رواية صبرا يا قلبي

رواية صبرا يا قلبي الجزء الأول للكاتبة روز الفياض الفصل الرابع عشر

ماجد: هذا ابو جبار اي شي تحتاجيه واني مموجود هو مثل ابوج كوليله ميقصر.
باسه وشبكه.
ابو جبار: بعيوني اكثر من بناتي انت مرت الغالي ابن الغالي.
ذهب: مشكور عمو الله ينطيك الصحه والعافيه.
باوع لماجد وماجد باوعله وابتسم.
ماجد: هاي اني هسه مكلت شي ابو جبار شهد من يمه بدون كلام.

اني مفهمت شي طلع ابو جبار وسد الباب طلعوا اهله هلهلو عماته واجوا عمامه مثل الاستقبال بيوم العقد جان بس هالمره ماكو ذبيحه اني باوعت للكاع اكو دم الظاهر ذبحوا قبل لنجي.
سلموا وسلمنه كللهم ماجد: ها خلصتوا؟
عبدالله: اي قبل شويه خلصنه بعد بس نغسل الحديقه حتى ينزل الدم بس انتظرناكم اول.
عمه ابو علي: جبير والله صار خير من الله كصصناه وخليناه بجياسه وجبه اخذها علي كال اكو ناس فقره يم المستشفى.

ووجبه انطيناها لابو جبار يتصرف بيها لاهله وجيرانه والباقي عمتك عليها نذر هي توزعها بيدها.
باوعلي عمه ابو علي كال: هذا اول نذر خلصنه منه.
ذهب: ينطيكم العافيه كواكم الله.
ضحك ماجد اني التفتت عليه ضجت شبي كلما حجيت شي ضحك.
عمه ابو علي: شوف الحجي المعدل ابوج خوش رجال وامج مخوش مره عاشت ايدهم على هالتربيه مو ذيج ام حلك الفاهي.
التفت على ماجد.
ماجد ضحك كله: لتذكرنه ورانه غدا.

ابو علي: عمو ماعدكم وحده بعد ممتزوجه تريد تتزوج.
ضحكت وماجد ضحك دخلنه للبيت كلهم مثل خلية النحل.
سلمت على العلويه وكعدت يمها هي لازمه ايدي تباوعلي اجت الخدامه تريد تكومها تخليها عالكرسي فكمت ساعدتها. التفتت لكيت ماجد واكف يباوعلي.
ماجد: متردين تصعدين تبدلين ملابسج.
هزيت راسي اي.
لزم ايدي وصعدنه دخلنه للغرفه حلوه ظليت واكفه واباوع هو كعد على قنفه بالغرفه وكلي: ليش واكفه؟
كعدت عالجربايه.

هو سد الباب اني باوعتله ظل واكف اني دنكت سويت نفسي يعني مخايفه وطبيعيه نزعت حذائي وخليت جنطتي عالميز وكفت انزع حجابي اشوفه بالمرايه واكف يباوعلي.
غلست نزعت حجابي وفتحت الكنتور طلعت الجلابيه اللي جابلياها هو من تركيا وطلعت وياها حجاب وشحاطه.
درت عليه ردت يحس ويطلع ماكو.
ذهب: اريد ابدل.
ماجد: اي نسيت اني هم اروح ابدل طلع من الباب البين الغرفتين غرفتي وغرفته رحت اني قفلته وراه.

وبدلت ملابسي وخليت كحل قوي شويه فوك عيوني ومسكارا دك الباب هو البين الغرفتين كمت فتحته باوعلي هو من فوك ليجوه غلست رحت كعدت عالطابوريه مشطت شعري هو واكف منتجي على حافة الباب ومتجتف ويباوعلي.
ذهب: شبيك؟
هز راسه ماكو شي.
ذهب: اذا اكو شي كول؟
ماجد: ماكو شي بس اريد استوعب انت هسه ابيتي مرتي على سنة الله ورسوله.
ذهب: معناها حقي اني اذا مستوعبت.
ماجد: انتي غير.
ذهب: شلون غير؟

ماجد: يعني اني ممستوعب لاني فرحان بس انت بالعكس.
حسيت بي ضايج بس ماادري ليش يعني هو جان قابل عالوضع وماعنده اعتراض هسه شتغير.
ذهب: ماجد من اجينه وانت مو طبيعي اذا تريد تكول شي كول مااتصور اكو شي بعد ممكن يصدمني ويفاجئني اكثر من اللي صار واحنه اتفقنه نكون صريحين.
ماجد: مو وكته هالحجي خل ننزل بالليل نحجي.
نزلنه لكيناهم ديصبون الاكل اني رحت للمطبخ وره عمته والبنات بس جنت ضايجه من كلام ماجد ماادري شبي.

مقبلوا اساعدهم بشي رحت كعدت يم امه جانت تصلي اني كعدت يمها خلصت صلاه اشرتلي اساعدها تنتجي ساعدتها كعدت عدل حجت شي بس مفهمته ضليت ساكته
رجعت عادت الحجي هم مفهمت كتلها اصيح للبنات يفهموني رحت صحت لرنا بت عم ماجد كتلها خاله تحاجيني بس ماافهم منها شي.
اجت حجت وياها.
دارت علي كلتلي: تكول شبيج ضايجه؟
ذهب: مابيه شي مو ضايجه.
اجيت كعدت يمها لزمت ايدها كتلها: مابيه شي.

حجت شي راحت رنا واجت جايبه ورقه وقلم انطتهم الها.
بدت تكتب وبعدين اشرتلي اقره.
وكفت يمها اقره إلى كاتبته: (ديري بالج على ماجد يحبج)
كتلها: لتخافين بعيوني اني هم احبه.
راحت رنا بقينه انه وامه اشرتلي صليتي كتلها اي.
كتبتلي: (شلونه ماجد وياج؟ )
ذهب: ماجد ورده ماكو مثله.
كتبت: (انت حلوه مثل ماكال حتى حجيج حلو).
اني استغربت كلت شنو قصتهم ويه حجيي
ذهب: حجيي عادي يعني بس ماادري ليش ماجد مستغرب.

دنكت تكتب هي تكتب بطئ بس زين نعمه عالاقل اكو طريقة للتواصل كتبت: انتي هادئه وحجيج قليل ومرتب اكبر من عمرج تربيتج حلوه.
ذهب: تسلمين خاله هذا من طيبج.
ابتسمت واتدنت عليه حسيتها تريد تبوسني اني دنكت بستها كتبت: ماجد عصبي بس طيب وحنون ويحبج.
ذهب: بالعكس حباب بس لان ممتعوده عليه بعدني واني هم احبه صدكي ماكو شي.

رفعت عينها هي عالباب اني التفتت لكيت ماجد واكف لابس دشداشه بيضا شكله عريس طالع ماادري اذا ينحسب عريس.
ماجد: ها شعدكم بدت الشكاوي والبجي.
ذهب: شكاوي شنو؟
كتبتله هي واشرتله اجه قره الكاتبته سكت باوعلي بعدين كال: اي طبعا اكو وحده متحب زوجها اني هم احبها انت تدرين؟
كتبتله شي رجع قره وكال: هي حساسه كل شويه تبجي حتى من الاخبار هسه تتعود عليج بعد متبجي هسه وضعج جديد عليها.

اني ساكته فهمت شنو كتبتله بس محجيت اجت الخدامه جابت الاكل لامه رفع هو ردن دشداشته وكعد كبالها وبده يوكلها بيده التفت علي كال: حبيبي كومي اتغدي اني اخلص واجي.
ذهب: لا انتظرك.
اباوعله شلون يوكلها عبالك طفله ويشربها لبن ويمسح حلكها ظليت افكرهيج تاليته الانسان مثل الطفل دمعت عيوني دنكت مردت ينتبهولي بس هي انتبهت اشرتله هو راسا كال: ليش تبجين؟
لزم ايدي سحبني كلي: تعالي كعدي بمكاني انت وكليها.

اني انرعبت خفت اوكلها وتغص لو يصير بيها شي بس مااكدر احجي.
خله الخاشوكه بأيدي وكلي: لتخافين وكليها حتى تتعودين عليها وتبطلين خوف ويجوز اني مسافر لو مشغول انت تقومين بهالمهمه.
اخذت الخاشوكه وبديت اوكلها واحس ايدي ترجف عبالك منطني مسؤولية طفل رضيع. وهو راح خلصت اكل اشرتلي بعد متريد مسحت حلكها بالكلينكس بعدين اشرتلي على دواها جبته الها طلعته اشرتلي شنو تشرب وره الغدا طلعته شربته وانطيتها مي شربت وراه.

سحبت الطاوله من كدامها وشلت الصينيه اوديها للمطبخ درت لكيت ماجد وعمته وعهود واكفين اباب المطبخ ويباوعولي.
استحيت اخذت الصينيه يمهم.
اتغدينه وشربنه جاي بعدين عهود هي وزوجها راحوا وبنات عمه رنا وحسناء هم راحو ويه ابوهم بقوا بس الولد وعمته حميده كامت هم راحت تتمدد اني اترخصت كمت رحت باوعت لامه نايمه وعمته دخلت للغرفه مال الخطار وسدت الباب اني هم صعدت لغرفتي نزعت الحجاب والجلابيه لبست بجامه بنفسجي.

وقفلت باب الغرفه عبالك راح يهجمون عليه.
بس من قفلته حسيت ارتاحيت واكدر انام بامان وراحه.
نمت واتغطيت وغفيت محسيت الا الباب اندك.
كعدت استغربت مكاني اول مره بعدين اتذكرت درت لكيت ماجد نايم عالقنفه شيسوي هذا هنا؟
اندك الباب ندهت ماجد كتله: الباب
كام هو فتح الباب الخدامه كالت خطار راح يجون فد شويه.

سد الباب اني واكفه باوعلي اتدنه خله ايده على كصتي كال: احسن جنج بس اذا حسيتي بردتي لو دختي احجي اني فد شويه اروح اجيبلج دوه خاف بالليل تصخنين.
ذهب: لا مابيه شي الحمدلله صرت زينه.
ماجد: ميخالف للاحتياط البارحه احتاريت شسوي ظليتي تهذين من الحراره.
ذهب: معقوله
ماجد: اكعدي شويه خل نحجي.
ذهب كعدت عالجربايه وهو كعد كبالي عالقنفه.

ماجد: ادري الوضع صعب وجديد عليج وادري اني ضغطت عليج هوايه بس الصدك مندمان على اي شي من اللي صار يمكن كلامي يضوجج بس هاذي الحقيقه.
ذهب: مفهمت شي شنو يعني المطلوب مني؟
ماجد: انت تضوجين مني؟
ذهب: لا طبعا لا. ليش اضوج منك انت يعني المفروض زوجي.
بلعت ريكي كوه وره هالحجايه.
ماجد: المفروض..

رجاءا لتخلين علاقتنه تكون جافه اتصرفي طبيعي سوي اللي يعجبج بالبيت بالنهاية انت ام البيت ومااريدج تشغلين نفسج بأمي ادري بيج متتحملين واني مااكدر اضغط عليج اكثر من هيج هي عدها خدامات يساعدوها هن موجودات هنا علمودها وعلمود يخدموها ويشوفون طلباتها.

ذهب: ان شاءالله ادري الوضع انت هم صعب يعني متزوج بس بالاسم بس شويه انطيني وقت بالنهايه احنه متزوجين اول وتالي بس كل الامور صارت بسرعه بدون مقدمات ولتتصور اني ندمانه على موافقتي اني استخاريت قبل لا اوافق الحمدلله ولتفكر بعد إلى صار صار وانتهى.
اتنهد هو وبعدين كال: اني يكيفني وجودج بالبيت حاليا انت وجودج بالبيت مصدر راحه للكل واني عد وعدي. ما المس شعره منج بدون رضاج.

راح للحمام واني رحت قفلت الباب بين الغرفتين لان ادري هسه ينطلي بالغرفه واني اريد ابدل.
فتحت الكنتور احتاريت شنو البس بالنهايه لبست فستان قصير جوه الركبه بنفسجي فاتح وبي شخابيط بالاسود.
ورفعت شعري ذيل حصان عالي وخليت كحل وحمره بنفسجي فاتح ولبست كعب اسود.
دك الباب البين الغرفتين كمت اني فتحته دخل هو وكف كبالي باوعلي كلي: راح تنزلين هيج؟
ذهب: اي ليش مو حلو؟
ماجد: ياريت..
ذهب: يعني شنو؟

ماجد: انت شكلج ناويه تقضين عليه.
ذهب: اسم الله شهالحجي.
ماجد: زين مادام هيج بدليه لبسي غيره البنفسجي مااريده.
ذهب: تحجي صدك؟
ماجد: اي طبعا دتشوفيني فرحان يعني؟
ذهب: لبست وخلصت وبآخر لحظه بدلي؟
رفع حاجبه معجبه كلامي، اشرتله عالباب يعني اطلع.
طلع وقفلت الباب.

هالمره كلت خليني انتقم منه شويه طلعت فستان مخطط خطوط عريضه ابيض واسود موديله لف وبي شريط احمر ينلف عالخصر والجتف نازل شوية الردن طويل وضيق والجتف يبقى طالع وعالصدر ورده حمره.
مسحت الحمره البنفسجي خليت لون احمر
ونزعت الحذاء الاسود لبست اسود وبي احمر.
وطلعت..
فتحت باب الغرفه لكيته هو وعمته كاعدين بالهول الفوك اللي كبال غرفتنه ويسولفون.

من شافوني حسيتهم صفنوا هو عبالك واحد جاب سطل مي بارد وذبه عليه حتى ميرمش وعمته كامت باستني: صلاوات على محمد لانحسدج يمه عيني بارده ان شاءالله خل انزل اطكطك الكم حرمل عيني بارده عليكم الله يهنيكم ان شاءالله.
نزلت هي اني بقيت واكفه منتظره يكلي يالله ننزل ماكال ولاحجه شي بس يباوعلي اخر شي استحيت مصخها كتله: ننزل؟
ماجد: لا.
ذهب: مو كالوا اجو خطار؟
ماجد: امم.
ذهب: يعني شنو ننزل لو اروح انزع؟

اشرلي كعدي يمي كعدت وجريت فستاني هو يباوعلي كلي: بس اريد اعرف انت منين مشتريه هاي الملابس؟
ذهب: ليش؟ من السوك.
ماجد: يعني السوك مابي غير هاللبس؟
ذهب: كل شي بي بس اني عروس يعني طبيعي يكون هذا لبسي. شبي؟
ماجد: نزعتج البنفسجي تلبسين هذا؟
ذهب: ادري شلبس كل الالوان انت متقبل عليها انطيني حل؟ البس اسود مثلا انطيني لون انت قابل عليه واني البسه؟
ماجد: هي بس الالوان؟ والموديلات؟

ذهب: تره انت دتبالغ يعني لبسي عادي بعدين اول وتالي اني راح ابقى كاعده يم النسوان انتو الرياجيل وحدكم.
لزم وجهي بيده وداره عليه اني خفت و حسيت بالتهديد.
ماجد: والحمره هاي ملكيتي غير هذا اللون؟
ذهب: مو هو الفستان بي احمر شنو اخلي يعني؟
ماجد: اي بس طوخ اللون لازم يكون فاتح.
ذهب: هو احمر مابي فاتح وطوخ.

لزم ايدي وكام سحبني للغرفه وسد الباب اني انخلست ظليت واكفه اتبسمرت لا احجي ولااتحرك حتى النفس بالكوه اجره خفت متت كلبي يدك بكل قوته.
باوعلي من فوك ليجوه بعدين باوع لحمرتي اني راساً سحبت كلينكس حتى امسحها وانقذ الموقف قبل لا يتهور ويمسحها هو.
ماجد: لا لا شيلي ايدج لتخربين الحمره.
ذهب: خل تخرب تولي انت مو كلت طوخ.
ماجد: صح طوخ لازم تنمسح.
ذهب: اي هسه امسحها.
هز راسه هو لا وخر ايدي و...

اني اصلا بس اتدنه حسيت كلبي اجه يوكف وبعد مدريت بالدنيا ماادري شصار بيه.
حسيت واحد يضربني على خدي فتحت عيوني ماجد كعدت باوعت شكو شصاير اني نايمه بملابسي هو لازم ايدي اتنهد من كعدت.
اتذكرت البوسه راسا سحبت ايدي وكشيت بمكاني متت من المستحه والاحراج هو وكف ودنك يريد يبوس راسي اني دفعته طلع وسد الباب وراه واني بقيت بمكاني متحنطه وصافنه الى ان نمت.

كعدت راسي يوجعني كمت غسلت وجهي وبدلت ملابسي حتى اصلي اندك الباب. خفت يكون ماجد ماادري شبيه وياه ومااعرف شلون اتصرف. صح هو غلطي اني تحديته يعني شتوقع؟
فتحت الباب طلعت عمته حميده كالت: ها يمه شبيج كال ماجد دختي.
ذهب: لايمه صرت زينه الحمدلله.
عمته: يالله زين منزلتي وتعبتي نفسج اجوا بس رياجيل اصدقاء ماجد. بس العلويه سالت عنج كللها ماجد مصخنه ونايمه.
ذهب: الحمدلله صرت زينه هسه اصلي وانزللها.

عمته: يالله لعد اني اروح اوزع اللحم حتى اوفي نذري مال زواج ماجد حبيبي.
ذهب: ينطيج العافيه.
عمته: الله يعافيج ان شاءالله زواجة العمر ان شاءالله الشهر الجاي نفرح بخبر حملج ان شاءالله.
ذهب: ياحمل على بختج عمه بعد وكت.
ضحكت هي وطلعت واني ظليت اصفن بمكاني ياحمل هذا هاي شلون اني ممفكره بهالتفاصيل عزا العزاج وهيبه.
كمت اتوضيت وصليت خلصت بقيت كاعده عالسجاده لزمت السبحه حتى ارتاح شويه.

انفتح الباب رفعت راسي ماجد غلست بقيت كاعده ولازمه السبحه.
دخل وسد الباب وكعد عالجربايه واني جنت بالكاع دنك باس راسي كال: تره اني بشر مو حجر يعني لازم تتوقعين لحظات ضعف مني والغلط تره غلطج انت المره الجايه لتخلين هيج مكياج طوخ وتلبسين فستان فاضح جسمج وتجين توكفين على راسي.
بعدين هي بوسه قابل شمسوين؟

باوعتله اني ومحاجيته كمت شلت السجاده وخليتها عالميز اليمه لزم ايدي اني سحبتها كتله: من هاللحظه علاقتنه حتكون رسميه اعتبر نفسك توك شفتني واني مااعرفك. لان انت الظاهر مو كد وعدك.
محجه شي ولا علق اتنهد وكام راح لغرفته.
اني لبست جلابيه شذري وطلعت وياها شال ونزلت جوه.
نزلت لكيت العلويه تصلي كعدت يمها خلصت اشرتلي اكعد بصفها كعدت اشرتلي على القلم والدفتر تريد تكتب انطيتها.
كتبت: (ماجد ضايج ليش؟ ).

ذهب: لا خاله متوهمه مو ضايج مابي شي.
كتبت: (تعرفين تقرين قران؟ )
ذهب: اي طبعا اعرف تردين اقرالج؟
هزت راسها اي اني كمت لفيت شالي عدل واخذت القران وكعدت بصفها اقره بصوت ناصي هي متمدده وتسمع انوب اني ظليت ابجي انقهرت على نفسي لا اني احبه ولا اني مااحبه ولااكدر اتقبله ومااعرف شلون اتصرف شكلي اني اللي ظالمته مو هو ظالمني.
معقوله اتعودت عليه لان اول رجل بحياتي لو شنو وضعي وشعوري تجاهه؟

يعني اليوم اول يوم بينه بس مااكدر اعتبره زوجي يمكن لان كل شي صار بسرعة بسرعة وركضة مالحكت استوعب ولالحكت اتعود عليه ولالحكت اتعرف عليه زين.
جنت اتمنى اتزوج شخص اكون اني اول وحده بحياته مثل ماهو اكيد اول رجل بحياتي بس دائما امنياتي ناقصه مو كامله حتى من تتحقق اتمنى احبه مثل مايحبني.

رواية صبرا يا قلبي الجزء الأول للكاتبة روز الفياض الفصل الخامس عشر

هي تأشرلي تسألني ليش ابجي.
لزمت ايدي تريد اكعدها كعدتها اخذت الدفتر والقلم كتبت: (صبري هو صعب وعصبي بس كلبه طيب).
كتلها: لتخافين مو منه ابجي هو مسوالي شي بالعكس بس اني ضايجه على اهلي.
رجعت اقرالها وهي تسمع حسيتها ارتاحت ونامت اني هم ارتاحيت كملت قراءه لنهاية السورة وكمت اريد اطلع شفته واكف يم الباب طلعت كال: مشكوره.
ذهب: على شنو؟
ماجد: اهتمامج بيها.
ذهب: اليوم اجيت ملحكت اهتم.

ماجد: حتى لو ساعه هم شكرا لان هي مو مسؤوليتج.
ذهب: لا مسؤوليتي بعدين اتزوجنه علمودها مو؟
ماجد: فد شويه راح يجون ولد عمي وزوجاتهم حتى يباركولنه روحي جهزي نفسج.
ذهب: عجيب قبل شويه جنت مقابل على لبسي ومكياجي هسه من لبست جلابيه روحي جهزي نفسج مااروح.
ماجد: زين بعد احسن اني اكيف تبقين بالجلابيه بس اني علمودج ملابسج مشتريتهم وتردين تلبسيهم مااريد احرمج.
ذهب: عود مااوصيك هالمره هم كلي روحي بدليهم.

ماجد: لا مادام راح تكعدون بحدكم ماكو مشكله.
صعدت للغرفه لبست بنطرون اوف وايت ووياه قميص وردي قصير ساده بس بي شرايط نازله من كل مكان والحفره مال الصدر مالته جبيره.
فتحت الباب اريد انزل لكيته جاي كلي: تعالي شوية
دخل للغرفه وخله الباب مفتوح اني بقيت واكفه بالباب خفت ادخل.
ماجد: دخلي شبيج مااسويلج شي.
دخلت على كيف وظليت واكفه يم الباب.

راح لغرفته وصاحلي اني رحت وكفت بالباب وطليت على غرفته حلوه هم عبالك مال عرايس فخمه وحلوه ومفروشه ومرتبه شكله شخص مرتب مو فوضوي.
هو فاتح الكنتور وره شويه سد الكنتور وطلع علبه خلاها عالطاوله باوعلي كلي: هاي الج.
ذهب: شنو هاي؟
ماجد: هدية صباحيتج.
ذهب: ماله داعي اني مجبتلك شي.
ماجد: اني كتلج انت وضعج غير، انت مرتي واني اريد اجيبلج هديه.
ظليت واكفه بالباب متحركت.
ذهب: انت هيج تخلي ضميري يأنبني اكثر.

ماجد: تره انت دتصعبين الامور علي وعليج اتصرفي طبيعي مطالب منج شي اكثر.
ذهب: انت تصعب الامور علي كلما اتقدم خطوه تتصرف تصرف تخليني اتراجع 10 خطوات بعدين ماله داعي كلما تشوف احد تكعد تضحك على حجيي وكل واحد تشوفه ماادري شتكله عل كلامي وتبقون تضحكون.

درت وجهي وطلعت من غرفته لان حصرتني البجيه صاح هو وراي اني مرديت سويت نفسي دخلت للحمام سديت باب الحمام وكلت بكلبي ياربي ليش مو مثل البنات اتزوج شخص اني اختاريته واحبه وليش مو مثل البنات اتعود بسرعه وانسى الخجل اللي مقيدني والخوف اللي شال تصرفاتي غسلت وجهي وطلعت لكيته واكف يبدل ملابسه بغرفتي انصدمت واستحيت دنكت ودرت وجهي وانطيته ظهري.
هو ضحك كال: تره بدلت قميصي مابيه مرض معدي حتى تخافين.

مرديت طلعت مني شهكه غصبن عني.
حسيته صار ورايه لزم ايدي.
ماجد: جنتي تبجين بالحمام؟
ذهب: لا
ماجد: عيني بعينج بالله.
مرفعت راسي حسيت جلدي قشعر لان ايده دافيه بس كلت لنفسي انجبي واتحملي.

ماجد: تره ابدا مو من طبعي احجي على احد من اهلي وانت هسه اهلي كل اهلي انت زوجتي مااقبل احد يحجي او يضحك عليج فما بالج اني شلون تتوقعين يعني اضحك على حجيج اني بالعكس كتلهم كلامها حلو ومرتب وتستخدم مفردات حلوه وكل حجيها دعاء ينطيك العافيه كواك الله جزاك الله خير حجيج مريح.
طاحت دموعي درت وجهي استحيت.
ماجد: حبيبي انت حساسه حيل اعرف بس لتظلميني تره اشور بيج لتنسين اني سيد هههههه.

باس راسي كلي: اذا فد يوم شفتي اسراء راح تعرفين معنى كلامي واستغراب الاهل من كلامج.
كعدني عالطابوريه وراح لغرفته جاب العلبه مال الهديه وانطانياها.
ماجد: فتحيها شوفيها علاقل يجوز متعجبج.
فتحتها بيها طقم ذهب حلو وزغير بس اني ضميري يأنبني وهو كلما جايه يصير احسن من الاول ويايه.
ليش اني هيج وياه يمكن مو بقصدي بس ماادري شبيه اتحسس من كل تصرفاته.
ذهب: شكرا جزيلا حلو.

ماجد: يعني عجبج اذا معجبج يتبدل مو مشكله الصايغ صديقي ومراح يخسرني هههه.
ذهب: لا بالعكس عاش ذوقك ومشكور حلو.
ماجد: يالله لبسيه.
لبست التراجي والخاتم هو لبسني السواره والعقد جان فعلا حلو عباره عن حيه زغيره ملتويه وعيونها لونهم احمر.
ماجد: بالعافيه.
ذهب: الله يعافيك مشكور.
ماجد: يالله ننزل كافي هسه يكولون مصخوها كل ميصعدون يظلون ساعتين فوك شوهتي سمعتي عالفاضي هههه.

نزلنه كعدنه جوه بالهول امه كعدت راح يمها كعد يسولف وياها عمته جانت تصلي الخدامات بالمطبخ كمت اني رحت يمهم كعدت على الطاوله كعدوا يمي.
سألتهم على اسمائهم كالت وحده اسمها ياسمين ووحده اسمها ساره سألتها انت مسلمه كالت: نعم اثنينه مسلم.
جانوا يجهزون العشا فكمت اني كتلها وخري اني اسوي لبست صدريه حتى لتتوصخ ملابسي وكعدت بمكانها اثرم البصل.

هي كامت تساعد الثانيه اني عيوني احسها عمت من البصل مااشوف عيوني تحركني وتصب بس كملت وكمت عالمغسله اغسل ايدي حتى اكدر امسح عيوني.
دخلت عمته شافتني صاحت: يمه بتي شبيها؟
اني كمزت ماادري شصاير ومااكدر امسح عيوني اشوف شكو ايدي بيها صابون اجه ماجد يركض.
ماجد: شبيكم شكو؟
عمته: كاعد انت مرتاح ومخليهم مستفردات بالبنيه تثرملهم بصل من اول يوم.

اني غسلت ومسحت عيوني بس تحركني كتلها: عمه على بختج وكفتي كلبي اني كتلهم اريد اسوي بدل مااني كاعده بدون فايده يعني ضجت مليت من الكعده ومااحب احد يخدمني ممتعوده.
ماجد: استغفر الله.
عمته: عيب يمه شلون تكومين من اول يوم تشتغلين مو عيب شتكول علينه الناس عدنه خدامتين ومن اول يوم شغلناج احنه منريد منج شغل.

جرتني من ايدي ودفعتني على ماجد كلتلي: هنا شغلج عليج بماجد الباقي كله لتعبين نفسج بي اهم شي هو مادام مرتاح وفرحان احنه شنريد اكثر.
اني باوعتله غمزلي كللها: اي والله عمه عفيه عليج خوفيها شويه خل تداريني تهتم بيه.
اني خزرته هو زاد: اكو وحده تستحي من رجلها ينطيها شي متاخذ منه لو تروح تبدل بالغرفه الثانيه.
غمزلي اني ظليت اباوعله واخزر بي هذا شيخربط عزا شيحجي شكد خبيث راح يفضحني كدام عمته صخام.

ماجد: ها اكمل لو كافي؟
عمته: لا مااصدك بيك انت صارلك سنين صايم على كيفك ويه بنيتي بعدها زغيره طبعا تستحي يالله اخذها هناك خل تكعد ترتاح راحت عيونها من البصل سوده عليه.
ذهب: اسم الله عليج عمه.
عمته: كله مستعجلين شعدكم وراكم العمر كل ان شاءالله بس اصبر عليها تستحي شتريدها تنزع كدامك بنيه مؤدبه تستحي مو مثل خليني ساكته احسن توني مصليه.
اني ابتسمت وباوعتله قصفت الجبهه.

ماجد: توج تكولين ماجد ونريد راحة ماجد هسه بس اشتكيت طلعت اني الغلطان صدك لو كالوا الشكوى لغير الله مذله.
عمته: اي ونعم بالله.
اني ضحكت وهي هم ضحكت كالت: يالله حبيبتي اجو الجماعه اسمع الباب انفتح نزعي صدريتج وروحي خلي عطر خاف ريحة البصل جلبت بملابسج.
صعدت خليت عطر وفتحت شعري ونزلت.

سلمت على البنات الجايين وكعدت سولفنه وضحكنه وحده منهم تصير زوجة ابن عمه الجبير عبدالله اسمها زينب سمينه حنطيه وقصيره بس تخرب من الضحك كله تضحك وتنكت طليقة ماجد تصير حماتها.
كل شويه وكالت: والله لو تشوفج فلانه تنتحر هي صارلها اسبوعين مصخنه من سمعت بالخطبه.
ظلينه نضحك ونسولف بعدين دخل ماجد اشرلي وصعد صعدت وراه.
ماجد: حبيبي غيري ملابسج الولد يردون يسلمون عليج وعلى امي واحتمال يبقون للعشا.

ذهب: ان شاءالله.
راح لغرفته اني لبست فستان جلد النمر طويل وعدل مابي ردن لبست فوكه ستره سوده وشال بيج.
دك الباب هو ودخل باوعلي ابتسم نزلنه كعدنه كل احنه بالهول حتى ولد عمه.
وصبوا عشا اتعشينه وشربوا جاي ماجد راح يم امه عشاها وانطاها الدوه وكعدها عالكرسي وجابها واجه كعد بصفي بس من كعد جني سمعته كال آخ.
التفتت عليه هو مدنك دنكت يم اذنه.
ذهب: اخذت دواك؟
رفع راسه وهزه لا.
ذهب: ليش؟
ماجد: نسيت.

ذهب: نسيت لو تغلس؟
كمت جبت الدوه انطيته وبقينه كاعدين نسولف بعدين راحوا ماجد طلع وراهم وعمته راحت تنام اجوا الخدامات اخذوا امه لفراشها.
اني صعدت بدلت ملابسي وجنت حيل نعسانه بس اتذكرت موبايلي مشايفته من البارحه خليته عالشحن ونمت.
الفجر كعدني ماجد: حبيبي يالله كومي صلاه.
ذهب: امم.
اني ممتعوده اكعد لصلاة الفجر اذا كاعده اصليها بس اذا نايمه من اكعد اصليها بس الظاهر هو متعود يصليها بوقتها.

رجعت نمت رجع كعدني بس نعساانه مااكدر اكوم اخر شي باسني من خدي خفت كعدت بسرعه.
صليت ورجعت نمت هو بغرفته يصلي خلص واجه خله ايده على كصتي كال: حبيبي كومي شربي دوه شويه دافيه.
ذهب: نعساانه اريد انام.
ماجد: شربي الدوه ونامي هذا خليته يمج.
نمت مشربته بس فجأه حسيت بردت حيل حسيت عبالك خاليني بالفريزر اسناني تصطك.
ذهب: ماجد. ماجد.

مااكدر اصيح من البرد ميسمعني ظليت ارجف ودموعي تصب حسيت باد حيلي كله سحبت اللحاف حيل غطيت راسي وطخ كلاص المي وكع وانكسر بس مكدرت اكوم.
اجه ماجد وخر اللحاف شافني ارجف راح جاب الغطا بغرفته واجه طفى السبالت وغطاني بس اني ارجف هو يدردم لان مشربت الدوه بس اني مااكدر ارد عليه اخر شي دخل ويايه جوه اللحاف وحضني حيل حتى ادفى استحيت بس بعدين حسيت دفيت ونمت.
مكعدت الا على صوت الباب يندك وماجد يكول: منو.

بس صوته قريب حيل عبالك يمي رفعت راسي لكيت نفسي بحضنه وهو نايم ومغمض اتحنطت.
ماجد: نامي اني رايح بس سمعي الكلام مره ثانيه وشربي دواج.
فتح عيونه باوعلي ابتسم لان راسي جان بحضنه فشعري منكوش عدل شعري بيده.
ماجد: آخ منج اني سامع اليتزوج يرتاح اني اتزوجت حتى اشتغل بالليل ممرضه.
راح للحمام اني اتغطيت وظليت لابده من الفشله جوه اللحاف واضحك على حجيه.

سمعت الباب انفتح وانطبك كلت طلع كمت رحت باوعت لنفسي بالمرايه شعري يضحك ووجهي احمر رحت للحمام طلعت نزعت البيجامه لبست بنطرون جينز وقميص ابيض نص ردن جنت اسد الدكم ودخل هو من غرفته اني راسا شبكت نفسي.
ذهب: شتسوي هنا ليش متدك الباب قبل لتدخل؟
ماجد: عبالي بعدج نايمه ردت اجي اكمل علاج ههههه.
استحيت من حجيه مرديت هو طبعا يتشاقه لان جان مبدل يريد يطلع.

رواية صبرا يا قلبي الجزء الأول للكاتبة روز الفياض الفصل السادس عشر

ماجد: حبيبي اني طالع تردين شي؟
هزيت راسي لا: سلامتك
ماجد: الله يسلمج.
اذا ردتي شي اتصلي او كولي لامي حميده زين؟
اني مااتأخر ساعه ان شاءالله وراجع.
ذهب: ان شاءالله.
نزل اني هم سديت الدكم مال قميصي ونزلت لكيته بعده جوه يتريك اجيت سلمت وكعدت عالسفره وهو اشرلي اتريكي بديت اكل هو كام كال مستعجل.
عمته: كمل ريوكك يوم وين رايح؟
ماجد: يمه هم يالله على منجيبه ونذبحه يحتاجله وقت.

معناها رايح يجيب ذبيحه كام طلع كمت وراه لباب المطبخ.
ماجد: يالله حبيبي رايح.
ذهب: طريق السلامه الله وياك.
التفت علي باوعلي كال اي كثري كثري.
ضحكت هو هم ضحك وراح.
الظهر صعدت صليت وسمعت صوت ماجد صعد دكيت الباب ماكو صوت كلت يمكن بالحمام رجعت كعدت الجربايه اتذكرت ماما خطيه محاجيه وياها وهي اكيد تستحي تتصل بيه لو تجي الا يفوت كم يوم لزمت تليفوني واتصلت بيها.
ماما: الو ها ماما حبيبتي.

ذهب: الو ماما حبيبتي مشتاقتلج.
راسأ بجيت انقهرت عليها وحشه البيت هسه وحدها.
وخرت التليفون مردتها تسمعني ابجي رجعته على اذني ظلت تسألني شلونج وشخبارج وشلونهم وياج و توصيني على ماجد وعلى امه كتلها: اني زينه ماما لايظل بالج وماجد خوش انسان وحباب
ظلت تلح: ديري بالج عليه خوش ولد ومريض لتأذيه وتضوجيه. ديري بالج عليه ماما.

سديته ورحت للحمام اختنكت سديت الباب وكعدت بجيت لحدما ارتاحيت ياربي ضميري يأنبني عليه وماما زادت الطين بله كل شويه وكالت مريض ديري بالج عليه.
ارتاحيت شوية بعدما بجيت وغسلت وجهي وطلعت هو دخل من غرفته كتله: تحتاج شي مني لو انزل اساعدهم؟
ماجد: لا كعدي شويه، صليتي؟
ذهب: اي الحمدلله.
كعدت عالجربايه هو كعد يمي باوعلي
ماجد: تره مو زين البجي بالحمام.
طاحت دموعي درت وجهي.
ماجد: بالليل اوديج روحي شوفيهم.
ذهب: منو؟

ماجد: امج وابوج مو جنتي تحجين ويه امج؟
سكتت يعني سمعني.
ذهب: ميحتاج هي باجر تجي ان شاءالله.
ماجد: زين ليش البجي مادام راح تجي تره باي وقت تردين اوديج ماكو مشكله.
ذهب: اعرف بس اشتاقيتلها وشايله همها بقت بحدها بالبيت عالاقل وجودي جان مونسهم اكو حس وياهم بالبيت.
ماجد: حبيبي يتعودون اول وتالي انت تتزوجين ويتعودون بدونج.

وهسه فرصتهم يسافرون يطلعون براحتهم ماكو التزام وهذا بيتج يعني بيتهم باي وقت اتصلي بيهم يجون يمنه او احنه نروحلهم ماكو مشكله.
هزيت راسي اي حسيت نفسي طفله زغيره بايته بمكان غريب بدون امي وخايفه ومشتاقلتها واريد احس بالامان وياها.
ذهب: شربت دواك؟
ماجد: انت دواي.
باس ايدي.
ذهب: يعني مشربته؟
اتنهد كال: لا.
ذهب: عود ليش متشرب علاجك؟
ماجد: انساه.
ذهب: زين شنو يسوي هالعلاج بالضبط؟

ماجد: ميسوي مجرد مسكن وينظم ضخ الدم.
ذهب: ينظم ضخ الدم؟ وميسوي شي؟ ماشاءالله.
ماجد: لتخافين دكتوره مااموت هسه توني متزوج ههه.
ذهب: اسم الله شهالحجي..
عمرك طويل ان شاءالله.
ماجد: آآآخ كل شي حلو بيج بس لو الله يهديج وتبطلين بجي وتحبيني.
ضحكت من كل كلبي وهو هم ضحك.
ومرت الايام الباقيه نفس الشي خطار وناس وبقى كم يوم عالدوام واني لهسه ممجهزه شي.

ماجد رجع للشغل الصبح يطلع الساعه ( 9 ) يروح للشركه ويرجع (ب2 ) يتغدا وينام ويرجع يطلع ( ب4 ) وميرجع للساعه ( 9 ) بالليل.

اني الصبح اكعد وياه وانزل وياه عالريوك واجهز ملابسه وحذائه بعدين يروح ارجع انام لان ماكو شي اسويه اكعد ( ب11) انزل للمطبخ ويه عمه حميدة اساعدها بالطبخ وانوب اصلي واقره لامه قران وابقى كاعده بالهول انتظره يجي يصعد اصعد وراه يسبح ويصلي انتظره ننزل نتغده يشربون جاي وانوب يرحون ينامون هو طبعا تعبان ودايخ من الشغل بس يخلي راسه ينام.

اني لو انام لو اقره كتاب لو الهي نفسي بشي لحد ميكعد انزل اسويله جاي يروح اسبح وابدل واكعد اخاف احد يجي يبارك وبالليل اساعدهم بالعشا ميقبلون بس الهي نفسي نتعشى ونكعد شويه وياهم بعدين كلها تنام وهكذا مرت الايام.
هذا الروتين اليومي وهو بالدوام.

حتى منطلع لمكان لان ناس تجي وهو طول الوقت مشغول ويرجع وقته ضيق واني استحي اكله نطلع مالي عين اتشرط واتدلع ولو هو مو دلع لان فعلا ضوجه وملل اذا هو مو موجود اضوج صح كلامنه قليل بس ارتاح من يجي حتى لو ميحجي.
اجه ماجد من الشغل الظهر بيده علاكه سلم وصعد فوك اني صعدت وراه لكيته بغرفتي ينزع قميصه درت وجهي وكعدت عالجربايه.
ماجد: شوفي شنو بالعلاكه.

كمت فتحتها بيها صور المهر مال الاستوديو والفيديو كعدت اتفرج عليهم الصور حلوه بس استحيت اكول حلوات لان اللقطات ماشاءالله.
ماجد: شنو رأيج؟
ذهب: زينات.
ماجد: شنو زينات بالله خل اشوف وياج؟
كعد يمي يباوع ويمدح بالصور.
ماجد: ماكو شي زين اذا العروس تخبل والعريس يخبل شتطلع الصور طبعا تخبل وخصوصا اخر لقطه لو يصير كل يوم اسوي مهر حتى اعيدها.

غلست واخذت الصور من ايده اريد انزلهم يشوفوهم سحبني من ايدي لحضنه اني حسيت رجلي التوت صحت: آآخ آآخ.
هو رأسا عافني وكام راح لغرفته اني وكعت عالجربايه، بقيت بمكاني حيل اذتني رجلي.
وخرت الصور ورجعت اسحب نفسي عالجربايه سحب من الالم مكدرت ادوس عليها ولا اصيح عليه عزت عليه نفسي حيل وانقهرت قابل شكتله حتى يزعل!
طبعا هو فهم هذا رفض بدون حتى ميسالني شبيج.

صلى ونزل وره شويه اجت الخدامه دكت الباب كتلها دخلي كالت: بابا ماجد يكول تعال تغدا.
ذهب: شكرا مااريد غدا اريد انام.
راحت اني ظليت اتكلب بالفراش بلكي انام قبل ميصعد لان اذا يحجي اي شي راح ابجي اعرف روحي بجاية.
مكدرت انام من الوجع حسيت رجلي مكسورة بس اتحملت الالم.
وراها حسيت باب غرفته انفتح وانطبك حيل انعصر كلبي يعني رجع لغرفته من الباب الثاني مو مثل كل مره يدخل من غرفتي حتى عالاقل يطل علي.

طلعت التليفون حجيت عالواتس ويه فطوم وحجيتلها وضعنه.
فاطمه: والله اثنينكم تكسرون الخاطر حبيبتي انت دومج مو محظوظه وهو هم مسكين ديحاول يريحج ويتقربلج بكل الطرق بس تره هو معذور يعني حقه يمكن انجرح من تصرفج صحيح هو انت مجنتي قاصده اللي فهمه بس انت عندج سوابق بالرفض طبيعي يفهم هيج هو رجال ذهب والرجال مو مثل المره اكيد كرامته انجرحت.

ذهب: صح بس عالاقل يعاتبني يصيح علي ميخالف قابله بس ميخليني هيج يزعل وميحجي ويايه ولايريد يشوفني يعني اني منو إلى بالبيت غيره هو.
فاطمه: ميخالف حبي خلي نفسج بمكانه.
ذهب: ادري اعرف كل الغلط مني بس هو اصلا من يتقرب مني اصخن واتمرض وادوخ وماادري شيصير بحالي والله العظيم اتخربط تدرين لو لا يعني من تزوجنه لهسه مصاير شي بيناتنه بس بوسه مره وحده وطبعا ماادري شصار بيه.

فاطمه: اكولج اخاف هاي طليقته مسويتلج شي حتى متحبيه؟
ذهب: لا استغفر الله شهالحجي حرام من زماان منفصلين شذكرها هسه.
من حجيت ويه فطوم حسيت ارتاحيت وهدأت وراها نمت مكعدت الا المغرب هو طالع اجت عمته حميده: ها يوم شبيج اليوم لانزلتي لا اتغديتي؟
ذهب: هلو عمه حبيبتي مابيه شي بس مااشتهي مجوعانه ونعست ونمت.
عمته: خليتيه اليوم بحده عالغدا فاهي حتى مااكل لكمتين وكال مااشتهي العصر طلع حتى الجاي مشربه.

ذهب: هسه اغسل واصلي وانزل يمكم.
عمته: اي بلكي تسوينه شوربه مثل اللي سويتيها بالمستشفى ذيج المره ههههه.
ذهب: صار. ان شاءالله من عيوني تدللين بستها وكمت سحبت نفسي عالجربايه على كيف وهي صاحت: شبيج شبيها رجلج ضربج اذاج اعرفه عصبي يسويها.
اني صفنت شبيها هيج انخبصت اذا هو مكلف نفسه ومد راسه من الباب يشوفني.
ذهب: لاماكو شي عمه رجلي تأذيني شويه.
عمته: شتأذيج شويه وهي مورمه شسوالج كولي؟

ذهب: شبيج عمه؟ على كيفج مابيه شي محد سوالي شي تره رجلي التوت بحدها.
عمته: عرفت اكو شي منزلتي تغديتي ولا نزلتي العصر وهو مااكل وطلع ضايج.
ذهب: لا والله اصلاً هو ميعرف تره مشاف رجلي ولايدري بالموضوع صدكي ماله علاقه مسوالي شي والله.
عمته: شنو مشافج شلون يعني مكمتي كدامه متحركتي مسألج ليش منزلتي ليش نايمه شنو هذا شبي؟
لتقنعيني ماكو شي هسه اخابره اريد افهم شبي وياج ليش هيج يتصرف؟

كتلها: عمه والله ماكو شي وهو ميدري وماله علاقه ماله داعي تتصلين اول وتالي هو راح يرجع ويشوف وشيريد يسويلي هي هيج هيج راح تبقى تأذيني كم يوم بعدين تصير زينه.
عمته: اني حاسه اكو شي بيناتكم ومااريد اتدخل ولا اريد احشر نفسي البينكم لازم تحلوه بينكم بس والله اذا طلع مسويلج شي وهاي الدموع بعيونج منه ميلوم الا نفسه وازعل عليج تره اذا يأذيج ومتحجين.
ذهب: صار اذا اذاني اكولج بس مسوالي شي والله العظيم صدكي.

ساعدتني دخلت للحمام غسلت واتوضيت وكعدت عالكرسي صليت وبجيت بالصلاه غصباً عني هي كاعده منتظرتني اخلص.
خلصت كالت: ماراح اسألج على هاي الدموع هسه بس تره اني امج هنا ومحد ينصحج مثلي اريد مصلحتج لان مصلحتج من مصلحت ماجد وماجد ابني الله شاهد شكد حبيتج اي شي تردين بي نصيحه او تردين تحجين تشتكين اني امج باي وقت حتى لو نص الليل كعديني لو تعاي نامي يمي.
ذهب: ان شاءالله.

عمته: تره اتشاقه وين تجين تنامين يمي وتخلين ماجد بحده ههههه سوده عليه اليوم انت متغديتي هو مااكل.
المهم انت هسه ارتاحي واني اصعدلج العشا.
ذهب: لا هسه انزل وياج اسويلكم شوربه.
عمته: لا يمه وين تنزلين وبعدين تصعدين علمود الشوربه وانت رجلج توجعج.
ذهب: زين هنا اسويها بالمطبخ الفوك بس خل ياسمين تصعد اعلمها وهي تسوي.

اجت ياسمين ساعدتني اروح للمطبخ طبعا رجلي مااكدر ادوس عليها تموتني من الالم بس اني متحمله واتسند على كرسي سوت ياسمين الشوربه. اني اكوللها سوي هيج وهيج وهي تسوي ومصبره نفسي عالالم كوه مااكدر اشتكي عمته خاف تسوي مشكله ولااكدر اتصل بي وحتى لو اجه هم مراح اكوله مدام هو هيج رده مراح ادافع عن نفسي ولا ابررله خلي براحته.