رواية صبرا يا قلبي

رواية صبرا يا قلبي الجزء الثاني للكاتبة روز الفياض الفصل الثامن

محسيت بنفسي الا طرت..
وصلت للسما ومكان كله ضوه لدرجة كوه فتحت عيوني وفراغ ابيض ماكو لابشر ولاحشر ولا اي شي بس اني..
ظليت اتلفت ادور على احد اعرفه بس ماكو..
بقيت طافية بالجو الغريب هذا وشعور بالراحة عندي مو طبيعي مخايفة من شي ولاحاسة بشي بس صور جهالي كبال عيني..
دورت صحت حجيت محد جاوبني..
بعدين كعدت على شي ماادري شنو هو وشفت من بعيد واحد جاي باتجاهي..
فرحت وبس اقترب عرفتها بيبي الله يرحمها..

اجت سلمت علي وفرحانه بيه وسالتني: شلونج وشخبارج امج وابوج شلونهم؟ سلميلي عليهم.
كتلها: وين اسلملج عليهم بعد مااشوفهم اني اجيت هنا يمج.
كلتلي: لا لا هاي جية سريعة مااريدج تتأخرين ويظل بالهم عليج روحي روحي رجعي لايظل بالهم عليج..

بعدني مجاوبتها حسيت بنفسي نزلت من السما بسرعة مو طبيعية..
فتحت عيوني وبقيت ثواني اباوع ماادري اني وين ووين جنت وشصار ومنو هذا اليبجي ومخلي راسي بحضنه!

بعدين حسيت عبالك جان واحد ساد خشمي ماااتنفس وفجأة انفتح خشمي..
دخل الهوى لصدري بقوه مو طبيعية لدرجة شهكت حيل..
ماجد يبجي وياسمين وسارة يبجن..
ماجد: رجعت، رجعت، كعدت، الف الحمدلله والشكر، الف الحمدلله والشكر، الحمدلله، كعدتي.

ويبجي حيل..
يبوس بوجهي واني بس فاتحه عيوني..
دنك خله راسه على راسي وظل يبجي..
وره ماادري شكد كأنما رجعت لوعيي اتنهدت حيل وسالته: شصار؟ ليش تبجي؟ اني وين جنت؟
وهو يسألني: شتحسين؟ هاا شتحسين؟ اكو شي يوجعج؟ اكو شي يأذيج؟ كومي تكدرين تكومين؟
ذهب: لا
لا مابيه شي..
لا ماكو شي يأذيني..
رجع خله راسه على راسي ويبجي..
ردت اتحرك مخلاني..
ماجد: لتتحركين، اني اشيلج هسه..
رجع بجه..

اني من شفته هيج طاحت دموعي كتله: فهمني شبيك؟ ليش تبجي؟
اني متت؟ خالتي بيها شي؟
هو بجه حيل بعدين كلي: اني المتت..
دنك باس راسي وحاول يشيلني مقبلت: مابيه شي اني اكوم بس كوم وانطيني ايدك..
ماجد: لا لا متكومين، اني اشيلج، هسه نروح للمستشفى..
ذهب: ليش؟!
مابيه شي..
ماجد: لا، تردين انتظر يصير بيج شي..
كام وسحبني كمت وشالني..
ذهب: مابيه شي والله..
ماجد؟
بس كلي شصار؟

مجاوبني كبل اخذني للسيارة وراح جابلي حجاب وشحاطه وعباية..
ذهب: ماجد؟ بس جاوبني رد علي فهمني شصار؟
ماجد: مابيج شي، وكعتي..
لبسي حجابج والعباية عدل..
ذهب: والجهال منو يبقى يمهم؟ وخالتي؟
ماجد: هسه راح اتصل على امي حميدة تجي..
ذهب: اي ليش كل هذا؟
راح دخل للمطبخ اتصل على عمه حميدة واباوعله يحجي ويبجي..
من شفته هيجي خايف ومتأثر عرفت اللي شفته مو حلم..
عرفت نفسي وصلت للموت!
حسيت قشعر جسمي..

انقهرت عليه حيل من فكرت بالرعب اللي حس بي من شافني هيجي..
دمعت عيوني واني اشوفه جاي باتجاه السيارة بسرعة وعصبية ودموعه على خده ومرتبك..
فجأة انفتح الباب الخارجي ودخل ابو جبار ووياه بت جيرانة دكتورة جانت تجي مرات تضربني ابر من اتمرض لو تشكلي المغذي..

دخلت البنية مباشرة اجت علي قاستلي الضغط وباوعت بعيوني كلتله: مابيها شي، ضغطها احسن مني!
هو ساكت بس ابو جبار كللها: بوية طاحت على راسها مو بوية؟ وراسها انضرب وفقدت بعد لاحس ولانفس..
كلتله: الحمدلله كل شي مابيها، يجوز انخفض فجاة يجوز مماكله شي؟

باوعتلي وهي تسألني كتلها: مجوعانه..
كللها ماجد بصوت ناصي عبالك مراح اسمعه ميريدني اسمع: انكطع حتى النفس..
متتنفس..
البنية هم خافت كلتله: والله ماادري بس حتى لتظلون بقلق افضل تاخذها للمستشفى لان لازم فحوصات وتحاليل كاملة حتى نعرف ليش هيج صار ماله داعي تضييع الوقت بالسوالف افضل ترحون فوراً، واني راح ابدل واجي وراكم..

اتشكرنه منها وراحت لبيتهم وطلعنه اني وماجد للمستشفى بس وجهه مخطووف مابي لون ومرتبك بصورة مو طبيعية والسيارة تمشي بكل سرعتها لدرجة عبرنه على سيارة شرطة راًساً صاحوا عليه بالسماعة: ابو السيارة البي ام اطبك على جههه..
راد يغلس بس بعدين طبك واجو همه نزلوا علينه يخافون يتدنون عبالهم يمكن انتحاري مدري شنو..
بس ماجد كللهم: زوجتي مريضة مختنكة متكدر تتنفس لذلك طلعت بسرعة ماخذها للمستشفى..

من وصلنه للمستشفى لكينه البنية الدكتورة واصلة قبلنه ومنتظرتنه يم باب الطوارئ..
بس دخلنه اشرت للسستر جابولي سدية نمت عليها واخذوني كبل جوه للطوارىء لكيناها صايحة للدكتور ومنتظرنه جوه.

سالني: شصار وشحسيتي؟
ذهب: ماادري شصار، بس اني عندي دوخة ومرات ضغطي يهبط احنه عدنه وراثة بالعائلة هبوط الضغط مزمن، وعندي ذبحة صدرية قبل كم سنة، بس هالمرة مااري شصار مجانت دوخة عادية ولاهبوط عادي، حسيت اكو شي مو طبيعي هالمرة بس ماادري شنو هو بس بعدين صارت ظلمة و..

سكتت خفت اكمل وماجد يخاف بس الدكتور سألني: وشصار؟ صار عندج الم بكلبج يعني؟
ذهب: لا، اي صار عندي بس شوية يعني بس مو هذا السبب ولا هذا الخلاني وكعت..
الدكتور: السبب بشنو؟ حسيتي انت يعني بنفسج من وكعتي؟
ذهب: لاا محسيت بس بعدما ظلمت الدنيا فجأة حسيت اثنين شالوني واحد منا وواحد منا..

دمعت عيوني وخنكتني العبرة سكتت شوية وبعدين كتله: وطاروا بيه للسما..
ماجد بجه..
الدكتور والدكتورة ظلوا صافنين بوجهي..
بعدين الدكتور رجع فحصني وكلي: شصار من طاروا بيج السما؟
ذهب: وصلت لمكان غريب بس ضوه ابيض وماكو احد ولا اكواي شي بس بعدين اجت بيبي وكلتلي رجعي..
الدكتور: بيبيتج متوفية؟!
ذهب: من جنت طفله..
رجعوا صفنوا بوجهي وماجد طلع بره يبجي..

بعدين الدكتور دار عالدكتورة كللها: للمفراس هسه وبعدين نكمل الفحوصات.
طلع لماجد حجه وياه وراحوا..
دخل ماجد كعد يمي ولزم ايدي حيل كلي: لتخافين، ماكو شي، بس لازم نطمئن راح يسوولج مفراس وشوية تحاليل..
طاحت دموعي كتله: للسما صعدت وظلت عيوني عليكم..
رجع بجه كلي: اششش، مابيج شي، كل شي مابيج، كل شي مابيج، هذا تعب واجهاد، تعب واجهاد هذا، ارتاحي هسه ارتاحي لتفكرين..

دك تليفونه عمه حميدة طلع بره يحجي وياها اسمعها يطمنها ويكللها مفراس وتحاليل.
اجت السستر حتى تاخذني للمفراس هو سد التليفون ودخل يمي..
رجع دك تليفونه عمه ابو علي وعمته..
طمنهم وفهمت من كلامه جايين بالطريق..
طلعتني السستر من الغرفة عالسدية واجت وحده ثانية وياه حتى ياخذوني للمفراس..
ماجد يمشي بصفنه وكل شوية واحد يتصل من ولد عمه وبنات عمه..

من ردت ادخل لزم ايدي حيل ودنك باس كصتي: لتخافين ميخوف، شوية وتطلعين..
ذهب: اخاف اختنك..
ماجد: لا بس لتفكرين بهيج افكار، فكري بشي حلو..
فكري بشموسه..
ابتسم رغم عيونه مدمعه بس ميريد يخوفني..

سوولي مفراس لراسي وطلعوني.
و سوولي مفراس للرئة وطلعوني.
و رجعوا سوولي للقلب وطلعوني..
كلها طلعت نظيفة!
ماكو لا اورام ولاتخلطات ولا انسدادات ولا اي شي..
الدكتور اتعجب بعدين حولني لطبيب القلب..
بعدما سوولي تحاليل كاملة وكلها مابيهاشي..
ظل ماجد بقلق لان حامل بس خاف يحجي..
شفته يحجي ويه الدكتورة ويستفسر منها..
بهالاثناء اهل ماجد كلهم اجو للمستشفى..
ولد عمه وعمه وبنات عمه وازواجهن وضياء وعبدالله والبقية..

والتليفونات مبطلت..
خلوني بغرفة خاصة لان المستشفى اهلي ويمي بنات عمه خطية كاعدات ويقرن قران ويسبحن ويستغفرن..

تعبت لان مرت تقريباً ست ساعات كاملة..
نعست واريد انام بس اخاف انام..
دخل ماجد: شلونج؟
ذهب: الحمدلله
ماجد: تعبانه؟
ذهب: نعست، يصير انام؟
ماجد: والله ماادري، انتظري بس شوية هسه اشوف الدكتور واسأله، وخاف هسه الدكتور ابو القلبية يجي، خلصي من ابو القلبية ونامي براحتج..

اتنهدت حيل اتدنه يمي كلي بصوت ناصي: مخابرت لاهلج شكللهم؟ مااريد اخوفهم...
تردين اخابر عليهم اكللهم يجون؟
سكتت احتاريت مااريد اقلقهم واخوفهم، بس خفت خاف انام واموت بدون مااشوف امي وابوي..
هزيت راسي اي وكتله: اي، خل يجون، احسن..
هز راسه اي وطلع..
بعدين اخذني للدكتورة كلي: نتطمن عالبيبي نسويلها سونار..
خفت بس حاولت ماابين..
بعدين من سوتلي الدكتورة سونار بجيت كتلها: ميته؟

خلت السبيكر على بطني وسمعتني النبض وكالت: هذا كلبها سمعيه شلون يدك، الحمدلله كل شي طبيعي وكل مشكلة ماكو..
ضحكت ومسحت دموعي كتلها: مو يكولون متت ورجعت..
الدكتورة: مو شرط ماما، انت يجوز فقدتي الوعي شوية وضعف نبضج عبالهم اتوقف..
ذهب: الحمدلله.
الدكتورة: الحمدلله على سلامتج وسلامة الطفل..
طلعت لماجد ابتسمت ودمعت عيوني كتله: مابيها شي..
بجيت وهو بجه..
حضني اباب غرفة السونار وظل يبجي..
بعدين رجعت لغرفتي..

وره شوية غفيت غصباً عني غلبني النعاس ونمت..
محسيت الا وره ساعتين من دخلت السستر وماجد وياها كعدوني واخذوني على كرسي للدكتور ابو القلبية..
وهم سوالي فحص جهد وايكو وطلع ماكو شي.
كل شي طبيعي..
بس طلب من ماجد ابقى بالمستشفى تحت الملاحظة خاف تتكرر الحالة..
رجعوني للغرفة ونمت..
سمعت صوت امي وابوي يمي بس مكعدت كللش نعسانه وتعبانه حسيت نفسي.

كعدت نص الليل لكيت امي يمي نايمة خطية رحت للحمام ورجعت حست بيه كعدت مرعوبه كتلها: مابيه شي مابيه شي رحت الحمام واجيت..
ظلت تبجي ساعة كاملة..
اخر شي كلتلي: شصاير؟
اتعاركتوا انت وياه لو ضربج؟
ذهب: لا والله حشا، لااتعاركنه ولاضربني، مصار شي بس اتعارك هو والعلوية واني خفت من علا صوتهم وانخفض ضغطي يمكن ووكعت..

بقت ساكتة تباوعلي ممصدكة بعدين كالت: على شنو اتعاركوا؟
ذهب: حجه على اختها وبنات اختها وهي مقبلت، جانوا عدنه بيت عبدالله وعبدالله حجه على امه وخواته وماجد ايده وهي تعرفيها كله الا اختها وبنات اختها..
امي: الله ياخذهن، شنو احنه منخلص من هالسيرة المعفنه بس هي عدها بنات اخت؟
ذهب: احنه شعلينه ياماما، هو وياها يتحاسبون..
امي: مااكدر اصدكج، كلبي يكلي ضاربج.
ذهب: والله العظيم مضاربني، ولاحتى متعاركين..

امي: اتمنى، لان اذا طلع ضاربج هالمرة اجرج من شعرج واخذج وياي الا اخليه يحلم يشوف اظفرج بعد طول عمره..

سكتت مااريد تصير مشكلة..
بقيت كاعده للصبح طار النوم من عيني وهي بقت كاعده للفجر بعدين تعبت وغفت خطيه..
الصبح اجه ماجد هو وعمه حميدة وامي راحت للبيت تسبح وتجيبلي كم شغلة..
كعدت عمة حميدة يمي بس محجت ولاسألت اكيد ماجد حاجيلها..
ذهب: منو بقى يم الاولاد يمه؟
عمة حميدة: عهود بت عمج ابو علي اجت الصبح يمهم، لتفكرين بيهم كل احنه يمهم..
ارتاحي ونامي ولتفكرين بشي..
ذهب: مابيه شي يمه الحمدلله حتى الم ماعندي.

عمة حميدة: اخخخخ، ياحظج وحظه، الله يجازي الجان السبب، هذا الولد خلص حياته متعوب راح يموتنه، راح يموتنه..
ذهب: اسم الله..
هزيت ايدها عمة حميدة وكالت: بعد ظل بيها اسم الله، الله يساعده همزين سوه العملية عالاقل جان البارحة انت وياه امددين من قهر سليمة واختها، شحجي حتى مااكدر ادعي عليهن، مااكدر ادعي..
لو عمج الله يرحمه بعده موجود جان طيح حظهن..
ذهب: حسبي الله ونعم الوكيل..

عمة حميدة: حسبي الله عليهن الى مالا نهاية، شذنبه هذا الولد من البارحة لانايم لامرتاح لاماكل لكمة؟ شذنبه؟ هسه يطيح من طوله هسه..
بجى عليج بجي..
دمعت عيوني كتلها: مابيه شي، والله مابيه شي..
عمة حميدة: عكبيش، غير نشف دمه البارحة وراد يموت، مابيج شي هسه بس امس؟ امس شصار بيج؟ سودنتينه البيت كله كاعد للصبح وياه، كل احنه كاعدين، ندعي ونسبح ونستغفر ونقرا قران بس كون ميطلع بيج شي، بس كون ميطلع..

ذهب: زين هو وين هسه؟ خل يروح للبيت ينام ويرتاح كليله يمه يروح..
عمة حميدة: هو يقبل، ملوا منه الولد كلوله احنه بمكانك نبقى وانت ارجع نام وغسل وارتاح وتعال العصر بس ميقبل، يخاف عليج، خاف يصيرلج شي وهو هناك بالبيت..
ذهب: ميصيرلي شي مابيه شي الحمدلله كل الفحوصات والتحاليل مابيها شي..
عمة حميدة: ان شاءالله مابيج شي يمه اسم الله عليج، بعدج زغيره شنو شفتي من عمرج..

كامت عمة حميدة طلعت تشوف ماجد وين ورجعت مالكته..
وره شوية اجه جايبلنه فاكهة وحليب وبساكت..
دخل خلاهم بالكاع واجه باسني: شلونج اليوم؟
ابتسمتله: زينة الحمدلله، مابيه شي..
كعد يمي عالجرباية ولزم ايدي حيل وظل صافن بوجهي ضحكت على كيف: مابيه شي والله العظيم، اصلاً ماكو شي يأذيني..
ماجد: ميخالف، الدكتور كال حتى نطمئن لازم تبقين كم يوم لحدما نتأكد ماكو اي يشكل خطوره..

ذهب: لا عفيه مااكدر ابقى هنا هواي، مااكدر اتخبل، واولادي مااكدر اعوفهم كلبي يرف عليهم مااتحمل.
ماجد: ميخالف حبيبي اتحملي شوية لخاطرهم..
اصلاً اني رحت مساع للدكتور كتله يكتبلج اقامة بالمستشفى شهر..
ذهب: لا ماجد لاااا، شهر شنو لاعفيه لاتتشاقا هيجي خلص عمري بالمستشفيات شهر شنو غير اموت..
ماجد: هسه ارتاحي ارتاحي لاتفكرين هذا الشي لمصلحتج..
ذهب: تتشاقه والله؟
ماجد: موتيني البارحة...

لزمت ايده حيل ودمعت عيوني..
عمة حميدة كالت: مابيها شي غدا شرها ان شاءالله، ان شاءالله بالعدو يايمه ولا بيكم..
اتحسر هو كللها: اخ يالعدو..
عمة حميدة: ميخالف يمه، سلمهن بيد الله.
دار عليها هو بعصبية كللها: شسلم؟ اسلم امي؟ امي الحركت كلبي البارحة علمود اختها وبت اختها؟ امي الخلتني البارحة غصباً علي اعلي صوتي عليها واتخبل واطلع من طوري؟
عمة حميدة: الله يسامحها ويهديها شنكول بعد..

ماجد: ماتت البارحة، ماتت يمه تكول وصلت للسما ورجعت، لومراجعة شلون بيه؟
بجت عمه حميدة كللها: شلون بجهالي منو الهم لو امهم مراجعة؟
ذهب: اذكر الله، لتظل تفكر هيج هذا التفكير يدمر صحتك، شي صار وراح الحمدلله، لتفكر بي عفيه، مو زين عليك ولاحتى علي اذا اشوفك هيجي مقهور اني انقهر واتعب..

بقى ساكت..
وره كم يوم عرفت من عمة حميدة العلوية رايحة زعلانه عد اختها..
وصايرة مشاكل هواي لان الكل عارف باللي صاير والكل لايمها..
وماجد طلع فعلاً حاجزلي الغرفة لمدة شهر..
شهر بس شطوله جان، كلها تعبت وياي، اهلي واهله ولد عمه مقصروا ابد ولازوجاتهم ولابنات عمه يومية وحده تجي..
الى ان خلص الشهر روحي طلعت..
رغم ماعندي كل مشكلة او الم بس ماجد جان كلش خايف..

من طلعوني للبيت لكيت عمو ابو علي خطية جايب ذبيحة وبنات عمه موجودات بالبيت استقبلني بالجوكليت والهلاهل..
خجلت منهم شكد تعبتهم..
اول يوم بالليل صعدت انام وصعد ماجد وراي بعدما نزل الجهال يم امي وعمه حميدة..
تمددت على جربايتي وغمضت عيوني اريد ارتاح بفراشي..
دخل ماجد شافني مغمضه راساً صاح: هاي شنو؟
فتحت عيوني كتله: شنو؟
غمض عيونه كلي: وكفتي كلبي عبالي ماادري شبيج، شفتج مغمضه.
ضحكت كتله: بعد مااغمض..

اجه نام يمه وحضني حيل..
ماجد: من شفتج وكعتي ومتردين ولاتتجاوبين ولابيج نفس، عبالي كابوس..
ظليت اصيح عالبنات كعدوها، كعدوها..
بست خده: الله لايخليني منك..
ماجد: ولامنج، هذا البيت ميسوى بدونج..
ذهب: يابعد عمري، واني بدونك شسوه..
باس خدي وبعدين شفتي كلي: اكتشفت نفسي احبج تصدكين؟
ضحكت حيل: بعد وكت.
ضحك..
ذهب: عفيه بعد مااريد مستشفيات لعبت نفسي..
ماجد: ان شاءالله ماكو، غير علمود نتطمن عليج..
ذهب: تعبت..

ماجد: كل احنه تعبنه، بس بعد شنسوي للضرورة احكام..
نعسانه؟
ذهب: يعني، اذا نعسان نام انت اريد انزل اشوف الجهال اذا نايمين..
ماجد: لا خليهم ماعليهم شي نايمين وعين الله عليهم..
نوميني اني..
ضحكت كتله: الوليلك يعني؟
ماجد: شكو بيها، بس بالاول اريد نتنوس..

ضحكت حيل: مو على اساس تعبانه وخايف علي؟
ماجد: صحيح بس اريد انوسج.
ذهب: هههههههههههههههههه..
بسته كتله: الله لايحرمني منك.
ماجد: تره هاي ماتنوس..
اريد هيج؟‍؟‍؟‍؟

بقيت بالبيت فترة مااطلع ابد ماجد ميقبل بس كل كم يوم ياخذني بالسيارة فره سريعة بالشوراع وعالكورنيش ويرجعني.
العلوية بقت عد اختها ماجد مراح شافها ولا رجعها بس يتصل على ولد عمه يسال عليها..
واني مالي خلك احجي مااريده يصير عصبي..
وره ايام جان عندي مراجعة عند الدكتور وكتبلي لازم ادخل مستشفى لحدما ادخل بالشهر السابع..
لان مرات يصير عندي خفقان سريع بدون سبب..
كلش ضجت واكتئبت..
مااكدر ابقى هلكد بالمستشفى..

بس بعد مجبورة هم الطفلة ميها قليل وهم كلبي..
رجعت للمستشفى..
وخلال الفترة اللي اني بيها بالمستشفى عرفت العلوية راجعة للبيت بس متحجي ويه ماجد..
نسرين زوجة ضياء صديق ماجد حجتلي، ماجد مكال اي شي..
جنت اشوفه ضايج ومهموم وكلش انقهر عليه..
ادري بي ميتحمل زعلها بس مقهور منها..
الى ان قررت احجي وياه: شخبار خالتي حجيت وياها؟
باوعلي ودار وجهه وبقى ساكت..
ذهب: لشوكت؟

انت متكدر متحجي وياها، وحتى لو هي غلطانه تره حرام عليك وخاف ينحسب عليك ذنب، حتى لو بعدك مقهور سوي اللي يرضي ضميرك حتى لاتتندم بعدين..

اتحسر..
ماجد: قهرتني، حيل قهرتني..
ذهب: حبيبي هاي امك، اذا هي تهون عليك انت تبقى ابنها ومتهون عليها..
ماجد: الصار بالعكس، هنت عليها هواي بس متهون علي..
انت متدرين اني شجنت اسويلها اول فترة من وكعت..
جان ابوي عدل بعده بس مااخليه يخدمها لان هو هم تعبان، جنت حتى سباحة اسبحها، وامشط شعرها واغسل ملابسها بيدي..

ذهب: هذا واجبك، وكله الك حبيبي كله الك بميزان حسناتك ان شاءالله كله ربك مسجله الج من تكبر ان شاءالله يرجعه الك باولادك يشيلوك مثل مشلتها..
كل الناس تعرفك شكد مداريها متشوفهم كلهم وكفوا وياك، بس انت اتعوذ من الشيطان واضغط على نفسك وصالحها، ادري بيك صعبه عليك بس والله زعلها عند الله جبير واني مااريدك تندم بعدين..

باس ايدي..
ماجد: انقهر اكثر من توصيني عليها..

ذهب: اني مو ملاك ولا اريد ارسم لنفسي صورة ملاك كدامك وجذابه لو كتلك من اتذكر الحجي السمعته ماانقهر وجذابة لو كتلك كلبي مشايل شي عليها، بس هذا كله يهون ولااشوفك يوم متندم لان متحجي وياها مااريد يجي يوم واشيل ذنبها لو اشوف نظزة لوم بعيونك تكول انتِ السبب، اني لو امي بمكانها جان اتمنيتك تكلي نفس الحجي، مرات اتخيل نفسي بمكانها ورائد وفضل ميحجون وياي والله كلبي ينمرد وهمه اطفال، شلون وانت رجال وبس انت عدها وجنت متفاركها مو جنت حتى اكل توكلها بيدك؟

اتعوذ من الشيطان وحاول تتصرف طبيعي واكعد يمها حتى لو ساكت بس حرام تخليها بغرفتها وحدها..

حضني..
بعدين خله ايده على بطني: شلونها بتي؟
ذهب: تزهو هههه، تتحرك بس اقل من الشباب.
ماجد: فدوه لعمرها..

انا هشٌ تمامًا أمامها
لِدرجة عندما تَرمش بِعيّنْيّها أمامي
يتفطر قلبي؟

رواية صبرا يا قلبي الجزء الثاني للكاتبة روز الفياض الفصل التاسع

بقيت بالمستشفى لحدما الشهر السابع.
خلال هالمدة كلها ماجد جان ميحجيلي اي شي عن وضع البيت حتى ميضوجني الى ان طلعت من المستشفى.
طلعت من المستشفى حتى اروح اولد لان لازم الولادة بالسابع وماجد اصر نروح لتركيا.
من طلعت من المستشفى للبيت بقينه تقريباً اسبوعين قبل منسافر لتركيا. رتبنة امورنه ونظمنه وضعنه لان ماجد مقبل ناخذ الاولاد ويانه كال يتبهذلون واحنه نتعب.

جنت اتحاشه العلوية رغم بقيت بالغرفة الجوه بس من اسمع صوتها بره مااطلع.
مالي خلك نكد ومشاكل امي جانت تجي مرات يمي حتى تساعدنه بالجهال بس جنت بداخلي مااريدها تجي بعد الحجي السمعته كايلته العلوية على اهلي بس مااكدر احجي شي.
لاحظت ماجد ميكعد يم امه. ضجت. سألت عمه حميدة: اكلج يمه شنو ماجد بعده ميحجي ويه خالتي؟
عمة حميدة: لا. هي متحجي وياه.
ذهب: ليش؟ شصاير بعد؟

عمة حميدة: مصاير شي بس هي من ذيج المرة بقت على زعلتها. حجه وياها راد ميفيد. فوكاها بعد هي ام الراهي.
اتنهدت وانقهرت على ماجد.
ذهب: والله ماادري. امرها غريب.
عمة حميدة: ماغريب الا الشيطان. حتى وياي متحجي لان حجيت عليها وكتلها ابنج وحيدج شتردين منه ليش تأذينه؟ مو بس هذا بقالج لتخلينه يهج منج ويكرهج. تكلي انت تتلوكين لمرته!
ضحكت: تتلوكين لمرته؟ وشعدها مرته وتتلوكيلها؟ هذا شلون حجي؟

عمة حميدة: بعد هذا حجيها. المرة مو طبيعية اظنها..
ذهب: شنو؟
عمة حميدة: مسگية.
ذهب: يعني شنو مسگية؟
عمة حميدة: مشربيها شي. عمل.
بقيت صافنه بوجها مفهمت كالت بعصبية: سحر ولج سحر الا نكول هيج!
ذهب: يااا. هاا. شمدريني. بس معقولة يعني اختها تسويلها؟ اخت تسوي لاختها ممعقولة!
عمة حميدة: لا ليش ممعقولة كلش معقولة. واذا مطلعت مسگية تعاي عاتبيني.

قشعر جسمي كتلها: اسم الله. الله يكيفنه الشر. هاي شلون سالفة؟ يعني احنه يومية نفس السوالف والاحداث تنعاد علينه؟ لشوكت؟
عمة حميدة: والله ماادري. لحدما ربج يحلها من يمه.
ذهب: ونعم بالله.
بالليل من رجع ماجد كعدنه نتعشه كال: امي اتعشت؟
عمة حميدة: اي اتعشت.
بعد العشا اخذلها هو الجاي خلاه يمها ورجع كعد بالهول اباوعله صافن عالتلفزيون بس مبين عليه ضايج.
كعدت بصفة كتله: النت اليوم ميشتغل.
ماجد: ليش؟

ذهب: ماادري يمكن مخلص الاشتراك.
ماجد: هسه اخابر الولد يفعله.
سكت.
لزمت ايده كتله: ليش ضايج؟
ماجد: ماكو شي.
ذهب: علمود خالتي؟
بقى ساكت بعدين اتحسر وكلي: زعلت لان اتعاركت ويه خالتي.
ذهب: اتعاركت؟ شوكت؟ ليش؟
ماجد: من جنتي بالمستشفى. اجيت مره لكيتها هنا وعاتبتها.
ذهب: اي؟
ماجد: اي. سوت نفسها مظلومة. وسمعتها التسجيلات تكلي انت مسحور.
ذهب: هههههه هسه انت المسحور. واكيد اني الساحرتلك؟
ماجد: اكيد.

وامي تكول تتجسسون علي انت ومرتك تسجلون اتصالاتي.
هو منو مخليه هذا البرنامج مال تسجيل المكالمات بتليفونها؟
ذهب: اني.
باوعلي كلي: ليش؟
ذهب: ماادري. مااتذكر بوقتها شنو سمعتها تحجي ويه خالتك وكلت خل انزله.
خزرني كلي: مو عيب؟
ذهب: عيب. بس عيب عليهن هن باللي يسونه. هن بدن.
سكت شوية وبعدين كال: بعد لتعيديها.
بقيت ساكتة لان ضجت.
وره شوية سألته: شصار على اسراء؟
ماجد: شبيها؟
ذهب: رجعت لو بعدها؟
ماجد: رجعها عبد الله.

ذهب: الحمدلله.
ضحك وغمزلي.
ماجد: تخافي علي منها؟
ذهب: لاحبيبي اخاف منك ومنها.
ماجد: ههههه واني شبيه عايف بنات امة محمد كلها وراجع لهاي العوبة ههههه. سدج امين لااسراء ولاغيرها. السيد ميعجبه اي شي ولا اي وحده.
باوعتله بطرف عيني كتله: اتمنى اصدك.
رجع ضحك كال: اليسمعج يكول يومية لازمتني ويه وحده؟
ذهب: اني لو الزمك يمكن ارتاح ولا هالقلق والتفكير.
ماجد: ماكو ثقة يعني؟
ذهب: الثقة الزايدة مو زينة حبي.

ماجد: هم صحيح.
زين بمناسبة الثقة الزايدة شرايج نخلي فضولي عد اهلج من نسافر ويبقى رائد يم امي حميدة والبنات؟ حتى لاينشلع كلب امج يومية رايحة وراجعة تشوفهم؟ شتكولين مو احسن؟
ذهب: اي طبعاً احسن خوش فكرة بس كلبي راح يظل يمهم.
ماجد: احسنلهم يبقون هنا كلهم يمهم هناك اذا اخذناهم راح نحتار بيهم. او بالاحرى اني راح احتار بيهم لان انتِ متكدرين تتحركين وراهم.
ذهب: هواي افاركهم.

ماجد: يعني اني مراح افاركهم؟ تره هم اولادي واني ابوهم.
ذهب: اي بس الاب مو مثل الام.
ماجد: لا بالله! ليش يابه ميحب اولاده لو مقصر وياهم؟
ذهب: لا بس مو مثل الام. الام غير.
ماجد: اي زايدة ايد.
ذهب: لا زايدة حنان. غير هي التحمل وتجيب وتتعب وتسهر وتربي.
ماجد: نعرف نعرف.
كملنه اجراءات السفر وكل امورنه وقبل السفر بيوم اجتنه خالته!
عبالها اني بعدني بالمستشفى دخلت اتفاجأت من شافتني طلعت من الغرفة.

لكيتها كاعده يم العلوية وتبسبس على كيف وعمة حميدة ماكو.
غلست ماسلمت عليها.
رحت لغرفة عمة حميدة لكيتها تصلي كعدت يمها لحدما خلصت كتلها: عدنه خطار.
عمة حميدة: منو؟
فتحت الباب شافتها سلمت ورجعت: شوكت اجت؟
ذهب: ماادري.
عمة حميدة: خل اروح اكعد على كلبهن حتى ميلحكن يحجن شي.
ذهب: هههه روحي.
اتصلت نجلاء سولفنه شوية بعدين كالت: هاي مرجعت؟
ذهب: منو؟
نجلاء: سريوه؟
ذهب: مو رجعت؟ ماجد كال عبدالله مرجعها على اساس.

نجلاء: اه؟ شوكت؟ قبل يومين حجيت ويه عهود كالت راح يطلكوها.
ذهب: عزا العزاج وهيبة! يعني اخوج يريد يسكتني؟!
نجلاء: ياا. لا لا لا شبيج اكيد اكو غلط بعده ميدري بالمستجدات الجدت عالساحة.
ذهب: يامستجدات؟ يعني تبقى وراي اني هالسوسة لحدما اموت؟

نجلاء: دصبري شبيج كتلج ميدري وحتى لو يدري غير ميريد يضوجج ولو هو انت تره ماعندج سالفة على شنو تضوجين؟ انت شكو بيها؟ اتزوجت لو اتطلك يطبها حمس اني منج اتشمت واتمشت واتشمت.
ذهب: اخخخ شلون شكو بيها؟ هي هسه متزوجة ومفاكه ياخه من عدنه هي وامها مو انوب تطلك وترجع على كلبي تدور رجل.

نجلاء: يابة يطبها مرض شتريد تسوي يعني قابل راح يرجعها لو هو اصلا ميت عليها ويحبها ومنتظرها تطلك؟! شبيج انت خليهن يحلمن شوية ويخططن وبعدين يفلسن من الجهتين لامن رجلها ولا من ماجد وتشبع ندم وطيحان حظ لاعبالج ولدنه سهلين لو عدهم ديمقراطية وتفهم بهالسوالف سريوة اول بنية بالعائلة تطلك وشبعت كتل من طلكها لان فعلاً متستاهله وخسرت هواي من شافت نفسها عليه. ولان يعرفون كلش زين هو طلكها لان محبها ولاارتاح وياها ولان عدها قصور وياه محد حجه ولااحد زعل رغم ابوي جان مستحي من عمي بس عمي يعرف بته فسكت.

بس هسه هذا الثاني شنو حجتها؟ ماعدها كل حجه وظلت تألف جذب عالعالم وطلعتهم يسوولها سحر ولاكية اوراق محروكة بغرفتها وخرز مدري شنو جوه الثلاجة وافلام وقصص ماانزل الله بها من سلطان.
جانوا بالبداية همه يردوها ترجع والولد متمسك بيها بس هسه كايللهم لو تبقى بس هي مااريدها.

والولد يكولون اذا اتطلكت فهذا البيت تعتبره كبرها منا لحد متموت متطلع منه وبعد لازواج ولاغيره تنسى شي اسمه زواج حتى لو راد يرجعها بعدين مترجع.
ذهب: اوكفي نجلاء شوية.
نجلاء: شكو؟
ذهب: يمكن ارتفع ضعطي. خل اتمدد شوية لا اوكع. عزا العزاج وهيبة هاي منين طلعتلي؟ منين الله بلاني بيها؟
نجلاء: شبيج خليها تطلك وتشبع ذل وكتل خل يطيحون حظها ويدرسون بطنها لحدما تصير ادمية.
ذهب: متصير. متصير. اخ ياگرادة حظي.

نجلاء: ههههه شبي حظج عندج ابو رائد مشتريج بروحه سريوه شنو شايلتلها هم ومنكده على نفسج وعليه!
ذهب: حقج. حقج. مشايفة امج شلون صايره. وخالتج مكابلتنه وكاعده يومية جاية حتى تشحنها وتروح. هاي بعدها بتها على ذمة رجال وهيج لو اتطلكت راح تظل يومية جايبتها وجاية ومو بعيدة.
وسكتت.
نجلاء: مو بعيدة شنو؟
ذهب: مااريد احجي واضوجج. ادري بيها خالتج وبت خالتج بس من قهري احجي يمج ويجوز كلامي يضوجج وتستحين تردين علي.

نجلاء: خاب دطيري، خالتي وبت خالتي شنو غير هذا اخوي وهذا بيت اخوي! خالتي بيش الكيلو؟ خلاله بكلبها الخالة اللي تريد تأذي اخوي وتهجم بيته علمود بتها الحيوانة.
لو بيها خير جان علمت بتها ونصحتها مو تكللها جيبي هدومج وعوفيهم همه يبتلون بامهم انت شعليج بيهم. هاي خالتي اخت امي عشتوا اختها وتحرض بتها عليها! هاي هم احبها لو اضوج اذا احد حجه عليها؟! الا ماعندي احساس ولاكرامة.

لعلمج احنه تره ظلينه سنين منحجي وياها هي وبناتها لحد قبل زواجكم بسنة يمكن وهم علاقة ماجد بالولد نفسها مااتغيرت ولااتأثرت بس اني علاقتي بيهن صارت سطحية وحتى عمتي حميدة رغم هي عمتهن بس يضوجن منها لان متقبل على سوالفهن وبعدما اخذج ماجد وكعدت عدنه كلش كرهنها لان تدافعلج وتحجي عليهن.
ذهب: والله يانجلاء هاي القصة ماادري شلون راح تنتهي ونخلص منها بس اني هسه خايفة كلش خايفة.
نجلاء: من شنو؟

ذهب: اخاف يوزها الشيطان وتسوي شي لماجد وتكلبه علي مثل قبل.
نجلاء: مااتصور. لو يكدرن جان سون ليش بس لامي يسون؟
ذهب: قصدج خالتي مسحورة؟
نجلاء: اي طبعاً. قابل طبيعية امي؟ امي من اجيتكم اني لاحظتها مو طبيعية تصرفاتها ونظراتها حتى اني بتها متتحمل مني كلمة وتريد علي حجه حتى على ماجد روحها من الدنيا جان فجأة قلبت عليه هذا شنو؟ شيسموه؟ سحر اكيد هي يومية رايحه يمهن وتبقى ايام تشبع وتجي منفوخة علينه.

ذهب: سلاماً قولاً من ربٍ رحيم، اسم الله الرحمن. اسم الله.
نجلاء: حصني نفسج وحصني جهالج يومية حرمل وملح والرقية.
ذهب: زين ليش متسوي لماجد؟ هن هدفهن ماجد ليش بس خالتي؟
نجلاء: ولج السحر لازم اثر من الشخص وين يلكن اثر من ماجد.
ذهب: يعني شنو اثر؟
نجلاء: يعني مثلاً ملابس داخلية او شعر او شي.
ذهب: اسم الله. اللهم اسكنهم في مساكنهم.

نجلاء: او يخلونه بالاكل بالشرب هو مياكل او يشرب عدهم اذا يعرف هذا طبخهن بالبيت كل عزايمهم يجيبون جاهز او يجيبون طباخ لذلك ياكل بالعزايم بس بالايام العادية لاياكل ولايشرب هو مره كال بعدما سونله ذيج المرة واتخبل عليج وعلينه.
ذهب: والله ماادري احس نفسيتي تعبت وحتى عقلي تعب من التفكير.
نجلاء: خلي عينج بعين الله على كولت عمتج حميدة. لتخافين منهن انت الله سبحانه وتعالى وياج.

ذهب: ونعم بالله. الله يبعدهن عنه ويشغلهن عنه بامور ثانية ولاينطيهن مجال يلتفتن علينه ويفكرن بينه يارب.
الله يشغلهن بنفسهن ان شاءالله.
نجلاء: اكلج. اريد اسوي شفط.
ذهب: شفطيش شكد وزنج حتى تسوين شفط سوي رجيم افضل.
نجلاء: تعبت من الرجيم اريد اكل. واريد اضعف واريد كون مااحرم نفسي من شي.
ذهب: لا ربحنه.
نجلاء: حسي بيه تعبانه نفسيتي من السمن اريد اصير مثلج.

ذهب: زوجج عاجبه وزنج ليش تلعبين بنفسج تره الشفط مو شي سهل.
سكتت نجلاء شوية بعدين كالت: ذهوبة اكو شي اريد احجيلجياه انت اختي الزغيرة وماعندي احد احجيلة غيرج ولااحد اثق بي غيرج وانت صحيح اصغر مني بس انت فاهمة وعاقلة واريد رأيج.
ذهب: بشنو؟ كولي حبيبتي شبيج؟ شمضوجج؟
سكتت مدة وسمعتها تتحسر.
ذهب: نجلاء حبيبتي؟
نجلاء: فراس.
ذهب: شبي؟
نجلاء: لكيته يحجي ويه بنات عالفيس.

صفنت شوية لان مااعرف شجاوبها وماعندي تفاصيل فحاولت اخليها تهدأ كتلها بضحك: هي هاي وكعتي كلبي برجليه هههههه والله عبالي عندج موضوع خطير.
نجلاء: اشو تضحكين؟
ذهب: لان ماكو رجال بهالزمن الاغبر ميحجي ويه بنات عالفيس.
نجلاء: يعني انت لازمة ماجد؟
ذهب: اكثر من شيماء؟!

واعرف اكو بنات يراسلنه هن يراسلنه عالواتساب عالفيس بس اجذب عليج اذا اكلج لزمته هو يرد عليهن. ماادري اذا يرد لو لا يجوز يرد ويحذف بعدين بس ماكو رجال يقاوم هيج الحاح يومية وحده تراسله شكل لشوكت يقاوم يعني.
نجلاء: وعادي عندج؟

ذهب: لا مو عادي. بس اكو شي بالبشر كلما يكبر ويمر بمواقف وحوادث وقصص يتغير. تفكيره واحساسه ومشاعره كلها تتغير. هسه خل ناخذ ماجد كتلج البنات تراسله لو نفرض لكيته راد على وحده منهن وكلامه وياها عادي وطبيعي وكل شي مابي. راح اضوج وانقهر بس بالنهاية راح اسكت واكول الحمدلله لان كلامه مابي شي بس لو كلامه وياها كلام مو حلو وبي اشياء مو زينة راح اموت. وراح اكرهه. مااكدر اباوع بوجهه يمكن.

نجلاء: هو كلامه عادي. يعني هي البنية سويدية وهي داخلتله عالخاص هي البادية الكلام وياه وسائلته عن اسمه وعمره ومتزوج لو لا.
ذهب: يعني مثلما كتلج كلام عادي مابينهم شي يجوز شافت صورته وانعجبت بي عبالهم ممتزوج.
نجلاء: بس هو مغلس ممجاوبها اذا متزوج لو لا.
ذهب: وبعد؟
نجلاء: بس.
بس هاي مو اول مره الكاه مجاوب بنات وحاجي وياهن.

ذهب: عادي حبيبتي مو لهدرجة حتى الجواب تفسرينه مو خوش تفسير؟ الله يساعد كلبي شويمه دزتله صورها مصلخه وفوكاها من حجيت حصلتلي كف على عيني.
نجلاء: انت غير. انت المفروض لو شفتيه بعيونج ويه وحده بوضع مو زين هم متصدكين. تجذبين عيونج وتصدكيه هو.
ذهب: ايبااه. ليش عيني؟ شنو اخوج نبي لو ولي من اولياء الله الصالحين؟
نجلاء: لا حبي هذا سيد ماجد. متطلع منه العيبه.

ذهب: اممم وهذا ابن عمه سيد فراس هم متطلع منه العيبه.
نجلاء: ههههه مينكدرلج صايرة لوتيه.
اكلج نسيت اكلج.
ذهب: خير؟ شكو بعد؟
نجلاء: بما انه احنه نحجي بموضوع الخيانة والتحرش والنسوان والسحر فهذا يعتبر ضمن الموضوع.
ذهب: ياساتر.
نجلاء: مو شويمه مخطوبة.
ذهب: حلفي؟
نجلاء: ههههههه والله ههههه.
ذهب: الحمدلله خلصت من وحده. اخ ربي تنخطب وحده تطلك الثانية.

نجلاء: دسمعي سمعي. يكلج خاطبها واحد عقيد بالجيش مطلك وعنده بنية وولد بس عد امهم ومخليلها بيت بحدها يجنن ومشتريلها سيارة عيني.
ذهب: الله يرزقها بعد وبعد بس بعيد عني وعن زوجي.
هي هيج شكول الله ينطيها هيج حظ. تلكيه هسه ميت عليها.
نجلاء: ميت عليها. بس يكولون هي مقابله مموافقه بس اخوانها جابريها. لان هو يعرف واحد من اخوانها وشايفها.
ذهب: لا ان شاءالله الله يهديها وتحبه وتقبل وتقتنع كولي يارب.

خوش خبر هذا فرحتيني الله يشغلها بي ان شاءالله.
نجلاء: مو هو مو هنا الخبر.
ذهب: لعد وين؟
نجلاء: الخبر هو..
ذهب: شنو؟
نجلاء: الرجال يداوم يمكم.
ذهب: ايييي؟
نجلاء: اييي..
يكولون شارطه عليه يشتريلها بيت يمكم.
انعصر كلبي كتلها: ساعة السودة.
هو هذا حظي وراي وراي هالعصابة. اخلص من وحده تطلع الثانية. يردن يجتمعن سوه هنا حتى يخططن براحتهن شلون يخلصن من ذهب.
نجلاء: هن غير اتعاركن اخر من صارت اخر مشكلة بينكم؟

ذهب: عادي يتصالحن مدام بيها اذيتي. ليش هن من الاول مو كلكم تكولون وحده متحب الثانية بس اتحالفن وصارن صديقات حتى يأذني وبحياتي كلها مشايفة صلافة مثل هيج صلافة. تجيني لبيتي تكلي صاحبتي تريد تخرب بيتج وتشوفني اني وعمة حميدة ابيتهم تروح تخابر ماجد تكله عبالي جاي ويه عمه حميدة ومرتك وواكف بره كلت حتى توصلني بدال ما اخذ تكسي.

حقيرة. حتى بس يعرف اني ابيت اهل شيماء مو مهم هي تنكشف لو شيصير وياها المهم اني اتأذى. هيج بشر كل شي عدها استعداد تسوي.
نجلاء: يمعودة لاتظلين تفكرين بهاي السوالف القديمة وتقهرين نفسج تره تتمرضين وهن ماشاءالله وحدتهن صايرة ثور من الراحة وعدم الاحساس.
ذهب: قديمة بس تحفر بكلبي. مااكدر انساها سوالفهن.
بالليل كلت لماجد: تكول عبدالله رجع اسراء؟
باوعلي ودار وجهه وبقى ساكت.
ذهب: يعني جنت تريد تسكتني؟

ماجد: لا اسكتج ولا شي. احنه شكو بيها اتطلكت لو اتزوجت؟
ذهب: صدك تحجي؟
ماجد: والله.
ذهب: يعني هي متزوجة ومفاكه من عدنه ياخه انوب تطلك؟!
ماجد: خليها تغلط بعد غلطة وحده. عمي يذبحها.
ذهب: مشفت احد ذبحها قبل.
ماجد: وانت ليش خايفة هيج؟ يطبها وجع تتزوج لو تطلك لتشغلين نفسج بهالامور.
ذهب: شلون مااخاف. هاي سوتلك سحر اذا تتذكر قبل؟ وهسه خالتي على كولت نجلاء هم مو طبيعية اكيد مسويتلها شي.
ماجد: عوفج منها.

بتي شلونها؟
ذهب: ماادري. حالها حال امها.
ماجد: امها حلوه. يعني هي هم حلوه.
ذهب: ههههه اي اضحك على عقلي بهالكلمتين.
حسيته مو على بعضه.
ذهب: شبيك؟
هز راسه ماكو شي.
ذهب: شبيك؟
ماجد: مابيه. ماكو شي.
ذهب: لعد شبيك ضايج؟
ماجد: ماكو شي. دوخة الشغل. هذا المحاسب ممرتاحله. من اول يوم محبيته.
ذهب: ليش شسوه؟
ماجد: يسوي لنفسه فواتير جذب ويصرفها لنفسه. المشكلة ماكو دليل هو مسوي هيج بس اني متاكد من هالشي.
ذهب: شلون تأكدت؟

ماجد: كل الموظفين عدنه قديمين صارلهم سنين من ايام ابوي الله يرحمه وكلهم ثقة وكلهم شايفين خير الا هذا مدري منين اجانه صارله سبع شهور عدنه كل شهر عده فاتورة لو فاتورتين بذاك الحساب.
شافنه نستحي نفشله مصخها.
ذهب: مابيها شي حاجوه يجوز ميعرف قوانينكم.

ماجد: يعرف لان كل التفاصيل بالعقد مذكوره المصيبة اخر فاتورتين مسويها باسم واحد من الموظفين ومن سألته طلع ميعرف شي عن الفواتير يعني هذا يزور فواتير باسماء الموظفين واحنه ندفعها ويخليها يجيبه.
ذهب: ياا. شبيها الناس استخفت؟ نمونه هي فاتورة الطبيب لو فاتورة العلاج شكد نفسه دنية.

ماجد: ليش مو نمونه كل فاتورة ياخذله مية دولار اقل شي هي مصاريف الطبيب شوية كل شهر تطلعله ميتين دولار زايدة فوك الراتب من غير الله يعلم شنو يبوك بعد.
ذهب: استغفر الله. وهسه؟
ماجد: ماادري بعد الولد همه راح يتصرفون وياه كالوا باجر نحجي وياه ونكله الله وياك مالك رزق هنا بعد.
ذهب: خلص معناها لتضوج اعتبرها دفعة بله.
ماجد: مااحب احد يستغبيني.

ذهب: حشاك حبيبي هذا مريض اعتبره مريض لو صاحي ميقبلها يدخل على جهاله فلس حرام. فاتورة مرض هاي مو فاتورة طبيب بر عاقل ميسويها.
ثاني يوم سافرنه لتركيا.

رواية صبرا يا قلبي الجزء الثاني للكاتبة روز الفياض الفصل العاشر

إيّاكِ أن تُفارِقيني بعّدَ كُلِ هذا الحُبْ؟
.
سافرنه لتركيا.
من المطار للمستشفى.
بس وصلنه للمستشفى كبل سوولي فحوصات وتحاليل كاملة والحمدلله كلها طلعت طبيعية.
بعدما طلعت نتائج التحاليل دخلوني للعمليات.
هالمرة ابرة بالظهر يخافون ينطوني بنج كامل.
احس بكل حركة واسمع حجيهم بالتركي. ماافهم شي بس من ابتسامة الدكتور كل شوية افهم كلامه ديطمني ويهديني يتصورني خايفة.

بالحقيقة اني مجنت خايفة على كدما جنت مستحية وخجلانة ماادري ليش.
يمكن هذا الخجل فطري عدنه احنه العراقيات من يكون المعالج دكتور ( رجل ) مو دكتورة ( امرإة ).
مطولت العملية من اولها لاخرها ساعة.
بس احس من اتذكرها بضبابية. مو واضحة ذكرياتي عنها يمكن لان جنت متوترة. ،
بس اتذكر فرحة الدكتور من طلعها.
فزيت.
شفتها من طلعوها كلللش زغيره وملامحها مواضحة. اول شي فكرت بي خشمها ميشبه خشمي خشمها مكطوم عبالك مثل ماجد.

جنها بزونه زغيرونه.
فرحتي بيها جانت غير. عبالك اول مره يصير عندي طفل سبحان الله.
اتذكر من طلعت للغرفة بعد العملية.
ماجد جان يمي سألني: شفتيها؟
دمعت عيوني وهزيت راسي اي.
ماجد: من شفتها بيد الممرضة بجيت عبالك اول مره يصير عندي طفل.
ضحكت كتله: اني جنت اريد اكلك هيج حسيت.
ليش اخذوها؟
ماجد: سبع شهور. لازم تبقى بالخدج لحدما تكبر.
انقهروا علي واكف اباوعلهم من الشباك وادك عالشباك احاجيها.
دمعت عيوني كتله: حلوه؟

ماجد: غير تجنن. تشبه ابوها.
ذهب: نفس الخشم المكطوم. بس الباقي ملامح امها.
ماجد: شبسرعة شفتي ملامحها!
ذهب: انقهرت لان كلت تشبهني؟ توه تكول تجنن!
ماجد: ههههه.
سكتت لان احس نفسي تعبانه. منتظره يروح البنج ويبدي الالم.
ماجد: تعبانه؟
ذهب: شوية. احس خدر برجلية مااكدر احركها ثكيله احسها.
اجه كعد يم رجليه وبدا يدلكها على كيف.
ماجد: تحسين بألم بالعملية؟

ذهب: لا لحد الان ماكو الم الحمدلله. بس شايله هم من يروح تأثير الابره.
ماجد: اني يمج. بس اول اسبوع شدتها متتذكرين بفضولي ورائد؟
ذهب: يعني اسبوع شوية؟
ماجد: لا مو شوية بس عالاقل انتِ هنا بمستشفى متطور ونظيف وكلها بخدمتج الممرضات والدكاترة والسيد؟ لو بالعراق جان باجر طلعوج للبيت وانشلع كلب اهلج بيج.
ذهب: اي والله. الله يساعد الماعنده الله يرزق كل فقير ويشافي كل مريض يارب.
ماجد: آمين يارب العالمين.

ذهب: اتصلت عالاولاد؟
ماجد: اتصلت. زينين الحمدلله لتفكرين بيهم كلها يمهم.
ذهب: مشلوع كلبي عليهم. ممرتاحه لان همه مو وياي.
اجوا خلوني على كرسي دخلوني للحمام غسلولي وبدلوا ملابسي واخذوني عالكرسي اشوف شموسه.
اتمنيت يخلوها بحضني. بس زغيرووونه اصغر من علبة الكلينكس
من شفتها شلون نايمة بجيت.
ذهب: حلوه؟
ماجد: اكو احلى من هيج ملاك. تخبل.
دنك باس الحاضنه الهي بيها: الله يحفظها. واخيراً اجت للدنيا موتتنا.

ذهب: متستاهل التعب بالله؟
ماجد: الحمدلله. الحمدلله كل التعب يهون مادام سالمة وكاملة وجنها العافية على كولت امي حميدة.
ذهب: ادعيلها الله يطلعها منا بالسلامة.
ماجد: انت ادعيلها مو انت امها.
ذهب: يارب.
رجعوني للغرفة نمت.
كعدت وره ساعتين كعدوني للحمام وجابولي عصير وشوربة لان لازم بس سوائل او يوم.
بقيت بالمستشفى اسبوع لحدما تأكدوا كل شي تمام وماكو مضاعفات والجرح بدا يلتئم وماكو اي نزف يالله طلعوني.

رحنه للشقة بس اني وماجد.
تعب وياي حيل يدخلني الحمام ويكومني ويكعدني ويلبسني ويغسلي واستحي منه على كدما تعبته وياي.
وره اسبوعين اجت امي وجابت الاولاد وياها يالله ارتاحيت.
صحيح هي وماجد تعب عليهم بس القلق اقل من همه جوه عيني.
بقيت امي ويانه اسبوعين وبعدين رجعت لان متكدر تعوف بابا وحده اكثر.
بقت شموسه بالخدج ويومية نروح نشوفها وارضعها ونرجع.
كلش تعبنه بعدما رجعت امي للعراق.

وماجد خطية عنده شغل متعطل وميكدر يعوفنه اني والجهال ويرجع.
الى ان طلعت من الاربعين رجع للعراق اسبوع كمل شغله ورجع واجه ابوي بمكانه.
وبقينه على هالحال كل شهر يروح اسبوع ويرجع ويجي احد بمكانه مره امي مره ابوي مره عمه حميدة.
لحدما كملنه تلث شهور وطلعوا شموسة.
من رجعنه للعراق العلوية جانت عد بيت ابو علي عم ماجد.
بصراحة حسيت براحة لان محد بالبيت بس احنه.
بقت عدهم مده مااجت من عرفت بينه رجعنه.

اجت عمه حميدة وامي اول ايام حتى يساعدوني خطار والجهال والبيت وماجد.
وره كم اسبوع اجت بس يوم تحجي وياي ويوم لا على مزاجها واني هم كلت براحتها.
وبيوم كعدنه الصبح على تليفون ماجد.
اتصلت عليه نجلاء كلتله: اني هسه بمطار دبي وفد ساعتين طيارتي للعراق اذا تكدر تجيني.
ماجد: اي اجي ان شاءالله بس من تصعدين بالطيارة دزلي مسج حتى اطلع من البيت.
ذهب: شكو؟
شد التليفون ويه نجلاء ودار علي كلي: نجلاء جاية.

ذهب: شعجب ماكالت؟
ماجد: ماادري.
رجع نام.
ذهب: اكعد بعد حتى تتريك وتروح.
ماجد: بعد ساعتين يالله موعد رحلتها خليني انام شوية.
ذهب: مو اخاف تاخذك نومه وتتعطل عالبنية؟
فتح عيونه باوعلي: مو شفتج اشتري قميص نوم بنفسجي من جنه بتركيا؟
ذهب: ياقميص؟ وين شفته؟
ماجد: شفته.
ذهب: شبي؟
ماجد: شبي! امي تريد تشوفه عليج شبي بعد.
ذهب: هههههههه اي امك.
ماجد: دكومي لبسيه خل اشوفه عليج.

ذهب: هههههه نام حبيبي نام وراك طريق لو تكعد تتريك اختار وحده من هالاثنين.
ماجد: الاختيار الثالث.
ذهب: ماكو ثالث للاسف.
حضني وغطا راسه وراسي باللحاف: الثالث عندي؟‍؟‍؟‍؟
بيومها من اجت نجلاء حسيت بيها مو على بعضها ومن اول مادخلت للبيت حسيت عيونها باجية.
بعد الغدا كعدنه نشرب جاي وسألتها العلوية شعجب اجت بدون متكول؟
نجلاء: اتعاركت ويه فراس.
العلوية: ليش؟ شسوالج؟

اباوع لماجد ضاج كأنما ميرديها تحجي بس هي حجت: يومية الزمه يحجي ويه وحده عالفيس مليت واني اسكت وافوت واكول باجر يعقل.
العلوية: يااا هذا صدك طايح حظ. شلون يصاحب عليج؟ شنو شناقصج؟ مو ذني خواته يعبدوهن عبادة كل وحده جنها ثور لعد شبي حظج من دون البنات. هو انت لو عدج حظ جان مااخذتيه. اطي الحظ للعايبات امهات الفضايح الماتنكسرلهن عين واحد يعرفهن والثاني يجلب بيهن.

اني ساكتة وماجد مغلس مدنك يفردش بالتليفون. بس حسيت الحجي علي بس من بعيد لحدما كالت: مكسرات وعايبات والف عله ومرض بيهن وهمه محتارين بيهن ويركضون بيهن منا ومنا. وهمه الف وحده تتمناهم احسن منهن بس غير هي حظوظ.
اني رأساً باوعت لماجد جان مدنك.
نجلاء انتبهت علي بس غلست. ومدت ايدها اخذت مني شموسه حتى تغير الموضوع: تشبهج تره.
ابتسمت بوجها جذب لان ضجت.

دارت العلوية على ماجد كلتله بعصبية: طيح حظه اذا خابرك لو كال راح اجي.
بقى ماجد ساكت بعدين كللها: الله كريم.
العلوية: شكلج من حجيتي وياه؟
نجلاء: شكلي. ظل يصيح ويغلط وكسر التليفون.
العلوية: وانت سكتيله مو؟
نجلاء: هو اني اعرف اسكت. لو اعرف اسكت جان مضربني.
ماجد: يعني معترفه االسبب من لسانج؟

ضحكت نجلاء على كيف بس العلوية اتخبلت من سمعت ضاربها: ضربج؟ الله يكسر ايده بجاه كلمن عنده جاه فوكما سر، ي ويحجي ويه بنات انوب يضربج! وليش سكتيله؟ انتم هناك مو اليطك المره ينسجن واشتكي عليه واخليهم يجرجرونه للسجن حتى يتأدب هالطليح الحظ الميستحي.

ماجد صار عصبي كللها: شنو تشتكي عليه؟ اكو وحده متربية تشتكي على رجلها؟ وهو ابن عمها! هاي اول مره يضربها تروح تشتكي عليه لو يومية ضاربها مثل ما ضربت ذهب شتسوي؟!
اني قبل ميحجي هو من حجت امه كلش انغثيت ومن حجه هو وخلاني مثال متت.

والخلاني اشتعل واطفى جوابها عليه: اني بتي محد يضربها ومحد يمد ايده عليها شنو رجلها شنو ابن عمها يطبه طوب ينسجن ينحبس. وذهب قابل انت ضاربها بدون سبب اذا اكو سبب الوضع يختلف مو اختك والله شنو حجت عليه وعلى طيحان حظه. مرتك اتعودت وهي المرة ماتنضرب وتنهان اكثر من مرة الا اذا ينهاها رجلها عن شي جبير وترجع تعيده.

بلحظتها والله حسيت انهبطت من حجيها. فد شي ماادري شنو صار بيه بحيث صفنت عليها اريد افتهم شكالت.

ماجد: انت هاي التردين توصليلها. هاي عصبيتج كلها فلم حتى تحجين هالحجايتين وتسمين بدنه بيهن. مرتي ممسوية شي مو زين حتى انهاها عنه ومن ضربتها بت اختج جانت مسويتلي سحر والمرة الثانية سالفتها هي وشيماء صاحبتج يعني المصايب الاجتنه منين؟ واختي طلعي نفسج من موضوعها وعوفي ابن عمي اني اعرف احل الموضوع وارجعها لبيتها.

نجلاء: ماارجع. اني مزعلانه عالضربه لان ادري استاهلها بس ماارجع الا اعرف شقصته يومية يحجي ويه وحده.
دار عليها ماجد كللها بعصبية: ترجعين وتعتذرين وتبوسين راسه بعد. افتهمتي؟
بقت ساكته هي.
دار علي هو اشرلي صعدي وصعد قبلي.

كمت اني باوعت للعلوية كتلها: انعم الله عليج بس انت مره جبيرة ومريضة وعلى اساس علوية وحاجه بيت الله. الحمدلله اني ورقة بيضا كل نقطة وكل لطخه مابيه واي واحد يحجي علي كلمة زور وبهتان يتلكاها بصحته وبعافيته كون.
رأساً زمخ علي ماجد: ذههههببب.
صعدي كدامي.

العلوية: الله واكبر. لسانها شطوله متسمعها تدعي على امك وانت واكف تباوع لحلكها. تدعي على صحتي وعافيتي وانت تتفرج؟ مابيك خير. كل خير مابيك اخو مريتك. مسويتك طلي. روح منا وتعال منا.
اتحنطت بمكاني واني اسمعها تعد وتصف لماجد عبالك دلالة مو عبالك هاي المره الجبيرة العاجزة المريضة.
اباوع لماجد صارت عيونه بكصته رأساً نزل من الدرج جرني من ايدي حيل ودفعني عالدرج كلي: كتلللججج صعددديييي.

وكعت عالدرج وتأذت ايدي ورجلي. قريب منه جان التلفزيون معلك بالحايط راساً مد ايده شلعه من مكانه وشمره بكل قوته بالكاع.
كل احنه انخلسنه والجهال ظلوا يبجون وشموسه بيد نجلاء فزت وظلت تبجي.
نجلاء اخذتها وراحت للغرفة واني جريت الجهال كتلهم صعدوا فوك.
وهو بقى واكف متخشب ومنتجي عالحايط.
العلوية بعد محجت اي شي سحبت كرسيها وراحت لغرفتها.
بقيت واكفة خفت يصير بي شي.
بقى واكف ومنتجي هالحايط ويتنفس سريع وداير وجهه.

رحت جبتله كلاص مي: اشرب شوية.
ماجد: وخري من وجهي.
ذهب: اوخر بس اشرب شوية.
بقى مثلما هو بعدين دار وجهه شرب شوية مي. ايده ترجف.
باوعتله شفت خشمه يصب دم.
ركضت جبتله كلينكس: خشمك يصب دم اكعد شوية.
كعد عالكرسي وانطيته الكلينكس.
باوع عالجهال واكفين عالدرج ويبجون كلي: اخذيهم وصعدي.
اخذتهم وصعدت للغرفة بس بالي يمه هالمرة كلش فقد اعصابه وما الومه.
بس لا ارتفع ضغطه مدام خشمه نزف. الله يستر.

كل شوية اروح اباوعله من المحجر كاعد بمكانه ومخلي ايده على وجهه.
اتصلت على نجلاء كتلها: احجي وياه شوية خل يهدا كليله خل يصعد يرتاح لايصير بي شي.
نجلاء: اخاف انت نزلي احجي وياه.
ذهب: حتى يذبحني اذا شافني نزلت.
نجلاء: لج بابا انت غير. انت.

كبل لاتكمل كتلها: انت مريضه ويخاف عليج وعلى زعلج ادري حافظتها بس هسه غير هو من يصير عصبي يفقد هو ليش كلي صعدي لان يعرف نفسه يفقد اعصابه واذا انزل هسه يطلع حركت كلبه بيه.
نجلاء: اهووو. يعني اني راح اصير كبش الفداء هسه. امري لله هو اني السبب اصلاً اني اجيت وسببتلكم هالمشكلة هاي كله مني.
ذهب: هسه دروحي احجي وياه وبعدين عود نحجي بالاسباب.
نجلاء: خوش. خووش.
راحت نجلاء كعدت يمه وحجت وياه اباوعلهم من فوك.

هي تحجي وهو مثلما هو ايده على وجهه وساكت ولااتحرك ولا رد عليها.
بعدين شموسه بجت هو وخر ايده والتفت عليها يباوعلها.
كامت نجلاء خلتها بحضنه وصعدتلي.
نجلاء: اكلج سويلنه حليب لبتكم شي
ذهب: هسه اسويلها.
نجلاء: خرب ولاعبرني ولا حاجاني اثاري ماجد مو هين هم يعرف يحكر.
ذهب: خشمه بعده يصب دم؟
نجلاء: لا اتوقف. سوده علي شاط بسببي يمه اخوي بس لا يصير بي شي.

ذهب: اسم الله الرحمن. مابي شي ان شاءالله بس لو يبطل هالعصبية على كل شي.
نجلاء: والله حقه. امي داست ابطنه وبعدين راحت نامت ولايمها عبالك مصاير شي! والله راح تخبلني هالمره.
بقيت ساكته.
بعدني اسوي الحليب ودخل هو جايب شمس.
سكتنه اني ونجلاء.
كعد عالجرباية وخلاها يمه وحضن الاولاد.
نجلاء نزلت واني اخذت شمس ارضعها. اباوعله حاضن رائد وفضل ومغمض عيونه.
اتنهدت حيل فتح عيونه باوعلي ورجع غمض ودار وجهه.

نومت شمس واباوع للاولاد هم ناموا.
رحت سويتله عصير وجبته شفته مغمض بس ادري بي ميكدر ينام: ماجد.
غلس.
ذهب: ماجد.
هم غلس.
ذهب: اكعد اشرب عصير شوية.
ماجد: عوفيني نايم.
ذهب: انت منايم اصلاً ادري بيك متكدر تنام. اكعد اشرب حتى يتعدل ضغطك.
فتح عيونه كلي: تخافين على ضغطي؟
ذهب: شلون مااخاف.
ماجد: ليش تشلعين كلبي اذا تخافين علي؟

ذهب: ليش شلعت كلبك شسويت؟ اني البديت الحجي؟ مو من حقي ادافع عن نفسي لو مره؟ تره اني هم بشر وعندي كرامة حتى الله ميقبل كلما تنهان كرامتي اسكت واكول ميخالف.
ماجد: يعني اني واكف خراعة خضره حتى انت تردين؟ يايوم احد حاجي عليج لو متصرف وياج تصرف مو حلو واني ساكتله؟ يايوم اني مماخذلج حقج؟ اكلج صعدي تكومين توكفين كبالها وتدعين عليها؟

ذهب: يعني انت هسه الغاثك اني دعيت؟ مو الحجي الكالته هي عني؟ هذا الحجي عادي صار عندك مثلما كالت هي مرتك اتعودت عالاهانة مو؟ اني دعيت على كلمن يحجي بيه وبسمعتي بالباطل بعد اذا هي هيج هاي مو مشكلتي.
ماجد: كلمة وحده بعد مااريد اسمع. ولاكلمة افتهمي تره والله وبالله اليوم اسوي بيجن المصاير.
سكتت واخذت الجهال لغرفتهم. اسمعه يكول: وجايبتلي عصير تخاف علي وعلى صحتي على اساس.

مديت راسي عليه كتله: والله العظيم صوجي.
ماجد: كتلج مااريد اسمع صوتج. لو تخافين علي صدك جان سكتي مو الا توكفين وتشوفيها شلون تعرفين تردين عليها. الف مره كتلج مره جبيرة.
صرت عصبية كتله: محد طيح حظي غير سكوتي. محد سوه بيه هيج غير احترامي وهذا عيب وهذا جبير وهذا ميصير. لو راد عليها من اول مره جان هذا البيت هسه بقمة الهدوء.
ماجد: عفيه عليج.
عفية.

سكت شوية بعدين كال: اذا صار بيه شي خطيتي بركبتجن انتن التلاثه.
ذهب: واذا صار بيه شي خطيتي بركبتكم كلكم.
بقى ساكت.
رحت اتمددت عالجرباية واسمعه يجر حسرات انقهرت عليه.
اتدنيت يمه وحضنته كلي: لو تحبيني صدك جان محجيتي شي. جان اتحملتيها لخاطري.
ذهب: هسه طلعت مااحبك لان حجيت كلمة بعدما انداس ابطني؟
ومامتحملتها لخاطرك؟

ماجد: عالاقل وحده منجن تسكت وتكول اتحمل لخاطره حتى تطفى النار بمكانها وحده منجن تكول اسكت واتحمل حتى لاازيد النار حطب وازيد المشاكل عليه.
صرت عصبية كتله: يابه اني الغلطانه. اني اسفه واعتذر لان دافعت عن نفسي وحجيت واذا تريد انزل ابوس راسها.
ماجد: محد منجن تفكر بيه. اذا انت متتحملينها لخاطري منو يتحمل لخاطري بعد؟ غير مرتي وامون عليج لعد عليمن امون منو يتحمل وياي؟
حسيت كلامه صحيح وانبني ضميري.

رجعت حضنته وخليت راسي على ظهري وظليت ابجي على كيف.
اتبللت ملابسه دار علي كلي: هم بجيتي؟
ذهب: تعبت. تعبت من المشاكل.
حضني وبقى ساكت بعدين كلي: كتلج الصبح لبسي قميص النوم خل اشوفه عليج مقبلتي ارتاحيتي هسه من اتعاركنه واتكسر التلفزيون واتعكر مزاجنه؟
ضحكت ومسحت دموعي كتله: البسه. بس لاتضوج. مااتحمل اشوفك ضايج.
ماجد: صدكتج.
ذهب: والله.
ماجد: دكومي لبسي القميص حتى ارضى.
ذهب: ههههههههه لاخليها بالليل.

ماجد: لا يمعودة انوب تسويلي قصه جديدة وتلكين حجه وتزعلين مااضمنج كومي لبسيه هسه.
كمت لبست ووكفت كبال المراية وهو يباوع.
ماجد: مو ضيك حيل؟
ذهب: لعد المن اسمه قميص نوم!
ماجد: هاا يعني هو موديله هيجي؟
ذهب: يعني معجبك؟ انزعه؟
ماجد: لا لا لا شتنزعين. لا شلون معجبني. اصلاً بس اللون يدوخ. دتعاي هنا خل اشوفه عن قرب.

ضحكت كتله: تتذكر قبل اول مااتزوجنه شلون جانت عندك عقده من الالوان هههههههه يالون البسه تكلي هذا اللون بس يمي ينلبس هههههههه.
تمددت يمه واني اضحك وهو مبتسم كلي: البيضا بيها شغلة مو زينه كل الالوان عليها تموت.
ذهب: وهاي شغلة مو زينة؟
ماجد: كدام الناس طبعا مو زينة شلون واحد يقبل الناس تباوع لمرته وتكول شوف هاي شلون بيضا وشلون هذا اللون يخبل عليها.
ذهب: هههههههههههه والله مو طبيعي.
ماجد: لجج.

؟‍؟‍؟‍؟‍؟‍؟‍؟‍؟‍؟‍؟
هذا اللون بس يمي بعد
ذهب:؟ عود هاي زعلان وضغطك مرتفع
ماجد: محد رفع ضغطي غيرج من الصبح كتلج لبسيه
ذهب:؟
.
‏أقترب، أسرق قبلة برضاي أو
رغماً عني.؟