رواية صبرا يا قلبي الجزء الأول للكاتبة روز الفياض الفصل التاسع والعشرون
اسمعه يتنهد ويتحسر اتمنيت اموت بلحظتها حتى اقهره واخليه صدك يتحسر. نسيت ردت انكلب على جهة اليسار بس ابرة المغذي من سحبت ايدي موتتني من الوجع ونيت وبجيت مدري من الوجع مدري لان هو يمي بس حسيت جفوني ثكلت مااكدر افتح عيوني بعد سمعت عمه حميده تكلي: اسم الله عليج حبيبتي. اسم الله اني يمج نامي سوده عليه يايمه. ذهب: راح اموووت. اريد اموووت.
صوتي مبحوح كوه يطلع الصوت احس دموعي تنزل على وجهي بس مااكدر احرك ايدي كلي ثكلت بديت انام بس عقلي واعي اسمعهم ومااكدر ارد ولا اتحرك ولا افتح عيوني. اسمع صوته يبجي احس ايده الحاره على راسي ارتاحيت من خلاها يمكن دنك باس راسي اشم ريحته. ذهب: اريد امووت.. وراها بديت انام شويه وحسيت براحه ودفو لان ايده على راسي. حسيت بي مسح دموعي. بس نمت. حلمت امشي بشارع ووياي ماجد ووكع منه قلمين اخذتهم وخليتهم بجيبي.
فزيت بس بعدني احس مو بوعيي عبالك بغير عالم عيوني متنفتح وصوتي ماكو وجسمي ثكيل مااكدر احرك ايد ولا رجل بس الالم احس بي قوي موتني. عبالي متت. ماادري ليل لو نهار بس اسمع صوته بالغرفه يحجي مدري ويه منو. ماجد: ماادري منو مااعرفه هو بس كلي شوف مرتك ويامن تحجي من وراك اني اتخبلت بعد ماظليت اشوف شي. نجلاء وعمه حميده عرفت صوتهم: شلون هيجي تسوي؟ شلون طاوعك كلبك؟ شلون واحد يصدك اتصال منواحد غريب مايعرفه؟
شلون واحد يشك بمرته اللي يعرفها ومعاشرها ويعرف اخلاقها؟ هسه انت اللي تمدح بيها وبأخلاقها وسمعتها من خطبتها احنه ماجنه نعرفها وهسه من عرفناها كلنه والنعم منها ومن تربيتها بعد شلون تسوي هيج؟ شلون واحد يصدك واحد ميعرفه ويجذب عيونه؟ ماادري شحجي وشكول. الله يسامحك يايمة عالسويته. الله يسامحك.
اسمع صوته لعبت نفسي حتى من صوته. لساني ثكيل اريد اكلهم خل يطلع مااريد اسمع صوته لعبت نفسي منه ومن صوته. اوون مو بس وجع جسمي كلبي يوجعني من وراه كلبي موتني اريد بس حرف يطلع مني ماكو عيوني مااكدر افتحها بس دموعي تصب. حسيت بدلولي المغذي بس اذوني حيل الابره مو ابره عبالك بسمار متت. نجلاء: الله يستر وتعدي على خير ويثبت الطفل عالاقل بلكي ينسيها ويشفعلك.
عمه حميده: ان شاءالله يثبت ان شاءالله. بحياتي كلها ماشفت وحده مثل هالبنيه ماعدها حظ والله. اتمنيت احجي واكولها اي والله ماعندي حظ والمصيبه محسوده. اوون من الوجع متت منه مااكدر انام على اي جهه وظهري يوجعني. ظليت بس ابجي واوون هو اجه وكف يمي حسيته لزم ايدي. حتى ايدي تأذيني. نجلاء: لتخاف تتحلم. تتحلم الله يعلم مدري تشوف كابوس مدري تتحلم بالصار.
اريد اكللهم كاعده مونايمه مااكدر حاولت احرك ايدي ماكو فكرت يمكن اني ميته لذلك مااكدر اتحرك واتحكم بجسمي وهمه عبالهم اني نايمه. الحمدلله من متت وارتاحيت. بس كون ابني يموت وياي مااريد وحده ثانيه تربيه اخاف تأذيه لو تعذبه بجيت. ماجد: مو طبيعي هالوضع وينه الدكتور خل يجي يشوفها. راح ورجع وياه الدكتور.
الدكتور: نايمه منطيها مهدئ خفيف لان حامل منكدر نزيد الجرعه علمود الجنين بس علمود تهدئ وترتاح بدونه متكدر تنام من الالم. جسمها يأذيها طبيعي توون نتيجة الالم. ظليت اغلب الوقت بالمستشفى نايمه بسبب الادويه مااحس بالايام بده الالم يخف شويه عيني بدت تتحسن بس العلاج مستمر والمغذي يخلص واحد يخلون الثاني يكعدوني وكت الاكل بس.
عمه حميده تبات ويايه بالليل وبالنهار نجلاء لو نسرين وماجد بره ليل ونهار اسمع صوته ماادري يروح للشغل لولا وين ينام هنا لو بالبيت ماادري ومو مهم عندي بعد. اهلي شنو اخبارهم شنو كلولهم مااعرف. نجلاء: ان شاءالله هانت مابقى شي خلصت هاي ( 10 )ايام بقى اسبوع ان شاءالله اذا طولتي. اشرتلها اريد قلم انطتني ورقه وقلم كتبتلها (ماما شلونها ماسألت عني هي وبابا؟ ).
احس حتى الادويه جسمي اتشبع منها ماانام بسرعه ولا يسكن الالم مثل الاول. المره الفاتت جان العذر سحر ماجان بوعيه هسه شنو عذره؟ مليت وتعبت من كعدة المستشفى دخلت مستشفى من اتزوجت لحد الان اكثر مما دخلت بحياتي كلها يوميه جايه. شايله هم من اطلع شلون بيه مااريد اشوفه شكد الانسان يحس نفسه ضعيف وذليل ومكسور ويتمنى يموت ويخلص من يكون الاذى من اقرب الناس اله.
طول مااني كاعده دموعي متبطل كل حركه بيها وجع والم وكلما اسمع صوته اكرههه. الادويه جانت رحمه لان انام شويه وارتاح عيوني راحت من البجي. اليوم يطلعوني من المستشفى اكيد ميودوني لاهلي مستحيل يقبل. نزلوني بالكرسي والمغذي بأيدي اني مدنكه هو يمشي كدام كالمعتاد صعدت بالسياره بالكوه وخليت راسي بحضن نجلاء ونمت عمه حميده كاعده يمه كدام ولازمه المغذي بيدها.
صعدوني لغرفتي اتمددت عالجربايه بس هالمره احس نفسي غريبه بهالبيت عبالك مااعرفهم حتى عمه حميده ونجلاء رغم مالهم ذنب ويحبوني وماقصروا وياي بس حسيت نفسي غريبه. شفته واكف اباب الغرفه صعد الجنطه اشرت لنجلاء سدي الباب هي باوعتله اترددت معذوره هو بالنهايه اخوها بس مااريد اشوفه بعدين راحت سدت الباب.
ماجد: ديري بالج عليها متعوفيها وحدها والجهال راح اخذهم ويايه للمعرض واذا ردتوا شي خابريني واذا صار اي شي اي شي حتى لو بسيط تتصلين بيه. نجلاء: ان شاءالله ماكو شي حبيبي انت لتفكر بعد هي هسه احسن والطفل يتحرك وكل شي تمام ارتاح انت هسه. نمت كعدوني بالليل حتى يخلولي مغذي ايديه تزرفت من الكانونة. اتعشينه اني ونجلاء وهي خاله ايدها على بطني حتى تحس بحركة ابن اخوها على كولتها.
حركتهم قويه وتأذي لان اثنين الحركه تقريبا مستمره لدرجة بالليل كوه انام. ذهب: اريد احجي ويه ماما. نجلاء: تحجين ويه ماما؟ البارحه اتصلت بعمه وكلتلها راح يرحون للزياه هي وابوج كم يوم ويرجعون. انت اصلا متكدريت تحجين حبيبتي ماله داعي تخوفيهم وتخليهم يقلقون عليج. ضجت مدري صحيح حجيها مدري ميردوني احجي وياهم. كامت طلعت صور العرس وبعدين الفيديو هي ماجانت موجوده بزواجنه. تباوع وتعلق وتضحك.
وصلت لمقطع الاغنية اللي هدالياها ماجد (انطيني وعد للموت). نجلاء: يمه اسم الله عليكم من الموت اثنينكم اشفتوا من حياتكم بس القهر. كلش انقهرت واتذكرت شسوه بيه بجيت وهي تسكت بيه بعدين طفت الفيديو وحضنتي بس اني عبالك البجي البجيته قبل كل كوم وهسه كوم ثاني كتلها: ياريت اموت. نجلاء: يمه اسم الله شنو تموتين لاتكولين هيج والله ازعل منج اسم الله عليج.
طلعت ورجعت تدور تليفونها اني تعبت من البجي عيوني تحركني غفيت شويه وفزيت ظهري يوجعني من كدما نايمه عليه اريد اتكلب مااكدر وين انكلب جسمي يوجعني والمغذي مقيدني تعبت من وضعي حتى بالنوم مااغفى مثل الناس دموعي احسها نكعت المخده نوميش هذا ياربي بس عيوني مغمضه. حسيت باب الغرفه انفتح اكيد عمه حميده لو نجلاء بقيت مغمضه مااريد اتعبهم اكثر بس من انام يرتاحون شويه.
حسيت بايده حاره كلبي ظل يدك بسرعه خله ايده على راسي بعدين باس راسي وكاعد يمي لزم ايدي كلما احسه قريب كلبي يظل يوجعني. الطفل تحرك لااراديا خليت ايدي على بطني هو هم خله ايده على بطني ايده حاره زادت الحركه، دمعت عيوني. اريد انام ميته من النعاس بس الوجع ياربي عالاقل انام مثل الناس حتى لو اجه يمي مااحس بي. جان يكولي من اشوفج تبجين كلبي يوجعني. نزلت مني دمعه اتدنه يمي كلي: حلم حبيبي لتخافين. اني يمج.
جنت كوه لازمه نفسي حتى لاابجي حيل. شكد جنت كارهته وبنفس الوقت مشتاقتله مشتاقه يحضني ويمسح دموعي ويكلي دموعج توجع كلبي. انفتح الباب عمه حميده: اسم الله حبيبي. خليها نايمه يمه بلكي ترتاح حتى بنومها توون سوده عليه. انت هم تعباان ومريض وهي هم اذا سمعتك تزيد اصبر شويه يمه اتحمل. ميخالف الصار مو شويه إلى سويته هالمره ماينكست عنه يايمه.
زين وسكتت وقبلت ترجع ويانه للبيت خليها على راحتها خل تنسى تحتاج وقت وانت حبيبي دواك لاتهمله انت مو زغير نتوسل بيك عالدوه تره تعبت واني احجي وياك واوصيك على دواك واكلك ميصير. يالله يابعد عمري كوم نام وارتاح انت تعباان مو تكول اليوم كله تتقئ لو مكمل بطل المي من زماان جان هسه خلصنه وافتكينه حسبي الله عليها يالله بلكي هسه تتزوج ونفتك منها ومن شرها. ماجد: الله كريم.
راح وخلاني افكر ليش هيج سويت بيه ليش تخليني اكرهك والمصيبه مااكدر اكرهك بس من اتذكر إلى صار اكرهك من كل كلبي اني تشك بيه وتصدك بواحد حقير يحجي هيج عني والله اعلم منو يمكن سراج هو اللي اتصل بس ليش شيستفاد مو هو اصلا اللي بطل واتراجع بيوم الخطبه يعني بعد فوك اللي سواه. منو ممكن يكون؟ اسراء وانخطبت وراح تتزوج وملتهيه بحياتها.
ظليت افكر لحدما سمعت الاذان ردت اكوم اصلي الفجر بس المغذي بأيدي من يوم اللي صار ماصليت كعدت حاولت افلته من ايدي بس أذاني انفتح الباب التفتت شفته هو جاي يتطمن. ماحجه شي باوعلي لازمه ايدي واحاول اسحب الابره بس البلاستر قوي. دخل كعد كبالي مارفعت راسي مااريد اشوفه سحب ايدي اني رجفت ودموعي ظلت تنزل وتطيح على ايدي وحده وره الثانيه اخر مره من ضربني كلي مدام ترجفين بيدي يعني تحبيني. طاح حظي بعدني احبك.
بعدني ارجف ومااكدر اباوعلك ادري بروحي اضعف. كعد يشلع البلاستر. شلعه على كيف وسحب الابره وظل مكانها يصب دم على رجله. سحب كلينكلس وخله على ايدي وجاب بلاستر زغير خلاه واخذ الكلينكس وكعد عمه حميده وطلع. كومتني هي ودتني للحمام غسلت واتوضيت كتلها: اريد اصلي ورفعت ايديه الله اكبر خاف ماسمعتني. عمه حميده: اي حبيبتي صلي يابعد عمري بس صلي وانت كاعده عالكرسي احسنلج واريح الله غفور رحيم.
صليت واني كاعده وصلاتي من اولها لاخرها بجي. مرت هالفتره بهدوء خلص علاجي كله وباقي يومين وادخل بالشهر الخامس بطني بينت والحركه صارت اقوى ماشاءالله. واجو ماما وبابا من الزياره وبس وصلوا اتصلوا على ماجد يردون يجون يشوفوني ماصدكت من كلتلي نجلاء العصر يجون.
جنت محتاره احجي لماما وبابا لو اسكت همه ماراح يعرفون اذا محد حجه لان وضعي تحسن واني اصلا ظليت البس بجامات وملابس طويله وردن لان ابرد ومااريد اشوف آثار الحزام. هاي فرصتي حتى اروح وياهم بس شلون؟ ماجد مستحيل يقبل.. اجو حسيت كلبي راح يطير كبلي اجت نجلاء نزلتني عمه حميده وماما كاعدين بالهول وبابا الظاهر بالديوانيه ويه ماجد.
شافتني ماما حسيتها استغربت حضنتها وبجيت حسيت رحت للجنه ماكو خوف بعد ولا اهانه ولاقهر. هي خافت تكلي: شبيج ماماتي تبجين؟ ليش هيج متغيره؟ ضعفانه شنو جنج مريضه. نجلاء لازمتني مثل الطفل الزغير توه يمشي وخاف يوكع. ماجد فتح باب الديوانيه سمعني ابجي ظل واكف يباوع.
رواية صبرا يا قلبي الجزء الأول للكاتبة روز الفياض الفصل الثلاثون
كعدت وماما كعدت يمي وحاضنتني وتسولف ويه عمه حميده وكل شويه تبوسني. ماما: طاك كلبي عليها والله صار شهر ماشايفتها بس عبالك سنه الله لايحرمني من هذا الوجه الحلو. عمه حميده: خلوا البجي هسه على صفحة خل نفرحج ويانه تره مو مريضه اسم الله عليها بس هي الحمل متعبها. ماما ظلت تبجي وتبوس بيه فرحانه. ماما: مبروك ياماما. مبروك ياعمري. ليش ماكلتيلي جان سويتلج الاكلات اللي تحبيها.
عمه حميده: لا ازعل تره. لعد اني شسوي هنا اذا مااداريها واراعيها اداري منو هاي بنيتي الله شاهد معزتها من معزة ماجد واكثر والله. نجلاء: لاتخافين خاله اني كاعدتلها بالمرصاد تاكل كل شي غصباً عليها مو بكيفها انت بس عوفيها علي وشوفي اذا ماسويتها دب هي وابنها بعد هو ولد فديته. ماما: ماشاءالله تبارك الله اللهم صل على محمد وال محمد ان شاءالله الابن البار ياماما مثل ابوه. عمه حميده: آمين.
ماما: اشو ساكته؟ متحجين شو احجيلي سفرتكم شلون جانت ظل بالي والله لان متتصلون وماجد ميتصل جان كلبي مقبوض كال ابوج خل اخذج للزياره نزور ونرتاح. عمه حميده: متكدر تحجي سوده عليه بلاعيمها التهاب حاد منعها الدكتور من الحجي تدرين لبنان بارده وهم رايحين ملابسهم خفيفه وهناك بعد عرفوا حامل والله مصدكنة شوكت ترجع للبيت ونشوفها بيناتنه ونداريها.
ماما: متقصرون علويه اوالنعم منكم هي بتكم بعد واحنه مأمنين بيكم وبالسيد. كل شويه تبوسني: ماعليج شر حبيبتي لازم تهتمين بنفسج هسه لان مو زين عالطفل تتمرضين هذا هسه امانه عندج انت مسؤوله عنه. اتوقعت عمه حميده تلكالها عذر حتى تسد الموضوع واني عكب كل هالخدمه وهالمداراه اللي مداريتنياها هي ونجلاء مااكدر احجي. فتح ماجد الباب وطلع يمنه. ماجد: ها خاله استلمتيها بحضنج وظل عمي جوه ينتظر تجون تره هو هم مشتاقلها.
ماما: ههههه اي والله حقه بس شسوي كلبي جان مقبوض عليها توها ردت بيه الروح وارتاح كلبي. كومتني ماما ودخلتني للديوانيه بابا بس شافني اجه حضني وظل يبجي. عمه حميده: شبيكم صلوا على محمد مابيها شي تره هاي كدامكم شحلاتها وراح تجيبلكم حفيد ان شاءالله. بابا: اي بابا حبيبتي لاتبجين كلي السيد توه والله كولش فرحت الله يسهلج ويتربى بعزكم ان شاءالله.
عبودي: خاله ذهب ميخالف اخلي ايدي على بطنج اشوف البيبي. ضحكت هزيت راسي اي. نجلاء: شتشوف ولك قابل هو سونار. لو بنيه جا خطبناها الك. دخل ماجد باوعلنه اني لازمه ايد عبودي ومخليتها على بطني وهو يضحك من يحس بحركه. نجلاء: حتى لو بنيه خالك مينطيها النه يكول شواذي. ضحكت بوست عبودي. ماجد: لاننطيكم ولاناخذ منكم بتي الحلوه انطيها لابنج هذا الشاذي.
نجلاء: ياا. شبي؟ يخبل امه حلوه وابو حلو بس اذكرك من تطلع بتك مو حلوه وتظل تركض وره ابني. ماجد: شيل ايدك لك شنو صدكت؟ اذا تطلع بنيه ازوجها سفير وزير مو ابنج بتي تطلع تخبل امها حلوه وابوها حلو ليش شناقصها وازوجها هالشاذي ههههه. نجلاء: تعال ماما تعال لتخلي ايدك على خالتك بعد تره يحطك عالقبله ويذبحك. بس ميخالف اصبر باجر من تطلع بتهم موحلوه شلون يجون يتوسلون بيك بس كون ترضى بيها لان محد مكلبها. بس اذا.
طلعت على امها اغسل ايدك لو تموت ميطوكياها. ضحكت من كل كلبي على نجلاء. نجلاء: اي رجلج يستهزأ بينه وانت تضحكين بس هي كلمه وحده على الاقل ابني يطلع عنده شعر على ابوه. ركضت لان ماجد كام وكف يريد يطلع عبالها يركض وراها اني خربت من الضحك. ماجد: خبله هاي صدك هذا فراس شلون متحملج ولو هو هم نفس الشي نص عقل. طلع ماجد واني ردت اكوم اصعد بس نجلاء كالت نطلع بالحديقه شويه وره الصلاه هزيت راسي لا.
نجلاء: ليش ملينه من الحبسه. اشرتلها ماجد ميقبل ومالي خلك مشكلة جديدة. نجلاء: والله خوافه انت، بابا انت هسه مريضه وحامل ميحجي وياج ولايتجرأ يزعلج اصلا انت بس طلبي وشوفي شلون كل طلباتج مجابه والله لو اني بمكانج آآخ جان لعبت لعب بالدلع. عمه حميده دخلت باوعنه اني ونجلاء وحده للثانيه وين جانت؟ نجلاء: حميده وين جنتي من مساع لهسه؟
عمه حميده: جنت اسولف ويه ابو جبار يسألني على ذهب شبيها كتله وكعت من الدرج وتأذت مو تكولين لاي احد حامل خليها شوكت ما كبرت بطنها الناس راح تعرف ومانعرف ولد لو بنيه ماجد ميقبل نعرف. زين؟ نجلاء: صار بعد اي اوامر ثانيه ست حميده؟ ابنج توه طلع وره ماجرح مشاعري ومشاعر ابني. عمه حميده: عوفي الولد بحاله البي مكفيه سوده علي النهار كل لازم كلبه يوجعه سوده عليه.
اتنهدت اني انقبض كلبي كمت اتوضا حتى اصلي حسيت صار الجو كئيب عكب حجي عمه حميده. اتوضيت وصليت ودعيت ياربي شافيه ويعافيه مااريد تشلع كلبي بي اكثر مااتحمل يصير بي شي لو تموتني لو تخليه وتهديه ياربي احبه اهديه إلى ياربي تعبت كلبي ميتحمل بعد اي تصرف منه اموت ربي انطيه الصحه والعافيه وخليه إلى ماعندي لااخ ولاخت. نجلاء كاعده تباوعلي كالت: بروح عزازج شجنتي تدعين صارلج ساعه؟ ضحكت. نجلاء: جنتي تدعيله؟ لماجد؟
اتنهد حيل بعدين كال: انت هسه ان شاءالله عديتي المرحله الصعبه من الحمل الحمدلله، بس اكو شغله لازم نتأكد منها مادام بعدنه بالبدايه. انقبض كلبي راسا اجت ابالي فكره اعوذ بالله منها. فكرت يمكن يريد يتأكد ابنه لو لا معقوله يعني تفكيره يوصل لهدرجه؟ انتحر احسنلي اذا هذا تفكيره. ماجد: يعني ان شاءالله خير بس نتأكد من البدايه افضل حتى اذا لاسامح الله طلعت النتيجه مو زينه نتصرف. حسيت لعبت نفسي من هالفكره.
ماجد: بس لاتخافين يعني بس حتى نتأكد ماكو شي ان شاءالله اني اكول نسافر لتركيا حتى نسوي فحوصات للبيبي. لعبت نفسي. هو نفسه ماجد اللي اتزوجته لو واحد ثاني؟ ماجد: شبيج خفتي وانخطف لونج؟ ماكو شي ان شاءالله. بس فحوصات حتى نتأكد كل شي اوكي والبيبي ماعنده فتحه بالقلب وراثي يعني.
انصدمت شي مخاطر على بالي. درت عليه بسرعة وحسيت دخت انخفض ضغطي لان المرجوحه تتحرك ردت ارجع ليوره حتى لا اوكع بس جسمي ظل يرجف هالمره هذا الحمل اذا طلع بي اي مشكله معناها اني انتهي مابيه حيل بعد تعب ومعاناة وصبر كلبي خلصان. لزمت ايده حيل هو لزمني حس دخت ماظليت اركز بنظري اتدنه يمي ورجعني ليوره وخله ايده وره ظهري وحضني طاحت دموعي غمضت.
هالدموع الفاضحتني وذالتني ماعندي طاقه بعد لصدمه من هيح نوع هالمره الحمل عده الاشهر الصعبه وتؤام مو واحد وحسيت بيهم وبحركتهم معقوله ربي تصدمني هيج صدمه وتشلع كلبي؟. هالمره اذا هالحمل ماكمل معناها من ينتهي تنتهي وياه حياتي ويه ماجد ماكو سبب نكمل سوه بعد. باس راسي كلي: خلص بدون بجي.. ماكو شي ان شاءالله مجرد فحوصات حتى نرتاح لااكثر ولااقل مابي شي ان شاءالله ليش تبجين وتفاولين عليه.
خله ايده على بطني اتحركوا هو ضحك كال: حبيبي.. مد ايده مسح دموعي. استحيت ومااريد ياخذه الواهس وكلبي معصور من حجيه وحاسته عبالك غريب دفعته وكمت اريد ادخل صاح وراي: اوكفي، انتظري لاترحين توكعين، صبري بس اقفل السياره.. اني هم جنت خايفه اوكع لو ادوخ بس كملت مشي وحدي كعدت بالمطبخ يم البنات هو دخل وده نجلاء يمي اجت تركض. نجلاء: يمه الحب يمه وين جنتي؟
غلست مالي خلك اضحك واتشاقه الضحك الضحكته مساع وياها احسه طلع من خشمي حتى من الله ينطيني فرحه ماتكمل مثل الناس. نجلاء: شكلتوا؟ شحجيتوا؟ اعتذر؟ شنو كال؟ شنو سويتوا؟ اشرتلها راح اصعد انام تعبت ظهري يأذيني ومالي خلك. نجلاء: شفتهمت بالله من برنامج من غير كلام وين ورقتج وقلمج؟ اتنهدت اشرتلها اريد انام وكمت صعدت هي تمشي وراي خاف اوكع.
نجلاء: اني كلت اكو شي صار بس محد صدكني لهذا السبب انت مسويه نفسج نعسانه وتردين تنامين حتى ماتجاوبين. دخلت للغرفه اخذت القلم كتبتلها: (راح نسافر تركيا). نجلاء: الله عليج؟ هنيالج، علواه فريس يوميه يكسر عظامي ووراها يسفرني. طول هالفتره ماجد حيل مشغول يريد يخلص اكبر قدر من الشغل قبل السفر مااشوفه الا نادرا وهو طالع لو وهو داخل بس احس مرات يجي لغرفتي واني نايمه.
اليوم راح ورجع من وكت واسمعه جوه يصيح وعمه حميده تهدي بي.. خفت شصاير اخاف انزل ويذب حركته بيه واخاف ابقى بالغرفه ويطلع الموضوع عني ويجني للغرفه ويستفرد بيه يستلمني ضرب وهالمره اني حامل خل ابقى واقفل الباب احسن حل.. قفلت الباب وقفلت الباب الثاني اللي بين غرفتي وغرفته وكعدت عالجربايه.
انتظرت هجومه فتره طويله بس ماكو شي ومافتحت الباب وره فتره سمعت باب غرفته انفتح وانطبك حيل واسمعه يصيح يمكن يحجي ويه احد بالتليفون. بقيت بغرفتي محد سأل عني الظاهر اكو شي وملتهين بي الله يستر. الظهر دكت ياسمين الباب تصيحلي عالغدا. نزلت اتغده بس ماجد ماكو وعمه حميده ضايجه ونجلاء هم ضايجه ويحجون عن واحد حسود وحقير بس مااعرف منو.
رواية صبرا يا قلبي الجزء الأول للكاتبة روز الفياض الفصل الحادي والثلاثون
نجلاء: ياسمين وين بابا ماجد ماصحتيله؟ عمه حميده: لا خلي ينام مانايم صارله كم يوم وتعبان وماله خلك من يكعد ياكل. نجلاء: لا اكل لانوم لاراحه ولادوه شلون ياربي بهذا الولد لشوكت هيج يبقى هامل صحته لحدما يصير بي شي يالله يرتاح..
عمه حميده: الله يعينه يايمه تعب وماله خلك منا يفكر بمرته حامل وميتحاجون هو وياها ومنا الشغل ودوخته ومنا امج الله يسلمها صارلها شهر كاعده عد اختها مكابله اسراء والله شنو تجهز لعرسها اليشوفها يكلك الاميره ديانا ومتعجبه بيها.
ضجت من حجايتها يفكر بمرته وميتحاجون مو ذنبي اللي صار هو ظلمني واذاني حيل جسديا ونفسيا الشك مو شي بسيط لو هين الشك ينهي اكبر العلاقات واني ماجد نهاني خلاني اخاف من كل شي حتى صديقاتي بعد اللي صار اخاف اتواصل وياهم واكيد هسه يفكرون شبيها هاي تغيرت وقطعت علاقتها ويانه. نجلاء: اخاف احجي تخاف يزعلون بعض الناس مني ومااريد ازعلهم. عمه حميده: احجي وفكينه مانزعل بلكي تطلع منج جمله مفيده.
حسيتها تريد تحجي شي يخصني وتخاف من رد فعلي. باوعتلها كتلها: كولي. نجلاء: حبيبتي انت لو بس الله يهديج وتحجين وياه.. سكتت واتنهدت. نجلاء: لاتصالحينه ولاتسامحينه هسه ادري متكدرين بس عالاقل كوليله ياخذ دواه كوليله ياكل. عالاقل من يسلم ردي السلام حتى لو صوتج ميطلع هو يحس. انت هسه همه الجبير ضميره يأنبه عاللي سواه وخايف عليج وعلى ابنه ومتأذي بس ميحجي.
انت بس تكدرين تغيرين وضعه بس شويه اهتمام منج اي شي بسيط منج راح يخليه يرتاح. ذهب انت اختي مثل ما هو اخوي والله يعلم شكد احبج مااريد اضغط عليج وادري هو ظلمج بس ادري بيج مينطيج كلبج عليه انت تحبيه وهو يحبج وتره متلكين واحد يحبج مثله صح عنده اغلاط بس تره ماكو واحد كامل وهي هاي الحياة الزوجيه. الله يخليج بس انطيه دواه ماراح يردج انتي بالذات.. دمعت عيوني وعفت الغدا وكمت صعدت.
سمعت عمه حميده: ارتاحيتي هسه من نكدتي عليها حرمتيها الغدا جنه بواحد هسه صاروا اثنين اخ يالسانج. عبالها زعلت من نجلاء مازعلت بس ماادري يمكن استحيت منها لان احرجتني يمكن لان احبه يمكن فعلا كلبي ماينطيني ويمكن اشتاقيتله. رحت مثل الرجل الآلي دكيت باب غرفته ماجاوب.. دكيت مرة اللخ ماكو.. فتحت الباب على كيف ودخلت شفته نايم عالجربايه بدون قميص بس بالبيجامه.
متجتف ونايم ظليت شويه اباوعله شكله متغير حسيته كبران وضعفان اترددت بالبدايه لان مجروحه منه حيل بس ضغطت على نفسي.. اخذت الدوه طلعت حبايه وكلاص مي خليتهم عالطاوله يم راسه وندهته من خليت ايدي عليه استحيت عبالك توني متزوجه واستحي منه لان بدون قميص، فتح عيونه باوعلي راسأ كعد: حبيبي شبيج خير؟ يوجعج شي؟ هزيت راسي لا. ماجد: البيبي بي شي؟ هزيت راسي لا واشرتله عالدوه باوع للطاوله اتنهد كال: خوفتيني، شذكرج بيه؟
دمعت عيوني من حجايته عبالك اني ناسيته اصلا. بكلبي كتله ماكو شي ثاني شاغل عقلي وتفكيري غيرك. ماجد: تردين اشربه؟ هزيت راسي بعصبيه اي. ماجد: ليش؟ مو تردين تموتين وتخلصين مني هسه اني اريحج اموت اني وارتاحي لان رائد اكيد يحتاج امه. باعت ريكي ورايه ورايه سيرة الموت اني المن ابقى عايشه اذا انت تموت؟ ويقهرني اكثر من يكول رائد يعني حتى الاسم مختاره على اسم اخوه الله يرحمه.
ماجد: ليش تبجين؟ تخافين اموت؟ لعد ليش تشلعين كلبي؟ لزم ايدي باسها سحبتها.. ماجد: زين اكعدي شويه حتى اشرب الدوه لو مااشربه تره. ظليت واكفه شويه. بعدين كعدت مقابيله. ماجد: تدرين شكد احبج؟ درت وجهي مااريد يبين علي التأثر. ماجد: زين لاتحجين وياي ولاتجاوبين بس سمعيني عالاقل وبدون بجي، تعاي هنا حتى نحجي.. هزيت راسي لا وخنكتني العبره. ماجد: والله مااسويلج شي، والله لاتخافين.
هزيت راسي لا دموعي تريد حجه حتى تطيح.. ماجد: تخافين مني؟ تخافين اضربج؟ اجه كعد يمي رجعت ليوره هو نام وخله راسه على حضني وغمض عيونه تمنيت اني انام بحضنه مو هو. بلحظتها بعد ماكدرت اتحمل اكثر. ظلت دموعي تصب وتطيح على وجهه. رغم حاولت بكل قوتي ماابجي. ماجد: تغسلني هالدموع ان شاءالله. بجيت حيل كعد حضني.
ماجد: اششش، كافي بجي، خلص مو زين على رائد تره يطلع بجاي اني مااريد ابني يطلع بجاي كافي علي انت ماادري منين تجيبين كل هالدموع. ظل حاضني لحدما هدأت، شويه وكام شرب دواه. ماجد: هاا بعد؟ امر. خدمه. شتريدين اسوي بعد بس بدون بجي؟ اشرتله على حلكي اقصد الاكل ينزل يتغدا. ماجد: شنو؟ بوسه؟ هزيت راسي لااا ذهب: غدا. صوتي مبحوح بس سمعني ضحك على كيف. ماجد: مااشتهي ومالي خلك اي شي انت نزلي اتغدي وغذي ابني وياج.
اشرتله بأيدي ليش شكو؟ ماجد: ماكو شي. عندي شغله بالدوام ولازم اخلصها قبل السفر. باوعتله اريد اعرف شنو الموضوع بس استحي اسأله. ماجد: ماكو شي شبيج. بس قلة السيوله لان فتحنه معمل عصير واحتاجيت مبلغ وبعد كم يوم رواتب الموظفين بالشركه تستحق وماكو فلوس كافيه والوحيد اللي يكدر يساعد مصطفى ابن عمي بس ميقبل. ذهب: ليش؟
ماجد: حقير ميغرز بي. وحسود يريد يشاركني كوه واني مااريد شريك كافي الشركه كلها مشتركه بيها وشالعين كلبي. حسد عيشه اعوذ بالله منه نحيس. ذهب: شكد المبلغ؟ ماجد: مو هواي كتلج عندي جزء يعني مو كل المبلغ راح اخذ من ابو تبارك الصايغ، لاتشغلين نفسج سهله.
فكرت اني من اتزوجنه ولحد اليوم هو كل شهر ينطيني مصرف بس مااصرف منه شي وجنت انطيهم لبابا يخليهم بحساب توفير لان عندي راتب. وراتبي كافي وزايد علي. وحتى مهري بقى منه لان مالحكت اجهز هوايه شغلات بوكتها وهو مامقصر وياي بشي، بس ماادري شكد بي الحساب حتى لو يغطي جزء بسيط ميخالف ولا يتورط بدين.
غلست اني مالي خلك سوالف العشاق اذا شرط من شروطه التعبانه اخلي واروح وبعد مالي علاقه بي.. ماجد: اولا. اخذهم كدين يعني بس يشتغل المعمل ان شاءالله ارجعهم الج. ثانيا. متحجين بالموت بعد ابد. ثالثا. عبودي ميخلي ايده على بطنج بعد. باوعتله عبالي سمعته غلط حصرتني الضحكه. يحجي صدك؟ ماجد: لتتباوعيلي هيج هذا اهم شرط عندي. اشرتله ليش؟
ماجد: شنو ليش؟ يعني عبودي مسموحله يخلي ايده على ابني ويحس بحركته واني ابوه ظال بس اباوع بعيوني؟ ضحكت، من تفكيره الغريب وتصرفاته يغار من كل الناس. والالوان عنده معضله. وهاي الحاجه بس يمي. وهذا اللون بس كدامي. وهذا الطفل لاتبوسينه، ولاتخلين مكياج كدام خالج وابوج مدري شنو. وماتباتين عند احد حتى اهلج. وماترحين خطار. لاحد الا اني اوديج واجيبج. ماتنزعين الحجاب كدام فلان ولا فلانه و و و و..
ماجد: تره ماتضحك. ابني وبكيفي شنو حاط ايده عليه بالله آذاه؟ بالله طلعت بنيه مو ولد شلون عبيد يخلي ايده عليها؟ ماجد: مبين ماعاجبتج الشروط؟ كتبتله: لا لا تمام. ماجد: تمام. ظليت يوميه اخليله دواه عالطاوله يم راسه وينزل يتغده ويتعشه طبيعي ونجلاء تكول نفسيته اتحسنت لان اني بينتله اهتمام. نجلاء: من تسافرون ديري بالج على اخوي اريده يرجع سمنان ومنشنش. عمه حميده: هههههه شلون منشنش يعني نزول عليج لسانج مصيبه.
نجلاء: شبيج حميده شحجيت اني غير داوصيها على اخوي الوحيد. نجلاء: لاتباوعيلي هيج انتو بكل الحالات هالسفره لازم تتصالحون عجبج لو ماعجبج هو هالسفره اجته من الله حتى يستفرد بيج بحدكم لا نجلاء ولاحميده. عمه حميده: صدك متستحين لج شنو اني لازمتهم؟ نجلاء: انت كاطعه حتى الهوا عنهم يالازمتهم اذا صارلج شهرين نايمه وياها بالغرفه. عمه حميده: صدك تحجين يعني اني واكفه بطريقهم واني ماادري؟
نجلاء: بشرفج هسه اذا اني الصبح مكابلتها وانت بالليل هو بعد وين يكدر يحجي وياها لو يتجرأ يباوعلها وانت كاعدتله مثل العتوي. بعد كم يوم. اليوم نسافر لتركيا نزلت لكيت ماجد يتريك وبحضنه آيه بت نجلاء توصيه على العاب وهو يكرص بخدودها. ذهب: صباح الخير. ماجد: صباح النور. جنت لابسه بنطرون مال حوامل ووياه بدله قصيره مال حوامل لاول مره البس بالطلعه لبس مال حوامل.
ماجد ظل يباوع استحيت. عمه حميده كعدت يمي توصيني على اكلي وشربي. نجلاء: اليوم صدك مبينه حامل ماشاءالله يخبل عليج هاللبس بديتي تصيرين طوبه. عمه حميده: ولج انت صدك خبله طوبتيش توها بطنها كبرت. نجلاء: اقصد بدت تورم تسمن. يعني شكلها شكل حامل. عمه حميده: هي تصير طوبه لان حامل انت ليش طوبه؟ ماجد: اي والله. نجلاء: هاي شبيكم؟ شنو هالعنصريه والطائفيه العدكم؟ تره اني بتكم هي جنتكم ليش ماتراعون مشاعري مثلها؟
تحميل محتوى الموضوع
عرض نسخة صالحة للطباعة
أرسل هذا الموضوع إلى صديق
[28]
الدعوات : 2قوة السمعة : 10
رواية صبرا يا قلبي