رواية صبرا يا قلبي

رواية صبرا يا قلبي الجزء الثاني للكاتبة روز الفياض الفصل الرابع عشر

البيت كله ناس.
عمام ماجد واهله وكرايبه.
اكو ناس مااعرفهم واكو ناس مجرد شايفتهم من اتزوجت اجو باركولي.
منين هاي الناس؟ المن ملتمين؟
كلها تريد تاكل وتشرب وتنخدم واني روحي طالعة.
كل شوية اخذ اولادي وانهزم فوك حتى ارتاح من اسألتهم ومن نظراتهم.
كل شوية اشوف عيون النسوان تفتر وراي واسمع كلمات من اعبر بيناتهن. هاي مرته المريضة.
بس ذولي الجهال عدها وبعد متخلف.
من اخذها لليوم مريضة.
عشكها واخذها وعاف بت عمه.

خالته وبناتها مكابلات امه وكاعدات.
يتصرفن كأنما البيت بيهن كل شوية اشوف وحده منهن بغرفة شكل.
خفت. شيسون يدخلن للغرف؟
بس لا يخلن شي إلى لو لماجد؟ لو حتى لعمة حميدة؟
احس صار تلوث بدماغي.
البيت مثل خلية النحل والبنات ميلحكن عالتنظيف والطلبات والماعين.

عمة حميدة مستلمة المطبخ وكلما اريد اساعدها تكلي: لا يمه روحي لجهالج لايوكعون لو يتعورون محد يمهم محد فارغ يهتم بيهم كعدي يمهم واني والبنات هنا نسوي النكدر عليه.
مر اسبوع واني مضايكة النوم شلونه.
انام نص ساعة مرات ساعة بالنهار من ينامون الجهال. تغفى عيني غصباً عني من التعب.
امي كل شوية تتصل تكلي: تعاي عدنه ياماما عالاقل اساعدج بالجهال.
ذهب: لا ماما مااكدر. مالي خلك.

امي: وتبقين مشلوع كلبج بهالهوسه البيت يغص بالعالم وانت محبوسة فوك عليمن؟ تعاي هنا ارتاحي يومين ورجعي.
ذهب: مالي خلك ماما وبس اطلع هسه يكولون شافت رجلها مو هنا وراحت لاهلها تتونس.
امي: يطبهم حمس خيكولون. شنو كفيلين لو وكيلين عليج همه؟ ابوج بره يم الرياجيل اذا تجين اتصلي عليه حتى يجيبج وياه.
ذهب: الله كريم.

امي: لا اكدر اجي يمج مااريد اشوف هاي خالته هي وبناتها البرعات لان اطيح حظهن. ولا اكدر ابقى هنا واخليج هناك وادري بيج ممرتاحة.
ذهب: ماكو شي ماما لاتفكرين يمي عمه حميدة والبنات. ومااكدر اجي واعوف عمه حميدة وحدها هي هم مثلي مترتاح بهيج اجواء كلها نفاق وتمثيل. عالاقل اني وياها نكعد سوه.
امي: واني ابقى هنا اطحن بروحي عليج؟

ذهب: ماما الله يخليج لاتطحين بروحج ولاتفكرين ادري قابل اعوف بيتي الهن واجي؟ هن هيج وماخذات راحتهن لو اعوفه واطلع شيسون؟
اسبوع كامل مر ماكو كل خبر عن ماجد.
رايحين للمركز وراجعين من المركز ورايحيين للمستشفى للسايق وراجعين من المستشفى.
السايق مضروب على راسه وره يومين بالمستشفى دخل بغيبوبة.

ومكدرنه نعرف منه شي اكثر من اللي كاله اول موصل للمستشفى وهو: قبل منعبر الجسر طبكت علينه سيارة وبيها مسلحين واحد منهم ضربني بالمسدس على راسي والثاني اخذ السويج مني وشمره واثنين نزلوا الولد السيد وضربوه بعدين صعدوه بالسيارة وراحوا.
الناس بالشارع جابتني للمستشفى وبقت السيارة بالشارع.
عمام ماجد من سالوهم: اكو احد مشتبهين بي؟
تتهمون احد؟
كالوا ماكو غير هذا الموظف اللي ضرب ماجد قبل كم شهر.

القوا القبض عليه وحققوا وياه لكن نكر معرفته باي شي اله علاقة باللي صار لماجد.
بقى محجوز بالتوقيف لان هو المشتبه بي الوحيد لكن مااعترف وبقى مصر على كلامه.
تخابرني نجلاء تبجي: ماكو حجز على عيني والله باقية هنا ومخليتكم بحدكم بس شسوي ماكو حجز.
ذهب: شتسوين تجين. بيتج واولادج. احنه هنا كاعدين ومخلين ايدنه على خدنه. ماكو شي نكدر نسويه اكثر من اللي سويناه.

نجلاء: سودة علي ياخويه سوده علي. انوب يكول فراس مضروب ليش تضربوه ليش ياجلاب؟ شمسويلكم؟ ماكو غيره هذا الحقير اللي ذيج المره ضربه بالسجينة واشتكوا عليه. هو هذا الكلب ابن الكلب ماكو غيره خليهم يشبعونه دك بالسجن وهو يعترف.
الحيوان يريد ينتقم. فوكما حرامي وسامحه.
ذهب: فدوه نجلاء بلا بجي تره كلبي خلصان ميتحمل البيه مكفيني.

نجلاء: مو بيدي والله مو بيدي، مااكدر اسوي شي بالبيت لا اطبخ لاانظف حسبه تاخذني وحسبة تجيبني؟
ذهب: ان شاءالله ماكو شي. الله ميكسر كلبي. اني متاكدة الله ميخليني ينشلع كلبي بدونه. صح لو لا؟
نجلاء:؟
ذهب: بلا بجي. كلبي يكول يرجع. ميعوف جهاله.
نجلاء: كافي لج كافي كطعتي كلبي وتكولين لاتبجين؟
مو اسبوع عبالك سنة.
حتى وزني نزل. بالكوة جنت اكل تفاحة لو برتقاله لو موزة خلال النهار.
كطعت الاكل. مااكدر ابلع اللكمة.

ماادري شلون تتحمل اللي زوجها عسكري؟
شلون تكدر تنام وهو بالجبهة وبنص الخطر؟
شلون تكدر تاكل وتشرب وتنام؟
شلون تكدر تكمل حياتها عادي؟
زين اللي يموت زوجها شتسوي؟ شلون تتصرف؟ شلون تكدر تستمر؟
كلما يندك الباب نطلع كل احنه نركض على امل نسمع خبر حلو ويكولون لكوه.
كلما يدك تليفون كلها تفز على امل يكولون رجع.
اليوم قبط اسبوع ومخلينه مكان مدورنه بي.

الولد يمشون ويوزعون فلوس ورشاوي عالشرطة حتى يدورون عدل ويحققون صدك.
بالليل جنت انوم الجهال وغفت عيني.
اتحلمت كانما اني ابيت اهلي. واجتني امي تصرخ من بعيد تكول ماجد مات.
رأساً فزيت.
فزيت مخنوكة. خفت ارجع انام مرة ثاينة.
اتعوذت من الشيطان وغطيت الجهال ونزلت اشوف عمة حميدة خاف محتاجة شي.
لكيتها كاعده تبجي من شافتني مسحت دموعها.
بلعت ريكي حتى لاابجي كتلها: ماكو خبر شي؟
عمة حميدة: كل شي ماكو.

عمج يكول التحقيق مستمر وممخلين واحد مشبهه بي مجايبينه يحققون وياه. بس محد يعرف شي.
ذهب: لاحول ولاقوة الا بالله.
عمة حميدة: الجهال ناموا؟
ذهب: اي توهم ناموا.
عمة حميدة: دروحي اكليلج لكمة مااتعشيتي. ضميتلج حصتج بالفرن اكليلج لكمة يمه انت عندج جهال وعندج طفله تريدلها حيل وتعب.
ذهب: مااشتهي.
عمة حميدة: كل احنه منشتهي. بس مجبورين.
مجبورين حتى نكدر نتحرك.
دسمعي الكلام.
ذهب: انت اتعشيتي؟

عمة حميدة: والله اكلت شوية بس سدت نفسي هاي النسرة هي وبناتها.
ذهب: شبيهن؟
عمة حميدة: مابيهن. تكللها يمه باجر نروح للبيت تكللهن المن رايحات ابقن واسن خالتجن. كتلها خل يرحن كل وحده عدها رجال وبيت شعدهن هنا باقيات تكلهن روحن روحن يمه عمتج مستثكلتجن علمود اللكمة.
اتنهدت وبقيت ساكتة.
عمة حميدة: ربي شمسوي وليدي وهيجي يصير بي؟ لو مسلط العصابة على سليمه حبايبها.
ضحكت.

عمة حميدة: دروحي اتعشي قبل متكعد بتج وتظل تبجي. عمت عيني عليج يابيبي تباوع على صورته بالصالة مساع وتأشر. اشتاقت لابوها؟
اتنفست حيل واستغفرت ربي ورحت للمطبخ طلعت العشا وكعدت اكلب بالخبزة بيدي مااكدر اكل.
دمعت عيوني من اتذكرت اخر شي حجيه على شموسه قبل ميطلع للمطار.
بقيت كاعده لنص الليل كلها نامت بس اني افتر بالبيت اصعد وانزل اكول عسى ولعل يندك الباب ويجي حبيبي.

عمو ابو علي والولد جانوا يبقون كاعدين بره يم ابو جبار للساعة ثنتين (2 ) ومرات لتلاثه ( 3 ) بعدين ناس تروح وناس تبقى تبات عدنه بالديوانية مال الرياجيل.
للفجر جنت نازلة اكعد عمة حميدة للصلاة وسمعت عمو ابو علي وعلي ابنه يسولفون بالحديقة يم الحمام الخارجي واكفين: الضابط يكول مادام لهسه محد اتصل بيكم ولا دزولكم خبر فمعناها احتمال مو شغلة خطف.
ابو علي: شغلتيش؟
علي: يكول تهيأوا لاي خبر.

يمكن الشغلة شغلة انتقام وتصفية مو مسالة خطف وفلوس.
سكت شوية ابو علي بعدين كال: ادري انتقام منو وراها؟
الزلمة هذا ومسجون ويكول مو اني وره الموضوع ولا ادري بي.
اهله يحلفون يكولون مو هو.
بعد منو؟ اكو شي انت تعرفه اني مااعرفه؟
اكو احد متعارك وياه واني ماادري؟
صاير بينه وبين احد مشاكل بالشغل واني ماعندي خبر؟
علي: لا ماكو.
هو على كولتك بس هذا ويكول ماادري.
ابو علي: اذن لاتكول اتهيأوا.

اللي يكلك هيج كله معناها انتم تاخذون فلوس بس مجاي تشتغلون وتدورون بضمير. اذا يصيرله اي شي اشتكي عليكم انتم.
رجعت كم خطوه كعدت عالكرسي بالمطبخ يم الشباك باوعت للشمس راح تطلع دعيت بكلبي: ربي بقت يمك بعد اذا مالي خاطر. لخاطر اولاده بعدهم صغار مااكدر اربيهم بحدي. لخاطر بنته توها عرفته.
ربي لخاطر اخته ماعدها اخ غيره. ولخاطر امه بس هالولد عدها ربي.

رحت كعدت عمة حميدة صلينه وكعدن البنات بدينه نجهز الريوك لحدما كعدت العلوية واختها.
صبينه الريوك وابو علي صاح لعمة حميدة بره بالحديقة.
وره تقريباً نص ساعة اجت كعدت بصفي كلتلي بصوت ناصي: خابروا على عمج ابو علي.
درت عليها باوعتلها: منو؟
عمة حميدة: الجماعة الخاطفين ماجد.
فزيت كالت: انفضحنه. انفضحنه. عود كلولي لتحجين لاحد لحدما نتاكد.
هدأت وكعدت عدل كتلها بصوت ناصي: شكالوا؟ شوكت خابروا؟

عمة حميدة: قبل شوية داك رقم عبدالله واخابر لعمج.
ذهب: شيكولون؟ شيردون؟
عمة حميدة: عشر دفاتر.
ذهب: عايش؟
كتلها بصوت ناصي كوه حافظت على هدوئه لان العبره خنكتني.
هزت راسها اي وهي ساكتة.
عمة حميدة: راحوا هسه يجيبون الفلوس كلوللهم حدكم لباجر العصر.
سكتنه شوية بعدين كتلها: شلون ينطوهم الفلوس؟ وشلون نستلمه؟
عمة حميدة: واحد يجي ياخذهن. وراها همه يطلعون ماجد.

بالليل الكل اتجمع كلهم كعدوا بالديوانية واشتغلت الجايات.
صينية وره صينية.
يتفقون منو يروح يودي الفلوس.
لحدما اتفقوا انه عبدالله هو اللي يروح لان التواصل بينهم وبين الخاطف عن طريق عبدالله.
وحاولوا وياهم حتى يخفضون المبلغ الى ان وصلوا لخمس دفاتر.
جمعوا المبلغ وثاني يوم الظهر راحوا حتى يودون الفلوس.
صار الاتفاق انه عبدالله ياخذ الفلوس وياه بسيارته ويبقى كاعد بالسيارة وهمه يجون ياخذون الفلوس منه.

وهذا إلى صار.
طلبكت سيارة مضلله بدون ارقام نزلوا منها اثنين واحد راح لعبدالله فتح باب السيارة واخذ الفلوس والثاني واكف يراقب.
اخذوا الفلوس وراحوا.
بيومها الكل دخل انذار.
اني بقيت فوك مااكدر انزل. مااتحمل اسمع خبر ينهيني.
هم بقينه كاعدين لنص الليل وماكو شي.
كلها نامت، .
بقينه اني وعمة حميدة كاعدين.
هي لازمة سبحتها بيدها تسبح.
واني اروح وارجع.
اروح وارجع.
اروح وارجع.
نومت الجهال وبقيت برعب.

ابو علي والولد كلهم كاعدين بره بالباب يم ابو جبار.
صارت الساعة بالوحدة وماكوشي.
صارت بالثنتين وهم ماكو شي.
بتلاثه. ماكو شي.
عمة حميدة غفت بمكانها.
ندهتها: يمة كومي بفراشج نامي.
كمزت كالت: ماكو شي؟
ذهب: تؤ.
عمة حميدة: يارب عليك مو على غيرك يارب.
كامت تتمشى لغرفتها.
رحت وكفت بالمطبخ كبال الشباك اباوع عالباب اشوفهم كاعدين بره ينتظرون.

كمزتني عمة حميدة: لتبقين هنا وتنسين جهالج بحدهم فوك يمه يكعدون وميلكونج ويخافون.
ذهب: وكفتي كلبي.
عمة حميدة: هههههه.
بعدنه واكفين نحجي اني وياها وسمعنه هوسه بره.
التفتت شفت الولد ركضوا.
عمة حميدة: شكو؟ شصار؟
طلعت تركض للباب واني بقيت بمكاني.
مااكدر اطلع ولا ادري شكو.
اسمع صوت عمه حميدة تبجي: وليدي، ولييييددديييي.
نشف دمي.
كلت ذبوا جثته يم الباب.
مرت اكثر من ربع ساعة ومحد دخل.
دخلت عمه حميدة بس بقت يم الباب.

مديت راسي عليها من باب المطبخ وصرخت: يمممه..
التفتت علي وهي تبجي بعدين ضحكت كالت: اجه.
اجه وليدي.
اجه ماجد.
راسا سمعت صوت اطلاق نار.
الولد بدوا يضربون نار بره انكلبت الدنيا كل البيت كعد.
كلها اجت تسال شكو واكللهم ماجد اجه.
اشتغلت الهلال ويه اذان الفجر.
والجيران كلها طلعت على صوت الرمي.
بس مشفت ماجد لهسه.
وره نص ساعة بدوا يدخلون للبيت ومن بين الزلم والرياجيل الدخلوا شفته بوسطهم واكف.
اخيراً.

دخلوا الديوانية وبدينه نجهز الريوك للكل.
رحت فوك اشوف الاولاد لكيت شموسه كاعده وتبجي بحدها.
خليتها بحضني كتلها: ياروحي اجه بابا. اجه بابا.
اخذتها ونزلت جوه.
توني نزلت ودخل للهول.
هلاهل وجكليت وبجي.
حضن امه وعمة حميدة وظل يبجي وياهن.
بعدين التفتت شافني ابتسم شوية.
مبين عليه التعب لحيته وملابسه كلها وصخه واكو دم بايده وراسه.
مد ايده على شموسه اخذها حضنها ويبوس بخدودها.
اتدنه وكف بصفي وخله ايده وره ظهري.

حضني على كيف بعدين دنك باس راسي.
طول الوقت اللي جان بي مخطوف جنت متماسكة.
احاول ماابجي.
بس من باس راسي بجيت.
ضحكت عمة حميدة: اول مرة يصير شي ومتبجين ولامرة بجيتي هههه هسه شبيج؟
ضحك هو كال: معقولة مبجيتي؟ مااصدك.
زدت بالبجي ضحكوا.
دار علي حضني حيل اني وشموسه.
حضنته كتله: شلعت كلبي.
خالته: هو انوب شلع كلبج؟!
عمة حميدة: عتب حبايب. يمه الله لايخليكم من بعض ويخليكم لجهالكم.
ماجد: صدك شلعت كلبها.

العلوية: كل احنه انشلع كلبنه.
اتنهد هو وسكت.
عمة حميدة: توه نور البيت يمه ماجد.
رجع حضنها ورجعت تبجي كلتله: شلون يصير بيك شي. ميصير بيك شي ان شاءالله. منو يدفني غيرك؟
بجه هو واني هم بجيت.
باس اديها كللها: عمرج طويل ان شاءالله وتزوجين فضيل ورائد وشموسه وتشوفين اولاد واولادهم.
ذهب: آمين.
صعد سبح وحلق وبدل ملابسه وتمدد.
نومت شموسه وجهزت ملابسه ونزلت سويتله ريوك لان مااكل وياهم.

صعدت لكيته متمدد عالجرباية ومغمض عيونه.
خليت الصينية يمه كلي: ليش صعدتيها؟
ذهب: بيك حيل تنزل؟
ماجد: لا والله.
مابيه حيل.
رجليه من جوه كلش تأذيني.
مورمه.
مديت ايدي على رجله كلي: لا لاتلزميها. تاذيني.
سويلي مي دافي وملح؟
ذهب: ان شاءالله.
هسه اسويلك بس اكعد اتريك بالاول.
كعد ياكل واني اباوعله.
ذهب: هذا الجرح البيدك يأذيك؟
ماجد: يعني. هسه طاب شويه. جان ملتهب لان ضربوني بحديدة مزنجره.

ذهب: يضربهم الله ان شاءالله. الله لايوفقهم.
ماجد: رجليه اكثر شي تأذيني يومية يضربوني على رجليه مااكدر ادوس عليها بالكوه.
ذهب: راسك هم.
ماجد: لا راسي هاي اول مااخذوني. ضربني الكلب خلاني يومين ماادري ليل لو نهار راسي مااكدر اشيله.
ذهب: حسبي الله عليهم.
الله ينتقم منهم.
خلص اكل نزلت الصينية وجبت طشت خليت بي مي دافي وملح وخليت رجليه وكعدت ادلكها على كيف بس جان موجوع.
كل شوية يكول آآآخخ.
.

‏وهبني الله حُبك ولم أعد اشعُر بالذين حولي منذ أن احببتك؟

رواية صبرا يا قلبي الجزء الثاني للكاتبة روز الفياض الفصل الخامس عشر

ذهب: يضربهم الله ان شاء فوكما اخذوا هلكد فلوس انوب يضربونك عساهم لااتهنوا بيهن ان شاءالله يصرفوهن على عافيتهم يارب.
تمدد عالجرباية وغمض عيونه: آآخ..
جسمي كله يأذيني.
ونعسااااان ميت من النعاس مجنت نام. اسبوع عبالك سبع سنوات متت من الحر والوصخ والجوع.
ذهب: سوده علي الله لاينطيهم ولايخليهم شيردون من عندك.
مكدرت تعرف احد منهم تميز صوت احد منهم؟

ماجد: لا وين اشوفهم واعرفهم. ملثمين واصلا خلوني بغرفة مال طين سكفها جينكو ومابيها كهرباء ظلمة ليل ونهار كل شي مااشوف.
لابيها بنكه لابيها شباك.
حتى للحمام مااكدر اروح بالكوه مرة الفجر ومره باول الليل حتى مااشوف شي.
ادبسزية. مفكرين بكل شي.
ذهب: الظاهر مو اول مرة يخطفون احد.
ماجد: اكيد مو اول مرة.
بس جانوا مراقبيني شلون ماانتبهت عليهم؟
ذهب: شمدريك بيهم قابل تشم ايدك.

ماجد: طايحين الحظ. خذولهم خمس شدات باردة مبرده. آآخ لو اعرفهم والله العب بيهم لعب.
ذهب: لا لا تفكر بالفلوس ابد.
ابد لاتفكر.
يمه غير الله نجاك من الموت. ياخمس شدات ياعشرة انعل ابو خيرهن اذا انت ماكو.
شنسوي بالفلوس لو مسويلك شي؟

اسبوع لو مر علي سنة بالشافعات اتحملته وكدرت اضبط نفسي واتحكم بيها لخاطر الجهال وعمة حميدة. اجيت اموت من التفكير والقلق. لااكدر انام لااكدر اكل لااكدر اكعد مثل البشر واسولف اجيت اتخبل لحدما رجعت.
لاتحجي بالفلوس وتتحسف عليها.
علينه بالعوض وعليهم بالتلف ان شاءالله.
اعتبر نفسك سويت مشروع وخسرت.
اعتبر نفسك اشتريت سيارة واندعمت.
اعتبرهن اي شي بس لاتفكر وتنقهر عفيه.
كافي القهر العشناه.

ماجد: شلون ماانقهر. غير تعبي وشگاي وكدي. ليل ونهار اشتغل واتعب تالي يجون كم واحد حافي يخاذونه مني عالحاضر؟
رزق جهالي وعائلتي شلون انطي للسفلة وماانقهر.
ذهب: لو فرضاً اسم الله واحد من الجهال مخطوف ماتنطي عنده فلوس شكد ميردون حتى بس يرجع سالم؟
سكت شوية بعدين: انطي روحي.
ذهب: معناها لاتنقهر وتفكر بالفلوس. لان نفس الشي.
سكتنه شوية بعدين كال: اريد انام شوية حيل تعبان. لاتخلين احد يكعدني عفيه.

ذهب: نام حبيبي. اني راح انزل جوه حتى اكللهم نايم وكال لحد يكعدني.
هسه راح اطفيلك الضوه نام.
دنكت بست خده لزم ايدي كلي: ظليت افكر بيج كلت اذا صارلي شي هاي شلون تدبرها.
دمعت عيوني رجعت بسته: يابعد عمري اسم الله عليك الحمدلله الحمدلله الله رجعك النه سالم ومابيك شي. هاي تسوى الدنيا. لاتفكر بشي ثاني بعد الحمدلله ربك لطف بينه.

لو صايرلك شي اسم الله شسوي بالفلوس اني وانت ماكو. شسوي بالبيت وانت ماكو. انت حبيبي وزوجي وابو جهالي وعمود هذا البيت. اذا يصيرلك شي احنه نضيع.
اتحسر وسكت.
عفته ونزلت جوه خالته كاعده هي وامه بالهول. تباوعلي واني انزل مانزلت عينها.
العلوية: وينه ماجد مشفناه صعد وبعد مانزل؟
ذهب: سبح واتريك ونام كال كلش تعبان ونعسان لحد يكعدني.
خالته: وانت جنتي يمه؟ شنو سبحتيه هههه.

باوعتلها كتلها: سبحته وليفت ظهره وريكته وبعدين خليت مي وملح ونكعت رجليه ودلكتها ونشفتها ودهتنها وغطيته ونام حبيبي تعبان.
العلوية: عفيه. عفيه.
خالته: لو باقيه يمه خاف يحتاج شي.
ذهب: لا نايم مااكدر اعوف الجهال بحدهم. وعمه حميدة خطيه بحدها بالمطبخ متلحك.
خالته: والخدامات مو وياها؟
ذهب: هم يالله يلحكن عالطلبات والبيت.
العلوية: صحيح.
خالته: هسه اتطش الناس وكلمن يروح لبيته. قابل جايين علمود الاكل والشرب.

عفتهن ورحت للمطبخ يم عمة حميدة كالت: ها يمه؟ شلونه ماجد؟
ذهب: نام كال كلش تعبان ونعسان مشايف النوم.
عمة حميدة: الله يساعده. يمه ياماجد همزين الله رجعك الله يحفظك يايمه ويخليك لمرتك وجهالك. هسه ارتاح كلبي.
ذهب: سوده علي رجليه مورمه من الضرب.
عمة حميدة: اووي يضربهم العباس ان شاءالله. وين ابو راس الحار كون ينكشفون وينعرفون وينفضحون.
ذهب: يارب.

خلصنه النهار شغل وركض عمام ماجد كلهم عدنه همه وعوائلهم وكل شوية نسمع اطلاق نار بره نعرف احد اجه.
ذبايح الحديقة انترست.
آخر شي دخل علي ابن عم ماجد كال: بس انت وعمتي بالمطبخ؟
وين تلحكن على هاي الناس والعالم البره؟ حتى الشيخ راح يجي وين البنات خل يجن يساعدنجن المن جايات اذا يردن يكعدن ويدكن سوالف؟
عمة حميدة: نسوي النكدر عليه وعبدالله كال راح يجيب طباخ يطبخ لان لو شكد منطبخ منلحك على كولتك.

هاي جاي نسوي زلاطه وانظف الخضرة ونحضر الطرشي والتمر واللبن. ،
وكطعنه اللحم و جهزنه الحشو للتمن حتى من يجي الطباخ كبل يبلش بالطبخ.
علي: وهن كاعدات؟ ادري خطار خوما خطار صدك جذب.
طلع وهو يحجي.
دارت علي عمه حميدة: حجيه صحيح. اشو بعزيايمهم ومناسباتهم احنه منكعد وهن من اجن لهسه العود ميشيلنه.

ذهب: ميخالف عمه هاي احنه خلصنه مباقي شي كله جاهز باقي الطبخ هسه الرجال يجي يطبخ والماعين البنات مراح يلحكن يغسلن هلكد اماعين. والمطبخ هذا ينرداله غسل والبيت طبه وطلعه كله ينرادله تنظيف. شيبقى بيهن خطيه.
عمة حميدة: لا والله هسه مااخليهن خطيه هسه اطلع لعلاوي اشحنه واخليه يجي لخواته وبنات عمه يصيح بيهن صوت يخليهن يلمعن البيت من فوك ليجوه. شفايدتهن لعد بس اكل ومرعى.

كملنه كل شغلنه واجه الطباخ ووياه واحد ثاني وبدوا الطبخ وشباب العائلة الصغار كاعدين يمهم خاف يحتاجون شي.
خلصت واترخصت من عمة حميدة وصعدت نومت شموسه وخليت الجهال جوه يم بيبيتهم.
فتحت باب الغرفة على كيف طلعتي ملابس حتى اسبح حسيت بماجد يتحرك التفتت لكيته كاعد يباوعلي: كعدتك؟
ماجد: لا. كلما اغفى اسمع صوت الرمي وافز.
ذهب: فرحانين بسلامتك.

ماجد: يعرفون كلش زين مااحب هاي السوالف مال الرمي. نفرح يعني ونموت العالم؟
ذهب: اي والله متنراد.
ماجد: منو جوه؟
ذهب: كلها موجوده.
ماجد: مابيه حيل انزل. اريد اخلص اليوم نايم.
ذهب: شتسوي بعد لازم تنزل علي يكول الشيخ راح يجي عالغدا جابوا طباخ يطبخ بالحديقة.
ماجد: وين شفتي علي؟
ذهب: دخل للمطبخ واني وعمة حميدة جنه نجهز اللحم والحشو.

جنت لابسة جلابية بسيطة لونها تركوازي وبيها تطريز ذهي ونقشة صفره. وعلى شعري مخليه شال اسود.
ماجد: وانت جنتي بهاي ملابسج؟
باوعت لملابسي مستغربة: اي!
ليش؟ شبيها؟
ماجد: تركوازي كدام هاي الزلم لابسه؟
ذهب: ليش التركوازي حرام؟
ماجد: عندي حرام. الف مرة كتلج هالالوان كدامي وبس لتلبسيها كدام احد غيري.
ذهب: صحيح كتلي بس ماكتلي اي لون مقبول البسه بلا زحمه؟
سكت.
اخذت ملابسي سبحت وطلعت لكيته نازل جوه.

مرت الايام والخطار رايحه وجبه وجايه وجبة.
بقى ماجد بالبيت شهر ميطلع بس كم مره راح للمركز قدم افادته وراح للرجال سايق التكسي اتحمدله السلامه جانت نفسيته كلش تعبانة.
وماله خلك وعصبي.
ماجد: ابو جبار ميفيدكم بعد.
ذهب: ليش؟
ماجد: اني رجال وانخطفت انتو شلون بيكم؟ اذا احد دخل عليكم للبيت شلون؟ ابو جبار الرجال الجبير شيسويلكم؟ شلون يدافع عنكم؟
ذهب: صلي على نبيك لاتظل تفكر وتحلل وتتشائم.

ماجد: لج شلون ماافكر؟ يجوز عدهم نية يخطفون واحد ثاني من عدنه يجوز عدهم نية يخطفوني اني مره ثانية.
بعدها ظلوا من يطلعون الصبح للشغل يطلعون كلهم سوه هو وولد عمه وكلهم مسلحين.
التحقيق جان مستمر لكن ماكو نتيجة.
بهالاثناء ماجد بدا يفكر يبيع البيت وننتقل لمكان ثاني.
وبدينه نهيأ نفسنه لهيج شي.
لكن فجأة قرر: قررت اخذكم ونروح لتركيا.
ذهب: والله كلش محتاجين اجازة.
ماجد: مو اجازة.
ذهب: لعد؟

ماجد: نروح نعيش هناك. نستقر.
ذهب: ياا! تحجي صدك؟
ماجد: اي والله.
مااكدر ابقيكم هنا. اروح للشغل وارجع الف فكرة تجي براسي كل شوية افكر اعوف الشغل وارجع اتطمن عليكم.
ذهب: حبيبي هذا الشي طبيعي بس شوية شوية تنسى وتتعود.
ماجد: لاا. مااجازف بيكم. هناك احسن. شقة وعدنه اصلا احسنلج هناك مستشفيات بيها حظ والجهال هم لااخاف عليهم ولا اقلق كل شي موجود ومتوفر وحتى ارخص من هنا. على شنو باقين بعد؟

ذهب: واهلي؟ شلون اكدر اروح واعوف اهلي؟
ماجد: اهلج ماعليهم شي وباي وقت يكدرون يجون يمنه هم يشوفوج وهم يغيرون جو ويتونسون ويانه.
سكتت.
ماجد: حتى عمة حميدة ناخذها ويانه المن باقية هنا.
وخلال شهر راح ماجد جهز شقتنه واثثها ورجع اجر بيتنه لشركة وشرط عليهم ابو جبار يبقى يشتغل عدهم.
والبنات ياسمين وسارة راحوا لبيت عمة ابو علي.

اما العلوية فمتقبل تروح ويانه وعمة حميدة كالت: لايمه لاوين اروح انوب خاف اموت هناك ووين اندفن. لا يمه لا مااروح اجيكم اشوفكم هناك اني مااصبرعلى بعدكم بس اروح وابقى هناك صعبه علي اني مثل السمجة بس اطلع من المي اموت بس اطلع من هالبلد اموت.
اجيكم عود كل شهر كل شهرين ابقى يمكن مدة وارجع لبيت اخوي.
اما امي: حقه ماما يخاف عليكم.
بس راح نشتاقلكم ولهالكتاكيت الحلوين.

نجيكم كل شهرين من يستلم ابوج التقاعد نجيكم ويجوز احنه هم نأجر بيتنه ونجي نسكن يمكم المن بعد باقين بحدنه هنا.
وفعلا انتقلنه لتركيا.
ماجد فتح فرع لشركتهم هناك حتى يوردلهم المواد بدل ميجون همه.
واني والجهال اول فترة بحدنه ماجد يطلع للشغل الصبح يرجع الظهر نتغدا وينام شوية بعدين العصر نطلع نتمشى شوية ومرات هو يطلع وياخذ الاولاد وياه ونبقى اني وشمس بالبيت.

اول شهرين جانت كلش صعبه علي احس بالوحدة رغم اغلب وقتي ركضه ويه الجهال بس احس بفراغ ماعندي احد احجي وياه.
امي وابوي اجو يمنه اسبوعين ورجعوا.
بعد الثلاث شهور اتصلت العلوية بماجد تريده يجي ياخذها.
ذهب: شعجب؟
ماجد: ماادري والله. بس المشكلة شلون اعوفكم واروح؟
ذهب: ماعلينه شي بابنه مسدود علينه.
ماجد: لا صعبة. كل شي يصير.
ذهب: زين خلي واحد من الولد يجيبها.
ماجد: لو عدهم مجال جان جابوها.
ذهب: والحل؟

ماجد: ماادري خليني افكر.
وره كم يوم مالكه حل غير يعوفنه بحدنه ويرجع يجيبها ويجي.
راح وبقينه بس اني والاولاد.
كل شوية يتصل ماجد: حبيبي خوما عليكم شي؟
ذهب: لا ماكو شي الحمدلله الجهال يلعبون واني طبخت واتغدينه وشموسه اليوم تلعب وياهم وبعدين ناموا وهسه كعدوا يلعبون.
ماجد: حبايب كلبي. الله يحفظهم ان شاءالله. ماادري شلون انام اليوم من التفكير.
ذهب: ههههه انت خلصها تفكير هن يومين تجيب خالتي وتجي.

ماجد: يومين بس لحد ميخلصن وارجع يمكم الف فكرة براسي.
ذهب: انت وين هسه؟
ماجد: عد بيت عمي. عكب باجر نجي ان شاءالله
ذهب: ان شاءالله. سلم عليهم كلهم. وعلى عمة حميدة حيل حيل كلش مشتاقتلها. كالت كل شهر اجي وبعد مشفناها.
ماجد: والله هي هم سالت عليج هواي. صحتها تعبانه خطيه ومخلصتها بجي عاليتمرض عاليوكع عاليسافر.
ذهب: الله ينطيها الصحة والعافية ان شاءالله.
وره يومية اجه ماجد وامه.

اني نظفت غرفتها ورتبتها وعطرتها وطبختلها اكل كله خضار سلك وشويتلها قطعة ستيك لان هي متاكل اي شي دسم.
اجت اول يومين فرحانه وهادئة بس منعرف سبب تغيير رايها وقرارها تجي يمنه ليش.
الى ان سمعتها تحجي ويه ماجد بصوت ناصي: متستحي تحجي على مرتك. كدام الناس كدام اليسوه والميسوه تكللهم مريضة ومتخلف بعد ومبتلين بيها ومن هالحجي.
ماجد ساكت.
بالليل سالته: شبيها خالتي؟ شنو متعاركه ويه ام عبدالله؟

ماجد: الظاهر متعاركات وخربانه الصحبة.
ذهب: يالله. الله يسمع منك.
ضحك على كيف بعدين كال: متعاركة وياها علمودج تكول تحجي على مرتك واتعاركت وياها.
ذهب: مااصدك.
ماجد: اي والله شبيج.
ذهب: لا قصدي مااصدك اتعاركت علمودي اكيد اكو ( ان ) بالموضوع.
ماجد: شدعوه. لايصير كلبج اسود فد مرة عاد.
ذهب: ههههه هذا كله وكلبي اسود؟!
يابه اذا مطلع الموضوع غير شي فلا اطلع اني ذهب.
ماجد: لعد شتطلعين شبهه ههههه.

وره مدة اجت عمة حميدة يمنه وكالت: اتعاركن عركة للظالين.
ذهب: اي تكول.
عمة حميدة: تعرفيها ذيج مسمومه وظاله تحجي عليج وعلى ماجد تكللها مريضة وبعد ميصير تحبل وهو يريد جهال كايلتها اختها صوجه ابنج هو مابي خير كدام ام علي ام علي مقابله عليهاكايلتلها البنية من اخذناها كل شي مابيها عدكم اتمرضت من القهر وهاي عود مسويه نفسها زينة من شايفة ام علي هزأتهن متعاركة وياها من كلتلها ابنج مابي خير.

ذهب: كلت اني مستحيل هيج تدافع عني.
عمة حميدة: عجايز لو بلا.
قابل مثلي كيوت ههههه.
ذهب: هههههه فدوة لكلبج يمه انت وين اكو مثلج ام كلب الطيب انت ياريت كل العمات مثلج ومثل طيبة كلبج وحنانج.
بعد مرور ست شهور على وجودنه بتركيا اتصلوا بماجد كلوله عرفوا العصابه اللي خطفوه والقوا القبض عليهم ولازم يجي.

رجع ماجد للعراق واكتشف انه العصابة جانت مكونة من مجموعتين مجموعة جانت عبارة عن سيطرة امنية موجودة بالشارع اللي بي شركتهم هاي جانت تراقب الشركات والموظفين وتعرف منو اصحاب الشركات هنا وشنو شغلهم وعنوانيهم واسمائهم وتنطي هالمعلومات للمجموعة الثانية اللي تشتغل خلف الكواليس وجانوا اغلبهم من غير محافظات وساكنين بمناطق تجاوز ( حواسم ).
وكلهم كرايب.

بعدما عرفوا عمام ماجد اتحولت الشغلة الى عشائرية وجيب الكوامة وودي الكوامة ورغم ماجد واهله يستحرمون من شغلة الفصل لكن هالمرة الكل كللهم لازم تاخذون منهم فصل حتى يتوبون.
واخر شي استقر الحجي على انه يرجعون الخمس دفاتر وبس.
لكن ذوله ماعدهم يرجعون هالمبلغ لذلك العشيرة اتعهدت ترجع المبلغ على دفعات الى ان يتسدد.

حاولو يخلون ماجد يتنازل لكن مقبل واصلا اكو ضحايا غير ماجد مايقارب العشرين شخص مختطفيهم وماخذين منهم فلوس هذول كلهم رفعوا قضية ومستحيل يتنازلون عن حقهم.
.
وتُمر بية طوايف
شوگ، وأتذكر ضحكتك وأنسى كُل حِزني؟

رواية صبرا يا قلبي الجزء الثاني للكاتبة روز الفياض الفصل السادس عشر

بعد مرور سنة.
ماجد: صباح الخير
ذهب: صباح النور
ماجد: كاعدين من وكت اليوم. شعدكم؟
ذهب: شنو نسيت؟
ماجد: شنو؟
ذهب: مو عدنه موعد بالمستشفى علمود شموسة؟
ماجد: اووه، . نسيت والله. ، بيها مجال على غير يوم؟
ذهب: هو بكيفنه غير موعد وهي متأذية خطية بطنها اسهال متشوفها شلون وجها ضعفان.
ماجد: يالله اوك بس بسرعة جهزوا نفسكم لان عندي شغل لازم بسرعة نخلص حتى اروح لشغلي.
ذهب: ان شاءالله.

لبسنه وبقيت الجهال يم بيبيتهم ورحنه.
وصلنه للمستشفى وكعدنه يمكن نص ساعة انتظار بس ماجد عينه بنقاله.
وكل شوية يباوع عالساعة.
ماجد: يالله عاد شنو هالتاخير مصخوها.
ذهب: غير يمه مرضى بعدين هو الدكتور من شوكت يتقيد بالوقت.
ماجد: عندي شغل. ، ماالحك، . اخليكم هنا واروح اخلص شغلي وارجعلكم من تخلصون؟
ذهب: روح. بس اذا احتاجيت شي شلون؟
ماجد: دبري نفسج بعد اعتمدي على نفسج شوية ذهب مو كله اني.

ذهب: وهو منو مخلينه مربطة مااكدر اسوي اي شي؟
ماجد: هسه مو وكته هذا الحجي اني مستعجل كلش مااكدر اتأخر اكثر من هيج من تخلصون اتصلي بيه اجي ارجعكم.
ذهب: اوك.
ماجد: اذا احتاجيتوا اي شي اتصلي.
ذهب: اوك. اوك.
راح وبقينة اني وشمس بس اني جنت مستغربة.
مستحيل ماجد يخلينه بمكان وحدنه ويروح حتى لو عنده شغل مهم!

على ماخلصنه مراجعة وفحص ورحت استلمت العلاج اتصلت على ماجد تقريباً وره ساعة: حبيبي انت وين؟ احنه خلصنه تره.
جاوبني بتوتر: هلو.
هلو.
ها خلصتوا؟ شكللكم الدكتور؟
ذهب: يكول مستبرده كتبلها علاج هسه جبته واجيت.
ماجد: اممم. يعني خلصتوا؟
ذهب: اي خلصنه. ننتظرك.
ماجد: اني مشغول شوية مااكدر اجيكم هسه. راح اتأخر عليكم شويةانتظروني.

ذهب: اكيد ننتظرك شدعوه اني اندل اروح بحدي. بس مو تشتلنه ماجد خلص بسرعة وتعال لان مناك الجهال يم خالتي خاف متكدر عليهم.
ماجد: لا ان شاءالله مااتاخر شوية واجيكم. يالله ديري بالج على نفسج وعلى شموسه.
ذهب: ماشي.
ماجد: يالله مع السلام.
ذهب: مع السلامة.
التفتت على شمس كاعده بالعربانة وتباوع عالناس بس مالها خلك لان بطنها تمغصها.
ذهب: بابا شكله اليوم ماله خلكنه. شنسوي هسه؟
احاجيها وهي تباوعلي وتبتسم.

مرت ساعة كاملة واني كاعده انتظر تعبت ومليت من الكعدة.
اتصل على ماجد ميجاوب.
شمس نعست وظلت تتنعوص وتبجي.
خبصتني خبص.
اتصلت على العلوية سالتها عالجهال كالت: خبلوني هذا رويئد ميكعد راحة يتحرش بفضولي ميخليه يلعب وساكت والله هادية. مرة يضربه مرة يعضه مرة ياخذ العابة ويشمرها ويخليه يبجي. لااكدر اروح وراه ولااكدر اوصله.
اصيح واني بمكاني.

ذهب: ينطيج العافية تعبوج اعرفهم. بس شسوي ماجد كال عندي شغل انتظروني فد شوية واجي وصار ساعة ماكو واتصل عليه ميجاوب وشمس هم خبصتني وظلت تبجي وتتنعوص. هسه بدت تنام بلكي هسه يجي عود هاي اني كتله مو تتأخر الجهال يم خالتي بقوا.
العلوية: يالله شنسوي بعد ننتظر وامرنه لله ان شاءالله ميتأخر. رجعي اتصلي عليه يمكن يجاوب.
ذهب: ان شاءالله يالله هسه اتصل عليه واشوفه وينه.
مع السلامة.

سديته ورجعت اتصلت على ماجد هم ميجاوب.
اتنهدت بعصبية وخليت شمس بحضني حتى تنام.
اهز بيها اريدها تنام ماكو نعسانه بس متستسلم. ظلت تتنحس تتنحس وتبجي لحدما نامت من التعب.
مرت ساعة ثانية واتصل ماجد: ها ذهب. خلصتوا؟
ذهب: صدك جذب؟ ادري هو اليتاخر هلكد غير يتصل؟ ساعتين؟ ساعتين كاملة تأخير؟ شغليش هذا؟
ماجد: يالله يالله جاي بالطريق عشر دقايق واني يمكم.
ذهب: يالله يالله.
وره ربع ساعة اجه.

نزل اخذ عربانة شمس واني صعدت وكالبة خلقتي.
ماجد: تأخرت عليكم شوية مو؟
ذهب: شوية؟ شوية؟ بذمتك بضميرك ساعتين تإخير شوية؟ هاي او اني متأخرةعشر دقايق على ماالبس حجابي جان اشتعلت الدنيا.
ماجد: اي شسوي غير عندي شغل!
ذهب: شغل هلكد؟ لو كايل اجتماع اكول بيها مجال بس شغل هيجي وهلكد تتأخر!
ماجد: هسه شصار هاي البنية نايمة وانت كاعدة عالكراسي وتباوعين للناس.

ذهب: اي نايمة اي. نايمة بعدما شبعت بجي وخبصتني خبص وشهرتني شهيرة ومناك خالتي قبل ساعة كالت الجهال خبلوني تعالوا بسرعة.
ماجد: عندي شغل. شغل. شغغغغلللل. تفتهمين لو لا؟
بقيت ساكتة.
وصلني للبيت وراح.
صعدت بسرعة للشقة لكيت خالتي حايرة بالجهال يتعاركون واثنينهم يبجون.

دخلت خليت شمس بفراشها وسكتتهم وخالتي اخذتلها نص ساعة تحجي: ياخذها يرحون يطلعون يتونسون ويخلون الجهال على كلبي احير بيهم. اني مره مگرمة لابيه حيل امشي ولابيه حيل اصيح عليهم ولايخافون مني. خبلوني من الصبح لهسه تعبت من الصياح عليهم والحجي وميفيد وياهم.
جهاليش هاي شنو هالتربية هاي.

طلعتوا اتونستوا ساعة كافي ارجع لبيتي ولجهالي. شنو ذنبي اني راحتي مسلوبة من الصبح لهسه؟ شنو ذنبهم هاي الجهال من الصبح لهسه يتعاركون ويبجون.
ذهب: وين رحنه نتونس؟ منو كلج رحنه نتونس مو كلج هو رايحين للمستشفى عدنه موعد؟
العلوية: عفية مستشفى من شافج مشاف غير المستشفيات. شنو حلاوة يومية رايحة للمستشفى؟

ذهب: اكثر من مرة تعيدها هاي الحجاية اني من اتزوجت ابنج مجنت اشتكي من شي الحمدلله جنت بكامل صحتي وعافيتي بس عدكم شفت المر المرضني مااتمرضت بدون سبب والسبب تعرفيه كلش زين.
العلوية: اي اي طلع لسانج. طلع لسانج مسويه روحج فقيرة ومتحجين هسه من يجي سوي نفسج خوينسه.
ذهب: لا مااسوي نفسي خوينسه هاي اني هيج عاجبج اهلاً وسهلاً معاجبج هاي مو مشكلتي.

العلوية: ممترباية. شكول بعد وشحجي لو عندج تربية متردين علي هالرد.
بعدها تحجي ودخل ماجد.
ظل مستغرب صوتنه طالع: شكو؟ ليش صوتكم طالع؟ شصاير؟
قبل مااني احجي هي بجت: مرتك هاي هزأتني وتصيح علي وتكلي اذا معاجبج اسلوبي مشكلتج هاي مو مشكلتي.
باوعلي هو متعجب: شنو هالحجي؟ شصاير؟ ليش هالحجي؟
اني ساكتة وطالعة روحي وجنت مدنكة الم العاب الجهال: اسألها شكالت هي بالاول من اول مادخلت للبيت لحد هسه من دخلت انت.

العلوية: اي اتمسكني اتمسكني. شكلت؟ شحجيت؟
تأخرتي علي وخليتني اركض وره الجهال واني مرة تعبانة شنو مو من حقي احجي ابيتي. بيتي وبيت ابني والميعجبه يتفضل بره.
باوعت لماجد ورفعت حواجبي: وين جنه احنه؟
ماجد: كافي هسه سدوا الموضوع على شنو هالهوسة والصياح كلها ساعتين ولوما شمس مريضة شعدنه رايحين من الصبح للمستشفى بهالبرد وعايفين الجهال.

درت عليها كتلها: هاي الحمدلله ابنج هسه كدامج كال جنه بالمستشفى لان شمس مريضة يعني مجنه نتونس وذابين عليج الجهال على كولتج ولا جان ماخذني للمستشفيات المشاف غيرها من شافني.
بقت ساكتة هي وهو هم ساكت.
دخلت للغرفة.
بدلت ملابسي.
دخل هو خله السويج ووكف كال: شصار؟
ذهب: شمدريني. من وصلتني لهسه وهي تصيح رحتوا تتونسون بحدكم وخليتوا الجهال علي تعبوني.
اكلها جنه بالمستشفى شمس مريضة تكلي من شافج مشاف غير المستشفيات.

اتنهد وبقى واكف شوية وساكت وعاكد حواجبه بعدين كلي: يالله يالله.
هي مال ونسه بهالبرد. عوفيها تحجي يمعودة لاتحطين عقلج وياها.

ذهب: ماجد. تره هي لامخرفة ولامو بعقلها حتى لاتحطين عقلج وياها. وماعدها غير من اخذج لليوم مريضة ومشاف غير المستشفيات من شافج ومن هالحجي الماصخ شنو يعني اول وحده اني اتمرض؟ عيب هذا الحجي كدام الكل تحجيه مو هي هم مريضة هم متعاجزة اني منها احجي عليها واكول مريضة ومبتلين بيها؟ مو تروح للدكتور وللمعالج؟ اشمعنه ذهب من اتمرضت صار عار وفضيحة ولازم الكل يدري بيها؟

اتحسر بعدين كلي: لاتردين عليها. الف مرة كتلج عوفيها تحجي وهي تسكت بحدها. شسويلها يعني اذبحها؟
ذهب: مكتلك اذبحها ولا كتلك احجي وياها بس لاتكلي لاتحطين عقلج ويه عقلها.
اني بشر وعندي طاقة اتحمل اتحمل اتحمل بعدين انفجر. ، لاتتوقع ابقى ساكتة طول الوقت هم صبري يخلص.
ماجد: استغفر الله العظيم. لو ادري مراجع للبيت ولهاي الدوخة.
درت عليه كتله: انت وين جنت اليوم؟
ماجد: اتونس..

ههههههههه مو امي تكول جنتوا تتونسون هو اني جنت اتونس.
ذهب: السالفة مو سالفة شغل. اعرفك اني.
ماجد: شتعرفين؟
ذهب: اعرفك من يكون عندك شغل تصير عصبي صحيح بس متعوفنه وتروح لو تنكلب الدنيا. شعندك؟
ضحك على كيف: شعندي؟
ذهب: هاي الضحكة مال واحد مذنب. احجي ماجد بدون مشاكل شعندك؟ وين جنت؟
رجع ضحك: مخبلة.
ذهب: لا والله حجيي صحيح متأكدة. اعرفك وحافظتك. تحجيلي لو انتظر بعدين من تنكشف السالفة وانت تعرفني من اكشفك؟

ماجد: شتكشفين؟ هههههه مو اكلج مخبلة.
ذهب: بكيفك.
على راحتك.
بس اذا اكتشفت اني الموضوع ومتأكدة موضوع تدري بيه مااقبل عليه تره مااضمن ردي.
ماجد: لج كافي شبيج؟ اتخبلتي؟
هههههه والله بلوه هاي.
بدلت وطلعت كبل اكمل الغدا لان من الليل مسوية الدجاج ومكملته بس اطبخ التمن.
كملت الاكل وكل شوية اباوع على ماجد بالصالة نقالة بيدة. ماادري يراسل منو.
العلوية زعلت راحت لغرفتها ومقبلت تتغدا.
بقينة يومين وماجد مو طبيعي.

احس عنده شي.
وره اليومين جنت جاي انظف ودخل هو بالليل: سلام.
ذهب: وعليكم السلام.
ماجد: شتسوين؟
ذهب: انظف. راجع من وكت شعجب؟
ماجد: ماعندي شي فكلت ارجع للبيت اخذكم اطلعكم شوية.
ذهب: شعجب؟
ماجد: متردون تطلعون؟
ذهب: حتى لو ردنه نطلع خالتي ماتقبل تطلع.
ماجد: عوفي خالتج.
ذهب: هسه تكول طلعوا وعافوني.
ماجد: بسرعة روحي لبسي وكملي واني راح اشوفها.
رحت هالسريع لبست الجهال ولبست ونزلنه.
العلوية مقبلت تروح مثلما اتوقعت.

مشينة مسافة بالسيارة ودك تليفونه.
سمعت صوت بنية تحجي وياه بس هو رد عليها بالعراقي.
استغربت.
فجأة كال: راح ارجعكم للبيت؟
ذهب: ليش؟
ماجد: شغلة مستعجله.
ذهب: شغلتيش؟
ماجد: شغلة عندي شغل ولد صديقي محتاجني بخدمة لازم اروحله.
ذهب: يعني بدلنه ونزلنه وين اودي الجهال هسه؟
ماجد: ولا لاي مكان تنزلون كبل تصعدون فوك. غير يوم اطلعكم ان شاءالله.
ذهب: منو اتصل بيك؟
ماجد: صاحبييي.
ذهب: صوت بنية؟!
سكت وغلس. ،
ذهب: اشو ساكت؟

ماجد: شنو؟
كتلج شغل؟
ذهب: ويه بنية؟
ماجد: اي وية بنية.
ذهب: وليش تكول صاحبي؟
بقى ساكت.
ذهب: ماشي بس من ترجع من الشغل ويه البنية اتوقع تفسرلي شغليش هذا ومنو هاي.
مجاوبني ولا كال اي شي.
وصلنه للبيت وراح.
بقيت احوس الليل كله منتظرته يرجع.
عشيت امه والجهال وصارت الساعة عشرة وهو ماكو.
بالعشرة ونص اجه متسوك.
سلم ودخل يبدل بعدين اجه كعد يمي جنت كاعده بحدي بالصالة.
ماجد: اتعشيتي؟

ذهب: اي المن باقية بدون عشا اكيد انت تعشيت ويه هاي الجنت طالع وياها.
ماجد: وين طالع؟
ذهب: ماادري انت احجيلي بالله؟
بقى ساكت مدة طويلة بعدين كلي: وحدة محتاجة مساعده واتصلت بيه.
ذهب: منو هي؟ ومساعدتيش؟ ووين تعرفك؟
رجع سكت بعدين كال: صبيلي عشا بالاول وبعدين.
ذهب: لا. احجي بالاول. منو هاي؟
اتنهد وسكت.
ذهب: منتظرة تره اني.
ماجد: شتردين؟
ذهب: منو هاي اللي اتصلت بيك؟
ماجد: متعرفيها.
ذهب: منو هي؟

باوعلي وبقى صافن بوجهي بعدين كلي: اذا اكلج متحجين اي شي. اي شي متحجين ولا تفتحين حلكج وتعترضين، .
ذهب: تره بديت اشك.
ماجد: بالاول كولي مااحجي ولااتنفس؟
ذهب: يعني السالفة مو سالفة شغل؟
ماجد: تره مااحجي. كولي.
كلبي كرصني ماجد مو من النوع اللي يخاف اذا سوه شي بس هالمرة مبين مسوي شي ويدري هالشي مااقبل بي وممكن يسبب مشكلة لذلك يخاف من رد فعلي اذا عرفت.
صرت عصبية كتله بصوت عالي: اذا متحجي اكلب الدنيا..

خله ايده على حلكي: اششش.
اششش.
امي نايمة والجهال. اتخبلتي؟
وخرت ايده: تحجي لو اكعدهم.
ماجد: امشي بالغرفة.
ذهب: احجي ولاتخبلني!
ماجد: بالغرفة.
راح كدامي للغرفة واني رحت وراه.
دخلت وسديت الباب كتله: احجي؟
اجه وكف يمي وخله ايده عالباب كلي: وحده من كرايبنة من بعيد جايه هي وزوجها هنا سفرة وصايرلهم حادث وزوجها متأذي ومسويلة عملية واحتاجت فلوس واتصلت بيه.
رحت وديتهن الها.
ذهب: منو هي؟
ماجد: متعرفيها.
ذهب: لا اعرفها.

فتح عيونه كلي: وين تعرفيها؟
ذهب: من رد فعلك مبينه اعرفها. احجي ماجد لاتحاول اول وتالي راح اعرف.
ماجد: افففف.
شيماء.
فتحت عيوني من الصدمة كتله: منوووو؟
ماجد: اششش.
اششش.
خطية صايرلهم حادث هي وزوجها وناقليه للمستشفى ومسويله عملية ومتعرف احد هنا.
ذهب: متعرف احد. بس انت تعرفك؟
خطية سودة علي خوما متأذي؟
ليش ماكتلي جان رحت وياك وقمت بالواجب؟
بدا صوتي يعلى رجع خله ايده على حلكي: صوتج.

صوتج. كتلج احتاجت مساعده متعرف احد خوما اخليها بحدها محتاره زوجها محتاج عملية ومتعرف احد.
وخرت ايده كوه كتله بعصبية: اي خطيه متعرف غيرك انت ابو كلب الحنين تتصل بيك؟
زوجها ماعنده اهل؟ ماعنده اصدقاء؟ ماعنده معارف؟ جان اتصلت عليهم يحولولها فلوس اشمعنه انت؟ ليش مااتصلت على امها؟ على اخوانها؟ على اي واحد من اهلها؟

ماجد: اقسم بالله اذا علا صوتج بعد متلومين الا نفسج. بت عمي ومحتاجة مساعدة مني شكللها مرتي متقبل؟ تغار علي منج؟
ذهب: لا شلون. مو عيب كللها مرتي يطبها مرض اهم شي انت متنزعجين ومتضوجين.
بروح ابوك من رحتلها رحت للمستشفى لو وين جانت؟
ماجد: صوتتتتججج.
ذهب: يعني مرحت للمستشفى؟ اخذتها تتعشى مو؟ عشيتها؟ احنه نرجع البيت وهي تطلع تروح تتعشى وترفه عن نفسها نفسيتها تعبانة خطية زوجها بالمستشفى؟!
ماجد: كااافييي.

ذهب: اقسم بالله اذا رحتلها بعد لو اتصلت عليك وجاوبت لاكلب الدنيا وخلي شيصير خل يصير.
.
-كيف حالك؟
- كُلي بكلك ممزوجٌ ومتصل
والنائباتُ التي تؤذيك تؤذيني؟