رواية صبرا يا قلبي

رواية صبرا يا قلبي الجزء الثاني للكاتبة روز الفياض الفصل السابع عشر

بين الحُب والحَرب يكُون حال العُشّاق، إنّهم
بالمُنتصف تمامًا، بِ مكان الرّاء
راضِين بِ عيش النّعيم والجحِيم بآن واحد؟
.
بقى ماجد يحاول يسكتني بس اني فقدت اعصابي وظليت اصيح واحجي بعصبية وصوت عالي.
عافني وطلع من الغرفة وقفل علي الباب بالمفتاح.
بقيت كاعدة عالجرباية وافور.
شلون بيها هاي شتريد تفتر وراي؟
مو اتزوجت شكو مجلبه بماجد؟
شلون اتصرف وياها؟
لازم اخليها حد.
كافي.
لحد هنا وكافي.

هاي الظاهر وحده متستحي ولاتخجل ولاتخاف.
وهيج بشر لازم اخاف منه.
لازم مااسمحلها تتمادى اكثر.
هاي نيتها تاخذ زوجي مني واضحة ومراح تتراجع مدام رجعت تركض وراه وهالمرة بصلافة اكثر واكبر لان المفروض هي هسه متزوجة.
خرب حظج ذهب.
الى متى هاي وذيج الثانية بت عمه كالبات حياتج جحيم؟
صفنت شوية بعدين اتذكرت من كال ( بت عمي ) شيقصد؟
شيماء مو بت عمه!
معقولة يجذب يكول شيماء وهي اسراء؟
بس هو ميطيق اسراء!؟

بقيت افكر وافكر وافكر ثال راسي من التفكير.
لحدما اتذكرت شغلة وصفنت بيها وكعدت احلل وافكك واركب من جديد لحدما كملت قصة كاملة براسي.
وهي: اذا فعلاً كلامه صحيح وشيماءهنا وهي اللي اتصلت بي فمعناها اكو احد ثاني مدخلها عالخط لان شيماء وين تعرف رقم ماجد هنا؟
اكيد احد مرجعها لحياتنه.
شخص منطيها الرقم وكايللها اتصلي عليه.
وهالشخص ماكو غير اسراء وامها.
ماكو احد يريد اذيتي بكدهن..
او.

الاحتمال الثاني ماجد طول هالمدة الفاتت كلها يضحك علي وعلى عقلي وبقى على تواصل وياها ماانقطع عنها رغم كل اللي صار.
مو بعيدة.
ياهو اقرب للحقيقة ياترى؟
بقيت بمكاني ابجي لحدما عمت عيوني ونعست ودخت.
حاولت افتح باب الغرفة لكيته بعده مقفول.
رجعت اتلفلت ونمت.
كعدت الصبح ماجد طالع.
العلوية شكلها متعرف اي شي لان محجت ولاعلقت ولا سألت.
شجاي يصير بحياتي!
بقيت محتارة شسوي هسه شلون اتصرف؟
اطبخ بس بالي مو وياي.

انتظرته يجي عالغدا حتى استجوبه وافهم منه بس مااجه.
بقيت كاعده واهز برجلي من العصبية وروحي بخشمي حتى الجهال مالي خلكهم وكل شوية اكوم اضرب واحد منهم على اقل شي.
بعدين انقهرت.
كعدت بجيت احس عقلي راح يصير بي شي من التفكير والتحليل لشوكت هالتعب لشوكت هالقلق.
مارجع ماجد لحد الليل دخل بدون سلام ولاكلام كبل بدل وكعد يشتغل عاللابتوب.
ماحاول يحاجيني.
وهذا تصرفه اكدلي انه هو خايف مني.

عشيت العلوية والجهال وكعدت انومهم حتى اروح احجي وياه.
هو بسرعة خلص شغلة وراح يريد ينام حتى بدون ميتعشه.
رحت وراه كتله: شيماء وين عرفت رقمك هنا؟
بقى ساكت ومسوي نفسه نايم.
ذهب: احجي وياك لاتحاول تغلس لو تسوي نفسك نايم ماجد هالمرة مو مثل كل مرة تره.
اتنهد حيل وكلي بعصبية: شتردين؟
صوجي اني حجيتلج المفروض اخليج مثل الثولة كل شي متعرفين.
ذهب: مثل الثولة؟!
فعلاً ثولة.
اي والله فعلاً اني ثولة.

هسه انتبهت اني ثولة. بس هسه كل شي راح يتصلح.
ماجد: روحي يم جهالج نوميهم ذهب وعوفي هالسوالف التعبانة. مالنه خلك المشاكل والصياح بهالليل.
ذهب: لا لا بعد انتهت مرحلة الثول والسكوت.
مااريد ابقى ثولة طول عمري.
ماجد: اتعوذي من الشيطان.
ذهب: وليش مااتعوذت انت؟
ليش الشيطان يفتر وراي ميريد يعوفني بحالي؟
ليش بس اني لازم اتعوذ من الشيطان وبالنهاية اطلع ثولة؟
ماجد: اهووو. لزكت بعد.
ذهب: وين عرفت رقمك شيماء؟

ماانقطع تواصلك وياها من ذيج المرة والمشكلة الاخيرة مو؟
بقيت تتواصل وياها وتطلع وتتراسلون والله يعلم شنو بعد. مو صح؟
دار علي باوعلي بعصبية: لاتضلين تخربطين وتألفين قصص وتصدكيها. بقيت اتواصل وياها شنو؟
وعيب هذا الحجي البنية اتزوجت والله يستر عليها.
فقدت اعصابي: ياااعيبب.؟
يااعيب؟
متزوجة وتركض وره واحد متزوج وتطلع وياه وتحجي وياه بعد ياااعيببب؟
متزوجة وبعدها تريدك وتركض ورااك وين العيبب؟

من تعرفها متزوجة وبعدك تحجي وياها العيببب ووويييين؟
راساً كام من مكانه راد يضربني بس اني دنك ورفعت ايدي.
ماضربي بس كلش صار عصبي جرني من ايدي للجرباية وكام سد باب الغرفة ورجع لزمني من ايدي: صوتج لااكص لسانج.
صوتج ميعلى علي افتهمتي؟
لاتنسين نفسج ذهب. تره ساكتلج لان مريضة فلا تحاولين تضغطين علي وتخليني اتصرف تصرف تندمين عليه بعدين.

ذهب: اعرفه التصرف لاتحاول تهددني بالضرب. عادي صار اتعودت ماعندي مشكلة انضرب بعد. المهم ماابقى ثولة.
ماجد: اخر مرة اكلج اتعوذي من الشيطان.
ذهب: واخر مرة اسألك وين عرفت رقمك هنا؟
علاقتكم جانت مستمرة كل هالفترة لو احد انطاها رقمك ورجعت تتصل لو اكو شي بعد اني مااعرفه؟ فهمني؟ فهمني لاتخليني اتخبل واسوي بروحي شي بهالليللل.
ظليت ابجي وهو واكف على راسي ساكت ويباوعلي بعدين كلي: اتخبلي اتخبلي بعد.

الظاهر انت تفكيرج المستمر باسراء وخالتي وامي اثر على عقلج وخلاج متعرفين شتحجين.
كمت بقمة العصبية دفعته حيل راد يوكع: اطلع برره.
اطلع بررره.
فتحت باب الغرفة وكتله: مااريد اشوف وجهك بعد. اطلع.
هو هم صار كلش عصبي دفعني عالباب.
من دفعني زلكت وحسيت المفتاح زلغ ظهري كله من فوك ليجوه من وكعت.
ماحاجني ولا حتى وكف شافني من وكعت طلع من الغرفة وراح للصالة.

بقيت شوية بمكاني لان تأذيت وتأذى ظهري بعدين كمت على كيف دخلت وقفلت الباب بالمفتاح.
بقيت الليل كله كاعدة ابجي.
بعدين انتبهت هو نسى تليفونه بالغرفة.
فتحته.
مابي شي من فتشته.
لكن من حرگت كلبي طلعت الارقام ونقلت رقم عبدالله ابن عمه وكلت باجر لازم اتصل عليه واگله.
كافي سكوت.
بقيت كاعدة للصبح وهو بالصالة.
غفيت وجه الصبح.
كعدت بالعشرة على صوت الجهال يمي يلعبون استغربت شلون دخلوا للغرفة اني قافلة الباب؟

الظاهر طلع النسخة الثانية من المطبخ وفتح الباب.
طلعت من الغرفة لكيت العلوية كاعده وبيدها شمس كالت: نايمة اليوم؟
ذهب: راسي يأذيني.
كملت شغلي والطبخ وبقيت كاعدة منتظرتها تنام او تدخل لغرفتها حتى اتصل على عبدالله.
ذهب: جوعانه؟ تتغدين؟
العلوية: كيفج.
ذهب: كيفي شلون اذا جوعانة اصب بس اذا مجوعانة مااصب.
العلوية: يالله صبي صبي خلينه نروح انام شوية العصر نكعد نشرب استكانة جاي.

صبيتلها اتغدت وغديت الجهال ونومتهم ورحت للغرفة دخلت وسديت الباب.
ايدي ترجف من الخوف بس اتشجعت واتصلت وكلت شيصير خل يصير بعد مابيها مجال.
دك التليفون وبسرعة عبدالله جاوب: الو؟
اول ماجاوب حصرتني البجية حاولت ماابجي كتله: الو صباح الخير ابو محمد شلونك؟
عبدالله: صباح النور منو؟
ذهب: اني ام رائد زوجة ماجد.
حسيته استغرب بس رحب بيه عادي فكتله: مااريد اطول بالحجي يجوز انت مشغول بس عندي سؤال اريد عليه جواب.

عبدالله: اي اتفضلي خوية شمحتاجة؟
ذهب: الجواب اريد اعرفه منك مااعرف باي طريقة المهم اريد اخذ الجواب الصحيح منك لان بعد ماعندي صبر ولاطولت بال ولاحتى صحة تتحمل هلكد ضغط وسكوت.
عبدالله: اي اتدللي بس كولي شكو؟ شصاير؟ ماجد مسويلج شي؟
ذهب: مو بس ماجد. مو بس ماجد.
ماجد ميسوي شي اذا ماكو احد وراه. كل مشاكلنه لان اكو ورانه ناس تحفر حتى تهدم هالبيت هذا.
هو فهم تلميحاتي كلي: امي لو خالتي هالمرة سبب المشكلة؟

ذهب: اختك.
اختك سبب كل المشاكل. مو اتزوجت وراحت ولت شتريد بعد من عندي؟ كافي خل تستحي شوية وتستقر وتركد لان عيب. وصارت ماصخة وبلا ملح.
حسيته استحى واني هم استحيت لان هو ماله ذنب كلي: فهميني بس شصاير شسوتلج؟
احجي ودموعي تصب كتله: منو منطي رقم ماجد لشيماء بس اريد اعرف؟ منين جابت رقمه اذا مو منها؟
انصدمت من سألني: بعدها تتصل عليه؟
سكتت شوية حتى استوعب ومسحت دموعي بعصبية: يعني انت تدري هي تتصل عليه؟

يعني من زماان تتصل عليه واني ماادري؟
معناها تعرف اختك المطيتها الرقم لو لا،؟
هي لو لا؟
اتنهد بعدين كلي: اهدي شوية خوية اهدي حتى نفتهم ونعرف نتصرف.
ذهب: هي لو لا؟
عبدالله: ماادري. والله العظيم ماادري.
اني اعرفلج الموضوع اذا هي والله العظيم ابرد كلبج بيها. بعد شتردين بس اهدي شوية.
ذهب: يعني هو من زماان يحجي وياها واني مطفية وثولة محاسة بشي وانتو كلكم تدرون؟
ليش؟

شقصرت؟ اذا يريد يسمع كلام امه وامك ويتزوج جان كلي واني اخذ جهالي وخلي يروح ياخذ راحته عسى ما يتزوج عشرة.
عبدالله: صلي على محمد خوية شالقصة. شيتزوج هو وين يلكة احسن منج ومن تربيتج.
ماادري اني حسيت بي من اجه مو على بعضه لذلك كلت يجوز عنده شي.
ذهب ؛
لا. انت تدري بي يحجي وياها. شايفه او سامعة او حاجيلك ماادري بس لاتحاول تغطي عليه بعد.

اني غبية جنت اسكت واكول ماتسوا اسوي مشاكل بس الظاهر كل شي يسوى بس اني طلعت مااسوا.
عبدالله: حشاج. حشاج.
اهدي بس شوية وثقي اذا طلعت اسراء هي وره الموضوع والله العظيم يوصلج الخبر شراح اسوي بيها. انت بس اهدي واذكري الله ولاتسوين مشكلة ولاتحجين لاحد حتى لماجد انتظري مني خبر واني اخذلج حقج.
مكدرت اجاوبه بعد اختنكت.
سديت التليفون وكعدت ابجي.
رجع هو اتصل مجاوبته.
بقيت محتارة شسوي؟

انتظرت ماجد يجي عالغدا بس مااجه.
صار العصر وهو ماكو.
شفت تليفوني ماجد متصل اكثر من مرة علي يمكن عبدالله اتصل عليه وكله.
كعدت العلوية رادت جاي.
سويتلها جاي كالت: اشو اني جوعانة. ماعدنه بورك شي كيك ويه الجاي؟
ذهب: الكيك ميشبع اذا جوعانة. بس عدنه بورك بالجبن هسه اسويلج.
العلوية: شوية كم وحده لاتكثرين مو كلش جوعانة.
مالي خلك بس مجبورة اكوم واتحرك واشتغل منا العلوية ومنا اولادي.

دك التليفون باوعت ( ماجد ) مجاوبته.
رحت للمطبخ خليت الطاوة عالنار وفرغت الزيت وبقيت واكفة صافنة عالزيت شلرن يتحرك من الحرارة.
طلعت البورك من الفريز وبديت اگلي ودموعي تصب.
سمعت باب الشقة انفتح عرفته اجه.
سمعت صوته سلم على امه.
دخل للمطبخ وبقى واكف بالباب متخوصر ويباوعلي.
مسحت دموعي وكملت گلي لاحاجيته ولادرت عليه ولاباوعتله.
اتدنه شوية وسد الباب كلي: ليش اتصلتي على عبدالله؟

حسيت بي يريد يعوف موضوع شيماء ويجلب باتصالي بعبدالله يمكن يضوج ويعصب من اتصالي حقه. يغار وميقبل ادري بي بس اني نار مشتعله بكلبي ومن حلات روحي محسيت بنفسي على لزمت الطاوة مال البورك وهي عالنار وشمرتها بالكاع.
الزيت الحار ترس المطبخ والبورك بالكاع.
طفر الزيت عليه على رجليه راًسا صرخ هو.
واني هم صرخت: لا تدنه يمي.
مو اني مخبلة؟
لاتدنه يمي ولاتحااول تحجي وياي. افهمتتت؟

بقى هو واكف مصدوم من رد فعلي لان فعلاً اتهسترت فقدت اعصابي بلحظتها فقدت السيطرة على نفسي.
شفت الجداحة قريبة من النار لاشعوريا مديت ايدي اوخرها خفت لاتنفجر.
هو عباله اريد احرگ نفسي رأساً فز وطفر وصل يمي ماادري شلون عبر المسافة البيني وبينه تقريباً مترين وكلها زيت حار يفور ماادري شلون عبرها ووصل يمي لزم ايديه اثنيهن لاواها وره ظهري بكل قوته.
ذهب: وخررر..
ماجد: اششش كافي.
ذهب: ووخر ماجد. وخررر. وخررر.

تعبت ظليت الهث وكلبي يدك بسرعة وبديت احس بأيدي نار شابه بيها عبالك لان لزمت الطاوه وهي حاره وشمرتها.
ماجد: اشششش، كافي. كافي خبال. اهدي..
حسيت كلش تعبت كلش. لدرجة حتى الحجي حسيته صعب مااكدر احجي.
ذهب: ايدي.
ماجد: كافي. بلا حجي.
ذهب: ايدي.
ماجد: مابيها شي اني لازمها. اشش سكتي واني اعوفها.
خليت راسي على صدره وغمضت.
ماجد: اهدي. هسه تدوخين وتوكعين.
محجيت لان فعلاً دخت.

خله ايده على راسي ورفع راسي. من رفع راسي بسرعة حسيت الدنيا ظلمت.
اخر شي حسيت بي من شالني.
وره شوية وعيت من سمعت صوت العلوية يمي تسأله: شسويتلها؟
ماجد: شسويتلها. سمعتيني حجيت شي من دخلت؟
العلوية: هيجي وحدها وكعت وانكلبت الطاوة وانجفت النعمة عالكاع؟
بقى ساكت.
فتحت عيوني هو واكف وبيده عطر. وهي على كرسيها كاعده تباوعلي: هاي هلكعدت.
شنو دختي لو شصار؟

قبل مااجاوبها كعد هو عالجرباية بصفي بس من كعد ماانتبه كعد على ايدي وايدي محتركة صحت: ايدي. ايدي، آخخخ.
هو كمز وكام من مكانه.
وخرت ايدي وبقيت لازمتها والوب من الوجع.
العلوية: كعدت على ايدها.
ماجد: حركت ايدها. وحركت رجليه وياها.
العلوية: غير تنتبهين هنه بورگايات شطلبت منج قوزي. حركت نفسج وحركتي الولد وياج. همزين ماحركتينه كلنه لو گبت بينه النار.
بقيت ساكتة مالي خلكها.
وهو هم ساكت.

سحبت كرسيها وطلعت وهي تحجي.
كام هو طلع ورجع جايب كريم مال حروق.
كعد عالجرباية دهن رجليه شمر الكريم بحضني: دهني ايدج قبل لا تورم وتلهتب.
لاحاجيته ولا اتحركت من مكاني.
اتنهد بعدين كلي: لشوكت احنه نبقى ندور بنفس الدائرة؟
مجاوبته.
ماجد: هاا؟ لشوكت نبقى ماعدنه موضوع غير شكالت شيماء وشسوت اسراء؟
ذهب: لحد هنا.
لهنا وبس. كافي بعد جذب وتمثيل.
لاتحاول تحجي ولاتبرر ولا تشرح ولاتحاول تكول اي شي. زين؟

من باجر الصبح تروح تحجزلي ولجهالي.
على اقرب رحلة راجعة للعراق. وابقى انت عيش حياتك شلون متريد بالطول بالعرض براحتك. شيماء موجوده واسراء موجودة واختار التعجبك محد راح يمنعك لو يوكف بطريقك.
كافي ثول.
بقى ساكت بعدين كام للكنتور طلع الجوازات واخذ السويج ونزل.
كمت اني طلعت جنطة خليت بيها ملابس للجهال كم قطعة وخليتها يم باب الشقة من جوه.
وطلعت جنطة ثانية وبديت اخلي بيها ملابسي وشغلاتي.

وره شوية دخل هو شافني الم ملابسي بالجنطة بقى واكف يباوع بعدين كلي: شتسوين؟
مجاوبته.
ماجد: يعني انت وين تردين توصلين؟ تردين تهدمين بيتج بيدج لو شنو؟
ذهب: ماعندي بيت اني. انت هدمته.
ماجد: بطلي حركات الجهال وشيلي الجنطة رجعيها بمكانها.
استمريت ارتب ملابسي بالجنطة وهو واكف يباوع.
فجأة اجه جر الجنطة بكل قوته وشمرها عالحايط: احجييي وياااممممنن انيييي؟
احجيييي ويااااممممنننن؟

رجع شال الجنطة وضربها بالكاع وطشر الملابس كلها.
ماجد: طلعة من هالبيت ماكو. روحه لاي مكاان مااااكووو. خبال بعد اكثر من هييييجججج هم ماااكووووو، افتهمتييييي؟
العلوية ظلت تصيح وتحجي لان تسمعه يصيح ومتعرف شصاير واجو رائد وفضولي وكفوا اباب الغرفة يباوعون عليه لان يصيح.
شافهم هو وسكت.
ماجد: لاتخافون بابا.
همه فعلاً خافوا اجو ركضوا لبدوا بحضني.
اتنهد هو حيل وطلع.
شوية وسمعت صوت شي انركع او انشمر.

ماجد: حضرت جنطها.
مجهزة نفسها. عبالها بهالبساطة. تلم ملابسها وتروح.
بكيفها احنه نمشي..
العلوية: شبيك اتخبلت يمه؟ متفهمني شبيك؟ شنو هاي الملابس الترست البيت بيها؟ المن هاي الجنط؟
ماجد: زعطوط اني متراس عينها بكيفها تتصرف. تتصل. تسافر. ترجع للعراق. بكيفها. منها لنفسها.
العلوية: اذكر الله واكعد لتحرك باعصابك وتخبصنه. اكعد شوية حتى نفتهم شصاير.
ماجد: مصاير شي.

وخرت الجهال من حضني كعدتهم عالجرباية وطلعتلها كتلها: تدرين بابنج عنده شي ويه شيماء؟
العلوية: ياشيماء؟
ذهب: شيماء مرت المرحوم اكو غيرها عدنه. كم شيماء عدنه غيرها؟ بس شومه وحده العزيزة الغالية.
حسيتها انصدمت.
دارت عليه كلتله: شعندك ويه شيماء؟
ماجد: مالج علاقة بيها هاي مخبلة.
ذهب: اي مخبلة صحيح. متتصل عليها وتتصل عليك؟ متروحلها؟ مااجت وراك لهنا ويومية رايحلها؟
ماجد ؛
اكلي تبن لاتخليني اكوم اوكلج.

العلوية: شهالحجي؟
اجت وراك وين؟ شتسوي اجت؟ وين اندلتك هنا وين وصلتلك؟
ماجد: لاحول ولاقوة الا بالله.
العلوية: احجي فهمني شويمه شتريد منك؟ شعدك وياها؟
ذهب: شتريد منه بعد. تحبه وعاشكته غير. من جان المرحوم عدل.
العلوية: يممممههههه!
من جان رائد عدل؟!
.
گآلَوّ تّريد أَتروح وأَتعذب أَلروح؟
أمودع ألله ويآگ بَس أبقى لَتروح؟

رواية صبرا يا قلبي الجزء الثاني للكاتبة روز الفياض الفصل الثامن عشر

استطيع الطفو لكني اخترت الغرق بك؟
.
العلوية اتخبلت ظلت تصيح من عرفت بشيماء تحب ماجد من ايام اخوه زوجها الله يرحمه.
العلوية: يعني اني جنت مخليه ابيتي حية؟
حية رگطه تلعب عالحبلين. متزوجه الجبير وتركض وره الزغير؟!
يممماااي يمه! ولك شلون هالحجي هذا ماادري بي؟
منو يدري بهالحجي بعد؟ منوووو؟
بقى هو ساكت ومدنك.
وهي استمرت يمكن ساعة كاملة كاعده على كرسيها وتدك على رجليها وتصرخ.

تعبت وارتفع ضغطها: انطيني مي نشف ريكي. الله لايوفقج شويمه. الله لايربحج.
منين اجتني هاي السالفة.
منين طلعتلي شويمه الدايحة من تالي رجعت على عمري.
رحت جبتلها مي شربت بعدين كالت: ارتفع ضغطي.
ارتفع ضغطي.
انطيني علاجي.
ركضت جبتلها علاجها.
كام هو شربها بعدين اخذها لغرفتها خلاها على فراشها وكعد يمها.
بقيت اني واكفة يمها باوعلي هو كلي: زين هيجي؟
ارتاحيتي؟
ذهب: هذا السؤال وجهه لنفسك.

ردت اطلع من الغرفة صاحت علي: تعاي.
تعاي. فهميني تعاي.
هالحجي صدك؟
هذا ميحجي اعرفه. انت كليلي هذا الحجي صحيح؟
شويمه شعدها ويه رجلج؟
ذهب: سأليه هذا هو كدامج كليله شعدها وياك؟ اني محد يكلي شي كله اخر من يعلم.
طلعت من الغرفة كبل المطبخ ايدي موتتني من الوجع.
وحت وكفت عالسنك وفتحت المي البارد عليها.
اسمع صوت العلوية تحجي وتسال ماجد وهو يجاوبها: ماكو شي يمه هاي مخبلة تتخيل.
هي وينها شيماء وعندي شي وياها.

نامي وتركي هالحجي ارتاحي لايرتفع ضغطج.
بقى يمها لحدما نامت بعدين طلع اجه وراي للمطبخ كلي: اذا صار بيها شي انت مسؤولة.
ذهب: لا انت.
رجع دار علي باوعلي: شستفاديتي من حجيتيلها؟
ذهب: من حقها تعرف الحقيقة ومن حقي.
ماجد: ياحقيقة شبيج انت؟ كافي ذهب. عقلي ورجعي لعقلج.
هالمهزلة هاي اتركيها.
ذهب: بطلت اصير ثولة.
عفته ورحت للغرفة لميت الملابس المطشرة وشلت الجنطة.
بيومها نام هو بالصالة واني وحدي الغرفة.

الصبح واني نايمة حسيت بألم مو طبيعي بأيدي. وحرارة.
كعدت شفت ايدي صايرة تخوف. كلها ملتهبه وصايرة فقاعات جبيرة بيها لدرجة مااكدر الزم اي شي بأيدي او حتى احرك اصابعي.
باوعت للساعة بالتسعة.
اتوقعت ماجد طالع بس من طلعت من الغرفة شفته بالصالة نايم ورافع رجليه.
استغربت.
اتدنيت يمه شوية سمعته يون!
اقتربت اكثر باوعت لوجه مغمض مدري نايم بس وجهه عركاان حيل عرفته مصخن.

ردت اغطي رجليه اتفاجأت رجليه ملتهبه اكثر من ايدي.
جفوف رجلية كلها محتركة وملتهبة وبيها فقاعات لدرجة ميكدر يدوس عليها.
خفت.
صحيح كلبي شايل عليه بس هسه وضعه مو مال عتب وزعل.
ندهته فتح عيونه بس محجه شي.
ذهب: مصخن؟
هز راسه اي ورجع غمض.
رحت جبت مي باود وخاولي زغير وكعدت اسويله كمادات واخلي على كصته وايدية.
المشكلة ايدي موتتني ومااكدر اعصر الكمادة من المي زين كلما اخليها تنقط مي على وجهه وملابسه.
ماجد: سبحت.

ذهب: هاا؟ نعم؟ سبحت شنو؟
ماجد: نكعتيني.
غلست شوية بعدين كتله: فوك شينه..
مو بس انت مصخن.
فتح عيونه باوعلي لزم ايدي حتى يشوف مصخنه لو لا بس اني صرخت.
كمز هو.
ذهب: آخخخخ آخخخخ آخخخ
ايدي..
آخخخخ خرررب.
رجع خله راسه وغمض: استغفر الله العلي العظيم.
ويكلج ليش تصير عصبي وتحجي.
ذهب: كلمة وحده منك بعد
بعدني ماكملت الجملة كلي: اصبعج هذا مترفعيه بوجهي، اكصه تره. منو الشمر الزيت وحركنه اني لو انتِ؟
ذهب: اي مو بدون سبب.

ماجد: ماكو سبب. كل سبب ماكو. خبالج وخيالج السبب.
بقيت واكفة اريد ارد بس هو كعد وراد يخلي رجليه بالكاع ميكدر بقى محتار شيسوي.
رجع راسه ليوره وهو عصبي: استغفر الله واتوب اليه.
اتفضلي. هاي سوالفج. شفتي؟
شلون امشي هسه؟ شلون اروح لشغلي؟ شلون اسوق السيارة؟ شلون اقضي طلباتكم؟
كتله باستهزاء رغم ضميري يأنبني: مجبور تمشي وتروح للشغل وتسوق شعندك مستعجل عالطلعة شيومه موجودة مطايرة تصير زين وتلحك عليها.

باوعلي بعصبية: وربي لو الزمج. والحمااام؟ الحماااام شلون اروح هسه؟
ويكلك لاتحجي. لاتحجي.
مو هاي تصرفاتج.
ذهب: عاجبك اهلاً وسهلاً معاجبتك تصرفاتي ماكو مشكلة كتله احجزلنه انت مقبلت.
شال الكوشاية من القنفة وشمرها علي.
ماجد: حسابج بعدين.
رحت غسلت وجهزت الريوك خاف تكعد العلوية ودنكت حسيت ظهري يأذيني.
رجعت الغرفة وكفت كبال المراية رفعت ملابس شفت ظهري ازرك اتذكرت من دفعني عالباب.
جبت الموبايل وصورته بالمراية.

ودزيتها اله، .
اسمعه يحجي بالتليفون ويه صديقه يكله يجي ياخذه للمستشفى.
سد التليفون وصاح علي: جهزي نفسج حتى نروح المستشفى.
ردت البس احتاريت شلون اسد الدكم. ايدي مااكدر احرك اصابعي لازم اعتمد على ايدي اليسار واني كل اعتمادي على ايدي اليمين.
اتنهدت بعصبية ورحتله حتى يسدلي الدكم مال القميص والبنطرون.
كاعد ومخلي راسه على ايده ومدنك.
وكفت كباله كتله: سدلي الدكم.

رفع راسه باوعلي شوية بعدين اتنهد وراد يحجي بس محجه.
سحبني من القميص اتدنيت وبدا يسد الدكم وهو عاكد حواجبه ومخنزر.
ماجد: هذا القميص هيجي ينلبس؟ عالجلد؟
ذهب: لعد على شنو؟
ماجد: باردة قصدي.
ذهب: قمصلة.
سكت.
بعدين راد يسد دكمة البنطرون رفع راسه: الا جينز..
ذهب: مو قماش يعني؟ بعدين ادفى.
ماجد: يالسانج. لسانج ماادري شوكت طال هيجي.
حاولت ماابتسم لان حصرتني الضحكه.

سد الدكمة: بسرعة كبل ميجي الولد لبسي حجابج وجيبلي مي اغسل وجهي عالاقل.
رحت جبتله مي غسل وجهه ومنشفه.
ماجد: قمصلتي وين؟
رحت جبتله القمصله لبسها.
كعدت العلوية اتفاجأت بحالتنه: ياااا شصاير بيها رجليك؟ شنو هذا؟ احجي ميعجبك حجيي. اسكت مااكدر.
شويمه هاي كله من وره شويمه ادري اني. وتكول محاجي شي وانت.
اووفف ياربي.
ماجد: راح يجي صديقي ياخذنه للمستشفى خلي حجابج على راسج.
العلوية: وينج ذهب؟ انطيني حجابي، اوووف.

شلون تمشي هسه؟
اتنهد هو وكللها: يشيلوني.
انطيتها حجابها شافت ايدي: ياااا انت شبيج بعد؟
ماجد: شبيها بعد.
العلوية: ترحون اثنينكم للمستشفى؟ هاي ايدج شلون بيها؟ شلون تشتغلين؟ تطبخين؟ جهالج شلون بيهم؟
اتنهد هو حيل حسيته يريد ينفجر من العصبية: انطيني محفظتي.
جبتله المحفظه وكعدت لازمه ايدي من الوجع.
دك تليفونه كطعه.
رجع دك مرة ثانية وهم كطعه.
باوعت ردت اشوف منو ممبين بس رقم.
العلوية: ياهو هذا؟ شيماء؟

ضحكت اني بصورة لاارداية هو باوعلي ودار وجهه وبقى ساكت.
العلوية: اذا دك اطينياها اريد احاجيها.
ضاج هو كللها: يمه. يرحم والديج مو وكتج هسه.
العلوية: يااا. شوكت بالله؟ من تضحك عليك شويمه وتجيبها ابيتي جنه؟
ماجد: ياجنة ياشويمه؟
رد عليها بعصبية هي سكتت.
وره شوية اندك الجرس طلعت رحت فتحت الباب شفت رجال كلش مرتب ووسيم ووياه بنية كلش حلوه سافره وشعرها اشقر مفتوح ولابسه جينز ضيك وبلوز قصير.

سلموا ورديت كال الرجال: هذا بيت استاذ ماجد مو؟
ذهب: اي نعم.
كال بابتسامة: اني ابو نور صديقه وهاي ام نور زوجتي اجينه حتى ناخذكم للمستشفى.
رحبت بيهم ودخلوا للبيت سلموا عالعلوية وكعدوا يسولفون بهالاثناء اني جيكت عالجهال نايمين وجهزتلهم ريوك خاف يكعدون لحدما اجه الناطور ( حارس العمارة ).
اتعاونوا ابو نور والناطور حتى يشيلون ماجد شوية ويسندوه لحدما ينزل للسيارة.
واني وام نور نمشي وراهم،.

صعدنه بسيارتهم ورحنه للمستشفى.
بالمستشفى من شافوا رجلين ماجد وايدي اتفاجأوا ورادوا يستدعون الشرطة بس هو كللهم زوجتي وكعد منها الزيت واحتركنه.
الدكتور بقسم الحروق كال لازم ماجد يبقى بالمستشفى اسبوعين لحدما يطيب الحرق لان مساحة الحرق برجليه اكبر من مساحة الحرق بايدي.
ماجد مقبل لان ميكدر يعوفنه بالبيت بحدنه بس الدكتور مقبل وبقى مصر على بقاء ماجد لحدما تطيب الحروق حتى لاتتسمم.

من شاف ايدي باوعلي وكلي انت هم المفروض تبقين لحدما يطيب الحرق. بس مقبلت كله ماجد مستحيل لان عدنه طفلة صغيرة بالبيت متكدر تعوفها.
بقى الدكتور يحجي ويه ماجد بس لاماجد قبل ولا اني على بقائي بالمستشفى مااكدر اعوف الجهال والعلوية منو الهم محد يمهم.
بدوا بماجد مددوا عالجرباية ورفعوا رجليه عقموها وبدوا يفتحون الفقاعات إلى برجليه.

جنت هادئة وساكتة ومنتظرة دوري لان جانوا يعقمون ايدي بس من سمعته صرخ من الوجع كمزت.
طفرت من مكاني.
من شفته شلون موجوع انبني ضميري حيل رغم من شمرت الزيت مجان قصدي اذيته بس من عصبيتي فقدت اعصابي.
اشوفه شلون يتلوى من الالم متت من القهر عليه.
ظليت ابجي.
نزلت من مكاني ردت اوكف يمه الزم ايده يمكن اخفف عنه بس مخلوني كلولي ممنوع تقتربين منه حالياً منعاً للتلوث.
جان بيناتنه حاجز زجاجي. بس اشوفه ويشوفني.

شوية واجه دكتور ثاني حتى يعالج ايدي واول مفقع الفقاعة حسيت بنفس الالم.
حسيت روحي تطلع عبالك توه محتركة.
قاومت صرخة الم لايحتمل. قاومتها بكل قوتي لكن فقدت السيطرة على دموعي فد مرة.
ظليت ابجي هم من الوجع وهم لان اشوفه موجوع بسببي.
الله يساعد اليحترك كل جسمه شلون يتحمل.؟
خلصوا ايدي بعدما عقموا ولفوا اصابعي كل اصبع وحده وكلولي يومية تجين نغير الشاش ونعقم المنطقة.
ذهب: مااكدر اجي يومية وارجع وحدي اخاف.

ام نور: هاي مهمتي اني يومية اجيبج.
ذهب: اتعبج ويايه هيج.
ام نور: لا عيني شدعوه اعتبريني جارتج او صديقتج ولو احنه المفروض من زمان نجيكم ونرحب بيكم ونتعرف عليكم بس بصراحة ابو نور كلي من خلال حجي استاذ ماجد حسيت زوجته مو اجتماعية. يعني متطلع متروح لاحد مسامع رايحة سفره مثلا او حفلة او تجمع فلذلك مردت اجي واكون ضيفة ثكيلة عليج.

ابتسمت رغم الوجع كتلها: مااطلع لان اولادي صغار مااسيطر عليهم وحدي وماجد اغلب وقته للشغل والعلوية امه عاجزة وبأمانتي مااكدر اطلع واعوفها وحدها بالبيت وماعندي هنا اقارب لو اهل لو صديقات حتى يجوني لو اروحلهم واصلا اول مرة اعرف ماجد عنده صديق اسمه ابو نور.
ام نور: لعد اعتبريني صديقتج ومنا وهيج كل طلعاتنه سوا اجيج وتجيني نطلع نشرب كهوة او نتسوك نخلص وقت بره ونرجع نسولف ليش كله وحدج.
ذهب: ان شاءالله.

بعدما خلصت رحت وكفت اباوع لماجد خلصوا وحده من رجليه وبعد الثانية.
اكلني كلبي عليه هو يتلوى واني ابجي.
كلش جنت مستحيه وخجلانه من نفسي.
شلون هيجي سويت؟
لو واكع الزيت على وجهه؟ يمه اسم الله.
شلون بي هسه؟ منو يبقى وياه بالمستشفى؟ شلون يروح للحمام شلون يمشي؟
اووف ربي سامحني انت تعرف مو بنيتي اذيته ولامفكرة اصلا.

بقيت واكفة وام نور وابو نور بره واني اباوعله لحدما خلصوا رجله الثانية وانطوه ابره حتى يسكن الالم وينام.
سمحولي ادخل يمه شوية قبل مااروح، .
كعدت عالكرسي هو مغمض عيونه من الالم وخال ايده على كصته.
سمع صوتي ابجي وخر ايده باوعلي: خلصتي؟
هزيت راسي اي.
ماجد: شكلولج؟
ذهب: لازم يومية اجي يغيرون الضماد.
اتنهد حيل وسكت.
ذهب: ام نور كالت تجبني وترجعني يومية.

رجع باوعلي: جزاها الله خير. يمكن بعدين اخابر على امي حميدة تجي يمكم.
مااكدر اخليكم وحدكم وانت هم ايدج متكدرين تسوي شي بيها لحدما اتطيب.
عندج الم؟
ذهب: شوية.
ماجد: ياشوية، طلعت روحي. عملية فوق الكبرى سويت محسيت بهيجي الم.
الله يسامحج.
من كلي الله يسامحج انفجرت بالبجي.
عبالك يعاتبني وهو فعلا جان عتب.

ظليت ابجي بالنص ساعة لدرجة الممرضة شافتني عبالها ابجي من الالم وراحت جابت ابره مسكن حتى تضربني بس مقبلت لان لازم ارجع لاولادي واخاف اذا سكن الالم انام.
اتنهد هو بعدين كلي: كافي بجي بعد على شنو تبجين شيفيد البجي هسه!
روحي للبيت واخذي علاجج وطبقي التعليمات الكالها الدكتور بالمضبوط وابد لاتقتربين من المي، اني بديت انعس. الالم خف شوية. من اكعد اتصل على امي حميدة.

ديري بالج على نفسج وعالجهال وامي. اذا احتاجيتوا شي اخذي رقم ام نور هي تساعدج.
ذهب: كله منك. كله منك. انت السبب.
ماجد: اففف. ميخالف مني السبب اني السبب كافي بجي. يالله روحي للبيت كلها كم يوم واطلع اني ان شاءالله.
ذهب: ان شاءالله.
رجعت بجيت غمض عيونه هو: الله يعينك ياماجد. تبجين علي لو على شنو؟ لو موجوعه؟ فهميني بس حتى اريحج.؟
ذهب: ابجي على حظي.

ماجد: زين حياتي كملي بجي بالبيت عيب الرجال ومرته واكفين بره ينتظروج صار ساعة. ، ومن توصلين دزيلي مسج كولي وصلت حتى ميظل بالي.
ذهب: اي راح يظل بالك خطية من هسه غمضت عيونك.
رد علي وهو فعلا بدا ينام: تعبتيني. مااكدر احجي بعد.
شفته غفى عفته وطلعت.
وصلوني ام نور وابو نور للبيت وانطتني رقمها واخذت رقمي واتفقنه تمر علي الصبح حتى اروح يضمدون ايدي واشوف ماجد.

من رجعت للبيت العلوية جانت منتظرتني: تعاي تعاي احجيلي بالله صدك شويمه عدها شي ويه ماجد؟
ذهب: والله خالة ماادري ليش انت مستغربة ذيج المرة على شنو جانت مشكلتنه مو عليها؟
العلوية: اي بس عمتج حميدة راحت وحجت ويه امها وطيحت حظها.
ذهب: الظاهر ماانتهى.
العلوية: شلون عرفتي؟
ذهب: هو كال.
العلوية: شكال؟
حجيتلها القصة.
وحجيتلها على موضوع حبها لماجد من جانت متزوجة رائد اخوه الله يرحمه.
طلت تدك وتلطم.

العلوية: وساااكتتته!
ذهب: شسوي يعني؟ اذا احجي تكولون حجت واذا اسكت هم متقبلون شسوي؟
العلوية: هاي وحدة نكسه، نكسه بت نكسه. متزوجة وتباوع لحماها شلون تسكتين؟ ولج بالله استخف وخلاها على راسج شتسوين؟
ذهب: اعوفه واخذ جهالي واروح لاهلي، .
غمتني باثنين اديها؟
العلوية: ولج اكعدلها ركبة ونص شنو اخذ جهالي واروح، غير اروح انعل والدي والديها..
فاهيه. ابقي هيج فاهية لحدما يحط على راسج مرة. وياريت مره تسوه.

بقيت ساكتة متعجبة من هالمحبة النزلت عليها فجأة.
لوجانت بت اختها بمكان شيماء جان شجعته.
بالليل اتصلت عمة حميدة ماجد متصل بيها: الحمدلله على سلامتكم يمه. شلون صرتي؟
ذهب: الحمدلله يمه زينه.
عمة حميدة: هسه اخوج عبدالله حجزلي باجر ان شاءالله اني يمكم لتخافين وتشيلين هم.
ذهب: ينطيج العافية راح نتعبج ويانه.

عمة حميدة: لج ياتعب غير طاك كلبي عليكم وعالجهال. ووليدي بالمستشفى سوده علي ماكلني كلبي عليه. غير تنتبهين يايمه هذا الزيت يموت ابن ادم مو عبالج بس يحرك.
بقيت ساكتة الظاهر متعرف شي.
ثاني يوم الصبح مرت علي ام نور حتى تاخذني للمستشفى.
اخذت وياي غيارات لماجد ومنشفة وكم شغلة خليتهم بجنطة صغيرة وطلعنه.
بالطريق سألتني: شكد صارلكم متزوجين انت وابو رائد؟
ذهب: ليش شكلنه قديم؟

ضحكت كالت: لا بالعكس شكلكم بالباكيت بس احس اكو بينكم معاناة ومشاكل.
اتنهدت وكتلها: ماكو زواج مابي مشاكل.
ام نور: اجاباتج متنطي جواب لا اي ولا لا ههههه. مبين عليج ذكية.
ذهب: هههه لا جوابي عادي مو قصدي اصير لوتيه تره هههه.
ام نور: اني وابو نور اتزوجنه عن حب وعدنه خمس جهال اثنين ولد وتلث بنات.
ذهب: الله يخليهم ويحفظهم.
ام نور: ابو نور مو حكر مثل السيد يعني اطلع براحتي اتصرف بكيفي عنده ثقة بيه.

ذهب: ومنو كلج السيد ماعنده ثقة بيه! الحمدلله الثقة موجودة بس الغيرة مخربة كل شي.
ام نور: لا هو يحجي يم ابو نور مرات من يساله عنج يكله اخاف عليها.
ذهب: يمعودة مااريد اطلع مالي خلك المشاكل. فد يوم احجيلج نبذه مختصرة عن المشاكل الصارت بينه بسبب غيرته بس اخاف تنصدمين هههه.
ام نور: لا عفيه ماعندي صبر احجيلي هسه.
حجيتلها شوية بصورة مختصره عن بعض المواقف وسالفة الالوان وهي تضحك ومتعجبة.

وصلنه للمستشفى رحت كبل لماجد لكيته كاعد يحجي بالتليفون.
وكفت يمه اسمع ويامن يحجي.
ماجد: اممم. اممم. اممم. ماشي ماشي. هسه اتصل عليه واشوفه.
سد التليفون كتله: منو هذا؟ وتتصل على منو؟ ومنو اللي راح تشوفه؟
ماجد: يالله صباحك خير. الناس تسلم بالاول تكول صباح الخير تكول شلونك شلون صرت اليوم حبيبي مو تهجم هيجي منو هذا وشنو هذا.
ذهب: ويامن جنت تحجي؟

ماجد: ابو نور. البارحة وصلنه تتذكرين لو نسيتي؟ ادكلج عليه حتى تتاكدين؟
ذهب: دك.
صفن بوجهي بعدين ضحك على كيف: هاي شلون بلوه، .
مو البارحة تبجين علي اليوم جنج اتغيرتي؟
ذهب: من سوالفك ومصايبك. مو زين وساكته منك لهسه.
ماجد: ساكتة مني؟
اممم شتسوي مثلا؟
ذهب: صير زين واطلع للبيت وتعرف.
هاي شغلات وغيارات خاف تحتاج.
مع السلامة.
درت اريد اطلع لزم ايدي خلاني طفرت من مكاني من الوجع.

ماجد: افف اسف اسف. ماانتبهت والله عبالي ايدج الثانية.
دمعت عيوني من الوجع كوه قاومت البجية.
ماجد: اسف والله ماانتبهت.
من هدأت كلي: عالاقل انت ايد وحده مو اني وجليه اثنيهن لااكدر امشي ولا اتحرك.
غير سوالفج هاي. يالله خلينه ساكتين الله يسامحج.
ذهب: لاتكول الله يسامحج على اساس مو انت السبب. كله منك ومن مصايبك.
ماجد: يعني هم حاركتني وهم متردين تعترفين بذنبج؟ اروح اشتكي عليج هسه هههه.
امي شلونها؟

ذهب: منتظرتك تطلع حتى تفهمها شعندك ويه حبيبتك.
ماجد: حبيبتي اخ يا حبيبتي. مرمرتني وعذبتني وتعبتني.
ذهب: حيل.
رفع راسه باوعلي وضحك: لج انت ليش هيجي صايره؟ تره صدك انت متغيرة واسلوبج متغير!
ذهب: كل هذا وتريدني مااتغير؟ حتى الله ميقبل ابقى ثولة.
ماجد: عاد انت لزكي هسه بهالحجاية.
ذهب: لان صحيحة. فعلا اكتشفت اني ثولة وعلى كولت خالتي فاهية. وحده غيري من زماان عافتك ورجعت لاهلها.

ضاج من حجايتي الاخيرة كلي: بلا لعب جهال. عقلي. لا تتمادين بتصرفاتج لهنا وكافي ماله داعي كل موضوع يصير بينه كلها تعرفه. مو كافي اتصالج عبدالله؟
ذهب: اطلع بالسلامة ويصير خير.
.
وكأن الله خلق حبك مع روحي.؟

رواية صبرا يا قلبي الجزء الثاني للكاتبة روز الفياض الفصل التاسع عشر

هَذا حالي وگَلبي مَگسور أبغيآبَگ؟
مگآبلّ أَلشبآگ وعيوني عَلى بآبَگ؟
.
بقى ماجد اسبوعين بالمستشفى لحدما اتحسنت رجليه ووكعت الطبقة الفوكانية كلها وبدا وياه علاج حتى تطلع طبقة جلدية جديدة ونظيفة.
واني نفس الشي.
خلال هالاسبوعين اجت عمة حميدة واتفاجات من عرفت بالصار والعلوية هالمرة لان السالفة مو على مرامها وافقت عمة حميدة على كلامها: ولج انت كم اكلج ابد لاتنطين مجال لوحده تخرب بيتج وتاخذ رجلج.

تعرفيه يحبج ويحب جهالج روحه بيكم بس بنات ابليس لعنة الله عليهن.
شتكولين علوية؟
العلوية: كتلها قبلج كتلها فاهية ابقي لحدما يحط مره على راسج.
عمة حميدة: لا ان شاءالله الله يرد كيدهن في نحورهن. لعد احنه وين رحنه ونخليهن يجن وياخذن مكانها. غير بنيتنه وام جهالنه ومرت الغالي.
بس لازم نتعرف شلون نتصرف هاي متريد اتوب وتعوفه وهذا مدري شقصته.

خلونه نفكر بطريقة نجرله اذنه حتى يتوب ويحطلها طابع وبعد متجي ولاتوصل ولا توطوط يمكم.
ذهب: والله اني تعبت ونفسيتي تعبت ومليت راح اخذ جهالي واروح لاهلي. حل يشبع بشيماء.
العلوية: اذا رحتي تره تتحملين النتيجة تعرفينه هو اذا تردين تعاندين عو اعند منج.
عمة حميدة: روحي.
استغربت من عمة حميدة.
عمة حميدة: روحي واحنه نكله حقها. وديها لاهلها خليه يشوف الحديدة حامية.
ذهب: منو يوديني ميقبل يوديني ولا يقبل اروح وحدي.

عمة حميدة: اني والعلوية نروح وياج نرجع كل احنه للعراق ونخليه وحده. خليه يبقى وحده واحنه كلنه وياج كل احنه راح نكله حقها.
ذهب: واذا مافاد؟
العلوية: هسه انت ليش تسبقين الاحداث؟
عمة حميدة: يفيد يفيد متعرفيه يعني يحبج ويحب جهاله.
سكتت رغم جنت ناوية اتصل على امي اكللها خلي بابا يجي ياخذني بس مادام همة حميدة والعلوية وياي معناها لازم اسمع كلامهم واشوف تاليتها حتى بعدين لحد يلومني.

ظلت ام نور يومية توديني وترجعني للمستشفى ومرتين اخذتني للسوك اتسوكت واجت يوم اتغدت يمنه هي واولادها.
آخر يوم قبل لايطلع ماجد واحنه رايحين للمستشفى كلتلي: ابو نور كلش يعزج.
باوعتلها باستغراب: ليش؟
ام نور: ابو نور يعرف اهل ابوج يكول جانوا قبل بالزمانات يم بيت اهله. كلش يمدحكم يكول خوش ناس ومحترمين حيل ومؤدبين.
ذهب: اممم.

ام نور: بالاضافة لحجي السيد عنج يم ابو نور يكول ميكول عنها كلمة مو زينة او مو حلوة بالعكس. يمدحج ويكول مهتمه بامه والبيت والجهال على اكمل وجه. واني هم لاحظت هالشي من اجيت اتغديت عدكم ذاك اليوم ماشاءالله عليج ماكو شي ناقص ومتخلين شي للصدفة حتى وانت ايدج متأذيه بس متكعدين.
ذهب: وشنو الفايدة.
ام نور: شلون يعني شنو الفايدة؟

تره اهم شي بالزواج بالنسبة للمرة انه الرجال ميكسرها كدام الناس ولاينطي بيها كدام احد وخصوصا كدام اهله.
ذهب: صحيح.
ام نور: احسج مراضية عنه؟ مأذيج؟ هو متعب اكيد لان ابو نور يكول كلش يخاف عليها ميخليها تطلع.
بعدما حسيت بام نور تريد تعرف شصاير وحسيت بيها هي وزوجها خوش اوادم حجيتلها قصة شيماء.

بقت ساكتة وبين عليها التأثر بعدين كالت: لازم هالمرة تاخذين موقف. اني مااريد احرضج بس اني لو بمكانج لازم اخذ موقف لازم اخلي حد لوجودها هي وغيرها بحياتي. الى متى تبقين عايشة بقلق وخوف؟ خليلها حد وطيحي حظها. تره الرجال حتى اذا غلطان محد يكله انت غلطان ومادام اهله واكفين وياج استغلي الموقف لصالحج ولعبي بيها لعب. ليش تخلين وحده مثل هاي تجي عالجاهز تاخذ بيتج وزوجج وعائلتج. روحي مثلما كلتلج امه روحي لاهلج وزعلي عليه خليه يتحمل نتيجة كذبه عليج لحدما يحجيلج الصدك ويجوز منها يالله ترجعين.

اتنهدت كتلها: افكر اروح وماارجع بعد.
ام نور: لاااا هالحجي ممقبول منج. مو اكلج لتخليها تخرب بيتج وحياتج شنو اروح ماارجع. راح احجيلج قصة محاجيتها لاحد لاي احد محاجيتها.
ذهب: احجي.
ام نور: ابو نور مرة اتزوج علي.
فكيت عيوني والتفتت عليها مصدومة.

ضحكت هي ودمعت بعدين كالت: هم وحده بت حرام لفت عليه واتزوجها بالسر واكتشفت اني الموضوع. عفت الجهال عليه ورجعت للعراق. مدارس وبيت وجهال وطبخ وكله طاح على راسه. مرجعت الا من طلكها.
هسه بعد اللي صار عرف قيمتي. ظل يمشي سيده.
ذهب: الله يعينج تجربة مره.
ام نور: مرة بس قوتني. وخلت حد لتصرفاته واستهانته بعائلته. انت هم هاي فرصة حتى تتقوين وتفرضين وجودج.
ذهب: الله كريم.

من طلع ماجد جان وضعه شوية احسن صح رجليه ملفوفة بس يكدر يمشي شوية شوية.
ماكو حجي بيني وبينه.
رغم هو يحجي وياي عادي بس اني لا وجنت انام يم الجهال بغرفتهم.
جان يعرف عمة حميدة تعرف وساكتة ومنتظر شوكت ينفتح الموضوع.
وره مطلع للبيت بقيت اسبوعين لحدما اتاكدت انه الحروق اللي برجلية طابت بعدين طلبت من عمة حميدة تحجي.
عمة حميدة: يمه حتى تحجزلي.
ماجد: وين؟
عمة حميدة: ارجع لاهلي.
ماجد: لعد احنه شنو مو اهلج؟

عمة حميدة: لا هم اهلي. بس انت تعرفني مااحب ابقى بعيد.
ماجد: ابقي بعد حتى شهر مكملتي.
عمة حميدة: لا هم يالله. اجيكم غير مره ان شاءالله.
بقى هو ساكت.
عمة حميدة: واحجز لبنيتي وياي هي والجهال.
اتفاجأ كللها: يابنيتج؟ وين رايحة؟
عمة حميدة: تعبانه تكول نفسيتها. خل تروح وياي تغير جو تشوف اهلها.
جنت بالمطبخ اسوي عشا واسمعهم.
ماجد: هي كلتلج؟
عمة حميدة: شكلتلي؟
بقى ساكت ويفر بالسبحة بايده.
العلوية: اني هم اروح وياكم.

ماجد: هاا شعدكم؟
العلوية: شعدنه بعد، البيت التطبله شويمه اني ماابقى كاعده بي.
ماجد: ياشويمه؟ شويمه شطببها هنا؟
صار عصبي.
العلوية: باجر عكبة تضحك عليك وتزوجها وتجي هنا بعد شنو شططبها.
ماجد: شنو تضحك علي؟ شنو زغيرون وتضحك علي؟
عمة حميدة: لا مو زغيزون بس تصرفاتك مالها معنى.
ماجد: ياتصرفات؟

عمة حميدة: شويمه احنه مو كوه خلصنه منها؟ مو كوه گلعناها منكم ومن حياتكم؟ مو كوه رجعنه البنية ذيج المره؟ مو سوتلكم مصيبة ومشكلة شكبرها؟ شرجعك عليها؟
بقى ساكت ومدنك.
العلوية: هسه لو يحجيلنا شصاير شجابها هنا؟ شتريد من عنده يمكن نقتنع ونسكت.
عمة حميدة: اي احجي خل نفتهم. ليش تخلي المشكلة تكبر وبعدين منكدر نحلها.
بقى ساكت مده طويلة واني احاول اسمع شيكولون بدون ميحس.

اتحرك واشتغل واطكطك بالمطبخ على اساس مااسمع شي.
بعدين كال: ماعندي شي وياها.
العلوية: شلون عرفت رقمك هنا وخابرت عليك؟
ماجد: تعرفه.
عمة حميدة: منين تعرفه؟ منو انطاهيا؟
ماجد: اني.
عمة حميدة: وين شفتها وانطيتها رقمك؟
ماجد: مشفتها. انطيته لامها.
العلوية: انوب امها.
ماجد: من الاول من جانت تجينه قبل لاتصير ذيج المشكلة جانت كلما تحجي انطيها فلوس. مصرف لامها.
العلوية: ياااا ء انوب ينطيها فلوس.

عمة حميدة: هسه سكتي خلينه نفتهم علوية. كمل يمه.
ماجد: اخوانها حالتهم تعبانه وعدهم عوائل وامها مريضة ودوم تكول امي بيها ضغط وسكر وتحتاج علاج وراتبي ميكفي.
ظليت انطيها كل شهر مبلغ اكلها هذا لامج حتى تشتري علاج او تروح للدكتور.
من سافرنه دزيتلها الرقم.
حميدة: يعني جانت تتواصل وياك تحجي وياك من بعد المشكلة إلى صارت؟

ماجد: مو تحجي وياي بس يعني اني احول المبلغ باسمها كل شهر فمن تستلم تدزلي رسالة تكول استلمت وشكرا.
دخلت عليهم اني كتله: يعني كل هالمدة جنت تضحك علي؟ تضحك علي وانت بعدك تحجي وياها؟
ماجد: اه استلمي. هسه تعاي فهميها.
ذهب: شاافتهم بعد؟ شاافتهم؟ تريد تقنعني شيماء توديلك رسالة من تستلم الفلوس بس تكلك شكراً؟! شنو هالادب النزل عليها فجأة شنو هالالتزام؟ شنو هالاخلاق الفاضلة والعرفان!

ماجد: اذا اكوم اكص لسانج هسه.
عمة حميدة: كافي، كافي اثنينكم خلونه نفتهم. شنو هالهوسة والصياح هذا بينكم؟ اشو ماكو احترام لوجودنه بينكم؟
ماجد: متشوفيها؟
عمة حميدة: اشوف.
اشوف. بس حقها. ماالومها. من شوكت شيماء مؤدبة!
العلوية: مننننن، خلوني ساكتة ههه. مؤدبة النكسة. ناس متستحي مو عدها راتب شبيها متشتري لامها علاج؟ وين تودي راتبها لاعدها ولد ولا تلد.

عمة حميدة: لاكيته على نياته تدري بي ينكسر كلبه عليها كلتلك خل اقشمره.
ماجد: شنو اقشمره!
اني ردت اساعدها شتفتهموها فهموها ميهمني بعد.
درت على عمة حميدة كتلها: شوكت ترحين للعراق رجلي على رجلج بعد ماابقى هنا.
ماجد: بكيفج هو؟
عمة حميدة: لا بكيفي. بكيفي. اني اخذها. متبقى هنا بعد المن باقية ارجعها لاهلها احسنلها.
العلوية: خل يبقى ويه شويمه يساعدها لحدما تذبه بمصيبة.
ماجد: استغفر الله.
مصيبتيش؟

العلوية: تكول طفر علي.
ضحكت عمه حميدة على حجايتها.
ذهب: على شنو تذبه بمصيبة خل يروح يتزوجها ويرتاح. هي من الاول عاجبته وهاي كلها حجج.
ماجد: اللهم طولج ياروح.
وخري من وجهي لاتخليني افقد اعصابي وتعرفيني من افقد اعصابي.
ذهب: اي اعرفك تضربني.
العلوية: شحده. يطكج علمود شويمه العايقه ام الوصخ! هنيالة وهنيالها.

عمة حميدة: لا لا ميضربج يمه شبيج انت دروحي روحي كملي شغلج معليج بهالحجي لا تضوجين وتنقهرين انت ترحين وياي مااخليج بعد امج محلفتني اذا لكيتج ضايجة اجيبج وياي.
ماجد: خوش عليك ماجد.
عمة حميدة: والله لعد شلون تريد نخليها الك تكرب بهالبيت ليل ونهار الك ولجهالك وانت حاير بشماء؟
سكت هو.

اني رجعت اكمل العشا وشوية واتذكرت ورجعتلهم: ليش مخابرت على اهل زوجها يحولولهم فلوس اذا صدك زوجها مسوي حادث؟ شنو ماعنده اهل؟
ماجد: وبعدين وياج؟
العلوية: اتذكرت هههههه.
عمة حميدة: حقج حقج يمه.
صبيتلهم العشا ورحت نمت.
ثاني يوم عمة حميدة هم حجت ويه ماجد بس مسمعت اي شي بس بالليل من رجع جان حاجزلنه للعراق.
وره يومين سافرنه للعراق.
سفرة متعبه جانت لان الجهال اذوني وتعبوني.
نزلت عد اهلي كبل.

من وصلنه اهلي جانوا مستغربين.
محجيتلهم عالمشكلة كلت مااريد اضوجهم من اول يوم بس امي حست اكو شي.
امي: متعاركة ويه ماجد؟
ذهب: لا. ليش؟
امي: لا مبين متعاركة.
سكتت.
امي: ميخليكم تجون بدونه مهما كانت الاسباب شعجب هالمره خلاكم.
ذهب: ويانه عمة حميدة والعلوية.
امي: احجيلي احجيلي خل اشوف شمسوي هالمرة سيد ماجد.

اترددت احجيلها بس المشكلة اذا مااحجيلها راح تخابر لماجد وراح تسمعه حجي قوي امي واعرفها من تصير عصبية متبقي شي متحجية.
اضطريت احجيلها اللي صار.
بقت ساكته بعدين كالت: مترجعين بعد.
مجاوبتها.
كامت اخذت تليفونها ورادت تطلع من الغرفة عبالي راح تخابر ماجد كتلها: لا ماما لا مو هسه تتصلين ومااريدج تتصلين بي.
باوعتلي: لج بيمن متصله قابل شبيج كمزتي كل هذا وتخافين عليه. لو مريحج ومهنيج جان شسويتي؟

اريد اخابر لخالتج تجي تشوفج.
من اول يوم وصلنه ماجد دزلي مسج ( البيت وحشة اليوم وحدي ).
مجاوبته لان عمة حميدة كلتلي اذا اتصل او راسلج لاتجاوبين خليه ينشلع كلبه.
بس الصدك اني الانشلع كلبي كلش ضميري يأنبني لان عفته وهو توه يالله صار زين وبدايمشي شوية.
كلما يراسلني مااجاوبه لحدما ظل ميراسل ولا يتصل.
ماادري وين اختفى والعلوية وعمة حميدة يومية وحده تخابر تسال: اتصل بيج؟
ذهب: لا
عمة حميدة: راسلج؟
ذهب: لا.

بعدها بكم يوم اتصلت بيه زينب زوجة عبدالله وعزمتني على غدا عدهم بالبيت: تعاي خل نشوفج شنو مالنه حصه بيج؟
ذهب: والله مالي خلك يازينب وخاف ماجد يسويلي مشكلة.
زينب: مالج علاقة عبدالله كايله راح نجيب ام رائد عدنه فد يوم تغير جو.
ذهب: وشكال؟
زينب: كايله ماكومشكلة خل تغير جو هي نفسيتها تعبانة.
فعلا رحتلهم ثاني يوم.
حجيت لزينب عالصار كالت: كله من عبدالله ميضم حجاية.
ذهب: بروح اعزازج عنده شي وياها لو لا.

زينب: والقران ماادري. هسه يجي عبدالله كدامج واسأله. اصلا محاجيلي هو على اتصالج ولاكايلي اي شي هسه سمعت منج.
ذهب: خلص كلبي.
زينب: صيري قوية ودوسي عالكل علمود بيتج وجهالج ورجلج لاتظلين كلبج رهيف بسرعة تنقهرين عالناس هو منو من الناس مهتملج باجر اذا راد يتزوجها عليج صدكي كلها راح تباركله وتتمناله السعادة حتى لو بالبداية عارضوا. ومحد يخسر غيرج.

بعدنه نحجي اجه عبدالله سلم وكعد وسالته زينب: مكايلي على شويمه؟
هو انحرج مني كللها: شكلج؟ شبيها شويمه؟
زينب: البنية كلبها طاك من الخوف والقلق وين تكدر على وحده مثل شويمه اذا عنده شي وياها كول حتى تحضر نفسها.
عبدالله: شتحضر نفسها؟ مابينه وبينها شي الرجال مجرد ينطيها مساعده.
ذهب: بروح عمو مابينهم شي؟

عبدالله: والله العظيم مابينهم شي شلون بينهم شي واعرف واعوفه لهيجي وحده؟! افه عليج ام رائد انت اختنه وبت هاي العائلة ليش معتبره نفسج غريبة انت بتنه اللي يرشج بمي نرشه بدم لاشيماء ولاغيرها.

سكتت بس ماارتاحيت بقيت بقلق بعدين من دخل جوه كلت لزينب: اني عبالي اسراء مطيتها رقمه بس اشو ماجد يكول منطي الرقم لامها وين لكه امها وانطاها الرقم اذا هو يدزلهم حوالات لكربلا؟ كولي دزه بمسج غير معناها على رقمها هي نفسها شيماء؟ يعني التواصل بينهم جان مستمر؟
زينب: هاااا. هسه اتذكرت.
ذهب: شنو؟
زينب: قبل مدة سمعت عبدالله اتعارك هو وامه وخواته بس مقبل يكول ليش يمكن علمودج؟

ذهب: شلون؟ علمود اسراء قصدج؟ اني تره كتله لعبدالله اختك مطيتها الرقم؟
زينب: اي شفتي. معناها علمود هالموضوع اتعارك وياهن. بس تره مااعتقد الها علاقة لان هي لايصه وحايسه ومخبوصه ومو بحال شيماء هسه.
ذهب: ليش؟ شبيها؟
زينب: غير زوجها طلع متزوج عليها وهي متدري.
اتذكرت خالتي كالت بنية وياهم انخطبت لواحد متزوج واسمه مهند.
ذهب: هاا يااا ادري.
زينب: شمدريج؟
ذهب: من اول مخطب سمعت بالسالفة.

زينب: اه شلون منو كلج؟ منين سمعتي؟
حجيتلها الحجي الكالته خالتي.
زينب: خرابة البيوت عمت على نفسها وعلى غيرها حتى زوجها مل منها بعدما كان يبوس الكاع التمشي عليها ومتحمل منها الويل والويلات بس رفست نعمتها.
ذهب: امها السبب وخالتها.
زينب: اي والله صحيح.
.
ممكن نختلف بس نفترگ صعبه؟