رواية صبرا يا قلبي الجزء الأول للكاتبة روز الفياض الفصل الحادي عشر
ماجد: بس اني سمعت غير شي؟ ذهب: شنو؟ ماجد: تره امي حميده حجتلي شلون خالتي دارت وجها من اجيتي تسلمين عليها هي وبناتها.. سكتت. ماجد: الو ليش ساكته؟ ذهب: يعني شحجي همه رد فعلهم طبيعي تجاهي الظاهر على الرغم من انه الانفصال صارله سنين بس جان عدهم امل ترجعون سوه واني طلعت فجأه وخرب كل شي شتتوقع يكون رد فعلهم اجيت بمكان بتهم.
سكت هو بعدين كال: انت طيبه زياده عن اللزوم اذا همه عدهم هيج امل فهاذي مشكلتهم ولاخر لحظه يعرفون مستحيل ارجعها ولو ابقى بدون زواج ماارجعها، بعدين انت مخربتي شي هو كل شي جان خربان من اول يوم وانت من اجيتي صححتي الوضع ومرة اللخ متسلمين عليهم همه يجون يسلمون عليج مااقبل احد يتصرف تصرف مو حلو ويه مرتي. ذهب: تره الموضوع ميستوجب الله يسامحها عمه حميده.
ماجد: لازم تكولي تصرفها صحيح حتى من البدايه واحد يكون على بينه. ذهب: تره هي مو حرب واني لو بمكانهم راح اتصرف نفس التصرف. ماجد: الله كريم. ذهب: الله كريم. ماجد: حبيبي اكو شي مهم ومستعجل لازم نحجي بي؟ ذهب: اوكي. احجي. ماجد: لا مينفع بالتليفون باجر اجي ونحجي ان شاءالله. ذهب: خوفتني شصاير؟ ماجد: لتخافين مصاير شي اريد نحجي عن موعد الزواج وهالامور المتعلقه بي. ذهب: اها الله كريم.
ماادري ليش ضجت وحسيت صدري ضاك من حجه هيج حسيت اكو شي راح يفاجئني بي يمكن ميريد يسوي عرس او يمكن يريد يقدم الموعد على نص السنه ماعنده استعداد ينتظر لحد مااتخرج. ماجد: وين صرتي؟ ذهب: موجوده. ماجد: زين دزيلي الصور اللي دزتلجياهم عهود. ذهب: هاا ياصور شتسوي بيهم؟ ماجد: صورج بالصالون تره حميده مخلت شي محجتلياه هههه. ذهب: الله يسامحها خطيره. ماجد: هههه فعلا يالله دزيهم. ذهب: ليش؟ شتسوي بيهم؟
ماجد: انشرهم عالفيس. شسوي بيهم يعني مرتي واريد اشوف صورها بيها شي؟ ذهب: اي بس مو هسه وره الزواج تشوفهم. ماجد: ههههه حلوه هاي وره الزواج يعني اني مشفتج بالحقيقه بيوم المهر مو اخذنه صور بالاستوديو سوه اشمعنه صورج وحدج ميصير اشوفها؟ ذهب: اوكي. اوكي. امري لله بس تشوفهم كل وحده ثانيه وتمسحهم مو اكثر عفيه. ماجد: هههه صار انت بس دزيهم يجوز ميعجبوني. ذهب: ان شاءالله. ضحك بصوت عالي.
دزيت الصور عالواتس وطلعت وغلقت التليفون مااريد اقره ردوده هذا يحرجني. وره ساعه كلت هسه اكيد نام خل اروح اشوف رده. كاتب: ممصدك صرتي مرتي حلالي ملكي إلى وحدي الحمدلله اللي عوض صبري بيج وان شاءالله راح تكونين سعيده بحياتج وياي. حسيت جلدي قشعر من قريت كلامه يربي هذا باني آمال عليه شلون لو معجبته بعدين شلون لو طلعت مو مثل ممفكر ومتأمل؟ بعدين اني مستحاي ماصخ شلون اكدر اللحك على حجيه وتصرفاته؟
الصبح الساعه ( 10 )اجه ماجد اني توه كاعده من النوم ومغسله دخل وماما راحت تصبله جاي وتسويله ريوك على مااصلي. صليت وخلصت ورحت نسيت اني شلابسه بجامه خضره فستقي ومرسوم عليها جوكليت وكيك ودباديب دخلت وسلمت هو يباوعلي كلي: منين تشترين هاي البجامات؟ باوعت لبجامتي طلعت ركض بدلتها لبست جلابيه دخلت ضحك كتله: شبيها بعد هاي؟ ماجد: مابيها اصلا كل شي حلو عليج بس ذيج هم جانت حلوه ليش بدلتيها؟ ذهب: اممم. واضح.
سكت وكلي: تعالي يمي. هزيت راسي لا. ماجد: تعالي خل نحجي شويه كافي ضحك. اتدنيت شويه يمه. ماجد: اكو شي لازم اخذ رأيج بي بس اتمنى توافقين. ذهب: شنو شكو؟ ماجد: ذهب امي وضعها مو تمام ويمكن بأي ساعه الله ياخذ امانته لاسمح الله. سكت حسيته اختنك يريد يبجي خفت اتدنيت يمه كتله: اسم الله ليش تحول هيجي طولت العمر والسلامه الها ان شاءالله. هو لزم ايدي ودنك وبجه بدون صوت. اني اتحنطت لااعرف شحجي ولا اعرف شسوي.
اخر شي ضغطت على نفسي وكتله: ماجد لتسوي هيج الله يخليك تدري اخاف ومااتحمل. رفع راسه باوعلي ماجد: الام عزيزه ذهب واني ماعندي بحياتي بس امي وانت اذا لاسامح الله صارلها شي اريدج يمي. ذهب: اسم الله لتكول هيج الله يخليها الك ويخليك الها يارب. اصلا اني يمك وين رايحه يعني انت بس لتفكر هيج. ماجد: لااني اريدج يمي ابيتي ويايه زوج وزوجته وعايشين ابيت واحد.
سكتت اني حسيته يريد يكول شي بس خايف من رد فعلي خفت من كلامه شيقصد؟ ماما دكت الباب علمود الريوك كمت اني جبته وهو كام اخذه من ايدي خلاه بس سمعته كال آاخ. كعد وحط ايده على كلبه. ذهب: كلبك يوجعك؟ ماجد: شويه لان ضايج ومااخذت الحبايه؟ ذهب: ليش هيجي تهمل نفسك؟ سهر وتعب وهم متشرب دوه؟ ماجد: مو مهم اشربها بعدين المهم هسه احنه لازم نتزوج باقرب وقت. ذهب: شنووو؟
ماجد: اريد امي تشوفني متزوج قبل لتموت ذهب، ادري مو هيج جان اتفاقنه بس الظروف اتغيرت، وبس الموعد راح يتقدم الباقي كله مثل ماهو مراح يتغير شي دوامج دراستج اللي ترديه اني حاضر بي وممنون. اني اسمع بس مااكدر احجي.. من الصدمه اصلا ماادري شفكر شحجي شرد بس ساكته.. هو لزم ايدي باسها كلي: مراح اضغط عليج ابد كل شي براحتج انت وبموافقتج فكري بالموضوع وان شاءالله خير. سحبت ايدي. ذهب: اكثر من هيج شلون يكون الضغط؟
من تكول اريد امي تشوفني متزوج قبل لتموت هذا شنو؟ شفكر يعني؟ تريدني افكر اقبل لو ارفض؟ واذا ارفض ولا سامح الله صارلها شي الحجيه الله ليكولها شنو برأيك راح يكون موقفي من نفسي وكدامك وشلون ضميري يتقبلها؟ واذا قبلت شلون؟ اذا قبلت الموضوع اصعب بهوايه لان جذب مااكدر شي فوك طاقتي فجأه اكون. متزوجه ووياك بنفس الغرفه مااتصور اكدر اني مو مثل باقي البنات ماجد.
يمكن كل شي طبيعي بس اني وضعي وتفكيري مو طبيعي. بس شسوي الله خالقني هيج مو بيدي كول مخبله كول مريضه كول معقده كول خجوله اكثر من اللازم حقك ادري حقك بس شي خارج عن ارداتي والله. جنت احجي بعصبيه ودموعي تصب وهو ساكت ومدنك رفع راسه مسح دموعي كلي: ادري مجنتي متوقعه هيج شي وبهالسرعه بس غصبن عني والله. مو قصدي اضغط عليج بس ردت احجي كل اللي بكلبي الج يمكن ارتاح.
ومتفهم كل مشاعرج انت مو مريضه ولا معقده ولامخبله انتي عكس هالاشياء كولها انتي عاقله ورزينه وحساسه وخجوله وهالخجل هو اللي يميزج بنظري عن باقي البنات. واعرف خجلج وين يوصلج بالتفكير بس ثقي انه اني مستحيل اقترب منج قبل متكونين مستعده ومقتنعه وموافقه وبرغبتج انت.
وحتى ترتاحين راح نكون متزوجين بس كل واحد ينام بغرفه وكدام امي والاهل كل شي طبيعي حياتنه عاديه مثل اي اثنين متزوجين لحدما تتعودين علي وتتقلبيني. مااكدر احجي ممتخيله يخليني بهيج موقف صعب اذا وافقت صعبه واذا موافقت اصعب لان راح يكرهني علمود امه اذا لاسامح الله اتوفت. كام هو ودنك باس راسي وهم كال آاخ. اني رفعت راسي باوعتله ايده على كلبه مسحت دموعي وكمت محاجيته رحت جبتله مي وانطيته.
واني استلمت الخط السريع ابجي ظليت حيل وماما خطيه اجتي تركض عبالها اتعاركنه لو انفصلنه. بعدين وره ساعه تقريبا هديت وحجيتلها اللي صار. ماما: حبيبتي هذا قدرج ونصيبج وبالنهايه انتي تقررين مو احنه احنه ضغطنه عليج اول مره بس هسه القرار الج انتي شوفي الصح شنو وسويه.
بيومها مااكلت شي ولاطلعت من غرفتي ولا سويت شي بس الصلاة والبجي مااريد اتزوج بهالسرعة بعدني مااعرفه ولااكدر اتقبله وماجد مااتصل بعد ولادز مسج الظاهر يريدني افكر براحتي مدري ياراحه بعد إلى ارتاحها. اجه بابا وحجه ويايه نفس حجي ماما بس بالنهايه كلي: خلي نفسج بمكانه بابا حتى تكونين عادله واني ادري بيج مؤمنه وتخافين الله وكلبج طيب.
يعني من كلامهم همه موافقين بقيت بس اني ولازم اكون عادله على حساب نفسي ومحد جان عادل ويايه من سراج لبابا وماما لماجد كلهم منطوني فرصه وكلهم اتصرفوا ويايه بأنانيه. اكيد مقهورين على ماجد لان هاذي امه واني هم عاذرته واعرف حقه بس مو بيدي. اخر شي كمت اتوضيت ورجعت صليت استخاره بلكي ربي يهديني للي بي صالح ان شاءالله. وحطيت راسي ولزمت سبحتي اذكر الله.
لحدما غفيت وكعدت على صوت اذان الفجر عبالك يأذن براسي نعساانه بس جبرت نفسي اكوم اتوضه واصلي خلصت فتحت تليفوني شفته جان موجود عالواتساب قبل دقيقه فعرفت كاعد يصلي. لا اراديا وبدون شعور كتبتله: لشوكت يعني اتقدم الموعد؟ انتظرت شويه ماكو رد الظاهر نام، رحت اني هم اتمددت بجربايتي وظليت اسبح سبحان الله والحمدلله.. شويه وسمعت صوت مسج كلبي ظل يدك مااريد احجي وياه هسه. فتحته المسج: ماجد: صباح الخير حبيبي.
مارديت رغم هو جان موجود بس حسيت بعدني مالي خلك. ماجد: ماكو موعد. ولااكو زواج مادام انت ما الج رغبه بهالشي معناها ماله داعي اذا مو عن قناعه واذا مو بموافقتج اني مااقبل وماارضاها لا الج ولاالي. قريت حجيه استحيت من نفسي هو شلون يحجي ويدور رضاي واني افكر بنفسي. ضغطت على نفسي ورديت: اذا على كلامك البارحه يعني، البارحه من كلت كلمن بغرفه فاني موافقه. ماجد: اكيد على كلامي مراح يتغير من كلامي شي كوني على ثقه.
ماادري ليش حسيت ارتاحيت ولاعبالك البارحه جنت ميته من البجي والحسره. ماجد: حبيبي شكرا هذا الموقف مراح انسالجياه بحياتي. ذهب: اتمنى تكون بس صبور ويايه ومتنسى وعودك الي. ماجد: عمري كله الج يرضيج هلكد صبر؟ اني اذا كلت كلمه انفذها لتخافين مني انت عندي اعز من روحي وتأكدي مراح تندمين على هالشي.
يأذيني اكثر كلامه الحلو وتصرفاته ويايه احسه مو مثل باقي الشباب اللي شفتهم بالكليه لا مختلف يعني مو بس بالعمر والتفكير الناضج بس مؤدب خلوق متدين كريم متواضع اسلوبه بالكلام مقنع ومؤثر رزن بتصرفاته ثكيل احس مااستاهله واحب حنيته على امه وتفكيره براحتها اتمنى ابادله نفس الشعور اتمنى احبه ذهب: الله كريم. ماجد: يالله حبيبي روحي نامي وارتاحي باجر نحجي لازم انزل لامي اوديها للحمام تتوضا حتى تصلي.
ذهب: اوك ينطيك العافيه. ماجد: انت عافيتي. مارديت فدزلي: وراح، اني رجعت نمت. كعدت الظهر ماما خلتني نايمه تدري نفسيتي تعبانه. بالليل دز مسج: هلو حبيبي شلونج؟ اريد اجي بس اريد الوالد يكون موجود حتى نحجي. ذهب: اي موجود. ماجد: اوك اني جاي مسافة الطريق ان شاءالله.
رحت بلغت بابا وكعد ينتظره واني رحت مشطت شعري ولبست فستان طويل وكلوش لونه ابيض ومشجر كله ورد وربع ردن وخليت عطر ولبست كلاده بيها فص زغير ازرك حسيت نفسي مرتاحه يمكن هاي نتيجة الاستخاره. وصل وكعد يم بابا وبدوا يحجون ماما دخلت الجاي والكيك وكعدت يمهم اني كاعده بغرفتي منتظره النتيجه. وره شويه صاحلي بابا وبدوا يحجون ويتناقشون واتفقوا انه الزواج بعد اسبوع يعني الجمعه الجايه.
مجان عندي اي رد فعل شمتوقعه مثلا يكلولي بعد شهر لو شهرين وبالنهايه اني وافقت ولازم اتحمل. بابا وماما طلعوا وخلونه اني وماجد وحدنه حتى نحجي. ماجد: تعالي يمي. مقبلت هزيت راسي لا. اجه هو كعد يمي خله ايده على راسي باس راسي كلي: سامحيني. طاحت دموعي. ماجد: تدرين كلبي يظل يوجعني من اشوفج تبجين. رفعت راسي: شربت الدوه؟ ماجد: مااشرب مادام تبجين. كمت اني صبيتله مي بالكلاص وكتله: يالله طلعها للحبايه واشربها.
ماجد: اذا متبطلين بجي مااخذها. مسحت دموعي كتله: يالله اشربها مادام الله هاديني لهسه. ماجد: مادام هيج اشربها. طلع الحبايه وشربها وكلي: زين مادام الله هاديج لهسه عندي سؤال؟ ذهب: شنو؟ ماجد: يعني اذا الله مهاديج شراح تسوين؟ ذهب: ما اسوي. ضحك هو وكال: طبعا متسوين شي مو كتلج انتي بزونه زغيرونه بزونتي. باوعتله حسيت لاول مره مو خجلانه او خايفه كتله: ماجد كول والله تخليني اكمل دراستي؟
ماجد: وغلاة امي اخليج تكملين دراسه. حتى اذا تردين تكملين دراسات كملي ليش مااخليج يعني اخر سنه حرامات بعدين اني اريدج تكملين وتاخذين شهاده ممكن تفيدج بيوم من الايام محد دايم لاحد. ارتاحيت من حلف بأمه وهسه حسيت امنت بي من هالناحيه بقت شغلة كلمن اله غرفه هاي الما اكدر اصدكه بيها الا اشوف بعيني.
كام يريد يروح كلي: باجر ان شاءالله اروح اشوف قاعه حتى احجزها للجمعه بعدين امر عليج نروح نشتري غرفة نوم حتى يلحكون ينصبوها وتخلين اغراضج بيها. ذهب: الله كريم. راح وبقيت اني اصفن بحدي شلون الحك ومنين ابدي كلشي ممجهزه كلت لماما كالت من باجر الصبح نروح للسوك. الصبح طلعنه للسوك اني وماما اشترينه جهزت ملابس وشغلات عرايس.
العصر اجه ماجد رحنه افترينه عالقاعات كلها محجوزه هو ضاج حيل وحسيته تعب كال: عبالي اخلص منها اليوم حتى ابدي افكر بأمي منو يبقى يمها بالبيت بيوم العرس. ذهب: والخدامات وين؟ ماجد: موجودات بس هو عرس يعني يطول كل هذا تبقى وحدها خطيه وهمه خطيه محبوسات وياها. ذهب: يعني ماكو امل تجيبوها على الكرسي مثل المهر؟ ماجد: مااريد اجازف اخاف تتعب بالبيت احسنلها شوكت متتعب تتمدد بفراشها تنام.
اني صفنت خطيه مشلوع كلبه بس شكد الله يحبه لان مخليه بار بامه يمكن اني اكون محظوظه بي. ذهب: زين شرايك نسويه بالبيت؟ ماجد: يعني هم فجأه وهم مغصوبه وهم بالبيت؟ بعدين اني هم اريد عرس مو بس انت ههه. اتنهدت بحسره زين انه هو فاهم وعارف شنو اني حاسه زين ومقدر هالشي.
رواية صبرا يا قلبي الجزء الأول للكاتبة روز الفياض الفصل الثاني عشر
ذهب: بالبيت احسن حل الديوانيه عدكم حيل جبيره نفتح ديوانية النساء على ديوانية الرجال تصير قاعه بس تشيل القاطع. ماجد: هسه نحصل قاعه لتخافين. ذهب: اني مخايفه ومو مهم عندي العرس وين بس اني اكول بالبيت خاله حتكون موجوده وتحضر العرس وتشوفك عريس مو انت هيج تريد؟ ماجد: اتمنى بس مينطيني كلبي اسويلج عرس بالبيت. ذهب: مو مهم اصلا.
ماجد: مو(يكولون كل له من اسمه نصيب) وانت ذهب شتتوقعين يكون نصيبي منج مو نصيبج انتي؟ باس ايدي وكلي: انت احلى عوض من الله واحلى دعوة والده وان شاءالله راح تكونين سعيده ويايه وراح اسويلج البيت احلى من القاعه مراح يكون عرسج اقل مستوى ابد. بعدين رحنه شفنه غرف نوم هوايه موديلات بس حيره وهو كلي: هي الج انت اختاري على ذوقج اللي تعجبج اني عندي غرفه. من كلي هيج ارتاحيت تأكدت من شرطي الثاني.
ماجد: اني عجبتني الذهبيه وفضيه. ذهب: حلوه بس سعرها مبالغ بي. ماجد: السعر مو مهم المهم نشتري شي مقتنعين بي وعاجبنه واني اشوفها فخمه وحلوه وتستاهل سعرها وانت براحتج. ذهب: كيفك. ماجد: لا مو كيفي اذا معاجبتج ملازم. ذهب: لا بالعكس بس سعرها هوايه. ماجد: خلص اذن هاذي. وفعلا اخذناها. ماجد: الحمدلله خلصنه هسه بما انه احنه مجان عدنه فتره خطوبه طويله حتى نطلع سوه واعزمج او تعزميني فهاذي فرصتنه اعزمج لو تعزميني؟
ذهب: اني مااعزم احد. ماجد: افه ليش هيج اني مو احد معقوله كل هالطيبه وتطلعين بخيله. ذهب: يجوز. ماجد: مااصدك عموما هاي اول عزومه فلازم على حسابي. رحنه اكو مطعم زغير طلبنه اكل وكعدنه نحجي. ماجد: نحجي شويه قبل ميجي الاكل. حبيبي من اللحظه إلى تدخلين بيها بيتي راح تصيرين مسؤوليتي شكو احد يضوجج او يسمعج كلمه او يتصرف وياج تصرف ميعجبج تكوليلي زين؟
طبعا البنات بالبيت همه يسوون كل شي انت عليج تدرسين وترتاحين واذا خلصتي دراسه تكعدين يم امي تسولفين وياها تونسيها على ماارجع من الشغل هي خطيه تحتاج احد يجي يمها ويسولف وياها عمتي تروح وتجي بس متطول لان عمي متعود عليها عنده بالبيت. ذهب: ان شاءالله. ماجد: اكو ولد صديقي عنده محل مال فساتين اعراس راح اخليه يدزلي صور واذا يعجبج شي كولي. اوك؟ ذهب: ان شاءالله. تعشينه ورجعنه للبيت وصلني وراح.
فاطمه: مقبوله مقبوله كله مدح مدح ان شاءالله بس احجي كتلني الفضول. حجيتلها الاتفاقات اللي صارت بينه. فاطمه: صخام معقوله؟ اول زواج اشوفه هيج زواجيش هذا؟ ومن كل عقلج انت هو ينفذ الشرط الثاني وكل واحد بغرفه ههههههه اكص ايدي اذا كدر يتحمل اسبوع بغير غرفه. ذهب: اي عفيه بعد بعد خوفيني حتى بلكي يوكف كلبي من الخوف وارتاح من هالبلوه.
اتفقت وياها هالكلام بيني وبينها حتى ماما متعرف بي ولا البنات لو مهما يصير لان ماجد جان هذا شرطه. محد يعرف باللي بينه. ثاني يوم مااجه ماجد ولا اتصل اكيد مشغول بالليل دزلي صورة الصالتين فاتحيهم على بعض وصايره قاعه جبيره والعمال ديشتغلون دزيتله مسج: ينطيك العافيه تعبت اليوم اكيد.
ماجد: الله يعافيج لا والله العمال هم يشتغلون ومحمد ابن عمي يمهم اني بالشغل تعرفين لازم اخلص شغل على كد مااكدر حتى ميتراكم الايام الجايه. ذهب: كواك الله. ماجد: كوه حيلج. نمت والصبح رحت للصالون صبغت شعري وحفيت وجهي وحواحبي رتبتهم ورجعنه بالطريق اتصل ماجد يريد يجي ياخذ ماما حتى ترتب اغراضي بالغرفه. اجه اخذها اني مطلعت كلت لماما كوليله بالحمام مردت يشوف التغيير بشكلي.
رجعت ماما مصورتلي الغرفه كولش حلوه ومرتبتها باقي بس فرشة العرس تنفرش. ماما: بس اغراض ماجد ممخليها بالغرفه كال خليهم بالغرفه الثانيه هاي اكيد متكفي لاغراضها هههه كتله صحيح والله. الحمدلله من دبر عذر معقول راح من بالي ماما ممكن تنتبه. ماما: الطابق الفوك كله الكم محد فوك غرفة ماجد القديمه وبصفها غرفتكم الجديده وبينهم باب وكل غرفه بيها حمام منفصل. وبره هول مثل الجوه ومطبخ جبير وكامل. ذهب: امم.
ماما: زين ان هو مخلي مصعد هاي الخدامات توكع رجليهم يصعدون وينزلون الله يرزقهم ويوسع رزقهم على عينج ان شاءالله اكثر واكثر. دك تليفوني مسج فتحته ماجد داز صور فساتين الاعراس كعدنه انه وماما نختار. اخر شي قررنه ودزيتله مسج كتله هذا. ماجد: تم حبيبي بعد شنو تأمرين؟ ذهب: سلامتك مايأمر عليك ظالم. ماجد: وبعدين بهالحجي الحلو. ذهب: ههه بعد مااحجي خلص. ماجد: لا لا احجي اني اريدج تحجين حجيج حلو. غلست استحيت.
ماجد: راح ادزلج رقم المحل مال البدلات واتفقي وياهم عالتفاصيل اكسسوارات وعالسوالف اني ماافهم بيها. دز الرقم واتفاهمنه وياهم واتفقنه والتوصيل راح يكون يوم الاربعاء. الاربعاء العصر وصل الفستان ويجنن ولبسته يم ماما وبابا طبعا خلصوهاا بجي حضرت الشغلات اللي اخذها ويايه للصالون مااريد انسى شي فطوم راح تروح ويايه للصالون وطبعا بنات عمه حجزنه بنفس الصالون مال المهر.
يوم الخميس بالليل هو جانوا مسويله اصدقائه حنه وولد عمه واهله وكل شويه يدزلي صوره لو مقطع فيديو شلون يركصون وشلون يهوسون وعمته شلون تركص هي وعمه. اني رتبت نفسي ولبست فستان ماروني طويل وضيق وخليت مكياج خفيف لان الشله كالوا نجي بالليل نحتفل سوه وفعلا اجو وركصنه وضحكنه وتونسنه حيل وفطوم صورتني كم صوره وراها بابا اخذنه للاستوديو اخذنه كم صوره للذكرى ورجعنه. الساعة ( ٢ ) تقريبا سمعت تليفوني دك مسج.
ماجد: حبيبي نمتي؟ ذهب: هلو لا منايمه. ماجد: ليش؟ متكدرين تنامين تفكرين؟ ذهب: لا جوعانه. ماجد: هاا هههههه فرحت عبالي تفكرين بيه. شنو اخبار حفلتكم اليوم؟ ذهب: زينه الحمدلله. ماجد: زين وين الصور؟ ذهب: يا صور؟ ماجد: صور الحنه اني مو دزيتج صور من قلب الحدث انتي المفروض هم تدزين صورج اشوفهم. ذهب: الصور بيها بنات وكلهم بدون حجاب ميصير تشوفهم.
ماجد: زين آمنت بالله بس اني مااريد صور البنات اريد صورج صور مرتي بس مو مال الاستوديو. ذهب: شمدريك؟ ماجد: شنو؟ ذهب: رحنه للاستوديو؟ ماجد: امي حميده كلتلي ههههه. ذهب: لا صدك هسه لو هي موجوده اكول بيها مجال. ماجد: ماكو اتصلت بيج جاوبت خاله كالت راحوا للتصوير. ذهب: اها اي معقوله. مكالت اتصلت. يمكن نست. ماجد: المهم هسه الصور انتظرهم قبل لا انام. ذهب: ادزهم بس بشرط متعلق ولتشوفهم هسه. ماجد: لعد شوكت؟
ذهب: بعدين يعني مو هسه. ماجد: هههه مااشي. دزيت الصور وايدي على كلبي من الفشله الله يبلاج يافطوم على هاللقطات كلها حركات واغراءات شورطني. بس لايعلق ويحرجني هذا لسانه فالت. دزيتهم واتندمت لو مغلسه لو كايلتله ممصورين شي صدك لو كالت فطوم عني ثوله. وصلته الصور بس معلق اني طلعت من الواتس كله ومن كد الفشله دخلت جوه اللحاف وغطيت حتى وجهي عبالك ديشوفني.
طبعا اذن واني كاعده كمت اتوضيت وصليت ورجعت بفراشي كلت بلكي تغمض عيني شويه بس ماكو فايده راح اموت من التفكير. وصل مسج فتحت الواتس ماجد: حبيبي صباح الخير صليتي؟ ذهب: صباح النور اي الحمدلله. ماجد: تمام خل انزل للعلويه حتى تصلي. ذهب: الله وياك. ماجد: شكرا البارحه مكدرت انام بسببج. ذهب: ليش؟ شكو؟ ماجد: الصور. بعدين نتحاسب عليهم. ذهب: دزيتهم والله. ماجد: اي وصلوا وشفتهم بس المصور عليه القاء القبض. ذهب: خرررب.
ماجد: ههههههههه يالله حبيبي بعدين نتحاسب هسه روحي ارتاحي وراج تعب. راح واني نمت شويه( ب9 ) ماما كعدتني اجت فاطمه حتى ماجد يودينه للصالون. وصلنه ماجد للصالون بس طول الطريق اني ساكته وهو هم مبين متوتر بس فطوم مبطلت حجي وضحك خففت شويه التوتر. موعدنه جان ( ب4 )نطلع من الصالون ونروح للاستوديو وبعدين يودينه للبيت وراها يرجع ويجون بالزفه.
رفعتلي شعري كله وخلتلي ورده بيضا وورده بنفسجي على الجانب وخلولي مكياج بنفسجي اتعجبت على نفسي عبالك مو اني طلعت شكل ثاني كلهم البنات اتعجبوا وكل شويه وكالت فطوم اليوم وين ترحين من ماجد. وعهود والبنات يضحكون ويكلولها اي والله.
اني كاعده على اعصابي واهز برجلي من التوتر مااكدر احجي ولاحتى ابتسم من الخوف والتفكير سمعنه صوت سيارته اني كمزت خفت وفطوم: على كيفج حبيبتي على كيفج لتخافين شنو هو اعدام اني وياج مااخليج حتى لو انام وياج بالغرفه. ذهب: ولااا كلمه ولاااا كلمه صار ساعه تخوفين بيه هسه صار مو اعدام.
طلعت هو لزمني نزلني بس اني ارجف ومخلوسه مااكدر حتى اتنفس هو فتح الباب الكدام اشرتله عالوره لان البدله منفوشه هواي فطوم تشرحله بالنيابه عني اني عبالك خرسه بس بالاشاره. وصلنه للتصوير نزلوني ودخلنه فطوم نزعتني البرنص والعبايه اني مثل الصنم وبس واحد يكلي بز ابجي. هو يباوعلي شفته يباوعلي درت وجهي وانطيته ظهري من الخوف ماادري شسوي احتاريت.
دخلت المصوره وبدت تعدل وكفتنه بدينه باللقطات الروتينيه خلي ايدك على خصرها وخلي ايدج وره راسه هو راسا خله ايديه حاره وابتسم اجت فطوم العوبه خلت ايدي وره راسه كلتله: تره هي اليوم فاقده الوعي من هسه فانت دير بالك لتبجي وتفضحنه اتصرف وحدك. ماجد: مبين عليها. دنك يم اذني كلي: عزمتوا وهيبه؟ ذهب: هااا ياوهيبه؟ ماجد: وهيبه. ذهب: ضحكت من كل كلبي اريد اسكت مااكدر والمصوره ضاجت كل لقطه اتذكر واضحك وهو هم يضحك.
اخر لقطه دائما محرجه كالمعتاد وكفتنه عبالك يريد يبوسني اني حسيت عركت من المستحه وكتلها: لاغير لقطه ماكو؟ مااريد هاي اللقطه. المصوره: بالعكس هاي احلى لقطه كل العرسان يطلبوها. ماجد: اي فعلا احلى لقطه. كال بصوت ناصي بعدين من وكفنه كال: عالاقل بس بالصور. ذهب: والله اذا حجيت شي بعد ابطل تره والله. ماجد: لاخلص التوبه بعد مااحجي. خلصنه ورحنه وصلنه لبيت اهلي وراح حتى يجيب اهله.
دخلت اشتغلت الهلاهل والاغاني والتصوير والبنات يركصون بس ماما خطيه تبجي وبابا دخل اتصور ويايه وظل يبجي واني ابجي. وره ساعه اجوا اني عبالك رايحه للامتحان كلبي يدك وبطني توجعني من الخوف. دخلوا يركصون ويهوسون واني خايفه وارجف من الخوف.
ظلوا يضحكون ويفرون بأيديهم عافوني ورجعوا لمكاناتهم. واني ظليت الوب بمكاني. دخل ماجد كعد شويه جانت اخر اغنيه وراها نكوم نطلع لبسوني البنات البرنص وهو نزله على وجهي وبدينه نطلع اني هنا خلص انتهيت ظليت انحب نحيب على ماما هي لازمه ايدي واني لازمتها بكل قوتي هي تبجي واني ابجي كلها ظلت تبجي على بجينه انقهروا حيل عليه وعلى ماما خطيه.
اخر شي ماما بوستني وباست ايدي وتركتها اني من تركت ايدي عبالك واحد دفعني من السما للكاع بالضبط مثل مرات واحد من يحلم مرات يوكع من شي عالي ويفز مرعوب اني هيج حسيت بلحظتها. مااشوفها من البرنص بس شويه رافعته بس من عافت ايدي صحت: ماما لتعوفيني. وشهكت واسمع بجي عمه حميده والبنات اخذوا ماما جوه حتى يهدأوها اني ماجد سحبني من ايدي وفتح باب السياره وعمته خطيه تبوس بيه وتسكت بيه وعهود. اني جنت مثل المخدره.
صعدنه بالسياره وصعدت وكعدت عمته وعهود وره وطلعنه للفندق هو لازم ايدي. وعمته وعهود يسكتون بيه ويكلولي يوميه ماجد يوديج الهم شوفيهم تردين هم يجون وياج البيت جبير وفارغ بس اهدي شويه كل اللي ترديه يصير. ذهب: اريد ماما. عمته: ليش يايمه هيج تسوين بنفسج اني هم مثل امج ماعندي بنات انت بنتي اني يمج واذا تردين ابات وياج هم ميخالف. ماجد: يمه مو جنه اخذج الواهس حيل. عهود وعمته.
طول الطريق اصدقائه وولد عمه يسوون حركات بالسيارات مخلين كلهم اغنية جنه جنه بصوت عالي والناس بالشوارع تباوع عليهم شلون يسوون حركات بسياراتهم سووا ضجه بالشارع وكل شويه ينزلون يركصون ويرجعون. وصلنه للفندق وصعدنه ماجد حاجز سويت دخلنه سدوا الباب اجت عهود نزعتني البرنص والعبايه وكعدنه السويت بااارد واني فستاني مصلخ بدون ردن كتلني البرد حسيت ظليت ارجف.
عهود: شبيج تره بس اول يوم بعدين عادي. اني محجيت بس ارجف ماادري خوف ماادري اتمرضت. خلصت حطتلي مكياج خفيف حيل كلتلي: ميحتاج انت حلوه بدون مكياج. طلعتلي طقم قميص نوم طويل ابيض وفوكه روب طويل حلو هي جايبته لبسته بدون كلام. عهود: انت هسه اختنه الزغيره نحبج وندللج وندلعج من معزة ماجد واكثر. ذهب: مشكوره حبيبتي.
طلعت عهود بره يم عمتها وماجد اسمعها توصي ماجد: دير بالك عليها تره زغيره بعدها ومبينه فقيره متعرف شي مو مثل بنات هالوكت. مو تضوجها وتعصب عليها هسه هي امانه بركبتك خلصت كلبنه من البجي اليوم على امها هسه انت امها وانت ابوها واخوها وكل اهلها احنه منفيدها ولا نترس عينها. ماجد: خلص على كيفكم تره اني هم ابنكم استلمتوني عمتج مقصرت وانت هسه زين وصوها عليه.
عمته: هي متحتاج وصيه بنيه متربيه متهديه وطيبه واهلها ناس طيبين ومتهدين. بوسوه ودخلوا بوسوني واخذوا وطلعوا.. دخل ماجد اني لبست احرام الصلاة صليت هو دخل للحمام سبح واتوضا وطلع صلى. اني خلصت كعدت على الجربايه خليت راسي بين رجليه ودنكت حسيت نفسي بردانه يمكن اتمرضت ظليت كاشه بمكاني ونعست حيل بس بردانه عبالك عظامي جامده متحركت من مكاني. اجه ماجد كعد يمي. ماجد: حبيبي تعبانه؟ ذهب: لا.