رواية صبرا يا قلبي

رواية صبرا يا قلبي الجزء الثاني للكاتبة روز الفياض الفصل الحادي عشر

‏وتسألني: كيف انت؟
فأجيبك: مريضة بك
وكلّ من يمرّ بي يُصاب بعدواي ويحبك
.
ماجد بيومها بقى ماله خلك كلش حتى ويه نجلاء ميحجي وخلص باقي يومه بره البيت.
نجلاء: اكلج مبين زعل مني.
ذهب: والله ماادري بس انت قصرتي من حجيتي كدام خالتي هالحجي.
نجلاء: اي غلطت وهو حذرني بالطريق من حجيتله كلي لتحجين شي لامي بس اني ماادري شبيه فلتتها.
ذهب: انوب اخاف يتعارك هو وفراس؟

نجلاء: لااا. لو يريد يتعارك وياه جان اول محجيتله بين عليه بس اشو من حجيتله بقى ساكت بعدين كلي اذا طلع الغلط منج متلومين الا نفسج.
ذهب: يااا!
نجلاء: والله.
ذهب: بس انت غلطتي من كلتي ضربج كدام خالتي وكدام ماجد.
نجلاء: ماجد اني حجيتله كل شي بالطريق من اجاني للمطار كتله صاير يضرب ومو بس حجي ويه بنات لااا طلعات وسهر وكلما احجي وياه يكلب الدنيا ويدفعني ويكلي خنزيرة.
ذهب: يااا. شبي هذا اتخبل؟

نجلاء: حتى قبل كم يوم شميت بي ريحة شرب ماادري شارب ماادري اني ظليت اتخيل.
ذهب: اسم الله. انوب ماجد يكلج ترجعين وتعتذرين! شبي هذا الثاني بعد؟
نجلاء: ماجد يكول احتمال خالتنه من خلاله بكلبها ان شاء الله هي وره الموضوع.
ذهب: شلون يعني وره الموضوع؟
نجلاء: يعني مسويتله شي. سحر. عمل.
ذهب: لاااا عاد كل مصخت. وفراس شعلاقته حتى تسويله وتخرب حياته؟
نجلاء: لج تريد تخرب حياتي اني مو مهم فراس.

صفنت متعجبه بس مو بعيدة السالفة على سريوه وامها: او يجوز تريد فراس.
نجلاء: شتريد منه؟
ذهب: مو بتها الزغيرة بعدها ممتزوجة. رواء؟ مو ابن عمها. وابن العم اوله ابت عمه هههه.
صفنت نجلاء بعدين كمزت: وشنو لازم توزع بناتها على ولدنه! ماكو بس ولد هالعائلة؟ واني شنولعد مو هم بت عمه؟ العب لعب والله اذا طلعن هن وره السالفة هاي. العب جوله والبيت اظلم.
ذهب: يعني شنو؟
نجلاء: شمدريني همه هيج يهوسون ههههههه.

ذهب: والله انقهرت اليوم على ماجد وعاتبني لان رديت على خالتي كلي اذا صارلي شي خطيتي بركبتجن انتن التلاثه.
نجلاء: ياتلاثه؟ انت وامي ومنو؟
باوعتلها صفح كمزت كالت: اني هم؟ اني هم وياجن؟ عزا!
اي هم حقه اني الحجيت بالاول وهو محذرني مااحجي كدام امي.
انت حقج ومو حقج. يعني حقج تضوجين وتنقهرين لان امي تصرفاتها وياج مو حلوه ومو اول مره. بس هم مو حلوه منج تردين عليها. عالاقل لخاطره هو.

ذهب: هو هم كلي هيج. والله يانجلاء اني بطبعي مااجاوب ولاارادد بس تعبت من السكته وكلما اسكت ينداس علي اكثر طفرت روحي. جزعت.
نجلاء: حبيبتي هو هذا القفص المزنجر. اقصد الذهبي. بس هو تشوفيه انت وتعرفين اطباعه زين اكثر وحده تعرفين اطباعه ميتحمل وعصبي وميتفاهم عالاقل وحده تكبس ووحده ترفع مو كل احنه عليه وهو يحبج لان انت متحجين ومتسوين مشاكل. انت عكس ذيج لهذا هو متمسك بيج ويعرف انت شنو.

ذهب: اسمع كلامك اسدأك اشوف امورك استعگب.
نجلاء: هههههه المهم هسه رجلي شلون بي شسويله؟
ذهب: شكلج ماجد؟
نجلاء: هو يحجي وياه.
ذهب: خلص معناها انتظري منه جواب.
نجلاء: ماادري احس الصار وياج ديصير وياي.
ذهب: لا اسم الله ان شاءالله شغله سهلة وبسيطة وتنحل وكل شي يرجع لطبيعته.
بالليل رجع ماجد كعدنه نتعشى سوه وامه وحدها.
ماجد: امي اتعشت؟
نجلاء: اي اتعشت قبلنه.

بعد العشا كال: اني رايح لبيت عمي ابو علي. نجلاء تردين ترحين وياي؟
ذهب: ليش؟ اكو شي؟ صاير شي؟
ماجد: لا ماكو شي. عمي خابرني يردني امر عليه.
نجلاء: علمودي؟
ماجد: ماادري. يمكن.
نجلاء: لعد دقيقة خل البس واجي.
راحت نجلاء تلبس دار علي كلي: امي نامت خاف تكعد وتسال عنه عادي كليلها راحوا لبيت ابو علي ولو مااتصور تكعد بعد.
ذهب: الله كريم.

ماجد: الاولاد راح اخذهم وياي حتى تبقى يمج بس شمس واذا ردتي شي او صار شي اتصلي.
ذهب: ماشي.
بلا عصبية ماله داعي تنفعل على كل شي ويرتفع ضغطك بهدوء احجي.
ماجد: قابل رايح اتعارك ويه عمي وولد عمي؟
ذهب: لا بس اعرفك بسرعة يتغير مودك بكلمة تنكلب واحد ثاني.
سكت واتنهد. وره شوية كعد بصفي جنت ارضع شموسة باوع على ايدي كلي: شبيها ايدج؟
باوعت شفتها بيها زراك كتله: ماادري.
ماجد: واكعة؟

ذهب: لا. لا خاف الظهر من دفعتني عالدرج.
باوعت لرجلي هم بيها زراك كتله: راح اتعوق من وراك.
ضحك.
ماجد: والله لهسه مختنك. كلش مغثوث منج.
ذهب: مني؟
هاي الناس كلها تحجي وكلها تسوي مشاكل وذهب بس تحجي كلمة تتسجل عليها نقطة سودة بصحيفتها ليوم الدين!
ماجد: ماكو فايدة.
ذهب: لا ليش ماكو فايدة. ذهب موجودة نذب اللوم عليها وتسكت كل مره ليش ماكو فايدة.
ماجد: اففف.
يالله نجلاااء وين صرتي؟
دنك يم اذني كلي: متفهمين قصدي.

ذهب: لا فاهمته. من تكول مغثوث منج شنو معناها؟
طلعت نجلاء وسكتنه.
راحوا لبيت عمه ورجعوا بوقت متأخر.
نومت شمس ونمت.
الصبح من كعدنه على صوت انفجار قوي اهتز البيت كله.
ذهب: ماجد. جهالي.
ركض ماجد للاولاد واني سحبت شموسه بحضني وغطيتها.
جاب ماجد الاولاد يمنه عالجرباية لان غرفتنه داخلية مابيها شباك.
ونزل يشوف امه ونجلاء.
وره شوية صعد يركض.
ذهب: وين الانفجار؟

ماجد: الظاهر قريب الشباك مال غرفة امي مكسورة الجامة وضاربتها.
ذهب: يمه. اسم الله. وين ضاربتها.
جان يلبس عالسريع كلي: نزلي جوه انت والجهال واني ونجلاء راح ناخذها للمستشفى.
ذهب: وين ضاربتها؟
ماجد: بأيدها وهي نايمة. همزين ماانبترت ايدها.
ذهب: اسم الله الرحمن.
نزل وياي الاولاد واخذ امه هو ونجلاء وراحوا دخلت للغرفة باوعت لفراشها غركان دم.
خفت. بس لاتموت.

رجعت نومت الجهال بغرفة نجلاء وبقيت كاعدة خايفه خاف يصير شي ثاني.
وره شوية اتصلت على ماجد سالته عالعلوية.
ماجد: دخلوها للعمليات.
ذهب: ياستار يارب. هيجي جرحها عميق؟
ماجد: مشفتي الدم بالغرفة والسيارة هاي عود احنه لافين ايدها كلها.
ذهب: لاحول ولاقوة الا بالله. طمني عود من تطلع من العملية.
ماجد: شطمنج هو اني لهسه ارجف.
ذهب: اسم الله اذكر الله شبيك شنو مداخل للعمليات؟ ماكو شي ان شاءالله بس كول يارب.

ماجد: يارب.
وره شوية رجع خابرني: منو عدكم فصيلة دمة ( A )؟
ذهب: ( A ) ناقص لو زائد؟
ماجد: زائد. امي محتاجة دم وماعدنه احد فصيلة دمه مطابقة الها.
ذهب: اني.
ماجد: غيرج. احد من اهلج. امج ابوج. بسرعة.
ذهب: محد منهم بس اني وخالتي يمكن بس خالتي مسافرة اعتقد.
ماجد: دكي عليها بسرعة عفيه. تكدر تجي تتبرع لامي؟
اتصلت على امي سالتها على خالتي كالت: خالتج مو هنا راحت لايران تسوي عملية تبديل مفصل لركبتها.

رجعت اتصلت على ماجد وكتله.
بقى ساكت بعدين كلي: تكدرين تتحملين؟
ذهب: بعد وضع طارئ هذا اتحمل ان شاءالله.
ماجد: جهزي نفسج اني جاي.
رحت لبست وكعدت انتظره وره عشر دقايق وصل اخذني ورحنه للمستشفى.
بس وصلت دخلوني لغرفة كعدوني على كرسي وبدوا يسحبون دم.
جانوا محتاجين بطلين دم ورغم انه اني اصلا بدون شي يصير عندي دوار لكن مكدرت اشوفه خايف على امه تموت وابقى اتفرج.
ماجد جان قلق حيل ونجلاء تبجي خطيه.

واللي زاد قلقهم هو اني المتبرع الوحيد اللي دمه يطابق دمها وحالتي الصحية مو تمام بس مجبورين.
اول بطل دم محسيت بشي بس نجلاء كالت: صار وجهها اصفر.
التفت ماجد باوعلي بقلق واتنهد: استغفر الله ولاحول ولاقوة الا بالله.
طلع بره يتمشى ونجلاء بقت يمي.
وره شوية رجع جايب عصير برتقال إلى ولنجلاء.
البطل الثاني حسيت واني كاعده بثكل على جتافي ورقبتي. عرفت ضغطي انخفض او يمكن ارتفع المهم اتأثر.
بقيت ساكتة وشربت العصير.

شوية اتحسنت بس اول مخلصوا كلولي: ابقي كاعده شوية لتكومين رأساً.
بعدني كاعده وحسيت كأنما الدنيا فجأة صارت بالمكلوب.
محسيت الا نجلاء لازمتني واني بمكاني اجيت انكلب.
هي صرخة من نجلاء وهي ماجد دخل شالني خلاني عالسدية مدد جسمي ورفع رجلية وبدا يضربني على خدي.
احس بيه ومنتبهه بس ماعندي قوة احجي اي شي ولااتحرك.

حسيت انخبصوا وصارت هوسة. بس مااتذكر وراها شصار عبالك نمت وكعدت وره ساعة اني على جرباية والعلوية ام ماجد عالجرباية الثانية.
واثنينه خلاينه مغذي.
بس فتحت عيوني اتذكرت اولادي: اولادي بحدهم.
نجلاء: اسم الله حبيبتي ماعليهم شي لتخافين قبل شوية خابرت للبنات.
ذهب: محد راحلهم؟

نجلاء: منو يروح؟ اني هنا بيقت كاعده يمكم انت وامي وماجد خطية راح يوصل عمي جان هنا. محد يدري ماجد كال لتحجين لاحد زحمة يومية خابصينهم ويانه.
ذهب: لو موصلني للبيت وياه.
نجلاء: دكعدي عمي وين يوصلج غير نتطمن عليج بالاول غير صرتي مثل الليمونة وعيونج اتكلبت عبالنه متي اسم الله.
ذهب: احس بيكم تحجون وتتحركون بس مااكدر احجي حسيت بثكل على جتافاتي فجأة وراسي ماادري شصار بي.

نجلاء: هو دمج على كدج وهذا المضمد الاثول سحب منج بطلين بدون ميعرف وضعج شكد دمج وماجد وشافج مسنحه ومتدرين بالدنيا وامي منا حالتها منعرفها شنو، زين والله وعنده قوة ويمشي ويحجي ويصيح. الله ينطيه الصحة والعافية عالهبطات الياكلها.
ذهب: سوده علي.
نجلاء: اي هو هذن الكلمتين المخربطات احواله هههههه هذا الدلع المن جوه ليجوه هو ميكدر يقاومه.

ذهب: يادلع؟ ادري غير تكولين تعبان وزين منه ومقاوم ويمشي شكول يعني هههه.
نجلاء: لعب لعب بالرجال. زين ماراح اشتكى عليه.
ذهب: يارجال؟ المضمد؟
نجلاء: يامضمد المفروض يسمي نفسه المسحول هسه مو المضمد ههههههه.
المهم شتردين تاكلين هسه؟
ذهب: لا يااكل جهالي مناك اريد اروحلهم.

نجلاء: اكلي قبل ميجي ويلكاج مماكله شي ويخبصنه. راح جاب ريوك وكال اذا تكعد خل تتريك وجابلح عصير فرش. اكلي تره الدكتور من شاف حالتج كتبلج علاج ومقويات.
ذهب: عود اجيت اتبرع انوب لصتها ههههه.

نجلاء: لا غلطان ماجد من خلاج تتبرعين. انت صحتج متسمح. الحمدلله من عدت على خير بس والله صدك انرعبنه اني وياه وظل خطية هو محتار شيسوي كلش خاف لان هو طلب منج تتبرعين وعباله متي مدري شصار بيج انوب ننقذ امي وانت يصير بيج شي مسوينه شي يعني.
ذهب: هو مقبل وطلب مني اتصل بخالتي تجي تتبرع بس خالتي مسافره وماكو غيري بعد اني كتله هو خطية مقبل لوما اتضايق لان محد مطابق غيري والوضع ميتحمل انتظار.

شوية ودخل ماجد: السلام عليكم
ردينه السلام.
ماجد: ها شلونج؟
ذهب: الحمدلله. بس لو توديني للبيت بالي يم الجهال خاف شموسه تبجي والبنات يحتارن بيها.
ماجد: لا امي حميدة اجت وياي للبيت هسه وصلتها.
دار على نجلاء: شلونها امي؟
نجلاء: زينة الحمد كل شي تمام الحمدلله.
ماجد: اتريكتوا؟
نجلاء: لا.
ذهب: منتظرينك.
ضحكت على كيف وغمزت لنجلاء.
ذهب: جوعان حبيبي؟
ماجد: اي والله كللش. حتى احس دخت من الركضة.
ذهب: اسم الله عليك.

اتريك وبعدين روح خل يقيسون ضغطك خلص بعد خالتي الحمدلله صارت زينة لتفكر ولتخاف.
اتريكنه عالسريع وبعدين طلعنه بقت بس نجلاء يم امها.
لكيت عمه حميدة بالبيت اتلكنه خطيه: الحمدلله عالسلامة يمه. وجهج اصفر. جزاج الله خير يطول بعمرج ان شاءالله ويخليج لجهالج ويحفظلج راعي بيتج.
ذهب: بعد عمري يمه.
عمة حميدة: دخلها دخلها شويتلج شوية معلاك حتى تتقوين وتعوضين الدم.
ذهب: هسه اتريكت يمه.

ماجد: لازم تعترض على اساس اتريكت باجة من الصبح لو اكلت راس الكطان.
ذهب: هههههه
عمة حميدة: لا لا اني هاي الاعذار مااقتنع بيها تاكلين يعني تاكلين والغدا يمه ماجد اشويلنه سمج مشتهين سمج بعد هاي الهبطات.
ماجد: ان شاءالله من عيوني.
عمة حميدة: سالمه عيونك يابعد عيوني.
وره يومين طلعت العلوية للبيت والكل مخبوص برجعتها وسلامتها.

واول ما رجعت للبيت كابلتها اختها وكعدت عدنه بحجة تخدمها وتداريها وكلما تكول اريد اروح العلوية تجلب بيها بحجة: اريد اختي تخدمني مااريد الغريبة.
الغريبة طبعاً اني.
صارت مشاكل هواي بين نجلاء وفراس واهله بس محد يحجي للعلوية ماجد ميقبل بس اختها جانت تنقللها الاخبار اول باول ويومية عدنه بالبيت حفلة وعرس بسبب العلوية.

من تسمع بشي تكلب الدنيا واول ماتهجم على ماجد: مابيك خير لو بيك خير متخلي هذا فريس المخنث يسوي باختك هيج.
حاير ب، خليني ساكته. لعنة الله عالسحارات امهات السحوره والمحوره.
نجلاء: السحوره عرفناها بس المحوره شنو؟
العلوية: امداج يالفاهية. لو بيج خير جان اشتكيتي عليه وانت هناك بس يمي لسانج.
ماجد اشر لنجلاء متحجي واني اخذت الجهال ورحت يم عمة حميدة بالغرفة تصلي.
عمة حميدة: ها شبيها؟
ذهب: موضوع نجلاء.

عمة حميدة: ذاك اليوم حلمت حلم.
ذهب: خير ان شاءالله.
عمه حميدة: حلمت باختها تحط السحر جوه نعال فراس تكرمين.
ذهب: اسم الله.
عمة حميدة: وخابرت للعلوية بت خالي متعرفيها بالكوت. ام عقيل حجيتلها الحلم كالت وره صلاة المغرب خابريني. هي تاخذ خيرة.
ذهب: اي؟
عمة حميدة: وره صلاة المغرب خابرتها كالت حلمج صحيح هاي مو حلم هاي رؤيا تحذير من شرها. وفراس صدك عليه عمل وحتى على مرته حتى تكرهه.

ذهب: حسبنا الله ونعم الوكيل ادري شتستسفاد من اذية الناس.

عمة حميدة: هي من يومها متحب الخير لاحد هو من شوية راد قبل يتزوج عليها بس محد قبل. من هاي سوالفها. عمج الله يرحمه يعرفها جان ويعرف سوالفها. وقبل لاتتزوجون انت وماجد مره جنت عدهم جان عمج مسوي عملية قسطرة ونزلت علينه زينب من فوك وبيدها اوراق ملفوفه ومدري شنو مثل الحصوه مدري خرزه جان اكو مشاكل بينها وبين عبدالله واصله للطلاك وكوه رجعناها للبيت ومن لكتهن ابيتها نزلت تبجي خطية.

شنحجي وشنكول كل احنه نعرفها هي وره هالسالفة بس سكتنه بس عمج من يومها كللها لاانت مرتي ولا اني رجلج. اني رجال صايم مصلي حاج بيت الله بريء من افعالج النكسة هاي.
حتى فراشه عزله منها. بس هم ماتابت ظلت تسوي حتى لعمج حتى يرجعلها بس عمج رجال مؤمن ونظيف ميمض بي هيج اعمال نكسة اسم الله.
ذهب: الله يرحمه والله لو مخلينه يتزوج وحده ثانية احسن ظلمتوه.
عمة حميدة: اي والله ظلمناه يايمه ظلمناه عمت عيني عليه.

شوية وسمعنه الباب انطبك وصوت السيارة بره.
طلعت باوعت شفت ماجد طلع.
سالت نجلاء جانت كاعده بحدها بالصاله: وين راح ماجد.
ردت علي بضوجة وحزن: طكت روحه من الحجي. على ساعة يصير بي شي من وره هالخالة هاي الله لايخليها.
ذهب: استغفر الله ذكري ربج.

بجت نجلاء وكلش قهرتني: اتمنيت من ارجع زعلانه امي تحضني وتطبطب علي وتكلي لتخافين مشكلة وتنحل زعل بسيط وينتهي. مو كل يومية تعيرني وتحاول تشيش اخوي علي وتالي ترفع ضغطه وضغطي بالحجي الماصخ والدعاوي علينه عبالك مو اولادها.
ذهب: لاحول ولاقوة الا بالله. والله كلبي خلص من كل هالمشاكل. تصدكين ساعات اكول وين جانتلي هاي الدوخة كلها.

عشت كل عمري بعائلة هادئة بس اني بيها ومدلله لا اب عصبي ويغلط ولا ام تعير وتدعي، .
ولاخالة تحاول تدمر حياتي وحياة عائلتي ولا اخت تحفر جوه اولادي حتى تخرب حياتهم.
نجلاء: ههههه انصدمتي من شفتينه يمكن؟
ذهب: لا بالاول عين الله عليها فقيرة وطيبة والله استغفر الله استغفر الله يمكن هم مسويلها شي ممعقولة كل فترة تنقلب علينه.

نجلاء: اي طبعا اكيد مسويتلها اختها سحر بس شلون نتخلص منه. حتى لو فكيناه هم تسوي غيره. مراح نرتاح الا من تموت. الله ياخذها.
ذهب: استغفر الله.
نجلاء: دطيري انت الثانية. هسه تسوي لرجلج واحد وعود من اكول الله ياخذها كولي استغفر الله.
ذهب: ههههههههههههههههه لعد شكول. لاحول الله ياربي صدك شر البلية مايضحك هههههه اسم الله علي وعلى رجلي.

خل اروح ادك عليه اشوفه وين راح. سوده علي خلصها تعب هالايام وهي متنطيه مجال يرتاح يومية تسويله حفله وتنكد عليه وتحرك دمه. مابيك خير ومابيك خير.
نجلاء: الله لاينطي اللي جان السبب.
ذهب: هي ليش تحجيلها يعني هي متعرف احنه ضامين عليهاهالتفاصيل؟
اني منج اتصل عليها واكلب الدنيا على راسها.
نجلاء: اخخخ متت كون اموت وارتاح.
ذهب: اسم الله شنو هالحجي.

بعدني كاعده نجلاءسحبت التليفون ودكت على خالتها وماقصرت بيها لعبت لعب.
واني فاكة حلكي مصدومه من كل إلى يصير داير مدايري.
اخر شي طلعت اتصل على ماجد.
دك بس مشاله.
رجعت دكيت مره ثانية. فصله.
كلت يجوز يمه احد او طلع ويه اصدقائه.
زحمة ارجع اتصل عليه مره ثالثة.
رجعت يم نجلاء كالت: طيحت حظها. العجوز الشمطاء تكلي مو حقه يدور بنات عليج جنج ثور مجنح ولسانج قذر عبالك تربية ملاهي.
ذهب: عزا العزاج وهيبة.

نجلاء: اي والله صدك يعني عزا العزه وهيبة كون.
ذهب:؟ حتى بهاي تحششين
.
وبلهفة عطش تانيت
تانيتك تجي لگلبي تجي لعيني
مثل جيت الحلم من غير دگة باب.

رواية صبرا يا قلبي الجزء الثاني للكاتبة روز الفياض الفصل الثاني عشر

أطِشلچ روحي مرخوصهُ وتحِبينيّ
يَ بنيه ال گلب دولبني چن دولاب
يفتر بينج وبينيَ؟
.
لليل وماجد ماكو.
العلوية اتعشت ونامت ولاعبالك. ،
بقينة كاعدين اني وعمه حميدة ونجلاء منتظرين ماجد يجي ونتعشا بس اتأخر.
ادك عليه ماكو ونجلاء تدك ماكو.
اخر شي عمة حميدة كالت: بيش الساعة؟
نجلاء: بهدعش ( 11 ).
ذهب: ميتأخر هو لهيج وقت حده للعشرة.
عمةحميدة: خل ننتظر بعد فد نص ساعة ان شاءالله جاي بالطريق.
ذهب: كلبي كارصني.

نجلاء: اني هم.
عمة حميدة: فال الله ولافالجن.
نجلاء: عمه هو تعبان نفسيته تعبانه وامي متخليه يرتاح متشوفيها يومية تغثه وتسمعه كلام يسم البدن وكدام مرته كلما شافته كلتله مابيك خير.
همزين سوه عملية القلب وخلص جان.
ذهب: اسم الله. اسم الله. كافي فدوه مناقصين مغثه وحركان دم. خلينه ساكتين وذاكرين الله.
عمة حميدة: لا اله الا الله. اي والله خلينه ذاكرين الله كافي علينه هالعجوز ومغثتها.

نجلاء: عود صدك جني ثور مجنح؟
ضحكت اني.
نجلاء: يعني شلون ثور مجنح عندي جناحات قصدها؟ لو عالسمن؟ لو راسي راس بشر وجسمي جسم ثور مفهمت؟
ذهب: هههههههههههه خرب يومج.
نجلاء: ههههههه والله جديات شلون يعني جني ثور مجنح؟ يعني هي بناتها احلا مني مثلا لو شنو الموضوع؟
عمة حميدة: ولج هاي من قهرها هي لو تستحي جان كالت اني مره جبيره احترم عمري وشيبتي واكعد ابيتي واكفي العالم شري. بس هاي متستحي ولاتخجل.

نجلاء: اي اوكي متستحي ولاتخجل بس اريد افتهم صدك اني جني ثور مجنح؟
عمة حميدة: تروحلج فدوه اشو مربرة وتخبلين شنو هي لو بناتها احلى منج بيضا ومربرة ودمج عسل خل تلوح اظفرج وبعدين تحجي.
ذهب: هاي جاوبنج عمتج الجواب الشافي.
نجلاء: لازم اسوي رجيم بعد هالكلام القاسي. جرحت مشاعري.
ذهب: ههههههه
نجلاء: ضحكي انت شعليج رجلج راضي باحوالج شما تكون محد كايلج ثور مجنح.
ذهب:؟
وره شوية دك تليفون عمة حميدة عبدالله.

عمة حميدة: ها عبدالله يمه شلونك؟ عمة حميدة: شكو؟ شبيك؟ عمة حميدة: يمه ابني، شوكت؟ شبي؟
بعدها تحجي اني ونجلاء انخبصنه: ماجد؟ شبي؟
سدت عمه حميدة التليفون كالت: ماجد متعارك ويه واحد وهسه همه بالمركز.
ضربت خدي كتلها: يمه! ويامن متعارك؟ وليش؟ وويامن؟
نجلاء: طبعاً يتعارك هو طلع وروحه بخشمه اكيد يتعارك ويه اي واحد يصير بوجهه. هاي نتيجة النكد والنك والحجي الماله داعي متجيب غير الفكر والمشاكل.

عمة حميدة: ماادري شصاير عبدالله محجه شي كال بس ردت اطمنكم خاف يظل بالكم لان احتمال نتأخر او حتى يبقى بالتوقيف.
ذهب: ياااا!
عمة حميدة: حسبي الله على اللي جاب علينه الفكر.
ذهب: وشنسوي هسه؟
عمة حميدة: شنسوي. نكعد وننتظر منهم خبر لو يجون لو يتصلون. قابل بيدنه شي نسويه.
مابيدنه اي شي غير الانتظار.
ذهب: لاحول ولاقوه الا بالله. ياربي دخيلك.

صعدنه نومنة الجهال اني ونجلاء وبعدين نزلنه كتلها: اخاف امي حميدة جاعت خطيه هي عدها شقيقة ومتعوده تتعشا يالله تاخذ دواها. خل اصبلها عشا.
نجلاء: صبيلنه كل احنه بعد المن كاعدين هيج راح انعس وانام.
ذهب: والله مالي نفس.
نجلاء: هو منو اله نفس ياكل بس بعد شنسوي. يعني اذا بقينه بدون اكل شراح يصير مثلا لو شراح يتغير وانت اصلا بعدج مريضة اكلي واسكتي.
ذهب: اوووف.

اتعشينه وكعدنه ننتظر تقريبا للساعة بالثنتين ( 2 ) يالله اتصل عبدالله كال: جايين بالطريق.
وره شوية اجوا.
ماجد من طلع جان لابس دشداشة فمن رجع عبدالله جان يسوق السيارة وماجد نزل من الباب الثاني اني جنت واكفه وره باب المطبح اباوعله من نزل.
دشداشتة بيها دم.
فكيت عيوني.
اباوع لعمة حميدة اتلكته وصرخت من شافت ملابسه بيها دم ونجلاء طلعت تركض.
بقيت واكفة بمكاني رجليه اتخشبت.
دار عبدالله يسنده ويدخله للبيت.

معناها جانوا بالمستشفى مو بالمركز لو شنو الموضوع.
يجوز مسوي حادث بس السيارة مابيها شي.
دخلوه للبيت ميحجي كبل للصاله مدده عبدالله وكال: مابي شي ان شاءالله جرح بسيط وضمدناه وخيطناه.
عمة: جرحيش هذا؟ شصاير يمه وليدي شبيك ياهو ضربك؟
ماجد: مابيه شي يمه لتخافين.

عبدالله: ماكو شي عمه سهله ان شاءالله. هذا واحد جان عدنه يشتغل قبل مده واكتشفناه يبوك ويسوي فواتير مزوره ومدري شنو وبطلانه اليوم طالع لماجد يم الشركة وظال يصيح ويغلط ويهدد واسويها عشاير ومدري شنووماجذ تعرفينه عصبي متعاركين.
عمة حميدة: يااا.
عبدالله: اي. وبعدين ذاك الكلب عنده مقراضه وضارب ماجد بالسجينة مال المقراضة. بس الحمدلله الجرح زغير وبسرعة اخذناه للمستشفى عقموه وخيطوه ورجعنه.

عمة: ويلي يايمه. ويلي عليك ياماجد يمه. هاي وين جانتلك. هاي كلها من النكد والنك تجيب الفكر لو طار. تجيب المشاكل والفكر.
سكت عبدالله لان يعرف الحجي على امه ومحرج وميعرف شيحجي وشيكول.
اشرتلي نجلاء نروح نسوي عشا لان البنات نامن.
رحنه للمطبخ كالت: منو هذا الكلب ابن الكلب الضاربه.

ذهب: هاي سالفة قديمة من رحنه لتركيا حتى اولد شموسه حجالي كلي واحد عدنه جديد صار كم شهر واكتشفناه يزور الفواتير باسماء الموظفين وياخذ الفلوس اله. الله لاينطيه فوكما عافوه ومااشتكوا عليه كالوا خطيه عنده عائلة وزحمة نشتكي عليه لان بعد محد يشغله اذا عرفوا بي حرامي. هاي جزاتها.
نجلاء: الحمدلله الحمدلله من الله نجاه. الله لاينطي كل واحد يأذي العالم فوك سوايته المابيها خير وفضلهم عليه. ناس مال حرك.

كملنه العشا بسكوت وصبينه الهم.
ماجد مقبل ياكل بس عمة حميدة كعدتله ركبة ونص الا ياكل.
بعدين عبد الله راح لبيتهم.
وبقينه احنه كاعدين للساعة اربعة يالله نمنه.
نام ماجد جوه يم عمة حميدة لان هي طلبت منه تكول تبقى بقلق عليه.
وصعدت اني يم الجهال انام بس مكدرت اغفى كل شوية انزل خلف يحتاج شي ويستحي يطلب من نجلاء لو عمة حميدة.
للساعة تسعة تقريبا بعدين تعبت ونمت.

كعدت من كعدوا الجهال ونزلت لكيته يتريك. العلوية كاعده كباله تساله: مطيحت حظه؟ شلون تخليه يضربك؟ مو اخلي السجينه ابطنه وانعل والدي والديه. شبيكم محد بيكم يشفي الكلب ويبرده.
ذهب: صباح الخير.
رد ماجد علي وهي غلست.

رحت للمطبخ يم عمه حميدة كتلها: لو تروحين تكعدين يمهم حتى متخليها تحجي لان تره بدت بالحجي الماله داعي وهو تعبان ماله خلك يعني هي متشوفه شلون وضعه هاي بدل متكوم تصلي ركعين حمد وشكر لرب العالمين الله نجاه من الموت!
عمة حميدة: حسبي الله عليها من مره الا تخلينه نتحسب عليها.
راحت يمهم عمة حميدة حتى متخليها تحجي ظلت تنكت وتسولف ويه ماجد.
نجلاءجانت تسبح من طلعت كالت: فنج منو راح يجي؟
ذهب: منو؟ بس لا خالتج؟

نجلاء: لا خالتي اكيد تجي هاي مفروغ منها لان كلها هسه تجي وهي وياهم تريد عزا وتشبع بي لطم.
ذهب: لعد منو؟
نجلاء: فراس دازلي مسج هسه من طلعت شفته كاتبلي شنو هذا الخبر السمعته؟ صحيح ماجد مضروب بسجينه؟ اني حجزت يومين واكون عدكم.
ذهب: شبسرعة الاخبار وصلت للسويد.
نجلاء: معناها كلها درت.
ذهب: يالله زين مادام راح يجي حتى ينحل موضوعكم.
نجلاء: الله كريم.

الايام البعدها خلصها ماجد وولد عمه مابين المركز والمستشفى وبعدها كالوا لازم كعدة عشاير.
والكعدة صار عد بيت عمو ابو علي.
واهل الموظف رادوا يدفعون فصل ويسدون الموضوع بس ماجد وعمامه رفضوا: اني ممحتاج الفصل ولا اريده الله يغنيني عن الحرام. بس شرطنه عليهم ميدخل للمنطقة هاي بعد ولايمر بيها. والشكوى مال المركز منتنازل عنها.
ذهب: وهيج فضت يعني؟

ماجد: المفروض لان همه الناس هم مقبلوا عليه وظلوا يتعذرون ويتوسلون وكالوا همه اصلا يردون يطلعونه من العشيرة لان يومية مسويلهم مشكلة ومفشلهم ويه الناس والعالم.
ذهب: فوكاها كللهم فوكما بطلناه بس بدون منشتكي عليه.
ماجد: حجينه كل الحجي بس بعد شيسووله واحد اعوج.
ذهب: حسبي الله عليه.
بقت هاي المشكلة مده طويلة يومية اهل هذا الرجال جايين يتوسلون حتى ماجد يروح يتنازل.

ويومية يدزون ناس وشيوخ حتى يتوسطون علمود ماجد يتنازل ويطلع الرجال من السجن.
بهالاثناء فراس جان موجود عد اهله بس يجي مرات شوية ويروح.
ذهب: يعني ميحجي بموضوهم هو ونجلاء؟
ماجد: شيحجي اني الموضوع اعرفه كله.
ذهب: شنو هو الموضوع؟
ماجد: هي هاي مخبلة. نجيله. شبيج هو هذا يستحي مو مال هيج سوالف هو من الاول مجان صاحب سوالف بنات وصحبة وعلاقات. مو بعد هسه وهو عده جهال.
ذهب: غير تكول يطلع ويسهر ويشرب.

ماجد: الرجال مو بوعيه. السالفة مو خالية يكول اصلا ماادخل للبيت بسببها. مااتحمل اشوفها.
ذهب: ياا ليش عيني؟
ماجد: شبي بعد. مسحور.
ذهب: ايباه. وهسه من اجه شنو راح عنه السحر؟
ماجد: لا متشوفينه ميبقى هنا. ميتحمل يشوفها. وهي تدري بي مسحور بس متقدر هالشي ولا تحاول تتفهم.
ذهب: تره هي مابيدها شي هي مشلوع كلبها وتعبانه نفسيتها اكثر منه.

ماجد: يكول رايح هناك للشيخ مال الجامع قاري عليه ومنطيه علاج مدري شنووجاي يتحسن. يكول بس احس بالالام بجسمي واحلام تخوف عندي نسوان يركضن وراي ورره نجلاء والجهال.
ذهب: اعوذ بالله اسم الله الرحمن
ماجد: شوكت الله يخلصنه ماادري.
ذهب: منين؟
ماجد: من السحر والسحارين.
ذهب: هاا. اي والله شوكت الله يخلصنه.

زين مدام انت صرت زين الحمدلله ليش متاخذه وتروح للزيارة بلكي الله واهل البيت يخلصونه من السحر ويرجع طبيعي لمرته وجهاله؟
صفن ماجد وبقى ساكت بعدين كال: اي ليش لا.
خوش فكرة. بس بالاول خل اخلص من دوخة هذا هو واهله. عمي ابو علي كلي باجر روح اتنازل.
ذهب: ليش؟ خيولي ليش تتتازل عنه.

ماجد: اهله يومية رايحين لعمي يتوسلون يكلولها لخاطر مرته وجهاله مالهم احد. ماعدهم احد بالبيت يعتمدون عليه. وامه مره جييرة وتبجي عليه ليل ونهار.
ذهب: اففف. لاحول ولاقوة الا بالله. مدام عنده هلكد مسؤوليات ليش ميفكر قبل ميتصرف هيج تصرفات ويعض الايد الانمدتله وفتحتله باب رزق اله ولعائلته!
ماجد: بعد شنسوي. هذا حظنه. نسوي زين ونذب بالشط.
ذهب: عند الله ميضيع ان شاءالله.
ماجد: ونعم بالله.

اتنازل ماجد عن هذا الرجال وطلعه من السجن.
وبعدها بكم يوم اخذ فراس وراحوا للزيارة.
من رجعوا فراس رجع ويه ماجد للبيت عدنه.
مبين عليه شوية احسن.
نجلاء جانت كلش فرحانه محتارة شتسوي.
بق فراس عدنه اسبوع تقريبا.
اني رحت لاهلي ابوي خطية شكل عنده سكري وامي محتارة وياه متعرف شلون تمنعه من الحلويات والسكريات.
بقيت يمهم يومين واجت خالتي وبت خالتي.
خالتي: بنية ويانه بالدوام انخطبت.

خوش بنية والله بت ناس طيبين وهي مؤدبة بس حرامات اتزوجت واحد متزوج وعلى اساس يريد يطلك مرته بس بعده ممطلكها. ماادري شلون اهلها قبلوا ينطوها وهو بعده ممطلك.
ذهب: يجوز تحبه.
خالتي: لا متعرفه. اجه اتعرف عليها بالدوام شافها.
ذهب: خاف جذاب ميريد يطلك زوجته الاولى؟
خالتي: اني هم هيجي اكول بكلبي.

بس هو الولد مبين خوش ولد وابن عائلة حتى اهله تكول خوش ناس وكايللها مسالة وقت ويطلكها الاولى لان هي مو خوش انسانه ومسويتلهم كومه مشاكل ولغاوي.
ذهب: الله يستر.
خالتي انوب شلون صدفة هي اسمها اسراء وزوجته الاولى اسمها اسراء تكول من اجه شافني كلي كل شي بيج حلو بس اسمج محبيته ولا اكدر اتقبله.
ذهب: ههههه خطيه. ما الومه اني هم مااحب اسراء ههههه.
خالتي: لج انت هاي اسراء العدج شسمه زوجها؟

ذهب: ماادري. يمكن مهند اسمه!؟
خالتي: يااا، يمكن هو! لتكولين.
ذهب: عزا العزاج وهيبة. لتكولين خالة!
غير انجلط.
خالتي: خاف صدك يطلع هو؟ لتحجين لاي احد خاف ميدرون. خاف محد يدري وبعدين اتطيح براسج.
ذهب: لا لا لا شلي علاقة واحجي يطبها حمس. بس مااريدها تطلك وترجع على كلبي.
خالتي: ان شاءالله مو هو ان شاءالله مو هو.
رجعت للبيت واني افكر معقولة هذا زوج اسراء؟
اخاف مو هو؟
زين احجي لماجد لو اغلس؟

اخاف احجيله ويروح يحجي لنجلاء وعمه حميدة واكيد عمه حميدة راح تحجي لان مهما كان هاي بت اخوها متقبل زوجها يتزوج عليها.
بقيت محتارة شسوي ماادري؟
.
طير گد ما لله حد
وين تلگالك سما بگد روحي؟

رواية صبرا يا قلبي الجزء الثاني للكاتبة روز الفياض الفصل الثالث عشر

آحب آلتملگ وآنت گل مآ آملگ.؟
.
حاولت اشغل نفسي عن التفكير باسراء وزوجها مااريد استبق الاحداث يجوز يطلع مو هو ليش احجي واصير بوجه المدفع.
نجلاء وفراس اتصالحوا ورجعوا للسويد بعدما اتحسن وضعهم شوية وعمة حميدة سوتلهم خلطات مال تربة الامام الحسين عليه السلام ومي مقري عليه قران وكلتلهم يشربون منه ويسبحون بي ووصتهم يقرون سورة البقرة يومية واشترتلهم حرمل عبالك ماكو حرمل بس بالعراق؟

وكلما تتصل نجلاء احسها حزينة بس احسن من قبل تكول اكو فرق بس بطيء.
بهالاثناء العلوية جانت مستمرة بحربها ضدي وضد ماجد وعلى كولت ماجد: الظاهر علكتها هي وخالتي يمكن صحيح كلامج مال ذيج المره.
ذهب: ياكلام؟
ماجد: مال يردن يطلكن اسراء حتى ارجعها.
جنت امشط كبال المرايه درت عليه باوعتله بنص عين كتله: وانت شتكول؟
هو جان يباوع بالموبايل: بشنو؟
ذهب: تريد ترجعها؟

وخر الموبايل باوعلي وبعدين طكها ضحكه: اي ليش لا هههههههه شبيه مخبل. مرايد روحي ماعندي كرامة ههههه لج هو اني قبل كوه قبلت بيها مو بعد هسه.
شمرت المشط كتله بعصبية: يعني مو علمودي؟
ماجد: شنو؟
ذهب: متقبل ترجعها مو علمودي؟ مو علمود متزوج وعندك مره وجهال؟ لاااا لان معاجبتك..
ماجد: شبيج صخنتي؟ شنو مو علمودي شنو متزوج وعندي جهال؟ لعد علمود منو؟

ذهب: لا لااا لتحاول تصلح الموقف وتغير الكلام. معجابتك جان رجعتها لو عاجبتك. يعني باجر عكبه لو حلت بعينك وعجبتك ترجعها ماكو مشكلة.
ماجد: لا بالله انت مو صاحية. تعاي خل اشوفج خاف صخنتي صدك تره وضعج صاير مينسكت عليه ابد ههههههه.
ذهب: لتضحك. اني يحترك كلبي بسبب برودك وردودك وانت تضحك.
ماجد: لعد شسوي اذا انت مخبله اتخبل مثلج قابل.
ذهب: ليش مخبله مو هذا حجيك.
هم باجر تعجبك وحده مو الا سراوي خانم وتتزوجها.

ضحك: الله يسمع منج.
شلت المنشفه من جتفي وشمرتها عليه.
بقى يضحك وكل شوية وكلي: غرتي علي؟ الله عليج غرتي؟
ههههههههههه والله مخبله ادري هم كون تغارين من وحده تسوه.
ذهب: شدعوه انتو تدورون وحده تسوه دومكم عدكم نسوان تنحسدون عليها وتركضون وره الماتسوه.
ماجد: اه! اليوم شاده حيلج! شسامعه؟
ذهب: ماسامعه الحمدلله لو سامعة جان عدمتك وانت بمكانك.
رجع يضحك.

لبست قميص نوم احمر وخليت عطر واجيت اتمددت وانطيته ظهري واتغطيت.
ماجد: عود هاي شنو معناها؟
ذهب: شنو؟
ماجد: هاي الحركات؟
ذهب: ياحركات؟
ماجد: كشختي واتعطرتي ونمتي واتغطيتي؟ المن كشختي للمخده مثلا مادام انطيتيني ظهرج؟
عدلت شعري بدلع كتله: لنفسي..
باوعلي: علينه!؟
ذهب: والله هذا الموجود.
سحبني من ايدي: دتعالي هنا، شنو هذا الموجود بكيفج. تتمسكنن لحدما تتمكنن وبعدين تظلن تدلعن وتتعزز علينه؟

ذهب: شكو بيها ركضوا ورانه شويه مثلما تركضون وره غيرنه.
ماجد: والله العظيم عدج شي اعرفج لتكولين ماكو شي هذا الحجي جديد عليج شكو؟ شسامعة؟
ذهب: مسامعه شي بس افكر بنجلاء وفراس ولو انت مقصرت كبل ويه شيمائو.
ماجد: مقصرت؟
ذهب: امم.
ماجد: ولا راح اقصر وياج؟‍؟‍؟‍؟‍؟‍؟‍؟‍؟‍؟‍؟
ذهب: اكعد اكعد لتغير الموضوع شبيها خالتي؟
رفع راسه باوعلي: بعدين هسه وكته؟
ذهب: اي كلي شبيها؟

سكتت وصفن شويه بعدين ضحك.
ذهب: شبيك؟
ماجد: موال جديد.
ذهب: شنو؟
ماجد: مراح يعجبج.
ذهب: اي غير اعرف شنو؟
رجع سكت وبقى مبتسم بس ابتسامته مو من كلبه كانما يريد يخفف او يستخف بالموضوع كدامي حتى لااضوج وازعل.
ذهب: احجي لاتحاول تجمل وتخفف من الموضوع احجي لان اول وتالي راح يوكع على راسي واعرفه.
ماجد: شيوكع على راسج شبيج هيجي ماعندج تفاهم صايرة؟
ذهب: ميحتاجلها تفاهم كول وفضها.
رجع سكت.

اتنهدت حيل وضجت وخرت ايده كتله: تحجي لو اروح انام احسنلي وانت كمل صفنتك؟
ماجد: امي تريد تشوفلي مره.
فكيت حلكي كتله: شنو؟ شنوو؟ شنووو؟ شنوووووو؟
ضحك.
ماجد: البارحة تكلي خومتبقى على ذولي الجهال بس قابل شكد عمرك المثلك عده خمسه سته وانت بس تلاثه وبعد مرتك متخلف. ههههههههههه.
حسيت انكسر واهسي لاكدرت ارد ولاكدرت اضحك مثله راسا دمعت عيوني.
ماجد: شبيج بجيتي شنو شفتيني سمعت حجيها ورحت اتزوج صدك؟

درت وجهي وظلت دموعي تصب.
الف فكرة اجت براسي بلحظة وحده. ،
هسه هو يكول عندي جهال بس يجوز باجر يريد جهال بعد شلون احمل واجيب بعد واني ممنوع علي الحمل؟
يجوز باجر يلكاه خوش حجه وعذر حتى يعترف على وحده ثانية ويتزوجها بحجة اريد بعد جهال وانت متكدرين بعد..
يجوز امه باجر تسويلها لعبة وخطه وتسوي نفسها مواته حتى يقبل او يفكر بموضوع الزواج حتى لو مو بالوقت الحالي بس المهم تزوع الفكره براسه.

ويجوز خالته تسطره بسحر معدل وتخليه يرجع بتها بحجة الجهال واني على كولت المصريين اطلع من المولد بلا حمص.
افلس من بيتي وزوجي وماعندي شي اكدر اسويه..
ماجد: صدك جذب؟ مو كتلج مراح يعجبج الحجي مقبلتي الا تعرفين. ارتاحيتي هسه؟
مديت ايدي عالكلينكس وره لزم ايدي وسحبني بحضنه وباس خدي: انت مخبلة تدرين؟
بجيت حيل هو ضحك.

ماجد: هههههههههه هاي شلون ورطه لج بابا شبيج اتخلبتي بهالليل هسه حتى لو اريد اتخبل واتزوج هم بطلت بعد هالاكشن والبجي هههههههههههههههههه والله انت فلم.
ذهب: اني جنت متوقعة هذا الشي راح يصير بس جنت اجذب نفسي. واحاول ابعد هالافكار من راسي واكول يحبني. متوقعت هاليوم بسرعه هيجي يجي؟
ماجد: ههههههههههههههه؟
همزين من طلعتي متوقعه؟ بس المشكلة اني مجنت متوقع اصلاً؟

استمر يضحك واني ابجي لحدما تعب: شكد احبج من تتخبلين؟
ذهب: اضحك اضحك وخليني هيج محترك كلبي حتى ظليت افكر شلون انتقم منك اذا سويتها واتزوجت علي.
ماجد: اهههههههههههههه يايابه؟وصلت للانتقام؟
ذهب: فكرت يجوز اخنك بس مااكدرلك انت اقوى مني فكرت اذبحك بس كلت اني ادوخ من اشوف الدم فكرت انتلك بالكهرباء بس مكدرت اتحمل افكر بيك تتألم اريد طريقة انتقم منك بس متحس كون بيها؟

ماجد: والله كلبي راح يوكف من الضحك خرببليسج؟
بقى يضحك ويسكت شوية كوه ويرجع ينفجر من الضحك لحدما هدأ شوية مد ايده مسح عيوني وهو مبتسم كوه لان حاصرته الضحكة: اهون عليج يعني تنتقمين مني وتموتيني وتيتمين جهالي؟
ذهب: مثلما ما اني هنت عليك واتزوجت علي ونسيت العشرة.
بعدين من تموت عالاقل اكول الله يرحمه بدل مااكول حسبي الله عليه.
ماجد: هههههههههههههههههههه لهدرجة يعني؟

مزوجتني بخيالج ومنتهي الموضوع؟ المن لعد هالبجي مادام الموضوع انت متقبلته ومخططه لجريمة قتل انتقام مع سبق الاصرار والترصد وتبجين صارلج ساعة المن؟
ذهب: ماعدكم احساس متفكرون مثلنه لان متحبون مثلنه.
ماجد: وبعد؟
ذهب: بعد شنو؟
ماجد: الليله هاي شبيها من بلاوي بعد؟ اكو اكشن ثاني وانتقام وقتل لو نحول عالرومانسي؟
ذهب: اي غير الموضوع غير.
ماجد: ياالله؟
ذهب: وخر كسرت واهسي.
ماجد: ها شنو وخر غير كلتي غير الموضوع؟

ضحكت: اقصد الموضوع مال الزواج مو افلامك.
ماجد: اني غيرت كل شي وماكو شي ممكن يخليني اتراجع هسه لو يموت الميت؟‍؟‍؟‍؟‍؟‍؟‍؟‍؟‍؟‍؟‍؟‍؟‍؟‍؟‍؟‍؟‍؟‍؟‍؟
الموضوع ماجان موضوع حجت بي العلوية وانتهى.
لاا جان فعلا هذا هدفها وسمعتها اكثر من مره تحجي وياه بهالموضوع.
واكثر من مره ترزلها عمة حميدة من تسمعها تحجي هيج.

وبيوم ماجد جان عنده سفرة لتركيا يجيب مواد.
طيارته جانت الساعة عشرة الصبح.
كعدنه كل احنه واتريكنه بعدين دخل يسبح وطلع جنت اني ارتب جنطته.
حضني كلي: حبيبي شتريد اجيبلك وياي؟
درت عليه حضنته: انت؟‍؟‍؟‍؟
ماجد: اويلي يابه. شنو هالحب هذا اليوم.
ذهب: هههه دروح اللبس حتى لاتتأخر.
ماجد: ميصير نتاخر نتنوس شوية قبل لا نروح؟‍؟‍؟‍؟
ذهب: ههههههههههه عفيه ونسه متخلص عندك.

ماجد: غير انت تتفطنين بالوقت الحرج. هسه شلون اروح واني هيج اشتعلت شعل.
ذهب: ههههه مشكلتك.
ماجد: شوية بس شوية؟‍؟‍؟‍؟‍؟‍؟‍؟‍؟‍؟‍؟
نزل ينتظر التكسي جوه وسلم على امه وعمه حميدة وكعد الجهال يمه.
ذهب: وشموسه؟ اشو معدت انت واولادك وعفتوها؟
ماجد: انطينياها هاي حبيبة ابوها.
انطيتهيا اخذها يبوس بخدودها واديها: شلون راح اكدر افاركها هاي الفصمه كلش اتعلقت بيها.

ذهب: خاف لان بنية باجر انت وولدك تستقوون عليها؟
ماجد: لح هاي هي ام البيت ام المال والحلال هي التأمر والتنهى بهالبيت بس تكبر باجر الا اخليها حتى تتزوج عن حب.
ذهب: ههههههههه خوش ديمقراطية هاي.
ماجد: خل تكبر وشوفي.
ذهب: نشوف باجر عكبة من تكبر اخاف بعدين حصره عليها تمد راسها من الباب؟
ماجد: والله بتي صاكه حقي مااخليها تمد راسها من الباب.
ذهب: هااا ههههه طلع الحجي بعدنه بس حجي واختلفنه.

ماجد: غير اغار عليه هذا الحلو. غيراخاف عليه من الحسد.
تعاي اني كم مره كتلج لاتخلين صورتها عالحالة؟
ذهب: ياصورة شوكت خليتها؟
ماجد: عالواتساب كتلج الف مره لتخلين صور الجهال لاينحسدون ليش متسمعين الكلام؟
ذهب: شوكت خليتها؟
ماجد: لعد منو مخليها امي؟
ذهب: شمدريني منو اتاكد قبل لاتحجي علي.
فتح تليفونه طلعت عمه حميدة مخليه صور الجهال عالحالة سكت.
ذهب: ها عيني اشوفك سكتت؟
ماجد: مااكدر احجي هههههه.

طلع للمطار بعدما ودعنه.
بعد ماطلع عمة حميدة كالت: عود ردت اوصيه يجيبلي علاج مناك لمفاصلي.
ذهب: عدج صورته؟
عمة حميدة: اي عدي ودتلي نجلاء الصورة عبالها اكو يمنه منه.
ذهب: دزيلياه واني ادزه اله هسه اني هم اريد اوصيه على كريم مال بشرة.
دزتلي الصورة ودزيتها لماجد.
اتصلت عليه حتى اكله دزيتلك صور بس ميجاوب عالتليفون.
معقولة بهالسرعة وصل للمطار؟
انتظرت نص ساعة ورجعت اتصلت مغلق.
كلت الظاهر ماكو شبكة يمه.

يالله من يوصل لو يفرغ يتصل اكيد.
مر الوقت والتهيت ويه الاولاد ونسيت.
وره تقريباً ساعتين اندك الباب واجه ابو جبار يركض لعمة حميدة: شرطة بالباب.
عمة حميدة: دخيلك يارب. شرطتيش؟ شعدنه؟
لبست عبايتها وطلعت تشوف شكو.
وره دقايق مسمعت الا الصريخ بره.
ذبيت شمس عالبنات وطلعت اركض بدون حجاب.
فتحت الباب.
عمة حميدة: دخلي، دخلللي، انطيني تليفوني بساع خل اخابر لعمج، ركضيييي..
ذهب: شكووو؟

عمة حميدة: جيبي التليفوون اكلج ركضييييي..
دخلت اركض للبيت ادور تليفونها ماادري من الخبصة وينه.
مااشوفه.
صاحت العلوية: شكو؟ شبيكم؟
ذهب: ماادري خالة. ماادري شرطة بالباب.
العلوية: اسم الله.
شيردون؟
ذهب: ماادري..
لكيت التليفون وطلعت لعمة حميدة اركض.
الشرطة واكفين واني وره الباب وعمة حميدة يمهم انطيتها التليفون ودكت على عمو ابو علي: ها خوية ابو علي. الحكنه. الحكنه.
ماجد انخطف.

اني هنا سمعت بس من الصدمة اتخشبت مديت راسي من وره الباب كتلها: منو انخطف؟
دارت علي باوعتلي مدت ايدها سدت الباب بوجهي لان الشرطة واكفين واني بدون حجاب.
ورجعت تحجي ويه اخوها: راح للمطار غير راح للمطار. منين طلعوله منين؟ ماادري. الحكنه خوية الحكنه بعد اختك الشرطة هنا بالباب.
بقوا واكفين بره واني متحنطه ماادري شسوي.
رجعت ركضت للبيت جوه ادور حجاب اخليه على راسي اريد افتهم شكو شصاير شنو ماجد انخطف؟!

لبست حجاب وردت اطلع وصاحت العلوية: شبيج تدخلين علينه تركضين وتطلعين تركضين؟ مو احجي وياج توه اشو تحكريني وتطلعين بدون متكولين خالتي تحاجيني خل اجاوبها بالاول!
احترك دمي منها كتلها: بطرانه انت خالة ياحكران ياحجي احنه بيا حال وانت تدورين مشاكل ابنج مخطوف وانت تفترين وراي.
عفتها وطلعت.
وكفت وره الباب اريد اسمع شكو شيحجون.
عمة حميدة: يعني ضربوه؟ ضربوا ابني وعافوا السايق؟ شلون عافوا السايق؟

الشرطي: ضربوهم اثنينهم حجية بس ابنج اخذوه وياهم والسايق بالمستشفى وهو خبر واطانه العنوان واجينه نبلغكم.
عمة حميدة: يمااااي يمه وليدي. وين ودوه؟ شيردون منه؟ منو همه؟ مشافهم السايق؟ ميعرفهم؟
الشرطة: بعده حجية بعده ممبين شي لازم نحقق بالقضية والسايق حالته صعبة مضروب براسه زين من عنده وحجه وكال على ابنكم، .
عمة حميدة: ياربي دخيلك. ، ياربي دخيلك.
اللهم اني لااسالك رد القضاء ولكن اسألك اللطف فيه.

اللهم اني لااسالك رد القضاء ولكن اسألك اللطف فيه.
شوية ووصل عمو ابو علي ووراه الولدوصارت هوسه بالباب واني مخلوسه محسيت حتى من طلعت العلوية وراي ووكفت يمي تسمع وتدك على رجلها..
ثواني وانكلب البيت وانترس ناس.
الرياجيل كلهم محد بقى منهم اللي راح ويه الشرطة للمركز واللي راحوا للمستشفى للسايق حتى يحجون وياه ويفتهمون اللي صار بالضبط.
اما النسوان فكلها بقت بالبيت وكلها تبجي وتدعي وتدك وتلطم.

واني من خوفي بقيت ساكتة محجيت ولاشي ولابجيت بس اخذت جهالي للغرفة وكعدت يمهم صافنة افكر معقولة ماجد انخطف؟
ليش انخطف؟
يردون فلوس؟
واذا انطيناهم الفلوس راح يتركوه؟
لو خاف ياخذون الفلوس وتالي ينقتل؟
وابقى ارمله؟
بحدي؟
بدون ماجد؟
شلون اربي جهالي؟
منو يربيهم وياي؟ منو الهم والي؟
شلون اذا سألوني عنه؟
شكللهم؟
شلون اكللهم ابوكم..
اسم الله
اسم الله.

الله لايكولها. من عمري على عمرك الله لايخليني منك. ولايحرمني من وجودك ودخلتك علي.
اموت غير اذا يصيرلك شي. اموت.
.
الحب سوف يضع روحك في النار.