رواية صبرا يا قلبي

رواية صبرا يا قلبي الجزء الثاني للكاتبة روز الفياض الفصل العشرون

‏جميلةٌ أنتِ وإن عبستِ
فكيف لو كنتِ تضحكين.
.
رجعت للبيت اتصلت على ام نور كالت: هاا شنو من لكه احبابة نسى اصحابه؟
ذهب: لا والله بس تعرفين مالي خلك وكلها تسال وتعتب.
ام نور: هههه اتشاقى وياج حبيبتي. شخباركم انت والسيد مااتصالحتوا؟
ذهب: لا
اصلا بالبداية جان يراسلني او مااجينه بس بعدين بطل. لان اني مااجاوبه يمكن.

ام نور: لاااا. غير وراكم جان مريض يكول ابو نور حتى ميجي للشغل ويومية ابو نور يجي ياخذلهم غدا هو وياه يتغدون عدكم بالبيت حتى شغلهم من بيتكم. هسه من ترجعين تلكين بيتكم فلم هههههه.
ذهب: شبي؟
ام نور: ضغطه مرتفع يكول ابو نور وكلش متأذي وتعرفين هم رجليه بعدها مو كلش تمام تحتاج بعد عناية.
انبني ضميري من سمعت هالحجي.
ماادري شسوي هسه اتصل عليه لو اغلس؟
ذهب: يعني بعده مريض؟

ام نور: لا الحمدلله صار زين حتى البارحة داوموا بالمكتب.
ذهب: الحمدلله.
انور: انت شخبارج؟
ذهب: ماكو.
ام نور: اني منا اراقبه الج وانطيج اخباره اول باول. سالت ابو نور كتله السيد هم عنده سوالف بنات ومدري شنو؟
كلي لا مو من هالنوع كتله اشو ام رائد خايفة وتكول مو طبيعي هالايام؟ كلي من شنو خايفة شمسوي الرجال اربعة وعشرين ساعة بالمكتب مكابل شغله.
ذهب: الله اعلم. يجوز ضلمته.

ام نور: ظلمتيه لو لا انت جان لازم تاخذين هالموقف وتصيرين قوية كدامهن وكدامه حتى ميفكر ابد يخونج بيوم من الايام وهن يدوسن بريك وبعد ميقتربن من بيتج وعائلتج وحياتج. خليلهن حد كلبي الدنيا عليهن لتحسبين حساب احد.
ذهب: اتمنى اكدر اسوي هيج بس مو بيدي.
ام نور: قوي كلبج.
وره كم يوم اتصلت بيه عمة حميدة وطلبت مني اخذ الجهال واروحلهم عد بيت عمو ابو علي.
رحت.

البنات موجودات وعمو ابو علي كلهم رحبوا بيه بقيت عدهم للمغرب ورجعوني.
من جنت هناك انفتح الموضوع كدام الكل.
فبقيت ساكتة لان العلوية وعمة حميدة جانن هنه يحجن بس بجيت لان انقهرت ليش اني من دون البنات حياتي كلها معاناة وقصص.
عمة ام علي: لا تبجين عمه. عليش تبجين كلنه وياج شنو بكيف شويمه احنه قابل ميحبج هو لو مستغني عنج اشو حبه الج ينضرب بي المثل.

عمة حميدة: ابو كلب الرجيج. ضحكت عليه بكلمتين ماعدها تشتري لامها علاج الحيالة.
العلوية: بنات محيلات.
وين تكدر عليهن هاي.
عمة حميدة: والله لاروحلها واطيح حظ حظها.
العلوية: واني هم اروح وياج.
اريد اتفل بوجهها وبوجه امها. طايحات الحظ.
ام علي تباوع للعلوية مستغربة على دفاعها عني.
عمة حميدة: اريد العن خير خيرها. ادب سز خوش فلم مسويتلها حتى تلزك بي. محتاجة هي على اساس وماعدها فلوس العلاج. وين تودين راتبج.

العلوية: ع، ارة شبيج انت. اكص ايدي اذا مطلعت متفقه هي وامها، امها من جانت بعدها عدنه تجي تشوفها عشتوا حتى مايوم اجت بيدها شي لبتها ابد والله مااتذكر اجت وجابتلها شي لو اشتهتلها اكله. بس من تطلع تطلع محمله علاليك علاليك. متخلي شي بالثلاجة متنطي لامها ولاتخلي دشداشة ولاحجاب ولاشحاطه. احنه تشتريلها منا وهي تنطهن لامها، لاخجل ولاحيا.
عمة حميدة: لا مبينه هي طميعية.

وهذا مصدك بيها ماعدها خطيه ومكسور كلبه عليها.
علي: احنه مسوين صندوك بالشركة للتبرعات كل شهر من نستلم الرواتب كل واحد يطلع بكيفه شكد يكدر حتى الموظفين يذبون بي واكو عدنه كم موظف همه يعرفون ناس محتاجة يوزعونها عليهم.

بس هم ننطي بره الشركة. الرجال ديساعدها بنية حسنه بعد شله علاقة بنيتها هي. ويجوز صدك محتاجة. يعني هسه لو جايتج انت ياام رائد لو الج عمة وكايلتج ماعندي وامي تحتاج علاج وادوية راح تكليليها ماعندي؟ مستحيل.
شحال بعد وهو رجال ومره تكله محتاجة؟ وانتو تعرفون ماجد كلش زين لابخيل ولاتهمه الفلوس.
سكتنه كل احنه.
بعدين العلوية كالت: حتى لو. حميدة لازم نروحلها ونطيح حظها. مو تروحين وتعوفيني؟
عمة حميدة: الله كريم.

بقيت بالعراق شهر بس قبل لا يكمل الشهر يعني وره تلث اسابيع جنت عد اهلي صابغة شعري وكاعده اباوع عالتلفزيون.
امي وابوي اخذوا الجهال وطلعوا للسوك.
شموسة نايمة واندك الجرس.
طلعت صحت منو محد جاوب.
منو؟
هم محد جاوب.
فتحت الباب على كيف اريد اباوع اشوف منو شفت ماجد بوجهي.
ماجد: السلام عليكم.
اتفاجأت.
وخرت من الباب وكتله: وعليكم السلام.
دخل للبيت وصل لباب الصالة كال: منو عدكم؟
ذهب: محد موجود بس اني وشموسه.

رحت فتحتله باب الصالة ودخل كعد.
واني كاعده ومغلسة ومخليه على راسي علاكة سودة علمود الصبغ.
هو يباوعلي ساكت بعدين ضحك.
باوعتله: خير؟
ماجد: شمخليه على راسج؟
ذهب: صبغ. صابغه شعري.
ماجد: اممم.
وين عمي وخالتي؟
ذهب: راحوا للسوك.
ماجد: والجهال؟
ذهب: راحوا وياهم.
ماجد: وشموسه؟
ذهب: نايمة بغرفتي.
ماجد: اريد اشوفها. جيبها.
ذهب: نايمة. روح انت شوفها.
كام راح لغرفتي يم شموسة وره شوية جابها شايلها واجه.

ماجد: مشتاقلها. حبيبة ابوها. البيت فارغ. وحشه بدونها. محد يتلكاني ولا احد يسأل علي.
ولااحد يكلي الله يساعدك.
بقيت ساكتة.
ماجد: شلونكم؟
ذهب: الحمدلله.
ماجد: شوكت تردون نرجع؟
ذهب: وين؟
ماجد: لبيتنه بعد وين
ذهب: ماارجع
ماجد: لشوكت؟
ذهب: لحدما اعرف الصدك.
ماجد: يا صدك؟ مو سمعتي القصة مو حجيت كدامج من جنه هناك؟
ذهب: لا هذا مو كل الحجي وحتى لو كله هم ماارجع. كافي تضحك علي كل هالمدة.

ماجد: يعني اذا مااحجيلج شي معناها اضحك عليج؟
ذهب: لعد شيسموها؟ من تسوي شي تعرفه كلش زين يضايقني ويأذيني ومااقبل بي وتروح تسوي من وراي شتسميها هاي؟
ماجد: اسميها لان انت متتفاهمين وكبل تسويها قصة والدليل تصرفج هذا من عرفتي شسويتي؟
ذهب: لا. لازم ابقى خالة ايدي على خدي وانت تسرح وتمرح ويه شيماء وغيرها.
ماجد: شيماء وغيرها؟ انت شايفتني هيج يعني؟ ابو بنات؟
ذهب: والله انت ادري بنفسك اني مااعرفك بعد.

ماجد: المطلوب؟
ذهب: ماكو مطلوب.
ماجد: شنو يعني ماكو مطلوب؟ شتردين يعني؟ وين تردين توصلين بهالتصرفات؟ كفرنه سوينه عمل خير؟
ذهب: بروح ابوك لو اني مسوي مثل سوايتك عادي عندك؟ تقبل؟
تاخذ الموضوع بهدوء وتكول عمل خير؟
ماجد: الرجال غير المرة.
المرة المجتمع يعيب اي تصرف منها.
ذهب: عوفنه من المجتمع. وانت؟ جان شسويت؟ اقل مابيها جان ضربتني. مو صح؟

اتنهد وبقى ساكت بعدين شمس لحت وياها تلعب وياه ظل يحجي وياها ويضحك واني كاعده اباوعلهم.
شوية واجوا امي وابوي والجهال.
اتذكرت شعري رحت بسرعة اغسله.
واني بالحمام سمعت امي استلمت ماجد: هاي مو حالة خالة. يعني ابتلينه قبلنه ننطيك مره؟ تره صحتها على كدها والبركة بيك وهم ميهمك وضعها؟

وحده ادب سز حشا السامع وصلتكم ذيج المرة الا شوية للمحكمة ونومت بتي بالمستشفى وصار عدها ذبحها وجان خسرت بتي بسببها وبسببك وهم رجعت تحجي وياها.
ماجد: خالة الموضوع مو هيج.
امي: اعرفه الموضوع، . اعرفه.
هسه تكلي اساعدها مو؟

ماشي. اني وياك يجوز متكدر ترد واحد يكلك محتاج يجوز ضميرك ميتحمل. يجوز لخاطر اخوك الله يرحمه. يجوز يجوز يجوز الى اخر الاسباب بس ممجبور تتعامل وياها وتتواصل وياها. جان خليت غيرك يوديلها الفلوس. من علي ابن عمك يكول مسوين صندوك بالشركة واكو موظفين متطوعين يوصلون الفلوس للمحتاجين كل شهر؟
جان خليتهم يوصلون الفلوس الها.

خالة مرتك تعبانه بعدها بعز شبابها وشبعت امراض بتي متتحمل كل هالضغط. شايلتك وشايله البيت والجهال وامك على راسها. وانت تعرف هالشي كل قصور ماعدها واتحداك تطلع بيها نقص لو عيب لو تكول مقصره بفد شي.

انت تضغط عليها هواي فوق طاقتها. ماكو طلعة ماكو طبه ماكو هيجي ماكو هيجي كل هذا وساكته وحامده ربها وشاكرته وعايش وياكم على حب الله. بس انت متفكر بيها ولابراحتها ولاصحتها ولا حتى تفكر بالشي اللي يزعجها ويهينها.
بسرعة غسلت شعري وطلعت حتى اسمع الحجي.
ابوي ساكت لحدما كال ماجد: طلباتكم شنو؟
ابوي: عمي احنه ماعدنه طلبات. انت ومرتك. انت متريد ترتاح وتستقر بدون مشاكل؟

تريد تخسر عائلتك علمود وحده انت تعرفها شنو مو احنه اللي نكلك.
تغلط عليها.
تضربها.
تتصرف تصرفات غلط وتريدها متحجي ولاتعترض.
وحتى متنطيها سبب مقنع ولاتبررلها تصرفاتك. شنو مثلا متارسه عينك؟
متريدها هم كول حتى احنه هم منخليها ترجع بعد للهم والغم والاذية نبقيها هنا شجابرنه نرجعها قابل مرايدين صحتها؟
تريدها وتكول مرتي وام جهالي معناها تكعد وياها وتفهمها وتفتهم منها شنو طلباتها.
متريدها كول؟

ماجد: لا عمي شلون مااريدها. طبعاً اريدها.
ابوي: معناها اكعد واحجي وياها بهدوء تره مو كل الامور بالحياة تنحل بالعصبية والصياح والضرب.

احنه ياعمي منريد المشاكل ولانحبها والدليل انه احنه منتدخل بيناتكم وحتى من تصير مشكلة دائماً نحاول نهدي الامور ونهديها رغم هي مغلطانه. بس لان منريد بيتكم ينخرب فانت هم حاول تحافظ على عائلتك وتقلل عصبيتك وتفرغ نفسك شوية الها يعني هي عبالك سجين سياسي ميحقلها تحجي ويحقلها تعترض ميحقلها تزعل.
ميصير هيجي ياعمي.
ماجد: صار عمي. تدلل.

سكتوا شوية وامي طلعت من الصالة لكتني واكفة اتسمع عليهم: شتسوين واكفة هنا؟ روحي خل يحجي وياج.
ذهب: شيحجي؟
امي: والله اذا مضبيتيه ارجع اني اضبه تره وتعرفيني من افقد اعصابي اطلع القضى والمضى.
اتنهدت ورحت اخذت المشط وبعدين انتظرت ابوي صاح علي.
دخلت كلي: ها بابا. تعاي كعدي يم زوجج اتفاهموا حتى توصلون لحل.
بهدوء اتفاهموا مو بصياح وعصبية ماكو شي يستجوب العصبية.
ذهب: ان شاءالله بابا.
طلع ابوي وسد الباب.

كعدت امشط شعري وهو يباوعلي.
ماجد: اتدني هنا شوية حتى نحجي.
ذهب: اريد امشط.
ماجد: مشطي منو لازمج.
ذهب: احجي اسمعك.
اتنهد وسكت.
بعدين اجه هو كعد بصفي كلش.
مد ايده خلاها وره ظهري قشعرت: لاا. كلت نحجي مو..
ماجد: مو شنو؟
ذهب: حركاتك اعرفها حافظتها تره.
ماجد: هههه ياحركات هسه اني سويت شي؟
ذهب: ماسويت بس بنيتك تسوي.
ضحك واخذ المشط من ايدي: خل اجرب امشطلج بالله.
ذهب: انوب! شهالفلم الجديد؟

بدا يمشطلي بس ثواني وحضني حيل: يااا. يااا. ماجد.
ابوي وامي منا.
ماجد: خليهم.
ذهب: اهوو لاتفضحنه. ماجد عيب والله هسه الجهال يفتحون الباب وننفضح.
ماجد: محد يفتحه.
ذهب: خرب. ماجد والله عيب عليك.
ماجد: اششش.
اشتاقيتلج؟‍؟‍؟‍؟
ذهب: هسه وكت اشتياق. داوكف خل نحجي.
ماجد: بعدين.؟‍؟‍؟‍؟
استلمني بوس وحضن واني خايفة لااحد يفتح الباب ونصير بموقف محرج.

آخر شي دفعته: كافي صدك جذب. اكله الجهال يفتحون الباب يزيد.
ماجد: يعني نبطل؟ شنو ذنبي راح يصير اكثر من شهر محروم منج.
ذهب: ليش محروم؟ شومه وينها؟
ماجد: شنو خره بكل سالفة راكعتها؟ عيب اني مال هيجي سوالف؟
ذهب: والله الصدك مااعرف مال ياسوالف.
ماجد: لج اني ماابدلج حتى بتيوتا هههه. شويمه شنو تغارين منها.
ذهب: مااغار منو كلك اغار.
ماجد: متغارين؟ لعد المن هالقصة والزعل والحجي اذا متغارين؟

ذهب: مااحب احد يعاملني على اني غبية.
ماجد: مو غبية. بس انت متنطين مجال للتفاهم.
ذهب: انت جربت تكلي ومااتفهمت؟ لو رحت من وراي لوحده بسببها وصلت للموت؟
ماجد: اي لان متتفاهمين. ماعندج صبر كبل تسوين زعله وقصه.
بعدين اني اساعد هواي ناس متعرفيهم اشمعنه هاي لازم اكلج عليها؟
ذهب: تعرف ليش. وحده تحبك وجانت تدزلك صورها عريانة. عريااانه شلون تريد اتفهم واقبل؟

ماجد: اففف. يعني هسه اكو وحده متعرف رجلها؟ متعرف ممكن يخونها لو لا؟ متعرف يحبها لو لا؟
ذهب: اي. اني مااعرفك.
ماجد: زين. رجعي واتعرفي علي.
ذهب: لاحبيبي فلمك قديم ومحترك.
ماجد: والله والله والله ماعندي شي وياها. ورح ابوي بعد شتردين.
سكتت.
ماجد: تره مالي خلك هالسوالف اني. وقتي كله شغل ماعندي مجال لهالسوالف؟
ذهب: مالي علاقة اختار. لو احنه لو هي؟
ماجد: شااختار اكلها ماعندي شي وياها تكلي اختار.

ذهب: حتى مساعده مااقبل تساعدها.
اتنهد وسكت بعدين كلي: ماشي. بعد؟
ذهب: تحظرها وتحذف رقمها متحجي وياها.
ماجد: بعد؟
ذهب: متمنعني اطلع. كافي سجن.
ماجد: واني مانعج متقصد؟ غير متعرفين احد ترحين لمنو؟
ذهب: اطلع ويه ام نور.
ماجد: هاا هههههه صرتن صحبه ههههه طلعي عمي طلعي.
بعد؟
ذهب: اريد سيارة.
ماجد: سيارتيش؟ وين تردين ترحين بالسيارة؟ تسوقين وترحين وحدج لاا. مستحيل.
ذهب: اهووو.
ماجد: اختاري غير شي.
ذهب: مااريد.

ماجد: سيارة لا. ماممكن. حتى ياهو يعبر عليج يباعولج لااا.
ذهب: استغفر الله؟
ماجد: ابدلج اثاث البيت.
ذهب: لا والله؟
ماجد: والله. ميعجبج اختاري شي ثاني بس سيارة لا.
ذهب: اذا بعد حجيت ويه شيماء لو غيرها لاي شبب تره ميردني عن الطلاك شي.
ماجد: يالله عاد. طلاك. ، بكيفج هو الطلاك لعب هو.
ذهب: اي بكيفي. ماعندي استعداد اتحمل اكثر تره كافي قهر صحتي متتحمل خليني اربي جهالي بعدهم صغار مو مال يتيتمون من هسه.

رجع حضني: اسم الله عليج. شنو هالحجي؟
ذهب: وبعدين وياك؟ مو جاي نحجي؟
ماجد: كافي حجي.؟
ذهب: يايابه منك متفوت فرصة.
ماجد: نتنوس شبيج هيجي قافله؟‍؟‍؟‍؟
رجعت ويه ماجد لبيت عمو ابو علي واتلكونه بعزومة حلوه طلعنه كل احنه للمطعم اتعشينه.
من رجعنة كلتلي عمة حميدة: باجر نروح اني والعلوية لشويمه لبيت رجلها اريد اطيح حظ حظها وافوخ كلبي بهالعار المتستحي.
ذهب: والله اتمنى اروح وياكم واطيح حظها.

عمة حميدة: لا لا لا كل شي ولا انت خليج بعيد منريد مشاكل اني والعلوية نروح ونقوم بالواجب وياها.
حتى رجلج مراح نكله من نرجع يالله لتحجيله اي شي.
ذهب: لا لا شحجي حتى ياكلني ويشربني.
عمة حميدة: عفيه عليج. انتظري مني خبر باجر من نرجع اخابرج انطيج الاخبار وابرد كلبج الا العن خير خيرها والله العظيم. هالعايقة المتستحي.
ذهب: اخخخ لو الزمها.
عمة حميدة: كل شي متسوي انت بس لسانج يمي.
ذهب: هههههههه
.

وما هي الا لبضع اختبارات يضعها لنا الله فنكون بأحسن حال بعدها.

رواية صبرا يا قلبي الجزء الثاني للكاتبة روز الفياض الفصل الحادي والعشرون

سيُزهر الطريق الذي سلكته يوماً وسيتلاشى عنك كل التعب ستُشرق روحك بعد ذبولٍ ظننته لن يزول ستلمعُ عيناك بعد أن خفّ بريقُها.
.
راحت عمة حميدة والعلوية لبيت شيماء.
بقيت انتظر خبر اريد اعرف شصار وياهن من راحولها.
بقيت طوال اليوم كاعده على نار.
صار المغرب ومحد اتصل.
رحت اصلي المغرب وسمعت التليفون دك مكدرت اكطع صلاتي.

خلصت الصلاة وشفت التليفون عمة حميدة متصله رجعت اتصلت عليها كالت: مبين ماعندج لهفة تعرفين شصار؟
ذهب: هههه صحيح لذلك مكابله التليفون طول اليوم منتظره اسمع خبر منج.
عمة حميدة: ههههه والله ماادري منين ابدي.
ذهب: من اول موصلتوا لبيتهم ولحد مطلعتوا من يمها.
عمة حميدة: رحنه اني والعلوية لبيتها بيت رجلها. دكينه الباب طلع هو.
مبينة عليه آثار الحادث ايدة مكسورة وراسه بعده ملفوف.
سلمت اني عليه كتله شيماء موجوده؟

كال اي موجوده منو اكللها؟
اني كلت ماكله اني منو خاف تتحجج ومتطلع فكتله كللها خطار.
دخل الرجال بعدما فتحلنه باب الصالة مالتهم ودخلنه اني والعلوية.
كعدنه ننتظرها تجي هسه تجي. بعد شوية تجي. وتشتلنه بالنص ساعة يالله طلعت علينه. ،
دخلت اتفاجأت بينه. سلمت وكعدت.
لابسه ست سوارات بايدها اليمين وملاوي تلاثة باليسار وماادري كم محبس وكلادتين كبار وزوجين تراجي.
ذهب: وماعدها تشتري لامها علاج؟
عمة حميدة: دصبري.

سلمنه عليها بس هي وجهها ينطي الوان.
رادت تضيفنه شي جاي او عصير كنالها ولا اي شي سمعنة بروجج مسوي حادث واجينه نتحمدلج على سلامته.
هي غلست لاكالت منو كللكم لا كالت منين عرفتوا بعدين العلوية كلتلها: مسألتي منين عرفنه؟
شيماء: ها خالة. منين؟
العلوية: ذهب كالت. ماجد كايللها.
هي سكتت غلست فاني سألتها: امج شلونها؟
شيماء: زينة خالة الحمدلله.
عمة حميدة: صحتها شلونها؟
شيماء: الحمدلله زينة.

عمة حميدة: بعدج تداومين بالمستشفى؟ لو زوجج ميقبل؟
شيماء: ها خالة. لا بعدني. هو كلي بطلي ممحتاجه للراتب بس اني مااكدر شسوي اكعد بالبيت.
العلوية: مدام ممحتاجة ياخالة وامج صحتها زينة لعد ليش ماجد يحوللكم كل شهر فلوس؟
وجهها صار اصفر.
بقت ساكتة شوية متعرف شتجاوب بعدين كالت: ماجد بعد عمري. اخوي المجابته امي خطية كل شهر يدزلي فلوس يكلي هاي لامج مره جبيرة وخاف تحتاج طبيب وعلاج.

اكله ممحتاجة اني مدللتها اصلا ممخليتها تحتاج شي يكول ميخالف امج مثل امي.
العلوية: يااااا؟!
عمة حميدة: خالة انت شتريدين من عنده بالضبط؟
شيماء: منو؟ اني؟ شريد من عنده؟
عمة حميدة: انت هسه مره متزوجة ورجلج هسه من فتحلنه الباب وشفناه رجال هيبة ومرتب ومن كلامج تكولين ممخلين محتاجة شي ومبين عليه مدللج. لعد شتردين من ماجد؟ هم هو رجال متزوج وعنده جهال ومرته مقاصره ولاناقصها شي اصغر منج واحلى منج.

شتردين بالضبط؟
كامت بسرعة سدت باب الصالة حتى رجلها لايسمعنه ويسمع حجينه: مااريد منه شي ماجد اخوي. واحب ذهب اموت عليها اخيتي الزغيره هاي.
العلوية: اخيتج منين وانت تركضين وره رجلها؟!
من جنتي متزوجة المرحوم وانت تركضين وره ماجد. ليش قبلتي بالمرحوم اذا انت عليج على اخوه لو على كولتهم حطي ايدج على اثنين.
شيماء: يمه! شوكت اني حطيت عيني عليه؟ شنو هالحجي هذا علوية اني ماجد طول عمري اشوفه اخوي.

ولا بعمري مفكرة بي بهالطريقة.
العلوية: يااا منو جانت توديله صورها عريانة؟ امي؟
ولج هاي سوالفج اذا متبطليها الا اروح لرجلج واحجيله على كل شي تره كله موجود بعد بتليفون ماجد المحادثات والصور والحجي ولصخام واللطام.
متستحين انت لو تستحين جان كلتي اني متزوجة اصون ابو بيتي واحترم البيت الدخلتله.
بس خيرا تعمل شراً تلقى فوك ميساعدج ويكول خطية خاف صدك محتاجة. بس احنه نعرفج ممحتاجة. هاي خطط حتى تهجمين بيته.

عبالج ياخذج؟ لا حبيبة مياخذج حتى لو كلج اخذج مياخذج ابني ميتورط ويه وحده مثلج.
من اتزوج شتزوج؟
هاا خية حميدة؟ شتزوج؟ اتزوجمن؟
عمة حميدة: اتزوج وحده من سال عنها كلوله فوت وانت مغمض متلكة مثلها ومثل اخلاقها.
العلوية: شفتي؟ شفتي شيدور؟ دور وحده ماكو مثل اخلاقها.
لو يريدج جان خطبج.
بس امثالج ميخطبوهن ولدنه. ماادري شلون ضحكتي عالمرحوم وخطبج. يمكن سحرتيله.

شيماء: مااسمحلج اني مو سحارة ولاميته على ابنج السحارات تعرفيهن منو اختج وبنات اختج.
العلوية وجهها ظل ينطي الوان.
عمة حميدة: هاي جيتنه انذار الج. حذرتج قبل من حجيت ويه امج بس مافاد. هالمرة راح اعديها بس المرة الجاية اجي لرجلج واكله على سوالفج كلهن.
اخذت العلوية وطلعنه.
رجعنة للبيت ماجد والولد طالعين. العلوية بعدما فشلتها شيماء وكلتلتها اختج وبناتها سحارات انخلست وضاجت بقت ساكتة لحدما ارتفع ضغطها.

وركضت بيها للطورائ خلولها مغذي لحدما نزل ضغطها ورجعنه متشوفيني مااتصلت بيج.
ذهب: بس هذا الصار؟
عمة حميدة: شتردين يصير؟
ذهب: عبالي تنكتل شويمه.
عمة حميدة: هههههه لج هو احنه بينه حيل نكتلها ههههه.
المهم ماجد لهسه بره مرجعوا اليوم ماادري وين رايحين.
ماادري اكله رحنه لو اغلس؟
ذهب: لاطبعاً كليله.
عمة حميدة: يجوز هي تكله هسه قبلنه.

ذهب: اذا اجه سالكم هو او حجه بالموضوع قبل متحجون معناها مفاد الحجي وياها وهي كايتلته.
عمة حميدة: شحدها. مفاد وياها شلون غير انوب صدك اكتلها واخلي كل سوالفها بيد رجلها.
ذهب: اوووف. مليت وتعبت ولعبت نفسي.
عمة حميدة: صيري قوية لتخلين احد يستضعفج اليتدنه يمج ويم عائلتج اكلي اكل.

ذهب: قبل لا اتزوج جنت من اسمع وحده تشتكي من عيالها اكو هسه شدعوه عليها ماتتحملهم ولا تتحمل تصرفاتهم ليش ماتعتبرهم اهلها ليش هيجي تحجي عليهم. وجنت من اسمع وحده تشتكي لان زوجها يخونها اكول اكيد منها السبب لوما هي بيها خلل ميخونها. ومن اسمع وحده تشتكي من مضايقات البنات لزوجها وتحرشهن بي وركضهن وراه اكول متريد تنطي بزوجها وتكول ابو نسوان تذبها براس بنات الناس اللي زوجها مقشمرهن.

بس من اتزوجت اكتشفت اني شكد جنت سطحية وماافتهم لان لو افتهم جان محكمت على ناس اني مااعرفهم ولااعرف شلون عايشين وشلون صايره حياتهم.
سبحان الله الله خلاني اعيش شوية من كل شي حتى اعرف ليش النسوان تشتكي وليش تتظلم.
الله رادني اضوك شوية من عذاب كل وحده حتى اعرف شتحس وشنو من شعور عايشة.
عمة حميدة: ذكري الله.
ذكري الله.
ذهب: لا اله الا الله.
عمة حميدة: يالله خل اروح اشوف العلوية نامت لو لا.

يمكن ماجد اجه صوت سيارة بالحديقة.
سكتت شوية بعدين كالت: اي اجه. هذا عمج ابو علي دخل.
يالله يمه روحي حبيبتي وبوسيلي عافيتي. فضيل.
ذهب: يوصل يمه حبيبتي تبوسج العافية.
سديت التليفون واني فرحانة خلصت من شويمة.
قبل لا انام راسلني ماجد: حبيبي. كاعده لو نايمة؟
ذهب: كاعدة.
اتصل بيه حجينه شوية وسأل عالجهال بعدين كلي: امي حميدة اتصلت بيج اليوم؟
ذهب: مساع جانت تحجي وياي.
ماجد: رايحات لشيماء هي وامي.
ذهب: ادري. كلتلي.

بقى ساكت بعدين كال: اني جنت انطيها من باب المساعدة ميهمني بعد اذا جانت صدك محتاجة لو تجذب. اني سويت العلي والي يرضي ضميري.
ذهب: امم. ضميرك بعدين يوديك بداهية.
ماجد: إلى يسمعج يكول عندي غير شي وياها.
ذهب: شمدريني شعندك وياها. بعدين حتى اذاماعندك شي وياها من رحتلها للمستشفى وانطيتها فلوس علمود عملية زوجها مكلت شلون ترجعهن؟ شوكت ترجعهن؟

ماجد: لا مااكول. اني من انطي لاحد فلوس ماافكر شوكت يرجعها خصوصا اذا اعرف حالته.

ذهب: اي حالته. خوش حاله حالتها محجتلك عمة حميدة وخالتي عن حالتها؟ بعدين امثال هاي بالذات لازم تفكر شوكت ترجع الفلوس لان هي ممحتاجة للمساعده صدك وانما شافتك تنطيها بدون حساب ولا ملل كلتلك خل اخذ منه شكد مااكدر بحجة محتاجة وهي لا محتاجة ولاشي. ولحد هسه اني شاكة بموضوع الحادث مال زوجها. هم يجوز جذب مفكرت بيها هاي؟ مكلت يمكن جذابة؟ لو تمشي وراها بدون تفكير؟

صار عصبي وصيح علي: شنو تمشي وراها بدون تفكير!
انت ليش متعرفين تحجين؟ ليش متعرفين ثمنين كلامج؟
شنو زغيرون اني لو زعطوط وامشي وراها بدون تفكير؟
بعدين اني شفته الحادث من وصلتكم للمستشفى ودزتلي مسج هي ورحتلهم بعد شنو جذب شنو امشي وراها بدون تفكير..

بالبداية جنت ساكتة لان شفته عصبي بس من كلي وديتكم للمستشفى ورحتلهم اتذكرت من عافني بالمستشفى اني وشمس وراح بحجة عندي شغل: هااا. يعني خليتنه بالمستشفى بحدنه وشتلتنه ساعتين انتظار علمود شيماء خانم مسوية حادث مو؟ واتصل عليك تكلي عندي شغل! عادي بالبرد اني والبنية كاعدين ننتظرك بس ميصير شيماء تنتظر وحدها بالمستشفى؟ بس هي شافتك تمشي وراها كلتلك خل استغله.

هو فار من العصبية لان رجعت عدت الجملة: هم كالت تمشي ورااااهاااا؟ انت مو مال واحد يحترمج ويحجي وياج ويشرحلج لان متعرفين تحجين صوجي اني.
سد التليفون بوجهي.
ضجت.
بقيت كاعده طول الليل اتكلب من التفكير.
اتوقعت ثاني يوم يتصل يسال عالجهال بس ماكو لاراسلني ولا حتى اتصل.
اليوم اللي بعده العلوية اتصلت بيه كالت: ماجد حجزلنه وره عكب باجر نرجع لتركيا كلج؟
ذهب: لا والله محد كلي.
شوكت حجز؟
العلوية البارحة.

ذهب: ان شاءالله.
باجر موعد سفرنه جنت كاعده امشط لشموسة بغرفتي عد اهلي العصر وامي وابوي اخذوا الجهال يشترون من السوبر ماركت.
شفت خيال شخص طلع من الحمام راح للمطبخ.
باوعت مشفت احد.
اتصورت امي وابوي رجعوا.
كملت شعر شموسة وكمت اريد اشوف منو اجه اشو الجهال مالهم صوت!
رحت للمطبخ ماكو احد!
رجعت للحمام هم ماكو احد!
باوعت بالصالة وبغرفة امي وابوي محد موجود!
لعد من هذا العبر من الحمام المطبخ؟

يجوز امي اجت ورجعت طلعت.
رحت باوعت للباب مقفول من جوه يعني مستحيل تكون رجعت ودخلت لان منو فتحلها الباب؟
ومستحيل تكون طلعت لان منو قفل وراها الباب؟!
اتعوذت من الشيطان ورحت صفطت ورتبت جنطنه اني والجهال خاف يجي علينه ماجد بالليل ياخذنه.
رجعوا امي وابوي ورحت اسبح.
واني بالحمام اجاني احساس غريب ماعرفت افسره.
جنت احس اكو احد يراقبني.

حاولت اقنع نفسي بانه اني اتخيل لكن ماكدرت لان كلما التفتت احس اكو احد واكف وراي.
خفت.
لبست ملابسي بسرعة وطلعت.
بعد العشا اجه علينه ماجد بس ميحجي وياي.
سلمنه على اهلي وطلعنه لبيت عمو ابو علي حتى الصبح نسافر ان شاءالله.
فرشولنه اني وشموسة وعمة حميدة والعلوية بنفس الغرفة وماجد والجهال بالصالة.
نمت.
ماادري بيش الساعة حسيت اكو احد واكف على راسي يباوعلي فزيت بس ماكو احد قريت المعوذات ورجعت نمت.

توني رجعت غفيت حسيت احد ضربني على رجلي.
رأساً كمزت.
بقيت كاعده دقايق بعدين قريت المعوذات واية الكرسي ورجعت خليت راسي عالمخدة.
فكرت بيني وبين نفسي اخاف انام وارجع اشرف كابوس خليني شوية كاعده.
جنت متصورة هذا كابوس بس حسيت بالم برجلي.
كعدت باوعتلها مااشوف شي ظلمة.
فتحت لايت الموبايل حتى اشوف واتفاجأت بأثر مال ايد على رجلي.
ظليت متحنطة!
يعني الضربة ماجانت كابوس ولاحلم! اكو احد ضاربني صدك!

بقيت كاعدة اباوع على عمة حميدة والعلوية.
لدرجة شكيت انه وحده منهن كاعده ومسوية بيه مقلب.
بقيت كاعده نص ساعة اباوع عليهن نايمات ومستغرقات بالنوم.
لعد منو ضربني؟!
استغفرت ربي وكمت رحت للحمام.
دخلت للحمام وسديت الباب. وانتبهت اكو خيال جوه الباب.
اكو احد بره الحمام جان واكف كأنما يراقبني او يتصنت.
خفت.
كلش خفت.
فتحت الباب ماانفتح.
حاولت مرة ثانية هم ماانفتح رغم اني ماقفلته من دخلت.

من خوفي رأساً صرخت وظليت ادك عالباب: عمة حميدة..
عممممة.
عمة حميدة..
ماااجدددد.
ظليت اصرخ لحدما كلها كعدت.
ماجد اجه يركض كلي من وره الباب: شبيج ذهب؟ وكعتي؟
ذهب: ماجد افتحلي الباب ماادري منو قفله علي.
بس لزم ايد الباب انفتح!
ماجد: هاي مفتوح شبيج خبصتينه؟
ظليت ابجي وجلبت بأيدة: جان مقفول والله جان مقفول شكد حاولت افتحه بس ماانفتح.
عمة ام علي: اسم الله يمة اسم الله خاف جان مشكل.

ذهب: لا عمة لا ماادري منو قفله من بره. شفت خيال واحد واكف وره الباب من بره.
سكتوا شوية كلهم مستغربين بعدين عمة حميدة كالت: اسم الله يمه اسم الله كلها نايمة ياهو يقفله عليج.
ذهب: ماادري منو والله العظيم قفل الباب علي اني شفت الخيال بعيني.
كلهم كالوا يتهيألج ورجعوا كلمن لغرفته.
اخذتني عمة حميدة وياها للغرفة وكلتلي: نامي خل اقره عليج.
نمت وهي خلت ايدها على راسي تقرا والعلوية تحجي وياي: تتحلمين خالة.

من تنامين لاتنامين كبل. اقري المعوذات اقري اية الكرسي واقري الفاتحة. ميصير واحد ينام كبل بدون ميقره قران حتى لو بس الفاتحة وقل هو الله احد.
ذهب: اقره والله اقره.
العلوية: هذا جاثوم يسموه عبالج صدك هو بس هو جاثوم.
ذهب: لا مو جاثوم. شفته بعيني شفت خيال جوه الباب والله العظيم.
العلوية: اي هو عبالج صدك عبالج شفتيه بس هو حلم يعني مو حقيقة يسموه جاثوم.
اقري قران واتوضي قبل لاتنامين.

دارت ظهرها عالصفحة الثانية ونامت.
عمة حميدة: يالله يمة نامي حبيبتي لاتخافين.
اعوذ بالله من هالاحلام هاي تخلس ابن ادم.
ذهب: يمة مو حلم. هذا الخيال حتى عد اهلي اليوم شفته. وهسه هنا شفته من جوه الباب مبين واحد واكف بره الحمام.
عمة حميدة: صلي على نبيج. لاتفكرين هالشكل تره مو زين. هذا البيت صارله سنين وصارلنة سنين عايشين بي كل شي ماشفنه بي ولاسمعنه بي شي الحمدلله. لاتخلين هالافكار براسج اسم الله.

نامي يالله وارتاحي. وكفتي كلبنه عبالي وكعتي بالحمام.
ماجد هم خطية انخطف لونه. هم عبالك وكعتي بالحمام يمكن.
بقيت ساكتة كلها تكول حلم وكلها تكول يتهيألج وكلها تكول لاتفكرين بهالاشياء.
معقولة اتخيل؟
زين والضربة؟!
اتذكرت الضربة كعدت على حيلي: مو حلم حتى قبل لا اروح للحمام حسيت واحد ضربني على رجلي واني نايمة وكعدت.
كشفت رجلي حتى اروايها اثر الضربة: وهاي شوفي.

كعدت عمة حميدة شافت رجلي والعلوية دارت علي تباوع. ،
شافن اثر الضربة بقن ساكتات.
.
الأرواحُ الحُلوة مصّيرها أشياء حلوة مهما كانت المرارة في طريقُهم؟

رواية صبرا يا قلبي الجزء الثاني للكاتبة روز الفياض الفصل الثاني والعشرون

أكثر من غرام المُحبين انا مغرمة بك.؟
.
بقيت كاعده للصبح.
عمة حميدة تمددت بفراشها بس بقت واعية تباوعلي.
العلوية نامت.
اذن الفجر دخل ماجد للغرفة شافني كاعده بفراشي ومخليه ايدي على خدي: اذن. كومي صلي.
رفعت راسها عمة حميدة: ها يمه. أذن؟
ماجد: اذن.
راح يتوضا واني هم رحت اتوضيت ورجعت صليت.
خلصت صلاة وبقيت كاعده عالسجادة اقرا تعقيبات الصلاة.

دنكت سجدت سجدة الشكر ورفعت راسي شفت كدامي تلث ( 3) اشياء ماادري اشكال بشعة.
اقزام شكلهم وصخ وكله شعر وعيونهم بالطول وواكفين كبالي ويقتربون على كييييف باتجاهي.
انرعبت بس حسيت انشليت لاكدرت احجي ولاكدرت اتحرك من مكاني.
لثواني ماعرفت شسوي بس اجه ابالي اقرا شنو حافظة من السور.
بديت اقرا اية الكرسي.
قريتها بدوا يبتعدون. خلصت رجعوا اقتربوا.
رجعت عدتها من جديد وظليت كلما تخلص اعيدها من جديد.

ماادري كم مرة عدتها تلاثين او خمسين مرة او اكثر او اقل ماادري.
المهم بقيت اعيدها لحدما اختفوا.
اختفوا؟!
راحوا؟
درت وجهي سألت عمة حميدة والعلوية اللي صافنات علي مستغربات.
عمة حميدة: منو؟
ذهب: ذوله التلاثه الجانوا واكفين هنا ويقتربون علي. راحوا؟
العلوية: شجاج انت اليوم متكوليلي البارحة تكولين شفت خيال وانقفل علي الباب اليوم تكولين تلاثه مدري شبيهم!
عمة حميدة: اسم الله يمه ذكري الله شبيج؟

ذهب: والله تلاثه هنا جاونوا واكفين عيونهم بالطول من رفعت راسي من السجود طلعوا.
دخل ماجد: كاعدين؟
عمة حميدة: كاعدين يمه كاعدين تعال.
العلوية: وهي مرتك تخلينه انام. ساعة شفت خيال ساعة انقفل علي الباب ساعة طلعولي تلاثه.
دار علي باوعلي كلي: شبيج؟
ظليت ابجي كتله: جاي اشوف اشياء انتو متشوفوها اكو واحد ضربني واني نايمة على رجلي وطلعتله رجلي راويته اثر الضربه صاير ازرك.

محجه شي كتله: وشفت احد وره الباب مال الحمام وبعدين انقفل الباب وهسه دنكت سجدت ورفعت راسي طلعوا تلاثه اقزام عيونهم بالطول كبالي بقين اقرا ايه الكرسي لحدما راحوا.
بقى ساكت ميعرف شيكول لايكدر يكلي تتخلين ولايكدر يصدك.
باوع لعمة حميدة كلتله: ناخذها للسادة؟
ماجد: شوكت؟ وطيارتنه؟

عمة حميدة: يمه الطيارة تولي تتأجل روحتكم كم يوم بس كون البنية ترتاح. رحتوا هناك واتخربطت حالتها؟ شلون؟ ياهو يمها يدير باله عليها؟
العلوية: شبيها؟ اتخلبت قابل؟
بقوا ساكتين.
راحت عمة حميدة والعلوية يتريكن واني رجعت تمددت يم شمس.
اتدنه ماجد يمي خله ايده على راسي كلي: شبيج؟
دمعت عيوني بس هزيت راسي ماكو شي.
اتنهد هو بعدين كلي: شوكت اول مرة شفتي الخيال؟
ذهب: البارحة عد اهلي.
ماجد: نفسه اللي شفتيه هسه؟

ذهب: لاا. ذاك خيال. ظل. بس هسه لا تلاثه اقزام اشكالهم تخوف.
ماجد: لاحول ولاقوة الا بالله.
هاي انوب منين طلعتلنه السالفة احنه ميصير نرتاح يوم بدون قصة.
استغفر الله.
نامي نامي اني هنا يم شموسه.
ذهب: اخاف.
ماجد: لا اله الا الله. لاتخافين اذا تخافين تتأذين.
ذهب: حقك. مشفت اللي شفته ولا حسيت باللي حسيت بي.
ماجد: شحسيتي؟
ذهب: احس احد يراقبني. يشوفني بالحمام.
بقى ساكت بعدين كلي: اذا تردين تدخلين للحمام كليلي.

حسيته ممصدك شي من كلامي ماالومه. بس بنفس الوقت جان خايف لايكون اكو شخص جان يباوعلي واني بالحمام.
بقيت ساكتة وصافنة بعدين غلبني النعاس وغفيت.
كعدت الساعة ب( 11) كمت ركض اريد اروح اغسل وابدل والبس الجهال ماباقي بس ساعة على موعد الطيارة شلون خلوني نايمة.
دخلت العلوية شافتني مخبوصه: شبيج؟ شنو شفتي هالمرة؟
كالت باستهزاء.
ذهب: ليش محد كعدني ماباقي شي عالطيارة.

العلوية: بعد ياطيارة. غير سويتيلج قصة البارحة مدري شتشوفين بعد كال مانروح.
ذهب: سويتلي قصة؟ رحم الله والديج. الله لايرواي احد اللي شفته.
العلوية: آمين.
من طلعت من الغرفة كلها تدري كلها تسالني شلون صرتي واكللهم الحمدلله وكلها تسالني شنو شفتي وارجع اعيدلهم اللي شفته.
العصر كالت عمة ام علي: اكو سادة يم بيت ابو محمد بيت اخوي يمدحون بيهم اذا تردون اتصل عليهم واجيب رقمهم واشوفهم موجودين لو لا.

عمة حميدة: اي والله جاي اكلج عليهم لان ذيج المرة هم كالوا عنهم خوش ناس عدهم بخت.
العصر اخذنه ماجد اني وعمة حميدة وعمة ام علي.
بيت قديم بس جبير وبي بره مثل المجلس مغلفة حيطانه بقماش اخضر واكو حنة ممسوحة عالقماش على شكل جفوف.
كعدنه جان اكو رجال تقريبا بنهاية الخمسينات من عمره شعره ابيض ولابس دشداشة وكاعد على كرسي والناس كلها كاعده بالكاع عالفراش.

وجان يصيح بالاسماء ماادري اذا مسجلات يمه او هو يعرفهم بس احنه محد سجل اسمنه ولا احد سألنه المن جايين.
وره تقريبا ربع ساعة صاح: السيد وينه؟
رفعت راسي متعجبة وماجد مثلي ظل يباوعله.
رجع صاح وهو يباوع لماجد: انت مو سيد؟
ماجد: اي نعم.
كله: زين تعال. تعال هنا انت ومرتك.
قشعر جسمي.
كومني ماجد ورحنة كعدنه بالكاع يمه.
جان مدنك وبيده سبحة يحرك بيها وره شوية رفع راسه باوعلي كلي: انت مؤمنة. شعجب خفتي منهم؟

فهمت قصده فجاوبته: ماادري. اتفاجأت وشكلهم يخوف مو حلو وخاف يأذون جهالي.
السيد: لا ميأذوهم.
ميأذوهم.
ذوله جايين مخصوص عليج ميأذون جهالج.
لاتخافين وخلي ايمانج قوي حتى محد يكدر يضرج.
ماجد ساكت يسمع بعدين كال: اني هم كتلها لاتخافين.
السيد: بس انت مجنت مصدكها.
ماجد: مو ممصدكها. بس.
شي غريب وهي مو من النوع اللي يبالغ لو يجذب لو يتخيل ويعيش الجذبه يعني هي عاقلة.
السيد: ومع ذلك انت مصدكتها.
وبالك راح بعيييدد.

بقينة ساكتين فكال: لاتخافين.
انت قوية.
نزع محبس جان بإيده وخلاه على راسي وبدا يقرا ويحركه يمين ويسار بعدين نزل بي على ظهري وايدية ورجليه بدون ميشيله.
من خلص كلي: اني شايفج وين بيتكم؟
ذهب: ماادري اول مرة اجي هنا اني وماعندي احد بهاي المنطقة.
السيد: احتمال مشبه عليج لان هنا اول مره تجين ياذهب.
باوعت لماجد من كال اسمي بدون ميسالني شنو اسمج.
دار على ماجذ كله تروح تجيبلي مي ورد وخل وحرمل وقفل زغير وتجي.

راح ماجد واني رجعت كعدت يم عمة حميدة وعمة امي علي.
وره عشر دقايق رجع ماجد جايب الشغلات إلى طلبها السيد.
صاحلي السيد بعدما قرا على كل الشغلات كلي: يوم الاربعاء تجين وتجيبين وياج بخور عرب وحنة وجايفة ( مادة موجوده عند العطار ) وكشور ثوم وفلفل اسود.
ذهب: ان شاءالله.
باوع لماجد كله: كل الاذيه من صفحتكم. دير بالك على مرتك وجهالك.
ماجد: اكو خطر عليهم يعني؟

السيد: غيرة النسوان والحسد اكبر خطر على ابن ادم من ابن ادم وانت وراك نسوان ماترتاح الا تاذيك.
غيرة المرأة كفر.
ماجد: حسبي الله.
السيد: انت هم تحتاج تحصين تعال يوم الاربعاء وياها.
ماجد: ان شاءالله.
السيد: اذا شفتوا شي لاتخافون اقرا ايات وسور ويومية اقروا سورة البقرة والمعوذات.
ماجد: ان شاءالله.
طلعنه للبيت بعدما فهمني السيد شنو اسوي بالمي والخل والقفل.

وصلنه المغرب بس وصلت شفت الخيال وره الباب بقيت اباوعله لحدما دخلنه للبيت واني اقرا المعوذات بكلبيي.
ردت اروح اتوضا صحت لماجد.
انتظرني يم الحمام لحدما اتوضيت.
رحت صليت ونفس الشي رفعت راسي شفت نفس التلاثه اللي الشفتهم البارحة.
انخلست. خفت من شكلهم.
يمي عمة حميدة اجت تريد تصلي انتبهت علي صافنه اباوع كدامي كلتلي: اقري المعوذات. اقري المعوذات.
بديت اقرا المعوذات وغمضت عيوني.
بقيت مغمضه واقرا يمكن نص ساعة.

فتحت عيوني ماكو شي وعمة حميدة كاعده يمي هم تقرا المعوذات وتصلي على النبي واله.
بقيت على هالحالة من الجمعة لحدما صار يوم الاربعاء.
اهلي اجو كلولي تعاي عدنه بالبيت بس مقبلت كتلهم لا هنا احسن هالاقل اكو ناس هواي بالبيت اذا صار شي عالاقل اكو احد يهتم بالجهال.
يوم الاربعاء رحنة اني وماجد وامي وعمة حميدة.
دخلنه جان المكان فارغ بس احنة وبدخلتنه دخل رجال.

صاح اول شي للرجال بعدين صاحلنه قرا عالشغلات اللي وصانه عليها بعدين كلي: لاتغفلين عن الوضوء بكل وقت اتوضي بنية انه تكونين طاهره قربة لله تعالى وسورة البقرة لو يومية تقرين منها صفحة هم ميخالف والملابس اللي تتبخرين بيها تذبيها بمي جاري وتخلين جوه مخدتج تربة مال صلاة ممصلى عليها.
ذهب: ان شاءالله.
جنت اريد اساله هذا مس لو عمل لو شنو بس فجأة: عمل. عمل. وتعرفين منو مسويه.

بقيت ساكتة متعجبة شلون عرف شنو اريد اسأله؟
بلعت ريكي كتله: ولشوكت يبقى مشلوع كلبي بسببهن؟
ابتسم كلي: شكد ميظلن انت لاتستسلمين رجلج ابو جهالج لاتعوفيه لغير مره ههههه شبيج ساكتتلهن.
ادافع عن بيتي ورجلي وجهالي حتى لو هو مقبل.
باوع لماجد كله: انطيها مجال تتنفس وترد وتاخذ حقها، انت مو سيد؟
ماجد: الحمدلله
السيد: بس هي تشور اكثر منك لان هي فقيرة وماكول حقها.
ماجد: اني موجود ان شاءالله محد ياكل حقها.

السيد: انت اول واحد ماكل حقها.
الصدك فرحت من سمعته حجه على ماجد.
ماجد سكت معجبه الحجي.
من ردنه نطلع صاح وراي: لاتخافين بتي.
نهايتها قربية باذن الله.
ذهب: الله كريم.
بس بكلبي كلت ان شاءالله.
طول الطريق امي وعمة حميدة يسالن شنو كلج؟ شنو سالج؟ شنو صار؟ شنو حجه؟
ذهب: هههه شوية شوية سوال وره سؤال.
امي: غير نريد نتطمن.
بادت رجليه واني اسمعه يصيح باسمج.

ذهب: ههههه اني هيج من رحنه ذاك اليوم انخلست من سمعته صاح لماجد.
الجمعة سافرنه لتركيا.
التزمت بكل التعليمات اللي انطانياها السيد والحمدلله مظليت اشوف شي لاخيال ولااقزام ولا اي شي.
مرات اسمع صوت او احس احد واكف وراي رأساً اقرا المعوذات ويختفي.
بس مرة جنه نايمين بالليل وحسيت احد رفع الغطا عن رجلي.
جان ماجد حاضني ونايم.
فزيت باوعت لماجد نايم رفعت راسي ردت اشوف منو محسيت الا انسحبت من مكاني.
ملحكت حتى اصرخ.

راساً كمز ماجد وكعد: شكو؟ شبيج؟
بديت اقرا المعوذات هو افتهم وبدا يقرا المعوذات وياي وكام فتح الاضوية وراح فتح التلفزيون عالقران وخلاه ناصي ورجع كلي: شنو شفتي؟
كعدت عدل ودمعت عيوني هزيت راسي ماشفت.
ماجد: شلون كعدتي؟
ذهب: رفع الغطا وسحبني من رجلي.
مديت رجلي شوفته اثر اظافر وخراميش على رجلي وطالع دم.
كعد يم بقى ساكت ومدنك: استغفر الله. لاحول ولاقوة الا بالله. لشوكت ياربي.

كام جاب الديتول والكطن عقم رجلي بعدين كلي اتوضيتي؟
ذهب: لا نسيت.
ماجد: هاي شوفي بس نسيتي. كومي اتوضي بسرعة.
رحت اتوضيت ورجعت تمددت وبقيت كاعده مااكدر انام لحدما صار الصبح.
فترة كلش كئيبة مرت علي وعلى ماجد.
اعصابي مشدودة، نفسي من مسدودة عن الاكل، مااكدر انام، صار عندي خوف مو طبيعي على اولادي.
وبس انسى الوضوء لازم يصير شي.
ظليت اوقت الموبايل كل ساعة يدك حتى اتذكر الوضوء.

وره شهرين جنت نايمة الظهر من التعب لان بالليل ماانام، وحلمت بجريذي اسود جبير ملتف على رجليه ويريد يعضني واني شفته وكمزت ودست عليه ومات.
فزيت من النوم حجيت الحلم للعلوية.
العلوية: اي حيل دوسي عليه عساه بالمرض منين هذا الليريد يأذيج؟
ذهب: شمدريني منو.
حجيت لماجد كال بضحك: الحمدلله ماعضج. بس هو مات؟
ذهب: انت ماعندك ايمان بالاحلام اني صوجي احجيلك.

وره اسبوعين اتصلت بيه زينب مرت عبدالله كالت: متدرين بخالتي مريضة؟
ذهب: شبيها؟
زينب: ماادري وداها عبدالله لكم دكتور كلهم يكولون مابيها شي بس هي تكول مريضة وموجوعه جسمي كله يوجعني.
ذهب: خاف تريد تشوف معزتها هههه.
زينب: ههههه يجوز ياخيه.
كلت للعلوية اختها مريضة مقبلت تتصل بيها وتسأل عليها.
حجيت لماجد: شبيها مريضة؟
ذهب: ماادري. اتصل على عبدالله زحمة هسه يكول سمعوا ومااتصلوا.

ماجد: مااريد احجي وياها ولا اشوفها.
ذهب: مو هي اتصل على عبدالله عيب هو بكل شي واكفلك.
ماجد: باجر اتصل عليه الصبح اذا الله سهل.
نايمين الصبح ودك تليفون ماجد عمة حميدة: ياستار.
الو؟ ها يمه؟
عمة حميدة: ها يمه نايم؟ سودة علي كعدتك بس بعد لازم.
ماجد: شصاير؟
عمة حميدة: خالتك ام عبدالله انطتك عمرها.
اتفاجأنه من الخبر.
انصدمنه مااتوقعنه لهدرجة مريضة.

بالكوة ماجد حصل حجز على ثاني يوم اله ولامه ومقبل اروح وياهم كلي: ام نور وابو نور يمج شتحتاجين ميقصرون.
واذا ردتي شي اتصلي علي.
ثاني يوم راحوا.
امي اتصلت من سمعت كتلها: اي ماما اعرف اتصلت بينه عمة حميدة وراحوا ماجد والعلوية.
امي: وين راحوا؟
ذهب: يمكم للفاتحة.
امي: وشلون يخليج وحدج؟
ذهب: ماما تره هنا امان ويمي بيت ابو نور وام نور.
امي: وانت خوما رجعت عليج ذيج الحالة؟
ذهب: هههه ياحالة؟ اليسمعج يكول مخبلة.

امي: اي اتوقعي ينكال عنج هيجي. من حبايب السيد كل شي اتوقعي.
ذهب: ميهمني.
بقى ماجد بس ايام الفاتحة هناك ورجع علمودنه وبقت العلوية هناك.
ماجد: كلش تعبان.
ذهب: راح عنك التعب ان شاءالله شلونهم هناك؟
ماجد: والله الولد يكسرون الخاطر امهم بعد. وسلموا عليج هواي كتلهم مخليتها تجي علمود الجهال لان من تجي نحتار بيهم كالوا معذوره منعتب عليها.

ذهب: اني اتصلت عزيت زينب وبنات خالتك من تليفون عمة حميدة حتى لحد باجر يكول غلست.
سكتنه شوية ودار وجهة يريد ينام بعدين دار علي: ذهوبه؟
ذهب: نعم؟
ماجد: سامحيها.
فهمت قصده بس كتله: منو؟
ماجد: خالتي الله يرحمها. خطية راحت لدار حقها والله سبحانه وتعالى هو يقتص منها وياخذ حقج.
انقهرت كتله: الله يسامحها.
ماجد: ابريها الذمة.
ذهب: مبرية الذمة.
ماجد: من كلبج؟
هزيت راسي اي ودمعت عيوني.

دار حضني وكلي: ابن ادم لو يفكر بالموت يومية جان ميأذي بشر. الله يسامحها ويغفرلها.
ذهب: خالتي شلونها؟
ماجد: امي منهاره والله تبجي، اختها الوحيدة وتكول ذهب كلتلي خابري سألي عليها مقبلت. شبيه عاندت؟
ذهب: خطيه.
ماجد: لوم النفس يدمر.
اتذكرت حلمج هناك.
ذهب: مو على اساس يضحك؟
ماجد: لا عمي لا طلعتي مكشوف عنج الحجاب ههههه.