ماجد: حبيبي اخذيه احنه هسه بسفر يجوز تحتاجينه او اني احتاج اتصل بيج كل شي يصير لازم يكون عندج تليفون. هزيت راسي لا. اتذكرت كم مشكله صارت بسبب التليفون. كم مره انضربت. كم مره اتفشل كدام اهله. كم مره رحت للمستسفى من اتزوجته لليوم لو مضروبه لو واكعه. طاحت دموعي ومستحهم بسرعه استحيت الناس تشوفني ابجي. ماجد: خلص من نوصل نحجي هسه بدون بجي ارتاحي. صعدنه بالطياره كعدنه ربطلي الحزام.
بدت الطياره تطير حسيت كلبي يرجف لزمت ايده حيل. ماجد: لتخافين اتنفسي براحه وغمضي عيونج واقري آية الكرسي. شويه ونعست ردت انام بس استحيت منه ظليت اتثاوب اخر شي غفيت بدون ماحس ماحسيت الا هو خله ايده وراي وحضني ارتاحيت خليت راسي على جتفه ونمت وماكعدني الا من وصلنه. طول الوقت جنت محتاره شلون افتح وياه الموضوع واكوله اني حامل بتوأم مو طفل واحد. اولا استحي. ثانيا هسه يكرل ليش ماكلتلهم من البدايه؟
اكيد حيفسرها غير شي. ماجد: ليش متاكلين؟ انت مااكلتي بالطياره اكيد رائد جوعان من الريوك ماماكل شي.. المشكله لو صوتي يساعد جان حجيت بس الكتابه تختلف ماتوصل المشاعر ولانبرة الصوت ولا قوة التعبير بس بعد ماعندي حل ثاني لازم اكول لان الظاهر فعلا مثل ماكالت نجلاء هالسفره راح نتصالح. واني لهسه احس بنفس الالم من اتذكر اللي صار.. يمكن كلبي صار اسود.
يمكن صرت حقوده بس اللي شفته من عداوه من خالته وبناتها وامه واذيه منهم ومنه هو بالذات احس غيرتني هواي وهو أذاني اكثر من الكل جنت اتحمل لخاطره بس هسه لخاطر منو اتحمل اذا هو اللي جنت اخاف عليه هيج سوه بس المصيبه احبه. اتمنيت لو اكدر اخليه يتعذب اكثر بعد ويضوك شويه من عذابي. يتعب بعد اكثر حتى اقبل اسامحه. اريده يعرف انه الانسان مرات لازم يخسر الشي حتى يرجع يحصله بقيمه اكبر. بقيمه مضاعفه. قيمته الحقيقيه.
خلصنه الغدا وصعدنه اني نمت بالغرفه وهو نام بالصاله بس مغفيت بس هو نام. ظليت اروح وارجع مااكدر اكعده واكوله حسيت نفسي ظالمه شلون متحجيتله من الاول صح جنت مقهوره منه ومجروحه حيل بس من حقه يعرف.. اخذت قلمي ودفتري ورحت كعدت مقابيله مديت ايدي ندهته ماكعد. ندهته مره ثانيه ماكعد.
يبست بمكاني من الخوف. اتدنيت يمه اريد اشوف يتنفس لو لا. اشوف صدره يتحرك بس من خوفي مامصدكه عيوني خليت ايدي على صدره فتح عيونه ورفع راسه. ماجد: شبيج؟ هزيت راسي ماكو شي. كعد وكعدني يمه وشكله خاف.. ماجد: وكعتي؟ اتأذيتي؟ البيبي بي شي؟ حلمتي حلم موحلو؟ كلما يكول شي اهز راسي لا. ماجد: وكفتي كلبي شبيج؟ كتبتله: ندهتك وماحسيت وندهتك مره ثانيه وهم ماحسيت. ماجد: اييي؟
استحيت. بعدني مرعوبه من الفكره وهي مجرد فكره شلون لو حقيقه الله لايكولها فعلا اموت. ماجد: خفتي؟ ضحك على كيف لزم ايدي باسها وحضني. ماجد: تخافين علي؟ ماجاوبته جنت مرتاحه لان لامني بحضنه اتمنيت الزمن يوكف وابقى هيج لاعتب لاخوف لاحزن حتى لو كلبي مجروح منه.. تعبت. ماجد: المشكله انت ماتحجين ولاتعاتبين ولاتلومين هذا السكوت والرضى العندج يأذيني اكثر.
شفتي انت هسه شلون خفتي؟ اني جنت خايف عليج اضعاف هالخوف ولهالحظه خجلان من إلى سويته. شلون هيج سويت ماادري. شلون هيج فقدت اعصابي ماادري. من طلعتي حامل اتمنيت اموت ولا يكولون اجهضت شلون اتحمل ذنبج وذنبه واصير اني سبب للمره الثالثه مره اسراء. ومره امي. وانوب اني. كتبتله: المره الرابعه. باوعلي هو كال: لا ( 2 ) والحمدلله الثالثه الله ستر. ذهب: (3 ) مرات اجهاض الثالثه من زلكت ووكعت. ماجد: شوكت؟
وليش سكتي محجيتي شي وماكلتي بوكتها؟ ذهب: مردتك تضوج وتنقهر. ماجد: وهسه؟ ذهب: هسه عادي راحت. مد ايده يلعب بشعري اتذكرت شلون لزمني من شعري بوكتها انعصر كلبي عبالك واحد ثاني مو هو. وخرت ايده. ماجد: ماعندي طريقه اكدر اعبرلج بيها عن اسفي وندمي مااعرف شلون ابينلج هالشي. بس ان شاءالله الايام تبينلج هالشي.
ان شاءالله باجر نروح نسوي الفحوصات لرائد وعكبه اوديج للدكتور على صوتج وراها من نرجع ان شاءالله راح تكون حياتنه مختلفه. ذهب: خايفه؟ ماجد: ليش تخافين ماكو شي ان شاءالله. راح تشوفين شلون باجر من يجي شلون يطلع وكيح ويخبلنه. ابتسمت. كال: بس تره مااقبل ياخذ مكاني عالجربايه لو بالاهتمام تلتهين بي واتركيني ينام بفراشه ومن اكون موجود يروح عد بيبيته حميده اريد انام وارتاح. ذهب: والثاني وين توديه؟
مافهم قصدي كال: منو عبيد؟ لا احتمال للشهر الجاي يجي ابوهم عليهم يرحون يرجعون ميكدرون يظلون اكثر هنا. ذهب: لا اقصد الطفل الثاني. ماجد: منا لحد مايجي الثاني الله كريم هسه بس خل يجي الاول. ذهب: همه يجون سوه همه اثنين مو واحد. باوعلي فتح عيونه كال: لاتكولين اللي فهمته؟ هزيت راسي اي. ضحك حيل وحضني كال: كولي والله توأم؟ ذهب: والله. ماجد: يعني اثنين ولد؟ رائد وعبدالله.
ذهب: لا واحد ولد والثاني ماجان مبين بالسونار. ماجد: ان شاءالله الثاني هم ولد حتى الجبير رائد والزغير عبد الله. ذهب: لا الثاني فضل. باوعلي وابتسم بعدين حضني وخله ايده على بطني. ماجد: رائد وفضل خلص، بس ليش محد كلي من الاول؟ ذهب: محد يعرف. ماجد: مجنتي ترديني اعرف؟ سكتت لان هاي هي الحقيقه. ماجد: جنتي تنتقمين يعني؟ هزيت راسي لا بس يمكن هيج. ماجد: لعد؟
ذهب: بالبدايه جان موضوع النزف والحمل مهدد ما ردت الالم يكون مضاعف. وبعدين، ماردتك تعرف حتى بلكي تقبل ترجعني. ماجد: ارجعج وين؟ ذهب: لاهلي. سكت شويه واتنهد. ماجد: ماراح نحجي بعد بهالموضوع المهم هسه احنه سوه وويانه ان شاءالله رائد وفضل ماكو شي اهم.. سكتت وردت اروح للغرفه. ماجد: وين؟ لاترحين اريد اكولج شي..
رجعت كعدت حضني حيل كلي: مااريد زعلج مني يطول اكثر من هيج كافي تره تعبت مااكدر بعد. اشوفهم يمج واني مااكدر حتى احاجيج. اشوفج تضحكين وياهم ولو اجيت رحتي لغرفتج. وحتى الباب تسدينه. اظل طول الليل بقلق كل شويه اجي شوفج نايمه لو كاعده. موجوعه لو هادئه ومرتاحه.. ادري استاهل العقاب بس مو هيج تعاقبيني ذهب. تعبت؟ ماجاوبته. ماجد: تحبيني؟
احبه اموت عليه قبل شويه انشليت بمكاني من ندهته وماجاوب شلون مااحبه، بس ماجاوبته. ماجد: كرهتيني يعني؟ هم ماجاوبته، حسيت رجعت مثل قبل من جان صعب عليه اعبرله عن مشاعري بس بالاول خجل وهسه كرامتي وكبريائي مجروحين منه. رغم ماانكر كرهته حيل من سوه بيه اللي سواه. ماجد: براحتج.. تمنيت يلح اكثر واكوله اي احبك واموت بدونك تمنيت يحضني حيل مثل قبل يكلي راح تحبيني اكيد.
تمنيت يكلي حتى لو متريدني ومتحبني اني اريدج ومااعوفج بس ماكال شي.. رحت دخلت للحمام وسديت الباب وبجيت بس ماحسيت ارتاحيت بالعكس انقبض كلبي، حسيت بعد وراي عذاب وتعب.. غسلت وجهي وطلعت لكيته واكف بالغرفه سويت نفسي رايحه اتمدد عالجربايه لان فعلا تعبت. لزمني من ايدي. ماجد: مو كايلج مو زين البجي بالحمام؟ مااكدر انكر عيوني مبينه والمصيبه دموعي فاضحتني على اقل حرف تنزل. ماجد: لو اعرف الحل لهالبجي شنو؟
اي ميصير هالبجي هذا على كل شي.. هالمره البجي ميفيد ذهب.. هالمره نحجي وبصراحه لان كل حياتنه الجايه تعتمد على هالموضوع اذا تحبيني ذهب كولي لان مراح اسألج بعد واذا كرهتيني ومتحبيني، هم كولي حتى ارجعج. مو تردين ترجعين؟ مااكدر اضغط عليج اكثر ومااكدر اغصبج تبقين عندي. اني هم كرامتي متسملحي ابقيج وانت مترديني. حتى لو اني اريدج. وانت اكثر وحده تعرفين اني مااحب اخذ شي غصب.
ماجد: الله لايحرمني منكم. يالله هسه ارتاحي ونامي تعبتي اليوم ولاتخافين اني يمج. عافني ورجع نام بره بالصاله استغربت بس سكتت. ثاني يوم رحنه للمستشفى اني خفت حسيت بمغص وكلبي ظل يدك لزمت ايده التفت باوعلي كال: خفتي؟ تره فحوصات عاديه متخوف وان شاءالله ماكو شي. سوينه الفحص ماجد دخل وياي والدكتور يشرحلنه ويسمعنه النبض اني ساكته بس ماجد فرحان من سمع النبض دمعت عيونه.
الحمدلله الفحوصات زينه ماكو شي يخوف وكل شي تمام فرحت حيل الحمدلله والشكر وماجد كال مدام كل شي تمام لو رجعنه ان شاءالله يذبح عجل لوجه الله على سلامتهم وسلامتي لان اني هم سوولي كل الفحوصات حتى يطمئن ماجد وتأكدنه الثاني ولد. راد يروح يفحص كلبه كلي: انتظري هنا ارتاحي واني اخلص واجيلج. لزمت ايده مثل الجهال الزغار. ماجد: يعني الله انطاني اطفال ( 2 ) ووياهم انت الطفل الثالث، ذهب: لاتشلع كلبي.
ماجد: خلص خلص يالله امشي. دخلنه وسووله ايكو وبده الدكتور يحجي ويشرح اخر شي كال: حالتك ماتتحمل بعد تأخير ولازم عمليه باقرب وقت. واذا كل شي تمام نسوي العمليه بعد ( 3 ) ايام. بس ماقبل ماجد كال: لازم ارجع للعراق ارتب وضعي وارجع زوجتي وبعدين ارجع. المهم حددوا موعد للعمليه بعد اسبوعين. اني اتخبلت من الخوف. ماجد: مادام خلصنه من وكت شرايج نروح فد مره للدكتور علمود يشوف صوتج وحنجرتج؟
اني مااحجي الف فكره اجت ابالي. ماجد: ليش خايفه بعدنه ماسوينه شي؟ ذهب: مااروح ابقى وياك. ماجد: وين؟ تبقين شتسوين؟ انت اصلا ينرادلج احد يهتم بيج ويداريج. ذهب: كتلك مااروح. ماجد: صار. صار. هسه خل نروح للدكتور ونخلص وحتى نلحك نرجع لاهلنه ارتب وضعي ولازم احد من الولد يجي ويانه. رحنه للدكتور كال التهاب حاد ومجرد علاج بسيط والابتعاد عن المقليات والدهون لمدة شهر وعادي خلال هالشهر اكدر احجي بدون صياح وعصبيه.
ثاني يوم رجعنه للعراق طلعنه من المطار لكينه ستار ابن ابو جبار ينتظرنه بره حتى يوصلنه للبيت. بالطريق ماجد كل لستار: اطلع منا. غير طريقه باتجاه بيت اهلي استغربت وبنفس الوقت فرحت لان راح نمر على اهلي بطريقنه ونسلم عليهم مشتاقتلهم. اني وابوي اتفاجأوا بينه محد متوقع نرجع بسرعه وماجد حجالهم اللي صار فرحوا حيل بموضوع التوأم بس راسأ اتغير الوضع من سمعوا بعملية ماجد.
ماجد: هالفتره ذهب راح تبقى يمكم خل ترتاح هنا لحد مااروح اسوي العمليه وارجع ان شاءالله. وبعدين يصير خير. اني انصدمت ظليت اباوعله اتصورته يتشاقه بس طلع راح نزل جنطتي ودخلها وباسني ودار سلم على بابا وماما ووصاهم علي. ذهب: اوكف. وين؟ ماجد: اروح. بعد انت هم ارتاحي ونامي وبالليل اتصل بيج ان شاءالله. تليفونج بالجنطه. لزمته من ايده. ذهب: متروح وتخليني. كتلك اروح وياك. مو كتلي صار؟ ماتخليني وتروح.
بابا اشر لماما طلعوا وسدوا الباب. ماجد: حبيبي مااكدر اخذج وياي اني راح اسوي عمليه فوق الكبرى احتاج رجال وياي يكومني يكعدني ويداريني انت شتسوين وياي؟ وانت هم تحتاجين احد يكون وياج ( 24 ) ساعه يراقبج ويهتم بيج اذا اجيتي راح يظل بالي مشغول عليج مراح ارتاح. بجيت حضنته وجلبت بقميصه. ذهب: مااكدر مااتحمل ابقى هنا اموت من التفكير. ماجد: مايحتاج تفكرين عمليه سهله ان شاءالله. ذهب: سهله؟ نسبة نجاحها 30% سهله؟
توه تكول عمليه فوق الكبرى. لبست حجابي ووكفت ولزمت ايده كتله: ماابقى هنا ماابقى.. ماجد: ليش تسوين هيج؟ انت مو جنتي تردين ترجعين لاهلج؟ بجيت انقهرت من حجايته عبالك يريد حجه. ذهب: ليش هسه؟ ليش مو من قبل؟ اشمعنه هسه كل كلمه كلت تردين ترجعين لاهلج؟
ماجد: انت عبالج اني اريدج تبقين؟ تره غصباً عني. بس مااريدج تبقين وياي وانت مترديني. سألتج اكثر من مره وماجاوبتي. واني رجال ذهب. اريد زوجتي تحبني مثل مااحبها وتبادلني نفس المشاعر ماريد شي بالغصب وانت تعرفيني. ذهب: لا. انت تنتقم مني هسه؟ تحاسبني على كلمه حجيتها من القهر البيه من وجع كلبي حجيتها؟
بقيت صافنه وراه عالباب ممستوعبه عافني وراح! شويه وانفتح الباب ودخل رجع، كعد يمي. باوعلي واني ابجي كلي: كافي بجي. يالله.. كومي.. خل نروح مو طلعتي تحبيني شمنتظره بعد؟ ماعندي مره تبات بغير بيتي. حضنته ماصدكت رجع ماانطاه كلبه يروح ويخليني. ماجد: يالله كومي كافي بجي راح تموتيني ناقص عمر من وره هالبجي. ذهب: اسم الله عليك يومي قبل يومك ان شاءالله.
ماجد: لا اسم الله لاتكولين هيج انقهر ومو زين علي القهر تره هههه يالله كومي لا اروح اتهور واسوي شي هنا بعدين وابوج وامج يشوفوني فشله عيب ههههه.. رحنه لبيتنه حجينالهم إلى صار بس ماجد ماكللهم على موضوع التوأم. فكرت لازم اكون قويه كدامه مااريده يضوج ويفكر ويشيل همي بهالفتره مااريده يروح مقهور اذا الله ماكاتبله عمر بعد العمليه الله لايكولها اني انتهي بس لازم اخلي مرتاح هالاسبوعين عالاقل..
ماجد: ليش ضايجه كلها يومين واروح اسوي العمليه ان شاءالله وارجع وتملين مني لان من ارجع لازم ابقى بالبيت شهر ارتاح. بس راح اشتاقلج حيل.. ذهب: اروح وياك الله يخليك اروح وياك. اتنهد كال: رجعنه لهالسالفه نفسها مو كتلج ميصير حبيبي ماارتاح واظل بقلق عليكم اذا اجيتي. ذهب: واني اموت اذا ابقى هنا اموت مااتحمل مجرد فكرة انت وحدك هناك تسوي عمليه احس كلبي يريد ينفجر شلون اكدر اتحمل ابقى.
اندك الباب دخلت عمه حميده. ذهب: يمه انت كليله. يمه انت اقنعيه مااكدر ابقى هنا وهو يروح وحده اموت والله اموت مااتحمل. عمه حميده: الله يلوم إلى يلومج يايمه بس انت هنا يمي احسن جوه عيني اداريج واراعيج هناك تعب وبدل مانكون بواحد نظل نفكر بيكم اثنينكم ونقلق اكثر. بجيت هو ضاج نزل صعدت نجلاء الظاهر هو كللها. كعدت يمي تسكت بيه وتواسيني. نجلاء: ميخالف حبيبتي اتحملي كلها اسبوعين ان شاءالله ويرجع.
ذهب: واذا مرجع؟ واذا مرجع شلون بيه شسوي؟ اموت اموت ياربي. نجلاء: اسم الله. ذكري الله ليش هالتشاؤم والخوف. بقت يمي نجلاء لحدما غفيت. حسيت بعدين بدفوا جسمه حضني دفيت وحضنته. الفجر كعدنه للصلاة وبعدين كلي: ادعيلي حتى ارجعلج. بس بدون بجي. اتنهدت كلبي يوجعني من كدما مختنكه منين اجيب طاقه اتحمل بدون بجي. بعدين كال: اكو شغله الج عندي هاذي بيني وبينج محد يعرف بيها.
طلع اوراق من جنطته مال اللابتوب كال: هاي اوراق طابو مال بيت عندي حولته بأسمج انت انطيتيني فلوسج اللي مجمعتها وهسه ماكو وقت ارجعهم هذا البيت تعويض هو زغير مو جبير يعني وهو هم بالنهايه بعد عمر طويل لرائد وفضل، وهذا البيت هم بيتي مو بيت الحجي الله يرحمه بيت الحجي تركناه من اتوفى رائد علمود امي تنسى شويه واجرناه واشتريت اني هذا البيت يعني هم الج ولرائد وفضل حصه بي وكل شي الج والهم بي حصه..
ظليت اباوعله مابجيت لزمت نفسي لدرجة حسيت كلبي راح يوكف. ماجد: حبيبي هاي الاوراق تضميها عندج او عند ابوج كيفج بعد. زين؟ ذهب: انت تريد تموتني من القهر؟ ماجد: اسم الله عليج بس هذا حق ووصيه حرام علي حتى تبريني الذمه. ذهب: يعني تركتوا ذاك البيت علمود امك متتذكر اخوك الله يرحمه.
بعد مكدرت احجي حسيت دخت وصارت الدنيا ظلمه انخفض ضغطي مديت ايدي هو لزمني عرفني دخت رجعني ليوره عالجرابايه ورفع رجليه. ماجد: اششش اشش كافي. هسه بعد ولاكلمه نامي. خليت راسي بحضنه وغمضت افكر بحظي من بلوه لبلوه من اتزوجته لليوم ماارتاحيت. شميت عطره ريحته..
اتمنيت لو واحد يكدر يحتفظ بريحة اللي يحبهم ياريت لو تتعبه روايحهم الطيبه وكلما اشتاقينالهم شميناها، ياريت لو اكو دوه يخلينه ننساهم بسرعه بدون وجع من يختفون من حياتنه. ياريت لو اصواتهم مثل حبة العلاج شوكت ماردنه نسمع صوتهم اخذنه حبه نبرد بيها نار الشوك والوحشه.. حسيت بديت اغفه هو ساكت بس اسمع صوت انفاسه كتله: اريد انام. باس راسي كلي: نامي اني يمج. ذهب: لاتعوفني ماجد. ماجد: مااعوفج نامي، راح ابقى يمج.
نمت غفيت بس كل شويه اكعد اشوفه بعده يمي لو لا عبالك اذا نمت راح يختفي. سمعت صوت الاذان فتحت عيوني باوعتله نايم حبيبي ربي لاتحرمني منه. باوعت للساعه( ١٢) الظهر ومحد مكعدنه يمكن لان بس اليوم هو موجود باجر يسافر ياريت مايجي باجر. بسته من خده وحضنته انتبه وكعد. ماجد: حبيبي كعدتي؟ بعد وكت. ذهب: الساعه ( 12 ) اذن الظهر. ماجد: لا والله معقوله؟ ذهب: يمكن خلونه نايمين لان انت باجر تسافر.
ماجد: يعني خلوني براحتي ويه مرتي. ابتسمت غصب وهزيت راسي اي. ماجد: زين مادام هيج لازم استغل الفرصه قبل ميغيرون رأيهم. حضنته وبسته كال: تره هاي اني افهمها دعوه مفتوحه. ضحكت كتله: شدعوه انت محتاج دعوات. ماجد: شكد احبج من تكونين مستسلمه. بيومها من بعد الغدا اجو ماما وبابا سلموا على ماجد وراهم اجو بيت عمه ابو علي الولد والبنات وازواجهم. وبالليل اجو بيت عمه ابو عبدالله حتى خالته اجت واتفاجأت من شافت بطني.
خالته: حامل؟ واني اكول شبيج متغيره وصايره سمينه هاي بعدج حامل وهيج شلون لو جبتي؟ نجلاء: علواه تسمن بعد ياريت لو كل اللي يسمنون يصيرون بحلاتها اللهم صل على محمد وال محمد عيني بارده عليها اني مشايفة وحده من تحمل تصير هيج حلوه. خالته: اخذتي سونار ولد لو بنيه؟ نجلاء: لا ماجد ميقبل ميريد يعرف ولد لو بنيه يكول كله خير من الله.
خالته: اي حقه هو بيا حال هسه ويفكر بالجهال من اتزوج لهسه ماارتاح خلصها ضيم وقهر عبالنه يتزوج يرتاح. انغثيت من حجيها حيل حسيت راح اكوم اطلع قهر كلبي كله بيها اذا حجت بعد. دخل ماجد يمنه كعد يمي وخله ايده على جتفي خالته تباوع. امه هالايام الله هاديها عاقده هدنة سلام وياي لخاطر ماجد اكيد مالها خلك هذا ابنها الوحيد الله يساعدها اذا اني زوجته اريد اموت شلون هي امه. ماجد: ها خاله شفتي ذهب حامل؟
خالته: فكر بصحتك خاله محد يفيدك لامره ولا جهال.. ماجد: شلون همه راس المال شعندي غير امي وهمه الله لايحرمني منهم. خالته: خاله انت بيا حال زوجناك عبالنه ترتاح انوب انشلع كلبك ماشفت يوم بي خير.
ماجد: مابيه شي الحمدلله البيه مو جديد من زماان بس اني اهملت نفسي هسه بعد اتزوجت الحمدلله والله رزقني بخوش بنيه بت اوادم وان شاءالله ولي العهد بالطريق بعد شريد اكثر من هيج نعمه من الله هسه لازم اهتم بصحتي لخاطرهم. نجلاء تباوعلي واني اباوعلها عمه حميده يم اخوها بالديوانيه. خالته: انت بس خلص واني ازوجك حوريه من الجنه.. كلت بكلبي شكد حقيره على اساس تريد تقهرني. ماجد: عندي وحده مااريد بعد.
كال هالحجايه وحضني على كيف وباس راسي. نجلاء ضحكت وغمزتلي اني هم على عناد خالته درت بسته من خده كتله: يابعد عمري الله لايحرمني منك. راحوا بيت عمه بعد ماوصاهم على امه وعليه وعلى اللي ابطني. ماجد: نكعد شويه بالمرجوحه؟ فراس: اي والله بس نريد جاي ووياه مقبلات شي كيك. ماجد: اي والله هي مال مقبلات. باوعلي ضحكت وغلست اشرتله اسكت. كعدنه عالمرجوحه اني وماجد فراس ونجلاء كعدوا عالكراسي.
نجلاء: اشمعنه انت ومرتك تكعدون تتمرجحون واحنه لا؟ فراس: اي والله يعني بس انت تحب مرتك تره احنه هم بعدنه عرسان. ماجد: واحنه شكوا بيكم احنه بالنسبه النه عرسان لحد ميجي ولي العهد نتدلل ونتدلع انتوا تغارون كيفكم. نجلاء: اي والله نغار عود اذا صرنه رومانسيين جبنه الجاي والمقبلات على كولت فراس. ماجد: هو اكو احلى من المقبلات بس انتو متفتهمون. ضحكت وسكتت استحيت بس لا ينتبهون على حجيه ويحسون.
ذهب: اكو كيك ومعجنات كل شي اكو هسه اجبيلكم. ردت اكوم مقبلت نجلاء كالت اني اكوم. دنك يم اذني: انت كعدي انت مو تخصصج الكيك والمعجنات انت تخصصج يمي مقبلات وهالسوالف. ضحكت من كل كلبي اريد اسكت مااكدر استحيت من فراس هسه شيكول. ثاني يوم كعدنه الفجر للصلاه وبقيت كاعده اباوعله يجهز جنتطه شال عطره انطانياه كال: خاف تشتاقيلي رشي عالمخده ونامي هههه. ذهب: ماتضحك.. دار حضني كال: شبيج هيج ضايجه عبالك الدنيا انتهت.
ذهب: ياريت بهالبساطه. ياريت بس انت متحس. ماجد: خلص هسه نحجي صدك ديري بالج على نفسج وعلى رائد وفضل ذوله امانتي عندج اريد ارجع الكاهم مثل ماهمه واحسن ان شاءالله. كتله: كول والله ترجع؟ ماجد: استغفر الله. حبيبي شهالحجي ميجوز هيج تكولين حرام كولي ان شاءالله. حضنته كتله: ان شاءالله. ماجد: تليفونج ضبطيه وخلي الشريحه حتى اكدر اتصل بيج باي وقت. وديري بالج على امي وعمتي حميده تره ذوله كلهم امانه بركبتج بغيابي.
انطيته قران زغير وسلسله فضه بيها آية الكرسي كتله: خليهم وياك وين ماتروح. نزلنه كعد هو يم امه اسمعه يوصيها علي وعلى ابنه هي مابجت احسن مني متماسكه باسته ودعتله وكلتله: لاتوصيني حبيبي انت ترجع وتستلم امانتك ان شاءالله. باس ايديها وراسها وحضنها اني دموعي تصب بسكته. سلم على عمه حميده وبوسها ونجلاء بس حضنها بجت وراح للجهال للغرفه نايمين بوس ايديهم وطلع.
وصل يمي حضني وباس راسي اني بجيت حضنته مثل الجهال خله ايده على ظهري. ماجد: يالله ديري بالج على نفسج. هزيت راسي ان شاءالله. ماجد: متوصين على شي؟ متردين شي؟ بجيت بصوت عالي كتله: كلبي اريده منك ماجد مثل مااخذته ترجعه. شهكت بصوت عالي وهو دمعت عيونه حضني كل احنه ظلينه نبجي. ماجد: ان شاءالله بس اذا مااجيت انت تعرفين وصيتي.
ذهب: لاتكول هيج. لاتكول هيج. انت كتلي ارجع. مااعرف شي بعد اذا مااجيت اني هم ماابقى لا توصيني، اذا رجعت كل احنه موجودين بس اذا لا وصيهم همه. حسيت كلبي انشلع بعد مااكدر اضم شي كلبي راح ينفجر باس راسي وخله ايده على بطني كال: هاي امانتي. وطلع..
رواية صبرا يا قلبي الجزء الأول للكاتبة روز الفياض الفصل الرابع والثلاثون
طلع وطلعوا كلهم وراه اني بقيت اباوعله من بعيد لان اذا اتقرب منه مااعوفه. سلم عالكل وراح.. اني كعدت بالمطبخ كلبي خلص من البجي. بقيت صافنه وحاطه ايدي على خدي. بعدين اتذكرت التليفون صعدت جبته وكعدت اضبطه اخاف يتصل بيه.. خلص هاليوم كوه كلهم يمي محد خلاني وحدي بس دموعي اعوذ بالله منها ماتبطل. عمه حميده: ميصير يايمه هالبجي ميجوز ومو زين عليج وعلى ابنج هالطفل خطيه. ظليت منتظرته يتصل مااعرف رقمه هناك.
سافر هو وعبد الله ابن عمه وبقى فراس ويانه بالبيت. بالليل دك رقم دولي عرفته هو. ذهب: الو. ماجد: الو حبيبي شلونج؟ ذهب: هلو حبيبي الحمدلله. انت شلونك؟ ماجد: الحمدلله. شلونهم حبايبي؟ ذهب: زينين الحمدلله. ماجد: فديتهم. اكلي زين لخاطري ونامي زين ولاتبجين كلها جم يوم وتخلص انشاءالله.. ذهب: ان شاءالله. ماجد: باجر الصبح ان شاءالله نروح للمسشتفى حتى نسوي كل الفحوصات المطلوبه وعكبه ان شاءالله العمليه.
ذهب: ان شاءالله. حجينه شويه وسولفلي شويه عالرحله بعدين كال: ذهب؟ ذهب: نعم؟ ماجد: تحبيني..؟ ذهب: انت شتشوف؟ ماجد: معناها اذا صارلي شي مااريدج تتزوجين بعدي. ذهب: اسم الله عليك، من طلعت كتلك اني وياك اذا تروح لو ترجع فلا تعب نفسك وتوصيني على شي. ماجد: هسه صحيح من كلتي اناني صح اناني مااريد احد يخلي ايده عليج غيري ادري حرام علي بس مو بيدي. سكت وبعدين كال: استغفرالله، خلص انسي هالحجي.
واليوم جان شطوله كوه خلص وشيطلع الصبح. ماجد: بس مو اكثر مني، وهسه يطلع الصبح مبقى شي. ذهب: شوكت انكطع كلبي. ماجد: اسم الله على كلبج، شعندج مستعجله تردين الوقت يخلص. انعصر كلبي من حجايته ودمعت عيوني.. ذهب: لا مااريده يخلص اريده يوكف مايتقدم بعد بس للصبح لان الليل وحشه بدونك. حسيته سكت شويه اكيد يفكر مثلي ويمكن بجه.. ماجد: حبايبي شلونهم؟ ذهب: زينين الحمدلله عدهم درس رياضه هسه هههه.
ماجد: هههه حبايبي ربي يحفظهم والله يساعدج. ثاني يوم مااتصل لان التهه يسوي فحصوات علمود العمليه واني ظليت افتر بالبيت كلبي ماكلني.. بالليل نفس الشي نزلت نمت يم عمه حميده حسيت تعبت مانايمه من البارحه بس مااكدر انام ولااغمض عيني فكره تاخذني وفكره تجيبني للصبح. عمه حميده كل شويه تكعد تشوفني كاعده. عمه حميده: نامي ياماما ارتاحي شويه مو زين عليج ولا على ابنج، شنو هذا الطفل لا راحة لا اكل لانوم؟
ذهب: مااكدر عمه كلبي يوجعني. عمه حميده: اسم عليج حبيبتي كومي توضي وصلي وادعيله الله يكومه بالسلامه ويرجعه الكم سالم ان شاءالله. ذهب: يارب.. اتوضيت وصليت صلاة الحاجه وكعدت انتظر الاذان احس الساعه سنه كوه تمشي الدقيقه. كتبتله عالواتساب: (وعلى نياتكم ترزقون فتخيل حجم نقائي الذي جاء بك الي). ماجاوب يمكن نايم حبيبي نوم العوافي.. صليت الفجر وطلعت بالحديقه كشفت راسي ودعيتله.
عمه حميده هي والعلويه كعدوا للصلاة وراها اتريكنه وكعدنه بالمطيخ ساكتين محد يحجي كل وحده تفكر بحدها بس اكيد بنفس الموضوع.. ام ماجد: عيونج منفوخه مانمتي صار ليلتين حرام عليج هالطفل. عمه حميده: لحد ميرجع انت راح تعمين من البجي.. ام ماجد: كومي خالة كومي نامي وارتاحي ساعه ساعتين خليها على الله. ذهب: ونعم بالله بس مااكدر انام والله. مو بيدي النوم طاير من عيني.
عمه حميده: علي نذر ان شاءالله من يرجع سالم اذبح عجل لوجه الله ذكروني خاف انسى. ذهب: هو هم سوده عليه جان ناذر من تطلع نتائج الطفل زينه هم يذبح عجل. ام ماجد: اي وصى عمه يجيبه ويذبحه ان شاءالله. ذهب: ان شاءالله. عمه حميده: دروحي يايمه اتمددي شويه بالغرفه لاتنامين بس اتمددي خلي جسمج شويه يرتاح هذا السهر مو زين عليج. ذهب: ان شاءالله. رحت لغرفتها واتمددت وخليت التليفون يمي بلكي يتصل بس ماكو.
وره فتره سمعت صوت مسج فتحته لكيته دازلي: (انت بالنسبه إلى احلى نعمه واحلى رزق الله رزقنايه الله لايحرمني منج ومن دعائج ولامن رائد وفضل). بجيت ومسحت دموعي خاف تشوفني عمه حميده وتعصب. ظليت متمدده بالفراش بلكي يتصل كلهم كعدوا.. احس الوقت مايمشي واني منتظره بالغرفه ويمي التليفون اتصلت على بابا كتله خل يدعوله هو وماما.
واتذكرت فاطمه والشله صار اكثر من شهرين ونص محاجية وياهم ولااعرف اخبارهم ولا إلى خلك احجي ويه اي احد بس لازم اكللهم يدعوله دزيتلهم كلهم مسجات كتلهم: هلو بنات هذا رقمي الجديد ذهب اريد خدمه مستعجله منكم تدعون لماجد عنده عمليه خطره بالقلب اليوم الله يخليكم وبعدين نتواصل ونحجي). البنات كلهم ماقصروا وماسألوني عن شي صارت الساعه ( 10 )وماكو شي.
بجيت حيل وبجوا ويايه رغم ميسمعون شيكول. ذهب: اسم على كلبك ياريت اني ولا انت. ماجد: لتكولين هيج. ذهب: حبيبي مو تتأخر، انتظرك. شهكت حيل هو سكت حسيته بجه. ماجد: ان شاءالله مااتأخر.. ذهب: ترجع مو؟ ترجع؟ ماجد: ان شاءالله بس لاتبجين. ذهب: ان شاءالله خلص ماراح ابجي. ماابجي. ماجد: يالله حبيبي ديري بالج على نفسج وعلى حبايبي وسلمي عالجميع. ذهب: ان شاءالله، لااله الا الله. ماجد: محمد رسول الله.
ذهب: مع السلامه. الله وياك. امانة الله ومحمد وعلي. ماجد: مع السلامه. سد التليفون واني بجيت لحد ما دخت وحسيت دموعي نشفت بعد. ظليت مثل اللي عدها ولاده اروح وارجع وره تقريبا ساعتين دك تليفوني (انطيني وعد للموت.. رديت ركض: الو الو الو.؟ ماكو جواب سديته وخليته عالشحن وكعدت انتظر. فراس اتصل على عبدالله سأله عبد الله كال دخلوه للعمليات قبل ساعه بس العمليه تطول تقريبا ( ٤ ) ساعات.
وره ساعه دك تليفوني هو (انطيتي وعد للموت. رديت: الو حبيبي الو ماجد؟ ماكو جواب. فراس: يمكن تليفونه عد عبد الله ومن يكعد لو يضغط عليه بدون ميدري يدك عليج لان هو بالعمليات هسه. نجلاء: اي يمكن اتصل بي وكله. تره وكف كلبنه البنيه راح تجيب من وراه كل شويه يدك عليها. اتصل فراس بعبدالله وكله. عبدالله اتعجب كال تليفونه بقى بالفندق بالسيفتي ويه الجوازات والفلوس ومقفوله.
اني هنا باد حيلي متت من الرعب كلت مات ماكو تفسير ثاني ويريدني احس بي. نزلت كعدت بالكاع خفت ادوخ واوكع حيل من مكاني رجع التليفون دك هو رقمه بجيت حيل وظليت اصرخ: ياربي شلعت كلبي ياربي متت مااكدر اتحمل بعد. ابجي وهم يبجون ويايه يسكتون بيه. جابتلي نجلاء عصير شربت شويه وماكدرت اكمله. بعدين حطت راسي بحضنها وسوتلي كمادات دافيه شويه خلتهم على عيوني بلكي انام. عمه حميده وامه كاعدين يقرون قران ويدعون.
صارت الساعه (ب4ونص) تقريبا اتصل عبد الله على فراس وفراس راح طلع بره مارد عليه كدامنه. اني من شفته طلع بره انشليت كلت مات وميريد يحجي كدامي ردت اطلع وراه ماكدرت اكوم رجليه ظلت ترجف وباد حيلي ظليت ازحف على ركبي ونجلاء تصيح وراي وعمه حميده ركضت وراي سحبتني وكعدتني بمكاني وظلت تبجي. دخل فراس كال: الحمدلله.. العمليه نجحت وكل شي تمام وتوهم مطلعينه من العمليات للعنايه.
تحميل محتوى الموضوع
عرض نسخة صالحة للطباعة
أرسل هذا الموضوع إلى صديق
[31]
الدعوات : 2قوة السمعة : 10
رواية صبرا يا قلبي