى مش هتشتغل وهتفضل قاعد جنب ابنك ...
( هشام ) يعنى اسيبه يعنى ياإبراهيم ...
( ابراهيم ) لأ طبعا انا مقصدش كده بس لازم ترجع مامته وتعيشوا سوا .. الولد صغير ومحتاج حد يراعيه .. ومفيش حد هيكون اقرب له من امه
( هشام ) انا بجد مش عارف اعمل ايه .. عموما ربنا يقدم اللى فيه الخير

فى منزل سعاد:
( سعاد ) يعنى انت خلاص ياسمير حددت ميعاد مع عبد الله علشان كتب الكتاب
( سمير ) ايوه هيكون على اول الاسبوع الجاى وبعد كتب الكتاب بيومين هياخدها ويسافروا على الامارات
( اميرة ) ماما انا عاوزة اروح اشوف كريم .. واحشنى اوى
( سعاد ) استنى بعد كتب الكتاب .. علشان هشام ميفتكرش انك رايحه له علشان يردك
( اميرة ) يعنى ده رأيك .. ياماما
( سعاد ) ايوه ..

بعد يومين --- فى منزل ناهد:
( ناهد ) تعالى ياهناء اتفضلى يابنتى
( هناء ) اومال منار وكريم فين ياطنط
( ناهد ) منار فى المطبخ وكريم نايم .. ادخلى يابنتى على ما اصحى كريم
( منار ) اهلا ياهناء .. ازيك
( هناء ) الحمد لله .. هاتى الحقنه لما اجهزها يامنار
( منار ) حاضر .. اتفضلى .. تحبى تشربى ايه ياهناء
( هناء ) ولا حاجة انا هديى الحقنه لكريم وهنزل على طول
( منار ) مستعجلة ليه .. مش ممكن لازم تشربى حاجة .. اعملك شاى
( هناء ) ماشى .. اوك

دخلت منار المطبخ تجهز الشاى وناهد قامت تصحى كريم .. وهناء قاعدة فى الصالة لقت باب الشقة بيتفتح ولقيت شخص داخل عرفت ان ده اكيد هشام اخو منار اتكسفت وحاولت متبصش عليه، دخل هشام الشقة لقى واحدة قاعده وبيقول فى نفسه مين دى ؟ وايه اللى جابها هنا ؟ قرب شويه ..
( هشام ) السلام عليكم
( هناء ) وعليكم السلام ...
هشام لسه هيسأل هناء ..حضرتك مين ..لقى ناهد شايلة كريم وجايه عليهم
( ناهد ) هشام انت جيت ياحبيبى .. وحشتنى وبتقرب منه وبتضمه ليها
( هشام ) بيبوس ايدها .. وبيشيل كريم منها وبيحضنه جامد وبيبوس فيه ..
( ناهد ) اعرفك .. هناء صاحبة منار وهى اللى بتدى الحقن لكريم وده هشام ابنى ابو كريم
( هشام ) اهلا وسهلا بيكى ..

(هناء) بإبتسامه وخجل .. الله يسلمك وحمدالله على السلامة
( ناهد ) اقعد ياهشام .. واقف ليه ..
( منار ) اهلا وسهلا بأبو كريم .. وبتقرب على هشام وبتحضنه وحشتنى اوى
( هشام ) انتى اكثر .. عارف انك تعبتى مع كريم معلش ماإنتى عمته بقا ولازم تتعذبى معايا شويه ...
( منار ) كيمو ده حبيبى .. هااا ياله ياهناء هتديله الحقنه دلوقتى ..
( هناء ) انا جاهزة ...
ادت هناء الحقنه لكريم وبعدها عملت منار الشاى لهناء وشربت الشاى وإستئذنت ومشيت وشكرها هشام على تعبها مع منار وكريم وشكرتها ناهد وطلبت منها انها تزورها ثانى فى اى وقت ..

( ناهد ) هشام " محمد " خطيب اختك جه من يومين وعاوزيحدد ميعاد كتب الكتاب علشان يخلص ورق منار علشان تقدر تسافر معاه
( هشام ) خلاص هكلمه وهحدد معاه الميعاد..
( ناهد ) بتبص لهشام .. مفيش جديد فى الموضوع اللى كلمتك فيه
( هشام ) رجوع لأميرة مش هرجعها ...وده قرار نهائى
( ناهد ) طيب اذن لازم تتجوز واحد تانية
( هشام ) خلاص لما الاقى واحدة مناسبه هبقى اتجوز
( ناهد ) طب واللى لقت لك خلاص واحدة مناسبه جدا
( هشام ) وكمان لاقيتها .. ده انتى مقرره بقا ...
( ناهد ) إيه رأيك فى هناء ؟
( هشام )كويسه ..
( ناهد ) يعنى عجبتك ...
( هشام ) عادى يعنى ..
( ناهد ) يعنى إيه عادى .. ماترد عليا كويس ياهشام ... انت محسسنى انى بغصبك على الجواز ...
( هشام ) ياماما كل الحكاية انى اتعقدت من الجواز وخايف ارتبط بأى واحدة وتطلع زى اميرة ... وانا لو هتجوز فأنا هتجوز علشان خاطر كريم .. وعلشانك انتى كمان .. علشان صحتك ..

( ناهد ) يابنى صوابعك مش زى بعضيها .. وبعدين هناء بنت كويسه ..
( هشام ) انا اول مرة اشوفها . بس انطباعى عنها واضح انها بنت كويسه ..بس انتى بتكلمينى كإنك متأكده انها هتوافق عليا وناسيه انى مطلق ومعايا ولد ...يعنى مش اى واحده هتوافق على الظروف دى وخصوصا انها متجوزتش قبل كده ..
( ناهد ) انت هتفرض انها هترفض طب ما نعرض عليها الاول وبعدين نشوف انما تقفلها من اولها كده يبقى مش هتتجوز تانى ابدا ... انا هخلى منار تحدد معاها ميعاد وهروح ازورها فى بيتها وهكلم مامتها ...

( هشام ) اللى تشوفيه ...
( ناهد ) منااااااااار
( منار ) ايوه ياماما ..
(ناهد ) ايه رايك فى هناء
( منار ) مش فاهمه يعنى ايه
( ناهد ) ايه رايك انا عاوزة اخطبها لهشام
منار بفرحه ياااااه ياريت ياماما ده يبقى احلى خبر ...هناء مؤدبه ومحترمه .. بس يارب هى توافق ...
هشام بيبص على منار وهى بتتكلم عن هناء وفى لحظتها قارن مابين كلام منار وناهد عن اميرة قبل مايتجوزها ومابين كلام منار وفرحتها انه ممكن يرتبط بهناء
( ناهد ) حددى لى ميعاد مع هناء اننا نروح نزورهم انا وانتى بس متقوليلهاش اى حاجة الا لما نروح
( منار ) حاااااااضر...