رواية صبرا يا قلبي

رواية صبرا يا قلبي الجزء الثاني للكاتبة روز الفياض الفصل الثاني

دخلت العلوية سبحت وطلعت شعرها لونه برتقالي صارخ. فد لون ناري مو طبيعي. لان شعرها جان ابيض كله.
كلما اباوعلها تحصرني الضحكة.
اخذتلها صورة ودزيتها لنجلاء مجاوبتني.
غديت الجهال وخليتهم جوه يم البنات وصعدت اريد اشوف رجلي واطلع الكزازه منها.
كعدت عالجرباية وخليت منشفة وخليت رجلي عليها.
وجبت گطن وديتول وملقط.
فتحت الشاش وعقمتها بالبداية وباوعت ماكو الكزازة بس من ادوس عليها احس بيها موجودة وتأذيني.

بقيت احاول بالملقط متطلع لان مااشوفها من الدم كلما احاول اطلعها يرجع الدم.
دخل ماجد.
شافني مبسطه عالجرباية باوع بطرف عينه بدون ميسلم.
دخل للحمام وطلع وشافني بعدني ابحوش برجلي.
رفعت راسي تعبت.
باوع شاف رجلي بيها دم وايديه حمر من الحنة. اتدنه كال: شنو هاي؟
شسويتي؟
جريت نفس وكتله: اني السويت لو انت؟
اتدنه لزم ايديه عباله بيها دم بعدين كلي: شنو هذا دم لو شنو؟
ذهب: حنة.
صفن بوجهي شوية بعدين كلي: الحمدلله مو دم.

شعندج محنية ايديج؟
ذهب: جان علي نذر.
ماجد: نذريش بعد؟ من تطلعين حامل تحنين اديج؟
ذهب: لاا. من تكسر المزهرية ويدخل الكزاز برجلي.
التفتت علي ورجع اتدنه باوع على رجلي كال: لميت الكزاز كله اني البارحة بس شوف انت وين دايسة.
ذهب: اي صح لميته.
دنك دقق النظر على رجلي كلي: طلعتيها؟
ذهب: لااا. مااشوفها.
ماجد: معناها ماكو مو كزازة.
ذهب: لا اكو. احس بيها من ادوس على رجلي.

كعد كبالي واخذ جف رجلي بيدة. ظل يتحسس رجلي بايدة لحدما خله ايدة عالكزازة كتله: اااخ. اي هنا.
غسل رجلي بالديتول ونشفها ولزم الملقط ولزم رجلي حيل وضغط عليها. اني صرخت ومحسيت الا طلع الكزازة لازمها بالملقط.
ماجد: هاي طلعت.
دمعت عيوني من الوجع وخليت راسي عالمخده وسنحت ضحك هو: شبيج سنحتي؟ دختي؟ تره قطرتين دم طالعة منج مو اكثر.
بقيت نايمة وساكتة محسيت اهو هو فوكي كتله: وين؟
دفعته اتمدد يمي واتنهد.

ماجد: وبعدين؟
ذهب: بعدين بشنو؟
تره احتمال جبير يطلع اكو حمل مو مال تذب نفسك عليه.
ماجد: اففففف..
منخلص يعني احنه من هالموضوع الا تذكريني؟
ذهب: انت لو ناسي جان كعدتني الصبح للصلاة لو خابرت مثل كل يوم تسال على خالتي والجهال.
ماجد: جنت مشغول.
ذهب: اصلا لو ناسي جان من دخلت سلمت.
سكت.
وره ثواني رجع يبوس بركبتي.
ضحكت.
رفع راسه باوعلي: لتضحكين واني محترك كلبي.
ضحكت حيل ابتسم.
ذهب: انت محترك كلبك اني شذنبي مااضحك؟

ماجد: محاسه انت بالمصيبة؟ متفكرين هذا الشي شنو تأثيره على صحتج وحياتج؟ على بيتج واولادج وعائلتج؟
ضجت كتله بعصبية: تره انت متحب اولادي اكثر مني ولا راح تخاف على صحتي وحياتي اكثر مني، اذا اكو احد مسؤول عن هالمصيبة هاي على كولتك فهو انت. اني لازم الومك واحجي واصير عصبية مو انت.
ماجد: اني هسه الغلط مني؟
ذهب: اي انت طبعاً لعد منو؟ منو ابوه؟
سكت واني هم سكتت. بعدين كال: العصر اخذج سوي تحليل.

رجع يبوس بيه كتله: وخر. تره اذا انت هسه نسيت اللي سويته البارحة اني لهسه بعدني.
ماجد: يابه غلطان واعتذر وانت كلبج طيب وتنسين بس خل نتنوس شوية كطعتي كلبي.
ضحكت كتله: شنو انوب كل شوية وكلت نتنوس؟ من جايبها هاي الكلمة؟
ماجد: رائد يكولها. ميكول نتونس كله نتنوس ههههه.
ذهب: شوكت؟
ماجد: مسامعته؟
ذهب: لاء.
ماجد: المهم هسه نريد نتنوس. لتكولين لا ارتكب جريمة تره.
ذهب: والمزهرية الكسرتها؟
ماجد: اجيبلج غيرها.

يحجي ويبوس بخدودي.
ذهب: ورجلي التصوبت؟
ماجد: مو عالجتها. انطيج فصل عليها.
ذهب: وقهرتي من البارحة اليوم؟

رفع راسه باوعلي: ماكو رجال ميحب يصير عنده جهال بكد شعب الصين. بس مو على حساب امهم وصحتها. لو الظروف مختلفة جان من الفرحة رحت جبتلج هدية ومخليتج تتحركين اي حركة بالبيت. اتمنى يصير عدنه بعد طفل وامنيتي تصير عندي بنية بس بهيج ظروف مااريد. مامستعد للمجازفة. الحمدلله عدنه جهال اثنين نعمة من الله جنه منحلم بيها.
بقيت ساكتة دنك باسني وكلي: هسه شلون نتنوس لونروح نصلي ونتغدا وانام؟

ضحكت و..؟‍؟‍؟‍؟
نزلنه للغدا.
ماجد: امي اتغدت؟
ذهب: اتحنت وسبحت واتغدت ونامت.
ماجد: اتحنت؟
ذهب: اي خلت حنه لشعرها.
صفن بوجهي بعدين ضحك: شذكرها بالحنة؟
ذهب: خالتك جايبتها الها.
ماجد: اممم. هنا الحجي.
العصر نزلنه حتى نروح نسوي تحليل جانت العلوية كاعده تشرب جاي ماجد من شافها انصدم بلون شعرها راساً باوعلي اني غلست حتى لااضحك.
اتدنه يمي كلي بصوت ناصي: شمسويه براسها؟

ضحكت كتله: شمسوية هو لون شعرها ابيض والحنة حمرة يطلع هيجي لونها.
ظل كل شوية يشرب جاي ويضحك على كيف: خررب يومج على هالدكة هاي؟
ذهب: اسكت لاتفضحنه.
ماجد: هي هاي الجريمة ينكست عنها؟
رحنة للمستشفى سوينه تحليل بس ماجد اعصابة تفور بعد نص ساعة طلعت النتيجة حامل.
اشرلي براسه امشي.
رجعنه للبيت ساكتين بس مبقى واحد عبر من يمه بالسيارة مارزله.
ماجد: ثور. لا يكوم الثور هم يفتهم اذا عاش بين البشر. مطي.

اتنهدت وبقيت ساكتة.
ماجد: شوف المطي هذا الثاني شلون يريد يعبر منا واني مشغله اشارة، انزل هسه اطيح حظه؟
درت وجهي وغلست.
ماجد: هذا الزمال شوفي شيسوي. شفناك شفناك.
ذهب: لاحول ولاقوة الا بالله.
ماجد: استغفر الله ياربي. استغفر الله. اني ناقص قلق وتفكير.
ذهب: اذكر الله.
ماجد: ذاكره وحامده وشاكره. الحمدلله والشكر.
اتحسرت وبقيت ساكته.
ماجد: دنكي راسج.
ذهب: دنكت. اففف.

ماجد: اففف معاجبج تردين تفرين براسج والشارع كله شباب. متشوفيهم ياكلون المره اكل لاحيا ولامستحه!
اها شوفي هذا مو بالسيارة عيونه راح تطلع. تعال. تعال شوفها من قريب ليش بعيد هيجي خاف متشوف ملامحها عدل.
ضحكت على كيف التفتت علي: على شنو تضحكين؟ اكو شي يضحك؟
ذهب: اتذكرت شغلة. ميصير اضحك؟ شنو علي القاء القبض؟
ماجد: شتذكرتي بالله؟ ضحكينه وياج بما انه ورانه قهر وتعب وشلاع كلب.

احتاريت شكله بس تلاحكت نفسي كتله: اتذكرت شعر خالتي. زين هيج؟
سكت.
بقى ساكت دقيقيتن بعدين ضحك.
ماجد: اخ ياربي، استغفر الله. والله ماادري اضحك لو اضوج.
ذهب: هذا كله وبعدك مضايج؟
ماجد: اخخخ لو الزمج، هذا البرود العندج راح يموتني.
ذهب: احمد ربك وشكره على هذا البرود الشايفه ومعاجبك لان اذا حجيت تره انت الخسران.
ماجد: لا بالله؟ شتحجين مثلاً؟ احجي بالله خل اشوف شعندج من حجي؟

ذهب: مااريد اغث نفسي ورجاءاً تريد تصيح وتدرم وتحجي وصلني بهدوء وروح صيح ودردم على غيري.
ماجد: اممم. لسانج طولان؟
ذهب: اتعوذ من الشيطان ماجد.
ماجد: واذا مااتعوذت؟
ذهب: لاحول ولاقوة الا بالله. اللهم اخزيك ياشيطان.
سكت.
وصلنه للبيت بطلوع الروح. صار الطريق شطوله.
نزلت بسرعة وصعدت فوك مالي خلك مشكلة.
اسمعه جوه يدردم يم امه ويحجي: حامل الخاتون. شلون يصير ماجد يرتاح لازم يخلصها اطباء ومستشفيات وادوية.

مااسمعها شنو ترد عليه.
اتدنيت يم المحجر حتى اسمعها لان هي كاعده بالهول الجوه.
العلوية: خير وجايك. متريد جهال انت بعد؟ بس اثنين عدك خو متريد تبقى عليهم؟ هم لازم عدهم بعد اخوان جيبلك بعد فد اثنين وياهم وانوب عود بطل.
ماجد: هو واحد وممنوع انوب اثنين؟! واحد هو ومو زين عليها شتجيب اثنين؟
العلوية: يعني اذا مو زين عليها شنو تبقى بلا جهال؟ تتحمل هن تسع شهور حالها حال النسوان مو هاي النسوان تحبل وتجيب.

ماجد: يمه ممنوع عليها الحمل مو زين على كلبها.
العلوية: هذا الحصلناه من هالزواج.
ماجد: شحصلتي؟
العلوية: بس التعب والقهر شحصلت هم زين من طلعتلك باثنين جهال عالاقل البكدك عدهم اربعة وخمسة.
ماجد: اني طالع. تردين شي؟
العلوية: لا. مااريد.
طلع.
اسمعها بعدما طلع تكول: مسحور يمه. مسحور وليدي. ميقبل احد يحجي عليها. فوك الضيم الشايفه من اخذها ليهسه، هذا هم حظك.

انغثيت من حجيها. هالمرة لوشنو اسويلها تبقى متحبني ومتحسفه على بت اختها.
حسبي الله ونعم الوكيل.
بقيت مغثوثة.
صليت ونزلت يم الجهال بعدين جهزت العشا ويه البنات واتذكرت صورة العلوية ماادري نجلاء شافتها لو لا.
فتحت التليفون لكيتها كاتبتلي: يمه دخيلك ياسبع الدجيل امي شبيها؟
ضحكت ضحك.
كتبتلها: مبين معجبج اللون؟

وره دقايق جاوبتني: بالقران اخترعت من شفته. عبالي نار مجلبه بشعرها جنت جاي اكل وشفت الصورة وكفت اللكمه على كلبي.
ذهب:؟
نجلاء: اي ضحكي ماعندج خالة تدك هيج دكات ناقصة بأمج.
ذهب:؟
نجلاء: باجر راح اجي واجيبلها وياي صبغ اصبغه الها لون غامق لاينصدمون الجهال من يشوفون بيبيتهم طالعة صهباء.
ذهب: والنبي راح اموت من الضحك؟
نجلاء: ليش هيجي خيه استفردتي بامي لو مخابرتني كايلتلي.

ذهب: لو كايلتلها لا جان اول مارجع اخوج اشتكتله مني وانوب خابرت لاختها حتى تجي تاخذها تزعل عدها.
نجلاء: صحيح. امي هاي سوالفها بس هم ميخالف تزعل ولاهاللون المرعب هذا. يالله شنسوي هذا ابتلاء من رب العالمين.
ذهب:؟
كافي عفيه والنبي يمكن يصير عندي اجهاض بسببج.
نجلاء: اععع سويتي تحليل؟
ذهب: سويت صخام.
نجلاء: يمه. من يمي خفت. بشرفج ماجد شسوه؟ شبدع هالمره.
ذهب: بس احجي ابجي تره.

نجلاء: يبوو. لاباجر اني جاية مااتحمل لازم اجي اهدي الوضع.
بالليل رجع ماجد اني جنت اعشي العلوية والجهال.
دخل: السلام.
ردينه اني وامه عليه.
بقى واكف شوية يباوع ويحجي ويه الجهال بعدين صعد.
وره نص ساعة نزل اني جنت اصب العشا بالمطبخ والبنات يمي يغسلن الماعين.
كعد بالهول يم الجهال كتله: العشا جاهز.
ماجد: متعشي.
اتنهدت ورجعت للمطبخ كعدت وحدي اتعشى حتى البنات اتعشن سوه.
اكلت لكمتين وحسيت انسدت نفسي.

بقيت كاعده مكابله الاكل والدمعة بعيني.
دخل للمطبخ ياخذ مي: اكلي. اتغذي لحدما نروح للدكتور ونشوف شنسوي.
ذهب: شنسوي بشنو؟
ماجد: باللي ابطنج. نشوف اذا اكو طريقة انزله.
انصدمت من حجايته.
ذهب: تحجي صدك؟
ماجد: اتعشي. اتعشي. وكت شقا هو.
اخذ المي وراد يطلع كتله: ماانزله.
دار علي عيونه براسة: كلمة زايدة والله متلومين الا نفسج.
ذهب: شتسوي بالله؟ تضربني لحدما ينزل؟
طلع وهو يستغفر راح رجع لمكانه.

بقيت طول الليل اتكلب مااكدر انام مغثوثه كلش عبالك اني المسؤولة لو اني الرايدة اصير حامل.
وجماله امه معاجبها.
نمت يم الجهال بغرفتهم حتى اتحاشاه.
كل شوية اسمع صوته يطلع من الغرفة ويرجع.
وفتح الباب علينه اكثر من مره.
وكل مره اسوي نفسي نايمة.
الفجر يالله غفيت.
توني غفيت وحسيت بي ندهني.
فتحت عيوني برعب: هاا؟
ماجد: شبيج. صلاة.
درت وجهي وغمضت كتله: توني غفيت.
ماجد: كومي صلي.

بقيت اتكلب نعسانة بس ضميري يأنبني مااكدر انام واغلس عالصلاة.
اتعوذت من الشيطان وكمت اتوضيت وصليت.
رجعت اتغطيت ونمت.
وره شوية حسيت بي واكف على راسي. غلست.
ماجد: كومي نامي هناك. موديل جديد انوب النوم يم الجهال.
سويت نفسي نايمة مسمعت.
سحب اللحاف كمزت كتله: شكو؟
ماجد: كومي نامي هناك.
ذهب: استغفر الله. يعني الليل كله منايمة مصدكت غفيت تكعدني ليش؟
ماجد: شبيج الليل كله كاعده؟ كلما اجي الكاج تشخرين اصلا.

ذهب: والله مانايمة.
كمت اخذت لحافي ورحت للغرفة نمت عالجرباية واتغطيت.
شوية وسحب اللحاف اني صرت عصبية: اللهم طولج ياروح. اريد انام الله اكبر.
ماجد: ماكو هذا الموديل الجديد مال كل واحد لحاف.
ذهب: هسه وكته؟
نام يمي وغطاني وحضني: لعد شوكت وكته؟
غمضت عيوني اريد انام على اساس بس اعرفه مراح يخليني انام.
ماجد: شبيج منايمة؟ شعندج؟ بيمن تفكرين؟

ذهب: افكر بروحي بالخاتون المرتاحه وانت محتار بيها وتفتر بيها عالاطباء حتى متلحك ترتاح.
سكتت حتى لاابجي.
بقى ساكت.
درت وانطيته ظهري وخرت ايده الحاضني بيها.
ماجد: ويعني هسه انت زعلانه على هاي.
ذهب: رحمه لروح اخوك ماجد. كافي المغثه مال اليوم واليومين الفاتت كافي. مفعولها مال شهر كدام بعد.
ماجد: وشدعوه عليج متتحملين كلمة؟

ذهب: كلمة؟! كلمة؟! شكد حجيت شكد دردمت شكد لمت شكد سمعتني حجي عبالك انت مالك دور بالموضوع مو ابوه بس اني امه وجايبته ماادري منين.
ماجد: احترمي نفسج عاد.
كعدت عدل كتله: اني شجابرني على المغثة؟ شجابرني؟ اروح انام يم جهالي اشرفلي.
كمت اخذت لحافي وامشي واحجي: انوب تكول مسحور وليدي. مسحور. امداني لااعرف اسوي سحر ولا اعرف اسوي صخام.
شمرت المخده واللحاف بالكاع واتغطيت ونمت.

الله رحمني وخلاني انام لو باقية يمكن جان متت من القهر.
كعدت الصبح كوه نعسااانه بس نزلت اشوف العلوية اتريكت لو لا.
لكيتها تتريك وهو بره جاي يطلع السيارة.
فتحت الثلاجة ماادري شسوي غدا كالت سارة: مدام بابا كال يجيب غدا.
درت عليها كتلها: شعنده؟ منين؟
سارة: مااعرف.
كلت بعد احسن خل ارجع انام لحدما يكعدون الجهال.
صعدت رتبت الغرفة وشلت ملابسه وبعدين رحت اندحست بلحافي ونمت.
كعدوا الجهال يلعبون يمي.

انجبرت اكعد اريكهم واغسللهم.
نزلتهم جوه واني نازله عالدرج سمعت امه تحجي بالتليفون: تعبت نفسيته تعبت منها ومن امراضها ومشاكلها. حامل ويكول ممنوع عليها الحمل شفتي بالله؟
شنو قابل يظل بس ذوله الجهال الاثنين؟ المثله عده درزن وهو محروم حتى من الخلفة. يااا شيتزوج، مسويتله سحر معدل. بس احجي وياه كلمة يكلب وجهه علي عبالك عدوته مو امه.
اتنهدت حيل وكلت حسبي الله ونعم الوكيل اكيد تتقل الموجز لاختها.

دخلت عليها للغرفة رأساً كمزت واتغير الحجي: اي شنسوي بعد محسودين محسودين. الله يبعد عنهم العين والحاسدين ولاارتاحوا.
كعدت الجهال يمها ورحت كعدت بالمطبخ كلش انقهرت.
بقيت كاعده يمكن ساعة وصافنه ماادري شوكت الله يخلصني من هالخاله هي وبناتها.
لو امه اللي بوجهي شكل وبظهري شكل.
فجأة اجت براسي فكرة ماادري زينة لو لا ماادري راح تفيدني لو لا بس كلت اجرب يجوز تفيدني بيوم من الايام.

قررت انزل برنامج تسجيل المكالمات بجهاز امه.
حتى متعرف شي عن البرامج والتليفونات.
بقيت اراقبها لحدما نامت.
واخذت التليفون ونزلت البرنامج ورجعته.
وره شويك ظليت الوم بنفسي اني شسويت؟ شبيه هيجي صرت حقوده؟ وشراح تفيدني المكالمات حتى لو سمعتها؟ قابل راح اسمعهن اله واسوي مشكلة بينه وبين امه؟ لا مااسويها مااكدر. هاي امه مهما كان ومره جبيرة.
رحت اريد احذف البرنامج لكيتها كاعده وبيدها التليفون.

شافتني كالت: متدكيلي على نجلاء اريد احجي وياها بالله.
اتصلتلها على نجلاء وصعدت سبحت واتصلت على عمه حميدة اشوف اخبارها كالت: صدك حامل؟
ذهب: منو كلج ام عبدالله؟
عمه حميده: لا ماجد خابرني الصبح وكلي. ليش ام عبدالله هم تدري؟
ذهب: خابرج علمود يشتكيلج؟
عمة حميدة: ليش يشتكي؟ منين يشتكي؟ شنو متزاعلين انتو؟
ذهب: متزاعلين هاي للجهال الزغار. كولي متعاركين متمالخين.

عمة حميده: يااا يااا. عليمن؟ اوكفي خل اسد الباب لحد يسمعني.
ذهب: علمود الحمل بعد عليمن.
عمة حميدة: شنو ميريده؟
ذهب: يكلي نزليه.
عمة حميدة: اسم الله، شلون حجي هذا؟ شنو نزليه؟ يمه اسم الله ابنه من صلبه من دمه ولحمه شلون يكلج نزليه؟
ذهب: يخاف.

عمة حميده: حتى لو يخاف. بعدين ليش واحد يتشائم ويفكر بالاشياء المو زينة شنو العدها مشكلة بكلبها تبقى بدون جهال هاي هنا بنية يم بيت عمج عدها فتحة بالقلب سوولها عملية وحبلت وجابت والحمدلله كل شي مابيها.
ذهب: والله يمه ماادري.
عمة حميدة: فد يومين خل تصير ام عبدالله زينة واجيكم. اني احجي وياه لتحجين انت. وعوفيه من تشوفينه عصبي طلعي وعوفيه.
ذهب: غير يعوفني هو.

رواية صبرا يا قلبي الجزء الثاني للكاتبة روز الفياض الفصل الثالث

من أصابيعچ على أزلوفچ أغار؟
مِن ألتراچي وأَلمَحابس وألسوار؟
بقيت كاعدة نعسانة.
الساعة بالوحدة سمعت صوت سيارته بره.
وره شوية دخل: السلام عليكم.
ذهب: عليكم السلام.
جاوبته ودرت وجهي اباوع عالتلفزيون وبيدي فضل يلعب ورائد واكف وراي ويجر بشعري.
كعد فضل بحضي حيل ومدد رجليه على بطني اذاني ون
ذهب: آآآخ.
اجه هو رأساً شاله: على كيفك بابا.
اذاج؟ اكو الم؟
هزيت راسي لا وبقيت ساكته لان اذاني بس مو لدرجة ابقى موجوعه.

ماجد: لك انت شلون بيك؟ انت وهذا اخوك شفت شلون ماما تعورت؟ واخوك هم اتعور بعد ممنوع العب يم ماما.
الجهال اثنينهم صافنين بوجهه.
دار علي اني بعدني مخليه ايدي على بطني: يتحرك؟ اذا يتحرك معناها اتأذى.
ذهب: شيتحرك؟ هن كلهن شهرين مدري اقل.
ماجد: لعد ليش ايدج على بطنج؟ لو الا تخوفيني.
وخرت ايدي بدون كلام.
ماجد: كوموا اتغدوا قبل لايبرد الاكل.

صعد يصلي واني رحت صبيت لامه وللجهال غدا وكعدت اوكلهم لحدما نزل اني جنت انوم الجهال.
ماجد: عوفيهم يلعبون شوية لحدما نتغدا وبعدين نصعدهم ينامون. كومي اتغدي.
رحت وراه اتغدى. كعدت اكل على كيف اخاف لاتلعب نفسي هو ياكل ويباوعلي من طرف عينه: شوكت تكملين صحنج على هذا الاكل الفاهي؟
ذهب: ماوراي شي. محد يركض وراي.
ماجد: مو تردين تنومين الجهال؟

ذهب: اوكي. راح اكل بسرعة واكمل الصحن كله بس انت المسؤول اذا لعبت نفسي وذبيته..
جبرت نفسي اكل بسرعة وهو يباوع وساكت بعدين خاف كلي: قابل اول مره حامل وتلعب نفسج؟ اكلي على كيف اكلي شلون متاكلين المهم تاكلين ومتذبيه.
اتنهدت حيل وكوه على اعصابي بقيت ساكتة.
ظليت احاول اشغل تفكيري باشياء بعيدة عن الواقع اتخيل نفسي ادرس ماجستير واتعلم اسوق سيارة واطلع وحدي للسوك واتونس ويه صديقاتي واهزمهم ويعزموني عالمول.

مااريد افكر بس بالمشاكل وبالمغثه عسى ولعل هالشي يأثر على نفسيتي واكمل صحني صدك.
خلص هو اكل وبقى كاعد صافن بوجهي وساكت.
عنده حجي بس هم الظاهر ماله خلك مشكلة ماادري يخاف لااتخربط او اصير عصبية لان اني اخر فترة صايرة بسرعة اعصب وانغث واظل الهث واتعب.
اتنهد حيل وبعدين راح يغسل ورجع صاح على ياسمين كللها: صعدي وراي رائد.
اخذ فضل وصعد وهي اخذت رائد وراه صعدته.

مكدرت اكمل صحني كله للنص وحسيت مااكدر فجاة انسدت شهيتي مااكدر ماافكر وماانغث وماانقهر.
لو الله بس يخلصني من التفكير هذا.
كمت صبيتلي لبن واخذته وصعدت.
لكيته حاط الجهال يمه عالجرباية ويحجيلهم قصة: هذا الامير راح للغابة ولكة هناك بنية.
ماادري ليش حصرتني الضحكة بس حاولت اتماسك.
يباوعلي ويحجي واني مغلسة.
ماجد: هاي البنية طبعاً مو حلوه. كلش مو حلوه. شافها انقهر عليها. فخطبها.

الضحكة وصلت حدها بس اني مقاومة شغلت نفسي باللبن حتى لااضحك.
ماجد: هي بس شافته جلبت بي. كمصته بايدها عبالك نازل من السما. هو من شافها هيج انقهر عليها لذلك خطبها. خاف عليها خاف تسوي بنفسها شي اذا ميخطبها.
اباوع للجهال صافنين بوجهه ضحكت على كيف ودرت وجهي حتى لايشوفني اضحك.
مكدرت اتحمل رحت كعدت بغرفة الجهال شبعت ضحك على قصته. طبعا هو يقصدني ويريد يحجيني كوه.

ظل من يحجي يعلي صوته حتى اسمعه: اتزوجها خطية. اتورط. هسه من اتزوجج غير تحمدين ربج صبح ومسا على نعمة وجوده بحياتج؟
لا عبالها حلوه وتدلع عليه.
تدلع عليه.
تدلع عليه.
لحدما انفقعت مرارته الرجال.
كال هسه اني هم امير وهم حلو وهم وسيم وهم بنات المملكة كلهن يركضن وراي شجابرني على هاي الجكمة تدلع علي؟
كام ولم هدومه وغراضة وانهزم منها بليلة ظلمة؟
ضحكت ورحت غسلت ورجعت خليتي مخده واتمددت كلش نعست.
غفيت.

وره ماادري شكد حسيت بي حضني وحاجني بس مسمعت شيكول بقيت نايمة.
دارني عليه.
درت واني مغمضه خليت راسي بصدره وكملت نومتي.
رفع راسي فتحت عيوني.
ماجد: هاي الغرفة راح الغيها. اقفلها.
هزيت راسي وغمضت.
ضربني على خدي على كيف فتحت عيوني كلي: لتنامين.
ذهب: نعسانة.
باسني. غلست.
ماجد: تسع شهور على متجيبين. يعني تسع شهور مااكدر اتدنالج ولا المسج شطلعت هاي؟ اني شورطني واتزوجت.

ذهب: يعني لا بالليل تخليني انام ولا بالنهار؟ تعبانه ياناس حسوا بيه.
ماجد: ياناس اني هم تعبان واريد واحد يحس بيه.
فتحت عيوني: تعبان من الحجي والدردمة انت.
ماجد: تعبان من وراج.
ذهب: اه. كعدت. امري لله الواحد القهار. كلي شبيك؟
رجع سحبني من ايدي وخله راسي على ايده: نامي هيج وحضنيني.
حضنته.
ماجد: بوسي راسي.
ذهب: لا بالله. ماليش؟
ماجد: مااستاهل؟
ذهب: لا تستاهل غير طلعت مقهور علي وخاطبني لااسوي بروحي شي.

ضحك كال: يعني فهمتي القصد من القصة؟ شفتي شلون ضحيت علمودج.
ذهب: اي حبيبي فهمت. لوما انت جان بقيت اني عانس منو يتزوج وحده كلش موحلوه مثلي؟ بس انت الفارس المغوار والامير الوسيم حنيت على حالي.
يضحك..
ماجد: قررت ازرع شعر.
فتحت عيوني: شحدك.
ضحك كال: ليش؟ متريدين يصير عندي شعر؟ لازم ازرع ماكو امير اصلع.

ذهب: مشتكيتلك اني؟ كايتلك اريد شعر؟ اني متحملتك ومتحمله صلعتك وقابله مثلما انت متحملني لان موحلوه واتورطت بيه.
كتله بعصبية.
دنك يبوس بركبتي ويضحك: شجابرج تتحمليني. اطلقي سراحي خليني اطير من عش لعش.
اتدغغ من يبوسني من ركبتي: كافي، ماااجددد اتدغدغ.
ماجد: مو كافي.
ذهب: مو على اساس مليت مني لان موحلوه واخذت هدومك وانهزمت هههههه.
ماجد: ههههه اجذب. ميصير واحد يجذب؟
ذهب: الجذاب الله يذبه بالنار.

ماجد: يعني هي القصة مو كلها جذب. يعني اني مو وسيم مثلاً؟
ذهب: لا.
ماجد: اه. مو وسيم؟
زين مو صحيح انت مو حلوه؟
ذهب: مو حلوه وذبحت نفسك علي لو حلوه جان شسويت؟
ماجد: اني؟ جان ماعندي نظر. مااشوف. مسحور وهسه فتحت.
ذهب: اممم، مسحور صحيح.
سكتت اتذكرت حجاية امه.
رجع حضني وباس كصتي: احبج من اول مرة شفتج بيها. من شفتج كلت بكلبي يارب كون مو هاي هي اليريد يخطبها ذاك المطي. هاي الحلوة لازم تكون الي.

سحرتيني من اول نظرة بس باوعتيلي ودرتي وجهج. يمكن حتى مشفتيني. بس اني جانت هالنظرة بالنسبة إلى فد شي جبير وظليت اوهم نفسي انت باوعتيلي وظليت يومية اجي اوكف كبالج بلكي تعيدين الحركة وتلفتين تباوعلي بس هالمرة بقصد.
حضنته كتله: احضني حيل.

حضني حيل: لتزعلين مني لان احجي. احجي لان اخاف عليج. ولتزعلين من امي. انت متحملتها من زمان مو جديدة عليج مرة جبيرة حتى لو ردت اعاتبها الكل راح يلومني ويلومج لان مره جبيرة.
بقيت ساكتة دنك باوعلي: هسه نامي.
ذهب: من طارت النعسة؟
ماجد: طارت؟ يعني نتنوس مادام متردين تنامين بعد؟
ضحكت. وقبل لا اجاوبه فتح دكم قميص البيجامة مالتي..
ذهب: على اساس منتظرني اقبل لو ارفض.
ماجد: اكو وحده ترفض النعمة.

؟‍؟‍؟‍؟‍؟‍؟‍؟‍؟‍؟‍؟
العصر قبل ميطلع كعدنه نشرب جاي جوه وامه يمنه كاعده على كرسيها.
كل شوية يضحك.
ذهب: شبيك؟
ماجد: مابيه. اتذكرت الامير خطية؟
امه تباوع لان نسولف بصوت ناصي ونضحك.
اجت نجلاء وماجد طلع.
كعدت نجلاء بصفي وشاورتني: شكول ودعي عليج ياذهب على هاي العمله. امي صايرة تخوف بسبب لون الحنة.
ذهب: ادعي على خالتج. غير هي جايبتها الها صوغة.

نجلاء: دعيت منوكلج مدعيت عليها. خلاله بكلبها كون ميجي من وراها خير.
ذهب: هههههه انوب ماجد كلما يباوعلها يضحك.
نجلاء: لج اني كوه لازمه نفسي هسه والله حلكي اتشنج لان لازمه نفسي كوه حتى لااضحك.
ذهب: ههههه روحي ضحكي بالمطبخ وتعاي.
هالحجي العلوية تباوعلنه بعدين كالت: شنو ذهب شعدها اليوم ياهو اليكعد يمها تشاوره وتكعد تضحك؟
اتفاجأت كتلها: شعندي؟ مااضحك؟

العلوية: شنو سالفة المشاور هذا؟ لو تحجين كدامنه لو لتحجين ضمي سوالفج من اروح لغرفتي اذا متردين تحجين كدامي.
نجلاء: يمه شبيج منو يمج انت؟ منو داس على طرفج شنو يعني منسولف لو منضحك اذا انت كاعده؟
العلوية: انجبي انتِ.
نجلاء: ليش انجب شحجيت؟ حجاية بيني وبينها مال بنات زغار الا نحجيها كدامج؟ نحجي على رجولتنه ونضحك بيها شي هاي؟
العلوية: اييي، اكليني وشربيني مثل اخوج. حسره علي احجيلي كلمة.

سحبت كرسيها وراحت لغرفتها.
بقيت ساكتة كالت نجلاء: شبيها هاي المرة؟! هبت بينه عبالك متعرفنه؟
ذهب: اففف والله نجلاء تردين الصدك. مادام خالتج ورانه منرتاح هذا احنه وضعنه مشاكل من شغلات متسوه والسبب خالتج الحنونة تقرا براسها يومية.
نجلاء: والله ياذهب ماادري شكول وشحجي، مو خالة هاي بلاء الله ابتلانه بيها مره جبيرة كعدي واسكتي ذكري ربج على ياساعة يلفيج الموت هو منو ضامن عمره دبطلي نفاق وبطلي حجي مابي خير.

ذهب: حسبنا الله ونعم الوكيل.
نجلاء: دعوفينه من الموضوع الكله نكد معليج بامي كليلي ماجد شلون وقع عليه الخبر؟
ذهب: كالصاعقة.
يمه لعب لعب بالطريق شسوه مخله احد مارزله وغلط عليه. طلعت روحي على موصلنه للبيت. انوب هنا كمل الباقي كل شوية ينفش ريشة علي عبالك اني حامل من روحي مو منه يحاسبني وناسي نفسه.

نجلاء: معليج بي ديري بالج على صحتج واكلي زين ولتعبين نفسج باي شي حتى الجهال ذبيهم على سارة وياسمين وامي. خل اتعب نفسها شوية وتسوي شي لجهال ابنها بدل مكاعده مكابله اختها الحنونة.
ذهب: يكلي نزليه.
صفنت بوجهي نجلاء: ديري بالج تسمعين كلامه تره تتندمين لاخر عمرج صدكيني. هذا رزق والله دازه الكم اكو واحد ميريد رزق من الله؟ هو هسه بعده خايف عليج بس بعدين من يشوفج مابيج شي راح يتعود ويفرح.

ذهب: كلش ضوجني. كلش. متتصورين شكد ديضغط علي وشلون يتصرف وياي. موتني بالملامه والحجي.
نجلاء: ميخالف حبي اتحمليه غير يحبج ويخاف عليج انت لو بمكانه والله تسوين اكثر من هالشكل.
ذهب: شلون يعني ابمكانه؟ هو حامل واني اكله نزله؟
نجلاء: ههههههههههههههههههههه عابت لازم تفشلني هسه مو دالقي خطبة واتحدث بلباقة لخاطرج ليش هيجي؟
ذهب: نصي صوتج يمعوده هسه امج تكول يضحكن علي.

نجلاء: هههههههه اي عفية والله مساع على طرف لساني اكللها دنضحك على شعرج حتى تسكت بس اتعوذت من الشيطان بآخر لحظة وسكتت ههههههههه.
ذهب: اويلي حتى تغضب عليج ليوم الدين. هاي الحنة من الغالية ام الغالية.
نجلاء: اكلج هي بعدها متدخل لبيت اهلها؟
ذهب: شمدريني. ماادري مااعرف اي شي عنهم ولااريد اعرف. تلكين اخبارهم عد عمة حميده.
نجلاء: وذيج الكلبه الثانية شيماء وين صارت؟

ذهب: هي من صارت اخر مشكلة بينه واهلها عرفوا على اساس بايعين البيت ورايحين لكربلا يم كرايبهم وبعد ماادري. واسراء عمي ابو عبدالله كال طردتها بعد متدخل للبيت بس ماادري اذا اتصالحوا وياها لو لا. خالتج متكدر على بعدها ولاامج.

نجلاء: حقيرات. شكد شفت بشر حقيرة ومتستحي بس مثل ذني الاثنين مشايفة وخصوصاً هاي الكلبة سريوه. يعني مصرة تخرب بيته الحقيرة ليش؟ شسوالج؟ انت مو ادمية وطلكج من اتزوج حلا بعينج؟ عمى بعينج حتى عمى.
ذهب: اففف. الله يبعدهن عنه دوم مو يوم ويشغلهن بأنفسهن ان شاءالله.
نجلاء: آمين يارب العالمين.
كمنه سوينه عشا ونسولف ونضحك بالمطبخ لحدما اجه ماجد: السلام عليكم.
وعليكم السلام، جاوبنه اني ونجلاء.
ذهب: الله يساعدك.

ماجد: الله يساعدج.
نجلاء: الله يساعدك خوية ومبروك عالنونو الجديد ان شاءالله الولد الصالح البار.
باوع لنجلاء وبقى ساكت.
نجلاء: هاا؟ اشو مفرحان؟
ماجد: شلون افرح وهي متتحمل الحمل؟
نجلاء: كول يا الله. صدك جذب منك ياخوية تره عدهن قلب وتهطل بالشريان كرايب صديقتي والله وحبلت وجابت عادي ماكو شي ان شاءالله ليش مضخم الامور؟ روحوا للدكتور وشوفوا يكللكم ليش من البداية تضوج وتخلي العقده بالمنشار؟

دارت علي كالت: يمه فديتني اليوم حجيي كله فصحى ومفردات مال مثقفين ههههههههه.
ضحك ماجد على سوالفها. شافني ساكتة اجه حضني على كيف وخله ايده وره ظهري: مو كتلج ارتاحي. شوكت تسمعين الحجي؟
ذهب: واني هسه شمسوية؟ هاي كاعده واختك تلقي على راسي خطابات.

نجلاء: اي والله اليوم شكد القيت خطابات عليها شكد علمتها ونصحتها حتى ريكي نشف. كتلها اياج تنزلين هالطفل تره تتندمين لاخر عمرج. تظلين تلومين بنفسج وتفكرين بي كل عمرج لو صاير هسه شلون شكله؟ لو كبران هسه بهلكد صف. لو شفتي جاهل راح تكولين لو باقي جان هسه يمكن بكده. اخذيها مني اني جربت هذا الشعوروكلمت اتذكر اموت من القهر وتأنيب الضمير وابقى الوم بنفسي.
ذهب: الله كريم
اتحسر ماجد وبقى ساكت محجه شي.

بعدين كعد عالطاولة وصفن.
نجلاء تسولف وتضحك وهو ساكت وصافن.
اشرتلها عليه باوعتله: شبيك خوية؟ ليش تفكر وشايل عبد القادر على راسك؟ خليها على الله باجر يجي ويترس البيت بحسه ويصير اعز من ذوله الاقزام الاثنين العندك.
ماجد: انتن مفاهماتني.
نجلاء: لا ياا. شلون مفاهمينك. اختك تفهمها وهي طايرة. خايف على مرتك وام جهالك محد يلومك الرجال ميسوى فلسين بدون المره.

رفع راسه باوعلها هي اتنبهت شجفصت كلتله: مثلما المره متسوى فلس بدون زوجها. بس انت اسمع شكلك الدكتور بالاول وبعدين ضوج يجوز مابيها شي ليش تضوج من هسه؟
ماجد: استغفر الله واتوب اليه. الله كريم.
ذهب: حبيبي كوم غسل وبدل حتى نتعشى. خالتي تره اكيد جاعت هسه.
ماجد: وليش لهسه بلا عشه امي؟
ذهب: زعلانه.
ماجد: ياستار يارب منين زعلانه؟
نجلاء: من عدنه اني وذهب. امك عقلها زغير متعرفها كلما تكبر عقلها يصغر.

ماجد: تأدبي لج.
نجلاء: والله شبيك تزعل على شغلات تافهه وتسوي مشكلة من لاشيء ها والله شلون تضحكن وتحجن بصوت ناصي واني كاعده.
ماجد: اممم.
وانتن شعدجن تضحكن وتحجن بصوت ناصي كدامها؟
نجلاء: خويه ضحكت على لون شعرها خوما اضحك بوجها لو اكللها لون شعرج يمه مرعب هههههه شتريد نحجي كدامها مثلاً.
ضحك هو: ههههه اني هم كلما اشوفها اضحك. همزين مكالت ليش تضحك.

ذهب: كالت منو كلك مكالت كلتلي شعندج منو يكعد يمج تضلين تضحكين وياه وتشاورينه. هو منو كعد يمي غيرك وغير نجلاء. يعني تقصدك من ضحكت مساع.
ماجد: هههههه دصبغن شعرها وغيرن هاللون لحد يجينه ويشوفه شيكول عليها.
من جان ابوي عايش هي مخلت حنة هسه اتذكرت!
نجلاء: غير خالتك ام الدولايب.
ذهب: هههههههه.
ماجد: صدك ام الدولايب هههههه.
يالله صبوا العشا علما ابدل واجي.

نزل ماجد راح عشه امه متقبل تتعشى ويانه بعدها زعلانه واني ونجلاء وماجد كعدنه اتعشينه بدون كلام بس كل شوية نفطس من الضحك وماجد يأشرلنه حتى متسمعنه نضحك..
بالليل من صعدنه ماجد كال: هاليومين راح احاول افرغ نفسي حتى اخذج للدكتورة تجيك عليج والطفل وادز التقارير مالتج للدكتور اللي بلبنان ونشوفه شيكول.
ذهب: ان شاءالله.
الجهال ناموا بسرعة لان لعبوا هواي ويه جهال نجلاء وتعبوا.

اخذهم بفراشهم ورجع يمي اني كاعده عالجرباية ومنتجية.
كعد يمي وحضني: خوفني حجي نجلاء.
ذهب: ياحجي؟
ماجد: من كالت تتندمون اذا نزلتوا البيبي.
بدون متحجي وتكول اني هيج جنت افكر. وحجيها ضوجني اكثر لان هي صاحبة تجربة.
باوعتله كتله: مااريد اتندم. مااريد اضلم ابني بدون ذنب منه.
مااكدر اتحمل انزله واموته بايدي..
دمعت عيوني وهو هم.
حضني حيل وباس راسي: الله كريم.
ان شاءالله منضطر لهيجي شي.
ذهب: يارب.

مسحت دموعي وبسته كتله: ماادري ليش احسه هالمرة بنية.
ماجد: بنية لو ولد نفس المعزه.
ذهب: اذا بنية ماانزلها لو شيصير.
ماجد: واذا ولد؟
ذهب: هم ماانزله.
ضحك..
ذهب: اكلك اني نفسيتي تعبانة. واريد شي يرفع معنوياتي.
ماجد: حاضر. تدللين انت بس كولي واني برسم الخدمة؟
ذهب: لااا مو هيج خلي خدمتك الك. اني اقصد كلام حلو قبل جنت تتغزل بيه وتدزلي اغاني واشعار هسه هاملني احسك.
ماجد: اممم.
بس اغاني تردين؟ لج اني روحي الج.

ذهب: سلامة روحك يابعد روحي. شكد احبك حتى وانت شالع كلبي.
ماجد: شمسوي؟ رجال فقير بحالي. اكدر عليج اني؟
ذهب: اي خطية ياكل القط عشاك على كدما فقير.
ماجد: هسه شنو انام لو عندج شي؟
ذهب: شعندي؟ كل شي ماعندي لا كيك ولا كليجة ولاحتى كرزات.
سحبني بحضنه حيل: ياكيك ياكليجة؟ هنا الكيك؟‍؟‍؟‍؟
.
لا تلمسوه حتى بأعينكم، إنه يخصني؟

رواية صبرا يا قلبي الجزء الثاني للكاتبة روز الفياض الفصل الرابع

ممكن نختلف بس نفترگ صعبه؟

ثاني يوم رحنة للدكتورة سوتلي كل الفحوصات والحمدلله الطفل زين والحمل عمره شهرين وكل شي تمام.
من رجعنة حجزلي ماجد على الدكتور ابو القلبية وره يومين لان ازدحام.
طول الطريق ساكت ومتوتر.
لزمت ايده. سحب ايده.
وره شوية هم رجعت لزمت ايدة كلي بنرفزه: لاتلزميني.
ذهب: شدعوه عيني؟
ماجد: اني اعصابي متوتره ومطايق نفسي؟
ذهب: كالت الدكتورة شي مو زين اني مسمعته؟
ماجد: لا اسم الله. اسم الله لتفاولين عليه.

ذهب: هسه هو اني المفاوله عليه لو انت!
انت الحارك الجو. معرفنالك شتريد البارحة تكلي نزليه اليوم لتفاولين عليه!
بقى ساكت بس احسه يريد ينفجر.
سكتت اني هم.
وصلني للبيت وراح.
دخلت لكيت نجلاء كاعده يم امها سلمت وصعدت ابدل ملابسي.
نزلت على كيف بس مو متقصده بس لان شحاطتي من طلعت نزعتها جوه وبقت جوه. نزلت حافية.

سمعت نجلاء تلوم امها على اسلوبها وياي: اي متى يمة تبقين معادية البنية؟ شمسويتلج؟ بت اختج واتزوجت شننتظره انت بعد مثلا؟ تردين ماجد يطلك مرته ويعوف جهاله علمود بت اختج؟ زين غير متزوجه هي؟!
العلوية: دانجبي انجبي. يطلك مرته ويعوف جهاله، شلون مره عاد هي انوب فوك القهر حامل بعد حتى تكسر ظهره بالجهال مو مثلج خارمة تعرف شلون تلزمه وتربطه بالجهال يومية واحد عساها لافرحت بجاهل بعد.
يمه!

حجايتها سجينة وبنص كلبي حسيتها..
طفل وبعده ابطني وتدعي عليه!
هي مو جانت فرحانه من كللها؟ بس اكيد من كلت لاختها شحنتها عدل.
حسيت كلش ضاك صدري من حجيها. اختنكت.
اسمع نجلاء تحجي عليها وتصيح بس ظليت ماافرزن شنو تحجي انقهرت حيل وكلبي ظل يوجعني.
كعدت شوية عالدرج ارتاح. وبعدين كمت رجعت صعدت لغرفتي مااكدر انزل واشوفها هسه مااتحمل.
وره تقريبا نص ساعة صعدتلي نجلاء كالت: وينج كل هذا تبدلين؟

مسحت عيوني بس ترجع تدمع من القهر الحسيت بي واحس نار اشتعلت بكلبي.
ذهب: هلو نجلاء تعاي فوتي.
نجلاء: شنو نمتي؟
ذهب: لا منايمة بس تعبت.
نجلاء: شبيج؟ ليش تبجين؟
طاحت دموعي كتلها: مابيه شي. بس مخنوكة. مالي خلك.
نجلاء: حقج. محبوسة بالبيت ( 24 ) ساعة. حرامات بطلتي من شغلج.
ذهب: قابل بكيفي. اخوج من صاروا الجهال كلي بعد ماكو دوام. عدل بدل كال ماكو. انت ممحتاجه للراتب والوظيفه عوفيها للمحتاجها اكثر منج. بطلت.

نجلاء: تدرين ذهب. شكد افرح من احس ماجد يحبج. وافرح اكثر لان اعرف هو ميلكه مثلج وحده تتحمله وتتحمل اوامر وغيرته وعصبية وتسكت.
ذهب: انت طيبة. وحقانية.
نجلاء: وبعد؟
ذهب: وحبابة وحلوه.
نجلاء: وبعد؟
ذهب: واحبج اموت عليج.
نجلاء: وبعد؟
ذهب: بعد شنو؟
نجلاء: وضعفانه مثلاً ومحلوه وكرشج صغران مثلاً؟
ذهب: لاء. مضعفانه ولاكرشج صغران.
نجلاء: مو توني كلت احبج ليش تخليني اكرهج؟

بقت نجلاء يمي تحجي وتسولف ونستني شوية بس بقى كلبي محروك من حجاية العلوية.
نزلت ويه البنات سويت عشا وعشيت الجهال وردت اعشي العلوية بس مكدرت..
حسيت كلبي كش منها.
مكدرت حتى اباوعلها. مااشتهي اكابلها واكعد.
غلست من عشاها.
عشيت بس الجهال.
اجه ماجد لكاني كاعده بالمطبخ وصافنة.
ماجد: سلام؟
ذهب: وعليكم السلام. الله يساعدك.
ماجد: الله يساعدج.
وين الجهال؟
ذهب: يلعبون بالصاله.
ماجد: ونجلاء؟
ذهب: هسه تجي راحت للحمام.

ماجد: امي نامت؟
ذهب: لا كاعده.
ماجد: شبيج كاعده هنا وحدج عبالك يتيمه؟
ذهب: مابية شي منتظرتك، .
ماجد: شكو؟
ذهب: ماكو شي. سلامتك.
تمنيت اكله هيج كالت امك وهيجي حجت بس اتعوذت من الشيطان.
صعد ونزل يريد يتعشى.
صاحت امه: شنو ماكو عشا اليوم؟
ماجد: شنو امي لهسه بلا عشا؟
ذهب: بعدها.
ماجد: ليش؟ هي من شوكت تتأخر لهيج وقت بلا عشا؟ يومية تتعشا من وكت وتشرب علاجها وتنام، ليش اليوم بلا عشا لهسه؟

مالي خلك اجاوب واذا اجاوب ابجي لان مقهوره واذا احجي راح تصير مشكلة.
ذهب: مالي خلك ماجد. تعبانه احس نفسي.
صارت عيونه بكصته: تعباانه؟ لتخليني احجي حجي اندم عليه بعدين صبي العشا خل اعشيها وبعدين نتحاسب..
تعبانه..
من احجي اطلع مو خوش آدمي. هذا اليمشي وره حجي النسوان.
ياكل وحل.
طلع من المطبخ راح ورجع كلي بعصبية بس بصوت ناصي: خابري لدكتورتج اذا اكو حجز حجزي باقرب موعد. كافي بعد. كافي لعب نزليه وخلصينه.

ذهب: استغفر الله رب العالمين.
جان داير وجهه يريد يطلع من سمعني رجع وكف على راسي جنت فاتحة الثلاجة اطلع الفاكهة.
لزمني من زندي حيل: كلمة وحده مااريد اسمع.
سحبت ايدي من ايده كوه كتله: روح ماجد اكعد هناك لحدما يصبون العشا. اني هم مااريد اسمع اي كلمة من اي احد.
ماجد: فوك الغلط متسكتين بعد!
ذهب: يابه اني الغلطانه واعتذر اني حامل من روحي مدري من واحد ثاني انت مغلطان بشي.
هي كلمة وهي كف دار وجهي.

بيدي جانت سلة البرتقال كلها وكعت.
اختنكت.
عفته وصعدت فوك.
صاح وراي: تعاااي.
مو احجي وياج.
لاجاوبته ولاالتفتت ولا صدر مني اي رد فعل.
صعدت اخذتلي فراش ورحت بالغرفة الاخيرة إلى هو مرات يكعد بيها يخلص شغله. وقفلتها علي بالمفتاح.
وره نص ساعة تقريباً صعدت نجلاء اسمع صوتها تدور علي بغرفتي وغرفة الجهال.
اجت حاولت تفتح باب الغرفة مقفول دكت الباب: ذهب؟
ذهب؟
ذهوبه حبيبتي جاوبيني شبيج؟
بقيت ساكتة.

بقت هواي تدك بالباب وتحجي بعدين نزلت.
وره شوية اجت ياسمين دكت الباب جايبتلي عشا هم دكته بس مجاوبتها ولافتحت الباب.
نزلت.
بقيت كاعده بالغرفة لحد الساعة ب ( 11) ونص سمعت صوته بره جايب الجهال.
دك الباب: فتحي الباب يردون ينامون.
مفتحته.
رجع دكه: فتحي الباب نومي الولد.
مجاوبته.
وصلت لمرحلة كلت: شيصير خل يصير بعد. اهم شي صحتي.
بقى يحجي ويصيح بره ولافتحت الباب.

سمعت فضولي يبجي بره انكسر كلبي عليه بس سمعت نجلاء صعدت اخذته وسكت.
اتصلت علي نجلاء مجاوبتها.
اتصلت على امي كتلها حامل.
امي: لااا. لتكولين.
شلون حامل؟ والادوية اللي تاخذيها؟ والمرض والذبحه؟ شلون متنتبهين؟ سويتي تحليل اتأكدتي؟
ضجت اكثر.
امي تخاف اكثر من ماجد. شوداني وكتلها.
ذهب: سويت وكل شي تمام ماكو شي يخوف.

امي: شلون ماكو شي يخوف؟ هاي ذبحه مو افلاونزا. رجلج وين؟ انطينياه شلون ساكت؟ مو زين عليج الحمل بي خطورة مو كلولج ميصيرلج الحمل بعد؟ شلون جازفتي؟ شلون متفكرين؟
ذهب: ماما تره لااني رايدته ولامخططتله صار بحده شلون ماادري.
امي: شوف القهر شلون يركض وراي. شوف القهر. باجر اروح لهاي المره بالسوك جانت تشتغل قابله. بلكي تكدر تنزله. شكد صارله؟
ذهب: ماما شبيج انخبصتي! ماانزله.

امي: شنو! شنو يعني متنزليه؟ شلون متنزليه؟ شنو متوازيه عليه؟ مجبورة؟ شي مو زين عليج شنو متنزليه؟ رجلج يريده؟ مو بكيفه يريده. اني هسه اخابره شنو بكيفه. اخسر بتي علمود والله جنابه يريد جهال بعد. ميفكر هذا؟!
ذهب: ميريد ميريد على كيفج. هو هم ميريد ويكلي نزليه.
امي: وشمنتظره؟ ليش متنزلينه؟ لا انت متاخذين الحجي. الحجي ويه رجلج. خل اخابرله وافتهم منه.
ذهب: ماما.
ماما.
سدت التليفون بوجهي.
ادك عليها مشغول.

اكيد اتصلت على ماجد.
افففف اني جبتها لنفسي شوداني هسه وحجيت جان انتظرت شوية.
رجعت نجلاء وره شوية اتصلت جاوبتها: شبيج يمعوده متفهميني؟
ذهب: جان سألتي اخوج وهو يكلج.
نجلاء: شبي؟ شسوه؟ سألته ميحجي شي.
بقيت ساكته خنكتني العبره واستهضمت على نفسي يرجع يضربني.
هي حست بيه بجيت: دفتحيلي الباب راح اصعد فضولي بفراشه واجيج.
فتحتلها الباب وسمعت صوته يصيح الظاهر نجلاء صعدت فضل وسألته شمسوي.
اجت نجلاء كالت: شبيكم شكو؟

درت خدي راويتها اثر اصابعه.
جفلت هي..

نجلاء: هذا صدك مخبل. ادري على شنو الموضوع ميستاهل هالعصبية والضرب والحجي الماله داعي شيصير يعني لو امي تأخر عشاها نص ساعة لو حتى ساعة لو ساعتين فرضاً واحد مريض لو صار عنده ضرف لو انشغل. شنو واح تموت من الجوع! شبي هذا؟ هي لو جوعانة جان كالت صبولي مو هاي البنات موجودات وكاعدات من المغرب بالمطبخ؟ وتكليله تعبانه شتتوقعين وانت من رجعتوا مالج خلك وتعبانه اني لاحظتج. شتتوقعين منه وهو صار شكد متخبل وخايف وكلما نحاول نقنعه يرجع يخاف انوب تكليله تعبانه طبعا يخاف اكثر ويكول حجيي صحيح.

بقيت ساكتة وامسح دموعي.
بقت نجلاء يمي تحاول تخفف من وطأة الموضوع بالكلام المعتاد: هو يحبج. ويخاف عليج وهو عصبي وانت اكثر وحده تعرفين شكد هو عصبي بس من يبرد يتندم ويجي يعتذر. تره ماكو رجال عراقي يغلط ويجي يعتذر بس هو هاي بحدها نعمة نادرة الوجود بس عندج موجوده حتى فريس مو مثله.
نعست خليت راسي عالمخدة وهي تلعب بشعري وتحجي وتضحك.
ذهب: انت يمكن الحماية الوحيدة بالكون طيبة وحبابة وتحبين مرت اخوج لهدرجة.

نجلاء: لااا تره لو خُليت قُلِبت. اكو هواي خوش ناس مو كل الناس مو زينة بس مرات اكو شخص يحفر جوه الكل لخاطر مصلحته مثل خالتي مثلاً ميصير يعني نطلع كل احنه اشرار لازم واحد بينه يصير محايد عالاقل. مو كافي امي واختها وبنات اختها مسويات عصابة عليج هههههه.
ذهب: واخوج مقصر على اساس.

نجلاء: يابة اخوي حبه عنيف. الا نحجي هيجي. اخوي من يحب يأذي. بس والله ماكو بطيبة كلبه. لو احجي عليه مراح تقبلين متاكده وراح تدافعين عنه لان تعرفين بي حنون وكلبه طيب بس هو هاي العصبية الميكدر يتحكم بيها هي مضيعته.
ذهب: وشنو ذنبي؟

نجلاء: ذبج يحبج. منو كلج تخليه يحبج ههههه يمعوده على اساس انت متفرحين بحبه هذا كله. شوفي خل اكلج شي والله والله هالعصبية هاي وحتى الضرب محسودة عليه كلهن يعرفن شكد يحبج وشكد يغاز عليج لذلك ميتات منج ومقهورات.
رفعت راسي واني منتهيه من النعاس باوعتلها: بشرفج بروح ابوج. هم جان يضربها؟
نجلاء: منو؟
ذهب: بت خالتج الجميلة.
نجلاء: هاا الجميلة.
سكتت.
ذهب: وين الجواب؟ ليش سكتي؟

نجلاء: يعني هو جان يحبها مثلاً. لو جان يغار عليها؟ لو جان يخاف عليها مثل ميخاف عليج؟
ذهب: يعني مجان يضربها!؟
طبعاً.
لان بت خالته. يستحي من عمه ومن ولد عمه ومن خالته ومن امه ومن ابوه ومن كل العشيرة. شلون يضربها بعد.
نجلاء: لا لا لا لا هذا الحجي كله مو صحيح. مو هيج تره. شحجيت اني قبل شوية؟ اشو جنج متسمعين شي!
ذهب: لا والله سمعت. وسمعت بما فيه الكفاية. بس هسه يالله افتهمت.

نجلاء: لا والله كل شي متفتهمين حتى لو زعلتي. اكلها يحبج ويغار عليج ويخاف عليج تكول هسه يالله افتهمت.
غفيت.
محسيت بنجلاء من راحت نزلت.
بقيت نايمة الى ان اجه هو كعدني.
وخرت ايده ورجعت نمت.
ماجد: كومي نامي هناك.
رجعت نمت بدون مااجاوبه.
رجع ندهني: ذهب؟ كومي نامي هناك مو احجي وياج؟
سمعته بس بقيت مثلما اني. مغمضه ومتغطية.
حسيت بي كعد.
اتحنطت مااريد يحس بيه وعيت.
بقى كاعد كبالي وساكت.

رجع ندهني: كومي نامي هناك يم الجهال عالاقل. ذهب؟
درت وجهي وانطيته ظهري.
ماجد: الجهال اذا كعدوا بالليل متسمعيهم.
مجاوبته.
صار عصبي: كوووممي نامي هناك وخلصيني.
ولااتحركت ولاجاوبته.
كلش قفلت هالمرة.
هو هم جر الغطا مني وسحبني من ايدي: مو احجي وياج؟
ذهب: واني مااريد ومااشتهي احجي وياك بعد.
بقى واكف يباوعلي بعدين طلع وطبك الباب حيل.
بقيت كاعدة طول الليل.
بقيت مااحجي وياه وهو هم.
وبقيت انام بالغرفة الاخيرة.

ظل هو يدز الجهال وراي وقت النوم عباله هيج يخليني اخذهم انومهم وابقى انام يمهم.
حتى الاكل ماانزل اكل اذا هو موجود.
فاتني موعد دكتور القلبية وهو غلس.
امي يومية تخابرني تلح حتى اروح انزل الطفل.
بعدها اجت عمه حميدة مسألتني شبيج وشكو وشصاير.
حسيت نجلاء حاجيتلها.
وره يومين من رجعتها دخلت ارتب غرفتها: سدي الباب شوية وتعاي يمي.
سديت الباب وكعدت كالت: لشوكت تبقون انت ورجلج هيج؟

ذهب: عمه عفيه مااريد انغث واذا احجي انغث.
عمة حميدة: لا مو بكيفج. حتى لو تنغثين المهم نعرف شقصتكم؟ لشوكت هيج هم نفرين بالبيت وهم ناس متحجي ويه ناس؟
ذهب: هيجي احسن راسي بارد.
عمه حميدة: ياااء. ولج انت لشوكت اعلم بيج اكلج الصبح زعلي بس بالليل جوه عباته.
ذهب: لاعباته ولاغيرها. مااريد بعد. هيجي اريح.
عمه حميدة: اششش. اشش ولاكلمة متحجين هيج حجي بعد ابد مااريد اسمعه.
ازعل منج. والله ازعل منج.

ماجد هذا ينكال عنه هيج؟ مااقبل. حتى اذا غلطان اني اجيبه الج ويبوس راسج بس متكبرين السالفة وتسويها صدك وتكولين مااريد احجي وياه بعد واريحيلي. يمه المره مو يومية رجال وهذا ابو بيتج ومدللج ويموت عليج وابن آدم مو كل ساعاته سوه. مره ماله خلك مره تعبان مره مريض مره فرحان وزين.
دمعت عيوني كتلها: رجع ضربني.
عمه حميدة: مو مشكلة كتلج اني اخلي يجي يبوس راسج ويراضيج.

ذهب: مااريد. مااريده يراضيني ولايبوس راسي. مليت اني من هالحالة يومية ضربه وتعاي انسي بحجة ندمان وغلطان.
شوية وانفتح الباب.
ماجد.
شلم ردت عليه عمه حميدة السلام اني بقيت ساكتة مرديت.
مسحت دموعي ودرت وجهي.
دخل هو وسد الباب.
انتبهت على عمه حميدة تأشرله اتدنه راد يبوس راسي بس اني دفعته.
اتنهد هو وكال: استغفر الله.
عمة حميدة: والله بطرانين. هسه اني بعدني شابة والمرحوم عدل واخلصها نكد وبجي وزعل!

ماجد: هسه فوكما هي غلطانة بعد هي المتقبل تحجي وياي.
عمة حميدة: اششش.
صرت عصبية كتله: لتكول غلطانه. لتكول هي غلطانة. اني مغلطانه بأي شي. افتهمت؟ لتحاول تطلع الغلط مني لان دائما الغلط منكم.
ماجد: دشوفي لسانها. لسانها صاير شطوله دتسمعين؟
ذهب: لازم ابقى ساكتة. تدوس ابطني وتتجاوز علي وتمدد ايدك واذا حجيت يطلع لساني شطوله؟!
عمة حميدة: صوتج. مااريد احد يسمع. صوتج.

كعد هو ساكت وحاول يحجي بهدوء: من اتزوجنه لليوم انت استلمي امي. تكعدين الصبح تسويلها ريوك وتسويلها غدا وتسويلها عشا. انت من نفسج اني مطلبت منج صح لو لا؟ اني قبل جنت اسوي كل هالشغلات. بس انت من اجيتي اخذتي هاي المهمة استلميها بمكاني. هذا طيب منج من تسويلها هيجي هذا من طيبج. اني اعتمدت عليج وشلت ايدي منها لاادري بسباحة ولااكل ولاشرب ولاعلاج. استغربت من اجيت بالليل وكالت امي وين العشا! يايوم امي باقية لهيج وقت كاعده علمود العشا.

كلما اجي الكاها متعشية وماخذه علاجها ونايمة. وانوب كلتي تعبانه واني ايام الح عليج واكلج مو زين عليج الحمل مو زين عليج.
متاخذين الحجي. صرت عصبي شتردين اسوي؟
ذهب: صرت عصبي اضربني. اهم شي متصير عصبي.
قبل لااكمل الحجي كالت عمة حميدة: هسه عوفوا سالفة العشا واذا تاخر عشاها شوية شصار يعني افرض مريضة افرض تعبانه افرض مموجوده بالبيت. واكسر ايدك مرة ثانية اذا مديتها عليها والله العظيم.

شنو استسهلت انت السالفة يومية ضاربها؟
ماجد: اني حالف اصلا ماامد ايدي عليها بعد من زمااان بس هي تخليني افقد اعصابي. اسبوعين ماادري شكد احجي واكللها مو زين مو زين مو زين عليج الحمل، هاي بعدها باول شهرين تعبت لو دخلت بالرابع بالخامس شتسوي؟
انقهرت صرت عصبية كتله: انت لو عندك احساس جان سألتني ليش، شبيج تعبانه. بس ماعندك احساس.
هو كام وكف: ماعندي احساس؟ هاي تسمعين؟ كدامج هذا الاسلوب الجديد!

عمة حميدة: الله واكبر. عود اكلكم صوتكم مااريد احد يسمع مااريد امك تسمع الا اكول هيج تركصلها بجفية مشاكلكم.
دار هو عليها كللها: امي شعليها وتركص بجفيه لمشاكلنه؟!
رادت هي تحجي بس اني كتله: لا شلون تحجين عليها، لا متحب المشاكل بينه حرام عليج عمه.
هو اتعجب من كلامي وصار عصبي اكثر: ضبي لسانج. يمج هي؟ حاجيه وياج؟ مسمعتج حجاية؟ عيب هذا الحجي مرة جبيرة اكبر من امج.
دفعته عمة حميدة طلعته بره.

رجعت كعدت يمي: فهميني هسه شنو القصة؟ شصاير واذا متحجين والله اصير وياه عليج.
انت متحجين هيج حجي بدون سبب بتي واعرفج.
بقيت ساكتة بس طكت روحي ومليت وتعبت كلما اسكت كلما ينداس علي اكثر.
حجيتلها الحجي السمعته من امه من حجت وياها نجلاء.
ذهب: شلون ماانقهر واني سمعتها بأذني تدعي الله ميفرحني بابني؟
ليش؟ ليش؟ شسويتلها اني؟

مو هسه هو يكول خادمتها؟ ليش اني من اسويلها شي ميغزر بيها؟ وبت اختها راوتها الويل واتطلكتها حتى لاتخدمها ومع ذلك ميته عليها وتريد تهجم بيتي علمودها؟
شلون اكدر اخدمها بعد واداريها بعد الحجي الكالته؟
شلون ميكش كلبي منها؟
اني هسه مااشتهي اشوفها تصدكين؟ والله احس كرهتها بعد.

بقت عمة حميدة ساكتة وتتحسر بعدين كالت: كومي يمه كومي روحي ارتاحي ومالج علاقة بيها بعد خلي البنا يخدمنها. هذا هم حظج مدري حظه هو. هاي المرة مدري الله اخذ عقلها وتريد تاخذ عقلنه وياها.
شتريد منج ومن ابنها؟
والله عقلي ميشيلها. شحجي هسه؟ شكله؟ اكله امك تدرعي على مرتك وابنك؟ حتى يموت من القهر.
ذهب: اني اكله. اذا متكليله اني اكله. بعد مااكدر ابقى ساكتة تعبت.

عمة حميدة: لا لا خلي اني اكله. احسن. منريد المشكلة بينكم تزيد. حسبي الله ونعم الوكيل. حسبي الله ونعم الوكيل.
الله لاينطيج ياللي ابالي.
ذهب: اوووف. كلبي يوجعني. والله كلبي يوجعنب. اختنكت. راح اطلع بره.
طلعت كعدت بالحديقة بالمرجوحة.