رواية صبرا يا قلبي الجزء الأول للكاتبة روز الفياض الفصل العشرون
ماجد: يالله كومي غسلي حتى هسه اخليلج ثلج عليها؟ رحت غسلت ورجعت هو من كل عقله راح جاب ثلج يريد يخلي على ايدي. كعدت عالقنفه ولزمت كتابي الهي نفسي مااكدر اباوعله ادري بس احجي وياه لو اباوعله اضعف. اجه هو كعد يمي يريد يخلي الثلج اني وخرت ايدي. ماجد: ليش؟ خلص عاد مو كتلج اسف مو قصدي. ذهب: اسف على شنو؟ ماجد: على إلى صار. ذهب: شنو إلى صار بالله؟ ماجد: صيحت عليج وأذيت ايدج زين هيج؟
ذهب: لو عالصياح لو ايدي مو مشكله بس اسلوبك وكلامك. ماجد: يعني لان كتلج ماعندج احساس؟ ذهب: وانت تشوفها كلمه عاديه لو اني اكولك هيج شتحس؟ تتقبلها عادي؟ هو سكت اتنهد بعدين كال: آسف مو قصدي. اني منطيته ظهري وابجي. ماجد: خلص عاد ليصير كلبج اسود. اني التفتت عليه بسرعه كتله: بعد؟ هم ماعندي احساس وهم كلبي اسود؟ ضحك هو كال: هاي اجيت اكحلها عميتها هههه، لا والله آسف فعلا مو قصدي.
اني اكلب بالكتاب وامسح دموعي كال: آآخ. درت عليه هو مغمض عيونه ومرجع راسه ليوره خليت ايدي على كلبه كتله: شربت الدوه؟ ماجد: لا. ذهب: انت ليش هيج تسوي؟ ليش تشلع كلبي؟ ليش تغلس عالعلاج؟ هو خله ايده على ايدي كال: ليش هو منو شالع كلبي غيرج. انطيته دواه وكعدت يمه اباوعله هو مغمض موجوع وكله بسببي.. اتدنيت يمه وخليت راسي على صدره وحضنته. ماجد: يعني الا كلبي يوجعني لو اموت يالله تحنين علي؟
ذهب: اسم الله لتكول هيج وتخوفني. ماجد: تخافين علي يعني؟ بس خلص منحجي بعد بهالموضوع كافي بجي اليوم بس خل نتمدد لان تعبااان. اتمدد عالجربايه واني كعدت يمه خله ايدي على صدره. ماجد: حبيبي؟ ذهب: امم؟ ماجد: محبيتيني؟ ضحكت وهزيت راسي لا ضحك هو كال: ولا شويه؟ ذهب: ماادري. ماجد: زين تعالي يمي بحضني عذبتيني من شفتج لليوم. اتمددت يمه وحضنته. ماجد: ليش من سألتج شنو كلتلج اسراء شنو سوتلج كلتي ماكو شي؟
ذهب: لان مصار شي شكول يعني؟ اجذب؟ ماجد: والحجي الحجته مضايقج تصرفها هي وخالتي مضوجج يعني حتى موجبوج بهديه حتى لو لخاطري؟ ذهب: منو كلك؟ ماجد: مو مهم منو كلي المهم عرفت. ذهب: هو اصلا محد جان موجود بس اني ونسرين وخالتي لو خالتي لو نسرين مو صح؟ ماجد: ضياء سولفلي، ليش سكتيلها على اسلوبها وكلامها؟
ذهب: لان مو مهم عندي كلامها واسلوبها لا تتوقع مني ارد على هيج حجي وهيج تصرفات اعتبرها مال اطفال ومو من مستوايه بعدين همه خطار شلون تريد اتصرف وياهم وهي جابت هديه بس نسيتها بقت جوه. ماجد: كل يوم احبج اكثر وكل يوم اتأكد اختياري صحيح واني محظوظ. شنو بالله هديتها؟ ذهب: ماادري والله مفتحتها شمرت بحضني علاكه سوده خليتها عالطاوله. ماجد: شمرتها؟ جيبيها بالله خل نشوفها. ذهب: هسه؟ ماجد: اي خل نشوف هديتها.
نزلت جبتها وانطيتها اله هو فتحها وطلع دشداشه تلعب النفس من التنزيلات اني محجيت شي بس بداخلي انصدمت شنو هالوقاحه. ماجد: منو انطاجياها اسراء لو خالتي؟ ذهب: مو مهم. طبيعي حيتصرفون هيجي ويمكن اكثر يعني جان اسلوبهم واضح من الخطوبه. ماجد: اسراء ممكن اعذرها لان اصلا هي ماعدها اسلوب بس خالتي عيب يعني اذا مو لخاطري لخاطر امي اختها. ذهب: ميخالف الحياة دين صير انت احسن منهم.
مر على زواجنه شهرين وبدت الامتحانات وماجد عنده سفره للصين وبابا راح يوديني ويجيبني هالاسبوع حتى ماجد ليظل يفكر ويبقى بقلق بس ماكو فايده لان عمته رايحه للعمره وهو جان يريدها تكون موجوده ويانه بغيابه والمشكله سفرته مستعجله ومفاجأه. ذهب: خلص لتفكر هو اسبوع وترجع ان شاءالله. ماجد: اي بالضبط اسبوع يعني ( 7 ) ايام (و6 ) ليالي ومدري كم ساعه شيخلصهم.
ذهب: ههههه صلي على محمد لتعقد الامور هاي بابا راح يوديني ويجيبني واي شي نحتاجه ابو جبار موجود وبابا هم ميقصر وماما حتمر علينه بعد شنو؟ ماجد: هم اظل قلق. ذهب: انت قبل شلون من جنت تسافر؟ ماجد: عادي امي حميده تبقى يم امي وعمامي موجودين والولد اي شي يحتاجوه يتصلون بيهم. ذهب: زين هسه نفس الشي ماكو شي اختلف بس امي حميده مسافره اني بمكانها. ماجد: الحجي سهل. ذهب: لهدرجه اني مو ماليه عينك؟
ماجد: مو شغلة مو ماليه عيني بس اني قلق عليج اكثر من امي. ذهب: ليش بابا راح يوديني ويجيبني يعني قبل مااتزوجك منو كان قائم بيه. ماجد: اعرف بس من جنت اسافر مااخاف على عمتي ولا امي من الوضع بس انتي غير انت زغيره وحلوه همه عجايز. ذهب: ههههههه تحجي صدك لو تتشاقه؟ ماجد: انت عندج كل شي سهل وعادي بس الرجال غير يفكر بكل شي وبكل الاحتمالات.
ذهب: استغفر ربك ولتفكر بهيج اشياء تفائلوا بالخير تجدوه بعدين الدنيا بخير تره ولو احتاجينه اي شي تليفون ونتصل بأهلي او بيت عمك وابو جبار موجود وكاميرات ليش الخوف بعد؟ ماجد: ياريت لو بيدي جان مسافرت لو جان اخذتكم ويايه. ذهب: تريد ابقى بالبيت ويه خاله حتى ترتاح؟ ماجد: ياريت تكدرين تأجلين الامتحانات؟ ذهب: لا اصلا الاسبوع الجاي الامتحانات هالاسبوع لازم ادرس. ماجد : خلص ابقي ادرسي بالبيت وارتاحي. ذهب: اوك.
ماجد: من هسه راح اشتاقلج اكيد مراح تشتاقيلي مو؟ ذهب: هههه لا طبعا مراح اشتاقلك. ماجد: والله؟ ليش هيجي؟ ذهب: هههه اكيد راح اشتاقلك مو زوجي. ماجد: بس لهذا السبب. ذهب: ليش اكو شي ثاني؟ ماجد: يعني مثلا لانك حبيبي وحياتي وابو جهالي ابو بيتي. ذهب: هههههه هاي شبسرعه صرت ابو جهالي؟ ماجد: ليش كولي ان شاءالله. ذهب: الله كريم. ماجد: اااخ منج شكد احبج وشكد متعبتني تعالي خلي انام.
سافر ماجد وظلينه وحدنه اني وامه والخدامات وابو جبار وماما وابويه يوميه يتصلون خاف نحتاج شي ويجون بين يوم ويوم حتى يطمئنون علينه. مرت يومين البيت وحشه هو يتصل عالواتساب بس الصوت يكطع واني احس مضيعه روحي افتر بالبيت جان يوميه يخبصني بالمسجات والاتصالات ويرجع للبيت ملهوف حتى نكعد سوه ونحجي هاليومين عبالك سنتين شيخلص الاسبوع. بهالاثناء اتصل هو: الو حبيبي. ذهب: الو هلو. ماجد: شلونج شلونها امي؟
ذهب: الحمدلله بخير انت شلونك؟ ماجد: تعبان. ذهب: اسم الله عليك لتعب نفسك الشغل ميخلص المهم صحتك دتشرب دواك؟ ماجد: اشربه بس تعبان مو من الشغل. ذهب: لعد شنو؟ شبيك؟ ماجد: تعباان كلبي من وراج. ذهب: اسم الله عليك لتكول هيج ينقبض كلبي وضميري يأنبني. ماجد: شيصير لو اتعذبتي فد ليلة لان تفكرين بيه لو مشتاقتلي لو ميصير؟ ذهب: حرام عليك اصلا البيت وحشه بدونك وماله طعم. ماجد: مااصدك اذني..
معقوله انت اللي تحجين ذهب مرتي؟ لو ادري من زماان مسافر. ذهب: كافي استحي. ماجد: يعني مشتاقتلي؟ ذهب: وبعدين بهالحجي؟ ماجد: زين نغير صيغة السؤال. اشتاقيتولي؟ ذهب: منو؟ ماجد: انت وامي هههه. ذهب: هاا ههههه اي اشتاقينالك اكيد. ماجد: الله عليكم؟ زين تحبوني؟ ذهب: منو؟ ماجد: انت وامي غير. ذهب: اي حبيناك. ماجد: الله الله الله اليوم احلى يوم واخير نطقتيها. ذهب: منو؟ ماجد: اقصد نطقتوها انت وامي ههههه.
اليوم شينومني باجر اذا خلصت شغل راح احجز وارجع باقرب رحله. ذهب: لتستعجل خلص شغلك براحتك. ماجد: توج تكولين الشغل ميخلص وصحتك اهم. ذهب: مو قصدي هيج ههههه. مكدر يرجع قبل الموعد اني طول هالايام انام جوه يم العلويه امه اخاف وحدي فوك واحس وحشه. اليوم يجي ماجد سشورت شعري ولبست فستان بنفسجي طوخ بسيط نص ردن ومن الخصر يبدي كلوش وطوله للركبه وبي ورد ابيض ونزلت يم امه انتظره.
سمعت صوت السياره وانفتح الباب طفرت من مكاني واحتاريت شنو اسوي رجعت كعدت يم امه هي تباوعلي لزمتني من ايدي بعدين ظلت تمسح على ظهري واني عبالك منتظره نتيجة امتحان سمعت باب المطبخ انفتح وسمعت صوته سلم عالبنات وهم يسلمون عليه اني كلبي ظل يدك وبطني توجعني كمت سويت نفسي الم بكتبي وارتبهم سمعت صوته دخل للغرفه اتحنطت. ماجد: السلام عليكم. ذهب: وعليكم السلام.
رواية صبرا يا قلبي الجزء الأول للكاتبة روز الفياض الفصل الحادي والعشرون
ماجد: امم وبعدين؟ ذهب: احبك. اتنهد ودار على امه وبعدين باوعلي كلي: امي مو يوميه تتعشى وتنام من وكت اليوم شعدها كاعده على حظي لهسه؟ اني ضحكت بصوت عالي متت ضحك اخذ امه للغرفه وانطاها دواها وصعدنه. فتح جنطته كال: هاي الجنطه بيها هدايا بسيطه الج ولاهلج ونسرين وضياء الصبح انتي فرزيهم على ذوقج. ذهب: شكرا تعبت نفسك. دار حضني كال: مااريد شكرا هيج بدون مقبلات اريد شكرا جزيلا حبيبي شكرا جزيلا حياتي.
حضنته استحي احجي وهو يباوعلي. ذهب: شكرا حبيبي. ماجد: كل التعب راح بس انت هيج تعذبيني اكثر وتصعبين علي الامور. حجينه وسولفنه شلون قضينه الاسبوع بعدين نام من التعب. وقربت امتحانات نص السنه وماجد كال بالعطله نسافر بما انه احنه مسافرنه سوه وهو طول الوقت مشغول لانطلع لا نزور احد لان اني دوام ودراسه وهو شغل. عمته حميده: ماكو شي منا منا؟ ماجد: شي شنو؟ عمته: مو وياك ويه بنيتي. ذهب: يعني شنو شي حلو قصدج؟
عمته: هههه اي حلو بس مو اكل لا. اشرتلي على بطنها.. اني باوعت لماجد وهو باوعلي اني استحيت واصلا شحجي دنكت ماجد رد عليها: بعد وكت عمه خل تخلص السنه وتتخرج والله كريم. عمته: هي مالها علاقه هي عليها تجيبه واحنه نربيه بس انتو اتشطروا واستعجلوا تره مابينه بعد ننتظر. سكت اني حسيته ضاج يعني لشوكت قابل ينتظر ويتحمل ويسكت. جنت احجي لفطوم بالدوام لان مااكدر احجي لاحد ثاني. فطوم: كله منج شمتوقعه؟
ذهب: ادري والله ادري بس استحي شنو اكله تعال اعزمه يعني؟ فطوم: والله احتار الولد وياج يتدنه تخافين يوخر تنقهرين. ذهب: ادري.. فطوم: خلص انلصمي كافي هو هم رجلج مدري شلونه شدعوه هالانضباط هذا كله خل يتلحلح شويه شمنتظر خل يتجرأ. خلصنه امتحان اخر يوم بقينه اني وفطوم نسولف. فاطمه: يعني باجر تسافرون لبنان؟ ذهب: لا عكب باجر ان شاءالله.
فاطمه: يالله ترحون وترجعون بالسلامه اتونسي مااوصيج وصيري حبابه خاف الولد يريد شي شيات. ذهب: يعني شنو شيات؟ فاطمه: لشوكت تظلين ثوله لشوكت اظل اعلم بيج لج صارلكم شكد من اتزوجتوا الله يقبل الولد لهسه صايم. ذهب: انجبي قليلة الادب صوتج فضحتينه صدك مخبله. فاطمه: انجبي انت وسمعيني اخذي وياج قمصان نوم ذول اللي بعدهم بجياستهم من يوم مااشتريتيهم حني عالولد تره والله حرام عليج حقه هذا. ذهب: اوووف.
فاطمه: انجبي وسمعيني عدل وطبقي مو بس اووف واوووف تره زين منه وساكت واحد ثاني والله يسويلج فضيحه بس هذا ابن اوادم لو واحد ثاني جان كال اكيد مسويه مصيبه ومتريد تنفضح. ذهب: عزا شهالحجي. فاطمه: لعد شعبالج هاي اني نصحتج لاخر مره اريد من ترجعون من السفر جايبه وياج جهالج. ذهب: هي كولها اسبوعين هاي اذا مرجعنه وره اسبوع بعد منين اجيب الجهال صدك خبله.
اني كمت سبحت واتعطرت وطلعت قميص نوم احمر طويل فتحات عالجوانب وخليت مكياج ورفعت شعري وظليت كاعده انتظره واقره ايات بلكي الله يهديني ومااتصرف تصرف يعفس الدنيا. نعست ماجد تأخر كمت طفيت الاضويه وخليت بس التلفزيون ونمت. وره شوية حسيته حضني فتحت عيوني هو: حبيبي نمتي؟ تأخرت عليج؟ هذا لزكه ميشبع من الحجي اريده بس يسكت شويه حتى اترخص ماكو.
ابتسمت وغمضت هو راح للحمام وبدل ملابسه ورجع فتح الاضويه خله تليفونه عالشحن كعدت اني رحت للحمام ورجعت اجيت طفيت الاضويه ورجعت اريد انام. ماجد: لا فتحي اللايت. ذهب: شكو؟ فتحت الاضويه واباوع شكو معقوله اكو هنا صراصير ظليت اتلفت. ماجد: تعالي هنا، اليوم شمسويه؟ رحت يمه عبالي اكو شي هو كاعد عالجربايه لزمني من خصري اني استحيت لان يباوعلي هيج. ذهب: خلص بعد سقط حقك تأخرت.
ماجد: لا والله انت اللي سقط حقج بعد من لبستي هالقميص معناها انت انطيتيني الضوء الاخضر واليوم لو انه لو هذا القميص. ذهب: نعسانه وانت تأخرت. ماجد: الا تردين تموتيني. ذهب: هههه اسم الله عليك. ماجد: تعالي خليني اشوف كل الالوان بلوه هذا اللوان بس يمي. ضحكت كتله: شرايك تخترع لون جديد واني البسه. رجليه طالعه من الفتحات كعدت ارتفعت الفتحه اني جريت القميص استحيت هو ضحك. ذهب: شبيك؟
ماجد: شوفي اني صايم من احتلال فلسطين واليوم افطر بيج يعني لتحاولين تغطين شي. ذهب: ماجد كافي عاد لتخوفني تره اني كوه لازمه نفسي. حضني كلي: معقوله بعدج تخافين مني؟ اني أئذي روحي وماأذيج كوني على ثقه. وبعدين. وبدينه بخطوه جديده المفروض تكون اخر خطوه وينتهي الخوف والخجل العندي بس اني جنت محاسه بهيج خوف وخجل بحياتي كلها.
ماجد جان بالحمام. اتحركت من مكاني شفت الفراش كله احمر صاير من الدم خفت انرعبت رحت دكيت الباب على ماجد كلي: دقيقه. بقيت واكفه يم باب الحمام حسيت شي نزل على رجليه باوعت شفت جوه رجليه فيضان دم. طلع ماجد كال: ها حبيبي؟ اشرتله عالجربايه اتعجب كال: هاي شنو؟ شصاير؟ ليش هيجي صار؟ ذهب: وهاي. اشرتله عالكاع جوه رجليه. ماجد: هاي شنو. حسيته خاف مثلي وفزع راسأ لزمني خاف اوكع كلي: لتباوعين للدم لايغمى عليج باوعيلي.
دخلني للحمام وكلي: تكدرين تغسلين؟ هزيت راسي اي. ماجد: معناها غسلي حتى اخذج للمستشفى. غسلت وبدلت ورحنه للمستشفى دخلت للدكتوره وحجيتلها اللي صار. بعد الفحص طمنتنه الدكتوره وكالت هاذي حاله نادره بين كل مدري شكد تصادف اكو هيج حاله اشبه بالنزف لكن هو مو نزف يعني بس بالبدايه بعدين تقل تدريجيا. كتبتلي علاج وطلعنه.
رجعنه للفندق بس دخلت للغرفه واتذكرت الدم حسيت دخت وبعد ماحسيت على روحي الا ماجد يمي كاعد ويضربني على وجهي على كيف. كعدت كال: ها حبيبي كعدتي؟ خوفتيني عليج. من كلي هيج استحيت وبجيت كال: ليش تبجين؟ شبيج؟ موجوعه؟ اكو شي يأذيج؟ هزيت راسي لا. ماجد: لعد ليش تبجين؟ شبيج؟ ذهب: مستحيه. ضحك كلي: مستحيه منين؟ مني؟ حبيبي تره اني وياج واحد. اني اخر واحد ممكن تستحين منه المفروض. يالله كومي خل نروح لغير غرفه. ذهب: ليش؟
ماجد: احسن حتى متفكرين بعد باللي صار وهاي الغرفه همه راح ينظفوها. يالله كومي. كل شي بيج مختلف حتى هاي حاله نادرة من بين مدري كم مليون تطلع حاله وحده وطلعت من نصيبي ههههه. سحبني من ايديه وكومني كلي: كل شي بيج مو مثل باقي البنات. انتقلنه لغير غرفه.. حسيت ماجد بليلتها مانام بقى قلق. وكل شويه يسألني شلون صرتي. كلما اتذكر اموت من المستحه كل البنات تتزوج بسكته بس حظي فضيحه.
ثاني يوم جنه متفقين نروح نسوي فحوصات إلى واله علمود حالة الاغماء اللي تصير عندي من اخاف لو من اشوف دم. واله علمود فحوصات دوريه كل مده يسويها علمود كلبه. نمنه يمكن وجه الفجر وبالكوه. مالحكنه انام ونشبع نوم لان عدنه موعد بالمستشفى ولازم نكعد من وكت حتى نروح نسوي الفحوصات. ثاني يوم رحنه للمستشفى نسوي فحوصات وسوولي كل انواع الفحوصات وراح ماجد سوه ايكو وضعه مثل ماهو المفروض عمليه بس هو ميقبل يسويها.
ذهب: ليش يعني متسويها وترتاح. ماجد: مسويتها قبل تردين اسويها هسه واني توني متزوج بعدني جديد هههه. ذهب: احجي صدك اني تره. ماجد: اني هم احجي صدك تره مااريد اموت واعوفج واعوف امي. ذهب: اسم الله لتكول هيج من عمري على عمرك. ماجد: شبيج اها شنو قابل متت صدك بجيتي. ذهب: تره متضحك. ماجد: اتشاقه شبيج احب اسمعج تكولين اسم الله عليك وهالمره من عمري على عمرك معناها طلعتي تحبيني صدك انت وامي هههههه.
رجعنه للبيت وبده الدوام ورجعنه لنفس الروتين الدوام والدراسه وماجد الشغل. السبت جان ماجد يداوم ويوديني لاهلي ويرجع ياخذني العصر او بالليل حسب شغله ومزاجه بس ميقبل ابات يكول: مرتي اتبات ابيتي ومااعرف ابقى وحدي. وبيوم جان ماجد طالع و جنت احجي ويه فاطمه نعست وغفيت حلمت عندي قفص وفرحت من شفت بلبل دخل بالقفص بس شويه واختفى واجه واحد ثاني وفرحت وهم طار وواحد ثالث وهم طار وظليت ابجي بالحلم.
الاولى: هنيالها يخاف عليها متطلع هو يدخللها للقسم. الثانيه: شوفي شلون لازمها من ايدها متعجب بيها. الثالثه: بس تره هو مبين عليه اكبر منها. انغثيت من حجيهم التفتت عليهم حسوا اني سمعتهم داروا وجهم وراحوا. انقهرت من الحجي وخفت من عيونهم. ذهب: ماجد طلعت صدقه؟ ماجد: لا والله نسيت هسه من نرجع انطيها لابو جبار وهو يتصرف. ذهب: اي عفيه لتنسه. ماجد: شبيج؟
ذهب: ماادري ضايك صدري من الحلم مال البارحه واحس الناس تراقبنه وحاسدتنه. ماجد: لتفكرين الله الحافظ. ذهب: ونعم بالله. عالعشا ماجد كال: باجر خطبة رنا بت خالتي. عمه حميده: ها منو كلك اشو مسمعنه؟ ماجد: عمي اليوم كلي باجر تعال. عمه حميده: محد كلي لحد خابرني؟ ماجد: بس الرياجيل النسوان غير يوم. عمه حميده: ها بيها الخير ان شاءالله. ثاني يوم ماجد راح العصر للخطبه ورجع بالليل وسولف عالخطبه لعمته وامه.
ماجد: عكب باجر النسوان تره حتى تلحكون ترتبون وضعكم. عمه حميده: ماعندي شي لاصالون ولا فستان بس اصبغ الشيب هههه. اني ساكته بس اسمع. ماجد: وانت ذهب؟ ذهب: شنو؟ ماجد: محتاجه شي للحفله تره بس باجر عندي عكب باجر الظهر اسافر. عمه حميده: وين مسافر يمه؟ ماجد: نروح اني وضياء لدبي نجيب مواد. عمه حميده: ها اي ان شاء الله ترحون وترجعون بالسلامه. ماجد: عبد الله راح يجي ياخذكم للحفله هي ابيتهم لان بس اهلنه.
بعد العشا صعدنه لغرفتنه بس اني دخت لزمت ايد ماجد حيل هو عرفني اتعود على هالحاله راسا لزمني. ماجد: دختي؟ متاكلين طبعاً تدوخين عبالك عصفور لكمتين وشبعتي. حسيت ماادري شبيه لعبت نفسي من اتدنه يمي ولزمني رحت للحمام واتقيئت لحدما حسيت روحي طلعت. هو واكف اباب الحمام غسلت وطلعت. ماجد: شنو شبيج؟ ذهب: يمكن لان طلعت اليوم بالمطر للكافتيريا اتبللت ملابسي واستبردت. شويه ورحت اتقيأت من جديد. ذهب: راح اموت.
ماجد: لبسي عبايتج خل نروح للمستشفى. ذهب: لا مااكدر. هسه انام وادفه اصير زينه. خله ايده على كصتي كلي: انت اصلا مو مصخنه لبسي بسرعه مدام بعد اكو وقت. لبست ونزلنه دك الباب على عمته وكللها هي خافت وكالت: اروح وياكم. ماجد: لايمه ظلي نامي وارتاحي احنه هسه نروح للطوارئ ونرجع بسرعه. عمه حميده: الله وياكم لتنسون تطمنوني يمه. طلعنه صاحت على ماجد اشوفها تضحك وهو يهز راسه.
ظلت تهلهل بالليل واني ماادري فرحانه وخايفه ومستحيه وكل المشاعر مره وحده. صعدنه لغرفتنه بالمصعد لان من ساعتها صار الدرج ممنوع عد ماجد وبدت قوانين جديده ماكو سهر ماكو تعبت ماكو حركه بس للدوام وبالدوام ممنوع المشي ممنوع الاكل الغير صحي جبس مدري شنو ممنوع مااشتهي شي و و و. ماجد: مبروك حبيبي. ذهب: الله يبارك بحياتك. ماجد: فرحانه؟ ذهب: لا احس مو مستوعبه يعني مجنت متوقعه. ماجد: بس اني فرحان.
ذهب: دوم ان شاءالله. ماجد: زين اذا رحتي لبيت عمي لبسي شي عريض مااريد بطنج تبين ولتلبسين كعب. ضحكت حيل من كل كلبي. ذهب: هي وينها بطني حتى متريدها تبين شنو بس اني من اول شهر بينت. ماجد: يعني خاف انت كل شي بيج مختلف بقت على هاي. ذهب: بس اني مااريد اروح، ماادري ليش مو متشجعه بعدين بصراحه اخاف انغث من تصرفاتهم.
رواية صبرا يا قلبي الجزء الأول للكاتبة روز الفياض الفصل الثاني والعشرون
اليوم خطبة رنا بت عم ماجد واخت طليقته. ولح عليه قبل ليسافر حتى اروح ويه امه وعمته لخاطر عمه. كللش مو عاجبني اروح بس لخاطره سكتت وقبلت مااريدهم يحجون ويكولون كطعية وزحمه من عمه. لبست فستان طويل ازرك جويتي وسشورت شعري ولبست الطقم اللي جابلياه وره الزواج واجه عبدالله ابن عمه اخذنه ورحنه لبيت عمه. دخلنه سلمنه وكعدنه لكيت نسرين موجوده وكعدت يمها نسولف واهلهم وكرايبهم كل شويه وحده تسأل عني وتجي تسلم..
بس بيت عمه ابو علي بعدهم محد جاي من البنات. نسرين: شكلج راح تنظربين عين كلهم يباوعولج لو يدري بيج ماجد طالعه هيج جان مخلاج تجين هههه. ذهب: اصلا ماجنت اريد اجي بس لخاطره ولخاطر عمي اجيت. نسرين: دكومي اوكفي هناك خل اصورج كم صوره ودزيها لماجد الله عليج.
رحت يم الباب وكفت وخليت ايدي عالحافه مال الباب ونسرين تصورني فجأه محسيت الا واحد دفعني ووكعت بكل قوتي على ركبي وايدي على حافة الباب لزمتها حيل حتى لا اوكع بس وكعت وانسد الباب على اصابعي حيل حسيت طلعت روحي من الوجع صرخت.. اجت عمه حميده تركض ونسرين اجو كوموني بس اني اتشنجت من الالم ركبي من وكعت صار جواهم غطا مال قوطية الببسي ولان وكعت بقوه حسيتها دخلت بركبتي احسها.
فتحت نسرين الباب وظلت تحجي وعمه حميده ظلت تصيح: منو هالخبيثه منو هالمتستحي اللي سوت هيج؟ محد حجه خالته وبناتها ولاجنهم ولاعبروني وحتى امه حسيتها ماكو اي رد فعل استغربت منها.. اصابعي عبالك دايستهم سياره كلهم دم ومااحس بيهم وركبتي مشكوكه من غطا البيبسي وحسيت دخت من شفت الدم. عمته: يمه شبيج دختي؟ بس لا صار بيج شي تأذيتي اعرف بيج حسبي الله ونعم الوكيل باللي سوتها الله لايوفقها لادنيا ولا اخره.
نسرين: اسراء من جنت اصورج شفتها وراج بس متوقعت هيج راح تسوي والله حقيرة. اني ظل جسمي يرجف لان انخفض ضغطي ومتت من المستحه والفشله والوجع. لبستني عمه حميده عبايتي وخابرت على عبدالله يودينه للبيت.. اني بقيت مصدومه برد فعل امه ولاعبالك اني زوجة ابنها ولاعبالك حامل ولاعبالك هي نفسها حتى مقبلت ترجع ويانه للبيت واني موجوعه. صعدنه بالسياره ظلت عمه حميده تحجي لعبدالله واني ابجي وبديت احس بالالم.
عبدالله: خويه اني اسف اعتذر وامسحيها بوجهي اني اخوج واني اخذلج حقج. ايدي ورمت اصابعي زرك واللحم كل مشيول والدم لطخ ملابسي والفستان انشك من الركبه وحسيت بشي حار انعصر كلبي عرفته بدون مااشوفه دخلنه للبيت اني راسا دخلت للحمام حتى اتأكد وفعلا طلع ظني بمحله راسا صحت على عمه حميده هي كاعده تشتكي لعبدالله. اجت ركض للحمام كالت: هاا شبيج لتكولين؟. هزيت راسي اي وبجيت.
هي طلعت راحت لعبدالله حجت وياه ورجعت كلتلي: غسلي غيري ملابسج خل نروح للمستشفى. صعدت مااكدر انزع ولا البس ايدي حالتها حاله صحت عليها صعدت خطيه تبجي هي نزعتني ولبستني وغسلتلي ولفت الحجاب على راسي ولفت ايدي بشاش لحد منوصل للمستشفى. رحنه للمستشفى كالوا اول شي اشعه سوي اشعه طلع عندي كسر بواحد من الاصابع والثاني خيطوه ( ٣ ) خياطات وركبتي خياطين.
وراها رحنه سويت سونار وطلعت النتيجه مثل مااني حسيت خلص نزل الحمل. انطوني علاج وضربوني ابره ورجعت للبيت نمت محسيت بشي بعد منا للليل يالله كعدت كعدتني عمه حميده خطيه مسويتلي عشا بس مكدرت اكل مااشتهي. دك تليفوني ماجد ماجاوبت وكلت لعمه حميده: اذا دك عليج كوليله نايمه لتحجيله اي شي. هو فعلا من شافني مارديت عليه اتصل بيها هي كلتله: اي رجعنه من الخطبة قبل شويه وذهب نامت.
اني رجعت نمت كعدت الصبح متأخر حتى مرحت للكليه من الليل كلت لبابا تعبانه مااروح ماحجيت لاهلي شي. الصبح كعدت لكيت ماجد متصل ( 3 ) مرات عباله بالدوام نزلت جوه لكيت عمه حميده تحجي وياه. اشرتلها اني بالدوام خاف يسأل عني وناسيه تليفوني بالبيت. وره ساعتين تقريبا رجع دك على تليفوني استغربت مو عمه كلتله بالدوام وناسيه تليفونها وبعد وكت على موعد رجوعي للبيت اذا مداومه.
دك على عمته شالته اني نايمه على جربايتها جوه واحس جسمي كله نحلان من الدوه ركبتي تأذيني واصابعي وبطني مغص قوي. اسمعها تكوله: مابيها شي والله لتخاف مابيها شي منو كلك انت منو كلك؟ معناها عرف باللي صار لذلك اتصل اكيد عبدالله خابره وحجاله عباله يدري. انطتني التليفون اني مكدرت احجي اختنكت بدموعي حجت هي وياه وسدته ورجعت خليت راسي بحضنها وظلت تقره علي لحدما نمت.
المغرب اني نايمه سمعت صوت بالهول اني بغرفة عمه حميده نايمه كعدت ردت اكوم افتح الباب سمعت صوت عبدالله ومرته رجعت لان ملابسه حجاب. همه هم مطولوا عمه حميده كلتلهم نايمه كعدوا شويه وبعدين راحوا. وره شويه سمعت صوت عمه تصيح الظاهر على العلويه ام ماجد يمكن اجت جابوها وياهم من اجوا.
عمه حميده: بنات اختج متنطين بيهم لو شيسوون بس حرام عليج انت مره مريضه وهاي البنيه امانه ومرت ابنج تره كافي قهرة ابنج من يجي هسه ويسمع باللي صار بمرته ويعرف ابنه راح من وراهم. وره شويه سمعت صوت بس مكمت بقيت نايمه بس جنه صوت ماجد معقوله رجع؟ نعسااانه مابيه حيل اكوم واشوف منو ظليت متلفلفه ونايمه. انفتح الباب باوعت ماجد!
كعدت وردت اكوم بس هو راسا اجه حضني اني جنت مااريد ابجي كدامه حتى لينقهر ويضوج بس من شفته مكدرت اسيطر على نفسي بجيت وهو حاضني كلي: لتبجين اني اعلمهم. طلع كمت وراه اصيح ملحكت عليه رجلي تأذيني عمه حميده راحت وراه ورجعت كالت: طلع اكيد راحلهم لبيت عمه؟ اتصلت عليه ميرد اتصلت عمه حميده عليه هم ميرد وره تقريبا ساعه رجع امه تعشت ونامت ولاعبالك اكو شي وضعها مخبلني بس مااكدر احجي ومالي خلك.
رجع عيونه براسه وظل يصيح ويغلط لحدما تعب حسيته. ذهب: وين دواك؟ ماجاوبني، رحت اني دورت بسترته وطلعته انطيته الدوه شربه. اني ساكته وكل جسمي يوجعني راسي من البجي وركبي وايدي حتى كلبي يوجعني على كدما مقهورة. باوعلي هو كلي: اني لحيت عليج ترحين. ذهب: الحمدلله على كل حال. ماجد: لو مرايحه جان مصار هيجي. ذهب: كافي عفيه كلبي يوجعني مااكدر اتحمل هالحجي. كام هو كعد يمي باس ايدي اني بجيت وعمته بجت.
بعدين خله ايده على بطني دنك باس بطني اني حضنته كتله: اذا تحبني صدك كافي لان والله اموت مااتحمل كلبي يوجعني لتسوي هيج وتأذيني مااتحمل اشوفك هيج.. مرت يومين الجو كئيب. اجوا بيت عمه ابو علي كلهم سامعين باللي صار. السبت مارحت لاهلي هم اجوا وشافوني اتفاجأوا وماما ظلت تبجي كل شوية وكللت: عين ماصلت على النبي. انحسدتي. ماردت احرج ماجد كدامهم كتلهم وكعت من الدرج. السبت العصر اجو عبدالله وزوجته زينب.
كعدت يمي بالغرفه خطيه وانصدمت من شافتني كلتلي: متوقعت هيج كلي عبدالله اتفاجأت لان اني محضرت الحفله اني هم مثلج هم مقصرت ويايه اسراء وخواتها لدرجة وصل الموضوع مره للطلاق بسببهم بس برد كلبي ماجد من اجه وظل يصيح هن كوليتهن لبدن حتى خالتي والبارحه عبدالله لعب طيح حظهم بس هم صلفات عيني وميتركوج صدكي سأليني اني.
ذهب: اني اتحمل بس ماجد ميتحمل هو بدون شي كلبه تعبان شلون يسوون هيج مفكروا يتأذه مااستحوا منه من امه من اي واحد؟ زينب: انت حساسه عيني شنو يتأذه هي متستحي مو اكلج صلفه ليش هو ماجد ميعرفها بعدين ليش يتحسون من امه هي امه تكدر تفتح حلكها وياهن؟ ذهب: انت لو شايفه البارحه حالته جان مكلتي هيج اني الكلبي صاحي ظل يوجعني عليه مااتوقعته لهدرجة راح ينقهر. اني ماجنت اريد اكوله عاللي صار هيج الله يسامحه عبدالله.
زينب: لا مو عبدالله كله اني من سمعت صوته عدنه عبالي انت كايلتله. ذهب: لاشلون اكوله وادري بي مراح يتحمل هيج خبر انت تدرين اني جنت حامل؟ زينب: لااا محد كلي لتكولين.. هزيت راسي اي. زينب: حبيبتي الله يعوض عليكم ان شاءالله لتضوجين. راحوا زينب وعبدالله حسيتهم محرجين رغم هم مالهم ذنب. ماجد: حبيبي شلونج؟ ذهب: الحمدلله. ماجد: عندج الم. ذهب: شويه.
كعد يمي خله راسي بحضنه كلي: من كلي ضياء اتخبلت يمكن بساعتها لو هالحقيره يمي جان طلعت روحها.. هذا شي بسيط من تصرفاتهم وياي حتى تعرفين ليش انفصلنه. ذهب: مردتك تعرف وانت هناك لان اعرف شكد جنت فرحان بالحمل وادري راح تضوج من تعرف باللي صار. ماجد: حتى لو مو حامل راح اضوج مو بس لان حامل انت زوجتي مااقبل احد يتعمد يهينج او يأذيج والطفل جنت فرحان بي لان راح يقربنه اكثر ويصير اكو شي اكبر واقوى يربطنه سوه.
ذهب: وعسى ان تحبوا شيئا وهو شر لكم. ماجد: ونعم بالله، الله يعوض علينه ان شاءالله اصلا انت طفلتي وبزونتي وحبيبتي ومرتي وكل شي. طاحت دموعي هو ضاج. ماجد: هذا اليضوجني اكثر البجي ادري بيج مقهوره بس انت بعدج زغيره راح تحملين مره ومرتين اني اصلا اريد( 6 ) اولاد و( ٤ ) بنات. ضحكت كتله: شدعوه بزونه صدك طلعت. ماجد: انت بزونتي الاليفه بس بزونه بجايه.
ذهب: بس اني مو عالحمل مقهوره اني مقهوره على نفسي حسيت نفسي هينه وعالفشله والاحراج كدام الناس الجانت موجوده كلها ضلت تباوع. ماجد: انت مسويتي شي حتى تستحين لو تنقهرين همه اللي غلطوا وهمه اللي فشلوا نفسهم كدام الناس لان تره محد قابل عاللي صار وشلون هينه مو رحت طيحتلج حظها. كعدت وبسته وحضنته.
تحميل محتوى الموضوع
عرض نسخة صالحة للطباعة
أرسل هذا الموضوع إلى صديق
[19]
الدعوات : 2قوة السمعة : 10
رواية صبرا يا قلبي