رواية صبرا يا قلبي الجزء الأول للكاتبة روز الفياض الفصل السابع والأربعون
ابو عبدالله: عمي اذا بعدج تعبانه فاحنه منضغط عليج. احنه نريد راحتج اذا تردين تبقين بعد يم امج ترتاحين احنه ماعدنه مانع بالعكس. احنه نريدج ترتاحين وترجعين لبيتج وجهالج ورجلج انت بتنه ومنقبل باذيتج ولاتعبج هواي مشاكل صارت وياج وطلعت من بيتي واجتج بدون ذنب ولاحجيتي ولااشتكيتي بس اني ماسكتت لاوالله وهذول كدامج سأليهم اخوانج. انت عزيزة علينه بوية اعز حتى منه هو ماجد نفسه. بتي سوتلج مشكلة واخذت جزائها اني ابوج واخذتلج حقج منها. تردين ضرب انضربت تردين اهانة انهانت..
بتي هي الغلطانة وهي السبب اني ماارضى بالغلط حتى لو هي بتي طردتها. بيتي بعد متطبله اسراء ومتوصل لعتبته. هاي لخاطرج واذا اكو شي بعد يرضيج حتى ترجعين كولي واتدللي.
ابوي: ابو عبدالله احنه لانريد نجربكم ولا عدنه نية ننتقم وذهب بتكم وتعرفوها لاصاحبة مشاكل ولا تحب تسوي تصفية حسابات والغلط كل الاطراف مشتركة بي حتى هي من طلعت بدون علم رجلها غلطت واحنه هذا الحجي حجيناه وياها مو بس كدامكم وهي تعرف نفسها غلطت بس هو ماجد عصبي وساعة شيطان.
ماجد: واني معترف غلطت وكتلها هالحجي اني مو من إلى تاخذهم العزة بالاثم ويبقى مصر على غلطه وهي اكثر وحده تعرفني اني اذا غلطت اكول غلطت واعتذر عالغلط الغلطته. هي طلعت بدون علمي ومو لاي مكان وتعرف كلش زين اني مااقبل تروح والدليل مكالت راح اروح لان متأكده مستحيل اقبل تروح، ومع ذلك راحت.
ابوي: ميخالف ياعمي. بس العصبية هاي المفرطة مالها داعي انت لشوكت تتعامل بكل شي بعصبية؟ مو كل الامور تتعالج بالعصبية ولا كل موضوع يستوجب العصبية شفت انت بعينك النتيجة موضوع بسيط وصلها للموت بسبب زلة لسان بساعة عصبية وعلى شنو والله طلعت من البيت بدون علمك. قابل طالعة وحدها؟ مو طالعة ويه العلوية؟
ماجد: عمي اني ماانقهرت لان طلعت من وراي، هاي مرتي يعني اعرفها حتى لو طلعت من وراي اعرفها وعندي ثقة بيها ومطالعة وحدها طالعة ويه عمتي قابل ماعندي ثقة حتى بعمتي؟ بس اني انقهرت لان مااريدها تروح لهناك، اني مرتي متنزل نفسها لهيجي ناس وتروحلهم. اني ماعندي مره تدخل نفسها بمتاهات وحجي ومهاترات ويه هيج عالم. وحدة متستحي حشاكم شلون اقبل مرتي تروحلها وتحجي وياها؟ كل شي كدامها جان يصير حتى من جنت احجي وياها بالتليفون افتح السبيكر كدامها حتى تسمع وترتاح ومتبقى بشك وتعرف كل شي جان يصير، تروحلها ليش؟ ليش؟ زغيرون اني ممالي عينها تروح تفاصل علي يم النسوان لتحجن ويه رجلي شنوزغيرون وخاف اتقشمر؟
موضوع مو من مستواي والاكبر من اتكفلوا بي همه يحلونه بمعرفتهم بدون مااتدخل وماانزل نفسي ومااخلي نفسي علج بحلك هيج عالم. ليش مااسمع الكلام وابقى بعيدة؟ مو امي حميدة كلتلها اني اروح واني احل الموضوع؟ ردت اجاوبه بس عمه ابو علي كال: هسه احنه مجايين نكول ليش سوت وليش هيجي صار. الصار صار وانتهى والموضوع اخذ اكبر من حجمة من الطرفين. احنه هسه جايين حتى نكلب الصفحة ونبدي صفحة جديدة بدون مشاكل وعصبية.
احنه جايين نرجع بنيتنه مو نحجي بهالمواضيع ونتعاتب. ومقدرين موقفج عمي والسويتيه الج حق بي مالج علاقة بالحجي اليحجي هذا مره وتعرف اكو وحده حاطه عينها على رجلها وتريد تاخذه منها شتريدها تسوي؟ سكتت هواي عنها مره مرتين مفاد وياها شلون تتحمل وتبقى كاعده ومخلية ايدها على خدها؟ غير تحبك وتغار عليك ومتريد بيتها ينهجم؟ لو وحده ثانية بمكانها جان من اول مره راحت وفضحتها وسوتلها قصة بالشارع كدام امة محمد.
سكتنه كل احنه بعد هالحجي وفهموا همه اني مااكدر ارجع هسه. وشافوا ماكو نتيجة من الحجي اكثر بالموضوع فكلوا لابوي خليها تبقى ترتاح بعد فد اسبوع اسبوعين. مرادوا يضغطون علي اكثر ولايحرجون ماجد اكثر. مر اسبوع والثاني وصار شهر. مليت من كعدة البيت منتظره الدوام يجي حتى التهي، الاسبوع الجاي عيد ميلاد حبايبي ووراه باسبوع اداوم بلكي التهي وانسى شويه.
ماما قررت تسوي عيد ميلاد رائد وفضل يكون بالحديقه القريبه يمنه لان عائليه وحلوه وزغيره وطبعا هاي خطة عمه حميده اعرفها.. عزمت فطوم والبنات وبيت خالتي ونسرين وعهود والبنات وزينب وطبعا عمه حميده والعلويه كلهم اجوا وماجد هم جان موجود صور كل شي حتى يوديه لنجلاء.. طول هالفتره ماجد يومية يراسلني من رقم واسويله حظر. احتفلنه بعيد ميلاد رائد وفضل جانت اللمه حلوه واني جنت محتاجه اغير جو شويه.
عمه حميده: اني نعست والعلويه غفت اول مره اشوف واحد ينام وهو كاعد. ذهب: اذا تردون روحوا اني والاولاد نرجع ويه خاله. عمه حميده: لا ماكو هيج حجي اكعدي ابوج راح هسه انت ويه رجلج. ذهب: يمه لاتسوين هيج لخاطرالله كافي خطط. عمه حميده: هسه هي وينها فايده وياكم؟ اجه ماجد بيده رائد فضل نايم عد عمه حميده كعد يمي كال: كلهم راحوا وامي نامت. عمه حميده: اي والله يمه اني هم نعست وحبيبي نام هم يالله نروح كافي.
كام وكف كال: يالله اتوكلوا على الله بس خل نكول للجماعه رايحين. خاله والبنات كالوا شويه ويرحون. احنه رحنه كعدت عمه حميده وفضولي كدام واني العلويه ورائد بحضني وره. عمه حميده: وصلنه احنه اول وبعدين مرتك وجهالك. العلويه: اي والله نريد انام.
وصلنه لبيتهم دخل السياره اني خفت خاف ميقبل يوديني بعد بقيت بالسياره منزلت عمه حميده نزلت وهو نزل ونزل امه ودخلها جوه عمه حميده سلمت علينه وخلت فضولي وره لان نايم وراحت دخلت للبيت. اجه هو صعد بالسياره باوع بالمرايه. ماجد: تعاي كدام انت ورائد خلوا فضل نايم. كمت كعدت كدام قبل لايلعب الشيطان بعقله ويبطل وميخلينه نروح. شغل السياره وطلعنه كال: كلها نايمه ابو جبار والبنات ميدرون بيج اجيتي.
بقيت ساكته باوعت لرائد بده ينعس كعدته وخليت راسه على صدري حتى يباوع من الشباك وينام وفعلا حبيبي بس اتحركت السياره شويه وغفى. ماجد: يشبهج. غلست كال: تره قبل شويه اني اللي جنت كاعد وياج ولازم ايدج واحجي وياج نفسي. مد ايده شغل الاغاني ونصه الصوت كال: تختارين لو اختار؟ ذهب: انت. طلع اغنية (انطيني وعد للموت).
باوعتله كلت بكلبي هسه وكتها ناقصين كآبه بس بدت الموسيقى انعصر كلبي درت وجهي عالشباك حتى ميشوف دموعي بس سمع شهكاتي على كيف لازمه نفسي كوه حتى لايطلع صوت.. لزم ايدي سحبت ايدي حضنت رائد. حسيت الطريق صار شطوله ميريد يخلص. هو ساكت ميحجي بعدين وكف بالطريق ودار علي. ماجد: لاتبجين. ذهب: ماابجي. ماجد: ليش تشلعين كلبي وكلبج هو بالنهايه ترجعين لان اني ماعندي اختيارات ثانيه.
وصلنه للبيت نزل هو دك الجرس بعدين فتح باب السياره اليمي ودنك علي كلي: رفعي الحظر عن رقمي واعتبرينه تونه مخطوبين محتاجين وقت حتى نتعرف على بعض ورائد وفضل اعتبريهم اخوانج. بقيت ساكتة اتنهدت كال: تره مااعيد هالحجي مره ثانيه. فتح بابا الباب اخذ هو رائد حتى انزل وانطاه لبابا وراح جاب فضل وانطانياه باسهم وسلم وراح.
رواية صبرا يا قلبي الجزء الأول للكاتبة روز الفياض الفصل الثامن والأربعون والأخير
اليوم داومت بس كل شويه اتصل على ماما اسأل عالاولاد بعدين كالت اجت عمه حميده اخذتهم كالت يوميه الصبح تجي تاخذهم والعصر تجيبهم لان ماما وحدها متكدر عليهم لان بدوا يحاولون يوكفون.. خلص اليوم كل مجاملات وسلام صارت الساعه ( ب1 ) ونص كلهم جهزوا نفسهم يطلعون بالباص مال الدائره للبيت بس اني بقيت لا ابويه اتصل كال وصلت ولا ادري اروح بالباص طلعوا بقيت وحدي خفت.
طلعت وراهم وبقيت واكفه اباب القسم انتظر كلت هاي هي راح انخطف لو يكتلوني ومحد يعرف التفتت شفت ماجد. ماجد: خفتي؟ عبالج حرامي. ذهب: الله يسامحك خلستني. ضحك كال: يالله ابوج خابرني مراح يكدر يجي اليوم عنده شغل. كلت بكلبي ادري بي ماعنده شغل وادري بيك انت كايله لايجي حتى انت تجي. بس غلست ورحت صعدت بالسياره ورحنه كتله: خل نمر اخذ الاولاد شيجيبها امي بعدين تجيبهم. ماجد: بعدين هسه نروح نتغدا.
ذهب: مااريد اتأخر رجاءا. ماجد: ابوج قابل اني متفق وياه وماخذ موافقته حتى نكعد ونتعرف على بعض.
ماجد: شبيج مو اتفقنه البارحه نعتبر نفسنه توه مخطوبين ونبدي نتعرف على بعض. ذهب: لاتعليق. ماجد: خوش حجي. تمام. شغل الاغاني كال: تختارين لو اختار؟ سكتت اتنهدت ومديت ايدي اختاريت اغنية الجسمي(لاتقارني بغير). ضحك هو كال: يعني هم ماخذج اغديج وهم تبسمريني. مد ايده لزم ايدي ردت اعترض بس سكتت مالي خلك مشكله جديده.
وصلنه للمطعم ونزلنه هو حاحز كابينه مثل الغرفه مغلقه كعدنه وطلبنه اكل وانتظرنه يجيبوه كال: ليش مرفعتي الحظر عن رقمي؟ ذهب: نسيت. ماجد: امم رفعيه هسه. طلعت التليفون ورفعت الحظر عن ارقامه الجديده دك علي كال: هذا حفظي عندج تتصلين على هذا الباقي مسحيهم. اني حسيت جعت حيل وبده ضغطي ينخفض لان جوعانه لا اكلت ولاشربت طول فترة الدوام. هو خال ايديه عالطاوله ويباوع بالموبايل.
مديت ايدي لزمت ايده لان حسيت الدنيا بدت تظلم مااشوف شي واضح. خفت لا اوكع من الكرسي. لزم ايدي هو الظاهر مافهم باس ايدي. حسيت كلبي ظل يدك حيل خليت ايدي على صدري. هو راسا اتنده يمي ولزمني خله راسي على صدره. ماجد: حبيبي شكو؟ شبيج؟ كلبج يأذيج؟ كومي نروح للمستشفى كومي. راد يكومني بس اني هزيت راسي لا هو انخبص وخاف. ماجد: كومي خل نروح للمستشفى. ذهب: خلص خلص دخت شويه يمكن انخفض ضغطي لان جعت.
ماجد: ميخالف كومي نروح للمستشفى حتى نطمئن. ذهب: مايحتاج خلص راحت هسه بس نتغده يتعدل كل شي. بقى كاعد يمي ولازم ايدي. ماجد: من نتزوج اخذج لتركيا نروح نشوف حل ان شاءالله. ضحكت خربت من الضحك واني بهالحاله هو ظل يضحك. ماجد: اي شسويلج كل من وراج. جابوا الاكل اكلنه وخلصنه بعده كلبي يأذيني بس سكتت مااريده يخاف ويلزك الا نروح للمستشفى. ماجد: دواج وين؟ هسه صرت اني اذكرج؟ ذهب: شربته الصبح.
لح هوايه حتى يوديني ويجيبني للدوام سكتت ادري مااكدر عليه كلي: من باجر ان شاءالله اوديج واجيبج وهذا مو طلب ولو هو خلص المفروض ترجعين لبيتج بعد مالها داعي كعدتج هناك. ذهب: الله كريم.. بالليل دز مسج يذكرني: الصبح تلكني بالباب اجي عليج اوصلج. الصبح لبست وكعدت انتظره بس مااجه اتصلت عمه حميده كالت: والله يمه مصخن ميكدر يجي يون من الصخونه وميقبل يروح للمستشفى يضربوه ابره حتى تفكه الصخونه.
بقيت متحيره اروح لو اغلس لو اتصل عليه اذا اغلس معناها كل شي ينتهي حتى وياهم لان اكيد راح يكولون شدعوه عليها حتى من اتمرض ما اجت شافته. كلت لبابا: ماجد مراح يجي مريض اليوم مصخن حيل وميكدر يكوم. بابا: سلامات ميشوف شر. ذهب: الله يسلمك. بقيت احوس. ماادري شسوي بالي يمه. امي وابوي حسوا بيه ماما: متردين ترحيله؟
سكتت كالت: ماما احنه ماعدنه غيرج نريد مصلحتج وهو زوجج ابو اولادج تعبتيه تره محد يصبر هلكد ويتحمل بس علمود تقبلين ترجعين كافي هيج هسه انتي لازم تضحين مو بس هو. هو اجه اكثر من مره واعتذر واتوسل كافي. لو ترديه لو تكولين مااريده بعد. بابا: ميحتاج تفكرين باباتي كومي جيبي شغلاتج واولادج وامشي اوديج لبيتج هو هم خطيه محتاجج هسه كافي جرينه اذنه وعرف غلطه.
طلع شغل السياره واني كمت اخذت بس الشغلات الضروريه واخذت فضل وماما جابت رائد ورحنه. وصلنه ابو جبار فتحلنه الباب وفرح من شافنه اجه سلم علينه خطيه واخذ رائد دخله وكف يم باب المطبخ وصاح: خطار. خطار. طلعت عمه حميده وبس شافتني طكتها هلهوله عبالك عروس. دخلنه جوه اجت العلويه على صوت الهلاهل حضنتني وباستني اني هم بست ايدها وبست راسها وبعدين حضنت عمه حميده كتلها: اشتاقيتلج.
عمه حميده: يابعد عمري والله اني اكثر يوميه من اكعد الفجر اظل ابجي اكول ياربي لخاطري ماعندي بنات بس هي بتي اهديها خليها ترجع ترد عني الوحشه. ذهب: هاي كلكم صرتوا تبجون مثلي انت ونجلاء وخاله هههههه. كعدنه شويه بابا كال: وينه السيد شخيره؟ العلويه: فوك يمكن نام، من الفجر لهسه نتوسل بي تودي عمته للمستشفى ميقبل يرجف بمكانه وميقبل يروح والافلاونزا هدت حيله. ماما: كومي ماما شوفي زوجج حتى ابوج يوديه للمستشفى.
ذهب: ان شاءالله. صعدت لغرفتنه ظلمه مطفي اللايت ومتغطي ونايم اتدنيت يمه خليت ايدي على كصته مصخن.. كعدت يمه عالجربايه ماحس بيه بقيت اباوعله شكد اشتاقيت لوجهه جنت من اشتاقله اطلع فلم واشوفه خليت ايدي على كرعته هو اتحرك فتح عيونه ضحكت اني على كيف وكتله: تكعد لو اروح؟ باوعلي مستغرب كال: انت عدنه لو اني من الصخونه اهذي؟ ذهب: هههه ماادري روح اضرب ابره وشوف من تنزل حرارتك اني موجوده لو من الصخونه تهذي.
كعد ضحك كال: خاف الكاميرا الخفيه؟ ذهب: معناها نام اني رايحه. ماجد: وين؟، اليدخل هنا بعد ميطلع مو عبالج كل مره عجبتج السالفه هاي اول واخر مره تسويها، بعد سنه مقدم مترحين لاهلج. ابتسمت حضني وباس خدي. ماجد: موتيني ياظالمه. كتله: بابا ينتظرك ياخذك للمستشفى كوم انزل. ماجد: شويه بس خليني ابقي هيج. ذهب: من ترجع اشبع هسه روح اضرب الابره بسرعة ماجد: صار. ردت انزل كال: تره مترجعين وياهم مو عبالج.
ضحكت كتله: لتخاف ماارجع باقيه. راحوا للمستشفى وضربوه الابره وماما وبابا راحوا لان بابا عنده دوام، اني صعدت اتصلت بالبنات اخذولي اجازه اليوم وبدلت ملابسي ونزلت يم عمه حميده والعلويه ماجد بالحديقه يحجي بالتليفون دخل كال: اني نعسان راح اروح انام وارتاح شويه. عمه حميده: روح يمه نام وارتاح.
صعد ينام صاحتلي العلويه كلتلي: ديري بالج عليه تره يحبج. اني ضوجتج قبل واذيتج اعتبريني مثل امج عبالي يرجع بت خالته. عبالي بعد اكو امل بينهم بس من رحتي شفت شكد يحبج واني ماعندي غيره وماااريد غير راحته الله يخليلكم هالحلوين ان شاءالله كتلها: انت هم امي مو بس امه واذا هو يحبني اني اموت عليه لاتخافين عليه انطيه عيوني لو راد. العلويه: ادري بيج وادري بي ميحبج من فراغ بس شايف منج طيب ودلال واهتمام.
انت بنت اوادم. عمه حميده: بعدج هنا كومي روحي يمه وخلي هالحلوين يمنه نتونس وياهم. صعدت لكيته متغطي ونايم مردت اكعده اتمددت على كيف يمه وبقيت اباوعله. ماجد: بدل متبقين تباوعيلي هيج بوسيني عالاقل. كمزت عبالي نايم كتله: مثل العتاوي تنام مغمض عين ومفتح عين. ماجد: ههههههههههههه. وخر الغطا واتنهد حيل كال: تعاي هنا. اتدنيت نمت بحضنه وغمضت، كال: اشتاقيتلج.
ذهب: على كيفك تره بعدنه مخطوبين وانت تدري استحي من هالحجي بعدني مامتعوده عليك. ماجد: لاحبيبي هذا الحجي قبل لاتجين اكو وحده مخطوبه تجيب اغراضها وتجي لبيت خطيبها لا ونايمه بحضنه بعد. ضحكت كتله: هذا غش شهاللواته ميصير هيج.
ماجد: ادري بيج تردين تعيشين الدور حتى تنامين بغرفه واني بغرفه بس فلمج محروك هذا قبل من جنتي متعرفيني هسه حتى لو متعرفيني اني اعرفج ورائد وفضل يعرفوج خوما جايبهم اني من الملجأ يعني مالج امل حقي اريده كامل مكمل مال اربع شهور. ضحكت حضنته وبسته كتله: احضني.. حضني باس راسي كلي: لاتعيديها مره ثانيه وتباتين بغير بيتج.
ماجد: شلون طاوعج كلبج كل هالمده تبقين؟ ذهب: عبالك سهله لو جنت فرحانه سعيده ومتونسه بس موبيدي جنت احتاج ابقى حتى انسى. ماجد: تردين تنسيني؟ ذهب: تمنيت انساك بس مااكدر متمردقيقه ماافكر بيك. ماجد: فدوه لكلبج اني. ذهب: اسم الله عليك اذا انت مو وياي مااريده كله شسوي بي. ماجد: شهالحجي الحلو احس نفسي مثل الجهال بليلة العيد مااكدر انام. ضحكت حيل كتله: لانام ماكو عيد لا اليوم ولا باجر انت مريض.
ماجد: مو ضربت ابره شنو بعد؟ ذهب: ميخالف حبيبي نام وارتاح حتى تصير زين واني راح انام يمك. ماجد: اي مادام هيج اني مريض ومحتاج اهتمام ودلال ودلع ورعايه. ذهب: ياربي ويحجي على نجلاء. ماجد: شبيج غير حقي؟ وراها بشهر سافرنه تركيا وسويت فحوصات والحمدلله كل شي تمام الذبحه طلعت من النوع المستقر مااحتاج عمليه بس علاج مثل اللي اشربه يوميه موسع اوعيه ولازم ماكو مجهود وتعب رياضه وهالسوالف.
بس موضوع الحمل ممنوع لان ممكن يكون بي خطوره.. رجعنه للعراق وكملنه حياتنه عادي بهدوء والحمدلله ماكو مشاكل جديده بحياتنه. حياتنه هادئه والحمدلله ماجد صارت عصبيته اقل ولاني مريضه صار التفاهم بينه اسهل يعني يخاف يزعلني. بس اكتشفت اني حامل وهنا رجعت العصبيه والتوتر ماجد يكولي نزلي الطفل واني مااريد انزله حرام هذا رزق.
هواي احتاجينه وقت حتى نتأقلم ويه الحمل الجديد بالوضع الجديد لان ممكن يكون بي خطوره على حياتي كلبي ممكن ميتحمل.. طبعا مااكدر اداوم ولا اتحرك لان اي مجهود مو بصالحي. حاليا اني توني دخلت بالشهر الخامس. نوموني بالمستشفى خاف يصير شي ولازم ابقى لحدما ادخل بالشهر السابع. بعدين اروح لتركيا حتى يولدوني بالسابع لان مو زين علي الحمل يطول اكثر.. هالمره اني حامل ابنوته.
ان شاءالله تعدي هالفتره على خير لحدما ادخل بالشهر السابع و الله يكومني بالسلامه ويصبر كلبي ويتحمل التعب والالم لحدما اولد حبيبتي اللي ان اتفقت ويه ماجد اذا اني الله ماكاتبلي عمر اشوفها يسميها بكيفه بس اذا اني موجوده اريد اسميها شمس ان شاءالله. بس الله يصبر كلبي.
في نهاية قصتنا نقول لكم: احبوا برفق. واعتدلوا في غيرتكم. وابتعدوا عن الشك. وعاتبوا من تحبون لكي يدوموا لكم. وليس الضرب من شيم الرجال بل الاعتذار. اعتذر اذا اخطأت كي يبقى من يحبك الى جانبك. فالاعتذار يزيل نصف الوجع. واصبروا على من تحبون.. تحياتي، روز الفياض. تمت نهاية الرواية أرجوا أن تكون نالت إعجابكم رواية صبرا يا قلبي الجزء الثاني للكاتبة روز الفياض كاملة تااابع اسفل
رواية صبرا يا قلبي الجزء الثاني للكاتبة روز الفياض كاملة اقتباس من الجزء الثاني
نجلاء: والله خوافة انت. المشكلة تخليني اتمنى اني بمكانج حتى استغل الوضع. لج بابا انت صحتج على كدج وهو يخاف عليج من اقل شي سبحان الله يمكن الله خلاج تتمرضين حتى يتغير ويغير اطباعه كلها علمودج. متتذكرين قبل شلون جان عصبي هسه هادىء اصلا ويخليج اتطلعين وترحين للسوك وتباتين عند اهلج كم مرة. اول تالي ماجد يتفاهم بهيج سوالف!
اتنهدت كتلها: المرض مينراد. بس يمكن على كولتج اتمرضت حتى يتغير شوية ويقلل عصبيته ويبطل سوالفه. نجلاء: ياسوالف؟ كولي غيرته. الرجال بلا غيرته مينراد. كل إلى صار بينكم لان يحبج ويريدج اله وبس الانسان من يحب يصير قاسي ويه اللي يحبه من كدما يحبه ويريده بس اله. ذهب: والله يانجلاء اليحب المفروض ميكدر يقسى عااللي يحبه.
نجلاء: والله اني ماافهم بسوالف الحب عفتها الكم انت واخوي. ماادري شوكت اخوي صار رومانسي اشو قبل اتذكره دفش. ابد ماعنده رومانسية حتى اغاني ميسمع ولايخليني اسمع. مره رزلني رزاله لان متمددة واسمع ام كلثوم ومندمجه صلخني ذاك الكف المعدل ورفس الراديو. جان عندي راديو عشتوا اسمع بي اغاني بالليل يايابة. انسحلت سحله بيومها. عباله احب. فصول رواية صبرا يا قلبي الجزء الثاني رواية صبرا يا قلبي الجزء الثاني للكاتبة روز الفياض الفصل الأول
أحتلني حبكِ كأنكِ تعانقين قلبي بكل قواكِ؟ ذهب: اكول نجلاء عندي شي اريد اكوله بس مااعرف شلون اكوله. نجلاء: خير حبي شمسويه من مصيبة؟ ذهب: مصيبتيش؟ ماكو شي. نجلاء: شوفي. اعرفج اني مادام كلتي ماكو شي معناها تأثرتي بكلمة مصيبة وخفتي. كولي شعندج؟ ذهب: شوكت تجين؟ نجلاء: شنو يومية جاية. تره اني هم عندي بيت ورجال مو بس انت. ذهب: مبين كاعد يمج فراس. الح بعد لو كافي؟
نجلاء: لا عيني لا مااكدر اجي واعوف فروسي حبيبي مااكدر اشتاقله وهو هم حبيبي ميكدر بدوني يوم واحد. ذهب: اكلج اني مااعرف امثل فتحي السبيكر خل اكله احجزلها ووديها ومتاكدة هو هسه ولايمه الحجي فخليني احجي وياه كبل احسن. نصت صوتها وكالت: لااا لج يسمع بس يغلس. انت ظلي لحي علي واني اتعزز وارفض راح افتح السبيكر. ذهب: ديالله. جانت هاي خطة نجلاء حتى يخليها فراس تجي للعراق.
وبعد عدة محاولات والحاااح عظيم مني استحى فراس وقبل يحجزلهم هي واولادها حتى يجون. اجت بعد شهر ودخلت من الباب تصيح بعدما راح ماجد جابهم من المطار: وينها؟ وينها؟ بس لانايمة؟ تره ماعدنه جناين تنام للظاهري، كلولها اجت حماتج خل تفز تجي تستقبلني. اني جنت كاعدة ارتبلهم الغرفة الجوه واسمعها تحجي بصوت عالي حتى تسمعني. ضحكت ومديت راسي كتلها: اوووي شنو هالازعاج من الصبح الواحد ميكدر ينام وياخذ راحته ابيته.
نجلاء: صدقة. لج تعاي شنو هاي شصاير بيج؟ ليش انت هيج تحلوين كل مره اكثر وتضعفين واني اتمدد واتمدد واتمدد. ضحكت ورحت سلمت عليها وعالجهال وكعدنه نسولف ونضحك ساعة كاملة بالغرفة لحدما دخل علينة ماجد: صدك جذب؟ ذهب: ها حبيبي؟ شكو؟ ماجد: يعني انتن من تكعدن سوه تنسن نفسجن؟ من شوكت من كعدتن تسولفن صار ساعة كاملة هاي عود بس سلام شوفن بيش الساعة صارت؟ نجلاء: بالثنتين. اي وخير ياطير شكو؟
ماجد: خير ياطير؟ هو اليشوفج انت وجربزتج يشوف خير؟ هاي اولها كتلنه الجوع. ذهب: ياا سودة علي حقك والله. راح عنك الجوع هسه دقايق واصب الغدا مو تدلل كم ابو رائد عندي. ماجد: اي هسه كم ابو رائد. صار ساعة ابو رائد محد بحالة. ذهب: لا اموت اني. شلون محد بحالة.
نجلاء صافنة علي تباوعلي بعين ونص بعدين كالت: شوفي توني واصلة مااحب المغثة ولا الحلاة الزايدة وانت ورجلج حلاتكم ترفع السكر والضغط مااتحمل اني هذا الجو لان معناها تتسببون بطلاكي وتتحملون ذنبي وذنب جهالي. بطلوا هاي الافلام العربية وخلوا عدكم احساس اكو غيركم متزوج صحيح بس حالة حال الحدايق تره. لا يمكن الحدايق ارحم عالاقل يكدرون يباوعون يدورون ماكو شي لازمهم بس احنه بالضيم.
ضحكت حيل وماجد واكف اباب الغرفة وماد راسه يضحك على سوالفها: نجلاء الله يساعد فراس عليج. نجلاء: ليش خوية ليش؟ مو اني اختك الوحيدة ليش هيجي تجرح مشاعري. ماجد: والله الله يساعده. النسوان شيجرعجن. وانت كومي يالله كتلني الجوع مو وكت سوالف. كمت ركض اصبله الاكل ويه البنات وجهزت كل شي وهو الجهال يلعبون ونجلاء راحت تغسل وتبدل. العلوية جانت نايمة لان متغدية وشاربة علاجها وعمه حميدة عد بيت عمو ابو عبدالله.
راحت تشوفهم بعدما سمعت امهم مريضة اللي هي خالة ماجد ام اسراء. بعد الغدا ماجد راح ينام صعد وصاح علي صعدتله: نعم حبيبي؟ صحتلي؟ ماجد: متردين تنامين؟ ذهب: ومن شوكت اني انام الظهر؟ يومية ابقى كاعده ويه الجهال وانت تنام شعندك اليوم؟ ماجد: ماكو. عود ردت راحتج. ذهب: ايبااه اشمعنه اليوم رايد راحتي؟ كول شكو؟ ماجد: ماكو، عبالي اكو مقبلات شي تنتوس بيها. ذهب: نتنوس شنو؟ ضحك كال: نتونس.
ذهب: ههههههههه لاحبيبي اتنوس بحدك اني نازلة هي ماتنوس بهالظهر والبنية اليوم واصله. ماجد: يعني اذا هي اليوم واصلة احنه نصوم؟ ذهب: هههههه وانت ميحلالك تتونس الا من تجي هي؟ ماجد: لان ادري بيج هسه تكابليها وتكعدين وتنسين اكو رجال موجود محتاج اهتمام وراحة محتاج يتنوس شوية حتى يكدر يشتغل ويجيبلكم اكل ويدللكم. ذهب: هههههههههه هاي التمثيلية جديدة اليوم صاير تتمسكن.
ماجد: هسه شنو؟ اكو شي تحت الحساب لو الف راسي وانام. اتدنيت يمه بسته كتله: هاي تحت الحساب. يالله نام وراك كعده العصر. ماجد: خير شعدج العصر؟ اجيت اكله اريد اروح اسوي تحليل بس خفت وسكتت: هاا؟ ماعندي. شعندي. بس غير تكول وراك شغل. نزلت يم نجلاء واني افكر شلون لو صدك طلعت حامل؟ يصير انزله لو حرام؟ معقولة حرام هو بس شهر واحد؟ ممنوع علي الحمل لان عندي ذبحة وماادري شسوي لو طلع اكو حمل. نجلاء: شبيج صافنة وساكتة؟
ضحكت وبعدين دمعت عيوني. نجلاء: عزا العزه وهيبة هي وعشيرتها. ضحكت حيل كالت: والله عرفتج. بقيت ساكته اتوقعت تفرح بس رد فعلها ضوجني اكثر. نجلاء: لج مو تاخذين علاج لمنع الحمل؟ هزيت راسي وطاحت دموعي. نجلاء: اووف. والله انتو لازم بعد تصير عدكم بنية ووراها قفلوا المعمل. ذهب: يابنية. اني هسه مجرد شك والرعب موتني. نجلاء: لا اسم الله شدعوه هيج خايفة قابل من اول شهر خطر؟
ذهب: اني مخايفة من الحمل بس ياخوفي من اخوج لو عرف. نجلاء: اي حقج. هو كلش ميتفاهم بسوالف الصحة. وانت اصلاً مو اي مرض عندج. حقه ما الومه. يخاف على زوجته وام جهاله. ذهب: على طرف لساني قبل شوية اكله نروح نسوي تحليل بس خفت.
نجلاء: والله خوافة انت. المشكلة تخليني اتمنى اني بمكانج حتى استغل الوضع. لج بابا انت صحتج على كدج وهو يخاف عليج من اقل شي سبحان الله يمكن الله خلاج تتمرضين حتى يتغير ويغير اطباعه كلها علمودج. متتذكرين قبل شلون جان عصبي هسه هادىء اصلا ويخليج اتطلعين وترحين للسوك وتباتين عند اهلج كم مرة. اول تالي ماجد يتفاهم بهيج سوالف!
اتنهدت كتلها: المرض مينراد. بس يمكن على كولتج اتمرضت حتى يتغير شوية ويقلل عصبيته ويبطل سوالفه. نجلاء: ياسوالف؟ كولي غيرته. الرجال بلا غيرته مينراد. كل إلى صار بينكم لان يحبج ويريدج اله وبس الانسان من يحب يصير قاسي ويه اللي يحبه من كدما يحبه ويريده بس اله. ذهب: والله يانجلاء اليحب المفروض ميكدر يقسى عااللي يحبه.
نجلاء: والله اني ماافهم بسوالف الحب عفتها الكم انت واخوي. ماادري شوكت اخوي صار رومانسي اشو قبل اتذكره دفش. ابد ماعنده رومانسية حتى اغاني ميسمع ولايخليني اسمع. مره رزلني رزاله لان متمددة واسمع ام كلثوم ومندمجه صلخني ذاك الكف المعدل ورفس الراديو. جان عندي راديو عشتوا اسمع بي اغاني بالليل يايابة. انسحلت سحله بيومها. عباله احب.. ذهب:؟
نجلاء: بس اني صدك جنت احب فريس ومخلية صورته جوه ملابسي بالكنتور وعايشة قصة حب من طرف واحد على اساس تالي طلعت كلها تدري حميدة فاضحتني؟ ذهب: يمه متت؟ نجلاء: والله رجلج مجرم تره. ذهب: توه تكولين الحب والحبيب ويصير قاسي لان يحب اتحملي اخوج ومحبته العنيفة بس اني لازم اتحملها. نجلاء: اييي. اخ منك يالساني. مااتوب الا اسوي نفسي مصلحة اجتماعية وتالي احجي حجي مااعرف اركعه شلون. ذهب: ههههههههههههههه.
بقينة اسبوع متونسين ويه نجلاء بعدها راحت لبيت عمها تشوفهم وتبقى عدهم كم يوم. كاعدين بالليل نتعشى اني وماجد والعلوية والجهال. حسيت لعبت نفسي. كمت غسلت وكعدت اتحججت اوكل فضولي. ماجد: ليش متاكلين؟ ذهب: جاي اوكل فضولي. العلوية: هو ياكل لتعودينه الا واحد يوكله. ذهب: مياكل يبقى يصفن وهو بنفس اللكمة. خلصوا عشى وماجذ اخذ امه ينطيها علاجها ويخليها بفراشها. شالوا البنات الماعين واخذت الجهال غسلتلهم.
ضحكت كتله: بلا هالافلام مابيه حيل اي شي ومالي خلك. كعدت اريد اروح لغرفتنه دنك باسني من رگبتي. قشعرت ورجفت. ماجد: شبيج مالج خلك؟ انت هيج تنطيني عذر اتزوج تره. ذهب: اوكي. اتزوج. منو تقبل تتزوج واحد متزوج وعنده كومه جهال؟ رحت لغرفتنه نمت واتغطيت. اجه وراي نزع التيشيرت واتمدد بالشورت كال: اووه اخبارج قديمة هسه يركضن ركض وره المتزوج بس كون هو يقبل. اتدنه راح يبوسني. حسيت لعبت نفسي. دفعته. رفع راسه وصفن بوجهي.
ذهب: شبيك؟ ماجد: انت شبيج؟ ذهب: مابيه. بقى كاعد ويباوعلي حسيته ضاج كلش كلت خل اكله واخلص. درت وجهي وانطيته ظهري وكتله: اريد اروح باجر اسوي تحليل. ماجد: ماليش؟ بقيت ساكتة. سحبني من ايدي حيل: لتكولين اللي ابالي؟ ذهب: اووي شلعت ايدي. ماجد: يعني حامل؟ صرخ بوجهي. ذهب: على كيفك شبيك؟ كتلك اريد اسوي تحليل ماكتلك سويت. ماجد: يحتاج تحليل يعني؟ تردين تفهميني متعرفين نفسج؟ محاسه بشي؟ ممتأخره عن موعدها؟
ذهب: التاخير مو مقياس ولاحتى احساسي اني ماخذه كل الاحتياطات يعني مو ذنبي اذا صار شي. ماجد: ومغلسه؟ شمنتظره يعني؟ من تجي الاسعاف تاخذج يالله تحجين؟ ذهب: استغفر الله. ماجد: صار شكد من رجعت واتعشينه وسولفنه وكعدنه لا صدك انت مااتعشيتي، لعبانه نفسج لان حامل ومغلسه. شمنتظرة بس اريد افتهم؟! صرخ بوجهي وشمر المخدة حيل عالميز تواليت ووكعت العطور والمزهرية وكعت وانكسرت. فز رائد وظل يبجي.
كمتله اني تمددت يمه بفراشة نومته وبقيت يمه. بقيت كاعده وصافنة عالسكف. اسمعه راح للحمام ورجع يلم الكزاز. بعدين صار هدوء. نام. نمت بغرفة الجهال نومه عميقة. كعدت الصبح حتى للصلاة مكعدت ولا ماجد كعدني الظاهر بعده عصبي. دخلت لغرفتنه باوعت عالميز تواليت على اساس مرتبه هو ولام الكزاز. رحت اتوضيت ورجعت حسيت بشي زرف رجلي اذاني. اكيد كزازة زغيرة. كلش اذتني بس مااشوفها ولااكدر اطلعها لان الدم ميخليني اشوفها.
عقمت الجرح ولفيت عليه شاش لحدما يتوقف الدم واحاول اطلعها. نزلت لكيته طالع. العلوية: نايمين الجهال؟ ذهب: اي خالة نايمين. العلوية: اي خوش. اريد اسبح بس بالاول ردت اخلي حنة. اختي ام عبدالله جابتلي ذاك اليوم حنه مال الفاو. من زماان ماحنيت راسي. متعجنيها إلى وتحنين شعري؟ ذهب: اي وينها انطينياها اعجنها. العلوية: شبيها رجلج؟ تعرجين؟ ذهب: كزازة يمكن البارحة بالليل انكسرت المزهرية.
العلوية: يا ديري بالج لتروح تدخل برجل واحد من الجهال كزازة. ذهب: سديت باب الغرفة لحد ميكعدون وارجع انظف الغرفة بالمكناسة الكهربائية حتى اذا اكو شي تشفطه. ، عجنت الحنة لام ماجد وخليتها ساعة بالشمس وبعدين خليتها لشعرها. من اتزوجت ماجد لليوم حتى صبغ متصبغ شعرها هي بس هالمرة لان الحنة من اختها عجبها تخليها.
تحميل محتوى الموضوع
عرض نسخة صالحة للطباعة
أرسل هذا الموضوع إلى صديق
[46]
الدعوات : 2قوة السمعة : 10
رواية صبرا يا قلبي