رواية صبرا يا قلبي الجزء الأول للكاتبة روز الفياض الفصل الثالث والعشرون
وصلني ماجد للستيج وكعدني وكلي: اذا تعبتي لو حسيتي بشي اتصلي ولتطلعين ابقي بمكانج. وراح وصى عليه فطوم والبنات ورئيس القسم ماخله احد فضحني. وطبعا بيومها صرت حديث الساعه كل شويه احد يجي يسألني شنو صاير شبيج واكولهم: وكعت من الدرج.
الشله انصدموا بوضعي خطيه حجيتلهم اللي صار كتلهم: انتو خواتي لذلك حجيتلكم بس هالحجي بيني وبينكم لان ماعندي احد احجيله محجيت لماما وابويه علمود ليخافون ويكبر الموضوع وماجد ينحرج. فاطمه: ميخالف حبيبي لتضوجين بعدكم زغار الله يرزقكم دزرن جهال ان شاءالله. خلصت امتحانات وخلص الدوام وكعدت انتظر النتائج الوضع جان غريب بين ام ماجد وبيني ابد مرجعت لطبيعتها ويايه ومااعرف شبيها.
متحاول تتواصل وياي حتى من احاجيها مترد علي ولا تعبرني ومن تشوفني ادرس تهز ايدها واذا انطيها دوامها متقبل تاخذه واذا تأخر ماجد متقبل اني اوكلها. الموضوع جان مضوجني بس ماادري شسوي ولا اعرف سبب تغيرها ولا اكدر احجي لماجد خاف يكول تشتكي من امي. هي بدت جلسات علاج طبيعي بس مو منتظمه بسبب شغل ماجد فراح اشترالها الجهاز وكلي: انتي سويلها بالبيت اذا اني مموجود.
بس مرتين سويتلها بعدين ظلت متقبل. من اجه كتله: حبيبي تره خاله متقبل اسويلها اي شي لاتاخذ مني دوه ولاتاكل من ايدي ولا حتى العلاج الطبيعي تقبل بي. استغرب هو كلي: ليش شبيها شصاير؟ ذهب: والله مااعرف من يوم خطبة رنا هاي حالتها هيج اتغيرت انت احجي وياها يجوز اني مضوجتها بدون ماانتبه لان بدون العلاج تره ميتحسن وضعها اني مردت احجي واضوجك بس الوضع بعد مو مال اسكت اكثر لان هي عدها علاج لازم تنتظم عليه.
ماجد: ان شاءالله. نزل ماجد حجه وياها عالعلاج الطبيعي وصعد ضايج بس اني ماسألته ماردت احرجه. ثاني يوم سويتلها جلسه واستمرينه على هالوضع تقريبا شهر الله هاديها وبدت تتحسن ايدها وحتى حجيها بده يتحسن حجيها صار واضح ومفهوم وماجد فرحان حيل واني فرحانه علموده. بعدين فجأه قررت تروح لبيت اختها واتصلت عليهم اجوا اخذوها وماجد جان بالشغل همه اتصلوا بي وبلغوه رجع ماجد وجان مستغرب مثلي موضوع روحت امه لبيت خالته.
ماجد: ليش شكو؟ ذهب: ماكو بس ردت اسوي تحليل يعني في حال اكو شي. ماجد: يعني قصدج تحليل حمل؟ استحيت هزيت راسي اي كال: كولي والله؟ ذهب: شنو كولي والله؟ اني شمدريني اكو لو لا اني اريد اتأكد لان تأخرت. رحنه للمستشفى وسوينه تحليل دم وكعدنه ننتظر وطلعت النتيجه حامل. ماجد: هالمره ابد مااريدج تتحركين ولاتنزلين جوه اذا اني مموجود لاطبخ ولاغيره حتى سباحه ماكو الا من ارجع. زين؟
ذهب: ههههه يعني ابقى وحدي مثل الطنطل فوك وجماله ابقى بدون سباحه ليش شدخل السباحه؟ ماجد: خاف تدوخين وانت وحدج خاف تزلكين خاف يصير اي شي مااريد حركة ابد. ذهب: ههههه شرايك تربطني عالجربايه حتى مااتحرك. ماجد: ياريت اكدر بس شسوي كلبي مينطيني. ذهب: هههههه. لهدرجه هالموضوع مهم بالنسبه الك؟ ماجد: اكيد هاي سنة الحياة بعدين بيتنه يحتاج شويه ازعاج ههه. ذهب: الله كريم..
زين حبيبي وخالتي مو لازم تروح تجيبها تره صار شهر وانت ولامره رحتلها ميجوز تره هاذي امك مو اني اعلمك ماجد انت جنت متاكل اذا متوكلها قبلك عالاقل فرحها بخبر الحمل هي امك اكيد تفرحلك. ماجد: زين شسوي اذا هي متقبل ترجع واني مااريد اروح واشوف اختها وبنات اختها هناك.
ذهب: ميخالف حبيبي اتحمل شويه اضغط على نفسك اني مااريدك باجر اذا الله اخذ امانته منها بعد عمر طويل ان شاءالله تكون انت نادم على شي او قصور تجاهها تره انت باجر حتكون اب واني ام اذا الله كاتبلنه تقبل هيج نطلع واولادنه ميتعبون نفسهم علمودنه بعدين اعتبر نفسك رايح لبيت عمك مو خالتك. اتنهد هو وسكت وبعدين كال: كلامج صحيح.
الله كريم نشوف يعني قابل اني مااريدها لو اريد اخلص منها بس هي الله يسلمها ماادري شبيها قالبه حتى علي يعني اني ملاحظها وياج لتظنين مامنتبه بس مااعرف شنو تريد شنو السبب وشنو الحل. ذهب: ميخالف حبيبي اصبر عليها الدنيا دين وهي دنيتك واخرتك الله ميوفقك بحياتك اذا هي مراضيه عليك انت سوي العليك. ماجد: الله كريم.
عبدالله: لا ماصاير شي ان شاءالله بس العلويه زعلانه شويه. ماجد: زعلانه من منو وعلى شنو غير نعرف؟ ابو عبدالله: الام ماتزعل على اولادها بس يعني مرات تتضايق ذهب بتنه ويجوز مضوجتها بدون متقصد وتنتبه. اني ساكته متفاجأه اسمي دخل بالموضوع الله يستر ومقهوره ميته من القهر على تصرفها وياي فشلتني ودفعتني وكسرت ظهري. زينب خطيه تشوف دموعي كل شويه تبوسني اني لازمه ظهري تأذيت حيل.
ماجد: يالله بالله اني رجال اغلب وقتي بالدوام اذا صاير شي واني ماادري كولي خل اعرف حتى احاسبها انت امي اني مااقبل احد يضوجج او يتصرف وياج تصرف مو لائق. هي ساكته متحجي بس مدنكه وهمه يكلولها احجي مادام ابنج موجود والبنيه كاعده حتى اذا غلطانه احنه هم مانرضى. ماجد: احجي واذا ذهب غلطانه وياج بحرف متلوم الا نفسها هسه كدامج تتحاسب. حجت بس مسمعتها شنو كالت. ابو عبدالله: اي شنو الاسباب مترديها؟
ابو عبدالله: يالله عمي ميخالف امك. ماجد: مكايل شي ياعمي امي على عيني وعلى راسي انتو شفتوا فديوم اي قصور مني تجاهها؟ يعني هسه اجت تسلم عليها ودفعتها ووكعتها وهي حامل تونه اجينه من المستشفى الله يقبل؟ اكو داعي لهيج تصرف؟ يعني لو هسه يصير شي هي ترتاح من انقهر اني؟ هذا ثاني حمل واذا صار شي هي المسؤوله يعني المره الفاتت هي كالت لاهلها وكعت من الدرج حتى لتحرجنه هالمره شنو اكللهم؟
حجوا عليها ومقبلوا كلهم اني ساكته ماحجيت ولا كلمه اخر شي عمه ابوعبدالله كال: عمي انت بتنه الله شاهد نحبج ونعزج ونحترمج انت مربايه ومؤدبه ماتطلع منج العيبه خادمتها وحاشمتها وحاشمتنه احنه هم برغم كل شي صار لخاطر زوجج احنه منجازيج الله يجازيج بنيتي ويوفقج احسبيها علينه واعتبريها امج. اني ظليت ساكته بس حسيت بمغص خفيف خفت بعدين راح ارتاحيت.
ماجد: مو لان زوجتي والله بس توه واحنه بالطريق تكولي روح جيبها ميصير دنيتك واخرتك الله مايوفقك اذا مترضه عليك واتخيل نفسك بمكانها. هي ماعجبها الحجي وانحرجت لان كلهم وكفوا ضدها اشرت لساره توديها لغرفتها وراحت همه اترخصوا وكلوا لماجد طول بالك وياها وسلموا علينه وراحوا.
رواية صبرا يا قلبي الجزء الأول للكاتبة روز الفياض الفصل الرابع والعشرون
راح ماجد وراها اني كمت اتوضيت وصليت بعدين شلت السجاده واتمددت عالجربايه اسبح بالسبحه بس نعست مانايمه من البارحه غفيت. حلمت امشي بطريق والدنيا ليل ومااندل وين رايحه ولا اكو احد بس اني وفجأه شفت العلويه ام ماجد واختها جايين عليه اني فرحت بس من وصلوا يمي انكلبوا وحده جلب ابيض ووحده جلب اسود ورفسوني ابطني.
فزيت مرعوبه رعب مو طبيعي جسمي كله ظل يرجف اريد انزل من الجربايه مااكدر انزل رجليه من كدما ارجف ردت اصيح على وحده من البنات نسيت حتى شلون احجي متت من الخوف. ظليت بمكاني مخلوسه ردت اكوم اروح للحمام خفت وحسيت شي حار نزل ظليت مثل الصنم متحركت حتى ماوخرت اللحاف اشوف شكو ماردت اشوف شي.
بقيت على حالتي هاذي ماادري نص ساعه اقل اكثربس اقرا المعوذات واتعوذ من الشيطان لحدما سمعت صوت ماجد وعمه حميده عالدرج صاعدين دخلوا للغرفه بس شفتهم بجيت همه خافوا. عمه حميده: اسم الله يمه اسم الله ليش تبجين؟ ماجد: شبيج شصار؟ اني عبالك لساني معكود جلبت بي اريده يكومني. عمه حميده: شبيج يمه حبيبتي حلمانه؟ شبيج؟ هو سحبني اني راسا باوعت لمكاني لكيته فايض دم هي ظلت تصرخ ماجد سكت بس حضني ودار وجهي حتى مااباوع.
ماجد: احجي شصار؟ اني احاول اطلع الكلام بس مايطلع اخر شي اخذوني للحمام سبحتني عمه حميده ولبستني طلعت اخذني ماجد لغرفته لان البنات جانوا ينظفون الجربايه. عمه حميده: اسم الله عليج يوم شبيج شصارلج؟ غطيها وانطيني القران خل اقره عليها. كعدت تقره على راسي قران وهو كاعد مدنك مايحجي بعدين نزل. ذهب: جلاب. عمه حميده: اسم الله عليج حبيبتي ياجلاب حلم لو منو شسوولج؟
حجيتلها الحلم ظلت ساكته اجه ماجد كعد يمي بعدين رادت تنزل صاحت لماجد وره شويه رجع يمي وهي نزلت. اجه يمي ماجد عالجربايه باسني وظل يمسح بيده على راسي وعلى ظهري بعدين كلي: موجوعه اكو شي يأذيج؟ تردين نروح للمستشفى؟ هزيت راسي لا. هو اتنهد حيل وكلي: نامي ارتاحي لتخافين اني يمج. ماكدرت انام الف فكره براسي ومخنوكه. جابتلي عمه حميده العشا.
عمه حميده: حبيبتي كعدي اتعشي ماما يالله ماجد حبيبي صلوا على محمد يمه تعالوا اكلوا تره هي فقدت دم لازم تعوض يالله حبيبي لتضوج امي انت هاي قسمة ربك ميجوز نعترض عليها. مر هالاسبوع بكآبه وبطئ فطوم من عرفت خطيه اجتلي للبيت.
ماما مكتلها اصلا على موضوع الحمل هم تنقهر وهم خطيه ماجد ينحرج مااكدر احرجه بالنهايه هاي امه وهو كاسر عيني مااكدر احجي مدللني ويحبني ويحب اهلي وممقصر ويايه بشي حتى اول فتره من زواجنه جان مينطني مصرف بعدين اجه بيوم كلي: انت ليش متحجين وتكولين انطيني مصرف؟ ذهب: عندي ماما تنطيني مااحتاج.
ماجد: انت من طبيتي هالبيت صرتي مسؤوليتي مااقبل تاخذين من اي احد حتى لو امج اني اصلا ناسي هالموضوع ولامنتبه لحدما ضياء اليوم سأل عالراتب كال نسرين ماكله راسي على مصرفها غير تنبهيني. ظل وراها كل شهر ينطيني مصرف للكليه ومصرف إلى وهوايه وبالرايحه والجايه ينطيني اني مااصرفهم لان مااطلع لاي مكان وهو يوديني ويجيبني واذا ردت شي هو او ماما يجيبوه ولامره سألني وين مصرفج شكد صرفتي بالعكس.
ماجد: حبيبي اني مااريد شي يخرب حياتنه كل اللي صار اريدج تنسيه متذكرين بس الاشياء الحلوه. ذهب: مادام انت وياي مااريد شي بعد انت وبس اذا تعوفني اموت. ماجد: اسم الله عليج شلون اعوفج بس انت اللي خاف تعوفيني بعدين. ذهب: مستحيل. ماجد: لهدرجه تحبيني؟ ذهب: اكثر. ماجد: زين بما انه عيد زواجنه الاسبوع الجاي شرايج نروح للزياره حتى ترتاحين هناك فد يومين او ( 3 ). ذهب: كول والله؟ ماجد: والله. ذهب: ياريت.
ماجد: ان شاءالله. ذهب: حبيبي الله لايحرمني منك كول آمين. ماجد: آمين. وره اسبوع رحنه بس اني وماجد امه مقبلت تروح وعمه حميده خطيه كالت تبقى وياها انقهرت عليها جان عاجبها تجي. رحنه ارتاحيت اخر راحه جانت سفره حلوه حسيت بالراحه نفسيتي اتحسنت. وره مده جان عندي مقابله علمود وظيفه وماجد وداني بس طول الطريق ساكت ويتأفف. اني ماحجيت اخاف ينفتح موضوع الشغل ويتحجج وتصير مشكله بعدين.
وصلنه جان اكو هوايه ناس جايه للمقابله وهناك شفت ولد جان ويايه اجه سلم علي وعلى ماجد وبقه يسولف ويه ماجد عالتعينات وهالسوالف بعدين دخل للمقابله وطلع وراه اني دخلت وطلعت مشفت ماجد باوعت ماكو شفت بس الولد فسألته على ماجد وشفت ماجد جاي من بعيد اترخصت ورحت. رجعنه بس طول الطريق ماجد ولاكلمه ولاحرف بس حسيته يريد ينفجر وخفت اسأله شبي وصلني للبيت وراح.
ماجد: دقيقه عفتج بالمقابله رجعت لكيتج واكفه ويه هذا السلم علينه وتسولفين شحجيتي وياه؟ ذهب: آخ أيدي ايدي والله ماحجيت شي طلعت مالكيتك سألته عنك كال مااعرف وانت اجيت ماحجيت شي بعد والله. ماجد: ماحجيتي شي مو؟ دك تليفونه فاطمه صديقتي اكيد استغربت لان انكطع الخط وماحصلتني بعد لان هو كسر التليفون.
شاف رقم فاطمه هو عرف نفسه غلطان ترك ايدي وانطاني التليفون اني بعد ياتليفون يا فاطمه يابطيخ خليت ورحت لغرفتي دخلت وقفلت الباب. بليلتها حسيت عيوني بعد مااشوف بيها من البجي وهو هم مادك الباب ولا حاول يفتحه.. مامتخيله ممكن يشك بيه هو بنفسه ياما كال سألت عنج وكلولي هنياله الياخذها. هسه هو اللي يسوي هيج ويايه؟
مامستوعبه ولا مصدكه اجه يكسر ايدي لهسه تأذيني اصابعه عبالك بسامير الاثر بأيدي احمر كلما اشوفه ارجع ابجي بحياته ابوي ممصيح علي ولاضاربني. منمت للصبح اذن الفجر واني كاعده كمت اتوضيت وصليت سمعت صوته راح للحمام بجيت وكمت كلت خل انام لان راسي حسيته راح ينفجر من كدما بجيت. الصبح كعدت على دكة الباب باوعت للساعه (ب11 ) ونص فتحت الباب عمه حميده. عمه حميده: ها حبيبتي صباح الخير شنو اليوم ماكو كل هذا نوم؟
رواية صبرا يا قلبي الجزء الأول للكاتبة روز الفياض الفصل الخامس والعشرون
هو اشرلها البنات كاعدات ويانه عالسفره ياسمين وساره هي سكتت اني دمعت عيونها مسحتها وكمت بس ابقى اكثر اظل ابجي. رحت غسلت وصعدت لغرفتي وقفلت الباب بجيت ارتاحيت شويه كمت طلعت كل الملابس من الكنتور وبديت اصفطهم من جديد بالكنتور حتى الهي نفسي من التفكير وره شويه اندك الباب غلست اندك مره ثانيه ساره فتحته الها كالت: ماما حميده يريدك جوا. ذهب: ان شاءالله هسه انزل.
انتظرت شويه مااريد انزل بس عيب من عمه حميده نزلت. هي كاعده بغرفتها دكيت الباب كالت: فوتي تعالي. دخلت هي تشرب جاي. عمه حميده: بالله ايدج خل اشوفها. باوعت لايدي وضربت خدها. عمه حميده: ولج هاي ايده مو؟ شلون صارت هيج؟ شسوالج؟ ذهب: ماادري. طاحت دموعي هي صاحت على ساره: روحي صيحلي ماجد بره يم ابو جبار. اني كمت هي لزمت ايدي. عمه حميده: اكعدي مترحين اليوم اريد افتهم شصاير ايدج مزوركة ليش؟
ذهب: ماكو شي يمه لازركة ولاشي يالله اريد اروح اكمل ترتيب الكنتور. عمه حميده: اكعدي عوفي الكنتور هسه مطاير. دخل ماجد وسد الباب. عمه حميده: اكعد بالله فهمني هاي ايدها شبيها هيج؟ اني كوه لازمه دموعي ومنطيته ظهري. ماجد: هاي ايدي. عمه حميده: اي؟ ادري بيها ايدك شلون صارت هيج وليش؟ ماجد: من الزمها يصير المكان هيج. عمه حميده: لا بالله شلون يعني مافتهمت شنو من تلزمها يصير بيها هيج؟
ماجد: ماادري يمه ماادري هي من الزمها يبقى بيها الاثر ميروح بسرعه بشرتها حساسه. عمه حميده: هاي اني لازمتها صار ساعه حتى تحجي ماصار بيها هيج. ماجد: ماادري. عمه حميده: الزمها بالله كدامي خل اشوف شلون بالله. ماجد: اففف مايبين بس من اكون معصب يبقى الاثر. اني طاحت دموعي هي عصبت.
عمه حميده: اسكتي بلا بجي خليني افتهم واكعدي اليوم محد يطلع من الغرفه اذا متحجون شصاير. هاي مو لزمة ايد هاي كسرت ايد كاسر ايدها انت مو لازمها.. ماجد: عصبت عليها ولويت ايدها ارتاحيتي؟ عمه حميده: يا عزا ليش لويت ايدها فهمني ليش؟ احجي انت ليش عصب عليج؟ هو ساكت واني ابجي بس ماحجيت شي. ماجد: ماسوت شي اني جنت تعبان وعصبت عليها.
عمه حميده: ادري بيها ماسوت شي طول الليل والنهار وياها ماشفتها سوت شي بس اريد اعرف شصار وعصبت. لاهو حجه ولا اني حجيت اني اصلا مااريدها تعرف حتى لاتظل تلح حتى نتصالح لان هالمره غثتي حيل وأذاني. كمت صعدت لغرفتي وقفلت الباب. رجعت كملت ترتيب الملابس بالكنتور وره شويه اندك الباب غلست ماسألت منو حتى ابين نايمه. ماجد: فتحي الباب ادري بيج كاعده اللايت شغال مبين من جوه الباب. مارديت ولافتحت الباب.
ماجد: فتحي الباب ذهب اريد اخذ ملابسي. باوعت صحيح ملابسه هنا. اخذتهم وفتحت الباب بين الغرفتين خليتهم بغرفته ورجعت هو سمعني فتحت الباب الثاني دار من الغرفه بس مالحك لان قفلت الباب. ماجد: فتحي الباب ذهب تره عيب تقفلين الباب وتخليني بره هاي هم غرفتي. اني ضجت مااريد افتحله الباب بس مااريد انطيه عذر لو حجه علي حتى باجر يطلع الغلط مني كمت فتحت الباب بسرعه ووخرت. دخلت للحمام مااريد اكعد يمه ولااريد احجي وياه.
ظليت كاعده بالحمام هواي احتريت منتظره اسمع صوت الباب بلكي يطلع ماكو. دك باب الحمام ماجاوبت. ماجد: ذهب احجي بيج شي دختي؟ اذا متردين تره اكسر الباب؟ كمت فتحت الباب هو واكف بالباب. ماجد: شيسموها هالتصرفات مال الاطفال؟ ماجاوبته راسأ لزمني من ايدي. ماجد: اوكفي خل اشوف ايدج دقيقه. وكفت بدون كلام هو باوع لايدي خله ايده عالاثر وخرت ايده بجيت هو راد يحضني ابتعدت. ماجد: يعني احنه مايصير نحجي بدون بجي.
ذهب: ماكو حجي بينه. عفته ونزلت جوه رحت كعدت بالديوانيه لان عمه حميده نايمه فتحت التلفزيون وكعدت اباوع هو طلع راح للمعرض. طلعت عمه حميده من الغرفه اجت كعدت يمي كالت: نجلاء قبل شويه خابرت وراح تجي عالشهر الجاي ان شاءالله. ذهب: هلا بيها. وكعدت تسولف عنها اني ماشايفتها مااجت حتى من اتزوجنه. ظلينه على هالوضع يومين لا احجي وياه ولايحجي وياي غريب وضعه مو ماجد هذا الحنون اللي يخاف علي من الهوا.
يعني يعرف نفسه غلطان وحتى ماحاول يعتذر او يبرر ولاحتى حاول وراها يحجي وياي. حيل انقهرت بس كلت خليه براحته مادام هيج. وراها صادف اول يوم برمضان وبيت عمه ابو عبدالله مسوين فطور عائلي وهو طبيعي يروح لشوكت يعني ميطبلهم فراح هو وعمه حميده وامه ووداني قبل الفطور لاهلي ووره الفطور يرجع ياخذني.
خلصنه فطور اني جهزت نفسي وكعدت انتظر ماادري شوكت يجي وماعندي تليفون حتى يتصل علي ويكولي شوكت يجي ومن سألتني ماما كتلها تليفوني عطلان. صارت الساعه ( ب11 ) اجه اخذني رجعنه طول الطريق هو يحجي بالتليفون. دخلنه للبيت اني صعدت للغرفه ردت ابدل ملابسي اني ماانزع كدامه لحد الان استحي قفلت الباب. نزعت وبديت البس راد يفتح الباب عرفه مقفول دك الباب اني كتله: دقيقه شويه. رجع دك الباب حيل. ذهب: دقيقه بس.
لبست ورحت فتحت الباب وهو لزمني من شعري وماحسيت بس بحراره على خدي وحراره بحلكي ضربني: شتسوين صارلج ساعه قافله الباب ويامن تحجين؟ اني من الضربه وشعري بيده ويجر بيه بالغرفهماادري شصار بيه من الصدمة محسيت بشي بعد راسا دخت بس ترك شعري وكعت انضرب راسي بشي شنو ماادري بعد ظليت مااشوف بعد وره شويه اسمع صوت عمه حميده تصرخ بعد ماحسيت بروحي.
وره ماادري شكد حسيت بحجي وصياح يمي فتحت عيوني عمه حميده تبجي وهو مدنك بس اتذكرت شسوه بيه ظليت ابجي. عمه حميده: اسم الله يمه، اسم الله اني يمج لاتبجين مابيج شي ان شاءالله حبيبتي هسه نروح للمستشفى. ذهب: خل يطلع مااريد اشوفه خل يطلع. عمه حميده: يطلع يمه يطلع حبيبتي هسه. كام هو طلع وسد الباب. عمه حميده: كومي ماما كومي خل اغسلج كومي.
كومتني جسمي يوجعني ودايخه وراسي يوجعني دخلتني للحمام احس شي على وجهي بس ماادري شنو التفتت عالمرايه شفت وجهي بي دم خفت: وجهي شبي وجهي؟ عمه حميده: مابي شي مابي شي حبيبتي لاتبجين هذا راسج انضربتي بالميز ونزل شويه دم على وجهج. وكفت عالمرايه تغسلي وجهي وحلكي طالع منه دم ووجهي بي اثر ضربته طابع على خدي هي تسكت بيه طلعت للغرفه طلعتلي ملابس نظيفه ملابسي بيها دم لبستني وطلعت عبايتي.
صعدنه بالسياره اتوسل بعمه حميده توديني لاهلي هي ساكته وهو وساكت اخذنه للبيت ودخل السياره ردت احجي اعترض بس حسيت تعبت ونعست حيل فجأة. دخلت عمه حميده جابت الكرسي مال امه كومتني اكعد عليه ردت اكوللها اكدر امشي بس بعد ماظليت اشوف ظلمت الدنيا بعيني ماوعيت الا ثاني يوم كعدت لكيت عمه حميده كاعده يمي وتقره قران بصوت ناصي. عمه حميده: صباح الخير حبيبتي كعدتي؟ شلون صرتي؟
هزيت راسي زينه بيومها خلصتها بجي من الصبح لحدما نمت بالليل حتى ماتفطرت. ماجد كل شويه يطل بالغرفه يباوعلي وينزل اسمعه يحجي ويه عمته بباب الغرفه يسألها عني. عمه حميده: اسكت ولاكلمه مالك علاقه بيها بعد اذيتها تره هالمره مصختها وهي حتى تليفون ماعدها مو كسرته انت بعد ويامن سمعتها تحجي. هو سكت.
ثاني يوم عمه حميده كالت العصر نروح للشيخ خل يشوف شبيكم ليش هيجي اتغيرتوا عين ماصلت على النبي خلي يقره عليكم وينطيكم حرز شي. رحنه لبيت بي بره قاعه جبيره حيل وناس كاعدين بس مو هوايه ورجال جبير كاعد يقره عليهم واكو واحد ثاني كاعد بغير جهه هم يقره التفت علينه واشر لماجد تعالوا. كعدنه يمه ماسألنه شبيكم بس كال: اسماءكم؟
عمه حميده انطته الاسماء وهو خله ايده على راسي يقره وبعدين خله ايده على ماجد قره وخلص كال: بابا عليكم عين ونفس واكو عمل مو زين من نسوان مو غريبات من لحمكم ودمكم. ودار على ماجد كله: وحده منهم جانت ممهوره الك. عرفناها احنه اسراء ماكو غيرها.
انطانه مي مقري عليه قران كال المي هذا لماجد يشربه وره مايفطر ويسبح منه وحرمل وكال تقرون يوميه سورة البقره وسورة يس وسورة الرحمن على مي نظيف وترشوه بالبيت والمعوذات (7 )مرات الصبح ( و7 ) مرات بالليل والحرمل بس يوم الاحد والاثنين والاربعاء ( مرتين ) باليوم مره الساعه ( 9 الصبح) ومره الساعه ( 4 )العصر.
كال لماجد اذا شرب المي وظل يتقئ شي اسود عادي حتى يطلع منه الشي المو زين اللي مسويه اله راح يظل يتقئ لحد ميذبه كله. رجعنه للبيت وبدينه بالحرمل والقران والمي المرشوش وشغلنه القران بالبيت كله وماجد شرب شويه من المي اللي انطاه اله. اني بغرفتي ظليت اقره قران وره شويه سمعت ماجد يتقئ بالحمام مال غرفته ماسكت كل شويه يروح يتقئ اني خفت ليكون اتسمم نزلت اركض لعمه حميده لكيتها حاطه مي وتقره عليه سورة يس.
ذهب: يمه لحكيني تعالي شوفي ماجد يتقئ. عمه حميده: ياالله صلوات على محمد وال محمد ان شاءالله طلع منه الله لاينطيها ولايوفقها الله ينتقم منها. صعدت وياي فوك دخلنه عليه نايم عالجربايه ولازم معدته وكل شويه يركض للحمام هي دخلت وراه كالت: اي هذا سم اسود الله يسمها ان شاءالله. اني بجيت كتلها: خاف اتسمم؟
عمه حميده: آآخ ياكلبج كلب السمجه هاي وهو فاتح راسج قبل يومين لتخافين مابي شي هسه يذبه كله ويرتاح ان شاءالله لتخافين.