نجلاء: جان يبقى يم ضياء لو يروح عد بيت عمي ابو علي يم عمتي حميده ويرجع بالليل. وبيوم من الايام بالليل اني بايته عدهم بغرفتي ابيتنه ذاك القديم غرفتي يم غرفة ماجد طلعت اريد اروح للحمام شفتها فتحت باب غرفة ماجد على كيف ودخلت وسدت الباب وراها بس مطبكته. ذهب: يمه نجلاء شنو شفتي شصار؟ كلبي حيوكف من الخوف. نجلاء: شنو فلم رعب هو؟ ذهب: اندري عنج تحجين عبالك قصه مرعبه واذا مرعبه مااريد اعرفها.
نجلاء: لا اني رحت على كيف ووكفت يم الباب اباوع ماجد نايم وهالولد من يومه ينام بدون قميص وهي واكفه فوك راسه تباوعله اني انصدمت راسأ فتحت الباب ودخلت هي خافت وارتبكت وطلعت من الغرفه اني دخلت كعدت ماجد هو اتفاجأ كلي شكو؟ شبيج؟ شلون دخلتي اني مو قافل الباب؟ ذهب: اي خوش قافل الباب.
نجلاء: هههه اصبري شويه، كتله لا مو مقفول الباب جان مفتوح كال يجوز نسيت اقفله كتله ليش تقفله هو من عدنه بالبيت حتى تقفله هو بس احنه وشيماء مرت اخوك باوعلي وسكت كتله متريد تكلي شي اني اختك الوحيده؟ اني ملاحظتك مو على بعضك اكو شي صاير شي؟
هو اتنهد واتحسر وميعرف شلون يبدي يحجي رحت اني قفلت الباب كتله شبيها شيماء وياك؟ هو اتفاجأ كلي شبيها شسوت؟ كتله انت كولي شديصير؟ كال اللي ديصير مينحجي. كتله شلون؟ كال مااكدر ارجع للبيت ارتاح من وراها كل شويه وناطتلي بالغرفه لاتكول مصلخ لا نايم لا عيب لا مدري شنو واخوج مطفي ينام ميدري بمرته الليل كل تفتر يم باب غرفتي ظليت اقفل باب الغرفه هاي مو صاحيه متستحي تروح تسويلي مصيبه اني واخوي واني لابيها ولاعليها..
كتله توها جانت يمك بالغرفه ومن شافتني راحت ولت لغرفتها انت ليش محجيت للحجي خلي يشوفلها حل بهالمصيبه؟ كلي شحجيي وشكول شلون احجي هيج كتله خلص اني احلها. وفعلا حجينه لعمتي حميده وهي حجت ويه الحجي الله يرحمه واتخبل بوقتها كال متبقى ابيتي بعد راسأ اجرلهم بيت يم اهلها وكللهم انتقلوا هناك احسنلكم.
وراها بفتره صار الحادث واتوفى رائد الله يرحمه وبعد طلعت من حياتنه ومن اتزوجتوا رجعت واكيد مرجعت بدون سبب لان اشمعنه هسه وين جانت قبل. ذهب: كولي والله هالحجي صدك؟ نجلاء: افه عليج اتجذبيني؟ ذهب: لا بس ماادري شصدك بعد كل قصه ابله من إلى قبلها عقلي ميستوعب بعد.
نجلاء: حقج بس والله العظيم مجذبت بحرف وهذا الموضوع تره محد يعرف بي حتى فراس ميعرف لخاطر رائد الله يرحمه مهما كان جانت زوجته بيوم من الايام وشايله اسمه. ذهب: آآآخ ياكلبي مااتحمل بعد صدمات فدوه اذا اكو بعد شي كولي تره حرام عليكم اللي ابطني شبعوا قهر من قهري. بجيت هي حضنتني.. نجلاء: اي ليش تبجين هاي انت ظلمتيه هالمره شلون تشكين بي هو يبوس التراب اللي تمشين عليه؟
شهكت حيل بالبجي كتله: كلبي بابا كلبي احسه حيوكف احس انمرد كلبي من سمعته يحجي وياها. بابا: هههه حبيبتي يابعد كلبي كلبج لاتبجين هيج اسم الله على كلبج السالفه كلها تمثيل بتمثيل واني اقترحتها من حجالي السيد من جنتي بالمستشفى. باوعتله استغربت يعني جان يعرف باللي صار ومااجه اخذني ولا شافني.
بابا: اعرف بكل شي اني كل شي حاجيلي ماجد اتصل بيه من جنتي بالمستشفى واجيت وحجالي كل اللي صار بالتفصيل بس مكدرت ادخل اشوفج لان لو داخل وشايفج مراح اخليج كلبي اكيد مينطيني اعوفج واني من حجالي ماجد صحيح انقهرت وعاتبته وصرت عصبي عليه وكتله مو بنتي اللي تشك بيها بنتي انت خطبتها لان مسمعت عنها الا كل خير هو الولد اعتذر وجان متندم حيل ومقهور ومتأذي ويبجي مردت ازيد عليه وانطيته العذر يمكن لو واحد بمكانه كان راح يسوي هيج واكثر بعد بس جان لازم يسألج يستفهم مو كبل هيجي يسوي. وعمته هم العلوية اتدخلت واتعذرت واتوسلت حتى ابقيج يمهم وبعدين يصير خير.
واقترحت عليه اذا شاك باحد يحاول يعرف ليش هيج سوه وبالبدايه كال شاك بذاك الحيوان اللي خطبج قبله بس بعدين طلع الولد مسافر من يومه وماراجع وبعدين اكتشفنه هاي البنيه وره الموضوع ولحد الان ممتاكدين لان ماعترفت بس كل الشكوك تكول هي لان دتلح عليه طلكها وشعندك مجلب بيها وعوفها ومن هالحجي وهو ديماشيها يريد تطلع منها اي حجايه تدينها، زين باباتي؟
ماكو شي من اللي ابالج زوجج خوش ولد متلكين مثله لو ادري بي مو زين والله لو مو حامل ولو مو تحبينه مااخليج عنده بس ولد مؤدب وخلوق ومتدين ويحبج شنو نريد اكثر من هيج غلط بحقج واعتذر وهو حقه انت هسه بس سمعتي زعلتي واتمرضتي واتخبلتي مو؟ من البارحه لليوم لااكل لاشرب شلون هو يتحمل رجال غريب يكوله روح شوف مرتك ويامن تحجي بنص الليل ومنو يدزلها مسجات وحبيات؟
وامج تره متعرف بشي اني محجيتلها اي شي لا عن اللي صار قبل ولا هسه ادري بيها متتحمل كلب ام حتى اذا انت غلطانه مينطيها كلبها ولو هي جانت حاسه اكو شي كلبها مقبوض وضايجه ويوميه وكلتلي اخذني اشوفها لذلك كتلها سافروا واخذتها للزياره حتى تلتهي وترتاح. حجه بابا هوايه شغلات اني محجيت شي بس ابجي بعدين بوسني ووصاني على صحتي وعلى احفاده على كولته وعلى ماجد وصاح على ماجد اجه..
بابا: سيد بعد مااوصيك على ذهوبه ولومتحتاج انت وصيه. ماجد: بعيوني عمي لاتوصي حريص. بابا: واني هم حجيت وياها وفهمتها كل شي وهي افتهمت وقدرت الموقف وكل شي صار واضح وانتهى الموضوع ان شاءالله. ماجد: تعبناك عمي اجيت مناك لهنا وانت عندك دوام. بابا: لا بابا لاتعب ولا شي وهي جان لازم تعرف حتى ينتهي كل شي ومنظل بقلق اكثر من هيج. ماجد: بقت شغله وحده بعد البجي متبطل بجي مدري شنو هالدموع لو تانكي هم خلص من زمان.
بابا: هههههه لا هاي مالها حل من هي طفله على كل شي تبجي متتحمل حساسه على البزونه مره ظلت تبجي اسبوع لان سدت الباب بدون متنتبه واتعورت رجل البزونه هههههههه. ماجد: هاي قويه مسامع بيها. اني استحيت وحقدت على بابا فضحني واتذكرت سالفة البزونه ضحكت. ذهب: متضحك تره البزونه هي عدها روح واني أذيتها وظلت اسبوع تعرج من رجلها لان تأذيها بسببي شتردون اسوي مثلا اضحك؟
بابا: هاي شوف ههههه البجي ماله علاج عدها وانت تتحمل بعد نتيجة اختيارك. ماجد: هي ورطه بعد ههههههه. بابا دنك باسني وراح وماجد طلع وياه. دخلت نجلاء من الغرفه الثانيه. نجلاء: يا يابه جنت لازمه نفسي كوه حتى لا اضحك ويسمعني ابوج لج شنو هاي انت حتى البزونه مخلصانه منج؟ ذهب: متضحك لهدرجه.. دخل ماجد يضحك نجلاء طلعت راح سد الباب وكعد يمي حضني درت وجهي.
ماجد: ليش هيجي تشلعين كلبي وتعذبيني والله حرام عليج ظلمتيني وكلبي يوجعني بسببج من البارحه حتى نوم منمت ولا علاجي شربته. انقهرت وضميري أنبني وخفت لان ماشارب علاجه. ماجد: ولخاطر الله بدون بجي قابل اني بزونه. ضحكت. ماجد: تره اني هسه الزعلان مو انت. استحيت من نفسي كتله: أسفه، بس مو بيدي حسيت لو ميته ولا اسمعك تحجي وياها هيج كلبي لهسه يوجعني والله. اموت اذا صدك تطلع تحبها ماجد.
ماجد: شنو اني خلصت من كلبي طلعتي انت شنو بيت ابو كلب، بعدين شحبها اصلا مااطيقها اني نجلاء محجتلج عنها؟ واللي عنده بزون بجاي شيسوي بغيره بعد ههههه. ذهب: اذا يوم حسيت نفسك متحبني مثل الاول او تحب وحده ثانيه كولي من الاول عفيه مااريد احس نفسي غبيه.
ذهب: خير شكو بعد على شنو نتحاسب؟ شمسوي بعد؟ ماجد: ممسوي شي بس انت ظلمتيني وقهرتيني وحتى مراضيتيني. ذهب: ليش منو المفروض يراضي منو؟ الغلط غلطك انت المفروض تراضيني. بعد فوكما لازمتك تحجي ويه هاي الزركة؟ ماجد: مو مهم منو يراضي منو المهم نتراضى النتيجه بالنهايه وحده. ذهب: هههههه والله مثل اختك مو صاحي. ماجد: لج! شنو مو صاحي؟ بعدين انت اخر وحده تحجي بهالموضوع انت اللي تبجين على البزونه لان تعرج.
ماجد: يالله كومي. ذهب: كول والله تحبني مثل الاول؟ ماجد: اهوو، يابه والله احبج مثل الاول واكثر من الاول. بعد؟ اتمددت تعبت من الكعده وغمضت عيوني. ماجد: شنو تردين تنامين؟ توج كعدتي ومن وراج مارحت للشغل تاليها حتى مراضيتيني. ذهب: اي مو كتلك أسفه رغم بعدني مغثوثه من الحجي إلى سمعته بعد شلون اراضيك. ماجد: اول مره اشوف واحد يعتذر وهو عصبي هيج هاي بدل متبوسني.
ماجد اقنعها بكلامه وهي حست بكلامه صحيح لان حجه بالموضوع اللي جانت هي السبب بي ومجان حاجي وياها بيه ولا عن رد فعله فهي صدكت بس المشكله مااعترفت وكلتله: تستاهل إلى سويته بيها اصلا المفروض من زمان ترجعها لاهلها قبل متحمل وتتورط اكثر.. ماجد: يالله بعد اللي صار صار بس جان المفروض اللي اتصل من زماان يتصل بس مع الاسف تأخر..
اني كاعده يمه هو فاتح السبيكر عضيته من ايده حيل من حركت كلبي هو سحب ايده تأذه وكطع الخط. ماجد: ااخخخ. شبيج اتخبلتي ليش هيج؟ ذهب: اسكت ماجد، اسكت لااليوم ارتكب بيك جريمه، للاسف تأخر إلى اتصل جان لازم يتصل من زماان مو؟ ماجد: اي حبيبي شسوي مو انت كلتلي احجي هيج واقنعها؟ وفعلا اجت بنفس اليوم لبيتنه سوت نفسها جايه تواسي ماجد وظلت تحجي كدام ام ماجد وعمه حميده ونجلاء علي.
شيماء: اني اصلا من شفتها مرتاحيتلها كلت مبينه مو هينه وزعطوطه وشايفه نفسها حتى متحجي.. اخذت رقمي من نجلاء على اساس تتصل تفهم الموضوع مني خاف اطلع مظلومه حرام حجت عليه بدون ماتسمع مني. حسيت نفسي مو عايشه بنفس الدنيا يعني اكو ناس لهدرجه كلوبها سوده ونفسيات مريضه ترتاح بأذيت غيرها. زين شلون ميأنبهم ضميرهم؟ ميوجعهم كلبهم؟
ميفكرون الحياة دين وباجر ترجع عليهم الشغلات اللي يسووها؟ ميفكرون ظلموا بشر وراح يدعي عليهم ويكول حسبي الله ونعم الوكيل؟ ميفكرون بالموت وخاف يموتون بالليل وهم نايمين واكو ناس مظلومه بسببهم ومتأذيه ودمعتها بعينها وتدعي عليهم؟ ظليت مصدومه..
ومن حجيت لماجد كلي: حبيبي الناس اشكال وانواع موكلهم مثلج يفكرون انت مشايفة الحياة بره لذلك متفاجأه بالناس لهذا اني اخاف عليج ومااقبل الا اني اوديج وارجعلج لاي مكان ولهذا السبب جنت خايف عليج تتوظفين بس امي حميده كالت لاتحبسها هو بس الدوام اذا ماطلعت انت تحبسها بالبيت فعلا اني لو علي مااخلي احد يشوفج ولااخليج تشوفين احد..
دزلي ماجد رقمها حتى اذا اتصلت ارد عليها وكلي: ظلي صيحي وغلطي وكولي بعد ماارجعله لو يموت. على اساس انت زعلانة وعد اهلج. ذهب: اسم الله عليك ان شاءالله هي.
شيماء: جنت عد بيت خالتي ام رائد وسولفولي عالمشكله الصايره بينج وبين ماجد والله انقهرت عليج حبي شلون هيج ماجد يسوي؟ شلون يشك بيج؟ شلون يضربج؟ اني من كالت هيج اتذكرت اللي صار صدك انقهرت وطاحت دموعي وحقدت عليها. شيماء: لاتبجين عمري لاتبجين يروحلج فدوه هو وين حاصله وحده بجمالج حتى يتبطر يعني احسنله اسراء الزركه جانت صاكرته. ذهب: حقيره. شيماء: شنو؟ منو؟ ذهب: اقصد هاي الزركه..
شيماء: اي. اي. طبعا حقيره شعبالج انت شلون جانت امشيتهم على مزاجها عبالج مثلي ومثلج نستحي ونخاف ونحترم وشحصلنه؟ تعلميني بيها اني اكثر وحده تعرفها. ذهب: مااريده بعد. لو شيسوي ماارجعله. اني يشك بيه. اني الف واحد يتمناني مو زين مني وقبلت بي.. دخل ماجد كعد يمي اشرتله اشش.. فتحت السبيكر حتى يسمع.. شيماء: اي طبعا مترجعيله خيولي ميستاهلج اني اصلا من شفتج استغربت شلون وافقتي عليه واحد ملعب وابو بنات.
ذهب: اي صحيح بس شسوي حظي.
شيماء: ميفيدج حبيبتي سأليني عنهم اني عاشرتهم قبلج واعرفهم اشردي بروحج العزيزه اشو جهالج وعندج المن متحملته. ذهب: اي صحيح والله بس عود جنت احبه. شيماء: حبيبتي كافي فرق العمر بينج وبينه شيريد بعد؟ ذهب: شبي فرق العمر؟ ماجد: اش. ذهب: اقصد اي طبعا فرق العمر ولو اني مااهتم بهيج سوالف.
شيماء: اني اريد مصلحتج تره انت مثل اختي الزغيره وتستاهلين واحد احسن منه. حجت هوايه وغثتني ولزمت نفسي بالكوه حتى ماارزلها. ماجد: طلعتي فاشله بالتمثيل تره مو اشرتلج لاتعصبين ولاتتنرفزين وانت كل شويه تعصبين وتردين عليها. ذهب: انت متسمعها شكد صلفه وعينها كويه تحجي وتعيب وتكلي ابو بنات عبالك اني ناقصه قلق.. ماجد: اها ليش هيجي؟ ذهب: آآآآخ بطني ظلت توجعني. ماجد: يعني شنو توجعج؟ ذهب: توجعني يعني توجعني.
ماجد: يعني ولاده؟ بعدلج اسبوعين على الشهر التاسع شلون توجعج؟ ذهب: ماادري. مادري. ماجد: ميصير هيج احنه مو متفقين بالولاده اوديج لبنان هناك احسن تولدين؟ ذهب: لاتخبلني. ااخ. هو بكيفي يعني؟ رحنه للمستشفى ركض ماجد وعمه حميده ونجلاء وكلهم خايفين وماجد عبالك هو اللي عنده ولاده يركض منا ومنا. تالي بعد الفحص طلعت تقلصات بس ماكو ولاده. رجعنه للبيت.
هالفتره ماجد داخل بالانذار لان باجر ادخل بالتاسع ويريد يخلص شغله قبل لانسافر. ماجد: ها حبيبي حاسه بشي؟ ذهب: No. ماجد: الحمدلله بس صبري لباجر وعكبه ان شاءالله نسافر.. ذهب: عجييييب. ماجد: ليش؟. ذهب: يعني هو بكيفي شوكت ميعجبني اجيب حتى صبري؟ ماجد: ماادري شسوي غير من خوفي عليج ياريت لو كدرت اخلص شغلي اسرع جان هسه احنه هناك. ثاني يوم ماجد خلص شغله والكل اجه سلم علينه اهله واهلي. وسافرنه ووصلنه الحمدلله.
كبل رحنه للمستشفى حاجزين غرفة بسريرين لان ماجد يبقى وياي بعد العمليه احتاج احد يكومني ويكعدني صح هو بعده تعبان بس بعد شنسوي هو ميقبل الا هو يكون وياي موجود يخاف.. ذهب: شوف شلون اني قبلت اجيبك ويايه وتبقى يمي وانت عفتني ورحت.. ماجد: اي عفتج ورحت للديسكو، مو رايح اسوي عمليه بكلبي هههه، ومشكوره على كرمج عالعمليه الجايه اجيبج وياي. ذهب: اسم الله الرحمن الله لايكولها فال الله ولافالك.
ماجد: اي مو اكلتي راسي واني احجي واكول واعيد نفس الكلام. ذهب: شسوي غير لهسه من اتذكر ينعصر كلبي عبالك اليوم. بالليل كتله: حبيبي نمت؟ ماجد: لا كاعد تردين شي؟ ذهب: سلامتك، بس انت قبل لاتسوي العمليه من سافرت وصيتني هسه اني لازم اوصيك.. ماجد: على شنو توصيني هي عملية ولاده نص ساعه وتنتهي ان شاءالله. ذهب: حتى لو بس كل شي يصير.
ماجد: اسم الله عليج لاتكولين هيج ميصير اي شي هي عمليه بسيطه وتطلعين بالسلامه ان شاءالله. ذهب: حبيبي لاتشلع كلبي اسمع واسكت وبس، خاف كل شي يصير الدنيا موت وفوت اذا الله ماكتبلي عمر رائد وفضولي امانتي عندك انت مو جنت مأمنهم عندي هسه دورك انت.. اجه يمي حضني كال: انت تضيعين وقتج وتوصين. ذهب: ميخالف اخذني على كد عقلي واحفظ كلامي، خاف. خاف يعني اذا ردت تتزوج بعدين.. دمعت عيوني وسكتت خاف ابجي.
ماجد: لاا لاا ماتفقنه هيج بجي ودموع اتفقنه اخذج على كد عقلج.. ضحكت وضربته على كيف.. ذهب: اذا ردت تتزوج واكيد لازم تتزوج علمود رائد وفضل يحتاجون ام تهتم بيهم وتربيهم اريدك من تختار اي وحده تستخير يالله مو هيج مثل مااختاريتني. ماجد: ومنو كلج مااستخاريت من اتزوجتج؟ ذهب: والله؟ ماجد: والله. ذهب: المهم اريدك تخليهم كل اسبوع يرحون يباتون يوم عد ماما وبابا ماتحرمهم منهم.
باس راسي كلي: هسه ليش هالحجي إلى يغث ويزعل؟ ذهب: اريدك تعودهم قبل لاينامون لازم يوميه يقرون سورة الفاتحه مره والاخلاص ( 3 ) مرات ويتشاهدون يالله ينامون. ماجد: صار بس انت ان شاءالله راح تعلميهم كل هالسوالف.. ذهب: اريدك تحجيلهم عني اريدهم يذكروني حتى لو بس بالاسم ويقرولي الفاتحه. بجيت وبسته كتله: وانت عود لاتنساني اقرالي الفاتحه وتعتمر عني حتى لو مره. ماجد: خلصتي؟ هزيت راسي اي.
ماجد: زين شرايج تكملين جميلج وتزوجيني. تخطبيلي من هسه شيماء. ذهب: يمه! بطلت مااموت كاعده على كلبك. ماجد: ههههههههههههههه. ذهب: اطلعلك من الكبر اذا تزوج وحده اني ماقابله عليها. ماجد: اسم الله عليج اموت اذا يصيرلج شي مو بس انت ماكو وحده ممكن تجي وراج وتاخذ مكانج بحياتي انت ام رائد حبيبة كلبي ومرتي وصديقتي الله لايحرمني من هالكلب الحنون ولا يحرمهم من هيج ام بجايه ام دميعه.
ثاني يوم ( ب4 ) اجو لبسوني واخذوني لغرفة العمليات وماجد ويايه لازم ايدي. اني قبلها اتوضيت وصليت ركعتين لوجه الله وبغرفة العمليات بديت اقره السور القصيره خلولي الاوكسجين ماجد يمي لازم ايدي ويكلي لاتخافين اني يمج. طاحت مني دمعة مسحها كلي: غمضي فتحي تلكين كل شي منتهي. الدكتور كلي اقري اي شي حافظته بديت اتشاهد وبعد محسيت بشي خلص.
موعيت الا الساعه ( 9 ) بالليل بغرفتي وماجد يمي كاعد يقره قران حسيت نفسي احجي واهذي بس ماادري شنو اكول. ماجد: حبيبي ها الحمدلله عالسلامه. كام باس راسي ولزم ايدي باسها. ذهب: متت؟ ماجد: اي هههه بالجنه هسه انت. بجيت وسكتت. ماجد: اسم الله حبيبي اتشاقى وياج كل شي مابيج ولدتي والحمدلله كل شي تمام انت ورائد وفضولي كلكم زينين الحمدلله..
رواية صبرا يا قلبي الجزء الأول للكاتبة روز الفياض الفصل الأربعون
ذهب: لا متت. ماجد: والله ممتي مو هاي اني يمج واحجي وياج شلون متي اسم الله عليج هههه. دخلت الممرضه اول ماشفتها كتلها: متت مو متت؟. ضحكت كلتلي: الحمدلله عالسلامه مدام. ماجد: اي متي اي زين هيج. ذهب: ماجد اتزوج. ماجد: الله اكبر شهالبلوه اليوم. كعدوني عدل بديت انتبه واحس. ذهب: ماجد؟ ماجد: عيونه وكلبه. ذهب: وينهم؟ ماجد: اليوم يبقون بالخدج حبيبي. ذهب: ليش شبيهم؟
ماجد: مابيهم شي كل شي تمام الحمدلله بس لان انت اليوم تعبانه همه يهتمون بيهم ومن باجر انت ترضعيهم حتى يعرفوج يعرفون امهم يعرفون ريحتج ويحسون بحنانج. ذهب: كول والله مابيهم شي؟ ماجد: والله وغلاتج مابيهم شي ارتاحي شويه وبعدين اخذج تشوفيهم. ذهب: مرتاحه مابيه شي خل نروح نشوفهم. ماجد: شويه حبيبي صبري يجي الدكتور يشوفج واذا سمحلج نروح لاتستعجلين. ذهب: انت شفتهم؟
ماجد: اي شفتهم انطونياهم شلتهم شويه اذنت وكبرت بأذنهم وبعدين اخذوهم. ذهب: حلوين؟ ماجد: يخبلون حبايبي مثل الملاك. رائد يشبهج اشقر وابيض وفضل شعره اسود بس هم ابيض طالعين عليج. ذهب: يعني واخيرا؟ ماجد: كل شي بوقته يجي كل شي بقسمة الله والله ماقصر الحمدلله عوضنه احلى عوض. ذهب: الحمدلله.
ماجد: عاد نجلاء اتصلت ( 3 ) مرات تسأل عنج رادت تباركلج وكلهم اتصلوا كتلهم خلص صار عدنه رائد وفضل وامي حميده اسمع هلاهلها بالتليفون خطيه. ذهب: الله لايحرمني منهم ماادري شلون اجازيهم تعبوا وياي حيل. ماجد: انت بتهم ميحتاج تفكرين هيج انت لو بمكانهم اكيد تسوين اكثر. جابولي عصير شربت واجه الدكتور شافني وطمنه. رحنه شفنه رائد وفضل حبايبي حلوين ماشاءالله تبارك الله بس حيل زغار.
ماجد: بعد هاي خلصت وانتهت على خير الحمدلله هسه كل التعب انسيه صرتي ام لازم تكونين قويه وعندج صبر وقوة تحمل شوفيهم شلون حلوين ربي يحفظهم. ذهب: حلوين بس ليش هيجي زغار؟ ماجد: لاتخافين كل شي طبيعي همه لان اثنين طبيعي يكونون زغار البطن متشيلهم. ذهب: الله يحفظهم. ماجد: آمين..
رجعنه للغرفه اجوا انطوني ابره طبعا بس منمت كل شويه يجون يقيسون الضغط والحراره وينطوني ابره بالمغذي حتى ماجد خطيه انشلع كلبه مانام زين. ذهب: حبيبي اتعذبت انت اليوم وياي لا ارتاحيت ولانمت باجر روح للفندق احسن.
ماجد: لاتعبت ولاشي انت مو جنتي تسهرين علمودي حتى من جنت هنا ومن رجعت حتى اظافري جنتي تقرضيها وتلبسيني النعال برجلي والجواريب حتى لاادنك هسه دوري اهتم بيج لان انت اهم مني انت الام كل التعب راح يكون عليج راح يحتاجوج اكثر مني.
بقيت بالمستشفى ( 3 ) ايام بعدين طلعنه اخذنه شقه لان حبايبي بقوا بالخدج كال الدكتور احسن بس شويه يزيد وزنهم ويطلعوهم جنت اروح ارضعهم ونرجع تعبنه حيل وطول الوقت اني بقلق شوكت يطلعون وارتاح بعدين اجوا ماما وبابا ورانه حتى يساعدونه لان اني احتاج عنايه بعده جرحي جديد وماجد بعده تعبان وما يلحك يرتاح ولا يشبع نوم.
ارتاحينه من اجو ماما وبابا عالاقل ماجد يكدر ينام ويرتاح همه يساعدوني اكوم اكعد ماما تسبحني وتكعد تقره على راسي قران يوميه بالليل لحدما انام. رجعنه للعراق..
طبعا جان اول شهر من رجوعنه متعب بشكل مو طبيعي خطار ليل نهار البنات هلكوا اني وماجد بقينه بالغرفه الجوه اللي جان بيها ماجد حبايبي نومهم جان قليل بالليل بس كل مره عد احد يهتم بيهم مره نجلاء مره عمه حميده مره ماما تجي تبات عدنه وحتى ام ماجد جانت ساعات من تكعد لصلاة الفجر وتسمعهم يبجون تاخذهم بغرفتها جانت طايره بيهم وخصوصا رائد..
بعدين بدوا الخطار يخفون صعدنه لغرفتنه ولكيناهم مسوين غرفه للاولاد بمكان غرفة ماجد تجنن ديكورات واخشاب فد شي ملائكي جانت هدية نجلاء الهم. ماجد: الحمدلله من خلصنه من هاي الغرفه حتى بعد اليزعل غصبن عليه يبقى بالغرفه. ذهب: ليش همه بس غيروا مكانها خلوها بغرفة المكتب والديوانيه صارت استقبال ومكتب واترتبت. ماجد: يعني شنو؟ ذهب: ماكو شي سلامتك. ماجد: عبالي ذهب: هههههه شبيك؟ ماجد: محد ينام بذيج الغرفه بعد.
ذهب: صار هههههه اني اخذت اجازة امومه ماجد رجع للشغل ونجلاء خطيه سافرت وظلينه كئيبين وراها بس خطيه هوايه تعطلت علمودنه. ماجد: حبيبي نايم اليوم. ذهب: منمت من البارحه فضولي الليل كله يريد يلعب بقيت كاعده اراقبه ماكدرت انام. ماجد: لا اقصد رائد. ذهب: هاا اي نسيت اجاك تالي عكبك بس همه صاروا الكل بالكل اني بيش الكيلو. ماجد: يعني تغارين منهم؟ ذهب: لا ليش اغار حقك وحقهم. ماجد: لا شكلك غرت حبيبي رائد.
ذهب: لا والله فضولي لاتخاف مااغار بس اتذكر كلامك بعدين من.. ماجد: شنو الفلم حبيبي رائد اليوم تهدد انت كد كلامك هذا؟ ذهب: فضولي حبيبي غسل وانزل اتعشا حتى تنام وراك شغل الصبح واي طبعا كد كلامي. حضني وباس ركبتي راسا باد جسمي كله من زماان مااتدنه يمي من قبل لايسوي عمليه حسيت عبالك اول مره يلمسني دخت ورجفت هو ضحك كال: هاي احلى شي. ذهب: ماجد، كافي خل ننزل نتعشه فشله شيكولون.
ماجد: مو مهم كافي مااكدر اصبر بعد ارحميني. المهم مانزلنه للعشا الا وره ساعه. الفتره الفاتت جنت ملتهيه وتعبانه ومشغوله نسيت موضوع شيماء وهي مااتصلت بيه بعد.. ذهب: حبيبي شخبار الحب؟ ماجد: ياحب منهم؟ ذهب: شنو؟. ماجد: اي منو قصدج اي وحده؟ ذهب: اذبحك والنبي اذا صدك تحجي. ماجد: هههه ليش بالله مو انت صار يومين تنامين يم اولادج بغرفتهم خلص معناها عندي عذر.
ذهب: جنت مجبوره لان ابنك الليل كله كاعد وفضولي عد امي حميده ظليت انزل واصعد اشوفه وانت نايم متدري بالدنيا. ماجد: اه خلص اليوم اني اسهر وياه وانت نامي ادري بيج تعباانه حقج. ذهب: مااريد شي منك. ماجد: حيرتيني شتردين؟ ذهب: اريد الصدك، الحقيقه، شخبار شيماء بعدها تتصل مو؟ ماجد: ههههه الحب والحب تالي طلعت شيماء اي بعدها ومنتظره شوكت اوديج لاهلج هههه. ذهب: اييي؟ ماجد: اي بس شنو بعد شكو؟
ذهب: زين سؤال اخير بس الله عليك تحجي الصدك؟ ماجد: صار اتفضلي ست الحسن سألي. ذهب: هم كتلها تحبها؟ ماجد: اممم خل اتذكر بالله. ذهب: شلون طاوعك كلبك؟ شلون كدرت؟ شلون نطقها لسانك؟ عيب عليك جهالك بطولك وتتصرف مثل المراهقين. اني مشلوع كلبي ويه جهالك وانت عايش حياتك بالطول وبالعرض. ماجد: شكو؟ تره بس كلت خل اتذكر. شصار؟ ذهب: اي معناها كايللها هالكلمه لو مكايللها جان كلت لا ماجان كلت افكر واتذكر.
ماجد: تره اتشاقه ليش هيج سويتيها صدك ذهب: كول والله؟. ماجد: والله وعيونج بس انت حبيبتي انت ام رائد. ذهب: حبيبي اعرفك تحبني. ماجد: حبيبي اليوم انت مبين عليج اعصابج تعبانه نامي وارتاحي اني اكعد وياهم اذا كعدوا. ذهب: لا خاف تتعب وراك دوام نام حبيبي نام اني كاعده. ماجد: اي لاخوش كاعده.
الصبح طلع للشغل مكعدني لان فعلا جنت تعباانه حيل محتاجه انام بس سمعت صوت التليفون وفزيت فتحته لكيته دازلي مقطع صوتي: ذهب: اريد اروح يالله. ماجد: وين ترحين حبيبي نامي نامي. ذهب: لا اروح اريد اروح. ماجد: هههه اي وين ترحين ارتاحي وبعدين روحي. ذهب: ماجد اتزوج. ماجد: ههههههههههه لا مااتزوج لاتخافين موجود ومنتظرج. ذهب: لا اروح ماجد اتزوج. ماجد: خلص هسه نامي وبعدين اوديج وين ماتردين. ذهب: اني متت؟
ماجد: لااسم الله عليج ولدتي وكل شي مابيج بس ارتاحي ارتاحي. ). صفنت كلت شنو هاي؟ ذهب: هذا صوتي وصوت ماجد شنو الفلم؟ دزيتله مسج: شنو هذا المقطع مافهمت؟ هاي شوكت؟ مجاوبني بعدين نجلاء دزتلي مسج: لج شنو هاي خربت من الضحك من سمعت التسجيل هاي انت سامعه المثل اللي يكول الدجاجه تموت وعينها عالسبوس اريد اروح ماجد اتزوج. ضحكت ورجعت سمعته هاي من طلعت من العمليه بعد الولاده من البنج اهذي.
دزيتله مسج: يعني حتى واني بالبنج افكر بيك وانت كاعد تسجلي وتضحك علي. وره شويه رد: ههههههه جنت ناسي هسه اكلب بالتليفون ردت ادزلج اغنيه وشفته سمعته وخربت من الضحك كلت هذا احسن من الاغنيه. ذهب: اي خوش بس الاغنيه اريدها هذا خلي الك ميضحك لان اني جنت مو بوعيي ومااوصيك دزه للعشيره كولها مو بس نجلاء اليوم شيخلصني منها.
هالفتره مجنت اروح لبيت اهلي هم يجون لان الاولاد بعدهم زغار وماجد يخاف عليهم يطلعهم. ذهب: حبيبي انت ليش مطلعت الرقم إلى اتصل بيك واشتكيت عليه؟ ماجد: لا مااريد الموضوع ينعرف ولا اريد اسمج ينذكر وهالمواضيع لازم بيها شرطه ودوخة راس وبعدين تروح تصير عشاير وفضايح مااريد. ذهب: زين يعني متعرف واسطه بس يطلعولك بأسم منو الرقم بدون شكوى وقضيه وانطيهم جم فلس.
ماجد: هو باسمها اصلا بس اني اريدها هي تحجي تعترف لان ممكن تكول الخط باسمي بس مااستخدمه او تكول إلى بس ماادري وين ضاع من هالحجي. ذهب: تعبت من هالموضوع خلص عوفها خل تولي. ماجد: لا طبعا مااعوفها رجال يتصل ويكلي شوف مرتك ويامن تحجي وتردين اعوفها حتى اسمج يعرفه شلون اعوفها؟ ذهب: هسه مو انتهى الموضوع كافي خلينه ننسى. ماجد: انسي اذا تكدرين بس اني مااكدر اذا مااعرفه منو واتأكد هي وراه.
جان الوضع هادئ الشي الوحيد اللي جان مسود ايامي هو موضوع شيماء مااعرف عنه شي وماجد ميقبل يحجي ومن اسولف لفاطمه تكولي ديري بالج زوجج لايظل يحبها ويتعلق بيها. احس باليوم اموت الف مره بس مااكدر اسوي شي لو احجي شي مااريد اسوي مشكله واخاف اسأله يعصب ويسويلي قصه ويزعل. الى ان رجع ماجد فد يوم بالليل ودخل للحمام وتليفونه كل دقيقه ترميشه كل دقيقه مسج عالواتساب قررت افتحه واشوف منو وياريتني مفتحته وشفته.
شيماء ومسجات شيماء حبيبي وحياتي وعمري ومباقية كلمه تعتب عليها والصور اللي دازتها فضيحه صور اثنين يبوسون بعض لو متحاضنين واخر شي صورها هي اللي بدون حجاب واللي لابسه بجامه وصدرها طالع واللي لابسه بنطرون جينز ضيك وياه تيشيرت علاك بدون ردن اتخبلت حسيت عقلي وكف. لا ماجد لاا.
تحميل محتوى الموضوع
عرض نسخة صالحة للطباعة
أرسل هذا الموضوع إلى صديق
[37]
الدعوات : 2قوة السمعة : 10
رواية صبرا يا قلبي