رواية صبرا يا قلبي الجزء الأول للكاتبة روز الفياض الفصل السادس والعشرون
بقه ماجد على هالحال طول الليل واني خايفه وعمه حميده تضحك تكلي: النسوان والله امرهن عجيب شيسوون بيهن الرياجيل يبقن يحبنهم لتخافين ميموت. ذهب: اسم الله الرحمن لاتكولين هيج عمه الله لايكولها. ضحكت حيل كالت: مااعرف اسجل بالموبايل جان سجلتله هالحجي حتى يسمعه يوميه ويحمد الله ويشكره صبح ومسا.
ظليت طول الليل كاعده خايفه خاف يصير بي شي هو نايم واني نعساانه ميته بس مااكدر انام ماينطيني كلبي انام وهو بهالحاله رغم بعدني مجروحه منه حيل بس مو بيدي كل شويه اروح اباوع عليه واتطمن اصفن على صدره يتحرك معناها يتنفس الحمدلله. ليله سوده حسيتها. غفيت شويه وسمعته اذن الفجر حتى ماتسحرت ولاهو على نومته رحت باوعتله شفته نايم وجهه اصفر ظليت واكفه شويه اباوعله ودموعي تصب ياربي ليش يخليني اكرهه.
اتحرك شويه فتح عيونه شافني واكفه اباوعله اني رحت اتوضيت وصليت وبجيت واني ساجده لحدما ركبي بادت كلت: ياربي اكفيني شرها وشر كل شخص يريدلي الاذيه وخلصني منها ارزقها بزوج ثاني تلتهي بي عني وعن ماجد وتكفيني شرها. من كدما تعبانه ومالي خلك ومتعاجزه وجسمي يوجعني مديت ايدي على الكوشايه من القنفه خليت راسي عليها ونمت عالسجاده باحرام الصلاه. وره شويه اجه هو كعدني كلي: ليش نايمه؟
هنا كومي نامي عالجربايه هنا تتأذين. ماجاوبته كمت نمت عالجربايه باحرامي نعسااانه ميته حسيت بي نزعني الاحرام بس مابيه حيل احجي نمت حسيت ارتاحيت هسه من كعد مابي شي اكدر انام وارتاح. الساعه (ب11) اندك باب الغرفه سمعت صوت ماجد يكول: منو؟ رفعت راسي شفته نايم عالقنفه رجعت نمت هو راح فتح الباب. عمه حميده. عمه حميده: صلاوات على محمد وال محمد والحمدلله على سلامتك حبيبي شلونك اليوم؟ ماجد: الحمدلله.
عمه حميده: وبنيتي شلونها اليوم؟ خلصتها بجي البارحه عليك. ماجد: مانامت البارحه اشتغلت حراسات طول الليل تروح وتجي تشوفني خاف متت. اني ساكته مغمضه عيوني ومتغطيه وبكلبي اكول اسم الله عليك. عمه حميده: اسم الله عليك يابعد عمري لاتكول هالحجي هسه تظل تبجي والله انت ماشفتها البارحه شلون تبجي مثل الجهال خايفه عليك هههه. ماجد: تبجي علي يعني؟ شبيه مابيه شي الحمدلله.
عمه حميده: ان شاءالله مابيك شي حبيبي. شكد جنت مقهوره وضايجه بس ضحكت عليها كتلها شلون بكلبج هذا كلب السمجه كتلها مايموت لاتبجين انوب زادت تكولي اسم الله عمه لاتكولين هيج اموت كتلها خل يولي هذا مايستاهلج ماقبلت. ماجد: اهاا ليش هيج يمه؟ ليش اني مو ابنج اكو ام تكول لجنتها ابني مايستاهلج؟ افاا عليج خربتي الاول والتالي. ضحكت هي كالت: يالله روح غسل وخليها تكوم تغسل كافي.
ماجد: يالله خل تكوم اني يمها لو مانعها؟ عمه حميده: مو احنه زعلانين منك شبيك؟ ماجد: انتو منو؟ اني اتذكرت حجينه اني وياه قبل وضحكت على كيف وعمه حميده ماتدري اصل الموضوع شنو بس ضحكت عالواهس وكلتله: اني وامك بعد منو. هو خرب من الضحك لان عبالك تدري بحجينه قبل اني لزمت نفسي كوه حتى مااضحك مااريد اخرب ابرستيج الزعل وبعدني حاقده عليه ومقهوره منه.
راح هو للحمام اني هم رحت غسلت ونزلت شميت ريحة الحرمل بالبيت ومي ورد وصوت القران عالي جلدي قشعر. نزل ماجد كعد بالهول يم امه وعمه حميده اني رحت بالمطبخ ولبست احرام الصلاه مال عمه حميده وطلعت بالحديقه شويه بالشمس. كعدت شويه بالمرجوحه بعدين طلع ماجد.. كلت بكلبي اكيد يطلع شلون يصير تطلع ست الحسن والجمال بالحديقه وحدها.
اجه كعد يمي بالمرجوحه يحجي بالتليفون كل شويه يدكون عليه يسألونه وينه ليش ممداوم يكللهم مريض. اني كمت ردت ادخل للبيت هو لزم ايدي وكعدني بالمرجوحه ويحجي بالتليفون ويه ضياء خلص دار علي كال: يعني لشوكت نبقى هيج مانتحاجه؟ ماجاوبته جريت ايدي منه ودرت وجهي من الشمس كام هو وكف كبالي اني دنكت. ماجد: تره ميصير هيج راح يصير اسبوع وانت زعلانه حرام عليج مالي ذنب. باوعتله ردت احجي بس سكتت ودرت وجهي.
ماجد: زين باوعيلي عالاقل لهدرجه يعني؟ اذا هيج مالازم هالعيشه. اني عبالي راح يكول نتطلك انعصر كلبي رغم من صارت المشكله جنت اتوسل مااريده بعد بس المصيبه احبه. ماجد: مو صح هيج متنراد؟ الله ان شاءالله ياخذني ويفكج مني حتى ترتاحين. اني بجيت. ماجد: ادري ليش البجي؟ انتي متعرفين تحجين بس تعرفين تبجين؟ لو تردين بس تشلعين كلبي؟
ذهب: لا اشلع كلبك ولاتشلع كلبي انت كلت هالعيشه متنراد يوميه اني مفضوحه كدام اهلك وكدام صديقاتي مضروبه ومدمايه على شنو؟ شجابرني على هالاهانه؟ ماجد: يعني انت شايفه اني جنت بوعيي؟ لعد هذا السم اللي داذبه من البارحه لليوم شنو؟ سكتت ماجاوبته مسحت دموعي كال: جاوبيني؟ وهاي مال وديني لاهلي ومااريده تنسيها هاي انطيتجياها من الاخير حتى متعيديها اني رجال مااطلك وماعندي مره اصلا تبات ابيت غير بيتي. افتهمتي؟
وكومي دخلي جوه ماكو بعد حديقه بالنهار. رفعت راسي باوعتله كتله: على اساس بالليل من طلعت جان عادي. عفته ودخلت جوه نزعت احرامي جانت عمه حميده بالمطبخ ويه البنات التفتت علي: روحي غسلي وجهج صاير احمر من الشمس وتعالي خل اعلمج شلون تسوين مركة سمج. رحت غسلت وجهي ورجعت وكفت يمها هي تشرحلي واني صافنه الف فكره مرت براسي مااكدر اركز وياها وكل شويه تدمع عيوني وامسحها.
احبه ياربي ليش يأذيني بكلامه وتصرفاته؟ ليش هالشك؟ دخل هو راح للحمام اتوضا وطلع اني اباوعله هو واكف ينشف ايديه يم الدرج. شويه وشفته دنك ولزم كلبه اني انقبض كلبي رحت اركض عليه بعدني ماوصلت يمه وماحسيت الا زلكت زلكه معدله. كلها صاحت: الله. الله. كومني هو وعمه حميده شكد استحيت عالفشله. ماجد: تأذتي؟ هزيت راسي لا بس طبعا اتأذيت بس من الفشله استحيت اكول اتأذيت. عمه حميده: شبيج يمه؟
ذهب: زلكت عمه اكو مي بالكاع الظاهر. شفته لزم كلبه وركضت بس زلكت. عمه حميده: هااا اي كولي هيج هو كله منه كل البلاوي من جوه راسه طلع من الحمام رجليه مبلله اجيتي انتي ام كلب السمجه تركضين طبعا تزلكين هو لاكيها خوش طريقه كل مايسوي سالفه يلزم كلبه حتى تنقهرين عليه وانت تصدكين وترحين تركضين. ماجد: بالله انتي عمتي لو عمتها بس فهميني؟ هي ناقصه وانت تشحنيها علي كل شويه؟
عمه حميده: المصيبه ماتوب شكد اشحن وانصح وافهم واعلم بس دقيقه ويخلص شحنها ههههههه. ضحكت اني هو هم ضحك دنك باس راسي وكومني ردت اصعد للغرفه. عمه حميده: وين رايحه؟ ذهب: ابدل ملابسي يمه كلها ريحة سمج وهسه اتبللت من وكعت. عمه حميده: روح صعد مرتك لاتوكع. هاي البنيه شبيها ياربي يوميه سالفه تصير بيها الله ينتقم من اللي جان السبب.
اني صعدت هو صعد ورايه دخل وسد باب الغرفه اني دخلت للحمام سبحت ولبست البرنص وطلعت هو كاعد يباوع عالتلفزيون فتحت الكنتور طلعت تنوره جينز وتيشيرت سمائي ورحت لغرفته لبستهم ورجعت كعدت امشط شعري هو يباوعلي. ماجد: انت فد وحده متخافين من الله. اني وكف كلبي كلت هسه قصه جديده. ماجد: مو تصلين وتصومين؟ ذهب: ياستار يارب. شسويت هالمره صار بيها صلاه وصوم؟ ماجد: مادام ياستار كومي بدلي ملابسج.
ماجد: خلص لاتبجين آسف. آسف مو قصدي. اصلا كل اللي صار ونص اللي صار اصلا مااتذكره والله ماجنت بوعيي. حضني حيل وظل يبوس بيه ويمسح دموعي ويبوس راسي. ماجد: والله حرام عليج تحاسبيني وتظلميني هيج على شي مالي ذنب بي مو بوعيي ليش ماتصدكين. انوب ضحك وسكت ورجع ضحك وسكت باوعتله. ماجد: اضحك على امي حميده الصبح من كالت مو احنه زعلانين منك اني وامك. ضحكت اني واتذكرتها هو باس خدي.
ماجد: تره تحبج هي حيل تحسج بتها خطيه الله مرزقها اطفال. بجيت باوعلي كال: وبعدين؟ مو تونه زينين وضحكنه انت على كل شي تبجين هاي كتلج تحبج بجيتي لو كايلج متحبج شلون؟ ذهب: اني هم احبها هوايه. ماجد: انت تحبينها وهي تحبج واني محد يحبني؟ ماجاوبته غلست كال: تكولين لو اخذ راحتي بعد هو اليوم خرب لاصيام ولاعباده. ذهب: كافي ماجد. ووخر. تره عيب عليك لو عرفت عمه شتكول علينه؟
ماجد: ليش عيب شمسوي؟ رجال وبحضنه مرته شتتوقع يعني؟ شيصير يعني مثلا يلفون دولمه؟ ضحكت كتله: كافي. عيب هالحجي مصختها وانت تدري استحي. ماجد: كله منج انت تخليني احجي وبعدين هسه ماكلتي قرارج شنو؟ ذهب: ياقرار؟ ماجد: تحجين لو.؟ ذهب: حبينااااك. ماجد: لا متفيدج امي بعد صارت قديمه هههه. ذهب: مااكول اكثر من هيج تره لهسه اني حاقده عليك ومقهوره منك ومااكدر اسامحك.
باوعتله ودموعي تصب واشهك بالبجي كتله: هاي اخر مره تسويها ماجد وتمد ايدك علي والله والله المره الجايه تره لاتتوقع اسكت لو لساني يجي على لسانك بعد لو شيصير، مرة اللخ بعد كل شي ينتهي زين لو لا؟ حضني حيل وباسني. ماجد: ماكو مره ثانيه خلص لاتبجين شلون ينطيج كلبج تعوفيني وتدرين اذا تعوفيني اموت؟
انت مو تكولين اذا عفتج لو صارلي شي تموتين شلون هسه تحجين هيج؟ شلون تردين تروحين لاهلج وتخليني؟ عادي يعني اموت متنقهرين عليه ميوجعج كلبج؟ ذهب: كلبي خلص منك ومن مرتك ماعندي بعد طاقه اتحمل اهانه جديده اني مو جاريه حتى انضرب وانهان كل مره بدون سبب يسوه ولازم اسكت واتحمل واتصرف كأنه ماصاير شي. وياريت على سبب يسوه. كلبي خلص منك ومن شكك.
ماجد: اسم الله على كلبج هاي انت ام كلب الصاحي، لعد اني شكول؟ بعدين منو مرتي؟ انت مرتي وام بيتي وبس وهي حسابها بعدين مادام الموضوع وصل للسحر. وانت مو جاريه انت مرتي حبيبتي وام جهالي ان شاءالله كل هالامور راح تمر وتنتهي وتنسي بس انت لاتبجين، يعني انت متصدكين من اكولج كلبي يظل يوجعني؟ يعني الا اموت يالله تصدكين؟ حتى دواي مااخذه مالي خلك شنو اسوي يعني حتى ترضين؟ تره اذا متت انت السبب انت المسوؤله..
عمه حميده: لاحول ولاقوة الا بالله يايمه شجرالج متكليلي شنو انحسدتي الله يعوض عليج ان شاءالله لاتحجين شي لماجد ولا لاي احد. ظليت صافنه مافهمت شي. ذهب: هو اني شفتهمت حتى احجي لماجد. عمه حميده: يمه هاي الظاهر جان توه مشكل عندج حمل بس ربج ماكتب زلكتي نزل. حطيت راسي بحظنها فكرت يمكن الله ماكاتبلي انرزق باطفال مثلها. ويمكن الله كاتب لماجد يرجع اسراء لذلك هالاشياء تصير الله لايكولها اتخبل غير.
ذهب: يمه هذا حلمي. مره من حلمت عندي قفص وكل شويه يحط بي طير افرح بيه ويختفي لحد ماصاروا ( 3 ). عمه حميده: طلعي صدقه ودفعة بله حبيبتي وماجد هم خل يذبح ذبيحه لوجه الله حتى الله يدفع عنكم البلاء ويكفيكم شر العين والحسد. ثاني يوم ماجد وعمه حميده راحوا لبيت عمه ابو اسراء حتى يشتكون منها علمود سالفة السحر وتأخروا تقريبا( 3 )ساعات يالله رجعوا ورجعوا مالهم خلك ويصيحون.
نجلاء: ياا لهدرجه وينها ذهب بالله خل تسمعك تقبلين بالله اخذهم ينامون جوه؟ هزيت راسي لا. نجلاء: هااا اني ماحجيت شي هسه مرتك متقبل هي عدها احساس بالامومه بالفطره وذول الشواذي محرومين هههه. ماجد: اي طبعا تكلج لا تستحي هاي تستحي من خيالها مو مثلج ولامثل رجلج. نجلاء: هسه نام بالغرفه الثانيه شصار لو الا بحضنهااا؟ ماجد: اهاا؟ مرتي وبكيفي عيب عليكم تره ماخذين غرفتي وماخذين مرتي.
نجلاء: ابروح عزازج شسويتي لاخويه ويهيج يحبج؟ ذهب: والله ماسويتله شي هو هيج من اول يوم. ماجد: يالله خلصيني اخذي جهالج اريد انام. نجلاء: والله جذاب. اليريد ينام ينام باي مكان بس انت نيتك مو صافيه. ماجد: باع هاي. نجلاء: يالله ماما يالله كوموا خالكم بعد ماعنده صبر اي حقه اذا لابستله قميص نوم ابيض عبالك عروس مو مثلي والله خطيه فراس البسله دشداشة الغفير. اخذت اولادها ونزلت لغرفتهم جوه.
ماجد: انت مكيفه وتكلج اخذهم تكليلها لا بسيطه حسابج عندي اذا شفتهم بعد نايمين يمج الا اشلع اذاناتهم واذانج وياهم. ذهب: ههههههههه حلوين احبهم. جنه متونسين بوجود نجلاء يوميه نسوي شغله مره رحنه للصالون اني وياها. نجلاء: اريد مثل لون شعرج اريد اخبل فريس من ارجع واريد وصفه تضعفني كون مثلج اصير شيسويني صايره جني درام على كولت فراس يكلي من تمشين الكاع تهتز. صبغت شعري اسود ونجلاء اشقر.
بالليل رجع ماجد اني بالغرفه يم نجلاء والجهال كاعدين نضحك تسولف على زوجها وعالمقالب اللي تسويها بي. اندك الباب ماجد دخل ظل يباوع مستغرب اشكالنه. نجلاء: شبيك صافن تره اني اختك وهاي مرتك باربي ولو اني هم باربي بس السايز دبل. ماجد: كومي كومي بعد متكعدين يمها من اطلع انوب اقفل عليج باب الغرفه هاي مو صاحيه راح تخبلج لتكعدين يمها. راح صعد ورحت صعدت وراها دكيت الباب فتحته لكيته واكف بالشورت.
ذهب: اطلعلك ملابس تسبح اول لو تتعشى. هو يباوعلي ورافع حواجبه. ذهب: شبيك؟ معجبك لون شعري لو الكصه؟ علمودك غيرته حتى لتمل. ماجد : يخبل الحلو كل شي يلوكله وانت حلو. ذهب: كافي يالله غسل وانزل اتعشى. ماجد: مااريد ميصير العشا يتأجل؟ ذهب: لا حبي ميصير مادام معجبك شكلي. ماجد: لا بالعكس يخبل بس لازم اتعود عليه. بعدين بالليل كعدنه اني ونجلاء بغرفتها هي وجهالها حتى انومهم ميقبلون هي تنومهم وماجد ميقبل ينامون يمنه.
هالفتره جانت مستقره وهادئه ونجلاء خابصه البيت خبص وجانت من جانبي من شافت امها شلون متطيقني وعمه حميده حجتلها على كل اللي صار. نجلاء: ياا سوده عليه كل هذا شفتي عدنه شكد عيب الله يساعدج علينه ههههه. ذهب: اسم الله عليج. نجلاء: زين هسه ماكو حمل محاولتوا بعد. ذهب: من اخر مره صارت عندي خربطه صار شهرين ماكو منزلت رغم عندي الالام اخذتني ماما للدكتوره وكتبتلي لبر حتى تنزل. بس مانزلت.
نجلاء: اي طبعا تتخربط لعد الحاله النفسيه وين تروح. اكلج هذا فريس من اجينه لليوم دك علينه بس مرتين عبالك يريد يخلص من عدنه. بسيطه. ذهب: اني اكو ارقام غريبه دتتصل بيه. نجلاء: ديري بالج ماجد يعرف شيخلصج. ذهب: الله لايكولها الا يعلكني بالبنكه اخوج ماعنده تفاهم من يعصب راسا تصير عيونه حمر وتصير ايده جاكوج.
نجلاء: صحيح اي والله هههههه، اتذكر من خطبني فراس واجانه مره وكعدنه اني وياه بالديوانيه والباب مسدود وهو اجه مااسولفلج شسوه بينه لهسه فراس يخاف منه وصلخني ذاك الكف المعدل عبالك مدري شمسوين مو كاعدين ونسولف. ذهب: عفيه. عفيه. خوفيني بعد خاف اني مااخاف منه. نجلاء: سبحان الله بعكس رائد الله يرحمه جان بااارد ولا عليه بأحد بس شيمائو العوبه جان متعجب بيها شتكول هو موافق جان خروف الله يرحمه.
ذهب: عزا صخام. اخوج متوفي كولي الله يرحمه. نجلاء: كلت والله. كلت جان خروف الله يرحمه مسمعتيني؟ ذهب: ماجد طلع كلامه صحيح انتي تخبليني وياج. عمه حميده: وينهم، وينهم.. نجلاء: هنا عمه هنا تعالي. عمه حميده: عندي خبر لذهب يستاهل ذبيحه. ذهب: يالله سترك شنو يوم كولي؟ ماجد طلع ميحبني؟
نجلاء: ياا شوف حظي. تكولج خبر يستاهل ذبيحه بعدين شدعوه ميحبج ماجد لوما يحبج جان مو يوميه مكسرج جان خلاج بكيفج مثل سحيله ام الخلاكين من جانت عنده قبل. ذهب: مشكوره. مشكوره. على اساس حاطلي نوط شجاعه ماعبالك مكسرني. نجلاء: هههههه اندري عنج انت كله تفكرين بماجد عبالك الخلقه ماخلق غيره هاي لو عنده شعر جان شسويتي؟
ذهب: لاااا والله العظيم ازعل منج. مااقبل تحجين عليه. فديت الكرعه اني احلى مابي كرعته اصلا. والله بس هو الكرعه حلوه عليه لان هو محليها فديت كلبه. عمه حميده: اي عفيه يمه اي لتسكتيلها. هو منو مثله كافي هيبته. طوله. هدوءه. اخلاقه. منو مثله؟ دخل ماجد. نجلاء: هلا. هلا. باخوي الهيبه. هلا بالضلع. تعال تعال. انقذني شنو هاي اكلوني بكشوري مرتك وعمتك. ماجد: السلام عليكم. كلنه ردينه السلام واني كمت.
نجلاء: وين رايحه اكعدي خل احجيله مو تردين تشردين تستحين اني مااستحي اليوم الا اكوله. ماجد: شبيكم؟ ذهب: ماكو شي تعال حبيبي حتى اصبلك العشا نجلاء مصخنه ههههه. عمه حميده: ههههه. لا مالج حق من حقه يعرف مو بس يمنه. ذهب: يمه هاي انت على اساس وياي مو ويها؟
نجلاء: اكلتني بكشوري مرتك بس حجيت عالكرعه زعلت متقبل نحجي عليك. ازعل اذا تحجون على كرعة ماجد اصلا يخبل. تخبل عليه الكرعه هو محليها. كتلها على كيفج شدعوه تره هو اخوي بس مو حلو كوه خوما كوه. نجلاء: اخ. ليش هيجي ليش. لان نحجي الصدك؟ باس راسي وكلي: ديري بالج تصيرين مثل هاي الخبله خليج مثل ماانت عاقله وتحبين رجلج.
عمه حميده: ههههه ربي يحفظكم ويهنيكم ان شاءالله ويخليكم لبعض ويكفيكم شر العين والحسد ويرزقكم بالذريه الصالحه ياربي. ماجد: أللهم آمين. نجلاء: بروح ابوج ممسويتله سحر؟ عمه حميده: يااا ههههه عابتلج هي سحرها لسانها ادبها مو مثلج لسانج شطوله الله يساعد ابن اخوي على عليج. صعد ماجد وبقينه بس احنه. ذهب: عمه شنو الخبر نجلاء مخلتنه نفهم شي. نجلاء: يااا. اني شلي علاقه؟ مو انت ورجلج سويتولكم فلم عربي رومانسي قديم.
عمه حميده: اسراء انخطبت. نجلاء: صحيح والله؟ يامكرود خطبها؟ ذهب: يارحمة الله الواسعه. يمه افيييش. عمه حميده: الله يساعدج شكد كلبج متحمل عليها. ذهب: مو حقي يمه الله عليج؟ عمه حميده: اي والله يمه الله يلوم اللي يلومج. ذهب: بس خل تتزوج اوزع حلال المشاكل. نجلاء: والله ماجد مسويلج غسيل دماغ طلعتي تحبي اكثر مايحبج. رحت صعدت وره ماجد فرحانه بالخبر دكيت الباب وفتحته لكيته يباوع صور زواجنه.
ذهب: ها حبيبي متريد تتعشا؟ ماجد: اي جوعان وتعبان. ذهب: اني هم احس اجوع هالايام بصوره مو طبيعيه واتعب بسرعه خصوصا من اصعد الدرج. ماجد: محتاجين سفره نسافر نروح نغير جو شويه نرتاح شرايج نروح لتركيا؟ ذهب: ان شاءالله بس مو هسه من تسافر نجلاء عيب هسه هي بالسنوات يالله تجي ميصير نسافر ونعوفها. دك تليفون ماجد كذا مره مارد عليه. ذهب: تليفونك؟ ماجد: ادري عوفيه خل يولي مااريد ارد. ذهب: ليش اخاف شغله ضروريه؟
ماجد: لا. شيماء. ذهب: ياشيماء؟ ماجد: شيماء زوجة رائد. ذهب: زين رد عليها يمكن محتاجه شي. ماجد: تولي عوفيها ولتنطيها وجه. ذهب: شبيك وياها تره البنيه فقيره. ماجاوبني. وره اسبوع تقريبا جان يوم خميس العصر ماجد طلع وكعدنه احنه بالديوانيه اني ونجلاء وعمه حميده نكرز حب والجهال راحوا لبيت جدهم ابو علي. شويه وسمعنه صوت سيارة ماجد استغربنه ليش رجع بسرعه مصارله ساعه من طلع. دخل علينه للديوانيه عيونه براسه.
عمه حميده: ها يمه رجعت خوماكو شي؟ راسأ دخل لزمني من شعري بدون حجي ولاتفاهم نجلاء ظلت تصرخ وعمه حميده يردون بس يفكون شعري من ايده ماكو. اخذني من شعري من الديوانيه جوه لغرفتنه فوك واني اصرخ من الوجع وهو ولا عبالك. دخلني للغرفه وقفل الباب ونجلاء وعمه حميده ورانه يدكون بالباب يصيحون يتوسلون ماكو فايده. اني ماادري شنو الموضوع بس ابجي واصرخ موجوعه. ذهب: شعري ماجد. شعرري ماااجد. شعريييي.
كلمه يسمعوها وكلمه ميسمعوها بس اني بعد انهاريت ماحسيت بنفسي وكعت وشالوني انطوني ابره مهدئ ونمت ماحسيت الا ثاني يوم يالله وعيت كعدتني نجلاء اتريك. كعدت كوه اول مافتحت عيوني بجيت كتلها: عيني مااشوف بيها مااكدر افتحها. هي ماتحجي بس تبجي وتسكت بيه سمعت صوته بالباب مال الغرفه كتلها: مااريده يدخل. مااريد اشوفه عفيه ابوس ايدج لتخلينه يدخل اموت نفسي اذا اجه يمي مااريده.
وهي خطيه تبجي تكلي: بس اهدي حبيبتي مايدخل والله مااخليه يدخل بس اهدي انتي وارتاحي لاتحجين مو زين صوتج راح ميصير تحجين. اصلا ماافتهم حجيج. ذهب: اريد اروح للحمام. كومتني بس كوه اتحرك جسمي يموتني من الوجع كله يوجعني من الضرب كوه وصلت للحمام. دخلتني وبقت تنتظرني بره. اتفاجأت عندي نزف ضجت هسه وكتها نزلت صارلها ( 3 )شهور ماكو حتى الابره مانزلتها بس من الضرب نزلت.
كمت اغسل وشفت وجهي عبالك جنت بحلبة مصارعه عيني زركه ومنفوخه لهذا السبب مااكدر افتحها ومااشوف بيها وحلكي من الطرف بي دم مشكوك واذني الترجيه مشلوعه وشاكه اذني والدم نازل حتى على ركبتي واثار اصابعه على رقبتي من خنكني والخراميش مال اظافره عبالك وحش ومجلب بيه كلها مجرحه ومخرمشه ايديه ورجليه زرك من الضرب مال الحزام ظليت ابجي بالحمام فقدت اتخبلت ونجلاء بره تصيح وتدك الباب علي: كافي ذهب.
اطلعي حبابه. زين افتحي الباب. تره والله اذا متطلعين اصيحله يكسر الباب. فتحت الباب لزمتني هي رجعتني للجربايه اجت الممرضه خلتلي مغذي. اشرت لنجلاء اريد اسبح ملابسي كلها دم وجسمي.. نجلاء: اي ياعمري ان شاءالله راحت عمتي تجيبلج ملابس وشغلات من البيت بس هذا الدم نزفتي. ذهب: صار ( 3 ) شهور منازله حتى بالابر بس هسه نزلت.. اجت الممرضه سحبت مني دم. نجلاء: فدووه هي محتاجه دم شتسحبون منها؟
الممرضه: حتى نطمئن منكدر ننطيها ادويه بدون منعرف طبيعة جسمها شبيها مابيها. اشرتلها اريد شي ينومني مااكدر انام جسمي يموتني من اللالم. دموعي صبت اتمنيت اموت وارتاح. اجت عمه حميده جايبتلي ملابس وشغلات بوستني وكعدت. اسمعها هي ونجلاء بيناتهم تكلها: وينه؟ عمه حميده: بره سوده عليه مثل المخبل يروح ويجي ويبجي. نجلاء: شيبجي بعد؟ شيبجي؟ هاي بت الناس زين ما ماتت بأيده. هذا صدك اتخبل.
عمه حميده: الله لاينطيه السواها. اني جنت اوون من الوجع وبطني تأذيني وظهري وكل جسمي ودموعي مانشفت. وره شويه اجت الدكتوره سلمت. الدكتوره: ها ذهب شلونج اليوم؟ هزيت راسي الحمدلله. الدكتوره: شنو هالحادث الصارلج وكسرج هيج ياماما متأذيه انتي حيل جسمج كله رضوض وجروح. طاحت دموعي مااكدر احجي.
الدكتوره: يالله الحمدلله على سلامتج الحمدلله فحوصاتج كلها زينه اغلب الاصابات رضوض بس الرضوض تكون مؤلمه وتاخذ وقت اكثر من الكسور للشفاء والمفروض ننطيج مهدئات ومسكنات شويه حتى ترتاحين وتنامين بس تحليلج يكول حامل ياماما انت. من شوكت؟ وليش محد كال حامل حتى نعالج النزف وننطيج مثبت؟ اني عبالك جابت سجينه وخلتها بنص كلبي ظلت بس دموعي تصب.
عمه حميده: صلاوات على محمد. صلاوات. ماتدري بنفسها حامل متأخره عليها صار ( 3 )شهور مو يمه؟ نجلاء: اي قبل شويه كالت ( 3 )شهور حتى ضربت قبل فتره ابر علىاساس تنزلها ومنزلت سبحان الله. الدكتوره: سبحان الله هذا رزقها. ليش تبجين المفروض تفرحين اول طفل هذا؟ نجلاء: اي اول طفل قبله بس اسقاطات ميكمل الحمل. الدكتوره: لا ان شاءالله هالمره يثبت بس لازم هسه تروح تاخذ سونار حتى نتاكد من وضع الجنين ونعرف باي شهر.
ظليت بالحمام كاعده وابجي لحد ماارتاحيت باوعت بالمرايه جسمي كله ازرك من ضرب الحزام مااكدر انام على ظهري يأذيني ولا اكدر انام على جهة اليمين اذني بيها خياط وجهة اليسار هم كلها زركه من الضرب. دكيت الباب حتى تجي نجلاء تنطيني ملابسي. لبستني وطلعتني كعدت بالكوه عالجربايه وكعدت عمه حميده تمشطلي واني اوون من الوجع وابجي. حتى راسي يوجعني من كدما يجر بشعري كطع شعري.
نجلاء بوستني وسلمت علي وكالت الجهال بحدهم خطيه وراحت. اجت نسرين بس دخلت صرخت واتحنطت من شافتني انصدمت. نسرين: يابعد كلبي مااردي والله توه ضياء خابرني كلي مريضه بالمستشفى روحيلها بحدها. بجيت من شفتها وماادري شكول شبيه هيج حالتي. وهي هم متسألت شنو صار اكيد تعرف هو ميضم شي على ضياء اكيد حجاله.
وره شويه اجت الممرضه تاخذني للسونار كوموني لبسوني عبايه فوك بيجامتي وخلوا على راسي شال ورحنه اني مدنكه ماشفت منو واكف بره يم باب الغرفه. دخلوني للسونار عمه حميده ونسرين وطلعوا. الدكتوره: سلامات. سلامات. ليش هيج صاير بيج ذهب مو اسمج؟ هزيت راسي اي. الدكتوره: ذهب اسم حلو. ذهب حامل مو ومتعرفين باي شهر؟ هزيت راسي اي. الدكتوره: هسه نشوف. ليش متحجين ذهب سمعيني صوتج منو سماج هالاسم الحلو؟
طاحت دمعتي اشرتلها على بلعومي حتى تفهم مااكدر احجي. الدكتوره: متكدرين تحجين. هاا. يالله هسه نبدي بسم الله. بدت تمشي السكانر على بطني كالت: هذا البيبي شوفي ماشاءالله هسه بالشهر الثالث وكل راس شهر تدخلين بشهر جديد يعني بعدلج اسبوعين وتخلصين الثالث وتدخلين بالرابع ماما. لازم متتحركين بهالفتره وتنامين على ظهرج حتى يثبت لان حملج بي خطوره. ديتحرك تحسين بي؟ هزيت راسي لا الدكتوره: هسه نسمع النبض.
خلت الجهاز على بطني وسمعنه صوت النبض بس جان غريب. الدكتوره: النبض مزدوج خل نعيد السونار ان شاءالله ماكو شي. انقبض كلبي التفتت عالشاشه من خلت السكانر على بطني وغيرت اتجاهه. الدكتوره: مثل ماتوقعت هذا البيبي الثاني. مافهمت شنو كالت هزيت راسي. الدكتوره: توأم حبيتي مبروك. بجيت مدري افرح مدري انقهر على توقيت هالحمل اجه بهالوقت ليش. الدكتوره: ليش تبجين حبيبتي؟
اشرتلها عالقلم انطتني قلم وورقه كتبتلها: (مااريد احد يعرف توأم لحدما يثبت الحمل). الدكتوره: اكيد ماما هذا شي خاص بيج. كتبت التقرير وانطتنياه آخذه للدكتوره. خلصنه اخذوني لغرفتي اني مدنكه وصلنه للغرفه سمعت صوت ماجد ماادري شصار بيه حتى صوته مااريد اسمعه مااتحمله دخلوني للغرفه كومتني نسرين ظليت ابجي حيل من اتمددت على ظهري يأذيني حيل يحركني وهي خطيه تهدي بيه.
نسرين: يالله حبيبتي اتحملي شويه لخاطر الطفل شنو ذنبه هالبجي يأذيه لاحول ولاقوة الا بالله. زدت بالبجي هذا الطفل إلى اجه بهالوقت الا هسه يبين زين لو مو زين توقيته؟ ياربي لااعتراض على حكمتك بس ماظل بيه عقل ياربي لو تموتني وتخلصني لو تفكني برحمتك مااكدر اتحمل كل هالاهانه والذله اني اللي جنت عزيزه محد بمعزتي ومحد مصيح علي لو ضاربني هسه يوميه انضرب وانهان.
نمت غفيت دخت من البجي وتعبت. توني غافيه اجت الممرضه تاخذني للدكتوره كعدت كوموني الا ثنين يكوموني واثنين يكعدوني مااكدر اكوم وحدي ومنين ميلزموني ابجي ومنين ماانتجي لو ادور اتوجع وابجي حسيت الموت ارحم. دخلوني للدكتوره دخلت وياي عمه حميده نسرين رايحه. الدكتوره: ها ذهب شلونج؟ شلون هالاسم المميز هذا مثل صاحبته. مبروك عالحمل بس لازم تنتبهين متتحركين اي حركه مالها داعي. وتبقين نايمه على ظهرج زين عيني؟
التفتت على عمه حميده كلتلها: بعد اسبوعين تخلص الثالث وتدخل بالرابع ان شاءالله خلال هالاسبوعين مااريد حركه بس للحمام. وتبقى نايمه على ظهرها وماكو اي تعب اي بجي واي اخبار مو حلوه مو زينه ممنوعه تره مبينه نفسيتها تعبانه وحملها خطر متبقى وحدها دائما احد يكون وياها واريد تغذيه جيده ومضاعفه انت هسه مو وحدج نعتبركم نفرين وتاكلين اشياء مفيده.
اني طول ماهي تحجي اكول ياربي كون متكول توأم اصلا بدون شي ميقبل يطلكني انوب حامل واذا توأم لو اموت كدامه مايطلكني. كتبتلي علاج ولازم ابقى بالمستشفى هالاسبوعين لحدما يثبت الحمل ويوكف النزف. رجعوني للغرفه اجت الممرضه تخليلي مغذي زرفت ايدي على وريد ميبين لان ايدي مورمه وزركه من ضربة الحزام جربت بايدي الثانيه كوه حصلت وريد وزرقت ابره بالمغذي وابره بالوريد.
عمه حميده كعدت تقره قران بصوت ناصي بس مسموع اني اوون من الوجع اريد انام مااكدر ومااكدر اتكلب حتى. حسيت بديت انعس يمكن خلولي شي بالمغذي حتى انام غمضت حتى قبل لاانام لان عيني توجعني مااكدر افتحها سمعت الباب اندك بس ماانفتح معناها مو دكتور. كامت عمه حميده تشوف منو سمعت صوته حتى صوته كرهته على كدما جنت احبه كرهته.
اوون مااكدر من الوجع البيه بس مغمضه عيوني بلكي انام سمعت صوته يمي بدون مايحجي صوت انفاسه اعرفه صوت مشيته هو نفسه. نفس الدفو الجان بي من جان يحضني حسيت بي. بس كرهته ومااشتهيه ولا اشتهي اشوفه ولا اسمع صوته ولااحجي وياه. طاحت دموعي غصباً عني من سمعته بجه بعد عكبيش يبجي عكب ماكرهته.
تحميل محتوى الموضوع
عرض نسخة صالحة للطباعة
أرسل هذا الموضوع إلى صديق
[25]
الدعوات : 2قوة السمعة : 10
رواية صبرا يا قلبي