ماجد: اني محجيت لان مو حلو بالعكس بس شلون تردين اقبل احد يشوفج لابسه هيج صدرج كل طالع ومكياجج طوخ وجماله لابسه اسمج تردين تخبليني انت؟ لبسي اللي يعجبج بالبيت ماعندي مانع بس بشرط محد يشوفج من خارج البيت ومتصورين وتدزين صورج لاحد حتى لو لابسه ححاب.. اتمددت وانطيته ظهري غطاني وحضني. ماجد: ليش من نتزاعل تصيرين حلوه هيج؟ ذهب: اني حلوه دائما اصلاً. ماجد: صحيح بس من نتزاعل تطلعين كل الطاقات المخفيه.
ذهب: ياطاقات شنو الجديد يعني مثلا قبل مجنت اخلي مكياج لو مجنت البس شي حلو؟ ماجد: لا تخلين بس خفيف وملابسج حلوه بس مو مثل هسه. ذهب: اي هسه صرت حلوه وملابسي حلوه يالله وخر خليني اكوم البس شي بردت. ماجد: ميحتاج ابقي هيج اني ادفيج. ذهب: لاشكرا عندي ملابس كومه.
ماجد: اي اعرفج هسه لان هذا الفستان عجبني بعد متلبسيه تلبسين هسه بيجامه وبلوز ابو الرقبه وجواريب زين متلبسين عبايه بعد مثل مسويتي بالمهر من لبستي العبايه فوك الفستان. ذهب: يعني تريد اكعد يمك مصلخه وانت رجال غريب وكاعد تباوعلي جنك ماشايف بنيه؟ ماجد: صحيح مشايف وين شايف رجال اروح بطريقي وارجع بطريقي وكطعتي كلبي لحدما خطبتج بعدين قبل جنت غريب وتستحين مني هسه شنو؟ دارني عليه ضحك.
ماجد: جنج بزونه بس بزون مخبله شويه ومنشفتها علي كلش. ذهب: شمنشفه؟ ماجد: منشفه الطارمه تعاي بس خليني اكولج شمنشفه. الايام الوراها ظليت افكر اريد الكه طريقه او حل حتى اخلص من شيماء بس بدون مشاكل مااعرف شسوي ماادري شنو الحل.. بيوم نزلت اتناقشنه اني وعمه حميده علمود روحتها لاهل شيماء وشنو راح تكللهم وشلون تفتح الموضوع. ذهب: اروح وياج اني احجي لامها يمكن تنقهر علي.
عمه حميده: هو اني ومن كتله كلب الدنيا تردين انت يقبل ترحين. ذهب: مااكله اروح وياج على اساس ترحين وحدج من يطلع العصر نروح اني وياج. عمه حميده: اذا يعرف تره مراح يسكت ومراح يسامحج تعرفينه هاي اني كتلج كل مره هو يكون غلطان بس هالمره من هسه اكولج انت غلطانه ورده حيكون قاسي. ذهب: لاتخوفيني يمه يعني هو اكو حل ثاني وكلت لا؟ ماكو غير هالحل وحتى لو ماقبل اقلها سويت شي مو باجر لو راحلها اتندم لان مسويت شي..
عمه حميده: الله كريم نشوف. ذهب: يمه تعبت من التفكير راح اموت كلبي يوجعني والله بس الله اليعلم شكد يوجعني. عمه حميده: اسم الله على كلبج لاتفكرين خلص الكاتبه ربج يصير راح تموتين من التفكير. ذهب: علواه بهالسهوله ماافكر طول النهار والليل احاول الهي نفسي واشغلها واضحك واسولف بس كلبي مثل النار مااكدر انسى الف فكره تجي براسي.
عمه حميده: شبيدي عليج يايمه ابني واثقه منه بس الشيطان شاطر وبنات ابليس ميخلن احد بحاله. ذهب: معناها اروح وياج. عمه حميده: حتى يكلب الدنيا. ذهب: مااتحمل ابقى هنا.
بقيت طول النهار ضايجه ومالي خلك واحتاريت اسألمن غير فطوم والبنات ماما مااكدر اكوللها لان راح تنقهر وخاف يرتفع ضغطها بابا اكيد من جانب ماجد حجيت ويه البنات وكلهم كلولي روحي انت واحجي وياها وويه امها مادام زوجج يكول ماعنده شي وياها روحي شمنتظره اكو وحده تبقى هلكد ساكته متدرين شنو ممكن يصير بعدين يمكن يتعلق بيها وانت لشوكت تبقين ساكته وجبانه متعرفين غير البجي اتشجعي لاتخافين هذا بيت وعائلتج متسكتين لاي وحده تفكر تهدم بيتج او تاخذ زوجج حجيهم صحيح لازم اتحرك كافي خوف واحترام وعيب واصول لازم اسوي شي وشيريد يصير خل يصير لكيت احد يشجعني اروح واحجي وياها بلكي ارتاح او ينحل هالموضوع بدون مشاكل وفضايح..
ظليت كاعده على نار شوكت يجي العصر ونروح؟ وشلون اذا عمه حميده مقبلت تاخذني وياها؟ وشلون اذا ماعرفت تحجي الحجي اللي اريده؟ شلون لو ماعرفت توصل الموضوع لامها؟ شلون لو راحت وبطلت محجت شي؟ اجه ماجد اتغدينه وصعد ينام اني بقيت يم الاولاد جوه عمه حميده نامت واني كاعده انتظر شوكت يكعد ويروح وشوكت هي تروح حتى اجلب بيها.
عمه حميده: استغفر الله واتوب اليه مااكدر عليج ومااكدر الومج شسوي كومي يالله لبسي حجابج خل اوصي البنات ميحجون شي لاحد خاف احد يجي يكلوله رحنه للمستشفى دخت ورحتي وياي. لبست حجابي ركض ورحنه بسيارتها وطول الطريق ادعي وميته من الخوف من رد فعلهم اللي ماادري شراح يكون ومن ماجد لو عرف شراح يسوي بيه الله يستر.
ام شيماء: يااهلا وسهلا بالعلويه زارتنه البركه شعجب بينتوا علينه اليوم؟ عمه حميده: والله جايينكم بشغله ومحد يحلها بس انت لان اعرفج متقبلين عالغلط وتخافين الله.. ام شيماء: شنو متكون الشغله مقضيه ان شاءالله جيتج على راسي علويه، بس منين هاي الحلوه؟ اني صافنه على اسراء شلون تراقب الحديث تريد تتأكد من موضوع جيتنه حسيت وجها ظل ينطي الوان. عمه حميده: هاي ذهوبه زوجة ماجد.
المره رأسا التفتت على اسراء عبالك ممصدكة.. اسراء ارتبكت راسأ سلمت وطلعت بحجة تجي غير وقت السايق ينتظرها بره متكدر تتأخر. ام شيماء: ماجد اتزوج؟ شوكت؟ مسمعنه. اخباركم انكطعت عنه بعد من ايام المرحوم الله يرحمه بس هالفتره اسراء تجينه ونسمع اخباركم بس مكالت ماجد اتزوج. عمه حميده: اتزوج صارله سنتين تقريبا وعنده( 2 ) اطفال وهاي زوجته.
ام شيماء: صلاوات على محمد بس والله عبالي ممتزوج حسب مسمعت من اسراء بعده ويدوروله على مره.
عمه حميده: لاعيني شيدوروله اتزوج الحمدلله واصلا هو اختار العروس حبها واتزوجها ذبح نفسه عليها كم مره بمره خطبها يالله انطوها اهلها بس هي عدهم وعزيزه ممستعجلين عليها بس شيسسون لماجد لزك لزكه لو هي لو ماكو.
ام شيماء: اي حقه. حقه. صبر هو واتحمل هوايه الله يهينهم ان شاءالله. يستاهل السيد كل خير كلكم طيبين علويه مانذكركم الا بكل خير علاقتنه مطولت هوايه بس مشفنه منكم شي مو زين الله شاهد. عمه حميده: احنه جايينج اليوم نشتكليج من شيماء. امها صار وجها اصفر وظلت تصب عرك حسيتها انحرجت قبل متعرف شي. ام شيماء: اي خيه كولي شمسويه شويمه؟ واني اكسرلج ايديها ورجليها.
عمه حميده: والله ماادري شكول بس مااكدر اسكت بعد وهاي بت الناس اتحملت وسكتت هوايه مارادت تصير مشاكل وفضايح بس بعد متتحمل صار سنه وشيماء لازكه لماجد اتصالات ومسجات وتدزله صورها بدون حجاب وملابسها مصلخه. امها انصعقت ظلت فاكه حلكها ماتعرف شتحجي بعدين كالت: والله كلبي جان كارصني من جيات هالاسراء هاي وكتلهة متفيدج لاتمشين وياها لاانت تحبيها ولاهي تحبج من زماان شعدكم هسه اتصاحبتوا..
عمه حميده: احنه هالموضوع محاجينه لاحد بس ماجد تعب ومرته هم تعبت هو يكول اني حاسبها مثل اختي واستحي ارزلها بس ميفيد لاتلميح ولا حجي وياها. ام شيماء: سود الله وجها فضحتنه بس هاي كله من هالحيه اسراء هي تكوللها ماجد ممتزوج ويردوروله مره واريد اكوللهم عليج.
عمه حميده: بس شيماء تعرف ماجد متزوج لان اجتنه كم مره للبيت وتعرف ذهب وتتصل بيها على اساس صديقتها تالي تكلها ماجد ابو بنات عوفيه واتطلكي، ترضين بهالحجي؟ ام شيماء: اعتبري الموضوع منتهي اليوم اخلي اخوها يموتها.. عمه حميده: لا لا لا. احنه منريد اخوها ولا غيره يعرف لو نريدهم يعرفون مااجيناج انت احجي وياها وكلليها عيب هو مثل اخوج بعدين مو مرته هم صديقتج وداخله لبيتها شلون هيجي تسوين بيها؟
اني هنا قررت احجي كتلها: خاله لو هو ميريدني ماابقى وياه دقيقه حتى لو اموت عليه بس هو يكلي انت مرتي واحبج واريدج شلون اكدر اتحمل وحده تجي وتخرب حياتي ويه زوجي اني اذا ماجد يعوفني اموت الا اذا ميحبني شسويله بس يحبني واحبه مااكدر اتحمل مجرد فكره وحده تدزله هيج صور. كتلها دقيقه خل اسمعج فد شي طلعت الموبايل وسمعتها اخر اتصال قبل عمليته من سجلته خاف مااسمع صوته بعد.
ظلت تبجي عمه حميده وامها دمعت وحضنتني كلتلي: خاله لاتخافين بتي اذا أذتج بعد اني بيدي افضحها.. بجت امها انقهرت عليها مسكينه فشلانه ومستحيه. سلمنه عليها وطلعنه ومن وصلنه للباب كلتلها عمه حميده: تره اسراء هي اللي اجت وكلتلنه ديروا بالكم من شيماء عبالها احنه منعرف. بالطريق اتصل ماجد اني خفت كلتلي عمه حميده: ردي عليه لايظل بقلق ولاتحسسينه بشي. اني ظليت ارجف كوه كلت: الوو؟. ماجد: وينج انت؟
اني من كلي هيج عرفته عرف. ذهب: ليش شصاير؟ ماجد: شصاير ها؟ اليوم مااريد اشوفج احسنلج شوفيلج مكان ظمي نفسج بي لان اذا الزمج ادفنج. سد التليفون اني كلبي حسيته راح ينفجر من الخوف كتلها: يمه لحكيني ماجد عرف وهيج كلي. عمه حميده: الله يستر مو كتلج ماسمعتي الكلام منو كله؟ شنو رجع للبيت وعرف؟ اني مو وصيتهم؟ ذهب: ماادري يمه. ماادري. بس مندمانة على الروحه شيريد يحجي خل يحجي. عمه حميده: ياريت عالحجي سهله.
وصلنه للبيت اني ركض بدلت ملابسي وكعدت يم عمه حميده ولزمت رائد حتى ميضربني من يشوفه بيدي. نص ساعه وسمعنه صوت سيارته فتح الباب مال المطبخ وركعه حيل اني نزيت. دخل عيونه حمر تخوف كلت لا راح يدفني صدك مابيها مجال.
ماجد: شوفي انت هسه خربتي كل شي على نفسج خاف قبل جنت مااريدها ولا اشتهيها ولااطيقها هسه بالعناد الا اروح واخطبها وطكي راسج بالحايط. انقهرت غثتني حجايته كتله: يعني انت مقهور عليها هسه لان انفضحت؟ مو علمود الطلعه؟ كول من الاول تريدها وهسه اجاك العذر. ماجد: ايييي اريدها ايي، احبها، احسن منج عالاقل. بيج خير وخير.. وسكت ماكمل جملته.. اني هنا حسيت كلبي وكف من الوجع..
راسأ اجه على بالي موضوع سراج مو هو هذا اللي ديعيرني بي ماعندي شي مو زين بحياتي يعيرني بي بس سالفة سراج. اختنكت بلحظتها والله، حسيت واحد خانكني اريد اتنفس كوه ماكو هوه. كتله: بيه وخير وخير شنو؟ تعيرني بشنو؟ لو بيه خير ماعافني ذاك الحقير؟ مو؟ هذا الجاي من تالي تعيرني بي؟ مجاوبني ولاحجة شي ظل داير وجه. عمه حميده واكفه ساكته متدري شنو الموضوع. ظليت الهث كوه احجي كلبي ظل يوجعني حيل..
ذهب: جزاك الله خير. وانعم الله عليك من سترت عليه واتزوجتني.. جان هسه اني بايره محد ياخذني، بس خوش ستر هسه جاي تعيرني بي. مو اني اليعيرونها. مو اني الينكالها هالحجي مااااجددد.. مو اني التتعير.. شهكت شهكه حسيتها شكت صدري من كدما غصيت بعد مكدرت احجي شي كعدت وظليت ابجي بصوت عالي وعمه حميده تسكت بيه وتحجي وياه هو خله وطلع.
اني بساعتها لو عايفني علمودها اهون علي من هالحجايه اللي كالها مااتخيلت فد يوم ممكن يفكر بيها مجرد تفكير هو اخر واحد ممكن يفكر هيج.. هو الوحيد اللي يعرف اللي صار واني مضربته على ايده ومجنت قابله بي لان ممسوية شي حتى اقبل بي غصب بس العتب مو عليه العتب على ابوي اللي ماخلالي قيمه وقدر.. عمه حميده: شبيج يايمه سكتي شويه فهميني شصاير؟ ستريش غير اعرف؟
مكدرت احجي شي لزمني كلبي مااكدر اتنفس بعد كمت ردت اوكف شويه لو اتحرك بلكي اتنفس بس مكدرت اوكف عبالك واحد وحاط سجينه بكلبي ويحركها لااكدر اتنفس ولااكدر اتحرك متت من الوجع بس أشرتلها كلبي هي كامت ركض وخرت رائد ومددتني وظلت تدلك كلبي.. ظلت عيني على رائد وفضل كلت خلص راح اموت، الهث ماكو هوه. هي اتصلت بماجد بس ميرد رجعت اتصلت بعد ماكو.
راحت جابت عبايتي لبستني ولبست عبايتها وكومتني هي والبنات للسياره بس عيني على جهالي ظلوا يبجون، حسيت متت بلحظتها بعد ردت اكوللها خليني هنا اموت يمهم اشوفهم قبل لااموت بس الوجع ذبحني ماااكدر احجي شي. اخذتني للمستشفى كبل للطوارئ اجو شالوني وخلولي اوكسجين واجه الدكتور كلتله: فجأه كلبها ظل يوجعها واختنكت ماادري شبيها.
سوولي فحوصات وتخطيط قلب اني احس نفسي ميته منا اولادي افكر بيهم ومنا حجايته ذبحتني ذبح اخر شي انطوني ابره مهدئ نمت. ظليت طول الليل نايمه موعيت الا الفجر سمعت صوت الاذان بتليفونه عبالي اني بالبيت فتحت عيوني اني وين ماادري خاليلي اوكسجين وهذا الجهاز مال تخطيط القلب ومغذي بأيدي وصوت الاجهزه يخوف رفعت راسي شفته كام يريد يروح يتوضا اكيد. شافني اتحركت اجه يمي محاجاني..
اتذكرت اللي صار عبالك حلم من اتذكرت حجايته درت وجهي مااريد اشرفه. خله ايده على راسي وخرت ايده ردت ادور على الجهه الثانيه لزمني كلبي لان تحركت بسرعه ظليت الهث رأسا صفر الجهاز هو سحبني لمكاني كلي: لاتتحركين نامي.. يانوم بعد شكد جنت مااريد اموت علمود اولادي بس بلحظتها اتمنيت اموت حتى اقهره مثل ماقهرني. ظليت ابجي بصوت والبجي يأذي كلبي يأذيني والجهاز كل شويه يصفر لو يطلع صوت خربطه بالنبضات.
طلع هو صاح الدكتور رجعوا انطوني ابره بالمغذي نمت مره ثانية مكعدت الا الظهر كعدني الدكتور يسألني: شنو حاسه؟ وشبيه؟ وشلون صار هيج؟ اني كوه احجي بس الدكتور دار على ماجد: هاي الحاله غريبه شلون هيج صار؟ بعدها شابه وين اكو بهيج عمر ذبحه؟ بس المدمنين بهيج عمر ممكن تصير عدهم. اني انصدمت من سمعت ذبحة دار علي الدكتور كلي: من شوكت عندج الالام؟ باوعت على ماجد وكتله: من اتزوجته بدت..
الدكتور سكت بعدين كال: هي مرات تصير نتيجة تراكمات وضغط نفسي بس متطلع بهيج عمر شنو هالضغط اللي يسوي ذبحه بهالعمر. ماجد ساكت ماكو اي رد فعل. طلع الدكتور وطلع وياه مااسمع حجيهم. شويه ودخلت عمه حميده اجت بوستني وكعدت يم راسي محجت شي بس تبجي بسكتة وتمسح دموعها.. اني وخرت الاوكسجين كتلها: وين الاولاد؟ ليش مجبتيهم اشوفهم؟ دخل ماجد كعد هي كالت: ردت اجيبهم بس ماجد مقبل يخاف عليهم من المستشفى نومتهم واجيت.
اني طاحت دموعي اتنفست شويه حتى اهدأ كتلها: بالله متت بدون مااشوفهم؟ بجت هي خطيه كامت باستني كلتلي: اسم الله عليج لاتكولين هالحجي ازعل منج والله. ازمه وتعدي ان شاءالله بس انت صيري قويه ولاتفكرين بشي فكري بصحتج بس حتى ترجعين لاولادج خطيه اليوم رائد يكول اما.
اني بجيت حيل واختنكت صفر الجهاز كام هو بسرعه رجع الاوكسجين وبقى لازمه حتى لا اوخره اني غمضت عيوني ماريد اشوفه كل المواقف والمشاكل اللي صارت بيني وبينه محسيت كرهته لهدرجه هالمره غير هالمره حسيته طاح من عيني. دك تليفونه طلع بره يحجي طول وره شويه اندك الباب دخلوا امي وابوي ماما بس شافتني ظلت تبجي بابا ميريد يبجي كدامي بس كل شويه يدور وجهه يمسح دموعه. كعدوا يمي عمه حميده كعدت كبالي هي وماجد..
ماما: شلونج ياعمري اليوم؟ هزيت راسي زينه كامت هي باست راسي مبطلت بجي بابا كللها: كافي بجي مابيها شي ان شاءالله لاتبجين وتخليها تضوج وتبجي. ماما: هو بكيفي هي بس هالبنيه عندي وتريدني ماابجي. اني انقهرت عليها متت مديت ايدي لزمت ايدها كتلها: اني زينه لاتبجين بس اريد رائد وفضولي..
وسكتت مااريد ابجي ظليت اتنفس حيل ردت اهدأ حتى ميصفر الجهاز بس يصفر يجون ينطوني ابره وانام مااريد انام قبل لا اوصيهم على رائد وفضل خفت اموت واني نايمة بدون مااشوفهم عالاقل اوصيهم عليهم. ماما: ارتاحي حبيبتي ارتاحي لاتحجين هسه. جريت نفس حيل كتلها: اريد اشوفهم. بابا بجه وطلع بره وطلع وراه ماجد. ماما: ان شاءالله ماما. ان شاءالله. بس شويه صيري زينه ارتاحي واني اجيبهم. ذهب: لا اليوم جيبيهم خاف ماالحك.
ظلت تبجي حيل كامت عمه حميده يمي كلتلي: هاي اني كتلج ازعل عليج من تحجين هيج مالي خاطر عندج مو مهم زعلي؟ بجيت كتلها: يمه انت تربيهم بأمانتج. ماما عصبت ظلت تصيح: سكتي لاتحجين هيج تردين تموتيني تردين تجلطيني. دخل ماجد ودخل بابا على صوتها. عمه حميده: كافي يمه كافي ارتاحي هسه اللي تردي يصير بس ارتاحي. شويه وراحت عمه حميده علمود الاولاد بحدهم. بابا وماجد راحوا رجعوا وره ساعه تقريبا جايبن ملابس وشغلات.
خاله انت هم ابنه بس بنتي ماتلكه مثلها تره ماكو وحده تمر بكل هالظروف وتبقى متحمله خصوصا بعدها زغيره بس لان تعرف ابوها ميقبل تزعل ومتريد تخسرك وتخسر بيتها، بس هم للصبر حدود وللتحمل حدود اكبر منها وميتحملن الشافته وياك. اني قبل جنت مااعرف شي لان لاهي تشتكي ولا ابوها يحجي بس من عرفت لا مااقبل بعد ولو ادري بيها شافت كل هذا وياك والله ساعة ماابقيها عندك شنو ماخذ فصليه؟ لو لان نستحي ونخلي خاطر للعلويه وللسادة عبالك مستغنين عنها لو مستثكلين لكمتها؟ تره بس هي عدنه لاولد ولا بنية بعد ممستغنين عنها. ومادام طلعت مابيها خير معناها ترجع لبيت ابوها معززه مكرمة ومثلما دخلنه بالمعروف نطلع بالمعروف.
هو محجة شي ظل ساكت بس اسمعه يتحسر. دك تليفونه طلع بره يجاوب.. بقيت بالمستشفى ( 3 )ايام بالعنايه بعدين كتبلي الدكتور خروج بشرط الراحه التامه مدة اسبوع بعد بالفراش وراحه نفسيه وماكو سهر والعلاج اكمله وارجع. بابا كل لماجد ابقى عدهم لحدما ارتاح وبعدين الله كري مااعترض ميكدر بعد يعترض. رحت لاهلي ويه امي وابوي وهو راح للبيت.
العصر اجت عمه حميده هو جابها هي والاولاد اني بغرفتي نايمه سمعت صوت بابا يضحك ويلعب وياهم كعدت مااكدر اكوم وحدي اخاف واصلا ممنوع اشيلهم هالفتره بقيت كاعده بفراشي منتظره يجيبوهم إلى حسيت كلبي راح يطك عليهم بعد عمري مشتاقتلهم شويه ودخلت ماما تشوفني اذا كاعده. ماما: حبيبتي كعدي هاي عمتج جابتلج رائد وفضولي تشوفيهم.
راحت واجت هي وعمه حميده ووياهم الاولاد بس شفتهم مديت اديه خلوهم بحضني شبعت بجي ظلت عمه حميده تحجي: بعد مااجيبهم والله اذا هيج شنو هالبجي هذا كله؟ شقصتج؟ مشايفة بحياتي وحده تبجي بكدج. ذهب: ابجي من قهري عمه. ابجي على حظي المحسوده عليه..
بقوا عندي لليل بالليل رجع ماجد اخذ الاولاد وعمه حميده لاشافني ولاشفته، مقبلوا يخلون الاولاد يمي لان يحتاجون ناس وياهم تداريهم وماما وبابا ملتهين وياي بس اني من اخذوهم عبالك ماخذين روحي ظليت الليل كل كاعده وافكر بيهم.
ماما تنام يمي بالغرفه خاف احتاج شي الصبح اجت خاله يمنه خاف ماما تتعب بحدها وخطار ليل ونهار ومالي خلك مره بيت عمي مره خوالي مره بيت ابوعلي عم ماجد مره عبدالله وزينب ومصطفى ومحمد بيت ابو عبد الله مره الجيران. اجتني فطوم وحجيتلها الصار اتخبلت. فاطمه: لا مااصدك ماجد تطلع منه هالكلمه مو معقوله شلون هو اللي صار كل شي كدامه وعلى عينه معقوله؟! ذهب: بعد هذا اللي صار.
فاطمه: كتلج هاي تطلع وره الموضوع متصدكين من نحجي عبالج الناس مثلج. ذهب: تعبت فطوم. تعبت. مااكدر اتحمل بعد، هاي مو عيشة. فاطمه: الله يساعدج حبي مو شويه اللي تحملتيه متستاهلين والله هو الفقير هيج يصير بي.
رواية صبرا يا قلبي الجزء الأول للكاتبة روز الفياض الفصل السادس والأربعون
كملت شهر عد اهلي وماجد ولامره اتصل على تليفوني ولادز مسج ولاحتى شفته بعد ولاهو راد يشوفني يجيب الاولاد ويتسوك ويخلي فلوس ويه عمه حميده عبالك اني مدري وين طالعه واحتاج الفلوس.. بابا جان محتار شيسوي حتى بس يشوفني فرحانه يمكن يحس بالذنب ويمكن خايف علي. الشهر خلص كلهم صايمين رمضان الا اني ميقبلون اصوم بقى يومين عالعيد اجه بابا كعد يمي: ها بابا شلونج اليوم؟. ذهب: الحمدلله بابا زينه.
بابا: احنه محجينه باللي صار حتى لانضوجج ونتعبج بس هسه صار شهر تقريبا لازم نسولف شويه. سكتت واتنهدت حيل. بابا: ادري بيج اتحملتي هواي لخاطر ماجد اتحملتي عصبيته واتحملتي الضرب والشك والغيره..
اني كل مره اكول مااريد اتدخل واعذره لان خوش ولد وابن اوادم رغم عصبيته مشفنه منهم شي موزين وهاي شفتي شلون من وكعتي لليوم رايحين جايين ومحتارين شيسوون لراحتج هاي البيت انترس ذبايح رايحين جايين يدرون بيج ممحتاجة شي ومناقصج شي ومع ذلك ميخلون شي ميدزوه بس هالمره غير رغم هو لاضربج ولاعنده شي ويه البنيه وانت تعرفين بس الحجايه الحجاها اذتج مو صح؟
دخلت ماما: كلتلي هالمره كيفج ماما منغصبج على شي انت تقررين وانت مسؤوله عن قرارج. احجي بكلبي اكول ليش ماما وبابا هيج سلبيين ماعدهم موقف ليش مارزله وكله لاتجي بعد مو هيجي المفروض الاب يسوي.
ذهب: مااريد ارجع ومااريده بعد ولااريد اشوفه ولا اريد احجي وياه اللي بينه وبينه الاولاد وبس ورجاءا لاتحاولون تغيرون كلامي يمه وتنطوه امل لان كرهته مااشتهيه ولااطيق اشوفه هذا كلامي بالضبط اللي راح تنقلوه اله في حال سأل. بابا: واولادج بابا شلون بيهم خطيه؟ ذهب: شبيهم مابيهم شي هاي اني صرت زينه المفروض يبقون عندي واذا يريدون يشوفوهم يجون ياخذوهم ماامنعهم بالنهايه هو ابوهم وهمه اهلهم.
ماما: الله كريم ارتاحي انت هسه لاتفكرين تره احنه هم نتعب من نشوفج تعبانه. ماادري خلال هالفتره شصار بموضوع شيماء واسراء ومو مهم عندي اعرف شي عنهم ولا عنه وهمه محجوا شي او فتحوا الموضوع حتى لايضايقوني. بليلة العيد اجت عمه حميده حتى ترجعني مقبلت لحت هواي واتوسلت بس مقبلت كتلها ماارجع.
عمه حميده: العلويه رادت تجي وياي مةخليتها كتلها ميحتاج اني اجيبها واجي خطيه هي والله المره كلساع تاخذلها بجيه عليج وعليه وعلى الجهال. ذهب: يمه عفيه لاتضغطين علي مااكدر اذا اروح معناها ارجع اتمرض مااريد اشوفه ولا احجي وياه عفيه اذا صدك اني بنتج وتحبيني..
عمه حميده: لاكل شي ولاتتمرضين اخذتي نص حيلي من جنتي بالمستشفى مالازم ابقي ارتاحي بعد بس تره هاي اكلج خاف تكولين محد كلي هو لاياكل ولايشرب بالبيت يطلع الصبح وميرجع لنص الليل يلف راسه وينام نشوفه بس الصبح من يطلع. ذهب: كيفه يمه مو مهم عندي بعد وضعه. عمه حميده: مو من كلبج ادري بس ميخالف راح اخليج براحتج بس عود اتمنيت بالعيد انت ويانه بالبيت.
راحت عمه حميده انقهرت عليها احرجتها وفشلتها بس مو بيدي مااكدر. ثاني يوم العصر يالله جابوا الاولاد مكشخيهم ملابس العيد حبايبي ومنطي لماما عيديتي بس ماعيد علي حتى بمسج انقهرت رغم جنت متوقعه مااهتمله بعد. يالله مو مهم هيج احسن حتى ماانقهر عليه ولا اتأثر وافكر ارجع. وره العيد تقريبا باسبوعين اجه ماجد الصبح على اساس ياخذ الاولاد لامه وعمه حميده يوم جمعه يبقون عدهم.
اني جهزتهم ورضعتهم ودخلوا ماما وبابا اخذوا الاولاد اله واسمعهم يسولفون ويضحكون بعدين صار هدوء تقريبا نصه صوتهم عرفت اني يحجون بموضوعنه كمت دخلت اسبح مااريد يجون يصيحولي احجي وياه لو يجي هو يحجي وياي ظليت بالحمام كومه لحدما اجت ماما دكت الباب خافت عبالها بيه شي..
طلعت رحت لغرفتي لكيته كاعد بغرفتي ومدنك يباوع بتليفونه رفع راسه شافني اني راسا رحت للغرفة الثانية و سديت الباب حسيت اختنكت وماادري شصار بيه ضجت حيل وانغثيت اتذكرت حجايته دخلت ماما كلتلي: عيب تره إلى سويتيه هسه حتى لو هو غلط احنه منقبل تردين بغلط، زوجج غصباً ماعليج تحترميه مربيناج احنه هيج مادام بعدج على ذمته متتصرفين وياه هيج. افتهمتي؟
ذهب: مااكدر ماما مااتحمل اشوفه ومااكدر احجي وياه تفتهمين شنو؟ اختنك من اشوفه مو بعد احجي وياه. ماما: احنه مكنالج رجعي وياه بس عالاقل اكعدوا واحجوا واتفاهموا لان هذا الوضع مو طبيعي انت بمكان وزوجج بمكان، لاتنسين انت زوجته تره يعني على ذمته يعني اول وتالي يجي يريد يحجي وياج ويدور حل يرضي الطرفين.
هو هم يريد مرته يمه واولاده يريد يرجع للبيت يلكه احد منتظره يسولف وياه يضحك وياه هو غلط بس انت بديتي الغلط طلعتي بدون علمه وتعرفين زوجج ماعنده تفاهم.. متردين ترجعين روحي كعدي وياه وكليله هالكلام اني لو اعرفه هو بس الغلطان والله مااخليج ترجعين لو شيسوي حتى لو انت تردينه بس المشكله انت غلطتي وهو عصبي طبعا يصيح ويغلط.. ماكو رجال يقبل مرته تتصرف بكيفها من وراه. وخصوصا بهيج مواضيع.
محجيت شي مالي خلك احجي واترادد وياها هي تعبت وياي هالفتره ومالها خلك. طلعت وسدت الباب وره شويه انفتح الباب دخل هو اني من شفته انطيته ظهري. كعد هو ظل فتره ساكت حسيته يباوعلي غلست بس لزمت نفسي كوه حتى ماابجي ومااريد يستغل ضعفي ولا اريد اباوعله لان ادري بروحي اضعف كدامه اذا باوعلي. ماجد: شلونج اليوم؟ مجاوبت حسيت اختنكت حتى صوته كرهته.
ماجد: اني خليتج براحتج هنا حتى ترتاحين شكد متردين بس جنج صرتي احسن الحمدلله صارلج تقريبا( 47 ) يوم مو كافي؟ فكرت هم اله عين بعد ويحسب الايام. ظليت ساكته اتنهدت. ماجد: كافي هيج ميصير. تعبت رايح جاي يوميه.. العلويه يوميه وكالت روح جيبها وامي حميده تعبت بحدها وحشه عليها. انقهرت يحجي بأمه وبعمه حميده جاي علمودهم جاي لان يلحون عليه يكلوله رجعها انقهر عليهم وحشه واجه..
حتى ماكو كلمة ندم لو اعتذار عالحجي الكاله. ماجد: بعدين الاولاد شنو ذنبهم رايحين راجعين؟ وامي تبجي على رائد متعوده ينام يمها.. حتى ابو جبار يسأل عنج وكلي سلم عليها جانت مداريتني مي بارد وعصير وجاي وتوديلي الاكل قبل الكل ههه. كتله: من الاخير ماجد ماارجع. ماجد: هذا اخر كلام يعني؟ هزيت راسي اي. سكت وطلع راح واخذ الاولاد لبيتهم.
وبقت عمه حميده تجي كل اسبوع تشوفني ونجلاء جانت يوميه تحجي وياي عالواتس لو تتصل بس ابد ماتفتح الموضوع جنه نضحك ونسولف ونتذكر من جانت موجوده..
اليوم كملت ( 3شهور) اني عد اهلي والوضع مثل ماهو عالشهر الجاي الاولاد يكملون سنه حبايبي وراها لازم اداوم. محتاره شسوي ارجع لو لا؟ اريده ومااريده احبه من اتذكر شكد يحبني وشلون يحبني وشكد صبر علي واكرهه من اتذكر شكد أذاني. كم مره دخلت للمستشفى بسببه. كم مره فشلني كدام اهله وكرايبة بسبب شكه. كم مره تنهان بيها كرامتي وادوس على نفسي واسكت واكول يحبني.
حجيت ويه فطوم والبنات عالواتس بعدين وصلني مسج من رقم غريب راسأ سويتله حظر مناقصة بلوه جديده. فكرت ممكن تكون شيماء لو اسراء حتى يسوولي قصه جديده فتحت المسج اغنية محمد عبدو (الاماكن) عرفته هو معناها مغير رقمه وحاط صوره الواتساب: (اشتاق لك بصمت فهل يصلك حنيني؟ ).. غيرت صورة الواتس مالتي خليت: (الخذلان هو ان يكسرك الشخص الذي قضيت معظم وقتك محاولا ترميمه). حاول ماجد اكثر من مره يرجعني بس مقبلت.
اجه اكثر من مره وحجه ويه اهلي بس اهلي كل مره يكلوله هي براحتها بعد منضغط عليها. واني كلما يجي اكله ماارجع. الى ان بيوم جنه كاعدين بالليل واندك الباب. طلع ابوي للباب وسمعنه صوت سلام ورياجيل بره. امي: منو؟ ذهب: خاف عمي؟ امي: عمج شيجيبه بهالليل مناك لهنا؟ لا مو عمج اصوات هواي. وره شوية سمعنه صوتهم دخلوا للصالة ودخل ابوي كال: سوولنة جاي. امي: منو؟ ابوي: ماجد ووياه عمامه وولد عمه. امي: ياستار. حسيت بمغص من سمعت.
اكيد جايبهم حتى يرجعوني. مستغل نقطة انه ابوي يستحي واني استحي من عمامة. بقوا كاعدين شكددد يسولفون شوبوا جاي مرتين واسمع ضحكهم وسوالفهم ومخليه ايدي على كلبي. متوترة ماادري شبية. ماادري شلون اتصرف؟ شسوي؟ مااكدر ارجع. لهسه مااكدر اسامحه. وبنفس الوقت ماادري شلون راح افشل عمو ابو علي وعمو ابو عبدالله. جيتهم علمودي مو شي عادي.
بعدين دخل ابوي كلي: بابا لبسي حجابج وتعاي يم الجماعة يردون يسلمون عليج ويحجون وياج. ذهب: شسوي جايه يابابا انت من يمك كللهم مترجع. ابوي: لا بابا عيب هالحجي. انت تجين وتحجين. ضجت مااحب المواجهه. بس اول وتالي وراي، لبست حجاب ودخلت متردده سلمت عليهم وكعدت يم ابوي وبقيت مدنكة مااريد اشوفه. بدوا يحجون بالموضوع ويتعذرون بعدين وجهوا الكلام الي.
عمه ابو علي كال: عمي انت بنيتنه ويشهد الله نحبج مثل بناتنه واكثر يمكن لان انت مؤدبه ومتربية احسن تربية هاي كدام ابوج اكلج واكله عاشت ايدك على هالتربية. لايوم طلعت منج حجاية مو زينة ولايوم رديتي على حجاية ولايوم اتجازرتي لا على جبير ولاعلى زغير.
كاعده ابيتج وحاشة نفسج وحاشمة رجلج وهو كبلج خو جان ماخذ هم وحده من بناتنه بت عمج ابو عبدالله بس مكدرت تتحمله ولاهو كدر يتحملها وراحوا كلمن بطريقة. بس انت اجيتي واتحملتي من عنده ومن عدنه اشكال والوان ومشتكيتي. هالمرة هو الظاهر زودها وغلط غلطة جبيرة وحقج تزعلين محد بينه يلومج لان احنه نعرف طبعه. نعرفه عصبي ومينحمل. بس صار هواي عالموضوع طول زعلج هالمرة. احنه ممتعودين نطب الكم للبيت وام البيت ماكو.
خليناج احنه براحتج كلنه مريضة وتريد ترتاح. شهر شهرين بس هسه هذا ثالث شهر خلص وانت ماكو! لشوكت تبقين هنا ياعمي؟ بيت ابوج وحقج بس هم لازم هذا الزعل ينتهي قابل تبقين للابد زعلانه؟ غلط ومعترف هو غلطان وندمان وقابل باللي تردينه منه شرطي شروط براحتج. وشحده ميقبل لو ميوافق واني عمج.
ابوج رجال طيب والنعم منه لو غير واحد جان طرده وانت هم طيبة ومتفشلين عمامج جايين علمودج احنه مو علمودنه يشهد الله. احنه نريدج انت بتنه تره مو بس هذا ابوج اني هم ابوج وابو عبدالله ابوج وهذول اخوانج. اذا زعلج بعد بس شيلي التليفون وكولي عمي زعلني والله العظيم ميلوم الا نفسه وهاي كدامه يسمعني. وبعد بكيفج. بقيت ساكتة بس دموعي تنزل. مااكدر. مااكدر ارجع بعدني مجروحه منه حيل مو شلون ماكان.
بلحظتها ماادري ردت افشله لو ردت اشوف رد فعلهم لو ردت افضح نفسي لو شنو ماادري المهم قررت احجيلهم كل شي: عمو جيتكم على عيني وعلى راسي. انتو اهلي وانت ابوي مثلما كلت والولد اخواني الله يشهد محسيت عدكم بغربة ولا حسيت منكم بقلة احترام لو اي تصرف منكم يهين كرامتي. بس اللي مااكدر ارجع. مااكدر. اكو شي بداخلي بكلبي احسه انكسر. ماادري هو شكايللكم شنو اللي صار بس اللي صار قديم. قديم مو من هسه.
القصة من يوم إلى اجه وخطبني. انتو يمكن متعرفون لهسه شلون ماجد خطبني ووين عرفني. سكتت شوية اجر نفس وامسح دموعي. شفته يباوعلي. غلست واتجاهلت نظراته ونظرات ابوي اللي جان واضح بيها الغضب. ميريدني احجي اللي صار بذاك اليوم بس اني لازم احجيه. حتى ميبقى شي اتعير بي بيوم من الايام بعد. كتلهم: اني جانوا حاجين علي ناس غيركم لابنهم بيوم الخطبني ماجد. بس مااجوا بيوم الخطبة.. ظلوا صافنين.
اتنهدت حيل وكملت: طلعوا ناس مو كفوا وابنهم مثلهم بعدما اجوا وحجوا واتفقوا على كل شي بيوم الخطبة بطل ومااجه لان يريد يتزوج ويسافر بره واني من كلي مقبلت كتله بس اني عد اهلي مااتزوج بره واعوفهم. ولانهم ميستحون مكالوا شي وبقوا ساكتين لحد يوم الخطبة وغلسوا مااجوا لااعتذروا ولابرروا وماجد جان موجود وشاف وسمع كل شي. لان صديقة الجان يريد يخطبني.
ماادري ليش وشنو السبب راد يستر عليه يمكن من الفضيحة وانقهر على ابوي فكله اريد اخطب بتك. وصارت هيج. هذا موضوعنه، وهاي قصتنه، وبعد كل هالسنين ماجد جاي يعيرني بي ويكلي بيج خير وخير ماعافج. رأساً اعترض ماجد كلي بعصبية: معيرتج اني ولاكتلج شي من هالحجي. ابو علي: يخسا. يخسا يعيرج شنو! انت بتنه. انت مرته وعرضه اكو واحد يعير مرته! هذا شلون حجي هذا؟
شحده يعيرج، احنه هذا الحجي منعرفه ولاسامعين بي ولايهمنه ولانريد نعرفه. انت صرتي جنتنه يعني بتنه لاشفنه منج شي مو حلو ولاشفنه عليج شي مو زين. بعد هذا الكلام القديم منريده ومنريد نسمعه. اذا هذاك جان ناقص ومو كد كلمته فهو الخسران. ومن خطبج ابنه هو الربح. لاستر عليج ولا انفضحتي. احنه النعرفه هو رايدج من الاول بعد انخطبتي قبله ومصارت لاي سبب هذا شي مو مهم. المهم بعدين انت صرتي مرته واكص لسانه اذا بيوم عيرج لو كلج كلمة بيها اسم ذاك النكس. احنه ماعدنه زلم تعير نسوانها. الرجال اليعير مرته ميستاهلها. والله وبالله لو اعرفه تطلع منه هيج كلمة اكلج لترجعين بس احنه ماعدنه بولدنه واحد ماعنده غيره ولاعدنه واحد ميستحي ولاعدنه واحد يحجي بشرف بنات الناس. شلون بعد ماجد يحجي على مرته وام جهاله!
تحميل محتوى الموضوع
عرض نسخة صالحة للطباعة
أرسل هذا الموضوع إلى صديق
[43]
الدعوات : 2قوة السمعة : 10
رواية صبرا يا قلبي