طريقة عمل الفلافل والحشوه الخاصه زى المطاعم

الفلافل او الطعميه المصريه

مكونات الفلافل المصريه
1/2 كيلو فول مدشش منقوع لمدة 24 ساعه
ربطة كرات
نصف ربطة كسبره خضرا
نصف ربطة شبت
نصف ربطة بقدونس
بصله متوسطه
5-6 فصوص ثوم
قرنين شطه خضرا حاميه
التوابل:
1م.ص فلفل اسمر
2م.ص كسبره ناشفه
1 م.ص شطه حمرا ناعمه (حسب الرغبه)
1 م.ص كمون
ملح حسب الحاجه


مكونات الحشو :
حبه طماطم
حبه بصل
قرن شطه خضرا حاميه او بارده
1/2 م.ص فلفل اسمر
1/2م.ص كمون
1/2م.ص كزبره ناشفه
1/2 م.ص ملح
شطه حاميه حمرا مفرومه (حسب الرغبه)
زيت






طريقة عمل الفلافل






طريقة تحضير عجينة الطعميه:

حنجيب الكبه او المفرمه اليدوى وحنبدا نحط شويه فول ونفرمهم ووراهم بصل وخضره ونفرم وبعدين فول وفصين توم ونفرم وهكذا لحد مانخلص الكميه اللى عندنا من الفول ومش لازم الخضره كلها تتفرم على حسب مانتى شايفه العجين واللون معاكى
لو العجينه اللى طلعت ميتها كتير حنجيب مصفاه الفاكهه وتمون عيونها ضيقه شويه ونخط العجين شويه شويه ونصفى الميه بتاعتهم
بعد كده حنحط التوابل والملح زى ماحنا عاوزين ونقلبهم كويس لحد مايمتزجوا ببعض
حنشيل الكميه اللى عاوزينها فى الفريزر فى اكياس ونبططها عشان متاخدش مساحه
اما اللى حيتقلي بقى تعالى نعرف ازاى نعمل الحشوه بتاعه الطعميه المشطشطه او بارده ع حسب رغبتك
فى طاسه على النار حنحط الزيت ونسيبه يسخن
حننزل بالبصله ونقلبها لحد لونها يتغير
حننزل بالفلفل الاخضر ونشوحها شويه مع البصل
اول البصله لونها مايحمر والفلفل يدبل معانا حننزل بالطماطم





بعد الطماطم ماتدبل وتتسبك شويه حننزل بالتوابل بتاعتنا والملح
ونسيبها تتسبك
بعد كده حنطفى عليها النار ونسيبها تبرد ونبدا نحشى بيها الطعميه ونحط السمسم على وش الفلافل

وكمان ممكن نسلق بيض ونغلفه بعجينه الطعميه والسمسم على الوش ونحمرها فى الزيت بتبقى تحفه ودى اسمها عين الكتكوت
وبكده نكون خلصنا احلا الاكلات الشعبيه عن المصريين
تقدم مع
الفول بالخلطه

بالف هنا وشفا