رواية صبرا يا قلبي

رواية صبرا يا قلبي الجزء الأول للكاتبة روز الفياض الفصل الثامن

لهم بعض الوقت ولك أنت العمر،.

حجيت ويه الشله عالواتساب لان مسوين كروب وعزمتهم على المهر يوم الاربعاء بس محجيتلهم شي عن اللي صار بس فاطمه تعرف.
ثاني يوم هم ماكو السيد واني هم نسيت والتهيت.
العصر ماما وبابا طلعوا للدكتور وبقيت افتر وحدي بالبيت اندك الجرس.
لبست احرام الصلاة لان لابسه بجامه وربع ردن طلعت صحت منو قبل لا افتح الباب.
كال: اني.
جنه صوت السيد بس مو متأكده رجعت سألته:
منو انت؟
السيد:
ماجد.

كلت وااه فشلتاه نسيت اليوم يرجع ومحد بالبيت وبجامتي تضحك ادري ليش ما اتصل قبل ميجي.
فتحت الباب شفته واكف على جهه.
السيد:
السلام عليكم.
ذهب:
وعليكم السلام اهلا اتفضل.
دخل للحديقه كال:
شعجب انت تفتحين الباب؟
ذهب:
بابا وماما طالعين.
السيد:
يعني بس انت بالبيت؟
ذهب:
اي اتفضل اتفضل هسه يجون.
السيد:
لا خلص نكعد هنا بالحديقه.
ذهب:
ليش حاره الدنيا.
السيد:
لا مو حاره زين الجو وبعدين ميجوز انتي وحدج بالبيت واني ادخل.
ذهب:.

براحتك دقيقه بس اجيب تلفوني.
دخلت للبيت واني افكر صحيح كلامه انه شلون هيجي ماافتهم واكوله اتفضل ادخل شكد فشله.
باوعت لشكلي بالمرايه:
لا نعمه الحمدلله ينطلع بي ميحتاج اخلي مكياج.
طلعت لكيته كاعد عالكرسي وخال علاليك كومه عالكرسي الثاني.
سحبت كرسي وكعدت بعيد عنه شويه.
ذهب:
الحمدلله عالسلامه.
السيد:
الله يسلمج.
باوعلي ابتسم كال:
شلونج؟
ذهب:
الحمدلله.
السيد:
شخبارج؟
ذهب:
ماكو شي لاجديد.
السيد:
اشتاقيتلج.

ابتسمت كوه اشتغل الاحراج.
السيد:
زين عالاقل قربي الكرسي شويه حتى تسمعيني من احجي بالله انت متحجين.
كمت قربت الكرسي صرت مقابيله وكتله:
لا عادي اسمعك مو لهدرجه.
هو صافن بوجهي دنكت.
السيد:
ليش متباوعيلي ليش كله مدنكه لو دايره وجهج؟
ذهب:
لا عادي اباوع مو مدنكه.
رفعت راسي باوعتله بس استحيت لان هو يباوع بوجهي فدرت وجهي.
ضحك هو على كيف كال:.

تره مااتصلت بيج لان ماعندي شريحه شريحتي مااشتغلت ومصار عندي مجال اروح اشتري ثانيه جنت جدا مشغول بعدين دزيتلج مسج من تليفون عبدالله ابن عمي لذلك كتلج لتتصلين على هذ الرقم او تدزين مسج.
ذهب:
عادي ماكو مشكله.
السيد:
يعني مو زعلانه؟
ذهب:
لا ليش ازعل.
السيد:
تمام.
زين اني جبتلج شبكه على ذوقي من شفتها راسا كلت هاذي الج ان شاءالله تعجبج.
مد ايده سحب علاكه وانطانياها اخذتها وكتله:
شكرا.
السيد:
فتحيها وشوفيها.

طلعت العلبه وفتحتها باوعتلها تجنن احلى شكبه شفتها على شكل ريش طاووس كلاده جبيره وتراجي واسواره ومحبس.
ذهب:
حلوه عاش ذوقك.
السيد:
اكيد عجبتج؟
ذهب:
تجنن.
ابتسم كال:
الحمدلله.
ذهب:
شكرا جزيلا.
السيد:
تدللين.
مد ايده على العلاليك الباقيه وكلي:
هاذي للوالد والوالده شي بسيط والباقي الج.
ذهب:
شكرا جزيلا ماله داعي كلفت على نفسك.
السيد:
ماكو كلافه.
بس ان شاءالله تعجبج.
ذهب:
اكيد عاش ذوقك مشكور.
السيد:
ممنون.
ذهب:
مشكور تسلم.

السيد:
البنات راح يتصلون بيج علمود الصالون وهالسوالف انطيتهم رقمج وراح ادزلج ارقامهم حتى اذا اتصلوا تردين.
ذهب:
ان شاءالله.
السيد:
بس اني ضايج وزعلان منج.
يبووي اني حجي مااعرف احجي انوب يزعل ولازم اراضيه مصدك نفسه ويتدلع عود حلو.
ذهب:
ليش؟
اتدنه يمي شويه وكال بصوت هادئ:
اني شنو اسمي؟
ذهب: اسمك؟ ماجد.
السيد:
لعد ليش لهسه تكولين سيد؟
ذهب:
اي ان شاءالله اتعود.
السيد:.

لا ماكو بعد سيد اكو ماجد يالله بالله كولي خل اسمعج تكولين اسمي.
ذهب:
ماجد.
السيد:
شفتي سهل مو صعب.
شويه واجوا بابا وماما وكعدوا وياه وظلوا يسولفون ويضحكون واني صافنه بحالتي شلون بيه الظاهر يحتاجلي وقت طويل يالله اتعود عليه وشلون بهالمستحه الماصخ بس شسوي مو بيدي.
راح ماجد ودخلنه حيل انبهروا بابا وماما بالشكبه.

فتحت باقي العلاليك عطور واكسسوارات وجلابيه حلوه وفخمه وفستان للمهر ذهبي مخصر عالجسم وطويل وبي ذيل طويل والذيل منثور عليه ريش طاووس ووياه تاج ذهبي بسيط بس بي ( 3 ) ريشات طاووس وحذاء كعب ذهبي وبي ريشة طاووس زغيره.
يعني منسقهم ويه الطقم مال الذهب فد شي مو طبيعي من لبسته اتعجبت على نفسي وماما ظلت تصورني بي كلتلي:
هذا كافي للمهر مينشبع منه حرامات تنزعيه وتلبسين فستان ثاني.
دزيتله مسج:.

(شكرا جزيلا عالهدايا كلهم حلوات عاش ذوقك).
ماجاوب الظاهر مشغول.
بالليل الساعه (11 ) ونص جنت اشوف فلم وسمعت التليفون عرفته هو شفته اونلاين
ماجد:
حبيبي بالعافيه بس اكيد عجبوج؟
ذهب:
حلوات شكرا.
ماجد:
جنت اتمنى عندي وقت اكثر اجيب غير اشياء بعد بس مااكدر اتأخر بعد يوم جنت كاعد على نار شوكت ارجع.
ذهب:
لا كافي كلفت على نفسك.
ماجد:
ماكو كلافه انت زوجتي.
ذهب:
بس هيج هوايه.
ماجد:.

هذا حقج بعدين انتي ليش تخجلين اني جايبهم برضاي انتي مطلبتي اول وحده متحب الهدايا.
ذهب: هههه لا مو مااحب الهدايا.
ماجد:
اهم شي طلعت المقاسات مضبوطه؟
ذهب:
مضبوطه شكرا.
ماجد:
باجر ان شاءالله راح يتصلون عليج البنات حتى تتفقون على تفاصيل المهر الصالون ومااعرف شنو. اي شي بخاطرج كولي لتستحين الحمدلله الخير هوايه.
ذهب:
مشكور متقصر.
ماجد:
ذهب؟
ذهب:
نعم؟
ماجد:
احبج
ذهب:
هاا.

سديت التليفون بوجهه من المستحه والصدمه حسيت دخت وانخفض ضغطي واحتريت وانوب بردت وظليت ارجف مبقى شي محسيت بي هو الظاهر عرف اني خجلت وطلعت من الواتس فاتصل بس مااكدر ارد جسمي كل يرجف شكد احراج.
شلون شسوي ياربي هاي اني من كلمة هيج صار بيه لو اكثر اكيد يغمى عليه مابيهة مجال.
ظل يتصل واني مااجاوب وخليته صامت قررت اخر شي لازم احجي وياه بصراحه حتى ليتوقع مني اشياء فوق طاقتي.

فتحت الواتساب لكيته موجود اكيد ينتظر بلكي ارجع.
ماجد:
زعلتي؟
ذهب:
لا.
ماجد:
لعد ليش طلعتي ومرديتي اتصل متجاوبين؟
ذهب:.

سيد انته من تحجي هيج اني مااعرف شجاوبك انت متعرفني اني جدا جدا جدا خجوله اولا وماعندي اخوان اولاد او حتى بنات حتى اتعلم منهم او اسمعهم يحجون هيجي ويه ازواجهم او زوجاتهم حتى اتعود هاذي ثانيا والاخيره والاه انت بالنسبه إلى شخص غريب يعني متتصور شلون صعبه عليه احجي وياك او اطلع وياك مو بعد احجي وياك هيجي هذا الشي فوق طاقتي داحاول بس مااكدر مااعرف احجي شي اني محاسته الله يخليك انطيني مجال.
ماجد:.

هسه اني زعلت احنه اتفقنه ماكو بعد سيد اكو ماجد اولا ومو قصدي احرجج ثانيا بس الرجل اقل خجل من المرأه ولو انتي خجلج مو طبيعي بس احبه لان مشايف هيج وحده وثالثا كل العمر الج ماورانه شي ابد لتجبرين نفسج تحجين حجي محاسه بي اني اريد كلامج وياي نابع من كلبج ومن تجاوبيني في يوم من الايام على هاذي الكلمه تكونين متلهفه تكوليها وتعبرين عنها مثلي اني هسه ورابعا خليج دائما صريحه هيج ويايه حتى نكون متفاهمين وخامسا احبج حيل واشتاقيتلج حيل واحب خجلج وهدوئج وقناعتج وتقبلج للامور بسرعه يعني من تزعلين بسرعه ترضين مو متعبه وعنيده.

..
اليوم الاربعاء حفلة المهر بنات عمه اتصلوا بيه حاجزين صالون بس محد يروح ويايه ماما تبقى بالبيت هي وخالتي يجهزون ويستقبلون اهلنه اللي يجون او الجيران اللي ميريد يروح للقاعه بنات عمه كلولي احنه وياج نساعدج ونرتبج لتفكرين والصالون اصلا بيومها محجوز بس النه لان عددنه هوايه.
منتظره ماجد يجي ياخذني للصالون مقبل الا هو يوديني.

دك تليفوني طلعتله وهو نزل من السياره حتى ياخذ اغراضي لان هوايه فساتين واحذيه واكسسوارات خلاهم عالكشن وره وفتحلي الباب كعدت كدام يمه.
ماجد:
هلو.
ذهب:
هلو، ضحكت
ماجد:
شبيج تضحكين؟
ذهب:
عالهلو مو جنها متأخره؟
ماجد:
مو شفتج محجيتي شي ولاسلمتي مبينه خايفه ومرتبكه عبالك ماخذيج للسجن ههه.
محجيت فعلا جنت خايفه لان هذا زواج وبدت كل الامور تمشي بسرعه واني الوحيده اللي مو مستوعبه الوضع.

بالطريق شغل اغنيتي المفضله اضعف كدامك ولزم ايدي وساكت ميحجي واني ساكته واباوع من الشباك بعدين وكفنه بالتقاطع اني دك تلفوني ومديت ايدي اطلعه من الجنطه وهو صاح:
لا تلتفتين عالجهه الثانيه.
اني لا اراديا درت التفتت بس مشفت شي. وهو صرخ علي:
لاتلتفتين.
ونزل من السياره اني درت اباوعله واشوفه دك الشباك على السياره اللي بصفنه ويصيح يكله:
انزل.

وذاك ميقبل يفتح الشباك ولا ينزل اخر شي فتح الشباك وماجد لزمه من ياخته ويصيح عليه وضرب الولد:
انت ماعندك عرض ماعندك خوات ماعندك شرف ياكلب يا، يا..
اشكال الحجي واني اصرخ بحدي بالسياره وشفت ذاك يريد يفتح الباب اني كلت خلص راح يتضاربون مابيها مجال راسا فتحت الباب ونزلت جلبت بماجد من ايده وهو يصيح على الولد بعدين انتبه اني لازمته.
التفت عليه خزرني خزره مرعبه..

لزمني من ايدي جرني فتح الباب مال السياره ودفعني بالسياره وسد الباب واسمع يكل للولد:
بيك بخت هسه مفارغلك جان دفنتك بمكانك.
صعد بالسياره وطلعنه بس اني مثل السعفه ارجف ياربي شنو هذا ليش هيجي عصبي عيونه صارت دم من العصبيه.
طول الطريق هو ساكت لو يكول لاحول ولاقوة الا بالله.
اني حتى نفس مااكدر اتنفس من الرعب بس حسيت راسي يوجعني لان من دفعني بالسياره انضرب راسي بالسقف مال السيارة.
ماجد:.

مو كتلج لتلتفتين ليش التفتي؟
يحجي بهدوء بس احسه كوه لازم نفسه ذهب:
لااراديا التفتت مو قصدي مااعرف شنو الموضوع وليش وشبيك.
ماجد:
اخر مره تفتحين الباب وتنزلين بدون مااني افتحلج الباب واكولج نزلي..
مفهوم؟
هزيت راسي اي بس محجيت.
هو يحجي بس ميباوعلي من هزيت راسي التفتت علي بعصبيه:
مفهوم؟
ذهب:
افتمهت افتهمت. لتصيح علي.
رديت اني بعصبيه لان ضجت يصيح عليه شسويت اني.
ماجد:.

انت متدرين هو طول الطريق ورانه ويمشي بصف سيارتنه ومن الجهه البيها انتي وصافن عليج شتردين اسويله مثلا اصفكله؟
يحجي ويصيح اني حيل ضجت مرديت سكتت اصلا ممنتبهه اني للسياره ولا للولد وحتى لو صحيح ميستوجب هالفضيحه بالشارع ودفعني بالسياره وانضرب راسي وهسه بعد هم يصيح عليه.
وصلنه للصالون وكف السياره اني منزلت مو هو كلي متفتحين الباب الا اني افتحه واكولج نزلي.

هو فعلا نزل الاغراض اول خلاهم اباب الصالون واتصل على بت عمه طلعت دخلتهم بعدين اجه فتحلي الباب سحب جنطتي من حضني ووكع تليفوني وانكسر لان جنت مطلعته حتى ارد وصارت الهوسه ومن كدما جنت مرعوبه من دفعني بالسياره مرجعته بالجنطه نسيت.
دنك هو شال التليفون واتنهد كال:
استغفرالله شهاليوم هذا.
ضجت اكثر من حجايته نزلت وسحبت الجنطه ودخلت للصالون بدون مااحجي.

دخلت سلمت عالبنات وكعدت بس اني بعدني ارجف مااكدر اسيطر على نفسي والبنات حسوا بيه كلهم شبيج شبيج حجيتلهم الصار وهمه هم ضاجوا وظلوا يصبرون علي ميخالف هو يحبج وهو غيور وعصبي بس كلبه طيب ومن هالحجي احنه بنات عمه ويسوي اكثر من هيج مو بعد انتي زوجته.
اني هدأت شويه بس راسي يوجعني مكان الضربه. اتصل على بت عمه واسمعها تكله:.

غير على كيفك ياعيني مو كل شي بالعصبيه والصياح. اي خطيه ترجف من دخلت وتبجي هسه شويه هدأت بس راسها يأذيها من البجي.
بعدين صاحت:
صدك؟ الله يسامحك ياماجد هي شعليها يالله يالله خل اروح اشوفها هي هم متحجي مكالت انضرب راسي هذا اللي يجي من وره العصبيه.
سدت التليفون واجت يمي وحجت للبنات كلتلي شلون:
خاف راسج تأذى ليش مكلتي اول مدخلتي جان كناله ناخذج للمستشفى.
ذهب:
ميحتاج هسه يروح الالم مو قوي تره لتخافين.

المهم هو ظل كل شويه يتصل على بنات عمه يسأل ويكلوله كل شي تمام بس اني حيل ضايجه من اللي صار وراسي يأذيني حيل واستحي اشتكي.
رحت للحمام البس فستاني وصحت لوحده من بنات عمه دخلت ويايه تساعدني نزعت القميص كلتلي هاي شبيهه ايدج باوعت لايدي اثر اصابع احمرر استغربت بعدين عرفت هذا اثر اصابعه كتلها:
ايد ماجد.
عهود:
شنو هاي لهسه باقي الاثر؟
ذهب:
اني بشرتي حساسه وهو ماقصر.
عهود:.

هههه اااه يالحب ممصدكه ماجد يحب بس الله عليج هم يكولج احبج.
ذهب:
صارت الساعه( 4 ) موعده يجي حتى نروح للتصوير وطلبت من عهود بت عمه تروح ويانه مالي خلك ينفتح هالموضوع بالطريق وهم اريدها تساعدني حتى اغير فستاني عند المصوره.
خلصوا البنات واجوا عليهم الولد اخذوهم واني وعهود بقينه ننتظر ماجد وعهود تصورني بموبايلها وانبهروا بالفستان.

دك تليفونها ماجد طلعنه اني مااشوفه بسبب البرنص بس حسيت ايده لزمتني حتى انزل لان ايده حاره عرفته.
رحنه للتصوير دخلنه نزعت البرنص هو واكف بس يباوع محجه شي عهود خبصتنه بالهلاهل اخر شي كلها:
صوتج كافي.
هي ضحكت وسكتت كلتلي:
شكتلج حتى علينه ميقبل.
اني ابد ماباوعتله منطيته ظهري سويت نفسي اعدل الفستان وعهود لبستني الطقم الذهب وجان خرافي طالع ويه الفستان وهي خطيه كل دقيقه وكالت:
اللهم صل على محمد وال محمد.

التفتت على ماجد كلتله:
وين طحت عليها هاي؟
هو اتنهد وظل ساكت.

هائم في جميع تفاصيلك.

رواية صبرا يا قلبي الجزء الأول للكاتبة روز الفياض الفصل التاسع

ميحجي ادري بي يباوعلي بس ظليت منطيته ظهري دخلت المصوره وكلتلي:
تعالي اقتربي يم العريس
درت عليه بس مباوعتله اجت هي لزمتني قربتني وكلتله:
خلي ايديك على خصرها.
اني من المستحه ومااكدر ارفع راسي واباوعله كلتلي خلي ايديج على ركبته استحيت اخذ ايديه هو وخلاهن على ركبته. وخله ايديه على خصري.
حسيت بشعور غريب اول مره احسه بحياتي من خله ايديه على خصري وايديه حاره راسأ رجفت هو حس دنك بأذني كلي:
أشش ولانفس.

اني من كلي هيج حسيت زدت حتى انفاسي اريد اسيطر عليها مااكدر ظليت مدنكه اجت المصوره رفعت راسي كلتلي:
باوعي لزوجج.
رفعت راسي باوعتله هو يباوعلي واحسه راح يفعص خصري بايديه حاره.
اخذنه كم لقطه وكل وحده ابله من اللي قبلها وبدلت الفساتين وعهود خطيه ويايه تساعدني وترتبني.
وهو ساكت ويباوع وصلنه للقطه الاخير كعد على كرسي وكلتلي تعالي اكعدي على رجله.
ذهب: هااا؟
لا لا مااكدر. مااكدر استحي.

اني هنا الموت عندي ارحم يمه شلون اكعد هيجي بحظنه.
المصوره:
ليش تستحين رجلج هو خلي ايدج وحده على رقبته والثانيه على صدره وباوعيله وهو يباوعلج.
ظليت مصفنه. اخذ ايدي خلاها على صدره وابتسم حسيت كلبه يدك حيل عبالك راح يطلع من صدره راسا كلت بصوت ناصي:
عزا العزاج وهيبه.
هو سمعني التفت عليه وضحك كال:
مسكينه ياوهيبه.

حصرتني الضحكه بس مكدرت اضحك منا خايفه ومستحيه من هاللقطه الزفت ومنا اني ضايجه منه على هوسة الصبح.
ماجد:
احلى لقطه هاي.
ذهب: اي كلش.
خلصنه تصوير وردت اكوم لزمني كلي بصوت ناصي باذني:
يصير اخذ بوسه؟
انخلست! محجيت ولا علقت ولا باوعتله ولا كدرت اكوم اصلا رجليه بادت من حجايته شكد جرئ وماعنده خجل.
هو حس بيه مسح على ظهري كلي:
اتشاقه شبيج ليروح يغمى عليج هنا واحتار بيج بس ردتج تجربين شويه من السويتي بيه اليوم.

طلعنه ورحنه للقاعه ونزلنه ودخلنه. هو لازم ايدي ونمشي للكوشه وكعدنه الهلاهل والتصوير وكاموا البنات يركصون ويصورون اشرلهم هو تصوير بالموبايل ماكو وفعلا مصوروا بس المصوره.
اني افكر لهدرجه يخافون منه معقوله هيج يخوف بعدين اتذكرت شلون اجه يوكف كلبي الصبح بالسياره من عصب.

التفتت شفت العلويه امه موجوده خطيه جايبيها عالكرسي كام هو راحلها باس راسها وايديها وشبكها حيل وكلها تبجي اني هم كمت ورحت سلمت عليها واجت عمته وبوستنه وكلتله:
حبييي كافي بجي اليوم يوم فرح هاي الفرحه الجبيره ميجوز تبجون يالله اخذ مرتك وكعدوا.
اجت بت عمه حجت وياه وراح طلع.

وراها كاموا البنات نزعوا حجاباتهم وظلوا يركصون وشفت فطوم والشله كوموني اركص وياهم وركصت بس مو ذاك الركص مستحيه بعدنه نركص كالوا العريس راح يدخل لبسوا حجاباتكم رجعوا كعدوا بقيت بس اني وعمته وعهود نركص.
دخل هو حسيته اتفاجأ من شافني اركص واني اتمنيت الكاع تنشك وتبلعني مساع جنت مستحيه بالتصوير هسه كايمه اركص يافشلة الفشلة.
كعد هو وراها كالوا العريس يهدي العروس اغنية ذهب.

رجعت كعدت اني وفطوم اجت يمي وكفت:
لج شنو هاي شنو هالحب غرت اريد اتزوج شوفولي عريس.
كرصتها اني كتلها صوتج دنكت كالت:
انه الج هسه تشوفين شراح اسوي.
راحت شفتها باتجاه الباب وطلعت ورجعت برجعتها كال ابو الدجي العروس تهدي هذه الاغنيه للعريس.
اني انصدمت يااغنية شوكت هديتله اغنية؟
باوعتلها عرفتها فطيم هي تضحك وتحجي ويه البنات.
التفتت لكيته يباوعلي.
بدت الاغنيه لشيرين (انا كلي ملكك).

حسيت وجهي اشتعل نار من الخجل كلت هسه شيكول عليه توني مستحيله وهسه اهديله اغنيه وشلون اغنيه صخام بوجهج فطوم على هالدكة.
اجت عهود كالت كوموا ركصوا سحبتنه من ايده وهو لزم ايدي وكام.
واني اكول لا لا بس محد ملكيني وجه كمنه نركص واني بالكوه اتحرك وهو عبالك يعرفني من سنين لاخجل ولا شي.
ماجد:
شكرا يابه عالاغنيه بس ادري مو من كلبج.
ذهب:
مو اني اصلا فاطمه تصرفت بكيفها.
رديت عليه بعصبيه.
ماجد:
يعني بعدج زعلانه؟

محجيت كلي:
مو قصدي بس شتردين اسوي اشوفه يمشي ويانه ويباوعلج ولا كأنه اني موجود؟
هم محجيت كلي:
ذهب؟
باوعتله.
ماجد:
احبج.
ذهب:
خرب.
حسيت نفسي دخت وجسمي باد ورخت ايدي اللي على جتفه بس اسمعه ضحك.
بعدين كلي:
انت مرتي وحلالي محد مسموحله يقترب منج او حتى يباوعلج.
خلصت الاغنيه وفتحوا الاضويه وراد يبتعد بس اني لزمته لان حسيت بعدني دايخه هو باس راسي كلي:
ها نكعد لو ترتاحين؟

باوعتله اني بعتب على حجايته يدري بيه استحي واتقصد يحجي.
هو ابتسم فهم نظرتي كلي:
انت البديتي منو كلج تطلعين حلوه لهدرجه هههه.
اجت عمته كالت:
ليش واكفين متكعدون لو تردون تركصون بعد؟
ماجد:
يصير؟
باوعلي اني راسا هزيت راسي لا ضحك هو.
ماجد:
لا كافي عمه جنتج داخت.
رحنه كعدنه وعمته كل شويه وكالت:
حبيبتي بنيتي شبيج دختي ليش دختي؟
اجت فطوم يمي باوعتلها بحقد.
ذهب:.

بسيطه فطيم اني الج شسويتي بيه الله يبلاج فشلتيني الله يفشلج.
هي تضحك:
يمعوده يابيلاني المفروض تشكريني انت مشفتي نفسج شلون نايمه بحظنه وكل شويه تضربينه سهم قاتل من عيونج.
ذهب:
اسكتي اسكتي تدرين استحي ياثوله ياسهم يامصياده اني جنت دايخه وجنه نتعارك ياغبيه.
فاطمه:
شكد حلو العرك اذا هيجي ان شاءالله يوميه عركه الله يرزقني بواحد كون كل عركه يكسر عظامي من الحضن مثل ماجد.

خلصت الحفله وطلعنه صعدنه بالسياره اني بعده راسي يأذيني بس زاد الالم بالحفله حسيته تقريبا اختفى هسه ليش رجع قوي.
شغل السياره وطلعنه لزم ايدي اني مدنكه ومااشوف شي من البرنص.
ذبحني الوجع.
باس ايدي وبقى لازمها وره شويه اني سحبت ايدي لزمت راسي. هو التفت كلي:
شبيج؟
ذهب:
راسي يوجعني.
ماجد:
يوجعج من الركص يمكن ههه.
اني عصبت كتله:
لا من الضربه إلى اجت براسي من دفعتني.

هو وكف السياره على جهه. والتفت عليه اني دموعي طاحت لان فعلا الالم قوي.
هو وخر البرنص من وجهي اتفاجأ بيه ابجي.
ماجد:
من شوكت يأذيج هيج؟
ذهب:
من الصبح بس جان الالم خفيف هسه ديقوه.
ماجد:
وليش محجيتي؟ اففف.
رجع البرنص على وجهي وكلي:
نروح للمستشفى بس اول نمر عالبيت غسلي وجهج ولبسي حجاب وملابس اللي رحتي بيهم للصالون وين؟
ذهب:
بالجنطه بس ميحتاج هسه نوصل واخذ بندول وخلص.
ماجد:
استغفرالله.

شغل السياره وطلعنه مااشوف شي من الطريق بعدين وكف اني رفعت راسي شويه عرفت اخذني لبيتهم دخل السياره للكراج ونزل اني بقيت بمكاني اسمعه يسلم على رجال وبعدين انسد الباب وجه هو فتحلي باب السياره ونزلني رفع البرنص من وجهي.
ماجد:
تكدرين تمشين؟
ذهب:
اي عادي.
دخلنه لكينه عمته وامه وعهود والبقيه كلهم رايحين.
استغربوا من شافوني بس فرحوا.
عهود:
هلا شعجب اجيتوا لهنا؟
ماجد:
راسها يوجعها.
عمته حميده:
هسه اجيبلها حبايه.
عهود:.

لاعمه مو هيج السالفه.
طلع ماجد جاب جنطة الملابس من السياره وكل لعهود:
ساعديها تبدل ملابسها حتى اوديها للمستشفى.
دخلنه اني وعهود للغرفه نزعت الفستان ولبست قميص وتنوره وطلعت حجابي بس كتلها اريد اغسل وجهي من المكياج.
طلعنه اسمع عمته:
ويلي ويلي ياماجد بس لاالبنيه صار براسها شي شلون عالفشله كدام اهلها شيكولون عليك وعلينه الله يسامحك يايمه وهي خطيه متحمله وساكته تركص وتتحرك والوجع بيها
ماجد:
ها خلصتي؟
ذهب:.

اي خلصت.
ماجد:
يالله مشينه.
عمته حميده:
وين بحدكم اروح وياكم.
ماجد:
شتسوين رايحه بس ترحين اتعبين ابقي واني اتصل بيج واطمنج.
عمته:
لايمه شيصبرني اروح احسن واتطمن على البنية.
كامت لبست عبايتها واجت شغل السياره اني كعدت وره عمته هم مقبلت اجت كعدت يمي وره وهو يباوعلنه بالمرايه.
ماجد:
ها خلصتوا نتوكل؟
عمته:
توكلنا على الله.
بهالاثناء دك تليفون ماجد طلعت ماما تتصل تسال احنه وين كلها هو:.

هلا بيج خاله فد شويه ونجي طالعين ويه عمتي منتأخر ان شاءالله.
سكت شويه بعدين كلها:
اي دقيقه بس.
انطاني التليفون اخذته حجيت ويه ماما بس مكتلها شي مردت اخوفها.
ماما:
حبيبتي مو تتأخرون ابوج اليوم الظهر اتصلوا بي عمج مريض حيل وراح خطيه اليوم بحدنه اني وياج بس خالتج تبقى يمنه.
ذهب:
اوكي ان شاءالله واذا ردتي شي اتصلي على ماجد تليفوني بصندوك السياره.

خصلت المكالمه ورجعتله التليفون هو يباوعلي بالمرايه اني حطيت راسي على جتف عمته وهي خطيه حضنتني واسمعها تبسبس اكيد تقره ايات.
وصلنه للمستشفى.
دخلنه للدكتور لان دنيا ليل ماكو ناس وماجد شرح للدكتور كله انضرب راسها بالسقف مال السياره الصبح ولهسه يأذيها بس هسه الالم اقوى.
كلي الدكتور كومي للفحص لزم راسي كلي وين انضرب راسج اشرتله وين الالم كتله بالبدايه نفسه مكان الضربه بس هسه راسي كله.

فتح لايت بعيني وكتبلي اروح اسوي اشعه وفحوصات رحنه كملنه الاشعه والفحوصات ورجعنه للدكتور كال:
خلال النهار من انضربتي لهسه هم اغمى عليج او فقدتي الوعي؟
ذهب:
لا
الدكتور:
زين نمتي؟
ذهب:
لا منمت بس احس نعسانه حيل.
الدكتور:
صار عندج تقيئ؟
ذهب:
لا ماكو.
التفت على ماجد كله كل الاعراض تدل على ارتجاج خفيف بالدماغ الظاهر الضربه مو قويه الحمدلله.
ماجد:
ارتجاج بالدماغ!
ذهب:
ارتاجاج!
الدكتور:.

الحمدلله مو قوي بس اكيد لازم نتخذ نفس الاجراءات للاحتياط.
ماجد:
ايي مو مشكله.
الدكتور:
هسه اكتبلها تنام اليوم مستشفى مو حتى تنام لا بالعكس حتى متنام احنه نريدها تبقى جوه عينه متنام للصبح لازم تبقى( 24 ساعه ) متواصله كاعده هي تقريبا كطعت نصف الوقت وهي كاعده من الصبح لهسه فيبقى نصف الوقت.
ماجد:
ان شاءالله.

كتب الدكتور العلاج وراح ماجد يرتب وضع الغرفه واني طلعت كعدت يم عمته بره وكتلها النتيجه وهي خطيه خافت.
عمته:
عين ماصلت على النبي من اول يوم حسدوكم اكيد هاي حياة وبناتها حسبي الله عليهم.
اني ساكته مالي خلك احجي راسي يوجعني واحس نعست وهذا يريدني ابقى لباجر الصبح ماانام.
اجه ماجد كال:
يالله نروح للغرفه رحنه وياه.
حجوا هو وعمته هي تريد تبات وياي وهو مقبل كلها:.

اتعبين وعهود لازم ترجع لبيتها اولادها خطيه خاف يبجون عليها وانتي تبقين ويه امي.
عمته:
استغفرالله لاحول ولاقوة الا بالله يوم حبيبي شلون البنيه منو يبقى وياها؟
ماجد:
يمه اني هسه اروح لبيتهم اجيبلها ملابس واكول لامها وراح احاول مااخليها تجي اني ابقى هنا ميحتاج احد يبقى بعد.
راح ماجد لبيت اهلي وتأخر اني حسيت ضجت ونعست وعمته خطيه حسيتها تعبت بس متريد تبين وحسيتها قلقه.

بدت تسولف على ماجد حتى تلهيني وماانام حجت عنه من جان زغير وحجتلي قصة زواجه وشلون طلك بنت خالته وشلون تعب وياها وشال فكرة الزواج من باله وشلون اخوه اتوفه بحادث سياره.
وحجتلي هي شلون اتزوجت وشلون الله مرزقها اطفال وشلون زوجها جان يحبها وتحبه بس زواجهم مطول هوايه لان اتوفى وهي وراه مقبلت تتزوج.

وره فتره اندك الباب دخلت ماما ووراها ماجد اجت خطيه مرعوبه وسألتني شلون صرتي وليش مكلتي طمنتها وسولفت هي وعمة ماجد بعدين ماجد اخذ عمته وداها للبيت ورجع جاب عشا وحلويات وكرزات وهالسوالف.
بس ماما كالت هي هم راح تروح اني ظليت صافنه شنو تروح يعني ابقى وحدي طبعا انام واروح بسابع نومه.
ذهب:
وين تروحين ماما؟
ماما:.

خالتج بقت بحدها بالبيت وتعرفيها خوافه وتليفوني نسيته من كلي ماجد انخبصت حتى ملابس خالتج خلتلج بالعلاكه واخاف يتصل ابوج ويظل باله خطيه مااريده يعرف لان يتخبل عباله شي خطير وهسه تعرفين زوجة عمج لازم تتصل اذا عرفت ومنريدها تعرف وتظل تألف قصص.
ماجد: لتخافين خاله اني اوصلج وارجع ابقى يمها ليظل بالج.
ماما:
حبيبي خاله دير بالك عليها.
ماجد:
بعيوني خاله لتوصين حريص.
ذهب:
وين ترحين وتعوفيني وياه؟
ماما:.

زوجج مو غريب بعدين شنو عايفتج وياه بغرفة النوم غير مستشفى؟
ذهب: ماما راحت اني كلت استغل الفرصه اسبح عالسريع واخلص من السبري بشعري واتوضيت وطلعت صليت واني كاعده خفت ادنك.
جعت وضجت حيل لان وحدي معقوله ماجد راح لبيتهم؟
اندك الباب دخل ماجد:
السلام عليكم
ذهب:
وعليكم السلام.
ماجد:
منمتي مو؟
هزيت راسي لا.
كعد يمي واتنهد بعدين حط ايده على راسي كلي منين يأذيج اشرتله دنك باس راسي ووخر.
ماجد:
استغليتي الوقت بغيابي.
ذهب:.

لان نعست بحدي وضجت وشعري كله سبريه مااكدر اصلي.
ماجد:
ليش مااكلتي؟
ذهب:
مااحب اكل وحدي. انت اتعشيت؟
ماجد:
مااشتهي.
اني جوعانه بس استحي اكل كدامه وهو مياكل واصلا اني متوتره وهو شكله ضايج وتعبان اكيد. اتصل بعمته سالها على امه واتصل بماما طمنها عني وبعدين التفت.
ماجد:
نتعشى؟ مو احسن حتى تشربين علاجج واني هم.

خلصنه عشا اندك الباب اني لبست حجابي دخلت الممرضه قاست حرارتي وضغطي والنبض وسجلتهم وطلعت. ماجد كعد عالجربايه الثانيه وطلع موبايله خلاه عالطاوله.
ماجد:
آسف.
ذهب:
عادي.
ماجد:
يعني صاير عندج اترجاج قبل؟
ذهب:
مصاير وياي اي حادث بسبب العصبيه والحمدلله خفيفه والمشكله نعست.
ماجد:
ماكو نوم رجاءا اتحملي اعتبري نفسج عندج سهره.
سكتت.
ماجد:
مراح تحجين شي؟
ذهب:
شحجي؟
ماجد:
يعني عاتبيني لوميني احجي اي شي بخاطرج.
ذهب:
مابخاطري شي.

ماجد:
واللي صار؟
ذهب:
يعني انت جنت متقصد؟
ماجد:
طبعا لا.
ذهب:
اعاتبك على شنو بعد؟
اجه كعد يمي لزم ايدي كلي:
اني محظوظ.
. باس ايدي ورجع كلي:
خل نحجي باي شي حتى يضيع الوقت.
ذهب: اوكي احجي.
ماجد:
الدوام مباقيله شي ان شاءالله ومن تداومين اني راح اوديج واجيبج.
ذهب:
ليش؟ اني عندي سايق من مرحله اولى ويه بنات صديقاتي.
ماجد:
انت هسه زوجتي يعني مسؤوليتي ومااريد احد غريب يوصلج انطيني جدول محاضراتج واجيلج الصبح وبعد الدوام.

ذهب:
الله كريم
ماجد:
صديقاتج مبين عليهم يحبوج هوايه.
ذهب:
اكيد واني بعد احبهم.
ماجد:
تره اني نزلت اغراضج ابيت اهلج من رحت بس تليفونج بقى بالسياره تردين اروح اجيبه؟
ذهب:
ميحتاج الساعه ب1ونص شسوي بي واصلا هو اتفلش منو كال يشتغل خلي للصبح اشوفه.
ماجد:
حاقده علي مو؟
ذهب:
علمود التليفون يعني؟ يمكن شويه هههه، اكره اغير تليفوني بس ان شاءالله يشتغل ويطلع مابي شي وساعتها مراح احقد عليك.

بقينه نسولف ونحجي بمواضيع عاديه لحد مطارت النومه مني بس هو نعسان وتعبان والمشكله وراه شغل الصبح.
اتمدد وشكله نام كمت غطيته فتح عيونه ولزم ايدي باسها كلي:
مااكدر انام وانت يمي واصلا مبقى شي عالصلاة.
رحت كعدت عالكرسي حتى لااغفى واستحي اتمدد وهو موجود.
الساعه ( 6 ) الصبح اجه الدكتور لبست حجابي قاس ضغطي والحراره وسالني كم سؤال وبعدين كال عالساعه ( 9 ) تكدرون تطلعون.

دك تليفون ماجد ماما اتصلت سألته وهو طمنها وبعدين عمته اتصلت وهم طمنها.
(ب9 ) نزل هو سوه اجراءات الخروج ودفع الحساب وطلعنه للبيت.
وصلنه للبيت ماما مجهزه ريوك ولزمت بماجد يتريك ويانه وحجينه عن البارحه ماجد ساكت بس يبتسم تعبان مااكل هوايه شويه وترخص يريد يروح ينام شويه.
اني هم رحت بدلت ردت انام بس اتذكرت تليفوني مااخذته بقى عنده بسيارته.
نمت مكعدت الا المغرب حسيت جسمي مكسر وتعبااانه.

بالليل اتصل ماجد على تليفون ماما يسألها اذا محتاجين شي حتى يجيبه بطريقه.
معناها راح يجي ويجيب تليفوني الحمدلله وره ساعه تقريبا اندك الجرس اني بدلت ملابسي لبست بنطرون اخضر فستقي وقميص بنفسجي واخضر وشويه خليت كحل وحمرة خدود لان وجهي من التعب شاحب.

دخل للديوانيه وكعد هو وماما يسولفون واني وخاله بالمطبخ سوينه جاي ونسولف طلعت ماما رحت وديت الجاي دخلت سلمت هو كالمعتاد كام وكف اخذ الجاي من ايدي وخلاه عالطاوله.
كعدت هو كعد يباوعلي اني ابتسمت.
ماجد: شلون صرتي؟
ذهب: الحمدلله زينه.

رواية صبرا يا قلبي الجزء الأول للكاتبة روز الفياض الفصل العاشر

ماجد: راسج بعده يأذيج؟
ذهب: مو هوايه.
ماجد: نمتي زين؟
ذهب: محسيت بنفسي من طلعت انت الصبح لحد قبل اذان المغرب بشويه.
ماجد: ههه زين اني والله هم نمت وعلى اساس شويه واروح للشركه بس نمت ماكعدت الا الساعه( 6 )كلت خل اوديلها التليفون زحمه اتصل على الوالده كلما ردت احجي وياج.
انطاني التليفون بس مو تليفوني باوعتله.
ذهب: هذا مو تليفوني.
ماجد: هذا تليفونج.
طلع تليفوني من جيبه بس الشاشه صايره خارطه.

ذهب: هاي شصاير بي حبيبي متشوه.
ماجد: حتى التليفون احسن مني عنده حظ وياج حبيبي وحياتي هههه.
ضحكت بالرغم جنت ضايجه علمود تليفوني.
هو هم ضحك بعدين كال: يعني معجبج التليفون؟
ذهب: لا مو شغلة معجبني بس ماله داعي
تليفوني شغال مابي شي بس الشاشه متضرره وعادي ابدلها ماله داعي تكلف نفسك وتجيب تليفون جديد ومااحب اغير تليفوني احسه عزيز علي ههه.

ماجد: اذا تردين تبدلين الشاشه مو مشكله بس هذا مو معناته متاخذين التليفون الثاني وتره اني ممشتريه يعني لتخافين ممكلفني شي اجاني هديه بس اني مااحب استخدم غير الايفون لذلك بقى بعلبته ممستخدم وهسه طلع من نصيبج.
ذهب: ماجد انت دتحرجني
ماجد: انت عنيده ولحوحه شنو تحرجني قابل اني شخص غريب واحرجج كدام منو كل الناس تعرف انت زوجتي ولتاخذين حاجه من احد بس اني مو اي احد ولو مشتريه الج حق بس ممشترية.

سكت ضاج يمكن من كلامي بس احس هو ديسوي كل شي علمودي واني مااستاهل اتمنى ابادله نفس مشاعره حتى ارتاح وهو هم يرتاح بس مو بيدي.
ذهب: زين خلص لتزعل انطيني جايك برد اجيبلك غيره.
مديت ايدي اخذ الجاي لزم ايدي.
ماجد: مو زعلان بس انت عنيده.
فتح ايدي وباس راحة ايدي وكلي: الحمدلله على السلامه.
ذهب: الله يسلمك.
راح ورحت اني ضبطت التليفون الجديد وحجيت ويه الشله وبعدين ماجد دز مسج: حبيبي كاعده؟

امي حميده اكلت راسي تريد تتصل تسأل عنج.
ذهب: هلو اي كاعده هسه اني اتصل بيها بس دقيقه.
اتصلت على رقمه هو وسلمت عليه وكتله انطينياها اسلم عليها.
سلمت عليها وكتلها سلمينه عالعلويه والبنات بعدين انطت التليفون لماجد: الو.
ذهب: الو
ماجد: حبيبي اتعشيتي؟
ذهب: هااا اي اتعشيت الحمدلله.
ماجد: شبيج؟
ذهب: منو يمك؟
ماجد: محد بس امي حميده والعلويه.
ذهب: شلون تحجي هيج كدامهم؟
ماجد: ههه اي ادري بيج تحبيني.
ذهب: شنووو؟

متت من المستحه هذا شبي يتعمد يحرجني.
سديت التليفون بدون كلام ولاسلام.
كعدت الصبح على اساس نروح اني وماما للسوك حتى ابدي اجهز للدوام مبقى شي بس ماما كالت بابا اليوم يرجع غير يوم نروح ان شاءالله.
الظهر وصل بابا وحجينه وسولفنه واتغدينه سألني عن ماجد كتله زين.
بس بيومها ماجد مااتصل ولادز مسج فتحت التليفون ماكو عالواتس كلت يمكن مشغول.
بالليل نفس الشي صارت الساعه ( 12 )وهو ماكو وهو يخلص دوامه ( ب10).

يمكن زعل لان سديت التليفون البارحه.
ياربي هسه شلون اتصل لو اغلس حتى الوقت مو مناسب بس عيب اغلس.
دزيت مسج مارد فقررت اتصل.
دك التليفون مارد معناها فعلا زعلان اهوو والله بلوه.
وره شويه هو اتصل: ماجد: الو؟
ذهب: الو هلو.
ماجد: هلو بس دقيقه شويه مشغول.
ذهب: اها اوكي براحتك باي.
ماجد: مع السلامه.
وره تقريبا نص ساعه اتصل: ماجد: الو حبيبي؟
ذهب: الو هلو
ماجد: شلونج؟
ذهب: الحمدلله انت شلونك؟
ماجد: تعباان.

ذهب: اليوم ماكو كلت يمكن زعلان.
ماجد: اووف اني وين والزعل وين حتى لو ازعل صدك محد يراضيني.
اكيد يقصدني بس حقه لذلك ضميري يأنبني.
ذهب: هذا كل ومو زعلان شخليت بعد للزعلانين؟
ماجد: لا والله بس تعبان حيل البارحه بالليل العلويه اتخربطت واخذناها للمستشفى ولهسه.
ذهب: ياستار ياربي شلون هيجي وليش مكلت؟
ماجد: مردت اضوجكم واقلقكم انت اصلا بعدج تعبانه.

ذهب: شنو تقلقنه وانت تعبان مره ويايه وهاي المره الثانيه ويه العلويه الله يساعدك.
المهم حجينه شويه وشرحلي وضعها الظاهر وضعها خطر لان هو حيل ضايج
خطيه سديت التليفون بس كتله يخليه عالي حتى اتصل اتطمن عليها.

خطيه انشلع كلبه وهي بس امه عنده الله يساعده ويشافيها يارب ظليت طول الليل كاعده كل شويه اتصل بي بابا وماما نايمين الصبح كتلهم وراحوا للمستشفى وبعدين اتصلت ماما كلتلي ابدي طبخي لحد مااجي بس سوي كميه جبيره حتى ياخذوه لماجد واهله بالمستشفى.
كمت عالسريع طبخت برياني وسويت مقبلات وسلطه دك تليفوني كصيت اصبعي باوعت عالتليفون ماجد.
ذهب: الو.
ماجد: ها حبيبي شلونج؟
ذهب: الحمدلله شلونها خاله شلون صارت؟

ماجد: الحمدلله مثل ماهي ماكو تحسن.
ذهب: متشوف شر ان شاءالله عدها العافيه.
ماجد: الله يعافيج عبالي راح تجين وياهم.
ذهب: لا ميصير كلهم بالمستشفى موجودين استحي بعدين اذا اجي تحتار بيه كلت اطبخلكم غدا لان اكيد كلكم هناك ومن اخلص اتصل على بابا يجي ياخذه ان شاءالله.
ماجد: لتعبين نفسج البنات اكيد يحسبون حسابنه او اجيب من المطعم لتعبين نفسج.
ذهب: تره طبخي طيب لتخاف اذا معجبك لتاكله ماازعل بس عالاقل ضوكه.

ماجد: يعني على مسؤوليتج؟
ذهب: اكيد. يالله خل اروح اكمل.
ماجد: اوكي حبيبي بس من تخلصين اتصلي حتى اني اجي اخذه اوكي؟
ذهب: ان شاءالله.
سويت شوربة عدس وضربتها بالخلاط علمود امه اذا يقبلون تاكل.
رتبت كل شي تمر لبن طرشي وخلصت ودكيت عليه حتى يجي ياخذه.
رحت سبحت عالسريع لان اكيد ريحتي صارت ريحة اكل وصليت وره شويه سمعت الباب انفتح دخلت ماما كالت ماجد بره فتحت الباب الداخلي مال الديوانيه دخل باوعلي.
ماجد: شلونج؟

ذهب: الحمدلله انت شلونك؟
ماجد: جنت تعبان بس هسه صرت زين.
خوما تطلعين بهالملابس بره؟
هزيت راسي لا.
باس راسي كال: فديت هالراس.
ضحكت بصوت ناصي كال: اششش امج بالبيت عيب.
باوعتله كتله: ليش اني شمسويه؟
ماجد: كل هذ اللي مسويته بيه وشمسويه.
لزم ايدي خلاها على كلبه وضغط عليها اني كلت: اي اي اصبعي.
ماجد: اصبعج مجروح؟
ذهب: قبل شويه من اتصلت كصيته بالسجينه.
باوعله وباسه اني رجفت هو راسا كال: ها دخنه ههه؟

غلست جريت ايدي حسيته مصخها.
ذهب: خل اشوف ماما تأخرت.
وراها هو اخذ الاكل وراح بقينه انه وماما وره ساعتين تقريبا رجع بابا واتغدينه.
حجيت ويه فطوم عالاحداث الاخيره
فاطمه: يااا كل هذا يصير واني اخر من يعلم.
ذهب: موكتلج ماعندي تليفون واليوم التهيت.
فاطمه: لاعيني حقج ماالومج بعد يمج الجو وين تتذكرين فطيم.
ذهب: انجبي لج انت تعرفين الوضع بيني وبينه شلون؟

فاطمه: اي طبعا اعرف لعد شلون اول البارحه هو باقي وياج بالمستشفى للصبح واليوم طابختله الغدا والليل كل اتصالات واني محد معبرني حتى بترميشه.
ذهب: انجبي لج صوتج لحد يسمعج عبالهم مدري شصاير بالمستشفى مااسمع صوتج اصلا جانت ليله سوده.
فاطمه: انلصمت عيني مااحجي بعد بس كوليلي اول شنو حجيتوا شنو كلج شنو الصار بالتفصيل الممل عفيه.
ذهب: مصار شي غير الكتلج عليه.

فاطمه: لا مااصدك مستحيل مو يكولون كل اثنين ثالثهم الشيطان لعد الشيطان وين عنج ياحظي شنو كاعده بالمنطقه الخضراء ممنوع يفوتلج.
ذهب: ايا قليلة الادب تعرفيني مو مال هيج سوالف اني الظهر باس اصبعي المجروح اجه يغمى عليه.

فاطمه: هاااا هاااا هاااا باس اصبعج المجروح طلع الحجي توه تكولين مصاير شي اعرفها اني حركات العشاق هاي ولو اني ممجربتها بس المهم اياج ثم اياج يغمى عليج لو يحس تلعب نفسج ثوله ليش ربي منطيني هيج صديقه متفتهم ثوله متعرف تستغل الفرص.
ذهب: وجعا انجبي لج عوبه ياعشاق يا فرص اكولج امه حالته خطره اسم الله.

فاطمه: صليلها انت هاي سوالفج ونذري مااوصيج خاب حظي هسه طليقته كاضه باب المستشفى حتى تشوفه وانتي ظلي طبخي ونفخي ومن يلزم ايدج دوخي.
ذهب: الله يعيني عليج.
مرت هاليومين بصعوبه وقلق وتعب واليوم الثالث الصبح الحمدلله طلعوها العلويه للبيت بس بعدها تعبانه.

العصر رحنه اني وماما وخاله وبابا الهم للبيت حتى نتحمدلها السلامه مسكينه تكسر الخاطر واهلهم كلهم موجودين سلمت عليهم ماعدا خالته من اجيت اسلم عليها دارت وجها هي وبناتها مااعرف منو بيهم طليقته بس اتصرفت طبيعي وكعدت يم عمته وبنات عمه ابو علي سولفنه وضحكنه وشفت الصور اللي عد عهود مال المهر وحسيت عمته جانت تتعمد كدام خالته وبناتها تكولي زوجج ماجد ومن تصيح ماجد تكوله مرتك.

طبعا هي شافت شلون اتعاملوا ويايه خالته وبناتها اللي هي زوجة عمه بنفس الوقت ماما حسيتها اطرش بالزفه متدري شنو الفلم وبابا كاعد بالديوانيه ويه الرياجيل.
اشوف ماجد يطلع ويطب يباوع علينه احنه كاعدين بالغرفه يم امه وخربنه من الضحك اني وبنات عمه ابو علي على سوالف عمته لان جانت تتعمد تضوج خالته وبناتها.
اخر شي شفته اشرلي.
اني كمت جنت لابسه بنطرون زيتوني وستره بيج وبيها اوراق زيتوني وكعب بيج.

كالت عمته: ها وين.؟
ذهب: يوم ماجد ديصيحلي.
عمته حميده: اي روحي حقه طك كلبه.
رحتله هو واكف يم باب الديوانيه.
ذهب: نعم؟
ماجد: شلونج؟
ذهب: الحمدلله.
ماجد: اشوفج ميته ضحك انت والبنات شعدكم؟
ضحكت بصوت عالي اتذكرت سوالف عمته واستحيت وحطيت ايدي على حلكي.
ماجد: اششش صوتج محد يسمعه وهاي الضحكه بس يمي تضحكيها مفهوم؟
ذهب: ان شاءالله هههههه.

رجعت ضحكت بس على كيف خالته وبناتها وعمته وبنات عمه كلهم يباوعولنه لان هو واكف قريب عليه حيل ومدنك علي ويحجي بصوت ناصي واني اضحك هو جنه انتبه عليهم رفع راسه ووكف عدل.
ماجد: اي شبيكم تضحكون هيج صوتكم واصل للشارع؟
ذهب: عمه حميده الله يسامحها تسوي شغلات.
ماجد: شغلات شنو يعني؟
ذهب: ماادري حسيتها تتعمد تضوج خالتك وبناتها بس زودتها شويه.
ضحك هو وكال خليها يستاهلون سوولج شي حجوا شي ضوجج؟

ذهب: لا بالعكس مؤدبات البنات وخالتك ساكته يعني محجت شي بحاله خطيه مالها خلك اكيد علمود اختها.
ماجد: خطيه مو؟ اي نشوف بعدين هالموضوع هسه روحي كعدي وبعد هاللون متلبسيه.
باوعتله باستغراب شقصته ويه الالوان لعد شلبس ماعبرني دخل للديوانيه واني رجعت يم عمته.
رجعنه للبيت حسيت حبيتهم بنات عمه حبابات وعمته تكسر خاطري.
بس خالته وبناتها واضح محبوني ولا الهم نية يحبوني.

وامه وضعها بعده تعبان خطيه بس كون تعدي هالايام على خير.
بالليل جنت اريد انام متوقعت هو كاعد لهسه لان الايام الفاتت كلها هو بالمستشفى وتعبان بس دزلي مسج: حبيبي كاعده؟
ذهب: هلو.
ماجد: شلونج؟
ذهب: الحمدلله.
ماجد: شلون شفتي الاهل اليوم؟
ذهب: حبيتهم يعني بنات عمك حبوبات وامي حميده مينشبع منها والعلويه اجينه ورحنه هي نايمه مسكينه.
ماجد: امم وخالتي وبناتها؟

ذهب: هم حبابين يعني مو مثل بنات عمك ابو علي يضحكون ويسولفون بس هم حبابات يعني مؤدبات.