رواية صبرا يا قلبي

رواية صبرا يا قلبي الجزء الأول للكاتبة روز الفياض الفصل الخامس

خاطري
الكلش عزيز بضحكه منك ينجبر.

باوعولي بابا كال:
فوتي حبيبتي.
ذهب:
لااا.
طلعت مسلمت على السيد ظل يباوعلي.

رحت لغرفتي وسديت الباب باوعت على روحي بالمرايه عيوني مورمه وحمره وبجامتي تضحك بيضا وبيها ارانب ملونه فشله شلون دخلت عليه بهالوجه وهالبجامه عبالك مال اطفال طلعت بنطرون جينز وتيشيرت ابيض وهم مرسوم عليه ارنب جبير وكحلت عيوني من بره حتى اخفي الانتفاخ ورشيت عطر وكعدت عالجربايه مالي خلك روحي وبدت الدموع وحده وره الثانيه تنزل حجيت ويه نفسي كلت:.

خلص انتي لازم تتقبلين الواقع انتي هسه متزوجه ومسؤوله من رجال ثاني غير ابوج والله يعلم شلون راح يطلع زين مو زين انتي وحظج وعاد شلون حظ عليج.
ماما فتحت الباب:
خطيبج يصيحج. ابتسمي ياماما وكافي بجي شوفي عيونج شلون كدما بجيتي البارحه.
حبيبتي هاذي مو نهاية الحياة عيشي واتونسي واتعرفي على خطيبج يمكن يطلع احسن مما تتمنين.
ذهب:
لخاطر الله لتكولين خطيبج.
ماما:
لعد شكول لو خطيبج لو زوجج انت اختاري؟

باوعتلها مالي خلك احجي واشرح مشاعري واخاف احجي حجي اجرح مشاعرهم بي لان مستغربه شلون بابا سوه هيج بيه يعني عبالك بزمن جدي قبل من جانوا البنات ميشوفون ازواجها الا بليلة العرس وهي وحظها بعد حلو مو حلو بي خير مابي خير احس نفسي مثلهم وكله كوم و لازم نعقد محكمه كوم ثاني ليش هالسرعه والاستعجال غير اعرفه اول وبعدين بالله محبيته مكدرت ابلعه اني من الاول من جنت اشوفه بالكليه شلون يباوعلي اضوج مو بعد هسه كل كلمه وكال انتي زوجتي حلالي.

ماما:
يالله حبيبتي مسحي دموعج وطلعي للولد فشله شيكول علينه لاتحرجينه وياه تره سوه اللي محد يسويه.
حجايتها هاي موتتني شنو سوه اللي محد يسويه شنو يعني قابل ستر عليه شمسويه اني شبيهم اهلي هيج يحجون مجنت متصورتهم هيج يفكرون.
كمت مسحت دموعي ودخلت للديوانيه سلمت بصوت ناصي ورحت كعدت باخر الصاله واحسه هو يراقبني ويباوعلي.

رد السلام هو وبابا وبقوا يسولفون عن الشغل والدوام واللي صار البارحه بس اني بالي مو يمهم احس مخنوكه ونفس الفكره ابالي معقوله هذا حلم؟
يعني هالقصص جنت اشوفها بالافلام والمسلسلات معقوله تصير ويايه؟
صاحلي بابا:
تعالي هنا بابا كعدي يم زوجج حتى تشوفين الحلقات.

كمت وكعدت وره بابا ميشوفني وبكلبي اكول جنها صارت صدك بس هذا الوضع مو طبيعي لو هذا مريض نفسي لو اني اتخبلت شنو شفتج وحبيتج وراقبتج وسألت عنج احس نفسي ببرنامج الكاميرا الخفيه.
اذا هو سراج الحقير اللي المفروض جان اليوم خطيبي مسوه هيج واهتم هيج وهذا احسه ممصدك من الفرحه وعايش الدور ومستمتع والله جنه مخبل هو هذا حظي اني.
ذهب؟
سمعت صوته حاجاني مديت راسي من وره بابا فكلي:.

هاذي الحلقات اختاري اللي يعجبج وخلي خاله هم تنطيج رأيها.
مد ايده انطاني علبه جبيره كلها حلقات بابا راح صاح لماما واجت سلمت عليه وكعدت يمي تشوف الحلقات وبابا طلع بره الصاله يخابر بقت ماما تكلب بالحلقات وتختار واني اباوع مو مستوعبه تطور الامور فاختارت هي كم وحده كلتلي:
ذولي احلى شي جربيهم وشوفي منو احلى على ايدج.

اخذتهم بدون كلام وبديت اقيسهم على ايدي وايديه ترجف لان هو يباوعلي وكلما البس وحده يكلي حلوه المهم ماما اختارت وحده فكتله:
خلص اللي اختارتها ماما.
السيد:
اكيد؟
هزيت راسي اي.
السيد:
يعني معجبج شي ثاني؟
ذهب:
كلهم حلوات بس هاي انزك ومناسبه.
السيد:
براحتج اللي يعجبج اني حاضر وممنون لايردج الا لسانج.
ذهب:
شكرا.
ماما طلعت بقينه وحدنه.

ظليت مدنكه وحاطه الكوشايه بحضني حسيته يباوعلي دك تليفونه كطعه وخلاه عالطاوله ودار عليه كلي:
لبسي الحلقه خل اشوفها بأيدج يجوز متعجبني.
اني مثل الصنم لبستها ومديت ايدي من بعيد بسرعه وسحبتها.
ضحك هو كلي:
شنو عندج سباق؟
شفتهمت هم كاعده على بعد شارعين وهم متردين اشوف شدعوه تره مااعض.
متت من الفشله والمستحه وغلست محجيت شي فكلي:
تعالي هنا كعدي قريب يمي حتى اشوفها عدل هههه لتخافين.

ضجت من ضحكته وضجت من نفسي هسه شيكول هاي شبيها مخترعه.
كمت رحت كعدت يمه بس مو كلش قريب ومديت ايدي حتى يشوف الحلقه.
باوعلها كال:
كلش حلوه بس ايدج اللي محليتها.
غلست مرديت هذا ميخجل ماخذته الميانه ولاعبالك البارحه عرفني وعرفته واني مااحب هيج ومااعرف ارد استحي اموت اصلا اذا حسيت احد معجب بيه بالكليه اكرهه يمكن صدك على كولت فطوم اني مو طبيعيه.
السيد:
زين نزعيها.
باوعتله باستغراب:
شانزع؟!
السيد:
الحلقه.

نزعتها مد ايده فتح ايدي واخذها صورها بالتليفون وصور الورقه اللي ملزوكه عليها مال الوزن والتفاصيل بعدين خل تليفونه عالطاوله واتدنه عليه.
اني جفلت وخفت اجه كعد بصفي كلللش حسيت اختنكت من المستحه مد ايده سحب ايدي باسها واني.
ولبسني الحلقه ورجع باس ايدي اني هنا حسيت كلبي مثل الطبل يمكن صوته وصل لسابع جار من الرعب والمستحه اريد ابلع ريكي مااعرف شلون كلي:
مبروك.
جريت ايدي بسرعه ودنكت وكتله بصوت ناصي:.

الله يبارك بحياتك.
اتحرك شويه طلع من جيبه علبه زغيره فتحها طلع منها حلقه رجاليه كلي:
اتفضلي.
باوعتلها كتله:
شنو هاي؟
ضحك كلي:
برغي هههه. هاذي حلقتي مو المفروض انتي تلبسينياها.
ذهب:
هاا. اي.
اخذتها من ايده واشرتله جيب ايدك فحط ايده بايدي راسا حسيت مثل الكهرباء عبالك انتلت فتركت ايده ضحك هو كلي:
على كيفج لتخافين ماانتل بس يمكن لان انتي شابكه الكوشايه بحضنج حيل وهي قديفه ماادري شيصير ههههه.

رجع حط ايده بأيدي ولبسته الحلقه لزم ايدي وباسها كلي:
ماكو مبروك؟
ذهب:
مبروك.
السيد:
الله يبارك بحياتج على كولتج.
مبروك عليه انت. بس عندي سؤال؟
ذهب:
شنو؟
ابتسم ابتسامه عريضه وكلي:
شنو موضوع الارانب؟ وليش حاقده عليهم؟ شمسويلج؟
باوعتله ماافتهمت شي من كلامه ياارانب شنو حاقده عليهم؟
ذهب:
ياارانب؟
ضحك بصوت ناصي حسيت ضحكته حلوه هادئه وصوته هادئ.
السيد:.

الارانب اللي بملابسج البيجامه وهسه هذا المسكين كتله الحر دافنته بالكوشايه.
ضحكت مجنت متوقعه منتبه ولا اني منتبهه اصلا وهو هم ظل يضحك واستحيت وسكتت فكلي:
الحمدلله مابجيتي اول مره تضحكين من لبارحه لليوم كل بجي.
من تضحكين تصيرن احلى.
ابتسممت وسكتت هو ابتسم كلي:
عفيه هيج ظل ضحكي تره من تضوجين تضوجيني.

ضحكت وسكتت هو ضحك ورجعت ضحكت ظليت اضحك واسكت ارجع اتذكر واضحك وهو يضحك رأسا جر الكوشايه مني وباوع للارنب اللي بالتيشيرت وكال:
الف رحمه على والديك من ضحكتها اتحمل الحمسه لخاطري تكسب بيه اجر.
اني متت من الضحك كلت بكلبي هذا صدك طلع مخبل يسويها حظي.
السيد:
يالله اني اروح اتأخرت وعندي شغل هوايه ولازم امر عالمعرض.
كمت اني وكفت بس محجيت شي فكلي:.

باجر عالساعه 8 ان شاءالله امر اخذج وشوف منو يريد يجي ويانه للمحكمه..
واليوم العصر ان شاءالله راح يجون عماتي وبنات عمي يشوفوج ويسلمون عليج ويتعرفون عليج.
البارحه اكلوا راسي شوكت تودينه نشوفها نريد نشوف منو هاذي اللي كدرت تخليك تفكر بالزواج. وامي خطيه البارحه من شافتني ظلت تبجي من الفرحه بس مع الاسف متكدر تجي وياهم تشوفج ان شاءالله اخذج فد يوم تشوفيها.
دار يريد يطلع ورجع التفت كلي:.

اكو شي جدا مهم نسيت اكولج عليه البارحه بس حجيته للوالد من البارحة حتى لتكولين غشني.
ذهب:
شنو؟
باوعلي واشر على كلبه:
تره اني عندي فتحه بالقلب.
اتفاجأت وانقهرت عليه بس ماادري يعني شنو المفروض اكول:
ما على كلبك شر..
ابتسم كال:
مااموت هسه لتخافين ههه بس لازم تعرفين حقج مابني على باطل فهو باطل واني جنت واضح وصادق بكل شي وياكم الله شاهد ماعندي نية سوء.
ذهب:
الله كريم متشوف شر ان شاءالله.
السيد:
يعني مضجتي؟
ذهب:.

ليش اضوج هالمواضيع بيد الله وكلشي يصير بي صالح.
السيد:
ونعمه بالله كلامج فرحني.
باس راسي وكال:
لتطلعين بالحديقه بهذا اللبس وباجر على موعدنه ان شاءالله. يالله مع السلامه.
ذهب:
مع السلامه.
طلع وسمعت صوته يحجي ويه ابوي بره سلم عليه وراح.
دخلت جوه شفت ماما واكفه بالمطبخ صاحتلي وابتسمت:
صوت ضحكم جان واصل لهنا.
استحيت كتلها:
هو يضحك على بجامتي ام الارانب مسوي دمه خفيف.
ضحكت كلتلي:
بالله ايدج خل اشوف الحلقه؟

مديت ايدي كالت:
كلش حلوه موفقه حبيبتي ان شاءالله كل السعاده بوستني.
ذهب:
العصر يجون عماته وخالته وبنات عمه حتى يشوفونه ويتعرفون علينه.
ماما:
هلا بيهم كل شي موجود بس نخلص تنظيف وجهزي نفسج.

رحت لغرفتي نزعت ملابسي والحلقه خليتها بالكنتور ورجعت لبست بجامتي ام الارانب وضحكت بعدين اتذكرت تلفوني طفيته البارحه اخذته فتحته وخليته عالشحن راسا ظل يدك مسجات واتساب فتحته لكيت الرقم الغريب داز كومه مسجات قصائد واغاني وصور ورد كلت هذا مصخها خل اسويله حضر كافي عاد وحضرته بس فتحت المقاطع الصوتيه اول واحد جان اغنية حسين الجسمي(ياحبي لك).
والثاني شيرين (حبيتوا بيني وبين نفسي).

والثالث اغنية ماجد المهندس(انت نبض كلبي).
العصر كمت سبحت وخليت شعري مفتوح شعري ناعم حيل ميحتاج سشوار وبي لون شقار خفيف ولبست فستان قصير جوه الركبه كله صاير عباره عن قوس قزح ونص ردن والصدر حفره عاديه وحطيت كحل بسيط فوك عيني لان عيوني زغار بس بيها لون وحمره وردي ولبست سلسلتي الناعمه بيها اسمي طلعت لبست كعب احمر عالي بعدني البسه واندك الجرس طلعت ماما من غرفتها كالت:
اكيد اجوا كومي بالله خل اشوفج.

كمت كلتلي:
تمام خل اروح افتحلهم الباب ابوج طلع.
دخلوا للديوانيه واسمع اصوات هوايه كلها اصوات نسوان الظاهر وصلهم وراح رحت كعدت بالمطبخ حطيت العصير والكيك بالصينيه واجت ماما كلتلي:
عوفيهم طلعي للولد بالحديقه يريدج.
باوعتلها كتلها:
اهووو مااطلع مو الصبح جان هنا وشافني وحجه وياي شيريد هسه؟
كلتلي:
هي هاي احلى ايام عمرج لتخلصيها تعوين اهووو اهوو.

سكتت وطلعت للحديقه شفته واكف يحجي بالتليفون وظهره علي وكفت انتظره يخلص تليفونه.
خلص وخله التليفون بجيبه ودار شافني واكفه كلي:
هاي انتي هنا محسيت بيج.
ذهب:
ماما كلتلي السيد يريدج.
السيد:
ردت اسلم عليج بس لو ادري هيج مكتلها.
رفعت راسي باوعتله شويه ودرت وجهي كتله:
ليش؟
اتدنه يمي كلي:
الصبح شنو كتلج من طلعت؟
مو كتلج لتطلعين للحديقه بهذا اللبس اشو طلعتي هسه بالاضرب منه والشعر مفتوح ومكياج.
ضجت من حجيه كتله:.

انت صحتلي واني اصلا جنت لابسه ومكمله مااكدر انزع والبس شي ثاني واصلا مجنت متوقعه انت حتبقى وياهم عبالي وصلتهم ورحت وماما استعجلتني حتى اطلعلك حتى الحذاء ملحكت البسه عدل وماكو بيوت كدامنه حتى اخاف احد يشوفني بالحديقه.
اتدنه اكثر صار كدامي عبالك ديغطيني كلي:
هو غلطي اني متوقعت هيج طالعه بس المفروض عالاقل تخلين عبايه على راسج اذا مستعجله.

ومنا وهيج ممنوع الطلعه للحديقه بدون حجاب وهالالوان الفاتحه متنلبس بعد كدام احد غيري.
رفعت راسي باوعتله اطول مني استحيت نزلت راسي لزم ايدي وسحبتها ضحك.
السيد:
فوتي جوه كافي وباجر اريد لبس عريض ومااريد الوان فاتحه زين؟
هزيت راسي باس راسي واشري فوتي جوه.
دخلت للبيت وهو راح.
مالكيت ماما بالمطبخ اكيد يمهم بالديوانيه.
دخلت سلمت عليهم واجيت اكعد يم ماما فصاحت وحده:
تعالي تعالي وين كاعده منقبل بهذا السلام.

كمت رحت بوستهم وحده وحده وكل وحده تكول شنو تقربله ومن خلصت صاحتلي نفس المره كلتلي:
يمي يمي تكعدين
رحت كعدت يمها وهي عمته اخت ابوه كل شويه وباستني وتباوعلي وتكول:
اللهم صل على محمد وال محمد شنو هالجمال عيني حقه ابنه اسم على مسمى ماشاءالله تبارك الله.

انطيني ايدج الصبح اجه فرحان يكلي عمه لبسنه الحلقات فدوه لكلبه والله متتصورون شلون فرحان مو ماجد الثكيل العاقل الميحجي واحنه فرحانين اكثر منه الله شاهد جنه ننتظر هذا اليوم وممتوقعين يقبل يتزوج مره ثانيه بس الحمدلله من شافج واقتنع ههههه.

تره العآشك مبينه سوآلفه ب عينه.

رواية صبرا يا قلبي الجزء الأول للكاتبة روز الفياض الفصل السادس

يقول عاشقي؟ ‏
تمسكي في يدي وإياكي إن
تفلتيها فلاحياة لي بدونك أميرتي.

ابتسمت مااعرف شجاوبها.
كالت مرت عمه:
والله البارحه من خابر لعمه وكله هسه تجي اريد اخطب والله مصدكت عبالي يتشاقه لان محد عنده خبر بالموضوع اتفاجأنه والبنات كل شويه وحده تتصل صدك هالحجي ماجد اليوم راح يخطب واكللهم اي يكلولي منو وشلون وليش مكلتولنه حتى نجي اكلهم لحد يسالني شي مااعرف اي شي مثلي مثلكم.

ساعه واشوفهم كلهم اجو كالوا رايحين لبيت عمي نفتهم الموضوع ونعرف شصار اكيد الرياجيل يرجعون هناك كتلهم لعد اخذوني وياكم.
عمته:
اي والله مصدكت من كلولي ظليت اهلهل كلولي البنات عمه على كيفج بعدها الشغله مصارت كتلهم لاصارت مدام راحوا الرياجيل معناها منتهيه وصارت البنيه جنتنه هههه وساعه اركص ساعه اهلهل بس مااكللكم جنه كاعدين على نار لحد مارجعوا وكالوا عالخير اني ناذره مدري كم نذر هههه.

كلهم يضحكون ويسولفون وفرحانين بس وحده ساكته وتباوعلي بيه خالته محجت ولا كلمه بس من يضحكون تبتسم شويه.
حبيتهم كلهم وخصوصا عمته مبين عليها فرحانه خطيه شكد تحبه.
كالوا بنات عمه خل ناخذ صور وياج حتى نراويهم لعمه ام رائد خطيه بس هي بقت مشافتج.
كمت كعدت يمهم وصوروا كم صوره إلى وحدي مره اوكفي مره اكعدي مره وعمته كالت:
اني هم اخذ صوره وياج مو بس همه حتى اوديها لابني.
باوعتلها كتلها:.

شلون يشوفها فستاني قصير وشعري طالع ميجوز.
ضحكت كلتلي:
الحمدلله من الله خلاني عايشه واشوف ماجد عنده زوجه حلوه ومدلله ومتدينه وبصراحه هو مدح باخلاقج لحد ماعجز، بس لتخافين اني ماعندي اولاد ههههه ابني ماجد اني مربيته وهو يكلي يمه حميده هذا اسمي مثل اسمج غريب هههههه.
ظلت تضحك وتنكت وكلهم يضحكون وياها كالوا:
يالله صار المغرب احنه نترخص
ماما كلتلهم يبقون للعشا مقبلوا كالوا العلويه ام رائد بحدها خطيه.

طلعوا للحديقه وطلعت وياهم ماما واني اجيت اطلع واتذكرت كلي متطلعين بدون حجاب او عبايه رحت لبست عباية راس وطلعت وراهم شافوني كلولي:
ها تلبسين عباية راس؟
ذهب:
لا بس السيد ميقبل اطلع بدون حجاب لو عبايه بالحديقه وفستاني قصير.
كالوا:
هاا بدت قوانين ماجد هو غيور حيل على كل بناتنه مو بعد مرته يحقله يغار مرته بعد.

المهم سلموا وراحوا باوعت من فتحه بالباب ردت اشوف منو اجه عليهم ماكو احد بس شفتهم انقسموا كل مجموعه بسياره سيارتين وحده عمته تسوقها والثانيه بت عمه.
بصراحه اتفاجأت من شفت بناتهم يسوقون سياره لان بناتهم من رادوا يطلعون اللي لبست عباية راس واللي لبست عباية جتف فحسيتهم مثل مكال بابا ناس محافظين.
شلون اذا هذا كلي لازم تلبسين عبايه مااعرف البسها وامشي بيها ممتعوده.

بالليل خلصنه عشا وحجينه اني وماما وبابا بكل الاحداث اللي صارت هاليومين صارت الساعه ( ب11 ) رحت اتوضيت ورجعت لغرفتي لان مشتركه بختمه مال القران واصلا ماما وبابا ينامون من وكت.
كعدت وبديت اقرأ وكل شويه تليفوني يدك وينكطع باوعت رقم غريب مارديت بعدين وصل مسج عالواتساب كمت خليته صامت وكملت قراءه بعدين من خلصت كلت خل اخابر لفطوم.
اخذت تليفوني واتمددت على جربايتي فتحت الواتساب كلت بلكي اشوفها موجوده ماكو.

شفت رقم الغريب دازلي مسج(ليش متردين عالتليفون مشغوله؟
لو متردين تحجين ويايه؟ )
شفته متصل دز مسج ثاني:
(الصوره كلللش حلوه)
صفنت اكول ياصوره؟
اتصورت صورة البروفايل مال الواتساب(ولسوف يعطيك ربك فترضى).
بعدين اتذكرت يمكن هذا السيد!
لان عمته كالت تريد الصوره اللي صورناها اني وياها حتى تنطيهيا.
شكد عيب هسه كاعد ويباوع بصورتي.
رجع دك ماشلته كلت خل اتأكد فكتبتله:
(منو؟ ).
رد عليه:
ماجد
ذهب:.

آسفه مااعرف رقمك وماارد عالارقام الغريبه.
السيد:
ادري لذلك خفت لترحين تسويلي حظر هذا رقمي اللي استخدمه للشغل حفظي يمج بس لتتصلين عليه بس عالثاني ذاك الخط العائلي.
ذهب:
ان شاءالله هسه احفظه ودزلي الثاني حتى اعرفه واحفظه بالجهاز.
السيد:
الثاني عندج بس رفعي الحظر.
انصدمت يعني هو هذا اللي يدزلي مسجات واغاني صار يومين! زين والارقام اللي قبله منو؟
ذهب:
يعني انت اللي صار يومين تدز مسجات؟
السيد:.

وقصائد نزار قباني والاغاني.
حسيت انحرجت مااعرف شجاوبه.
السيد:
هسه؟ اكدر اتصل؟
ذهب:
لا.
السيد:
ليش؟ اكو احد يمج لو نعستي؟
ذهب:
لا محد يمي اني بغرفتي ومو نعسانه بس مااعرف احجي بالتليفون.
السيد:
ويه كل الناس لو بس ويايه؟
احتاريت شرد عليه اني فعلا عكس الناس استحي احجي بالتلفون ماادري ليش.
السيد:
الظاهر بس ويايه بس لشوكت؟
ذهب:
لا والله مو بس انت ويه الكل استحي الكتابه احسن.
السيد:.

هههه شكلي راح اتعب وياج اذا من كل شي تستحين.
ذهب:
مو كيفي هذا طبعي اني حتى بالكليه خجوله مااحجي ويه ايا كان بس اللي ارتاحلهم.
السيد:
اعرف وهذا الشي اللي خله اعجابي بيج يزيد، شلون جان اللقاء ويه الاهل اليوم؟
ذهب:
تمام.
السيد:
رجعت من الشركه لكيتهم هنا جانوا فرحانين كلهم انعجبوا بيج وحبوج وخصوصا امي حميده.
ذهب:
اني هم والله حبيتهم وخصوصا عمه حميده تجنن.
السيد:.

ياسبحان الله شفتيهم ساعه حبيتهم واني ( 70 ) مره اجيتكم محبيتيني ههه.
غلست بالبدايه بس كلت لازم احجي واخليه بالصوره فكتبتله:
هذا الموضوع يحتاج وقت لازم تصبر عليه اني مو متعوده احجي ويه ولد بهيج مواضيع وبهيج صيغه لتتوقع مني هالشي هسه احتاج وقت حتى اتعود عليك.
السيد:
فاهم وتأكدي عندي استعداد اصبر بعد لحد متحبيني ومتأكد راح تحبيني واتمنى دائما تكونين صريحه ويايه ومتضمين عني شي مثل مااني صريح وياج.
ذهب:.

ان شاءالله
السيد:
باجر الاثنين ان شاءالله الاربعاء اني اسافر.
اني نزيت كلت شنو يسافر هو مو يعرف خطوبتي من صاحبه الحقير خربت لهالسبب!
شنو يريد باجر نعقد حتى يجبرني اسافر وياه؟
ماكتبتله شي بس ظليت افكر كل ثانيه تخطر ابالي فكره شكل وكلها تخوف.
السيد:
نعستي؟
ذهب:
لا بس افكر.
السيد: بشنو؟
ذهب:
وين تسافر؟
السيد:.

تركيا عندي اجتماع ويه شركه تركيه وراح نروح اني وعبدالله ابن عمي وزوجته لان هم عدهم مراجعة طبيب بالنسبه اليه اني مراح اتأخر اذا خلصت شغلي الجمعه ارجع ان شاءالله وهمه براحتهم.
ذهب:
الله كريم تروح وترجع بالسلامه ان شاءالله.
السيد:
الله يسلمج.
يالله حبيبي روحي نامي مااريد اسهرج باجر لازم تكعدين من وكت لان ( ب8 ) اني واكف يم بابكم هههه.
يبووي هذا توه كتله اصبر هسه يكلي حبيبي شلون هسه شنو ارد عليه.
ذهب:.

اوكي تصبح على خير.
السيد:
وانتي من اهلي ان شاءالله.
عزاا العزاج ذهب شلون بيج متعرفين تحجين حقها فطوم تكلج عندج مشكله ماعندج كلب اكو وحده خطيبها يكلها وانتي من اهلي وتسكت ويكول حبيبي وانتي تكولين اوكي شنو اوكي، ظليت احجي ويه روحي بصوت عالي
بس المشكله مو بيدي مااعرف شلون اتصرف استحي بصوره مو طبيعيه ومااحس بشي تجاهه والمصيبه مااعرف امثل.
رفعت الحظر عن رقمه الثاني ونمت..

الصبح ماما كعدتني( ب7 ) صليت ولبست بنطرون اسود وستره طويله لونها ازرك جويتي ولبست جواها قميص اسود وحجاب مخطط جويتي وبيجي واسود ومكياج بسيط جدا ولبست الحلقه.
ورحت اكل شي مااحب اتريك بس المشكله اذا مااكل شي ينخفض ضغطي اخذت قطعة كيك وماما صبتلي حليب شويه واندك الجرس.
طلع ابوي فتح الباب ودخل صاحلي كلي:
يالله بابا زوجج ينتظرج.

كمت طلعت شفته هو وبابا واكفين سلمت ورد هو عليه وباوعلي ورجع كمل حجيه ويه بابا ملحكت اسمع شي بس سمعت بابا كله:
اي حقك بس لتتأخرون.
السيد:
ان شاءالله ماكو تأخير.
التفت عليه كلي:
ها جاهزه؟
هزيت راسي اي.
فسلم على بابا وطلعنه وصلت للسياره اجه هو فتحي الباب صعدت وسد الباب ورحنه للمحكمه.
بالطريق شغل اغاني كلب بيهم واختار وحده بس بدت الموسيقى عرفتها اغنيتي المفضله(اضعف كدامك).

سويت نفسي اباوع من الشباك وايديه بحظني مد ايده سحب ايدي وبقى لازمها اني هنا ظليت ارجف حتى هو حس بايدي ترجف التفت عليه كلي:
هلو.
ذهب: هلو.
السيد: ليش ساكته؟
ذهب: شحجي؟
السيد:
لو دتسمعين الاغنيه؟ تره اني مااحب اسمع اغاني ولاعندي وقت بس من عرفتج ظليت اسمع وكل الاغاني اللي راح تسمعيها مني الج.
سحبت ايدي كلي:
بردتي اطفي التكييف؟
ذهب:
لا مو بردانه زين الجو.
السيد:
لعد شبيج ترجفين لو بردانه لو مستحيه لو خايفه؟
ذهب:.

لا والله مو بردانه.
ضحك بصوت عالي وكلي:
معناها مستحيه وخايفه ههههه اثنينهن سوه حرام عليج شمسويلج اني تخافين مني؟
تستحين اوكي حقج هذا طبيعي بس ليش تخافين شنو سامعه عني هههه شكلي راح اصبر هوايه مو؟
سويت نفسي جريئه وشجاعه وكتله:
لا مو لهدرجه يعني اكيد راح اتعود ويصير كل شي طبيعي.
السيد:
اكيد مو لهدرجه؟
خفت كتله:
هااا لا بصراحه مو اكيد.
ضحك بصوت عالي كال:
ميخالف اني قابل.

وصلنه للمحكمه دخلنه اتصل السيد بمحامي هو يعرفه.
وره دقيقتين اجه سلم علينه واخذنه كملنه كل الاجراءات ودخلنه للقاضي وانطانه العقد وطلعنه.
صعدنه بالسياره واول ماصعدنه لزم ايدي وباسها كلي:
هسه انتي مرتي شرعا وقانونا مبروك حبيبي.
كتله:
الله يبارك بحياتك.
ضحك وسكت وكلي:
تره هسه راح نروح لبيتنه انتي اليوم غداج عدنه.
ذهب:
لا مااكدر عيب من بابا ميدري شيكول عني من اول يوم طلعت بدون علمه.
السيد:.

عنده علم اني كتله الصبح من اجيت وافق بس كلي لتتأخرون يعني يريد ارجعج من وكت كتله صار بس جذب اليوم اول مره تجينه لازم تباتين والصبح ارجعج.
اني راسا سحبت ايدي وصحت:
شنووو؟ شنو ابات لاعيني لا رجعني هسه لاهلي.
بضحك كال:
هههههه شكد خوافه هههه اتشاقه وياج انتي كل شي تصدكين؟ هههه.
ذهب:
احلف دتشاقه؟
السيد:.

والله اتشاقه شبيج خفتي هيج تره اني مااجذب وكلمتي وحده وشخصيتي وياج مختلفه عن الباقين يعني يم الكل اني هادئ ومااعبر عن مشاعري بسهوله بس وياج مااعرف شصارلي اتشاقه واسمع اغاني احس نفسي مراهق لاول مره يحب.
غلست شكلهم الولد كلهم هيج ميخجلون ويحجون كل إلى يجي ابالهم.

وصلنه لبيتهم بيتهم ماشاءالله حلو من بره وفخم وكف السياره اكو مثل الكرفان زغير ابابهم طلع منه رجال جبير فتحلنه الباب ودخلنه بالسياره للكراج ونزل السيد اجه الرجال سلم عليه وبوسه وباركله ودنك باوعلي بالسياره وسلم علي وباركلي وراح سد الباب وطلع فتحت الباب اجه السيد كلي يالله نزلت جان اكو رياجيل ( ٢ ) كبار كاعدين على كراسي يضحكون ووياهم جم ولد شاب. كاموا استقبلونه سلموا علي وباركولي.
السيد:.

هذا عمي ابو عبدالله مد ايده سلمت عليه وبست ايده وهو دنك باس راسي.
والثاني جان مبتسم ويضحك كلي:
هلا وكل الهلا بالكيك.
ابتسمت اني وهو اول شي باس السيد وباركله وكله:
لك شنو هاي وين طحت عليها بعلي كيكه وضحكوا كلهم.
استحيت فالسيد كلي:
هذا عمي ابو علي لتستحين منه هو يحب يتشاقه.
رد هو عالسيد:
لاعمي متستحي مني بس انت عوفها خليني اشوف ماعدها اخت خاله عمه تشبها.
كلهم ضحكوا واني هم ابتسمت وكتله:
ماعندي.
كال:.

مو خوش خبر ههههه تره اتشاقه وياج مو تضوجين لو تزعلين مني.
ذهب:
لا مااضوج.
كلي:
مدام هيج تعالي ابوسج باس راسي واني هم بست ايده.
والولد سلموا عليه وباركولي ولد عم السيد وردنه ندخل للبيت بس صاح عمه:
لا اوكفوا اول خل نذبح الذبيحه جوه رجليكم وبعدين فوتوا.
وفعلا جابوا الخروف ودخل واحد من ولد عمه جاب سجينه جبيره وطلعت وراه عمته حميده وزوجة عمه.
كلي السيد:
دوري وجهج لتباوعين خاف تدوخين من تشوفين الدم.

ذبحوه واشتغلت الهلاهل اني بقيت دايره وجهي ومغمضه اخاف اباوع حسيت عمه مسح السجينه بحذائي جلدي قشعر لزمني السيد من ايدي وكلي يالله ندخل.
دخلنه وبقوا عمامه وولدهم بره واستقبلونه بنات عمه بوسوني وباركولي وكل شويه هلهوله.
دخلوني للديوانيه كعدت وهو كعد يمي ولازم ايدي وره شويه كام كال اجيب العلويه تشوفج كتله:
لا اني اروحلها.
اخذني لغرفة امه.

دخلنه اني وياه وورانه عماته وبنات عمه سلم هو واني هم سلمت هي كاعده على كرسي مال عجزه بس بعدها زغيره متوقعتها هيج فدنك باس راسها وايديها وكللها:
هاا علويه هاي جبتلج جنتج.
اني دنكت عليها بست ايدها وراسها وهي لزمت ايدي وحجت بس مفهمت شنو كالت بس بجت بعدين السيد سحبني ومسح دموعها وباس راسها التفتت شفتهم كلهم واكفين ويبجون..

كلهم دخلوا كعدوا يمنه وبدوا يسولفون ويضحكون واني ابتسم بس حسيت اريد ابجي واطلع كل الخنكه البيه انقهرت على امه حيل وعليه هو اكثر خطيه ماعنده احد بس امه ومريضه لاتحجي ولاتمشي اباوعله كاعد بصفها ولازم ايدها وكل شويه يبوسها الله يخليهم لبعض ان شاءالله.
صلينه واتغدينه بس السيد مااتغده ويانه راح يم امه كالوا هو متعود يتغده وياها ويوكلها بيده وينطيها دواها وبعدين يرجع للشغل..

بعدين عمامه وولد عمه اترخصوا كالوا عدهم شغل وزوجة عمه هم راحت وياهم بقت عمته حميده وبنات عمه يساعدون الخدامات عدهم ( 2 )بالبيت.
بقينه اني والسيد كاعدين بحدنه بالديوانيه كل شويه يدك تليفونه.
اني مسويه نفسي اباوع عالتلفزيون وهو يحجي كل شويه بالتليفون اخر شي كلي:
دخت واكيد انتي ضجتي لان وحدج هاي طفيت التليفون بعد محد يزعجنه.

‏كل شَي ويا مُختلف حتَى ضحكتي.

رواية صبرا يا قلبي الجزء الأول للكاتبة روز الفياض الفصل السابع

آريد چفوفكّ السمره تنام بسدَ اصابيعي.

سويت نفسي مندمجه ويه التلفزيون حسيت بي يباوعلي غلست كلي:
البارحه شنو كتلج؟
التفتت عليه بس مباوعتله كتله:
شنو؟
السيد:
مو كتلج هاذي الالوان متلبسيها كدام احد غيري؟
ذهب:
لا كتلي الالوان الفاتحه اني اليوم ملابسه لون فاتح كلهم غوامق ازرك واسود.
السيد:
صح بس طلعت الالوان الغامقه هم حلوه عليج.
غلست وحسيت عركت من كدما استحيت فكلي:
والحل؟
ذهب:
حل شنو؟
السيد:
انتِ.
ذهب:
شبيه؟
السيد:
حلوه حيل.

حسيت وجهي صار طماطية. ودرت وجهي عالجهه الثانيه كتله:
فدوه لتحجي هيج اضوج.
ضحك كال:
وغريبه وغرابتج محليتج اكثر.
ذهب:
شنو الغريب؟
السيد:
مستحاج مو طبيعي.
ذهب:
لاطبيعي وكتلك احتاج وقت حتى اتعود انت بالنسبه إلى رجال غريب صعبه اتصرف واحجي وياك هيجي.
السيد:
مو هذا قصدي قصدي اول مره اشوف وحده من تخجل يصير وجها احمر هيج.
مجاوبته فكلي:
الجماعه راحوا ليش متنزعين حجابج بس البنات موجودات نزعيه وارتاحي منه.

نزعت حجابي وعدلت شعري بيدي وهو يباوعلي فكتله:
لتباوعلي هيج.
ابتسم ومسح وجه بيده ورجع ليوره وكلي:
هم بس بالعيون وهم متقبلين حرام عليج بعدين حلالي.
رفعتي الحظر عن رقمي الثاني مو؟
هزيت راسي وكتله:
اممم.
السيد:
اتصلي علي بالله خل اشوف.
ذهب:
رفعته.
السيد:
ادري بس اريد اتاكد من يارقم رفعتي الحظر نفسه اللي كتلج عليه لو قديم.
مفهمت شي طلعت تليفوني واتصلت دك عنده.
السيد:
تمام هسه مسحي كل الارقام القديمه.
ذهب:.

ارقام منو امسحها؟
السيد:
ارقامي القديمه اللي جنت ادزلج منها وتسويلها حظر.
باوعتله كتله:
ياارقام؟ يعني هذا انت من الاول!؟
السيد:
اني..
شلعتي كلبي لا اكدر احجي وياج ولااكدر اكلج بسبب سراج واصلا جنت مأيس خاصة من حددوا موعد الخطوبه كلت خلص انتهى الموضوع.
دار عليه لزم ايدي كلي:
بس من كلي سراج مااجي صرفت نظر سويت نفسي عصبي وشلون واتعوذ من الشيطان بس الصدك حسيت مي بارد وطاح على كلبي يعني مصدكت فد شي عبالك حلم.

وحتى اتاكد من كلامه واخابر اهلي يجون فخليت ضياء هم يرجع يتصل بي وكلي ميجي كتله لعد اني اليوم اخطب..
باوعلي مفهم شي كتله خابر عالولد كللهم تعالوا هنا السيد راح يخطب واني راح اتصل بعمي ابو عبدالله وعمي ابو علي يجون ضياء.
ههههه يباوعلي ميحجي كتله شبيك اتصل بيهم اني اريد اخطب البنيه واتصلت باهلي وبعدين حجيت ويه ابوج. ابوج جان خايف مصدكني من كتله اني اريد اخطب بتك عباله اتشاقه يمكن.

بس طول مااحنه كاعدين اني خايف لا سراج يغير رأيه ويجي لحدما عقدلنه السيد يالله ارتاحيت.
اني ساكته محجيت..
فكلي:
ادري الوضع مو سهل بالنسبه الج يعني انتي جنتي متوقعه خطبتج اتم من شخص وفجأه لكيتي شخص ثاني بدون علملج وموافقتج بس صدكي متلكين احد يحبج بكدي وعندي استعداد اصبر واتحمل لحد متتعودين عليه وبراحتج مراح اضغط عليج بشي اي شي ابالج او تردين تكولينه كولي اي شروط اني موافق عليها غير الدراسه.

باوعتله بعصبيه وكتله:
كله الا دراستي وهذا شرطي الاول مستحيل اوافق اترك دراستي لاي سبب.
السيد:
ادري بس قصدي اذا عندج شروط غير هذا الشرط كولي مو قصدي اكلج مو موافق على دراستج.
من كلي هيج ارتاحيت كتله:
ماعندي شروط دراستي بس ومن اخلص اشتغل مااكعد بالبيت.
سكت وبعدين كلي:
ان شاءالله يصير خير.
بعد ماكو شي؟
ذهب:
لا
السيد:
طبعا احنه محجينه بهوايه تفاصيل مثل الذهب والمهر السكن العرس.

مهرج هسه انطيجياه والذهب تردين انطيج فلوس تشترين لو تردين نروح سوه وتختارين لو تردين اني اجيبه على ذوقي؟
استحيت كتله:
لا انت جيب على ذوقك.
السيد:
تمام باجر اني اروح اشوف قاعه حتى احجزها للمهر عالاسبوع الجاي ان شاءالله اوكي؟
هزيت راسي اوكي.
السيد:
اكو شي عاجبج اسوي بالمهر غير الشغلات المتعارف عليها؟
ذهب:
لا ماكو شي.
السيد:
اي شي بخاطرج كولي واني اسوي لتستحين اذا تستحين مني اتصلي بامي حميده وكليلها.
ذهب:.

ان شاءالله.
اندك الباب دخلت عمته كالت:
اشو مالكم حس ههه.
السيد:
فوتي يمه كاعدين نسولف هو اني اسولف هي ساكته.
دخلت عمته واجو بنات عمه كعدوا يمنه واجت الخدامه جايبه جاي وكيك وعصير.
سولفنه وضحكنه وعمته حبابه حيل كلتلي:
لتكلي عمه هو يكلي يمه وانت هم حتى مثل ماهو ابني انت هم صرتي بنتي.
ذهب:
صار.
كام هو كال:
من رختصكم اروح اشوف ابو جبار.
كالت بت عمه:.

الله يسعدكم ان شاءالله متتصورين شلون احنه فرحانين لان نشوف هيج فرحان من زماان مفرحنه هيج وهو هم خطيه خلصها قهر بقهر.
كالت الثانيه:
اي والله مسكين ماعنده حظ بس ان شاءالله وجهج خير عليه.
ذهب:
ان شاءالله.
عمته:.

من فشل زواجه الاول بعد مقبل يتزوج ويزعل من نفتح الموضوع مصدكنه من اتصل وكال اريد اخطب والله عليه نذر عجل اذا الله وفقه بت الحلال واتزوج وبس كالوا يريد يخطب راسأ نذرت خروف اوزعه عالناس الفقره والحمدلله من وفيت اليوم اول نذر.
رأسا بت عمه كلتلي:
بالله احجينله شلون اتعرفتي على ماجد شلون هيجي اجه خطبج لو جنتي تدرين؟
بت الثانيه:
اييي عفيه احجيلنه.
وعمته ضحكت كالت:
مو كللكم شافها بالكليه.
كللولها:.

عمه ندري بالكليه بس نريد نعرف الاحداث شنو حجه وياها شنو سوه يالله عفيه احجي..
ابتسمت بس ماادري شجاوبهم من كلامهم هو محاجيلهم شي عن سراج الحقير واللي سواه فكتلهم:
ماكلي شي ولا حاجاني ولاحاجيته.
معرفت اجذب ولاعندي جذبه اجذبها.
بنات عمه:
لا عفيه احجي شبيج خل نشوف بالله ماجد شحجه؟
ذهب:
والله مكال شي اصلا مااعرفه ولابيني وبينه كلام جنت اشوفه بالكليه وبالقسم يباوعلي بس مابيني وبينه كلام.
بنات عمه:
معقوله؟

دخل هو كال:
شنو هو المعقوله؟
عمته:
لحك على مرتك تره بدوا يحققون وياها هههه.
كعد بصفي وخله ايده على جتفي وكال:
خير شبيكم؟
بنات عمه:
ردنه نعرف شلون اتعرفتوا على بعض.
ماجد:
مااتعرفنه على بعض هي متعرفني بس اني سألت عنها وعرفتها بس كل شي مجانت تعرف عني شفتها بالكليه جانت عندي شغله ويه ولد صديق وعجبتني وسألت كلولي فوت وانت مغمض مشفنه عليها شي مو زين.
البنات:
اييييي؟
ماجد:.

اي رحت سألت رئيس القسم كلي ونعم الاختيار بنيه من احسن البنات العدنه
استمريت بالسؤال والمراقبه اشهر والنتيجه جانت لصالحها.
عمته:
وبعدين؟
ماجد:
ماكو بعدين رحت دكيت الباب وحجيت ويه ابوها وخطبتها وخابرتكم هذا كل اللي صار من البدايه للنهايه.
البنات:
يعني غريبه شلون وافقتي عليه بدون متعرفيه معقوله محاجي وياج ولامره؟
سكتت شجاوبهم هو جاوب:
شنو الغريب بالموضوع حجيت وياها مره بالكوه حجت وياي.
باوع للساعه كال:.

هسه الساعه( 4 ) ب ( 5 ) نروح ارجعج للبيت.
عمته:
ليش بعد وكت مشبعنه منها اول يوم تجينه.
ماجد:
ابوها كوه قبل تجي وكلي متتأخر.
الساعه ( 5 ) كمنه راح هو شغل السياره واني لبست حجابي وسلمت عالكل وطلعنه.
ارتاحيت من طلعنه خفت من اسئلة البنات.
رجعنه للبيت هو مقبل يدخل كال:
عندي شغل انت دخلي وسدي الباب.
ردت انزل سحب ايدي وكلي:
دقيقه انتظري هاج هذا مهرج واذا ردتي شي اتصلي لتستحين.
ذهب:
مشكور.
السيد:.

العفو حقج. ممحتاجه شي؟
ذهب:
لا مشكور سلامتك.
السيد:
الله يسلمج، يالله هسه دخلي للبيت وسدي الباب حتى اروح.
ذه:
مع السلامه.
السيد:
مع السلامه.
بالليل اتصلت بفاطمه:
الو؟
فاطمه:
الو هلو.
ذهب:
شدعوه ياابه رحتي وبعد لاسألتي لااتصلتي؟
فاطمه:
شحجي شكول كلت اكيد هسه منهاره وتبجين ووجودي بهيج وضع مو حلو محرج.
ذهب:
اني المحرجه مو انتي اصلا انت جنتي معجبه بي وهسه اني المااعرف شحجي وشلون ابرر..
فاطمه:.

انجبي لج شتحجين شتبررين تره كله جان شقا يعني اني جنت معجبه بالشبه الجبير بينه وبين الممثل اللي احبه مو اكثر.
ذهب:
يعني بس هيج؟
فاطمه:
اي والله العظيم.
ذهب:
لعد ليش رحتي بيومها وخليتيني؟
فاطمه:
مو كتلج الوضع جان متوتر ومردت تصير هوسه وحجي وينحرجون مني لان ظليت بس اتخيل ردة فعلج من تشوفيه وتعرفين اللي صار.
ذهب:
اوف فطووم يوم اسود. كلما اتذكر ينعصر كلبي.
فاطمه:
اسم الله على كلبج حبيبتي. هسه شنو صار؟
ذهب:.

سوالف هواي صارت وانتي متسألين عني متكولين المن تشتكي المن تحجي.
بجيت. كلتلي:
كافي كافي كطعتي كلبي باجر الصبح اجيج واتغده يمج خلي خاله تسويلي غدا.
ضحكت من كل كلبي كتلها:
عابت همها بس على بطنها.
ضحكت هي هم وكالت:
يالله حبي باجر ان شاءالله من الصبح اني يمج هسه نعست اريد انام.
كتلها:
يالله اوكي مع السلامه.
فاطمه:
مع السلامه حبي.

دخلت عالسيد ماكو عالواتساب كلت يمكن نايم او مشغول لان من العصر لهسه مسأل ولا دز مسج مو عوايده بس احسن.
خليت التليفون يمي عالطاوله ونمت غفيت.
دك التليفون اني كمزت جنت غافيه ماادري بيش الساعه اريد افتح عيوني مااكدر حيل نعسانه لان كاعده من الصبح مديت ايدي عالطاوله اخذت التليفون بدون مااشوف منو كلت اتوقعت فاطمة:
ها عوبه شتردين؟
كل ظني فاطمه محد رد، رجعت كلت:
وقزالقرط تحجين لو انااام؟
السيد:.

مشكوره مااريد شي بس ردت اسمع صوتج..
اني نزيت طفرت من مكاني وخرت التليفون باوعت الاسم السيد راسا كلت بصوت عالي:
عزا العزاج وهيبه.
حطيت التليفون على اذني وميته من الفشله كلت:
الو؟
السيد:
الو شبيج؟ ههههههه.
ذهب:
اسفه ماشفت الاسم عبالي فاطمه جنت غافيه فماادري شخربطت.
السيد:
هههه عادي مصار شي اصلا مبين جنتي نايمه ههههه اسف كعدتج من النوم.
ذهب:.

لا عادي اصلا ماانام من وكت بس لان ماما وبابا ينامون من وكت فاضوج وحدي والتلفزيون ملل فنعست وجنت احجي ويه فاطمه قبل لتتصل لذلك يعني..
ضحك على كيف كلي:
اليشوفج بالكليه يخاف منج.
ذهب:
ليش؟
السيد:
يعني شخصيه وبرستيج ومو بسهوله احد يحجي وياج هههه حتى اني خفت احجي وياج.
ذهب:
وهسه؟
السيد: طلعتي بزونه زغيره تخافين من كل شي وتتأثرين بكل شي.
سكتت فكال:
يالله كافي ادري بيج نعسانه روحي نامي اني هم لازم انام.
ذهب:.

اوكي تصبح على خير.
السيد:
وانتي من اهلي حبيبي. ذهب؟
ذهب:
نعم؟
السيد:
بس سؤال؟
ذهب:
اسأل.
السيد:
منو وهيبه؟
ذهب:
شنو؟ يا وهيبه؟
السيد:
ماادري انتي كلتي عزا العزاج وهيبه؟
صفنت وبعدين ضحكت حيل:
هو هم ظل يضحك على ضحكي بعدين سكتت كتله:
مااعرف منو بس بيبي الله يرحمها قبل جانت هيج تكول وتعلمت منها.
ضحك ورد بصوت هادئ:
تمام هاذي معلومه جديده انضافت للسي في مالتج هههه يالله حبيبي تصبحين على خير.
ذهب:
اجمعين.

الصبح كعدت على صوت فطوم صوتها فضيحه عبالك فيفي عبده فتحت باب الغرفه لكيتها كاعده هي وماما بالهول وتسولف وتضحك وكالبه الدنيا.
شافتني كامت بوستني كتلها:
شهالصوت شهالازعاج من الصبح؟
فاطمه:
الساعه10 يابه ياصبح راح يأذن الظهر بس بعد انتي صرتي تسهرين مو مثلنه الحدايق.
اني راسأ بجيت هي شبكتني وتسكت بيه.
فاطمه:
لج شبيج احجي شسوالج كولي حتى اروح افلش بيتهم والله.
ضحكت اني هي دارت على ماما:.

خاله من رخصتج نريد نحجي اسرار متنحجي كدامج فراح ندخل للغرفه.
ضحكت ماما وهي جرتني من ايدي دخلنه وسدت الباب
حجيتلها كل شي ودموعي مبطلت وهي تبجي وياي بعدين كالت:
شوفي انت هسه اتصرفي طبيعي وشوفي هالفتره هي الخطوبه فترة تعارف واذا معجبج الله وياه بس انتي انطيه فرصه يجوز يطلع خوش رجال.
ذهب:
هو ماعندي غير حل.
فاطمه:
زين انتي شتحسين تجاهه؟
ذهب:.

شحس هو كل صار يومين مخطوبين شوكت لحكت احس ومن يحجي حجي بي رومانسيه وهالسوالف تعرفين يعني.
فاطمه:
اي ادري ادري السوالف الطبيعيه بين المخطوبين اللي انتي تضوجين منها.
ذهب:
لج عوبه.
فاطمه:
آآخ ليش تضربين حاجيه شي جذب.
ذهب:
قليلة الادب.
فاطمه:
المهم كملي شيصير من يحجي؟
ذهب:
شيصير يعني شتتوقعين تلعب نفسي واستحي واتوتر واعرك ويصير وجهي احمر واتمنى اجيبه كف لان يحرجني.
فاطمه:.

صخام لج شنو هاي انتي حالتج متطوره فد مره لتروحين تسوينها صدك وتضربيه كف.
خلص اليوم بسرعه راحت فطوم العصر واليوم كله السيد لا اتصل ولا دز مسج الظاهر عنده شغل.
بالليل دزلي مسج فتحته لكيته مقطع اغنية اول مره اسمها بس حبيتها (مرني مرني اذا الوكت يسمحلك وتكدر).
كتبتله:
حلوه اول مره اسمعها.
حجينه شويه بعدين كال:
ذهب؟
ذهب:
نعم؟
السيد:
اسمج مصيبه ميصير نغيره؟
ذهب:
ياريت بس بعد مينفع كلها تعرفني بهالاسم.
السيد:.

ليش ياريت؟ متحبين اسمج؟
ذهب:
لا طبعا مااحبه لنفس السبب اللي مخليك ضايج منه.
السيد:
بس اني احبه مميز مثل صاحبته ولايكلج بس مضوجني لان ملفت ومثير للاهتمام.
ذهب:
زين عندي سؤال؟
السيد:
اسألي شنو ابالج.
ذهب:
انت ليش محاجي لاهلك عن اللي صار؟
السيد:
وشنو اللي صار؟
ذهب:
اقصد موضوع سراج واللي سواه؟
السيد:.

وليش احجيلهم هذا شي خاص بيني وبين زوجتي ماله داعي يعرفوه ومااريدج تحجينه لاحد واي واحد يكولج ليش صارت الخطوبه فجأه كليله لان ابوج جان يريد يسافر ثاني يوم ويتأخر شهر يالله يرجع.
ذهب:
اوكي.
السيد:
تره اني اليوم حجزت قاعه على يوم الاربعاء الجاي ان شاءالله. تمام؟ يناسبج؟
ذهب:
عادي.
السيد:
تمام اذن انتي ابدي شوفي شنو تحتاجين سجلي بورقه من ارجع نتفق على كل شي ان شاءالله.
ذهب:
ان شاءالله.
السيد:.

يالله حبيبي تصبحين على خير.
ذهب:
اجمعين.
سافر السيد ثاني يوم ومااتصل ولادز مسج اليوم كله.
الخميس نفس الشي مااعرف مشغول لو اكو شي بس استغربت وحسيت بفراغ جان يوميه يخبصني بالمسجات.

الجمعه الصبح من كعدت فتحت تلفوني لكيت مسج من رقم دولي (حبيبي تعطلت رجعتي على باجر ان شاءالله بس اريد اعرف قياسج يعني ملابس شكد قياس تلبسين اذا شي موديله مخصره عالجسم؟ ) فكرت بس لاهذا يريد يجيبلي ملابس نوم! عزا العزاج وهيبه وضجت ماادري ليش يعني لاشلونج لاشخبارج ولاحتى مشتاقلج مو جان مسوي نفسه روميو.
كتبتله:
وعليكم السلام بخير الله يسلمك انت شلونك؟
السيد:
هلو حبيبي شكد قياسج؟
ذهب:
40
السيد:
تمام، والحذاء؟

ذهب: 38
السيد:
تمام.
وراح بدون لاسلام ولاكلام.
وره شويه دز مسج ثاني(حبيبي لتتصلين على هذا الرقم او تدزين مسج لان مو رقمي).

انت بالدنيا نصيبي الانتظرته.