رواية صبرا يا قلبي

رواية صبرا يا قلبي الجزء الثاني للكاتبة روز الفياض الفصل الخامس

؟حبك بطريقة تجعلني أحارب صحتي؟
.
بقيت كاعدة بالحديقة ماادري شكد ابجي.
طلعت نجلاء يمي جايبتلي عشا.
نجلاء: والله اذا كلتي مااشتهي.
ذهب: مااريد.
نجلاء: هسه اقتنعت حقه من يحجي ويصيح ويصير عصبي. لج انت غير حامل وعندج دوه لازم تشربيه؟ غير اكو جنين بداخلج يتغذى عليج؟
اكلي اللفه تره حرام عليج. والله اذا تبقى اني اكلها واني وزني صار تسعين تدرين لو لا؟
ضحكت.
نجلاء: داكليها كدامي.

اخذتها من ايدها كالت: داخذي هاي الثانية وروحي انطيها لرجلج اتعشوا اثنينكم.
باوعتلها كتلها: مو اتعشيتوا انتو؟
نجلاء: مقبل ياكل. ماادري شبي صاحتله عمتج حميدة بالغرفة مالتها وطلع ماله خلك راح كعد بالديوانية وطرد الجهال. يمكن رزلته علمودج. شتردين بعد عندج ناس تدافعلج وتطلع حقج من حلك السبع فرحي عيني فرحي هههه.
اتحسرت وصفنت عرفت عمه حميده حجتله الحجي الكلته الها عن امه ودعاويها وحجيها.

ماادري ضجت لو انبني ضميري بس انقهرت عليه.
بقت نجلاء تلح حتى اكل، اكلت على اعصابي بعدين جابتلي عصير اكلها مااريد وهي تلح وتتوسل.
اخذته شربت شوية شفته فاتح البرده مال الديوانية ويباوع علينه.
نجلاء: شرايج باجر نطلع للمول؟
باوعتلها كالت: ضجنه ملينه والجهال خطية جهالي ممتعودين على هاي الحبسة تره يومية جنت اخذهم للحديقة لو للمول.
ذهب: مالي خلك.

نجلاء: عادي حبي شنو الجديد انت ورجلج دومكم مالكم خلك مو جديدة تره.
ذهب: اخوج يراقبنه من شباك الديوانية.
التفتت نجلاء شافته.
ذهب: ليش تلتفتين؟ اخ ياربي هسه عرف اني كتلج.
نجلاء: هههه والله تخبلون عبالك جهال من يتزاعلون هههه.
بقى ماجد ميحجي وياي ولااني بعد اسبوع بس هالاسبوع كله ميجي ياكل بالبيت.
ومن يجي روحه بخشمة وميكعد يمهم ولايسولف وياهم.

يطلع الصبح يرجع بالليل يكعد بالصالة لحدما يريد ينام، يصعد ينام بهدوء.
امي اتصالتها وقلقها كلش وترني وسببلي قلق وكآبة.
كلما تتصل وكلتلي: خليني اخذج لهاي القابلةلو لدكتورتج حتى تنزله قبل ميفوت الوقت وبعد منكدر نسوي شي.
دخلت للغرفة الصبح اخذت ملابس اريد اسبح ودخل ماجد، استغربت عبالي طالع للدوام.
اتمدد عالجرباية واتغطى كلي: العصر جهزي نفسج من وكت حتى نروح لابو القلبية.
بقيت ساكتة اخذت ملابسي ورحت سبحت.

العصر رحنه للدكتور سوالي الدكتور ايكو وفحص جهد وتحاليل ثانية وكلها زينة الحمدلله وعالحمل كلي: اهم شي الراحة اهم شي الراحة النفسية والجسدية اثنيهم اي شي ثاني مراح اوصيج. احنه مننصح بالحمل بهيح حالات بس هواي حالات عادي متتأثر وافضل من تدخلين بالخامس تنامين مستشفى لحد متدخلين بالسابع لان حدج للسابع ولازم تسوين عملية ولاده منريد نجازف ونبقى للتاسع.
ماجد: يعني اكو خطورة؟

الدكتور: حالياً لا. بس مااريدها تكمل الحمل للشهر الاخير، ليش المجازفة اذا اكو امكانية تسوي عملية ولاده مبكرة بالسابع يكون افضل لصحتها وللجنين.
رجعنه على اساس للبيت بس مطلع على طريق البيت ظل يفتر بالسيارة وهو ساكت واني ساكتة.
ماجد: تردين شي قبل منروح للبيت؟
مجاوبته باوعلي: احجي وياج؟
هزيت راسي لا.
وصلني للبيت وراح.
وره يومين جنه كاعدين اني ونجلاء وعمه حميدة بالليل نسولف جوه بالهول وهو صعد ينام.

عمة حميدة: اني منج اروح وراه هسه وانام يمه واخليه يصالحني.
غلست.
نجلاء: لا اني منج اروح اسويله حركات اغراء البس ملابس مال نوم من هاي الزرق ورق واتعطر واظل رايحه جايه كدامه.
هم غلست.
عمة حميدة: والله كبل على ايامنة مو مثل هسه سوالف البنات والعرايس اخ لو بعدني شابة والمرحوم عدل.
نجلاء: اييي؟
عمة حميدة: جان يومية البسله موديل واطير عقله.
نجلاء: لا يمعوده خلي مات وارتاح ولاتطيرين عقله ويتخبل ونبتلي بي.

ذهب: ههههههههههههههههه
عمة حميدة: عابتلج. كله عندج ضحك وتصنيف.
فجأة نزل ماجد مبدل ويركض عالدرج.
كل احنه التفتنه عليه.
عمة حميدة: هايمة وين بهالليل؟
ماجد: للمستشفى.
نجلاء: اسم الله شبيك؟ شيوجعك؟ يمه اخوي.
كامتله نجلاء تركض باوعلها كللها: شبيج؟ شبيج فزيتي؟
عمه حميدة: شبيك يمه شعندك بالمستشفى؟
ماجد: عمي ابو عبدالله مختنك وماخذيه للمستشفى.
كمزت عمة حميدة من مكانها: يمه اخوي.

ماجد: ماكو شي شبيكم الرجال عنده ربو ومختنك شنو اول مره؟
عمة حميدة: اوكف اروح وياك خل البس عباتي.
ماجد: شيوديج؟ شتسوين رايحة؟
عمة حميدة: اخوي مريض وابقى كاعده؟ وياك تاخذني.
دخلت تلبس عبايتها وهو كعد كبالي: قفلندالباب ورانه. ابو جبار كاعد بره. ونامن ولحد تكل لامي شي واذا سألت احنه نايمين؟ زين؟
نجلاء هزت راسها اي وكلتله: زين بس عفيه ماجد من توصلون اتصلوا بينه وطمنونه مو تخلوني انتظر.
ماجد: يصير خير.

راحوا واني قفلت البيبان ودخلت نومت الجهال وبقيت كاعده اني ونجلاء منتظرين احد منهم يتصل يطمنه.
وره تقريباً ساعة اتصل ماجد على تليفوني انطيته لنجلاء مجاوبته.
كللها عمو ابو عبدالله بعده مثلما تعبان شوية بس حالته مستقره.
نجلاء: مادام حالته مستقره الحمدلله خلينه نروح انام شوفي بيش الساعة صارت روحي نامي وارتاحي خاف يكعدون الجهال وانت تعبانه.
رحت صعدت نمت يم الجهال لان ماجد ماكو.
نمت.

الساعة بتلاثه الفجر حسيت اكو حركة بالغرفة.
فزيت رحت اشوف منو لكيت ماجد فاتح الكنتور ويبحوش.
حس بيه كعدت التفت علي باوعلي ودار وجهة.
اباوعله بدل ملابسه لبس دشداشة نيلي ونزل بسرعة.
نزلت وراه شفته كاعد بالمطبخ ومخلي ايده على كلبه.
دك تليفونه كطع الصوت.
طلع للحديقة يرد: ها علاوي؟ اي هسه. اليوم قبل ساعتين اتوفى خلصنه الاجراءات وكملنه كل شي واخذوه للمغيسل.
بجه.

انقبض كلبي طلعت وراه هو خلص مكالمته وحس فتحت الباب التفتت يشوف منو.
ذهب: منو مات؟
مسح عيونه كلي: عمي ابو عبدالله انطاج عمره.
انخلست.
بقيت ساكته وصافنه بوجهه هو خاف كلي: رجال جبير ومريض وعنده ضغط وسكر وربو.
بقيت ساكته كلش انقهرت على عمر ابو عبدالله جان يحبني حيل ودوم واكف وياي ضد مرته وبناته.
دمعت عيوني وهو بجه حيل.
من بجى حيل اني هم بجيت.

ظل يبجي بعدين كلي: امي حميده راحت هناك واخاف اكل لامي. اخاف اكعدها واكللها هيج خبر. ومينطيني كلبي هم اصدم نجلاء..
شسوي؟
ذهب: لازم تكعدهم وتكللهم. ميصير يبقون للصبح.
بقى واكف كل شوية يبجي. بعدين دخل كعد امه اباوعله كعد يمها وندهها وحجه وياها بهددووء عبالك طفله واكفة اباب الغرفة وكوه اسمع حجيهم.
امه من كللها اتفاجأت وظلت تبجي بصوت عالي.
وهو يبجي وياها.
كعدت نجلاء على صوتهم. ومن كلولها خطية ظل تصرخ وتبجي.

فزوا جهالها على صوتها خايفين عبالهم بيها شي.
اخذتهم اني للغرفة وسديت الباب حتى ينامون.
وره شوية دخل ماجد: راح اخذ امي ونجلاء لبيت عمي وانت ابقي هنا ويه الجهال اصلاً مااريدج ترحين بس تعاي قفلي الباب ورانه والصبح اخابر لعمي ابوج تجي امج يمكم. تكدر؟
ذهب: الله كريم للصبح هسه لتفكر.
بس زحمة شلون مااروح وياكم خاف يكولون مااجت ويلومون؟

ماجد: اليحجي خل يحجي والي يلوم خل يلوم مترحين. ابقي ارتاحي ولتسوي اي شي البنات موجودات يمج هن يسون بس عليج تراقبين الجهال.
سكتت.
سد الباب وشوية ورجع فتح الباب واجه وكف كبالي: ماعليج اذا عفناج وحدج مو؟
متخافين؟
هزيت راسي لا: لا لا روحوا الله وياكم ماعلينه شي هاي الجهال اسم الله عليهم رجعوا ناموا وهسه انزل رائد وفضل هنا حتى كلهم يمي يبقون وتحت عيني.
روحوا ماعلينه شي.
ماجد: متخافين وحدج؟

ذهب: ابو جبار بره. ومباقي شي وتطلع الشمس. ماكو شي يخوف اتوكل بالله. لايظل بالك ماعلينه شي ان شاءالله.
جنت كاعده يم بت نجلاء عالجرباية، دنك باس راسي كلي: اذا صار شي لو خفتي اتصلي.
هزيت راسي اي.
طلع من الغرفة راح نزل الجهال يمي واخذ امه ونجلاء وراحوا.
الصدك اني خفت.
اول مره ابقى بالبيت وحدي.

قفلت الباب وراهم وبقيت كاعده ضايك خلكي على عمو ابو عبدالله بعدين اذن الفجر كمت صليت وقريت سورة يس هديت ثوابها لابو عبدالله الله يرحمه.
نمت.
فزيت الصبح على صوت التليفون. باوعت الساعة بثمانية، ماجد اتصل: ها نايمه؟
ذهب: هلو. اممم. جنت.
ماجد: شلون الاولاد؟ كاعدين لو نايمين؟
ذهب: كلهم نايمين.
ماجد: ماشي. ديري بالج على نفسج وعليهم. اذا ردتي شي اتصلي.
ذهب: ان شاءالله.
رجعت نمت كعدت الظهر بالكوه.

سمعت الجهال كاعدين ويلعبون اتعجبت الساعة ب( 12 ) معقولة لهسه نمت ومحسيت بالجهال من كعدوا؟
خابرت لامي وابوي كتلهم ماجد عمه اتوفى.
راحوا للعزا وبعد العزا امي اجت يمي.
امي: الله يرحمه لان زين وخوش رجال راح. بقت الحيزبونه عايشة للاذية.
ذهب: اي وحده بيهم؟
امي: ام عبدالله. اسلم عليها واعزيها ترد علي من وره خشمها وتدور تسولف ويه اختها وتحكرني!
شكد شايفة ناس بلا ذوق بس مثلها مشايفة.
ذهب: بناتها النسرات وين؟

امي: موجودات كاعدات يبجن بعد ابوهن، بس هم حقيرات على امهن مسلمن علي من شافني كاعده وطلعن ماادري وين راحن اختفن بالغرف.
ذهب: بعد احسن.
امي: وانت شعجب مرحتي عزيتي وياهم خاف عيب من خالتج ام ماجد؟
ذهب: ماجد مقبل. كلي ابقي ارتاحي يم الجهال متروحين.
امي: زحمة. خاف بعدين تاخذ على خاطرها منج.
كتلها بكلبي لو تدرين بيها.
بقت ماما يمنه باتت بيومها بس كرعت راسي بالحجي.

رجع ماجد نص الليل امي جانت هي والجهال بغرفة عمة حميدة.
سمعت صوت الباب انفتح رحت اشوف منو شفته كاعد بالمطبخ ينزع حذائة.
شافني سلم وخله راسه عالطاولة.
ذهب: متدخل تسبح حتى ترتاح شوية.
مجاوبني بقى هيج دقايق بعدين صعد بدون كلام.
دخل للحمام طلعتله ملابس ومنشفه ونزلت اسويله عشا ادري بي مياكل بعزا ولاعرس.
كملت العشا وصعدته فوك اله جان متمدد عالجرباية ومغمض عيونه،.

شافني دخلت بيدي الصينية فز اخذها مني: ليش تشيلينها؟ استغفر الله كم مره اعيد الحجي حتى تسمعين وتطبيقين؟ ويكلك ليش تحجي. ليش تصير عصبي.
ذهب: على كيفك هي صينية. البنات نايمات مو يصعدها.
ماجد: اني انزل. اصلاً منو كلج اريد عشا؟
بعدها الصينية بيده اخذتها منه: مالازم. صوجي اني اكول تعبان ومياكل هناك خطية يبقى بلا عشا.
ماجد: جيبي. اني انزلها.
اخذ الصينية جوه.
رحت نمت بالغرفة الاخيرة وقفلت الباب.

وره شوية حاول يفتح الباب لكاه مقفول دكه.
كمت فتحته بدون كلام وبقيت واكفة.
ماجد: شنو بعد هاي النومة هنا؟ اشو رجعتي تنامين هنا؟
ذهب: ليش شصار؟ شنو التغير مثلاً؟ لايكون حجيت وياك عبالك نسيت لو سامحتك لو كلت مثل كل مره متسوه؟ اذا هذا تفكيرك فانت غلطان. اني بعد مااكدر اتحمل تصرفاتكم.
تعبت. وماعندي استعداد ادوس على نفسي بعد علمود ارضي احد.
بقى واكف صافن بوجهي بعدين اتنهد وكلي: والمطلوب؟

ذهب: انت بحالك واني بحالي. لاتحجي وياي ولااحجي وياك اني هالمرة سكتت وبقيت لخاطر جهالي. مرة ثانية مااحط خاطر لاحد.
رفع حواجبه كلي: براحتج.
رجع للغرفة واني دخلت وقفلت باب الغرفة علي.
ثاني يوم امي كلتله: لازم تاخذها تعزي واني ابقى يم الجهال نص ساعة ورجعها.
استحى من امي وقبل. مااشتهي اروحلهم بس بعد هذا موت والموت لازم تنسي كل الخلافات بي.

رحت وياه دخلت الحمدلله شفت نجلاء بوجهي هي هم بس شافتني كامتلي: همزين اجيتي.
ذهب: شكو؟
نجلاء: ماكو. بس تعرفين الناس التحب عمل الخير هوايه وكل شوية وحده تسأل امي وينها جنتكم نسلم عليها واني اكللهم هسه تجي عفنه الجهال يمها محد بالبيت.
ذهب: غير اخوج ميقبل اجي الا حجت وياه امي يالله قبل.
نجلاء: اووف يااخوي.
شفت خالته سلمت عليها وعزيتها.
ذهب: بنات خالتج وين؟

نجلاء: خيولن عوفيهن يستنكفن يجن يكعدن يم الناس كاعدات بغرفهن عبالك موعزا ابوهن.
ذهب: لعد شبيها خالتج متكوم تطيح حطهن. لو بس تعرف تفتر وراي.
نجلاء: هي لو عدها شخصية وبناتها جان خافن منها بس ماعدها شخصية يم بناتها. هاي سرويه تتزوج وتطلك بكيفها.
درت عليها كتلها: لاتكولين تريد تطلك؟
هزت راسها اي.
ذهب: الله. الله. كملت السبحة هسه عرفت.
نجلاء: شنو؟

ذهب: امج ليش متغيره علي. كلتلك فرصة واجتني ارجع بت اختي مدام راح تطلك.
نجلاء: امي تخوط بصف الاستكان مالج علاقة بيها المهم زوجج. رجلج هو الاهم ومادام مشتريج معناها خل يسون شيردن يسون.
ذهب: مبارك على حظي. انوب يكلك لكل من اسمه نصيب لعد وينه نصيبي يمكن اسمي مصايب اسمي قهر اسمه ماادري شنو.
نجلاء: دسكتي شبيج ظليتي تولولين هسه هي قابل اتطلكت صدك؟

ذهب: تطلك تطلك. امج وخالتج يطلكنها باسرع وقت عمج وراح منو يوكفلي بعد.
نجلاء: ذكري الله. صلي على نبيج.
ذهب: ياالله. اللهم صل على محمد وال محمد.
ليش تريد تطلك بالله؟ يضربها؟ لو يغلط عليها؟ لو كرايبه مسويات حرب عليها؟
نجلاء: ضايجة من المشتمل ضيك عليها عيني تريد بيت ملك يم امها.
ذهب: لا مو هذا السبب.
نجلاء: لعد شنو؟

ذهب: السبب تريد ترجع لاخوج. لاكيه ناس مشجعتها عالطلاك وتكللها اتطلكي ورجعي لماجد. ليش تبقى بعد ويه هذا المكرود؟
اكو اللي يساعدها تحقق املها وترجع. متريد مشتمل حقها. ماجد عنده بيت طابقين وبي خدامتين ليش تبقى بالمشتمل؟
حسبي الله ونعم الوكيل. لو ادري ماجايه يمكن لهالسبب مرادني اجي؟! اي صح ميريدني اعرف.

نجلاء: لااا لج شدراه هو قابل ماعنده شغل وعمل بس يدور اخبارها؟ سمعت امي تسال خالتي ومن سألت امي وكتلها سمعتجن مكدرت تنكر وتكول حجتلي مقتطفات كالت زعلانه من رجلها وتريد تطلك ممرتاحه وياه. عاد اني رحت لزينب حجتلي التفاصيل.
ذهب: هو هذا حظي اني. وراي وراي.
ساعة السودة اللي اتزوجت بيها واحد متزوج ومطلك.

نجلاء: شبيج انت كل شي تاخذيه على اعصابح وصحتج؟ بابا خل تزعل وخل تطلك هو منو بحالها؟ خليها تطلك وتكعد على كلب امها لحدما يدبرولها رجل ثاني.
ذهب: امي حميدة وين؟
نجلاء: ماادري هسه اشوفها الج بالله ابقي هنا.
راحت نجلاء تشوف عمه حميدة واني كاعده بصف العلوية ام ماجد ويمها اختها.
التفتت شفتهن اثنينهن صافنات علي صفنة مال كفر.
قريت المعوذات بكلبي وكتلهن الله يكفيني شرجن.
فجأة دخلت اسراء.
لابسة بنطرون اسود وقميص.

عبرت علي جنها متشوفني كعدت كبال امها وخالتها.
اني هم غلست وحكرتها درت وجهي عالجهة الثانية.
اسمعها تبسبس وياهن اباوع بطرف عيني ام ماجد لازمتها من ايدها وتمسح على ايدها ومبتسمه بوجهها ابتسامة شعرضها.
بقيت متعجبة.
حسيت بيهن يباوعلي كلهن يمكن يحجن بيه.
غلست.
فجأة ام ماجد كلتلي: شتخلين لوجهج خلطة لو شنو؟
التفتت عليها كتلها: تحجين وياي خالة؟
العلوية: اي اكلج شتخلين لوجهج هيج ابيض احمر خلطة لو شنو اطينه اسمها؟

ضحكت كتلها: خلطتيش؟ شنو جنت سوده لو سمره من اخذتوني؟ اني بشرتي بيضا من الاول.
العلوية: اي اكلهن من الاول بيضا يكولن لا خلطة تخلي.
ذهب: لاخالة حبيبتي اني بيضة جسمي كله مو بس وجهي لو بس وجهي اكول حقهم يكولون خلطة. الحمدلله من الله مااحتاج لاخلطات ولا شي.
بقن ساكتات وهم رجعت درت وجهي وحكرتهن لحدما رجعت نجلاء ووراها عمة حميدة.
كمت اني لعمة حميدة بستها وعزيتها.

كعدت بصفي تبوس بيه: عنيتي علي انت والجهال ظل بالي يمكم بحدكم بالبيت يمه.
ذهب: ماما اجت بالليل من رجعت منكم باتت يمنه وماجد هم رجع بعدين خطية رجع تعبان وجوعاان.
عمه حميدة: اي سوده علي هو مياكل بهيج مناسبات تعرفين طبعه. سويتيله عشا؟
ردت شوية اغيضهن كتلها: طبعاً شتعرفيني تغمض عيني واني ادري بي بدون عشا؟ سويتله اشكال والوان وصعدته اله فوك للغرفة.

عمة حميدة هم لوتية فهمتني كالت: اي اعرفج اعرفج. نادرة محد بندارتج ليش يحبج هو ويموت عليج مداريته. عفيه بنيتي.
بقت عمة حميدة تسولف وتضحك وتنكت وتقلد على فلانه وعلانه علو عنادهن وهن كاعدات يسمعن ووحده تباوع للثانية.
دك علي ماجد سلمت وطلعت.
وصلني ورجع بدون كلام.
كملت الشهر الثالث واني مااحجي وياه ولاهو يحجي وياي.
نجلاء رجعت لزوجها ولبيتها.
وعمة حميدة بقت عد بيت اخوها لحدما طلع الاربعين وبعدين اجت عدنه.

ماجد ماله خلك من يوم مااتوفى عمه الله يرحمه.
راحوا كلهم للاربعين واني رحت عد اهلي.
حجيت لامي على اسراء كتلها تريد تطلك.
امي: اتعلمت هاي يومية متزوجة ومتطلكه. ليش مرحتي وياهم للاربعين؟ ليش تعوفين زوجج الهن هن يتحينن الفرص حتى يشوفن وحده ويستغلن الظرف وانت فاهية عايفته براحته يروحلهم.
ذهب: شسوي يعني؟ اروح وياهم واشبع مغثه؟

امي: لا ليش تشبعين مغثه اروح واني اغثهم واكعد على كلبهم. اتعلمي اللواته مثل البنات شبيج خارمة.
ذهب: هسه طلعت خارمة؟ لو حاجيه وكايله اروح وهو معارض اول واحد رجلج راح يوكف وياه وانت تجين تلحين على تلحينه رجلج وعيب وميصير واحنه مربيناج هيجي!
امي: يااا! شوكت هالحجي لج انت لسانج بس يمي.
ذهب: كولي جذب؟ محد خلاني هيج غيركم والله العظيم.
سكتت امي.
بالليل اسمع ابوي يحجي ويه ماجد متصل يسأل عالجهال.

ميتصل علي يسال عليهم لان كتله لاتحجي وياي ولااحجي وياك.
ثاني يوم اجت خالتي وبتها وسولفنه وضحكنه بعدين كالت بت خالتي: كلش عاجبني اسوي وشم بايدي.
ذهب: بس حرام والوضوء؟
خالتي: كتلها تكول ميأثر.
ذهب: لا شلون ميأثر ميجوز يكون ضاهر للرجل الغريب ولا واقع بمنطقة يشملها الوضوء.
امي: انت هم سوي.
باوعت لامي مستغربه منها من الشيطان قبل كله عدها ممنوع.
كتلها بالضحك: اذا اسوي اسوي تاج بجتفي.

امي: لاسوي عين مثل مال هيفاء وهبي.
خالتي: ههههه صدك مثل هيفاء وهبي.
شفت امي موافقة قررت اتخبل واسويها صدك.
اقنعنه خالتي واخذتنه لصديقتها عدها صالون بالبيت.
طلعتلي موديلات ونقشات بس اني بقيت مصره اريد تاج زغير على الجتف من وره.
وسويته؟
بس الالم لايتحمل لان بدون مخدر خفت عالنونو اخلي مخدر رغم البنية كلتلي المخدر خارجي عالجلد ميأثر بس كلت مااجازف.
بقيت تلث تيام مااكدر انام على جافي من الالم.

واحاول ماابين عندي الم خاف ماجد يسالني.
لان وره يومين همه رجعوا من الاربعين واجه اخذنه.
اخذله اسبوع الوشم يقشر لحدما طاب وراحت الطبقة الخارجية المثل الجرح يالله ارتاحيت.
.
تبارك الذي جعلك في قلبي حبيباً
‏وجعل لي من معرفتك حظاً جميلاً.؟

رواية صبرا يا قلبي الجزء الثاني للكاتبة روز الفياض الفصل السادس

كُن بجانبي دائما، ف انا لا اجيد الفرح بدونكك؟
.
جان ماجد نايم وسمعت صرت جوه.
نزلت شوية عالدرج ردت اشوف منو مشفت شي بس سمعت صوت سلام ومباوس بغرفة العلوية.
رجعت صعدت راسلت عمة حميدة كتلها: يمه منو عدنه؟
وره ربع ساعة جاوبتني: اسراء واختها.
انصدمت!
شهالبراعة العدهن؟!
بقيت احوس اريد اعرف شعدهن.
رجعت عمة حميدة راسلتني: اتزوكي ونزلي غير انت ام البيت.

ضحكت على سوالفها بس قررت اسوي هيج لازم اغثهن لازم يعرفن اني ام البيت على كولت عمه حميدة.
جنت لابسه اسود بعدني علمود عمو ابو عبدالله وماعندي ملابس سوده كشخه.
احتاريت شلبس؟
ماجد نايم مااكدر اتحرك وابحوش براحتي مااريده يحس بوجودي بالغرفة.
فتحت الكنتو على كيف وبقيت واكفة اباوع شلبس؟
لكيت عندي فستان بينسل بدون ردن اسود ووياه مثل الصايه بيج.

طلعت بس الفستان وطلعت عندي بشت اسود من الظهر دانتيل ومن كدام قماش حرير اسود سادة وعالجوانب من تحت الابط للرجلين دانتيل شفاف وبي شغل ونفس الشغل عالظهر.
صفنت شوية كلت هذا مبين اوفر. بس يالله ماعندي غيره خل البسه وطلعت حجل زغير عندي فضي كله شراشيب اشتريته من رحت ويه خاله للصالون سويت الوشم من ام الصالون اخذته بالفين؟ كلش عجبني.
اجه وكته البسه هسه.

لبست وخليت كحل خفيف كلش ومسكارا وخليت حمرة خدود على عنادهن امهات الخلطة وترست روحي عطر ونزلت.
نزلت لنص الدرج ورجعت بسرعة.
اتذكرت كلادتي الزغيرة بيها اسمي لبستها وامي من صاروا الاولاد صاغتلي كلاده بيها اسم ماجد والاولاد.
نزعت الكلادة البيها اسمي لبست الكلاده الثانية. ولبست تراجي.
وطوخت الحمره شوية ونزلت اتمختر.
نزلت سويت نفسي ماادري اتفاجأت.
مديت راسي شفتهن كاعدات بصف خالتهن هالجرباية: هاا مو عدنه؟

التفتن هن وخالتهن كالت عمة حميدة: عندج خطار يمه هسه ردت ادك عليج اكلج نزلي. ام البيت لازم ترحب بخطارها بعد. مو احنه احنه هم خطار مثلهم.
ذهب: يمه انت ام البيت واني خطار لتكولين هيج ازعل منج.
التفتت عليهن كتلهن: هلو.
ردن هن ابرود بس عيونهن رادت توكع بالكاع: هلوو.
ظلن يباوعلي واني كعدت يم عمه حميدة اضحك واتشاقى وانطيتهن ظهري.
صحت على ياسمين تسويلهن جاي.

راحت ياسمين سوت الجاي وجابته كتلها: ليش بس جاي؟ كيك كليجة كل اسبوع شكد اسوي.
ياسمين: باكي شوية اني يخليه لبابا ماجد.
ذهب: لا جيبي. هسه اسويله بابا ماجد.
عمة حميدة: اي يحب الحلاة هو حبيبي. عودتيه موخوش تعويد الا كيك لو كليجة لو فطاير ويه الجاي.
ذهب: حتى بالليل مينام اذا مياكل.
عمه حميدة: الف عافية. هني ومري ان شاءالله.
هن ساكتات ويباوعن.
طلعن جايات جايبات صبغ شعر للعلوية تستحي من الحنه وهي حزينة.

نزل ماجد توه كاعد من النوم مد راسه شافنه كاعدين سلم من الباب وراح كعد بالهول.
اني كاعده يم باب الغرفة يعني يشوفني واشوفه.
كاعد ويباوعلي واني مغلسة واسولف واضحك ويه عمة حميدة.
صاح على البنات يريد جاي.
جابوله جاي كللها: ماكو شي وياه؟
ياسمين: مافي خلص ماما دهب كالت انه يسوي لبابا ماجد.
باوع علي كال: اي.
شوكت تسوي يعني؟
سمعته وغلست.
شرب الجاي وصعد يبدل حتى يطلع.
نزل سأل اذا محتاجين شي حتى يجيبه وهو راجع.

العلوية: انتظر شوية حتى توصل البنات خاف يرحن. مو مال تكسي الدنيا مغرب.
باوعت اني لعمة حميدة رأساً!
ماجد: اوكي. اني راح انتظر بره.
صارت عيوني بكصتي.
عمة حميدة: كومي لبسي حجابج حتى ترحين وياه مو تردين مواد للكيك.
صفنت بوجهها غمزتلي.
رحت للمطبخ اشوفه وينه خاف يرحون ويعوفوني لكيته واكف يم باب المطبخ يلبس الحذاء.
شافني اباوع ظل يباوعلي من فوك ليجوه.

رجعت صعدت للغرفة انزع البشت لان الظهر شفاف والبس شي ثاني وحجاب.
نزعت البشت وطلعت عباية جتف وكمزت من حسيت واحد بالغرفة.
درت لكيته واكف يم الباب يباوع.
ذهب: استغفر الله. وكفت كلبي. اتنحنح طلع صوت وانت صاعد.
بقى ساكت يباوع. غلست ولبست العباية وجاي البس الحجاب واجه جر العباية.
ذهب: شبيك؟ شكو؟
ماجد: نزعي.
ذهب: شكووو؟
ماجد: نزعيها.
سحبها من جتفي ودارني يباوع عالوشم.
ولا اجه ابالي شافه.
ماجد: هذا يروح بالغسل؟

عدلت العباية ولبستها عدل وكتله: لا.
خليت الحجاب على راسي كلي: يعني وشم؟
ذهب: نعم. وشم.
ماجد: شوكت سويتيه؟
ذهب: من رحت لاهلي.
ماجد: بكيفج؟
ذهب: اي طبعاً بكيفي. جسمي لو جسمك هو. لو ردت انت تسوي راح تجي تاخذ رايي يعني؟
ماجد: اممم. وين لابسه ورايحة؟
ذهب: وياكم.
ماجد: ويانه منو؟ وين ويانه؟
ذهب: مو تريد توصل بنات خالتك الحلوات؟
ماجد: وانت شكو؟ وين رايحة؟
ذهب: لا والله؟! رجلي على رجلك متروح وياهن وحدك لو تموت.

رفع حواجبه كلي: لو اموت؟
ذهب: اي والله لو بيها موت متروح وحدك. رجلي على رجلك مااخليك وياهن وحدك.
ماجد: ليش بالله؟ تغارين علي؟
ذهب: لاحبيبي ماعندي ثقة لابيك ولابيهن.
عفته ونزلت بسرعة قبل ميفقد اعصابة ويتخبل.

نزل هو راد يكلي مترحين بس اني بسرعة اشرت بعيوني لعمة حميدة كالت: ذهوبه يمه من تنزلين تشترين حوايج الكيك جيبلي وياج علج من هذا ابو الهيل الانطيتينياه البارحة. معدتي ارتاحت عليه. واكو كم حاجة راح اكتبلجياها بورقة.
ماجد: اني اجيبلج يمه شمحتاجة؟
عمة حميدة: لا انت تتأخر علي هي تروح تنزل تجيبهن وذبها علي وروح. ليش انتظرك لليل.
سكت هو بعدما حس عمة حميدة متقصده تسوي هيج حتى اروح وياه.

كتبتلي عمة حميدة قائمة اجيبها الها من السوبر ماركت قريتها كلها حلويات وهي عدها سكر صفنت!
كعدت كدام بالسيارة يم ماجد وهو ينافخ مثل البزون ماخذني وياه على اعصابه.
كعدن اسراء واختها وره.
طلعنه. ساكتين مردتهن ينتبهن انه احنه منحجي مع بعض فكلت هل اتنازل مؤقتاً واحجي وياه: هذا المحل جديد هنا؟
دار علي هو مستغرب كلي: هاا؟
ذهب: المحل جديد؟ اول مره اشوفه؟
غلس شوية بس مجبور يجاوب: اي. جديد.

ذهب: من نرجع خل ننزل يمه. يمكن اكو شي يعجبني.
رجع باوعلي بعين ونص كأنما يكلي وبعدين وياج.
غلست كتله: مبين عدهم ملابس حلوه. محتاجه ملابس سود كشخه للطلعة.
ماجد: ان شاءالله.
وين الورقة مال امي حميدة اشوفها؟
انطيته الورقة.
باوعلها كلي متعجب: شنو هاي؟ كلها حلويات؟ والسكر؟
ذهب: قابل راح تاكلهم كلهم بنفس اليوم.
ماجد: يعني هسه اني رايح ومتعني لهناك علمود هاي الزعابيل؟

ذهب: ليش مستغرب؟ بس هي تحب الحلويات والكيك؟ لو عليك حلال وعليها حرام.
ماجد: اني ماعندي سكر.
ذهب: اسم الله عليك.
ابتسم نص ابتسامة وحب يردلياها: لا بعد مااكل سكريات. خاف يصير بيه سكر واموت.
ذهب: اسم الله عليك. هسه شجاب طاري الموت؟
غمزلي وضحك بصوت ناصي: لو اموت.
لو اموت. حتى لو بيها موت بعد.
ذهب: اممم.
ماجد: مااكل شي حلو.
غلست.
هن ساكتات كلش لاحس ولانفس وكل وحده تباوع من شباك.
شغل الراديو وعلاه بعدين لزم ايدي.

باوعتله غمزلي وضحك. غلست.
وصلناهن نزلت اسراء وركعت باب السيارة التفت عليها ماجد.
دخلت بسرعة للبيت. نزلت الثانية كالت: مع السلامة.
رديت اني عليها.
سحبت ايدي منه كلي وهو يضحك: شبيج هيجي مستنكفه غير امشيلج فلمج كدامهن؟
ذهب: ماكو فلم مااحتاج اسوي افلام.
ماجد: لاخطية هههههه. اسم عليك ها؟
غلست.
وصلنه للسوبر ماركت كال: هسه التمثيليه وخلصت المن نازلين هنا بعد؟

ذهب: كتلك ماكو تمثيليه ولافلم اني جاية اريد حوايج للكيك لو بس تعرف تاكلها من اسويها؟
ماجد: مو كتلج بعد مااكل حلاة.
ذهب: خوش. نشوف بالله. بس احنه هم نريد ناكل مو بس انت.
ماجد: نزلي. نزلي اخذي اللي يعجبج ماراح احجي. بس اريد اشوف منو المياكله بعدين ويكول تلعب نفسي.
نزلت اخذت شغلات الكيك وبعدين القائمة مال عمه حميدة وهو راح جاب اجبان وبساكت وحليب للاولاد.

خلصنه وحاسبنه عبرت علينه مره بيدها جيس متسوكه من السوبر ماركت مبين بي دقوس ( شطه حارة ).
حسيت نفسي مطكت عليه حسيت بطعمه بحلكي كلش اشتهيته.
فتح السيارة واشرلي صعدي كتله: ماجد؟
باوعلي وهو يصعد: شكو بعد؟
كعدت كتله: هاي المرة مشترية دقوس.
ماجد: شنو؟
ذهب: دقوس حار شطه حاره.
ماجد: اي؟
ذهب: اشتهيته. احس ابني يمطك هسه عليه.
ماجد: مو زين الحار على معدتج.
طبك الباب وشغل السيارة واني الباب يمي مفتوح.

دار علي منتظرني اسده.
انقهرت. مو بيدي بس انقهرت لان اول مره احس هيج اشتهي حاجة احس طعمها بحلكي.
دمعت عيوني كلي: سدي الباب!
طبكت الباب حيل ودرت وجهي عالشباك.
ماجد: اكو مكان بعد لو بس هذا؟
طاحت دموعي كتله: مااريد شي منك مااريد اي شي.
التفت علي هو متعجب كلي: شبيج؟ ليش تبجين؟
بقيت ساكته وامسح دموعي.
ماجد: شبيج غير افتهم؟
بس لا علمود الدقوس؟
ذهب: لادقوس ولا سم. مااريد منك شي الله لايعوزني.
صفن شوية بعدين ضحك.

عافني ونزل راح جاب دقوس واجه خلاه بحضني: هاج هذا الدقوس بلا بجي هههههههههههههههه اول مره اشوف وحده تبجي على دقوس هههههههههه والله بلوه.
ذهب: اي طبعاً تضحك انت التتوحم لو اني متحس بهالشي.
ماجد: ههههههههه اي دكولي هيج اني شمدريني ههههههه هسه اليتوحم يتوحم على دجاجه على تشريب على كباب على بيتزا على اي شي مو دقوس ههههههه.
ذهب: اي مو بكيفي هو.
ماجد: ديالله يالله تبجين عبالك جاهل زغيرون ويريد حاجه.

سكت ثواني ورجع ضحك حيل، باوعتله صرت عصبية كتله: اذا متسكت تره والله انزل.
باوعلي كلي: سويها حتى اعدمج هنا بنص الشارع.
ذهب: اذا تضحك بعد اسويها وكول كالت.
ماادري هي هرمونات الحمل لو شبيه احس بعصبية مو طبيعية مو مثل هدوئي القديم.
وصلنه للبيت عبالي واح ينزلني ويطلع بس نزل وياي.
نزل الاغراض واني صعدت ابدل ملابسي.
نزلت لكيته واكف بالمطبخ يم عمه حميدة وضحكون اسمعها تكله: خطيه. هاي من الحمل يأثر عليها هههههه.

ماجد: والله لو شايفتها شلون تبجي تشبعين ضحك.
دخلت عليهم للمطبخ باوعتله هو سكت.
عمة حميدة: هايمة شبيج ضايجة؟
ذهب: مابيه يمه. نسيت جنطتي مااخذتها ورحت واتندمت.
عمة حميدة: رجلج وياج متحتاجين ان شاءالله.
ذهب: لا الواحد يصرف من جيبه ولا العازه للناس؟
ضحك هو على كيف.
عمة حميدة: لج ياناس ذول هذا غير ابو رائد الورد غير كله فلوس كله خير ودلال انت بس أشري وكولي اريد فلان حاجة وشوفي.

ذهب: ابو رائد الدقوس سوالنه عليه قصة.
ضحك هو حيل وهي ضحكت وياه كال: اني سويت قصة عالدقوس؟ بشرفج اني؟
الك الله ياللفقير.
ذهب: اي كلش فقير تنكط فقاره.
بيومها عالعشا اكلت دقوس كانما لاول مره اكله بحياتي.
كل شوية ماجد يشيله من كدامي وارجعه.
اخر شي صار عصبي كلي: اذا اشتكيتي من معدتج بتالي الليل متلومين الا نفسج.
ذهب: انت الولد كله متريده وتريدلك حجه كول هيج لتظل تلف وتدور.

اكل واحجي واشر بأيدي ومنفعله وعمه حميده مخليه ايدها على خدها وصافنه علي مبتسمه.
باوعلها هو وضحكوا.
غلست.
كملت اكل وطلبت من البنات جاي.
كعدت بالهول انتظر الجاي اجه هو جابلي لبن: هذا احسن من الجاي.
ذهب: مااحبه.
ماجد: من شوكت؟ يومية تشربين من شوكت متحبيه؟
ذهب: من اليوم. كرهته.
ماجد: ميخالف. شوية شوية حتى لو كل ساعة شربه وحده احسنلج والله يبرد معدتج.
اخذته وخليته كدامي وكل شوية اغلس ويأشرلي شربي.

بقى شوية غلست وصعدت فوك.
اخذت فراشي ورحت للغرفة الاخيرة نعست.
غفيت.
ماادري بيش الساعة حسيت بحركة يمي عبالي اتحلم غلست، فجأة حسيت لحافي انرفع وواحد حضني كمزت.
ماجد: شبيج. شبيج. شبيج من كل شي مخترعة.
ذهب: استغفر الله.
كعدت عدل باوعتله: شكو؟
ماجد: ماكو. واحد يريد مرته.
ذهب: اريد انام مالي خلك مشكلة بهالليل. بيش الساعة هسه؟
ماجد: عوفي الساعة وتعاي نامي اني هم اريد انام بدون مشاكل.

سحبني من ايدي بحضنه ردت ارجع اكوم مخلاني: اششش. لتتحركين كافي مصختيها.
شكتت شوية بعدين كتله: ماجد تره اني تعبانه. نفسيتي تعبانه. وماعندي طاقة بعد اتحمل ضرب واهانة وغلط وحجي. الكم سنة العشتها بهذا البيت شفت بيها اللي غيري مشافوه عمر كامل.
ماجد: ادري.
ذهب: مدام تدري معناها لازم تعرف اكو شي بداخلي انكسر. اكو شي بداخلي اتغير. يمكن اخيراً حسيت وعرفت اني مالي قيمة هنا ولازم هالشي يتغير.

ماجد: مالج قيمة؟ شلون حسبتيها وعرفتي مالج قيمة؟
ذهب: ميحتاجلها حساب. اني هنا موجوده حتى انت تنفس عن عصبيتك شوكت ميعجبك وترضي رجولتك شوكت متريد.
اني كلت هالكلمة وهو اتخبل.
رفع راسه بوجهي كلي: شنو؟
ارضي رجولتي؟ شنو يعني ارضي رجولتي؟ شلون ارضي رجولتي؟

مرتي انت لو مو مرتي؟ ارضي رجولتي شلون؟ ويه مرتي غير لعد المن اروح؟ المن اروح فهميني؟ تردين اروح ارضي رجولتي على كولتج بره البيت؟ ويه وحده ثانية؟ ماشي. ماشي ذهب. انت الجنيتي على نفسج.
راد يكوم بس راسي على ايده دفعني حتى يكوم طلع طرف جتفي شوية.
صفن.
رجع دنك علي كلي: لا. مادام اني ماخذج حتى ارضي رجولتي معناها لازم ارضيها ليش احرم نفسي.
سحب الدشداشة ودار ظهري كلي: ومسويه وشمم.

ذهب: اكعد ماجد. لاتتخبل بهالليل.
ماجد: وليش مااتخبل. مو مرتي انت؟ وين ارضي رجولتي غير يم مرتي؟ ويييينننن؟
صرخ بوجهي.
دنك يبوس بيه واني ساكته اعرف نفسي جفصت هالمرة ومصختها بالحجاية هاي بس اني لهسه مقهورة لان ضربني وحتى من عرف بحجي امه غلس.
دنك يبوس بركبتي واني مغلسه بعدين رجع طلع جتفي مكان الوشم.
باسه على كيف اني رجفت.
رفع راسه باوعلي: لو متحبيني مترجفين بيدي. لو مترضيج رجولتي جان مسويتي هالوشم.

ذهب: سويته لنفسي.
ماجد: اممم. لنفسج.
رجع دنك باسه واني اتدغدغ واكش وهو متونس.
جر دشداشتي راح ينزعني مقبلت: اريد انام.
ماجد: واني اريد ارضي رجولتي.
ذهب: وبعدين يعني؟
ماجد: حقي لو مو حقي؟
ذهب: لا مو حقك.
ماجد: ماكو شي مو حقي.
كلي وهو ينزعني الدشداشة كوه واني لازمتها كوه بس سحبها.
ونزل بيه بوس واني مقاومة.
حضني حيل كسر عظامي.
ذهب: ماجد!
ماجد: اممم؟
ذهب: حامل. حامملل.
ماجد: اممم. ادري؟‍؟‍؟‍؟

فجاة سمعت صوت رائد كعد يبجي: ابني؟ رائد يمكن كعد. ماجد.
باوعلي كلي: هسه وكته؟
ذهب: ابني يبجي. وخر خل اروح.
ماجد: اني رايحله.
كام يريد يروحله اني كعدت مديت ايدي على دشداشتي هو رأساً جرها من ايدي واخذها وياه: جيبي. ابقي هيج.
ذهب: يااا.
راح واخذها وياه.
اتلفلفت باللحاف ونمت.
بس حسيت بمعدتي بيها حرارة. طلعت علي حرارة الدقوس.
نوم رائد ورجع اندحس وياي جوه اللحاف وحضني.
ماجد: تحبيني؟
غلست.
جرني بحضنه: تحبيني لو لا؟

كتله بعصبية: لاااا.
ضحك: والله؟ لعد المن رحتي وياي من وصلت اسراء ورواء؟
ذهب: كتلك رايحه اجيب حوايج الكيك.
ماجد: جذابة من عيونج، تحبيني تموتين علي اصلاً.
ذهب: على شنو؟ شنو اول واخر الخلق؟
ماجد: لااا. اول واخر سيد ماجد الحار ومكسب.
ضحكت على كيف كتله: اي وعليه سمسم.
ماجد: ههههه لا عليه دقوس.
باوعتله: كله منك معدتي ظل تأذيني.
ماجد: كله مني؟ واني شكو؟ كتلج لاتاكلين مو زين عليج متسمعين الحجي.

ذهب: جنت نايمة مابيه شي ولاحاسة بشي منو اجه كعدني وكلب معدتي؟
ماجد: كلب معدتج؟ لو كلب كيانج؟
حصرتني الضحكه وضحكت غصباً عني كتله: انت صاير مو طبيعي تره روح اتعالج.
درت وجهي وانطيته ظهري.
خله ايده عالوشم يتلمسه وبعدين باسه: بعد متكدرين تنطيني ظهرج. عجبني هذا الوشم حبيته. مسويتلي تاج والله يعلم بعد شمسويه.
ذهب: ماكو شي.
ماجد: ممسوية بعد واحد يعني؟
ذهب: لاا. بعد واحد وين يعني؟ هو بس هذا.

ماجد: باي مكان. المهم اريدج.
؟‍؟‍؟‍؟
؟‍؟‍؟‍؟
؟‍؟‍؟‍؟
الصبح كعدت على صوت التليفون.
دازلي مسج: جان المفروض تكتبين اسمي وشم.
ضحكت ورديت عليه: غير لو احبك.
ماجد: نشوف من ارجع.
كعدت سويتله كيك ومعجنات عمة حميدة كاعده تسوي محشي ويه البنات وتباوعلي: اليوم نزل وجهه مورد؟
ضحكت كتلها: منو؟
عمة حميدة: ابوي.
ضحكت كتلها: شمدريني.
عمة حميدة: علينه. خلصها الصبح ضحك وشقا.
ذهب: بس يمكم.

عمة حميدة: صحيح. بس انت هم نزلتي وجهج مورد.
ضحكت حيل كتلها: اليوم تحللين الوجوه؟
عمة حميدة: اي طبعاً غير مبين عليكم الصلح هههه.
ذهب: اصلاً اتعاركنة مو اتصالحنه.
عمة حميدة: وهو على كلبه هالعركة عسل. يدري بيج حامل واعصابج تعبانه هالمرة مو مثل كل حمل.
ذهب: شبيها اعصابي تعبانه؟
عمة حميدة: انت ام الدقوس لو غيرج ههههههه.
ذهب: كلش اشتهيته والله يمه ظليت امطك مثل الجهال عليه متت عليه.

ضحكت كالت: هالمرة وحامج غير. يمكن بنوته. ،
درت عليها كتلها: صدك؟
عمة حميدة: يكولون. اني لاحربت الحبالة ولاالله رزقني بجهال بس يكولون اذا الحمل يختلف معناها الطفل يختلف.
ذهب: ياريت بنية. اسميها شمس.
عمه حميدة: بعد انت وابوها اتفقوا.
ذهب: هو اني اكدر عليه ابوها.
عمة حميدة: افقر واطيب منه متلكين.
ذهب: اي كلش فقير خطية يكسر الخاطر. يمج فقير مو يمي.
عمة حميدة: لا مو بس يمي مو هل جاي اشوفه شبي شمسوي؟

ذهب: اي طبعاً كدامج ميسوي شي خو ميطلع طناكيره عليج.
انفتح باب المطبخ ودخل ماجد بيده صينينة.
خلاها عالطاولة وكلي: مطلع عليج طناكيري مو؟
غلست. عمة حميدة ضحكت كلتله: هاي شنو؟
ماجد: بيت ضياء مسوين ثواب مدري شنو جابلياها للشركة ادري وين اخليها.
ذهب: شنو بيها؟
قبل ميفتحها الريحة دخلت بخشمي شمست ريحة مندي دجاج.
ذهب: مبين طيب ريحته تشهي. ووياه دقوس.
ضحك كال: اول تالي تدورين اكل وتتشهين ههههه.

عمة حميدة: صلي على محمد علواه تاكل. هاي النساوه مال بنية ان شاءالله.
ماجد: بنيتيش؟
ذهب: بتي.
ماجد: اذا بنية اريد اسميها، رغد.
باوعتله: كتله منو هاي رغد؟
ماجد: لاتحرجيني.
ذهب: بتي اني اسميها.
شموسه رغد شنو.
ماجد: نشوف.
ذهب: نشوف
.
‏رُوحي في هَوى حُبببببببك تاهت كثييراً؟

رواية صبرا يا قلبي الجزء الثاني للكاتبة روز الفياض الفصل السابع

هاي ألدنيا مو دنياچ عُوفيها وأحضنيني؟
.
بالليل بعد العشا اشرلي ماجد اصعد.
صعدت: شكو؟
سحبني من ايدي لان جنت واكفة اباب الغرفة.
ماجد: ماكو. نريد انام.
ذهب: نام. منو لازمك.
ماجد: دتعاي.
قفل الباب.
ذهب: تره ماانام هنا. بعد انت بغرفة واني بغرفة.
ضحك.
ماجد: اي هههه مو بكيفج هو ههههه
ذهب: لاتضحك. احجي صدك.
ماجد: اوكي.
نزع التيشيرت وراح نام وخله ايديه جوه راسه: يالله. روحي لغير غرفة اذا تكدرين تفتحين الباب.

ذهب: انطيني المفتاح.
ماجد: لا بالله؟ انت فتحيه بدون مفتاح.
ذهب: شكلولك علي قبل جنت اشتغل حرامي واعرف شلون اكسر القفل؟
ماجد: معناها لاتعبين نفسج وانت اصلاً تعبانه تعاي نامي ومالي علاقة بيج انت بحالج واني بحالي. ،
ذهب: كول والله؟
ماجد: الحلفان حرام ( لاتحلف كاذباً او صادقاً )
ذهب: شنو هاي حديث لو اية؟ ووين المصدر؟
ماجد: شمدريني وين اتذكر اتذكرها من ايام المدرسة بعد يامصدر.
طفت الكهرباء.

فتح الموبايل مشيت اني للجرباية على ضوه الموبايل كعدت عالجرباية.
انتظرت ابو جبار يشغل المولد ماكو.
ذهب: ابو جبار نايم؟
ماجد: لا ماكو گاز.
ذهب: ونبقى بالحر.
ماجد: زين الجو مو حارة.
ذهب: والامبيرية؟
ماجد: ماادري. انتظري شوية.
ذهب: احتريت.
ماجد: نزعي ملابسج.
ذهب: اي عندك عيد.
ماجد: ههههه علمودج. مو محتره؟
ذهب: اي. بس ماانزع.
ماجد: براحتج.
بقينه شوية كلش احتريت رغم الجو جان زين يعتبر.

رحت غسلت ورجعت مااتحملت نزع الدشداشة.
تمددت وانطيته ظهري.
حسيت بي اتندنه علي كتله: لتفكر تدنه هنا.
ماجد: ماافكر.
حضني ورجع كال: هاي تلقائياً تصير بدون تفكير.
ضحكت كتله: شوف اللواته.
ماجد: بعد لتلبسين داشداشة. جنها برشوت.
ذهب: ههههههه اي تدلل. مااكدر اتحمل الملابس اموت من الحر واحسها ثكيله علي. الدشداشة اريح شي. ومااكدر البس بيجاما تأذي بطني.
ماجد: اممم. لتلبسين شي.
ذهب: هههههههههه تريدها من الله.

ماجد: علمود رغودة اني.
كعدت درت عليه: رغودة منو؟ شنو فلم رغوده بلا زحمة؟
ماجد: ماكو فلم. عاجبني اسمي بتي رغد بيها شي هاي؟
ذهب: منو هي؟
ماجد: ماكو محد. عاجبني الاسم.
ذهب: منو هييي؟
ظل يضحك كتله: يعني عدها تاريخ وياك؟
ماجد: اي تاريخ وجغرافية هههههه.
ذهب: صاحبتك؟ ليش مكايلي عليها.

بقى يضحك كل شوية. بعدين كال: قديمة هاي من جنت بالمدرسة. جنت اوكفلها بالركن مال المدرسة انتظرها وتعبر هي وكصيبتها علي وانطيها الرسالة. سوالف قديمة هاي ههههه.
من شفته يضحك ويسولف عادي اتنرفزت: بس جنت تحبها؟
ماجد: اي اموت عليها هههه.
ذهب: لا لاتضحك. احجي صدك جنت تحبها مو صح؟
ماكو واحد يتذكر حبيبته قبل سنين ويريد يسمي بته عليها الا اذا يحبها ومناسيها..

حصرتني البجية. وهو يضحك كلش انقهرت ودمعت عيوني هو زاد بالضحك.
ذهب: سميها اني هم اغير اسم واحد من الجهال.
رجعت نمت وانطيتها ظهري.
كعد دراني عليه: شتسميه؟
كلي وهو صافن بوجهي ورافع حواجبه مستفسر.
خفت.
بلعت ريكي: بكيفي اختارلي اسم واسميه بس انت تسمي على حبيبتك.
ماجد: اني رجال. عندي احب اصاحب اتزوج محد اله عندي شي. بس انت مره.
ذهب: اييي؟
ماجد: اي. اعدمج اعدام لو كلتي كلمة بعد.

ذهب: ليش يابه بس انت تحمس بكلبي صارلك ساعة.
ماجد: مالج كل حق. كل حق ما الج تردين هالرد. اني رجال طبيعي يكون عندي ماضي. بس انت اي كلمة منج حتى لو بالضحك مااقبلها. اعرف. اتزوجت لان انت ماعندج ماضي قبلي بس مااقبل تتشاقين بهيج امور. مااتحمل. لتعيديها بعد. مفهوم؟
بقيت ساكته.
ماجد: مفهووم؟
ذهب: لا مو مفهوم، طلع عندك ماضي؟ يعني مو بس رغودة تعرف؟ احجيلي بالله؟ غرد خل اعرف مااريد اتافاجأ بقصة جديدة بعدين.

ماجد: قصتيش؟
ذهب: قصة مثل قصة شيمائو.
ماجد: رغد وين وشيماء وين؟ شجاب الثرى عالثريا.
استفزني رغم جان يضحك متعمد يضوجني.
ذهب: مادام ثريا المن اجتيني؟ ليش ماخطبتها بدل هالعذاب؟ وين جنت عنها قبل المن اجيتني اذا انت هيج متيم بحبها؟
ماجد: انت غير. جنت اريد ام لجهالي مثل القطة المغمضة كل شي متعرف وكل شي متفهم بهالسوالف وكل شي ماعدها قبلي وكل شي مشايفة قبلي بس الحب غير.

انقهرت كتله: امداني لاصاحبت لاحبيت لالعبت لعب مثل البنات جان حظي شكبرة هسه وياك.
نمت واتغطيت.
غمضت حتى لاابجي.
حضني يبوس بجتفي: مو على اساس حاره؟
ذهب: وخر عفيه. وخر خليني انطمر.
ماجد: اسم الله عليكم انت ورغوده.
طفرت من مكاني وذبيت اللحاف كتله بعصبية وصياح: كافيي عاادد. مصختها. رغوده ورغوده لتشوفني ساكتة ياخذك الواهس.

ضحك حيل جرني من ايدي دفعته: لج شبيج؟ محد يتشاقى وياج؟ رغودتيش؟ هو اني كل عمري ماصاحبت بنية.
ذهب: اي اضحك على عقلي المطفية القطة المغمضة التتقشمر بكلمتين.
ماجد: هههههههههههههههههههههه ههههههههههه.
والله اتشاقى. والله العظيم وروح ابوي.
ذهب: عاب هيجي شقا..
حسيت انخفض ضغطي من العصبية مديت ايدي عليه كتله: ايدك.
ماجد: شكو؟
ذهب: مااشوف.
كام هو كعدني عالجرباية.
بجيت. رجع ضحك.
ذهب: خليني بس اصير زينة. بس اصير زينة.

ماجد: شتسوين؟
ذهب: شسوي، البس عباتي واشرد منك ومن جهالك. بس خل اصير زينة. خليك انت ورغودة.
دفعني تمددت.
ماجد: رغودة الكبد.
حضني وهو يضحك.
ذهب: عفيه لاتحجي مااريد انغث.
ماجد: ههههههههههه والله قشمر.
ذهب: اخخخ. تعبت.
ماجد: منين؟
ذهب: منك ومن صاحباتك.
ماجد:؟ آخ يابة. صدك انت فطيرة.
بجيت: اي اضحك اضحك. تحرك كلبي وتتونس واني اعصابي متنهيه.
ماجد:؟
عفيه ابقى هيج منا احدما تولدين خلينه نتونس ونشبع ضحك.

ذهب: قبل من ابجي تضوج وتكول كلبي يظل يوجعني. هسه تتونس.
ماجد: هههههههههههه لج انت صايرة سينما.
سكت شوية وباس خدي: يارغودة يا شيماء. غير انت الكبد مالي.
ذهب: بلا كبد بلا جلاوي كافي جذب.
ماجد: والله ماكو غيرج. لاقبل ولا هسه.
وذهب: وبعدين؟
ماجد: ولابعدين. انت وبس.
ذهب: صحيح. صدكتك. كالت نسرين.
ماجد: شكالت؟
ذهب: كالت ماكو واحد منهم اله امان ووفي.

ماجد: هههههه هاي نسرين هيج تكول؟ باجر اكل لضياء حتى ياخذ راحته مادام بالحالتين متهم هههههه.
خلص الليل ضحك لحدما اشتعلت الكهرباء.
ماجد: انوب سوت وشم وظلت تتكلب. وبس تدنه يمها كالت تعبانه ومحتره. اوووف يارب.
.
.
.
مرت الايام ورحت اسوي سونار.
رحنه اني وماما للدكتورة وطلعت حامل ببنية.
امي: رجلج بس لا ميحب البنات؟
ذهب: لا مو من هالنوع.
امي: والله اني لحد متجي هالطفلة ميته من القلق.

ذهب: ماما ذكري الله. الحمدلله ماعندي ولا مشكلة ولا الم.
امي: اخخ راح اموت من وراج يومية قصة.
ذهب: هو بابا جان ميحجيلج شي شوداه وحجالج.
امي: اي طبعاً تردين كله سوالفج ومصايبج من وراي خاف احجي ويزعل الاستاذ.
ذهب: ههههه ماما الاستاذ هذا الروح والرية.
امي: اي عيني اي هو هذا هم حظه فوك الاذية يزيد الحب والدلال.
ذهب: مانما شبيج هيجي عصبية ومتحمله عليه هو شمسوي؟

امي: هسه ممسوي شي هسه. بس هو سواياته قبل مال مية سنة مقدم.
رجعت البيت فرحانه حيل امي بقت عدنه للعشا وبعدين وصلها ماجد للبيت.
من رجع كلي: خالتي تكلي على كيفك وياها شوية شوية.
ضحكت.
ماجد: تشتكين مني يعني؟
ذهب: مااحتاج اشتكي. كلها تعرفك وتعرف سوالفك ابو رغودة عيني.
خله السويج عالميز ودار علي: كولي والله؟
ذهب: والله انت سوالفك هواي يعني شمتوقع.
ماجد: لج كولي والله بنية؟
ذهب: منو كال؟ اني كلت بنية؟

ماجد: كلتي ابو رغودة.
ذهب: عمت عينها رغودة شنو. هاي العايزتني. اخلص من شيماء تجيني رغد اخلص من رغد تطلعي اسراء ابتليت اتزوجت.
ماجد: شكد تحجين، لج بابا جاوبي شطلع بالسونار بنية لو ولد؟
حبيت اشلع كلبه شوية: ممبين. تكول مكلوب مدري ساد رجليه.
ماجد: وليش مرحتي لغير سونار. يجوز هاي متعرف متفتهم.
ذهب: واني بيه حيل افتر من سونار لسونار علمود اعرف ولد لو بنية! كل شي من الله حياه الله.

بقى واكف شوية يباوعلي بعدين دار نزل ملابس يريد يدخل يسبح.
تمددت عالجرباية وفتحت التليفون اباوع على صفحات ملابس الاطفال اكلب بالصور مال فساتين البنات.
عبر من يمي رايح للحمام لاف خصره بالمنشف.
ماجد: غير اضوج اذا منتظر خبر على موضوع وبعدين مااحصل جواب شافي.
مجاوبته.
دنك يشوف اني بشنو مشغولة.
ماجد: اهههههااا بنية. عرفتها والله. رغد. ههههههه الحمدلله رب العالمين من انطيتني فرصة اسمي اسم حبيبتي.

ذهب: حبها برص.
دخل للحمام يضحك وطلع فرحان كل شوية يسألني: الله عليج ولد لو بنية؟
ذهب: رغودة.
ماجد: فدوه لعينها. يابعد ابوها.
ضحكت.
ماجد: شيجيبها، من هسه اشتاقيتلها.
ذهب: مو على اساس متريد بعد طفل ونزليه وذبيه ومدري شنو؟
ماجد: لج لو علي اجيب درزن. بس انت وضعج مو مال تعب. انوب بنية ههههه والله مااكدر اتخيل عدنه بنية زغيرة تلعب وتتكلب بالبيت ياربي. الف الحمدلله، .
ذهب: فرحان؟

ماجد: احس بحياتي مفرحان هيجي فرحة.
ذهب: على اساس من اتزوجنه كلت مفرحان هيج فرحة؟
ماجد: لابعد انت صرتي قديمة. هسه رغودة.
ذهب: بالقران اذا فكرت مجرد فكرة تسميها هيج اسم ياماجد الا اخلي الدم للركب.
ماجد: .؟
جان فرحان بصورة مو طبيعية لدرجة اجه بيوم من الايام بالليل جايب عليه زغيرة خلاها عالميز تواليت.
فتحتها لكيت بيها تراجي زغار ومحبس مال طفل.
عبالي جايبها هدية لاحد.
من راد ينام حضني: شفتي شجبت لرغودة؟

ذهب: استغفر الله العظيم.
ماجد: لعد شسمها؟ انت ماعندج اسم شسميها؟
ذهب: عندي اسمها شمس.
ماجد: هاااا. شمس! مو حلو.
ذهب: يجنن اصلاً.
ماجد: يعني شموسة؟
ذهب: ان شاءالله.
ماجد: شفتي شجبتلها؟
ذهب: شنو؟
ماجد: جبتلها تراجي ومحبس من ابو تبارك.
ذهب: ياا هاي الها؟
ماجد: اممم.
ذهب: فدوة. الله يخليك ويرزقك ويرسع رزقك وتجيب وتدللها ان شاءالله.
ماجد: اللهم آمين.
انت من تولدين بالسلامة ان شاءالله هديتج غير شكل.

ذهب: بعد عمري. الله لايحرمني منك.
من دخلت بالخامس والعلوية كما هي.
اتعلمت كل خميس تروح لبيت اختها وتبقى يومين وترجع.
تروح طبيعية وترجع منفوخة.
تاخذلها يومين متحجي وياي وتليفونها ليل ونهار على اذنها تحجي ويه اختها وبنات اختها.
بس كدام ماجد طبيعية.

اسراء بقت عد اهلها متقبل ترجع تريد تطلك وزوجها متمسك بيها وصارت هواي مشاكل واتدخلت ناس وهي مصره الى ان بيوم اجانه عبدالله هو وزينب وظل يحجي اني لان مقهورة وكلبي متحمل كتله: هي مدام مخليه ابالها تطلك بعد لتعبون نفسكم. مدام اكو احد يشجعها عالطلاك معناها متستقر ولا ترتاح الا تطلك.
العلوية كاعده دارت علي تباوعلي وماجد هم خزرني بس زينب كالت: اي صحيح هي لوما لاكية خالتي مشجعتها هي والعلوية جان ركدت.

العلوية: غير ممرتاحة قابل نشجعها وهي مرتاحة؟
رد عليها ماجد بحده: شنو يعني ممرتاحة؟ الولد ماكو منه واهله فد ناس فقره وطبيبن واوادم ماكو هيج بس انتن مشجعاتها.
عبدالله: اذا تطلك والله ادمرها. يومية زوجوني وطلكوني شنو لعب هو عبالها ابوي مات تاخذ راحتها.
العلوية: شتردون من البنية محاربينها؟

ماجد: عدوان مو اخوان غير! شنو يعني محاربينها؟ تدريها بكيفها تتصرف؟ اصلا لعلمج عمي ابو علي كال لو تذب على نفسها نفط وتحركها طلاك ماكو.
العلوية: شتردون منها الله واكبر شهالجبروت.
عافتنه وراحت دارت علي زينب كالت بصوت ناصي: جبروت! ترديها تلعب لعب يالله ترتاحين.
ذهب: ههههه اي والله.
زينب: وانت شلون ساكتة؟
ذهب: والله يازينب اني معتمدة على عمة حميدة وبيت عمو ابو علي لان مااكدر اسوي شي بس احجي شي تصير مشكلة.

زينب: اي ماجد ميقبل تحجين تره.
ذهب: شحدي احجي. وهي العلوية غير تكلب الدنيا شفتي هسه شلون زعلت متنطي بيها
زينب: شلون تنطي بيها غير تريدها اله.
ذهب: على جثتي اخليج ياسليمة تجيبين بت اختج على راسي.
زينب: شفايتلج تجيبها على راسج. خاف باجر ترجعج لاهلج وتجيبها بمكانج.
ذهب: امنيتهن هاي.
زينب: بس ميربحن وداعتج مو هن علويات بس والله انت تشورين لان فقيرة ومابيج اذية وهن كلهن اذية.

ذهب: مفوضة امري بيهن لله. الله ياخذ حقي ويفشل كيدهن وخططهن.
زينب: دوم كولي ( اللهم اجعل كيدهم في نحورهم )
ذهب: اللهم آمين.
بعد ماطلعوا ظلت الحجية تحجي وتدردم لان حجيت اني على اسراء.
دخل ماجد سمعها تحجي كللها: شبيج يمه؟ ليش عصبية؟
العلوية: كله منك ومن مرتك ام المشاكل. كل مشكلة صارت عدنه بسببها من يوم الطبت لهذا البيت اجتنه المشاكل يومية مشكلة يومية مشكلة يوم الاسود الاجتنه وطبت علينه.

اني واكفه بالمطبخ متفاجأة بس محجيت اي شي بقيت واكفة واسمعها هو واكف يم باب الغرفة يسمعها من خلصت كللها: يامشكلة الصارت بسببها؟
العلوية: كلهن. كل المشاكل الصارت بينهوالمصايب منها.

ماجد: لان حجت على سريوه احترك كلبج. يمه. سريوه هاي ذبتج وخلتج بس انشليتي ووكالت مااخدمها. واختج الكاتله نفسج عليها كالت بتي مو من مسؤوليتها تخدمها بتي زغيرة وتريد تكمل مدرسة قابل امها وتخدمها امكم انتو خدموها تجيبلوها خدامة بكيفكم بس بتي متخدمها. وطلتكها بسبب هالمرضوع وانت من عرفتي طلكتها وسمعتي ابوي كال شلون تطلك بت اخوي هسه يزعل واني ضجت من حجاية ابوي تتذكرين شكلتي؟ تتذكريين؟

كلتي لاتضوج. هاي جلبة مو الك.
هسه شتغير؟ من اتزوجت لليوم حبنج وظلن يسالن عليج وصرتي عزيزة. بس مو ميتات عليج. يردن خراب بيتي..
اباوعله بأشر على صدره بالسويج حيل: يردن خراب بيتي، تردينهن يخربن بيتي؟ ترضين يخربن بيتي؟ اختج وبناتها اعز مني ومن جهالي صارن؟ تدعين على ابني وهو ابطن امه علمود سريوه الادب سز وعلموذ اختج؟ ابني طفل بعده مصاير تدعين عليه؟! ليش؟ لييييششش؟
مو بس اني ابنج. ابنج الوحيد اني يممممه!

العلوية: اني ادعي على ابنك؟! شلون ادعي على ابنك؟ جهالك ذوله روحي من الدنيا وهمه المصبريني عليها وعلى مصايبها، شلون ادعي على ابنك؟ تجذب عليك وانت عدك حجايتها سيف تجذب امك وتصدكها..
انعم الله عليك.
انعم الله عليك يمه. ماعليك عتب دامغتك دمغ بالسحوره.

هو رأساً فقد اعصابه وشمر السويج والتليفون كللها: باذني سمعتج تدعين على ابني. اجذب اذني؟ من حجت وياج نجلاء تتذكرين؟ ان شاءالله متفرح بي، لييييشششش؟ ليييششش؟ لييييش يممممه ليييش فهميني؟
سريوه طلعت اعز منيييييي؟
والسحوره منوالجان يسويليااااههههاااا؟ اذكرج بسوالفها وسوالف اختج القديممممة؟
اتحنطت واتخشبت رجليه لاكدرت اروح احجي وياه واطلعه من يمها ولاكدرت اكعد ولا اتحرك ابددد.

بقيت واكفة بمكاني وارجفففف وكلبي يدك يدك يدك.
ولساني انربط اريد اكله كافي مكدرت.
اباوعله وجهه صار احمر دم وعيونه حمر.
وبعدين ركض لتليفونها فتحه.
استغربت راساً فتحلها المكالمات المسجلة بالبرنامج إلى اني منزلته مال تسجيل المكالمات.
بالبداية استغربت بعدين اتذكرت البرنامج اللي نزلته وردت احذفه بس نسيته..
الظاهر هو مكلب بالتليفون وشايف البرنامج وسامع المكالمات. ،
الحمدلله محذفت البرنامج.

انصدمت واني اسمع المكالمات كلها محورها اني ام السحورة المصلوخه لان بشرتي بيضا اليابسة لان ضعيفه وهن كلهن سمان ام الزلم إلى جان ظلت بايره لوما سحرت لماجد وخليته ياخذني ويستر علي، ولوما سراج شايف سوالفي مو زينه ماعافني بيوم المهر والفكر بت الفكر الجان حسره علي اللكمة وعدهم شبعت وشفت.
الما استحي اتغزل بي كدامهم واكله حبيبي وحياتي.

وصوت ضحكي وسوالفي الطايح حظها يوصل للطابق الارضي بالليل لااستحي من ناس جوه ولاخطار.
اللي مخلصة فلوسه على الاطباء والذهب والملابس.
ويومية اهلي جايين كاعدين على كلبها يتغدون ويتعشون.
واكثر من مره تشوفني احوس اكيد لان اريد اخليلها سحر بغرفتها.
واختها تحذرها لااخليها سم بالاكل واموتها.
عقلي احسه اتبنج ميستوعب هالحقد هذا كله.
كلبي ظل يوجعني.
ورجليه متشيلني بعد.
ردت امد ايدي عالكرسي اسحبه واكعد عليه مكدرت.

التفتت شافني ماده ايدي عالكرسي ولوني مخطوف وكلي ارجف ايديه ورجليه واباوعله اريده يفهم راح اوكع.
ظل يباوعلي ويحجي يرد عليها لان مسكتت مصره هي ممسوية شي واني ام المشاكل والسحورة وهو يحجي هيجي لان مسحور.
بدت الدنيا تظلم بعيني حسيت اكو شي مو طبيعي بيه مو دوخة عادية ولا مثل كل مرة ينخفض ضغطي. لااا.
فجاة مشفت شي بعد ومحسيت الا اني طحتتت من مكاان عااالييييي.

ولزموني اثنين مشفت شكلهم وطاروا بيه لحدما وصلوا بيه للسما.
واني مدنكة اباوع على بيتي وجهالي.
.
كأني العينه الوحيدة التيَ يجري عليها الكون تجاربهُ بأكملها.؟