رواية صبرا يا قلبي

رواية صبرا يا قلبي الجزء الأول للكاتبة روز الفياض الفصل الخامس والثلاثون

عمه حميده: اليوم تنامين ان شاءالله براحه هاي برد كلبج واطمأنيتي عليه.
ذهب: وين اطمأنيت بعده بمرحلة الخطر لازم اصبر لباجر وشيصبرني.
التفتت هي على نجلاء: انت ولج شلون بلسانج اكصه يالله احنه نريدها ترتاح وتنام ابطنها طفل لاتروح توكع والولد موصينه عليها ورايح وانت ترحين تخبليها.
نجلاء: اخ ياحميده شكول وشحجي شلون ترتاح وتنام والحب هذا الحب فديته مسوي عمليه متنام ولاترتاح لحدما يرجع صدكيني.

ذهب: يوميه الوكت يركض هسه الساعه بسنه.
ام ماجد: اي والله اليوم شطوله صار اني انطوني دواي مادام وليدي اخباره طيبه خلوني اروح انام.
انطوها وراحت تنام ونجلاء اخذت اولادها راحت تنومهم وفراس طلع بالحديقه يشرب نركيله وعمه حميده نامت كاعده من الفجر بقيت وحدي صعدت لغرفتي اتمددت وكعدت اكلب بالتليفون سبحان الله بعد مادك ليش جان كل ساعه يدك وليش رقم ماجد.؟

حجيت ويه البنات عالواتس وكتلهم ماجان عندي تليفون وجنت مريضه ومن صرت زينه ماجد اتمرض لهذا التهيت عنهم وماسألت عنهم.
ظليت احجي وياهم تقريبا للساعه ( ٢).
نجلاء وفراس بالحديقه اسمع صوت ضحكهم الله يهنيهم حلوين ومتوالمين.
دزيتله مسج ردت من يكعد ويشوف تليفونه يقراه: (حبيب كلبي الحمدلله على سلامتك ياروحي ياريت الوجع بعروك كلبي ولابيك)..
اذن اتوضيت وصليت ودعيت ربي يكمل نعمته ويكومه بالسلامه.

وبقيت مشغله التلفزيون حتى ماانام لان نعست بس مالي كلب انام ومااعرف اخباره
ظليت اكلب بالتلفزيون لحدما صاارت الساعه ( ب8 ) نزلت لكيت عمه حميده وام ماجد يتريكون.
عمه حميده: ليش نمتي فوك البارحه مااكدر اصعدلج رجلي توجعني وظل بالي يمج.
ذهب: مابيه شي لاتخافين يمه بس عفيه اتصلي على عبدالله شوفي شنو الاخبار.
عمه حميده: هسه بعد وكت عدهم نايمين مو مثلنه نكعد ويه الديوجه فد ساعتين واتصل بي ان شاءالله.

ذهب: شيصبرني بعد ساعتين مو كافي الليل شطوله؟
عمه حميده: مانمتي مو؟ يمه منج! عفيه عليج خوش تسمعين الحجي..
ذهب: مو بكيفي عمه مو بيدي.
صارت تقريبا ( ب11 ) ونص اتصل عبد الله كمت اركض حجه ويه فراس وطمنه كله كل شي تمام واحتمال اليوم ينقلوه لغرفه عاديه بس الدكتور يجي يشوف وضعه.

اتمنيت احجي وياه بس مقبل عبدالله كال: منريد نتعبه هو زين وكاعد هسه فاتح عيونه ويتحرك قليل بس الحجي ممنوع حتى لايتعب والحركه محدوده لان جرحه جديد.
بس عموما زين الحمدلله وقبل شويه اتريك وهسه منتظرين الدكتور يجيله.
سد التليفون بس محسيت براحه اتوقعت احجي وياه اسمع صوته حتى لو بس الو.
عمه حميده: الحمدلله والشكر.
فراس: الحمدلله هسه ام رائد المفروض ترتاح بعد.

نجلاء: امي؟ هنيالها على ادويتها مكضيتها نوم لاتفكر ولاتضوج.
فراس: مو امج اقصد ذهب.
اني ابتسمت لان مستغربه الاسم مامتعوده عليه.
نجلاء: والله مااتخيل شكلج يصيحولج ام رائد.
ذهب: ههه ولا اني بس ماجد اختار الاسم.
نجلاء: وانت كل شي يكوله ماجد توافقين عليه؟
ذهب: ليش احرمه الامنيه إلى يتمناها بعدين اسم رائد حلو.
نجلاء: اي طبعا غير الحب مختاره شلون ميطلع حلو.
فراس: شوفي. شوفي، اتعلمي منها شويه.

نجلاء: لاعيني لا. خليني مثل مااني، مااريد اتعلم تريد تموتني هاي صارلها كم يوم لانامت ولا ارتاحت على ساعه توكع ويصير بيها شي منو يفيدها ولو ماجد حبيبي فديته حنون ورومانسي طلع مو هين والله.
عمه حميده: ماما لاتحجين كدام هالاثنين شي لايجيبوبكم عين تره..
فراس: اه انعم الله عليج عمه.
نجلاء: اسم الله لاعيني مانحسد احنه بس نغار شويه هههه.

ابتسمت حسيت نعست حيل بعد مااكدر اترخصت ورحت للغرفه خليت راسي ودعيتله ونمت اخيرا.
نمت والحمدلله محد كعدني للغدا ظليت نايمه للعصر سمعت صوت بره لبست حجابي خاف فراس موجود وطلعت لكيت شيماء زوجة رائد الله يرحمه.
اتفاجأت من شافت بطني محسيتها فرحت رغم باركتلي وبوستني طول ماهي كاعده تباوعلي وحسيتها ضاجت من شافتني.
ونجلاء ضايجه ومعصبه وعمه حميده نفس الشي اخر شي كامت نجلاء وصاحتلي رحت وراها.

نجلاء: حبيبتي كعدي بالغرفه هاي عينها حاره اعوذ بالله منها لاتنطيها وجه تره بكل شي تدخل حشريه وحسوده.
ذهب: ليش متحبوها لا انت ولا ماجد ولا امي حميده.
نجلاء: خبيثه اخبث من اسراء لاتشوفيها تضحك وتسولف عاشت عدنه سنه خبلتنه اخر شي ابوي الله يرحمه كللهم طلعوا بيت وحدكم احسن.
بقت كاعده تقريبا ساعه هيج وبعدين راحت.
ثاني يوم كعدت الظهر صليت ونزلت اتغديت وعيني عالموبايل بلكي يتصل.

الساعه ( ب2 )ماتحملت بعد كلت لنجلاء اتصلي.
نجلاء: فراس الصبح اتصل وكلوله كل شي تمام.
ذهب: الصبح راح هسه الظهر بلكي طلعوه من العنايه.
نجلاء: صار شعدنه غير ام رائد وابو رائد.
اتصلت نجلاء كللها عبد الله توهم نقلوه لغرفه عاديه وانطاه التليفون حجه ويه نجلاء.
نجلاء: ها ماجد حبيبي الحمدلله عالسلامه خويه شلونك؟
كعدت يمها اشرتلها اريد احجي وياه.

نجلاء: حبيبي كل احنه زينين هاي ام رائد تريد تحجي وياك موتتنه تره بس تبجي من سافرت لهسه..
انطتني التليفون كلبي ظل يدك عبالك اول مره احجي وياه.
ذهب: حبيبي؟
ماجد: هلو.
ذهب: شلونك حبيبي؟
ماجد: الحمدلله، انت شلونج؟
ذهب: اشتاقيتلك موتتني يومين صار انتظر يخلوك تحجي وياي..
ماجد: ممنوع لان جنت بالعنايه.
اكيد عبدالله يمه يستحي يحجي وتعبان وموجوع مبين من صوته كوه يحجي.
ذهب: يالله الحمدلله هانت ان شاءالله.

ماجد: شلونه رائد؟
ذهب: الحمدلله زينين مادام انت زين.
ماجد: الحمدلله يالله سلمي عالجميع وديري بالج على نفسج.
ذهب: الله وياك امانة الله ومحمد وعلي.
ماجد: مع السلامه.
ذهب: مع السلامه ياعمري.
سد التليفون مصدكت حجيت وياه حسيت شويه ارتاحيت ولو اتصال سريع بس ميخالف المهم سمعت صوته.
بقى ماجد بالمستشفى اسبوع وراها طلع من المستشفى استأجروا شقه هو وعبدالله بعدين سافرله ضياء ورجع عبد الله علمود الشغل.

بعد اسبوع وماجد يرجع جنت ادزله مسجات عالواتس من يكون كاعد يرد علي.
دزيتله مره: (علمتني كيف اشتاق لك في كل لحظه ولكنك لم تعلمني كيف اصبر على فراقك).
دزلي وره ساعتين تقريبا: يعني انت بريئه بس اني مجرم؟ اني رجال مجنت اريد اتزوج جربت مره وجريت اذني انت خليتيني اغير رأيي واقرر اتزوج من جديد واتورط بس هسه بعد ميفيد الحجي الفاس طاح بالراس منا انت ومنا جهالج هههه.
ذهب: ها هسه صاروا جهالي؟

ماجد: ههههه فديتهم والله.
خلص الاسبوع الثاني وعكب باجر يرجعون.
رتبت الغرفه الجوه النه لان لازم يبقى جوه علمود الخطار لحدما يتحسن فرشتها ورتبتها ورد احمر وشرشف احمر وبخرتها ووديت ملابسه بيد ابو جبار للوندري احتاريت شنو اسوي حتى احذيته كعدت لمعتهم بأيدي ونجلاء تضحك.

تعبت بيومها حيل تعبت ودخت بالليل نمت مثل القتيل وكعدت من الفجر صليت ونزلت جوه اتريكت والقيت نظره اخيره عالغرفه خاف ناقصها شي اتذكرت عطره جنت ارشه عالمخده من راح رشيت شويه بالغرفه ولو بعد مااحتاجه حبيبي اليوم يرجع.
سبحت وسشورت نجلاء شعري ولبست جلابيه خضره وبالحافات ورد احمر.

نجلاء: ايبااه شنو هالكشخه؟ شنو هالاناقه والفخامه هاي كلها علمود اخوي؟ والله هنياله، سبحان الله اليشوفج هسه عبالك مو انت نفسج من سافر خلصيتها تنوحين.
ذهب: لاتذكريني فدوه جانت ايام سوده الله لايعيدها.
نجلاء: اي والله، بس تره بعد وكت بعد تقريبا ساعتين علما يوصلون.
ذهب: هو الوكت حيل شد وياي من سافر ماجد لهسه كوه يمشي.
نجلاء: والله عبالك وحده عدها ولاده تريد تخلص..

راحت نجلاء تسبح اولادها واني رحت لغرفتنه الجديده جوه اتمددت انتظرهم تعبت ونعست كاعده من الفجر غفيت.
حلمت بيدي سوار حلو وفخم وكل البنات يردون ياخذونه مني يجرون بي بس ميطلع من ايدي..
حسيت اكو صوت بس ظليت نايمه مستغرقه بالنوم لحدما حسيت ايد على راسي ايد دافيه ايده هو حبيبي فتحت عيوني عبالي بعدني اتحلم باوعتله بس ماجان عندي رد فعل عبالي حلم رجعت غمضت مااريد الحلم يخلص.
ماجد: صح النوم..

سمعت صوته بس بقيت مغمضه لان حلم. سمعت صوت ضحك نجلاء وعمه حميده بس ماكمت ماتحركت من مكاني.
ذهب: يمه حميده هاي بالحلم؟
ضحكت نجلاء بعلو صوتها واجتها كفخه من عمه حميده هنا عرفته مو حلم كعدت اباوعله مامصدكه هو ضحك.
لزمت ايده بعدني خايفه يكون حلم.
ذهب: لاتضحكون اريد اعرف صدك لو بعدني اتحلم؟
ضحك هو باس ايدي اني بجيت وحضنته.
ذهب: هذا انت صدك حبيبي يابعد عمري.

هو حضني على كيف خاف يتأذه بس اني محتاره شلون احضنه على كيف مااشبع ماارتاح اريد انام بحضنه براحتي.
ظليت ابجي وهو يضحك ونجلاء تصورنه بالموبايل.
ماجد: خلص عاد رحت واجيت وانت تبجين.
مسحت دموعي وخليت راسي على رجله.
ذهب: متخليني وتروح بعد لاي مكان زين؟ اموت والله اموت حرام عليك شسويت بيه وراك.
ماجد: اسم الله عليج اصلا بعد وين اروح خلص بعد العمليه وسويناها.

نجلاء: لابس صدك تموت تره هاي مرتك مو صاحيه لانوم لااكل لاراحه احنه خفنه عليها يصير بيها شي قبل لاترجع.
ماجد: هاي واني موصيها.
نجلاء: الله لايعيدها من ايام همزين خلصت قلق وخوف والتليفون إلى يدك كل شويه من جنت بالعمليه وخبلنه.
ماجد: يمكن هاي من وكف كلبي داانطيكم اشاره هههه.
ذهب: اسم الله.
رجعت بجيت.
ماجد: والله عجيبه مو هياتني يمج على شنو تبجين بعد؟

نجلاء طلعت وسدت الباب بقينه بس اني وياه وهو كل شويه يبوس ايدي واني صافنه عليه متعجبه كلبه وكف ورجع وهسه هو يمي خلص صار زين الف الحمدلله ربي ماقصرت.
ماجد: تعباااان.
ذهب: اسم الله عليك راح عنك التعب ان شاءالله كوم بدل ملابسك وغسل حتى تتغده وتنام وترتاح.
ماجد: اشتاقيتلج.
كتله: هالكلمه متوفي حق إلى حسيت بي وانت هناك..
ماجد: الله لايحرمني من هالصوت والوجه الحلو.
ذهب: والله بعد متروح لمكان بدوني.

ماجد: اصلا اني مااكدر افاركج ولا افارك هالحلوين اذا اجو بالسلامه.
ذهب: هالحلوين شعليهم مرتاحين ويلعبون واني مشلوع كلبي.
ماجد: علواه جنت اكدر اخذج وياي لو اسوي العمليه وارجع اسرع من هيج بس مو بيدي.
كعدت نزعته الحذاء والجواريب ميكدر يدنك. فتح هو القميص اني انصدمت من شفت صدره شلون مفتوح ومخيط.
حضنته على كيف وبست صدره.

رواية صبرا يا قلبي الجزء الأول للكاتبة روز الفياض الفصل السادس والثلاثون

طلعتله بجامه جديده يلبسها.
ماجد: غرفتنه الجديده هاي ههه؟
ذهب: اي لحدما تصير زين ان شاءالله ويخفون الخطار.
ماجد: زين تعالي شويه.
اتدنيت اكومه بس كلي كعدي كعدت بصفه لزم ايدي بعدين حضني.
ماجد: اريد نبقى هيج.
ذهب: ياريت بعد لازم صبر اكثر لان انت بعدك مريض وتعبان ينرادلك فد شهر حتى تتعافى وجرحك يلتئم ويطيب.
ماجد: مااكدر شيصبرني وانت مسويه الغرفه هيج كله احمر باحمر حتى بيوم زواجنه مجانت هيج ههههه.

ضحكت كتله: هاي غير حتى اسويلك غرفه حلوه ترتاح بيها وتشوف شكد اني مهتمه براحتك تره نيتي صافيه قصدي نفسيتك تتحسن مو شي ثاني.
ماجد: عيني بعينج بالله اشوف نيتج شكد صافيه هههه.
ذهب: والله مو قصدي شي.
ضحك باس خدي.
ماجد: احبه اليستحي مني لهسه ماكو هيج تره.
ذهب: ماكو شنو؟
ماجد: ماكو هيج وحده تستحي من زوجها او من خطيبها اصلا متخجل مو بعد زوجها بس انت بعدج تستحين مني.

ذهب: شسوي الله هيج خالقني صعبة هسه صرنه منعجب؟
ماجد: اصلا هو شنو إلى احبه بيج غير هالمستحه.
ذهب: بس المستحه؟ انعم الله.
ماجد: لا كلشي بيج حلو وهسه صايره احلى على فراكي خوش مقهوره صايره طوبه.
ذهب: طوبه؟ وطلعت هسه مامقهوره عليك؟ جزاك الله خير.
ماجد: ههههههه اضحك وياج شبيج بعدين اني شكلت كلت صايره احلى طوبه.
ذهب: كوم روح اتغده اني اليوم بديت رجيم.

ماجد: لا والله شكلج حلو لايكلج الحمل بعدين اني احبج بكل حالاتج بس شغله وحده بيج مااحبها.

ماجد: البجي، على كل شي تبجين واذا بجيتي متسكتين مثل الجهال.
ذهب: انت هسه مريض مااكدر احاسبك بعدين نتحاسب على هذا كلامك مو عبالك انساه لاحسابه بعدين.
ماجد: زين ماكو شويه مقبلات اصبر نفسي بيها؟
ذهب: هههه لاحبيبي ماكو اي شي كل الانواع مو زينه عليك هسه.
ماجد: والحل؟
ذهب: الحل تصبر وتتحمل منا لحد متصير زين وتتعافى اصلا اني جهالك ذوله كاطمين ظهري اتحرك بالكوه وماشاءالله حركه مستمره فخليك بعيد.

ماجد: حبايبي فديتهم شوكت يجون تعبنه ننتظر..
ذهب: لعد اني شكول احس عبالك فيله احس صار سنه حامل.

ماجد: هههههه الله يساعدج هسه انت دخلتي بالشهر السابع مو؟
ذهب: امم..
ماجد: هانت ان شاءالله بس انت هسه لازم ترتاحين هالشهر خطر تره انتبهي على نفسج وعلى صحتج.
ذهب: الله كريم.
ماجد: الله كريم هسه كوميني خل نروح يم الجماعه عيب مصخناها.
ذهب: يالله انطيني ايدك على اساس اكدر اكومك اني.

طلعنه كعد هو بالهول يم امه واني رحت للمطبخ اساعدهم حتى لو شي بسيط باوعت بالحديقه شفتهم جايبين عجل وذابحي وولد عمه وعمامه بره دخت ولعبت نفسي من شفت الدم مديت ايدي عالكرسي كعدتني ساره.
نجلاء: انت شتسوين تجين للمطبخ؟ احد طالب مساعدتج؟ احنه كولنه موجودين وكل شي خالص كومي كعدي يم رجلج وارتاحي مو جنتي بس ترديه يجي.
ذهب: بس شويه ارتاح..
نجلاء: ارتاحي حبي ارتاحي بس اني اريد مصلحتج تره.

عمه حميده: عوفيها ترتاح لتخبليها ماتت من البجي وراه توه برد كلبها ذكرتني بالحجي الله يرحمه من راح للعسكريه..
نجلاء: ايباااه شذكرج بالعشق هسه هذا العشق الممنوع الرجال مات صارله نص قرن الا تحمسيه هسه.
ذهب: ههههههههه الله يرحمه.
صبوا الغدا الرياجيل بحد والنسوان بحد طبعا ماجد يمنه ميكدر يكعد الا على طاولة الطعام وعمه حميده تفلسله الاكل عبالك طفل واني طبعا مكيفه لان يمي.

خصلنه غدا راح ماجد يم عمامه شويه بعدين ترخص يريد يرتاح راح للغرفه رحت وراه انطيته علاجه وطفيت اللايت وسديت الباب عليه حتى يرتاح وطلعت استحيت ابقى يمه كدام عمه حميده ونجلاء واهله.
عمه حميده: ها يمه رجعتي؟ ليش مبقيتي يمه خاف يحتاج شي؟
نجلاء: تستحي مدري تطرد عيون شبيج حميده ذوله ناس على مستوى يخططون مو مثلنه ههههه..
ذهب: يامستوى متشوفيه حتى ميكدر يبقى كاعد فتره طويله صدره كل مفتوح سوده عليه.

نجلاء: شكد احبج من تكولين سوده عليه احسها تطلع من نص كلبج مثل عمتج حميده ههههه.
عمه حميده: كومي يمه كومي روحي يم رجلج هاي متفيدج وحده مو صاحيه تره الله يساعد رجلها عليها.
ذهب: هههههه.
نجلاء: تتشمتين مو؟ بسيطه وين تروحين مني انت ورجلج كاعدتلكم بالمرصاد.
دخلت للغرفه شفته نايم كعدت عالكرسي مال اريد ازعجه خليت التليفون صامت ورجعت انتجيت نعست نمت لان هدوء وظلمه حسيت بي كعد ظل يتحرك كعدت شفته يباوعلي.

ماجد: شتسوين؟
ذهب: ماكو مااسوي كعدت هنا خاف تحتاج شي بس نعست ظلمه وهدوء.
ماجد: وليش نايمه عالكرسي بعدين يتأذه ظهرج.
ذهب: ماردت اكعدك شفتك نايم كلت خلي يرتاح.
ماجد: واذا نايم ممنوع تنامين عالكرسي لو عالقنفه مو زين عليج بالله انكلبتي؟
كمت رحت يمه اتمددت مد ايده خليت راسي على ايده اخذ ايدي خلاها على صدره خفت وجلدي قشعر لان حسيت الجرح جوه ايدي سحبت ايدي.
ماجد: ليش خليها..

ذهب: لا اخاف حسيت الجرح جوه ايدي خفت خاف تتأذه.
ضحك وسكت ورجع ضحك، ضحكت كتله: شبيك ضحكني وياك؟
ماجد: اتذكرت من نمتي على ايدي اول مره ههههههه تتذكرين؟
ذهب: لااا.
ماجد: لا تتذكرين، منمتي للصبح خاف راسج ثكيل على ايدي ههههههه.
ذهب: صوجي والله صوجي، عود اني اخاف عليك ومااريد تتأذه وتتعب.
ماجد: حبيبي امي مساع تكلي هاي شمسويلها هلكد بجت عليك ههههه، ليش تبجين هلكد تحبيني يعني؟
ذهب: لاا..

ماجد: والله؟ لعد المن تبجين؟.
ذهب: يعني تريد تدلع بعد مو كافي موتتني وراك..
ماجد: اي شكو بيها اذا دلعتيني شويه مو توني طالع من الموت وبعدني بفتره نقاهه لازم ارتاح واتدلع.
ذهب: اسم الله عليك بس ماكو دلع بعد تعبااانه ميته من التعب لهنا وكافي هسه اني اريد تعويض عن قهري وتعبي وراك.
ماجد: زين ماعندي مانع تعالي شويه هنا واني انطيج تعويض بسيط تحت الحساب.

ذهب: لا شكرا خلي تعويضك الك انت تعباان ومريض بيا حال هسه هي مال تعويضات..
ماجد: هيج صارت بسيطه نتحاسب بعدين بس هسه شويه تعالي شووويه.
كعدت حضنته على كيف وبست خده.
ماجد: لا هيج مينفع اريد هيج.
وخرت حسيته تعباان.
ذهب: كافي هيج مصختها مادام هيج ماتلتزم معناها اصعد انام فوك احسنلي واحسنلك.
ماجد: فوك احسن بس اني هم اصعد.
ذهب: لعد اني المن صاعده اذا انت هم تريد تصعد وراي؟

ماجد: اذا تردين تعذبيني ليش اكلتي راسي حتى ارجع جان خليتيني هناك ارتاح.
ذهب: لا مو من كلبك هالحجي يعني عادي عندك ينشلع كلبي عليك وماانام الليل افكر واشتاقلك وابجي.
ماجد: واني اشتاقيتلج اكثر لعلمج ومن اخابر ويكولون متنام ومتاكل وبس تبجي انقهر واضوج واظل افكر بيج وبرائد وفضل بس شسوي.
ذهب: خلص، خلص..
سامحتك راح ابقى هنا وياك بالغرفه مااصعد بس انت بمكانك واني بمكاني متعبر الحدود.
ماجد: ياحدود؟

بشرفج اني شفتهمت من الزواج والعرس كم شهر اني ممنوع علي حظر تجوال حتى الغرفه ممنوع انام بيها؟
ذهب: ههههههههه والله عرفتك حتكول هيج خوش لاكيها حجه لا حبيبي هذا شرطي اذا متقبل حتى اخذ زعابيلي واصعد اني وزعاطيطي بغرفتنه. شتكول؟
ماجد: خلص خلص امري لله.
موافق بس تره هذا ظلم طلعتي قاسيه.
ذهب: لاتحجي عالقسوه انت اللي عفتني ورحت ماكلت هاي خاف تموت وراي شلون اتركها واروح.
ماجد: ههههه والله بلوه شيخلصني بعد.

ذهب: اذن لاتحجي لان انت الغلطان زين مني وسامحتك.
شويه واجو بيت عمه زوجه عمه وعهود ورنا وازواجهم بس عمه حميده كلتلهم يدخلون يمه بالغرفه مايحتاج كل شويه يكوم ويطلع.
صعدت اني لبست فستان نيلي وبي خطوط بيضا ونزلت كعدت يمهم فرحوا من شافوني بطني جبيرة وكل شويه يدعولي الله يكومني بالسلامه.
طلعوا اجو ماما وبابا وجابوا خروف بقوا شويه وراحوا لان ماجد تعباان.

بالليل عشيته بالغرفه سويتله شوربه وشربته وبعدين انطيته علاجه ونام بس كلي خلصي وتعالي يمي.
رحت اتعشيت عالسريع ورجعت لكيته غافي كعدت يمه عالجربايه اباوعله هو حس لزم ايدي حيل ونام اني هم نمت واخيرا هو يمي هسه انام وارتاح بدون تفكير.
نمنه بسرعه من التعب ودوخة الخطار.
مرت هالايام كل شي تمام بس بتعب لان ناس هوايه معارفهم وكرايبهم واصدقاءهم هلكوا البنات من الشغل وكلما اريد اساعدهم ميقبلون يخافون اتعب.

وراها رحنه اني وماما للدكتوره عندي موعد واخذت سونار كل شي تمام بس كلتلي الطفل نازل لازم تبقين نايمه على ظهرج.
رجعت للبيت لكيت شيماء موجوده كاعده يم ماجد بالغرفه اتفاجأت شنو الموضوع شنو هالميانه ضجت بس محجيت شي صعدت فوك بدلت وبقيت كاعده بالغرفه منزلت لحدما اجت نجلاء سألتني على الدكتوره شنو كالت وشنو حجت وكلتلي: خل ننزل راحت شيماء.
نزلت بس جنت متضايقه ومالي خلك.
ماجد: ها حبيبي بشري شنو كالت الدكتوره؟

ذهب: ماكالت.
ماجد: ولا شي؟ يعني طبيتي سلمتي عليها وطلعتي؟
ذهب: لا كالت نامي على ظهرج الطفل نازل.
ماجد: اها ليش نازل؟ اكيد من الحركه متكعدين مترتاحين مثل الحوامل تفترين ياصاعده يانازله وكل شويه الكاج بالمطبخ شتسوين ماادري.
ماجاوبته مالي خلك سكتت اتنهدت حسيت ضاك صدري.
ماجد: رجاءا ارتاحي لاتتحركين خلصي بس هالشهرين على خير وبعدين سهله ان شاءالله.
ذهب: صار.

ماجد: اهتمي بصحتج اكلج نومج تره ذوله اطفال مالهم ذنب اذا انت اتعبين هم يتعبون وياج.
قررت اصعد لغرفتي لان مااكدر ابقى نايمه على ظهري شهرين بنفس الغرفه وهو ناس تجيله كل شويه.
صعدت اغراضي وصعدت ظليت انام بغرفتي.
فات هسه شهر على عملية ماجد اتحسن وضعه بدا يروح للشركه ساعه ويرجع لان يضوج بالبيت.
ماجد: اريد اصعد فوك بعد كافي الحمدلله هسه احسن اكدر اتحرك واصعد وانزل والناس هم خفوا هوايه.

ام ماجد: خاف تتعب يمه انتظرلك بعد شهر.
ماجد: شهر قليل شرايج ابقى ( 6 ) اشهر هههه.

عمه حميده: لا حبيبي اصعد براحتك مدام تشوف نفسك صرت زين روح يم مرتك خطيه بحدها تبات..
ذهب: اشو جنج مليتي مني يمه؟
عمه حميده: لا حشا بس انتهى دوري بعد شتسوين بيه مره عجوز لا احضن لا ابوس.
ذهب: عزا العزاج وهيبه.
نجلاء: هههههههههه وربي حميده اليوم حمت.

ماجد: هم رجعت علينه وهيبه هههههه.
نجلاء: منو وهيبه؟
صعد ماجد فوك لغرفتنه الصبح يروح للشركه ومرات العصر يروح للمعرض اني مااتحرك ممنوع كلها تراقبني وممنوع حتى اكعد شويه ومليت متت من النوم على ظهري وحركتي صارت حيل بطئيه وثكيله وجسمي كله مورم.
رحت اني وعمه حميده للدائره استلمت راتبي وسلمت عالبنات اتفاجأوا من شافوني لان ميعرفون اخباري ولا شفتهم من صار الحمل ولحد الان.

رجعت للبيت طلعت فلوس العمره لابو جبار وزوجته انطيتهم لماجد كتله: هذا نذر علي من تكوم بالسلامه وانت هسه الحمدلله صرت زين وكل شي تمام.
ماجد: من عرفتج خلصتها نذوره هههه.
ذهب: يعني اني فكر انعم الله عليك.

ماجد: لج لا قصدي من شفتج نذرت اذا صرتي إلى اخذج ونروح للعمره ومن خطبتج نذرت اذبح ذبيحه وذبحت ومن تزوجنه نذرت وذبحت ومن كل مره من تحملين انذر حاجه بس الله مايقسمها بس اخر مره من جنتي بالمستشفى نذرت اذا كمتي بالسلامه انتي والبيبي اذبح عجل والحمدلله وفيت.
ذهب: والعمره؟
ماجد: ماصار مجال بس ان شاءالله من تولدين بالسلامه اخذج ونروح.
ذهب: ان شاءالله.

رواية صبرا يا قلبي الجزء الأول للكاتبة روز الفياض الفصل السابع والثلاثون

بهالفتره شيماء هوايه جانت تجينه بس اني مااشوفها لان ماانزل بس ماجد ينزل وهو يوصلها من تروح لبيتهم بالليل.
ذهب: نجلاء شيماء شعجب متزوجت وره رائد الله يرحمه.
نجلاء: ماادري بس تره هي موحلوه لايغرج الشكل كله مكياج بدون مكياج زركه وتخرع.
ذهب: اي بس مغريه وملفته للنظر يعني لبسها مفصل جسمها والشعر طالع من الحجاب وضخمه ماشاءالله ومكياج يعني هوايه يحبون هيج.

نجلاء: لا بالعكس تره المثلها يركضون وراهم بس للعب وتقضيت وقت مو اكثر اللي يريد يتزوج يدور وحده عكسها محد شايف طولها مو تمشي وتفر ب..
ذهب: بس هي قبل مجانت تجي مو؟ بس هسه ماشاءالله كل يوميه جايه وتبقى لليل وتعال ياماجد وصلني ماتكول مريض تعبان توه طالع من عمليه.
نجلاء: اااه يالغيره يعني انت مقهوره عليه لو عليها لو تغارين لان يوصلها بالليل؟

ذهب: يعني بالنهار وحد؟ التوصيله توصيله وعيب عليها تصعد وياه يعتبر رجال غريب عنها كدام الناس طالعه وطابه وياه.
نجلاء سكتت ماجاوبت واني هم سكتت مااريد اكبر الموضوع.
رجع بالليل صعد للغرفه يبدل ملابسه اني نزلت اتعشى انتظرت هسه ينزل بعد شويه وينزل ماكو!
رجعت صعدت اشوفه وين فتحت باب غرفتنه ماكو كلت يمكن بالحمام دخلت لغرفته على كيف بس مو قصدي لكيته واكف ظهره باتجاهي ماشافني جان يحجي بالتليفون.

ماجد: خلص حبيبتي اني كتلج اللي ترديه يصير مالج علاقه شلون وشوكت.
اني انعصر كلبي عصر عبالك واحد ولازم كلبي بيده ويضغط عليه.
ماجد: اصبري بس شويه مابقى شي هانت كلها هالشهرين هي تجيب ان شاءالله ويصير خير هسه وهي حامل مااكدر اخاف يصير بالطفل شي.
ظليت واكفه مثل الصنم مااكدر اتحرك لا اكدر انزل ولا اكدر ابقى بمكاني اتخشبت.
ماجد: اتحملي هي اصلا بس تجيب اوديها لاهلها وينتهي الموضوع.

من هيج جنت تريد تخليني عد اهلي قبل لاتسوي العمليه واني الغبية ردت اموت علمودك شنو اني احلم لو صدك.
بقيت واكفه الف فكره اجت براسي خلال دقايق حسيت الدنيا وكفت ماعندي رد فعل مو مستوعبه اللي سمعته ولا مصدكته.
التفتت شافني واكفه سد التليفون وجهه ظل ينطي الوان وارتبك.
اتدنه شويه علي بس اشرتله بيدي لاتدنه.
هو بقى واكف كال: شوكت صعدتي مو نزلتي وكتلج نازل وراج؟

ماجاوبته خليت ونزلت جوه اختنكت متت كلبي احسه راح ينفجر سألوني وين ماجد تعالوا اتعشوا ماجاوبتهم طلعت بره كعدت يم باب المطبخ بالكاع.
خفت خاف مااكدر اوصل ابعد من هيج كعدت بمكاني ساكته حتى دمعه مانزلت مني بس حسيت روحي دتطلع لدرجة اتشاهدت وكعدت اقره شكو سوره حافظتها.
نزل اسمعه يسألهم وينها وهم يسألوه شصاير طلع لكاني يم الباب كاعده بالكاع وظلمه اللايت محترك.

كعد يمي بالكاع لزم ايدي اني ظليت ارجف من العصبيه سحبت ايدي ودنكت كملت اقره الايات إلى حافظتهم هو يباوعلي يحجي شي.
خلصت اتنهدت حيل حسيت الهوا ماكو وكلبي يريد ينفجر ومااكدر ابجي ردت ابجي حتى ارتاح ماكو.
ماجد: على كيفج..
كومي ندخل جوه نحجي؟
ذهب: مايحتاج نحجي بشي بعد..
كل شي صار واضح.
ماجد
: لا ماكو شي واضح لازم تعرفين الموضوع من الاول وبعدين حكمي.

ذهب: مايحتاج تبرر عادي تره مو صوجك صوجي اني غبيه وماافتهم بسرعه. مااستوعب من اول مره. مااصدك انت تغلط ولا اصدك بيوم متحبني ولا اصدك بيوم اطلع مااسوه شي. ولااصدك اي شي يجي منك مو زين فمو غلطك غلطي..
ماجد: الموضوع مو هيج تره انت فاهمه غلط.
ذهب: اي مو داكولك اني غلطي ماافهم مااستوعب شسوي؟ بس هسه خلص بعد افتهمت ووضحت الصوره مايحتاج تبرر معذور.
ماجد: اصبري شويه خليني احجي.

ذهب: كافي ماجد فدوه تره كلبي ميتحمل بعد حجي بأي شي واني هم راح اسهل عليك الموضوع حتى ترتاح ومتشيل هم انت جنت تريدني ابقى عد اهلي قبل لاتسوي عمليه بس اني حشاك حماره مافهمت وماقبلت ابقى واجيت كعدت على كلبك هنا هسه بعد مايحتاج تحجي عذرك قوي وواضح فلو توديني لو اتصل على بابا يجي ياخذني كيفك.
ماجد: تره ميصير هيج انطيني مجال ادافع عن نفسي.

ذهب: انت ليش تسوي هيج؟ انت مو جنت منتظرني اجيب وبعدين تتصرف؟ مدري تطلكني مدري تاخذ اولادي مني لان هسه حامل تخاف عليهم مو؟ هسه اني اكولك مايحتاج تنتظر استغل الفرصه ومن اجيب اكيد راح تعرف انت ابوهم.
ماجد: انت اصلا متعرفين ويامن جنت احجي وليش. الانسان اول مره لازم يفهم الموضوع قبل ميحكم.
ذهب: صحيح. مو انت جنت كل مره تفتهم الموضوع قبل متحكم علي صحيح ومنكم نستفيد، بعدين منو كلك مااعرفها؟ شيماء مو؟

هو سكت انغث من حجيي واتفاجأ من سمع اسم شيماء.
ماجد: كومي كافي عيب تره إلى دتسوي هذا كومي فوتي جوه نحجي واللي تردينه يصير.
ذهب: طلكني ماجد. كافي بعد تعبت. والله تعبت. والله. ،
هو عصب لزم ايدي حيل اذاني بس ماحجيت ولا فتحت حلكي.
ماجد: هاي الكلمه تنسيها بدل المره الف كايلج ماكو هالكلمه بقاموسي طلاك ماكو اتعوذي من الشيطان وفوتي جوه ولاتخليني اتخبل بهالليل.

طلعت عمه حميده ورانه شافتنه كاعدين بالظلمه يم الباب.
عمه حميده: شكو؟ شبيكم كاعدين هنا شعدكم؟ صار ساعه خالين العشا متردون تتعشون؟
اني ساكته هو اتنهد حيل.
ماجد: تعاي احجي وياها وفهميها عقليها تره مابيه حيل ومتنطي مجال واحد يحجي ويفهمها.
عمه حميده: ياستار يارب شصاير؟
ماجد: سمعتني احجي ويه شيماء واتخبلت.
عمه حميده: هذا الجنت خايفه منه مو نبهتك كم مره وكتلك لاتسمعك لو من البدايه كايللها احسن.

ماجد: مو انتو اللي مقبلتوا بالبدايه؟
اتعجبت حتى عمه حميده تعرف وتدري بي يحجي وياها والظاهر الموضوع صارله فتره واني ياغافلين الكم الله.
راح طلع يم ابو جبار بره عمه حميده جابت كرسي وكعدت يمي متكدر تكعد بالكاع.
عمه حميده: كومي ماما دخلي جوه نحجي ميجوزلج كعدة الباب مو زينه عليج والكاع بارده لاتاخذين بروده.
ماجاوبتها اختنكت متت ظليت الهث عبالك جنت اركض.
اجت نجلاء كعدت يمي.
نجلاء: شبيكم؟ شبيج حبيبتي شسوالج؟

عمه حميده: اففففف، سمعته يحجي ويه شيماء.
نجلاء: والله كلبي جان حاس راح تعرف لان جانت ضايجه منها وملاحظه الموضوع وساكته.
عجيب حتى نجلاء تعرف حسيت بردت بس ماحجيت شي بقيت ساكته.
نجلاء: حبيبتي تره احنه كل احنه نعرف بس ماردناج تعرفين نعرف الموضوع صعب عليج متتحمليه وخفنه نكلج بس تره هو راد يكلج واحنه مقبلنه.

باوعتلها كتلها: شكرا بس لو من الاول كايلي احسن حتى ماانقهر هيج جان من الاول بقيت عند اهلي ولا هالذله.
عمه حميده: ياا ليش هيج يوم ماعاش اللي يذلج واحنه موجودين افه عليج انت بس افتهمي الموضوع وبعدين قرري لاتستعجلين حبيبتي كومي يالله دخلي كومي.
حسيت الدنيا بدت تدور بيه مظليت اشوفهم وكتلني البرد.
اجه ماجد يحجي بالتليفون وخلاه على اذني كلي هذا ابوج يريد يحجي وياج.

بابا: حبيبتي بابا تره انت فاهمه غلط اني هم اعرف بالموضوع بس محبيت احجي شي حتى لاتضوجين اصبري للصبح اني اجي واحجيلج..
بعد ماسمعت شي مااستوعب شيكول كلبي ظل يدك بسرعه واسناني تصطك وظليت ارجف نجلاء صاحت: تره داخت. انخفض ضغطها خل ندخلها لايغمى عليها.
جابولي الكرسي مال امه كوموني كوه وكعدوني عليه وصعدوني للغرفه.

اشوفهم يحجون وياي بس مااكدر اجاوبهم بعدين ظلمت الدنيا وماحسيت بشي بس البرد كتلني وبعدين دفيت ونمت ماكعدت للصبح حسيت شي بارد على كصتي فتحت عيوني ماجد يسويلي كمادات رجعت غمضت..
ماجد: شلون صرتي؟
ماجاوبته ولااريد افتح عيوني واشوفه.
ماجد: ليش هيج تسوين بنفسج وبيه وباولادنه؟
واخيرا نزلت دموعي مسحها بيده كال: زين هيجي من صخنتي؟
الحمدلله مجانت حرارتج قويه بس سبحناج نزلت بس طول الليل مدريتي بشي.

فتحت عيوني باوعت لملابسي مو نفسهم الجنت لابستهم هاي شلون سمح لنفسه ينزعني ويلبسني ويسبحني بعد؟
شكد فشله.
اتنهدت كلبي بعده يوجعني درت وجهي عالجهه الثانيه ولزمت كلبي اتمنيت اكدر الزمه بيدي واضغط عليه حتى ينفجر وارتاح ولا هالوجع والمهانه.
خله ايده على ايدي كال: يوجعج؟ اني غلطان جان لازم من البدايه اكولج كل شي بس خفت تضوجين وانت حامل وتعبانه..
رحت نمت بغرفته واتغطيت.

اجه وراي اتمدد يمي كال: شوفي شلون الدنيا دواره جنتي مخليتني بهالغرفه وحدي انام هسه انت من نفسج اجيتي نمتي بيها هههه..
كلبي يوجعني مابيه حيل احجي وارد عليه.
ماجد: حبيبي تره اني جنت احجي وياها استدرجها يعني مو اكثر من هيج والله.
حسيت بطني توجعني من حركت البيبيز اذوني حيل وكلت: آآآخ.
هو كمز من مكانه كال: شبيج بطنج تأذيج؟ شنو يعني ولاده؟ مو بعد وكت؟ شنو يوجعج؟

ماجاوبته ظليت ساكته هو دارني عليه كلي: لخاطر الله تعبتيني تره احجي جاوبي؟
ذهب: شتريد ماجد؟
ماجد: شبيج شيوجعج؟
ذهب: بطني اذتني من حركتهم وكلبي يوجعني من وراك ان شاءالله يوكف وارتاح..

درت وجهي هو ظل يتأافف بعدين كال: انت يمكن نسيتي اللي صار من وره شغلة التليفون بس اني مانسيت ولان ضميري يأنبني وكلبي لهسه محترك على السويته بيج ماتركت الموضوع ولازم اعرف منو وراه وليش منو اللي يستفيد من تخرب علاقتنه اني مااحب أذي احد بس مااسمح لاحد يأذيني ويأذي عائلتي..
ماجاوبته بس جنت اسمعه ولو ادري مراح اصدكه شلون اصدكه بعد اللي سمعته.

ماجد: جنت متوقع ذاك الحقير سراج بس طلع الموضوع اكبر منه طلعت شيماء.
اني انصدمت فتحت عيوني بس مرديت عليه ظليت مثل مااني بس اباوع بعيوني هو ضاج ونزل وعافني..
وره شويه صعدت نجلاء اتمددت يمي.
نجلاء: هاي شنو ذوذو بعدج زعلانه؟
مجاوبتها.

نجلاء: يابه حقج تزعلين من عدنه بس مو هيج. يعني جان قصدنه شريف الله وكيلج مجنه نريدج تنغثين وهو جان يريد من الاول يحجيلج بس احنه بالبدايه منعناه كناله تنغث ومتتحمل حتى لو تمثيل..
باوعتلها ماادري اصدكهم لو اصدك اذني والحجي اللي سمعته يحجيه ويه شيماء منو الصح بيهم منو التمثيل اخاف اصدك واطلع اكبر غبيه بعدين اخاف ديقشمرني ينتظرني اجيب حتى ياخذ اولادي ويشمرني شسوي،.

نجلاء: ذهوبه حبيبتي اني اختج الجبيره لتتصورين اغشج بيوم تره اني هم بنيه مثلج ومااريد اسوي شي باجر الله يطلعه بيه اني هم متزوجه وعندي عائله مااريد انحط بهيج موقف اوك؟ بعدين تره هااي جانت فكرة ابوج مو فكرة ماجد.
انصدمت ابوي شدخله بالموضوع هو يمكن البارحه حجه ويايه بس مااتذكر شي من اللي كاله الي.