رواية صبرا يا قلبي الجزء الأول للكاتبة روز الفياض الفصل السابع عشر
كملت اخذتها ياسمين ونزلت اني رجعت للغرفه بالكوه دورت على باندج لو شاش الفها بلكي الالم يقل ماكو طلعت براسيتول اللي خلاه يمي من صخنت شربت اثنين بلكي الالم يخف باوعت للساعه ( ب7 ) ونص بعده مو هسه يجي طلعت روايه جنت اقراها مرات ظليت اقره بلكي يضيع الوقت.
حسيت نعست من الضوجه والملل ونمت غفيت حلمت اني امشي بحديقه حلوه وجبيره وكلها ورد الوان واشكال وماجد يمشي ورايه وفجأه طلعت مره مشفت وجها بس ظلت تجرني من ايدي واني اصرخ تجرني واني اصرخ. الى ان ماجد دفعها وجرني من ايدي وفزيت مرعوبه الغرفه ظلمه ماادري بيش الساعه. خفت حيل مكدرت ارجع انام وجسمي ظل يرجف من الخوف شكد اكره هيج احلام مرعبه.
لزمت تليفوني اتصلت بعمته اجت تركض خطيه حجيتلها الحلم ظلت تقره على راسي لحدما رجعت نمت. نمت والدموع بعيني من الخوف عبالك مو حلم حقيقه بعدين حسيت سمعت صوت فتحت عيوني سمعت صوت ماجد وعمته بغرفته يحجون بس مسمعت شي رجعت نمت ارتاحيت لان مو وحدي حسيت بالامان. بعدين حسيت بأيده يلعب بشعري فتحت عيوني كونه شفت ماجد كاعد يمي عالجربايه يباوعلي. رجعت غمضت عيوني طاحت دموعي بسكته.
ماجد: لو اعرف منين تجيبين كل هالدموع. محجيت مسحت دموعي واني مغمضه مفتحت عيوني. ماجد: شلون صارت رجلج؟ ذهب: الحمدلله. اتنهد هو كال: ليش مكلتي شي ليش محجيتي؟ كم مره اكولج من تحسين بشي كولي لتظلين ساكته. محجيت شي بس امسح بدموعي مقهوره وموجوعه ومااريد اكول موجوعه. ماجد: اكعدي شويه خل اشوفها. حاولت اكعد سحبت نفسي بدون كلام وخر هو اللحاف شاف رجلي كال: هاي مورمه تأذيج؟
بالبدايه هزيت راسي لا كرامتي مسمتحلي اعترف موجوعه بس وراها بدقيقه بجيت من الالم. بس لزمها اني صرخت. ماجد: زينه الحمدلله مو؟ مابيه شي مو؟ هذا اللي تعرفيه. من شوكت هيج تأذيج؟ ذهب: من الظهر ماجد: ليش محجيتي مو جنت الظهر هنا؟ اني عصبت وانقهرت يلومني وهو لاوي بوزه من الظهر لهسه. ذهب: مو انت اللي جريتني ومن كلت اخ زعلت ورحت وبعد مشفتك بعد شلون تريد احجيلك بعد؟ سكت هو واتنهد ودنك رجع كعد يمي.
ماجد: بعدين نحجي هسه كومي خل اساعدج لبسي نروح للمستشفى خلي الدكتور يشوفها ويكتبلج مسكن قوي. كومني اتسندت عليه لبست عباية جتف وشال وردي باوعلي كلي لا غيري الشال باوعتله هذا من كل عقله هسه وكته! نزعت الشال لبست واحد ثاني لونه بني باوعلي كلي: يالله امرنا لله كومي بعد شسوي كل الالوان مو زينه. استغفرت ربي وغلست واصلا شحجي نزلنه بالمصعد. كالت عمته اروح وياكم بس هو مقبل. جابلي الكرسي مال امه اكعد عليه ضحكت.
ماجدتكعدين لو اشيلج؟ كعدت لان يسويها ماعنده مانع. حسيت بكل تصرفاته حتى الغلط منها هو المنتصر هو صاحب الحق والمصيبه لحد الان كل الحق وياه مسوه شي يخليني اكدر اعاتبه لو مجرد عتب عادي. فحصها الدكتور طلع بس تمزق وكتبلي مسكنات وكلي دفيها ولتضغطين عليها بالمشي. رجعنه للبيت صبوا العشا والشوربه اللي سويتها ماجد شرب منها وباوعلي كلي: انتي سويتيها مو؟ هزيت راسي اي ماجد: طيبه عاشت ايدج. ذهب: بالعافيه.
كعدني عالجربايه انطاني الدوه كلي: شربيه كدامي بالله. شربته وكمت رحت للحمام هو ساعدني طلعت اريد ابدل بس هو كاعد واستحي. ماجد: تنامين؟ ذهب: لا اذا تريد انت روح نام انت تعبان اني مو نعسانه اليوم كله نايمه. ماجد: لا اليوم انام هنا بلكي ردتي شي بالليل لو ردتي ترحين للحمام راح انام عالقنفه. ذهب: زين اريد ابدل لعبت نفسي من ملابسي من المستشفى. فتح الكنتور كلي: شنو تردين تلبسين؟ ذهب: اي شي مريح يعني.
طلع هو دشداشه قصيره انطانياها. اشرتله يدور وجهه دار انطاني ظهره نزعت التيشيرت ولبست الدشداشه وبديت اسحب البيجامه من رجلي هو كعد راد يساعدني بس استحيت لان دشداشتي حيل قصيره ردت احجي واكوله ميحتاج بس مالحكت اعترض. ماجد: اششش ماكو اعتراض بعدين اني شفتج بالمرايه من نزعتي ماله داعي بعد تستحين. متت من المستحه يبووي. ذهب: تره حرام عليك هذا غش.
ماجد: ليش حرام؟ ووين الغش بالموضوع حلالي الله يكول حلالي بعد شلون حرام؟ وين الغش بالموضوع؟ ظليت افكر هذا شاف جسمي شكد فشله ظليت اصب عرك من المستحه وجماله يحجي ميسكت والله الولد ميخجلون. رجعت ليوره عالجربايه هو راح جاب لحافه ومخدته حتى ينام عالقنفه بس استحيت كلت هسه هو راح ينام هنا علمودي وهم ينام عالقنفه يعني اني صدك قليلة ادب. ذهب: القنفه حتأذي ظهرك. ماجد: يعني مسموح اليوم انام على الجربايه؟
ذهب: مسموح. اجه اتمدد عالجربايه اني طلعت الكتاب سويت نفسي اقره حتى ميبين علي التوتر. هو يباوعلي بعدين كعد. ماجد: حبيبي؟ ذهب: امم؟ ماجد: مو زعلانه مني؟ تره والله منتبهت. ذهب: ادري. ماجد: ماادري ليش عصبت وضجت. ذهب: مو مشكله حقك. ماجد: ادري بينه اتفاق واني مدالتزم بي بس ادري انت حبابه وطيوبه متزعلين. ذهب: مزعلانه. ماجد: خل نسولف شويه اذا مو نعسانه. خليت الكتاب باوعتله كتله: اوك.
ماجد: صار شهر تقريبا من اتزوجنه انت مرتاحه ويايه؟ ذهب: الحمدلله انت ممقصر ويايه بشي. ماجد: مندمانه؟ ذهب: ليش اندم انت خوش انسان ومتحملني وهاذي قسمة الله إلى بالنهايه كل شي قسمه ونصيب. لزم ايدي باسها وخله ايده على جتفي. ماجد: انت دواي مو كتلج حجيج حلو. زين احنه لازم نطور علاقتنه شوية. سكتت ادري هالموضوع ورايه ورايه وادري حقه محد يتحمل مثله بس ياريت هو اللي يطورها بدون ميحجي ويحرجني. ذهب: ان شاءالله.
ماجد: يعني احنه هسه تمام، بدليل ايدي على جتفج اتقبلتيها. ضحكت كتله: انت تتصور انه اني مااريد وضعنه يكون طبيعي بس انت شفت من ذيج المره شنو صار من.. ماجد: من البوسه قصدج؟ ذهب: ياااربييي ممكن شويه تخفف من هالجرأه بالحجي شويه تره راح تجلطني.
ماجد: صار. صار. حبيبي لتخلين هالموضوع يخوفج بالنهايه راح يصير كل شي طبيعي وميخوف وراح تتعودين مراح يغمى عليج. انت لانج زغيره وبرئيه ومتعرفين ماعندج تجارب يصير عندج هيج رد فعل طبيعي تره. سكتت هزيت راسي اي. ماجد: اني مااريد اغصبج على شي ولا اريد اخذ منج شي وانت متحبيني اني اريدج تحبيني مثل ما اني احبج. ذهب: ان شاءالله. ماجد: اكيد اتعودتي علي هالفتره بس المشاعر اللي اقصدها غير.
ذهب: اني مااعرف إلى احسه شنو بس اريد احجي بدون خجل هالمره وو.. سكتت. ماجد: بعدج مبديتي استحيتي هههه. ذهب: هههه لا خلص والله راح احجي بس لتضحكني ولتحرجني. سكت هو كلت: اني افرح يعني من تجي للبيت واحس من تطلع اضوج واحس بغربه عبالك بس انت اعرفك بالبيت وانتظر ترجع ويعجبني نكعد ونحجي سوه بكل شي يعني منخلي شي مضموم بس يعني انت تعرف اني مااعرف احجي.
هو ابتسم باس راسي كلي: لعلمج اني افرح اكثر منج من ارجع للبيت عبالك بالمدرسه ويكولون حله هههه. ضحكت رجع باس راسي واتنهد. ماجد: تدرين احس من اتزوجنه لحد الان من اروح للشغل اريد اخلص شغلي بسرعه حتى ارجع واشوفج اشتاقلج هوايه مااكدر اتخيل حياتي بدونج بعد، اتعودت على وجودج بعدين انت مو متعرفين تحجين بالعكس بس انت متعرفين تعبرين عن مشاعرج خجوله وهذا الخجل هو المخبلني.
ذهب: اني بصراحه ضميري يأنبني يعني على اسلوبي وياك وتصرفاتي وانقهر حيل من نفسي بس موبيدي والله ادري حرام علي وهذا حقك وانت مالك ذنب تتحمل بس مااعرف شسوي لدرجة كلبي يظل يوجعني عليك والله من كدما افكر. ماجد: حبيبي اسم الله عليج انت مالج ذنب واني مقدر هالشي ولتخافين كل شي بالبدايه صعب بس شويه شويه نمشي خطوات بسيطه لحد متتعودين وتتقبلين الفكره. ذهب: ان شاءالله. ماجد: يعني نبدي من اليوم بعد انام هنا؟
بليلتها منمت من المستحه مااعرف بس فرحانه هو يمي حسيت براحه وامان احس كلبه يدك حيل وجسمه حار وينام بدون قميص بس بالشورت ومقبل الا انام على ايده بس ظليت طول الليل افكر خاف راسي ثكيل على ايده خاف تأذه لحدما أذن الفجر بموبايله كعد هو شافني كاعده. ماجد: حبيبي شبيج موجوعه؟ ذهب: لا الحمدلله ماكو الم. ماجد: شنو منمتي؟ هزيت راسي لا. ماجد: ليش ضايقج وجودي يمج؟
ذهب: لا بسسس انت الا تريد انام على ايدك واني ظليت قلقه اخاف راسي ثكيل على ايدك وتتأذه. بالبداية صفن بوجهي. بعدين ضحك بصوت عالي من كل كلبه اني اباوعله وهو مستمر يضحك. ماجد: والله انت فقيره ههههههههههه بحياتي مشايف مثلج يعني منمتي الليل كل تفكرين بايدي خاف تتأذه من راسج ههههههههههههههه. ذهب: تره متضحك. ماجد: والله انت فعلا ذهب ههههههه حبيبي حساس.
باس راسي كلي: هالراس الحلو ميأذي لان كل الافكار البي حلوه وبرئية. ساعدني دخلت اتوضيت وطلعت صليت عالكرسي وهو راح اتوضا وصلى رجعنه نمنه ( ب9 ) كعد للشغل اني كعدت وياه بس مقبل كلي رجعي نامي نمت مكعدت الا من رجع من الشغل كعدني هو مرت يومين على هالحاله بعدين كتله: ماجد اريد اطلع اشتري شغلات للدوام مبقى شي الاسبوع الجاي ادوام.
ماجد: اي ان شاءالله شوفي خاله شوكت تكدر توديج وانطيني خبر بس شلون راح تكدرين تمشين بالسوك ورجلج بعدها. ذهب: مااطلع للسوك هي تجيبلي بس اريد اروح للصالون. ماجد: صار ان شاءالله اختاري يوم واوديج يمها بس بشرط ممنوع تباتين. ذهب: ان شاءالله. وراها اتسوكتلي ماما للدوام واخذتني للصالون ماجد وصلنه ورجعنه وعدت هالايام بهدوء ورجلي صارت احسن وباجر دوام ان شاءالله.
رواية صبرا يا قلبي الجزء الأول للكاتبة روز الفياض الفصل الثامن عشر
شفت الشله وكعدنه نسولف ونضحك والطلاب اتفاجأوا متزوجه وطبعا كلهم يعرفون ماجد هو زوجي لان هو اللي جان يسأل عني. ماجد وصلني الصبح وكلي: بالرجعه هم اجيلج انتظري بالكافتيريا. خلصت محاضرات هو خابر كال: راح اجي. ذهب: ماشي كعدت بالكافتيريا اني والبنات وفطوم لحد مااجه وكف السياره يم الكافتيريا ونزل سلم عالبنات ورحنه. ماجد: ها حبيبي شلون جان اليوم؟
ذهب: حلو هادئ محاضرات قليله ومن باجر نبدي التعب كتب واستنساخ وملازم. ماجد: اي شي متعرفيه سأليني يجوز اكدر افيدج صح القسم غير بس اكو معلومات مشتركه. ذهب: هو انت شوكت موجود بالبيت حتى اسألك. لو بالشغل لو من ترجع يادوب تاكل وترتاح شويه وتنام. ماجد: لا اخصصلج وقت اعتبريه درس خصوصي ليش تدفعين فلوس اني ادرس مجانا ههه. ذهب: اذا مجانا اوكي موافقه. ماجد: مجانا بدون فلوس بس الدفع حيكون بطرق اخرى. ذهب: شنو؟
لا عيني خلي تدريسك الك الف واحد ممكن يشرحلي مجانا بدون اي مقابل وهم مااريد. باوعلي بعصبيه ماجد: حتى بالشقا مااريد اسمع هالحجي مره ثانية تره مااقبل حتى لو بالضحك. مفهوم؟ ذهب: اعصابك شكلنه. رجعنه للبيت هو طول الطريق ساكت ومبين من وجهه ضايج. اني هم بقيت ساكتة مالي خلك مشكلة من لاشيء.
اتمنيت عندي الشجاعه واتجاوب وياه بس حيلي كله باد خدر جسمي حتى مااكدر احجي كوه فتحت عيوني وطاحت دمعه مسحها ردت احجي حاولت بس مكدرت هو مسح على راسي وكلي: لتخافين ولتحجين اتنفسي على كيفج براحتج اني وياج لتخافين. هدأت شويه هو حضني حيل باس خدي. ماجد: حبيبي ماكو شي يخوف لتخافين ولتتوترين خليج على راحتج متخجلين مني اني بالذات لان اني وانت واحد. هزيت راسي بس كلمة مكدرت احجي باس راسي.
ماجد: اذا كل مره هيج شلون شوكت اطلع فلوس التدريس هههه. ابتسمت اني ولا اراديا حضنته. حسيت براحه حسيت جنت محتاجه احضنه حتى احس بي وبوجوده ويايه وحتى اعبرله عن مشاعري بما انه الحجي مكدرت اطلعه واخجل احجي وياه بصراحة. هو هم حضني حيل وحسيته فرح لان حضنته وحس بشعوري. ماجد: اني يمج ووياج طول العمر ماورانه شي.
نمنه غفيت واني حاضنته المغرب اندك باب الغرفه كمزنه عمته فتحت الباب واني نايمه بحضن ماجد وماجد كالمعتاد بدون قميص بس بالشورت. عمته: نايمين لهسه شبيكم يمه اسم الله دنيا مغرب؟ ماجد يمه مرحت لشغلك شبيكم اليوم؟ ماجد: لا والله؟ بيش الساعه هسه؟ اخذتني نومه جنت تعبان. عمته: اي حقك تعبان ولكيت الراحه هههه حقك شلون متاخذك نومه هههههه. ماجد: اخ منج حاسده الميت على موتة الجمعه. ذهب: اسم الله.
عمته: اسم الله عليك هههه هاك استلم صدكت هسه تبجي اعرفك تتعمد تحجي هيج كدامها ههههه ياجمعه يمه كل ايامك جمعه من اتزوجت لهسه. التفت علي باوعلي وابتسم. ماجد: كله منج ممحصل بس الحجي من وراج. ذهب: ليش شعليه اني والله جنت نايمه. ماجد: اي شعليج جنتي نايمه. ذهب: ههههه صدك كله منج والله مسويتله شي جنت غافيه.
مرت الايام الاولى من الدوام نفس الروتين يوميه يوديني ويرجع ياخذني وبالبيت نفس الشي بس بدت الدراسه خفيفه فمن يطلع اخذ كتبي وملازمي وانزل يمهم ادرس مااحب ابقى وحدي فوك. راحت عمه حميده لبيت اخوها بقيت وحدي بالبيت الصبح بالكليه والظهر يرجع ياخذني نروح للبيت نصلي ونتغده وهو يروح ينام واني اغدي امه وانطيها دواها بعدين اروح ادرس شويه لو انام وبالليل اسوي عشا ويه البنات.
ذاك اليوم كال زوجة صديقه ضياء تريد تجي تباركلج لان جانت مسافره وتوها رجعت. العصر لبست فستان اخضر طويل ومخصروبي حزام اسود ولبست كعب اسود اجت البنيه اني نزلت يمها وكعدنه نسولف بالهول وماجد وزوجها بالديوانيه مال الرياجيل. نسرين: ضياء يكولي ماجد فرحان من تزوج لحد الان احسه مرتاح وسعيد وكل شويه كلي سألي ذهب شمسويتله حتى انت هم تسويلي ههههه.
ذهب: هههههه مسكين شمسويتله عادي يعني بس يمكن لان بده يحس بالاستقرار يعني؟ اتصل علي ماجد راح يرحون هو وضياء للمعرض. نسرين: وين راحوا؟ ذهب: مااعرف يكول رايحين لمعرض ماادري شنو. نسرين: ها اي للمعرض. ذهب: معرض شنو؟ نسرين: معرض السيارات مال السيد. توه فهمت شنو قصة المعرض واتذكرت الولد بشعبتي مره من كلي خل يتساهل ويانه لو اجينه اخذنه سياره. سولفنه وضحكنه محبوبه نسرين ودمها خفيف.
نسرين: تره ضياء ابن خالتي يصير موغريب واتزوجنه عن حب بس طبعا ساعات يكولي ساعة السوده الحبيتج بيها هههه اني عصبيه وقويه ماانطيه مجال يتنفس تره الرياجيل مالهم امان هههه بس طبعا مو ماجد مينطبق عليه هالحجي. ذهب: من زمان تعرفوه؟ نسرين: هو وضياء اصدقاء من ايام المدرسه بس اني وره متزوجت ضياء واجيت هنا عرفته بس ضياء يمدح بي ليل نهار ويحبه هوايه. ذهب: وماجد يحبه هوايه وهوايه يذكره بالخير.
شويه واندك الباب وسمعنه سلام وصوت نسوان دخلوا علينه فجأه كمت شفت خالته ووياها بنيه سمره وكصيره وشويه متروسه مو سمينه لابسه بنطرون اسود وبدي بني ساده وعبايتها بيدها. رحبت بيهم اني بس مابوستهم دخلوا للديوانيه اني كلت: لنسرين هاذي خالة ماجد. نسرين: اي اعرفها وهل يخفى القمر هههه وهاي بتها اسراء شكد عين صلفه المن جايه بالله اكيد حتى تشوفج. ذهب: يااسراء؟ يعني قصدج هاي طليقته؟! نسرين: اي عيني هي شكد صلفة.
باوعت لنسرين باستغراب شنو هالاسلوب نسرين ضحكت. ذهب: اي حبيبتي اني زوجته. اسراء: هاا عبالي مو انتي. ذهب: لا اني. اسراء: كالوا مرته حلوه بس شو شكلج عادي بس بيضا. نسرين ضحكت على جرأتها اني ابتسمت رغم حصرتني الضحكة بس لزمت نفسي. بس هم ضجت لان حسيتها تتعمد تغثني. ذهب: شكرا حبي من ذوقج. اسراء: ذوقي يخبل اصلا هنا عاد ضحكت كلت هاي شبيها عبالك خبلة حتى حجي متعرف تحجي.
واتذكرت ماجد من كلي مره من تشوفين اسراء راح تعرفين ليش احب حجيج. نسرين: اي اكيد طبعا. اسراء: هاج هاي جبتلج هديه مال الزواج ولو متأخرة. شمرت بحضي علاكه نايلون سودة. مفتحتها شلتها خليتها على جهه. ذهب: شكرا جزيلا كلفتي على نفسج ماله داعي. اسراء: لا شلون ماجد عزيز علي واعرف ذوقه شيحب شيكره محد يعرفه مثلي بعد تعرفين جنه متزوجين. ضجت من قلة ادبها وحسيتها مصختها بس هم سكتت. ذهب: اي صح.
اسراء: بس ديري بالج تره احنه ولدنه ميتزوجون غريبات الا من العائله علويات يعني خاف بعدين يتندم تعرفين ساعات الانسان يتصرف تصرفات بساعة غضب وبس يهدأ يتندم عليها يعني. ذهب: هاا؟ شكرا عالنصيحه بس وين العصبيه بالموضوع؟ وعلى شنو يتندم بلا زحمة؟ نسرين: اسم الله عيني ان شاء الله زواجة العمر بعدين غيرسنة يركض وراها بس حتى تحجي وياه ومتقبل بعد شلون يتندم وهو كوه حصلها.
نسرين الظاهر زوجها حاجيلها على قصتنه اني وماجد لذلك هبت للدفاع عني وخوش دفاع لو علي مااعرف ارد واحجي شي ويه هيجي ناس. اسراء: ماجد مستحيل يركض وره وحده لتحاولين تقنعيني اني زوجته واعرفه هن يركضن وراه من يعرفن عده فلوس. نسرين: زوجته السابقه عيني هاذي زوجته هسه اشو ماخذج الواهس وجنج ناسية انتو منفصلين صار سنين؟ استفزتني حيل بحجيها شنو قصدها اني ذابه نفسي عليه يعني؟ لو قبلت بي علمود فلوسه؟
ذهب: صحيح ميركض وره البنات هن يركضن وراه بس اني غير عن بقية البنات حبي اني مااركض وره احد همه يركضون وراي. نسرين: اي والله صحيح حقه وين شايف هيج عسل. طبعا انغثت من نسرين حيل لان نسرين متسكت الها واني هم فرحت بهجوم نسرين. اسراء: همه الرياجيل هيج دائما عدهم نزوات من يشوفون وحده بيضا وضعيفه يتخبلون عليها وبعدين يرجعون لعقلهم لان كلهم بالحقيقه يحبون المره السمينه.
نسرين: شجاب السمن والضعف عالموضوع بعدين بالعكس هسه كلها تدور رشاقه ميسموها ضعف وذهب ماشاءالله عارضة ازياء شكل وجسم على كولت ضياء يكول اكيد السيد يلبسها عباية ويمكن نقاب ميريد احد يشوفها. ضحكت على نسرين حسيتها حمت ههههه. اسراء: شدعوه اني مالبسني. نسرين: طبعا انت ميبلسج. حسيتها حتنجلط من نسرين هي تحجي ونسرين كاعدتلها بالمرصاد اخر شي معجبها كامت راحت وره امها بدون حتى متترخص.
ذهب: لا مو صاحيه مستحيل مااصدك اكو هيج بشرفدوه هاي شنو؟! نسرين: يمعوده انت مشايفه شي لهسه لتتهاونين وياها ضياء يكول راوتهم الويل هي وامها. ذهب: بس خاله مبينه مو من هالنوع يعني شفتها كم مره هادئة متحجي؟ نسرين: لاعيوني شنو مو من هالنوع لعد يانوع ليغرج سكوتها تره كل البله بيها نصها دفن. وراها بشويه رجعوا ماجد وضياء كمت اني لبست صايه وحجاب ونزلت سلمت على ضياء كعد شويه وكال: احنه نترخص.
ماجد: وين ابقوا اليوم اتعشوا ويانه محد اليوم بس اني وذهب بالبيت والعلويه تنام من وكت. نسرين: لاعيني لا بعد اسراء موجوده وامها كافي عليكم. ضياء خزرها هي سكتت وبعدين باوعتلي وضحكت اني ابتسمت وحصرتني الضحكة وظليت ساكته ماجد باوعلي. ماجد: خالتي هنا؟ هزيت راسي اي. ماجد: واسراء هم وياها؟ هزيت راسي اي. باوع على ضياء ورفع حواجبه. ضياء: يالله خويه احنه نترخص انت ادخل شوف خطارك الله يستر من هالزياره.
سلموا علينه ونسرين اخذت رقمي وراحوا. دخلنه للبيت ماجد ساكت راح كبل لغرفة امه اني وكفت بالهول نزعت الحجاب والصايه وبعدين دخلت يمهم ماجد كاعد يم امه ومدنك وخالته تسولف واسراء كاعده يمها حاطه رجل على رجل وفاتحه الحجاب وتلعب بشعرها. رحت كعدت يم ماجد هو راسا خله ايده على جتفي وباس راسي بعدين اخذ ايدي بايده وظل يلعب باصابعي.
اني محجيت ولا كلمه ولاماجد بقت خالته تحجي هي وبتها وماجد يهز براسه اخر شي كالت: يالله احنه نروح تأخرنه ماجد انت وصلنه خاله منكدر ناخذ تكسي ويايه بنيه شابه شلون اخذ تكسي بهالليل. ماجد: اي ان شاءالله.. حبيبي لبسي وتعالي ويانه. ذهب: لا خاله تبقى بحدها خطيه. ماجد: شويه تسليني بالطريق اضوج ارجع وحدي منتأخر.
حسيته يريد يغيضهم ويريد يبينلي انه ماكو اي شي باقي بينه وبينها رغم اني ماعندي شكوك بهالموضوع بس محبيت احرجه كدامهم فلبست الصايه والحجاب وهو فتحلي الباب اكعد يمه كدام اني استحيت من خالته شلون اكعد كدام وهي وره زحمة باوعتله هو فهم بس غلس واشرلي بعيونه اكعدي.
كعدت وهمه كعدوا وره هو شغل السياره وطلعنه بعدين شغل الاغاني واختار اغنيتي المفضله (اضعف كدامك) ولزم ايدي اني حسيت بالاحراج وبنفس الوقت ضجت فكرت ليش يريد يراويها يعني اذا كل شي منتهي بينهم ليش منطيها كل هالاهميه. طول الطريق احنه ساكتين محد حجه شي وصلنه لبيت عمه نزلوا ونزل ماجد وكف ينتظر لحد ميدخلون اني بقيت كاعده بالسياره.
انفتح الباب دارت خالته سلمت على ماجد وبوسته ومسلمت علي واسراء هم سلمت على ماجد: مع السلامه مجود تصبح على خير. هو مجاوبها صعد بالسياره رجعنه طول الطريق نفس الشي ساكتين احسه مرتبك واني مالي خلك احجي بمواضيع بيها مغثه وممكن تسبب تراجع بعلاقتنه فظليت ساكته ومغلسه بس جنت متعجبه عليهم شلون حكروني هي وبتها وبكل صلافه تكوله مجود حسيتها قليلة ادب.
وصلنه للبيت ونزلنه اني صعدت ابدل ملابسي دخلت للغرفه وقفلت الباب نزعت الكعب ونزعت الفستان عالسريع حتى انزل اسوي عشا لماجد لبست بيجامه بيضا وبيها ورد احمر وبعدني اريد البس التيشيرت ودخل ماجد من الباب الثاني اني راسا صرخت وخليت التيشيرت على جسمي هيج شلون ماكان ولزمته حيل. ذهب: اكو واحد يدخل لمكان بدون ميدك الباب هاي ثاني مره.
ماجد: اكيد؟ ذهب: اكيد. ماجد: يعني محجت شي من اجت مسوت شي؟ ذهب: لا شتسوي يعني؟ ثاني يوم من دوامت خلصت محاضراتي رحنه اني والشله للكافتيريا اللي نكعد بيها كل يوم ننتظر السيارات وره شويه اجوا علاء الولد اللي بشعبتنه هو وخطيبته كعدوا يمنه وراها اجه ماجد نزل سلم عليهم كلهم وكمت اني من صعدت بالسياره سويتلهم كلهم بأيدي باي.
رحنه طول الطريق ماجد ساكت ولاكلمه ولاحرف يوميه جان يسألني شلون الدوام شلون محاضراتج شنو الاخبار. ذهب: اليوم ساكت؟ مجاوبني ولاعبرني اصلا. ذهب: شبيك؟ ماكو جواب بس حسيته يريد ينفجر. سكتت ملحيت عليه وصلنه للبيت دخل السياره اريد انزل لزمني من ايدي. ماجد: سدي الباب. سديت باب السيارة بدون كلام والتفتت عليه. ماجد: اذا شفتج مره ثانيه مديتي ايدج وسلمتي على احد اكسرها. اني صفنت عبالي مسمعته عدل ردت استوعب شنو كال.
ذهب: شنو؟! ماجد: سمعتيني؟ ذهب: شلون؟ ماافهمت؟ شنو؟ ماجد: اللي سمعتيه وهالكلام مراح اعيده مره ثانيه. يحجي بعصبيه ولازم ايدي بكل قوته حسيت عظامي اتكسرت جوه ايده. ذهب: شنو الغلط اللي سويته مافهمت على منو مديت ايدي وسلمت اني مااسلم على احد بالايد؟ ماجد: وهاي الباي من كمنه قبل شويه شنو؟ ضحكت عبالي يتشاقه كتله: صدك تحجي؟ عالباي شنو بيها وعلى منو سلمت كلهم صديقاتي. ماجد: وعلاء؟ ذهب: علاء شنو؟
علاء زميلي واخويه وخطيبته صديقتي وجانت كاعدنه ويانه وانت شفتها وبغض النظر عن هالتفاصيل شنو بيها اذا سويت بأيدي باي! ضغط على ايدي اكثر. ماجد: انت صدك ماعندج احساس. اني انصدمت عبالك ضاربني كف. ذهب: مشكور انعم الله عليك.
حسيت غصيت وبس ارمش تطيح دموعي جريت ايدي منه بالكوه ونزلت صعدت فوك كبل لغرفتي وقفلت الباب ذبيت الكتب ونزعت الحجاب اختنكت متت مااحس اكو هوا اتذكرت الباب الثاني ركضت قفلته وذبيت نفسي عالجربايه ظليت يمكن ساعه كامله متمدده فاتحه السبلت ومااحس اكو هوا. اختنكت عبالك واحد لازمني من بلعومي ويعصره بكل قوته ودموعي مبطلت لحدما حسيت خلص دموعي نشفت مااكدر ابجي بعد هو مسمعته دك الباب او حاول يفتحه.
وراها نزلت اشوف العلويه خطيه مالها ذنب لكيتها تباوع عالتلفزيون شافتني اشرتلي تعالي. رحت يمها كتبت: (ماجد ليش راح مبقى عالغدا). اني ارتاحيت من عرفته رايح كتلها: عنده شغل بس اني وياج والبنات اليوم نتغدا. صبوا الغدا اني جنت صارلي كم يوم ماما تطبخ وتدزه إلى لان ماالحك اطبخ. كعدنه اني وياها والخدامات عالسفره وكلتها وشربتها جاي وانطيتها دواها ورحت جبت كتبي كعدت يمها ادرس الى ان نامت.
ياسمين وساره كالوا: احنه يريد يسوي كيك بس مايعرف. اني عندي دراسه بس كلت اكوم اسويلهم بكل الحالات جذب اليوم اكدر ادرس كلبي مشتعل نار من ماجد وايدي لحد الان تأذيني واثر اصابعه بعد طابع على ايدي عبالك مجويني مو لازمني بيده. كمت سويت كيك وخليته بالفرن وكعدت اتذكرت حجي ماجد كلما اتذكره تدمع عيوني بعدين كمت غسلت خفت يجي ويشوفني ابجي مااريد ابين ضعيفه كدامه.
وغضبا علي انقهر لان مااشوف اكو سبب حقيقي يستحق هالعصبية وهالحجي والتهديد. نعست باوعت للساعه ( ب5 ) كمت رحت نمت يم العلويه اخاف انام فوك وحدي. حلمت امشي بشارع محد بي بس اني وداير مدايري بزازين شكدددد واكو وحده بنية لابده وراي محتميه بيه من البزازين واني امشي وبيدي علم اخضر والبزازين تريد تهجم عليها بس خايفين مني وفزيت اصرخ مرعوبة.
انقهرت عليه بس مااريد اشوفه ولااريد احجي وياه. راح للحمام اني طلعت الاكل خليته بالمايكرو وصعدته عالطاوله ورجعت بفراشي هو اسمعه يصلي بغرفته وين جان لهسه ممصلي. خلص حسيته واكف يمي فوك راسي غلست. ماجد: يعني الله يقبل على الريوك الساعه( 7 ) الصبح ولهسه ( ب12 ) بالليل مماكل شي محد بكلبه رحمه محد يغص باللكمه علمودي. امري لله اروح اكل تفاحه خبزه اي شي.
طلع من الغرفه سمعت صوت الكرسي سحبه اكيد شاف العشا وكعد يتعشا. غمضت عيوني كلت خل انام قبل ميجي ويارب كون يروح ينام بغرفته احسن بس مانمت. وره شويه اجه اتمدد اني منطيته ظهري ومغمضه عيوني حسيته صار قريب اني يبست بمكاني دنك باس ايدي مكان الاثر مال ايده متحركت رجع باسه هم متحركت بس دمعت عيوني كال: انكسرت ايده ان شاءالله السواها.
اني اختنكت بدموعي ظلن مثل النهر ينزلن من كال هيج هو اتنهد حيل كال: مااريد ابرر ومااريد ادافع عن نفسي لان مراح تصدكيني بس والله احبج مثل محبتي لامي ماعندي بالدنيا بس هي وانت. ظليت ابجي هو حضني. ماجد: مااتحمل احد يباوعلج حتى لو ابوج الا اكول هيج مااتحمل. اني محجيت بس ابجي هو يتلمس ايدي مكان الاثر من يخلي ايده حاره وخرت ايده رجع خلاها وباس المكان. ماجد: تأذيج؟
سحبني بحضنه اني زدت بجي هو خله راسي بحضنه ويمسح على شعري. ماجد: كافي مو قصدي والله ماانتبهت من العصبيه. اني ابجي مو بسبب ايدي حجايته اذتني اكثر ليش ماعندي احساس. ماجد: زين بس كافي بجي شكد تبجين.
تحميل محتوى الموضوع
عرض نسخة صالحة للطباعة
أرسل هذا الموضوع إلى صديق
[16]
الدعوات : 2قوة السمعة : 10
رواية صبرا يا قلبي